Hobu39
1Subudi bumuti funagia ka lan dan hemeiliha gábara áraabuna? Ariha baali funagia temeilihan usari?2Subuditi funagia bun átiriñein lan hati hanügün lubá hemeilihan?3Dan le hemeiliha lan, aba hésegeragun, ábati hemeilihaniña harahüñü.4Lárigiñe aba héredun harahüñü, aba haweinamudun áraabu, ñéingiñe aba houdin ani magiribudúnhaña.5Kagia ígiragüdübalin mile áraabuna? Ka ígirubalin lun léibugun magüürǘnga?6Au arufudubalin lun halíaba lan laganawa, lidan fulasu mageirawati luma burí lidan fulasu mawübüriti.7Mínsiñeti lireinga le uburugubei lun, madügün ligía gasu lau lagúarahan abugahati animaalu.8Éibuga lumuti burí wübü áluaha sagadi, áluaha furumiñeguarügü híduru wurigili lun leigin.9Haritaguatibu funagia luagu lánharuba lan bágasu wügüri le áraabuna leseriwidun bun luma lun lásügürüni áriebu tidan haban bilügüniña animaalu?10Gayaraabei funagia bagüürüni awouhagülei lun bafosuruni lun lawouhan odi lun lan lidin bárigi bárigi árouheinei ichari?11Gayaraabei funagia bemenigidun luagu ladüga lueirin lere, ígirabeime lun ladügüni buadigimari?12Haritaguatibu funagia luagu leseriwiduba lan bun lun labudahani balubahan luma lun lóundaruni ilaü tidan lagei?13Ariha bumutu dunuru to awesüturusu: ánhinha tumuti tarüna lau ugundani, kamá hamuga garünatu libe tarüna sigueña,14aba tígiruniña tigañén lidan sagoun lun habacharagun lábugiñe lara weyu.15Maritaguntu luagu gayara lan haburechawagun, luagu gayara lan ladügüraguniña somu animaalu.16Rófutu houn tirahüñü kamá hamuga mama tirahüñü, mebereseguntu anhein mahuudun tuadigimari.17Ladüga míchutina lichú aau tun, míchutina lubuidun saminaü tun.18Gama lumoun dan le tásaarun lun téibaagun, éherahatu hau gabayu hama ha agalufehabaliña.19Buguya funagia íchugubei erei lun gabayu, ani wéndegüdabei ligiina lau ídiburi?20Buguya funagia achubahagüdübalin kei chagagaru lau lanarime líñaahan le íchugubei anufudei?21Achíahati lau pantaü lidan fulasu mawübüriti, ñüdün ligía wuriburugun manufudeuga.22Éherahati lau anufudei, ani manufudeti tuéi eféin,23Íbini tareinchun tagei lefeinte agalufehati, ani durungua ligía arufun tuma gimara.24Éibaaguati lau lanarime mágüdaha lan; ani tínwinrun fidu, aba mederaguagüdün lan.25Lau líñaahan lóunabei tínwinrun fidu; lúmagiñe dísegiñe hirimicha laali líhemen wuribu, aganbaléi lumalalina gumadi luma agúarahani.26Wéiriti funagia lichú bau lun barufudahan áhamahani lun guriguri, luma lun láhamahan luagun suru?27Buguya funagia ariñagubei tun ágila lun tíchuguni tumasa iñu?28Luagu dübü wéinamuti taganawa áriebu wéyuagu luagu lábulugu wübü tadügoun tuban.29Ñéingiñe íñugiñe taríaahei tíliru.30Lau hitaü hawinwanda tirahüñü, le ñein lumuti úgubu hilaali, ñein tadarirúa.
Bible Society of Honduras