Ariñawagúni11
1Magundanti Bungiu lau balansu múaragunti; gama lumoun gúndaati lau le úaraguati.2Barüti anaaguni unguaü busiganu; hámañein ǘnabugubutiña lichú aau.3Gürigia ha úaraguabaña, adundeha lumutiña húaragun; ánhaña ha múaragunbaña, günringua lumutiña múaran hamá.4Úabei hu lan irisini lidan luéyuri aguseruni; ánheinti richaguaü, sefu lumutiña gürigia lídangiñe óunweni.5Surugüda lumuti richaguaü hémeri ha richaguabaña; ánhañati ha salufuribaña, ábürügüda lumutiña hariban guánarügü.6Sefu lumutiña richaguaü gürigia ha úaraguabaña; ánheinti uámaahabu, súfurigüda lumutiña ha salufuribaña.7Dan le hounwen gürigia ha salufuribaña, hilati hemenigin labu hayumahan úara hama.8Sefu lumutiña Bungiu gürigia ha richaguabaña lídangiñe idiheri, aba líchuguni idiheri ligía houn ha salufuribaña.9Günringua lumutiña hererun gürigia ha salufuribaña gürigia háledi; ánheinti lichú hau ha richaguabaña, sefu lumutiña.10Dan le hawanserun ha richaguabaña, gúndaatiña lílana fulasu; dan le hounwen salufuritiña, achubahatiña lílana fulasu lau ugundani.11Bunawaguati aban uburugu lau habinirun richaguatiña; ánheinti hererun salufuritiña, günringua lumuti.12Ha salufuribaña, wuribati hadimurehan hawagu hamadagu; gürigia ha buídubaña, manitiña.13Ha marasualugubaña, abahüdagua hamuti sun katei; ánhañati ha manibaña, mariñaguntiña ni kata.14Anhein ua agumadihani buiti, lagünrinchaguba fulasu; háhaburuguñein saragu eweridihatiña agañeiruni.15Wuribati líchugun lanügün kárugu lau ladúeihan terencha; ha manügüntiña kárugu lau hadúeihan amu, wínwantiña darangilu.16Würi hanichigutu ibihatu inebesei; wügüri le benefati, ibihati irisini.17Ha gudemehabubaña, adügatiña buiti hóuniwagua; ánhañati ha fásibaña, adügatiña wuribati hóuniwagua.18Gürigia ha salufuribaña, ibihatiña afayeiruahaü le iyeeniti; ánhaña ha adügübaña katei lau richaguaü, buiti hafayeiruaha.19Lafalarúniwa richaguaü, barǘ lumutiña gürigia lidoun ibagari; ánheinti lafalarúniwa wuribani, barǘ lumutiña lidoun óunweni.20Iyereegutiña ha wuribabaña isaminan lun Bungiu; ánhaña ha buídubaña óuserun, hínsiñetiña lun.21Meredebaña gürigia ha salufuribaña mabeichúnga; ánhaña ha richaguabaña, buídubei lidin houn.22Würi to magadiñetu ani lóuguati tisaminan, ítara tiña kei bagü lauti golu luagu liyuma buíruhu.23Súnwandan buidu lan lasalirun haritagun ha richaguabaña; ánheinti haransehan ha salufuribaña, igañi lanügübei.24Añahein gürigia mángitiña, ibihatiña sügǘ lau le híchugubei; añahein giñe arügüretiña agumuchutiña lidan gudemei.25Ha gareinibaña, awansetiña; ha íchugubaña, ibihatiña giñe.26Ha máhabaña halugurun türigu lidan lidaani ilamaü, íñaragua hamutiña gürigia; ánhaña ha alugurahabaña biní hamutiña.27Ha ñǘdünbaña lárigi katei le buídubei, buiti lidin houn; ha ñǘdünbaña lárigi katei le wuribabei, wuribabei lidin houn.28Ha emenigidutiña luagu harisin, hábürühaba kei ubanaü sáühali; ánhaña ha richaguabaña, hilumarügübaña kei tilimun wewe.29Ha móunigirun hamutu haban, meredeti ni kata houn; ha ibidiouguabaña aau, súnwandan hadamunbaña lan ha chúbaña aau.30Ruti richaguaü ibagari; anhein anarimeni, gidarügü lumuti.31Resibi hamaali ligía ha richaguabaña hafayeiruaha ya ubouagu, gúbudigiame ha salufuribaña hama ha gafigounbaña!
Bible Society of Honduras