Yohaannisixxa Waleella11
Lame Dhugaa Kula
1Ookkoneechchi uduma shonbooqo fakkataaxxi mikisanjo siqqichcho ane'n uwwendenaa, «Maretettexxi Magniinka galmanna tochi malcho miki; ookko magenooffataakaaranna laakko'i» hiyyemenne.2Yaane kinni gadhika ba'lina kinni waal, isi Ayihudake kadebaake manni'a uwwemeeke kademmaxxee mikkoxxee; insa'ne woyyichcha qachcha shoole tomme agenjuwwa hirbeessinaa'n.3Eettene lame anxe dhugaa kula'a hunna uwwannon; insa'nenna yaaddotixxa seemma oddo'wineexxi mitte kumanna lame dhibbanna jaane tomme barra raaga haasonnaan.4Insa'nenna buttatike Gootti edo uurraake lame ejersinke haqichchuwwanna lame xassike uggemalchuwwan.5Ayyinna insa'nee miidho'a hasoole, giira afo'o insa'neekenaa'n fuldeexxi naaphaa insa'neeka balleessitaan; insa'nee miidho'a hasaak duuchchi reyaak konne qiicinten.6Kunni manni raaga haaso'aaka agenjuwwa xeeni ganabaashsha iima cunfo'a baalloma anfe'een; iittanni wodu'uwwa mundete'n jijiiratee hansaaxxa yanna duuchcha buttatanna heene balanni ganno'a baalloma anfe'een.7Dhugaa kula ifixxa bidhineechchi uduma iikki dhi'motenaa'n fulaak biniichi insa'ne'a lolaan; insa'neenna injifataan; insa'neenna shiyaan.8Renshi insa'neekinna ookkone lumoke qachchike ba'line'n hunemaan; kunni qachchinna fakkeennik Soodominna Gibtse hiyyemee ye'emeekenna insa'nek goottinna ookko fannisememmabanni.9Aanchi aanchike mannanaa'n gosa gosake minnenaa'n laagaddi laagadanaa'ninna gosa gosake ardanaa'n dageek manni rensha insa'neeka sasenna gamisa barra da'wataan. Renshi insa'neekinna moogemabaashsha hoyyaan.10Tinni lame wabeekko buttatike manna'n seldo iyendangeemmaxxee buttate'n hedhamaki manni insa'ne'n gelteexxe yaane'a gammande; weli wel'anna uwwa uunaan.11Eettene sase barranna gamisi uduma kinni hedhotik hafuuri Magniinbaa'n dageexxi insa'ne'n e'ye; insa'neenna ke'neexxi ifi ifixxe lekkanni uurrine; insa'nee daa'wataammake manna'ninna lumoxxi soda'a insa'ne abidde.12Ookkoneechchi uduma, «Kaba iimi'a amme!» hiyyaaka lumooka hafuura iimatenaa'n lanqe; naaphi insa'nekinna insa'nee uuda'naa'n duumanchik iimi'a me'ine.13Eettene yanna'n lumoxxi buttatixxi lele'ma kadde; ookkone qachchixxi tommixxi anga ibbe; eetene lele'ma'ninna torbaani kumi manni reye; reyotenaa'n gateekiriinaa lumooshsha sodaante; iimike Mageni'anna ulfinna uune.14Iitti langaxxi aanenna sa'xxe'een; kunse sakkaxxi aanne rakkee daggaan.Torbeessoka Malagata
15Torbeessok iimik erganji ifika malagata ufuufe; iiminaa'ninna, «Butta duuchchixxi mootumma Gootta no'okixxenna Kiristoosi'i isikixxe kadde; isinna duuchchi woddinaa'n duuchchi woddi'a moyaan» hiyyende.16Magenii edo ifi ifixxe mootuwwa'n ofoldeemmaxxi iitti lame tommenna shoole geedhe ifi ifike albinni kumbu hiyye Mageno magenooffanta'n17Hitee qici,«Hexxetekinna hexxa'etak,duuchchiinxa dandeetatokGootta Magenoo! Atee galateeffanta'ennen;tinni kaddachchinna ati lumoxxe hunna atixxe adhdhitettexxi moote'eten.18Gosa gosak arduwwi mufate'emman;atixxi mufenna dagge;Reyeeke manna'n murtatoxxi,erganjuwwa atike wabeeko'annaQulliyyetenna summa atika sodaatakeeri'a,lumokeenna shiixarammake'e hira uutatoxxi,Butta balleessemmakaaranna balleessitatok bari dage.»19Ookkoneechchi uduma iima hedheek Magenik galmi baneme; galmi giddonna kakotik taabot leelle; xassiink uggemalchi, hafuuri, dindinso, buttatixxi lele'manna lumoxxi kaade kadde.The Word for the World International