Mark4
1พะอ๋งตั๋นอยู่ฮิมตะเลสาบแฮ๋ม มีคนจะนักมาห้อมล้อมพะอ๋ง พะอ๋งจึงลงไป๋นั่งอยู่ในเฮอแล้วลอยอยู่ข้างๆเพิ่ง ส่วนปะชาชนยืนฟังอยู่ฮิมเพิ่ง2พะเยซูใจ๋เรื่องเปรียบเทียบสอนหมู่เปิ้นหลายอย่าง พะอ๋งเล่าฮื๊อฟังว่า3“ฟังฮื๊อดีๆมีจาวนาคนนึ่งออกไป๋หว่านข้าว4ขณะตี้หว่านอยู่อั่น บางเมล็ดก็ต๋กบนตางเตียว นกก็มาจิกกิ๋นเมิ๊อด5บางเมล็ดก็ต๋กบนดินตี้ชั้นล่างเป๋นหิน มีดินบะนัก เมล็ดอั่นก็งอกขึ้นอย่างรวดเร็วแต่เฮื่องจากมีดินบะลึก6ตอนดวงอาติ๊ดขึ้นพืชอั่นถูกแดดเผาและเฮื่องจากมีรากตื้นๆพืชอั่นก็แห้งต๋ายไป๋7บางเมล็ดต๋กในพงหนาม หนามก็งอกขึ้นมาปกกุมพืชอั่นฮื็อจึงบะออกดอกออกผล8และบางเมล็ดต๋กลงในดินดีก็เจริญงอกงามขึ้นมาเกิดดอกออกผลสามซิบเท่าบ้าง ห๋กซิบเท่าบ้าง และนึ่งร้อยเท่าบ้าง”9แล้วพะอ๋งก็อู้ว่า “ไผมีหูก็ฟังฮื็อฮื๊อดี”10ต่อมาตอนพะเยซูอยู่คนเดียว ลูกซิดทั้งซิบสองคนกับคนตี้ติ๊ดต๋ามก็มาซอยตึ๋งความหมายของเรื่องเปรียบเทียบหมู่อั่น11พะอ๋งอู้ว่า “มีแต่โบ๋สูเท่าอั่นตี้เฮาจะอู้ฮื๊อฮู๊เรื่องความฮับของเมิงของพะเจ๊านี้ ส่วนหมู่คนนอกอั่นเฮาจะใจ๋แต่เรื่องเปรียบเทียบสอน12ฮื๊อว่า‘หมู่เปิ้นจะพ้อแล้วพ้อแฮ๋ม แต่ก็จะบะหันฟังแล้วฟังแฮ๋ม แต่ก็จะบะเข้าใจ๋ เพาะว่าถ้าเปิ้นหันและเข้าใจ๋เปิ้นจะปิ๊กมาหาพะเจ๊าและได้ฮับการยกโต้ด’”13แล้วพะอ๋งซอยหมู่เปิ้นว่า “สูยังบะเข้าใจ๋เรื่องเปรียบเทียบเรื่องนี้แฮ๋มหรือ แล้วสูจะไป๋เข้าใจ๋เรื่องเปรียบเทียบอื่นๆได้จะได๋14จาวนาคนนี้หว่านถ้อยคำของพะจ้าว15เมล็ดตี้ต๋กลงบนตางหนตางก็อย่างเดียวกับคนตี้ฟังถ้อยคำของพะจ้าว แต่ซาตานมาแย่งเอาถ้อยคำตี้ได้หว่านฮื็อในหมู่เปิ้นอั่นไป๋ท้นเต้า16ส่วนเมล็ดตี้ต๋กลงบนดินตื้นๆตี้มีหินอยู่ข้างล่าง ก็อย่างเดียวกับคนตี้ฟังถ้อยคำอั่น แล้วรีบฮับฮื็อตวยความดีอ๊กดีใจ๋17แต่รากบะลึกจึงบะทนทาน ตอนเจอกับความตุ๊กข์เดือดฮ้อนหรือถูกข่มเหงเพาะว่าเจื้อในถ้อยคำอั่น เปิ้นก็เลิกเจื้อท้นเต้า18เมล็ดตี้ต๋กลงในพงหนามก็อย่างเดียวกับคนตี้ฟังถ้อยคำแล้ว19แต่ยังเป๋นห่วงกังวลเกี่ยวกับจีวิดในโลกนี้ หลงไหลอยู่กับทรัพย์สมบัติและความโลภตี้บะสิ้นซุ๊ด สิ่งจะหนี้มากุมถ้อยคำฮื็อลุบะเกิดผล20เมล็ดตี้ต๋กในดินดี ก็อย่างเดียวกับคนตี้ฟังถ้อยคำแล้วฮับฮื็อ และออกดอกออกผล สามซิบเท่าบ้าง ห๋กซิบเท่าบ้าง และนึ่งร้อยเท่าบ้าง”21แล้วพะอ๋งอู้กับหมู่เปิ้นว่า “มีไผบ้างตี้จุดโกมแล้วเอาไป๋ฮื็อใต้ถังหรือใต้เตียง เปิ้นจุดโกมเอาฮื็อบนเชิงโกมบะใช่หรือ22สิงใดตี้แอบซ่อนอยู่จะถูกเปิดโปง และความฮับกุ๊กอย่างจะถูกเปิดเผยเมิ๊อด23ไผมีหูก็ฟังฮื็อฮื๊อดี”24พะอ๋งอู้กับหมู่เปิ้นแฮ๋มว่า “คึดฮื๊อดีๆในสิ่งตี้สูได้ฟัง ยิ่งเยี๊ยะจะอี้นักเท่าได๋ ก็จะยิ่งเข้าใจ๋นักขึ้นเต้าอั่น และจะได้นักกว่าอั่นจะนัก25คนตี้เข้าใจ๋อยู่แล้วก็จะเข้าใจ๋นักยิ่งขึ้น ส่วนคนตี้บะเข้าใจ๋แล้วยังบะสนใจ๋ฟังแฮ๋ม แม้สิ่งตี้เปิ้นเข้าใจ๋ก็จะหายไป๋ตวย”26พะอ๋งอู้ต่อว่า “เมิงของพะเจ๊าเปรียบอย่างเดียวกับป้อจายคนนึ่งตี้หว่านข้าวลงบนดิน27บะว่าป้อจายคนอั่นจะลับหรือตื่น พืชอั่นก็แต๋กหน่อและเจริญงอกงามขึ้นเรื่อยๆตุ๊กวันตุ๊กคืน โดยตี้ป้อจายคนนี้บะฮู๊ว่ามันงอกขึ้นมาได้จะได๋28เพาะว่าดินเป๋นตั๋วตี้เยี๊ยะฮื๊อเมล็ดพืชอั่นงอกขึ้นเป๋นลำต้น เริ่มจากเก๊าอ่อนก่อนแล้วต่อมาก็เป๋นรวง และมีเมล็ดเต็มรวง29ตอนเมล็ดสุกเหลืองอร่ามจาวนาก็รีบเอาเคียวมาเกี่ยวพืชท้นเต้า เพาะว่าตึ๋งฤดูเก็บเกี่ยวแล้ว”30แล้วพะอ๋งก็ซอยว่า “จะเปรียบเทียบเมิงของพะเจ๊าอย่างเดียวกับไอยั๋งดี เปรียบเทียบกับเรื่องบะไอยั๋งฮื๊อฟังดี31เปรียบกับเมล็ดมัสตาร์ดก็แล้วกั๋น เมล็ดชนิดนี้ตอนตี้ปลูกลงในดินอั่นเม็ดมันน้อยจะนัก32แต่พอโตขึ้นมากลายเป๋นเก๊าตี้ใหญ่ตี้ซุ๊ดในหมู่เก๊าไม้ตึงมด และได้แผ่กิ่งก้านสาขาจนนกมาเยี๊ยะรังใต้ร่มมันได้”33พะอ๋งใจ๋เรื่องจะหนี้แฮ๋มหลายเรื่องตั๋นหมู่คนหลาย เกี่ยวกับถ้อยคำของพะเจ๊าเท่าตี้หมู่เปิ้นจะฮับไหว34พะอ๋งเล่าตุ๊กเรื่องโดยใจ๋เรื่องเปรียบเทียบเมิ๊อด และตอนอยู่กั๋นตามลำพังกับลูกซิดพะอ๋งก็จะอธิบายฮื๊อหมู่เปิ้นเข้าใจ๋กุ๊กอย่าง35ในแฮงวันอั่นพะอ๋งอู้กับหมู่ลูกซิดว่า “ข้ามไป๋เพิ่งโน้นกั๋นเถอะ”36หมู่เปิ้นก็ขว้างฝูงชนมาขึ้นเฮอตี้พะเยซูนั่งอยู่ก่อนแล้ว มีเฮอลำอื่นๆตามไป๋ตวย37มีพายุใหญ่จะนัก เยี๊ยะฮื๊อคื่นซัดน้ำเข้ามาจนเกือบเต็มลำเฮอ38แต่พะเยซูยังนอนลับอยู่ท้ายเฮอ หมู่ลูกซิดจึงมาปุ๋กพะอ๋งและอู้ว่า “อาจ๋าน บะห่วงกั๋นบ้างหรือ หมู่เฮากำลังจะจมน้ำต๋ายกั๋นเม็อด”39พะอ๋งจึงฮุกขึ้นสั่งห้ามลมและคื่นว่า “ดั๊กซะ” และทันใดอั่นเอง ลมก็ยู๋ดพัดและคื่นก็สงบ40แล้วพะอ๋งอู้กับหมู่เปิ้นว่า “โก๊วไอยั๋งกั๋น ยังบะฮื็อวางใจ๋เฮาแฮ๋ม”41แต่หมู่เปิ้นโก๊วจะนักและอู้กั๋นว่า “คนนี้เป๋นไผกั๋นแต๊ ขนาดลมและคื่นยังฟังเปิ้นลุ”
Empower Asia Bible Translation Movement