2 Saamu'eeli15
Abeseloomi Fuggoxxini Ke'exxa
1Ookkoneechchi uduma Abeseloomi sarageelanna fadhaduwwa, iittanni isi edo gonga'ni me'aaka onde tomme manna ifi'a qophpheesedhe.2Abeseloomi bariisa ke'eexxi qachchi giddi'a e'yinammaxxe hulaba'a me'ammake ori qarqara uurrammani. Gargari hexxeexxe ku'la'a murte alfatee moyanjinba dangaa wodda duuchcha; Abeseloomi konne manna ifibaa ye'a'ni, «Ati hoone qachchanaa'ni daggeette? Hiyya'ni laqaamman» iikki manjinna, «Erganji atik Isira'eelike mini mini hadinaa'ni mitteken» hiyye isi'a hiissan.3Ookkoneechchi uduma Abeseloomi isoo, «Uudi yaane atixxi seerinxen; yaane kinni moyanjiinxe tukke kade yaane atixxa toggi asse uudaak manji hedhebaan» hiyyamman.4Abeseloominna lebbexxi, «Toggitte murte murona'a maye hedhee? Ani bogake'ni murte uwwanoke assineele? Yaane ku'lo'a daagaki manji duuchchi aniba daga'ni toggite murte alfaashsha silaa assannan» hiyyaamman.5Iitanni fedheek manji isiba shiqeexxi ulfeesatee heeshshi hiyya wodda Abiseloomi hanqalfeexxi isoo sunqedhaamman.6Abeseloomi dhugaatixxa murte alfatee moyanjiinba dagaaka Isira'eelichoke kadaake duuchcha'ni shiqa'neeki konne toorinnite kadeemmaxxee Isira'eelke ardixxi qalbe ifiba'a higgaashsha asse.7Shoole wogga uduma Abeseloomi moyanjo hiyyee qici, «Duuchchi Woddike Gootti'a werreegenneka werreega Kebirooni mare uwwonnaaa eetii ani'a uwwi.8Ani atik erganji Sooriyake boga'ni Geshuuri hedhenna wodda, ‹Duuchchi Woddik Gootti Iyyerusaalemi'a anee hiisseexxe kaddoole; Kebirooni'i Duuchchi Woddike Gootti'a kumbu hiyyanon› hiyye werreegeennan.»9Moyanjikinna, «Nage'iki me'i» iso'o hiyye; tennexxee Abeseloomi Kebirooni'a me'e.10Ookkoneechchi uduma Abeseloomi, «Malagatiinka hafuura laqqinaa wodda hafuura ha'nnooka lummissineexxi, ‹Abesoloomi Kebiroonike moyanjo kadeen› hiyye kulaaka erganjuwwa sho'iki Isira'eelixxe gosa duuchcha'ni erge» hiyye.11Iyyerusaalemi'ni lame dhibbi manni Abeseloominni welti me'e; mitteba ye'eme ba'lunteti me'a malee'e tenne yaane mittelchonna ege'neechchi hedhemmabaan.12Abeseloomi tolcha shiqishammaxxe yanna'ni Daawwiti'i mari'achchisammaki Giiloke qachchik manji Akixofeel ifike boganaa'ni Giilo'ni isiba'a dagaashsha manjo isiba'a erge; tennexxe Daawwiti'ninna diini jabaata'ni me'e; Abeseloomixxi gamonna bira saxxa'ni me'ite.Daawwitika Baqa
13Erganjikinna dageexxi, «Isira'eelike manniki godobi Abeseloomi'ni hedheen» hiyye Daawwiti'ni kule.14Ookkoneechchi uduma Daawwiti isinni welti Iyyerusaalemi hedheemmaka ja'laaba duuchcha, «Ke'we baqaanto; baqata gonphonnole Abeseloomixxe anganaa'ni fula dandeennabo'non; ta'anni kabaa'ni fula no'o'a hasissaan; kada gophoole hordoffe dagee no'oo abidoole no'oo shiyaan; qachchake'ni afeeka duchcha wolaantichchik shiye biraan» hiyye.15Moyanjiink Ja'laabuwwinna, «Gootti no'oki moyanjo fi'leexxa duuchcha assiyyotee no'o erganjuwwi atiki qophpheeffanteenen» hine isi'a hiissine.16Moyanjikinna mini hadi ifikenni welti fule me'e; mootummatika minenna tomme shiixxoxxi aruwwa heqitaashsha gatise.17Tennexxe Moyanjikinna ardi duuchchi ifixxa duuka me'aashsha asse; shiixxo qico me'ineechchi uduma mitte bakka'ni uurrine.18Kelito duuchchi Kelito, Felito, iittanni Gaati'ni isinni welti dageeka jaane dhibba Geetitto duuchcha lebeexxi daliki Moyanji edii'ni sa'ne.19Moyanjikinna Itaayite hine ye'naamaka Gaatika manjo hiyyee qici: «No'onni welti daggeeteki mayyeete? Higgettexxi Abeseloominni welti ofo'li; ati ifi'anni wele bogana'ni dageetteke keesutichchon.20Atinna konne boga'ni daggetteki bereqeten; yoona haba me'aanexxa eg'nebo'noki manji; hitta no'onni welti doonsa kiyya hittattoshsha assanno? Ke'i manna atika adhdhitettexxi higi; ellenna addatensha atinni welti hexxowwaal» isi'a hiyye.21Itaayi kinni «Hedha'neeke Duuchchi Woddike Goottike iittanna anke goottike moyanjinke summinni kakatannen; hedhotenna kaddo reyo hoone booncho'ninna gootti anki moyanji kadaaxxa duuchcha atiki erganjinna iittanni kadaan» hiyye hiisse.22Daawwitinna Itaayi, «Eloxxen! Yooni edi'a kexxe me'i» hiyye. Tennexxe Gaatichchi Itayemik manni duuchchinna isinni welti hedhemmaka mini hado ifika adhdhe me'e.23Ardi duuchchi sa'aa wodda ookkone bogiki mann duuchchi hiiqise oodhe; moyanjikinna Qediroonixxa dhooqa foofe; ardi duuchchinna foofeexxi gammoojje'a me'e.24Qeesichchi Saadooqinna ookko hedhemman; isinni welti hexxeemmaxxi Leewwito duuchcha ookkonee Mageniinka kakotika taabota dukkeemman. Insa'nenna ookkonee kakotika taabota butta uggine; Abiyataarinna ardi duuchchi ookkonee qachcha waale fulaa qico'ni tolcha shiqishe.25Ookkoneechchi uduma moyanjikinna Saadooqi hiyyee qici, «Ati Mageniinka Taabota qachchi giddi'a aaxxe higi; Duuchchi Woddike Goottanaa'ni elle alfoonnole, isi anee hiissee'naa taabotakanna seemmati giisinemaka fooqa higgeenni uudannoshsha anee assaxxe hexxen;26Yaane kinni isi ‹Ate'ni gammadebo'non› hiyyaxxe kaddoole eloxxe fakkaateexxa leelliteexxa yaane isi ani'a assowwaali; aninna adhdhatee qophpho'ennen.»27Iittanni moyanji qeesichcho Saadooqii hiyyee qici, «Ati wabeekakebaata? Yoona atinna belto atika Ahima'aatsii'i, Abiyataarika belto Yoonataanii'i aaxxettexxi qachchi giddi'a nage'iki me'i. Atinna Abiyataari laminxa ha'nooxxa oose adhdhitine me'e.28Aninna atenaa'ni odo laqanno qico'ni gammoojje giddike wede'iinke riqichchi qarqara hedhee heqqannoni» hiyye.29Tennexxe qeesichchi Saadooqinna Abiyataari Mageniinka Taabota adhdhineexxi Iyyerusaalemi'a aa'ne hiissine okkonni turre.30Daawwitinna kinni oodha'ni Dabire Za'yitetixxa tarbaba'a qabate; isinna haguuqeexxi lekka duwwixxenni hedhemman; isinni welti hedhemmak ardi duuchchi iittanni haguuqqeexxi oodha'ni tarba qabata'nemmaan.31Eettenne yanna «Abeseloominni welti diinakee guddeemaake manni giddi'ni mitti Akixofeeliten» hine Daawwiti'ni kulle. Tennexxee Daawwiti, «Duuchchi Woddike Gootta maganneteni Akixxofeelka gorsa la'o afabaake assi» hiyye soodate.32Daawwitinna ardi Mageno magenoonfatammaaxxe koobaxxa xungo geyee wodda, Arkichchi Huushayi seemma ifixxa dareexxi buko umo ifike'ni fifilxxexxi isinni welti afemo'a dage.33Ookkoneechchi uduma Daawwitinna isi'a hiyyee qici, «Ati aninni welti me'itottole ane'ni ba'ote kadattoni;34Yaane kinni Ati qachchiiniba'a higge Abeseloomii'i anna atikee ergatemenneshshan, ‹Moyanjo ani atike erganjo kadannoni; telchonna ati'a ergatemannon› anee hitottole Akixofeelika gorsa moromati anee gargaaritattoni.35Qeese, Saadooqinna Abiyataari okko'o atinni welti he'nneebaa? Moottummatike minenaa'ni hinaa'naa laqqettexxa duuchcha insa'ne'ni kuli.36Saadooqik belti Ahima'aatsiinna Abiyataariki belti Yoonataani lamiinxi insa'nexxi labbaxxi oose ookkon insa'nenninni welti hexxen. Atinna laqqettexxa duuchcha insa'nee gamii'ni anibaa'a sa'issi.»37Tennexxe Daawwitiki jaali Huusheyi Abeseloomi Iyyerusaalemi e'yeexxe yanaa'ni ookko geye.The Word for the World International