Bulus sẽkoo yɛnɛ shɔ Korinti Yutasinɛ Bulus sẽkoo au pɛsiyɛ yɛnɛ shɔ Koranti,5
1Dɔdɔrim u zɛ tɛttɔ naa u jazɛ bi gbete a kotipi au ɔ̃ ɗɔn naa talim kɛ lɛsinɛ, Ɗalapa au yuu yɛ mariu wɛrɛtɔ a kolapani u ɔ̃rɛ aɗɔn, wɛrɛ gbete maa ayuu yɛ, yɛ ɔ̃ dangdang.2Dɔdɔrim u sɨntɛ au sisɨn nɛ, pɛ vitɔ̃vɨng pɛ̃niba u kasirɛ u wɛrɛ gbete a a kolapa shɔu tosiu a bi naa fãrã;3na shɔkɛ tosiu fãrãu nɛ a bi, shɔ yɛ zɛu tɔkɨn naa u biwaati ɓa.4aɗagbete ukɛ ɔ̃nɛ a bi kotipim, u sɨntɔ aru raa gbete u ɓooyɛ; ɓanɛ aru u kasi vɔsinɛ au jazɛ bi kotipimkɔni ɓa, ama u kasirɛ shɔu tosiu bi shɔ kolapa a bi, nɔgbete bi gbete u suru aɗɔn u kɔsi shɔgbete yɛ vɔyɛtɔ dangdang.5Ɗalapa au yuu ukɔ masiubiirɛ aru kɔsinɛnni, a ãu u suru aru u tasiunɛ nyamasinɛ ɓa a vigbete yɛ pɛliu a ɗekɨn yɛ.6Aru nankɔ kopileepiya u sisɨn manɛ aɗɔn fɛ̃ɛm, u zɛ tɛtɔ u bi kotipim kɛ ɔ̃nɛ dɔni, u kpɛlɛ a Uɓeyelapa wɛrɛ.7Aruviya u ɔ̃nɛ pɛ shɔ sisɨn ãnɛ, ama ɓa shɔ jazɛnɔda ɓa.8U sisɨn manɛ aɗɔn fɛ̃ɛm, u kasirɛ u yaau wɛrɛ a jazɛbiimtɔ, u ɔ̃ a Uɓeyelapani a kolapa.9Ama vi pɛ̃niba ukɔ ɔrɛ shɔm, u kasirɛ u nta binyatɔ̃nɛtɔ, ko au wɛrɛ kotipim ko a kolapa.10Aruviya ɔ̃tɛ kaka jazɨng akɔrɔ u shi a Kirisi ɗekɨn, aru u yeeruu ayuu. Kopiya yɛ kpaa ji vi shonɛ gbete pɛliyɛ, ji ko iviya au pɛliyɛ au bi kotipimkɔ, tɔ̃vɨn ko kɔ̃linɛ.
A Kirisi Kabii a Sã wesatɔ a Ɗalapani
11Aru u zɛ vigbete a shɔ ɓaanɛ Uɓeyelapa seti ntanɛ tɛttɔyɛ, ukɔ sɨnrɛ u ɗɔgbete u maabii u gɔ̃ shɔ gãsiyirɛ. Ɗalapa zɛu tɛttɔ piti kpai nɔgbete u ɔ̃yɛni, ang kasinɛ ɔkɔma ɔ zɛtɔ a sisɨnni nizɛ nkɔng ɔ̃rɛ piya.12Ɓanɛ u kasinɛ u bɛliu yuu awɔ ɗekɨn ni ɓa; ama u kasirɛ u gelɔɔ ruu aru ɔ ntaubiinyatɔ̃nɛ, nɔgbete ɔ zɛnɔɔ shɔgbete i ɗeyuu i nya kasinɛyɛ, ama ɓa nɔgbeteyi sisɨn ɔ̃yɛ ɓa.13U pɛ rãngkɔ nizɛ ya? u kɛ ɔ̃nɛ rãng u pɛli aru Ɗalapa nii bassinɛ, ko u ɓa rãng ɓa ya? shɔmpɛ awɔ ruu yuu.14U vi pɛlinɛ kpai Kirisi ɔrinɛ ukɔ tesiu ɗekɨn rɛ, aruviya u ãsisɨntɛ nɛ Kirisi vɔ a shɔzɛ yuu piti kpai, aru nankɔ ko-piya vɔtɛ awuni.15Kirisi vɔ a shɔ yuu piti kpai, aruviya shɔ gbeteyi a suruni, ikɔyi ɔ̃nɛ, ɔ̃nɛ gbeteyi ɔriyɛ ɓa ama i ɔ̃ aru shɔgbete vɔrɛ a yuurɛ a suruni ai yuu.16Sãnɛ dɔdɔrim yɛnɛ ɗekɨn ukɔu yeeri shɔwɔ ruunɛ yuu naa shɔ kotipiyi yeeyɛni ɓa, aru nankɔ ɔ tuu Kirisi si tɛttɔ a nyabangkɔ ama dɔdɔrim ɔ tuu tɔkɨn nankɔni ɓa.17Ko-piya kɛ ɔ̃nɛ a Kirisini u pɛ shɔzɛ sɔɔ; vi gbaali tɛɛtɛ gboti, u sɔɔ akɛrɛ.18Vim piti kpai Ɗalapa pɛlirɛ, shɔgbete a nyaba Kirisi kabii kɔsiutɛ au shɔnɔpɔ̃m anɛ u ɓɛusayi, a lɔurɛ nɛu pɔ̃ shɔwɔyi sɔ̃njo i ɔ̃ u ɓɛusa.19U ruu gbete u geli shɔyɛ ukɔ ɔ̃rɛ Ɗalapa ɓasi shɔzɛtɛ kpai a Kirisi kabiikɔ. Ɗalapa ji gai ruuvini ɓa. Ɗalapa ãu naatɛ aru u ɓasi shɔtɔ awuni.20Nkɔu yɛm, ukɔu ɔ̃rɛ Kirisi janɔ, ji nagbete Ɗalapa au yuu nwanya au kabiiyɛ. U gaki a Kirisi yuu: Ɗalapa ɔ kɔsi sisɨntɔ ɔ ɔ̃ ɓeusayi, ama ɓau shɔnɔpɔ̃yi ɓa.21Kirisi u si ɓa a ruuvini ɓa, ama au yuukɔ Ɗalapa pɔ̃urɛ a vɔ au yuu ruuvinikɔ, aru u kpaa Ɗalapa tɔ̃vɨn pɛlinɛ.The Word for the World International