Ariñawagúni10
Lererun burí Salomón
1Isaanigu ha chúbaña aau, gúndaaguagüda hamutiña hagübürigu, ánhaña ha ibidiouguabaña aau, súfurigüda hamutiña.2Irisini le mabuidunbei libihíniwa, manügünti buiti; ánheinti arumani, sefu lumuti gürigia luéi óunweni.3Kimulegüda lumutiña Bungiu gürigia ha buídubaña; ánhaña ha salufuribaña, ígira lumutiña lau halama.4Ánhabu magúali, gudemebadibu; ánhabu benefa, rísibadibu.5Ha chúbaña aau, alubahabaña irumurugu; ha mabusigaribaña, arumugubaña lidan lidaani alubahani.6Ábürühati saragu abiniruni hawagun gürigia ha buídubaña; ánhaña ha salufuribaña, ñaraguagüda lumutiña anarimeni.7Haritawagúati hawagun gürigia buítiña súnwandan lau abiniruni; ánhañati ha salufuribaña, bulíeiwatiña furese.8Ha chúbaña aau, resibi hamuti gumadi; ánhaña ha adimurehabaña libidiounigan aau, günrinwaguatiña.9Ha madurunbaña, manufudetiña; ha wuribabaña éibugun, wuribabei hagumuchun.10Ha ámuruhabalin hagu, barütiña saragu wuribani; ha adimurehatiña libidiounigan aau, lidan günringuaü hagumucha.11Lísensen ibagari hererun ha richaguabaña; ánhañati ha wuribabaña, lañaradaguagüdübaña hagañi.12Agubuhati iyereehabúni wuribu; ánheinti ínsiñeni, feruduna lumuti sun wuribani.13Anihein lichú aau hayumulugu ha chúbaña aau; anhein wewe lunti hanagan ha ibidiouguabaña aau.14Areida hamuti chu tau hasubudin; ánhaña ibidiougua tau dan le hadimurehan, yarafati denchaü.15Harisin rísitiña ágüdahabaliña; hagudemen gudemetiña agünrinchagubaliña.16Ibagari hafayeiruahabei ha richaguabaña; ánhañati ha salufuribaña, figóu halubahabei.17Ha ánharutiña lun ererehóuni, luéigiñeñanu lémeri ibagari; ánhaña ha máhabaña lun, luéigiñeñanu lémeri günringuaü.18Gürigia yéetiña aramudahabalin iyereehabu; ibidiougua tau adimurehabei marasualugu.19Ha gíbebaña adimurehan, gíbeti habulieidagun; ha ámanichubaña lidan dan, chuti hau.20Ítara tiña hañeñe ha richaguabaña kei pülata le fínuti; ánhaña ha salufuribaña, mebegiti hasaminan.21Arufudahatiña ha richaguabaña houn saragu gürigia; ánhañati ha ibidiouguabaña aau, hilaguatiña ladüga libidiounigan hau.22Irisini labiniragülebei Bungiu, ani manügünti igarigu lúmagua.23Gúndaatiña ibidiougua tau dan hadaagun wuribani; gúndaatiña chu tau lau lichú aau.24Katei létima ueibei hanufudeda gürigia ha salufuribaña, ligía asuseredubei houn; ánhañati ha richaguabaña, gúnfuliti le hayumahabei.25Lásügürün herigini, hagumuchagun gürigia ha salufuribaña; ánhañati ha richaguabaña, rédeitiña lun sun dan.26Ítara haña ha magúalibaña houn ha óunahabaliña, kei binigá lun ari, kei gumuleli lun agu.27Lichugúniwa inebesei lun Bungiu, barüti limigifen ibagari; anhein habagari salufuritiña, dürüwaguati.28Houn ha richaguabaña, buiti le lunbei liabin; anhein houn ha salufuribaña, wuribati.29Góunigi lumutiña Bungiu ha adügübaña buiti, gama lumoun günringua lumutiña ha adügübaña wuribati.30Ha richaguabaña, súnwandan buídubei lan lidin houn; ánhañati ha salufuribaña, málübaña ubouagu.31Furiti lichú aau hayumulugugiñe ha chúbaña aau; ánhañati ha salufuribaña, tibugúba hañeñe.32Ha richaguabaña, katei buiti hariñagubei; ánhaña ha salufuribaña, katei wuribati hariñagubei.Bible Society of Honduras