AGBÃ9
Iwola Gu Adzunisɛ̃
1Iwola ɔɔtsue ɔ̃ iyo;ɔ̃ɔɣedza akpa akɔdzɛ i ne ame.2Ɔ̃ɔɖoe ɔ̃ bɔi fiɛ ɔ̃ɔlupura ɔ̃ wain,fiɛ ɔ̃ɔtu ɔ̃ ɔpɔrɔ̃ ana.3Ɔ̃ɔpia ɔ̃ maɖaborɔ̃gomi ɔsese, si makpedza maturimabɔrɛgu i ɔmagɛ̃siare kakɔlɛkɔ̃.4Maɣɛ sɔ, "Mi madzunisɛĩ, miba i ngbe!"Ɔsɛ ɔɣere mma nna inyaiɖiite sɛɛ sɔ,5"Miba miaɖe wũ araɖea,si minɛ wũ ndã mɛ loɔlupu.6Minyua mi adzunisɛ̃ siri, si miasɛ ngbã;misɛ i karɔ̃inɔ ɔri iso.7"Ɔturi wɔ nsɛ ɔyira aɣiãrase ne, sitia ɔsɛ ɔnɔ;ɔturi wɔ nsɛ ɔsɛ̃ ɔtilese ne, iraboa nsɛ ibara wũ.8Daasɛ̃ atã aɣiãrase, ɔto ɔ̃atsiri-ɔ;ɣɛɛ si asɛ̃ atã kawolai ne ɔto ɔ̃aɖɔɛ-ɔ.9Te kawolai ara, ɔto ɔ̃atsue iwola ɔbua.Te ɔturi bɔlɔlɔa ara, ɔto ɔ̃abua ne i ɔ̃ araisuã iso.10"Bosate kunigã nɖe iwola karɔ̃isɛ;Ɔsekelea itsue nɖe ara karɔ̃inɔ.11Alasɔ iki i iwola iso ne, maatã fɔ ayi ɔsi,fiɛ maasu akɔ gbodzoo mabua-ɔ i ngbã ame.12Si atsue iwola ne, fɔ loana ne kusia,si aɖe aɣiãrase ne, fɔ ɔnɔwɛ̃ loawe inyɛ."13Ɔrɔ̃go kadzunisɛĩ nsɛ ɔlakulu;ɔna ikpadzɛ̃ fiɛ ɔna inɔkpa.14Ɔsɛ ɔsɛ i iyara iso i ɔ̃ kukui kanya,ɔsɛ ɔsɛ i iyara iso i ɔmagɛ̃siare kakɔlɛkɔ̃ ga loɖo,15ɔto mma nsɛ mafe,masɛ siĩ i ma ɔri iso ikpere.16Ɔsɛ ɔɣɛ sɔ, "Mitã mma ɔɖuɖu nɖe madzunisɛĩ si maba i ngbe!"Ɔsɛ ɔɣere madzunisɛĩ sɔ,17"Ndu mɛ mayu sɛ miwe ɔmɛrɛ̃.Aɖera wa maɖe i iwɛrɛ ame sɛ awe ɔmɛrɛ̃ nyɛkɛ̃nyɛkɛ̃!"18Ɣɛɛ maiɣe ɖuɖuuɖu sɔ makpise pia i mmɔ,fiɛ maiɣe sɔ ɔ̃ maturi kpedzaa pia i ikpibiɔ kawodorokɔ̃.The Seed Company