Hobu3
Lekeharun Hobu luagu lumabunurun
1Lagumuhóun dan, aba ladimurehan Hobu, aba líñaraguni weyu le lágurahounbei.3Íñarawaguala weyu le tibihinbalina núguchu turageirugu! Íñarawaguala weyu le nágurahounbei!4Saliguagubeihali hamugaha weyu ligía áriebume, aba hamuga lásügüragüdüni Bungiu, aba hamuga marugadun lan!5Daruguagubeihali hamuga meha aban lamuñounga wéiriti lau, odi laburigadagüdüngubei meha aban dúeri lau, odi aba lan hamuga meha lanufudedaguagüdüni aban añounguru!6Féridigubeihali hamuga meha áriebu ligía lidan luburiga, aba hamuga giñe mabahüdǘn lan weyu ligía lidan burí luéyurina hati luma irumu!7Ábangubeihali hamuga meha áriebu híruti le maniigati, le hamuga ñein lumuti maguarahóun lan lau ugundani!8Íñaraguagubei hamaali hamuga meha gabiñarahatiña ha gabafubaña luagu Lewiatán!9Marugoungadunhañagubei hamuga meha waruguma binaafin ligía, aba hamuga hagurabuni larugan, gama lumoun machülüti hamuga.10Íñarawaguala áriebu le ígirubei lun nágurahoun, maramudun lumutina luéi narihin saragu lamiselu!11Ka funa san uagu mounwen nubéi turageirugu núguchu, odi lidan lan oura le nágurahounbei?12Ka san uagu ñeinñein lubéi igachürügü eresibirana luma uri lun nátagüdüniwa?13Lun hamuga meha hilá nan, anahein hamuga arumuga guentó darangilu, emeraagua lidan ñuruguaü,14hama urúeigu habu minisigu ha ábunagubaña óunwenbu burí uburugu houngua,15odi hama burí lan gumadan ha abuinchagüdübarun haban lau golu luma pülata.16Ka uagu mábunun habalina keisi agüriaawagutiña, kei lan irahüñü ha óunwebaña lubaragiñe hágurahouniwa?17Lidan umúahaü lagumucha luriban hasaminan salufuritiña, ñein giñe hemeraagua ha buchaañabaña uagu;18ñein hadarira adaürǘtiña darangilaü, ñein lásura haganbuni lagúarahan hábuti;19añahein wéinamuhaña hama ñǘbürigiña ñein, ani séfuti idamuni luéi lubafu labureme ñein.20Ka uagu lígira Bungiu lun harihini ha súfuribaña larugounga? Ka uagu líchiga ibagari lun le buinbei lau idiheri,21houn ha agurabahabálin óunweni ani machülüti, íbini háluahani sügǘ lau láluahouniwa irisini le aramudaguati?22Darí dan le lararirun gürigia ligía lidoun lumuaha, ligía lagundaarun.23Éibugagüda lumuti Bungiu marihinga, darú lumuti üma luéi luéigiñe sun oubaü.24Ayahuni ligía néiginbei, amumehani luma igarigu, ligía nuniñebei.25Sun katei le ueibei nanufudeda, létima anufudedaguagüdübalina, ábürüha nuagun.26Úati emeraaguni nun, ni deregüdaguaü, madaritina darangilaü luéidigia mederaguagüdüni.Bible Society of Honduras