Hobu4
Furumiñeti liyanun Hobu hama lumadagu
1Hobu, afiñetina mínsiñebei lan bun lun nadimurehan bun, gama lumoun siñati námanichun.3Buguya, le meha arufudahabei houn saragu, ru buguya erei lun le mérebei;4buguya, le meha íchugubei gurasu lun le éiguadubei lun lásaarun, ágüdahabei meha le madiseelibei lun léiguadun,5kagia uagu banufudeda guentó dan lachülürün bun lun basufurirun?6Buguya, le ábanbei lubúein Bungiu, aban wügüri le úaraguati lóuserun, ida liñagia memeniginhadibu lubéi le gumuti?7Saminabá, anhein anihein lubéi abeichúti madurunga.8Arufudahati nisubudin nun luagu ha lan ábunagutiña wuribani luma anarimeni alubaha hamani le hábunagubei.9Lidan ligañi Bungiu aba láfurun hawagun, aba lagumuchaguagüdüniña.10Íbini ánhaña aaünha odi ánhaña lan adürürüha kei liñún, lámanichagüdübaña Bungiu lau láhalahani hari.11Hóunweguba kei liñún ha madaritiña háliru, ábame hawaraüdaguagüdüniwa harahüñü.12Chülüti aban uganu nun lau lámarun, wéiriti lámarun darí lun aganbarügü nan aban gülülüguaü hámaruti yágüragua.13Áriebubei dan le lábürühan idabagu hawagun gürigia, aba gewenedü nan aban luriban uénedü.14Aba lárügüdünina anufudei; aba ladadagarun sun nabu.15Aba láfurun aban garabali nigibuagun, aba lírufadun sun nura.16Ñeinñein aban gürigia rara nigibugiñe ariha numutu liyawadi gama lumoun ibidiñeti nun katei lan. Maniigati... Lárigiñe aba naganbun lariñagun aban umalali:17«Gayaraati funagia richagua lan gürigia ligibugiñe Bungiu? Gayaraati san haruma lan ligibugiñe le adügübalin?18Ni íbini lani ánheligu madünatiña lun lafiñerun hawagu. Ánheinti darí lubéi Bungiu mabuiduni hawagu lani ánheligu,19gúbume san hawagu gürigia, ha débilibaña keisi aban muna to lautu múa to ábunawagutu ligibuagu sagoun, ha gayaraabei haburechawagun keisi hamutiri!20Günrinwaguatiña laganagua binaafin luma rábounweyu hilatiña lun súnwandan ani úatiña unti leberesera.21Gumuguati libagari keisi látumurawagun filu; hilati márügüdünga lichú aau».Bible Society of Honduras