Esekiéli26
Ñunsu kóntüra uburugu Tiru
1Weyu furumiñe lidan hati, lidan irumu unsu, aba ladimurehan Aburemei numa, lariñaga nun:2—Liráü wügüri, ariñagaali Tiru luagu Herusalén:“Günringua le lubenaribei marasun hadan néchanigu! Guentó, chülüha nidaani! Au abuincha lau irisini, ligía eredera lidan günringuaü”.3Ligía nariñagunbei au, le Aburemei: Tiru, gáganiguaadiwa. Nadügüba lun hiñuragun saragu néchanigu houngua buagun, kei liñurahan lugudi barana,4lun hagünrinchaguni burí bubarieirun, fui hameime buayelesin. Íbini kaliki, nabuidubei lídangiñe lubara, ábanrügüba wübü wásati nígira.5Lerederuba lamidangua barana, kei aban fulasu le ñein lubéi tagumurawagua seni. Au, le Aburemei ariñagubalin. Hasagarahabei néchanigu Tiru,6háfarawaguba lirahüñü würiña ha áraabubaña tau eféin. Ábameti hasubudiruni luagu au lan Aburemeibei.7“Nariñahare au, le Aburemei: Nadügüba lun liabin Nabukodonosoru le lurúeite Babilónia, urúei le gabafutimabei luéigiñe nórute, lun lábürühan luagun Tiru. Liábinba hau gabayu, karü, agalufehatiña gabayu, hama saragu súdaragu.8Láfaragubaña ha aganóubaña lidan burí buburugute; legeyedagubadibu, iñuragua ligíame ebu íñuti lun lawarirun luagun bubarieirun lun lageindagun buma, lóunahaba súdara lau idaüdinaü buagun.9Lagünrinchagubei burí bubarieirun lau dübü ábürügüdaleime buayelesin lau gürabu.10Danme lebelurun lurúeite Babilónia luéigiñe bubenari kei lebelurúniwa lidoun aban uburugu le ragüwaali, gíbebaña ligabayun darime lun hadouragun bau lau kaliki le hiñuragubei; ladadagaruba bubarieirun lau tirein karü hama gabayu;11hadügüragubei ligabayun sun bémeri. Láfaragubaña gürigia tau eféin, lágurubei burí buagaburi le derebugubei.12Hanügübei birisin, híweruhabei burí bebegidina, hágurubei burí bubarieirun tuma burí bani palasiu to wéndeguboun; hachagarubei burí dübü baranahoun, índanu luma sun árigirugu.13Ítara luba nagumuchaguagüdüni beremun, maganbúnhalime tumalali bani árüpa.14Nadügübadibu ábanme wübü wásati, ábanme fulasu le ñein lumuti tagumurawagua seni, úaalimeya araramagüdütibu. Au le Aburemei adimurehabei, au le Aburemei ariñagubalin”.15—Au, le Aburemei, nariñahare lun Tiru: Ladadagaruba uburugu burí le baranahabei danme laganbuni liréin bábürühan labadinagua haünhan abuleseirutiña luma háfarawagun birahüñü.16Harariruba sun lurúeitegu barana lídangiñe lálana harúeihan, ábame haragachunu hadáü tuma hadaüragun to lánina harúeihan, hañuuruba múarugu buin lau anufudei, hadadagaruba sun oura hanufudegua hagíame lau harihinibu.17Ábameti heremuhani uremu lánina ábunahani le bun: «Günrinwaguaadibu, gumuguaadibu baranahagiñe, buguya uburugu wéiriguti! Gabafutibu meha baranaha hau bumutuniña, hanufudeguagüda bumutiña meha lílana fulasu.18Guentó lau héiguaadibu lan, adadagarati burí ageiraü le baranahabei lau anufudei. Guentó lau gumuguaadibu lan, buin liña burí ubouhu le baranahabei lau anufudei».19—Lugundun anihán le nariñagubei au, le Aburemei: Nígirubadibu lidan árigirugu kei aban uburugu le ñein lumuti ua hamá aganóutiña. Nadügüba lun ladouragun lidunari barana bau,20lun babuluchun darí le ñeinhin habéi hilaaña, gürigia ha meha lánina binadu dan. Nágurubadibu lidoun lilulin-agei múa, baganóuba hadan ha hilaguaañabaña. Maganóundigiaaña gürigia bidan, mararamawagüdün buguyayame lidan múa le, le hamúan ha wínwanbaña.21Nadügübadibu ábanme katei hanufunati, ábame bagumuchagun. Báluahouba, gama lumoun madarirúnbadibu. Au, le Aburemei ariñagubalin.
Bible Society of Honduras