2 Saamu'eeli16
Daawwitinna Siba
1Daawwiti koobatixxe xugonaa'ni shiixxo qico sa'e me'eeshshanni Siiba hiyyemaak manji Mefibosheetik erganji, lame dhibba wodhaamo, mitte dhibba woyinetixxe roddeka xalta, mitte dhibba balasetika xaltanna mitte qalqallo weyinetixxa booka feeneexa lame harre dagaa'na afeeme.2Moyanjikinna Sibaa, «Konnechcho duuchcha iyyedagetelchi mayeete?» hiyye qore.Siibanna, «Harruwwa moyanjinki mini hadi gulufo'a, kebbonna balasetixxa gumma dargaggeeyye ittaan, weyine kinni qiila gammooje'ni dheebo'weki ha'waashshaten» hiyye.3Ookkoneechchi uduma moyanji, «Atike goottiki belti haba hedhe?» hiyye qore.
Siibanna, « ‹Isira'eelik mini telcho anke annixxa mootumma ani'a hiissaani› hiyye hedammaxxee Iyyerusaalemi ofo'le'eeni» hiyye.4Ookkoneechchi uduma moyanji Siibaa'a, «Mefibosheeti afeechchi duuchchi atiken» hiyye.
«Sibanna lumooxxe shaquntenni heeshshi hiyyennexxi» anga iimi'a ke'issannoni; «anke gootta moyanjo atenaa'ni elle alfo» hiyye.
Shimi'a Moyanjo Daawwiti'i Yowwe
5Moyaanji Daawwiti Baahuriim geyee wodda, Sa'oolike mini hado kadeeki mitti manji dage; isinna Geerake belto Saamiten; isinna isoo badina'ni gadhi'a fule.6Moyanjinki lolinki manninna garigarti hedheek heqanjuwwi duuchchi Daawwitike midda'ninna bitta'ani he'neexxenna kaddole Shimi'a Daawwiti'ninna Ja'laabuwwa duuchcha'ni kino darbataammani.7Saaminna hiyye yowwaamma qici, «Ati manjo anga saxxeetek manji; ati fuggaaleessi manji; fuli, amo fuli kabaa'ni!8Mootumma adhdhitetteke Sa'oolike mini hadixxi munde Duuchchi Woddiki Gootti hiissate'ni hedhen. Duuchchi Woddik Gootti mootumma atixxa belto atike Abeseloomi'a uwwe'eeni. Ati manjo anga saxxeeteke kaddetaxxee kunni ba'ne atixxi gelte'een.»9Ookkoneechchi uduma Tsuriyak belti Abisa moyanjo, «Kunni reyeeke wolchishsha hedheeki gootta moyaanjo anka hitta yowwa? Widi'a foofenneexxi gooba isika kutoo» hiyye.10Moyanji kinni «ha'no Tsuriyaxxi oose ha'noonna anee maachcho afensisaachchi? Duuchchi Woddik Gootti ‹Daawwiti'i yowwi› hiyye'naa anee isi yowwa'noole, ‹Tenne mayee assitete› hiyye ayyete isoo qora dande'a?» hiyye.11Ookkoneechchi uduma Daawwiti Abisa'ninna ja'laabuwwa ifike duuchcha'n hiyyee qici: «Ani i'lenegi belti anee shiyo'a hasa'neexxinni, kunni Biiniyaamichchi anee galaafateele mitte mambe'a assitaaxxi yaane hexxee? Mee hoyye Duuchchi Woddik Gootti iso'ni kulee'naaten waalle yowwun.12Dedha Duuchchi Woddik Gootti rakko anxa uudee kunni manjichchi anee yowwemmaxxa bakka eebbate ani'a assaan.»13Tennexxe Daawwitinna isiki manni ora ifika me'ine; Saami koobatike kasa kasanaa'ni me'a'ni; badina'ni, kinjo darbata'ninna buko iso'ni xeeraamman.14Moyanjikinna isini welti me'a'nemmaki manni duuchchi marate hendemmaba genne lumoshsha gonpheemmaxxee ookkone booncho'ni hafuura adhdhineen.Kuusikanna Akixofelka Gorsa
15Eettenne yanna Abeseloominna Isira'eeliki manni duuchchi Iyyerusaalemi'a dange, Akixofeelinna insa'nenni welti hedhemmani.16Daawwitiki jaali Arkichchi Huusheyinna Abeseloomibaa dageexxi, «Moyanjo balloo duuchchi wodda moyi! Moyanjo balloo duchchi wodda moyi!» hiyye.17Abeseloominna Huusheyi'i, «Jaalo atike afettaxxi addatensha ookkone qico? Mayee jaali atikinni welti me'a gophphete?» hiyye qore.18Huusheyinna Abeseloomii'i hiyyee qici: «Hitta ani isinni welti me'anno? Fedheexxe yanna'ninna ani konne ardixxe, Isira'eelike ardi duuchchixxenna Duuchchi Woddik Gootti fileeke manjixxe gamon ani edi'aana isinni welti hedhannon.19Yooni Gootti anikike belti'a ergatema gophonnole ayi'ata ergatemanno? Tennexxe anna atikee ergatemeneshshanni ati'anna ergatemannoni.»20Abeseloominna Akixofeelii'i «Yooni afetteka yaada iyyedagi; maata assinaanno?» hiyye.21Akixofeelinna hiisseexxi, «Mootumatika ifika mine heqqito'a anni atiki gatisemmaxxe atike annixe shiixoxxe melaallenni diiphi; ookkonechchi uduma ati anna ateke'ni hara naaphunteti kexxeeteke kaddettexxa Isira'eelike boga'ni hedhaaki ardi duuchchi laqee'naa atini welti hedheeke mannixxi hunna jabaattaani» hiyye.22Tennexxee Abeseloomi'a Mootummatike minixxe xelephpho hana duunkaana isi'a onte; ookkonna Isira'eeliki ardi duuchchi uuda'naa anni ifikixxe melaallenni welti diiphe.23Eettene yanna'ni Akixofeel uwwammaka gorsa duuchcha Mageniinke hiyyichchishsha assine adhdhina'nemman; edi wodda Daawwiti Akixoofeelika gorsa adhdhammashshanni Abeseloominna isika gorsa adhdhe.The Word for the World International