AGBÃ10
Solomon Agbã
1Solomon agbã ngbe ne:Ɔbi wolai sɛ ɔpia ɔ̃ ɔse isoɣɔ,ɣɛɛ ɔbi kadzunisɛĩ sɛ ɔpia ɔ̃ ɔnyi isoma.2Karana ga mana iki i aranyanyariã ibara ame na kusia.Ɣɛɛ ara bɔlɔlɔa ibara sɛ iɖi ɔturi ibɔrɛgu i kukpi ame.3Bosate iisɛ ɔtã kukã ɔkpɛ̃ ɔturi bɔlɔlɔa,ɣɛɛ ɔsɛ ɔtɛ̃ ɔtilese ara ibie ɔri.4Ɖãdze nrɔɔ̃ mɛ loisɛ mipɛgu mibara sɛ mitã siwɛrɛba,ɣɛɛ nwɔ mba ɔdzini nrɔɔ̃ sɛ mibɔ karana.5Ɔbi wɔ nsɛ ɔsa ɔraɖui kanya ku ɔsɔrɛ̃wi ɖe ɔbi wolai,ɣɛɛ ɔbi wɔ nsɛ ɔrɛ ku ɔraɖui ɔsɔrɛ̃wi ɖe nwɔ nsɛ ɔpia kunuarɛ.6Kusɛkusɛ sɛ kusia i ɔturi bɔlɔlɔa iti iso,ɣɛɛ ɔturi nyanyariã kanya sɛ kakɔla ɔtile.7Ɔturi bɔlɔlɔa inyigi ɖe kusɛkusɛɣɛɛ ɔtilese iyere sɛ iyu.8Kawolai sɛ kabara i mmaraisi iso ku ɔtuɣɛɛ kadzunisɛĩ ɖeaka sɛ kabo i iwɔ ame.9Ɔturi wɔ nsi ngbã ku ɔnukuare ne, ɔsɛ ɔwe i kaɣɔ ame,ɣɛɛ nwɔ nsɛ ɔsiai kasɔla siri to ɔ̃abɔrɛ kayi.10Ɔturi wɔ nsɛ ɔma ɔturi anɔmi ku adzuni lalaa sɛ ɔbɔ imɔrɛ̃,ɣɛɛ kadzunisɛĩ ɖeaka sɛ kabo i iwɔ ame.11Ɔturi bɔlɔlɔa kanya ɖe ngbã itubiɔ,ɣɛɛ ɔturi nyanyariã kanya sɛ kakɔla ɔtile.12Itsiri sɛ ikpadzɛ̃ kulu ibɔ,ɣɛɛ kuɖɔɛ sɛ kufu i aɣɛrɛ ɔɖuɖu iso.13Iwola atɔ̃me sɛ abɔrɛ i nwɔ mba karɔ̃inɔ ikaɖe ame,ɣɛɛ iporobi lokote itã kadzunisɛĩ kama.14Maturi wolai sɛ masa inɔkpa kanya.ɣɛɛ madzunisɛĩ kanya ame atɔ̃me sɛ abɔ iwɔ.15Ranase karana nɖe ɔ̃ ɔmagɛ̃siare wɔ mba ɔle,ɣɛɛ siwɛrɛba nɖe wɛrɛba iwɔ.16Ɔturi bɔlɔlɔa sɛ ɔsu ɔ̃ kuso ɔsɛ ngbã,ɣɛɛ ɔtilese kuso sɛ kubɔ wũ kutsueikpadzɛ̃.17Ɔturi wɔ nsɛ ɔɖɔɛ ikpadzɛ̃ sɛ i ngbã ɔri iso,ɣɛɛ ɔturi wɔ losɛ̃ iyira ne, ɔsɛ ɔkɔkɔ mamama ɔyura.18Ɔturi wɔ lokɔla itsiri ne ladze ɔɖe,fiɛ ɔturi wɔ nsɛ ɔla mila ɔnina ɔturi iyere ɔki ne, kadzunisɛĩ ɔɖe.19Akaɖe gbodzoo sɛ ikɔ ɔturi ipia i ikpi ame,ɣɛɛ nwɔ nsɛ ɔkososo ku ikaɖe ne, ɔɣe iwola.20Ɔturi bɔlɔlɔa ɔnyagɛmi ne, sikãfudza sɛɛ ɔɖe,ɣɛɛ ɔtilese ɔtu iire kuira.21Ɔturi bɔlɔlɔa akaɖe sɛ apia maturi gbodzoo katetere,ɣɛɛ madzunisɛĩ sɛ makpi alasɔ mana kasusu.22Bosate kusɛkusɛ sɛ kubɔ ɔturi karana,fiɛ imɔrɛ̃ kuiwɛ̃ iisɛ ibua i kã iso.23Kadzunisɛĩ sɛ ɔna isoɣɔ i nsɛgbai lalaa ame,ɣɛɛ nwɔ mba karɔ̃inɔ sɛ ɔna isoɣɔ i iwola iso.24Ira nɛ ɔtilese sɛ ɔnigã nsɛ iba wũ iso.Ɣɛɛ nnɛ i ɔturi bɔlɔlɔa sɛ ɔbie sɛ iba i kame itã wũ.25Si awɛ ɔɔkpɛ̃ ne, ɔtilese iisibawe,ɣɛɛ ɔturi bɔlɔlɔa ne, ɔɣɛ teteree ɔwi ɖaa.26Kumɛgɔ i ndãbea sɛ mibo inyɛ, fiɛ kuyɔ sɛ kubo inɔmi ne,ngbɔ kere dãdze se ɔtã nwɔ lopia wũ katɔme ne.27Bosate kunigã nsɛ kutã agbanayi ɔsɛ katɔ̃,ɣɛɛ ɔturi nyanyariã akɔ sɛ atu kaku.28Ɔturi bɔlɔlɔa ɔriinyɔ nɖe isoɣɔ,ɣɛɛ ɔturi nyanyariã ɔriinyɔ ɖe siefe.29Bosate ɔri ɖe katarikɔ̃ ɔtã ɔturi bɔlɔlɔa,ɣɛɛ ɔsɛ ɔwɔra mma nsɛ mabara aranyanyariã.30Maibarui ɔturi bɔlɔlɔa i ɔ̃ kasɛkɔ̃ kuiyikuiyi,ɣɛɛ maarui ɔturi nyanyariã maɖi i karɔ̃ iso.31Iwola atɔ̃me sɛ abɔrɛ i ɔturi bɔlɔlɔa kanya ame,ɣɛɛ maatu mila ɔnyagɛmi maɖi.32Ɔturi bɔlɔlɔa kanya ame atɔ̃me sɛ atã kuka,ɣɛɛ ɔtilese kanya ɔyigu mila.The Seed Company