EZEKIEL10
Bosate Ikpawaĩ Ɔrui i Isɔrɛyo Ame
1Lonyɔ, ne lonya nnɛ lonyɔ lɛ itafɔkuɣa safir sigarakaɖekɔ̃ i igbado nɛ mpia i makerubi ati kato.2Bosate ɔɣere ɔrɛrɛ̃ wɔ lopia ɔkati ɖɔbɔrɔa arapia sɔ, "Kɛlɛ kukai ndɛ̃ i makerubi kayirinɔ. Ɖi atɔgirĩ wa lowara ato i makerubi ndɛ̃ yira i fɔ nrɔɔ̃ ame bɔrɛgu si asamera wã afere i ɔmagɛ̃siare iso." Ne gɔ nto lonyɔ ne, ɔkɛlɛ kame.3Kiniɔ ne makerubi ɔya i isɔrɛyo kagbalɔ ibaba isɛ, ku i ɔwi wɔ i ɔrɛrɛ̃ wɔmɔ ɔkɛlɛ kame. Ne idɔdɔ ɔyi i kame kasarɛkɔ̃ ame ne.4Kere ne Bosate ikpawaĩ ɔta i makerubi kato ne isɛ ikɛlɛ isɔrɛyo kabɔrɛnya. Idɔdɔ ɔyi i isɔrɛyo ame, ne kasarɛkɔ̃ ɔyigu Bosate ikpawaĩ ifiɛ.5Mato mawo makerubi abue ipɛ silɔ ɔnɔ ta kuruɛ kasarɛkɔ̃, gɔ sire lɛ Ɣaa Ɔlesate silɔ awe si ɔsɛ ɔɖeika.6Ɔwi wɔ i Bosate ɔɖisilɔ ɔtã ɔrɛrɛ̃ wɔ i ɔkati ɖɔbɔrɔa arapia ame sɔ, "Ɖi ɔtɔ bɔrɛgu i makerubi ndɛ̃ i kukai ndɛ̃ ne," ɔrɛrɛ̃ ɔsɛ ɔkɛlɛ ɔ̃aya i kakai kɔrɛ.7Kere ne makerubi ndɛ̃ ɔwɛ̃ ɔɖi ɔ̃ kɔrɔ̃ ɔpia i ɔtɔ wɔ lowe i ma ndɛ̃ ame. Ɔɖi ɔtɔ̃ ɔwɛ̃ ne ɔsu ɔpia i ɔrɛrɛ̃ wɔ lopia ɔkati ɖɔbɔrɔa arapia nrɔɔ̃ ame. Ne ɔrɛrɛ̃ ɔfɔ ɔtɔ ne ɔbɔrɛ ne.8(Maawo ira nɛ lonyɔ lɛ ɔturi nrɔɔ̃ ɔnya i makerubi abue kayirinɔ.)9Lonyɔ, ne lonya kukai kuna i makerubi iso, kakai kawɛ̃ ɔwe i kerubi biara isɛ. Kukai to kufiɛ lɛ itafɔkuɣa nɛ marɔ sɔ Kirisolit.10Ma ina ɔɖuɖu ɔre so i ma kuseme kanya, ɔbiara ɔnyɔ lɛ kakai losakanya ku kakai mama.11Si mato masɛ ne, masɛ makɛlɛ kusɛ kuna karere isɛ i ngbegɔ i makerubi to manyɔ. Kukai iisɛ kupɛ kufiriki si makerubi to makɛlɛ. Makerubi sɛ makɛlɛ kasɛ karere ga i ma ati to anyɔ, gɔ maisɛ mapɛ mafiriki gɔ mato makɛlɛ.12Anɔmi ɔyi ma kuturidziri ɔɖuɖu iso, ibua i ma kama, ma nrɔɔ̃ gu abue iso pelepele ɔyigu anɔmi, ngbɔ ame i ma kukai kuna ɔyigu anɔmi ne.13Lonɔ mato makpere kukai sɔ, "kagbadadururu kukai."14Kerubi biara ɔwe ntɔ̃ mina: Katɔ̃ kawɛ̃ ɔɖe nantsuĩrɛrɛ̃ kare, katɔ̃ nyɔare ɔɖe ɔturi awune kare, katɔ̃ tɛare ɔɖe dzata kare, ne katɔ̃ naare ɔɖe finikpo kare.15Kere ne makerubi ɔta makɛlɛ kato. Nwagbe loɖe ara wa mba ngbã wa loɔnya i Kebar Ɔwore kɔrɛ ne.16Si makerubi ɔsɛ ne, kukai gɔ i ma ababa ɔsɛ, ne si makerubi ɔwarɛ ma abue gɔ maata i karɔ̃ ne, kukai iirui i ma ababa iso.17Si makerubi ɔya kaa ne, kukai ana ɔya kpoo, si makerubi ɔta ne, kukai ana ɔtagu ma, alasɔ ara wa mba ngbã siwarã ɔwe i kɔ̃ ame.18Kere ne Bosate ikpawaĩ ɔrui i isɔrɛyo kabɔrɛnya kato ne ituĩ i makerubi kato.19Gɔ nto lonyɔ ne, makerubi ɔwarɛ ma abue ne mata i karɔ̃, ne gɔ makɛlɛ ne kukai ana ɔkɛlɛgu ma. Matuĩ i Bosate iyo kuɣɛ̃kabɔrɛkɔ̃ kayogodɔ̃ kabɔrɛnya, ne Israel Ɣaa ikpawaĩ ɔwe i ma kato.20Nwagbe loɖe ara wa mba ngbã wa loɔnya, i Israel Ɣaa kayirinɔ i Kebar Ɔwore kuruɛ. Ne lotsue sɔ ma loɖe makerubi ne.21Ma ɔbiara ɔwe ntɔ̃ mina gu abue ana ne i ma abue kayirinɔ ne ira ɔwe nɛ lonyɔ lɛ ɔturi awune nrɔɔ̃.22Ma ntɔ̃ ɔwe kuseme lɛ mma loɔnya i Kebar Ɔwore kɔrɛ kure. Ma ɔbiara ɔkɛlɛ katɔ̃ siĩ.The Seed Company