Ariñawagúni13
1Isaanigu ha chúbaña aau, aganba hamuti lererehan háguchi houn; ánhaña ha ibidiouguabaña aau, meberesentiña lau ebechúni.2Ha buídubaña, ibiha hamuti lubuidun lafayeiha katei le hariñagubei; ánhaña ha múaranbaña, lamatiña lun anarimeni.3Ha óunigirutiña hererun, góunigiguatiña hóuniwagua; ha gíbeti hadimurehan, hagünrinchaguba hóuniwagua.4Ha magúalibaña, busentiña saragu katei, gama lumoun mibihintiña ni kata; ha nadagimeinbaña, awansetiña lun hibihini sun le habusenrubei.5Gürigia ha richaguabaña, mínsiñeti iyeeni houn; ánhaña ha salufuribaña, lébuna busiganu luma minebesei hagía.6Ágüdaha lumutiña ísuruni gürigia ha buídubaña; günringua lumutiña wuribani gürigia gafigountiña.7Añahein gürigia, úati ni kata hama ani afamuratiña kei rísitiña; añahein gámatiña afamura kamá gudemetiña.8Sefu lumuti harisin rísitiña habagari; ánhañati ha gudemebaña, úatiña álugutiña háfaruniña.9Ítara haña ha richaguabaña, kei aban igemeri le elelehati; ánhaña salufuritiña, ítara haña kei igemeri le éñeguchuti.10Wuriburügüñein lanüga anaaguni unguaü; hámañein ha ǘnabugububaña lichú aau.11Ha ibihubaña irisini furese, lau eyeedúni, murusun murusun lidin hawéi; ha óundaragutiña irisini murusun murusun, lau arumani, gánwoungüda hamuti.12Emenigini masaliti, anigi nidiheritu; ánheinti ayumahani gúnfuliwati, ítara liña kei tídibu wewe lánina ibagari.13Ha íchugutiña mebereseni luagu aban gumadi hasakürihaba; Ha inebeti gumadi houn, gafayeiruahabaña.14Lísensen ibagari larufudahan le chubei aau, ani sefu lumutiña gürigia lídangiñe óunweni.15Lubuidun ichügü, gúndaawati lau; ánhaña ha múaranbaña, lídanñanu lémeri günringuaü.16Gürigia ha buídubaña ichügü, lau lualin ichügü hadügei sun katei; ánhañati ha ibidiouguabaña aau, arufuda hamuti libidiounigan hau houn súngubei.17Óunagüleigu ha wuribabaña, barütiña lénrengunga; ánhañati óunagüleigu ha úaraguabaña, huáliguagüda hamuti.18Gudemei luma minebeni, ligíaba habiha ha meberesenbaña lau eweridihani; ánhaña ha aganbubaña ererehani, hibihuba óunwenbu inebesei.19Libihín le busenwabei, barüti ugundani; ha ibidiouguabaña aau, mínsiñeti houn lun hadisedun luéi wuribani.20Ha óundaragutiña hama chu tau, lachuuduba hau, ánhaña ha óundaragubaña hama ibidiougua tau, heferidiruba.21Éibaaha lumutiña wuribani gafigountiña; ánhaña richaguatiña, fáyeiwatiña lau buiti.22Gürigia ha buídubaña, ígiratiña alagan houn habañan, ánhaña ha gafigounbaña, óundaraguatiña irisini habá ha richaguabaña.23Anihein saragu éigini hacharirugu gudemetiña, gama lumoun gíbeti féridi ñein lumuti ua lan richaguaü.24Ha mererehantiña houn harahüñü, mínsiñetiña houn; ha hínsiñehabubaña houn, ererehatiña houn.25Gürigia ha richaguabaña, hóutiña darí hakimuledun; ánhaña ha salufuribaña, rédeitiña lau ilamaü.
Bible Society of Honduras