Yohaannisixxa Waleella10
Iimika Erganjonna Ookkone Shiixxoka Mirqisanjo Maxaafa
1Ookkoneechchi uduma weli worbi iimik erganji duumancha oddo'weexxi iimii'n dirraa wodda afennen; isinna ifike umi iimii darre dowwichcho afe'emman; albi isik arshotishsha, lekkuwwa isixxi giiratike utuphuwwishsha hexxemman.2Anga ifixxe'ninna banemeeka mirqisanjo shiixoka maxaafa afeemman; middixxi isixxi lekkanna abbaayyate'n bita'ixxa isixxa lekkanna buttate'n uggudhdhe.3Baroodaake neenqishshanna hafuura gikk asse cance; cance'exxa yanna torbaane dindinsoki hafuuruwwinna haasoe'e.4Iitti torbaane dindinso haasotee wodda borreessona'a qixxeeffatenne; yaane kinni «Torbaannixxi didinso haasotemmalcho maxxansik cufi malee'e borreessitoxxe» hiyyaaka haaso'a iiminaa'n laqenne.5Ookkonechchi uduma abbaayyate'ninna buttinake'ni uurre'naa afennak iimik erganji middixxa ifixxa anga iimi'a ke'ise.6Isinna duuchchin woddanaa'n duuchchi woddi'a hedhaake iimanna ise giddo hedheechcho buttatanna ise giddo hedheechcho abbaayyatanna ise giddo hedheechcho dademmake iso'n kakate. Hiyyenna kakatee qici, «Ta'anni edi'a hekki hiyya hexxeba'a!7Yaane kinni torbeesok iimik erganji malagati ufuufemaaxxe barruwwa'n ifika erganjuwwa wabeekko, insa'ne'a ifissemaxxe qixenni Mageniinxi buqo yaane muuxendaan.»8Ookkoneechchi uduma iiminaa'n laqennak hafuuri haaroba ane'n, «Missi abbaayyate'ninna buttate'n uurre'eke iimike ergajixxe anganaa'n banemeeka mirqisanjo maaxxaafa adhdhi» hiyye haaso'e.9Aninna ookkone iimike ergajiba'a marennexxi, «Ookkone shiixoka mirqisanjo maxaafa ane'ni uwwi» hiyye iso'o qorenne; isinna anee, «Adhdhitettexxi isoo iti, godobaa atikanna qararaanjoke assaan; afo'o atike'n kinni maleminsha xe'maan» hiyye.10Aninna ookkone shiixoka maxafa iimik erganjixxe anganaa'n aadhennexxi isoo itenne; isinna afo'o anke'n malebuffa xe'me; itennelchi uduma kinni godobi ank qaraaranjoke kade.11Ookkoneechchi uduma ani, «Heddo arduwwixxee, aanchi aanchike mannixxee, gargar hedheeke laagaduwwixxeenna moyanjuwwiixxee haaroba raaga haaso'a atee hassissaan» hiyyemenne.The Word for the World International