Hobu38
Furumiñeti lóunabagüle Bungiu lun Hobu
1Ábati ladimurehan Bungiu lun Hobu laganagua luriban dan, lariñaga lun:2Kátañadibu san lun lalouguaduba lan bafiñen luagu le naransehabei ani arufudabéi libidiounigan bau lau bererun?3Arufudabéi ganigi le buágubei nun guentó, óunababei álügüdahani burí le:4Halíañadibugia dan le nadügünbalin ubóu? Ariñagabéi nun, anhein inarüni lubéi luagu subudi ban saragu.5Subuditi bun ka lan ariñagubei átiribei lan lueirin ubóu, ani ka lan amisurahabalin?6Kagia uáguñein lebu? Kagia íchugubalin dübü le wéirigutimabei, le ágüdahabalin,7sun buga añaha lan waruguma lánina binaafin eremuha labadinagua hagundan nani ánheligu ha siélubaña?8Dan le láfuridunbei barana lídangiñe múa, kagia íchugubalin lágüdaha lun leredehani?9Rútina aban dúeri lun ladaüragunme luma aban hemereedu lun lágeime.10Rútina lébeha barana, aba nadouruni lubenari lau geléin.11Aba nariñagun lun: «Yáarügüba bachülüra, másügürünbadibu yáagiñe, yaaba láhalaha bugudi».12Lidan bibagari, ru baali san bererun lun larugaduba lan, ani aba larugadun?13Lun larugoungadun luagun sun ubóu luma lun houdin wuribatiña aramudagua?14Ábati larufuduni weyu ligaburi wübü luma burí fulasu wayati, aba lárügüdün koloru kei aban daüguaü:15Harugoungayati igemeri ligía houn wuribatiña ábati lásiñarun hadaagun wuribani.16Ariha baali funagia láhüchagüle barana, éibuga buguya lidan lilulin-agei?17Ariha baali funagia halíañein lan lubenari larúeihan óunweni?18Subudi bumuti funagia átiriñein lan lítulen múa? Ariñagabéi nun, anhein binarün lubéi luagu subudi lan sun katei bun!19Halía san lareidúa larugounga luma luburiga?20Gayara bumuti san achülüragüda lidoun lagumuhóun larigei ubóu ani lárigiñe aba lagiribudun lúbiñoun?21Mosu subudibani, lugundun wéiyayaadibu; ani águrahouaadibu meha lidoun dan ligía!22Ariha baali funagia fulasu le ñein lubéi nareidei niewe luma lúbara huya dereguati.23Lun nóunahani lidan lidaani lamiselu, lidaani ageindaguni luma lidaani wuribu.24Kagia üma lárügüdübei larugounga dan le lawaraüdagun? Ida liña laweiridagun ligarabalin oubaü le ñéingiñe lubéi laboucha weyu luagun ubóu?25Ka adaarubei aban üma lun huya, arufudaléi üma lun luriban dan,26lun láhuyun lidan fulasu mageirawati, lidan burí fulasu le úati aganóuti ñein,27lun ladüdüragüdüni múa mábeiti ani bóugüdaleime híduru?28Kagia lúguchibei huya luma serenu?29Ka lúguchuboun yelu luma lúbara duna dereguati?30Ka edereragüdübalin duna kei dübü, dereguagüdalei barana ligibuagugiñe?31Buguya adügübei lun lidan hamá aban hóundaragun waruguma díseguagüda waruguma ha Orión.32Buguya funagia asagarubarun waruguma to binaafina lidan tidaani? Buguya adundehabaliña waruguma ha tani to wéiriboun hama tani to ñǘraüboun?33Subudi bumuti funagia lúrudu le anügübei fulasu sielu? Buguya funagia adügübalin lúrudu ligía ubouagu?34Gayaraati funagia bíchugun dimurei lun dúeri lun ladouragunibu lau duna?35Ánhabu ariñaga lun lidübüri wayuhuru lun lidin lidan somu fulasu, lariñaguba funagia bun: «Aransetina lun nadügüni bugundan»?36Kagia íchugubei gunfurandaü houn dunuru kei burí íwisi luma ariran?37Kagia wéiribei lichú lau lun lasubudiruni átiriñein lan dúeri? Kagia gayaraabei láhuyagüdüni dúeri huya,38lun lasaliragun sagoun múame, lun labadülerun lagu múa luougua?39Buguya funagia agaliruhabei houn liñún ha würiña, lun heigin harahüñü darí hakimuledun,40dan le haramudagun tidan haban odi dan lan le hagaliruhan lidan búbugati?41Kagia éigagüdübaliña sanadi, dan le houdin lídangiñe aban fulasu lun lidoun aban áluaha éigini, dan le hagúarahan harahüñü amuriahei numa?Bible Society of Honduras