GENESIS1

Raenaw Kong

1Athotakaw kya Pachia nynh vaaw te lae kha a rae,2laephi tuh muinsan a hoi leipaw accakaepaw nynh thua, akhupaw rilipi kha mohnaw nynh phang a bong, te Pachia muisaw tuh tui luki khe a pae.3Oute Pachia nynh, “Awnaw um sah,” ci zah awnaw tuh a um.4Pachia nynh awnaw tuh ahoy cite a muih; te awnaw kha mohnaw kyate a phia.5Pachia nynh awnaw kha Khuadae, mohnaw kha Khuazi cite min a phu. Zete thang zah awkhua yn thua—tuh-e tuh nin kheitnaw nin nynh thua.
6Te Pachia nynh, “Tui angaelung khe myarya kopaw adawkuhpaw ccangkheit um sah, tuh-e nynh tui te tui kha phia hae sah,” a ci.7Te Pachia nynh myarya kopaw adawkuhpaw kha rae zah, tuh-e luki umpaw tui te tuh-e kaw lang umpaw tui kha a phia hae thyhte a um vae.8Te Pachia nynh myarya kopaw adawkuhpaw tuh Vaawlui cite min a phu. Zete thang zah awkhua yn thua—tuh-e tuh nin ningnaw nin nynh thua.
9Pachia nynh, “Vaawlui zakaw umpaw tui hynh san kheit kya pynkheihlan sueluakuh sah, aroupaw laelung kha langkuh sah,” cite kaw a pya thyhte acyihkuh vae.10Pachia nynh aroupaw laelung kha Laephi cite minphu zah, pynkheihlan sueluakuhpaw tui kha Rili cite min a phu. Te Pachia nynh tuh-e tuh ahoy cite a muih.11Oute Pachia nynh, “Laephi vawlan hin thingku-ruaku aphuinphuin po sah: acii-amung umpaw aku hae, te laephi vawlan athae lungkhu amung umpaw thingku aphuinphuin po sah,” cite kaw a pya thyhte a cyihkuh vae.12Tetuh laephi nynh thingku-ruaku aphuinphuin kha a posah vae: acii-amung umpaw aku phuin miakaw, te athae lungkhu amung umpaw thingku phuin miakaw kya-e thingku hae tuh a po vae hae. Pachia nynh tuh-e tuh ahoy cite a muih.13Zete thang zah awkhua yn thua—tuh-e tuh nin thumnaw nin nynh thua.
14Te Pachia nynh, “Khuazi te khuadae kha phia khylan adawkuhpaw vaawlui kya awnaw um sah; tuh-e awnaw tuh muihsahnaw hae, nin hae, kum hae te kumvaelori kha khya khylan thua sah.15Laephi vawlan awnaw pya khylan adawkuhpaw vaawlui kya awnaw um sah,” cite kaw a pya thyhte a cyihkuh vae.16Te Pachia nynh myarya lepaw awnaw ccangning kha a rae, khuadae uktu lang khuanin kha rae zah, khuazi uktu lang sawpaw kha a rae, te awsi hae kha mah a rae.17Pachia nynh laephi vawlan awnaw pya khylan,18khuadae te khuazi kha uk khylan, te awnaw te mohnaw kha phia khylan tuh-e a aw hae paw kha adawkuhpaw vaawlui kyakhe a nung. Te Pachia nynh tuh-e tuh ahoy cite a muih.19Zete thang zah awkhua yn thua—tuh-e tuh nin palinaw nin nynh thua.
20Te Pachia nynh, “Tui kya ahiinpaw ahysuepaw aphuinphuin kha tui nynh pousah sah, te pavaw hae nynh laephi luki adawkuhpaw vaawlui khe zou bungthung hae sah,” a ci.21Tuhcite rili lungkhu umpaw myarya lepaw ngasawpi hae te tui kya piathya zah ahiinpaw ahysuepaw aphuinphuin, te azouthyapaw pavaw aphuinphuin kha Pachia nynh a rae. Te Pachia nynh tuh-e tuh ahoy cite a muih.22Pachia nynh minmin kha, “Pungzae oh, lungthung oh lah rili tui kya phe beih oh, pavaw hae nynh laephi vawlan lungthung hae sah,” cite hythua a pya hae.23Zete thang zah awkhua yn thua—tuh-e tuh nin pangawnaw nin nynh thua.
24Te Pachia nynh, “Laephi nynh ahiinpaw ahysuepaw aphuinphuin: sahiin aphuinphuin te loramsaw aphuinphuin te avawpaw aphuinphuin kha pousah sah,” cite kaw a pya thyhte a cyihkuh vae.25Pachia nynh laephi vawlan umpaw loramsaw aphuinphuin, te sahiin aphuinphuin, te laephi vawlan avawpaw atyn-are kha a rae. Te Pachia nynh tuh-e tuh ahoy cite a muih.
26Oute Pachia nynh, “Ahmaw muinsan hawte, ahmaw oun lo lante ccungccaw kha rae oh sih; minmin nynh tui kya-e ngasaw hae thuasah, vaawlang e pavaw hae thuasah, sahiin hae thuasah, laephi kya-e loramsaw balyn thuasah, te laephi vawlan avawpaw miakaw thuasah uk hae sah,” cite kaw a pya.27Tuhcite Pachia nynh, ccungccaw  khaamaw muinsan alo lante a rae,minmin kha Pachia muinsan alo lante a rae hae;aning nynh pise te nopi kha a rae hae.
28Pachia nynh minmin kha, “Pungzae oh lah lungthung oh, laephi kha phe beih oh lah laephi kha uk oh; te tui kya-e ngasaw hae, vaawlang e pavaw hae te laephi vawlan hiin zah apiathyapaw miakaw kha uk oh,” cite hythua a pya hae.29Pachia nynh, “Laephi vawlan balyn umpaw acii-amung hoipaw aku miakaw te athae lungkhu amung umpaw thingku miakaw kha kae pya vae oh; nanning nynh tuh-e hae tuh na ae cih oh.30Te laephi kya-e ramsaw miakaw, vaawlang e pavaw miakaw, laephi vawlan avawpaw atyn-are, hiinnaw hy a hoipaw atyn-are hanlan hinlalyhpaw aku miakaw kha ae lan ka pya vae hae,” cite kaw a pya thyhte acyihkuh vae.31Pachia nynh a raepaw atyn-are kha myarya ahoy ccaccing cite a muih. Te zete thang zah awkhua yn thua—tuh-e tuh nin taruhnaw nin nynh thua.
1Tuhcite vaaw te lae te tuh-e hae kya umpaw atyn-are kha rae kou athua vae.2Te nin sarinaw nin khe Pachia nynh a lawpaw a ryalaw kha a thangsah, te a lawpaw a ryalaw balyn kyate nin sarinaw khe a haeung.3Tukeiccuze Pachia nynh nin sarinaw nin kha hythuapya zah taekhia lante a thyaasah, pawccecize tuh-e nin khe Pachia nynh a raepaw raenaw balyn kha thangsah zah a haeung.
4Hynh-e hae tuh Pachia nynh vaaw te lae a raenaw konglang nynh thua. Ccangpaw Raenaw Kong
Bawipaw Pachia nynh vaaw te lae kha a rae nin khe,5laephi kya ramkaw e aku mah um loh khyh zah ccoukupaw aku mah um loh khyh, pawccecize Bawipaw Pachia nynh laephi vawlan khuaarawsah loh khyh, te laephi vawlan looh ccoukupaw rya a lahtu mah um loh khyh;6thuasalama tui tuh laephi kyate pou zah laephi balyn kha a ciasah.7Oute Bawipaw Pachia nynh laephi kya-e laenoi khate ccungccapaw kha a rae, hiinnaw hy kha a naduh lungkhu lang a sawnua; te ccungccapaw tuh ahiinpaw ahysuepaw lang yn tang.
8Te Bawipaw Pachia nynh nithua langkhe Eden kya khokhu ccangkheit a rae; te a raepaw ccungccapaw kha tuin kya a umsah.9Bawipaw Pachia nynh do ry umpaw te ae lan ahoypaw thingku miakaw kha laephi kyate a posah, khokhu ngaelung khe hiinnaw thingku kha mah a posah, te athya ahoy nynawpaw thingku mah a posah.
10Khokhu kha tui bu khylan Eden kyate vaw vakheit pou zah a lua, tuh-e vaw tuh tuin kyate vaw pali lang a phiakuh.11Ccangkheitnaw vaw min tuh Pishon acikuh; tuh-e vaw tuh Havilah ram balyn po lekuh lan lua zah tuh-e kyatuin sui a pou;12te tuh-e laelung kya-e sui tuh ahoy; amynkhuhpaw badelah thingphi te oniks lung mah a um.13Ccangningnaw vaw min tuh Gihon acikuh; tuh-e vaw tuh Kush ram balyn po lekuh lan a lua.14Ccangthumnaw vaw a min tuh Tigris acikuh, tuh-e vaw tuh Assiria ram nithua lang aluapaw nynh thua. Te ccangpalinaw vaw tuh Zufrates acikuh.
15Bawipaw Pachia nynh ccungccapaw kha lah zah Eden khokhu kya ryalaw khylan te do-oih khylan tuin kya a nung.16Te Bawipaw Pachia nynh ccungccapaw kha, “Nang nynh khokhu kya umpaw thingku miakaw kya-e athae hae hynh rythyte na ae cih;17thuasalama athya ahoy nynawpaw thingku kya-e athae hynh tuh na ae lan khyh, hynh-e thingthae hynh na ae lanze, na ae nin khe nang tuh na chih cih,” cite kaw a pya.
18Oute Bawipaw Pachia nynh, “Ccungccapaw hynh amaw makhaete um lan hoy khyh; amaw hanlan angaekuhpaw bawmtu lu kheit ka raepah cih,” a ci.19Tukeiccuze laephi kya-e sarangpaw miakaw te vaawlang e pavaw miakaw kha Bawipaw Pachia nynh laephi khate a rae, tuh-e hae tuh ccungccapaw nynh muih zah min a phu ccaw cite amaw kalan a cciakhae hae, ccungccapaw nynh ahiinpaw ahysuepaw miakaw kha min a phu thyhte min ccarou a hoi hae.20Ccungccapaw nynh sahiin balyn, vaawlang e pavaw hae, te sarangpaw miakaw kha min a phu hae; thuasalama ccungccapaw hanlan angaekuhpaw bawmtu ccangkheit sanmah muih khyh.21Tukeiccuze Bawipaw Pachia nynh ccungccapaw kha thuhbabi lan a isah; oute Pachia nynh a naru ccangkheit kha lah zah, tuh-e a lawnaw kyakhe ngesaw khate a pingsah.22Te Bawipaw Pachia nynh ccungccapaw kyate a lawpaw naru khate ccungccanung kha rae zah ccungccapaw kalan a cciakhae.23Oute ccungccapaw nynh,“Hynh-e hynh ka ru kya-e ru thua zahka ngesaw kya-e ngesaw nynh thua;Ccungccapaw kyatelawpaw athua keiccuzehynh-e hynh Ccungccanung citeko athua cih,” a ci.
24Tukeiccuze pisepaw nynh a nung te a paaw kha cciataw zah a zu te a umkheih hae, te minmin tuh pyn pynkheit lang a tang hae.25Te pisepaw te a zu tuh mih ccakaete um hae zah mih maethah khyh. Seinaw Kong (Rom 5.12-21)
1Bawipaw Pachia nynh a raepaw ccangpaw sarangpaw hae laeze hupaw tuh a thyaruh huapaw nynh thua. Hupaw nynh nopinung kha, “Pachia nynh, ‘Khokhu kya umpaw pawpaw thingthae mah na ae lan khyh oh,’ a ci ccaccing tou?” cite a ci.2Te nopinung nynh hupaw kha, “Khokhu kya umpaw thingthae hae kha kae ae kho;3thuasalama Pachia nynh, ‘Khokhu angaelung umpaw thingku kya-e thingthae tuh na ae lan khyh oh, tuhpiaze na ty lan khyh oh, tuhkhyhze tuh na chih cih oh,’ a ci,” cite a cipya.4Thuasalama hupaw nynh nopinung kha, “Na chih lan khyh oh;5pawccecize tuh-e thingthae kha na ae oh zetuh nae mit a aw cih, athya ahoy kha na nyh cih oh zah Amaw na lo lan oh paw kha Pachia nynh a ny,” a cipya.6Tukeiccuze tuh-e thingku a thae tuh ae lan ahoy, duaa lan a um, te hawnaw mue nawlan ry lan umpaw thingku athuapaw kha nopinung nynh he a muih tuh, athae kha lokuh zah a ae, thingthae abang kha a vawpaw kalan pyabua zah a vawpaw nynh mah a ae.7Oute parouhte mih mit tuh phae aw zah mih ccakaete a um hae paw kha a nyku hae; te minmin nynh eboh anaw hae kha biakuh hae zah cce kya khawkupaw uccaw lang a raeku hae.8Zetesang khe minmin nynh khokhu kya Bawipaw Pachia a cciapaw roi kha a thae hae, te pisepaw te a zu tuh Bawipaw Pachia muihnaw kyate khokhu kya-e thingku hae laku khe a rekuh hae.9Thuasalama Bawipaw Pachia nynh pisepaw kha ko zah, “Teimou na um?” a ci.10Pisepaw nynh, “Khokhu kya na roi kha ka thae, te ka ccakaete ka um keiccuze ka rih zah ka rekuh,” a cipya.11Pachia nynh, “Na ccakaete na um cipaw hummou ae hopah? Na ae lan khyh cite kaw kae pyapaw thingthae kha phe na ae vae tou?” cite a khia.12Pisepaw nynh, “Kae te umkheih lan nae pyapaw nopinung nynh thingthae kha yn pya zah ka ae,” a cipya.13Oute Bawipaw Pachia nynh nopinung kha, “Pawcce hynhte na la cyi?” a ci. Te nopinung nynh, “Hupaw nynh yn ling zah ka ae,” a cipya.
14Bawipaw Pachia nynh hupaw kha,“Nang nynh hynh-e hynh na cyi keiccuzesarangpaw hae balyn teramkaw e ahysuepaw balyn lakuthyalaw na thua;na vue te na vaw cih zahna hiin lungkhu balynlaenoi kha na ae cih.15Nang te nopinung laku thuasah,na ciihan te a ciihan laku thuasahrawsekunaw ka nung cih;aning nynh na lu khaae tude cih zahnang nynh a ccukhung khana tuh cih,” a ci.
16Nopinung kha, “Na teing lanpawccaawpoinaw kya-e teingnaw khamyarya ka lesah cih;ccinaw teingte ccaaw na saah cih,thuasalama na vawpaw khana ry ngaethae cih zahaning nynh nang kha ae uk cih,” a cipya.
17Te pisepaw kha,“Na zu bya kha na ngae zah‘Khah-e thingthae khana ae lan khyh,’ citekaw kae pyapaw kha na ae keiccuzelaephi hynh nang keiccuzethyalaw athua;na hiin lungkhu balyn laephi kya-e khathawbangte ryalawkute na ae cih;18laephi nynh na hanlan hinpaw kuaphuinphuin kha a posah cih;te loo kya-e athae te anaw kha na ae cih.
19Laephi kalan na kithui makhiana mae kyate na vaesaw a pou lantelooh kha na ae cih,pawccecize laephi kyate rae na thua;nang tuh laenoi na thua zahlaenoi kalan na kithui cih,” a ci.
20Pisepaw nynh a zu kha Evi cite min a phu, pawccecize aning tuh ccungccaw balyn hae nung nynh thua.21Te Bawipaw Pachia nynh pisepaw te a zu hanlan saphua uccaw kha raepah hae zah a lawsaku hae. Adam te Evi A Dee hae
22Oute Bawipaw Pachia nynh, “Pisepaw tuh aening kya-e lukhakheit hawte thua vae zah athya ahoy kha a ny vae; te aning nynh zungzae hiinnaw mue khylan a kuih kha a dyng cih zah hiinnaw thingku kya-e athae kha mah lokute a aesei cih,” a ci.23Tukeiccuze pisepaw tuh amaw yn thuanaw laephi kya ryalaw khylan Bawipaw Pachia nynh Eden khokhu kyate a pousah.24Pachia nynh pisepaw kha dee zah hiinnaw thingku kalan cceihpaw laanpi kha khynsah khylan Eden khokhu nithua langkhe teitei lang balyn amiakuh khopaw maee thaloi te cherubim hae kha a nung hae. Kain nynh Abel A Chia
1Te Adam nynh a zu Evi te ihkheih hae zah Evi tuh ccaaw a poi, te Kain kha saah zah, “Bawipaw bawmnaw liate ccapise lu kheit ka saah,” a ci.2Tukoute a neitaw Abel kha a saah. Abel tuh tuurinpaw thua zah Kain tuh loophopaw nynh thua.3Accyh yn zaw tuh Kain nynh Bawipaw pya khylan loo kya-e athae kha yn ccyng,4te Abel nynh a tuuphu kyate masaty a than hae paw kya-e athopaw kha a pya. Te Bawipaw nynh Abel te a pyapaw a uccaw kha a ccoupya,5thuasalama Kain te a pyapaw a uccaw kha ccoupah khyh. Tukeiccuze Kain tuh myarya a thinria zah a mitmae hoy khyh.6Bawipaw nynh Kain kha, “Pawcce na thinria, pawcce na mitmae hoy khyh?7Ahoypaw kha na rae lanze ccoupya leite um na thua cih zawtou? Te ahoypaw kha na rae khyh lanze seinaw nynh thuakaw kya phang ae buh, seinaw nynh nang kha uk lan ae ry, thuasalama nang nynh seinaw kha na tae lanpaw nynh thua,” a cipya.
8Kain nynh a neitaw Abel kha, “Loo lang cceih sih,” a cipya. Te loo kya a um lya hae khe Kain nynh a neitaw Abel kha rawse zah a chia.9Oute Bawipaw nynh Kain kha, “Na neitaw Abel teimou um?” a ci. Kain nynh, “Ka nyh khyh; kae tuh ka neitaw rintu ka thua zawtou?” a ci.10Te Bawipaw nynh, “Pawmou phe na rae vae? Ngaetua; na neitaw chii nynh laephi kyate kamaw kalan palei a sia!11Na kuih te na chiapaw na neitaw chii kha zu khylan a khalang a awpaw laephi kyate nang tuh atu thyalaw na thua vae.12Laephi kya rya na law ze pawsang mah ae poupah lan khyh; nang tuh laephi kya a ccuepaw te a khiavuikuhpaw na thua cih,” a ci.13Kain nynh Bawipaw kha, “Nae pyapaw detahnaw tuh ka ngaesang khonaw laeze alehua!14Kae kha laephi kyate atunin nae dee vae zah na mae kha kae muih vae lan khyh; laephi kya a ccuepaw te a khiavuikuhpaw ka thua vae cih, yn muihpaw lukhakheit nynh kae kha yn theih vae cih,” a cipya.15Oute Bawipaw nynh Kain kha, “Tuhte thua khyh! Kain a theihpaw tuh humhung zemah liarunaw leit sari a ing cih,” a ci. Te Kain a muihpaw lukhakheit nynh Kain kha a chia khyh nawlan Bawipaw nynh Kain kyakhe syntawnaw ccangkheit a rae.16Oute Kain tuh Bawipaw umnaw kyate po pou zah Eden nithua lang umpaw Nod ram kya khua a sah.
17Kain tuh a zu te a ihkheih hae, te a zu nynh ccaawpoi zah Enok kha a saah; khuapi khuakheit rae zah a min tuh a ccapaw Enok min kha lee zah Enok cite min a phu.18Enok nynh Irad kha a saah; te Irad tuh Mehujael a paaw, Mehujael tuh Methusael a paaw, Methusael tuh Lamek a paaw nynh thua.
19Lamek nynh zu lu ning a hoi; lu kheit min tuh Adah cikuh zah ccangpaw lu kheit min tuh Zillah a cikuh.20Adah nynh Jabal kha a saah; Jabal tuh bu kya um hae paw te sahiin a kua hae paw mih minpaaw nynh thua.21Jabal a neitaw min tuh Jubal nynh thua; aning tuh tintang a khuathya hae paw te phyly a tuthya hae paw mih minpaaw nynh thua.22Zillah nynh Tubal-kain kha a saah, aning tuh sohin te sivawhaelua aphuinphuin a raethyapaw nynh thua. Tubal-kain a ccianung tuh Naamah nynh thua.
23Lamek nynh a zu hae kha:“Adah te Zillah, ka roi hynh thaetua oh;Lamek zu hae,ka hopaw bya hynh ngaetua oh:Vaemaw yn muihsahpawccungccapaw lu kheit kha phe ka chia,kae yn buapaw ccangvaelu kheit kha phe ka chia.24Kain a theihpaw kha leih sari teliaru athua lanze Lamek a theihpaw tuhsung sari leit sari te liaru athua cih,” a ci.
25Te Adam nynh a zu te bua a ihkheih hae, te aning nynh ccapaw lu kheit saah zah Seth cite min a phu, pawccecize aning nynh, “Kain nynh a chiapaw Abel ccelang ccangpaw ccapaw kha Pachia nynh yn khangpya vae,” a ci.26Seth nynh ccapaw lu kheit saah zah Enosh cite min a phu. Tuh-e ccyh lya ccungccaw hae nynh Bawipaw min kha mangte a beik takaw hae. Adam Ciihan (1Sh 1.1-4)
1Hynh-e hynh Adam ciihan ccazing nynh thua. Pachia nynh ccungccaw kha he a rae tuh minmin kha amaw te a lokuh lante a rae.2Pise te nopi kha a rae, te hythuapya hae zah minmin a rae nin hae khe “Ccungccaw” cite min a phu hae.
3Adam tuh kum za kheit sung thum he cih tuh amaw muinsan te a lokuh lante ccapaw lu kheit saah zah Seth cite min a phu.4Seth a pui koute Adam tuh kum za tarya hiin zah ccangpaw ccapaw hae te ccanung hae kha mah a saah hae.5Adam tuh kum za takua sung thum acih te a chih.
6Seth nynh za kheit kum pangaw acih te Enosh kha a saah.7Enosh a pui koute Seth tuh kum za tarya kum sari hiin zah ccangpaw ccapaw hae te ccanung hae kha mah a saah hae.8Seth tuh za takua kum haw lae ning acih te a chih.
9Enosh nynh kum sung takua acih te Kenan kha a saah.10Kenan a pui koute Enosh tuh za tarya kum haw lae pangaw hiin zah ccangpaw ccapaw hae te ccanung hae mah a saah hae.11Enosh tuh za takua kum pangaw acih te a chih.
12Kenan nynh kum sung sari acih te Mahalalel kha a saah.13Mahalalel a pui koute Kenan tuh kum za tarya sung pali hiin zah ccangpaw ccapaw hae te ccanung hae kha mah a saah hae.14Kenan tuh za takua kum haw acih te a chih.
15Mahalalel tuh sung taruh kum pangaw acih te Jared kha a saah.16Jared a pui koute Mahalalel tuh kum za tarya sung thum hiin zah ccangpaw ccapaw hae te ccanung hae mah a saah hae.17Mahalalel tuh za tarya sung takua kum pangaw acih te a chih.
18Jared tuh za kheit sung taruh kum ning acih te Enok kha a saah.19Enok a pui koute Jared tuh kum za tarya hiin zah ccangpaw ccapaw hae te ccanung hae kha mah a saah hae.20Jared tuh za takua sung taruh kum ning acih te a chih.
21Enok nynh sung taruh kum pangaw acih te Methuselah kha a saah.22Methuselah a pui koute Enok tuh kum za thum lungkhu Pachia te a mungkuh hae; te ccangpaw ccapaw hae te ccanung hae kha mah a saah hae.23Enok tuh za thum sung taruh kum pangaw cia a hiin.24Enok tuh Pachia te a cceihkheih hae; te aning tuh um vae khyh, pawccecize Pachia nynh aning kha a law vae.
25Methuselah nynh za kheit sung tarya kum sari acih te Lamek kha a saah.26Lamek a pui koute Methuselah tuh za sari sung tarya kum ning hiin zah ccangpaw ccapaw hae te ccanung hae mah a saah.27Methuselah tuh za takua sung taruh kum takua acih te a chih.
28Lamek nynh za kheit sung tarya kum ning acih te ccapaw lu kheit a saah;29Lamek nynh, “Bawipaw nynh thya a lawpaw laephi kya-e ah ryalaw te ah kuih te lawpaw ryalaw rupaw kyate hynh-e paw nynh thawdangnaw yn pya cih,” cih zah a min tuh Noah cite a phu.30Noah a pui koute Lamek tuh za pangaw sung takua kum pangaw hiin zah ccangpaw ccapaw hae te ccanung hae kha mah a saah hae.31Lamek tuh za sari sung sari kum sari acih te a chih.
32Noah tuh kum za pangaw acih te Shem, Ham te Jafeth kha a saah hae. Ccungccaw Hoyleinaw
1Laephi vawlan ccungccaw hae tuh pungzae hae zah ccanopi hae kha he a saah hae tuh,2Pachia ccapaw hae nynh tuh-e ccanopi hae mih puithyanaw kha a muih hae; a ry hae paw kha pokuh hae zah zu lang a dyku hae.3Oute Bawipaw nynh, “Ka muisaw tuh a chihthyapaw ccungccaw hae kya zungzae um lan ccan khyh, pawccecize minmin tuh ngesaw nynh thua hae; ccungccaw she tuh za kheit kum kuin thua sah,” a ci.4Tuh-e she kya laephi vawlan mih pyn lepaw Nefilim ccungccaw hae la um hae, tuh-e she koute mah Pachia ccapaw hae nynh ccungccaw ccanung hae te ihkheih hae zah ccaaw a saah hae. Tuh-e ccaaw hae tuh langmawlya mawte rawhoy hae paw te minthaan hae paw nynh thua hae.
5Laephi kya ccungccaw hoyleinaw tuh myarya le zah mih thinlung nynh a tuapaw miakaw kya ahoy leipaw cci nynh zungzae a um cipaw kha Bawipaw nynh a muih.6Bawipaw nynh laephi vawlan ccungccaw a la raepaw kha a ngaesikuh, te tuh-e a raepaw nynh a thinlung kha myarya a ccisah.7Tukeiccuze Bawipaw nynh, “Ka raepaw ccungccaw hae, sarangpaw hae, a vawthya hae paw te vaawlang e pavaw hae kha laephi kyate ka roh cih, pawccecize minmin ka raepaw hynh ka ngaesikuh,” a ci.8Thuasalama Noah tuh Bawipaw mitmuihnaw kya maehoynaw a mue. Noah nynh Pachia Lungrytung
9Hynh-e hae tuh Noah konglang nynh thua hae. Noah tuh midingpaw, tuh-e she lyaze ccaenaw um leipaw thua zah Pachia ryte a mungkuh hae paw nynh thua.10Te Noah nynh ccapaw lu thum a saah, Shem, Ham te Jafeth nynh thua hae.
11Laephi tuh Pachia mitmuihnaw kya ahoy leipaw hiinzia te um zah puathonaw te phe a beih.12Te Pachia nynh laephi hynh hoy khyh cite a muih; pawccecize ccungccaw balyn tuh laephi vawlan ahoy leipaw hiinzia te a hiin vae hae.13Te Pachia nynh Noah kha, “Ccungccaw balyn kha phe maemih lan ka tuaku vae, pawccecize laephi tuh minmin keiccuze puathonaw te nynh phe a bia vae; atu laephi te minmin kha ka roh vae cih.14Kawparah thing te sanphalung ccangkheit kha namaw hanlan raekuh; a lungkhu kya akhaan hae kha rae lah sanphalung a lungkhu lang te atolang kha thingphi te pong na thuh cih.15Sanphalung kha hynhcite na rae cih: asaepaw dong za thum, akopaw dong sung pangaw te ahangpaw dong sung thum athua cih.16Sanphalung avawlan kha na daw cih, tuh-e na dawpaw te pang laku khe dong kheit na uasah cih. Sanphalung akin langkhe thuakaw ccangkheit na rae cih zah akaw khang, angaelung khang te avaw khang cite khang thum lante na sak cih.17Vaawlui kaw um zah ahiinpaw ahysuepaw balyn kha ro khylan laephi vawlan tui ka ynsakuh cih. Laephi vawlan umpaw atyn-are a chih cih hae.18Thuasalama namaw kya tuh ka byakin kha ka tynsah cih; te nang tuh na ccapaw hae, na zu te na ccapaw hae zu hae ryte sanphalung lungkhu lang na tee cih oh.19Ahiinpaw sarangpaw aphuinphuin kya-e nopi te pise bua kheit cci kha na lah cih zah namaw ryte mih hiinnaw kha khynsah khylan sanphalung lungkhu lang na teekhae cih hae.20Pavaw hae kha mimaw phuin thathyhte, te sarangpaw hae kha mimaw phuin thathyhte, a vawthyapaw miakaw kha amaw phuin thathyhte, a phuin takyh kya-e sa ning cci kha mih hiinnaw khynsah khylan namaw kalan oun tee cih hae.21Aepaw looh phuin miakaw kha mah namaw ryte na cciakhae cih zah na ccakhung cih; te tuh-e tuh namaw te sarangpaw hae aepaw lang a tang cih,” a ci.22Pachia nynh kaw a pya thyhte Noah nynh pong a cyi. Alepaw Tuipayn
1Oute Bawipaw nynh Noah kha, “Nang te na innbyn balyn sanphalung lungkhu lang tee oh, pawccecize hynh-e she kya nang rou nynh ka malang na ding cipaw ka muih.2Athyaapaw sarangpaw hae balyn kya-e nopi te pise bua sari cci, te athyaa leipaw sarangpaw hae kya-e nopi te pise bua kheit cci,3te vaawlang e pavaw hae nopi te pise bua sari cci kha mah laephi vawlan balyn mih phuin raveihte hiinsah khylan namaw ryte sanphalung lungkhu lang teekhae hae.4Pawccecize atunin kyate nin sari he aro te, laephi vawlan nin sung pali te zi sung pali khua ka rawsah cih; te ka raepaw ahiinpaw miakaw kha laephi kyate ka roh cih,” a ci.5Te Pachia nynh kaw a pyapaw balyn kha Noah nynh pong a cyi.
6Laephi vawlan tuipayn he a ynku lyakhe Noah tuh kum za taruh acih vae.7Te Noah tuh a ccapaw hae, a zu te a ccapaw hae zu hae ryte tuipayn kyate lue khylan sanphalung lungkhu lang a tee hae.8Athyaapaw sarangpaw hae, te athyaa leipaw sarangpaw hae, pavaw hae te laephi vawlan avawthya hae paw kya-e,9nopi te pise bua kheit cci tuh Pachia nynh Noah kya kaw a pya thyhte Noah ryte sanphalung lungkhu lang a tee hae.10Te nin sari he aro te, laephi vawlan tuipayn tuh yn yhkuh vae.
11Noah kum za taruh a ci kum, sawpaw sah ningnaw , nin haw lae sari nin kya, myarya khupaw tuinaw hae balyn tuh phae koi zah vaawlui e thanlan-aw hae tuh oun hungkuh vae.12Te laephi vawlan nin sung pali te zi sung pali khua a rah.13Tuh-e nin ccaccei kyatuin Noah te a ccapaw hae, Shem, Ham te Jafeth, te Noah a zu te a ccapaw hae zu lu thum tuh sanphalung lungkhu lang a tee hae.14Minmin ryte ramsaw phuin miakaw, te sahiin-awvaw phuin miakaw balyn, te laephi vawlan a vawthyapaw miakaw, te pavaw phuin miakaw, sake hoipaw ahysuepaw miakaw mah a teebua hae.15Hiinnaw hy a hoipaw miakaw kya-e bua kheit cci tuh Noah ryte sanphalung lungkhu lang a tee hae.16Pachia nynh Noah kha kaw a pya thyhte alungkhu lang a tee hae paw tuh sarangpaw balyn kya-e nopi te pise nynh thua hae; te Bawipaw nynh Noah kha a lungkhu kya a khawsung vae.
17Tuipayn tuh nin sung pali lungkhu laephi vawlan a ynkuh thung; te tui tuh lungthung zah sanphalung kha hangthung zah laephi luki kyacia a hangsah vae.18Laephi vawlan tui tuh kaethung zah myarya a lungthung; te sanphalung kha tui vawlan a phaly.19Tui tuh laephi vawlan myarya a thawsae lante kaethung zah vaawlui zakaw umpaw ahangpaw mua hae balyn kha pong a vu hae.20Tui tuh mua hae luki cia kaethung zah dong haw lae pangaw akhu lan a vu.21Te laephi vawlan apiathyapaw ahysuepaw hae, pavaw hae, sahiin-awvaw hae, ramsaw hae, laephi vawlan avawpaw ahysuepaw balyn, te ccungccaw balyn tuh pong a chih hae;22Aroupaw laelung kya umpaw, naduh te hysue zah ahiinpaw atyn-are pong a chih hae.23Laephi vawlan umpaw ahiinpaw miakaw, ccungccaw hae te sarangpaw hae te a vawthyapaw hae, te vaawlang e pavaw hae kha Pachia nynh marya a ro; minmin kha laephi kyate ro athua hae. Noah amaw te sanphalung kya a umkheih hae paw rou nynh a lae hae.24Te tui tuh laephi vawlan nin za kheit sung pangaw lungkhu a kaethung. Tuipayn A Kynaw
1Thuasalama Pachia nynh Noah te sanphalung kya umkheih hae paw sarangpaw balyn te sahiin-awvaw balyn kha ning khyh hae. Te Pachia nynh laephi vawlan khivae zawsah zah tui tuh akybung;2myarya khunaw kya umpaw tuinaw hae te vaawlui kya-e thanlan-aw hae kha oun khawkuh zah vaawlui kya-e khuaa tuh akan vae,3te tui tuh laephi kyate byabyate akybung. Te nin za kheit sung pangaw aro tuh tui tuh aky vae;4te sawpaw sah sarinaw , nin haw lae sari nin kyakhe sanphalung tuh Ararat mua kya a tinkuh.5Tui tuh sawpaw sah hawnaw , cia po akybung; sawpaw sah hawnaw, masaty nin kya mua dung hae tuh oun langkuh hae.
6Nin sung pali aro te Noah nynh a raepaw sanphalung kya-e thanlan-aw kha hung zah,7va-aw sa kheit kha a saw; tuh-e va-aw nynh laephi vawlan tui arou makhia a khiakuh.8Oute Noah nynh laephi vawlan tui aky vae tah cipaw ny khylan vahu sa kheit kha a saw;9thuasalama vahu nynh ccunaw kha muihkuh khyh zah Noah umnaw sanphalung kalan phe a ki, pawccecize laephi vawlan balyn tui a um ung. Tukeiccuze Noah nynh a kuih kha dyngte vahu kha kyng zah amaw umnaw sanphalung lungkhu lang a nung.10Noah nynh nin sari a ngaw koute vahu kha sanphalung kyate bua a saw;11zete khe vahu tuh Noah kalan yn ki zah a mung te a teipaw hinlalyhpaw oliv naw kha yn thuakhae; tukeiccuze Noah nynh laephi vawlan tui aky vae cipaw a ny.12Oute Noah nynh nin sari a ngaw koute vahu kha bua a saw; vahu tuh Noah kalan yn ki vae khyh.
13Noah za taruh kum kheit a ci kum, sawpaw sah kheitnaw , kyaze masaty nin kyakhe laephi vawlan tui tuh karae aky vae; te Noah nynh sanphalung adawkuhpaw kha phou zah he a do tuh, arou takawpaw laephi kha a muih.14Sawpaw sah ningnaw kya nin kuin lae sari nin khe laephi tuh arou vae.15Oute Pachia nynh Noah kha,16“Namaw ryte na zu, na ccapaw hae te na ccapaw hae zu hae ryte sanphalung kyate pou ccavae oh.17Laephi vawlan pungthung khylan te pungzae khylan namaw ryte a um hae paw ahiinpaw miakaw, pavaw hae te sarangpaw hae te laephi vawlan a vawthyapaw miakaw kha namaw ryte poukhae hae,” a cipya.18Tukeiccuze Noah tuh a zu, a ccapaw hae te a ccapaw hae zu hae ryte a pou hae.19Te sarangpaw miakaw, avawpaw miakaw, te pavaw miakaw, laephi vawlan apiathyapaw miakaw tuh mimaw phuin thathyhte aphuphute sanphalung kyate a pou vae hae. Noah kya Pachia Byakinpyakunaw
20Oute Noah nynh Bawipaw hanlan silawhang ccangkheit kha rae zah athyaapaw sarangpaw te athyaapaw pavaw phuin takyh kya-e sa kheit cci kha lah zah silawhang vawlan khe maee-ute silawnaw kha a rae.21Te Bawipaw nynh lungrythuasah paw amynkhuhpaw kha he a thae tuh, Bawipaw nynh, “Ccungccaw keiccuze laephi hynh mazi thya bua ka law vae lan khyh, pawccecize ccungccaw thinlung tuh a di lya mawte hoy khyh; vaekheit ka la cyi vae hawkhate ahiinpaw ahysuepaw miakaw kha kharouh bua ka roh vae lan khyh.22Laephi she athang makhia,ccou ccyh te rue ccyh,akyaapaw ccyh te asopaw ccyh,hawnin te khuaccih,khuadae te khuazi,thang boi vae lan khyh,”cite a thinlung kya bua a ciku. Pachia te Noah Byakinkunaw
1Pachia nynh Noah te a ccaaw hae kha hythuapya hae zah, “Pungzae oh lah lungthung oh, laephi kya phe beih oh.2Laephi vawlan sarangpaw miakaw, vaawlang e pavaw miakaw, laephi vawlan avawpaw atyn-are, te rili lungkhu e ngasaw balyn nynh nanning kha ae rih cih oh zah a thyngkuh cih hae; minmin kha nae kuih kya pya athua hae.3Ahinpaw thingku-ruaku hae kha nanning kae pya oh hawte hiin zah apiathyapaw miakaw tuh nanning hanlan looh athua cih, atyn-are kha nanning kae pya oh.4Thuasalama saw kha achii te na aede lan khyh oh, pawccecize hiinnaw tuh chii kya nynh a um.5Pawccecize nae hiinnaw athuapaw nae chii kha kae ngiaru cih oh, sarangpaw balyn kyate tuh-e kha ka ngiaru cih, te ccangpaw lu kheit chii hanlan ka ngiaru cih.6Humhung zemah ccungccawlukhakheit chii khaa luasahpaw tuh,lukhakheit nynh a chii khaa luasah ru cih;pawccecize amaw muinsan alo lantePachia nynh ccungccaw kha a rae.
7Te nanning tuh pungzae oh lah lungthung oh, laephi vawlan ccaaw patae saah oh lah pungzae oh,” a cipya hae.
8Te Pachia nynh Noah te a ccaaw hae kyakhe,9“Nanning te naemaw koute nae ciihan hae kya thuasah,10te nanning ryte a um hae paw hiin zah mih hysue hae paw (ahiinpaw ahysuepaw athua hae paw) pavaw hae, sahiin-awvaw hae, ramsaw miakaw—sanphalung kyate a pou hae paw kya thuasah ka byakin kha ka tynsah cih.11Tuipayn keiccuze ahysuepaw balyn hynh papin buachih vae lan khyh, te laephi ro khylan tuipayn hynh mazi bua ynkuh vae lan khyh, nanning kya ka byakin kha ka tynsah,” a ci.12Pachia nynh, “Kamaw te naemaw, nanning ryte a um hae paw ahiinpaw ahysuepaw miakaw laku, malang she balyn hanlan ka raepaw byakin kya-e muihsahnaw tuh hynh-e nynh athua:13Ka sawdoih kha maeking kya ka nung vae, tuh-e tuh kamaw te laephi laku byakin muihsahnaw ccangkheit athua cih.14Maeking kha laephi luki ka umsah vae ze sawdoih tuh maeking kya a langkuh,15Kamaw te naemaw te nanning ryte a um hae paw ahiinpaw ahysuepaw balyn laku a umpaw ka byakin kha ka ning lan khyh zah ahysuepaw balyn kha tuipayn nynh mazi bua roh vae lan khyh.16Maeking kya sawdoih a umpaw kha he ka muih vae ze, Pachia te laephi vawlan umpaw ahiinpaw ahysuepaw balyn laku a umpaw zungzae tynpaw byakin kha ka ning lan khyh,” a ci.17Pachia nynh Noah kha, “E hynh kamaw te laephi vawlan umpaw ahysuepaw balyn laku ka tynsahpaw byakin muihsahnaw nynh thua,” a cipya. Noah te A Ccaaw hae
18Sanphalung atolang a pou hae paw Noah ccapaw hae tuh Shem, Ham, te Jafeth nynh thua hae. Ham tuh Kanaan a paaw nynh thua.19Hynh-e lu thum tuh Noah ccapaw hae thua zah hynh-e hae kyate laephi pynpi ccungccaw a pazaekuh.
20Noah tuh loophopaw thua zah misu khokhu masaty a raetupaw nynh thua.21te Noah nynh misutui kha neih zah a rui keiccuze a bu kya a ccakaete a ih.22Kanaan a paaw Ham nynh a ccakaete umpaw a paaw kha muih zah atolang umpaw a uno hae lu ning kha a hopya hae.23Te Shem te Jafeth nynh boeining zung kheit kha lah hae zah mih raw kya a khangkuh kou hae te, mih nulangte sihnuakuh hae zah a ccakaete umpaw mih paaw kha a bong hae; mih mae kha ccanglang a hawi keiccu hae ze, mih paaw nynh a ccakaete a umpaw kha muih vae khyh hae.24Noah nynh misutui a ruinaw kyate a lung yn cci zah he yn thaekuh tuh, a ccasoi nynh a tungvaw a cyipaw kha nyh zah,25“Kanaan tungvaw thyalawnaw um sah;a upaw hae see hae kyazeanyaa huapaw see lang tang sah,” a ci.
26Tukoute Noah nynh,“Ka Pachia Bawipaw nynhShem kha hythuapya vae sah,Kanaan tuh Shem see lang tangsah.
27Pachia nynh Jafeth khapungzaesah sah lah,a ciihan tuh Shem a bu hae kyakhuasah hae sah;Kanaan tuh Jafeth see langtang sah,” cite bua a ho.
28Tuipayn koute Noah tuh kum za thum sung pangaw hiin zah29kum za takua sung pangaw acih te a chih. Noah Ccaaw hae Ciihan (1Sh 1.5-23)
1Hynh-e hae tuh Noah ccapaw hae Shem, Ham te Jafeth ciihan thua hae zah tuipayn koute a saah hae paw nynh thua.
2Jafeth ccapaw hae tuh: Gomer, Magog, Madai, Javan, Tubal Meshek te Tiras nynh thua hae.3Gomer ccapaw hae tuh Ashkenaz, Rifath te Togarmah nynh thua hae.4Javan ccapaw hae tuh Elishah, Tarshish, Kittim te Rodanim nynh thua hae.5Hynh-e hae kyate rili kin te tuikoih hae kya umpaw ccungccaw hae lang a pazaekuh hae. Hynh-e hae tuh Jafeth ciihan thua hae zah mih phuin raveihte mih ram kya khuasah hae zah mih bya raveih kha a mang hae.
6Ham ccapaw hae tuh Kush, Izip, Put te Kanaan nynh thua hae.7Kush ccapaw hae tuh Seba, Havilah, Sabtah, Raamah te Sabteka nynh thua hae. Raamah ccapaw hae tuh Sheba te Dedan nynh thua hae.8Kush nynh a min Nimrod cikuhpaw ccapaw lu kheit kha mah a saah; tuh-e ccapaw tuh laephi vawlan masaty a lesaepaw nynh thua.9Aning tuh Bawipaw malang athawsaepaw sawkawthyapaw nynh thua; tukeiccuze phungtangbya kyaze “Bawipaw malang Nimrod hawte a thawsaepaw sawkawthyapaw” cite a um.10Masaty a peenaw tuh Shinar ram umpaw Babilon, Erek te Akkad nynh thua hae.11Tuh-e ram kyate Assiria ram lang cceih zah Nineveh khua, Rehoboth Ir khua, Kalah khua, te12Resen khua kha a rae hae, Resen khua tuh Nineveh khua te Kalah khua laku umpaw myarya lepaw khualipi nynh thua.13Izip tuh Ludi hae, Anam hae, Lehab hae, Naftuh hae,14Pathrus hae, Kasluh hae mih paaw nynh thua. Filistin ccungccaw hae tuh Koftor kyate nynh oun thokei hae.
15Kanaan tuh a ccatawccaw Sidon te Heth,16Jebus hae, Amor hae, Girgash hae,17Hiv hae, Arki hae, Sin hae,18Arvad hae, Zemari hae te Hamath hae mih paaw nynh thua. Nyalangte Kanaan minphuin hae tuh phiakuh hae zah,19Kanaan ramri tuh Sidon kyate Gerar langsang Gaza cia athua, te Sodom, Gomorrah, Admah, Zeboiim langsang Lasha cia athua.20Hynh-e hae tuh Ham ciihan nynh thua hae, mih phuin raveihte mih ram raveih kya khuasah hae zah mih bya raveih kha a mang hae.
21Jafeth a upaw Shem nynh mah ccaaw hae kha a saah, aning tuh Eber ccungccaw hae balyn mih paaw nynh thua.22Shem ccapaw hae tuh Elam, Asshur, Arpakshad, Lud te Aram nynh thua hae.23Aram ccapaw hae tuh Uz, Hul, Gether te Mash nynh thua hae.24Arpkshad tuh Shelah paaw thua zah Shelah tuh Eber paaw nynh thua.25Eber nynh ccaaw lu ning saah zah lu kheit a min tuh Peleg nynh thua, pawccecize Peleg ccyh lyakhe laephi ccungccaw hae tuh pong la phiakuh hae; Peleg a neitaw min tuh Joktan nynh thua.26Joktan tuh Almodad, Shelef, Hazarmaveth, Jerah,27Hadoram, Uzal, Diklah,28Obal, Abimael, Sheba,29Afir, Havilah te Jobab mih paaw nynh thua; hynh-e hae balyn tuh Joktan ccaaw hae nynh thua.30Mih umnaw ram tuh Mesha kyate Sefar langsang, nithua lang e mua alungnaw ram kyacia a ko.31Hynh-e hae tuh Shem ciihan nynh thua hae, mih phuin raveihte mih ram raveih kya khuasah hae zah mih bya raveih kha a mang hae.
32Hynh-e hae tuh mih ram kya mih thokeinaw thyhte Noah ccaaw hae mih ciihan nynh thua; hynh-e hae kyate minphuin hae tuh laephi vawlan tuipayn koute apazaekuh. Babel Innhangpaw
1Laephi vawlan ccungccaw balyn tuh bya phuin kheit kyalya la hoi hae zah alokuhpaw bya kha la ho hae.2Nithua lang te la nuekuh hae zah Shinar ram abialaenaw san kheit kya la thua hae zah tuin kya khua la sah hae.3Minmin nynh lu kheit te lu kheit hokuh hae zah, “Rang oh, anglae rae oh sih lah maee te hoyte rua oh sih,” a ciku hae. Te lung ccelang anglae kha mang hae zah bede nawlan bitumen kha a mang hae.4Tukoute minmin nynh, “Rang oh, khuapi khua kheit rae oh sih, te adungpaccy te vaawlui phe phahpaw innhangpaw ccangkheit sak oh sih lah ahmaw hanlan minthaannaw rae oh sih; tuhkhyhze tuh laephi pynpi kya pong ah phiakusei cih oh,” a ciku hae.5Te tuh-e ccungccaw hae nynh a rae hae paw khuapi te innhangpaw kha do khylan Bawipaw tuh yn rungbung.6Bawipaw nynh, “Minmin tuh minphuin phuin kheit thua hae zah mih balyn te bya phuin kheit nynh a ho hae; te hynh-e hynh a cyi lan hae paw kyaze masaty nynh athua ung; cyi lan cite a tuaku hae paw kha minmin hanlan athua kho leipaw um vae lan khyh.7Rang oh, rungbung oh sih lah, lu kheit te lu kheit bya a thaekuh khyh ccaw hae, mih bya kha laesah oh sih,” a ci.8Tukeiccuze Bawipaw nynh minmin kha tuin kyate laephi vawlan balyn phiasakuh hae zah khuapi kha rae leite a um vae hae.9Tukeiccuze tuh-e khua min tuh Babel a ci hae, pawccecize tuin kyakhe Bawipaw nynh laephi ccungccaw balyn kya-e bya kha laesah zah tuin kyate Bawipaw nynh laephi vawlan balyn a phiasakuh hae. Shem Ciihan hae (1Sh 1.24-27)
10Hynh-e hae hynh Shem ciihan nynh thua hae. Tuipayn koute kum ning aro te Shem tuh kum za kheit cih zah ccapaw Arpachshad kha a saah;11Arpachshad a pui koute Shem tuh kum za pangaw hiin zah ccangpaw ccapaw hae te ccanung hae mah a saah.12Arpachshad nynh sung thum kum pangaw acih te Shelah kha a saah;13Shelah a pui koute Arpachshad tuh za pali kum thum hiin zah ccangpaw ccapaw hae te ccanung hae mah a saah.14Shelah nynh kum sung thum acih te Eber kha a saah;15Eber a pui koute Shelah tuh za pali kum thum hiin zah ccangpaw ccapaw hae te ccanung hae mah a saah.16Eber nynh sung thum kum pali acih te Peleg kha a saah;17Peleg a pui koute Eber tuh kum za pali sung thum hiin zah ccangpaw ccapaw hae te ccanung hae mah a saah.18Peleg nynh kum sung thum acih te Reu kha a saah;19Reu a pui koute Peleg tuh za ning kum takua hiin zah ccangpaw ccapaw hae te ccanung hae mah a saah.20Reu nynh sung thum kum ning acih te Serug kha a saah;21Serug a pui koute Reu tuh za ning kum sari hiin zah ccangpaw ccapaw hae te ccanung hae mah a saah.22Serug nynh kum sung thum acih te Nahor kha a saah;23Nahor a pui koute Serug tuh kum za ning hiin zah ccangpaw ccapaw hae te ccanung hae mah a saah.24Nahor nynh kum kuin lae takua acih te Terah kha a saah;25Terah a pui koute Nahor tuh za kheit kum haw lae takua hiin zah ccangpaw ccapaw hae te ccanung hae mah a saah.26Terah nynh kum sung sari acih te Abram, Nahor, te Haran kha a saah hae.27Hynh-e hae tuh Terah ccaaw hae nynh thua hae. Terah nynh Abram, Nahor, te Haran kha a saah hae; te Haran tuh Lot a paaw nynh thua.28Haran tuh a puinaw Khaldi ccungccaw hae umnaw Ur khua kyakhe a paaw Terah a chi mawkhe a chih.29Abram te Nahor tuh zu a hoi hae; Abram zu min tuh Sarai thua zah Nahor zu tuh Haran ccanung Milkah nynh thua. Haran tuh Milkah te Isakah mih paaw nynh thua.30Sarai tuh tiin zah ccaawsaah khyh.31Terah tuh a ccapaw Abram, te Haran ccapaw athuapaw a mintawpaw Lot, te a ccapaw Abram zu athuapaw a monung Sarai ryte Khaldi ram Ur khua kyate thokuh hae zah Kanaan ram lang pynkheihlan a cceih hae; thuasalama Haran khua a thua hae te tuin kya khua a sah hae.32Terah tuh za ning kum pangaw hiin zah Haran khua khe a chih. Pachia nynh Abraham A Ko
1Bawipaw nynh Abram kha, “Na ram, na puizia hae te na paaw inn kyate pou lah, kae muihsah cih paw ram langkhe cciatua.2Nang kha myarya lepaw minphuin lang kae rae cih, nang tuh hythua ccoupaw na thua nawlan na min kha kae thaansah cih zah hythua kae pya cih.3Nang hythua ae pyapaw kha hythua ka pya cih zah nang thya ae lawpaw kha thya ka law cih; te laephi vawlan minphuin balyn tuh namaw liate hythuapya athua cih hae,” a cipya.4Tukeiccuze Bawipaw nynh a hopya hawte Abram nynh cceih zah Lot mah amaw kya a cceihbua. Haran kyate Abram a pou lya tuh sung sari kum pangaw acih vae.5Abram nynh a zu Sarai, a neitaw ccapaw Lot, a hoi hae paw uccaw balyn, te minmin nynh Haran khua kya a mue hae paw mih see hae ryte Kanaan ram lang cceih hae zah tuh-e ram kya a thua hae.6Abram tuh tuh-e ram kya po cceih zah Shekhem khua kya umpaw Moreh kya-e phaesi ku kya a thua. Tuh ccyh lya tuh tuh-e ram kya Kanaan ccungccaw hae a um hae.7Te Bawipaw nynh Abram kya yn langkuh zah, “E ram hynh na ciihan hae kalan ka pya cih hae,” a ci. Tukeiccuze Abram nynh amaw kya yn langkuhpaw Bawipaw hanlan tuh-e hmin kya silawhang ccangkheit kha a rae.8Tuin kyate Bethel khua nithua lang umpaw mua alungnaw ram lang nuekuh zah, niccaw lang umpaw Bethel khua te nithua lang umpaw Ai khua laku khe bu kha a sak; te tuin kyakhe Bawipaw hanlan silawhang ccangkheit rae zah Bawipaw min kha a ko.9Te Abram tuh san kheit koute san kheit cceih zah Negeb pee kya a thua. Abram Izip lang A Cceih
10Tuh-e ram kya ccakan yn ccih. Tukeiccuze Abram tuh ramccang ccungccaw lu kheit hawte sohsoh um khylan Izip ram lang a cceihbung, pawccecize tuh-e ram kya ccakan myarya a ccih.11Izip ram a teedyn hae khe Abram nynh a zu Sarai kha, “Nang tuh a puithyapaw nopi nynh na thua cipaw phe ka ny;12Izip hae nynh nang kha he ae muih hae tuh, ‘E hynh a zu nynh thua,’ ae ci cih hae zah kae kha yn theih cih hae, thuasalama nang kha ae hiin cih hae.13Tukeiccuze ‘A ccianung nynh ka thua’ na cipah cih hae zah namaw liate kae kha hoyte yn do-oih cih hae, te namaw liate ka hiinnaw kha yn haang cih hae,” a cipya.14Abram nynh Izip ram he a tee tuh myarya puithyapaw a zu kha Izip hae nynh a muih hae.15Faro siapharan kya ryalahtu bawi hae nynh a muih hae tuh a puithyanaw kong kha Faro kya a hopya hae. Te nopinung kha Faro inn lang a cciakhae hae.16Sarai liate Faro nynh Abram kha hoyte a do-oih; te Abram tuh tuu hae, tangnuapaw hae, lanntepaw hae, seenung hae te seepaw hae, lann pinung hae te kalauh hae kha a hoi.17Thuasalama Abram zu Sarai keiccuze Bawipaw nynh Faro te a inn um hae paw kya shethya kha a sawnua hae.18Tukeiccuze Faro nynh Abram kha ko zah, “Pawcce ka tungvaw hynh-e hynh na rae? ‘Aning tuh ka zu nynh thua,’ cite pawcce nae hopya khyh?19Kae nynh aning kha zu lang ka umkhae ccaw cite pawcce ‘Aning tuh ka ccianung nynh thua,’ cite na ho? Na zu kha atu ko lah cceih oh,” a cipya.20Te Faro nynh Abram konglangte a ccungccaw hae kha kaw a pya hae; te minmin nynh Abram kha a zu te a hoipaw balyn ryte a deebia hae. Abram te Lot A Phiakuh hae
1Abram tuh a zu, a hoipaw balyn, te Lot ryte Izip ram kyate Negeb lang a cceihthung.2Abram tuh sahiin, phua te sui khate myarya a hoirum.3Abram tuh Negeb kyate san kheit koute san kheit cceih zah Bethel pee, Bethel khua te Ai khua laku masaty bu la sakkuh zah,4masaty silawhang a la raenaw hmin kya bua a thua; te tuin kyakhe Abram nynh Bawipaw min kha a ko.5Abram te a cceihkheih hae paw Lot nynh mah tuu, miaa, vaetua, te amaw kya umpaw ccungccaw hae kha a hoi,6tukeiccuze minmin parouhte umkheih nawlan loram nynh zaw vae khyh, pawccecize mih hoirumnaw tuh eih lung zah pynkheihlan um kho vae khyh hae,7te Abram sahiin a rintu hae te Lot sahiin a rintu hae laku pekunaw a um. Tuh ccyh lya tuh Kanaan ccungccaw hae te Periz ccungccaw hae nynh tuh-e ram kya a um hae.8Te Abram nynh Lot kha, “Nang te kae laku thuasah, na sahiin rintu hae te ka sahiin rintu hae laku thuasah, pekunaw um nan sah; pawccecize aening tuh uno nynh ah thua.9Ram balyn tuh na malang a um khaw? Nang tuh kamaw kyate phiakuh, nang nynh voilang na ccia ze kae tuh ranglang ka cceih cih; nang nynh ranglang na ccia ze kae tuh voilang ka cceih cih,” a cipya.10Lot nynh do zah Jordan vahue Zoar khua lang ccianaw laanpi tuh Bawipaw khokhu hawkhate thuasah, Izip ram hawkhate thuasah, pawpaw kya balyn tui hoyte a umpaw kha a muih. E hynh Bawipaw nynh Sodom te Gomorrah khua hae a ro maw nynh thua.11Tukeiccuze Lot nynh Jordan vahue balyn kha pokuh zah nithua langkhe a cceih vae; tukeiccuze minmin tuh lu kheit te lu kheit a phiakuh vae hae.12Abram tuh Kanaan ram khe khua a sah, Lot tuh Vahue kya umpaw khuapi hae kyakhe khuasah zah Sodom khua pe khe bu a sakku.13Sodom khua e ccungccaw hae tuh ahoy lei hae paw te seinaw patae raete Bawipaw a rawse hae paw nynh thua hae. Hebron lang Abram Nuekunaw
14Abram kyate Lot a phiakuh koute Bawipaw nynh Abram kha, “Na umnaw hmin kyate nithua, niccaw, palung lang te alia langkhe dotua;15na muihpaw ram balyn kha namaw te na ciihan hae hanlan zungzae kae pya cih.16Na ciihan hae tuh laephi kya-e laenoi hawte ka lungsah cih hae; lukhakheit nynh laephi kya-e laenoi kha a ria kho zetuh na ciihan hae kha a ria kho cih.17Thokuh lah laephi asae lante thuasah, ako lante thuasah po cciatua, pawccecize tuh-e tuh nang kae pya cih,” a cipya.18Tukeiccuze Abram nynh a bu kha nue zah Hebron khua e Mamre kya-e phaesi ku hae pe khe khua a sah. Aning nynh Bawipaw hanlan silawhang ccangkheit kha a rae. Abram nynh Lot A Khum
1Shinar siapharan Amrafel, Ellasar siapharan Ariok, Elam siapharan Khedorlaomer te Goiim siapharan Tidal tuh2Sodom siapharan Bera, Gomorrah siapharan Birsha, Admah siapharan Shinab, Zeboiim siapharan Shemeber te Bela siapharan ryte rhaw a tukkuh hae (Bela tuh Zoar nynh thua).3E siapharan lu pangaw nynh mih rhawkaw hae kha Siddim Vahue kya a suelua hae (Siddim Vahue tuh Rili Chihpaw nynh thua). 4Minmin nynh Khedorlaomer kuihkaw kum haw lae ning a um hae, thuasalama kum haw lae thumnaw kya minmin nynh amaw kha a dou hae.5Kum haw lae palinaw kyakhe Khedorlaomer tuh amaw te a pankheih hae paw siapharan hae ryte oun thua hae zah Ashteroth-karnaim khua kya Refaim hae kha thuasah, Ham khua kya Zuzim hae kha thuasah, Kiriathaim vahue kya Emim hae kha thuasah,6Mua alungnaw Seir ram kya-e Hor hae kha thuasah tae hae zah laesia ram pe a umpaw Elparan khua cia a deehui hae;7te minmin tuh ki hae zah Kadesh ram umpaw En-mishpat kya a thua hae, te Amalek hae ram balyn te Hazazontamar kya umpaw Amor hae kha mah a tae hae.8Oute Sodom siapharan, Gomorrah siapharan, Admah siapharan, Zeboiim siapharan te Bela siapharan (Bela tuh Zoar nynh thua) nynh cceih hae zah Siddim Vahue khe9Elam siapharan Khedorlaomer, Goiim siapharan Tidal, Shinar siapharan Amrafel te Ellasar siapharan Ariok kha a dou hae, siapharan lu pangaw te siapharan lu pali tuh a doukuh hae.10Siddim Accya tuh bitumen hunghua te phe abeih; tukeiccuze Sodom te Gomorrah siapharan hae nynh a ccue lya hae khe abang tuh tuh-e hunghua lungkhu lang a ccah hae, tuhlaepaw hae tuh mua lang a ccue hae.11Tukeiccuze rhaw hae nynh Sodom te Gomorrah kya umpaw uccaw te looh balyn kha lah hae zah a cceih hae;12rhaw hae nynh Sodom khua kya umpaw Abram a neitaw ccapaw Lot te a uccaw hae kha mah lah hae zah a cciakhae hae.13Oute tuh-e rhaw kyate a luepaw lu kheit tuh yn thua zah Hebru paw Abram kyakhe tuh-e kong kha a hopya, Abram tuh Amor paw Mamre kya-e phaesi ku hae pe khuasahpaw nynh thua, Mamre tuh Eshkol te Aner mih upaw thua zah, tuh-e hae tuh Abram te a hobung hae paw nynh thua hae.14Abram nynh a neitaw ccapaw phe kyng hae cipaw he a thae tuh a inn kya pui hae zah a ccangpya hae paw ccungccaw za thum lu haw lae tarya kha cciakhae hae zah Dan khua cia a deehui hae.15Abram nynh khuazi khe a ccungccaw hae kha phia hae zah rhaw hae kha a tuk hae, amaw te a ryalahtu hae nynh rhaw hae kha tuk hae zah Damaskas khua palung lang umpaw Hobah cia a deehui hae.16Oute aning nynh rhaw hae nynh a lua hae paw uccaw balyn kha thuasah, a neitaw ccapaw Lot te a uccaw hae kha thuasah, nopi hae te ccungccaw hae kha thuasah bua a kikhae hae. Melkhizedek nynh Abram Hythua Pya
17Abram nynh Khedorlaomer te Khedorlaomer ryte a pankheih hae paw siapharan hae kha tae hae zah he yn ki tuh, Sodom siapharan nynh Shaveh Vahue kya Abram te tungku khylan a cceih (Shaveh Vahue tuh Siapharan Vahue nynh thua).18Te Ahang Huaccepaw Pachia kya-e ranpibawi a thuapaw Salem Siapharan Melkhizedek nynh sanlou te misutui kha yn ccyng zah,19“Vaaw te lae raetuAhang Huaccepaw Pachia nynhAbram kha hythuapya sah;20te na rhaw hae khana kuih kalan ae pyatuAhang Huaccepaw Pachia tuhthehoyte um sah!” citehythua a pya.Te Abram nynh atyn-are kya-e pumhaw pumkheit kha amaw kalan a pya.21Oute Sodom siapharan nynh Abram kha, “Ccungccaw hae kha kamaw kalan bua yn pya, thuasalama uccaw hae kha tuh lawkuh,” a cipya.22Te Abram nynh Sodom siapharan kha, “Vaaw te lae raetu Ahang Huaccepaw Bawipaw Pachia malang thyalawkute bya ka kinkuh zah,23‘Abram tuh ka hoirumsahpaw nynh thua,’ cite na ho khyh nawlan law syngtarawpaw thuasah, phanah rui ruikheit thuasah, na kya-e pawpaw sanmah ka lawkuh lan khyh, cite a hopya.24Pawpaw mah ka lawkuh lan khyh, thuasalama ka ccungccaw hae nynh a ae vae hae paw te kae cceihkheihpaw Aner, Eshkol, te Mamre nynh mue lan accan hae paw uccaw hae kha thang nynh ka lawkuh cih. Minmin nynh mue lan accan hae paw kha lawkuh hae sah,” a ci. Abram kya Pachia Byakinkunaw
1Tukoute Bawipaw bya tuh Abram kalan vizin lante yn thua zah, “Abram, na thinphang nan sah, kae tuh nang ae thungkhawpaw nynh ka thua; na lasung tuh myaryamaw ale cih,” a cipya.2Thuasalama Abram nynh, “Pou Bawipaw PACHIA, kae tuh ccaawsaah leipaw ka thua keiccuze pawmou nae pya cih? Ka rhoccoutu tuh Damaskas khuapaw Eliezer nynh thua,” a cipya.3Te Abram nynh, “Ciihan nae pya khyh, tukeiccuze ka inn kya a puipaw see lu kheit tuh ka rhoccoutu athua cih,” a ci.4Thuasalama Bawipaw bya tuh amaw kalan yn thua zah, “E paw tuh na rhoccoutu thua lan khyh, thuasalama na ccapaw ccaccei nynh na rhoccoutu athua cih,” a ci.5Te Abram kha atolang poukhae zah, “Vaawlui khuh dotua lah awsi hae khuh na ria kho ze riatua. Na ciihan hae tuh khuh-e awsi zeih acih cih hae,” a cipya.6Abram nynh Bawipaw kha zyn zah tuh-e a zynnaw tuh Bawipaw nynh dingnaw lang a riapya.7Te Bawipaw nynh Abram kha, “E ram hynh rho lang na ccou ccaw cite nang kha pya khylan Khaldi ccungccaw hae umnaw Ur khua kyate ae pousahpaw Bawipaw nynh ka thua,” a ci.8Abram nynh, “Bawipaw PACHIA, tuh-e ram tuh ka ccou cih cipaw pawtemou ka nyh cih?” a ci.9Bawipaw nynh Abram kha, “Kum thum cih paw vaetua tohlaw sa kheit, kum thum cih paw miaa nopi sa kheit, kum thum cih paw tuu pise sa kheit, vahu sa kheit te anopaw valaele sa kheit kha kamaw kalan yn thuakhae,” a cipya.10Aning nynh tuh-e balyn tuh Pachia kalan thuakhae zah a theih koute ccangning cci lang ccarou a bua hae, tuh-e a bua hae paw tuh a hawiliakuh lante a nung hae, thuasalama pavaw hae kha tuh ccangning lang bua khyh hae.11A nungpaw saw hae kha sawhe aepaw pavaw hae nynh he a zounua hae tuh Abram nynh a dee hae.12Khuanin he ccah zah Abram tuh marya a ihtheih, te ri lan um zah marae mohpaw mohnaw tuh Abram kya a ccah.13Te Bawipaw nynh Abram kha, “Na ciihan hae tuh milae ram kya ramccang ccungccaw lang a tang cih hae, tuin kya see lang a tang cih hae zah kum za pali lungkhu vawsaw pyanaw a ing cih hae cipaw ccaerarih lan nytua.14Thuasalama minmin rya a lawsahtu hae paw minphuin kha de ka tah cih hae, tuh-e koute minmin nynh hoirumnaw patae te a pou cih hae.15Nang tuh na minpaaw hae kalan daenaw te na cceih cih, te phe na taw te uu na thua cih.16She palinaw kya na ciihan hae tuh hynh-e ram kalan a ki cih hae, pawccecize Amor ccungccaw hae cyiseimenaw tuh phe ccing loh khyh,” a cipya.17Te khuanin ccah zah he yn moh tuh maeekhuh poupaw maee-ang ccangkheit te aruapaw maee tung ccangkheit oun langkuh hae zah abuakuhpaw saw hae laku khe a cceih hae.18Tuh-e nin khe Bawipaw nynh Abram kya byakinnaw rae zah, “E ram hynh na ciihan hae ka pya hae, Izip vaw kyate vawpi athuapaw Zufrates kyacia,19Ken hae ram, Keniz hae ram, Kadmon hae ram,20Hit hae ram, Periz hae ram, Refaim hae ram,21Amor hae ram, Kanaan hae ram, Girgash hae ram te Jebus hae ram kha ka pya hae,” a ci. Hagar te Ishmael
1Abram a zu Sarai tuh ccaawsaah khyh. Sarai nynh a min Hagar cikuhpaw Izip minphuin seenung lu kheit a hoi,2Sarai nynh Abram kha, “Bawipaw nynh kae kha ccaaw yn saah sah khyh; ka seenung hynh ikhae tua; aning nynh imua yn saahpah kho,” a cipya. Te Abram nynh Sarai bya kha a ngae.3Abram nynh Kanaan ram kya kum haw a um koute a zu Sarai nynh Izip minphuin a seenung Hagar kha a vawpaw Abram kalan zu lang a pya.4Abram nynh Hagar kha ikhae zah Hagar tuh ccaaw a poi; Hagar nynh ccaaw a poipaw he nyhkuh tuh a bawinung kha pawlangria vae khyh.5Tetuh Sarai nynh Abram kha, “Hagar nynh pawlang yn ria khyhpaw hynh nang na meseinaw nynh thua, kae nynh ka seenung kha na by kya kae pya zah ccaawpoipaw he a nyhkuh tuh kae kha pawlang yn ria vae khyh. Bawipaw nynh nang te kae laku byapia vae sah,” a cipya.6Abram nynh Sarai kha, “Na seenung tuh na kuihkaw nynh um; amaw kha na cyi ry thyhte cyih,” a cipya. Tetuh Sarai nynh Hagar kha thawte reih zah Hagar tuh amaw kyate po ccue vae.
7Bawipaw vaawpaw nynh Hagar kha Shur lang ccianaw laanpi kya umpaw ramkaw e tuidy pe khe a muih.8“Sarai seenung Hagar, paw kyate nae thua zah teilangmou na cceih cih?” a ci. Hagar nynh, “Ka bawinung Sarai kyate nynh kae ccue,” a ci.9Bawipaw vaawpaw nynh Hagar kha, “Na bawinung kalan kithui lah a kuihkaw khe la um,” a cipya.10Bawipaw vaawpaw nynh Hagar kha, “Na ciihan hae kha riatae um lei lan kae pungthungsahpah cih,” bua a cipya.11Te Bawipaw vaawpaw nynh Hagar kha,“Atu ccaaw na poi zahccapaw lu kheit na saah cih;a min tuh Ishmael  cite na phu cih,pawccecize Bawipaw nynhna riathaenaw kha ae nypya.
12Ishmael tuh apuapaw lann hawteathua cih,aning nynh ccungccaw miakaw khaa rawse cih zahccungccaw miakaw nynhamaw kha a rawse cih;te a puizia balyn te arawsekuh lantea um cih,” a cipya.
13Hagar nynh, “Pachia kha ka muih ccaccing, thuasalama ka hiin ung khaw?” ci zah amaw kalan bya yn hopahpaw Bawipaw kha, “El-roi” cite min a phu; pawccecize Hagar nynh, “Yn muihtupaw kha phe ka muih vae khaw?” a ci.14Tukeiccuze tuisung kha Beer-lahai-roi cite a ko hae, tuh-e tuh Kadesh te Bered laku nynh a um.
15Te Hagar nynh Abram kha ccapise lu kheit a saahpya; Hagar nynh a saahpyapaw a ccapaw kha Abram nynh Ishmael cite min a phu.16Hagar nynh Ishmael a saahpya lyaze Abram tuh sung tarya kum taruh acih vae. Byakinnaw kya-e Vingdungawkunaw (Exo 12.43—13.2)
1Abram sung takua kum takua he cih tuh Bawipaw nynh amaw kya langkuh zah, “Kae tuh Athunghuapaw Pachia nynh ka thua; ka malang khe cceih lah ccaenaw um lei lante um.2Nang te kae laku ka byakinnaw kha ka rae cih zah nang kha kae pungthungsah cih,” a cipya.3Te Abram nynh ccukharutungte a bakhung;4Pachia nynh, “Hynh-e hynh na hanlan ka byakinnaw nynh thua: Nang tuh minphuin patae hae thokeinaw paaw na thua cih.5Na min tuh Abram thua vae leite Abraham na cikuh vae cih; pawccecize nang kha minphuin patae hae thokeinaw paaw lang kae rae vae.6Nang kha myaryamaw a pungzaepaw lang kae rae cih; na kyate minphuin hae ka rae cih zah siapharan hae kha na kyate oun langkuh cih hae.7Ka byakinnaw tuh kae te nang laku, namaw koute na ciihan hae mih she takyh kya ka tynsah cih, pawccecize namaw te na ciihan hae Pachia ka thua cih, tuh-e tuh zungzae tynpaw byakinnaw nynh thua.8Atu ramccang ccungccaw lang na tangnaw oh Kanaan ram balyn hynh nang te namaw koute na ciihan hae kalan zungzae hanlan kae pya cih oh; te kae tuh mih Pachia ka thua cih,” a ci.
9Pachia nynh Abraham kha, “Nang te she takyh e na ciihan hae nynh ka byakinnaw hynh na zui cih oh.10Hynh-e tuh kae, nang te namaw koute na ciihan hae laku umpaw na zui lan oh paw ka byakinnaw nynh thua: Nanning laku e pise miakaw tuh vingdung na awkuh cih oh.11Nae vingdung e ngesaw kha na awkuh cih oh, tuh-e tuh kae te nang laku byakinnaw muihsahnaw athua cih.12Nae she takyh kya-e ccapise miakaw, nae inn e see kyate a puipaw thuasah, nae ciihan athua leipaw ramccang ccungccaw kya-e phua te na re oh paw lukhakheit thuasah, nin tarya he acih te vingdungaw athua cih.13Nae inn e see kyate a puipaw te nae phua te na re oh paw kha vingdungaw athua cih hae. Tukeiccuze nae ngesaw kya ka byakinnaw tuh zungzae tynpaw byakinnaw athua cih.14Vingdungawkuh leipaw ccapise humhung zemah a minphuin kyate vua athua cih; pawccecize aning nynh ka byakinnaw kha phe a ro vae,” a cipya.
15Pachia nynh Abraham kha, “Na zu Sarai kha Sarai cite na ko vae lan khyh, a min tuh Sarah a cikuh vae cih.16Sarah kha hythua ka pya cih zah amaw kyate ccapaw lu kheit kae pya cih. Aning kha hythua ka pya cih zah aning tuh minphuin hae nung athua cih; ccungccaw a uktu siapharan hae kha amaw kyate oun langkuh cih hae,” a cipya.17Te Abraham tuh baling zah a nuin, te Abraham nynh, “Kum za kheit acih vae paw pise nynh ccaawsaah kho ung vema? Kum sung takua acih vae paw Sarah nynh ccaawsaah kho ung vema?” cite amaw te amaw kha a ciku.18Te Abraham nynh Pachia kha, “Ishmael tuh namaw mitmuihnaw kya hiin vae sah,” a ci.19Pachia nynh, “Tuhte thua khyh, na zu Sarah nynh ccapaw lu kheit ae saahpah cih zah Isak cite min na phu cih. Amaw te amaw koute a ciihan hae hanlan zungzae tynpaw byakinnaw lang ka byakinnaw kha ka tynsah cih.20Ishmael konglang te na bya kha kae thaepya vae; amaw kha hythua ka pya cih, ka pungthungsah cih zah myarya ka lungthungsah cih; aning tuh bawi lu haw lae ning hae paaw athua cih zah minphuin lepaw lang ka rae cih.21Thuasalama khuavae atu ccyh kya Sarah nynh ae saahpah cih paw Isak kyakhe ka byakinnaw kha ka tynsah cih,” a cipya.22Pachia te Abraham byahokuh kou hae te, Pachia nynh Abraham kha a cciataw vae.
23Oute a ccapaw Ishmael, a inn e see hae kyate a pui hae paw balyn, a phua te a re hae paw balyn, te a inn kya umpaw pise hae laku e ccapise miakaw kha Pachia nynh a hopya thyhte Abraham nynh mih vingdung kha tuh-e nin ccaccei khe a aw hae.24Abraham a vingdungaw athua lya tuh sung takua kum takua acih vae.25A ccapaw Ishmael a vingdungaw athua lya tuh kum haw lae thum acih vae.26Tuh-e nin ccaccei khe Abraham te a ccapaw Ishmael tuh vingdungaw athua hae;27a inn kya puipaw see pise hae te ramccang ccungccaw kya-e phua te re hae paw pise hae, a inn e pise hae balyn tuh amaw ryte vingdungaw athua hae. Isak Puinaw hanlan Byakinnaw
1Bawipaw tuh Abraham kya Mamre kya-e phaesi ku hae pe khe a langkuh, ninthu khuaninso lyakhe Abraham tuh a bu thuakawzung kya a dahung.2Abraham nynh dothung zah amaw pe a thadynpaw pise hae lu thum kha a muih hae. Aning nynh minmin kha he a muih hae tuh tungku khylan a bu thuakawzung kyate ccue zah laephi kya a bakhung.3Abraham nynh, “Ka bawipaw, na malang maehoynaw ka mue zetuh na seepaw kae hynh kawtawte yn cciataw nan.4Tui beihtaraw kae lah hin sah, te nae ccu kha singkuh oh lah thingku kaw haeung oh.5Na seepaw kamaw kalan nae thua keiccu vae oh ze, na ae lan oh paw sanlou beihtaraw kae lah hin sah, nae thawbangpaw hoy hin sah, tukoute na cceih cih oh,” a cipya hae. Tukeiccuze minmin nynh, “Na ho vae hawte cyih,” a cipya hae.6Abraham tuh bu lungkhu umpaw Sarah kalan arangte tee zah Sarah kyakhe, “Ahoypaw vaekhui pung sung thum kha non lah sanlou lang arangte raetua,” a cipya.7Abraham nynh vaetua phu kalan ccue zah ahoypaw te athopaw vaetuataw sa kheit kha lah zah a seepaw kalan pya zah arangte ang a hynsah.8Oute samateitui ahaawpaw, samateitui te a paccyn vae paw vaetuataw a saw kha yn ccyng zah mih malang a nyapya hae; minmin nynh thingku kaw a ae lya hae khe mih pe khe a thadyn.
9Minmin nynh Abraham kha, “Na zu Sarah teimou um?” a ci hae. Te aning nynh, “Bu lungkhu nynh um,” a cipya hae.10Oute minmin kya-e lu kheit nynh, “Khuavae atu ccyh kya na kalan solei kae thua ung cih, te na zu Sarah nynh ccapaw lu kheit a saah cih,” a cipya. Sarah nynh tuh-e paw a nulang thuakawzung kyate bya kha a ngae.11Abraham te Sarah tuh mih kum tang vae zah a taw vae hae; Sarah tuh nopiny mah nyh vae khyh.12Tukeiccuze Sarah nynh nuin zah, “Kae mah ka taw vae zah ka vawpaw mah a taw vae, hoysahnaw tuh ka hoi ung vema?” cite amaw te amaw kha a ciku.13Bawipaw nynh Abraham kha, “Pawcce Sarah nynh nuin zah, ‘Phe ka taw vae zah imua tuh ka saah ccaccing ung vema?’ a ci.14Bawipaw hanlan pawpaw uccaw mah eih ru cipaw a um tou? Accyh yn zaw te khuavae atu ccyh kya na kalan bua kae thua cih zah Sarah nynh ccapaw lu kheit a saah cih,” a cipya.15Thuasalama Sarah nynh a ri keiccuze, “Ka nuin khyh,” cite a pheiku. Aning nynh, “Mang na nuin,” a ci. Sodom hanlan Abraham Sawsang
16Oute tuh-e ccungccaw hae nynh tuin kyate pou hae zah Sodom khua langkhe dote a cceih hae; te Abraham tuh minmin kha dohaw khylan mih kya a cceihbua.17Bawipaw nynh, “Ka rae lanpaw hynh Abraham kya ka phei cih tou?18Abraham tuh myarya lepaw te athawsaepaw minphuin athua cih zah, laephi vawlan minphuin balyn tuh amaw liate hythuapya athua cih hae.19Adingpaw te ahmepaw raenaw liate Bawipaw laanpi kha zui khylan Abraham nynh a ccaaw hae te amaw koute a innbyn hae kha a ccangpya ccaw hae cite amaw kha ka po vae, tuhcite Bawipaw nynh Abraham kya bya a kinpyaku thyhte a rae cih,” a ci.20Oute Bawipaw nynh, “Sodom te Gomorrah khua e thethyanaw tuh myarya le zah mih seinaw mah myarya alung.21Ka cceih cih zah kamaw kalan yn thuapaw mih thethyanaw thyhte minmin nynh a cyih hae tou, cyih khyh hae tou cipaw ka do cih; a cyi khyh hae ze a cyi khyhnaw hae kong kha ka nyh cih,” a ci.22Tukeiccuze tuh-e ccungccaw hae tuh tuin kyate pou hae zah Sodom khua langkhe a cceih hae, tuh ccyh lya Abraham tuh Bawipaw malang phang a thadyn.23Tukoute Abraham nynh Bawipaw kalan naekuh zah, “Ading hae paw kha ccungccaw hoylei hae ryte na rohkheih ccaccing cih hae tou?24Khuapi lungkhu miding sung pangaw a um lanze na roh cih tou? Tuh-e khua lungkhu um hae paw miding sung pangaw liate tuh-e khua kha ngaethya leite na roh cih tou?25Miding hae kha ccungccaw hoylei hae hawte athua khyh nawlan hae, miding hae kha tuh-e hae ryte chiakheih lanpaw tuh namaw kyate sawkuh sah. Laephi pynpi Byapiatu nynh ahmete byapia lan khyh tou?” a ci.26Te Bawipaw nynh, “Sodom khua khe miding sung pangaw ka muih lanze tuh-e miding hae liate tuh-e hmin balyn tuh ka ngaethya cih,” a ci.27Abraham nynh, “Kae tuh laenoi te buhhaw ka thua zemah Bawipaw kalan rawhoyte kae ho sah.28Miding sung pangaw thua leite sung pali lu pangaw a um lanze pawte athua cih? Lu pangaw azyahua keiccuze khuapi balyn kha na roh cih tou?” a ci. Te Bawipaw nynh, “Tuin kya sung pali lu pangaw ka muih zetuh ka roh lan khyh,” a ci.29Abraham nynh, “Tuin kya sung pali na muih lan zeso?” cite bua a ho. Bawipaw nynh, “Sung pali hae liate khua kha ka roh lan khyh,” a ci.30Te Abraham nynh, “Bawipaw, na thinria nan sah, ka ho ung cih. Tuh-e khua kya sung thum a um lan zeso?” cite a ci. Bawipaw nynh, “Tuin kya sung thum ka muih zemah ka roh lan khyh,” a ci.31Abraham nynh, “Bawipaw kalan rawhoyte kae ho sah, tuh-e khua kya lu kuin na muih lan zeso?” a ci. Bawipaw nynh, “Lu kuin hae liate khua kha ka roh lan khyh,” a ci.32Te Abraham nynh, “Bawipaw, vaekheit ka ho ung cih, na thinria nan sah. Tuh-e khua kya lu haw na muih lan zeso?” a ci. Bawipaw nynh, “Lu haw hae liate khua kha ka roh lan khyh,” a ci.33Te Bawipaw tuh Abraham te bya a hokuh kou hae te a cceih vae; Abraham mah a umnaw lang a ki vae. Sodom Khuaccaaw hae Hoyleinaw
1Vaawpaw lu ning tuh zetesang khe Sodom khua a thua hae, Lot tuh Sodom khua koikua kya a la haung. Lot nynh minmin kha he a muih hae tuh cciadue khylan thokuh zah laephi kya a bakhung.2Lot nynh, “Ka bawipaw oh, nae seepaw inn lang tee oh lah, khuazi rya oh, nae ccu kha singkuh oh; te awkhua takaw te na tho cih oh zah na cceih cih oh,” a cipya hae. Minmin nynh, “Kae tee lan khyh, khuazi khualae lungkhu kya nynh kae rya cih,” a ci hae.3Thuasalama Lot nynh thawte a soihbia hae keiccuze Lot inn lang cceih hae zah a tee hae; te Lot nynh minmin hanlan ransi phing leipaw sanlou kha thoupah hae zah minmin nynh a ae hae.4Thuasalama minmin a i maw hae khe Sodom khua e pise hae, pise adih ale balyn nynh inn kha a koihlu hae;5Lot kha ko hae zah, “Atu khuazi na kalan oun thua hae paw pise hae kha teimou um hae? Minmin te kae ikheih ccaw, kae kalan yn poukhae hae,” a ci hae.6Lot nynh thuakaw kyate tuh-e pise hae kalan atolang pou zah thuakaw kha a khaw,7te Lot nynh, “Uteno hae, hoyleinaw hynh beih rae nan oh cite kae ngia oh.8Pise te a ikheih loh lei hae paw ccanung lu ning ka hoi, minmin kha nanning kalan kae cciakhae hae sah lah, minmin kyakhe nae rythyte rae oh; hynh-e pise hae kya pawpaw mah cyih nan oh, pawccecize minmin tuh ka mikhia hae thua hae zah ka thungkhaw lan hae paw nynh thua,” a ci.9Thuasalama minmin nynh, “Cceih, khawkuh nan!” a ci hae. Tukoute minmin nynh, “Ramccang ccungccaw hawte nae thuapaw nang nynh byapiatu lang nae tansaku. Atu minmin tungvaw laeze namaw tungvaw accihhua lante kae cyih vae cih,” a ci hae. Te minmin nynh Lot kha ccaring eih hae zah thuakaw kha ro khylan thuakaw pe lang oun naekuh vae hae.10Thuasalama alungkhu e vaawccungccaw hae nynh mih kuih kha dyng hae zah Lot kha inn lungkhu lang sue hae zah thuakaw kha a khaw hae.11Te thuakaw pe um hae paw pise adih ale hae kha mih mit a mohsah hae, tukeiccuze minmin nynh thuakaw kha muih kho vae khyh hae. Sodom kyate Lot A Ccue
12Vaawccungccaw hae nynh Lot kha, “Hynh-e kya ccangpaw na ccungccaw lukhakheit a um ung tou? Na ccapaw hae, na ccanung hae, na ccanung hae mih vawpaw hae, te khua kya-e na ccungccaw athuapaw miakaw kha hynh-e kyate poukhae hae.13Pawccecize hynh-e hmin hynh kae roh cih. E ccungccaw hae nynh Bawipaw rawsete a siaruanaw hae tuh Bawipaw malang myarya ale vae, tukeiccuze Bawipaw nynh Sodom khua ro khylan kaening hynh oun saw vae,” a ci hae.14Tukeiccuze Lot nynh atolang pou zah a ccanung hae kha zu lang a dy hae paw a paepaw hae kha, “Thokuh oh, hynh-e hmin kyate pou oh; pawccecize Bawipaw nynh khuapi hynh a roh vae cih,” a cipya hae. Thuasalama minmin nynh a ccyasahpaw cite a tua hae.
15Awkhua takaw he yn thua tuh vaawccungccaw hae nynh Lot kha hopah hae zah, “Thokuh, hein kya umpaw na zu te na ccanung lu ning kha ko hae lah pou oh, tuhkhyhze tuh khuapi detahnaw kya maemih na thua vae cih oh,” a ci hae.16Thuasalama Lot tuh rarymamaw a um, te Bawipaw nynh Lot kha ngaethyaumsah keiccuze vaawccungccaw hae nynh amaw, a zu, te a ccanung lu ning kha mih kuih te sue hae zah khuapi atolang a poukhae kou hae te tuin kya a cciataw hae.17Vaawccungccaw hae nynh minmin kha khuapi atolang he thuakhae hae te, vaawpaw nynh, “Nae hiinnaw hanlan ccue oh; nulang do nan oh, pawpaw Vahue kya sanmah thadyn nan oh; mua lang ccue oh, tuhkhyhze tuh na maemih cih oh,” a cipya hae.18Te Lot nynh minmin kha, “Ka bawipaw hae, tuhte thua khyh;19nae seepaw kae tuh nae malang maehoynaw ka mue, te myarya ngaethya nae um sah oh zah, ka hiinnaw kha nae khum vae oh; thuasalama mua lang tuh ka ccue kho lan khyh, pawccecize ronaw nynh yn thuanua cih zah ka chihsei cih cipaw kha ka rih.20Dotua, khuh-e khua tuh nae zah ccue kho a ung cih, adihpaw khua mah athua. Khuh-e khua lang beih kae ccuesah lah khuh-e khua tuh adihpaw khaw athua? Khuh-e khua taraw kalan ka ccue zetuh ka hiinnaw kha khum athua cih,” a ci.21Aning nynh Lot kha, “Myarya hoy, nae ngiapaw kha kae ua cih zah na hopaw khua kha ka roh lan khyh.22Rangsakuh, na lue ccaw, tuh-e khua kalan ccue, pawccecize tuin kya na thua makhia pawpaw mah ka cyih kho khyh,” a ci. Tukeiccuze tuh-e khua tuh Zoar a ci hae.23Lot nynh Zoar khua he athua tuh laephi vawlan khuanin phe thuabia vae.
24Bawipaw nynh vaawlui luki Amaw kyate kemaee kha Sodom te Gomorrah kya khuaa lang a rawsah;25Bawipaw nynh tuh-e khuapi hae thuasah, Vahue balyn kha thuasah, khua hae kya umpaw ccungccaw balyn kha thuasah, laephi kya a popaw miakaw kha thuasah pong a ro.26Lot zu tuh nulang do zah loi tung lang phe tang.
27Awkhua takaw khe Abraham tuh Bawipaw malang a la thadynnaw hmin kalan a cceih.28Oute aning nynh Sodom te Gomorrah te Vahue balyn kha do zah maeephupi kya-e maeekhuh hawte a pouthungpaw laephi kya-e maeekhuh kha a muih.
29Tuhte Pachia nynh Vahue e khua hae kha he a roh tuh Abraham kha a liathui, tukeiccuze Lot nynh khua a la sahnaw khua hae kha Pachia nynh he a roh tuh ronaw lungkhu kyate Lot kha a pousah. Moab hae te Ammon hae Thokeinaw
30Te Lot nynh Zoar khua kyate cceihthung zah mua kyakhe a ccanung lu ning ryte a um hae, pawccecize aning nynh Zoar khua kya um lan a rih; tukeiccuze a ccanung lu ning ryte lungkarung kya a um hae.31Te atawccanung nynh asoinung kha, “Ah paaw tuh a taw vae, te laephi phung thyhte aening kha zu lang oun dy lanpaw pise laephi vawlan um vae khyh.32Yn cceih, ah paaw hynh misutui niasah sih, ah paaw ciihan kha tynsah khylan amaw kha ikhae sih,” a ci.33Tukeiccuze tuh-e khuazi khe minmin nynh mih paaw kha misutui a niasah hae; te atawccanung tuh a paaw te a ihkheih hae; atawccanung nynh a ihbuapaw te a thopaw kha a paaw nynh nyh khyh.34Awkhualan khe atawccanung nynh asoinung kha, “Atazi khe kae tuh ka paaw te kae ihkheih vae; atu khuazi mah misutui niasah sih, te ah paaw ciihan kha tynsah khylan amaw te ihkheih oh,” a cipya.35Tukeiccuze minmin nynh tuh-e khuazi khe mah mih paaw kha misutui a niasah hae; te asoinung nynh thokuh zah a paaw te a ihkheih hae; asoinung nynh a ibuapaw te a thopaw kha a paaw nynh nyh khyh.36Tukeiccuze Lot ccanung hae tuh parouh mawte mih paaw liate ccaaw a poi vae hae.37Atawccanung nynh ccapise saah zah Moab cite min a phu; aning tuh atu Moab minphuin hae mih thokeinaw paaw nynh thua.38Asoinung nynh mah ccapise saah zah Ben-ammi cite min a phu; aning tuh Ammon minphuin hae mih thokeinaw paaw nynh thua. Abraham te Abimelek
1Abraham tuh Mamre kyate Negeb ram lang cceih zah Kadesh te Shur laku khe a um. Gerar khua kya ramccang ccungccaw hawte a um lyakhe,2Abraham nynh a zu Sarah kong kha, “Aning tuh ka ccianung nynh thua,” cite a ho. Te Gerar siapharan Abimelek nynh Sarah kha a kosah hae.3Thuasalama khuazi Abimelek a maan kyakhe Pachia nynh langkuh zah, “Nang tuh na umkhaepaw nopi keiccuze na chih cih; pawccecize aning tuh vawpaw hoi vae paw nynh thua,” cite Abimelek kha a cipya.4Abimelek nynh Sarah kha ikhae loh khyh; tukeiccuze aning nynh, “Bawipaw, seinaw hoi leipaw ccungccaw hae kha na roh cih tou?5Abraham nynh, ‘Aning tuh ka ccianung nynh thua,’ a ci khaw? Te nopinung ccaccei nynh, ‘Aning tuh ka raepaw nynh thua,’ a ci. Hynh-e hynh adingpaw ka thinlung te athyaapaw ka kuih te nynh ka cyi,” a cipya.6Te Pachia nynh Abimelek a maan kyakhe, “Athua, adingpaw na thinlung te nynh hynh-e hynh na cyi cipaw ka ny; tuh apiaze kamaw kha rawsete na sei khyh nawlan kae tuh ae thungkhawpaw nynh ka thua. Tukeiccuze aning kha kae ty sah khyh.7Atu Abraham zu kha amaw kalan bua pya ccavae; pawccecize aning tuh profeh nynh thua, aning nynh namaw hanlan saw ae sangpah cih zah na hiin cih. Thuasalama nang nynh amaw kha bua na pya khyh zetuh nang te na umkheih oh paw balyn na chih ccaccing cih oh cipaw kha nytua,” a cipya.
8Tukeiccuze Abimelek nynh awkhua takaw te tho zah a see hae balyn kha ko hae zah hynh-e acyihkuhpaw balyn kha a hopya hae; te minmin tuh myarya a rih hae.9Te Abimelek nynh Abraham kha ko zah, “Kae tungvaw na raepaw hynh pawmou athua? Na tungvaw paw ka sei keiccu mou hynhcih alepaw hoyleinaw hynh ka tungvaw te ka peenaw kya nae thuakhaepya? Nang nynh cyi lan accan leipaw uccaw hae kha ka tungvaw phe na cyi vae,” a cipya.10Te Abimelek nynh, “Paw na tua keiccu mou e uccaw hynh na cyi?” cite Abraham kha a cipya.11Abraham nynh, “E kya umpaw balyn tuh Pachia rih khyh hae zah ka zu keiccuze kamaw kha yn theih cih hae cite ka tua pawte nynh e hynh ka cyi.12Te Sarah tuh ka ccianung ccaccing nynh thua, ka paaw ccanung nynh thua, thuasalama ka nung ccanung thua khyh; te aning tuh ka zu lang yn tang.13Te Pachia nynh ka paaw inn kyate he yn khiasakuh te, Sarah kha, ‘E hynh ka tungvaw na cyi lanpaw thawccinaw nynh thua: ah ccianaw hmin takyh kya, Aning tuh ka raepaw nynh thua cite na ho cih,’ ” ka cipya.14Oute Abimelek nynh tuu hae, vaetua hae, seenung hae te seepaw hae kha cciakhae zah Abraham kha a pya, te a zu Sarah kha mah bua a pya.15Abimelek nynh, “Na muihpaw loram hynh ka ram nynh thua; na lungrynaw kya khuasah,” a cipya.16Aning nynh Sarah kha, “Dotua, na raeepaw kha ngunphua thong kheit ka pya vae; tuh-e tuh nang te na umkheih oh paw ccungccaw balyn malang na thyaa cite langsakunawpaw nynh thua; nang tuh phe na thyaa ccaccing,” a cipya.17Te Abraham nynh Pachia kalan sawsang zah Pachia nynh Abimelek, a zu te a seenung hae kha dansah hae zah ccaaw a saah hae.18Pawccecize Abraham zu Sarah keiccuze Abimelek inn kya umpaw nopi balyn kha Bawipaw nynh pong a tingsah hae. Isak Puinaw (Heb 11.11)
1Bawipaw tuh a la ho vae hawte Sarah kya a thua, te Bawipaw nynh byakinpyaku thyhte Sarah hanlan a cyipya.2Abraham phe a taw vae khe Sarah nynh ccaawpoi zah Pachia nynh a la hopaw ccyh kyakhe ccapaw lu kheit a saahpya.3Sarah nynh a saahpyapaw a ccapaw kha Abraham nynh Isak cite min a phu.4Te Abraham nynh a ccapaw Isak tuh nin tarya he acih te, Pachia nynh kaw a la pya thyhte a vingdung kha a aw.5A ccapaw Isak a pui lya Abraham tuh kum za kheit acih vae.6Sarah nynh, “Pachia nynh nuinnaw yn pya vae; tuh-e kong a thaepaw miakaw nynh kamaw ryte a nuin cih hae,” a ci.7Tukoute “Sarah nynh ccaaw kha matei a zusah cih cite hum nynh mou Abraham kalan a hopah boi? Thuasalama phe a taw vae khe, amaw hanlan ccapaw lu kheit ka saahpya vae,” cite Sarah nynh a ci. Hagar te Ishmael A Saw hae
8Imua tuh yn le zah matei phia athua; te Abraham nynh Isak kha matei phia athua nin khe poi pi kha a tua.9Thuasalama Izip ccungccaw Hagar nynh Abraham hanlan a saahpyapaw ccapaw te Sarah a ccapaw Isak nynh a zue hae paw kha Sarah nynh a muih.10Tukeiccuze Sarah nynh Abraham kha, “E seenung te a ccapaw hynh po dee hae; pawccecize e seenung a ccapaw hynh ka ccapaw Isak te rhoccoukheih lan khyh hae,” a ci.11A ccapaw konglang athua keiccuze tuh-e bya nynh Abraham kha myarya a lungvawsaw sah.12Thuasalama Pachia nynh Abraham kha, “Imuapaw te na seenung keiccuze na lungvawsaw nan sah; Sarah nynh ae hopya thyhte cyitua, pawccecize Isak kya nynh na ciihan atyn cih.13Seenung ccapaw mah minphuin ccangkheit lang ka rae cih, pawccecize aning tuh na ciihan nynh athuabua,” a ci.14Tukeiccuze Abraham nynh awkhua takaw khe tho zah sanlou te saphua tui-ung te tui kaw kheit kha lah zah Hagar kha a pya. Te aning nynh tuh-e tuh Hagar a raw vawlan khangpah zah imua ryte a cciasah vae. Hagar nynh cceih zah Beersheba ramkaw khe a khiavuikuh.15Saphua kya-e tui he athang tuh Hagar nynh imuapaw kha thabu kaw khe a nung.16Oute Hagar nynh, “Imua a chipaw kha ka muih ry khyh,” cih zah kaih za kheit loukaw a sawnaw lang cceih zah imua te arawsekuh lante a dahung; aning nynh a dahung lyakhe thawmawte a rah.17Te Pachia nynh imuapaw roi kha a thae; te vaawlang te Pachia vaawpaw nynh Hagar kha ko zah, “Hagar, pawcce na lungriathae? Rih nan; pawccecize Pachia nynh imuapaw a umnaw kya-e a rawpaw roi kha a thae vae.18Thokuh, imuapaw kha hang lah na kuih te pom, pawccecize aning kha minphuin lepaw lang ka rae cih,” a ci.19Oute Pachia nynh Hagar mit kha awsah zah aning nynh tuisung ccangkheit kha a muih. Hagar nynh cceih zah saphua tui-ung kyakhe tui phe beih lan the zah imuapaw kha a niasah.
20Pachia nynh imuapaw kha umkhae zah aning tuh a lethung; imuapaw tuh ramkaw khe khuasah zah li myarya kawthyapaw lang yn tang.21Aning tuh Paran ramkaw khe khua a sah; te a nung nynh Izip ram e zu kha a dypya.
22Abimelek ccyh lya, Abimelek te a rhawbawipaw Fikol nynh Abraham kha, “Na cyipaw balyn kya Pachia nynh ae umkhae;23tukeiccuze kamaw thuasah, ka ccaaw hae thuasah, ka ciihan hae thuasah, nae ling khyh nawlan, nang kha lungzite kae ccuepe hawte nang nynh kamaw kya thuasah, ramccang ccungccaw hawte na umnaw ram kya thuasah nae ccuepenaw lan atu Pachia malang byakinkuh,” a ci.24Te Abraham nynh, “Bya ka kinku,” a ci.25Abimelek see hae nynh a la luade hae paw tuisung ccangkheit kong a lung-ungnaw kha Abraham nynh Abimelek kha a hopya,26Abimelek nynh, “Tuh-e tuh hum nynh a cyih cipaw ka nyh khyh; nae hopah khyh zah atunin cia tuh-e tuh ka thae khyh,” a ci.27Te Abraham nynh tuu hae te vaetua hae kha Abimelek a pya, te mih lu ning te byakinnaw a rae hae.28Abraham nynh tuutaw sa sari kha tuuphu kyate ccanglang a phia hae.29Te Abimelek nynh Abraham kha, “Na phiapaw hynh-e tuutaw hae sa sari asuilan hynh pawmou athua?” cite a khia.30Abraham nynh, “E tuisung hynh kae nynh ka thaepaw cite ccaekia lang yn tangpya nawlan, e tuutaw sa sari hynh ka kuih kyate nae lawpakuh cih,” a cipya.31Tuh-e hmin tuh Beersheba cite a ko hae, pawccecize mih lu ning te tuin kya byakinnaw kha a rae hae.32Minmin nynh Beersheba kya byakinnaw a rae kou hae te, Abimelek te rhawbawipaw Fikol tuh cceih hae zah Filistin hae ram lang a ki vae hae.33Abraham nynh Beersheba kyakhe mangking ku kukheit ling zah, zungzae tynpaw Pachia, Bawipaw min kha a ko.34Te Abraham tuh Filistin hae ram kya ramccang ccungccaw hawte khaw cia a um. Isak te Silawnaw
1Tukoute Pachia nynh Abraham kha a syntawtua. Pachia nynh, “Abraham,” cite ko zah Abraham nynh, “Hein kya mang ka um,” a ci.2Pachia nynh, “Na sungsahpaw na ccapaw, lu kheit kyalyapaw Isak kha hoei lah Moriah ram lang cciatua, te kae muihsah cih paw mua muakheit vawlan khe Isak khate maee-ute silawnaw kha raetua,” a ci.3Tukeiccuze Abraham nynh awkhua takaw te tho zah a lann kha ade de zah a ccapaw Isak te a ccangvae hae lu ning kha a hoei hae; aning nynh maee-ute silawnaw kha rae nawlan maeething kha tya zah Pachia nynh a hopyapaw asawnaw hmin lang a cceih.4Nin thumnaw kya Abraham nynh dothung zah tuh-e hmin kha asawnaw kyate a muih.5Te Abraham nynh a ccangvae hae kha, “Hein kya lann ryte la um oh; imuapaw te kae tuh khuhlang khuin kae la cceih cih; Pachia kae la beik cih zah athang te nae kalan bua kae ki cih,” a cipya hae.6Abraham nynh maee-ute silawnawpaw unaw lanpaw maeething kha lah zah Isak kha a puihsah, te amaw nynh maee te tangpaw kha ccyng zah lu ning te a cceih hae.7Isak nynh a paaw Abraham kha, “Apang,” cite ko zah a paaw nynh, “Ka ccaaw, hein kya mang ka um,” a ci. Isak nynh, “Maee te maeething tuh mang um zah maee-ute silawnaw lanpaw tuutaw teimou um?” a ci.8Abraham nynh, “Ka ccapaw, maee-ute silawnaw lanpaw tuutaw kha Pachia nynh oun pya cih,” cipah zah mih lu ning te pynkheihlan a cceih hae.
9Pachia nynh a la langsahpyapaw hmin kya a thua hae tuh, Abraham nynh silawhang ccangkheit kha rae zah maeething kha a khang. A ccapaw Isak kha he zah silawhang vawlan umpaw maeething vawlan khe a nung.10Te Abraham nynh a kuih kha dyng zah a ccapaw chia nawlan tangpaw kha a law.11Thuasalama Bawipaw vaawpaw nynh vaawlang te, “Abraham, Abraham!” cite ko zah Abraham nynh, “Hein kya mang ka um,” a ci.12Vaaw ccungccapaw nynh, “Imuapaw tungvaw na kuih hang nan, amaw kha pawpaw mah cyih nan; nang nynh Pachia kha na ri cipaw atu ka ny, pawccecize na ccapaw lu kheit kyalyapaw kha kamaw hanlan na hysah,” a ci.13Te Abraham nynh dothung zah a ki te thabu kya phang bawkuhpaw tuutepaw sa kheit kha a muih. Abraham nynh cceih zah a ccapaw ccelang tuutepaw kha lah zah maee-ute silawnaw kha a rae.14Tukeiccuze Abraham nynh tuh-e hmin kha, “Jehovah-jireh,” cite min a phu; atu she cia zemah, “Bawipaw mua vawlan tuh-e tuh paccynpya athua cih,” a ci hae.15Te Bawipaw vaawpaw nynh Abraham kha vaawlang te vaeningnaw ko zah,16“Bawipaw nynh kamaw min ccaccei te byakinnaw ka rae cih ci zah hynhte a ho: Nang nynh na ccapaw lu kheit kyalyapaw kha kamaw hanlan na hysah zah hynh-e hynh na cyi keiccuze,17nang kha hythua kae pya ccaccing cih, na ciihan kha vaawlui kya-e awsi zeih, te rili kin umpaw laesia zeih alung lan kae pungthungsah cih. Te na ciihan nynh mih rhaw hae khua koikua kha a uk cih hae,18te na ciihan liate laephi vaw e minphuin balyn hythuanaw a ccou cih hae, pawccecize ka kaw kha na ngae vae,” a ci.19Te Abraham nynh a ccangvae hae kalan a ki, te minmin nynh thokuh hae zah Beersheba lang pynkheihlan a cceih vae hae; Abraham tuh Beersheba kya khua a sah. Nahor Ccaaw hae
20Tukoute, “Na neitawpaw Nahor zu Milkah nynh ccaaw hae kha a saah,” cite Abraham kha a hopya hae:21Uz tuh ccatawccaw thua zah a neitaw tuh Buz nynh thua, Kemuel tuh Aram a paaw nynh thua,22te Khesed, Hazo, Pildash, Jidlaf te Bethuel nynh thua hae.23Bethuel tuh Rebekah a paaw nynh thua. Milkah nynh Abraham neitaw Nahor kha e ccapaw lu tarya hynh a saahpya hae.24Tuhpiaze Nahor a lovaenung Reumah nynh Tebah, Gaham, Tahash te Maakah kha a saah hae. Sarah Chinaw te Uunaw
1Sarah tuh za kheit kum kuin lae sari cia a she sae.2Te Sarah tuh Kanaan ram Kiriath-arba khua kya a chih (Kiriath-arba tuh Hebron khua nynh thua); Abraham tuh Sarah hanlan rawkhui khylan a cceih.3Abraham nynh a zu rhua pe te thokuh zah Hit ccungccaw hae kyakhe,4“Kae tuh nanning laku a um buapaw ramccang ccungccaw te mikhiapaw ka thua zah ka zu rhua uu nawlan shaw hmin san kheit beih yn pyabua oh,” a ci.5Te Hit ccungccaw hae nynh Abraham kha,6“Nang tuh kaening laku a thawsaepaw bawi lu kheit nynh na thua. Kae shawku hmin kyakhe pokuh lah na zu rhua kha uh; na zu rhua uu nawlan shaw hmin sankhakheit kha namaw hanlan a hysah leipaw kae um lan khyh,” a cipya hae.7Abraham nynh thokuh zah tuh-e ram e Hit ccungccaw hae malang bakhung zah,8“Ka zu rhua kha uhsah cite nae ry oh zetuh Zohar ccapaw Efron nynh9a hoipaw Makpelah lungkaryn kha yn zuapya nawlan beih hopah oh; tuh-e tuh a loo kin umpaw nynh thua. Khah-e shaw hmin kha a mee thathyhte nae malang yn zuapya nawlan yn soihbiapah oh,” a cipya hae.10Efron tuh Hit ccungccaw hae laku a haungbua; te Hit ccungccapaw Efron nynh tuh-e khua koikua lungkhu umpaw Hit ccungccaw hae balyn a thaenaw hae khe Abraham kha,11“Bawipaw, tuhte thua khyh, loo thuasah, loo lungkhu umpaw lungkaryn thuasah ka ccungccaw hae malang kae pya; na zu rhua kha uh ccaleih,” a cipya.12Oute Abraham nynh tuh-e ram e ccungccaw hae malang a bakhung.13Tuh-e ram e ccungccaw hae nynh a thaenaw hae khe Abraham nynh Efron kha, “Ka bya hynh yn ngaepya tua, ka zu rhua kha tuin kya ka uu ccaw, loo mee hynh kae pya cih, yn lawpakuh,” a cipya.14Efron nynh Abraham kha,15“Ka bawipaw, tuh-e laephi tuh phua za pali nynh a mee, nang te kae laku tuh-e tuh pawsang thua zawtou? Na zu rhua tuh uh ccaleih,” a cipya.16Abraham nynh Efron hopaw kha a nawccaw; te aning nynh Efron hanlan Hit ccungccaw hae nynh a thaenaw hae khe, kungku hae nynh a tou hae thyhte phua za pali kha toupah zah a pya.
17Tuhcite Mamre nithua lang e Makpelah kya umpaw Efron loo thuasah, loo lungkhu umpaw lungkaryn te thingku hae thuasah,18Hit ccungccaw balyn a umnaw hae, tuh-e khua koikua lungkhu a teepaw ccungccaw balyn malang khe Efron nynh Abraham kha a pya.19Tukoute Abraham nynh a zu Sarah kha Kanaan ram, Mamre te a hawiliakuh hae paw Makpelah loo kya umpaw lungkaryn kyakhe a uu.20Tuh-e loo te loo lungkhu umpaw lungkaryn kha Abraham nynh a hoipaw shawku hmin lang Hit ccungccaw hae nynh a pya hae. Isak Zudynaw
1Abraham tuh taw vae zah a kum myarya tang vae; Bawipaw nynh Abraham kha atyn-are kya hythua a pya.2Abraham nynh a inn kyaze a kum tang huapaw, a hoipaw balyn kha a uktupaw a seepaw kyakhe,3“Ka umnaw Kanaan ccungccaw hae mih ccanung hae hynh ka ccapaw zu lang na dypya khyh nawlan,4te ka ram, ka uno hae kalan na cceih cih zah ka ccapaw Isak hanlan zu na dypya nawlan, na kuih kha ka phae kaw nung lah vaaw te lae Pachia, Bawipaw min te bya kae kinsakuh cih,” a cipya.5A seepaw nynh Abraham kha, “Nopinung nynh e ram kalan kamaw kha zui ry leite a um lanze na ccapaw kha nae thuanaw ram lang ka kikhae cih tou?” a cipya.6Abraham nynh a seepaw kha, “Tuh-e ram lang ka ccapaw kha na kikhae khyh nawlan raeringkuh.7Ka paaw inn kyate thuasah, ka puinaw ram kyate thuasah yn cciakhae zah, ‘E ram hynh na ciihan kha ka pya cih,’ cite bya yn kinpakuhpaw, vaawlui Pachia, Bawipaw nynh a vaawccungccaw kha na malang a saw cih zah nang nynh ka ccapaw hanlan tuh-e ram kya-e zu kha na dypah cih.8Thuasalama nopinung nynh nang kha ae zui ry khyh ze nang tuh hynh-e ka byakin kyate na lue cih; ka ccapaw kha tuh-e ram lang na kikhae lan khyh,” a cipya.9Tukeiccuze a seepaw nynh a kuih kha a bawipaw Abraham phae kaw nung zah tuh-e kong lante bya a kinku.
10Oute tuh-e seepaw nynh a bawipaw kalauh sa haw kha cciakhae zah a bawipaw kya-e ahoypaw lasung aphuinphuin kha phu zah Mesopotamia ram Nahor khua lang a thokuh vae.11Tuh-e seepaw nynh khua atolang e tuisung pe khe kalauh hae kha a ryasah hae; tuh-e ccyh tuh zetesang, nopi hae nynh tui the lan a ccia ccyh hae nynh thua.12Te seepaw nynh sawsang zah, “Pou Bawipaw , ka bawipaw Abraham Pachia, atunin ka laan ka sui yn uasahpah lah ka bawipaw Abraham kya apaleihkuh leipaw na lungzinaw kha tynsah tua.13Kae tuh hynh-e tuisung pe khe ka thadyn zah khuaccaaw hae mih ccanung hae tuh tui the lan oun cceih vae hae.14Liaccanung kyakhe, ‘Thawccinawte tui ka nia ccaw, na tui-re kha beih yn pyatua,’ cite ka ho zah, ‘Neih ccaleih, na kalauh hae kha mah tui kae niasahpah cih hae,’ cite a hopaw liaccaw tuh na seepaw Isak hanlan na popaw thuasah. Tuhte athua zetuh ka bawipaw kya apaleihkuh leipaw na lungzinaw kha na tynsah vae cipaw ka nyh cih,” a ci.
15A sawsangnaw athang mawkhe Rebekah tuh a tui-re kha a raw vawlan yn khangkuh zah yn thua vae. Rebekah tuh Bethuel ccanung thua zah Bethuel tuh Abraham neitaw Nahor zu Milkah a ccapaw nynh thua.16Tuh-e liaccanung tuh myarya do ry um zah pise nynh a ikhae loh leipaw liaccady nynh thua. Aning nynh tuisung lang cceihbung zah a tui-re kya tui a the koute a cceihthung.17Oute seepaw nynh liaccanung kha tungku khylan ccuenua zah, “Thawccinawte na tui-ung kya-e tui beihtaraw kae niatua,” a cipya.18Aning nynh, “Ka bawipaw, neih ccaleih,” cih zah a tui-re kha a kuih kya nya kangmaw zah seepaw kha a niasah.19Seepaw kha tui he a pya koute liaccanung nynh, “Na kalauh hae hanlan mah tui phe a byn lan hae, ka la thepah ung cih hae,” a cipya.20Te tui-re kya-e tui kha tui nianawpaw banang lungkhu lang arangte ccae zah tui the khylan tuisung lang bua ccue zah kalauh hae balyn hanlan tui a thepya hae.21Bawipaw nynh ka khuaccongnaw kya laansui-uanaw yn pya tou, yn pya khyh tou cipaw ny nawlan pisepaw nynh liaccanung kha yccae leite phang a do.
22Kalauh hae tui he neih kou hae te, pisepaw nynh naduh kya huingkupaw sui ngawmuh aripaw te kia haw aripaw suikhawccan ccangning kha poh thuaa zah,23“Hum ccanung mou na thua? Yn hopya tua. Khuazi kae rya nawlan na paaw inn kya akhaan a um tou?” cite a khia.24Liaccanung nynh, “Kae tuh Nahor zu Milkah ccapaw Bethuel a ccanung nynh ka thua,” a cipya.25Te “Aroupaw loohku hae, ae lanpaw patae te khuazi ryanaw lanpaw hmin mah kae hoi,” a cipya.26Pisepaw nynh a lu bakhung zah Bawipaw kha beik zah,27“Ka bawipaw hanlan atynpaw a sungsahnaw te a lungzinaw kha a zosah leipaw, ka bawipaw Abraham Pachia, Bawipaw tuh thehoyte um sah. Ka bawipaw a uno hae inn lang cceihpaw laanpi kya Bawipaw nynh yn cciakhae,” a ci.
28Oute liaccanung nynh ccue zah a nung inn kyakhe e konglang balyn kha a hopya hae.29Rebekah nynh Laban cikuhpaw rae lu kheit a hoi; Laban nynh pisepaw umnaw tuisung lang a ccue.30Laban nynh a ccianung naduh kya a huingkupaw te a kuih kya-e khawccan hae kha muih zah, “Pisepaw nynh tuhte nynh yn hopya,” cite a ccianung Rebekah nynh a hopaw kha he a thae tuh, tuisung kya kalauh hae pe a thadynpaw pisepaw kalan a cceih.31Laban nynh, “Pou Bawipaw nynh hythua a pyapaw, kae inn lang yn cceih; pawcce atolang phang na thadyn? Inn te kalauh hae hanlan hmin kha phe ka paccyn kou vae,” a cipya.32Tukeiccuze pisepaw tuh inn lungkhu lang a tee; te Laban nynh kalauh hae mih uccaw kha khahpah hae zah, aroupaw loohku hae te ae lanpaw kha a pya hae, te pisepaw te a umkheih hae paw ccungccaw hae nynh mih ccu a singku nawlan hae paw tui kha a pya hae.33Oute pisepaw a malang khe ae lanpaw looh kha a nungpya. Thuasalama pisepaw nynh, “Ho lan ka hoipaw kha ka ho maw tuh ka ae lan khyh,” a ci. Laban nynh, “Hotua,” a cipya.
34Tukeiccuze pisepaw nynh, “Kae hynh Abraham seepaw nynh ka thua.35Bawipaw nynh ka bawipaw kha hythua patae pya zah a hoirumpaw lang a tang vae; Bawipaw nynh tuuphu, vaetua phu, sui, phua, seepaw hae te seenung hae, kalauh hae te lann hae kha a pya.36Te ka bawipaw zu Sarah nynh he a taw vae khe, ka bawipaw hanlan ccapaw lu kheit a saahpya; te a hoipaw balyn kha a ccapaw pong a pya vae.37Ka bawipaw nynh bya yn kinsakuh zah hynhte yn hopya: ‘Ka umnaw ram e Kanaan ccungccaw hae mih ccanung hae kha ka ccapaw zu lang na dypah lan khyh;38ka paaw inn lang te ka uno hae kalan na cceih cih zah ka ccapaw hanlan zu na dypah cih,’ cite yn tawsya.39Kae nynh ka bawipaw kha, ‘Nopinung nynh kamaw kha zui leite yn um kho,’ ka cipah zah,40ka bawipaw nynh, ‘Bawipaw malang a cceihpaw nynh ka thua; tuh-e Bawipaw nynh a vaawccungccaw kha nang te cciakheih lan ae sawpah cih zah na laansui kha ae uasahpah cih. Ka ccapaw hanlan ka uno hae kya-e, ka paaw innbyn kya-e zu kha na dypah cih.41Oute ka uno hae kya na thua zetuh bya kae kinsakupaw kyate na lue cih; minmin nynh nopinung kha ae pya khyh hae zemah bya kae kinsakupaw kyate na lue cih,’ yn cipya.
42“Atunin tuisung kya ka thua lyaze saw ka sang zah, ‘Ka bawipaw Abraham Pachia, Bawipaw , ka khuaccongnaw hynh ka laansui nae uasahpya zetuh,43tuisung pe ka thadyn lya, tui the lan yn cceihpaw liaccanung kyakhe, “Thawccinawte na tui-re kya-e tui beihtaraw kha nia lan yn pyatua,” cite ka hopah cih zah,44aning nynh kamaw kha, “Neih ccaleih, na kalauh hae hanlan kha mah tui ka la the cih,” cite yn khungpaw liaccanung tuh ka bawipaw ccapaw hanlan Bawipaw nynh a paccynpaw nopi thuasah,’ ka ci.
45“Ka thinlung kya ka sawsangnaw athang mawkhe Rebekah tuh a tui-re kha a raw vawlan yn khangkuh zah yn thua vae; te tuisung lang cceihbung zah tui a the. Kae nynh amaw kha, ‘Thawccinawte tui beih yn niasah,’ ka cipya.46Aning nynh a tui-re kha a raw kyate nya kangmaw zah, ‘Neih ccaleih, na kalauh hae kha mah tui kae niasahpah cih hae,’ a ci. Tukeiccuze ka neih zah, aning nynh kalauh hae kha mah a niasah hae.47Oute, ‘Hum ccanung mou na thua?’ cite ka khia zah aning nynh, ‘Milkah nynh Nahor a saahpyapaw, Nahor ccapaw Bethuel ccanung nynh ka thua,’ a ci. Tukeiccuze naduhnakahuing kha a naduh kya ka huingsah zah khawccan hae kha a kuih kya ka nawsaku.48Te ka lu kha ka bakhung zah, ka bawipaw a unopaw ccanung kha ka bawipaw a ccapaw zu lang dy khylan ahmepaw laanpi yn cciakhaepaw, ka bawipaw Abraham Pachia, Bawipaw kha ka beik zah the ka hoysah.49Tukeiccuze atu, nanning nynh ka bawipaw kha thanccingte thaw na ccih cih oh tou, na ccih lan khyh oh tou cipaw yn hopah oh, tuhteze nynh kae nynh ranglang laanpi khyhze voilang laanpi ka zuithya cih,” a cipya hae.
50Oute Laban te Bethuel nynh, “E uccaw hynh Bawipaw kyate yn thuapaw thua zah kaening nynh athya ahoy kha kae hopah kho khyh.51Dotua, Rebekah tuh na malang phang um, amaw kha ko lah cceih oh, Bawipaw nynh a ho vae thyhte Rebekah tuh na bawipaw a ccapaw zu lang tangsah,” a cipya hae.
52Abraham seepaw nynh mih bya kha he a thae tuh, laephi kya bakhung zah Bawipaw kha a beik.53Te seepaw nynh phua, sui te boeining hae kha thuaa zah Rebekah kha a pya; a nung te a raeepaw kha mah amee rupaw lasung a pya hae.54Oute seepaw te a umkheih hae paw pise hae tuh ae hae, neih hae zah khuazi tuh tuin kya a rya hae. Awkhua he a tho hae tuh seepaw nynh, “Ka bawipaw kalan kae la ki ccavae,” a cipya hae.55A nung te a raeepaw nynh, “Liaccanung tuh kaemaw kya azyahua nin haw loukaw sohsoh umbua hin sah; tukoute a cceih cih,” a ci hae.56Thuasalama seepaw nynh, “Accyh yn rosah nan vae oh, Bawipaw nynh ka khuaccongnaw kha laansui phe yn uasahpya vae; ka bawipaw kalan beih yn kisah ccavae oh,” a cipya hae.57Minmin nynh, “Liaccanung kha kae ko cih zah kae khia cih,” a ci hae.58Te minmin nynh Rebekah kha ko hae zah, “E ccungccapaw kya na cceihbua cih tou?” cite khia hae zah, aning nynh, “Ka cceihbua cih,” a ci.59Tukeiccuze mih ccianung Rebekah te Rebekah a do-oihtu kha Abraham seepaw te a ccungccaw hae kyakhe a cciasah bua hae.60Te minmin nynh Rebekah kha hythuapya hae zah,“Kae ccianung, nang tuhccungccaw athong patae nung langla tang vae ii;na ciihan hae nynhmih rhaw hae khua khala tae vae hae sah,” a ci hae.
61Te Rebekah te a see liaccaw hae nynh kalauh hae kha ccikuh hae zah seepaw kha a zui vae hae; tukeiccuze seepaw nynh Rebekah kha ko zah a cceih vae hae.
62Negeb kya khuasahpaw Isak tuh Beer-lahai-roi kyate yn thua.63Zetesang khe Isak nynh ramkaw lang a cceih; te ngaw he a do tuh kalauh hae oun cceih hae paw kha a muih.64Te Rebekah nynh dothung zah Isak kha he a muih tuh kalauh tungvaw te arangte rung zah,65seepaw kyakhe, “Aening te tungku khylan ramkaw kya yn cceihpaw pisepaw khuh hummou?” cite a khia. Seepaw nynh, “Ka bawipaw nynh thua,” cite a khung. Tukeiccuze Rebekah nynh mae kya bongkupaw boei kha lah zah a bongku.66Te seepaw nynh a la cyipaw atyn-are kha Isak kya a hopya.67Oute Isak nynh Rebekah kha a nung Sarah bu lungkhu lang a teekhae. Aning nynh Rebekah kha ko zah a zu lang a tang vae; Isak nynh Rebekah kha a sungsah. Tukeiccuze Isak tuh a nungchih koute Rebekah liate lungtangnaw a mue. Ccangpaw Abraham Ciihan (1Sh 1.32-33)
1Abraham nynh ccangpaw zu a min Keturah cikuhpaw kha dy zah,2Keturah nynh Zimran, Jokshan, Medan, Midian, Ishbak te Shuah kha a saahpya.3Jokshan tuh Sheba te Dedan mih paaw nynh thua. Dedan ccapaw hae tuh Asshurim, Letushim, te Leummim nynh thua hae.4Midian ccapaw hae tuh Efah, Efer, Hanok, Abida te Eldaah nynh thua hae. Tuh-e hae balyn tuh Keturah ccaawno hae nynh thua hae.5Abraham nynh a hoipaw balyn kha Isak a pya.6Thuasalama Abraham nynh amaw a hiin lyakhe a lovaenung te a saah hae paw ccapaw hae kha lasung pya hae zah a ccapaw Isak kyate asawnaw nithua lang umpaw ram kalan a cciasah hae. Abraham Chinaw te Uunaw
7Abraham tuh za kheit sung sari kum pangaw cia a she sae.8Abraham tuh a hiinkhua sae zah kou a tawthya, te accyh zaw tuh a chih. Amaw kha a ccungccaw hae kalan khe a sueluabua hae.9A ccaaw hae Isak te Ishmael nynh Makpelah lungkaryn kyakhe a uu hae, tuh-e lungkaryn tuh Mamre nithua lang umpaw Hit ccungccapaw Zohar ccapaw Efron loo kya nynh a um,10tuh-e loo tuh Abraham nynh Hit ccungccaw hae kyate a la repaw nynh thua. Tuin kyakhe Abraham tuh a zu Sarah te a uukheih hae.11Abraham a chih koute Pachia nynh a ccapaw Isak kha hythua a pya. Te Isak nynh Beer-lahai-roi khe khua a sah. Ishmael Ciihan (1Sh 1.28-31)
12E hae tuh Abraham ccapaw Ishmael ciihan nynh thua hae, Ishmael tuh Sarah seenung a thuapaw Izip ccungccanung Hagar nynh Abraham a saahpyapaw nynh thua.13E hae tuh Ishmael ccapaw hae mih min thua zah mih puinaw azuiku thyhte nynh thua: Ishmael a ccatawccaw tuh Nebaioth nynh thua; te Kedar, Adbeel, Mibsam,14Mishma, Dumah, Massa,15Hadad, Tema, Jetur, Nafish, te Kedemah nynh thua hae.16E hae tuh Ishmael ccapaw hae mih min, mih khua te mih umnaw hmin thyhte thua zah, mih phin thyhte bawi lu haw lae ning nynh thua hae.17(Ishmael tuh za kheit sung thum kum sari cia a she sae; aning tuh a hy thang zah a chih, te a ccungccaw hae kalan khe a sueluabua hae.)18Ishmael ciihan hae tuh Havilah kyate Shur kyacia a um hae. Tuh-e ram tuh Izip ram nithua lang, Assiria lang ccianaw laanpi kya nynh a um; aning tuh a ccungccaw hae balyn pepan khe nynh a um. Esau te Jakob Puinaw (Rom 9.10-12)
19Abraham ccapaw Isak a ciihan hae tuh hynh-e hae nynh athua hae: Abraham tuh Isak a paaw nynh thua,20Isak nynh kum sung pali he acih te Rebekah kha a dy, Rebekah tuh Mesopotamia ram umpaw Aramean minphuin Bethuel ccanung thua zah Aram minphuin Laban ccianung nynh thua.21Isak a zu tuh a tiin keiccuze Isak nynh Bawipaw kalan saw a sang; Bawipaw nynh a sawsangnaw kha thaepah zah a zu Rebekah tuh ccaaw a poi.22A lungkhu e imua hae tuh lu kheit te lu kheit a dyykuh hae; te a nung nynh, “Hynhcite a cyiku lanze pawcce ryakhae ka la hiin?” a ci. Tukeiccuze Bawipaw kha khia khylan a cceih.23Te Bawipaw nynh,“Na vue kya minphuinphuin ning a um,na saahpaw minphuin phuin ning hae tuhphia athua cih hae;lu kheit tuh ccangpaw lu kheit laezea thawsaehua cih,atawccapaw nynh asoipaw kharya a lawpah cih,” a ci.
24Ccaaw pui ccyh yn zaw tuh a vue kya ccaawphei hae paw a la um hae.25Masaty a puipaw tuh se zah a pyn balyn tuh aming saepaw boeining nynh alo; tukeiccuze Esau cite min a phu hae.26Tukoute a neitaw he yn pui tuh a upaw Esau ccukhung kha phang a kyng; tukeiccuze Jakob cite min a phu hae. Minmin a pui lya hae tuh Isak tuh kum sung taruh acih vae.27Imua hae tuh he oun lethung hae zah Esau tuh sawkawthyapaw lang yn tang, rampou a huapaw lang yn tang. Jakob tuh daebabipaw thua zah bu kya a um thyapaw nynh thua.28Isak nynh Esau a kawpaw saw kha palei a ae keiccuze Esau kha a sungsah; thuasalama Rebekah nynh Jakob kha a sungsah. Esau nynh Ccatawccaw Thuanaw A Zua
29Vaekheit tuh Jakob nynh bia ehang la sah lyakhe Esau tuh rampounaw kyate yn thua zah myarya a vuelaw.30Tukeiccuze Esau nynh Jakob kha, “Myarya ka vuelaw, asepaw aepaw abang kha beih yn dang,” a cipya. (Tukeiccuze Esau kha Edom cite a ko hae.)31Jakob nynh, “Ccatawccaw na thuanaw kha masaty yn zuapah,” a ci.32Esau nynh, “Ka chih vae cih; ccatawccaw thuanaw nynh kamaw hanlan ccungkianaw pawmou a um cih?” a ci.33Jakob nynh, “Masaty bya yn kinpakuh,” a ci. Tukeiccuze Esau nynh byakinpakuh zah ccatawccaw a thuanaw kha Jakob kalan phe a zua.34Oute Jakob nynh a pyapaw sanlou te bia ehang kha Esau nynh ae zah a nia, te thokuh zah a cceih vae. Tuhcite Esau nynh ccatawccaw a thuanaw kha pawlangria khyh. Gerar te Beersheba kya Isak
1Abraham she lya-e langmaw ccakannaw a pui apiaze tuh-e ram kya ccangpaw ccakannaw a pui. Tukeiccuze Isak tuh Filistin hae mih Siapharan Abimelek umnaw Gerar khua lang a cceih.2Bawipaw nynh Isak kya langkuh zah, “Izip ram lang cceihbung nan; kae muihsah cih paw ram kya khuasah tua.3E ram kya ramccang ccungccaw hawte umtua, nang kha kae umkhae cih zah hythua kae pya cih; pawccecize e ram balyn hynh namaw te na ciihan hae kae pya cih oh zah na paaw Abraham kya ka kinkupaw byakinnaw kha ka ccingsah cih.4Na ciihan tuh vaawlui e riatae lei awsi zeih kae pungzaesah cih zah, e ram balyn hynh ka pya cih hae; te laephi vaw e minphuin balyn tuh na ciihan liate hythuanaw a ccou cih hae,5pawccecize Abraham nynh ka bya kha ngae zah ka kawbya hae balyn kha a zui,” a ci.
6Tukeiccuze Isak nynh Gerar kyakhe khua a sah.7Tuh-e ram kya umpaw ccungccaw hae nynh a zu kong kha he khia hae ze, Isak nynh, “Aning tuh ka ccianung nynh thua,” a ci; pawccecize “Ka zu,” cite ho lan a rih, “Rebekah tuh a puithyapaw thua zah tuin ram e ccungccaw hae nynh Rebekah keiccuze kamaw kha yn theihsei cih hae,” cite a tuaku.8Isak nynh tuin kya khaw a um tuh, a zu Rebekah te a balokuh hae paw kha Filistin hae Siapharan Abimelek nynh thanlan-aw kyate do zah a muih.9Tukeiccuze Abimelek nynh Isak kha ko zah, “Rebekah tuh na zu khaw athua! Pawcce, ‘Aning tuh ka ccianung nynh thua,’ na ci?” cite a khia. Isak nynh, “Aning keiccuze ka chihsei cih cite ka tua keiccu nynh thua,” a cipya.10Abimelek nynh, “Pawcce kae tungvaw hynhte na cyi? Lukhakheit nynh na zu kha zoikadeih lan a ikhaesei ze kae tungvaw hoyleinaw kha na thuakhae cih,” a ci.11Tukeiccuze Abimelek nynh ccungccaw balyn kha raeringnaw pya hae zah, “Humhung zemah e ccungccapaw hynh thuasah, a zu hynh thuasah a typaw tuh chia athua cih,” a ci.
12Isak nynh tuh-e ram kya ccacii ccou zah tuh-e kum kya aleit za kheit a rue. Bawipaw nynh amaw kha hythuapya zah,13Isak tuh a hoirum; aning nynh houhouh hoirum zah myarya a hoirumpaw lang a tang.14Aning nynh tuuphu hae, vaetua phu hae te see patae a hoi keiccuze Filistin hae nynh a tungvaw eiungnaw a hoi hae.15(A paaw Abraham she lyaze a paaw see hae nynh a la thae hae paw tuisung balyn kha Filistin hae nynh laephi phe beih lan a thei hae.)16Te Abimelek nynh Isak kha, “Kaemaw kyate cceih ccavae; nang tuh kaening laeze eih na lesaehua vae,” a cipya.
17Tukeiccuze Isak nynh tuin kyate pou zah Gerar vahue kyakhe khua a sah.18A paaw Abraham she lyaze la thae hae zah, Abraham he a chih te Filistin hae nynh laephi a la thei hae paw tuisung hae kha Isak nynh bua a thae; tuh-e tuisung hae kha a paaw nynh min a la phu hawte Isak nynh min a phu hae.19Isak see hae nynh vahue kya he a thae hae tuh tuidy ccangkheit a muih hae,20Gerar khua e sahiin rintu hae nynh Isak sahiin rintu hae te pekuh hae zah, “Tui hynh kae tui nynh thua,” a ci hae. Tuhte minmin nynh amaw te a luakuh hae keiccuze Isak nynh tuh-e tuisung tuh Esek cite min a phu.21Oute Isak see hae nynh ccangpaw tuisung bua thae hae zah, tuh-e tuisung mah bua a luakuh hae keiccuze Isak nynh Sitnah cite min a phu.22Aning nynh tuin kyate nuekuh zah ccangpaw tuisung kha a thae, tuh-e tuisung tuh luakuh vae khyh hae, tukeiccuze tuh-e tuisung tuh Rehoboth cite min a phu, te aning nynh, “Bawipaw nynh aening hanlan umnaw hmin kha atu yn pya vae zah, e ram kya ah pungthung vae cih oh,” a ci.
23Isak tuh tuin kyate Beersheba lang a cceihthung.24Te tuh-e khuazi ccaccei khe Bawipaw nynh Isak kya langkuh zah, “Kae tuh na paaw Abraham Pachia nynh ka thua; rih nan, pawccecize nang kha kae umkhae zah, ka seepaw Abraham liate hythua kae pya cih zah na ciihan kha patae kae pungzaesah cih,” a cipya.25Tukeiccuze Isak nynh tuin kya silawhang ccangkheit rae zah Bawipaw min kha a ko, te a bu kha tuin kya sak zah a see hae nynh tuisung ccangkheit a thae hae. Isak te Abimelek Byakinkunaw
26Oute Abimelek tuh tuanaw pyatu Ahuzzath, a rhawbawipaw Fikol ryte Gerar khua kyate Isak kalan a cceih hae.27Isak nynh minmin kha, “Nanning tuh kamaw kha nae hua oh zah nae kyate nae dee oh paw khaw na thua oh, pawccemou ka kalan nae ccia oh?” a ci hae.28Minmin nynh, “Bawipaw nynh nang kha ae umkhae cipaw ccaerarih lan kae muih vae; tukeiccuze nang te kaening laku thyalawkute byakinnaw rae oh sih,29tuhteze nynh na tungvaw ahoy leipaw rae leite hoyte daenaw te kae cciasah hawte kaening tungvaw kya ahoy leipaw na rae lan khyh. Nang tuh Bawipaw nynh hythua a pyapaw nynh na thua,” a cipya hae.30Tukeiccuze Isak nynh poi tuapah hae zah ae hae zah a neih hae.31Minmin nynh awkhua takaw te tho hae zah lu kheit te lu kheit thyalawkute byakinnaw kha a rae hae; te Isak nynh minmin kha dohaw hae zah daenaw te a cceih vae hae.32Tuh-e nin khe Isak see hae nynh oun thua hae zah tuisung a thae hae paw kong kha Isak kyakhe, “Kaening nynh tui kae muih vae,” cite a hopya hae.33Aning nynh tuh-e tuisung kha Shibah cite min a phu; tukeiccuze tuh-e khua min tuh atunin cia Beersheba cite a ko hae.34Esau nynh kum sung pali he acih tuh Hit ccungccaw Beeri ccanung Judith te Hit ccungccapaw Elon ccanung Basemath kha zu lang a dy hae;35tuh-e nopi hae nynh Isak te Rebekah kha mih lungvawsaw sah hae. Isak nynh Jakob Hythua Pya
1Isak tuh taw vae zah a mitmoh keiccuze ngawmuih kho vae khyh. A ccatawccaw Esau kha, “Ka ccapaw,” cite ko zah Esau nynh, “Hein kya mang ka um,” a ci.2Isak nynh, “Ka taw vae zah ka chih cih nin kha ka nyh khyh.3Tukeiccuze na zunghe hae, na the te na li kha lawkuh lah ramkaw lang sawde lan la cceih lah saw yn kawpya tua.4Ka chi maw hythua kae pya ccaw, leih ka rythyapaw, kou thuapaw looh kha yn paccynpah lah, ka ae lan yn pyatua,” a cipya.
5Isak nynh a ccapaw Esau a hopyapaw kha Rebekah nynh zya a la ngae. Tukeiccuze Esau nynh sawkaw lan zah thuakhae lan cite ramkaw lang a ccia lyakhe,6Rebekah nynh a ccapaw Jakob kha, “Na paaw nynh na upaw Esau kyakhe,7‘Ka chi maw Bawipaw malang nang kha hythua kae pya ccaw, saw yn kaw lah kou thuapaw looh kha ka ae lan yn paccynpah,’ cite a hopyapaw kha phe ka thae.8Tukeiccuze ka ccapaw, kaw kae pyapaw ka bya thyhte cyitua.9Na paaw nynh leih a rythya hawte, kou thuapaw looh kha na paaw elang ka paccynpya ccaw, miaa phu kalan la cceih lah miaa taraw sa ning kha yn po lah yn thuakhae;10a chi maw hythua ae pya ccaw, tuh-e looh tuh na paaw a ae lan na cciakhae cih,” a cipya.11Thuasalama Jakob nynh a nung Rebekah kha, “Ka upaw Esau tuh a mingrungpaw thua zah kae tuh ngesaw anaepaw nynh ka thua.12Ka paaw nynh poh yn haetua zetuh, yn lingpaw nynh thua cite yn tua cih zah ka tungvaw hythuapya leite thya yn lawsei cih,” a cipya.13A nung nynh, “Ka ccapaw, na tungvaw thyalawnaw ccaw lan accan lanze, ka tungvaw ccah vae sah, ka bya kha ngaete cceih lah miaa taraw hae kha yn thuakhae,” a cipya.14Tukeiccuze aning nynh cceih zah miaa taraw hae kha a nung kalan a thuakhae; te a nung nynh kou thuapaw looh kha a paaw nynh leih a ry hawte a paccynpya.15Oute Rebekah nynh a ccatawccaw Esau kya-e innvaw umpaw boeining ahoy huaccepaw kha lah zah a ccasoi Jakob kha a lawsaku;16te miaa taraw phua kha a ccapaw kuih kya te a ming um leinaw a nging kyakhe a voipya.17Oute a paccynpaw kou thuapaw looh te sanlou kha a ccapaw Jakob kha a pya.
18Te Jakob nynh a paaw kalan cceih zah, “Apang,” cite ko zah a paaw nynh, “Hein kya mang ka um, ka ccapaw, nang tuh hummou na thua?” a ci.19Jakob nynh a paaw kha, “Na ccatawccaw Esau nynh ka thua. Nae hopya hawte phe kae cyi vae; thokuh lah dahungtua, hythua nae pya ccaw, saw kae kawpyapaw hynh aetua ccavae,” a cipya.20Thuasalama Isak nynh a ccapaw kha, “Ka ccapaw, hynhcih arang lante nae thuakhaepaw hynh pawtemou athua?” cite khia zah Jakob nynh, “Bawipaw na Pachia nynh ka laan ka sui yn uasahpya keiccu nynh thua,” a cipya.21Oute Isak nynh Jakob kha, “Ka ccapaw, nang hynh ka ccapaw Esau na thuate na thua khyh kha ny nawlan haetua kae ry zah ka kalan yn naeku tua,” a ci.22Tukeiccuze Jakob nynh a paaw Isak kalan naekuh zah a paaw nynh haetua zah, “Roi tuh Jakob roi nynh thua, thuasalama kuih tuh Esau kuih nynh thua,” a ci.23A kuih tuh a upaw Esau kuih hawte a mingrung keiccuze a paaw nynh syntaw khyh zah hythua a pya.24A paaw nynh, “Nang hynh ka ccapaw Esau na thua ccaccing tou?” cite bua khia zah, “Ka thua,” a cipya.25Oute a paaw nynh, “Saw tuh yn cciakhae tua, tuh-e tuh ka ae cih zah hythua kae pya cih,” a cipya. Tukeiccuze Jakob nynh saw kha cciakhae zah a paaw nynh a ae; te misutui kha cciakhae zah a paaw nynh a nia.26Oute a paaw Isak nynh Jakob kha, “Ka ccapaw, yn naekuh lah yn myngtua,” a cipya.27Tukeiccuze Jakob nynh naekuh zah a paaw kha a myng; te Isak nynh a boeining myng kha thae zah Jakob kha hythua a pya, te a paaw nynh,“Ka ccapaw myng tuhBawipaw nynh hythuapyapawloram myng te nynh a loku.28Pachia nynh vaawlang evuiraw kha thuasah,laephi kya-e lae hoy kha thuasah,looh patae te misutui patae khathuasah ae pya vae sah.29Ccungccaw hae nynhna rya ae lawpah hae sah lah,minphuin hae nynh na malangbakhung hae sah.Na uno hae kya bawi lang tang lah,na nung ccapaw hae nynhna malang bakhung hae sah.Nang kha thya ae lawpaw miakaw tuhthyalaw thua sah lah,nang kha hythua ae pyapaw miakaw tuhhythuapya thua sah,” a ci.Esau tuh Hythuanaw A Shung
30Isak nynh Jakob hanlan hythuapyapaw he a thangsah te, Jakob tuh a paaw Isak kyate zya he a pou lyakhe, a upaw Esau tuh sawdenaw kyate yn thua vae.31Esau nynh mah kou thuapaw looh kha paccynpah zah a paaw kalan a ccyngpya. Te a paaw kha, “Apang, hythua nae pya ccaw, na ccapaw nynh kae kawpyapaw saw hynh ae lan thokuh lah dahungtua,” a cipya.32A paaw Isak nynh, “Hummou na thua?” cite khia zah, Esau nynh, “Na ccatawccaw Esau nynh ka thua,” a ci.33Oute Isak nynh phe thyngku biate, “Saw yn kaw zah yn pyapaw kha hummou athua? Nang nae thua maw, saw kha pong ka ae zah hythua phe ka pya kou vae, aning tuh hythua ccoupaw athua ccaccing vae cih,” a ci.34Esau nynh a paaw bya he a thae tuh myarya accae lante thawte rah zah a paaw kha, “Apang, kae mah hythua yn pyabua,” a cipya.35Thuasalama a paaw nynh, “Na neitaw nynh yn ling zah na hythuanaw kha phe a lawku vae,” a cipya.36Esau nynh, “Amaw kha Jakob cite minphu a la thuapaw tuh a min te phe angaekuhpaw khaw a la thua? Pawccecize vae ning yn ling vae. Aning nynh ccatawccaw thuanaw kha phe yn lawpahku zah, atu ka hythuanaw kha bua a lawku vae. Kamaw hanlan hythuanaw ccangkheit san nae hangpah vae khyh tou?” a ci.37Isak nynh Esau kha, “Amaw kha na bawipaw lang phe ka la rae vae, te a uno hae balyn tuh a see hae lang phe ka pya vae hae, looh te misutui kha amaw phe ka pya vae. Ka ccapaw, na hanlan pawmou kae cyipah kho vae cih?” a ci.38Esau nynh a paaw kha, “Apang, hythuanaw tuh ccangkheit rou tou na hoi? Apang, kae mah hythua yn pyabua,” a cipya. Te Esau tuh accae lante thawte a rah.
39Oute a paaw Isak nynh khung zah,“Dotua, na umnaw kyakhelae hoy um lan khyh zah,ahangnaw vaawlang evuiraw mah um lan khyh.40Na thaloi te na ryakuh cih,te na neitaw kha rya na lawpah cih;thuasalama he na douru tena nging kya-e a taphu khana khyapah cih,” a cipya.Esau Thinrianaw kyate Jakob A Ccue
41A paaw nynh Jakob a pyapaw hythuanaw keiccuze Esau nynh Jakob kha hua zah a thinlung kya, “Ka paaw hanlan rawkhuinaw nin tuh anae vae; oute ka neitaw Jakob kha ka theih cih,” cite a tuaku.42Te a ccatawccaw Esau bya kha Rebekah nynh a thae tuh, a ccasoi Jakob kha ko zah, “Na upaw Esau nynh a lungdae nawlan nang kha chia lan a paccynku.43Tukeiccuze ka ccapaw, ka bya hynh ngaetua; Haran khua umpaw ka raeepaw Laban kalan la ccue,44na upaw a thinrianaw phe ahoy cia Laban kya sohsoh la um,45na upaw nynh na hanlan a lungdae zah a tungvaw na la cyipaw kha phe a ning cia la um; oute ccungccaw kae saw cih zah kae hoeisah cih hae. Nin kheit lungkhu nanning lu ning kha parouhte pawccemou ka shung lanpaw tuh?” a ci.
46Oute Rebekah nynh Isak kha, “Hit nopi hae nynh ka hiinnaw kya eih yn khin vae hae. Jakob nynh e ram e ccungccaw hae tahawpaw Hit nopi kha zu lang a dy zetuh ka hiinnaw hynh pawmou a thane ung cih?” a ci.
1Oute Isak nynh Jakob kha ko zah hythua a pya koute byatawsya zah, “Kanaan minphuin nopi kha zu lang na dy lan khyh.2Mesopotamia ram umpaw na nung a paaw Bethuel inn lang la cceih lah, na nung a raeepaw Laban ccanung hae lu kheit kha zu lang na dy cih.3Ccungccaw patae paaw na thua nawlan Athunghuapaw Pachia nynh hythua ae pyasah lah a pungzaepaw te myarya alungpaw lan ae rae vae sah.4Pachia nynh Abraham a pyapaw ram, atu ramccang ccungccaw hawte na umnaw ram hynh na ram lang a tang nawlan, Abraham kya-e hythuanaw kha nang ae pya vae sah,” a ci.5Tuhcite Isak nynh Jakob kha a cciasah; te Jakob nynh Mesopotamia ram umpaw Aramean minphuin Bethuel ccapaw Laban kalan a cceih. Laban tuh Esau te Jakob mih nung Rebekah a raeepaw nynh thua. Esau nynh Ishmael Ccanung Zu lang A Dy
6Isak nynh Jakob kha hythuapya zah zudy lan Mesopotamia ram lang a cciasah cipaw kha Esau nynh a ny, te Isak nynh Jakob kha hythuapya zah, “Kanaan minphuin nopi kha zu lang na dy lan khyh,” cite bya a tawsyapaw te7Jakob nynh a nung te a paaw bya kha ngae zah Mesopotamia ram lang a cceih cipaw kha Esau nynh a ny.8Te a paaw Isak nynh Kanaan nopi hae kha ry khyh hae cipaw Esau nynh he a nyh tuh,9Abraham ccapaw Ishmael a ccanung Mahalath cikuhpaw Nebaioth ccianung kha zu lang dy khylan Ishmael kalan a cceih, tuh-e nopinung tuh ccangpaw zu hae a hoi koute a dy chihpaw nynh thua. Bethel kya Jakob Maan
10Jakob nynh Beersheba kha cciataw zah Haran khua lang a cceih.11Aning nynh hmin san kheit kya thua zah khuanin a ccaw vae keiccuze tuin kya a rya. Tuin kya umpaw lung ccangkheit kha lungngya lang ngya zah a ih.12Te Jakob nynh maansah zah a maan kyakhe, nawkui ccangkheit tuh laephi vawlan duakuh zah adung tuh vaawlang phe a phah; Pachia kya-e vaawccungccaw hae nynh nawkui kya a kae, a rung bungthung hae.13Te Bawipaw nynh Jakob pe thadyn zah, “Kae tuh na paaw Abraham Pachia, Isak Pachia, Bawipaw nynh ka thua; na inaw ram hynh namaw te na ciihan kalan kae pya cih oh;14na ciihan tuh laephi vawlan laenoi hawte alung cih zah, nang tuh nithua lang, niccaw lang, alia lang, palung lang na pazaekuh cih; namaw te na ciihan liate laephi vawlan minphuin balyn tuh hythuapya athua cih hae.15Nang kha kae umkhae zah na ccianaw takyh kya kae rin cih, te e ram lang bua kae kikhae cih; pawccecize bya kae kinpyakupaw kha ka cyi kou makhia nang kha kae cciataw lan khyh,” a cipya.16Oute Jakob nynh a inaw kyate thaekuh zah, “E hmin kya Bawipaw a um ccaccing, tuh-e tuh ka la nyh khyh,” a ci.17Aning nynh rih zah, “E hmin hynh pawcih baban ri lan um! E hmin tuh ccangpaw thua khyh, Pachia inn te vaawram thuakaw nynh thua,” a ci.
18Tukeiccuze Jakob nynh awkhua takaw te tho zah lungngya lang a ngyapaw lung kha lah zah lungbing lang a bing koute adungparyh khe chitui a bu.19Aning nynh tuh-e hmin kha Bethel cite min a phu; masaty lyaze tuh-e khua min tuh Luz a la cikuh.20Oute Jakob nynh byakinkuh zah, “Pachia nynh kae kha yn umkhae zah, ka ccianaw hynh-e laanpi kya yn do-oih zah, ae lanpaw sanlou te lawku lanpaw uccaw kha yn pya zah,21ka paaw inn lang daebabi lan bua ka thua zetuh, Bawipaw tuh ka Pachia athua cih zah,22lungbing lang ka bingpaw e lung hynh Pachia inn lang a tang cih; te nae pyapaw balyn kya-e pumhaw pumkheit kha kae pya ccaccing cih,” a ci. Jakob te Rachel Tungkunaw
1Jakob nynh po cceih zah nithua lang umpaw ccungccaw hae ram kya a thua.2Jakob nynh dothung zah loo kya tuisung ccangkheit te tuh-e pe a rya hae paw tuu sa thum kha a muih; pawccecize tuuphu kha tuh-e tuisung kya tui leih a niasah hae. Tuisung ahukuhpaw lung tuh myarya ale.3Tuu hae balyn nynh tuin kya a tungkuh vae hae ze, tuurin hae nynh tuisung ahukuhpaw lung kha nue hae zah tuu hae kha tui a niasah hae, te lung kha a umnaw kya bua leih a nung hae.
4Jakob nynh minmin kha, “Ka u te ka neitaw hae, tei te mou nae thua oh?” cite khia hae zah, minmin nynh, “Haran khua te nynh kae thua,” a ci hae.5Jakob nynh minmin kha, “Nahor ccapaw Laban kha na nyh oh tou?” cite khia hae zah, minmin nynh, “Kae nyh,” a ci hae.6Te aning nynh, “Ngedante a um tou?” cite khia hae zah, minmin nynh, “A dan, a ccanung Rachel mah tuu hae ryte yn thua cih,” a cipya hae.7Te Jakob nynh, “Khuanin myarya asae ung; sahiin hae kha pynkheihlan suelua ccyh thua loh khyh. Tuu hae hynh tui niasah oh, cceih oh lah, paeesakuh hin oh,” a cipya hae.8Thuasalama minmin nynh, “Tuu hae balyn kha pynkheihlan kae suelua zah tuisung ahukuhpaw lung kha kae nue makhia tuh tui kae niasah kho khyh hae; lung kae nue koute nynh tuu hae kha tui kae niasah hae,” a ci hae.
9Tuhte aning nynh minmin ryte bya a hokuh cciamang lya hae khe Rachel tuh a paaw tuu hae ryte yn thua vae; pawccecize Rachel tuh a paaw tuu a rintu nynh thua.10Jakob nynh a nung raeepaw Laban ccanung Rachel te a nung raeepaw Laban a tuu hae kha a muih tuh, cceihthung zah tuisung ahukuhpaw lung kha a nue, te a nung raeepaw Laban tuu hae kha tui a niasah hae.11Oute Jakob nynh Rachel kha myng zah thawte a rah.12Te Jakob nynh Rachel kha, “Kae tuh na paaw ccianung Rebekah ccapaw nynh ka thua,” cite a hopya; Rachel nynh ccue zah, a paaw kha a hopya.
13Laban nynh a ccianung ccapaw kong kha a thae tuh, tungku khylan a ccuenua; Laban nynh aning kha pom zah a myng, te a inn lang a cciakhae. Jakob nynh Laban kha a konglang pong a hopya.14Laban nynh Jakob kha, “Nang tuh ka ru te ka saw ccaccing nynh na thua,” a cipya. Te Jakob tuh Laban kya sawpaw sah kheit a umbua. Jakob nynh Laban Ccanung Zu lang A Dy
15Oute Laban nynh Jakob kha, “Nang tuh ka uno na thua keiccuze alakawte rya nae lawpya lan accan zawtou? Na ryalaw mee hohzeihmou?” a cipya.16Laban tuh ccanung lu ning a hoi; atawccanung min tuh Leah cikuh zah asoinung min tuh Rachel acikuh.17Leah mitdae tuh sungsah lan a um, thuasalama Rachel tuh a pynrua hoy zah a puithya.18Jakob nynh Rachel kha a sungsah; tukeiccuze Jakob nynh, “Na ccasoinung Rachel hanlan kum sari rya kae lawpah cih,” a ci.19Laban nynh, “Rachel hynh ccangpaw pise lukhakheit kha pya laeze nang kae pyapaw tuh ahoyhua; kamaw kya umbua,” a cipya.20Tukeiccuze Jakob nynh Rachel mue khylan kum sari rya a lawpya, Rachel tungvaw a hoipaw sungsahnaw keiccuze tuh-e kum sari tuh nin beihtaraw lan nynh a ria.
21Oute Jakob nynh Laban kha, “Kamaw te ikheih khylan ka zu kha yn pya ccavae, pawccecize accyh phe ccing vae,” a cipya.22Tukeiccuze Laban nynh a umnaw e ccungccaw hae kha pynkheihlan suelua hae zah poi a tua.23Thuasalama zete riryngmoh khe Laban nynh a ccanung Leah kha Jakob kalan a thuakhae; te Jakob nynh a ikhae.24(Laban nynh a seenung Zilpah kha a ccanung Leah hanlan a thosakhaeku).25Awkhua he thua tuh, Leah nynh athua cipaw Jakob nynh he nyh te, Laban kyakhe, “Pawcce ka tungvaw hynhte na cyi? Rya kae lawpyapaw kha Rachel mue khylan thua khyh tou? Pawcce nae ling?” a cipya.26Laban nynh khung zah, “Kaening ram kya tuh asoinung nynh atawccanung laeze tungtuh ty phung thua khyh.27Zuvaw lang na tangnaw oh hynh naw kheit ccing hin sah, te kum sari cia rya bua nae lawpya ung zetuh Rachel kha kae pya cih,” a cipya.28Jakob nynh a nawccah zah zuvaw lang a tangnaw hae kha naw kheit a ccingsah; tukoute Laban nynh a ccanung Rachel kha Jakob zu lang a pya.29(Laban nynh a seenung Bilhah kha a ccanung Rachel hanlan a thosakhaeku).30Tukeiccuze Jakob nynh Rachel kha mah a ikhae vae, te aning nynh Rachel kha Leah laeze a sungsahua. Jakob nynh Laban kha kum sari cia rya bua a lawpya.
31Jakob nynh Leah a sungsah khyhpaw kha Bawipaw nynh he a nyh tuh, Leah kha ccaawsaah khonaw a pya; thuasalama Rachel tuh a tiin.32Leah nynh ccaawpoi zah ccapaw lu kheit a saah, a min tuh Reuben cite a phu; pawccecize Leah nynh, “Ka vawsawnaw kha Bawipaw nynh yn muihpya vae; tukeiccuze ka vawpaw nynh yn sungsah ccaccing vae cih,” a ci.33Leah nynh ccaaw bua poi zah ccapaw lu kheit saah zah, “Huanaw ka teingpaw kha Bawipaw nynh thae zah, e ccapaw hynh mah yn pya,” cih zah Semeon cite min a phu.34Aning nynh ccaaw bua poi zah ccapaw lu kheit saah zah, “Ccapaw lu thum ka saahpya keiccuze atu tuh ka vawpaw nynh kamaw kya ccavyng a mungkuh vae cih,” a ci; tukeiccuze Levi cite min a phu.35Leah nynh ccaaw bua poi zah ccapaw lu kheit saah zah, “Atu tuh Bawipaw kha the ka hoysah vae cih,” a ci; tukeiccuze Judah cite min a phu; oute aning tuh a ccasaah ady vae.
1Rachel nynh Jakob hanlan ccaaw a saahpya khyhpaw kha he nyhkuh tuh, a unung tungvaw a eiung zah Jakob kha, “Ccaaw yn pya, tuhkhyhze ka chih vae cih,” a cipya.2Jakob nynh Rachel tungvaw myarya a thinria zah, “Kae tuh ccaawsaahnaw kaw ae pya leipaw Pachia lang tou nae ria?” a cipya.3Oute Rachel nynh, “Ka seenung Bilhah hein kya mang um; cceih lah ikhae tua, aning tuh ccaaw a saah kho, aning liate kae zemah ccaaw ka hoi kho,” a ci.4Tukeiccuze aning nynh a seenung Bilhah kha Jakob zu lang a pya; te Jakob nynh seenung kha a ikhae.5Bilhah nynh ccaawpoi zah Jakob kha ccapaw lu kheit a saahpya.6Oute Rachel nynh, “Pachia nynh kamaw hanlan bya yn piapya vae, ka roi kha mah Pachia nynh yn thaepah zah ccapaw lu kheit yn pya vae,” a ci; tukeiccuze Dan cite min a phu.7Rachel seenung Bilhah nynh ccaaw bua poi zah Jakob kha lu ningnaw ccapaw a saahpya.8Oute Rachel nynh, “Ka unung tae khylan ka zuakuh zah phe ka tae vae,” a ci; tukeiccuze Naftali cite min a phu.
9Leah nynh a ccasaah ady vae paw kha he a nyhkuh tuh, a seenung Zilpah kha ko zah Jakob zu lang a pya.10Tukoute Leah seenung Zilpah nynh Jakob kha ccapaw lu kheit a saahpya.11Te Leah nynh, “Ka vehoy,” a ci. Tukeiccuze Gad cite min a phu.12Leah seenung nynh Jakob kha lu ningnaw ccapaw a saahpya.13Te Leah nynh, “Lungtuanung nynh ka thua! Pawccecize nopi hae nynh a lungtuanung cite yn ko cih hae,” a ci; tukeiccuze Asher cite min a phu.
14Ccathae rue ccyh he thua tuh, Reuben nynh cceih zah loo kya mandarek kha muih zah a nung Leah kalan a thuakhae. Rachel nynh Leah kha, “Thawccinawte na ccapaw kya-e mandarek abang kha yn pyabua,” a cipya.15Thuasalama Leah nynh, “Ka vawpaw na ccuekhaepaw hynh adihpaw uccaw thua zawtou? Ka ccapaw kya-e mandarek hynh mah ccuekhae na ry ung tou?” a ci. Rachel nynh, “Na ccapaw kya-e mandarek nae pya zetuh atu khuazi Jakob te na ihkheih cih oh,” a cipya.16Zete ccyh kya Jakob nynh loo kyate he yn thua tuh, Leah nynh cciadue zah, “Kamaw kalan na ryabua cih; pawccecize nang kha ka ccapaw kya-e mandarek te phe kae hoh vae,” a cipya. Tukeiccuze tuh-e khuazi kya Jakob tuh Leah te a ihkheih hae.17Pachia nynh Leah kha thaepah zah ccaaw a poi, te Jakob hanlan lu pangawnaw ccapaw a saahpya.18Leah nynh, “Ka seenung kha ka vawpaw kalan ka pya keiccuze Pachia nynh amee yn pya,” a ci; tukeiccuze Issakhar cite min a phu.19Te Leah nynh ccaawpoi zah Jakob hanlan lu taruhnaw ccapaw lu kheit a saahpya.20Oute Leah nynh, “Ahoypaw lasung ccangkheit kha Pachia nynh yn pya; ccapaw lu taruh ka saahpya vae keiccuze ka vawpaw nynh kae kha yn thehoysah cih,” a ci; tukeiccuze Zebulun cite min a phu.21Tukoute Leah nynh ccanung lu kheit saah zah Dinah cite min a phu.
22Oute Pachia nynh Rachel kha liathuite a bya ngaepah zah ccaawsaah khonaw a pya.23Aning nynh ccaawpoi zah ccapaw lu kheit saah zah, “Saryanaw ka teingpaw kha Pachia nynh yn lawpya vae,” a ci;24te Rachel nynh Josef cite minphu zah, “Bawipaw nynh ccangpaw ccapaw kha yn pya hin vae sah,” a ci. Jakob te Laban Hoirumnaw Neekunaw
25Rachel nynh Josef he a saah tuh, Jakob nynh Laban kha, “Ka inn te ka ram lang yn cciasah ccavae.26Ka ryalaw mee ka zu hae te ka ccaaw hae kha yn pya hae lah, ka la cceih ccavae; pawccecize myarya hoy lan rya kae lawpyapaw kha phe na ny,” a ci.27Laban nynh Jakob kha, “Byahonaw kaw yn pyatua, Bawipaw nynh namaw liate hythua yn pya cipaw ka ny;28na ryalaw mee hokuh lah kae pya cih,” a cipya.29Jakob nynh, “Pawcihtemou rya kae lawpya cipaw te pawcihtemou na sahiin hae hynh kamaw kya a um hae cipaw phe na ny.30Pawccecize ka thua maw tuh beihtaraw nynh na hoi, atu tuh myarya alungthung vae; te pawpaw kya ka ccia zemah Bawipaw nynh nang kha hythua ae pya. Ka innbyn hae so hohtuhmou ka do-oih cih hae?” a cipya.31Tukeiccuze Laban nynh, “Pawmou kae pya cih?” cite khia zah Jakob nynh, “Pawpaw mah nae pya lan khyh. E uccaw hynh nae cyipya zetuh na sahiin hae kha bua ka dang cih hae zah ka rin ung cih hae:32atunin na sahiin hae balyn laku ka la khiakuh cih zah apyaapaw te ccapoh-ccapoh apyaapaw tuu hae te man phaphuhpaw tuu taraw miakaw, te miaa hae lakuze apyaapaw te ccapoh-ccapoh apyaapaw miakaw kha ka phia cih hae zah tuh-e hae tuh ka ryalaw mee athua cih hae.33Te ka ryalaw mee kha do khylan nyalang he nae thua te, ka dingnaw nynh kamaw kha yn thungkhaw cih. Miaa hae lakuze apyaa leipaw te ccapoh-ccapoh apyaa leipaw miakaw, te tuu taraw hae lakuze man phaphuh leipaw miakaw kha he na muih zetuh ka rupaw athua cih,” a ci.34Laban nynh, “Ahoy! Na ho hawte thua vae sah,” a ci.35Thuasalama tuh-e nin khe Laban nynh ccapoh-ccapoh apyaapaw te apyaapaw miaatepaw hae te miaapinung hae, mih pyn kya apyaapaw miakaw te man phaphuhpaw tuu taraw miakaw kha a ccapaw hae a rinsah hae;36te Jakob umnaw te amaw umnaw kha nin thum laanccia a sawsakuh hae, te Laban kya-e alaepaw tuu hae te miaa hae kha Jakob nynh a rinbia hae.
37Oute Jakob nynh poplar thing, almond thing te plane thing ahinpaw akaran hae kha lah hae zah akaloh he kia hae tuh araw lante apyaa vae hae.38Te tuu hae, miaa hae nynh tui nia lan oun ccia vae hae ze, sahpaw a dekuh ccaw hae cite tuh-e thingpyng hae kha sahiin tui nianawpaw kua malang khe a bing.39Tukeiccuze tuu hae, miaa hae nynh tuh-e akaran hae malang khe sahpaw dekuh hae zah apyaapaw, ccapoh-ccapoh pyaapaw, aphae lante pyaapaw lang a than vae hae.40Jakob nynh tuutaw hae kha phia hae zah Laban sahiin hae kya-e pong aman hae paw te apyaa hae paw kalan khe mih mae hawi sah hae; te a sahiin phu hae kha phia hae zah Laban sahiin hae te nungkheih khyh hae.41Athawsaepaw sahiin hae nynh sahpaw he a ry vae hae ze, thingpyng hae laku khe sahpaw dekuh hae sah cite Jakob nynh thingpyng hae kha sahiin hae malang kua kyakhe a bingpya hae,42thuasalama anyaa hae paw nynh sahpaw a ry hae zetuh mih malang thingpyng kha nungpah khyh hae; tukeiccuze anyaa hae paw tuh Laban kya-e thua hae zah athawsae hae paw tuh Jakob kya-e nynh thua hae.43Tukeiccuze Jakob a hoirumnaw tuh lungthung zah sahiin phu patae, seepaw hae te seenung hae, kalauh hae te lann hae kha a hoi. Laban kyate Jakob A Ccue
1Laban ccapaw hae nynh, “Ah paaw uccaw balyn kha Jakob nynh pong a lawku vae; ah paaw uccaw te nynh e hoirumnaw balyn hynh a mue,” cite a ho hae paw kha Jakob nynh a thae.2Te Laban mah langmaw hawte a mitmae hoy vae khyh cipaw kha Jakob nynh a muih.3Oute Bawipaw nynh Jakob kha, “Na minpaaw hae ram lang te na uno hae kalan ki ccavae, nang kha kae umkhae cih,” a ci.4Tukeiccuze Jakob nynh ccungccaw saw zah a sahiin phu a paeenaw hmin kalan Rachel te Leah kha kosah hae zah,5“Nae paaw tuh langmaw hawte ka tungvaw a mitmae hoy vae khyh cipaw ka muih. Thuasalama ka paaw a Pachia nynh kamaw kha yn umkhae.6Ka thawzung balyn te nae paaw kha rya ka lawpya vae cipaw phe na ny oh;7tuhzemah nae paaw nynh yn ling zah ka ryalaw mee kha vae haw yn hynpya, thuasalama ka tungvaw hoyleinaw rae lan Pachia nynh ua khyh.8‘Ccapoh-ccapoh apyaa hae paw tuh na ryalaw mee athua cih,’ cih zah, sahiin phu balyn nynh ccapoh-ccapoh pyaapaw lang a than hae; te ‘Apyaa hae paw tuh na ryalaw mee athua cih,’ cih zah sahiin phu balyn tuh apyaapaw lang a than hae.9Tuhcite Pachia nynh nae paaw kya-e sahiin-awvaw balyn kha lah zah kamaw kha yn pya.
10“Sahiin hae sahpaw a dekuh hae ccyh lyaze maan ka sah, ka maan kyaze, ngaw ka la do zah sahpawdepaw miaatepaw hae tuh apyaapaw, ccapoh-ccapoh pyaapaw te pyaari-pyaaraepaw athua hae paw kha ka la muih.11Oute ka maan kyakhe Pachia vaawpaw nynh, ‘Jakob,’ cite yn ko zah, ‘Hein kya mang ka um!’ ka cipya.12Te aning nynh, ‘Dotua, sahpawdepaw miaatepaw balyn tuh apyaapaw, ccapoh-ccapoh pyaapaw te pyaari-pyaaraepaw cci nynh athua hae; pawccecize Laban nynh na tungvaw a cyisahnaw balyn kha ka muih vae.13Kae tuh lungbing kha chitui na thuh zah kamaw kya bya na kinkunaw Bethel khua kyaze namaw kya a langkuhpaw Pachia nynh ka thua. Atu e ram hynh poutaw lah na puinaw ram lang ki ccavae,’ yn cipya,” cite a hopya hae.14Oute Rachel te Leah nynh, “Kae paaw inn kya-e kae ccou lanpaw rho te neeku bua lanpaw paw sanmah a um zawtou?15Kaening hynh ramccang ccungccaw hae lang oun riapaw kae thua khyh tou? Pawccecize kaening kha oun zua zah, oun zuanaw mee phua kha phe a mang vae.16Pachia nynh kae paaw kyate a lawpaw sisua balyn tuh kaening te kae ccaaw hae kya-e nynh thua; tukeiccuze Pachia nynh ae hopyapaw miakaw kha cyih ccaleih,” a cipya hae.
17Tukeiccuze Jakob nynh thokuh zah a ccaaw hae te a zu hae kha kalauh hae tungvaw a ccisaku hae;18te a sahiin hae balyn, a muepaw sisua balyn, Mesopotamia ram kya a muepaw sahiin hae kha Kanaan ram umpaw a paaw Isak kalan a cciakhae vae.
19Laban tuh a tuuming ngo lan a ccia loukaw khe Rachel nynh a paaw innbyn kya-e pachia hae kha a rupya.20Jakob nynh Aram ccungccapaw Laban kha ling zah ccue lan a paccynkupaw kha hopah khyh.21Tuhcite Zufrates vaw kha zua zah Gilead mua langkhe a hoipaw balyn ryte a ccue. Laban nynh Jakob A Dee
22Nin thumnaw nin khe Jakob phe ccue vae cipaw Laban kha a hopya hae.23Tukeiccuze a uno hae ryte nin sari deehui hae zah Gilead mua kyakhe Jakob kha a phya hae.24Thuasalama Pachia nynh Aram ccungccapaw Laban kalan khuazi a maan kyakhe yn langkuh zah, “Jakob kya athya ahoy bya kaw kheit sang na ho khyh nawlan raeringkuh,” a cipya.
25Laban nynh Jakob kha he a phah tuh, Jakob tuh mua kya bu phe la sakkuh ty vae, te Laban nynh a uno hae ryte Gilead mua kya bu a sakku bua hae.26Laban nynh Jakob kha, “Pawcce hynhte na cyi? Nae ling zah ka ccanung hae tuh rhaw kya-e kyng hae paw hawte na cciakhae hae.27Kae kha nae ling zah hopya leite pawcce aruh lante na ccue? Nae hopya zetuh lungtuanaw te, hlaw te, tintang te tyng te kae cciasah cih paw.28Ka ccanung hae te ka mintaw hae kha pawcce beihsyate nae myngsah sya khyh hae? Na cyisahnaw hynh ngaeepaw nynh thua.29Na tungvaw vawsawnaw kae pya kho; thuasalama na paaw a Pachia nynh atazi khe, ‘Jakob kya athya ahoy na ho khyh nawlan raeringkuh,’ yn cipya.30Na paaw inn kha eih na ngae keiccuze na la cciapaw athua zeso pawcce ka pachia hae kha na ru?” a ci.31Jakob nynh Laban kha, “Ka ri keiccu nynh thua, pawccecize na ccanung hae kha kamaw kyate nae luadesei cih cipaw ka tua.32Na pachia hae kha a tungvaw na muih biapaw humhung zemah chia thuasah. Kae uno hae mitmuihnaw kya na uccaw tuh ccungkuh lah lawkuh,” a cipya. Rachel nynh pachia hae a la rupaw kha Jakob nynh nyh khyh.
33Tukeiccuze Laban nynh Jakob bu, Leah bu, seenung lu ning bu lungkhu lang tee zah a ccung, thuasalama a pachia hae kha muih khyh. Te aning nynh Leah bu kyate pou zah Rachel bu lungkhu lang a tee.34Rachel nynh innbyn pachia hae kha lah zah kalauh khungnin kya nung zah phang a dahungthin. Laban nynh bu kya pong a ccung, thuasalama muih khyh.35Rachel nynh a paaw kha, “Bawipaw, na malang ka thadyn kho khyhpaw na thinria nan sah, pawccecize nopiny ka ny ccyh nynh thua,” a cipya. Tukeiccuze Laban nynh ccung salamah innbyn pachia hae kha muih khyh.
36Oute Jakob nynh thinriate bo zah Laban kha, “Paw seinaw mou ka rae? Paw ka cyihsei zahte mou thawte nae deehui?37Ka uccaw hae balyn kya pong na ccung zah na innbyn kya-e uccaw hae pawmou na muih? Aening lu ning laku na uno hae te ka uno hae nynh byapae khylan tuh-e uccaw tuh minmin malang nungtua.38Namaw kya kum kuin ka um vae; na tuupinung hae te na miaapinung hae tuh mih taw thansei boi khyh hae. Na tuuphu kya-e tuutepaw hae mah ka ae boi khyh.39Sarepaw hae nynh a tei hae paw mah namaw kalan kae cciakhae boi khyh; kamaw nynh hung ka rung; khuadae kya thuasah, khuazi kya thuasah a ru hae zemah kamaw kha nae ngiaru.40Khuadae ccyh kya asopaw nynh yn u zah khuazi ccyh kya akyaapaw kha ka teing, i kho leite mah ka um.41Tuhcite na inn kya kum kuin ka um vae; na ccanung lu ning hanlan kum haw lae pali, na sahiin phu hanlan kum taruh rya kae lawpya, ka ryalaw mee kha vae haw nae ling.42Ka paaw a Pachia, Abraham Pachia, Isak nynh a ripaw Pachia nynh yn la pankhae khyh zetuh ka kuih ccakaete solei nae cciasah cih. Pachia nynh ka vawsawnaw, ka ryalawnaw kha muih zah atazi khe nang kha phe ae pe vae,” a cipya. Jakob te Laban Byakinkunaw
43Oute Laban nynh Jakob kha, “E ccanung hae hynh ka ccanung hae nynh thua hae, e ccaaw hae hynh ka ccaaw hae nynh thua hae, e sahiin-awvaw hae hynh mah ka sahiin-awvaw hae nynh thua hae, na muihpaw balyn hynh ka kya-e nynh thua. Thuasalama e ka ccanung hae tungvaw thuasah, minmin nynh a saah hae paw mih ccaaw hae tungvaw thuasah, atunin pawmou ka cyih kho ung cih?44Atu yn cceih lah nang te kae byakinkunaw rae sih; tuh-e tuh nang te kae laku ccaekia lang tang sah,” a ci.45Tukeiccuze Jakob nynh lung ccangkheit lah zah lungbing lang a bing.46Te Jakob nynh a uno hae kha, “Lung hae kha pum oh,” cipah hae zah minmin nynh lung hae kha lah hae zah lungpum lang a pum hae; te minmin nynh lungpum pe khe a ae hae.47Laban nynh tuh-e lungpum tuh Jegar-sahadutha cite minphu zah Jakob nynh Galeed cite min a phu.48Laban nynh, “Atunin hynh-e lungpum hynh nang te kae laku ccaekia ccangkheit nynh thua,” a cipya. Tukeiccuze Galeed cite min a phu,49Mizpah lungbing cite mah a ko hae, pawccecize Laban nynh, “Aening lu kheit te lu kheit he ah sawkuh te Bawipaw nynh nang te kae laku oun do-oih kalang sah.50Ka ccanung hae kha hoyte na ccuepe khyh hae ze thuasah, ka ccanung hae laelan zu na dychih ze thuasah, aening laku ccungccaw um khyh, nang te kae laku Pachia tuh ccaekia nynh thua cipaw kha nytua,” a cipya.
51Oute Laban nynh Jakob kha, “Nang te kae laku ka nungpaw e lungpum te lungbing hynh dotua.52Kae nynh nang kha vawsaw pya khylan e lungpum hynh ka lue lan khyh, te nang nynh kae kha dou khylan e lungpum te lungbing hynh na lue lan khyh. E lungbing te lungpum tuh nang te kae hanlan ccaekia nynh thua.53Abraham Pachia, Nahor Pachia te mih paaw Pachia nynh nang te kae laku bya oun pia sah,” a cipya. Te Jakob a paaw Isak nynh a ripaw Pachia min te Jakob nynh thya a lawku.54Oute Jakob nynh mua vawlan silawnaw rae zah a uno hae kha sanlou ae lan a ko hae. Te minmin nynh sanlou kha ae hae zah tuh-e khuazi tuh mua vawlan a um hae.
55Laban nynh awkhua takaw te tho zah a mintaw hae te a ccanung hae kha myng hae zah hythua a pya hae. Te Laban nynh cceih zah a umnaw lang a ki vae. Esau te Tungku lan Jakob Paccynnaw
1Jakob tuh cceih zah Pachia vaawccungccaw hae nynh amaw kha oun tungku hae;2Jakob nynh minmin kha he muih hae tuh, “E hynh Pachia rhawkaw phu nynh thua,” a ci. Tukeiccuze tuh-e hmin kha Mahanaim cite min a phu.3Jakob nynh locceihtu hae kha amaw malang khe Edom ram, Seir pee umpaw a upaw Esau kalan saw hae zah,4“Ka bawipaw Esau kha hynhte la hopah oh: Na seepaw Jakob nynh, ‘Laban kya ramccang ccungccaw hawte atu cia ka umbua vae;5vaetua hae, lann hae, tuu hae, miaa hae, seenung hae te seepaw hae kha ka hoi; te ka bawipaw, na malang maehoynaw ka mue nawlan hopya khylan ccungccaw kae saw,’ a ci cite ka bawipaw Esau kha la hopah oh,” a cipya hae.
6Locceihtu hae nynh Jakob kalan oun ki hae zah, “Na upaw Esau kya kae thua, namaw kha tungku khylan pise za pali ryte oun cceih hae,” a cipya hae.7Oute Jakob tuh myarya rih zah a lungvawsaw vae; amaw te umkheih hae paw ccungccaw hae, tuu hae, miaa hae, vaetua hae te kalauh hae kha phu ning lang a phia hae.8Pawccecize, “Esau nynh phu kheit kha thuanua zah a ro zemah phu kheit tuh a lue cih,” cite a tua.
9Te Jakob nynh, “Pou ka paaw Abraham te ka paaw Isak Pachia, ‘Na ram te na uno hae kalan ki lah na tungvaw hoynaw ka rae cih,’ cite yn hopahpaw pou Bawipaw ,10Na seepaw nae muihsahpaw apaleihkuh leipaw lungzinaw balyn te atynpaw sungsahnaw balyn kya-e adih huapaw te sanmah ka ngaekuh khyh, pawccecize ka hoitang kyalya te nynh e Jordan vaw hynh ka zua; atu tuh phu ning lang ka tang vae.11Ka upaw Esau kuih kyate beih yn luesah, pawccecize amaw kha ka rih; aning nynh yn cceih cih zah kaening balyn, nung hae ccaaw hae ryte pong oun theih vae cih.12Tuhzemah nang nynh, ‘Na tungvaw hoynaw ka rae ccaccing cih zah na ciihan kha riatae um leipaw rili laesia zeih lang ka rae cih,’ nae cipya,” a ci.
13Khuazi tuh tuin kya a rya, te a hoipaw uccaw kya-e kha a upaw Esau hanlan lasung lang pya lan cite14miaapinung za ning te miaatepaw sah kuin, tuu nopi za ning te tuutepaw sah kuin,15kalauh mateisu sung thum te mih taw hae, vaetua pinung sung pali te tangnuapaw sa haw, lann pinung sa kuin te lanntepaw sa haw kha a po hae.16Khah-e hae kha aphuphute phia hae zah phu kheit ze seepaw lu kheit cci kalan ap hae zah, “Ka malang la cceih ty oh lah phu kheit te phu kheit kha sawsakuh oh,” a cipya hae.17Masaty a cceihpaw kha byataw zah, “Ka upaw Esau te he na tungkuh oh zah, ‘Nang hynh hum ccungccaw mou na thua? Teilangmou nae ccia? Na malang umpaw sahiin hae hynh hum kya-e mou athua hae?’ cite ae khia ze,18‘Na seepaw Jakob kya-e nynh thua hae; ka bawipaw Esau namaw hanlan lasung lang ae pyapaw nynh thua hae; Jakob amaw mah kae nulang nynh a um,’ cite na hopah cih oh,” a cipya.19Tuhawte lu ningnaw, lu thumnaw te sahiin phu a zui hae paw balyn kha, “Esau te na tungkuh oh ze hynhte na hopah cih oh:20‘Na seepaw Jakob mah kae nulang nynh a um,’ cite na hopah cih oh,” cite a taw hae. Pawccecize Jakob nynh, “Ka malang a cceih typaw lasung khate Esau kha a lung ka hoysah cih zah nyalangte he kae tungkuh te kamaw kha naw yn ccaw ze yn ccaw kho,” cite a tuaku.21Tukeiccuze lasung kha amaw malang cciasah ty zah amaw tuh tuin a ryanaw hae kyakhe tuh-e khuazi tuh a rya. Jakob te Vaawpaw Theikunaw
22Tuh-e khuazi khe Jakob tuh thokuh zah a zu hae lu ning, a seenung hae lu ning, a ccaaw hae lu haw lae kheit kha cciakhae hae zah Jabbok vawkhu kha adeinaw kyate a zua.23Aning nynh minmin kha cciakhae hae zah vaw khuraw lang a zuasah hae, tuhawte a hoipaw atyn-are kha khuraw lang a zuasah hae.24Jakob tuh a makhaete a umhy; te ccungccapaw te khuadae cia a theikuh hae.25Ccungccapaw nynh Jakob kha ka tae vae khyh cipaw he nyh tuh, Jakob a kung kha phah a thong, te tuh-e paw te a theikuh lya hae khe Jakob a kungru tuh poh suhliakuh.26Oute ccungccapaw nynh, “Oun cciasah ccavae, pawccecize khua vyavya dae vae,” a cipya. Thuasalama Jakob nynh, “Hythua nae pya khyh zetuh kae cciasah lan khyh,” a ci.27Tukeiccuze ccungccapaw nynh, “Na min hummou?” cite khia zah “Jakob” cite a khung.28Oute ccungccapaw nynh, “Na min tuh Jakob cikuh vae lan khyh, Israel cikuh vae cih, pawccecize nang tuh Pachia te mah na taekuh oh, ccungccaw te mah na taekuh oh zah phe na tae hae,” a ci.29Oute Jakob nynh, “Na min beih yn hopah,” a ci. Thuasalama aning nynh, “Pawcce ka min tuh nae khia?” a ci. Te tuin kyakhe Jakob kha hythua a pya.30Jakob nynh, “Pachia kha hawiliakute ka muih salamah ka hiin ung,” ci zah tuh-e hmin kha Peniel cite min a phu.31Jakob nynh Peniel kyate a pou lyakhe khuanin mah he a thua, a kungru keiccuze Jakob tuh a bae.32Tukeiccuze atunin cia Israel ciihan hae nynh kung kya umpaw tharuipi kha ae khyh hae, pawccecize Jakob a kung kya-e tharuipi tuh aning nynh a thongnaw nynh thua. Jakob te Esau Tungkunaw
1Jakob nynh dothung zah Esau te ccungccaw za pali oun ccia hae paw kha a muih. Tukeiccuze imua hae kha Leah, Rachel te seenung lu ning kyakhe a nee hae.2Seenung hae kha mih ccaaw hae ryte malang khe a nung hae, tukoute Leah te a ccaaw hae, te Rachel te Josef kha nulang kou khe a nung hae.3Jakob tuh minmin malang khe cceih zah a upaw pe a thua maw laephi kya vae sari a bakhung.
4Esau nynh Jakob kha ccuenua zah phang a pom, te Jakob kha myng zah lu ning te a rawkhaekuh hae.5Esau nynh dothung zah nopi hae te ccaaw hae kha he muih tuh, “Namaw kya a um hae paw khuh hum hae mou?” cite khia zah Jakob nynh, “Pachia nynh na seepaw kae kha thawccinawte yn pyapaw ccaaw hae nynh thua hae,” a ci.6Oute seenung hae tuh mih ccaaw hae ryte oun naekuh hae zah a bakhung hae;7Leah tuh a ccaaw hae ryte oun naekuh hae zah a bakhung hae; te nyathyakou kya Josef te Rachel oun naekuh hae zah a bakhung hae.8Esau nynh, “Kae tungkuhpaw aphu hae balyn kha paw suilan mou athua?” cite khia zah Jakob nynh, “Ka bawipaw, na malang maehoynaw ka mue ccaw cite kae saw hae paw nynh thua,” cite a leih.9Thuasalama Esau nynh, “Ka neitaw, phe azaw lan mang ka hoi; na hoipaw kha namaw hanlan nungkuh,” a cipya.10Jakob nynh, “Tuhte thua khyh, na malang maehoynaw ka mue zetuh kae pyapaw lasung hynh yn lawpakuh; pawccecize hynhcite maehoynaw he ka mue tuh na mitmae muihpaw hynh Pachia mitmae muihpaw te nynh a loku.11Namaw kalan kae ccyngpyapaw ka lasung hynh beih yn lawpakuh, Pachia nynh thaw yn ccih zah ka rypaw tynre kha yn pya,” a ci. Jakob nynh Esau kha a soihbia keiccuze Esau nynh khah-e kha a lawku.
12Oute Esau nynh, “Cceih ccavae oh sih, kamaw laan ka maw cih,” a ci.13Thuasalama Jakob nynh Esau kha, “Ka bawipaw, imua hae tuh mih thaw azya, tuu hae, miaa hae te vaetua hae tuh mih taw hae ryte ka do-oih lan hae paw nynh thua cipaw kha na ny; arangte eih ka cciakhae hae zetuh sahiin hae hynh nin kheit mawte pong chih cih hae.14Tukeiccuze ka bawipaw, nang tuh ka malang la cceihlo, kae tuh ka malang umpaw sahiin hae te imua hae nynh a ccia kho hae thyhte ka bawipaw na umnaw Seir ram kae thua makhia byabyate kae cciakhae cih hae,” a ci.
15Te Esau nynh, “Ka kya umpaw ccungccaw abang hynh na kyakhe kae cciataw hae sah,” a ci. Thuasalama Jakob nynh, “Pawccemou ka bawipaw nang nynh ka tungvaw hynhcih baban na hoy?” a ci.16Te Esau tuh tuh-e nin khe Seir ram lang bua a ki.17Jakob tuh Sukkoth lang cceih zah amaw hanlan inn te a sahiin hae hanlan bu kha a sak; tukeiccuze tuh-e hmin tuh Sukkoth a ci hae. Jakob Shekhem A Thua
18Jakob tuh Mesopotamia ram kyate yn ki zah Kanaan ram umpaw Shekhem khua kya khyndadyh lante a thua; te tuh-e khua malang khe bu kha a sakku.19Te Shekhem paaw Hamor a ccapaw hae kyate bu a saknawpaw laephi hmin kha ngunphua za kheit te a re.20Tuin kyakhe silawhang kha rae zah El, Elohe-Israel cite min a phu. Dinah kha A Kyngde hae
1Jakob te Leah nynh a saah hae paw mih ccanung Dinah tuh tuh-e ram kya umpaw nopi hae kalan a paebua.2Tuh-e ram kyaze bawi athuapaw, Hiv minphuinpaw Hamor ccapaw Shekhem nynh Dinah kha he a muih tuh kyngdete ikhae zah a thethyasah.3Te a thinlung tuh Jakob ccanung Dinah kyakhe phang a um; aning nynh liaccanung kha sungsah zah nebaleih lante bya leih a beih.4Shekhem nynh a paaw Hamor kha, “E liaccanung hynh ka zu lang yn dypah,” a cipya.
5Jakob nynh a ccanung Dinah kha Shekhem nynh a thethyasah cipaw a ny; thuasalama a ccapaw hae tuh a sahiin hae ryte ramkaw kya a um hae keiccuze Jakob tuh minmin oun thua hae makhia daebabi lan a um.6Te Shekhem paaw Hamor tuh Jakob te byahoku khylan cceih zah7tuh lyatuin Jakob ccapaw hae tuh ramkaw kyate la thua hae. Shekhem nynh Jakob ccanung kha ikhae zah Israel minphuin kya ahoy leipaw, cyi lan accan leipaw kha a cyi keiccuze minmin tuh mih thinlungccih zah myarya mih thinria.
8Hamor nynh minmin kyakhe, “Ka ccapaw Shekhem nynh nae ccanung kha a sungsah; tukeiccuze a zu lang beih pya oh.9Nanning nynh kaening te zudykunaw kha rae oh lah nae ccanung hae kha zu lang oun pya oh, te kae ccanung hae hynh mah zu lang dykuh oh.10Nanning tuh kaening kya umbua oh lah, e ram tuh nanning elang ua athua cih, e ram kya khuasah oh lah kungkunaw kha rae oh, te na hoi oh paw uccaw tuh nae uccaw lang a tang cih,” a ci.11Shekhem nynh Dinah a paaw te a raee hae kyakhe, “Ngaethya oun umsah oh lah, na ho oh paw miakaw kae pya cih oh.12Lasung te mee zemah na ry oh zeihte hokuh oh lah nae ngia oh paw miakaw kae pya cih oh; liaccanung rou kha ka zu lang oun pya oh,” a cipya hae.
13Shekhem nynh mih ccianung Dinah kha a thethyasah keiccuze Jakob ccaaw hae nynh Shekhem te a paaw Hamor kha lingpaw bya te a leih hae.14Jakob ccaaw hae nynh, “Kae ccianung tuh vingdungawkuh leipaw kalan kae pya kho khyh, pawccecize kae pya zetuh kaening kha the oun thyasah cih.15Kae nawccaw kho nawlan ccangkheit kyalya um zah tuh-e tuh: nanning nynh kaening hawte pise miakaw vingdung na awkuh cih oh.16Tuhteze nynh kae ccianung hae kha nae zu lang kae pya cih oh zah nae ccianung hae kha zu lang kae dykuh cih, te nanning kya kae umbua cih zah minphuin phuin kheit lang ah tang cih oh.17Thuasalama kae bya kha na ngae khyh oh zah vingdung na awkuh khyh oh zetuh kae ccanung kha kae ko cih zah kae cceih vae cih,” a ci hae.
18Mih bya tuh Hamor te a ccapaw Shekhem nynh mih nawccah.19Te ccangvaepaw tuh Jakob ccanung kha a lungrythua zah cyi lanpaw kha arangte a cyi vae. Aning tuh a innbyn hae balyn kyaze sawtua lan um huapaw nynh thua.20Oute Hamor te a ccapaw Shekhem nynh mih khua koikua tungkunaw hmin kalan cceih hae zah mih khuaccaaw hae kyakhe,21“E ccungccaw hae tuh aening te ccawku lan a um hae; ah ram kya khuasah hae sah lah kungku hae sah, pawccecize ah ram tuh minmin hanlan mah phe azawbia; mih ccanung hae kha zu lang dy oh sih lah ah ccanung hae kha mah zu lang dy hae sah.22Thuasalama minmin nynh vingdung a awku hae hawte aening pise miakaw vingdung ah awku oh ze rou nynh aening ryte umkheih lan te minphuin phuin kheit lang tang lang mih nawccah cih.23Minmin kya-e sahiin hae, sisua te sahiin-awvaw balyn tuh aening uccaw lang a tang cih khaw? Minmin rynaw kha ah nawccaw ze rou nynh aening kya a umbua cih hae,” a ci hae.24Hamor te a ccapaw Shekhem nynh a ho hae paw kha a khua koikua kyate a pou hae paw balyn nynh mih nawccah zah pise miakaw tuh vingdung a awkuh vae hae. Dinah A Raee hae kyate Liarunaw
25Tukoute nin thumnaw kya mih vaemaw a cci lyakhe Jakob ccaaw hae lu ning Simeon te Levi, Dinah a raee hae nynh mih thaloi hae kha lawkuh hae zah aphirute tuh-e khua lungkhu lang tee hae zah pise balyn kha pong a chia hae.26Hamor te a ccapaw Shekhem kha thaloi te phe a chia hae, te Dinah kha Shekhem inn kyate ko hae zah a cciakhae hae.27Mih ccianung tuh a thethya vae keiccuze ccangpaw Jakob ccaaw hae nynh a chia vae hae paw ccungccaw hae kalan cceih hae zah, khua kha thiing hae zah28mih sahiin hae, mih lann hae, te khua kya te loo kya umpaw atyn-are kha phe lawpya hae.29Mih sisua balyn, mih ccaaw hae balyn te mih zu hae, inn kya umpaw balyn kha pong lua hae zah a cciakhae hae.30Oute Jakob nynh Simeon te Levi kha, “E ram kya umpaw Kanaan hae te Periz hae nynh kamaw kha nae huasah vae oh keiccuze vawsawnaw nae thuakhaepya vae oh; ka ccungccaw hae tuh a zya hae, te minmin nynh sueluakuh hae zah kamaw kha rawsete oun tuk hae zetuh kamaw te ka innbyn hae tuh kae chih vae cih,” a cipya hae.31Thuasalama minmin nynh, “Kae ccianung tuh ohhuanung hawte cyisah lan accan tou?” a ci hae. Jakob Bethel lang Bua A Ki
1Pachia nynh Jakob kha, “Thokuh, Bethel lang cceihthung lah, tuin kya khuasah. Na upaw Esau kyate na ccue lyaze namaw kya a langkuhpaw Pachia hanlan silawhang ccangkheit kha tuin kya rae,” a cipya.2Tukeiccuze Jakob nynh a innbyn te amaw kya a um hae paw balyn kha, “Nae kya umpaw ramccang pachia hae kha vua oh, te naemaw te naemaw kha thyaasakuh oh lah nae uccaw kha liakuh oh;3rang oh, Bethel lang cceih oh sih, ka vawsaw ccyh lya yn bawmtupaw te ka ccianaw takyh kya yn umkhaepaw Pachia hanlan silawhang ccangkheit kha tuin kya ka rae cih,” a cipya hae.4Tukeiccuze minmin nynh a hoi hae paw ramccang pachia hae te mih nakua kya umpaw nakuahuing hae kha Jakob kalan a pya hae; te Jakob nynh khah-e hae kha Shekhem pe umpaw phaesi ku kaw khe a thuruh.
5Minmin nynh a ccia lya hae khe Pachia kyate ri lan umpaw kha mih pepan e khua hae kyakhe a ccaw keiccuze humhung nynh mah Jakob ccaaw hae kha deehui vae khyh hae.6Jakob tuh amaw kya umpaw ccungccaw hae ryte Kanaan ram umpaw Luz khua a thua hae, (Luz tuh Bethel nynh thua),7te tuin kyakhe silawhang ccangkheit kha rae zah tuh-e hmin tuh El-bethel cite min a phu, pawccecize a upaw kyate a ccue lyaze Pachia nynh a langpyakunaw hmin nynh thua.8Te Rebekah kha a do-oihtu Deborah tuh chih zah Bethel akawlan umpaw phaesi ku kaw khe a uu hae. Tukeiccuze tuh-e thingku tuh Allon-bacuth cite min a phu hae.
9Jakob nynh Mesopotamia kyate bua a thua tuh Pachia nynh amaw kya bua langkuh zah hythua a pya.10Pachia nynh Jakob kha, “Na min tuh Jakob nynh thua; atu te Jakob cite ko na thua vae lan khyh, thuasalama na min tuh Israel a cikuh vae cih,” a cipya. Tukeiccuze Israel cite ko athua vae.11Pachia nynh amaw kha, “Kae tuh Athunghuapaw Pachia nynh ka thua: na pungzae cih zah na lungthung cih; minphuin phuin kheit te minphuin patae kha namaw kyate oun langkuh cih hae, te siapharan hae kha namaw kyate oun pou cih hae.12Abraham te Isak ka pya hae paw ram kha nang kae pya cih, tuh-e ram tuh namaw koute na ciihan hae kha ka pya cih hae,” a cipya.13Oute Pachia tuh Jakob te bya a hokunaw hae hmin kyate vaawlang a kae vae.14Jakob nynh Pachia te bya a la hokunaw hae hmin kyakhe lungbing ccangkheit bing zah a vawlan khe niapaw silawnawpaw kha bu zah chitui kha mah a bu.15Jakob nynh Pachia te bya a hokunaw hae hmin kha Bethel cite min a phu. Rachel A Chih
16Tukoute Bethel kyate cceih hae zah Efrath khua te tabeih asawnaw kyakhe he a thua hae tuh Rachel tuh a ccaaw pui zaw zah neitangia ccinaw kha myarya a teing.17Tuhte neitangia a cci lyakhe neitaw puisanung nynh Rachel kha, “Rih nan, pawccecize atu ccangpaw ccapaw na hoi vae cih,” a cipya.18Rachel nynh a hy athang dyn khe ccapaw kha Ben-oni cite min a phu; thuasalama a paaw nynh Benjamin cite min a phu.19Rachel tuh chih zah Efrath lang ccianaw laanpi kya a uu hae (Efrath tuh Bethlehem nynh thua),20te Jakob nynh a shawku kyakhe lungbing ccangkheit a bing; tuh-e tuh Rachel shawku kya-e lungbing nynh thua, tuh-e tuh atunin cia tuin kya a um.21Israel nynh cceih zah Eder innhangpaw arawlang khe a bu kha a sak. Jakob Ccapaw hae (1Sh 2.1-2)
22Israel nynh tuin ram kya a um lyakhe Reuben nynh a paaw lovaenung Bilhah kha a ikhae; te Israel nynh tuh-e tuh a thae. Jakob ccapaw hae tuh lu haw lae ning acih hae.23Leah ccapaw hae tuh: Reuben (Jakob a ccatawccaw), Simeon, Levi, Judah, Isakhar te Zebulun nynh thua hae.24Rachel ccapaw hae tuh: Josef te Benjamin nynh thua hae.25Rachel seenung Bilhah ccapaw hae tuh: Dan te Naftali nynh thua hae.26Leah seenung Zilpah ccapaw hae tuh: Gad te Asher nynh thua hae. E hae tuh Mesopotamia ram kya a pui hae paw Jakob ccapaw hae nynh thua hae. Isak Chinaw
27Jakob tuh Mamre kya umpaw a paaw Isak kya a thua, Mamre tuh Abraham te Isak nynh ramccang ccungccaw hae hawte a la umnaw hae nynh thua, (Mamre tuh Kiriath-arba cite mah cikuh zah Hebron cite mah a cikuh).28Isak tuh kum za kheit sung tarya acih vae.29Te Isak tuh a kum tang vae zah he a taw vae te a chih, te a ccungccaw hae kalan a sueluabua hae; a ccaaw hae Esau te Jakob nynh amaw kha a uu hae. Esau Ciihan hae (1Sh 1.34-37)
1Edom cikuhpaw Esau ciihan tuh hynh-e hae nynh thua hae.2Esau nynh Kanaan minphuin hae kha zu lang a dyku hae, tuh-e hae tuh: Hit ccungccaw Elon ccanung Adah, Hiv minphuinpaw Zibeon ccapaw Anah ccanung Oholibamah,3te Ishmael ccanung Basemath nynh thua hae; Basemath tuh Nebaioth a ccianung nynh thua.4Adah nynh Esau hanlan Elifaz kha saahpah zah Basemath nynh Reuel kha a saahpya;5te Oholibamah nynh Jeush, Jalam te Korah kha a saahpya hae. E hae tuh Kanaan ram kya a puipaw Esau ccapaw hae nynh thua hae.
6Oute Esau nynh a zu hae, a ccapaw hae, a ccanung hae, a innbyn balyn, a sahiin hae, a sahiin-awvaw balyn te Kanaan ram kya a hoipaw sisua balyn kha lah zah a neitawpaw Jakob kyate asawnaw ram langkhe a nuekuh.7Pawccecize mih hoirumnaw tuh eih lung kaesy zah pynkheihlan um kho vae khyh hae; mih sahiin-awvaw hae keiccuze a umnaw hae ram nynh minmin hanlan zaw vae khyh.8Tukeiccuze Esau tuh mua alungnaw Seir ram kya khua a sah; Esau tuh Edom nynh thua.
9E hae tuh mua alungnaw Seir ram kya umpaw Edom minphuin hae mih paaw Esau ciihan nynh thua hae.10E hae tuh Esau ccapaw hae mih min nynh thua: Esau a zu Adah ccapaw Elifaz; te Esau a zu Basemath ccapaw Reuel nynh thua.11Elifaz ccapaw hae tuh Teman, Omar, Zefo, Gatam te Kenaz nynh thua hae.12(Timna tuh Esau ccapaw Elifaz a lovaenung thua zah aning nynh Elifaz hanlan Amalek kha a saahpya.) E hae tuh Esau a zu Adah ccapaw hae nynh thua hae.13Reuel ccapaw hae tuh: Nahath, Zerah, Shammah te Mizzah nynh thua hae. E hae hynh Esau a zu Basemath ccapaw hae nynh thua hae.14Esau zu Oholibamah ccapaw hae tuh Jeush, Jalam te Korah nynh thua hae. Oholibamah tuh Zibeon ccapaw Anah a ccanung nynh thua.
15E hae tuh Esau ccapaw hae lakuze ciihan paaw hae nynh thua hae. Esau a ccatawccaw Elifaz ciihan hae kyaze ciihan paaw hae tuh Teman, Omar, Zefo, Kenaz,16Korah, Gatam te Amalek nynh thua hae. E hae tuh Edom ram umpaw Elifaz ciihan hae lakuze ciihan paaw nynh thua hae; minmin tuh Adah ccapaw hae nynh thua hae.17E hae tuh Esau ccapaw Reuel a ccapaw hae nynh thua hae, minmin lakuze ciihan paaw hae tuh: Nahath, Zerah, Shammah te Mizzah nynh thua hae; e hae tuh Edom ram kya umpaw Reuel ciihan hae lakuze bawi nynh thua hae; minmin tuh Esau zu Basemath a ccapaw hae nynh thua hae.18E hae tuh Esau zu Oholibamah ccapaw hae nynh thua hae: ciihan paaw hae tuh Jeush, Jalam te Korah nynh thua hae; e hae tuh Anah ccanung, Esau zu Oholibamah nynh a saah hae paw ciihan paaw hae nynh thua hae.19E hae tuh Esau a cikuhpaw Edom ccapaw hae thua hae zah bawi hae mah a thua hae.
20Tuin ram kya umpaw Hor minphuin a thuapaw Seir ccapaw hae tuh Lotan, Shobal, Zibeon, Anah,21Dishon, Ezer te Dishan nynh thua hae; e hae tuh Hor minphuin kyaze ciihan paaw hae thua hae zah Edom ram umpaw Seir a ccapaw hae nynh thua hae.22Lotan ccapaw hae tuh Hori te Heman nynh thua hae; Timna tuh Lotan ccianung nynh thua.23Shobal ccapaw hae tuh: Alvan, Manahath, Ebal, Shefo te Onam nynh thua hae.24Zibeon ccapaw hae tuh Aiah te Anah nynh thua hae; Anah tuh a paaw Zebeon kya-e lann hae kha ramkaw kya a rin lyaze tuidy a muihtupaw nynh thua.25Anah a ccapaw tuh Dishon thua zah Anah a ccanung tuh Oholibamah nynh thua.26Dishon ccapaw hae tuh Hemdan, Eshban, Ithran te Kheran nynh thua hae.27Ezer ccapaw hae tuh Bilhan, Zaavan te Akan nynh thua hae.28Dishan ccapaw hae tuh Uz te Aran nynh thua hae.29Hor minphuin kya-e ciihan paaw hae tuh Lotan, Shobal, Zebeon, Anah,30Dishon, Ezer, te Dishan nynh thua hae; e hae tuh mua alungnaw Seir ram kyaze mimaw phin raveihte Hor ccungccaw hae kya-e ciihan paaw hae nynh thua hae. Edom Siapharan hae (1Sh 1.43-54)
31Israel ccungccaw hae a uktupaw siapharan humhung mah a um mawze, e hae tuh Edom ram a uk hae paw siapharan hae nynh thua hae.32Beor ccapaw Bela nynh Edom ram kha a uk, a khua min tuh Dinhabah nynh thua.33Bela he chih te, Bozrah khuapaw Zerah ccapaw Jobab nynh siapharan lang a tang.34Jobab he chih te, Teman minphuin hae ram umpaw Husham nynh siapharan lang a tang.35Husham he chih te, Moab ram e Midian hae a la taepaw Bedad ccapaw Hadad nynh siapharan lang a tang, a khua min tuh Avith nynh thua.36Hadad he chih te, Masrekah khuapaw Samlah nynh siapharan lang a tang.37Samlah he chih te, Zufrates vaw kin umpaw Rehoboth khua kya-e Shaul nynh siapharan lang a tang.38Shaul he chih te, Akbor ccapaw Baalhanan nynh siapharan lang a tang.39Akbor ccapaw Baalhanan he chih te, Hadar nynh siapharan lang a tang, a khua min tuh Pau nynh thua, a zu min tuh Mehetabel cikuh zah Matred ccanung nynh thua, Matred tuh Mezahab ccanung nynh thua.
40E hae tuh Esau ciihan hae kyaze ciihan paaw thua hae zah mih phin raveihte mih umnaw raveihte mih min nynh thua hae: Timna, Alvah, Jetheth,41Oholibamah, Elah, Pinon,42Kenaz, Teman, Mibzar,43Magdiel te Iram; e hae tuh Edom ciihan paaw hae nynh thua hae, mih ram kyaze khua a la sahnaw hae raveihte nynh thua (Esau tuh Edom ccungccaw hae mih paaw nynh thua). Josef te A Uno hae
1Jakob tuh a paaw nynh ramccang ccungccaw hawte a la umnaw Kanaan ram kyakhe a um.2E tuh Jakob a innbyn phungpaw nynh thua. Josef nynh kum haw lae sari he cih tuh, a upaw hae ryte tuu hae te miaa hae kha leih a rin hae; a paaw zu hae Bilhah te Zilpah mih ccapaw hae kha leih a bawm hae. Josef nynh a upaw hae hoyleinaw kong kha mih paaw kya leih a hopya.3Israel nynh Josef kha phe a taw vae te a saahpaw ccapaw athua keiccuze ccangpaw a ccaaw hae laeze a sungsahua; te aning nynh apyaapaw angkiccuapaw kha a raepya.4Mih paaw nynh Josef kha a upaw hae balyn laeze a sungsahua cipaw a upaw hae nynh he a nyh hae tuh, Josef kha hua hae zah hoyte byabeih ry vae khyh hae.
5Vaekheit tuh Josef nynh maansah zah a maan kha a upaw hae kya he a hopah hae tuh minmin nynh amaw kha houh a hua vae hae.6Josef nynh minmin kha, “E ka maan hynh ngaetua oh.7Aening nynh loo kya loohku acce kha ah la tung oh. Ka loohku acce nynh vaekheit mawte la thokuh zah lawbabin lan a la thadyn; oute nae loohku acce hae nynh ka loohku acce kha la koihlu hae zah bakhungte a la beik hae,” a ci.8A upaw hae nynh, “Nang nynh kaening kya siapharan lang nae tang cih tou? Nang nynh kaening kha nae uk cih tou?” a cipya hae. Tukeiccuze a maan te a bya keiccuze amaw kha houh a hua vae hae.
9Josef nynh ccangpaw maan kha bua sah zah a upaw hae kyakhe, “Ngaetua oh, ccangpaw maan kha bua ka sah vae: khuanin, sawpaw te awsi haw lae kheit nynh ka malang bakhungte yn la beik hae,” a ci.10A maan kha a paaw te a upaw hae kya he a ho tuh a paaw nynh amaw kha pe zah, “Pawcihawpaw maan mou na sah? Kaening, kamaw, na nung te na upaw hae nynh na kalan kae cceih cih zah na malang khe laekhu kya kae bakhung cih tou?” a cipya.11A upaw hae nynh Josef tungvaw mih eiung, thuasalama a paaw nynh tuh-e tuh a thinlung kya palei a tua. Uno hae nynh Josef Zuanaw
12Josef a upaw hae tuh mih paaw kya-e tuuphu kha Shekhem kya rin lan a cceih hae.13Te Israel nynh Josef kha, “Na upaw hae tuh Shekhem kya tuuphu kha a rin hae khaw? Oun cceih, minmin kalan kae saw cih,” cipah zah Josef nynh, “Phang ka paccynkuh,” a cipya.14A paaw nynh Josef kha, “La cceih lah na upaw hae te tuu hae kha ngedante a um hae tou cipaw la dotua hae lah, kamaw kha nae thaesah cih,” a cipya. Tuhcite a paaw nynh Hebron accya kyate a saw. Josef nynh Shekhem kya a thua tuh,15ccungccapaw lu kheit nynh loo kya a khiakuhpaw Josef kha muih zah, “Pawmou na ccung?” cite a khia.16Josef nynh, “Ka upaw hae nynh ka ccung hae, tuuphu kha teimou a rin hae cipaw beih yn hopah,” a ci.17Ccungccapaw nynh, “Phe cceih vae cih hae, pawccecize, ‘Dothan lang cceih oh sih,’ cite a hokuh hae paw kha ka thae,” a cipya. Tukeiccuze Josef nynh a upaw hae nulangte cceih zah minmin kha Dothan khe a muih hae.18A upaw hae nynh asawnaw kyate Josef kha a muih hae, mih pe a thua mawkhe amaw kha chia lan cite a paccynku hae.19Minmin nynh mimaw te mimaw kha, “Maansahtupaw hein kya yn thua vae.20Rang oh, amaw kha theih oh sih lah, hunghua ccangkheit lungkhu lang vua oh sih; oute sarepaw nynh phe tei cite ho lan, te a maan hae kha pawlangmah yn tang cipaw dotua lan,” a ciku hae.21Thuasalama Reuben nynh he thae tuh, “Amaw kha theih nan oh sih,” cipah hae zah mih kuih kyate Josef kha a luesah.22Tukoute Reuben nynh minmin kha, “A chii luasah nan oh, e ramkaw umpaw hunghua lungkhu lang vua oh, kuih hangnua nan oh,” a cipya hae. Amaw kha mih kuih kyate ka luesah cih zah apang kya bua ka thuakhae sah cite a tuaku.23Josef nynh a upaw hae kya he a thua tuh, minmin nynh apyaapaw angkiccuapaw, a kikupaw kha a khah hae;24te amaw kha lah hae zah hunghua lungkhu lang a vua hae. Hunghua lungkhu kya pawpaw mah um khyh, tui mah um khyh.
25Oute ae lan cite a dahung hae; te he do hae tuh Gilead ram kyate oun cceih hae paw Ishmael ccungccaw khuaccong hae paw phu kheit kha a muih hae. Tuh-e hae nynh amynkhuhpaw ehang kya thungpaw, amynkhuhpaw thuhkuhpaw te therih angro aphuinphuin kha mih kalauh phusah hae zah Izip ram lang oun ccia hae paw kha a muih hae.26Oute Judah nynh a uno hae kha, “Ah neitaw tuh ah theih cih oh zah phe ah pheikuh oh zeso pawmou athane?27Rang oh, amaw kha Ishmael hae kalan zua oh sih, amaw tungvaw ah kuih hang nan oh sih, pawccecize aning tuh ah neitaw thua zah ah chiisaw nynh thua,” a ci. Te a uno hae nynh mih nawccaw.28Te Midian kungku hae he la thua hae tuh, Josef kha hunghua lungkhu te poh thuaa hae zah Ishmael minphuin hae kya ngunphua kia kuin lang a zua hae. Te minmin nynh Josef kha Izip ram lang a cciakhae hae.
29Reuben nynh yn ki zah Josef kha hunghua lungkhu he a muih khyh tuh a ngaethah zah a boeining kha a seiiku.30A uno hae kalan yn ki zah, “Imuapaw um vae khyh, teilangmou ka cceih vae cih,” a ci.31Oute minmin nynh Josef angki kha a law hae, miaa kha theih hae zah miaa chii kyakhe Josef angki kha a dung hae.32Minmin nynh apyaapaw angkiccuapaw kha mih paaw kalan cciakhae hae zah, “Kaening nynh e angki hynh kae muih, na ccapaw angki athua thua khyh cipaw dotua,” a cipya hae.33Aning nynh tuh-e angki tuh syntaw zah, “E hynh ka ccapaw angki nynh thua! Sarepaw nynh amaw kha phe a tei vae; Josef kha zoihtatyh lan pong a pae vae cipaw phe aria vae,” a ci.34Oute Jakob nynh a ngaethya keiccuze a boeining kha seii zah buriboei kha a tae kya a voiku; te a ccapaw hanlan khaw cia rawkhuite a um.35A ccapaw hae balyn te a ccanung hae balyn nynh mih paaw kha lungtangnaw bya a hopya hae; thuasalama mih paaw nynh a lungtangsakuh kho khyh zah, “Ka ccapaw umnaw michi khua lang rawkhuite ka cceih cih,” a cipya hae. Tuhcite a paaw tuh aning hanlan rawkhuite a um.36Te Midian hae nynh Josef kha Izip ram umpaw Faro siapharan kya-e bawi lu kheit a thuapaw Potifar kalan a zua hae; aning tuh siapharan do-oihtu hae kyaze bawi nynh thua. Jakob Te Tamar
1Tuh ccyh lyakhe Judah tuh a uno hae kyate cceih zah Adullam khuapaw Hirah kya a um.2Tuin kyakhe Judah nynh Kanaan ccungccapaw a min Shua cikuhpaw a ccanung kha a muih; tuh-e nopinung kha zu lang umkhae zah a ikhae.3Tuh-e nopinung nynh ccaawpoi zah ccapaw kha a saah; Judah nynh tuh-e ccapaw kha Er cite min a phu.4Tukoute ccaawpoi zah ccapaw bua saah zah Onan cite min a phu.5Tukoute ccapaw bua saah zah Shelah cite min a phu. Shelah a pui lya Judah tuh Khezib khua nynh a um.6Judah nynh a ccatawccaw Er hanlan zu a dypya; a zu min tuh Tamar a cikuh.7Judah a ccatawccaw Er tuh Bawipaw malang ahoy leipaw thua zah Bawipaw nynh amaw kha phe a chisah.8Oute Judah nynh Onan kha, “Na upaw zu kha la ikhae lah zu lang la umkhae; na upaw hanlan ccaawno kha la saahpah,” a cipya.9Thuasalama Onan nynh kae saahpaw hynh kamaw ccaaw lang tang lan khyh cipaw a ny, te a upaw kha ccaawno a pya ry khyh keiccuze a upaw zu kha a ikhae takyh vae ze, a buatui kha laephi kalan leih a pousah han.10A cyisahnaw nynh Bawipaw lung kha tung khyh, tukeiccuze Bawipaw nynh Onan kha mah phe a chisah.11Oute Shelah hynh a u hae hawte yn chihsei cih cite Judah nynh a phang keiccuze a monung Tamar kha, “Ka ccapaw Shelah a zaw makhia na paaw inn kya nomaenung lante la um,” a cipya. Tukeiccuze Tamar nynh a paaw inn lang cceih zah a um.
12Tuinte aro mawze Shua ccanung Judah zu tuh phe a chih; Judah nynh a rawkhuinaw ccyh he athang te, a bangpaw Adullam khuapaw Hirah ryte Timnah khua e a tuuming ngotu hae kalan a cceih hae.13Tamar kha, “Na ranpaw Judah tuh Timnah lang a tuuming ngo lan a cceih cih,” cite a hopya hae.14Tamar nynh a nomae uccaw kha liakuh zah mae bongkupaw boei te a mae kha a bongku, a pyn kha mah phang lungkuh zah Timnah lang cceihpaw laanpi kya umpaw Enaim khua teenaw koikua kyakhe a haung. Shelah tuh phe a zaw vae, tuhzemah zu lang yn umkhae sah khyh hae cipaw kha Tamar nynh a ny.15Judah nynh nopinung kha he a muih tuh, a mae a bongku keiccuze ohhuanung nynh thua cite a tua.16Laanpi pe lang ccianua zah, “Rangtua, ikheih tua sih,” a ci, pawccecize a monung nynh thua cipaw nyh khyh. Nopinung nynh, “Ah ihkheih ze pawmou nae pya cih?” a ci.17Judah nynh, “Miaa phu kya-e miaa taraw sa kheit kha kae pya cih,” a ci. Te nopinung nynh, “Tuh-e tuh nae pya mawze byakinku nawpaw ccangkhakheit kha nae pya ze rou,” a cipya.18Judah nynh, “Pawcihawpaw byakinkunaw uccaw mou kae pya cih?” a ci. Nopinung nynh, “Na tazeih, na kya-e akhekuhpaw arui te na ccyngpaw hoitang kha,” a cipya. Tukeiccuze Judah nynh khah-e hae kha pya zah a ikhae, te Judah liate ccaaw kha a poi.19Tukoute nopinung tuh thokuh zah a cceih vae, te a mae bongkupaw boei kha hungkuh zah a nomae boeining kha bua a lawku.
20Judah nynh nopinung kya byakinku nawpaw uccaw kha bua law khylan a banpaw Adullam khuapaw kyate miaa taraw kha nopinung kalan he a pya tuh, aning nynh nopinung kha muih kho vae khyh.21Aning nynh tuin kya umpaw khuaccaaw hae kha, “Enaim khua laanpi pe umpaw beikinn ohhuanung kha teimou um?” cite a khia hae. Thuasalama minmin nynh, “Hein kya ohhuanung um boi khyh,” a ci hae.22Tukeiccuze aning nynh Judah kalan ki zah, “Nopinung kha ka muih vae khyh, tuhpiaze khuaccaaw hae nynh, ‘Hein kya ohhuanung um boi khyh,’ a ci hae,” cite a hopya.23Oute Judah nynh, “Nopinung kya umpaw uccaw kha amaw la lawkuh sah, tuhkhyhze tuh aening kha oun nuinse cih hae; e miaa taraw hynh nopinung kalan phang ka pya pite amaw kha na muih vae khyh hynhsa,” a ci.
24Sawpaw sah thum he aro te Judah kyakhe, “Na monung Tamar tuh ohhuanung lang tang zah ahoy leipaw ryalaw keiccuze atu ccaaw a poi vae,” cite a hopya hae. Judah nynh, “Amaw kha atolang poukhae oh lah phe chih lan maee te u oh,” a ci.25A poukhae lya hae khe nopinung nynh a ranpaw kha byataw zah, “Ccaaw yn poisahtupaw hynh e uccaw hae a hoitupaw nynh thua, hynh-e tazeih, akhekuhpaw arui te hoitang hynh hum uccaw mou cipaw na syntaw tou, beih dotua hei,” a cipya.26Judah nynh khah-e hae kha syntaw zah, “Nopinung hynh kamaw laeze a dinghua, pawccecize ka ccapaw Shelah kha a vawpaw lang ka pya khyh,” a ci. Te nopinung kha ikhae boi vae khyh.
27Ninsaw a kyh tuh, a vue kya ccaawpheipaw a la um.28Neitangia a cci lyakhe ccapaw lu kheit nynh a kuih kha atolang a dyng; te ccaawpuisah nung nynh a kuih kha kyng zah law te khii zah, “E ccapaw hynh masaty a puipaw nynh thua,” a ci.29Thuasalama tuh-e ccapaw nynh a kuih kha bua khin zah lu kheit kha nynh poh a puity vae, te ccaawpuisah nung nynh, “Nang tou poh na puity!” a ci. Tukeiccuze Perez cite min a phu hae.30Tukoute a kuih kya laaw khiikuhpaw a neitaw tuh yn pui; te Zerah cite min a phu hae. Josef te Potifar Zu
1Josef kha Izip ram lang a cciakhae hae, te Izip ccungccapaw Potifar cikuhpaw, Faro kya-e bawi lu kheit, siapharan inn a do-oihtu hae mih bawi a thuapaw nynh Izip ram lang a cciakhaetu hae Ishmael hae kyate Josef kha a re.2Bawipaw nynh Josef kha umkhae zah ahangkuhpaw ccungccaw lang a tang; te a bawipaw Izip ccungccapaw inn kya a um.3Bawipaw nynh Josef kha umkhae zah a cyipaw balyn kyakhe Bawipaw nynh a laansui a uasahpya cipaw kha a bawipaw nynh a muih.4Tukeiccuze Josef tuh a bawipaw malang maehoynaw mue zah a bawipaw nynh a sungsah keiccuze a ryalawpahtu lang a nung; Potifar nynh Josef kha a inn uktu lang nung zah a hoipaw balyn kha a do-oihtu lang a nung.5A inn te a hoipaw balyn kha a do-oihtu lang he a nung ccyh kyate Bawipaw nynh Josef liate Izip paw a inn kha hythua a pya; Bawipaw hythuanaw tuh Potifar a hoipaw balyn kya, a inn te a loo kya a um.6Tukeiccuze Potifar nynh a hoipaw balyn kha Josef kuih kya pong ap zah amaw a aepaw looh holeite tuh ccangpaw pawpaw hanlan mah a peki vae khyh.
Josef tuh a pynrua hoy zah a puithya.7Tukoute a bawipaw zu nynh Josef kha ry zah, “Kamaw te ihkheih sih,” a cipya.8Thuasalama Josef nynh ei zah a bawipaw zu kha, “Hein kya ka um zah ka bawipaw nynh a inn kya umpaw pawpaw mah peki leite a uccaw tynre kha ka kuih kya yn ap vae.9E inn kya kamaw laeze ale huapaw um vae khyh, a zu na thuapaw nang holeite tuh pawpaw mah kaw yn khyasah leipaw um khyh. Pawtemou e hoyleinaw alepaw kha raete Pachia a rawsepaw seinaw kha pharung ka rae kho cih?” a ci.10Te a bawinung nynh Josef kha nin kheit koute nin kheit soih salamah Josef nynh ikheih, umkheih lanpaw kha a nawccah khyh.11Nin kheit tuh, inn kya lu kheit sanmah a um khyh lyakhe Josef nynh ryalaw lan inn lungkhu lang he a tee tuh,12A bawinung nynh Josef a boeining kha phang kyng zah, “Oun ikhae!” a cipya. Thuasalama Josef nynh a boeining kha a bawinung kuih kya ccuetaw zah atolang po a ccue vae.13Josef nynh a kuih kya a boeining kha cciataw zah atolang a ccuepaw kha a bawinung nynh he a muih tuh,14a inn um hae paw kha ko hae zah, “Do oh, ka vawpaw nynh e Hebru paw hynh aening kha dothatheih khylan aening kalan yn thuakhae! Aning nynh kamaw kha ikhae lan yn teenua zah kae nynh thawte ka sia;15aning nynh thawte ka siapaw roi kha he thae tuh, a boeining kha ka pe khe ccuetaw zah atolang po ccue vae,” a ci.16Oute a bawipaw innvaw yn thua mawlaezung a bawinung nynh Josef boeining kha a pe khe phang a nung.17te a bawipaw innvaw he yn thua tuh a bawinung nynh a la ho vae hawkhate a vawpaw kyakhe, “Aening kalan nae thuakhaepaw Hebru seepaw nynh kamaw kha yn dothatheih zah yn teenua;18thuasalama thawte he ka sia tuh, a boeining kha ka pe khe ccuetaw zah atolang po ccue vae,” a cipya.
19“E hynh na seepaw nynh ka tungvaw yn cyisahnaw nynh thua,” cite a zu nynh a hopaw bya kha a bawipaw nynh he thae tuh myarya a thinria.20Te a bawipaw nynh Josef kha cciakhae zah siapharan kya-e thongccah hae a nungnaw hae thonginn kyakhe a nung, te Josef tuh thong a ccah vae. Thonginn kya Josef
21Thuasalama Bawipaw nynh Josef kha umkhae zah atynpaw sungsahnaw kha a muihsah, te thong uktupaw malang maehoynaw kha a pya.22Te thonginn lupi nynh thonginn kya umpaw thongccah hae kha Josef kuih kya a ap, te thonginn kya cyi lan accanpaw pawpaw balyn Josef nynh a cyi.23Josef nynh a cyipaw miakaw kha thong uktupaw nynh pawpaw mah dothui vae khyh, pawccecize Bawipaw nynh Josef kha umkhae zah a cyipaw miakaw kha Bawipaw nynh a laansui a uasahpya. Josef nynh Maan A Leih
1Tukoute ccyh sohsoh aro tuh Izip siapharan banang kyngtu bawi te sanlou raetu bawi nynh mih bawipaw Izip siapharan tungvaw a sei hae.2Faro siapharan tuh banang kyngtu bawi te sanlou raetu bawi, tuh-e lu ning tungvaw a thinria zah3Josef thong a sawnaw hae siapharan inn rintu bawi a inn kyakhe minmin kha thong a sawbua hae.4Siapharan inn rintu bawi nynh Josef kha minmin hanlan ryalawpahtu lang khang zah Josef nynh rya a lawpya hae; te minmin kha khaw cia thong a saw hae.5Zi kheit tuh tuh-e thongccah hae paw Izip siapharan banang kyngtu bawi te sanlou raetu bawi nynh mimaw raveihte asuilan um kalang paw maan kha a sah kalang hae.6Awkhua khe Josef nynh minmin kalan he thua tuh, mih lungriathaepaw kha a muih hae.7Josef nynh a bawipaw inn kya thongccahkheih hae paw Faro kya-e ryalahtu bawi hae kha, “Pawcce atunin nae mitmae hoy khyh rei?” cite a khia hae.8Minmin nynh Josef kha, “Maan kae sah zah oun leihpah khotu lu kheit sanmah um khyh,” a ci hae. Te Josef nynh, “Maan leih khonaw tuh Pachia te sekuh khyh tou? Nae maan tuh yn hopya tua oh,” a cipya hae.
9Tukeiccuze banang kyngtu bawi nynh a maan kha Josef kalan hynhte a hopya: “Ka maan ze ka malang hin misu ku kukheit a la um,10tuh-e misu ku kyatuin aran ran thum a um. A naw he yn toih tuh a paw kha palou yn paw zah a thae tuh palou yn thae vae.11Faro banang tuh ka kuih kya ka ccyng, te misu thae kha ka lo zah Faro banang lungkhu kya ka su koute Faro kuih kya ka pya,” a ci.12Oute Josef nynh, “Na maan asuilan tuh hynhte nynh thua: Misu aran ran thum tuh nin thum cipaw nynh thua;13Nin thum lungkhu Faro nynh thong kyate ae pousah cih zah langmaw na ryalaw kha bua ae pya cih; te banang kyngtu bawi na la thua lyaze na la cyi hawkhate Faro banang kha a kuih kya bua na pya cih.14Tuhte hoynaw he na tung te, kamaw kha ning leite thaw yn ccih lah kamaw kong kha Faro kya beih la hopah vae ii, tuhcite e thonginn kyate yn luesah bua.15Accaccingte ho lanze kamaw hynh Hebru ram kyate oun ru hae; e Izip ram kya mah minmin nynh thongsaw lan ciate pawpaw mah ka cyih khyh,” a ci.
16Maan a leihpaw kha accing cipaw sanlou raetu bawi nynh he a muih tuh, Josef kha, “Kae mah maan ccangkheit ka sah: Ka lu kya sanlou bawng bawngthum ka la khangkuh zah17avawlankou umpaw sanlou bawng kyatuin Faro siapharan hanlan sanlou aphuinphuin a um, thuasalama pavaw hae nynh ka lu vawlan umpaw sanlou bawng kya-e kha a la ae hae,” a ci.18Te Josef nynh, “Na maan asuilan tuh hynhte nynh thua: Sanlou bawng bawngthum tuh nin thum cipaw nynh thua;19nin thum lungkhu Faro siapharan nynh na lu kha ae pae cih. Te na pyn kha thing kya ae sae cih zah pavaw hae nynh na saw kha ae ae cih hae,” a cipya.
20Nin thumnaw nin tuh Faro pui nin thua zah Faro nynh a ryalawpahtu hae hanlan poi a tuapya hae, te banang kyngtu bawi te sanlou raetu bawi kha tuh-e a ryalawpahtu hae malang khe a pousah hae.21Faro nynh banang kyngtu bawi kha langmaw a ryalaw kyakhe bua a nung; te aning nynh banang kha Faro kuih kya a pya;22thuasalama Josef nynh maan a leihpya hae hawte sanlou raetu bawi kha theih zah a sae.23Tuhzemah banang kyngtu bawi nynh Josef kha liathui leite phe a ning vae. Josef nynh Faro Maan A Leih
1Kum ning he aro koute Faro nynh maansah zah a maan kyaze Nal vawpi pe khe a la thadyn,2te puithya zah athopaw vaetua sa sari tuh vawpi lungkhu te oun pou hae zah vawkhu kin umpaw lonua kha a boukuh hae.3Tukoute a muinthah zah angethahpaw vaetua sa sari tuh Nal vawpi kyate oun pou hae zah Nal vaw kin kya umpaw masaty e vaetua hae pe khe a la thadyn hae.4A muinthah zah angethahpaw vaetua hae nynh puithya zah athopaw vaetua sa sari kha phe ae hae. Te Faro tuh luih a thaekuh.5Oute Faro nynh ih zah vaeningnaw maan a sah; a maan kyaze accan le zah ahoypaw loohku kya-e avui vui sari tuh ku kheit kyate a lethung hae.6Accan dih zah nithua lang e khisan keiccuze asipaw loohku kya-e avui tuh vui sari a vui hae.7Te accan dihpaw looh avui hae nynh accan le zah ahoypaw looh avui vui sari kha phe a laang hae. Faro nynh he thaekuh tuh a maan nynh thua cipaw a ny.8Khua he yn dae te, Faro tuh a lungriathae; tukeiccuze Izip ram e mitleihthya hae paw te ahaw hae paw balyn kha kosah hae zah Faro nynh a maan kha a hopya hae, thuasalama Faro maan kha a leihpah khopaw lu kheit sanmah um khyh hae.
9Oute banang kyngtu bawi nynh Faro kha, “Ka seinaw kha atunin ka nykuh cih.10Vaekheit tuh Faro nynh a ryalawpahtu hae tungvaw a thinria zah kae te sanlou raetu bawi kha inn rintu bawi a inn kya-e thonginn kyakhe yn nung.11Kae te aning nynh zi kheit lungkhu kaemaw raveihte asuilan umpaw maan kha kae sah.12Tuin kya kaening ryte inn rintu bawi a seepaw Hebru ccangvaepaw a umbua. Kae maan kha kae hopah zah kae maan raveih thyhte yn leihpya.13Maan yn leihpya thyhte phe accing; kae nynh langmaw ka ryalaw kha bua ka mue zah sanlou raetupaw kha tuh theih zah a sae,” a ci.
14Oute Faro nynh Josef kha kosah hae zah Josef tuh thonginn kyate arangte a cciakhae hae. Josef nynh a khawming kha ngokuh zah uccaw a liakuh koute Faro kalan a tee.15Te Faro nynh Josef kha, “Maan ccangkheit ka sah zah a leih khopaw lu kheit sanmah um khyh. Maan kha he na thae ze phe na leih kho cipaw ka thae,” a ci.16Josef nynh Faro kha, “E tuh kamaw cyi khonaw thua khyh, Pachia nynh nang kha ahoypaw maan asuilan ae pya cih,” a cipya.17Tukoute Faro nynh Josef kha, “Ka maan kyaze Nal vawpi kin khe ka la thadyn;18te puithya zah athopaw vaetua sa sari tuh Nal vawpi lungkhu te oun pou hae zah vawpi kin kya popaw lonua kha a boukuh hae.19Tuh-e vaetua hae malang khe a muinthah zah angethahpaw ccangpaw vaetua sa sari tuh oun pou hae, tuhte amuinthahpaw vaetua hae tuh Izip ram balyn kya ka muih boi khyh.20Muinthah zah angethahpaw vaetua hae nynh masaty e athopaw vaetua sa sari kha phe a ae hae,21thuasalama he a ae kou hae te, phe a ae vae hae cipaw kha humhung nynh mah nyh khyh, pawccecize minmin tuh atakaw lya hawte mih muinthah mamin. Tukoute luih ka thaekuh vae.22Vaeningnaw ka ih zah ka maan kyaze accan le zah ahoypaw loohku kya-e avui vui sari tuh ku kheit kya a lethung hae,23tukoute accan dih zah nithua lang e khisan keiccuze asipaw avui vui sari tuh a vui hae;24te accan dihpaw avui hae nynh accan hoypaw vui sari hae kha phe a laang hae. Tuh-e tuh mitleihthya hae paw kya ka hopah hae zah yn leihpah khopaw lu kheit sanmah um khyh,” a ci.
25Oute Josef nynh Faro kha, “Na maan hae tuh phuin kheit thua zah phe lokuh hae; Pachia nynh a cyi lanpaw kha namaw kya ae langsapyaku vae.26Ahoypaw vaetua sa sari tuh kum sari thua zah ahoypaw looh avui vui sari tuh mah kum sari cipaw nynh thua; na maan hae tuh ccangkheit nynh thua hae.27Nulang te oun pou hae paw vaetua a ngethah zah a muinthah hae paw tuh kum sari cipaw nynh thua. Nithua lang e khisan keiccuze asipaw looh avui vui sari tuh mah ccakannaw kum sari cipaw nynh thua.28Phe kae hopya vae hawte nynh thua; Pachia nynh a cyi lanpaw kha namaw kya ae muihsah.29Izip ram balyn kya kum sari lungkhu myarya loohvoi cih.30Tukoute ccakannaw kum sari yn thua cih zah Izip ram kya loohvoinaw balyn kha phe oun ning cih hae; te ccakannaw nynh ram kha yn roh cih.31Oun thua cih paw ccakannaw tuh myarya yn ccih cih keiccuze ram lungkhu looh a la voi boi paw kha oun nyh vae lan khyh hae.32Vae ning maan na sahpaw asuilan tuh, e uccaw hynh Pachia nynh phe a khyade vae paw thua zah Pachia nynh taloi yn cyih vae cih cinawpaw nynh thua.33Tukeiccuze nang nynh a thya a hawpaw pise lu kheit kha na po cih zah Izip ram a uktu lang na nung cih.34E ram kya bawi hae kha na khang cih hae zah kum sari loohvoi lungkhu Izip ram kyate a poupaw pum pangaw pum kheit kha na khoisah cih hae.35Minmin nynh oun thua cih paw ahoypaw kum sari kya-e looh kha ccakhung hae sah lah Faro kawhoinaw zakaw khe nung hae sah. Khuapi kya looh kha suelua hae sah lah phang ccy hae sah.36Tuh-e looh tuh Izip ram lungkhu yn thua cih paw ccakannaw kum sari lungkhu ae lan ram hanlan nungdaepaw athua cih zah ccakancci lungkhu ram tuh roh vae lan khyh,” a ci. Josef tuh Uktu lang A Tang
37Tuh-e bya nynh Faro te a ryalawpahtu balyn kha mih lung a pawsah.38Faro nynh a ryalawpahtu hae kha, “Pachia muisaw nynh a umkhaepaw ccangpaw lukhakheit, e ccungccapaw tahawpaw hynh ah muih kho ung cih oh tou?” a ci.39Tukeiccuze Faro nynh Josef kha, “E balyn hynh Pachia nynh nang kha ae muihsah vae keiccuze nang hawte a thya a hawpaw lu kheit sanmah um vae lan khyh.40Nang tuh ka inn uktu na thua cih zah ka ccungccaw hae nynh na bya kha a ngae cih hae; siapharan tungkhung kya ka dahungpaw kyalya hynh nynh nang laeze ka lehuanawpaw athua cih,” a ci.41Te Faro nynh Josef kha, “Nang kha Izip ram balyn a uktu lang kae nung vae,” a cipya.42Faro nynh a tazeih kuihpu kha khahkuh zah Josef kuih kya a pusah; myarya hoypaw boeining kha lawsakuh zah suisi kha a oisah.43Te siapharan nynh ccangningnaw umpaw a marangle kha ccisakuh zah minmin nynh Josef malang khate, “Nae ccukharutung oh,” cite a sia hae. Tuhcite Faro nynh Izip ram balyn kha a uksah.44Tuhpiaze Faro nynh Josef kha, “Kae tuh Faro siapharan nynh ka thua, Izip ram balyn kya na kaw leite humhung nynh mah a kuih a ccu hang lan khyh,” a cipya.45Faro nynh Josef kha Zafenath-paneah cite min a phu; te On khua e ranpibawi Potifera ccanung Asenath kha Josef zu lang a pya. Tuhcite Josef tuh Izip ram balyn kha uknaw kaw a mue.46Josef nynh Izip siapharan Faro kya ryalaw he a tee lya tuh kum sung thum he acih. Te Josef nynh Faro umnaw kyate pou zah Izip ram balyn kya khua a ccung.47Kum sari loohvoi lungkhu laephi nynh looh myarya lung lan a pousah.
48Izip ram kya looh patae he avoi tuh Josef nynh kum sari lungkhu e looh balyn kha suelua zah khua hae kya a ccakhung; khua pepan umpaw loo hae kya-e looh hae kha khua takyh kya a ccakhung.49Josef nynh looh kha rili kya-e laesia hawte myarya alung lan ccakhung zah tou kho um lei lan alung keiccuze tou mah tou vae khyh.
50Ccakanccinaw a thua mawkhe Josef nynh On khua e ranpibawi Potifera ccanung Asenath te ccapaw lu ning a saah hae.51Josef nynh atawccaw kha Manasseh cite min a phu, “Pawccecize Pachia nynh ka vawsawnaw balyn te ka paaw inn balyn kha phe yn ningsah vae,” a ci.52Ccapaw lu ningnaw kha Efraim cite min a phu. “Pawccecize vawsaw ka tungnaw ram kyakhe Pachia nynh yn pungzaesah vae,” a ci.
53Izip ram kya loohvoi kum kumsari tuh yn thang vae;54Josef nynh a la ho hawte ccakanccinaw kum sari tuh yn thua vae. Ram takyh kya ccakan accih, thuasalama Izip ram balyn kya tuh looh a um.55Izip ram balyn kya ccakan he yn ccih tuh ccungccaw hae nynh looh mue khylan Faro kalan a sia hae. Faro nynh Izip hae kha, “Josef kalan cceih oh lah ae hopya oh paw kha cyih oh,” a cipya hae.56Te ccakannaw nynh ram balyn kya pong alekuh tuh Josef nynh looh a ccakhungnawpaw ccunginn balyn kha pong hungpah hae zah Izip hae kha a zuapya hae, pawccecize Izip ram kya myarya ccakanccih.57Tuhpiaze laephi vawlan e ccungccaw balyn nynh looh re lan Izip ram e Josef kalan a cceih hae. Josef Uno hae Izip Ram lang Ccianaw
1Jakob nynh Izip ram kya looh a um cipaw he thae tuh a ccapaw hae kha, “Pawcce lu kheit te lu kheit phang na doku oh?2Izip ram kya looh a um cite ka thae; ah hiin nawlan oh, te ah chi khyh nawlan oh, la cceih oh lah looh la re oh,” a cipya hae.3Tukeiccuze Josef a upaw hae lu haw tuh Izip ram e looh re lan a cceih hae.4Thuasalama Jakob nynh Josef a neitaw Benjamin kha a upaw hae kya cciasah bua khyh, pawccecize Benjamin nynh vawsawnaw a tungsei cih cipaw a thinphang.5Kanaan ram kya ccakancci keiccuze Israel a ccapaw hae tuh looh re lan cceih hae paw mingccang hae ryte oun thuabua hae.
6Josef tuh ram uktu thua zah ram lungkhu e ccungccaw balyn elang looh a zuapahtu nynh thua. Te Josef a upaw hae tuh oun thua hae zah Josef malang a bakhung hae.7Josef nynh a upaw hae kha a muih hae tuh phe syntaw hae, thuasalama a nyh leipaw hawte umsakuh zah byarepaw te beih hae zah, “Teitemou nae thua oh?” a ci hae. Minmin nynh, “Looh re lan Kanaan ram te nynh kae thua,” a ci hae.8Josef nynh a upaw hae kha syntaw hae salamah a upaw hae nynh amaw kha syntaw vae khyh hae.9Josef nynh a upaw hae konglang maansahpaw kha liathui zah, “Nanning hynh dophitu hae nynh na thua oh, ram a nyaanawpaw do khylan nae thua oh paw nynh thua,” a cipya hae.10Minmin nynh Josef kha, “Thua khyh, kae bawipaw; na see hae hynh looh re lan kae cceihpaw nynh thua.11Kaening tuh lu kheit ccaaw hae, u te neitaw hae nynh kae thua; a ding hae paw nynh kae thua; na see hae hynh dophitu hae papin kae thua khyh,” a ci hae.12Thuasalama Josef nynh minmin kha, “Thua khyh, nanning hynh ram a ryachinawpaw kha nae do oh paw nynh thua,” a ci.13Minmin nynh, “Na see hae kaening hynh Kanaan ram e lu kheit ccaaw hae, u te neitaw hae kae thua zah uno lu haw lae ning kae cih; asoi huapaw tuh kae paaw te nynh atu a um hae, lu kheit tuh um vae khyh,” a ci hae.14Thuasalama Josef nynh minmin kha, “Ka ho vae hawte nynh thua, nanning tuh dophitu hae nynh na thua oh.15Nanning kha pawtemou kae syntawtua cih oh ci zetuh: Faro min te bya ka kinku, nae neitaw asoi huapaw kha hein kya yn thua khyh zetuh e hmin kyate na pou lan khyh oh.16Nae bya hynh ahme hme khyh cipaw ny nawlan nanning laku e lu kheit nynh cceihsah lah nae neitaw kha yn thuakhae sah, tuhlaepaw tuh thonginn kya na um cih oh; tuhkhyhze tuh Faro min te bya ka kinku, dophitu hae nynh na thua ccaccing oh,” a ci.17Te minmin kha thonginn kya nin thum cia pynkheihlan a nung hae.
18Nin thumnaw nin kya Josef nynh minmin kha, “E hynh cyih oh lah na hiin cih oh, pawccecize Pachia kha ka rih:19nanning hynh a dingpaw na thua oh zetuh nanning lakuze lu kheit kha na umnaw oh thonginn kya umsah. Tuhlaepaw tuh nae innbyn kya ccakancci keiccuze looh kha phukute cceih oh lah20nae neitaw asoi huapaw kha kamaw kalan oun cciakhae oh. Tuhte na cyi oh zetuh nae bya tuh ahmepaw athua cih zah na hiin cih oh,” a cipya hae. Te minmin nynh tuhte cyi lan mih naw a ccah.21Minmin nynh lu kheit te lu kheit kha, “Aening nynh ah neitawpaw tungvaw ah la cyi oh paw hanlan detahnaw ah tung vae oh; aning nynh oun soihbia zah a vawsawnaw mang ah muih oh pite ah ngaepah khyh oh. Tukeiccuze e vawsawnaw hynh ah tungvaw a ccah vae,” a ciku hae.22Te Reuben nynh minmin kha, “Imuapaw tungvaw sei nan oh sih cite kae hopah khyh oh tou? Thuasalama na ngae khyh oh. Tukeiccuze amaw a chii keiccuze e vawsawnaw nynh oun thuanua vae,” a ci.23A hoku hae paw kha Josef nynh phe a ny cipaw minmin nynh nyh khyh hae, pawccecize Josef nynh byaleihtu kha mang zah bya a hopya hae.24Josef nynh minmin kyate toikuh zah a rah; tukoute bua yn ki zah minmin kha bya a beih hae. Te Simeon kha ko zah mih malang khe phang a he. Josef A U hae Kanaan lang A Ki hae
25Josef nynh, “Mih sungkua kya looh kha phe beih lan ruinpah oh, mih phua kha mih lathin sungkua raveih kya na sangpah cih oh zah laanryng hanlan vaelooh kha na pya cih oh,” cite kaw a pya hae. Tuhcite minmin hanlan a cyipya hae.26Minmin nynh mih lann hae kha looh phusah hae zah a cceih vae hae.27Khuazi ryanaw hmin kyakhe minmin laku e lu kheit nynh a lann kha aepaw pya lan cite a lathin sungkua kha he phou tuh a phua kha lathin sungkua kyakhe a muih.28A uno hae kyakhe, “Ka phua kha bua oun nungpya hae; ka sungkua kya phua phang um rei!” a cipya hae. Minmin nynh mih bungzou zah mih rikaw phe thua lante lu kheit te lu kheit kha, “Pachia nynh aening tungvaw a cyipaw hynh paw a rynaw mou thua?” a ciku hae.
29Minmin nynh Kanaan ram e mih paaw Jakob kya he thua hae tuh, mih tungvaw a cyihkuhpaw balyn kha a hopya hae;30“Ram uktu bawi nynh byarepaw te oun beih zah, ram kya dophitu hae nynh na thua oh, oun ci.31Thuasalama kaening nynh, ‘Kaening tuh a ding hae paw kae thua zah aphirute thongpang lahtu hae kae thua khyh.32Kae paaw nynh oun saahkheih paw uno lu haw lae ning nynh kae thua; lu kheit tuh um vae khyh, asoi huapaw tuh kae paaw te Kanaan ram kya nynh atu a umkheih hae,’ kae cipya.33Te ram uktu bawi nynh kaening kha, ‘Nanning tuh a ding hae paw nynh na thua oh cipaw ka ny nawlan, nae uno lukhakheit kha kamaw kya cciataw oh, nae innbyn kya ccakancci keiccuze looh kha phukuh oh lah cceih oh.34Nae neitaw asoi huapaw kha kamaw kalan nae cciakhae cih oh, tetuh nanning hynh a ding hae paw na thua oh zah dophitu hae na thua khyh oh cipaw ka nyh vae cih. Te nae unopaw kha naemaw kalan bua kae sawpah cih oh zah, e ram kya kung na ku cih oh,’ oun cipya,” cite a hopya hae.
35Mih lathin sungkua kya-e looh kha he a boh hae tuh mih phuabu raveih tuh mih lathin sungkua raveih kya ccarou a la um. Minmin te mih paaw nynh mih phuabu hae kha he a muih hae tuh mih rikawthua.36Te mih paaw Jakob nynh minmin kha, “Nanning nynh kae kha ccaaw leite nae nung vae oh: Josef mah um vae khyh zah Simeon mah um vae khyh, te atu Benjamin mah bua na cciakhae vae cih oh. Hynh-e balyn hynh ka tungvaw acyihkuh vae,” a ci.37Oute Reuben nynh a paaw kha, “Namaw kalan Benjamin kha bua kae thuakhae khyh zetuh ka ccapaw hae lu ning kha na theih cih hae. Amaw kha ka kuih kya yn ap lah namaw kalan bua kae thuakhae cih,” a cipya.38Thuasalama a paaw nynh, “Ka ccapaw kha namaw kya cceihbua lan khyh, pawccecize a upaw tuh phe chih vae zah, amaw makhae nynh a um vae. Na ccianaw oh laanryng khe a chisei zetuh nanning nynh ka sang phe paw vae paw hynh ngaethyanaw te michi khua lang nae cciasah sei cih oh,” a ci. Benjamin te Izip lang A Cceih hae
1Kanaan ram kya myarya ccakan accih.2Izip ram kyate a phu hae paw looh phe thang lan a ae hae tuh mih paaw nynh minmin kha, “Bua la cceih oh lah looh beihtaraw oun re oh,” a cipya hae.3Thuasalama Judah nynh a paaw kha, “Ccungccapaw nynh, ‘Nae neitawpaw kha nae thuakhae khyh oh zetuh ka mitmae nae muih lan khyh oh,’ cite oun cipah zah, ccaerarih lan raeringnaw oun pya.4Kae neitawpaw kha kaening ryte nae sawpya zetuh kae cceihbung cih zah looh kha kae repah cih;5thuasalama amaw kha nae sawpya khyh zetuh kae cceih lan khyh, pawccecize ccungccapaw nynh, ‘Nae neitawpaw yn cciabua khyh zetuh ka mitmae nae muih lan khyh oh,’ cite oun cipya,” a ci.6Israel nynh, “Ccangpaw neitaw kae hoi ung cite ccungccapaw kha hopyate pawcce kae kha lungriathaenaw nae pya oh?” a ci.7Minmin nynh, “Ccungccapaw nynh kaemaw te kae puizia hae kong kha pekite oun khia zah, ‘Nae paaw a hiin ung tou? Ccangpaw neitaw na hoi ung oh tou?’ cite oun ci. Tuhte bya oun khia keiccu nynh amaw kha kae hopya. ‘Nae neitawpaw kha oun thuakhae oh,’ cite oun ci lanpaw kha kae nyh kho cih zawtou?” a ci hae.8Oute Judah nynh a paaw Israel kha, “Imuapaw hynh kamaw kya cciasah bua lah kae la cceih sah; tuhte rou nynh namaw, kaemaw te kae ccaaw hae hynh ah hiin cih oh zah ah chih lan khyh oh.9Kamaw ccaccei hynh amaw hanlan aamahkhan ka thua cih; amaw hanlan ka tungvaw tavuan yn pya. Amaw kha na kalan ngedante hoyrarih lan bua kae thuakhae khyh zetuh seiphusahnaw kha zungzae ka ing sah.10Hynhte accyh kae la sung khyh zetuh, atu hynh vae ning kae leihkuh vae cih paw,” a cipya.
11Oute mih paaw Israel nynh, “Tuhte athua zetuh hynhte cyih oh: Kanaan ram e ahoy huapaw thingthae phin, balm thingphi beihtaraw, khoilutui beihtaraw, ehang kya thungpaw mynkhuhpaw, pistakhio thae, akaloh thaawpaw thingthae te almon thae kha nae sungkua kya sangkuh oh lah tuh-e ccungccapaw hanlan lasung lang la phupah oh.12Phua kha leit ning alung lante phu oh. Nae sungkua kya nae kikhae oh paw phua kha bua la phu oh; a mesei hae paw nynh thua cih.13Nae neitawpaw mah ko oh lah tuh-e ccungccapaw kalan bua la cceih oh;14tuh-e ccungccapaw nynh nae uno lu kheit te Benjamin kha bua oun kisahnaw lan hae, Alesaepaw Pachia nynh tuh-e ccungccapaw malang thaw ae la ccih vae oh sah, kae tuh ka ccapaw hae hanlan rawkhui lan accan ze ka rah vae cih latu,” a ci.15Minmin nynh lasung, phua leit ning ryte Benjamin kha Izip ram lang cciakhae hae zah Josef malang a thuakhae hae.
16Josef nynh minmin ryte Benjamin kha he a muih tuh, a inn e ryalahtupaw kyakhe, “Minmin kha inn lungkhu lang teekhae hae lah saw sa kheit theih lah aepaw kha la paccyn; pawccecize minmin ryte ninthu kae aekheih cih,” a cipya.17Josef nynh a ho hawte tuh-e ccungccapaw nynh minmin kha Josef inn lang a cciakhae hae.18Josef inn lang he cciakhae hae tuh, minmin nynh rih hae zah, “Anuhlang lyaze ah sungkua kya oun kisahkhaeku paw phua keiccu nynh oun teekhae hae. Aening kha seinaw ccungpyate see lang oun tangsah cih zah lann hae kha oun lua cih,” a ciku hae.19Tukeiccuze Josef inn kya ryalahtupaw kalan cceih hae zah thuakaw zung kyakhe,20“Bawipaw, anulang lya looh re lan vaekheit kae thua boi vae,21khuazi ryanaw kya kae thua zah kae sungkua kha he kae phou tuh, kae lathin sungkua kya kae phua raveih kha phe ccing lan a la um. Tuh-e tuh atu bua kae phubia.22Tuhpiaze looh re nawlan phua kha alae lante kae phubia. Kae phua kha kae sungkua kya hum nynh mah oun sangpah cipaw kae nyh khyh,” cite a hopya hae.23Aning nynh, “Nae lungdaesah, nae thinphang nan sah, nae Pachia te nae paaw a Pachia nynh nae sungkua kya sisua kha ae sangpya oh paw nynh athua cih; nae phua kha phe ka mue,” a ci. Oute Simeon kha minmin kalan khe a thuakhaepya hae.24Tuh-e paw nynh minmin kha Josef inn lang a cciakhae hae, tui kha pya hae zah mih ccu kha a singku hae, mih lann hae kha mah aepaw a pya hae,25minmin nynh ninthu ccyh kya yn thua cih paw Josef hanlan lasung kha phe a paccyn ty vae hae, pawccecize minmin nynh tuh-e inn kya ae lan cipaw phe a thae vae hae.
26Josef nynh innvaw he a thua tuh minmin nynh inn lungkhu lang a teekhae hae paw lasung kha ccyngpah hae zah amaw malang khe laekhu kya a bakhung hae.27Josef nynh minmin kha bya a beih kou hae te, “Na ho oh paw a taw vae paw nae paaw so a dan tou? A hiin ung tou?” cite khia hae zah28minmin nynh, “Na seepaw kae paaw tuh mang a dan; mang a hiin ung,” a cipya hae. Te minmin nynh mih lu baling hae zah sawtuanaw kha a pya hae.29Oute Josef nynh ngawdo zah a nung ccapaw, a neitaw Benjamin kha he a muih tuh, “E hynh nae hopya oh paw, nae neitaw asoi huapaw tuh athua tou? Ka ccapaw, Pachia nynh thaw ae ccih vae sah,” a cipya.30Josef nynh a neitaw kha muih zah myaryamaw a sungsah keiccuze a rawthua zah arangte a toikuh. Te amaw khaan lungkhu lang tee zah a rah.31Oute a maelahkuh koute bua yn pou; te aning nynh phang yhkuh zah, “Aepaw tuh yn paccynpah oh,” a cipya hae.32Josef hanlan ccaboi ccangkheit, a upaw hae hanlan ccaboi ccangkheit, te Josef te a aekheih hae paw Izip hae hanlan ccaboi ccangkheit khate aepaw kha a paccyn hae, pawccecize tuh-e tuh Izip hae nynh Hebru hae kha a zawpuinaw hae paw nynh thua.33Josef a uno hae kha Josef malang khe atawccaw tahyhte alepaw kyate adihpaw kyacia po a haungsah hae. Tukeiccuze Josef a uno hae nynh mimaw te mimaw kha dokuh hae zah mih ngaeangthua.34Josef ccaboi kyate minmin kha aepaw a pya hae. Benjamin tuh a upaw hae laeze leit pangaw alunghua lante looh kha a mue. Tuhcite minmin nynh neih hae zah Josef ryte a hoysah hae. Banang Azo
1Oute Josef nynh a inn kya ryalahtupaw kha, “Minmin nynh a phu kho hae thyhte mih sungkua kya looh kha phe beih lan ruinpah hae lah mih phua raveih kha mih sungkua raveih kya sangpah hae.2Asoi huapaw kya-e sungkua kyakhe ngun banang te looh mee lang yn phupaw phua kha sangpah,” a cipya. Te Josef nynh a hopya thyhte aning nynh a cyi.3Awkhua he yn aw tuh mih lann hae ryte minmin kha a cciasah vae hae.4Minmin nynh khua kyate eih asaw leinaw cia he a cceih hae khe, Josef nynh a ryalawpahtupaw kha, “Cceih lah minmin kha la deehui hae; he na phah hae te minmin kha, ‘Pawcce ahoypaw kha ahoy leipaw te nae liaru oh? Pawcce ka ngun banang kha na ru oh?5E hynh ka bawipaw nynh a nianawpaw banang thua khyh tou? Malang yn cyihkuh lanpaw kha ny nawlan a mangpaw banang thua khyh tou? E na cyi oh paw hynh phe na sei oh,’ cite la hopah hae,” a cipya.
6Aning nynh minmin kha he a phah hae tuh khah-e bya kha a hopya hae.7Minmin nynh, “E bya hynh bawipaw nynh pawcce a ho? Tuhte cyi lanpaw tuh na see hae nynh tua mah kae tua boi khyh!8Kae sungkua kya kae muihpaw phua kha Kanaan ram kyate namaw kalan phe kae kikhae vae; na bawipaw inn kya-e sui thuasah, ngun thuasah, pawcce kae ru lanpaw tuh?9Na see hae lukhakheit kyakhe tuh-e uccaw kha muih athua zetuh, tuh-e paw tuh chihsah; tuhpiaze tuhlaepaw kaening balyn hynh bawipaw see lang kae tang cih,” a cipya hae.10Aning nynh, “Na ho oh hawte thuasah; amaw kya banang muih athuapaw tuh ka see lang a tang cih, thuasalama tuhlaepaw tuh na la cceih cih oh,” a ci.11Oute minmin nynh mih sungkua raveih kha laephi kya nyakuh hae zah mih sungkua kha a phou hae.12Aning nynh atawccaw kyate asoi huapaw kyacia he ccung tuh, banang kha Benjamin sungkua kya a muih.13Minmin nynh mih ngaethah zah mih uccaw kha a sei hae. Te mih lann raveih tungvaw khe mih uccaw kha khang hae zah khua lang a ki vae hae.
14Judah te a uno hae tuh Josef innvaw a la um lyakhe oun thua hae; te minmin nynh Josef malang a bakhung hae.15Josef nynh, “Pawcce hynhte na cyi oh? Kae tahawpaw ccungccaw nynh tuh malang yn cyihkuh lanpaw kha phe a ny kho cipaw na nyh khyh oh tou?” a cipya hae.16Te Judah nynh, “Bawipaw, namaw kya pawmou kae ho kho cih? Kaemaw kong kha pawtemou ccaerarih lan kae hopah thya cih? Pachia nynh na see hae seinaw kha phe muih vae; kaening tuh a uccaw kya banang muih athuapaw ryte ka bawipaw see hae nynh kae thua,” a cipya.17Josef nynh, “Tuhte ka cyih lan khyh, a uccaw kya banang muih athuapaw ccungccaw rou nynh ka see lang a tang cih; thuasalama nanning tuh nae paaw kalan daetedae lan la cceih oh,” a cipya. Judah nynh Benjamin Lue nawlan A Ngia
18Oute Judah nynh amaw kalan naekuh zah, “Pou ka bawipaw, na seepaw kae nynh ka bawipaw na nakaring kya bya kaw kheit beih kae hopah lah na seepaw tungvaw na thinria nan sah; pawccecize nang tuh Faro te na lae khyh oh.19Bawipaw, nang nynh kaening kha, ‘Nae paaw na hoi oh tou? Nae neitaw na hoi oh tou?’ cite nae khia.20Te kaening nynh, ‘A taw vae paw paaw kae hoi, te kae paaw nynh a kum phe tang te a saahpaw imua, kae neitaw lu kheit kae hoi. A upaw tuh phe chih vae; a nung nynh a saah hae paw ccaaw hae kyaze amaw makhae nynh a um vae, tukeiccuze a paaw nynh myarya a sungsah,’ cite ka bawipaw kha kae hopya.21Te nang nynh na see hae kaening kha, ‘Tuh-e paw tuh ka muihtua ccaw, ka kalan oun cciakhae oh,’ nae cipya.22Kaening nynh, ‘Imuapaw nynh a paaw kha phiakuh kho lan khyh, pawccecize aning nynh a paaw kha a cciataw zetuh a paaw tuh a chihsei cih,’ cite kae hopya.23Oute nang nynh, ‘Nae neitaw asoi huapaw yn cciabua khyh zetuh ka mitmae kha nae muih vae lan khyh oh,’ cite na see hae kaening kha nae cipya.24Kaening nynh na seepaw kae paaw kalan kae ki zah ka bawipaw na bya kha kae hopya.25Te kae paaw nynh, ‘Bua la cceih oh lah aening hanlan looh beihtaraw kha oun re oh,’ cite oun hopah zah26kaening nynh, ‘Kae cceih kho lan khyh, kae neitaw asoi huapaw a cciabua ze rou nynh kae cceih cih; pawccecize kae neitaw asoi huapaw a cciabua khyh zetuh khah-e paw a mitmae kha kae muih kho lan khyh,’ kae cipya.27Oute na seepaw kae paaw nynh, ‘Ccapaw lu ning kha ka zu nynh yn saahpya cipaw phe na ny oh;28lu kheit tuh phe yn cciataw vae, amaw kha saw nynh zoihtatyh lan phe a pae ccaccing vae cite ka ci; tuin kyate amaw kha ka muih boi vae khyh.29E lu kheit hynh mah kamaw kyate na cciakhae oh zah vawsawnaw a tungsei zetuh nanning nynh ka sang phe paw vae paw hynh ngaethyanaw te michi khua lang nae cciasah sei cih oh,’ oun cipya.30Tukeiccuze kae nynh imuapaw leite na seepaw ka paaw kya ka thua zetuh ka paaw hiinnaw tuh imuapaw hiinnaw kya akyngkuhpaw thua zah31imuapaw nynh kaemaw kya a umbua khyhpaw kha ka paaw nynh he a muih tuh a chih vae cih; te na see hae kaening nynh a sang phe paw vae paw, na seepaw kae paaw kha ngaethyanaw te Michi khua lang kae cciasah sei cih.32Te na seepaw kae nynh, ‘Imuapaw hynh ka paaw kalan bua kae kikhae khyh zetuh ka paaw malang seiphusahnaw kha ka hiin lungkhu ka ing vae sah,’ cite ka hopya keiccuze kae tuh ka paaw kya imuapaw hanlan aamahkhan nynh ka thua.33Tukeiccuze na seepaw kae hynh imuapaw ccelang namaw kya see lang beih kae tangsah lah imuapaw hynh tuh a upaw hae ryte la kibua sah.34Pawccecize imuapaw leite pawtemou ka paaw kalan ka ki ngan cih? Ka paaw nynh a tung lanpaw teingnaw kha muih lan ka rih,” a ci. Josef nynh Amaw Kong A Ho
1Oute Josef nynh a pe thadyn hae paw malang khe yhkuh kho vae khyh zah, “Ka kyate pong toisakuh oh,” cite a sia. Tukeiccuze Josef nynh a uno hae kya amaw kha he a nysakuh hae tuh, milae lu kheit sanmah umbua vae khyh hae.2Te Josef nynh raerae ccae lan a rawpaw kha Izip hae te Faro innbyn hae nynh phe a thae hae.3Josef nynh a uno hae kha, “Kae hynh Josef nynh ka thua. Apang a hiin ung tou?” a ci. Thuasalama a uno hae tuh Josef malang mih rikawthua zah byakhung kho khyh hae.
4Oute Josef nynh a uno hae kha, “Ka kalan oun naeku tua oh,” cipah hae zah minmin nynh a naeku hae. Te aning nynh, “Kae hynh Izip ram lang nae zua oh paw nae neitaw Josef nynh ka thua.5Thuasalama nanning nynh Izip ram lang nae la zua oh keiccuze nae ngaethah nan sah, naemaw te naemaw mah thinriakuh nan oh; pawccecize ccungccaw hiinnaw khum khylan Pachia nynh nae malang yn la saw.6Ram lungkhu kum ning ccakanccih vae; atu te kum pangaw lungkhu loophonaw te loohruenaw yn um lan khyh.7Pachia nynh nanning kha laephi vawlan khum khylan te alepaw luenaw liate nae hiinnaw kha khum khylan kae kha nae malang yn la saw.8Tukeiccuze nanning nynh Izip ram lang nae saw oh paw thua leite Pachia nynh yn la sawpaw nynh thua; Pachia nynh kae hynh Faro a paaw lante thuasah, siapharan inn a uktu lante thuasah, Izip ram balyn a uktu lante thuasah yn nung.9Apang kalan arangte la cceih oh lah la hopah oh, Josef nynh, ‘Pachia nynh na ccapaw kamaw kha Izip ram balyn a uktu lang yn nung vae; accyh rosah leite kamaw kalan yn cceih,10Goshen kya khua na sah cih zah kamaw te naeku lan, te namaw, na ccaaw hae, na mintaw hae, na tuu hae, na miaa hae, na vaetua hae te na hoipaw balyn ryte na um cih oh.11Ccakan hynh kum pangaw yn ccih ung cih, tukeiccuze namaw te na innbyn hae, te na hoipaw balyn ryte ryachinaw kya na um khyh nawlan oh, Goshen kyakhe kamaw nynh kae bawm cih oh,’ a ci cite la hopah oh.12Ka mung te nanning kae hopya oh paw kha nae mit te ka neitawpaw Benjamin mit nynh phe a muih.13Kae nynh Izip ram kya pawcih alepaw sawtuanaw mou ka mue cipaw te na muih oh paw balyn kha apang kya na la hopah cih oh. Arangte la cceih oh lah apang kha hynh-e kalan oun cciakhae bung oh,” a cipya hae.14Oute a neitaw Benjamin kha kui zah a rah; Benjamin nynh mah kui zah a rah.15Te a upaw hae balyn kha myng hae zah a rah; tukoute a upaw hae ryte bya a hokuh hae.
16“Josef a uno hae phe thua vae hae,” cipaw Faro inn kya thongpang he thae hae tuh, Faro te a ryalawpahtu hae tuh mih lungtua.17Faro nynh Josef kha, “Na uno hae kyakhe, ‘Nae uccaw kha nae sahiin hae tungvaw khe khang oh lah, Kanaan ram lang la ki oh.18Nae paaw te nae innbyn hae kha kamaw kalan oun cciakhae oh lah, Izip ram ze ahoy huapaw loram kha kae pya cih oh zah loram kya-e apaw-athae kha na ae cih oh,’ cite hopah hae.19Tuhlaepaw na hopya lan hae paw tuh, ‘Nae zu hae te nae imua hae hanlan Izip ram e marangle kha cciakhae oh, te nae paaw kha oun ko oh lah oun cceih oh.20Nae sisua hanlan nae thindae nan sah, pawccecize Izip ram balyn ze ahoy huapaw tuh nae uccaw nynh thua,’ cite hopah hae,” a cipya.
21Israel a ccapaw hae nynh tuhcite a cyi hae. Faro nynh a hopya thyhte Josef nynh minmin kha marangle a pya hae, te laanryng hanlan vaelooh kha mah a pya hae.22Minmin lu kheit cci hanlan liakunawpaw uccaw zung kheit cci kha a pya hae; thuasalama Benjamin kha ngunphua za thum te liakunawpaw uccaw zung pangaw kha a pya.23A paaw elang Izip ram e ahoy huapaw uccaw hae a phupaw lann sa haw te laanryng kya a paaw ae lanpaw looh, sanlou te vaelooh a phupaw lann pinung sa haw kha a ky.24A uno hae kha, “Laanryng kya la pekuh nan oh,” cipah hae zah a cciasah hae.
25Izip kyate cceih hae zah Kanaan ram umpaw mih paaw Jakob kya a thua hae.26Te minmin nynh mih paaw kyakhe, “Josef tuh phang hiin ung! Aning tuh Izip ram balyn a uktu nynh thua,” a cipya hae. Jakob tuh mangtaran cih zah minmin kha zyn kho khyh hae.27Thuasalama minmin nynh mih paaw Jakob kyakhe Josef nynh a hopaw balyn kha hopah hae zah mih paaw nynh Izip ram lang a ccianaw lanpaw marangle Josef nynh a kypaw kha he a muih tuh, a lung bua yn cci vae;28te Israel nynh, “Ka ccapaw Josef a hiin ung cipaw ka thae nyngkae tuh phe zaw vae; ka cceih cih zah ka chi maw amaw kha ka muih cih,” a ci. Jakob Izip lang A Cceih
1Israel nynh a hoipaw balyn ryte cceih zah Beersheba kya he a thua tuh, a paaw Isak Pachia kalan silawnaw a rae.2Pachia nynh Israel kha khuazi vizin kyate, “Jakob, Jakob,” cite ko zah Jakob nynh, “Hein kya mang ka um,” a ci.3Oute Pachia nynh, “Kae tuh Pachia nynh ka thua, na paaw a Pachia nynh ka thua; Izip ram lang ccia lanpaw kha rih nan, pawccecize tuin kya nang kha minphuin alepaw lang kae rae cih.4Kamaw ccaccei nynh nang kha Izip ram lang kae cciakhae bung cih, te nang kha bua kae kikhae thung cih; Josef nynh a kuih te na mit kha ae masisah cih,” a cipya.
5Jakob tuh Beersheba kyate a cceih; te Israel ccapaw hae nynh mih paaw Jakob, mih ccaaw hae te mih zu hae kha Jakob nynh a cciku lan cite Faro nynh a kypaw marangle khate a cciakhae hae.6Minmin nynh Kanaan ram kya a mue hae paw mih sahiin hae te mih uccaw hae ryte Izip ram lang a cceih hae, Jakob nynh a ciihan balyn kha a cciakhae hae:7a ccapaw hae, a ccapaw hae mih ccapaw hae, a ccanung hae, a ccapaw hae mih ccanung hae kha Izip ram lang pong a cciakhae hae.
8Izip ram lang a cceih hae paw Israel ciihan hae mih min tuh hynhte nynh thua. Jakob te a ccaaw hae: Jakob a ccatawccaw tuh Reuben,9te Reuben ccapaw hae tuh: Hanok, Pallu, Hezron te Karmi.10Simeon ccapaw hae tuh: Jemuel, Jamin, Ohad, Jakhin, Zohar, te Kanaan minphuinnung a ccapaw Shaul.11Levi ccaaw hae tuh: Gershon, Kohath te Merari.12Judah ccaaw hae tuh: Er, Onan, Shelah, Perez te Zerah (Er te Onan tuh Kanaan ram kya a chih hae). Perez ccaaw hae tuh Hezron te Hamul nynh thua hae.13Isakhar ccaaw hae tuh: Tola, Puvah, Jashub te Shimron.14Zebulun ccaaw hae tuh: Sered, Elon, te Jahleel.15(E hae hynh a ccanung Dinah ryte Paddan-aram kya Leah nynh Jakob a saahpya hae paw nynh thua; a ccapaw hae te a ccanung hae mih balyn te sung thum lu thum acih hae).16Gad ccaaw hae tuh: Zefon, Haggi, Shuni, Ezbon, Eri, Arodi, te Areli.17Asher ccaaw hae tuh: Imnah, Ishvah, Ishvi, Beriah, te mih ccianung Serah. Beriah ccaaw hae tuh Heber te Malkhiel18(E hae tuh Laban nynh a ccanung Leah a pyapaw Zilpah a ccaaw hae nynh thua; e hae hynh Zilpah nynh Jakob a saahpya hae paw thua zah mih balyn te lu haw lae taruh acih hae).19Jakob zu Rachel a ccaaw hae tuh: Josef te Benjamin nynh thua hae.20Izip ram umpaw On khua e ranpibawi Potifera ccanung Asenath nynh Izip ram kya Josef hanlan Manasseh te Efraim kha a saahpya hae.21Benjamin ccaaw hae tuh: Bela, Bekher, Ashbel, Gera, Naaman, Ehi, Rosh, Muppim, Huppim, te Ard.22(E hae hynh Rachel nynh Jakob a saahpya hae paw thua zah mih balynte lu haw lae pali acih hae).23Dan ccapaw tuh Hushim nynh thua.24Naftali ccaaw hae tuh: Jahzeel, Guni, Jezer, te Shillem.25(E hae tuh Laban nynh a ccanung Rachel a pyapaw Bilhah ccaaw hae nynh thua; e hae hynh Bilhah nynh Jakob a saahpya hae paw thua zah mih balynte lu sari acih hae).26Jakob monung hae hobia leite, Jakob ryte Izip ram lang cceih hae paw Jakob ciihan hae tuh mih balynte sung taruh lu taruh acih hae.27Josef nynh Izip ram kya ccapaw lu ning a saah hae; tukeiccuze Izip ram lang cceih hae paw Jakob innbyn hae tuh mih balynte sung sari acih hae. Goshen kya Jakob A Um
28Jakob nynh Judah kha Josef kalan Goshen ram lang laanpi do ty khylan malang a saw. Goshen ram kya he a thua hae tuh,29Josef nynh a marangle kha paccynsah hae zah a paaw Israel kha Goshen ram kya tungku khylan a cceih. A paaw malang he a thua tuh, a paaw kha kui zah khaw cia a rah.30Israel nynh Josef kha, “Na mitmae kha phe ka muih vae zah na hiin ung cipaw ka ny vae keiccuze atu ka chi zemah pawtua-ung vae khyh,” a ci.31Josef nynh a uno hae te a paaw innbyn hae kha, “Faro kalan ka cceih cih zah, ‘Kanaan ram umpaw ka uno hae te ka paaw innbyn hae tuh kamaw kya oun thua vae hae.32Minmin tuh tuurin hae thua hae zah sahiin a kua hae paw nynh thua hae; te mih tuuphu, mih sahiin phu te mih hoipaw balyn kha oun thuakhae hae,’ cite ka hopah cih.33Faro nynh he ae ko oh zah, ‘Paw rya mou na law oh?’ cite ae khia oh ze34‘Na see hae kaening tuh kae minpaaw hae kyate tho zah kae ditaraw lyate atu cia sahiin a kua hae paw nynh kae thua,’ cite na hopah cih oh. Tuhteze tuh Goshen ram kya na um kho cih oh, pawccecize Izip hae tuh tuurin hae paw miakaw kha a hua hae paw nynh thua hae,” a cipya hae.
1Tukeiccuze Josef nynh cceih zah Faro kha, “Ka paaw te ka uno hae tuh mih tuuphu hae te mih vaetua phu hae, a hoi hae paw uccaw balyn ryte Kanaan ram kyate oun thua vae hae; atu Goshen ram kya nynh a um hae,” a cipya.2A upaw hae laku e lu pangaw kha ko hae zah Faro kalan a cciakhae hae.3Faro nynh a upaw kha, “Paw ryalaw mou leih na law oh?” cite khia hae zah minmin nynh, “Na see hae kaening tuh kae minpaaw hae hawte tuurin hae nynh kae thua,” a ci hae.4Minmin nynh Faro kha, “E ram kya ramccang ccungccaw hae hawte um khylan kae thua vae; pawccecize Kanaan ram kya myarya ccakancci keiccuze kae sahiin phu hae hanlan ram um vae khyh. Tukeiccuze na see hae kaening hynh Goshen ram kya nae umsah nawlan kae ngiaku,” a cipya hae.5Oute Faro nynh Josef kha, “Na paaw te na uno hae tuh namaw kalan oun thua vae hae.6Izip ram tuh na kuih kya nynh a um; na paaw te na uno hae tuh ram kyaze ahoy huapaw hmin kya khuasah sah hae; Goshen ram kya um hae sah; te minmin lakuze cyi khonaw a hoi hae paw na ny zetuh ka sahiin kuanaw kya uktu hae lang na nung cih hae,” a cipya.
7Oute Josef nynh a paaw Jakob kha teekhae zah Faro malang a thuakhae, te Jakob nynh Faro kha hythua a pya.8Faro nynh Jakob kha, “Kum hohzeihmou na cih vae?” cite a khia.9Jakob nynh, “Ka khiavuikunaw hynh za kheit kum sung thum acih vae; ka hiinnaw kum tuh zya salamah kou maw aru. A khiavuikuh hae paw ka minpaaw hae kum asaepaw te touse khinpaw thua khyh,” a cipya.10Oute Jakob nynh Faro kha hythuapya zah Faro umnaw kyate a cceih vae.11Faro nynh kawpya thyhte Josef nynh a paaw te a uno hae kha umnaw pya hae zah Izip ram kyaze ahoy huanaw Rameses ram kha a pya hae.12Te Josef nynh a paaw, a uno hae te a paaw innbyn hae balyn kha milu alung azya thyhte looh a pya hae. Izip Ram kya Ccakannaw
13Ccakan myarya acci keiccuze ram balyn kya looh um vae khyh. Ccakan keiccuze Izip ram te Kanaan ram tuh mih thaw azya.14Josef nynh Izip ram te Kanaan ram kya-e looh a renaw hae paw phua balyn kha suelua zah Faro siapharan inn lang a cciakhae.15Izip ram te Kanaan ram kya-e phua kha pong a mang hae tuh Izip hae balyn nynh Josef kalan cceih hae zah, “Looh oun pyatua! Pawcce na muihnaw kya kae chih cih? Pawccecize kae phua phe thang vae,” a cipya hae.16Te Josef nynh, “Nae phua athang vae ze, nae sahiin hae kha oun pya oh, nae sahiin hae khate looh kha oun rulaekuh oh,” a cipya hae.17Tukeiccuze minmin nynh mih sahiin hae kha Josef kalan a cciakhae hae; Josef nynh minmin kya-e marang hae, tuu hae, miaa hae, vaetua hae te lann hae khate looh kha a rulaesakuh hae. Tuh-e kum kya Josef nynh mih sahiin balyn khate looh kha a rulaesakuh hae.18Tuh-e kum thang zah khuavae he thua tuh, minmin nynh Josef kalan cceih hae zah, “Kae phua kha pong kae mang vae cipaw kae bawipaw namaw kha kae phei kho lan khyh, kae sahiin hae tuh namaw kya-e nynh athua vae. Namaw malang kae pyn te kae laephi laelan tuh pawpaw mah umlae vae khyh.19Kaemaw te kae laephi parouhte na muihnaw kya kae chih vae cih tou? Kaemaw te kae laephi hynh looh te oun re. Kaening nynh kae laephi ryte Faro see lang kae tang cih; chi leite kae hiin nawlan te ram hynh ccungccaw adae khyh nawlan ccacii oun pya,” a ci hae.
20Josef nynh Faro hanlan Izip ram balyn kha a re. Izip hae nynh myarya ccakancci keiccuze mih loo kha zua hae zah Faro loo lang a tang vae.21Josef nynh Izip ram voikheit langte voikheih lang kyacia ccungccaw hae kha see lang a tangsah hae.22Aning nynh ranpibawi hae laephi kyalya kha nynh rebia khyh; pawccecize minmin tuh Faro kyate tyty a mue hae paw nethungpaw looh te Faro nynh a pya hae paw looh kha nynh a ae hae; tukeiccuze minmin nynh mih laephi kha zua khyh hae.23Oute Josef nynh ccungccaw hae kha, “Atunin naemaw te nae laephi kha Faro hanlan phe ka re vae, hein kya nanning hanlan ccacii mang um; lawkuh oh lah nae loo kya ccou oh.24Te looh na rue vae oh ze pum pangaw pum kheit kha Faro na pya cih oh, pum pangaw pum pali kha nae looh lang a tang cih zah ccacii lang thuasah, naemaw te nae innbyn hae ae lan thuasah, nae ccaaw hae ae lan thuasah na lawkuh cih oh,” a cipya hae.25Minmin nynh, “Kae bawipaw, kae hiinnaw kha nae khum vae; ngaethya oun um sah; Faro see lang kae tang cih,” a ci hae.26Tuhcite Josef nynh Izip ram kya upadi ccangkheit a rae, tuh-e upadi tuh Faro nynh pum pangaw pum kheit kha a lawkuh cih cipaw thua zah atunin cia atyn. Ranpibawi hae laephi kyalya nynh Faro laephi lang tang khyh. Jakob kyate Rhohui Bya
27Israel tuh Izip ram, Goshen pee kya khua a sah; minmin nynh tuin kya a hoirum hae, te myarya lungthung hae zah a pungzae hae.28Jakob tuh Izip ram kya kum haw lae sari a hiin; tukeiccuze a hiinnaw she tuh za kheit sung pali kum sari acih vae.
29Israel a chinaw ccyh he anae tuh a ccapaw Josef kha ko zah, “Na malang maehoynaw ka mue zetuh na kuih kha ka phae kaw nung lah lungzite, hmerarih lan bya yn kinpyaku tua; Izip ram kya yn uh nan.30Ka minpaaw hae kya he ka ihbua te, Izip ram kyate nae cciakhae cih zah mih shawku kyakhe nae uhbua cih,” a cipya. Josef nynh, “Na ho hawte ka la cyih cih,” cite a cipya.31Te Israel nynh, “Bya yn kinpakuh,” ci zah Josef nynh bya a kinpyaku. Tukoute Israel tuh a ikhung vawlan lu nungnaw langkhe a bakhung. Jakob nynh Josef Ccaaw hae Hythua Pya hae
1Tukoute Josef kha, “Na paaw dan khyh,” cite a hopya hae. Tukeiccuze a ccapaw hae lu ning Manasseh te Efraim kha ko hae zah a cceih hae.2“Na ccapaw Josef tuh na kya yn thua vae,” cite Jakob kha he hopah hae tuh, thawte e-iasawkuh zah ikhung kya a haung.3Te Jakob nynh Josef kha, “Athunghuapaw Pachia nynh Kanaan ram Luz khua khe ka kya langkute hythua yn pya zah,4‘Nang kha kae pungzaesah cih zah kae lungthungsah cih; ccungccaw patae lang kae rae cih, e ram hynh namaw koute na ciihan hae kalan zungzae hanlan ka pya cih hae,’ yn cipya.5Tukeiccuze na umnaw Izip ram kae thua maw, Izip ram kya na saah hae paw na ccapaw hae lu ning tuh ka ccapaw hae nynh thua hae; Efraim te Manasseh tuh Reuben te Simeon hawte ka ccapaw hae athua cih hae.6Minmin koute na saah hae paw tuh na ccaaw hae athua cih hae zah rhoccounaw kya tuh mih upaw hae min kya riabia athua cih hae.7Kae tuh Paddan ram kyate kae ki lya, Efrath khua kae thua maw taraw, Kanaan ram laanryng khe Rachel tuh a chih; te Efrath khua lang ccianaw laanryng khe Rachel kha ka uu,” (Efrath tuh Bethlehem nynh thua).
8Israel nynh Josef ccapaw hae kha he a muih hae tuh, “E hae hynh hum hae mou?” cite khia zah9Josef nynh, “Pachia nynh hein kya yn pyapaw ka ccapaw hae nynh thua hae,” a ci. Te Jakob nynh, “Minmin kha kamaw kalan beih yn cciakhae hae, hythua ka pya cih hae,” a ci.10Israel tuh a kum tang vae zah a mitmohbia vae keiccuze hoyte ngawmuih kho vae khyh. Tukeiccuze Josef nynh minmin kha amaw kalan a naesaku hae; te Jakob nynh minmin kha myng hae zah a pom hae.11Israel nynh Josef kha, “Na mitmae muih lante ka la ngaehoi vae khyh; thuasalama Pachia nynh na ccaaw hae kha mah hein kya yn muihsah vae hae,” a ci.12Oute Josef nynh minmin kha a paaw ccukharu kyate a hoei hae, te Josef tuh a paaw malang khe a bakhung.13Josef nynh a ccapaw hae kha parouhte cciakhae hae zah, Efraim kha a ranglang kuih khate kyng zah Israel a voilang kuih kalan khe a cciakhae, te Manasseh kha a voilang kuih khate kyng zah Israel a ranglang kuih kalan khe a cciakhae.14Thuasalama Israel nynh a ranglang kuih kha avoikekuh lante dyng zah asoi huapaw Efraim a lu vawlan khe a khang, te a voilang kuih kha a tawccaw huapaw Manasseh a lu vawlan khe a khang.15Israel nynh Josef kha hythuapya zah,“Ka minpaaw Abraham teka paaw Isak khaamaw malang a la cciasah hae paw Pachia,ka hiin lungkhu atunin ciakamaw hanlan tuurintua thuapaw Pachia,16vawsawnaw balyn kyateyn khumtupaw vaawpaw nynhe imua hae kha hythuapya vae hae sah;te ka min, ka minpaaw Abraham min,ka paaw Isak min tuhminmin tungvawzungzae la tyn vae sah;te laephi vawlan la pungzae vae hae sah,” a ci.
17A paaw Jakob nynh a ranglang kuih kha Efraim lu vawlan a khangpaw kha Josef nynh he a muih tuh a lunghoy khyh; tukeiccuze Josef nynh a paaw kuih kha lah zah Efraim lu kyate Manasseh lu kalan a khang sah.18Josef nynh a paaw kha, “Apang, hynhte thua khyh! Hynh-e paw hynh a tawccaw athua keiccuze na ranglang kuih kha hynh-e paw lu vawlan khang,” a cipya.19Thuasalama a paaw nynh phe ei zah, “Phang ka nyh, ka ccapaw, mang ka nyh; Manasseh hynh mah a phuin lepaw ccungccaw lang a tang cih. Tuhzemah a neitawpaw tuh amaw laeze a phuin lehuapaw lang a tang cih zah a ciihan tuh minphuin patae lang a tang cih,” a ci.20Tukeiccuze tuh-e nin khe minmin kha hythuapya hae zah,“ ‘Pachia nynh nang kha Efraim hawte thuasah, Manasseh hawte thuasah ae rae vae sah,’cite Israel hae nynh naemaw min te hythua a pya cih hae,” a ci.Tuhcite Jakob nynh Efraim kha Manasseh malang a nung.21Oute Israel nynh Josef kha, “Ka chih vae cih, thuasalama Pachia nynh nanning kha ae umkhae cih oh zah nae minpaaw hae ram lang bua ae cciakhae cih oh.22Na upaw hae laeze nang kha alunghua lante kae pyapaw tuh, ka thaloi te ka li te Amor ccungccaw hae kuih kya-e ka lawpaw Shekhem nynh thua,” a ci. Jakob Rhohui Bya
1Oute Jakob nynh a ccaaw hae kha ko hae zah: “Oun sueluakuh oh, malang ccyh kya nae tungvaw yn cyihkuh lanpaw kha kae hopah cih oh.2Pou Jakob ccapaw hae,sueluakuh oh lah thaetua oh;nae paaw Israel bya kha ngaetua oh.
3Reuben, nang tuh ka ccatawccaw,ka thungnaw, ka thawzung kya-e thaety,sawtua lan um huapaw,huhan a hoi huapaw nynh na thua.4Tuhzemah nang tuh vahungtui hawteatyn leipaw na thua keiccuzebyapi huapaw tuh na thua lan khyh,pawccecize na paaw ikhung—ka iphae vawlan na kae zahna thusah vae.
5Simeon te Levi tuh uno nynh thua hae,mih thaloi hae khaahoy leipaw zunghe lang a mang hae.6Aphirute khua a khankunaw hae kalanka teebua lan khyh;minmin tungkunaw kyaka umbua lan khyh,pawccecize mih thinria vae zeccungccaw kha theih hae zah,lungpawte taeku nawlantangnuapaw ccumaria kha a khya hae.7Myarya lepaw mih thinrianaw terehahan lan mih bungpawnaw tuhthyalawnaw um sah,minmin kha Jakob ciihan kyaka phia cih hae zahIsrael minphuin kyaphiariphiarae ka nung cih hae.
8Judah, na uno hae nynh nang khaae thehoysah cih hae;na kuih te na rhaw hae nging khana kyng cih hae;na paaw ccapaw hae nynh na malanga bakhung cih hae.9Ka ccapaw Judah!Nang tuh anopaw chindeih nynh na thua;saw kha na tei zahakarung kalan na ki.Aning tuh chindeih hawte thuasah,chindeih pinung hawte thuasah,tharae leih dyngkuh zah a rya,hum nynh mou amaw khaa laesy ngan cih?10Minhoynaw kha a mue makhia tuhsiapharan kawhoinaw ccoi thuasah,a ccu laku kya-e uktu hoitang thuasahJudah kyate phiakuh lan khyh,te ccungccaw hae nynhamaw kaw kha a ngae cih hae.11A lann kha misu ku kya khii zaha lann nopaw kha misu kuahoy huapaw kyakhe a khii,a boeining kha misutui kyakhe suh zahchii hawte asepaw misutui kyakhea angkiccuapaw kha a su;12a mit tuh misutui laeze sehua zaha haw tuh mateitui laeze arawhua.
13Zebulun tuh rili kin kyakhua a sah cih;amaw kya-e rili kin tuhsanphalung hae thadynnawhmin athua cih.A ram tuh Sidon khua kyaciaathua cih.
14Issakhar tuh a thawsaepaw lannathua cih,a phupaw uccaw tung ninglaku khe a rya;15a haeungnaw hmin tuhhoy zah a umnaw ram tuhlungrythua lan a um cipaw a muih;tukeiccuze phupaw khakhangku khylan a raw kha tuakuh zahnangsete ryalawsahpawsee lang a tang.16Dan tuh Israel minphuin hae kyazephuin kheit hawtea ccungccaw hae kha byapia cih hae.17Dan tuh laanpi kin umpawhupaw athua cih,marang a ccikuhpaw khanulang a ccaw nawlanmarang ccu a tuhpawhupaw arepaw athua cih.
18Pou Bawipaw ,na khumnaw kha phang ka ngaw.
19Luadetu hae nynhGad kha a tuk cih hae,thuasalama Gad nynh minmin khaa tukru cih hae zah a dee cih hae.
20Asher ram kyate athuapaw loohapou cih zahsiapharan hanlan angaekuhpaw loohathua cih.
21Naftali tuh a rythyte a paeepaw sazuh,apuithyapaw ccaaw khaa saahpaw nynh thua.
22Josef tuh athae tephe beihpaw akaran,tuidy pe umpaw athae tephe beihpaw akaran nynh thua,amaw akaran hae tuhlungrua vawlan po a lo hae.23Li a kawthya hae paw nynhamaw kha thawte a tuk hae;amaw kha kaw hae zah thawtea naangbia hae.24Tuhzemah a li tuh no khyh,a zunghe hae tuhAthungpaw Jakob Pachiakuih te thuasah,Israel Lungpi a thuapawTuurinpaw min te thuasah,25nang ae bawmpawna paaw a Pachia liate thuasah,nang kha hythua ae pya cih pawAthunghuapaw liate thuasahraepaw nynh thua.Tuh-e Pachia nynhahangnaw vaawram e hythuanaw,anenaw umpaw akhupaw tui kya-ehythuanaw, matei hythuanaw tevue hythuanaw kha ae pya vae sah.26Na paaw kya-e hythuanaw tuhzungzae tynpawmua hae kya-e hythuanaw,zungzae tynpawmua kya-e ry lan umpawuccaw hae laeze aphutehua;tuh-e hythuanaw tuh Josef lu vawlan,a uno hae kyatephia a thuapaw kya-ea terui vawlan um vae sah.27Benjamin tuh saw leih a teipawsuizaw nynh thua,awkhua kya a teipaw kha a ae,phe a tei vae paw khazete ccyh kya phiariphiarae leih a nung,”a cipya hae.
28E hae hynh Israel phin haw lae ning nynh thua. E bya hynh mah minmin kha lu raveihte angaekuhpaw hythuanaw kha mih paaw nynh a hopya hae paw bya nynh thua. Jakob Chinaw te Uunaw
29Oute Jakob nynh, “Ka ccungccaw hae kalan suelua ka thua vae cih, Hit ccungccapaw Efron loo kya umpaw lungkarung kyakhe ka paaw hae ryte nae la uh cih oh.30Tuh-e lungkarung tuh Kanaan ram, Mamre te anaekunaw Mekpelah kya umpaw thua zah, Abraham nynh uuku nawlan cite loo ryte Hit ccungccapaw kya-e a repaw nynh thua.31Tuin kyakhe Abraham te a zu Sarah kha a uu hae; Isak te a zu Rebekah kha mah a uu hae; te Leah kha mah tuin kya ka uu.32Loo te loo lungkhu umpaw lungkarung tuh Hit ccungccaw hae kya-e repaw nynh thua,” cite bya a tawsya hae.33Jakob nynh a ccapaw hae kya bya a tawsya hae paw kha he a thangsah te, a ccu kha ikhung kalan khin zah a hy thang vae, te a ccungccaw hae kalan a sueluabua hae.
1Oute Josef nynh a paaw mae kha bakhungnua zah thawte rah zah a myng.2Josef nynh a paaw rhua kha mynkhuhpaw te ccaan khylan a kuihkaw ryalahpaw sibawi hae kha kaw a pya hae. Tukeiccuze sibawi hae nynh Israel kha mynkhuhpaw te ccaan hae zah3nin sung pali a rokhaekuh hae, pawccecize tuh-e accyh tuh mynkhuhpaw te ccaan nawlan ahopaw ccyh nynh thua. Te Izip hae tuh Jakob hanlan nin sung sari a rah hae.
4Jakob hanlan rawnaw nin he athang te, Josef nynh Faro innbyn hae kyakhe, “Nae kyate maehoynaw ka mue zetuh, Faro kha akawlan thyhte beih la hopah oh:5Ka paaw nynh bya yn kinsakuh zah hynhte a ho, ‘Ka chih vae cih. Kanaan ram kya kamaw hanlan ka karynkupaw shawku kya nae la uh cih oh,’ a ci. Tukeiccuze atu ka paaw kha uu khylan ka la cceih sah; te bua kae ki cih,” a cipya hae.6Faro nynh Josef kha, “Na paaw nynh bya ae kinsaku hawte na paaw kha la uh,” a cipya.
7Josef tuh a paaw uu lan a cceihthung, amaw ryte Faro see hae balyn, a inn kya ryalah hae paw piccan hae, Izip ram e piccan hae balyn a cceihthung bua hae.8Josef a innbyn hae, a upaw hae te a paaw innbyn mah a cceihbua hae. Mih ccaaw hae, mih tuu hae, mih miaa hae te mih vaetua hae kyalya kha Goshen kya a cciataw hae.9Marangle hae te marang rhawkaw hae mah Josef kya a cceihbua hae. Tuh-e phu tuh myarya lepaw phu nynh thua.10Jordan nithua lang umpaw ccatan tinnaw hmin Atad kya he a thua hae tuh myarya alepaw te ngaethya lan kou umpaw rawkhuinaw kha a rae hae; Josef tuh a paaw hanlan nin sari rawkhuite a um.11Ccatan tinnaw hmin Atad kya-e rawkhuinaw kha tuh-e ram kya umpaw Kanaan hae nynh he a muih hae tuh, “E hynh Izip hae kya-e myarya thinlungcci lan umpaw rawkhuinaw nynh thua,” a ci hae. Tukeiccuze Jordan vaw nithua lang umpaw tuh-e hmin kha Abel-mizraim cite min a phu hae.12Jakob nynh a tawsya hae hawte a ccapaw hae nynh a cyipya hae.13Minmin nynh Jakob kha Kanaan ram lang cciakhae hae zah Abraham nynh uuku nawlan cite Hit ccungccapaw Efron kya-e a repaw, Mamre te anaenaw Makpelah loo kya umpaw lungkarung kyakhe a uu hae.14Josef nynh a paaw kha a uh koute a uno hae te a paaw uu khylan a cceihthung kheih hae paw balyn ryte Izip ram lang a ki hae. Josef nynh A Ngaethya hae
15Mih paaw he a chih tuh, Josef a upaw hae nynh, “Josef nynh aening kha palei lung-ung yn la tungpah zah a tungvaw kya ah la cyi oh paw hoyleinaw keiccuze oun liaru lanze pawte athua cih?” a ciku hae.16Tukeiccuze minmin nynh Josef kalan hynhte bya a taw hae: “Na paaw nynh a chi mawze bya oun tawsya zah,17‘Josef kha hynhte la hopah oh: Na upaw hae nynh seinaw a rae hae paw te na tungvaw vawsawnaw pyate a sei hae paw kha beih la ngaethya hae cite kae ngia,’ cite yn hopya. Tukeiccuze na paaw a Pachia see hae nynh seinaw kae la raepaw kha beih oun ngaethya,” a cipya hae. Minmin nynh tuhte he a ho hae tuh Josef tuh a rah.18Oute a upaw hae mah a rah hae, te Josef malang bakhung hae zah, “Kaening tuh na see hae nynh kae thua,” a cipya hae.19Thuasalama Josef nynh, “Rih nan oh, kae tuh Pachia umnaw kya zawtou ka um?20Nanning nynh ka tungvaw vawsawnaw pya lan na la tuaku oh zemah Pachia nynh khah-e kha ahoypaw lante paccyn zah, atunin acyiku vae hawte ccungccaw patae kha khum khylan a la paccyn.21Tukeiccuze rih nan oh, naemaw te nae ccaaw hae kha kamaw ccaccei nynh kae bawm cih oh,” a cipya hae. Tuhcite minmin kha lungtangnaw pya hae zah nebaleih lante a hopya hae. Josef Chinaw
22Josef tuh a paaw innbyn hae ryte Izip ram kya um zah za kheit kum haw a hiin.23Josef tuh Efraim ccaaw hae te Efraim mintaw hae kha a muihsya ung hae; Manasseh ccapaw Makhir ccaaw hae kha mah Josef nynh a innbyn kya a umsah bua hae.24Oute Josef nynh a uno hae kha, “Ka chih vae cih, thuasalama Pachia tuh nanning kalan yn thua ccaccing cih zah Abraham, Isak te Jakob kya bya a kinkupaw ram langkhe e ram kyate ae cciakhae thung cih oh,” a cipya hae.25Te Josef nynh Israel ccapaw hae kha, “Nae kalan Pachia he yn thua te, ka ru kha e kyate nae la cciakhae thung cih oh,” cite hopah hae zah bya a kinsaku hae.26Te Josef tuh za kheit kum haw acih te a chih, mynkhuhpaw kha thuh hae zah Izip ram kya thingkua lungkhu khe a nung hae.

Bible Society of Myanmar

https://app.library.bible/content/1a340f5ae072b2f4

expand_more
chevron_right次の章