Colossians1
1Chiyawaau niichishaanitikw kaa taapwehtamekw, chiyawaau kaa taapweucheyihtaakusiyekw e wiichewekw Christ, anite Colossae kaa ishinihkaatech ihtaawin kaa ihtaayekw, niya Apastal Paul kaa masinahamaatakuch.2Chiichishaanuu Timothy ihtaau kaye wiya utah mekwaach e masinahamaatakuch. Nitutamuwaanaan Chishemanituu Kuuhtaawiinuu chechii miyutuutamaataakw kaye chechii miitaakw chiyaameyihtamuwiniyuu.3Muush nanaaskumaanaan Chishemanituu, Chitipeyihchikeminuu Jesus Christ Uhtaawii, tahtwaau e ayimiheshtamaataahch,4wesh nichii pehtenaan taan e ishi taapweyimekw Christ Jesus kaye nichii pehtenaan taan e ishpish saachihekuch misiwe anichii kaa taapwehtahkwaau.5Anit uskach kaa waawiihtamaakuyekw miywaachimuwin, uu taapwewin ayimuwin kaa ishinihkaatech, ekut kaa pehtamekw taan e ishi ihtakuhch aspeyimuwinihch. Ekw maak aspeyimuwin e ayaayekw ekut wehchi ishinaakuhch chechii taapweyimekw Christ kaye chechii saachihiiweyekw. Uu maak taan e ishi aspeyimuyekw kihchikiishikuhch kanuweyihtaakanuu.6Uu miywaachimuwin tasine pimipayuu shaweyihchichewin anit uhchi kaye maak kanawaach mishihtepayuu e waawiihtaakanuuhch misiwe e ispichiskamikaach utah aschiihch. Ekun maak e ishinaakuhch miywaachimuwin anit mekwesiinuu e ihtaayekw iskunaak kaa pehtamekw e aayimuutaakanuyich Chishemanituu uchishewaatisiiwin kaye kaa nisituhtamekw taan nihaau e iteyihtaakuniyich.7Epaphras maak kaa ishinihkaasut niwiichewaakanaan eukw kaa chischeyihtamihiitaakw Chishemanituu uchishewaatisiiwiniyuu kaa waawiihtamaataakw miywaachimuwiniyuu. Naashch taapwe nisaachiwiichewaanaan e wiitaapatisiimachiht uu Epaphras. Muush kuiskw ishi atushkuweu Christ kaye wiya. Naashch taapwe nimiyuu wiichihiikunaan taan e ishi atushkuwaat Christ.8Nichii wiihtamaakunaan Epaphras taan kaa ishi miikuwekw Ahchaahkw chechii saachihiiweyekw.9Iishpin maak kaa pechi itaachimushtaakuyaahch Epaphras misiwe uyuu taan kaa ishi chischeyihtamihiitaakw Chishemanituu chipimaatisiiwiniwaahch muush chitayimiheshtamaatinaan. Namui nipuuniinaan e ayimiheshtamaataahch. Muush nitutamuwaanaan Chishemanituu tekash chechii chischeyihtamuwekw utiteyihtamuwin. Mitun tekash chechii ayaayekw kachehtaaweyihtamuwin ekw maak nishituhtamuwin taan aniyuuh e ishi miiwet Payehchi Ahchaahkw chechii chischeyihtamekw uu.10Ekw maak chechii ishi pimaatisiyekw taan e ishi nituweyimitaakw Chishemanituu chechii ishi pimaatisiiwekw. Muush chika ihtuutamuwaanaawaau taan aniyuuh e ishi naheyihtamihiikut. Nanaahkuu chika ishi mamiyuutuutamuwaawaauch awenichii kaye wetaach chika miyu chischeyimaawaau Chishemanituu taan e iteyihtaakusit.11Nitutamuwaau Chishemanituu chechii ihtuutaataakw mitun tekash chechii maskuuhiikuyekw suuhkaatisiiwin, wiya kaa chisteyihtaakuniyich usuuhkaatisiiwinihch uhchi. Ekw maak che siipiiwesiyekw mikw taan che ishi nachishkamuwekwe.12Kaye maak e muuchicheyihtamekw che nanaaskumekw Uhtaawiimaau an kaa ihtuutaataakw chechii tepicheyihtaakusuwekw chechii ayaawekw aniyuu kaa itwet cheshtinaash che miyaat aniyuu kaa taapwehtamiyich waashtewinihch kaa ihtaayich.13Chichii wiihkuchihiikunuu taan aniyuuh kaa ishi tipeyimikuuhk wanitipiskusiiwiniyuu miiskuch aniyuu naashch kaa saachihaat Uukusisa uchimaawiniyuu ekw chechii tipeyimikuuhk.14Wesh wiya Christ uhchi chichii wepeyihtamaakunaanuu chimachihtwaawinuuh kaye Christ uhchi chichii aapihkunikunaanuu taan kaa ishi maahchikwaapihkaasuyihkw.15Wiya Christ mwehch ekun e iteyihtaakusit taan e iteyihtaakusiyich Chishemanituuh aniyuuh ekaa kaa nuukusiyich. Christ eukw Chishemanituu Uniishtamuushaanh, an maauch niikaan e iteyihtaakusit e iteyihtaakuniyich misiwe chekwaayuu kaa ushihtaakanuyich.16Wesh Christ uhchi, Chishemanituu misiwe chekwaayuu kihchikiishikuhch kaye utah aschiihch kaa ihtakuniyich chii ushihtaau, aniyuu chekwaayuu kaa nuukuniyikwaau kaye aniyuuh ekaa kaa nuukuniyikwaau. Chii ushiheu kaye misiwe kaa waauchimaawiyich ahchaahkwah, kaye aniyuuh aweyuuh kaa uchimaawiyich, kaye misiwe kaa tipeyihchicheyich. Misiwe chekwaayuu Christ e ihtaat chii uhchi ushihtaakanuuyuu kaye maak wiya chii ushihtamuwaakanuu.17Eshkw ekaa chekwaayuu uhchi ihtakuniyich shaash chii ihtaau wiya Christ. Wiya chii wiyeyihtam taanite che ihtakuniyich misiwe chekwaayuu kaa ushihtaat.18Wiya niikaanishkam wiiyuu, eukunh uyuu umaamuuayimihaauh. Wiya maauch niishtam chii ihtaau Christ kaye wiya maauch niishtam kaa wanishkaanaakanuut nipuwinihch uhchi, kaye maak misiwe chekwaan taan e ishi ihtakuhch wiya maauch niikaan iteyihtaakusuu.19Wesh Chishemanituu chii naheyihtam tekash chechii piihchishkuwaat Jesus chechii nispitaakut.20Kaye maak chii iteyihtam aniyuu Ukusisa uhchi chechii ihtuutahk kaau wiya e ihtaat chechii ihtakuniyich misiwe chekwaayuu kaye kaau wiya e ihtaat chechii ihtaayich misiwe aweyuuh, wesh misiwe chekwaan kaye misiwe awen utah aschiihch kaye kihchikiishikuhch chii pahkaanihiisuumakan Chishemanituu uhchi e ihtaat. Aniyuu maak e chii pachishtinisuyich Ukusisa chechii nipahaakanuyich aashiteyaahtikuhch ekut kaa uhchi ihtuutahk Chishemanituu kaau chechii miyu wiicheutunaanuyich wiya ishi e ihtaat, kaau wiya e ihtaat chechii ihtakuniyich misiwe chekwaayuu kaye misiwe aweyuu utah aschiihch kaye kihchikiishikuhch.21Eshkw ekaa uhchi taapweyimekw Christ chichii ayaawaapamaawaau Chishemanituu kaye chichii pikwaataawaau. An taan kaa ishi chii maayaatahch chimituneyihchikanawaahch kaye taan kaa ishi chii maayaatahch chipimaatisiiwinawaahch chichii uhkaateyimaawaau Chishemanituu.22Ekw maak anuhchiish wii, Chishemanituu chichii ihtuutaakuwaau chechii miyu wiichewekw. Aniyuu e chii nipiyich Jesus aashiteyaahtikuhch ekut kaa uhchi nihiipayihtaat chechii miyu wiichewekw ekw maak wiya e ihtaat chechii uhchishkuukaapuuhiitaakw e payehchisiyekw tekash ekaa mitun chekwaayuu ataameyihtaakusuwekw.23Chinituweyihtaakusinaawaau yaaitei chechii kanuweyihtamekw taan e ishi taapwehtamekw uu miywaachimuwin, wesh ekut uu wehchi cheshtinaachikaapuyekw. Ekaawii maak chika uhchi ishinaakusinaawaau chechii ati waanihtaayekw an aspeyimuwin kaa ayaayekw iskunaak kaa pehtamekw miywaachimuwin. Wesh shaash mistahii mishihte chii ituhtataakanuu. Kaye niya Paul niwiichihiiwen e papaamuhtataakanuuhch uu miywaachimuwin.24Nimiyeyihten maak e nanehkaateyimuhiikuyaan chiyawaau uhchi, kaye niyaasihch nichiishihtaan aniyuu taan e ishi nuuhtepayiniyich Christ uwiisacheyihtamuwinihch, chechii wiichihiikwaau umaamuuayimihaauch, Christ wiiyuu.25Chishemanituu nichii itashumikw chechii atushkaamach aniyuu kaa taapweyimaayich Christ. Nichii miikw uyuu chechii itaapatisuuch chiyawaau chechii wiichihiitakuch. Nichii itashumikw maak tekash chechii chiishihtaauch misiwe taan kaa ishi miit chechii ishi waawiihtamaatakuch.26Uyuu maak kaa ishi miit chechii aayimuutamuch namui uhchi pachishtinam chechii chischeyihtaakunuyich anite pechi utaahch. Namui waawaach peyakw awen kaa ishpish chii pechi pimaatisiit utah aschiihch uhchi miyaakanuu chechii chischeyihtahk uyuu. Anuhchiish maak wii ekw pechishtinak chechii waawiihtamuwaakanuyich kaa taapwehtamiitwaauh.27Chishemanituu maak chii iteyihtamihiikuu chechii chischeyihtamiyich ekw utiiniimh aniyuu ekaa uhchi chischeyihtamihaat anite utaahch. Nuwach maak maamishkaateyihtaakuniyuu uyuu waa ishi chischeyihtamihaat misiwe aweyuu. An maak ekaa nihtaa kaa uhchi pechi chischeyihtaakunuuhch eukw Christ e piichishkaataakw chitehiiwaahch wesh ekut wehchi cheshtinaateyihtamihiikuyekw taapwe che utihtamekw misiwe taan e ishi miyu ayeskuushtamaataakw Chishemanituu.28Ekw maak misiwe awen e aayimuutamuwachiht Christ. Misiwe maak kachehtaaweyihtamuwin kaa ishi miikuuyaahch nitayaakwaamimaanaanich taan aniyuuh ekaa chipaa uhchi ihtuuch kaye suuhk niwii chischeyihtamihaanaanich taan aniyuuh chipaa ihtuuch. Uyuu maak e ihtuutuwachihtwaau eukw uyuu anite Chishemanituu ishi e ihtaayich chechii ituhtahiichihtwaau mitun e chiishi nihtaauchitwaau anite Christ ishi e ihtaayich.29Chechii ihtuutamaan maak uu nuuskawiin taan e ishpish suuhk atushcheyaan. Aniyuu suuhcheyihtaakusuwiniyuu e ishi miit Christ nuuhtaapachihuun. Mitun maak wesh nuukuniyuu aniyuu suuhcheyihtaakusuwiniyuu mekwaach anit e atushcheuch.
Canadian Bible Society