Oseasi10
Lagünrinchawagun hani Ísüraelina latarü
1Ítara liña Ísüraeli kei aban lídibu beibei le gíbeti lin; gama lumoun sun meha dan le gíbetima lubéi lin, ligíatima ladaawagun latarü; dan létima buidu lubéi lumúan, ligíatima buídutima lan burí lidübüri le sagüráubei.2Fánreinguatu lanigi Ísüraeli, lafayeihati luagu lifigoun guentó. Lagünrinchagubei Aburemei lani burí latarü chagaléime burí lidübüri le sagüráubei.3Guentó hariñaguba gürigia ha: «Marúeitetiwa, lugundun minebenti Aburemei woun. Gama lumoun kaba hamugagia liyara aban urúei adüga luagu wafulesein?4Luéidigia ladimurehan saragu, magunfulirun lani le füramase láalibei luma laseinihan daradu; ítara luba hamuga liricha kei aban híduru péisiniti le áhüchübei lidan ichari».5Adadagaratiña lílana Samaria; aba hayahun lárigi liyawa bágasu le Betü-awenbei. Hayahuahañein lílana fulasu hama fádirigu, ladüga gumugua luéirigun.6Bágasu guánarügü ligía, lanügǘba Asirioun lun lichugún lun urúei. Ítara luba lerederun Éfürain lau busiganu: Lanügüba Ísüraeli busiganu lau liguariuan.7Lagumuchaguba lurúeite Samaria kei aban life wewe le áfayaruti ligibuagu duna.8Tagünrinchawaguba burí hasanduariun gibe tubungiutegu to ñéinñaha lubéi hafigouha lánigu Ísüraeli. Láhüchüba lagübüri sagadi luma hiiyu luagu burí hani latarü, hariñaguba gürigia lun burí wübü: «Darugua humá wau!» «Heigua humá wawagun!»Lasiadiruni Aburemei Ísüraeli
9Lariñahare Aburemei: «Lúmagiñe hagumeserun Ísüraeli afigouha uburugu Gibeá, meredegili hafigouhan. Aban le houn lidan hafigoun! Ligía lárügüdübaña lubéi wuribu gürigia wuribatiña ha, uburugu Gibeá.10Nabeichubaña gürigia danme le nabusenrun. Hóundaraguba néchanigu kóntüra hagía danme le nabeichuniña luagu hariban.11«Ítara liña bugaha Éfürain kei aban bágasu ñǘraügiru to hínsiñeti tun lun téferehan ilaü. Guentó rúhadina yugu luagu ligiina Éfürain lun lachawahan karü; Hudá, ligíaba achawahei awouhagülei, Hakobu ligíaba achawahei reeka.12Nariñaga houn: Bunagua humá irichaü, halubaha ínsiñehabuni. Aranse huméi múa lubá aban iseri bunaguaü, lugundun lidaanihali láluahoun Aburemei, danme liabin lanügüba huya lánina esefuruni huagun.13Gama lumoun huguya wuribani hábunagubei, alubahaadün marichaü, hóuhadün lin iyeeni.«Ladüga bemenigidun tuagu burí bikarün to lánina wuribu luma hawagu hibe bánigu ha wuriburuguna.14Ñeinbei chagaguaü hadan bumutuniña günrinwagua ligíame sun buburugute le derebuguti, ítara kei lagünrinchaguni Betü-arübéli le lurúeite Salümán lidan luéyuri wuribu, dan le taburechawagunbei úguchuru hau tirahüñü.15Ligiamémeba giñe asusereda hun, huguya lílana Beteli, ladüga lueirin huriban. Lóunweba lurúeite Ísüraeli úara luma larugadun!»
Bible Society of Honduras