Read EXODUS 1

EXODUS1

¹Jakob ryte Izip ram lang a thua hae paw Israel ccapaw hae mih min tuh:²Reuben, Simeon, Levi te Judah,³Issakhar, Zebulun te Benjamin,⁴Dan, Naftali, Gad te Asher nynh thua hae.⁵Jakob kyate a pui hae paw milu tuh abalynte sung sari acih hae. Josef tuh Izip ram kya phe a la umty vae.⁶Oute Josef te a uno hae balyn tuh chih vae hae zah, tuh she lya-e ccungccaw hae mah pong a chih vae hae.⁷Thuasalama Israel hae tuh ccaawsaah hae zah a pungzae hae; minmin tuh a lungthung hae, thawzung myarya hoi hae zah ram kya phe a beih hae. Israel hae tungvaw Tuaasahnaw

⁸Josef kha a nyh leipaw siapharan athawpaw tuh Izip ram kya yn langkuh.⁹Aning nynh a ccungccaw hae kha, “Dotua oh, Israel ccungccaw hae tuh aening laeze lunghua hae zah huhan a hoihua hae.¹⁰Rang oh lah minmin kha lunghawsakute ccuepe oh sih, tuhkhyhze tuh houh oun lungthung cih hae zah rhawtukkunaw yn um ze aening rhaw hae ryte pankheihte oun tuk cih hae zah ram kyate a ccue cih hae,” a ci.¹¹Tukeiccuze minmin nynh Israel hae kha nangsete ryalawsah khylan uktu bawi hae kha a khang hae. Minmin nynh Faro hanlan looh nung nawlan Pithom khua te Rameses khua kha a sak hae.¹²Thuasalama Israel hae tuh vawsawnaw pyakunaw kha houh a teing hae ze, houh pungzae hae zah houh a pazaekuh hae, tukeiccuze Izip hae nynh Israel hae kha a rih hae.¹³Izip hae nynh Israel hae tungvaw thawcci leite arupaw ryalaw kha a lawsah hae.¹⁴Anglae rya, ohkhe rya te arupaw ryalaw phuin takyh kya myarya ccih lante rya a lawsah hae. Ryalaw a naw hae paw takyh kya thawcci leite a nangse hae.

¹⁵Izip siapharan nynh Hebru ccaaw puisahtu hae, mih min Shifrah te Puah cikuh hae paw kyakhe,¹⁶“Hebru nopi hae kha ccaaw na puisah vae oh ze, ccapise a thua zetuh na chiapah cih oh, thuasalama ccanopi a thua zetuh na hiin cih oh,” a ci.¹⁷Thuasalama ccaaw puisahtu hae nynh Pachia kha rih hae zah Izip siapharan nynh kaw a pya hae thyhte cyi leite ccapise hae kha a hiin hae.¹⁸Tukeiccuze Izip siapharan nynh ccaaw puisahtu hae kha ko hae zah, “Pawcce hynhte na cyi oh zah ccapise hae kha na hiin oh?” a ci.¹⁹Ccaaw puisahtu hae nynh Faro kha, “Hebru nopi hae tuh Izip nopi hae te lokuh khyh hae; minmin tuh mih ngedang zah mih chiisaw ahoy keiccuze kaening nynh mih kya kae thua mawze, mih ccaaw kha phe a la pui vae,” a cipya hae.²⁰Tukeiccuze Pachia tuh ccaaw puisahtu hae tungvaw a hoy; te Israel hae tuh pungzae hae zah thawzung myarya a hoi hae.²¹Ccaaw puisahtu hae nynh Pachia kha a ri hae keiccuze Pachia nynh minmin kha ccaawno a pya hae.²²Oute Faro nynh a ccungccaw hae balyn kha, “Hebru hae nynh a saah hae paw ccapise miakaw kha Nal vaw lungkhu lang na vua cih oh, thuasalama ccanopi miakaw kha na hiin cih oh,” cite kaw a pya hae. Moses Puinaw (Heb 11.23)

¹Levi phin kya-e pisepaw lu kheit tuh Levi phin nopinung lu kheit te zuvaw lang a tang hae.²Nopinung nynh ccaawpoi zah ccapise lu kheit a saah; aning tuh a pynrua hoypaw ccaaw nynh thua cipaw a nung nynh he a muih tuh, imua kha sawpaw sah thum cia a thuruh.³He a thuruh kho vae khyh tuh, phaekute a sah hae paw abawng kha lah zah thingphi kha athuh. Te abawng lungkhu khe imua kha sang zah vawkhu pe lonua ahang hae paw laku khe a nung.⁴A unung tuh a neitawpaw tungvaw pawmah yn cyihkuh cipaw muih khylan asawnaw khate a ngawbia.

⁵Faro siapharan ccanung tuh vawkhu lang tuisingku lan yn cceihbung zah a seenung hae ryte vawkhu kin khe a cceih hae. Faro ccanung nynh abawng kha lonua ahang hae paw laku khe muih zah a seenung kha tuh-e abawng law lan a naw.⁶Faro ccanung nynh abawng kha he a hung tuh, imua kha a muih. Imua nynh he a rah tuh, ngaethyaumsah zah, “E imua hynh Hebru hae ccaaw lukhakheit nynh a thua cih,” a ci.⁷Oute imuapaw a unung nynh Faro ccanung kyakhe, “Imua hynh namaw hanlan kua khylan do-oihtu Hebru nopi lu kheit kha kae kopah cih tou?” a cipya.⁸Faro ccanung nynh, “Ou, la ko,” a cipya. Tukeiccuze nopinung taraw nynh cceih zah imua a nung maw kha a kopya.⁹Faro ccanung nynh imua a nung kha, “E imua hynh cciakhae lah kamaw hanlan yn kuapah, nae kuapya mee kha kae pya cih,” a cipya. Tukeiccuze nopinung nynh imua kha cciakhae zah a kuapya.¹⁰Imua he a le tuh, nopinung nynh imua kha Faro ccanung kalan cciakhae zah aning nynh a ccapaw lang a lawku. Aning nynh imua kha Moses cite min a phu, “Pawccecize tui kyate atolang ka lawkupaw nynh thua,” a ci. Moses Midian Ram lang A Ccue (Heb 11.24-25)

¹¹Moses nynh he yn le tuh, a minphuin hae kalan cceih zah nangsekute ryalah hae paw kha a muih hae. Izip paw lu kheit nynh Moses a minphuin a thuapaw Hebru paw lu kheitpaw a buapaw kha Moses nynh a muih.¹²Moses nynh a pepan ngawdo zah lu kheit sanmah he a muih khyh tuh, Izip paw kha theih zah laesia kya a thuruh.¹³Awkhualan khe Moses nynh he toikuh tuh, Hebru hae lu ning a ziakuh hae paw kha a muih; te aseipaw lukheitpaw kha, “Pawcce na banpaw Hebru paw kha na zia?” a cipya.¹⁴Tuh-e paw nynh, “Hung nynh mou nang kha kaening laku uktu lang te byapiatu lang ae nung? Izip paw na chia hawte kae hynh chia lan tou nae ry?” a cipya. Oute Moses nynh rih zah, “Ka cyipaw kha phe yn ny vae hae hynhsa,” cite a tuaku.¹⁵Faro nynh tuh-e kong kha he a thae tuh, Moses kha chia lan a ccung.
Thuasalama Moses tuh Faro kyate phe a ccue. Aning nynh Midian ram kya um zah tuisung pe khe a haung.¹⁶Midian ranpibawi tuh ccanung lu sari a hoi. Minmin nynh mih paaw kya-e tuu hae te miaa hae kha sahiin nynh tui nianaw kua kyakhe tui the lan zah tui niasah lan cite oun cceih hae.¹⁷Thuasalama tuurin hae abang oun thua hae zah minmin kha a dee hae. Moses nynh yn thokuh zah tuh-e nopi hae kha pankhaw hae zah mih tuu hae te mih miaa hae kha tui a niasahpya hae.¹⁸Minmin nynh mih paaw Reuel kalan he a ki hae tuh, mih paaw nynh, “Pawcce atunin taloi nae thua oh?” a ci.¹⁹Minmin nynh, “Izip paw lu kheit nynh kaening kha tuurin hae kyate oun khum; kaening hanlan tui oun thepah zah kae sahiin hae kha tui a niasah hae,” a cipya hae.²⁰Aning nynh a ccanung hae kha, “Tuh-e paw tuh teimou um? Pawcce nae cciataw oh? Looh ae lan amaw kha la ko oh,” a ci.²¹Moses nynh Reuel kya umbua lan a nawccaw, te Reuel nynh a ccanung Zipporah kha Moses zu lang a pya.²²Zipporah nynh ccapaw lu kheit saah zah Moses nynh Gershom cite min a phu; pawccecize Moses nynh, “Kae tuh ramccang kya a umpaw mikhiapaw nynh ka thua,” a ci.

²³Ccyh hynhsepi aro koute Izip siapharan tuh a chih vae. Israel hae tuh seetangnaw zakaw kya hawkhaekuh hae zah a sia hae. Seetangnaw keiccuze bawmnaw ngiakute a siaruanaw hae tuh Pachia kya phe a thua.²⁴Pachia nynh a hawkhaenaw hae roi kha thae zah Abraham, Isak te Jakob kya a la raepaw a byakinnaw kha a liathui.²⁵Tukeiccuze Pachia nynh Israel hae kha do hae zah minmin konglang kha a tua. Pachia nynh Moses A Ko (Exo 6.2—7.7, 11.1-4, 12.35-36)

¹Moses tuh Midian ranpibawi a thuapaw, a zu paaw Jethro kya-e tuu hae te miaa hae kha a rin hae, te sahiin hae kha laesia ram akhung langkhe cciakhae hae zah Horeb cikuhpaw Pachia mua kya a thua.²Bawipaw vaawpaw tuh thabu lungkhu kyate maeesoi hawte Moses kalan yn langkuh; Moses nynh do zah thabu tuh maee lang a rua, thuasalama thabu tuh u khyh.³Oute Moses nynh, “Ka ccianua cih zah khuh-e myarya lepaw ka muihpaw ngaeangnaw khuh ka dotua cih, pawcce thabu khuh karae a u khyh cipaw ka dotua cih,” a ci.⁴Moses nynh dotua lan a ccianua vae cipaw Bawipaw nynh he a muih tuh, thabu kyate Pachia nynh, “Moses, Moses,” cite a ko. Moses nynh, “Hein kya mang ka um,” a ci.⁵Oute Pachia nynh, “Oun naekuh nan vae! Na phanah kha khahkuh, pawccecize na thadynnaw hmin kha athyaapaw laephi nynh thua,” a ci.⁶Te Pachia nynh, “Kae tuh na paaw a Pachia, Abraham Pachia, Isak Pachia, te Jakob Pachia nynh ka thua,” a cipya. Te Moses nynh Pachia kha a do ngan khyh keiccuze a mae kha a khawku.

⁷Oute Bawipaw nynh, “Izip ram umpaw ka ccungccaw hae vawsawnaw kha phe ka muih vae; minmin tungvaw ryalaw uktu bawi hae keiccuze a siarua hae paw roi kha phe ka thae vae. Mih teingnaw kha ka ny ccaccing vae,⁸te minmin kha Izip ram kyate luesah khylan, tuh-e ram kyate poukhae khylan, te ahoypaw te akopaw ram, mateitui te khoilutui a luanaw ram, Kanaan hae, Hit hae, Amor hae, Periz hae, Hiv hae te Jebus hae nynh a umnaw hae ram lang cciakhae khylan kae rungbung vae.⁹Israel hae siaruanaw tuh atu kamaw kya yn thua vae; Izip hae nynh minmin tungvaw pawcihtemou a tuaa a sah hae cipaw kha mah phe ka muih vae.¹⁰Tukeiccuze atu yn cceih, ka ccungccaw Israel hae kha Izip ram kyate poukhae khylan Faro kalan kae saw cih,” a ci.¹¹Thuasalama Moses nynh Pachia kha, “Kae tuh pawcihawpaw ccungccaw ka thua zahte mou, Faro kalan cciate Israel hae kha Izip ram kyate ka poukhae lan hae paw tuh?” a ci.¹²Pachia nynh, “Nang kha kae umkhae cih; kae nynh nang kha kae saw cipaw namaw hanlan muihsahnaw tuh hynhte a thua cih: Izip ram kyate ccungccaw hae kha he na poukhae hae te, e mua vawlan hin Pachia kha na beik cih,” a cipya.

¹³Thuasalama Moses nynh Pachia kha, “Israel hae kalan ka la thua cih zah, ‘Nae minpaaw hae Pachia nynh kae kha nae kalan yn saw,’ cite ka hopah hae zah minmin nynh, ‘A min hummou?’ cite yn khia hae ze pawtemou ka hopah cih hae?” a ci.¹⁴Pachia nynh Moses kha, “KAE TUH KAE NYNH KA THUA. Tukeiccuze, ‘KAE NYNH KA THUA a cihtupaw nynh kae kha nae kalan yn saw,’ cite Israel hae kha na hopah cih hae,” a cipya.¹⁵Te Pachia nynh Moses kha bua hopah zah, “Tukeiccuze Israel hae kha, ‘Bawipaw , nae minpaaw hae Pachia, Abraham Pachia, Isak Pachia, te Jakob Pachia nynh kae kha nanning kalan yn saw,’ cite na hopah cih hae.E hynh zungzae hanlanka min nynh thua,e hynh malang she balyn hanlanka min nynh thua.

¹⁶La cceih lah Israel piccan hae kha la pum hae lah, ‘Bawipaw , nae minpaaw hae Pachia, Abraham Pachia, Isak Pachia, te Jakob Pachia nynh ka kya yn langkuh zah: Nanning kalan kae thua zah Izip ram kya nae tungvaw pawmou a cyihkuh cipaw ka muih vae.¹⁷Nanning kha Izip ram e riathaenaw kyate Kanaan hae, Hit hae, Amor hae Periz hae, Hiv hae te Jebus hae nynh a umnaw hae ram, mateitui te khoilutui a luanaw ram lang kae cciakhae cih oh, a ci,’ cite la hopah hae.¹⁸Minmin nynh na bya kha a ngae cih hae; te nang te Israel piccan hae nynh Izip siapharan kalan na cceih cih oh zah, ‘Bawipaw , Hebru hae Pachia nynh kaening kha oun tungku; Bawipaw kae Pachia kalan silawku khylan nin thum laanccia asawnaw laesia ram lang oun cciasah,’ cite na la hopah cih oh.¹⁹Thuasalama athawsaepaw kuih te Izip siapharan kha nangse khyh zetuh aning nynh nanning kha ae cciasah lan khyh oh cipaw phe ka ny.²⁰Tukeiccuze ka kuih kha ka dyng cih zah Izip ram kya ka rae lanpaw ngaeangnaw balyn khate Izip ram kha de ka tah cih; tukoute nanning kha ae cciasah cih oh.²¹E ccungccaw hae kha Izip hae malang maehoynaw ka pya cih hae, tetuh na ccia vae oh ze, kuih ccakaete na cceih vae lan khyh oh;²²Nopi miakaw nynh a innpaw te a inn kya umpaw nopi miakaw kya-e ngun, sui te boeining kha a ngia cih zah nae ccapaw hae te nae ccanung hae kha na lawsakuh cih oh; ou tuhte Izip hae uccaw kha na luade cih oh,” a ci. Ngaeang lan umpaw Moses Huhan

¹Oute Moses nynh, “Israel hae nynh kae kha yn zyn khyh hae zah ka bya kha ngae leite, ‘Bawipaw tuh na kya langkuh khyh,’ yn ci hae ze pawtemou ka khung cih hae?” a ci.²Bawipaw nynh Moses kha, “Na kuih kya pawmou um?” cite khia zah Moses nynh, “Hoitang nynh um,” a cipya.³Te Bawipaw nynh, “Hoitang kha laephi kya vuatua,” a cipya. Tukeiccuze Moses nynh hoitang kha laephi kya he a vua tuh, hupaw lang poh a tang; te Moses tuh hupaw kyate a nulang a sihkuh.⁴Oute Bawipaw nynh Moses kha, “Na kuih kha dyng lah a leihmae kha kyng,” a cipya. Tukeiccuze a kuih kha dyng zah a leihmae kha he a kyng tuh a kuih kyakhe hoitang lang bua a tang.⁵Bawipaw nynh, “Ou hynhte na cyi zetuh minmin nynh Bawipaw , mih minpaaw hae Pachia, Abraham Pachia, Isak Pachia, te Jakob Pachia tuh na kya a langkuh cipaw a zyn cih hae,” a cipya.

⁶Bawipaw nynh Moses kha, “Na kuih kha na angkile lungkhu lang puku tua,” bua a cipya. Aning nynh a kuih kha a angkile lungkhu lang a pu; te a kuih kha he a thuaa tuh, a kuih tuh vuipua hawte raw zah vaethya a kae vae.⁷Oute Pachia nynh, “Na kuih kha na angkile lungkhu lang bua putua,” a cipya, tukeiccuze a kuih kha a angkile lungkhu lang bua a pu, te a kuih kha he a thuaa tuh, a kuih tuh a ngesaw thathyh lang bua a tang.⁸Bawipaw nynh, “Nang kha ae zyn khyh hae zah masaty e muihsahnaw kha a nythya khyh hae zemah vaeningnaw muihsahnaw kha tuh a zyn vae cih hae.⁹E muihsahnaw ccangning mawte minmin nynh zyn khyh hae zah na bya kha a ngae khyh hae zetuh Nal vawkhu e tui beihtaraw kha na lah cih zah aroupaw laephi kya na lae cih; te Nal vawkhu e na lawpaw tui tuh aroupaw laephi vawlan khe chii lang a tang cih,” a cipya.

¹⁰Thuasalama Moses nynh Bawipaw kha, “Pou ka Bawipaw, kae tuh langmaw mah thuasah, atu nae hopah koute mah thuasah byaho a puakuhpaw ka thua khyh; kae tuh a mung a lae sungpaw nynh ka thua,” a ci.¹¹Oute Bawipaw nynh Moses kha, “Ccungccaw byahonaw hynh hum nynh mou a pya? Byaho leinaw, nawpannaw, mitmuihnaw te mitmohnaw kha hum nynh mou a rae? Kamaw, Bawipaw nynh ka raepaw thua khyh tou?¹²Tukeiccuze atu cceih lah na mung na lae kya kae umkhae cih zah na ho lanpaw kha kae ccangpah cih,” a ci.¹³Thuasalama Moses nynh, “Pou ka Bawipaw, ccangpaw lukhakheit kha beih saw,” a cipya.¹⁴Oute Bawipaw nynh Moses tungvaw a thinria zah, “Levi phin na upaw Aaron kha mang a um khaw? Aning tuh byaho a puakuhpaw nynh thua cipaw ka ny; nang kha tungku khylan atu yn cceih cciamang zah he ae muih te, a lungtua cih.¹⁵A ho lanpaw bya kha na hopah cih; na munglae te a munglae kya kae umkhae cih oh zah na cyi lan oh paw kha kae ccangpah cih oh.¹⁶Aaron nynh ccungccaw hae kalan namaw ccelang bya a ho cih; aning tuh namaw hanlan mung te lae a thua cih zah nang tuh aning hanlan Pachia hawte na thua cih.¹⁷Muihsahnaw hae na raenaw lanpaw e hoitang hynh na kuih kya ccyngkuh,” a cipya. Moses Izip Ram lang A Ki

¹⁸Moses nynh a zu paaw Jethro kalan ki zah, “Izip ram umpaw ka vaeccaw hae kalan beih ka la cceihsah lah a hiin ung hae tah cipaw ka la dotua hae sah,” a cipya. Te Jethro nynh Moses kha, “Ngedante la cceih,” a cipya.¹⁹Midian ram umpaw Moses kha Bawipaw nynh, “Izip ram lang ki ccavae, pawccecize nang ae theih ry hae paw balyn tuh phe chih vae hae,” a cipya.²⁰Tukeiccuze Moses nynh a zu te a ccapaw hae kha ko hae zah lann tungvaw khang hae zah Izip ram lang a ki vae hae; te Moses nynh Pachia hoitang kha a kuih kya a ccyngku.

²¹Te Bawipaw nynh Moses kha, “Izip ram lang he na ki te, kae pyapaw ngaeang lan umpaw balyn kha Faro malang na langsakuh cih; thuasalama a lung kha ka khungsah cih zah Israel hae kha cciasah lan khyh hae.²²Oute nang nynh Faro kyakhe, ‘Bawipaw nynh hynhte a ho: Israel tuh ka ccatawccaw nynh thua,²³“Ka ccapaw nynh kae kha yn beik ccaw, ka ccapaw kha cciasah,” cite kae hopya. Thuasalama amaw kha cciasah lan phe na ei; atu na ccatawccaw kha kae chiapah cih,’ a ci cite la hopah,” a cipya.

²⁴Minmin nynh cceih hae zah khuazi a ryanaw hae khe Bawipaw nynh Moses kha tungkuh zah chia lan a zuaku.²⁵Zipporah nynh ahepaw lung ccangkheit kha lah zah a ccapaw vingdung kha a aw, te tuh-e lung khate Moses ccu kha nae zah, “Nang tuh chiise te asekuhpaw ka vawpaw ccaccing nynh na thua!” a cipya.²⁶Te nopinung nynh, “Nang tuh vingdungawku keiccuze a luapaw chiise te asekuhpaw vawpaw nynh na thua,” a cipya. Te Bawipaw nynh Moses kha a makhaete a umsah.

²⁷Bawipaw nynh Aaron kha, “Moses te tungku khylan laesia ram lang la cciatua,” a cipya. Tukeiccuze aning nynh cceih zah Pachia mua kyakhe Moses te tungkuh hae zah Moses kha a myng.²⁸Moses nynh amaw a sawtupaw Bawipaw bya balyn te Bawipaw nynh cyi lan a nawpaw muihsahnaw balyn kha Aaron kya a hopya.²⁹Oute Moses te Aaron nynh cceih hae zah Israel piccan balyn kha a pum hae.³⁰Bawipaw nynh Moses a la hopyapaw bya balyn kha Aaron nynh hopah hae zah muihsahnaw hae kha ccungccaw hae malang a raepya hae.³¹Te ccungccaw hae nynh a zyn hae; Bawipaw nynh Israel hae kya yn thua zah mih riathaenaw kha a muih vae cipaw minmin nynh he a nyh hae tuh, bakhung hae zah a beik hae.

¹Tukoute Moses te Aaron nynh Faro kalan cceih hae zah, “Israel hae Pachia Bawipaw nynh hynhte a ho, ‘Laesia ram kya kamaw hanlan poi yn tuapya ccaw hae, ka ccungccaw hae tuh cceih hae sah,’ a ci,” cite a hopya hae.²Faro nynh, “A bya kha ngaepyate Israel hae kha ka cciasah lan hae paw tuh, Bawipaw tuh hummou athua? Bawipaw tuh ka nyh khyh, Israel hae kha ka cciasah lan khyh hae,” a ci.³Te minmin nynh, “Hebru hae Pachia tuh kaening kya phe yn langkuh vae; Bawipaw kae Pachia kalan silawku khylan nin thum laanccia asawnaw laesia ram lang beih oun cciasah, tuhkhyhze tuh kaening kha shethya ccinaw te khyhze thaloi te de oun tah cih,” a cipya hae.⁴Izip siapharan Faro nynh, “Moses te Aaron, pawcce ccungccaw hae kha mih ryalaw na sawsakuh oh? Nae ryalaw kalan cceih oh!” a cipya hae.⁵Faro nynh bua hopah hae zah, “Minmin tuh ram kya-e ccungccaw hae laeze lunghua vae hae zah mih ryalaw kha na lawsah ry vae khyh oh,” a cipya hae.⁶Tuh-e nin khe Faro nynh ryalaw uktu bawi hae te ryalaw dopahtu hae kha,⁷“Ohkhe rae nawlan ccatanphue kha ccungccaw hae kalan langmaw hawte pya nan vae oh; mimaw ccaccei nynh cceih hae sah lah ccatanphue kha ccungkuh hae sah.⁸Thuasalama a rae hae paw ohkhe accanlu tuh langmaw zeih maminte na raesah cih oh; na zyasahpah hua lan khyh oh, pawccecize minmin nynh mih thawnaw keiccuze, ‘Kae Pachia kalan silawku khylan oun cciasah,’ cite a sia hae.⁹Minmin nynh ryalaw kha houh ru lante lah hae sah; khah-e ryalaw kha thawmawte a law hae zetuh lingpaw bya kha peki mang vae lan khyh hae,” a ci.

¹⁰Tukeiccuze ryalaw uktu bawi hae te ryalaw dopahtu hae nynh cceih hae zah ccungccaw hae kha, “Faro nynh, ‘Ccatanphue ka pya vae lan khyh hae.¹¹Minmin nynh a muih khonaw hae hmin kalan cceih hae sah lah ccungkuh hae sah; thuasalama mih ryalaw tuh ccapyh sanmah zyahua lan khyh,’ ae ci oh,” cite a hopya hae.¹²Tukeiccuze ccungccaw hae tuh ccatanphue hanpaw athupaw kha ccung khylan Izip ram balyn kya a pazaekuh hae.¹³Ryalaw uktu bawi hae nynh, “Ccatanphue ae pya lya oh ze, nin takyh na law oh hawkhate nae ryalaw kha phe lyn oh,” cite a nangse hae.¹⁴Faro a ryalaw uktu bawi hae nynh Israel hae hanlan a khangpya hae paw Israel ryalaw dopahtu hae kha bua hae zah, “Langmaw na rae oh paw ohkhe accanlu zeih kha inkhawnin te atunin kya pawcce na thangsah khyh oh?” cite a khia hae.

¹⁵Oute Israel ryalaw dopahtu hae nynh Faro kalan cceih hae zah, “Na see hae tungvaw pawcce hynhte nae cyi?¹⁶Ccatanphue mah nae pya khyh, thuasalama ryalaw uktu bawi hae nynh, ‘Ohkhe rae oh!’ oun cipya hae. Na see hae hynh pawcih ciate mou oun bua hae cipaw hynh oun dotua. Na ccungccaw hae tungvaw na ding khyh,” a cipya hae.¹⁷Faro nynh, “Nae thaw a naw, nae thaw a naw; tukeiccuze, ‘Bawipaw kalan silawku khylan kaening hynh oun cciasah,’ na ci oh.¹⁸Atu cceih oh lah ryalah oh; ccatanphue kae pya lan khyh oh, thuasalama ohkhe accanlu tuh langmaw te phe lokuh lante nae pya cih oh,” a cipya hae.¹⁹“Nin takyh na rae oh paw ohkhe accanlu zeih laeze na zyasah hua lan khyh oh,” cite Faro nynh a hopah hae tuh, vawsawnaw kae tung vae cipaw kha Israel ryalaw dopahtu hae nynh a ny hae.²⁰Minmin nynh Faro kyate he a pou hae tuh, minmin te tungku khylan a la ngaw hae paw Moses te Aaron kalan a cceih hae.²¹Minmin nynh Moses te Aaron kyakhe, “Bawipaw nynh nanning kha ae do oh sah lah, bya ae pia vae oh sah! Faro te a ryalahtu bawi hae kha kaening tungvaw nae huasah oh zah, kaening chianaw lanpaw thaloi kha mih kuih kya na pya vae oh,” a cipya hae. Moses Sawsangnaw

²²Oute Moses nynh Bawipaw kalan bua cceih zah, “Pou Bawipaw , e ccungccaw hae tungvaw pawcce riathaenaw na pya hae? Pawcce kae hynh nae saw?²³Faro kalan na min te byaho lan he ka thua ccyh kyate tho zah Faro nynh e ccungccaw hae tungvaw vawsawnaw a pya vae hae, te na ccungccaw hae kha luesah khylan pawpaw mah na cyih khyh,” a ci. Israel hae A Lue Cih hae

¹Oute Bawipaw nynh Moses kha, “Faro tungvaw ka cyi lanpaw kha atu na muih vae cih: Alesaepaw huhan liate Israel hae kha a cciasah cih hae; alesaepaw huhan liate minmin kha a ram kyate a dee vae cih hae,” a cipya.

²Pachia nynh Moses kha bua hopah zah, “Kae tuh Bawipaw nynh ka thua.³Abraham, Isak te Jakob kya Athunghuapaw Pachia lante ka langkuh, thuasalama Bawipaw cikuhpaw ka min tuh minmin kha ka nysah khyh hae.⁴Minmin nynh ramccang hae hawte a umnaw hae Kanaan ram kha kae pya cih oh cite bya ka kinkupaw kha mah ka tynsah.⁵Izip hae see lang a tang hae paw Israel hae kya-e hawkhaekunaw roi kha mah ka thae vae, te ka byakinnaw kha mah ka ning khyh.⁶Tukeiccuze Israel hae kha, ‘Kae tuh Bawipaw nynh ka thua, Izip hae kya-e phupaw ripaw kyate kae luesah cih oh zah minmin see lang na tangnaw oh kyate poh kae thuaa cih oh. Kuih dyngnaw te thuasah, alesaepaw byapianaw te thuasah, nanning kha kae khum cih oh.⁷Nanning kha ka ccungccaw hae lante kae rae cih oh zah kae tuh nae Pachia ka thua cih. Kae tuh Izip hae kya-e phupaw ripaw kyate ae luesah oh paw Bawipaw nae Pachia nynh ka thua cipaw kha nae nyh cih oh.⁸Abraham, Isak te Jakob kha kae pya cih oh cite bya ka kinpyaku hae paw ram lungkhu lang kae cciakhae cih oh; khah-e ram kha naemaw ram lang kae pya cih oh. Kae tuh Bawipaw nynh ka thua,’ a ci cite na la hopah cih hae,” a cipya.⁹Moses nynh tuh-e tuh Israel hae kya a hopya hae; thuasalama mih lungronaw te myarya ccihpaw seetangnaw keiccuze Moses bya kha ngae khyh hae.

¹⁰Oute Bawipaw nynh Moses kha,¹¹“Izip siapharan Faro kalan la cceih lah Israel hae kha a ram kyate a pousah nawlan hae la hopah,” a cipya.¹²Thuasalama Moses nynh Bawipaw kha, “Israel hae nynh ka bya kha ngae khyh hae, byaho a puakuh leipaw kae nynh ka hopaw bya kha pawtemou Faro nynh a ngae cih?” a ci.¹³Bawipaw nynh Moses te Aaron kha, “Israel hae te Izip siapharan Faro kyakhe Bawipaw nynh, ‘Israel hae kha Izip ram kyate na poukhae cih oh,’ oun cipya cite la hopah oh,” a cipya hae. Moses te Aaron Thokeinaw

¹⁴Akawlan e ccungccaw hae tuh mih innbyn raveih kyaze lupi raveih nynh a thua hae: Israel a ccatawccaw Reuben ccapaw hae tuh Hanok, Pallu, Hezron, te Karmi nynh thua hae; e hae tuh Reuben phin nynh thua hae.¹⁵Simeon ccapaw hae tuh: Jemuel, Jamin, Ohad, Jakhin, Zohar te Kanaan nopinung ccapaw Shaul nynh thua hae; e hae tuh Simeon phin nynh thua hae.¹⁶Levi ccapaw hae mih min tuh mih thokeinaw thyhte: Gershon, Kohath te Merari. Levi tuh za kheit sung thum kum sari cia a hiin.¹⁷Gershon ccapaw hae tuh mih phin thyhte Libni, Shimei nynh thua hae.¹⁸Kohath ccapaw hae tuh: Amram, Izhar, Hebron te Uzziel nynh thua hae. Kohath tuh za kheit sung thum kum thum cia a hiin.¹⁹Merari ccapaw hae tuh: Mahli te Mushi nynh thua hae. E hae tuh mih thokeinaw thyhte Levi phin nynh thua hae.²⁰Amram nynh a paaw ccianung Jokhebed kha zu lang umkhae zah Aaron te Moses kha a saah hae. Amram tuh za kheit sung thum kum sari a hiin.²¹Izhar ccapaw hae tuh: Korah, Nefeg te Zikhri nynh thua hae.²²Uzziel ccapaw hae tuh: Mishael, Elzafan te Sithri nynh thua hae.²³Aaron nynh Amminadab ccanung, Nahshon a ccianung Elisheba kha zu lang umkhae zah Nadab, Abihu, Eleazar te Ithamar kha a saah.²⁴Korah ccapaw hae tuh: Assir, Elkanah te Abiasaf nynh thua hae. E hae hynh Korah phin nynh thua hae.²⁵Aaron ccapaw Eleazar nynh Putiel ccanung lu kheit kha zu lang umkhae zah Finehas kha a saah. E hae hynh mih phin thyhte Levi phin hae kya-e lupi hae nynh thua hae.

²⁶Bawipaw nynh, “Israel hae kha aphuphute Izip ram kyate poukhae oh,” cite a hopya hae paw tuh Moses te Aaron kha nynh a thua hae.²⁷Izip ram kyate Israel hae poukhae lanpaw kha Izip siapharan Faro kya a hopahtu hae kha mah Moses te Aaron mamin nynh a thua hae. Moses te Aaron Ryalaw Nawnaw

²⁸Bawipaw nynh Moses kha Izip ram kya a hopya lyaze,²⁹“Kae tuh Bawipaw nynh ka thua; nang kae hopyapaw balyn kha Izip siapharan Faro kalan hopah,” a cipya.³⁰Thuasalama Moses nynh Bawipaw malang khe, “Kae tuh byaho a puakuh leipaw ka thua zah pawtemou Faro nynh ka bya kha a ngae cih?” a ci.

¹Bawipaw nynh Moses kha, “Dotua, Faro hanlan nang kha Pachia lang kae rae vae, na upaw Aaron tuh na profeh a thua cih.²Kaw kae pyapaw balyn kha na ho cih, te a ram kyate Israel hae kha a pousah nawlan hae, na upaw Aaron nynh Faro kalan a hopah cih.³Thuasalama Faro thinlung kha ka khungsah cih zah Izip ram kya muihsahnaw te ngaeangnaw kha patae ka rae cih.⁴Faro nynh na bya kha he a ngae khyh tuh, Izip ram kya ka kuih kha ka khang cih zah alepaw detahnaw liate Izip ram kyate ka ccungccaw Israel hae kha aphuphute ka cciakhae cih hae.⁵Izip hae kha rawsete ka kuih ka dyng cih zah Israel hae kha Izip hae laku kyate he ka cciakhae hae tuh, Izip hae nynh kae tuh Bawipaw nynh ka thua cipaw kha yn nyh vae cih hae,” a cipya.⁶Bawipaw nynh kaw a pya hae thyhte Moses te Aaron nynh a cyi hae.⁷Faro kalan bya a hopya lya hae tuh, Moses tuh kum sung tarya cih vae zah Aaron tuh sung tarya kum thum acih vae. Aaron Hoitang

⁸Bawipaw nynh Moses te Aaron kyakhe,⁹“Faro nynh, ‘Ngaeangnaw raetua oh,’ ae cipya oh ze, Moses nynh Aaron kha, ‘Na hoitang kha lawkuh lah Faro malang vua lah hupaw lang a tang cih,’ na cipah cih,” a cipya hae.¹⁰Tukeiccuze Moses te Aaron nynh Faro kalan cceih hae zah Bawipaw nynh kawpya hae thyhte a cyi hae; Aaron nynh a hoitang kha Faro te a ryalahtu bawi hae malang khe vua zah hupaw lan poh a tang.¹¹Oute Faro nynh ahaw hae paw te apawe hae paw kha a ko hae; te Izip ram e mitleihthya hae paw nynh mah mih thyanaw khate tuhcite phe a cyibua kho hae.¹²Lu kheit cci nynh mih hoitang kha vua hae zah mih hoitang hae tuh hupaw lang phe a tang hae; thuasalama Aaron hoitang nynh mih hoitang hae kha pong a laang.¹³Faro thinlung kha phang khungsah ung zah Bawipaw nynh a la ho vae hawte mih bya kha ngaelae khyh. Vaekheitnaw Shethya: Chiise

¹⁴Oute Bawipaw nynh Moses kha, “Faro tuh a lungkhung zah Israel hae cciasah lanpaw kha phe a ei.¹⁵Tukeiccuze Faro nynh vawkhu lang a ccia ccyh awkhua khe Faro kalan la cceih lah amaw te tungku khylan vawkhu kin khe phang la ngaw lah hupaw lang atangpaw hoitang kha na kuih kya ccyngkuh.¹⁶Te Faro kha, ‘Hebru hae Pachia Bawipaw nynh kae kha na kalan yn saw zah, “Laesia ram kya kae kha oun beik ccaw hae, ka ccungccaw hae kha cciasah hae,” cite la hopah yn cipya. Thuasalama atu cia na ngae khyh.¹⁷Tukeiccuze Bawipaw nynh, “Kae tuh Bawipaw nynh ka thua cipaw kha hynh-e ka cyipaw liate na nyh cih,” a cipya. Dotua, Nal vawkhu e tui kha ka kuih kya umpaw hoitang te ka bua cih zah chiise lang poh a tang cih.¹⁸Vawkhu e ngasaw hae tuh a chih cih hae, vawkhu tuh a myn cih zah Izip hae nynh Nal vawkhu e tui kha neih kho lan khyh hae,’ cite la hopah,” a cipya.¹⁹Bawipaw nynh Moses kyakhe, “Aaron kha, ‘Na hoitang kha lawkuh lah Izip ram umpaw tui hae—vaw hae, tuizy hae, kua hae te tuisung hae luki khe na kuih kha dyngtua. Tui tuh chiise lang pong a tang cih zah Izip ram balyn kya chiise a um cih, thing karung kya te lungkarung kya a ynkuhpaw tui hae heize chiise lang pong a tang cih,’ cite hopah,” a cipya.

²⁰Bawipaw nynh kawpya hae thyhte Moses te Aaron nynh a cyi hae. Faro te a ryalahtu bawi hae malang khe Aaron nynh a hoitang kha hang zah vawkhu e tui kha he a bua tuh, vawkhu e tui tuh chii lang a tang vae,²¹vawkhu e ngasaw hae tuh chih hae zah vawkhu e tui tuh eih amyn keiccuze Izip hae nynh neih kho vae khyh hae, te Izip ram balyn kya chiise pong a um.²²Te mitleihthyapaw Izip hae nynh mah tuhcite a cyibua hae; tukeiccuze Bawipaw nynh a ho hawte Faro tuh a lungkhung zah mih bya kha ngaelae khyh.²³Faro tuh a inn lang ki zah a cyi hae paw kha pawlangria khyh.²⁴Te Izip hae balyn nynh nia lanpaw tui kha mue khylan Nal vahue khe a karouhku hae, pawccecize minmin nynh vawkhu e tui kha neih kho vae khyh hae.

²⁵Bawipaw nynh Nal vaw kha de a tahnaw tuh nin sari aro vae. Vaeningnaw Shethya: Buphaw

¹Oute Bawipaw nynh Moses kha, “Faro kalan la cceih lah, ‘Bawipaw nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.²Minmin cciasah lanpaw kha na ei lanze na ram balyn kha buphaw te shethya ka thuasah cih.³Vawkhu tuh buphaw te phe a beih cih; tuh-e buphaw hae nynh na siapharan inn kya thuasah, na inaw khaan kya te na ikhung kya thuasah, na ryalahtu bawi hae inn kya te na ccungccaw hae inn kya thuasah, na takua kya te na sanlou raenawpaw pake kya thuasah a kae cih hae.⁴Buphaw nynh nang te na ccungccaw hae te na ryalahtu bawi hae tungvaw kya ae kaenua cih oh,’ cite la hopah,” a cipya.⁵Oute Bawipaw nynh Moses kha hopah zah, “Aaron nynh tuu a rinnawpaw a hoitang kha Izip ram e vawkhu hae, tuizy hae te kua hae luki khe hangsah lah Izip ram balyn kya buphaw kha kaesah,” a cipya.⁶Aaron nynh Izip ram e tui hae luki khe a kuih kha dyng zah Izip ram balyn tuh buphaw te phe a beih vae.⁷Thuasalama mitleihthya hae paw nynh mah mih thyanaw te tuhcite cyih hae zah buphaw hae kha Izip ram lang phe kaesah hae.

⁸Oute Faro nynh Moses te Aaron kha ko hae zah, “Bawipaw nynh buphaw kha kae te ka ccungccaw hae kyate a law nawlan sawsang oh, te ccungccaw hae kha Bawipaw kalan silaw khylan ka cciasah cih hae,” a cipya hae.⁹Moses nynh Faro kha, “Naemaw te nae inn kyate buphaw hae kha law thua hae sah lah, Nal vawkhu kya kyalya a um ccaw cite, nang te na ryalahtu bawi hae te na ccungccaw hae hanlan hohtuhmou saw ka sang cih cipaw beih yn hopah,” a cipya.¹⁰Te Faro nynh, “Awkhualan,” a cipya. Moses nynh, “Na ho hawte thuasah! Bawipaw kae Pachia alopaw pachia um khyh cipaw na ny nawlan,¹¹buphaw hae nynh nang te na inn hae, na ryalahtu bawi hae te na ccungccaw hae kha ae cciataw cih oh zah Nal vaw kya rou nynh a um cih hae,” a ci.¹²Oute Moses te Aaron tuh Faro kyate a pou hae; te Pachia nynh Faro tungvaw a thuakhaepaw buphaw hae konglang kha Moses nynh Bawipaw kalan saw a sang.¹³Te Moses nynh a ngia hawkhate Bawipaw nynh a cyipya: buphaw hae tuh inn hae kya, inn voidu lungkhu kya te loo hae kya a chih hae.¹⁴a chihpaw buphaw hae kha suelua hae zah patae a pum hae keiccuze ram tuh a myn vae.¹⁵Faro nynh ahoyhua vae cipaw he a muih tuh, Bawipaw nynh a la ho vae hawte a lungkhung zah Moses te Aaron bya kha ngaelae khyh. Vaethumnaw Shethya: Maseih

¹⁶Oute Bawipaw nynh Moses kyakhe, “ ‘Izip ram balyn kya umpaw laenoi tuh maseih lang a tang ccaw, na hoitang kha kyngte na kuih kha dyng lah laephi kya-e laenoi kha buatua,’ cite Aaron kha hopah,” a cipya.¹⁷Te minmin nynh tuhcite a cyi hae; Aaron nynh a hoitang kha kyngte a kuih kha dyng zah laenoi kha a bua, te maseih tuh ccungccaw hae te sarangpaw hae kyakhe a um vae hae; Izip ram balyn e laenoi balyn tuh maseih lang a tang vae.¹⁸Mitleihthya hae paw nynh mih thyanaw te maseih rae lan a zuaku hae, thuasalama rae kho khyh hae. Maseih hae tuh ccungccaw hae te sarangpaw hae kyakhe a um hae.¹⁹Te mitleihthya hae paw nynh Faro kha, “E tuh Pachia nynh a cyipaw nynh thua,” a cipya hae. Thuasalama Bawipaw nynh a la ho vae hawte Faro tuh a lungkhung zah minmin bya kha ngaelae khyh. Vaepalinaw Shethya: Myn

²⁰Oute Bawipaw nynh Moses kha, “Awkhua takaw te tho lah vawkhu lang a cceihpaw Faro malang khe thadyn lah, ‘Bawipaw nynh hynhte a ho: Ka ccungccaw hae nynh kae kha yn beik ccaw hae, minmin kha cciasah hae.²¹Ka ccungccaw hae kha na cciasah khyh hae zetuh myn hae kha namaw, na ryalahtu bawi hae te na ccungccaw hae tungvaw kya te na inn hae lungkhu lang ka saw cih; te Izip hae inn te a umnaw hae laephi kha mah myn te phe abeih cih.²²Tuh-e nin kyakhe kae tuh e ram kya Bawipaw nynh ka thua cipaw na ny nawlan, ka ccungccaw hae nynh a umnaw hae Goshen ram kha thoh ka phia cih zah tuin kya myn um lan khyh.²³Ou tuhte ka ccungccaw hae te na ccungccaw hae laku laesahnaw ka rae cih. E muihsahnaw hynh awkhualan yn langkuh cih,’ cite la hopah,” a cipya.²⁴Bawipaw nynh tuhcite cyih zah myn hae patae tuh Faro inn kya, a ryalahtu bawi hae inn kya te Izip ram balyn kya oun thua hae zah, tuh-e myn hae keiccuze Izip ram tuh a roh vae.

²⁵Oute Faro nynh Moses te Aaron kha ko hae zah, “La cceih oh lah e ram lungkhu kya nae Pachia kalan silawnaw la rae oh,” a cipya hae.²⁶Moses nynh, “Tuhte cyi lan hoy lan khyh; pawccecize Bawipaw kae Pachia kalan kae pyapaw silawnawpaw kha Izip hae nynh anungsikuh a ci cih hae. Izip hae nynh anungsikuh a ci hae paw silawnawpaw khate Izip hae mitmuihnaw kya si kae law lanze minmin nynh lung te oun deih lan khyh hae tou?²⁷Bawipaw kae Pachia nynh kaw oun pya thyhte nin thum laanccia asawnaw laesia ram langkhe kae cceih cih zah amaw kalan si kae lawkuh cih,” a ci.²⁸Te Faro nynh, “Myarya asawnaw lang na ccia khyh oh zetuh, Bawipaw nae Pachia kha laesia ram kya silaw lan kae cciasah cih oh. Kamaw hanlan saw yn sangpah oh,” a cipya hae.²⁹Moses nynh, “Awkhualan khe myn hae tuh namaw kyate thuasah, na ryalahtu bawi hae kyate thuasah, na ccungccaw hae kyate thuasah, a pou nawlan hae, na kyate he kae pou takaw mawte, Bawipaw kalan saw ka la sang cih; ccungccaw hae nynh Bawipaw kalan silaw khylan a ccia lan hae paw kha ua leite bua na ling vae lan khyh hae,” a cipya.

³⁰Te Moses tuh Faro kyate pou zah Bawipaw kalan saw a sang.³¹Moses nynh a ngia thyhte Bawipaw nynh a cyi: Myn hae kha Faro kyate thuasah, a ryalahtu bawi hae kyate thuasah, a ccungccaw hae kyate thuasah Bawipaw nynh pousah hae zah sa kheit sanmah um vae khyh hae.³²Thuasalama tuh-e ccyh kyacia Faro tuh a lung bua khung zah ccungccaw hae kha cciasah khyh hae. Vaepangawnaw Shethya: Sarangpaw hae Chinaw

¹Oute Bawipaw nynh Moses kha, “Faro kalan la cceih lah, ‘Hebru hae Pachia Bawipaw nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.²Minmin cciasah lanpaw kha na ei zah phang na kyng hae zetuh,³Bawipaw kuih nynh loo kya umpaw nae sahiin-awvaw hae: marang hae, lann hae, kalauh hae, vaetua hae, tuu hae te miaa hae kyakhe myarya lepaw ccinaw kha a thuasah cih.⁴Thuasalama Bawipaw nynh Israel hae sahiin-awvaw hae te Izip hae sahiin-awvaw hae kha a laesah cih zah Israel hae nynh a hoi hae paw balyn tuh sa kheit sanmah chih lan khyh,’ cite la hopah,” a cipya.⁵Bawipaw nynh accyh kha khya zah, “E uccaw hynh Izip ram kya awkhualan a cyih vae cih,” a cipya.⁶Te Bawipaw nynh awkhualan khe a ho hawte a cyi vae; Izip hae kya-e sahiin-awvaw balyn tuh pong a chih hae, thuasalama Israel hae kya-e sahiin-awvaw tuh sa kheit sanmah chih khyh.⁷Faro nynh acyihkuhpaw kha khia hae zah Israel hae kya-e sahiin-awvaw tuh sa kheit sanmah chih khyh cipaw a ny. Thuasalama Faro tuh a lungkhung zah Israel hae kha cciasah lae khyh hae. Vaetaruhnaw Shethya: Balyh

⁸Oute Bawipaw nynh Moses te Aaron kha, “Moses nynh takua kya-e buhhaw kha kuihphe kheit khate lah sah lah, Faro a muihnaw khivae kyakhe vuasah.⁹Tuh-e buhhaw tuh Izip ram balyn kya laenoi lang a tang cih zah Izip ram balyn kya ccungccaw hae te sarangpaw hae kyakhe balyh kha a thuakhae cih,” a ci.¹⁰Tukeiccuze minmin nynh takua kya-e buhhaw kha lah hae zah Faro malang a thadyn hae, te Moses nynh buhhaw kha khivae kya vua zah ccungccaw hae te sarangpaw hae kyakhe balyh kha a thuakhae vae.¹¹Mitleihthya hae paw tuh mih balyh keiccuze Moses malang thadyn kho khyh hae, pawccecize minmin kha mah ccangpaw Izip hae balyn hawte balyh nynh a thuanua bua hae.¹²Thuasalama Bawipaw nynh Faro tuh a lungkhung sah zah Bawipaw nynh Moses a la hopya hawte minmin bya kha ngaelae khyh. Vaesarinaw Shethya: Hya

¹³Oute Bawipaw nynh Moses kha, “Awkhua takaw te tho lah Faro malang khe na thadyn cih zah, ‘Hebru hae Pachia Bawipaw nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.¹⁴Laephi pynpi kya kamaw yn lopaw lu kheit sanmah um khyh cipaw na ny nawlan, atu tuh ka kya-e shethya balyn kha na tungvaw, na ryalahtu bawi hae tungvaw, na ccungccaw hae tungvaw kya ka thuasah cih.¹⁵Ka kuih kha ka dyng cih zah nang te na ccungccaw hae kha shethya ccinaw te de ka tah cih hae, nang kha laephi kyate phe kae zosah cih.¹⁶Thuasalama ka huhan kha nang muihsah khylan te laephi pynpi kya ka minthaan sah khylan nang kha kae hiinsah.¹⁷Ka ccungccaw hae kha rawsete namaw te namaw kha palei na hangsakuh zah minmin kha na cciasah khyh hae.¹⁸Awkhualan atu ccyh khe Izip ram a um takaw te atu cia Izip ram kya accah boi leipaw myarya lepaw hya kha ka ccawsah cih.¹⁹Tukeiccuze loo kya na hoipaw na sahiin-awvaw te atyn-are kha akhynnaw hmin lang saw hae; rekunaw bu kya um leite loo kya umpaw sarangpaw te ccungccaw miakaw tuh hya nynh a ccawphu cih hae zah a chih cih hae,’ cite la hopah,” a cipya.²⁰Bawipaw bya a rihpaw Faro a ryalahtu bawi hae nynh mih see hae te mih sahiin-awvaw kha akhynnaw hmin kalan arangte a cciasah hae.²¹Bawipaw bya kha pawlangria lei hae paw tuh mih see hae te mih sahiin-awvaw kha loo kya a nungsya hae.

²²Bawipaw nynh Moses kha, “Izip ram balyn kya thuasah, Izip ram umpaw ccungccaw hae te sarangpaw hae kya thuasah, loo kya umpaw aku hae balyn kya thuasah hya accaw ccaw, na kuih kha vaawlang khe dyngtua,” a cipya.²³Moses nynh a hoitang kha vaawlang khe a hangthung, te Bawipaw nynh kholungthyhsah zah hya kha a ccawsah, te maee tuh laephi vawlan a ccah. Te Bawipaw nynh Izip ram kya hya kha khuaa lang a rawsah;²⁴hya te maee tuh pykuh zah apaekuh lei lan thawmawte accah, tuhcihawpaw hya tuh Izip ram a um takaw te Izip ram balyn kya ccah boi khyh.²⁵Izip ram balyn e loo kya umpaw atyn-are, ccungccaw te sahiin-awvaw kha hya nynh a deih hae; loo kya-e aku hae balyn kha mah deih hae zah loo kya umpaw thingku miakaw tuh pong a khya.²⁶Israel hae nynh a umnaw hae Goshen ram kya rou nynh hya ccah khyh.

²⁷Oute Faro nynh Moses te Aaron kha kosah hae zah, “Atu tuh phe ka sei vae; Bawipaw tuh ding zah kae te ka ccungccaw hae tuh kae mesei vae.²⁸Bawipaw kalan sawsang oh! Pachia kya-e kholung te hya nynh phe yn zawsah vae! Nanning kha kae cciasah vae cih oh; po na um vae lan khyh oh,” a cipya hae.²⁹Moses nynh Faro kha, “Khuapi kyate he ka toikuh takaw te, ka kuih kha Bawipaw kalan ka dyng cih. Laephi tuh Bawipaw kya-e nynh thua cipaw na ny nawlan kholung tuh adae cih zah hya mah um vae lan khyh.³⁰Thuasalama nang te na ryalahtu bawi hae tuh Bawipaw kha na rih loh khyh oh cipaw phe ka ny,” a cipya.³¹Buri ku te barli ku tuh phe aroh vae, pawccecize barli thae tuh voi vae zah buri ku tuh apaw ccyh lya nynh thua.³²Thuasalama ccathae te phawvoi tuh roh khyh, pawccecize hynh-e hae tuh nyathya nynh a po hae.³³Moses nynh Faro kyate toikuh zah khuapi atolang khe a cceih, te a kuih kha Bawipaw kalan a dyng; oute kholung te hya tuh dae hae zah laephi vawlan khuaarah vae khyh.³⁴Thuasalama Faro nynh khua, hya, te kholung tuh phe dae vae cipaw he a nyh tuh, bua sei zah a ryalahtu bawi hae ryte lungkhungte a um hae.³⁵Tuhcite Faro tuh a lungkhung zah, Bawipaw nynh Moses kyate a la ho vae hawte Israel hae kha cciasah lae khyh hae. Vaetaryanaw Shethya: Tungkhipaw

¹Oute Bawipaw nynh Moses kha, “Faro kalan la cceih; pawccecize kamaw kya-e muihsahnaw hae kha minmin kya langsaku ka ry keiccuze Faro te a ryalahtu bawi hae mih lung kha ka khungsah vae hae,²Tuh-e tuh Izip hae kha a ngaeepaw ccungccaw lang pawtemou ka rae hae cipaw te minmin kya pawcihawpaw ngaeangnaw mou ka rae cipaw kha nae ccaaw hae te nae mintaw hae kha na hopah oh zah, tuhcite kae tuh Bawipaw nynh ka thua cipaw nae nyh cih oh,” a cipya.

³Moses te Aaron nynh Faro kalan cceih hae zah, “Hebru hae Pachia Bawipaw nynh hynhte a ho, ‘Ka malang zakawsangsaku lanpaw kha hohsemou na ei ung cih? Kamaw kha beik khylan ka ccungccaw hae kha cciasah hae.⁴Ka ccungccaw hae kha cciasah lan na ei zetuh, la do vae, tungkhipaw hae kha na ram lungkhu lang awkhualan kae thuakhae cih.⁵Tuh-e tungkhipaw hae nynh laephi kha hung nynh san muih kho um lei lan, a lang lei lan a bong cih hae; naemaw kya alaepaw, hya nynh a ro leipaw miakaw kha a ae cih hae. Nae loo kya apopaw aku miakaw kha a ae cih hae.⁶Na inn hae, na ryalahtu bawi hae inn balyn te Izip hae inn balyn kya phe a beih cih hae; tuh-e tuh na paaw, na minpaaw hae nynh laephi vawlan a um takaw hae te atu cia muih boi lan khyh hae,’ a ci,” cite a hopya hae. Te Faro kyate maeleihkuh hae zah a pou vae hae.

⁷Faro a ryalahtu bawi hae nynh Faro kha, “E ccungccapaw nynh hohsemou vawsawnaw oun pya ung cih? Minmin nynh mih Bawipaw Pachia kha a beik ccaw hae, cceih ccavae hae sah; Izip ram phe roh vae cipaw na nyh loh khyh tou?” a cipya hae.⁸Tukeiccuze Moses te Aaron kha Faro kalan bua cciakhae hae zah Faro nynh, “Cceih oh lah Bawipaw nae Pachia kha la beik oh! Thuasalama a cceih cih hae paw tuh hum hae mou?” a ci.⁹Moses nynh, “Kae mino hae te kae piccan hae ryte kae cceih cih; kae ccapaw hae, kae ccanung hae, kae tuu hae te kae miaa hae, te kae vaetua hae ryte kae cceih cih, pawccecize Bawipaw kalan beiknaw poi kha kae tua cih,” a ci.¹⁰Faro nynh minmin kha, “Bawipaw nynh ae umkhae ccaccing cih oh, nae ccaaw hae hynh nae kya ka cciasah bua hae lanze, nae thinlung kya ahoy leipaw eenaw na hoi oh cipaw phe aria.¹¹Tuhte thua lan khyh! Nae ngia oh hawte pise hae nynh la cceih oh lah Bawipaw kha la beik oh,” a cipya hae. Te minmin kha Faro umnaw kyate a dee hae.

¹²Oute Bawipaw nynh Moses kha, “Tungkhipaw hae nynh Izip ram kya oun thua hae zah hya nynh a ro leipaw aku miakaw, laephi kya alaepaw balyn kha pong a ae ccaw hae, Izip ram vawlan khe na kuih dyngtua,” a cipya.¹³Tukeiccuze Moses nynh Izip ram vawlan khe a kuih a dyng, te Bawipaw nynh tuh-e nin kya khuazi khuadae nithua lang e khisan kha a zawsah; awkhua he yn thua tuh, nithua lang e khisan nynh tungkhipaw hae kha oun thuakhae vae hae.¹⁴Tungkhipaw hae tuh Izip ram balyn kya oun thua hae zah Izip ram pynpi kya a um hae, tuhcih alungpaw tungkhipaw phu hae tuh langmaw zemah um boi khyh zah malang zemah um boi vae lan khyh.¹⁵Tuh-e tungkhipaw hae nynh ram balyn kha phe man lan a bong hae; ram kya umpaw aku balyn te hya nynh a ro leipaw, alaepaw thingthae balyn kha pong a ae hae; Izip ram balyn kya umpaw loo kya-e thingku-ruaku hae kya ahinpaw anaw um vae khyh.¹⁶Tetuh Faro nynh Moses te Aaron kha arangte ko hae zah, “Nae Bawipaw Pachia tungvaw te nanning tungvaw phe ka sei vae.¹⁷Tukeiccuze atu vaekheit kyalya ka seinaw kha yn ngaethya oh lah, e chinaw detahnaw kyalya hynh Bawipaw nae Pachia nynh yn vuapya kho nawlan amaw kalan saw yn sangpah oh,” a ci.¹⁸Tukeiccuze Moses nynh Faro kyate toikuh zah Bawipaw kalan saw a sang.¹⁹Bawipaw nynh khisan kha myarya athawsaepaw niccaw lang e khisan lang tangsah zah tuh-e khisan nynh tungkhipaw hae kha hangthung hae zah Rili Se kalan pong a mung hae.²⁰Thuasalama Bawipaw nynh Faro thinlung kha khungsah zah Faro nynh Israel hae kha cciasah lae khyh hae. Izip ram balyn kya tungkhipaw sa kheit sanmah um vae khyh. Vae Takuanaw Shethya: Mohnaw

²¹Oute Bawipaw nynh Moses kha, “Izip ram balyn kya mohnaw a um nawlan te tuh-e mohnaw tuh hae khopaw mohnaw athua nawlan, na kuih kha vaawlang khe dyngtua,” a cipya.²²Tukeiccuze Moses nynh a kuih kha vaawlang khe dyng zah varyng zipingpaw mohnaw tuh Izip ram kya nin thum lungkhu a um.²³Izip hae tuh lu kheit te lu kheit muihkuh kho khyh hae, nin thum lungkhu mih umnaw kyate thokuh kho khyh hae; thuasalama Israel hae balyn tuh mih umnaw kya awnaw a mue hae.²⁴Oute Faro nynh Moses kha ko zah, “Cceih oh lah Bawipaw tuh la beik oh. Nae tuu hae, nae miaa hae, te nae vaetua hae kyalya kha nungsya oh. Nae ccaaw hae kha naemaw kya cceihbua hae sah,” a cipya.²⁵Thuasalama Moses nynh, “Bawipaw kae Pachia kalan pya lanpaw silawnawpaw hae te maee-ute silawnaw lanpaw sahiin hae kha nae pya cih.²⁶Kae sahiin-awvaw mah kaemaw kya a cceihbua cih hae, sa kheit sanmah kae cciataw lan khyh, pawccecize sahiin hae laku e abang kha Bawipaw kae Pachia beik nawlan kae po cih. Bawipaw beik nawlan pawcihawpaw sahiin mou kae mang cih cipaw kha tuin kya kae thua maw tuh kae nyh lan khyh,” a ci.²⁷Thuasalama Bawipaw nynh Faro kha a lungkhungsah zah, Faro nynh Israel hae cciasah lanpaw kha ry khyh.²⁸Oute Faro nynh Moses kha, “Kamaw kyate pou! Ka mae bua nae muih khyh nawlan raeringkuh, pawccecize ka mae he nae muih nin tuh na chih cih,” a cipya.²⁹Moses nynh, “Na ho hawte thuasah! Na mae kha nyalang kharouh kae muih vae lan khyh,” a cipya. Ccatawccaw Chinaw Kong A Ho

¹Bawipaw nynh Moses kha, “Faro tungvaw te Izip ram kya shethya phuin kheit bua ka thuasah ung cih; tukoute nanning kha e kyate ae cciasah vae cih oh; he ae cciasah oh te, nanning kha dee mawte ae dee cih oh.²Nopi pise miakaw nynh mih innpaw hae kya-e sui uccaw te ngun uccaw kha a ngia nawlan hae, Israel hae kha na hopah cih hae,” a cipya.³Bawipaw nynh Izip hae muihnaw kya Israel hae kha maehoynaw a pya hae. Tuhpiaze, Moses tuh Izip ram kyaze Faro a ryalahtu bawi hae malang te ccungccaw hae malang myarya doliakupaw pise lu kheit nynh thua.

⁴Oute Moses nynh Faro kha, “Bawipaw nynh hynhte a ho: Ziraccyng loukaw khe Izip ram angaelung lang ka cceih cih;⁵te Izip ram kya umpaw ccatawccaw balyn a chih cih hae, Faro bawitungkhung kya a haung cih paw a ccatawccaw kyate tho zah looh mianawpaw sung nulang a umpaw seenung a ccatawccaw kyacia a chih cih hae, te sahiin-awvaw kyaze thanty balyn tuh a chih cih hae.⁶Oute Izip ram pynpi kya a la um boi leipaw te malang zemah a um vae cih leipaw myarya ccihpaw rawkhuinaw kha a um cih.⁷Thuasalama Bawipaw nynh Israel hae te Izip hae laku kya laesahnaw kha a rae cipaw na ny nawlan, ui nynh Israel ccungccaw lukhakheit kha thuasah, sarangpaw hae kha thuasah ngoh lan khyh.⁸Oute hynh-e na ryalahtu bawi hae nynh kamaw kalan cciate oun bakhung cih hae zah, ‘Nang te nang ae zuipaw ccungccaw balyn tuh cceih ccavae oh,’ cite oun ho cih hae. Tukoute kae tuh ka cceih cih,” a cipya. Te Moses nynh myarya a thinria lante Faro kha a cciataw.

⁹Bawipaw nynh Moses kha, “Izip ram kya ngaeangnaw kha houh ka rae nawlan, Faro nynh na bya kha ae ngaepah lan khyh,” a cipya.¹⁰Moses te Aaron nynh e ngaeangnaw balyn kha Faro malang a raepya hae; thuasalama Bawipaw nynh Faro kha a lungkhungsah zah Israel ccungccaw hae kha a ram kyate cciasah lae khyh hae. Kawtaw Poi¹Bawipaw nynh Moses te Aaron kha Izip ram kya hynhte a hopya hae:²“Atu sawpaw hynh nae hanlan sawpaw he athonaw a thua cih; nanning hanlan kum kheit lungkhu ze sawpaw masaty a thua cih.³Nanning nynh Israel zapi hae kha hynhte na hopah cih oh: Atu saw nin hawnaw nin kya innbyn raveih hanlan innbyn byn kheit nynh tuutaw sa kheit cci kha na paccynkuh cih oh.⁴Tuutaw sa kheit a pyn balyn kha a ae cih paw innbyn kya-e ccungccaw tuh eih azya lanze, anaekuh huapaw innbyn ryte na mungkuh cih oh zah, a ae lanpaw milu thyhte tuutaw kha na neekuh cih oh.⁵Nae tuutaw tuh douccahpaw a thua cih zah kum kheit beih vae paw pise a thua cih; tuu zemah thuasah, miaa zemah thuasah na paccyn kho oh.⁶Tuh-e tuutaw tuh atu sawpaw nin haw lae pali nin cia na nung cih oh; oute tuh-e nin zetesang kyakhe Israel ccungccaw balyn nynh tuh-e tuutaw tuh na theih cih oh.⁷Tuutaw chii abang kha na lah cih oh zah, tuh-e tuutaw saw na ae cihnaw oh inn thuakawtung tungning kya te avawlan e thuakawccaw kyakhe na noi cih oh.⁸Tuh-e nin khuazi khe saw kha maee te na e cih oh zah ransi phing leipaw sanlou te akhahpaw anaw-athae ryte na aede cih oh.⁹Saw kha ahe te thuasah, tui te thungte thuasah na ae lan khyh oh, thuasalama alu, accu hae, alungkhu e aring-akua hae balyn ryte maee kya na e cih oh zah na ae cih oh.¹⁰Alaepaw kha awkhua cia na nung lan khyh oh; alaepaw tuh awkhua cia a um ze, maee te na u cih oh.¹¹Khah-e kha pawtemou na ae cih oh ci lanze: nae taevoiboei kha na voikuh cih oh, nae phanah kha na nawkuh cih oh zah nae hoitang kha na kyng cih oh; te arangte na ae cih oh. Tuh-e tuh Bawipaw kya-e kawtaw poi nynh thua.¹²Pawccecize tuh-e khuazi khe Izip ram balyn phe lekuh lan ka cceih cih zah Izip ram umpaw ccungccaw ccatawccaw miakaw te sarangpaw thanty miakaw kha ka theih cih hae; Izip ram e pachia hae kha bya ka pia cih hae; kae tuh Bawipaw nynh ka thua.¹³Chiise tuh na umnaw oh inn kya nae hanlan syntawnaw athua cih; chiise kha he ka muih tetuh nanning kha kae kawtaw cih oh zah Izip ram kha de he ka tah te, shethya nynh nanning kha ae roh lan khyh oh.

¹⁴“E nin hynh nae hanlan liathuipaw nin a thua cih zah Bawipaw kalan beiknaw poi lante nae she takyh kya zungzae tynpaw phungzae lang na zui cih oh.¹⁵Nin sari lungkhu ransi phing leipaw sanlou kha na ae cih oh; masaty nin kya ransi kha nae inn kyate ccanglang na nung cih oh, pawccecize humhung zemah masaty nin kyate nin sarinaw nin kyacia ransi phingkuhpaw sanlou a aepaw tuh Israel phin kyate vua a thua cih.¹⁶Masaty nin te nin sarinaw nin kyakhe athyaapaw pumkunaw kha na rae cih oh; tuh-e nin hae kya rya na lah lan khyh oh; na ae lan oh paw looh hanlan rou kha rya na lah cih oh.¹⁷ransi phing leipaw sanlou poi kha na tua cih oh, pawccecize hynh-e nin ccaccei khe nanning kha aphuphute Izip ram kyate kae poukhae oh; tukeiccuze hynh-e nin hynh nae she takyh kya zungzae tynpaw phungzae lante na zui cih oh.¹⁸Masaty sawpaw kya, nin haw lae palinaw nin zete kyate nin kuin lae kheitnaw nin zete kyacia ransi phing leipaw sanlou kha na ae cih oh.¹⁹Nin sari lungkhu nae inn kya ransi um lan khyh; humhung zemah ransi phingpaw sanlou a aepaw tuh ramccangpaw thuasah, ram kya-e ccungccaw thuasah, Israel phin aphu kyate vua a thua cih.²⁰Ransi phingpaw sanlou kha na ae lan khyh oh; na umnaw oh kya ransi phing leipaw sanlou kha na ae cih oh,” a cipya hae.

²¹Oute Moses nynh Israel piccan balyn kha ko hae zah, “La cceih oh lah nae innbyn raveih hanlan tuutaw kha pokuh oh lah kawtaw poi hanlan theih oh.²²Hyssop ku ange ngekheit kha lah oh lah pakepi kya umpaw chii kyakhe dung oh, te pakepi kya umpaw chii khate thuakawtung tungning te thuakawccaw kha noi oh. Awkhua cia nae inn thuakaw atolang na pou lan khyh oh.²³Pawccecize Bawipaw tuh Izip hae kha detah khylan phe lekuh lan yn cceih cih; aning nynh thuakawtung tungning te thuakawccaw kya anoikuhpaw chiise kha he a muih tuh, Bawipaw nynh khah-e thuakaw kha a kawtaw cih zah nanning chia khylan nae inn lungkhu lang rohtu hae tee lanpaw kha kaw-ua lan khyh.²⁴Naemaw te nae ccaaw hae nynh e phung hynh zungzae tynpaw phungzae lante na zui cih oh.²⁵Bawipaw nynh bya ae kinpyaku oh hawte ae pya cih oh paw ram kya he na thua oh te, e naawpawphung hynh na tynsah cih oh.²⁶Te nae ccaaw hae nynh, ‘E naawpawphung asuilan tuh pawmou athua?’ cite ae khia oh ze,²⁷nanning nynh, ‘Bawipaw kalan pyapaw kawtaw silawnaw nynh thua, pawccecize Bawipaw nynh aening inn kha luesah zah Izip hae kha de he a tah hae tuh, Izip ram umpaw Israel hae inn kha phe a kawtaw,’ cite na hopah cih oh,” a cipya hae. Te ccungccaw hae nynh bakhung hae zah a beik hae.²⁸Bawipaw nynh Moses te Aaron kalan kawpya hae thyhte Israel hae nynh cceih hae zah a cyi hae. Vaehawnaw Shethya: Ccatawccaw Chinaw

²⁹Ziraccyng khe Bawipaw nynh Izip ram e ccatawccaw balyn kha a chia hae, bawi haungnaw kya a haungpaw Faro a ccatawccaw kyate tho zah thong lungkhu umpaw thongccahpaw a ccatawccaw kyacia a chia hae, te sahiin-awvaw kyaze thanty balyn kha a chia hae.³⁰Faro te a ryalahtu bawi hae balyn te Izip hae balyn tuh khuazi khe a tho hae; Izip ram kya rawkhuinaw te phe a beih, pawccecize michi a um leinaw inn innkheit sanmah um khyh.³¹Oute Faro nynh Moses te Aaron kha khuazi khe ko hae zah, “Naemaw te Israel hae tuh thokuh oh lah ka ccungccaw hae kyate cceih oh. Na ho oh hawte cceih oh lah Bawipaw kha la beik oh.³²Na ho oh hawte nae tuu, nae miaa te nae vaetua hae kha cciakhae oh lah pou oh. Te kamaw hynh mah hythuanaw yn pya oh!” a cipya hae.

³³Izip hae nynh, “Kae balynte pong kae chih vae cih,” ci hae zah ram kyate arangte a pou nawlan hae, Israel hae kha a ngia hae.³⁴Tukeiccuze Israel hae nynh ransi phingkuh leipaw vaekhui kha lah hae zah mih uccaw te a tung hae paw sanlou nonnawpaw pake ryte mih raw kya a puih hae.³⁵Moses nynh a hopya hae thyhte Israel hae nynh Izip hae kha sui uccaw, ngun uccaw te boeiningsungpue kha a ngia hae.³⁶Israel hae nynh a ngia hae paw kha Izip hae nynh a pya nawlan hae, Bawipaw nynh Israel hae kha Izip hae mitmuihnaw kya maehoynaw a pya hae. Tuhcite Israel hae nynh Izip hae uccaw kha a luade hae. Izip Ram kyate Israel hae Pounaw

³⁷Israel hae tuh Rameses khua kyate Sukkoth lang cceih hae zah nopi te imua holeite pise milu thung za taruh loukaw acih hae.³⁸Ccangpaw ccungccaw zapi hae mah sahiin-awvaw hae tuu, miaa te vaetua hae patae ryte a cceihbua hae.³⁹Minmin nynh Izip ram kyate a poukhae hae paw ransi phing leipaw sanlou kha maee kya a rua hae; minmin kha Izip ram kyate arangte a dee hae keiccuze ransi kha phing vae khyh hae, mimaw hanlan looh kha paccynkuh mang vae khyh hae.⁴⁰Israel hae tuh Izip ram kya kum za pali sung thum a um hae.⁴¹Kum za pali sung thum he accing nin ccaccei khe Bawipaw ccungccaw balyn tuh Izip ram kyate a pou hae.⁴²Tuh-e khuazi tuh Bawipaw nynh minmin kha Izip ram kyate poukhae khylan phang a ngaw hae paw khuazi nynh thua; tukeiccuze tuh-e khuazi tuh Israel hae nynh mih she takyh kya Bawipaw hanlan leih a ngaw hae paw khuazi nynh thua. Kawtaw Poi Tuanaw Phung

⁴³Bawipaw nynh Moses te Aaron kha hopah hae zah, “Kawtaw poi tuanaw phungzae tuh hynhte athua cih: Ramccang ccungccaw nynh kawtaw poi kya ae bua lan khyh,⁴⁴thuasalama repaw see tuh vingdungaw a thua koute a ae cih;⁴⁵sohsoh um buapaw nynh thuasah, amee te hohpaw ryalahtu nynh thuasah ae lan khyh.⁴⁶Saw sa kheit kha inn innkheit kya ae athua cih; saw kha ccapyh sanmah inn atolang na poukhae lan khyh oh, aru ccangkheit sanmah na khya lan khyh oh.⁴⁷Israel ccungccaw zapi balyn nynh e poi hynh a tua hahe cih hae.⁴⁸Nae kya um buapaw ramccang ccungccaw lukhakheit nynh Bawipaw hanlan kawtaw poi kha tua bua a ry zetuh amaw kya umpaw pise balyn kha vingdungaw a thua cih hae; tukoute tuh poi kya a umbua kho vae cih; amaw kha ramccungccaw lu kheit lante riabua athua vae cih. Thuasalama vingdungaw a thua leipaw nynh tuh-e poi kya ae lan khyh.⁴⁹Israel ccungccaw hanlan thuasah, naemaw kya um buapaw ramccang ccungccaw hanlan thuasah hynh-e upadi ccangkheit kyalya a um cih,” a cipya hae.

⁵⁰Bawipaw nynh Moses te Aaron kalan kawpya hae thyhte Israel hae balyn nynh a cyi hae.⁵¹Tuh-e nin ccaccei khe Bawipaw nynh Israel hae kha Izip ram kyate aphuphute a cciakhae hae.¹Bawipaw nynh Moses kha,²“Ccatawccaw te thanty balyn kha kamaw hanlan na thyaasah cih oh; Israel hae kyaze masaty a puipaw ccungccaw thuasah, masaty a thanpaw sahiin-awvaw thuasah kamaw uccaw nynh thua,” a cipya. Ransi Phing leipaw Sanlou Poi

³Moses nynh ccungccaw hae kha, “See lang na tangnaw oh inn kyate thuasah, Izip ram kyate thuasah na pou nin oh, hynh-e nin hynh ning nan oh, pawccecize Bawipaw nynh athawsaepaw kuih te Izip ram kyate ae poukhae oh; ransi phingkuhpaw sanlou kha na ae lan khyh oh.⁴Abib sawpaw lungkhu atunin kya na pou cih oh.⁵Nanning kha kae pya cih oh cite nae minpaaw hae kya bya a kinpyaku hae paw ram, mateitui te khoilutui a luanaw ram, Kanaan hae, Hit hae, Amor hae, Hiv hae te Jabus hae nynh a umnaw hae ram lungkhu lang Bawipaw nynh he ae teekhae oh te, e sawpaw kya hynh-e naawpawphung hynh na zui cih oh.⁶Nin sari lungkhu ransi phing leipaw sanlou kha na ae cih oh, te nin sarinaw nin kya Bawipaw hanlan poi na tua cih oh.⁷Ransi phing leipaw sanlou kha nin sari lungkhu na ae cih oh; ransi phingkuhpaw sanlou kha na hoi oh paw uccaw kya na nung lan khyh oh zah ransi kha na umnaw oh kya balyn naemaw kya na nung lan khyh oh.⁸‘Izip ram kyate la pou lyaze Bawipaw nynh kamaw hanlan yn la cyipya keiccu nynh hynhte ah cyi oh,’ cite khah-e nin khe na ccaaw kha na hopah cih.⁹Bawipaw kya-e ccangpyanaw kha na mung kya atyn nawlan hynh-e hynh na kuih kya na khiikupaw muihsahnaw hawte thuasah, na terui kya na heedekupaw nysakunawpaw hawte thuasah a thua cih; pawccecize athawsaepaw kuih te Bawipaw nynh nang kha Izip ram kyate ae poukhae vae.¹⁰Tukeiccuze e phungzae hynh kum takyh, amaw accyh takyh kya na zui cih. Ccatawccaw

¹¹“Bawipaw nynh nang te na minpaaw hae kya bya a kinku thyhte nang kha Kanaan ram lungkhu lang ae thuakhae zah khah-e ram kha he ae pya te,¹²na ccatawccaw pise balyn kha Bawipaw kalan na pya cih. Na sahiin kyaze thanty pise balyn tuh Bawipaw kya-e a thua cih.¹³Thuasalama masaty a thanpaw lann taw kha tuh tuutaw te na shawkhaw cih; na shaw ry khyh ze a nging kha na khya cih. Nae ccatawccaw pise miakaw kha na shawkhaw cih.¹⁴Malang ccyh kya na ccaaw hae nynh, ‘E hynh asuilan pawmou athua?’ cite ae khia hae ze nang nynh, ‘Bawipaw nynh athawsaepaw kuih te Izip ram seetangnaw kyate aening kha oun pousah.¹⁵Faro nynh a lungkhung zah aening kha cciasah lan he a ei tuh, Bawipaw nynh Izip ram e ccatawccaw balyn te sahiin thanty balyn kha pong a chia. Tukeiccuze thanty pise miakaw khate Bawipaw kha si ka law, thuasalama ka ccatawccaw pise miakaw kha ka shaw,’ cite na hopah cih hae.¹⁶Tuh-e phungzae tuh na kuih kya na khiikupaw muihsahnaw hawte thuasah, na terui kya na heedekupaw nysaku nawpaw hawte thuasah athua cih; pawccecize athawsaepaw kuih te Bawipaw nynh aening kha Izip ram kyate oun poukhae vae,” a ci. Maeking Tung te Maee Tung

¹⁷Faro nynh Israel hae kha he a cciasah hae tuh, Pachia nynh minmin kha anae huanaw Filistia ram lang a cceihpaw laanpi kyate cciakhae khyh hae; pawccecize, “Minmin nynh rhawtuk kha a tung hae ze mih thinlung a paleihkuh cih zah Izip ram lang a kisei cih hae,” cite Pachia nynh a tua.¹⁸Tukeiccuze Pachia nynh minmin kha laesia ram e avoikuhpaw laanpi khate Rili Se langkhe a cciakhae hae. Israel hae tuh rhawtukkunaw hanlan paccynkute Izip ram kyate a cceih hae.¹⁹Josef nynh Israel hae kha tynkaring lan byakinsakuh hae zah, “Pachia nynh nanning kha ae bawm ccaccing cih oh, e hmin kyate ka ru kha nae la cciakhae hahe cih oh,” cite a la hopya hae thyhte Moses nynh Josef a ru kha a cciakhae.²⁰Minmin nynh Sukkoth khua kyate pou hae zah laesia ram pe umpaw Etham khua kya a rya hae.²¹Minmin nynh khuazi khuadae a ccia kho ccaw hae cite, Bawipaw nynh minmin kha cciakhae khylan khuadae ccyh kyaze maeking tung te thuasah, khuazi ccyh kyaze minmin kha awnaw pya khylan maee tung te thuasah mih malang khate a cciakhae hae.²²Khuadae ccyh kya maeking tung tuh thuasah, khuazi ccyh kya maee tung tuh thuasah Israel hae malang kyate zo khyh. Rili Se A Zua hae¹Bawipaw nynh Moses kha,²“Israel hae kha nulang ki oh lah Pi-hahiroth malang, Migdol khua te rili laku, Baal-zefon khua te arawsekunaw malang, rili kin khe rya oh cite hopah hae.³Faro nynh, ‘Israel hae tuh ram lungkhu kya eenaw hoi leite a khiavuikuh vae hae; laesia ram nynh minmin kha phe a koihlu vae,’ cite a ho cih.⁴Faro te a rhawkaw hae balyn kya phu-enaw ka mue nawlan Faro thinlung kha ka khungsah cih zah Israel hae kha aning nynh a deehui cih hae, kae tuh Bawipaw nynh ka thua cipaw kha Izip hae nynh yn nyh cih hae,” a cipya. Te Israel hae nynh tuhcite a cyi hae.⁵Ccungccaw hae phe ccue vae hae cipaw kha Izip siapharan kya he a hopah hae tuh, Faro te a ryalahtu bawi hae thinlung tuh phe paleihkuh zah, “Israel hae kha ah ryalaw kyate pawcce ah la cciasah oh?” a ciku hae.⁶Tukeiccuze Faro nynh a marangle kha paccyn zah a rhawkaw hae kha a ko hae;⁷a popaw marangle za taruh te Izip ram e ccangpaw marangle hae balyn kha marangle a uktu lang bawi lu kheit cci ryte a ko hae.⁸Bawipaw nynh Izip siapharan Faro kha a lungkhung sah zah rawhoyte a pou hae paw Israel hae kha a deehui hae.⁹Izip hae, Faro marang hae balyn, marangle hae, a marangle a mawngtu hae te a rhawkaw hae nynh deehui hae zah rili kin a ryanaw hae Pi-hahiroth khua pe Baal-zefon khua malang khe a phya hae.¹⁰Faro nynh houhouh yn naekuh lyakhe Israel hae nynh he do hae tuh, Izip hae nynh oun naangku hae paw kha a muih hae. Israel hae tuh myarya rih hae zah Bawipaw kalan a sia vae hae.¹¹Minmin nynh Moses kha, “Izip ram kya shawku a um khyh keiccu tou laesia ram kya chi khylan nae cciakhae? Pawcce kae tungvaw hynhte na cyih zah Izip ram kyate nae poukhae?¹²‘Kaening hynh oun cciataw, Izip hae see lang kae la tang sah,’ cite Izip ram kya kae hopyapaw kha hynh-e hynh thua khyh tou? Ramkaw kya chi laeze Izip ram kya see lang tangpaw tuh kaening hanlan ahoyhua,” a ci hae.¹³Thuasalama Moses nynh ccungccaw hae kha, “Nae thinphang nan sah, tynkaring lan thadyn oh lah Bawipaw nynh nae hanlan atunin a raepaw khumnaw kha dotua oh. Atunin na muih oh paw Izip hae kha na muih boi vae lan khyh oh.¹⁴Bawipaw nynh nae hanlan rhaw ae tukpah cih oh; nanning nynh daebabi lan na um cih oh,” a cipya hae.¹⁵Oute Bawipaw nynh Moses kha, “Pawcce kamaw kalan na sia? Israel hae kha malang ccia lan hopah hae.¹⁶Na hoitang kha hang lah rili vawlan khe na kuih kha dyng lah rili kha thoh phiatua. Israel hae nynh rili lungkhu aroupaw laelung vawlan khe a cceih cih hae.¹⁷Izip hae kha mih lung ka khungsah cih hae zah Israel hae kha a dee cih hae; te Faro te a rhawkaw hae balyn, a marangle hae te a marangle a mawngtu hae liate phu-enaw ka mue cih.¹⁸Faro te a rhawkaw hae balyn, a marangle hae te a marangle a mawngtu hae liate phu-enaw he ka mue tuh, Izip hae nynh kae tuh Bawipaw nynh ka thua cipaw yn nyh vae cih hae,” a cipya.¹⁹Israel rhawkaw hae malang a cceihpaw Pachia vaawpaw tuh nuekuh zah mih nulang khate a zuikuh; maeking tung tuh mih malang te nuekuh zah mih nulang khe a thadyn.²⁰Maeking tung tuh Israel rhawkaw te Izip rhawkaw hae laku khe a um. Tuh-e maeking nynh Izip hae kyakhe mohsah zah Israel hae kyakhe khuazi ccyh kya a awsah; tukeiccuze khuazi zidae phu kheit te phu kheit naekuh kho khyh hae.²¹Oute Moses nynh a kuih kha rili vawlan a dyng. Bawipaw nynh athawsaepaw nithua lang e khisan khate rili kha khuazi zidae mungsah zah rili tui tuh phiakuh zah aroupaw laephi lang a tang vae.²²Israel hae tuh rili lungkhu aroupaw laephi kyakhe a cceih hae, tui tuh mih ranglang te mih voilang khe pang hawte a thungkuh.²³Izip hae, Faro a marang hae balyn, marangle hae te marangle a mawngtu hae nynh Israel hae nulang khate rili lungkhu khe a dee hae.²⁴Bawipaw nynh khuadae dyn khe maee te maeking tung kyate Izip rhawkaw hae kha dobung hae zah a siisaku hae.²⁵Bawipaw nynh mih marangle a ccu hae kha miaku aru ccaw cite phang a tawsah hae. Izip hae nynh, “Israel hae kyate ccue ccavae oh sih, pawccecize Bawipaw nynh minmin hanlan aening kha oun tuk vae,” a ciku hae.²⁶Oute Bawipaw nynh Moses kha, “Izip hae, mih marangle hae te marangle a mawngtu hae kha tui nynh a luathin ccaw hae, na kuih kha rili luki lang dyngtua,” a cipya.²⁷Tukeiccuze Moses nynh a kuih kha rili luki lang a dyng, te khuadaetakaw khe rili tuh amaw mamin hawte bua yn tungkuh. Izip hae nynh a ccue lya hae khe Bawipaw nynh minmin kha rili lungkhu lang pong a phung hae.²⁸Rili lungkhu lang Israel hae a deehui hae paw Faro rhawkaw hae balyn, marangle hae te marangle a mawngtu hae kha tui nynh bua yn tungkuh ki zah pong a vu hae; lu kheit sanmah lue khyh hae.²⁹Thuasalama Israel hae tuh aroupaw laephi vawlan cciate rili kha zua hae zah tui tuh mih ranglang te mih voilang khe pang hawte phang a thungkuh.³⁰Tuh-e nin khe Bawipaw nynh Israel hae kha Izip hae kuih kyate a khum hae; te rili kin kya a chih hae paw Izip hae kha Israel hae nynh a muih hae.³¹Bawipaw nynh Izip hae kha rawsete ryalaw lepaw a lawpaw kha Israel hae nynh a muih hae. Tukeiccuze ccungccaw hae nynh Bawipaw kha rih hae zah Bawipaw tungvaw te a ryalahtu Moses tungvaw zynnaw a hoi hae. Moses Hlaw

¹Oute Moses te Israel hae nynh Bawipaw kha hynh-e hlaw a sahpya hae:Bawipaw hanlan hlaw ka sah cih,pawccecize Bawipaw nynhphu-enaw te a tae vae; marang hae tea ccikuhtu hae kha rili lungkhu langphe a vua vae hae.²Bawipaw tuh ka thawzung teka cyi khonaw thua zahyn khumtu nynh thua;amaw tuh ka Pachia thua zahthe ka hoysah cih, ka minpaaw haePachia thua zah ka hangthung cih.³Bawipaw tuh rhawkaw nynh thua,a min tuh Bawipaw nynh thua.⁴Faro a marangle hae tea rhawkaw hae kharili lungkhu lang a vua hae;Faro nynh a po hae paw ryalahtubawi hae kha Rili Se kya a phung hae.⁵Akhupaw rili nynh minmin khaphe a vu hae; akhunaw langkhelung hawte a ccah hae.⁶Pou Bawipaw , na ranglang kuih tuhhuhan liate phu-enaw a um.Pou Bawipaw , na ranglang kuih nynhrhaw hae kha phe a sakhia hae.⁷Nang ae rawse hae paw khaalepaw na lesaenaw khatena khulia hae;na thinrianaw kha na langsakuh zahminmin kha maee nynhathupaw hawte a u hae.⁸Na naduh kyate apoupawkhisan khate tui khana sueluasakuh zahaluapaw tui kha pang hawtena thungsaku; rili ngaelung kyaakhupaw tui tuh tangkarae lan a um.⁹Rhaw nynh, ‘Ka deehui cih hae,ka phah cih hae, minmin kya-eluapaw uccaw kha neeku lan zahka rypaw kha ka lawkuh cih.Ka thaloi kha ka thuaa cih zahka kuih te minmin khaka roh cih hae,’ a ci.¹⁰Na khisan kha na zawsah zahrili nynh minmin kha pong a vu hae;minmin tuh athawsaepawtui lungkhu khe kue hawte a ccah hae.¹¹“Pou Bawipaw , pachia hae lakuzenang ae lopaw hummou a um?Nang hawte thyaanaw kyahuhan a hoipaw, lesaenaw kyari lan umpaw, ngaeang lan umpawuccaw a rae khopaw hummou a um?¹²Na ranglang kuih kha na dyng zahlaephi nynh minmin kha phe a laang hae.¹³Na shawkhaw hae pawccungccaw hae kha atynpawna sungsahnaw te na cciakhae hae;minmin kha na thawzung teathyaapaw na umnaw langkhena cciakhae hae.¹⁴Minphuin hae nynh thae hae zaha thyngkuh hae; thinphangnaw nynhFilistia ram um hae paw khaa thuanua hae.¹⁵Oute Edom lupi hae tuhmih thin a phang;Moab cciakhaetu hae tuha thyngku cih hae;Kanaan hae balyn tuh mih lung a roh.¹⁶Rinaw te thinphangnaw nynhmih tungvaw a thuanua hae;Pou Bawipaw ,na ccungccaw hae nynhpo a ccia makhia hae,na shawkhawpaw ccungccaw hae nynhpo a ccia makhia hae,athawsaepaw na kuih liate minmin tuhlung hawte daebabi lan a um hae.¹⁷Pou Bawipaw , na hoipaw mua vawlan,na um nawlan na raepaw hmin kalan khena ccungccaw hae kha na teekhae hae;Pou Bawipaw , na kuih tena tynsahpaw beikinnthyaa kyakhena nung cih hae.¹⁸Bawipaw nynh zungzae tezungzae cia a uk cih,” a ci hae.Miriam Hlaw

¹⁹Faro marang hae, a marangle hae, a marangle mawngtu hae tuh rili lungkhu lang tee hae zah Bawipaw nynh rili tui kha minmin vawlan khe tungsakuh zah a luathin hae; thuasalama Israel hae tuh aroupaw laephi vawlan cceih hae zah rili kha a zua hae.²⁰Oute Aaron ccianung, profehnung Miriam nynh tyng kha a lawku, te nopi balyn nynh tyng kha khuakute law hae zah Miriam kha a zui hae.²¹Miriam nynh hlawsakhae hae zah,“Bawipaw nynh phu-enaw tea tae vae keiccuze Bawipaw kalanhlawsah oh; marang hae tea ccikuh hae paw kharili lungkhu langpong a phung vae hae,” a ci.Akhahpaw Tui

²²Oute Moses nynh Israel hae kha Rili Se kyate pou lan kawpya hae zah Shur laesia ram khe a tee hae. Tuh-e laesia ram kya nin thum cceih hae zah tui muih khyh hae.²³Marah kya thua hae zah Marah tui tuh a khya keiccuze neih kho khyh hae. Tukeiccuze tuh-e hmin tuh Marah cite a ko hae.²⁴Ccungccaw hae nynh Moses kha, “Pawmou kae neih cih?” cite a ccohnuaku hae.²⁵Moses nynh Bawipaw kalan sia zah Bawipaw nynh thing ccangkheit a muihsah; Moses nynh tuh-e thing kha tui lungkhu lang phung zah tui tuh khah vae khyh.
Tuin kyakhe Bawipaw nynh zui lanpaw phungbya te phungzae kha minmin hanlan raepah hae zah syntawtua nawlan a nungpya hae.²⁶Bawipaw nynh, “Bawipaw nae Pachia bya kha hoyte na ngae oh zah amaw malang ahmepaw kha na cyi oh ze thuasah, a kawbya hae te a upadi balyn kha na zui oh ze thuasah, Izip hae kya ka thuasahpaw ccinaw kha nanning tungvaw ka thuasah lan khyh; pawccecize kae tuh ae dansah oh paw Bawipaw nynh ka thua,” a ci.²⁷Oute minmin nynh tuidy haw lae ning te ungcci ku sung sari a umnaw Elim kya thua hae zah tuin kya tui pe khe a rya hae. Vaawlang te Vamyng¹Israel zapi balyn tuh Elim kyate a cceih hae; minmin nynh Izip ram kyate he a pou hae te, sawpaw sah ningnaw , nin haw lae pangawnaw nin khe Elim te Sinai mua laku umpaw Sin laesia ram khe a thua hae.²Laesia ram kyakhe Israel zapi balyn nynh Moses te Aaron kha ccohnuakuh hae zah,³“Bawipaw kuih te Izip ram kya kae chi ze ahoyhua. Izip ram kya tuh saw thungnawpaw ang pe khe kae haung zah looh phe byn lan kae ae; pawccecize hynhzeih zapi balyn hynh haedang te chia khylan laesia ram lang nae cciakhae,” a ci hae.⁴Oute Bawipaw nynh Moses kha, “Nanning hanlan vaawlang te sanlou kha khuaa lang ka raw sah cih, ccungccaw hae nynh nin takyh a pounua cih hae zah tuh-e nin hanlan phe zaw lan a khuinkuh cih hae. Minmin nynh ka ccangpya hae paw kha a zui hae tou, zui khyh hae tou cipaw tuhcite ka syntawtua cih hae.⁵Nin taruhnaw nin khe tuh ccangpaw nin hae kya a khuingku hae paw laeze leit ning alunghua lante a khuing cih hae zah a paccyn cih hae,” a cipya.⁶Tukeiccuze Moses te Aaron nynh Israel hae balyn kha, “Zete ccyh khe nanning kha Izip ram kyate ae poukhae oh paw tuh Bawipaw nynh thua cipaw kha nae nyh cih oh,⁷Bawipaw rawsete na ccohku oh paw kha phe a thae vae keiccuze awkhua ccyh kya Bawipaw phu-enaw kha nae muih cih oh. Kaening tungvaw rawsete ccohnuaku lan ciate kaening tuh pawmou kae thua?” a cipya hae.⁸Te Moses nynh, “Zete ccyh kya na ae lan oh paw saw kha Bawipaw nynh ae pya oh zah awkhua ccyh kya sanlou phe na byn lan oh, ae pya oh paw kha nae muih cih oh, pawccecize Bawipaw tungvaw rawsete na ccohkuh oh paw kha phe a thae vae. Kaening tuh pawmou kae thua? Na ccohkuh oh paw tuh kaening nae rawse oh paw thua khyh, Bawipaw kha na rawse oh paw nynh thua,” a ci.⁹Oute Moses nynh Aaron kha, “Israel zapi balyn kyakhe, ‘Bawipaw kalan oun naekuh oh, pawccecize na ccohku oh paw kha phe a thae vae,’ cite hopah hae,” a cipya.¹⁰Te Aaron nynh Israel zapi balyn kha a hopya lya hae khe, minmin nynh laesia ram lang do hae zah Bawipaw phu-enaw tuh maeking kya a langkupaw kha a muih hae.¹¹Bawipaw nynh Moses kha,¹²“Israel hae nynh a ccohku hae paw kha phe ka thae vae; tukeiccuze ‘Zete khuanin ccaw dyn khe saw kha na ae cih oh zah awkhua ccyh kya sanlou kha phe byn lan na ae cih oh; oute kae tuh Bawipaw nae Pachia nynh ka thua cipaw kha nae nyh cih oh,’ cite hopah hae,” a cipya.¹³Zete ccyh khe vamyng hae nynh oun kaethung hae zah ryahmin kya phe a beih hae; awkhua ccyh kyakhe ryahmin pepan kya dangtui accah.¹⁴Dangtui nynh he akhuhthung tuh laesia ram laephi vawlan khe pahsadya lante aphepaw vuiraw kha a um hae, laephi vawlan khe vuiraw alungkuhpaw hawte a um hae.¹⁵Israel hae nynh tuh-e tuh he a muih hae tuh, pawmou athua cipaw nyh khyh hae zah lu kheit te lu kheit kha, “E hynh pawmou athua?” cite a hoku hae. Moses nynh minmin kha, “Bawipaw nynh ae lan ae pya oh paw sanlou nynh thua.¹⁶‘Nae bu kya umpaw ccungccaw balyn hanlan milu thyhte, lu kheit ze omer ccangkheit ciate na khuinkuh cih oh,’ cite Bawipaw nynh kaw yn pya,” a cipya hae.¹⁷Israel hae nynh tuhcite a cyi hae, ccungccaw abang nynh alunghua khuing hae zah abang nynh azyahua a khuing hae.¹⁸Thuasalama omer ccangkheit te he a tou hae tuh, alunghua a khuing hae paw tuh patae hoilae khyh hae zah azyahua a khuing hae paw mah zyahua lae khyh hae; lu kheit cci hanlan aho zeihte a khuingku hae.¹⁹Te Moses nynh, “Humhung nynh mah awkhua cia na laesah lan khyh oh,” a cipya hae.²⁰Thuasalama abang nynh Moses bya kha ngae leite awkhua cia a nung hae keiccuze zanpaw lan tang zah phe aroh. Moses tuh minmin tungvaw a thinria.²¹Mimaw raveih hanlan aho zeihte awkhua takyh a khuingku hae; khuanin he so tuh phe a tui.²²Nin taruhnaw nin khe looh tuh leit ning alung lante lu kheit ze omer ccangning cci a khuingku hae. Zapi kya-e piccan balyn nynh oun cceih hae zah Moses kha he hopah hae tuh,²³Moses nynh minmin kha, “ ‘Awkhualan tuh daebabi lan haeung nin, Bawipaw hanlan athyaapaw sabbath nynh thua; na ry oh paw sanlou kha ruakuh oh lah, na ry oh paw ang kha hyngkuh oh; alaepaw balyn kha ccy oh lah awkhua cia nung oh,’ cite Bawipaw nynh kaw oun pya,” a cipya hae.²⁴Moses nynh kawpya hae thyhte awkhua cia ccy hae zah thuh khyh, alungkhu kya zanpaw mah kae khyh.²⁵Moses nynh, “Atunin khah-e kha ae oh, pawccecize atunin tuh Bawipaw hanlan sabbath nynh thua; atunin khah-e kha ramkaw kya na muih lan khyh oh.²⁶Nin taruh lungkhu khah-e kha na khuing cih oh; thuasalama nin sarinaw nin, lonawnin kya pawpaw mah um lan khyh,” a ci.²⁷Nin sarinaw nin khe ccungccaw abang nynh khuing khylan pou hae zah pawpaw mah muih khyh hae.²⁸Bawipaw nynh Moses kha, “Hohseciamou ka kawbya te ka ccangpyanaw kha zui ry leite na eiung cih oh?²⁹Ngaetua oh! Bawipaw nynh sabbath kha ae pya vae oh, tukeiccuze nin taruhnaw nin kya looh kha nin ning hanlan ae pya oh; nae umnaw raveih khe na um cih oh; nin sarinaw nin kya nae umnaw kyate na pou lan khyh oh,” a cipya hae.³⁰Tukeiccuze ccungccaw hae tuh nin sarinaw nin khe a haeung hae.³¹Israel hae nynh tuh-e looh kha manna cite min a phu hae; manna tuh koriander amung te lokuh zah araw, khoilutui te raepaw sanlou hawte athua.³²Moses nynh minmin kha, “ ‘Izip ram kyate kae poukhae lya oh ze, laesia ram kya kae dang oh paw looh kha nae she takyh kya-e ccaawno hae nynh a muih ccaw hae cite omer ccangkheit kha ccy oh,’ cite Bawipaw nynh kaw oun pya,” a cipya hae.³³Moses nynh Aaron kha, “Daw-ang ccangkheit lah lah, a lungkhu khe manna kha omer ccangkheit khate sangtua, nae she takyh kya ccy a thua nawlan, khah-e daw-ang kha Bawipaw malang nungtua,” a cipya.³⁴Bawipaw nynh Moses kha kawpya thyhte khyndadyh lan a um ccaw cite Aaron nynh tuh-e manna kha byakin thingkua malang khe a nung.³⁵Israel hae nynh ccungccaw umnaw ram kya a thua mawlaezung hae, kum sung pali lungkhu manna kha a ae hae; Kanaan ram ramri a thua mawlaezung hae tuh, manna kha a ae hae.³⁶Omer ccangkheit tuh ephah pumhaw pumkheit nynh thua. Lungpi kyate Tui Pou (Nam 20.1-13)

¹Israel zapi balyn tuh Bawipaw nynh kawpya hae thyhte Sin laesia ram kyate pou hae zah san kheit koute san kheit a cceih hae. Refidim kyakhe a rya hae, thuasalama ccungccaw hae hanlan nia lanpaw tui um khyh.²Tukeiccuze ccungccaw hae nynh Moses kha pe hae zah, “Nia lanpaw tui oun pya,” a ci hae. Moses nynh, “Pawcce kae kha nae pe oh? Pawcce Bawipaw kha na syntaw oh?” a cipya hae.³Thuasalama ccungccaw hae tuh mih tui eih haw zah Moses kha rawsete ccohku hae zah, “Kaemaw, kae ccaaw hae te sahiin hae kha tui kanmawte chia khylan Izip ram kyate pawcce nae poukhae?” a ci hae.⁴Tukeiccuze Moses nynh Bawipaw kalan, “E ccungccaw hae hynh pawtemou ka cyih cih hae? Kamaw kha lung te vyavya yn deih vae hae,” cite a sia.⁵Bawipaw nynh Moses kha, “Ccungccaw hae malang cceih lah Israel piccan hae abang kha ko hae; Nal vaw na buanawpaw hoitang kha na kuih kya ccyngkuh lah la cceih.⁶Horeb mua kya umpaw lungpi vawlan, na malang khe ka thadyn cih. Lungpi kha buatua. Tuh-e lungpi kyate ccungccaw hae nynh a nia lan hae paw tui kha a pou cih,” a ci. Moses nynh Israel piccan hae malang khe tuhcite a cyi.⁷Israel hae nynh, “Bawipaw hynh aening laku a um tou, um khyh tou?” cite Bawipaw kha syntawtua hae zah a pe hae keiccuze tuh-e hmin kha Massah te Meribah cite min a phu hae. Amalek hae te Rhawtukkunaw

⁸Oute Amalek hae nynh oun cceih hae zah Israel hae kha Refidim kyakhe rhaw a tuk hae.⁹Moses nynh Joshua kha, “Pise abang kha aening elang po lah Amalek hae kha tuk khylan pou oh. Awkhualan khe Pachia hoitang kha ka kuih kya ccyngkute mua dung khe ka thadyn cih,” a cipya.¹⁰Moses nynh a hopya hawte Joshua nynh cyih zah Amalek hae kha a tuk hae, tuh lyatuin Moses, Aaron te Hur nynh mua dung lang a kaethung hae.¹¹Moses nynh a kuih a hang ccyh balyn tuh Israel hae nynh tae hae zah a kuih a sawbung ccyh balyn tuh Amalek hae nynh a tae hae.¹²Moses kuih tuh a bang keiccuze minmin nynh lung ccangkheit kha lah hae zah Moses zakaw nungpah hae zah, Moses tuh tuin kya a haung. Aaron te Hur nynh Moses kuih kha lu kheit ze voikheit ccite a hang hae; tukeiccuze a kuih tuh khuanin phe ccah cia tynkaring lan a um.¹³Joshua nynh Amalek te a ccungccaw hae kha thaloi te phe a tae hae.¹⁴Oute Bawipaw nynh Moses kha, “E kong hynh ning khyh nawlan ccauh kya zei lah Joshua kha riapah. Amalek te asekuhpaw syntawnaw kha vaawlui zakaw kyate phe ka maemih cih,” a cipya.¹⁵Te Moses nynh silawhang ccangkheit kha rae zah Bawipaw tuh ka taenaw alan nynh thua a ci.¹⁶Moses nynh, “Bawipaw kya-e taenaw alan kha na kuih te hangthung! Bawipaw nynh Amalek hae kha she takyh kya a tuk cih hae,” a ci. Jethro kya-e Tuanaw Pyapaw

¹Bawipaw nynh Israel hae kha Izip ram kyate pawtemou a poukhae hae cipaw te Pachia nynh Moses te a ccungccaw Israel hae hanlan a cyipya hae paw balyn kha Midian ranpibawi, Moses a pupaw Jethro nynh a thae.²Tukeiccuze Moses nynh a pupaw Jethro kalan a la saw hae paw a zu Zipporah te³a ccaaw hae lu ning kha Jethro nynh hoei hae zah a kikhae hae. A ccapaw lu kheit min tuh Gershom a cikuh (pawccecize Moses nynh, “Ramccang kya mikhiapaw nynh ka thua,” a ci),⁴ccangpaw lu kheit min tuh Eliezer a cikuh (pawccecize Moses nynh, “Ka paaw a Pachia tuh yn bawmpaw thua zah Faro thaloi kyate yn luesah,” a ci).⁵Moses a pupaw Jethro tuh Moses a ccapaw hae te a zu kha yn cciakhae hae zah Moses nynh a ryanaw Pachia mua, laesia ram langkhe yn thua.⁶Jethro nynh Moses kha, “Na pupaw Jethro kae tuh na zu te na ccaaw hae lu ning ryte namaw kalan kae cceih cciamang,” cite bya a taw.⁷Moses tuh a pupaw kha tungku khylan a pou; bakhung zah a pupaw kha a myng; mih ngedannaw kong kha lu kheit te lu kheit khiakuh hae zah bu lungkhu lang a tee hae.⁸Oute Bawipaw nynh Israel hae hanlan Faro te Izip hae tungvaw a la cyipaw balyn kha thuasah, laanryng kya a tung hae paw vawsawnaw balyn kha thuasah, Bawipaw nynh pawtemou a luesah hae cipaw kha thuasah, Moses nynh a pupaw kha a hopya.⁹Bawipaw nynh Israel hae kha Izip ram kyate a luesah lya hae ze, Israel hae hanlan a la raepaw hoynaw balyn hanlan Jethro tuh a lungtua.¹⁰Jethro nynh, “Nang kha Izip hae kyate thuasah, Faro kyate thuasah, ae luesahtu Bawipaw tungvaw thehoynaw um sah.¹¹Bawipaw tuh pachia hae balyn laeze alehua cipaw atu ka ny vae, pawccecize Izip hae nynh Israel hae tungvaw dothatheihte he cyih hae tuh, Bawipaw nynh ccungccaw hae kha Izip hae kyate a luesah hae,” a ci.¹²Te Moses a pupaw Jethro nynh maee-ute silawnawpaw te silawnawpaw hae kha Pachia kalan a thuakhae; te Aaron te Israel piccan hae balyn tuh Moses a pupaw ryte Pachia malang sanlou ae khylan oun thua hae.

¹³Awkhualan khe ccungccaw hae tuh awkhua te zete cia Moses pe a thadyn lya hae khe, Moses tuh ccungccaw hae hanlan byapiatu lante a dahung.¹⁴Moses nynh ccungccaw hae hanlan a cyipya hae paw balyn kha a pupaw nynh he a muih tuh, “Ccungccaw hae hanlan pawmou palei na cyipya hae? Ccungccaw balyn tuh na pepan khe awkhua te zete cia thadyn hae zah pawcce na makhaete na dahung?” a cipya.¹⁵Moses nynh a pupaw kha, “Ccungccaw hae nynh Pachia rynaw kha ny khylan ka kalan oun ccia hae keiccu nynh thua.¹⁶Minmin nynh bya a lung hae ze, ka kalan oun cceih hae zah minmin lu kheit te lu kheit laku bya ka pia hae, Pachia kya-e upadi te ccangpyanaw kha ka nysah hae,” a cipya.¹⁷Moses a pupaw nynh Moses kha, “Na cyipaw hynh hoy khyh.¹⁸Namaw te namaw kya umpaw ccungccaw hae tuh eih na bang cih oh. Pawccecize na ryalaw hynh eih ru kaesy; na makhaete na cyih kho lan khyh.¹⁹Ka bya hynh ngaetua. Tuanaw kae pya cih, Pachia nynh ae umkhae vae sah! Nang tuh Pachia malang ccungccaw hae ccelang a thadynpaw na thua cih zah minmin kya-e byalungnaw kha Pachia malang na thuakhae cih;²⁰upadi te ccangpyanaw kha na ccangpah cih hae zah a ccia nawlan hae paw laanpi te a cyi lan hae paw kha na nysah cih hae.²¹Ccungccaw hae laku e a cyih khopaw, Pachia a rihpaw, a lungzipaw te ahme leite muepaw kha a huapaw ccungccaw hae kha na po cih hae zah ccungccaw thung kheit uktu, za kheit uktu, sung pangaw uktu te lu haw uktu cite na nung cih hae.²²Minmin tuh ccungccaw hae tungvaw byapiatu hae lante zungzae um hae sah; minmin nynh arupaw byalungnaw miakaw kha na kalan thuakhae hae sah, thuasalama azoipaw byalungnaw kha tuh mimaw nynh pia hae sah. Ou tuhte namaw hanlan azoihua cih zah, minmin nynh na phupaw kha ae due cih hae.²³Ou tuhcite Pachia nynh kaw ae pya thyhte na cyi zetuh na taening cih, e ccungccaw hae nynh mih inn lang lungdaete a ki cih hae,” a cipya.²⁴Moses nynh a pupaw bya kha ngae zah a hopyapaw balyn thyhte a cyi.²⁵Moses nynh Israel hae balyn kya-e a cyih kho hae paw kha po hae zah ccungccaw thung kheit uktu, za kheit uktu, sung pangaw uktu te lu haw uktu cite lupi lang a nung hae.²⁶Te minmin nynh ccungccaw hae kha zungzae bya a pia hae; arupaw byalungnaw kha Moses kalan a thuakhae hae, thuasalama azoipaw byalungnaw kha tuh mimaw nynh bya a pae hae.²⁷Oute Moses nynh a pupaw kha cciasah zah aning tuh amaw ram lang a ki vae. Israel hae Sinai Mua Thuanaw

¹Israel hae nynh Izip ram kyate he a pou kou hae te, sawpaw sah thumnaw, nin kheit nin khe Sinai ramkaw kya a thua hae.²Refidim kyate pou hae zah Sinai ramkaw kya a thua hae, te tuh-e ramkaw kya umpaw mua malang khe a rya hae.³Oute Moses tuh Pachia kalan a kaethung; Bawipaw nynh mua kyate ko zah, “Jakob ciihan Israel hae kha hynhte na hopah cih hae:⁴Izip hae tungvaw ka la cyipaw te nanning kha mosipi sake te kae hang oh zah kamaw kalan kae hoei oh paw kha phe na muih vae oh.⁵Tukeiccuze atu ka bya kha na ngae oh zah ka byakin kha na zui oh zetuh, ccungccaw balyn laeze ka hoipaw aphutepaw ka rho na thua cih oh. Accaccing tetuh laephi balyn hynh ka uccaw nynh thua.⁶Nanning tuh kamaw hanlan ranpibawi te athyaapaw minphuin na thua cih oh. E bya hynh Israel hae kalan na hopah cih hae,” a cipya.⁷Moses nynh yn cceih zah Israel piccan hae kha a pum hae, Bawipaw nynh kaw a pyapaw balyn kha a hopya hae.⁸Ccungccaw balyn nynh, “Bawipaw nynh a hopaw atyn-are kha kae cyih cih,” cite ngingrarih lante a leih hae. Moses nynh ccungccaw hae bya kha Bawipaw kalan a hopya.⁹Oute Bawipaw nynh Moses kha, “Ccungccaw hae nynh nang te bya ah hokupaw kha thae hae zah nang kha tyty ae zyn nawlan hae, thaawkalaepaw varyng zipingpaw maeking kyate na kalan kae thua cih,” a cipya. Ccungccaw hae Thyaasahnaw
Moses nynh ccungccaw hae bya kha Bawipaw kalan he a hopah tuh,¹⁰Bawipaw nynh Moses kha: “Ccungccaw hae kalan la cceih lah, minmin kha atunin te awkhualan la thyaasah hae. Mih uccaw hae kha sukuh hae sah lah,¹¹nin thumnaw nin hanlan la paccynkuh hae sah, pawccecize nin thumnaw nin khe Bawipaw tuh ccungccaw balyn malang Sinai mua vawlan yn rungbung cih.¹²Ccungccaw hae hanlan mua po voilu lan ramri kha na nung cih zah, ‘Mua vawlan na kae khyh nawlan oh te mua aleihpaw mah na tysei khyh nawlan oh na raeringkuh cih oh. Mua kha a tysei paw tuh chia a thua cih.¹³Tuh-e ccungccaw kha kuih te na hae lan khyh oh, lung te deih a thua khyhze the te kaw a thua cih; sarangpaw thuasah, ccungccaw thuasah hiin lan khyh,’ cite na hopah cih hae. Mungkae kha khaw cia accae te, minmin nynh mua vawlan a kae cih hae,” a cipya.¹⁴Te Moses tuh mua kyate ccungccaw hae kalan a cceihbung. Aning nynh ccungccaw hae kha a thyaasaku hae, te minmin nynh mih uccaw kha a suku hae.¹⁵Moses nynh ccungccaw hae kha, “Nin thumnaw nin kya paccynkuh oh; nopi pe lang naekuh nan oh,” a cipya hae.

¹⁶Nin thumnaw nin awkhua khe mua vawlan kholungthyh zah khozaw a lae, varyng zipingpaw maeking nynh mua kha phang a bong, te mungkae roi tuh eih ccae keiccuze ryahmin kya umpaw ccungccaw hae tuh a thyngkuh hae.¹⁷Moses nynh Pachia te tungku khylan ccungccaw hae kha ryanaw hmin atolang khe a poukhae hae. Minmin tuh mua aleihpaw khe a thadyn hae.¹⁸Bawipaw tuh Sinai Mua vawlan khe maee te yn rungbung keiccuze Sinai Mua tuh maeekhuh nynh varyng a lung; maeekhuh tuh maeephu kya-e maeekhuh hawte kaethung zah mua pynpi tuh thawte a hy.¹⁹Mungkae roi tuh houhouh yn ccae. Moses nynh hopah zah Pachia nynh kholung kyate bya a leih.²⁰Bawipaw nynh Sinai Mua dung vawlan he yn rung tuh, Moses kha mua dung kalan khe ko zah Moses tuh a kaethung.²¹Oute Bawipaw nynh Moses kha, “Ccungccaw hae nynh Bawipaw kha do khylan ramri kha a lue khyh nawlan hae, la cceihbung lah minmin kha raeringnaw la pya hae. Tuhkhyhze tuh patae a chihsei cih hae.²²Bawipaw kalan a naekuhpaw ranpibawi hae heize mimaw te mimaw kha a thyaasakuh cih hae. Tuhkhyhze tuh Bawipaw nynh de a tahsei cih hae,” a cipya.²³Moses nynh Bawipaw kha, “Mua vawlan kae khylan ccungccaw hae kha ua thua khyh hae; pawccecize namaw ccaccei nynh kaening kha, ‘Mua po voilu lan ramri nung oh lah thyaasah oh,’ cite raeringnaw nae pya zah phe nae hopya vae,” a cipya.²⁴Bawipaw nynh Moses kha, “La cceihbung lah Aaron kha yn kaekhae thung; thuasalama ranpibawi hae te ccungccaw hae tuh Bawipaw kalan kaethung lanpaw kha na ua lan khyh hae; tuhkhyhze tuh Bawipaw nynh minmin kha de a tah cih hae,” a cipya.²⁵Tukeiccuze Moses nynh ccungccaw hae kalan cceihbung zah a hopya hae. Kawbya Ccanghaw (Deu 5.1-21)

¹Oute Pachia nynh e bya hae hynh a ho:

²Kae tuh nang kha see lang na tangnaw Izip ram kyate ae poukhaepaw Bawipaw na Pachia nynh ka thua;³Kamaw laelan ccangpaw pachia hae kha na beik lan khyh.

⁴Ahangnaw vaawram kya thuasah, anenaw laephi kya thuasah, laephi akawlan e tui kya thuasah a umpaw ccangkhakheit te muinsan alokuhpaw zohtuh kha namaw hanlan na raekuh lan khyh.⁵Tuh-e zohtuh hae malang na bakhung lan khyh zah na beik lan khyh; pawccecize Bawipaw nae Pachia kae tuh a eiungpaw Pachia ka thua zah kamaw oun vuapaw ccungccaw hae kha she thum, she pali kyacia, paaw hae seinaw hanlan ccaaw hae kha de a tahpaw Pachia nynh ka thua,⁶thuasalama kae kha oun sungsah hae zah ka kawbya kha a zui hae paw tungvaw kya tuh atynpaw sungsahnaw kha she thong kheit kyacia a langsakuhpaw Pachia nynh ka thua.

⁷Bawipaw na Pachia min kha ahme lei lante na mang lan khyh; pawccecize Bawipaw min kha ahme lei lante a mangpaw tuh Bawipaw nynh seinaw hoi leipaw cite muih khyh.

⁸Sabbath nin kha ning nan, te khah-e nin kha athyaapaw lante la mang.⁹Nin taruh lungkhu rya na lah cih zah, na ryalaw balyn kha na lah cih.¹⁰Thuasalama nin sarinaw nin tuh Bawipaw na Pachia hanlan sabbath nin nynh thua; tuh-e nin kya tuh namaw, na ccapaw, na ccanung, na seenung, na seepaw nynh thuasah, na sahiin-awvaw te na khua kya umpaw mikhia nynh thuasah pawpaw rya mah na lah lan khyh oh.¹¹Pawccecize Bawipaw nynh vaawram, laephi, rili te tuh-e hae lungkhu a umpaw balyn kha nin taruh lungkhu rae zah nin sarinaw nin khe a haeung, tukeiccuze Bawipaw nynh sabbath nin kha hythuapya zah a thyaasah.

¹²Bawipaw na Pachia nynh ae pyapaw ram kya na hiinshe a sae nawlan, na nung te na paaw kha sawtua hae.

¹³Ccungccaw na theih lan khyh.

¹⁴Milae zu kya khyhze milae vawpaw kya na sei lan khyh.

¹⁵Na ruh lan khyh.

¹⁶Na innpaw kha rawsete ahme leipaw ccaekia lang na tang lan khyh.

¹⁷Na innpaw kya-e inn kha na duaa lan khyh; na innpaw paw a zu, a seepaw, a seenung, vaetua, lann, te na innpaw kya-e hankhakheit kha na duaa lan khyh, a ci. Ccungccaw hae Rinaw (Deu 5.22-33)

¹⁸Ccungccaw balyn nynh kholungthyhpaw, khozawlaepaw, mungkae roi te mua vawlan maeekhuh khuhpaw kha he a muih hae tuh, a rih hae, thyngkuh hae zah asawnaw kyate a thadyn hae,¹⁹te Moses kha, “Oun hopah lah na bya kha kae ngae cih; thuasalama Pachia nynh kaening kha oun hopah nan sah, oun hopya zetuh kae chih cih,” a ci hae.²⁰Moses nynh ccungccaw hae kha, “Rih nan oh, pawccecize nanning kha syntawtua khylan te seinaw na rae khyh nawlan oh, Bawipaw kha na ri ccaw oh cite nynh Pachia tuh yn thua,” a cipya hae.²¹Oute ccungccaw hae tuh asawnaw kya a thadyn lya hae khe, Moses tuh Pachia umnaw varyng zipingpaw mohnaw kalan khe a naekuh. Beikhang

²²Bawipaw nynh Moses kha hopah zah, Israel hae kyakhe hynhte na hopah cih hae: “Vaawlang te nanning kalan bya ka hopaw kha phe na muih vae oh,²³Nanning nynh kamaw hawte beik lanpaw phua pachia thuasah, sui pachia thuasah na raekuh lan khyh oh.²⁴Laephi khate silawhang ccangkheit kha kamaw hanlan na rae cih, tuh-e silawhang vawlan khe maee-ute silawnawpaw te vaeccawku nawlan silawnawpaw na tuu hae te na tangnuapaw hae khate si na lawkuh cih, kamaw kha nae beik cih ka cinaw hmin takyh kya ka min kha na ning khyh nawlan namaw kalan kae thua cih zah hythuanaw kae pya cih.²⁵Kamaw hanlan silawhang kha na rae ze, a-awkuhpaw lung te na rae lan khyh, pawccecize sivawhaelua kha rae nawlan na mang zetuh silawhang tuh a nungsikuh vae.²⁶Na pyn kya-e maethyaumpaw kha a lang khyh nawlan, ka silawhang kalan nawkui te na kae lan khyh,” a cipya. See Kong Upadi (Deu 15.12-18)

¹E phungzae hae hynh Israel hae kalan na pya cih hae:²Hebru ccungccaw athuapaw seepaw kha na re oh ze, kum taruh lungkhu rya ae lawpah cih oh, thuasalama kum sarinaw kyakhe laebah sang aho lei lante a lue vae cih.³A makhaete yn thua lanze a makhaete a pou cih; a zu ryte oun thua lanze a zu ryte a pou cih hae.⁴A bawipaw nynh zudypah zah, ccanung ccapaw a saah zetuh a zu te a ccaaw hae tuh a bawipaw ccungccaw hae a thua cih hae zah, a makhaete a pou cih.⁵Thuasalama seepaw nynh, “Ka bawipaw, ka zu te ka ccaaw hae kha ka sungsah hae, a luepaw ccungccaw lante ka pou ry khyh,” a ci zetuh⁶a bawipaw nynh Pachia malang a thuakhae cih; thuakaw kya khyhze thuakawtung kalan a cciakhae cih zah a nakua kha vinawpaw te a vih cih; te a bawipaw rya kha a hiin lungkhu a lah vae cih.

⁷Ccungccapaw nynh a ccanung kha see lang a zua ze, tuh-e nung tuh seepaw hae hawte luesah thua lan khyh.⁸Tuh-e seenung nynh ryalaw a nawtupaw a bawipaw lungry kha a tung khyh lanze a bawipaw nynh ming hae kha shawkuh oh cite a hopah cih hae; a bawipaw nynh tuh-e seenung kha a hynpya keiccuze ramccang hae kalan zuanaw kaw hoi khyh.⁹A bawipaw nynh tuh-e seenung kha a ccapaw zu lang a pya zetuh amaw a ccanung hawte a do-oih cih.¹⁰Te ccangpaw zu kha a dy zetuh masaty a dypaw a zu hanlan looh, boeining te zu a thuanaw kha langmawlya hawte a pya cih zah a ccuepe cih.¹¹E phin thum hynh nopinung hanlan a cyipya khyh zetuh nopinung kha laebah um lei lante phua ngia leite a pousah cih. Buakunaw Kong Kawbya

¹²Humhung zemah ccungccaw kha phe chih lan a buapaw tuh chia a thua cih.¹³Thuasalama Pachia a ccansahnaw thyhte thua zah, tuakutynaw a um leite a chiasei zetuh a ccue nawlan hmin kha ka nungpah cih.¹⁴Thuasalama lukhakheit nynh paccynkute ccangpaw ccungccaw kha a chia zetuh ka silawhang kya a reku zemah chia khylan na sue cih oh.

¹⁵Humhung zemah a paaw thuasah, a nung thuasah a buapaw tuh chia a thua cih.

¹⁶Humhung zemah ccungccaw kha a ruhpaw tuh a zua zemah thuasah, a kuih kya a nungku zemah thuasah chia a thua cih.

¹⁷Humhung zemah a paaw thuasah, a nung thuasah thya a lawpaw tuh chia a thua cih.

¹⁸Lu kheit te lu kheit pekute ziakuh hae zah lu kheit nynh ccangpaw lu kheit kha lung te a tude ze thuasah, a kuihlung te a thung ze thuasah, vaemaw a muetupaw tuh a chi khyh zemah ikhung kya phang a huekuh ze thuasah,¹⁹tukoute yn danhua zah hoitang te a ccia kho ze thuasah, a buatupaw tuh detahnaw ing lan khyh, thuasalama a teingtupaw nynh a shungpaw accyh hanlan te phe a danthyanaw hanlan kha a rung cih.

²⁰See hoitu nynh seepaw khyhze seenung kha tungbang te bua zah phe a chi kangmaw zetuh see hoitu kha detah a thua cih.²¹Thuasalama tuh-e see tuh nin kheit khyhze nin ning a hiin zetuh detahnaw um lan khyh; pawccecize tuh-e see tuh a hoitu kya-e uccaw nynh thua.

²²Ccungccaw hae nynh ziakuh hae zah ccaawpoipaw nopi lu kheit kha a pawling hae keiccuze a ccaaw phe roh zah ccangpaw vaemaw a mue khyh zetuh tuh-e nopinung a vawpaw nynh a ngia zeihte a pawlingtupaw kha detah a thua cih zah byapiatu hae nynh byapia hae zeihte a rung cih.²³Ccangpaw vaemaw a mue zetuh hiinnaw hanpaw hiinnaw,²⁴mit hanpaw mit, haw hanpaw haw, kuih hanpaw kuih, ccu hanpaw ccu,²⁵maee-unaw hanpaw maee-unaw, vaemaw hanpaw vaemaw, buanaw hanpaw buanaw khate a liaru cih.

²⁶See hoitu nynh seepaw khyhze seenung a mit kha phe roh lan a bua zetuh a mit hanlan seetangnaw kyate a luesah cih.²⁷See hoitu nynh seepaw khyhze seenung a haw kha a khyasah zetuh a haw mee lang a luesah cih. Sahiin Hoitu hae hanlan Kawbya

²⁸Tangnuapaw nynh ccungccaw pise khyhze nopi kha phe chih lan a dia zetuh tangnuapaw kha lung te deih a thua cih zah a saw kha ae lei lan; thuasalama tangnuapaw a hoitu kha tuh detah thua lan khyh.²⁹Thuasalama tuh-e tangnuapaw tuh langmaw zemah ccungccaw dia a la mangpaw thua zah a hoitu kha raeringnaw phe a pya vae hae pite a hoitu nynh phang khung leite nung zah ccungccaw kha a chia zetuh tuh-e tangnuapaw tuh lung te phe chih lan deih a thua cih zah a hoitu kha mah chia a thua cih.³⁰Thuasalama a hoitu tuh a hiinnaw kha shawkhawku khylan phua rungsah cite khya a thua zetuh khyapyanaw thyhte a rung cih.³¹Tuh-e tangnuapaw nynh milae ccapaw khyhze ccanung kha a dia zetuh hynh-e phung thyhte zui a thua cih.³²Tangnuapaw nynh seepaw khyhze seenung kha a dia zetuh tangnuapaw a hoitu nynh see a bawipaw kha phua shekel sung thum a rung cih, te tangnuapaw kha lung te phe chih lan deih a thua cih.

³³Lukhakheit nynh laekarung a uasya ze thuasah, laekarung kha karouh zah ahu hu leite a nung ze thuasah, tangnuapaw khyhze lann nynh tuh-e laekarung lungkhu lang a ccaw zetuh,³⁴laekarung a hoitu nynh sahiin a hoitu kha phua a rung cih zah a chihpaw sahiin kha a lawkuh cih.

³⁵Lukhakheit kya-e tangnuapaw nynh milae kya-e tangnuapaw kha phe chih lan a dia zetuh minmin nynh a hiinpaw tangnuapaw kha a zua cih hae zah a mee kha a neekuh cih hae; achihpaw kha mah a neekuh cih hae.³⁶Thuasalama tuh-e tangnuapaw tuh langmaw zemah dia a la mangpaw thua zah, a hoitu nynh phang a khung khyh keiccu athua zetuh a hoitu nynh achihpaw tangnuapaw hanlan tangnua sa kheit kha a rung cih zah achihpaw tangnuapaw kha a lawkuh cih. Rungnaw Kawbya

¹Lukhakheit nynh tangnuapaw khyhze tuu kha ruh zah a chia ze thuasah, a zua ze thuasah miruh nynh tangnuapaw sa kheit hanlan tangnuapaw sa pangaw kha a rung cih zah tuu sa kheit hanlan tuu sa pali kha a rung cih.²Miruh nynh pyaru lanpaw kharouh a hoi khyh ze, a rupaw hanlan amaw kha zua athua cih. Miruh kuih kyakhe sahiin, tangnuapaw khyhze lann khyhze tuu kha a hiin te muihbia athua zetuh miruh nynh leit ning a rung cih. Miruh nynh inn a kia lyakhe muihbia thua zah phe chih lan bua athua zetuh ccungccaw chiapaw thua khyh. Thuasalama khuanin thua koute acyiku zetuh ccungccaw chiapaw nynh thua.

⁵Lukhakheit nynh milae loo khyhze misu khokhu kha a sahiin a ae sah ze thuasah, a sahiin kha milae loo kya a paeesah ze thuasah, amaw loo khyhze a misu khokhu kya-e ahoy huapaw kha a rung cih.

⁶Maee-u zah lonua hae kha a u keiccuze apumkuhpaw looh thuasah, a thadynpaw looh thuasah loo kha phe a u zetuh maee a soitu nynh phe ccing lan a rung cih.

⁷Lukhakheit nynh phua khyhze uccaw kha a khyn ccaw cite a innpaw kya a ccysahku, te tuh-e uccaw hae tuh a innpaw inn kyate miruh nynh phe ruh zah miruh kha kyngbia a thua zetuh miruh nynh leit ning a rung cih.

⁸Miruh kha muih kho a um vae khyh zetuh inn hoitu tuh a innpaw kya-e uccaw kha a kuih te a ty tou, ty khyh tou cipaw ny nawlan Pachia malang thuakhae a thua cih.

⁹Uccaw luakunaw kong kyaze, a luaku hae paw tangnuapaw, lann, tuu, boeining khyhze a shung hae paw ccangkhakheit kha lukhakheit nynh, “E hynh ka uccaw nynh thua,” cite a ho ze, parouh mawte Pachia malang a thua cih hae; Pachia nynh na sei a cipyapaw kha nynh ccangpaw lu kheit kha leit ning a rung cih.

¹⁰Lukhakheit nynh lann, tangnuapaw, tuu khyhze ccangpaw sahiin sakhakheit kha ccangpaw lu kheit kha a do-oihsah, te tuh-e sahiin tuh a chih, tuhkhyhze vaemaw a mue, tuhkhyhze a muih biapaw um leite lukhakheit nynh ccanglang po a sue ze,¹¹a do-oihtu te a do-oihsahtu mih lu ning laku kya Bawipaw malang thyalawkunaw nynh bya a pae cih; a hoitu nynh thyalawkunaw kha a nawccah cih zah a do-oihtu nynh a la ru khyh zetuh rungsah lan khyh.¹²Thuasalama lukhakheit nynh a la ru zetuh a do-oihtu nynh a hoitu kha a rung cih.¹³Sarepaw nynh a tei zetuh a chihpaw kha ccaekia lan thuakhae a thua cih, sarepaw nynh a teipaw hanlan rungrunaw um lan khyh.

¹⁴Lukhakheit nynh milae kya-e sahiin kha hoh zah a hoitu a um khyh lyakhe vaemaw a mue, tuhkhyhze phe a chi zetuh a hohtu nynh a rung cih.¹⁵A hoitu a umbua zetuh a hohtu tuh rung lan khyh; hohpaw a thua zetuh a hoitu nynh hohnaw mee kyalya kha a mue cih. Ziazae te Beiknaw lante Kawbya

¹⁶Pise lukhakheit nynh zu lang a dy leipaw liaccaw kha hyy zah a ikhae zetuh mee kha a pya cih zah a zu lang a umkhae cih.¹⁷Thuasalama liaccanung a paaw nynh a nawccaw khyh zetuh tuh-e pise nynh liaccaw mee kha a rung cih.

¹⁸Puimawnung kha na hiin lan khyh oh.

¹⁹Humhung zemah sarangpaw ryte nopi pise seinaw a raepaw tuh chia a thua cih.

²⁰Humhung zemah Bawipaw laelan ccangpaw pachia kha si a lawpaw tuh ro a thua cih.

²¹Ramccang ccungccaw kha na dothatheih lan khyh oh zah, na tuaasah lan khyh oh, pawccecize nanning tuh Izip ram kya ramccang ccungccaw lang na tang boi oh.²²Nomaenung hae khyhze ngawraw hae kha na theihrya lan khyh oh.²³Minmin kha na theihrya oh zah minmin nynh kamaw kalan a siarua hae zetuh minmin siaruanaw kha solei ka thae cih;²⁴Ka thinrianaw tuh maee lang a rua cih zah nanning kha thaloi te kae theih cih oh, te nae zu hae kha nomaenung lang a tang cih hae zah nae ccaaw hae tuh ngawraw hae lang a tang cih hae.

²⁵Nanning lakuze a ryachipaw ka ccungccaw hae kha phua na koiisaku oh ze, phua ato lawkute a koiisakuh hae paw hawte minmin tungvaw na cyih lan khyh oh; minmin kyate phua ato kha na ngia lan khyh oh.²⁶Na innpaw kya-e boei kha ponpaw uccaw lante na law ze, khuanin a ccaw maw, bua na pya cih;²⁷pawccecize khah-e boi kyalya kha nynh thyku lanpaw a hoi; aning nynh pawtemou a ih kho cih? Aning nynh kamaw kalan a sia zetuh ka ngaepah cih, pawccecize kae tuh thaw a ccihthyapaw nynh ka thua.

²⁸Pachia kha the na thyasah lan khyh, na ccungccaw hae a uktupaw kha thya na law lan khyh.

²⁹Na looh kyaze avoi typaw athae te na su typaw atui kha thysung leite nae pya cih.
Na ccatawccaw ccapise kha nae pya cih.

³⁰Tuhawte na vaetua hae te na tuu hae nynh a thanty hae paw kha nae pya cih: nin sari lungkhu a pi kya a umbua cih zah, nin taryanaw nin khe kamaw kha nae pya cih.

³¹Nanning tuh kamaw kya athyaapaw ccungccaw na thua cih oh; tukeiccuze ramkaw kya sarepaw nynh a teipaw saw kha na ae lan khyh oh; ui hae kha na vuapah cih oh. Ccungccaw balyn hanlan Dingnaw

¹Ahme leipaw thongpang kha na pazaesakuh lan khyh. Ahme leipaw ccaekia lang tangpya te a seipaw kha la bawm nan.²Ahme leipaw raenaw kya ccungccaw alunghua kha na zui lan khyh; byapianaw kya ccaekia na khanku ze, dingnaw a khawtupaw ccungccaw alung huapaw kalan na pan lan khyh.³Byapianaw kya a ryachipaw cite na pankhae lan khyh.

⁴Na rhawpaw kya-e tangnuapaw khyhze lann nynh laanpi a mesei ze, bua na kikhaepah cih.

⁵Nang ae huapaw kya-e lann tuh a phupaw nynh phang a nepaw kha na muih ze, cciataw nan, a thoku kho nawlan na bawm cih.

⁶A kaethekunaw hae kyaze a ryachipaw kha ahme lei lante bya na pia lan khyh.⁷Ahme leipaw seibenaw kha rae nan, seinaw a hoi leipaw te a dingpaw kha theih nan, pawccecize seinaw a raetupaw kha a seinaw kyate ka luesah lan khyh.⁸Pyaruh kha lawkuh nan, pawccecize pyaruh nynh bawi hae mit kha a mohsah, te ahmepaw kya um hae paw kha a ro hae.

⁹Ramccang ccungccaw kha na tuaasah lan khyh; pawccecize nanning tuh Izip ram kya ramccang hae lang na tang vae oh keiccuze ramccang ccungccaw thinlung kha na ny oh. Sabbath Kum te Sabbath

¹⁰Kum taruh lungkhu nae loo kya looh na ccou cih oh zah, apoupaw athae kha na suelua cih oh;¹¹thuasalama kum sarinaw kum kya loo kha na haeungsah cih oh zah, ccou leite na nung cih oh. Tetuh aryachipaw nae ccungccaw hae nynh a ae cih hae; te a cciataw hae paw kha ramsaw hae nynh a ae cih hae. Tuhawte nae misu khokhu te oliv khokhu kha mah tuhcite na cyih cih oh.

¹²Nin taruh lungkhu na ryalaw kha na lah cih, thuasalama nin sarinaw nin kya na haeung cih, tuhteze tuh na tangnuapaw te na lann nynh haeungnaw a mue cih hae zah, na inn kya a puipaw see te ramccang ccungccaw mah mih thaw bua athua cih.¹³Kae hopyapaw balyn hynh na syntawkuh cih. Ccangpaw pachia hae min kha na ko lan khyh; na mung kya-e bya kha tuh-e pachia hae nynh thae nan hae sah. Kum Takyh Tuapaw Poi hae (Exo 34.18-26; Deu 16.1-17)

¹⁴Kamaw hanlan kum kheit ze vae thum poi na tua cih oh.¹⁵Ransi phingkuh leipaw sanlou poi kha na tua cih oh; kaw kae pya oh thyhte, Abib sawpaw lungkhu kya khyapyapaw nin sari lungkhu ransi phingkuh leipaw sanlou kha na ae cih oh, pawccecize tuh-e sawpaw kya Izip ram kyate na pou oh.
Humhung mah kuih ccakaete kamaw malang yn langkuh lan khyh.

¹⁶Loo kya na ccou oh paw, nae ryalaw kya-e thaety na rue ccyh oh khe Loohrue poi kha na tua cih oh. Nae ryalaw kya-e athae kha loo kyate he na suelua oh te, kum athang ccyh kyakhe Looh Ccakhung poi kha na tua cih oh.¹⁷Nanning laku e pise balyn tuh kum kheit ze vae thum Bawipaw PACHIA malang na langkuh cih oh.

¹⁸Si nae lawnaw oh paw a chii kha ransi phingkuhpaw ccangkhakheit te pydete nae pya lan khyh oh, ka poi kya si nae lawnaw oh paw atho kha awkhua ccyh cia na laesah lan khyh oh.¹⁹Nae laephi kya masaty a thaepaw thae kya-e na po oh paw kha Bawipaw nae Pachia inn lungkhu lang na thuakhae cih oh.
Tuu taraw kha a pi mateitui te na thungde lan khyh. Kanaan Ram Taenaw

²⁰Nang kha kae paccynpyapaw hmin lang cciakhae khylan te nang kha laanpi kya rin khylan na malang khe vaawpaw lu kheit kha kae sawpah cih.²¹Amaw kha sawtua lah a bya kha ngae; amaw kha dou nan, pawccecize ka min tuh amaw kya a um keiccuze na seimenaw kha ae ngaethya lan khyh.²²Thuasalama a bya kha hoyte na ngae zah ka hopaw balyn kha na cyi zetuh, kae tuh na rhaw hae hanlan rhaw ka thua cih zah, ae doutu hae kha a doutu ka thua cih.

²³Ka vaawpaw nynh na malang cceih zah Amor hae, Hit hae, Periz hae, Kanaan hae, Hiv hae te Jebus hae kalan he ae cciakhae te, minmin kha ka roh cih hae,²⁴mih pachia hae kya na bakhung lan khyh, na beik lan khyh zah a cyi hae paw kha na cyihbua lan khyh, minmin kha pong na roh cih hae zah mih tungpi hae kha phe zoih lan na khya cih hae.²⁵Bawipaw na Pachia kha na beik cih zah na sanlou te na tui kha hythua kae pya cih; na lungkhu kyate ccinaw kha kae lawpah cih.²⁶Na ram kya a ccaaw rohpaw te a tinpaw um lan khyh; na she kae saesah cih.²⁷Kamaw rinawpaw kha na malang khe ka saw cih zah rawsete na ccianua hae paw ccungccaw balyn kha mih lung ka muasah cih, te na rhaw hae balyn kha mih nulang ka kisah cih hae.²⁸Ccinaw kha na malang khe ka saw cih, tuh-e ccinaw nynh Hiv hae, Kanaan hae te Hit hae kha na malang kyate a dee cih hae.²⁹Minmin kha na malang khate kum kheit lungkhu ka dee lan khyh hae, tuhkhyhze tuh ram kya ccungccaw adae cih zah nang te arawsekuh lante ramsaw hae tuh a pungthungsei cih hae.³⁰Nang nynh na pungzae zah ram kha na pee mawlaezung, minmin kha na malang khate beihtararaw te ka dee cih hae.³¹Na ramri tuh Rili Se kyate Filistin Rili cia, laesia ram kyate Zufrates Vaw cia athua cih; pawccecize tuin ram kya um hae paw kha na kuih kya kae pya cih zah na malang khate na dee cih hae.³²Minmin te thuasah, mih pachia hae te thuasah byakinnaw na rae lan khyh.³³minmin nynh na ram kya um lan khyh hae, tuhkhyhze tuh nang kha ka tungvaw seinaw ae raesahsei cih hae; pawccecize mih pachia hae kha na beik zetuh, tuh-e tuh namaw hanlan kaang a thua ccaccing cih. Byakin Chii

¹Oute Bawipaw nynh Moses kha, “Nang te Aaron, Nadad, Abihu te Israel piccan hae sung sari tuh ka kalan oun kaethung oh lah asawnaw khate oun beik oh.²Moses makhae nynh Bawipaw pe lang a cceih cih; thuasalama ming hae tuh naekuh lan khyh hae, te ccungccaw hae tuh Moses ryte kaethung bua lan khyh hae,” a ci.

³Moses tuh yn thua zah Bawipaw bya balyn te phungzae balyn kha ccungccaw hae kha a hopya hae; te ccungccaw balyn nynh, “Bawipaw nynh a hopaw bya balyn kha kae cyih cih,” cite roi roikheit te a leih hae.⁴Te Moses nynh Bawipaw bya balyn kha a zei. Aning nynh awkhua takaw khe tho zah mua leihpaw khe silawhang kha a rae, Israel phin haw lae ning hanlan lungbing haw lae ning kha a bing.⁵Aning nynh Israel ccangvae hae kha saw hae zah minmin nynh Bawipaw kalan maee-ute silawnaw kha a rae hae, ccawkunaw silawnaw hae lante tangnuapaw hae khate si a law hae.⁶Moses nynh chii angankuh kha lah zah pakepi kya a nung, te chii angankuh kha silawhang vawlan a hei.⁷Oute byakin ccauh kha lah zah ccungccaw hae a thaenaw hae khe a ria; te minmin nynh, “Bawipaw nynh a hopaw balyn kha kae cyih cih zah kaw kae ngae cih,” a ci hae.⁸Moses nynh chii kha lah zah ccungccaw hae kha hei hae zah, “Ngaetua oh, e bya hae balyn ae pyanaw oh thyhte Bawipaw nynh nae tungvaw a raepaw byakinnaw kya-e chii nynh thua,” a ci. Pachia ryte Mua vawlan

⁹Oute Moses te Aaron, Nadab, Abihu te Israel piccan sung sari tuh kaethung hae zah¹⁰Israel Pachia kha a muih hae. A ccu kaw khe safaiar lung te aphaekuhpaw alopaw, thyaararihpaw vaawlui alopaw a um.¹¹Pachia nynh Israel lupi hae tungvaw kuih hangnua khyh hae; minmin nynh Pachia kha mah a muih hae, te ae hae zah a neih hae.

¹²Bawipaw nynh Moses kha, “Kamaw kalan mua vawlan yn kaethung lah yn umtua; minmin ccangpya nawlan cite upadi te kawbya ka zeinawpaw lungphe hae kha kae pya cih,” a cipya.¹³Tukeiccuze Moses tuh ryalaw a bawmtu Joshua ryte a cceih hae, te Moses tuh Pachia mua lang a kaethung.¹⁴Moses nynh piccan hae kha, “Nae kya kae thua mawlaezung hein kya nae la ngaw cih oh; Aaron te Hur tuh nae kya a umbua hae, tukeiccuze bya a lung hae paw humhung zemah minmin kalan a cceih cih hae,” a cipya hae.

¹⁵Oute Moses tuh mua vawlan a kaethung, te maeking nynh mua kha phang a zithin.¹⁶Bawipaw phu-enaw tuh Sinai Mua vawlan um zah maeking nynh mua kha nin taruh lungkhu phang a bong; nin sarinaw nin khe Bawipaw nynh Moses kha maeking kyate a ko.¹⁷Bawipaw phu-enaw tuh aruapaw maee hawte mua dung khe Israel hae muihnaw kya a langkuh.¹⁸Moses tuh maeking lungkhu lang tee zah mua vawlan a kaethung, tuin kya nin sung pali te zi sung pali a um. Beikbu hanlan Ahlu (Exo 35.4-9)

¹Bawipaw nynh Moses kha,²“Kamaw hanlan ahlu ccyng lan Israel hae kha hopah hae; nang kha pya lan mih thinlung atho thyhte a pya hae paw balyn kya-e ahlu kha kamaw hanlan na lah cih.³Minmin kyate na law lanpaw ahlu tuh: sui, phua, sohin,⁴meizong, sephaphuhpaw, asepaw, nebaleihpaw boei, miaa ming,⁵anangkuh vae paw tuutepaw phua, ahoypaw saphua, eri thing,⁶maee aw nawlan chitui, thuhkuhpaw chitui hanlan te zimuin aphuinphuin,⁷ranpibawi lepaw angki kya te a bybe kya bede lanpaw oniks lung hae te aphutepaw lung hae nynh thua.⁸Te minmin laku ka um ccaw, beikinnthyaa ccangkheit kha yn raepah hae sah.⁹Kae muihsah cih paw accinccang balyn thyhte beikbu te a lungkhu e uccaw hae kha na rae cih oh. Byakin Thingkua (Exo 37.1-9)

¹⁰“Minmin nynh eri thing te thingkua kha a rae cih hae; tuh-e tuh asaepaw dong ning khaw kheit, akopaw dong kheit khaw kheit, ahangpaw dong kheit khaw kheit athua cih.¹¹Tuh-e alungkhu te atolang kha sui ccipaw te na thei cih, po voilu lan sui te arae kha na mia cih zah na rae cih.¹²Sui bawtary ccangpali na rae cih zah thingkua apaki ki pali kyakhe, voikheit lang ze ccangning ccite na sae cih.¹³Eri thing kha puihnawpaw ccong lang na rae cih zah sui te na thei cih.¹⁴Te thingkua puih nawlan puihnawpaw ccong kha thingkua apaki kya umpaw sui bawtary hae lungkhu lang na ruh cih.¹⁵Puinawpaw ccong tuh thingkua kya-e sui bawtary hae kya po a um cih zah ccanglang na lah lan khyh.¹⁶Nang kae pya cih paw byakinnaw kha thingkua lungkhu na nung cih.

¹⁷Dong ning khaw kheit sae zah dong kheit khaw kheit akopaw thingkua ahu kha sui ccipaw te na rae cih.¹⁸Sui te raepaw cherubim ccangning kha na rae cih; tuh-e hae tuh thingkua ahu voikheit voikheit langkhe na deihping cih.¹⁹Thingkua hu voikheih lang dung khe cherubim ccangkheit, ccangpaw voikheit lang dung khe cherubim ccangkheit na rae cih zah, thingkua ahu dung san ning kyakhe cherubim hae kha na rae cih.²⁰Cherubim hae tuh mih sake kha avawlan a daw cih hae zah thingkua ahu kha phang a bong cih hae. Mih mae tuh a hawiliakuh cih hae zah, thingkua hu kalan khe a do cih hae.²¹Ahu kha thingkua vawlan na khang cih zah, kae pya cih paw byakinnaw kha thingkua lungkhu na nung cih.²²Tuin kya namaw te tungku lan, te ahu vawlan, byakin thingkua vawlan umpaw cherubim ccangning laku kyate Israel hae hanlan kaw kae pyapaw balyn kha kae pya cih. Umkhaenaw Sanlou hanlan Ccaboi (Exo 37.10-16)

²³Asaepaw dong ning, akopaw dong kheit, te dong kheit khaw kheit ahangpaw ccaboi ccangkheit kha eri thing khate na rae cih.²⁴Tuh-e tuh sui ccipaw te na thei cih zah, arae kha po voilu lan sui te na mia cih.²⁵Ccaboi arae kha zapae ko lante po voilu lan na rae cih zah, tuh-e arae kha sui te po na mia cih.²⁶Tuh-e ccaboi elang sui bawtary ccangpali kha na rae cih zah, ccaboi apaki ki pali kya umpaw ccaboi ccu ccupali kyakhe ccarou na heede cih.²⁷Ccaboi puihnawpaw ccong ruh nawlan raepaw bawtary hae tuh arae kya miapaw khate anaekuh cih hae.²⁸Puihnawpaw ccong eri thing hae kha na rae cih zah sui te na thei cih hae, te tuh-e hae khate ccaboi kha puih athua cih.²⁹Zimuin nung nawlan angphe hae te pakekhupaw hae, te niapaw ahlu ccae nawlan banang lepaw hae te ccekoh hae kha na rae cih zah, sui ccipaw te na thei cih.³⁰Ka malang ccaboi kyakhe Umkhaenaw Sanlou kha zungzae na nungpah cih. Maee Tung (Exo 37.17-24)

³¹Akaran pheipaw maee tung ccangkheit kha sui ccipaw te na rae cih. Maee tung aleihpaw te atungpi tuh deihde te raepaw athua cih; a banang hae, apaw pawnahpaw hae te apawkary hae kha atungpi ryte na raede cih hae;³²tuh-e akaran pheipaw maee tung kyatuin akaran ccangtaruh a um cih, akaran ccangthum tuh voikheit lang a um cih hae zah, ccangpaw akaran ccangthum tuh ccanglang a um cih hae;³³akaran ccangtaruh kya-e ccangkheit cci kyakhe almon haetapaw te alokuhpaw banang ccangthum kha apaw pawnahpaw te apawkary ryte a um hae.³⁴Maee tung kya mah almon haetapaw te alokuhpaw banang ccangpali um zah, ccangkheit cci tuh apaw pawnahpaw hae te apawkary hae a hoi hae.³⁵Akaran bua thum aleihpaw hae kyatuin apaw pawnahpaw ccangkheit cci a um cih.³⁶apaw pawnahpaw hae, akaran hae te maee tungpi tuh deihpingpaw sui ccipaw pynkheit athua cih hae.³⁷Maee tung hanlan maeekhua ccangsari kha na rae cih zah, malang a aw ccaw cite maeekhua hae kha na aw cih hae.³⁸A tetakia te maeloi luanawpaw hae kha sui ccipaw te na rae cih.³⁹Maee tung te a uccaw hae balyn kha rae nawlan sui ccipaw pung za kheit na mang cih.⁴⁰Mua vawlan kae muihsahpaw accinccang thyhte na rae ccaw syntawkuh. Beikbu (Exo 36.8-38)

¹Te meizong, sephaphuhpaw, asepaw law, nebaleihpaw laaw te kuakuhpaw boei zung hawkhate beikbu kha na sak cih, tuh-e boei hae kyakhe cherubim azuh hae kha na soi cih.²boei zung kheit tuh dong kuin lae tarya asae cih zah dong pali ako cih; boei hae balyn tuh asaepaw te akopaw alokuh cih hae.³boei zung pangaw kha po piakuh lan huide athua cih zah ccangpaw zung pangaw kha mah tuhcih maminte huide athua cih.⁴masaty ahuidekuhpaw boei adung apaki kyakhe meizong bawtary hae kha na rae cih; tuhawte ccangningnaw ahuidekuhpaw boei apaki kyakhe bawtary hae kha na sae cih.⁵Masaty ahuidekuhpaw boei kyakhe bawtary sung pangaw na rae cih zah, ccangningnaw ahuidekuhpaw boei adung kyakhe mah bawtary sung pangaw na rae cih; tuh-e bawtary hae tuh ccangkheit te ccangkheit a hawiliakuh cih hae.⁶Bawnawpaw sung pangaw kha sui te na rae cih zah, tuh-e bawnawpaw te ahuidekuhpaw boei hae kha zung kheit te zung kheit na tungsakuh cih hae, tetuh beikbu tuh bu kheit lang a tang vae cih.

⁷Beikbu avawlan daw lanpaw kha miaa ming te akuakuhpaw boei zung haw lae kheit na rae cih.⁸Boei zung kheit cci tuh dong sung thum asae cih zah, dong pali ako cih; boei zung haw lae kheit tuh asaepaw te akopaw phe alokuh cih hae.⁹Boei zung pangaw hae kha na huide cih hae zah, zung taruh hae kha mah na huide cih hae, te zung taruhnaw boei kha beikbu malang avawlan khe thyh ning lang na bi cih.¹⁰Ahuidekuhpaw boei dung atolang khe bawtary sung pangaw kha na sae cih, tuhawte ccangningnaw boei dung kya mah sung pangaw na sae cih.

¹¹Boei hae tuh zung kheit lang a tang nawlan, bawnawpaw sohin sung pangaw na rae cih zah, bawtary kyakhe na baw cih.¹²Athualaepaw boei angankuh tuh beikbu nulang khe asaekuh cih.¹³Voikheit voikheit lang athualaepaw boei dong kheit cci tuh beikbu kha bong khylan asaekuh cih.¹⁴Tuh-e bu bong lanpaw kha anangkuhpaw tuutepaw phua te atolang te bong lanpaw saphua kha na rae cih.¹⁵Beikbu hanlan eri thing khate athadynpaw pang hae kha na rae cih.¹⁶Pang phe kheit cci tuh dong haw asae cih zah, dong kheit khoi ako cih.¹⁷Pang hae kha pynkheihlan tary nawlan pang phe kheit cci kyakhe tarynawpaw pangreih ccangning cci a um cih; tuh-e pangreih hae kha beikbu kya-e pang hae balyn elang na rae cih.¹⁸Beikbu hanlan pang hae kha na rae cih zah alia lang hanlan pang kha phe kuin na rae cih;¹⁹te pang phe kuin aleihpaw hanlan ngunphua ccusy sung pali kha na rae cih, pang phe kheit cci kya umpaw pangreih ccangning cci hanlan ngunphua ccusy ccangning cci kha na rae cih;²⁰te beikbu palung lang hanlan pang phe kuin kha na rae cih,²¹pang phe kheit ze ngunphua ccusy ccangning ccite sung pali na rae cih.²²beikbu a nulang, niccaw lang hanlan pang phe taruh kha na rae cih.²³beikbu a nulang e apaki hae hanlan pang phe ning kha na rae cih;²⁴tuh-e pang hae aleihpaw lang tuh alahkuh cih hae, thuasalama adung lang tuh masaty bawtary kya atarykuh cih hae; apaki e pang hae tuh parouhte alokuh cih hae zah, apaki san ning lang a tang cih hae.²⁵Tukeiccuze pang phe kheit kyaze ngunphua ccusy ccangning cci a um cih zah, pang phe tarya kya tuh ngunphua ccusy haw lae taruh a um cih.

²⁶Beikbu voikheit lang e pang hae kha ruh nawlan eri thingccaw ccaw pangaw kha na rae cih,²⁷te ccangpaw voikheit lang e pang hae kha ruh nawlan pangccaw ccaw pangaw kha na rae cih zah beikbu anulang niccaw lang e pang hae hanlan pangccaw ccaw pangaw kha na rae cih.²⁸Pang angaelung kya ahuekuhpaw, angaelung e pangccaw tuh voikheit lang dung te voikheit lang dung cia phe adia cih.²⁹Pang hae kha sui te na thei cih, pangccaw hae ruhnawpaw sui bawtary kha na rae cih; te pangccaw hae kha sui te na thei cih hae.³⁰Mua vawlan kae muihsahpaw accinccang thyhte beikbu kha na sak cih. Boei

³¹Apiazon, sephaphuhpaw, asepaw law, nebaleihpaw laaw te kuakuhpaw zokhawpaw boei kha na rae cih; tuh-e boei tuh kou hoy lan soikuhpaw cherubim azuh khate ccaan athua cih.³²Tuh-e boei kha sui te atheikuhpaw eri tungpi ccangpali vawlan khe na zo cih, tuh-e tungpi hae kyakhe sui te raepaw bawnawpaw hae te ngunphua te raepaw ccusy ccangpali vawlan abingkuhpaw tung hae a um cih.³³Boei bawnawpaw hae zakaw khe boei kha na zo cih, te byakin thingkua kha azokuhpaw boei alungkhu lang na teekhae cih; te boei nynh hminthyaa te hminthyaa huapaw kha a riadaw cih.³⁴Hmin thyaa huaccepaw kya umpaw byakin thingkua kha ahu na hu cih.³⁵Ccaboi kha azokuhpaw boei atolang khe na nung cih zah, maeekhuatung kha beikbu alia lang, ccaboi te arawsekunaw khe na nung cih; te ccaboi kha palung langkhe na nung cih.³⁶Apiazon, sephaphuhpaw, asepaw law, nebaleihpaw boei khate phynbang te kou puithya lan ccaan athuapaw zokhawpaw boei kha bu thuakaw lang na rae cih.³⁷Tuh-e boei hanlan eri thing te raepaw tung ccangpangaw kha na rae cih zah sui te na thei cih; tuh-e tung hae nynh sui te raepaw bawnawpaw hae kha a hoi cih hae, te tuh-e tung hae hanlan sohin ccusy ccangpangaw kha na rae cih. Maee-ute Silawnawpaw Silawhang (Exo 38.1-7)

¹Dong pangaw sae zah dong pangaw akopaw silawhang kha eri thing te na rae cih; silawhang tuh akopaw te asaepaw alokuh cih zah dong thum ahang cih.²Beikhang apaki san pali kyakhe aki hae kha na rae cih hae; aki hae tuh silawhang te ccangkheit lante a beedekuh cih hae zah sohin te na theithin cih.³A buhhaw nungnawpaw ang, buhhaw luanawpaw pakepi, pakephepaw, ccungthy te maee-e nungnawpaw pake kha na rae cih; silawhang te asekuhpaw angphe hae balyn kha sohin te na rae cih.⁴Beikhang hanlan sohin te raepaw pasaryh ccangkheit kha na rae cih; tuh-e pasaryh kha hang nawlan apaki san pali kyakhe sohin bawtary ccangpali kha na rae cih.⁵Pasaryh tuh silawhang angaelung kya a um ccaw cite silawhang arae zakaw khe na nung cih.⁶Eri thing kha silawhang puihnawpaw ccong lang na rae cih zah, sohin te na theithin cih,⁷te puihnawpaw hae kha bawtary lungkhu lang na ruh cih, tuhteze nynh silawhang kha he a puihkuhte, tuh-e puihnawpaw hae tuh silawhang voi te, rang te a um cih hae.⁸Beikhang tuh alungkhu kya akhupaw kua a um lante thingphe te na rae cih. Mua vawlan muihsah na thua hawkhate tuh-e hae tuh na rae cih hae. Voidu te A Uccaw hae (Exo 38.9-20)

⁹Beikbu voidu kha na rae cih. Tuh-e voidu alia langkhe dong za kheit sae zah kou hoy lan akuakuhpaw, nebaleihpaw boei kha na zo cih.¹⁰Tuh-e boei kya-e tung ccangkuin te mih ccusy ccangkuin tuh sohin te raepaw athua cih hae, thuasalama tung kya umpaw bawnawpaw hae te tungccaw hae tuh ngun te raepaw athua cih hae.¹¹Tuhawte tuh-e voidu tuh palung langte dong za kheit asae cih, mih tung tungkuin te mih ccusy ccangkuin tuh sohin te raepaw athua cih hae, thuasalama tung kya-e bawnawpaw hae te tungccaw hae tuh ngun te raepaw athua cih hae.¹²Voidu tuh niccaw lang te dong sung pangaw ako cih zah, tung tunghaw te ccusy ccanghaw a um cih.¹³Nithua lang te voidu a malang tuh dong sung pangaw ako cih.¹⁴Voikheit langkhe dong haw lae pangaw asaepaw boei te tung tungthum, ccusy ccangthum a um cih.¹⁵Ccangpaw voikheit langkhe dong haw lae pangaw asaepaw boei te tung tungthum, ccusy ccangthum a um cih.¹⁶Voidu kya-e sakoih kyakhe meizong, sephaphuhpaw, asepaw law, nebaleihpaw laaw te kuakuhpaw boei dong kuin asaepaw a um cih; phynbang te kou puithya lan ccaan athuapaw tuh-e boei tuh tung tungpali te ccusy ccangpali a hoi cih.¹⁷Voidu kha po akoihlupaw tung balyn tuh ngun te theipaw accaw te piade athua cih; bawnawpaw hae kha ngun te rae a thua cih hae zah ccusy hae kha sohin te rae a thua cih hae.¹⁸Voidu tuh asaepaw dong za kheit, akopaw dong sung pangaw, te ahangpaw dong pangaw athua cih zah nebaleihpaw laaw te akuakuhpaw boei athua cih, accusy tuh sohin athua cih.¹⁹Beikbu kya mangpaw uccaw balyn, beikbu kya-e ccong balyn te voidu kya-e ccong balyn tuh sohin athua cih. Maeekhua Do-oihnaw (Lev 24.1-4)

²⁰Maeekhua tyty a rua ccaw cite, maee aw nawlan oliv thae aphongkuhpaw chitui athyaapaw kha kamaw kalan oun thuakhae oh cite Israel hae kha kaw na pya cih hae.²¹Tungkunaw bu kyaze byakin thingkua malang umpaw zokhawpaw boei atolang khe Aaron te a ccapaw hae nynh tuh-e maeekhua kha zete te awkhua cia Bawipaw malang a aw cih hae. Tuh-e tuh Israel hae nynh mih she takyh kya a zui lan hae paw zungzae tynpaw phungzae athua cih. Ranpibawi hanlan Boeining (Exo 39.1-7)

¹Oute na upaw Aaron kha a ccaaw hae Nadab te Abihu, Eleazar te Ithamar ryte ranpibawi lante kamaw kha ryalawpya khylan Israel hae laku kyate na kalan ko hae.²Na upaw Aaron nynh a phu-epaw ccaankunaw hanlan athyaapaw boeining hae kha na raepah cih.³Te Aaron nynh ka ranpibawi lang a tang ccaw cite amaw kha thyaasah khylan, Aaron boeining kha raethyanawpaw thyahawnaw ka pya hae paw balyn kalan khe tuh-e boeining rae lan na hopah cih hae.⁴Minmin nynh a rae lan hae paw boeining hae tuh: by kya bekuhpaw bybe ccangkheit, ranpibawi angki zung kheit, angkiccua zung kheit, akaw-angki zung kheit, pungde zung kheit te taeccia ccangkheit nynh thua hae. Na upaw Aaron te a ccapaw hae nynh kamaw hanlan ranpibawi rya kha oun lawpya nawlan hae cite a raetu hae nynh e athyaapaw boeining hae kha a rae vae hae ze,⁵sui, te meizong, sephaphuhpaw, asepaw te nebaleihpaw boei kha a mang cih hae. Ranpibawi Angki

⁶Minmin nynh ranpibawi angki kha meizong, sephaphuhpaw, asepaw tuuming te nebaleihpaw boei khate kou hoy lan a rae cih hae zah sui te a ccaan cih hae.⁷Raw kya bawkunawpaw arui ccangning a um cih zah, tuh-e boeining kyatuin pynkheihlan kyngku khylan malang te nulang tuh akyngkuh cih hae.⁸Ranpibawi boeining hae kya-e ccaanpaw byccia kha mah tuh-e boeining hawte sui te thuasah, meizong, sephaphuhpaw, asepaw tuuming te akuakuhpaw nebaleihpaw boei ahoypaw te thuasah rae athua cih.⁹Oniks lung ccangning kha na lah cih zah lung hae vawlan khe Israel ccapaw hae mih min kha,¹⁰lung ccangkheit kyakhe lu taruh min, ccangpaw lung ccangkheit kyakhe tuhlaepaw lu taruh min kha atawccaw tahyhte na zei cih hae.¹¹Sui laee thya hae paw nynh tazeih a rae hae hawte, Israel ccapaw hae mih min kha lung ccangning kyakhe na zei cih hae zah sui ang kya na nung cih hae.¹²Israel ccapaw hae kha ning khyh nawlan cite tuh-e lung ccangning kha athyaapaw angki araw kya bawkunawpaw arui kyakhe na huide cih hae; te Aaron nynh tuh-e min hae kha Bawipaw malang a raw vawlan khe liathui nawlan a vawkuh cih.¹³Sui ang kha sui te na rae cih hae,¹⁴te liarue hawte ruekuhpaw arui ccangning kha sui ccipaw te na rae cih; tuh-e aruekuhpaw sui rui hae kha sui ang kyakhe na khiide cih hae. Bybe (Exo 39.8-21)

¹⁵Byapianaw bybe kha kou hoy lan na rae cih; tuh-e bybe kha sui te thuasah, meizong, sephaphuhpaw, asepaw tuuming te thuasah, nebaleihpaw boei te thuasah ranpibawi angki hawkhate na rae cih.¹⁶Tuh-e bybe asaepaw te akopaw tuh alokuh cih zah, thyh ning lan bipaw a thua cih, khaw kheit asae cih zah khaw kheit ako cih.¹⁷Bybe kyakhe aphutepaw lung kha ring pali lante na bede cih; masaty aring kya tuh rubi, topaz te karnet a thua cih hae;¹⁸ring ningnaw kya tuh emeral, safaiar te daimon a thua cih hae;¹⁹ring thumnaw kya tuh jasin, agate te amethist a thua cih hae,²⁰te ring palinaw kya tuh beril, oniks te jasper a thua cih hae; tuh-e hae tuh sui ang kyakhe nung athua cih hae.²¹Israel ccapaw hae min azeikuhpaw lung ccanghaw lae ning a um cih; tuh-e hae tuh minphuin phuin haw lae ning hanlan lung ccangkheit kyaze min minkheit ccite zeipaw a thua cih zah tazeih hawte a thua cih hae.²²Te liarue hawte ruepaw sui rui kha sui ccipaw te bybe hanlan na rae cih;²³te sui bawtary ccangning kha bybe hanlan na rae cih zah bybe apaki san ning kyakhe na tyngde cih hae.²⁴sui rui ccangning kha bybe apaki kya umpaw sui bawtary ccangning kyakhe na khii cih hae;²⁵sui rui ccangning a dung hae kha sui ang ccangning kyakhe na khii cih hae zah ranpibawi angki araw kya bawkunawpaw arui malang khe na tyngde cih.²⁶Sui bawtary ccangning kha na rae cih zah, ranpibawi angki alia lang umpaw bybe alia lang e apaki san ning kyakhe na tyngde cih.²⁷Sui bawtary ccangning kha na rae cih zah ranpibawi angki araw kya bawkunawpaw ccangning malang alia lang kyakhe na tyngde cih, tuh-e tuh ranpibawi angki kya-e ccaanpaw byccia avawlan khe tyngde athua cih.²⁸Bybe kya-e sui bawtary ccangning kha ranpibawi angki kya-e sui bawtary hae kyakhe meizong arui te khiide a thua cih, tuhcite bybe tuh byccia avawlan khe a um cih zah bybe tuh ranpibawi angki kyate phoukuh vae lan khyh.²⁹Te Bawipaw nynh Israel hae kha zungzae a ning khyh nawlan hae cite, Aaron nynh hminthyaa lungkhu lang he a ccia vae ze, byapianaw bybe kya umpaw Israel ccapaw hae mih min kha a thinlung vawlan khe a um cih.³⁰Byapianaw bybe vawlan khe Urim te Thummim kha na nung cih hae, tuh-e hae tuh Aaron nynh Bawipaw malang he a tee vae ze, a thinlung vawlan khe a um cih hae; tuhcite Aaron nynh Israel hae hanlan byapianawpaw kha a thinlung vawlan Bawipaw malang zungzae a phukuh cih. Ccangpaw Ranpibawi Boeining hae (Exo 39.22-31)

³¹Ranpibawi angki avawlan te bongpaw uccaw kha abalynte meizong khate na rae cih.³²Tuh-e angki angaelung khe lu hoihku nawlan a ua san kheit a um cih, tuh-e a ua tuh seikuh nan sah cite po voilu lan kuapaw boei te angkile a nging hawkhate mia a thua cih.³³Tuh-e uccaw alia langkhe meizong, sephaphuhpaw, asepaw te raepaw ccalee thae kha thuasah, sui khinling hae kha thuasah po voilu lan na nung cih hae.³⁴Tuh-e uccaw alia langkhe sui khinling kha ccalee thae te po voilu lan ataeleihkuh lante na sae cih.³⁵Aaron nynh silawpaw rya a law vae ze, tuh-e uccaw tuh a lawkuh cih zah hminthyaa lungkhu lang Bawipaw malang a tee vae ze thuasah, a pou vae ze thuasah khinling roi tuh thae a thua cih, tuh-e tuh Aaron a chi khyh nawlan nynh thua.

³⁶Sui ccipaw te aphepaw ccangkheit kha na rae cih zah, avawlan khe “Bawipaw hanlan Athyaapaw,” cite tazeih khiapaw hawte na zei cih.³⁷Tuh-e tuh meizong arui te pungde a malang khe na heede cih.³⁸Aaron nynh tuh-e pungde tuh a terui kya a khungkuh cih zah Israel hae nynh athyaapaw ahlu lante a pya hae paw athyaapaw pyanaw kya umpaw seinaw ccangkhakheit kha Aaron nynh a cciakhae cih; minmin nynh Bawipaw malang maehoynaw a mue ccaw hae cite tuh-e pungde tuh Aaron terui kya zungzae a um cih.

³⁹Angki kha ahoypaw law te na kua cih, te pungde kha mah ahoypaw law te na kua cih zah, taeccia kha phynbang te kou puithya lan na ccaan cih.

⁴⁰Aaron ccapaw hae mih phu-e nawlan te a puithya nawlan hae, angki, taeccia te pungde kha na raepah cih hae;⁴¹Tuh-e uccaw hae tuh na upaw Aaron te a ccapaw hae kha na lawsakuh cih hae, te ranpibawi lante kamaw kha ryalawpya khylan minmin kha chitui na thuh cih hae, ordain na pya cih hae zah na thyaasah cih hae.⁴²Maethya lan umpaw mih ngesaw kha a khaw ccaw cite minmin elang cce kyate phae kyacia athuapaw ccuhoih dynpaw kha na raepah cih hae;⁴³Aaron te a ccapaw hae nynh tungkunaw bu lungkhu lang a ccia hae ze thuasah, hminthyaa kya silawpaw rya kha law khylan silawhang pe lang a thua hae ze thuasah tuh-e ccuhoih dynpaw kha a lawkuh cih hae; tuhkhyhze tuh minmin nynh seinaw kha mih tungvaw a cciakhaesei cih hae zah a chihsei cih hae. Hynh-e hynh Aaron te a ciihan hae hanlan zungzae tynpaw phungzae a thua cih. Ranpibawi hae Ordain Pyanaw (Lev 8.1-36)

¹Aaron te a ccapaw hae nynh ranpibawi lante kamaw kha rya oun lawpya ccaw hae cite, minmin kha na thyaasah vae hae ze, mih tungvaw khe hynhcite na cyih cih. Ccaenaw um leipaw tangnuapaw anopaw sa kheit te tuutepaw anopaw sa ning kha na lah cih,²te ransi phing leipaw sanlou, ransi phing leite chitui te raepaw sanlou aphepaw te ransi phing leite chitui thuhpaw sanlou apahpaw kha na lah cih. Tuh-e hae tuh ahoy huapaw chanvuih akhui te na rae cih.³Tuh-e sanlou hae tuh sua ccangkheit kya na sang cih zah tangnuapaw te tuutepaw sa ning kha nae pya cih.⁴Aaron te a ccapaw hae kha tungkunaw bu thuakaw kalan nae cciakhae cih hae zah tui na sing cih hae.⁵Oute ranpibawi boeining hae kha na lah cih zah ranpibawi angki kya-e angkiccua, ranpibawi angki te bybe kha na lawsakuh cih zah, ranpibawi angki kya-e ccaanpaw bytaeccia kha na cciasakuh cih;⁶te a lu kyakhe pungde kha na khungsakuh cih zah athyaapaw sui aphepaw kha pungde vawlan khe na bede cih.⁷Thuhkupaw chitui kha na lah cih, te a lu vawlan na bu cih zah amaw kha na thuh cih.⁸Oute a ccapaw hae kha na ko cih hae zah angki na kisakuh cih hae,⁹taeccia kha na cciasakuh cih hae zah lukhung kha na khungsakuh cih hae; zungzae tynpaw phungzae liate ranpibawi thuanaw tuh minmin kya-e athua cih. Tuhcite Aaron te a ccapaw hae kha ranpibawi lang ordain na pya cih hae.

¹⁰Tangnuapaw kha tungkunaw bu malang na cciakhae cih. Aaron te a ccapaw hae nynh mih kuih kha tangnuapaw a lu vawlan khe a khang cih hae,¹¹te tangnuapaw kha tungkunaw bu thuakaw kya Bawipaw malang khe na theih cih,¹²tuh-e tangnuapaw chii abang kha na lah cih zah silawhang a ki hae kyakhe na kuihdung te na noi cih, te alaepaw chii balyn kha silawhang aleihpaw khe na bu cih.¹³Aring hae abongpaw atho balyn, athin kya athualaepaw te akin ccangning te akin vawlan e atho kha na lah cih zah silawhang vawlan maee te na u cih.¹⁴Thuasalama asaw, aphua te aringkua hae kha ryahmin atolang khe maee te na u cih; e tuh seishawnaw silawpaw nynh thua.

¹⁵Oute tuutepaw sa kheit kha na lah cih zah Aaron te a ccapaw hae nynh mih kuih kha tuutepaw a lu vawlan a khang cih hae,¹⁶te tuh-e tuutepaw kha na theih cih, a chii kha na lah cih zah silawhang kha po voilu lan na thei cih.¹⁷Oute tuutepaw saw kha pong na tya cih, aringkua hae te a ccu hae kha na sing cih hae zah na tya hae paw ryte a lu ryte na nungkheih cih hae,¹⁸te tuutepaw apyn balyn kha silawhang vawlan khe maee te na u cih. E tuh Bawipaw kalan maee-ute silawnaw nynh thua; e tuh lungry a tungpaw mynkhuhpaw, Bawipaw kalan maee te silawnaw nynh thua.

¹⁹Ccangpaw tuutepaw kha na lah cih; Aaron te a ccapaw hae nynh mih kuih kha tuh-e tuutepaw a lu vawlan khe a khang cih hae,²⁰te tuh-e tuutepaw kha na theih cih, a chii abang kha na lah cih zah Aaron te a ccapaw hae mih ranglang nakua kha thuasah, mih ranglang kuihpi te mih ranglang ccupi kha thuasah na noi cih hae, te alaepaw chii khate silawhang kha po voilu lan na thei cih.²¹Oute silawhang vawlan umpaw chii abang te thuhkupaw chitui abang kha na lah cih zah Aaron te a boeining kya thuasah, a ccapaw hae te mih boeining kya thuasah, na thei cih hae; tetuh Aaron te a boeining thuasah, a ccapaw hae te mih boeining thuasah athyaa vae cih.

²²Tuutepaw atho, atho athualaepaw, aringkua hae abongpaw atho, athin kya athualaepaw, akin ccangning te akin hae vawlan umpaw atho te a ranglang phae kha na lah cih hae, (pawccecize e tuutepaw tuh ordain pya nawlan mangpaw nynh thua),²³Bawipaw malang umpaw ransi phing leipaw sanlou abawng lungkhu e sanlou phe kheit, chitui te raepaw sanlou phe kheit, te sanlou apahpaw phe kheit kha na lah cih;²⁴te tuh-e hae balyn kha Aaron kuih kya te a ccapaw hae kuih kya na nung cih zah Bawipaw malang khe hangthung-hebiate silawnaw lante na hang cih hae.²⁵Tukoute mih kuih kyate tuh-e hae tuh na lah cih zah Bawipaw malang mynkhuhpaw a thua nawlan, silawhang vawlan maee-ute silawnawpaw vawlan khe maee te na u cih; tuh-e tuh Bawipaw malang maee te silawnaw nynh thua.

²⁶Aaron kha ordain pya nawlan mangpaw tuutepaw aby kha na lah cih zah Bawipaw malang hangthung-hebiate silawnaw lante na hangthung cih; tuh-e tuutepaw aby tuh na ccou lanpaw a thua cih.²⁷Aaron te a ccapaw hae kha ordain pya nawlan mangpaw tuutepaw kya-e hangthung-hebiate silawnaw lante hangthung athua hae paw aphae te aby kha na thyaasah cih.²⁸Tuh-e aby te aphae tuh Aaron te a ccapaw hae hanlan Israel hae kyate hlupaw zungzae tynpaw phungzae athua cih, pawccecize tuh-e tuh pyapaw thua zah Israel hae nynh ccawkunaw silawnaw kya-e si a lawnaw hae paw kyate Bawipaw kalan a pya hae paw pyapaw athua cih.

²⁹Aaron kya-e athyaapaw boeining kha amaw koute a ccapaw hae kalan pyasya athua cih hae; tuh-e boeining a lawkuh hae paw minmin kha chitui thuh a thua cih hae zah ranpibawi lang khang a thua cih hae.³⁰Aaron ccelang ranpibawi lang atangpaw a ccapaw nynh hminthyaa kya ryalaw khylan tungkunaw bu lungkhu lang he a tee vae ze, tuh-e boeining kha nin sari lungkhu a lawkuh cih.

³¹Ranpibawi lang ordain pyanaw hanlan mangpaw tuutepaw kha na lah cih zah, a saw kha hminthyaa kyakhe na thung cih;³²te Aaron te a ccapaw hae nynh tuutepaw saw te abawng lungkhu umpaw sanlou kha tungkunaw bu thuakaw pe khe a ae cih hae.³³Minmin kha ranpibawi lang ordain pya khylan te thyaasah khylan, seingaethyanaw hanlan mangpaw looh kha minmin nynh a ae cih hae, thuasalama tuh-e looh tuh athyaa keiccuze minmin rou nynh a ae cih hae.³⁴Ordain pyanaw elang mangpaw saw thuasah, sanlou thuasah awkhua cia alae zetuh minmin nynh maee te a u cih hae; tuh-e tuh athyaa keiccuze ae thua lan khyh.

³⁵Kaw kae pya thyhte Aaron te a ccapaw hae tungvaw na cyih cih; minmin tungvaw ordain pyapaw ranpibawi ryalaw kha nin sari lungkhu po na lah cih.³⁶Seingaethyanaw hanlan tangnuapaw sa kheit khate seithyaanaw silawnaw kha nin takyh na rae cih. Tuhcite silawhang elang seithyaanaw silawnaw kha mah na rae cih, silawhang elang seingaethyanaw he na rae vae ze, khah-e kha thyaasah khylan chitui na thuh cih.³⁷Nin sari lungkhu silawhang elang seingaethyanaw kha na rae cih zah na thyaasah cih, te silawhang tuh athyaa huaccepaw lan a tang cih; tuh-e silawhang te atungkuhpaw miakaw tuh athyaapaw lang a tang vae cih. Nin Takyh Silawnaw hae (Nam 28.1-8)

³⁸Beikhang vawlan si na law lanpaw tuh: kum kheit acihpaw tuutaw sa ning khate nin takyh zungzae si na law cih.³⁹Awkhua ccyh kya tuutaw sa kheit khate si na law cih zah zete ccyh kya ccangpaw sa kheit khate si na law cih;⁴⁰te masaty e tuutaw kha oliv chitui hin kheit kya-e pum pali pum kheit te apykuhpaw, vaekhui ahoypaw tounawpaw kaw kheit kya-e pumhaw pumkheit ryte thuasah, te niapaw silawnaw hanlan misutui hin kheit kya-e pum pali pum kheit ryte thuasah si na law cih.⁴¹Te zete ccyh kya na pya lanpaw ccangpaw tuutaw kha awkhua ccyh kya na pyapaw hawte ccathaete silawnaw te niapawte silawnaw kha na pyabia cih, tuh-e tuh Bawipaw kalan maee-ute silawnaw mynkhuhpaw nynh thua.⁴²E tyty raepaw maee-ute silawnaw hynh Bawipaw malang, tungkunaw bu thuakaw kyakhe nae she takyh kya zungzae na rae cih oh, tuh-e hmin tuh nanning kha kae tungkuh oh zah bya kae hopyanaw oh hmin athua cih.⁴³Tuin kyakhe Israel hae kha ka tungkuh cih hae zah, ka phu-enaw liate tuh-e hmin tuh thyaasah athua cih;⁴⁴tungkunaw bu te silawhang kha ka thyaasah cih; kamaw hanlan ranpibawi lante ryalawpya khylan Aaron te a ccapaw hae kha mah ka thyaasah cih hae.⁴⁵Israel hae laku khe ka um cih zah mih Pachia ka thua cih.⁴⁶Kae tuh minmin laku um khylan Izip ram kyate a poukhae hae paw mih Bawipaw Pachia nynh ka thua cipaw kha oun nyh cih hae; kae tuh mih Bawipaw Pachia nynh ka thua. Zimuin hanlan Silawhang (Exo 37.25-28)

¹Zimuin kha maee te u nawlan silawhang ccangkheit na rae cih; tuh-e tuh eri thing te na rae cih.²Tuh-e silawhang tuh dong kheit a sae cih zah dong kheit ako cih; akopaw te a saepaw alokuh cih zah dong ning ahang cih; aki hae tuh apyn te akyngkuh cih hae.³Adungparyh kha thuasah, po voilu lante pang hae kha thuasah, te a ki hae kha thuasah sui ccipaw te na thei cih; te po voilu lan arae kha sui te na mia cih.⁴Te silawhang hanlan sui bawtary ccangning kha na rae cih; tuh-e hae tuh ahawiliakuh hae paw sui te ccaankuhpaw apaki hae kaw khe na rae cih, te tuh-e hae tuh silawhang puihnawpaw ccong hae kha ruh nawlan nynh thua.⁵Eri thing te puihnawpaw ccong hae kha na rae cih zah sui te na thei cih.⁶Tuh-e silawhang kha byakin thingkua luki umpaw zokhawpaw boei malang khe na nung cih, e hmin hynh nanning kae tungkunaw oh hmin athua cih.⁷Aaron nynh maeekhua hae kha awkhua takyh a paccyn vae ze, zimuin kha tuh-e ccaboi vawlan tuin maee te a u cih,⁸te Aaron nynh zete ccyh kya zemah maeekhua hae kha a aw vae ze, silawhang vawlan khe zimuin kha a u cih. E zimuin pyanaw hynh Bawipaw malang nae she takyh kya na rae cih oh.⁹E silawhang vawlan hin athyaa leipaw zimuin kha thuasah, maee-ute silawnaw kha thuasah, ccathae silawnaw kha thuasah na rae lan khyh; niapaw silawnawpaw kha mah e silawhang vawlan na bu lan khyh.¹⁰Aaron nynh aki hae vawlan khe seingaethyanaw silawnaw kha kum kheit vaekheit a rae cih. Aaron nynh seingaethyanaw elang seishawnaw silawnawpaw sahiin chii khate kum kheit vaekheit e silawhang hanlan seingaethyanaw kha a rae cih, nae she takyh kya, hynh-e hynh na rae cih oh. Tuh-e tuh Bawipaw hanlan athyaa huaccepaw nynh thua. Hminthyaa hanlan Phua

¹¹Bawipaw nynh Moses kha hynhte a hopya:¹²Israel hae kha milu he na ria hae te, minmin nynh shethya a tung khyh ccaw hae cite, mih hiinnaw shawkhaw mee kha Bawipaw kalan mih balynte a pya cih hae.¹³Milu ria a thuapaw lu kheit cci nynh a pya lanpaw tuh: beikinnthyaa kya-e shekel thyhte shekel ngawmuh kha Bawipaw kalan pyapaw lante a pya cih (shekel ccangkheit tuh kerah ccangkuin nynh thua).¹⁴Milu rianaw kya a umpaw kum kuin te palung lang, lu kheit cci nynh Bawipaw kalan pyapaw kha a pya cih.¹⁵Nae hiinnaw hanlan Bawipaw kalan seingaethyanaw mee he na pya vae oh ze, a hoipaw nynh shekel ccangkheit laeze alunghua lante pya lan khyh zah a ryachipaw nynh mah azyahua lante pya lan khyh.¹⁶Israel hae kyate seingaethyanaw mee phua kha na lah cih zah tungkunaw bu kya ryalawnaw hanlan na mang cih; tuh-e phua tuh Bawipaw malang, nae hiinnaw shawkhawnawpaw hanlan pyapaw nynh thua cipaw ae nysah oh paw a thua cih. Sohin Pakepi

¹⁷Bawipaw nynh Moses kha hynhte a hopya:¹⁸Kuihccu singku nawlan accu mah sohin te raepaw sohin pakepi kha na rae cih. Tuh-e tuh tungkunaw bu te silawhang laku khe na nung cih zah a lungkhu khe tui na ccae cih;¹⁹tuh-e tui khate Aaron te a ccapaw hae nynh mih kuih te mih ccu kha a singkuh cih hae.²⁰Minmin nynh Bawipaw kalan maee te silawnaw kha rae khylan tungkunaw bu lungkhu lang a tee hae ze thuasah, ryalaw khylan silawhang pe lang a naeku hae ze thuasah, a chi khyh nawlan hae, tui te a singkuh cih hae.²¹A chi khyh nawlan hae, mih kuih te mih ccu kha a singkuh cih hae: tuh-e tuh Aaron te a ciihan hae hanlan mih she takyh kya zungzae tynpaw phungzae a thua cih. Thuhkupaw Chitui te Zimuin

²²Bawipaw nynh Moses kha hynhte a hopya:²³Ahoy huaccepaw amynkhuh hae paw: muratui shekel za pangaw, amynkhuhpaw sinnamon thing angankuh, tuh-e tuh shekel za ning sung pangaw, amynkhuhpaw ccazung za ning sung pangaw,²⁴beikinnthyaa kya-e shekel te toupaw kassia za pangaw, te oliv chitui hin kheit;²⁵Mynkhuhpaw a raetu nynh a rae hawte e thuhkupaw chitui hae kha na pyde cih hae zah na rae cih; tuh-e tuh athyaapaw thuhkupaw chitui a thua cih.²⁶tuh-e chitui khate tungkunaw bu te byakin thingkua,²⁷lungphae te a uccaw hae balyn, maeekhuatung te a uccaw hae, zimuin unawpaw silawhang,²⁸maee-ute silawnawpaw silawhang te a uccaw hae balyn, te pakepi te tuh-e a ccu kha na thuh cih hae;²⁹tuh-e uccaw hae tuh athyaa huaccepaw uccaw lang a tang nawlan, na thyaasah cih hae; e uccaw hae te a tungkuhpaw miakaw tuh athyaapaw lang a tang cih.³⁰Aaron te a ccapaw hae kha chitui na thuh cih hae, te minmin nynh ranpibawi hae lante ka rya kha a law ccaw hae minmin kha na thyaasah cih hae.³¹Israel hae kha, “E chitui tuh nae she takyh kya kamaw kya-e athyaapaw thuhkupaw chitui a thua cih.³²Pyn kya huataw thuhkupaw lante na mang lan khyh oh, te hynh-e te alokuhpaw ccangpaw chitui kha pydete na rae lan khyh oh; e chitui tuh athyaapaw thua zah nae hanlan athyaapaw athua cih.³³E chitui te alokuh lante a raepaw humhung zemah thuasah, thuh lan accan leipaw ccungccaw kha a thuhpaw humhung zemah thuasah a minphuin kyate vua a thua cih,” cite na hopah cih hae a cipya.

³⁴Bawipaw nynh Moses kha hynhte a hopya: Mynkhuhpaw hae stakte, onikha, galbunum te athyaapaw frankinsen kha phe angankuh lante lah hae.³⁵te zimuin a raetu nynh a raede hawte zimuin kha raetua. Loi kha na phing cih, accipaw te athyaapaw zimuin a thua cih;³⁶abang kha akhuipaw lang na phung cih zah abang kha nang te kae ah tungkuh cihnaw, tungkunaw bu kya umpaw byakin thingkua malang khe na nung cih; e zimuin tuh nae hanlan athyaa huaccepaw a thua cih.³⁷E zimuin rae hawhynhte namaw hanlan zimuin kha na rae lan khyh; e zimuin tuh Bawipaw hanlan athyaapaw cite na tua cih.³⁸E zimuin te alokuh lante amaw mang khylan a raekuhpaw humhung zemah a minphuin kyate vua a thua cih. Bezalel te Oholiab (Exo 35.30—36.1)

¹Bawipaw nynh Moses kha hynhte a hopya:²Dotua, Judah phin a thuapaw Hur ccapaw Uri a ccapaw Bezalel kha a min te ka ko vae:³Amaw kha kuih te raethyanaw aphuinphuin kyaze cyi khonaw, thyanaw te nynaw kha Pachia muisaw te ka biasah vae,⁴Pungsan aphuinphuin soithyanaw, sui, phua te sohin laee thyanaw,⁵lungrua hanlan lung awthyanaw, thingphe te aphuinphuin raethyanaw, kuih te aphuinphuin raethyanaw a hoi.⁶Tuhpiaze amaw ryte Dan phin a thuapaw Ahisamak ccapaw Oholiab kha ka khang vae; kaw kae pyapaw balyn kha minmin nynh a cyi kho nawlan hae, cyithyanaw balyn kha ka pya vae hae:⁷tungkunaw bu, byakin thingkua, tuh-e thingkua vawlan umpaw ahu, bu kya-e uccaw balyn,⁸ccaboi te a uccaw hae, athyaapaw maeekhuatung te a uccaw hae balyn, zimuin unawpaw silawhang,⁹maee-ute silawnawpaw silawhang te a uccaw hae, pakepi te a ccu,¹⁰Kou hoy lang akuakuhpaw boeining, ranpibawi rya a lawnaw hae paw, ranpibawi Aaron kya-e athyaapaw boeining te a ccapaw hae boeining,¹¹thuhkupaw chitui te hminthyaa hanlan amynthuapaw zimuin kha a rae cih hae, a cipya. Nang kha kaw kae pya thyhte minmin nynh a cyih cih hae. Sabbath Kawbya

¹²Bawipaw nynh Moses kha hynhte a hopya:¹³Namaw ccaccei nynh Israel hae kha hynhte na hopah cih hae: Bawipaw nynh, “Ka sabbath nin hae kha na nawsah cih oh, pawccecize sabbath nin tuh nae she balyn kya kae te nanning laku kya-e muihsahnaw thua zah, kae, Bawipaw nynh nanning kha kae thyaasah oh cipaw na ny nawlan oh, kae pya oh paw nynh thua.¹⁴Nanning elang sabbath nin tuh athyaapaw athua keiccuze na nawsah cih oh; sabbath nin kha a thusahpaw miakaw tuh chia a thua cih; sabbath nin kya ryalaw a lahpaw tuh a minphuin laku te vua a thua cih.¹⁵Nin taruh lungkhu ryalaw na lah cih oh, thuasalama nin sarinaw nin tuh athyaapaw haeung nin, sabbath nin thua zah Bawipaw hanlan athyaapaw nynh thua; sabbath nin kya ryalahpaw humhung zemah chia a thua cih.¹⁶Tukeiccuze Israel hae nynh sabbath nin kha a nawsah cih hae, mih she balyn kya zungzae tynpaw byakinnaw lante a nawsah cih hae.¹⁷Sabbath nin tuh kae te Israel hae laku zungzae hanlan muihsahnaw nynh thua, pawccecize Bawipaw nynh nin taruh lungkhu vaaw te laephi kha a rae, te nin sarinaw nin khe haeung zah a thaw a thuasahku,” a ci. Byakin Lungphe Phe Ning

¹⁸Pachia nynh Moses kha Sinai Mua vawlan khe bya he a hopah koute, byakinnaw lungphe phe ning, Pachia kuihdung te a zeipaw lungphe hae kha Moses kalan a pya. Sui Vaetuataw (Deu 9.6-29)

¹Moses tuh mua vawlan te rungbung leite khaw cia aro vae cipaw kha ccungccaw hae nynh he a nyh hae tuh, Aaron pe khe oun sueluakuh hae zah, “Kae malang a cceih cih paw pachia hae kha kaening hanlan oun raepah; Izip ram kyate oun poukhaepaw Moses hynh pawte acyiku vae cipaw kae nyh khyh,” a cipya hae.²Aaron nynh minmin kha, “Nae zu hae, nae ccapaw hae te nae ccanung hae nynh a huingkuh hae paw sui nakuahuing hae kha oun khah oh lah kamaw kalan oun cciakhae oh,” a cipya hae.³Tukeiccuze ccungccaw balyn nynh mih nakua kya-e sui nakuahuing hae kha khahku hae zah Aaron kalan a cciakhae hae.⁴Aaron nynh minmin kya-e sui kha lah zah a tuisah koute raenawpaw khate vaetuataw zohtuh ccangkheit kha a rae; te minmin nynh, “Pou Israel, e pachia hae tuh nang kha Izip ram kyate ae poukhaepaw na pachia hae nynh thua!” a ci hae.⁵Aaron nynh tuh-e a cyisahnaw hae kha he a muih tuh, tuh-e zohtuh malang khe silawhang ccangkheit kha a rae; te Aaron nynh, “Awkhualan tuh Bawipaw hanlan poitua nin athua cih,” a cipya hae.⁶Minmin nynh awkhualan nin kya tuh awkhua takaw te tho hae zah maee-u te pyanaw kha rae hae zah ccawkunaw silawnawpaw hae kha a thuakhae hae; te ccungccaw hae tuh ae khylan te nia khylan a haung hae, te hoysah khylan a thokuh hae.

⁷Bawipaw nynh Moses kha, “Arangte la cceihbung! Izip ram kyate na poukhae hae paw na ccungccaw hae tuh a ccouseikuh vae hae;⁸zui lan kaw ka pya hae paw laanpi kyate arangte a maeleihkuh vae hae; vaetuataw kha raekute beik hae zah tuh-e kalan khe si a lawku hae, te ‘Pou Israel, e pachia hae tuh nang kha Izip ram kyate ae poukhaepaw na pachia hae nynh thua!’ cite a hoku hae,” a cipya.⁹Bawipaw nynh Moses kha, “E ccungccaw hae tuh mih lungkhungpaw ccungccaw hae nynh thua hae cipaw ka ny vae hae.¹⁰Ka thinrianaw tuh maee lang rua zah minmin kha phe ka maemih ccaw hae, ka makhaete yn umsah; te nang kha minphuin lepaw lang kae rae cih,” a cipya.

¹¹Thuasalama Moses nynh Bawipaw a Pachia kha, “Pou Bawipaw , alepaw na huhan te thuasah, athawsaepaw na kuih te thuasah, Izip ram kyate na cciakhae hae paw na ccungccaw hae tungvaw kya pawcce na thinrianaw tuh maee lang a rua?¹²‘Israel hae kha mua hae kya chia khylan te laephipi kyate maemih khylan Bawipaw nynh a cciakhae hae paw tuh ahoy leipaw paccynnaw nynh thua,’ cite Izip hae nynh pawcce a ho cih hae? Na thin myarya rianaw kyate ngaesiku tua; na lungpaleihkuh lah na ccungccaw hae tungvaw ronaw kha thuasah nan.¹³‘Na ciihan tuh vaawlui e awsi hae zeih ka pungzae sah cih, bya kae kinpyakupaw e ram balyn hynh na ciihan hae kalan ka pya cih hae zah minmin nynh rho lang zungzae a ccou cih hae,’ cite namaw ccaccei nynh thya na lawpahku hae zah na hopya hae paw na ryalahtu hae, Abraham, Isak te Israel kha liathui hae,” cite ngia zah a hopya.¹⁴Te Bawipaw nynh a ccungccaw hae tungvaw a paccynpaw ronaw thuasah lanpaw kyate a lung a paleihku.¹⁵Oute Moses nynh nulang malang san ning maw te azeikuhpaw byakin lungphe phe ning kha ccyngte maeleihkuh zah mua kyate a cceihbung vae.¹⁶Tuh-e lungphe hae tuh Pachia nynh a raepaw thua zah lungphe hae vawlan azeikuhpaw ccaw mah Pachia nynh a zeipaw nynh thua.¹⁷Ccungccaw hae nynh a siarua hae paw kha Joshua nynh he a thae tuh, Moses kha, “Ryahmin kya rhawtukkunaw roi athan,” a cipya.¹⁸Thuasalama Moses nynh,“Tuh-e roi tuh rhawa tae hae paw roi thua khyh,a shung hae paw roi mah thua khyh;ka thaepaw roi tuhhlawsah hae paw roi nynh thua,” a ci.

¹⁹Moses nynh ryahmin pe a thua takaw te, vaetuataw zohtuh te a law hae paw kha he a muih tuh a thinrianaw kha maee lang a rua, te lungphe hae kha a kuih kyate vua zah mua leihpaw khe phe a koi hae.²⁰A raeku hae paw vaetuataw kha lah zah maee te a u, maeeloi lang phe tang lan palae tui sah zah maeeloi kha tui vawlan a phing koute Israel hae kha a niasah hae.

²¹Moses nynh Aaron kha, “E ccungccaw hae nynh na tungvaw kya paw cyih hae zahte mou, nang nynh myarya alepaw seinaw hynh mih tungvaw na thuakhae?” a cipya.²²Aaron nynh, “Ka bawipaw, na thinrianaw kha maee lang rua nan sah; e ccungccaw hae mih tuanaw tuh hoyleinaw kya nynh a um cipaw phe na ny.²³Minmin nynh, ‘Kae malang a cceih lanpaw pachia hae kha oun raepah; Izip ram kyate oun cciakhaepaw Moses tungvaw paw nynh acyihkuh cipaw kae nyh khyh,’ yn cipya hae.²⁴Kae nynh minmin kha, ‘Sui a hoipaw humhung zemah khahkuh oh!’ cite ka hopya hae; tukeiccuze minmin nynh sui kha yn pya hae, tuh-e sui tuh maee lungkhu lang ka phung zah, e vaetuataw lang yn tang,” a cipya.

²⁵Aaron nynh ccungccaw hae kha mih rhawpaw hae malang khe mih rythyte a um sah hae keiccuze mih rythyte a um hae paw kha Moses nynh he a muih tuh,²⁶Moses nynh ryahmin thuakaw kya thadyn zah, “Hummou Bawipaw kalan a pan? Ka kalan oun cceih oh!” a ci. Te Levi phin hae balyn tuh Moses pe khe a sueluakuh hae.²⁷Moses nynh Levi minphuin hae kyakhe, “Israel Pachia Bawipaw nynh hynhte a ho, ‘Nae thaloi raveih kha lawkuh oh! Thuakaw ccangkheit koute ccangkheit, ryahmin a nulang a malang phe lekuh lan cceih oh lah nanning lu kheit cci nynh nae unopaw, nae bangpaw, te nae innpaw kha theih oh,’ a ci,” cite a hopya hae.²⁸Moses nynh kaw a pya hae thyhte Levi phin hae nynh theih hae zah tuh-e nin khe ccungccaw thung thum loukaw a chih hae.²⁹Moses nynh, “Bawipaw ryalaw hanlan atunin naemaw te naemaw kha phe na thyaasahku vae oh, nanning lu kheit cci nynh nae ccapaw hae te nae uno hae kha na chia oh, tukeiccuze atunin naemaw te naemaw kha hythuanaw na thuakhaeku vae oh,” a cipya hae.

³⁰Awkhualan khe Moses nynh ccungccaw hae kha, “Myarya lepaw seinaw kha phe na rae vae oh. Thuasalama Bawipaw kalan ka la cceihthung cih zah nae seinaw hanlan seingaethyanaw kha poh ka rae kho vema,” a cipya hae.³¹Te Moses nynh Bawipaw kalan bua cceih zah, “Pou Bawipaw , e ccungccaw hae nynh myarya lepaw seinaw kha phe a rae vae hae; sui pachia hae kha mimaw hanlan phe a raeku vae hae.³²Thuasalama mih seinaw kha beih ngaethya hae; na ngaethya kho khyh hae zetuh na zeipaw ccauh kyate ka min kha the ccavae,” a cipya.³³Bawipaw nynh Moses kha, “Ka tungvaw a seipaw humhung zemah ka ccauh kyate a min kha ka the cih.³⁴Atu la cceih lah kae hopyapaw hmin kalan khe ccungccaw hae kha la cciakhae hae; ka vaw ccungccaw hae nynh na malang khe a cceih cih hae. Tuhzemah detahnaw nin yn thua vae zetuh mih seinaw hanlan de ka tah cih hae,” a ci.

³⁵Oute minmin nynh Aaron kha vaetuataw a raesah keiccu hae ze, Bawipaw nynh minmin kha shethya a sawnua hae. Sinai Mua te Pou lan Kawpyanaw

¹Bawipaw nynh Moses kha, “Namaw te Izip ram kyate na poukhae hae paw ccungccaw hae nynh e hmin hynh cciataw oh lah, ‘E ram hynh na ciihan hae ka pya cih hae,’ cite Abraham, Isak te Jakob kya bya ka kinpyaku hae paw ram lang cceih oh.²Vaaw ccungccapaw lu kheit kha na malang ka saw cih zah Kanaan hae, Amor hae, Hit hae, Periz hae, Hiv hae, te Jebus hae kha ka dee cih hae.³Mateitui te khoilutui a luanaw ram lang cceih oh; thuasalama nanning laku ka cceihbua lan khyh, nanning tuh lungkhung hae paw na thua oh keiccuze laanryng khe kae maemihsei cih oh,” a ci.

⁴Ccungccaw hae nynh tuh-e byaccih paw kha a thae hae tuh, myarya mih ngaethah zah hung sanmah ccaankuh khyh hae.⁵Bawipaw nynh Moses kha, “Israel hae kyakhe, ‘Nanning tuh lungkhung hae paw nynh na thua oh; nanning laku sohsoh ka cciabua lanze, phe kae maemihsei cih oh. Tukeiccuze nae tungvaw pawmou ka cyih cih cipaw ka ny nawlan, na ccaankunaw oh paw uccaw hae kha khahkuh oh,’ cite hopah hae,” a cipya.⁶Tukeiccuze Israel hae nynh Horeb Mua kyakhe a ccaankunaw hae paw uccaw hae kha a khahku vae hae. Ryahmin Atolang e Buu

⁷Moses nynh bu kha leih lah zah ryahmin atolang asawnaw khe a sak; aning nynh bu kha tungkunaw bu cite min a phu. Te Bawipaw a ccungpaw miakaw nynh ryahmin atolang umpaw tungkunaw bu kalan khe a cceih hae.⁸Moses nynh bu kalan a ccia takyh vae ze, ccungccaw balyn nynh thokuh hae zah lu kheit ccite mih bu thuakaw kyakhe thadyn hae zah Moses nynh bu lungkhu lang a tee mawlaezung amaw kha a do hae.⁹Moses nynh bu lungkhu lang he a tee tuh, maeking tung nynh yn rungbung zah bu thuakaw kyakhe a thadyn, te Bawipaw tuh Moses te bya a hokuh hae.¹⁰Ccungccaw balyn nynh bu thuakaw kya a thadynpaw maeking tung kha he a muih hae tuh, mih balynte thokuh hae zah mih bu thuakaw kyakhe pong a bakhung hae.¹¹Te Bawipaw nynh Moses kha ruiban lu kheit te byahoku hawte hawiliakute bya a hokhae. Tukoute Moses tuh ryahmin lang a ki; thuasalama a rya bawmtu, ccangvaepaw Nun ccapaw Joshua tuh bu kyate pou khyh. Moses kyate Hopianaw

¹²Moses nynh Bawipaw kha, “ ‘E ccungccaw hae hynh cciakhae hae,’ cite nae hopya; thuasalama kamaw ryte hummou na saw cih cipaw nae nysah khyh. Tuhzemah, ‘Nang kha na min te phe kae ny, ka malang maehoynaw na mue vae,’ cite nae hopya.¹³Atu namaw malang maehoynaw ka mue vae lan athua ze, namaw kha kae ny nawlan te na malang maehoynaw ka mue nawlan, na laanpi kha yn muihsah. E minphuin tuh na ccungccaw hae nynh thua cipaw kha tuabia tua,” a cipya.¹⁴Te Bawipaw nynh, “Nang kha kae cciakhae cih zah lung ngaengannaw kae pya cih,” a cipya.¹⁵Te Moses nynh, “Na cciabua khyh zetuh, e hmin kyate kaening kha oun cciasah nan.¹⁶Kaening kha nae cciakhae khyh zetuh, kae te na ccungccaw hae nynh na malang maehoynaw kae mue cipaw kha pawtemou ny kho a thua cih? Tuhcite kae te na ccungccaw hae tuh laephi vawlan umpaw ccungccaw miakaw te kae lae cih,” a cipya.

¹⁷Bawipaw nynh Moses kha, “Nae ngia hawte ka cyih cih; pawccecize ka malang maehoynaw na mue zah nang kha na min te kae ny,” a cipya.¹⁸Moses nynh, “Na phu-enaw kha beih yn muihsah tua,” cite a ngia.¹⁹Bawipaw nynh, “Ka hoynaw balyn kha na malang ka cciasah cih, te ‘Bawipaw’ min kha na malang ka siakhae cih; thaw ka cci rypaw kha thaw ka ccih cih zah, ngaethya ka umsah cih paw kha ngaethya ka umsah cih.²⁰Thuasalama ka mae kha na muih kho lan khyh; pawccecize ka mae a muihpaw tuh humhung zemah hiin lan khyh,” a ci.²¹Tukoute Bawipaw nynh, “Lung vawlan na thadyn cihnaw ka pe khe hmin san kheit a um.²²te ka phu-enaw po a ccia lyakhe nang kha lungpi laku kya kae nung cih zah, ka ccia kou makhia ka kuih te phang kae bong cih;²³oute ka kuih kha ka lah cih zah ka nulang khate nae muih cih; thuasalama ka mae tuh nae muih lan khyh,” a cipya. Moses nynh Lungphe Thawpaw A Rae (Deu 10.1-5)

¹Bawipaw nynh Moses kha, “Langmaw e lungphe hae hawte lungphe phe ning kha awtua, na koipaw langmaw e lungphe hae vawlan umpaw bya hae kha khah-e lungphe hae vawlan khe ka zei cih.²Awkhua khe paccynkute na um cih, Sinai Mua lang awkhua khe na kaethung cih zah mua dung kya ka malang khe na um cih.³Namaw ryte humhung mah kaethung bua lan khyh, mua pynpi kya humhung mah na langsakuh lan khyh hae; e mua a malang kyakhe tuu hae, vaetua hae kha na paesah lan khyh hae,” a cipya.⁴Tukeiccuze Moses nynh langmaw e lungphe hae hawte lungphe phe ning kha a aw; te Bawipaw nynh kaw a pya thyhte Moses tuh awkhua khe Sinai Mua vawlan kaethung zah lungphe phe ning kha a kuih kya a ccyng.⁵Bawipaw tuh maeking te yn rungbung zah tuin kya Moses pe khe thadyn zah Bawipaw min kha a siakhae.⁶Bawipaw tuh Moses malang po cceih zah,“Bawipaw , Bawipaw ,Ngaethyaumsahnaw tethawccinaw a hoipaw Pachia,a lungsae zahatynpaw sungsahnaw te thuasah,lungzinaw te thuasah phe abeihpaw,

⁷she athong-asan kyaciaatynpaw sungsahnaw kha a tynsahpaw,hoyleinaw, cyiseinaw teseinaw kha a ngaethyapaw,tuhzemah seimenaw khahuatawte a ngaethya leipaw,nungpaaw hae hoyleinaw khaccaaw hae tungvaw teccaawsenopaw she thumnaw teshe palinaw kyacia liarunawa mangpawBawipaw ,”cite a siakhae.⁸Te Moses nynh a lu kha laephi kalan palou bakhung zah a beik.⁹Aning nynh, “Pou Bawipaw , namaw malang maehoynaw ka mue zetuh kaening ryte beih cceihbua. E ccungccaw hae tuh mih lungkhungpaw a thua hae zemah kae hoyleinaw te kae seinaw kha oun ngaethya lah namaw rho lante beih oun lawkuh,” a cipya. Byakinnaw Thawpaw (Exo 23.14-19; Deu 7.1-5, 16.1-17)

¹⁰Bawipaw nynh, “Byakinnaw kha ka rae. Laephi vawlan balyn kya te pawpaw minphuin kya mah rae a thua boi leipaw ngaeangnaw kha na ccungccaw balyn malang ka rae cih; na umnaw e ccungccaw balyn nynh Bawipaw ryalawnaw kha a muih cih hae; pawccecize tuh-e tuh namaw hanlan ka rae lanpaw ri lan umpaw uccaw nynh thua.

¹¹Atunin kae pya lanpaw kawbya kha na zui cih. Amor hae, Kanaan hae, Hit hae, Periz hae, Hiv hae te Jebus hae kha na malang te ka dee cih hae.¹²Na cceih cihnaw ram kya umpaw ccungccaw hae ryte byakinnaw kha na rae khyh nawlan raeringkuh, tuhkhyhze tuh tuh-e byakinnaw tuh nanning laku kya kaang lang a tang cih.¹³Minmin kya-e silawhang hae kha na ropah cih hae, athyaapaw mih tungpi hae kha na khyapah cih hae zah athyaapaw mih thing hae kha na tyapah cih hae,¹⁴(ccangpaw pachia kha na beik lan khyh, pawccecize a min “Eiumthyapaw,” cikuhpaw Bawipaw tuh a eiungthyapaw Pachia nynh thua.)¹⁵Tuh-e ram kya umpaw ccungccaw hae te byakinnaw na rae lan khyh, pawccecize mih pachia hae kalan mimaw te mimaw kha ohhuakunaw rae hae zah silawnaw a rae vae hae ze, minmin laku e lukhakheit nynh nang kha ae ko cih zah silawnawpaw kha na aesei cih.¹⁶Mih ccanung hae kha na ccapaw hae zu lang na dypasei cih hae zah mih pachia hae kalan ohhuakunaw a rae hae paw mih ccanung hae nynh na ccapaw hae kha mah mih pachia hae kalan ohhuakunaw a raesahsei cih hae.

¹⁷Namaw hanlan laeekute pachia hae kha na raekuh lan khyh.

¹⁸Ransi phing leipaw sanlou poi kha na tynsah cih oh. Kaw kae pya thyh oh te, Abib sawpaw kya accan ccyh kyakhe nin sari lungkhu ransi phing leipaw sanlou kha na ae cih oh; pawccecize Abib sawpaw kyakhe Izip ram kyate na pou oh.

¹⁹Ccatawccaw te sahiin thanty tuh ka uccaw nynh thua; na sahiin-awvaw kya-e a thang typaw pise balyn, vaetua thuasah, tuu thuasah ka uccaw nynh thua.²⁰Lann a than typaw kha tuh tuutaw te na shawkhaw cih, na shawkhaw khyh ze a nging kha na khya cih. Na saah typaw ccapise balyn kha na shawkhaw cih.
Humhung mah kuih ccakaete ka malang langkuh lan khyh.

²¹Nin taruh lungkhu rya na lah cih, thuasalama nin sarinaw nin kya na haeung cih; looh ccou ccyh kya te rue ccyh kya zemah na haeung cih.²²Lonaw hae poi, chanvuih rue ccyh kya-e masaty athae poi te kum thang ccyh kyaze looh ccakhung poi kha na tua cih.²³Nanning pise balyn tuh kum kheit ze vae thum Bawipaw Pachia, Israel Pachia malang na langkuh cih oh.²⁴Minphuin ccangpaw hae kha nae malang te ka dee cih hae zah nae ramri kha ka kosah cih; kum kheit ze vae thum Bawipaw nae Pachia malang langku khylan na ccia vae oh ze, nae ram kha hung nynh sanmah duaa lan khyh.

²⁵Si nae lawnaw oh paw a chii kha ransi phingkuhpaw sanlou ryte nae pyakheih lan khyh oh, te kawtaw poi kya-e silawnawpaw kha awkhualan awkhua cia na laesah lan khyh oh.

²⁶Na laephi kya masaty athae hae paw kya-e ahoy huaccepaw kha Bawipaw na Pachia inn lang na thuakhae cih.
Tuutaw kha a pi mateitui te na thungde lan khyh.

²⁷Bawipaw nynh Moses kha, “E bya hae hynh zei hae; e bya hae thyhte nang te Israel hae ryte byakinnaw kha ka rae vae,” a cipya.²⁸Moses tuh Bawipaw ryte nin sung pali te zi sung pali tuin kya a um; looh mah ae khyh zah tui mah neih khyh. Lungphe hae vawlan khe byakinnaw bya hae kawbya ccanghaw, kha a zei. Moses Mae

²⁹Moses tuh Sinai Mua kyate yn rungbung. Moses nynh a kuih kya byakin lungphe phe ning kha yn ccyng zah yn rungbung lyakhe Pachia te bya a hoku hae keiccuze a mae a akpaw kha nyhkuh khyh.³⁰Aaron te Israel hae nynh Moses mae phaephae akpaw kha he a muih hae tuh, a pe lang naeku lan a rih hae.³¹Thuasalama Moses nynh minmin kha a ko hae, te Aaron te Israel zapi cciakhaetu hae tuh amaw kalan naeku hae zah Moses nynh minmin kha bya a beih hae.³²Tukoute Israel hae balyn tuh Moses pe lang a naekuh hae, te Bawipaw nynh Sinai Mua kya a hopyapaw kawbya balyn kha a pya hae.³³Moses nynh bya he a hopah kou hae te, mae bongkupaw boei khate a mae kha a bongku;³⁴Thuasalama Moses nynh byahoku khylan Bawipaw malang he a tee takyhte, yn toiku makhia mae bongkupaw boei kha a lyngku; te aning nynh he yn toikuh te, Bawipaw nynh kaw a pyapaw balyn kha Israel hae kya a hopya hae,³⁵Israel hae nynh Moses mae a akpaw kha a muih hae; Bawipaw te byahoku khylan a tee makhia tuh, Moses nynh mae bongkupaw boei kha a mae kya bua a bongku. Sabbath hanlan Phunglang hae

¹Moses nynh Israel hae zapi kha pum hae zah hynhte a hopya hae: E hynh Bawipaw nynh cyi lan kaw ae pya oh paw nynh thua:

²Nin taruh lungkhu rya na lah cih oh, thuasalama nin sarinaw nin tuh Bawipaw hanlan athyaapaw sabbath, aphutepaw haeung nin nynh thua; tuh-e nin kya ryalaw ccangkhakheit a lahpaw humhung zemah chia a thua cih.³Nanning nynh na umnaw oh balyn kya sabbath nin maee na tua lan khyh oh. Beikbu Rae nawlan Paccynnaw (Exo 25.1-9)

⁴Moses nynh Israel hae zapi kha hynhte a hopya hae: E tuh Bawipaw kawpyapaw nynh thua:⁵Bawipaw kalan ahlu na pya cih oh; hysahnaw thinlung te Bawipaw kalan ahlu a pya rypaw miakaw nynh sui, ngun, sohin;⁶meizong, sephaphuhpaw, asepaw tuuming, uccaw nebaleihpaw; miaa ming,⁷anangkuhpaw tuutepaw phua, saphua hoypaw, eri thing,⁸maee aw nawlan chitui, thuhkupaw chitui te amynthuapaw zimuin hanlan amynkhuhpaw aphuinphuin,⁹oniks lung hae, te ranpibawi angki kya te bybe kya be lanpaw aphutepaw lung kha a hlu cih.

¹⁰Nanning lakuze ryalaw apuakuh hae paw balyn tuh oun cceih cih hae zah, Bawipaw nynh rae lan kawpyapaw balyn kha a rae cih hae, tuh-e uccaw hae tuh: beikbu,¹¹a bu te avawlan dawpaw, beikbu bawnawpaw sui hae te beikbu pang hae, pangccaw hae, a tung hae, a ccusy hae;¹²thingkua te puihnawpaw ccong hae, thingkua ahu, riadaw nawlan zokhawpaw boei,¹³ccaboi te puihnawpaw ccong hae te a uccaw hae balyn, Umkhaenaw Sanlou;¹⁴maee aw nawlan maeekhuatung, tuh-e a uccaw hae te a maeekhua hae, maee aw nawlan chitui;¹⁵zimuin unawpaw ccaboi te puihnawpaw ccong hae, thuhkupaw chitui te zimuin, beikbu thuakaw lante zokhawpaw boei;¹⁶maee-u silawnaw ccaboi, sohin pasaryh, puihnawpaw ccong hae, tuh-e ccaboi a uccaw hae balyn, kuih singkunawpaw pakepi te a tung;¹⁷voidu, a tung hae te a ccusy hae, sakoih lante zokhawpaw boei;¹⁸beikbu ccungngue hae te voidu ccungngue hae te arui hae te tuh-e kya-e liarue hae;¹⁹hminthyaa kya ryalaw nawlan mangpaw, kou hoy lan kuakuhpaw boeining hae, tuh-e hae tuh ranpibawi Aaron hanlan athyaapaw boeining, Aaron ccapaw hae boeining, ranpibawi rya a law vae hae ze a mang hae paw nynh thua. Beikbu elang Ahlu hae

²⁰Tukoute Israel hae zapi balyn tuh Moses umnaw kyate a cceih vae hae.²¹A lungthopaw miakaw te hysahnaw thinlung a hoipaw miakaw nynh tungkunaw bu kya mang lanpaw, ryalawnaw balyn kya mang lanpaw te athyaapaw boeining hae kya mang lanpaw Bawipaw pya lanpaw ahlu kha oun ccyng hae zah oun thua hae.²²Hysahnaw thinlung a hoipaw pise hae te nopi hae balyn nynh by kya ccaankunawpaw hae, nakuahuing hae, naduhhuing hae, tazeih kuihpu hae, si lungmung hae, sui aphuinphuin kha oun ccyng hae zah lu kheit cci nynh Bawipaw kalan sui kha oun hlu hae.²³Apiazon, sephaphuhpaw, asepaw, nebaleihpaw boeining, miaa ming, anangkuhpaw tuutepaw phua te nebaleihpaw saphua phuinkhakheit kha a hoipaw miakaw nynh ccarou oun ccyng hae.²⁴Ngun te sohin a hlu khopaw miakaw nynh ngun te sohin kha Bawipaw ahlu lang oun ccyng hae; ryalawnaw kya mang lanpaw eri thing a hoipaw miakaw nynh eri thing kha oun ccyng hae.²⁵Nopi boeikua thyapaw balyn nynh mih kuih te a kua hae, te a kua hae paw meizong, sephaphuhpaw, asepaw te nebaleihpaw boei kha oun ccyng hae;²⁶Mih thinlung nynh mih cyithyanaw kha mang lan mih lung a thosah hae paw nopi balyn nynh miaa ming kha law lang a rae hae.²⁷Te cciakhaetu hae nynh ranpibawi boeining kya te bybe kya bede lanpaw oniks lung te aphutepaw lung hae kha thuasah,²⁸maee awnaw hanlan, thuhkupaw chitui hanlan te amynthuapaw zimuin hanlan amynkhuhpaw aphuinphuin te chitui kha thuasah oun ccyng hae.²⁹Bawipaw nynh Moses kyate cyi lan kaw a pya hae paw ryalaw hanlan kha mih thinlung nynh lungthonaw a pya hae paw Israel pise hae te nopi hae nynh ccangkhakheit kha hysahnaw thyhte ahlu lante Bawipaw kalan oun ccyng hae. Bezalel te Oholiab (Exo 31.1-11)

³⁰Oute Moses nynh Israel hae kha hynhte a hopya hae: Ngaetua oh, Judah phin a thuapaw Hur ccapaw Uri a ccapaw Bezalel kha Bawipaw nynh a min te a ko vae;³¹Bawipaw nynh Bezalel kha Pachia muisaw te phe biasah zah, kuih te raethyapaw aphuinphuin kha raethyanaw, cyi khonaw te nynaw kha thuasah,³²pungsan soi kho nawlan nythyanaw, sui, ngun te sohin kha kou puithya lan raethyanaw kha thuasah,³³lung kha awthyanaw te beethyanaw, thing suethyanaw te kuih te raethyanaw aphuinphuin kha thuasah a pya vae.³⁴Bezelel te Dan phin a thuapaw Ahisamak ccapaw Oholiab kyakhe milae hae ccangpya thyanaw kha a pya hae.³⁵Zeithyapaw ryalaw, pungsan soithyanaw ryalaw, meizong, sephaphuhpaw, asepaw te asiapaw, nebaleihpaw laaw te boei kya haetapaw soithyanaw ryalaw, boeikua thyanaw ryalaw, aphuinphuin cyithyanaw te pungsan soithyanaw kha a pya hae.

¹Bezalel, Oholiab te beikinnthyaa saknaw kya ryalaw ccangkhakheit kha pawte cyi lan cipaw Bawipaw nynh cyithyanaw te nythyanaw a pya hae paw miakaw nynh Bawipaw kawpyapaw balyn thyhte a lah cih hae.

²Bezalel, Oholiab te Bawipaw nynh cyithyanaw pya hae zah ryalaw khylan ccia lan a thinlung kya lungthonaw a hoipaw miakaw kha Moses nynh a ko hae;³beikinnthyaa kya ryalaw nawlan cite Israel hae nynh lungthote oun ccyng hae paw ahlu balyn kha minmin nynh Moses kyate a mue hae. Lungthote a pya hae paw ahlu kha Moses kalan awkhua takyh palei a thuakhae ung hae,⁴beikinnthyaa kya ryalaw aphuinphuin lah hae paw acyihthya hae paw balyn tuh rya a lawnaw hae kyate bebe oun cceih hae zah,⁵Moses kyakhe, “Bawipaw nynh cyi lan kaw yn pyapaw rya kha law nawlan cite ccungccaw hae nynh oun ccyng hae paw tuh azaw laelan alunghua vae,” a cipya hae.⁶Tukeiccuze Moses nynh, “Pise nynh mah, nopi nynh mah beikinnthyaa hanlan pawpaw ahlu mah hlu nan vae oh,” cite kawpya hae zah ryahmin lang balyn a hosahpya hae. Tukeiccuze ccungccaw hae kha ahlu pya lan a khee hae;⁷pawccecize minmin nynh ahlu kha ryalaw balyn law nawlan azaw laelan a la pya vae hae. Beikbu Saknaw (Exo 26.1-37)

⁸Ryalahtu hae lakuze ryalaw apuakuh hae paw nynh beikbu kha zokhawpaw boei zung haw te a rae hae; tuh-e boei hae tuh nebaleihpaw laaw asiapaw, meizong, sephaphuhpaw, asepaw khate a kua hae paw thua zah tuh-e boei hae kyakhe cherubim kha kou puithya lan a soi hae.⁹Tuh-e zokhawpaw boei zung kheit cci tuh dong kuin lae tarya sae zah dong pali ako; tuh-e boei hae tuh asaepaw te akopaw phe lokuh hae.

¹⁰Tuh-e boei zung pangaw tuh pynkheihlan piade hae zah ccangpaw zung pangaw kha mah pynkheihlan a piade hae.¹¹Masaty a huidepaw boei hae kyaze atelangkou umpaw boei dung kyakhe meizong bawtary hae kha a rae hae; tuhawte ccangningnaw a huidepaw boei kyaze atelangkou umpaw boei dung kyakhe bawtary hae kha a rae hae;¹²masaty e boei zung kheit kyakhe bawtary sung pangaw a rae, te a huidepaw boei ccangningnaw kyaze atelangkou umpaw boei dung kyakhe bawtary sung pangaw kha a rae; bawtary hae kha ccangkheit te ccangkheit a hawiliasakuh hae.¹³Te bawnawpaw sung pangaw kha sui te rae hae zah, tuh-e te zokhawpaw boei hae kha a piade hae; tukeiccuze beikbu tuh bu kheit lang a tang vae.

¹⁴Moses nynh beikbu avawlan te bong lanpaw kha miaa ming te boei zung haw lae kheit a rae.¹⁵Tuh-e boei zung kheit cci tuh dong sung thum sae zah dong pali ako; tuh-e boei zung haw lae kheit tuh asaepaw te akopaw a lokuh hae.¹⁶Zung pangaw kha pynkheihlan piade zah zung taruh kha pynkheihlan a piade.¹⁷Pynkheihlan a huidepaw kyaze atolang kou umpaw boei dung kyakhe bawtary sung pangaw kha a rae, te ccangpaw a huidepaw boei a dung kyakhe bawtary sung pangaw kha a rae.¹⁸Ahuidekuhpaw boei hae kha pynkheihlan piade nawlan bawnawpaw sung pangaw kha sohin te a rae, tuhteze nynh bu kheit lang a tang kho cih.¹⁹Te bu bong lanpaw anangkuhpaw tuutepaw phua kha thuasah, bu avawlankou kya bong lanpaw kha ahoypaw saving kha thuasah a rae.²⁰Oute eri thing te a thadynpaw pang hae kha beikbu hanlan a rae.²¹Pang phe kheit cci tuh dong haw sae zah dong kheit khoi a ko.²²Pang hae tuh pynkheihlan piade nawlan pang phe kheit cci kyatuin ruhpaw pangreih ccangning cci a um; beikbu kya-e pang hae balyn hanlan tuhcite a rae.²³Beikbu hanlan pang hae kha rae zah alia lang hanlan pang phe haw kha a rae;²⁴Ngun te raepaw ccusy sung pali kha pang phe kuin akaw khe a rae, tuh-e tuh pang phe kheit kya umpaw pangreih ccangning hanlan ccusy ccangning cci nynh thua.²⁵Beikbu palung lang kyakhe pang phe kuin hanlan²⁶ngun te raepaw ccusy sung pali kha, pang phe kheit akaw khe ccusy ccangning cci a um lante a rae.²⁷Beikbu a nulang, niccaw langsang khe pang phe taruh kha a rae.²⁸Beikbu a nulang umpaw apaki hae hanlan pang phe ning kha a rae.²⁹Tuh-e pang hae aleihpaw kya tuh lahsahku hae zah a dung lang umpaw masaty e bawtary kyakhe a besahku hae; aning nynh apaki san ning hanlan pang phe ning kha tuhcite a rae.³⁰Ou tuhte pang phe tarya kya tuh, pang phe kheit cci kyaze ccusy ccangning ccite, ngun te raepaw ccusy haw lae taruh a um.

³¹Te beikbu voikheit lang umpaw pang hae hanlan eri pangccaw ccaw pangaw kha a rae,³²te beikbu kyaze ccangpaw voikheit lang umpaw pang hae hanlan pangccaw ccaw pangaw kha rae zah beikbu anulang, niccaw lang umpaw pang hae hanlan pangccaw ccaw pangaw kha a rae.³³Voikheit lang kyate voikheit lang kyacia pang hae angankunaw kya hue lanpaw angaelung accaw kha a rae.³⁴Pang hae kha sui te a thei hae, te pangccaw hae ruhnaw lanpaw bawtary hae kha mah sui te a rae, tuh-e pangccaw hae kha sui te a thei hae.

³⁵Zokhawpaw boei kha meizong, sephaphuhpaw te asepaw law asiapaw te kuakuhpaw boei ahoypaw khate rae zah tuh-e boei kyatuin cherubim azuh kha kou puithya lan a soi.³⁶Tuh-e boei zo nawlan eri thingtung tung pali kha rae zah sui te a thei hae; tuh-e tung hae kyatuin bawnawpaw hae kha sui te a rae, te tung hae hanlan ngun te raepaw ccusy ccangpali kha mah a rae.³⁷Buu thuakaw kya zokhaw lanpaw kha meizong, sephaphuhpaw, asepaw, nebaleihpaw laaw asiapaw te akuakuhpaw khate zokhawpaw boei kha rae zah, phynbang te kou puithya lan a ccaan;³⁸te tuh-e boei hanlan tuh bawnawpaw a umpaw thingtung tung pangaw kha a rae. Tung adung lang te aleihpaw lang kha sui te a thei hae, thuasalama tung accusy ccangpangaw kha tuh sohin te a thei. Byakin Thingkua Raenaw (Exo 25.10-22)

¹Bezalel nynh eri thing te thingkua kha a rae; tuh-e tuh dong ning khoi asae, dong kheit khoi ko zah dong kheit khoi ahang.²Thingkua alungkhu te atolang kha sui ccipaw te a thei, te arae kha po voilu lan sui te a mia.³Thingkua ccu ccupali kyakhe sui bawtary ccangpali kha voikheit lang ze bawtary ccangning cci a rae.⁴Eri thing te puihnawpaw ccong kha rae zah sui te a thei,⁵te thingkua kha puih nawlan thingkua voikheit voikheit lang umpaw bawtary hae kyakhe puihnawpaw ccong hae kha a ruh.⁶Thingkua ahu kha sui ccipaw te a rae; tuh-e tuh dong ning khoi sae zah dong kheit khoi ako.⁷Ahu adung san ning kyakhe cherubim ccangning kha sui te rae zah a deihping.⁸ccangkheit kha thingkua hu voikheit lang dung khe rae zah, ccangpaw ccangkheit kha voikheit lang e adung khe a rae; ahu te phang kyngkuh lante a raede hae.⁹Cherubim mih sake hae tuh vaawlang khe daw hae zah, thingkua ahu kha mih sake hae khate a dawpya hae. Ccangkheit te ccangkheit hawiliaku hae zah, thingkua hu kha a do hae. Umkhaenaw Sanlou hanlan Ccaboi (Exo 25.23-30)

¹⁰Asaepaw dong ning, akopaw dong kheit, te dong kheit khoi ahangpaw ccaboi kha mah eri thing te a rae.¹¹Tuh-e ccaboi kha sui ccipaw te thei zah arae kha po voilu lan sui te a mia.¹²Ccaboi arae kha zapae ako lante po voilu lan rae zah sui te a ccaan.¹³Bawtary ccangpali kha sui te rae zah, tuh-e hae tuh ccaboi ccu ccupali kya-e apaki ki pali kyakhe atyn lante a raede.¹⁴Ccaboi puih nawlan mangpaw accong hae ruhnawpaw bawtary hae tuh ccaboi arae miakuhpaw te a naekuh hae.¹⁵Ccaboi puih nawlan accong hae kha eri thing te rae zah sui te a thei.¹⁶Te ccaboi vawlan a um lanpaw, sui ccipaw te a raepaw angphe, zimuin hanlan pakephepaw hae te pakekhupaw hae, te niapaw silawnawpaw hae kha sua nawlan banang lepaw te ccekoh hae kha a rae. Maeekhuatung (Exo 25.31-40)

¹⁷Maeekhuatung kha mah sui ccipaw te a rae. Maeekhuatung a ccusy te akaran hae tuh rae zah a deihpingpaw nynh a thua hae; a banang hae, haetapaw pawnahpaw hae, akary hae kha atungpi te ccangkheit lang raede a thua hae.¹⁸Maeekhuatung kyatuin voikheit voikheit lang asaepaw akaran ccangtaruh a um, akaran ccangthum tuh voikheit lang hawi hae zah, ccangpaw akaran ccangthum tuh ccanglang a hawi hae;¹⁹akaran ccangkheit cci kyatuin almon haetapaw te alokuhpaw banang ccangthum kha apaw pawnahpaw te apawkary ryte a um hae, te ccangpaw akaran kya mah tuhcite a um kalang hae— ou tuhcite akaran ccangtaruh tuh maeekhuatung kyate a po hae.²⁰Maeekhuatung kya mah almon haetapaw te alokuhpaw banang ccangpali um zah ccangkheit cci tuh apaw pawnahpaw hae te apawkary hae a um hae.²¹Akaran hae bua thum kya-e akaran ccangkheit cci leihpaw kyatuin apaw pawnahpaw ccangkheit cci a um.²²Apaw pawnahpaw hae te akaran hae tuh maeekhuatung te pynkheihlan kyngkuh hae zah, maeekhuatung balyn tuh sui ccipaw te rae zah, a deihpingpaw nynh thua.²³Maeekhuatung hanlan maeekhua ccangsari, tetakia te maeloi nungnawpaw kha sui ccipaw te a rae.²⁴Maeekhuatung te a uccaw hae balyn kha sui ccipaw pung za kheit te a rae. Zimuin Silawhang Raenaw (Exo 30.1-5)

²⁵Dong kheit sae zah dong kheit akopaw zimuin hanlan silawhang kha eri thing te a rae; tuh-e tuh asaepaw te akopaw phe lokuh zah dong ning ahang; a ki hae tuh silawhang te po kyngkuh hae.²⁶Tuh-e silawhang adungparyh, voikheit voikheit lang po voilu lan te a ki hae kha sui ccipaw te a thei; te silawhang arae kha po voilu lan sui te a ccaan,²⁷silawhang voikheit voikheit lang, sui te arae miapaw zakaw khe bawtary ccangning kha sui te a rae, tuh-e tuh silawhang puihnawpaw ccong hae kha ruh nawlan nynh thua.²⁸Te puihnawpaw ccong hae kha eri thing te rae zah sui te a thei. Thuhkupaw Chitui te Zimuin (Exo 30.22-38)

²⁹Athyaapaw chitui thuhkuhpaw kha thuasah, amynkhuhpaw zimuin ccipaw kha thuasah zimuin raetu hae nynh a rae hae hawte a rae. Maee-u te Pyanawpaw Silawhang (Exo 27.1-8)

¹Maee-ute silawnawpaw silawhang kha mah eri thing te a rae; tuh-e tuh dong pangaw sae zah dong pangaw ako; asaepaw te akopaw phe lokuh zah dong thum ahang.²Apaki ki pali vawlan khe a ki hae kha a rae; a ki hae tuh silawhang te ccangkheit lang po akyngkuh lante sohin te a thei.³Beikhang kya-e uccaw hae balyn, buhhaw nungnawpaw ang hae, luanawpaw kawpia hae, pakepi hae, sivaw ccungthy te maee-e nungnawpaw pake hae kha sohin te a rae.⁴Beikhang hanlan pasaryh ccangkheit kha a ccu zakaw angankunaw khe sohin khate a rae.⁵Puihnawpaw ccong hae kha ruh nawlan sohin pasaryh apaki ki pali kyakhe bawtary ccangpali kha a rae;⁶puihnawpaw ccong hae kha eri thing te rae zah sohin te a thei.⁷Te silawhang voikheit voikheit lang umpaw bawtary hae kyakhe puihnawpaw ccong hae kha puih nawlan a ruh hae; tuh-e silawhang tuh alungkhu kya akua a um lante thingphe te a rae.

⁸Tungkunaw bu thuakaw kya ryalah hae paw nopi hae kya-e sohin muinsado khate sohin pakepi te sohin ccu kha a rae. Beikbu Voidu Raenaw (Exo 27.9-19)

⁹Beikbu voidu kha a rae; voidu alia lang zokhawpaw kha nebaleihpaw laaw te kuakuhpaw ahoypaw boei khate dong za kheit asae lante arae;¹⁰beikbu tung tungkuin te ccusy ccangkuin tuh sohin te raepaw nynh thua hae, thuasalama tung kya umpaw bawnawpaw hae te ccong hae kha tuh ngun te raepaw nynh thua hae.¹¹Palung langkhe dong za kheit asaepaw zokhawpaw a um; tuh-e atung tung kuin te ccusy ccangkuin tuh sohin nynh athua hae, thuasalama tung kya-e bawnawpaw hae te ccong hae tuh ngun nynh athua hae.¹²Niccaw lang e zokhawpaw boei tuh dong sung pangaw sae zah atung tung haw te ccusy ccanghaw a um; tung kya-e bawnawpaw hae te mih ccong hae tuh ngun nynh athua hae.¹³Nithua lang a sangpaw voidu a malang tuh dong sung pangaw ako cih.¹⁴Sakoih voikheit lang kya zokhawpaw boei tuh dong haw lae pangaw sae zah, tung tungthum te ccusy ccangthum a um hae.¹⁵Ccangpaw voikheit lang mah tuhmaminte a um; voidu voikheit voikheit lang umpaw sakoih kya tuh dong haw lae pangaw asaepaw zokhawpaw boei hae um zah tung tungkuin te ccusy ccangthum a um.¹⁶Voidu kya po voilu lan zokhawpaw boei balyn tuh nebaleihpaw laaw te kuakuhpaw boei hae nynh athua hae.¹⁷Tung hae elang ccusy hae tuh sohin nynh thua hae, thuasalama tung kya-e bawnawpaw hae te mih ccong hae tuh ngun nynh thua hae; tung alu hae kha mah ngun te ccaanpaw nynh athua hae, voidu a tung hae balyn kha ngun te theipaw ccong hae te piade athua hae.¹⁸Voidu sakoih kya zo lanpaw boei tuh meizong, sephaphuhpaw, asepaw law te nebaleihpaw laaw khate phynbang te kou puithya lan ccaanpaw nynh thua. Tuh-e tuh dong kuin sae zah dong pangaw ahang, voidu kya zokhawpaw boei te po angin hae.¹⁹Tung tungpali a um; mih ccusy ccangpali tuh sohin thua hae zah, mih bawnawpaw hae tuh ngun nynh athua hae, mih tung alu hae te mih ccong hae tuh ngun nynh athua hae.²⁰Beikbu hanlan te voidu balyn hanlan po voilu lan mangpaw pangreih balyn tuh sohin te raepaw nynh thua hae.²¹Hynh-e hae tuh Moses kawbya kya zei athua vae thyhte ranpibawi Aaron ccapaw Ithamar kuihkaw ryalah hae paw Levi phin hae nynh a rae hae paw byakinnaw kya-e beikbu ccazing nynh thua.²²Bawipaw nynh Moses kya kaw a pyapaw balyn kha Judah phin a thuapaw Hur ccapaw Uri a ccapaw Bezalel nynh a rae;²³Bezalel ryte Dan phin a thuapaw Ahisamak ccapaw Oholiab mah a umbua; aning tuh lung te raenaw kya a puakuhpaw, accinccang a soi thyapaw, meizong, sephaphuhpaw, asepaw law te nebaleihpaw kya haetapaw a soi thyapaw nynh thua.²⁴Beikinnthyaa saknaw balyn kya ryalaw nawlan mang lan cite a hlu hae paw sui tuh talent kuin ccangtakua te shekel za sari sung thum acih, tuh-e tuh beikinnthyaa kya-e tounawpaw shekel te a tou hae paw nynh thua.²⁵Milu ria a thuapaw ccungccaw zapi nynh a pya hae paw ngun tuh talent za kheit te shekel thong kheit za sari sung sari ccangpangaw acih, tuh-e tuh beikinnthyaa kya-e shekel te a tou hae paw nynh thua;²⁶Milu rianaw kyaze ria a thua hae paw, kum kuin te palung lang pise balyn tuh thong za taruh thong thum za pangaw sung pangaw cih hae zah, tuh-e hae lu kheit cci nynh beka ccangkheit cci (tuh-e tuh beikinnthyaa kya-e shekel te tou lanze shekel angankuh nynh thua) kha a pya hae.²⁷Ngun talent za kheit tuh beikinnthyaa ccusy hae hanlan te zokhawpaw boei ccusy hae hanlan nynh thua; talent ccangkheit tuh ccusy ccangkheit hanlan thua zah talent za kheit tuh ccusy za kheit hanlan nynh thua.²⁸Alaepaw ngun shekel thong kheit za sari sung sari ccangpangaw kha tung hae hanlan bawnawpaw hae lang thuasah, mih tung alu hae thei nawlan thuasah, tuh-e hae elang ccong hae lang thuasah a rae hae.²⁹A hlu hae paw sohin tuh talent sung sari te shekel thong ning za pali acih;³⁰tuh-e sohin khate tungkunaw bu thuakaw hanlan ccusy hae kha thuasah, sohin silawhang te sohin pasaryh kha thuasah, silawhang a uccaw balyn kha thuasah,³¹Voidu po voilupaw ccusy hae, voidu thuakaw a ccusy hae kha thuasah, beikbu pangreih balyn kha thuasah, voidu po voilupaw pangreih balyn kha thuasah a rae hae. Ranpibawi hanlan Boeining (Exo 28.1-14)

¹Apiazon, sephaphuhpaw, asepaw law te nebaleih lan a kua hae paw boeining kha hmin thyaapaw kya ryalaw nawlan a rae hae; Bawipaw nynh Moses kya kaw a pya thyhte minmin nynh athyaapaw boeining kha Aaron hanlan a raepya hae.

²Bezalel nynh ranpibawi angkiccua kha sui te thuasah, meizong, sephaphuhpaw, asepaw law te nebaleih lan kuakuhpaw boeining te thuasah a rae.³Sui pahsadyapaw kha tude zah arui lang a rae koute meizong, sephaphuhpaw, asepaw law te nebaleihpaw laaw te akuakuhpaw boei kyakhe pungsan kou puithya lante a raede.⁴Raw kya bawkunawpaw arui ccangning kha angkiccua hanlan rae hae zah arui adung hae san ning te angkiccua kyakhe a huide hae.⁵Bawipaw nynh Moses kya kaw a pya thyhte angkiccua vawlan khe byccia kha mah angkiccua hawte sui te thuasah, meizong, sephaphuhpaw, asepaw, nebaleihpaw laaw te akuakuhpaw boei te thuasah a rae hae.

⁶Oniks lung hae kha paccyn hae zah sui ang lungkhu khe a be hae, tazeih kya minkhia hawte Israel ccapaw hae mih min thyhte lung kyakhe a khia hae.⁷Bawipaw nynh Moses kya kaw a pya thyhte Israel ccapaw hae kha ning leinawpaw lung hae lang a tang ccaw hae cite tuh-e lung hae tuh raw kya bawkupaw angkiccua arui hae vawlan khe a raede hae.

⁸Aning nynh bybe kha angkiccua a rae hawkhate sui te thuasah, meizong, sephaphuhpaw, asepaw, te nebaleihpaw laaw te akuakuhpaw boei khate thuasah kou hoy lan a rae.⁹Tuh-e bybe tuh asaepaw te akopaw alokuh; thyh ning lang abikuh lante khaw kheit sae zah khaw kheit ako lante a rae.¹⁰Bybe kyakhe lung hae kha ring pali lante a bede hae. Masaty ring kya tuh karnelian, krisolite te emeral;¹¹ring ningnaw kya tuh emeral, safaiar te daimon;¹²ring thumnaw kya tuh jasin, agate te amethist;¹³ring palinaw kya tuh beril, oniks te jasper nynh thua hae; tuh-e lung hae kha sui ang kyakhe a nung hae.¹⁴Israel ccapaw hae mih min a khiakuhpaw lung ccanghaw lae ning a um; tuh-e hae tuh tazeih hae hawte thua zah minphuin phuin haw lae ning hanlan lung ccangkheit kyaze min minkheit cci a um.¹⁵Arui hawte ruepaw, sui ccipaw te raepaw arui kha bybe vawlan khe a rae hae;¹⁶sui ang ccangning te sui bawtary ccangning kha rae hae zah bawtary ccangning kha bybe apaki avawlan khe a tyngde hae;¹⁷sui rui ccangning kha bybe apaki kya umpaw bawtary ccangning kyakhe a khii hae.¹⁸Sui rui ccangning hae kya-e adung san ning kha sui ang ccangning kyakhe a khii hae; tuhawte tuh-e tuh angkiccua araw kya bawkupaw arui a malang khe a tyngde hae.¹⁹Oute sui bawtary ccangning kha rae zah, bybe alia lang apaki kyakhe alungkhu langte ranpibawi angki te phang bekuh lante a tyngde.²⁰Sui bawtary ccangning kha rae hae zah angkiccua araw vawlan bawkupaw arui ccangning alia lang kya-e a malang khe a tyngde hae; tuh-e tuh angkiccua kya-e accaankuhpaw byccia palung lang kya nynh a tyngde hae.²¹Bybe sui bawtary hae khate angkiccua bawtary hae kha meizong arui khate a khiide hae, ou tuhcite Bawipaw nynh Moses kya kaw a pya thyhte bybe tuh angkiccua kya umpaw byccia aluki khe um zah phoukuh vae khyh.

²²Angkiccua vawlan e angkile kha meizong kyalya te kua zah a rae;²³te tuh-e angkile angaelung khe lu hoihku nawlan a ua san kheit um zah a ua tuh seikuh nan sah cite kuapaw uccawsah te angki a nging hawkhate po voilu lan a mia hae.²⁴Tuh-e angkile alia langkhe meizong, sephaphuhpaw, asepaw, te nebaleihpaw laaw te akuakuhpaw boei te ccalee thae kha a rae hae.²⁵Khinling hae kha athyaapaw sui ccipaw te rae hae zah, angkile alia langsang umpaw ccalee thae hae laku khe po voilu lan a raede;²⁶khinling te ccalee thae kha ataeleihkuh lante rae zah Bawipaw nynh Moses kya kaw a pya thyhte ranpibawi ryalaw nawlan angkile kha a rae hae.

²⁷Aaron te a ccapaw hae hanlan ahoypaw law te kuakuhpaw angkile kha thuasah,²⁸nebaleihpaw laaw te akuakuhpaw pungde kha thuasah, nebaleihpaw laaw te akuakuhpaw lukhung kha thuasah, nebaleihpaw laaw te kuakuhpaw dya adynpaw kha thuasah,²⁹haetapaw soikuhpaw uccawsah, meizong, sephaphuhpaw, asepaw, nebaleihpaw laaw te akuakuhpaw taeccia kha mah phynbang te kou puithya lan a ccaan hae; tuh-e balyn kha Bawipaw nynh Moses kya kaw a pya thyhte a rae hae.

³⁰Lukhung aphepaw kha sui ccipaw te rae hae zah tazeih kya minkhia hawte, “Bawipaw hanlan Athyaapaw” cite min a khia hae.³¹Apiazon arui khate pungde vawlan khe a khiide hae; tuh-e tuh Bawipaw nynh Moses kya kaw a pya thyhte a rae hae. Rya Lynnaw (Exo 35.10-19)

³²Ou tuhte tungkunaw bu kya-e beikbu ryalaw balyn tuh a thang vae; Bawipaw nynh Moses kya kaw a pya thyhte Israel hae nynh atyn-are kha a cyi vae hae.³³Oute minmin nynh beikbu kha Moses kalan cciakhae hae zah avawlan te dawpaw te a uccaw balyn, bawnawpaw hae, pang hae, pangccaw hae, tung hae te ccusy hae kha thuasah;³⁴Avawlan te dawpaw, anangkuh vae paw tuutepaw phua te avawlan te dawpaw, saphua ahoypaw te zokhawpaw boei kha thuasah;³⁵byakin thingkua, puihnawpaw ccong hae te thingkua ahu kha thuasah;³⁶ccaboi te a uccaw hae balyn, Umkhaenaw Sanlou kha thuasah;³⁷athyaapaw maeekhuatung te a maeekhua hae te a uccaw hae, te maee aw nawlan chitui kha thuasah;³⁸sui silawhang, thuhkupaw chitui, amynthuapaw zimuin, bu thuakaw kya zokhawpaw boei kha thuasah;³⁹sohin te raepaw silawhang, sohin pasaryh, puihnawpaw ccong hae te a uccaw balyn kha thuasah; pakepi te a thadynnawpaw kha thuasah;⁴⁰voidu kya zokhawpaw boei hae, a tung hae, a ccusy hae, voidu thuakaw kya zokhawpaw boei, arui hae, a pangreih hae kha thuasah, beikbu kya ryalawnaw lanpaw uccaw balyn, tungkunaw bu kya-e uccaw balyn kha thuasah;⁴¹hmin thyaapaw kya ryalaw nawlan kou hoy lan raepaw boeining hae, ranpibawi Aaron hanlan athyaapaw boeining hae, a ccapaw hae nynh ranpibawi rya a lawnaw hae paw boeining hae kha thuasah Moses kalan a cciakhae hae.⁴²Bawipaw nynh Moses kha kaw a pya thyhte Israel hae nynh ryalaw balyn kha a law hae.⁴³Bawipaw nynh kawpya thyhte minmin nynh ryalaw balyn pong a law hae paw kha Moses nynh he a muih tuh minmin kha hythua a pya hae. Boei Beikbu Thadynsahnaw

¹Bawipaw nynh Moses kha hynhte a hopya:²Masaty sawpaw kya-e masaty nin kyakhe tungkunaw beikbu kha na sak cih.³Tuh-e beikbu lungkhu khe byakin thingkua kha na nung cih, te thingkua kha zokhawpaw boei khate na zokhaw cih.⁴Ccaboi kha a lungkhu lang na teekhae cih zah a uccaw hae balyn kha na paccyn cih hae; te maeekhuatung kha na teekhae cih zah maeekhua hae kha na aw cih.⁵Zimuin hanlan sui silawhang kha byakin thingkua malang khe na nung cih, te beikbu thuakaw kyakhe zokhawpaw boei kha na zo cih.⁶Maee-ute silawnawpaw silawhang kha tungkunaw bu kya-e beikbu thuakaw malang khe na nung cih,⁷te pakepi kha tungkunaw bu te silawhang laku khe na nung cih zah a lungkhu khe tui na the cih.⁸Voidu kha po voilu lan na rae cih zah, voidu sakoih kyakhe zokhawpaw boei kha na zo cih.⁹Oute thuhkupaw chitui kha na lah cih zah beikbu te a lungkhu umpaw balyn kha na thuh cih, beikbu te a ccinccang balyn kha na thyaasah cih, ou tuhte beikbu tuh athyaapaw lang a tang cih.¹⁰Maee-ute silawnawpaw silawhang te a uccaw balyn kha mah chitui na thuh cih zah silawhang kha na thyaasah cih, ou tuhte silawhang tuh myarya athyaapaw lang a tang cih.¹¹Pakepi te a ccu kha mah chitui na thuh cih zah na thyaasah cih.¹²Oute Aaron te a ccapaw hae kha tungkunaw bu thuakaw kalan na cciakhae cih hae zah tui te na sing cih hae,¹³te Aaron nynh ranpibawi lante rya oun lawpya ccaw cite athyaapaw boeining kha na lawsakuh cih, chitui na thuh cih zah na thyaasah cih.¹⁴A ccapaw hae kha mah na cciakhae cih hae zah angki kha na kisakuh cih hae,¹⁵te mih paaw kha chitui na thuh hawkhate chitui na thuh cih hae zah ranpibawi hae lante ka rya kha a lah cih hae: tuh-e chitui thuhnaw tuh nynh yn thua cih paw she takyh kya minmin kha ranpibawi lang zungzae a tangsah cih hae.

¹⁶Bawipaw nynh kaw a pya thyhte Moses nynh atyn-are kha pong a cyi.¹⁷Kum ningnaw kya masaty sawpaw kya-e masaty nin kyakhe beikbu kha a sak.¹⁸Moses nynh beikbu kha a sak; beikbu accusy hae kha a nung hae, pang hae kha a thung hae, te puihnawpaw ccong hae kha ruh zah tung hae kha a thadynsah;¹⁹beikbu a vawlan khe dawpaw kha a daw, tuh-e dawpaw vawlan khe ccangpaw dawpaw kha bua a dawthin; tuh-e tuh Bawipaw nynh kaw a pya thyhte Moses nynh a cyipaw nynh thua.²⁰Moses nynh byakinnaw kha lah zah thingkua lungkhu khe a sang, puihnawpaw ccong hae kha ruh hae zah ahu kha thingkua vawlan khe a hu;²¹te thingkua kha beikbu lungkhu lang teekhae zah zokhawpaw boei khate byakin thingkua kha phang a zokhaw; tuh-e tuh Bawipaw nynh kaw a pya thyhte Moses nynh a cyipaw nynh thua.²²Ccaboi kha tungkunaw bu alungkhu, beikbu palung lang, zokhawpaw boei atolang khe a nung,²³Bawipaw malang, ccaboi vawlan khe sanlou kha a nung; tuh-e tuh Bawipaw nynh kaw a pya thyhte Moses nynh a cyipaw nynh thua.²⁴Maeekhuatung kha tungkunaw bu lungkhu, ccaboi te arawsekuh lante beikbu alia langkhe a nung,²⁵te maeekhua hae kha Bawipaw malang khe a aw; tuh-e tuh Bawipaw nynh kaw a pya thyhte Moses nynh a cyipaw nynh thua.²⁶Sui silawhang kha tungkunaw bu lungkhu, zokhawpaw boei malang khe nung zah,²⁷amynkhuhpaw zimuin kha tuh-e silawhang vawlan khe a pya; tuh-e tuh Bawipaw nynh kaw a pya thyhte Moses nynh a cyipaw nynh thua.²⁸Beikbu thuakaw kyakhe zokhawpaw boei kha a zo.²⁹Bawipaw nynh Moses kya kawpya thyhte maee-ute silawnawpaw silawhang kha tungkunaw bu thuakaw kyakhe a nung, te tuh-e silawhang vawlan khe maee-ute silawnaw te ccathae silawnaw kha a rae.³⁰Pakekhupaw kha tungkunaw bu te silawhang laku khe nung zah alungkhu khe singkunaw lanpaw tui kha a ccae,³¹tuh-e tui khate Moses, Aaron te a ccapaw hae nynh mih kuih te mih ccu kha a singku hae.³²Minmin nynh tungkunaw bu lungkhu lang tee hae zah silawhang kalan he a naekuh hae te, a singku hae; tuh-e tuh Bawipaw nynh kaw a pya thyhte Moses nynh a cyipaw nynh thua.³³Beikbu te silawhang po koihlu lante voidu kha thadynsah zah, voidu sakoih kyakhe zokhawpaw boei kha a zo. Ou tuhte Moses nynh ryalaw kha a thangsah. Maeking te A Phu-enaw (Nam 9.15-23)

³⁴Maeking nynh tungkunaw bu kha phang a bong, te Bawipaw phu-enaw tuh beikbu kya phe a beih.³⁵Maeking nynh tungkunaw bu kha phang bong zah Bawipaw phu-enaw nynh beikbu kya phe abia keiccuze Moses tuh tungkunaw bu lungkhu lang tee kho khyh.³⁶Beikbu kyate maeking kha hangthung a thua takyh vae ze, Israel hae tuh san kheit kyate san kheit lang leih a cceih hae,³⁷thuasalama maeking kha hangthung nin a thua makhia tuh mih malang cceih khyh hae.³⁸Pawccecize Israel ccungccaw balyn nynh a ccianaw takyh hae, mih malang khe Bawipaw maeking tuh khuadae ccyh kyaze beikbu vawlan um zah, khuazi ccyh kyaze maeking kyakhe maee a um.

Bible Society of Myanmar

https://app.library.bible/content/1a340f5ae072b2f4