Kaiwo Riwangsoai9
Awaifoi tuti bonggoifoi urohong noti
1Awaifoi mantauni biaung ne munufoi kawurua,tuti yuai ne diri warabong itufo doatiraifa. Diri warabong2Kiutu fiahungfoi kia ne taraifoi, soni kaharifui to anggurifo,tuti meinenang fiangfo na mejafoi.3Na katai dadai na bendarifo,mangfata wiwing fosa, demisa esahu eteyo,4“Mandoni dino wiro deitawang turura kaha mani, da toninai ma!”Tuti we inontarai mano wiro enetituai kariri neo mai kahafoi, deyo,5“Mera to ninai ma, metang nehu fiangne,tuti metunung angguri yohong kaharifui oinei!”6Mehabi bonggoiwa, ambori metarang na mai,tuti mera na rangbo dohong mea mewaitawangnafo.7Mandoni dino deunau inontarai mano deikanggani inontarai siaifo mani, mantauni sobu aikangganiafo kontai,tuti mantei dino sua inontarai kerirafoi na mambiriu mani, sobu dadirafo.8Wiro wua inontarai mano deikanggani inontarai siai fanai, ambori wiro enerireu wau kaha,wua inontarai sewaifoi na mambiriu, ambori enewawu wau.9Bounau inontarai mano sewaifoi, ambori sewai sewa aha,bounau inontarai mano mesifoi, ambori deitawangnai werorongfo fuba aha.10Roaso Yahwei tuti omi wei mani, reantenang we obu awaifo,tuti aroangso Mano Dedai Mirarebanafoi mani, we obu waitawangnai werorongfo.11Yauno iwedaya nemu fuinane da waroi,tuti nemu fuina ro oane mani yohongnai aha.12Masino wowai mani, mantaung wau obu awaifo,masino enemurireuwi mani, mantaung wauno wobu dadirafo.13Inontarai mano wiro miaya we aunawi kahafoi mani, netarai toyario wiwingno borong beinseng,wiro deitawang fi fuba kaha tuti wiro mimaya kaha.14Minohi na ne munufoi na rahutu borongfo,na katai dadai na bendarifoi,15tuti inontarai mano era na rangfoi,mano era mimoya na rangfoi, sahu wesa deyo,16“Mandoni dino wiro deitawang turura kaha mani, da toninai ma.”Tuti we inontarai mano wiro enetituai kariri neo mai kahanei mani, medu deyo,17“Mereha kamananainei mani memisi,tuti fiangno angwaworainei mani miaing sewa.” 18Wape inontarai fosa eserawawerahai weo eraweia mani, ambori emarareha na wanaifa,tuti inontarai mano sahusa eramafo, esuai to raimeri kawurua.The Seed Company