EZEKIEL11
Bosate Ɔɣɛ Kutsueikpadzɛ̃ Gɔ Loaba i Yerusalem Maɖeisoi Iso
1Kere ne Siwarã ɔkɔlɛ me kato sikɔ me sibɔ i Bosate iyo kayogodɔ̃ ga nto kanyɔ kuɣɛ̃kabɔrɛkɔ̃ isɛ. Marɛrɛ̃ sinyɔ-iru ɔwe i kayogodɔ̃ kabɔrɛnya i mmɔ. Lonya Azur ɔbibirɛrɛĩ Yaazania gu Benaya ɔbibirɛrɛĩ Pelatia, ma loɖe maturi matɔ̃ɖedze i ma ndɛ̃.2Bosate ɔɣere me sɔ, " Ɔturi awune ɔbi, mmagbe nɖe marɛrɛ̃ ma nto mabara adzuni nyanyariã fiɛ mato matã maturi ɔtile kuka, i ɔmagɛ̃siare wɔgbe ame ne.3Masɛ maɣɛ sɔ, 'Ikuti kɛkɛĩ boto boatsue ayo. Ɔmagɛ̃siare wɔgbe nɖe iwabui, fiɛ bo nɖe sina ne.'4Ne ɔso ɖikanya ta ya i ma iso, ɔturi awune ɔbi, ɖikanya."5Kere ne Bosate Siwarã ɔba i wũ iso, ne siɣere me sɔ loɣɛ sɔ, "Bosate sɔ: Nnɛmɔ ato aɣɛ, Israel iyo, ɣɛɛ loɣe nnɛ nto iki i mi adzuni ame.6Miɔɖue maturi gbodzoo i ɔmagɛ̃siare wɔgbe ame, ne miɔyira ɔ̃ sivurã ku makpise.7"Ne ɔso Bosate Wɔ Nsiguso sɔ: Maturi kuturidziri gɔ miɔfuĩdza misɛ i mmɔ nɖe sina ne, ɔmagɛ̃siare wɔgbe nɖe iwabui, ɣɛɛ nto loasa mi loɖi i ɔ̃ ame.8Misɛ minigã ipɛmi, ne ipɛmi nɖe ira nɛ loabɔ i mi iso, Bosate Wɔ Nsiguso loɣɛ.9Loto loasa mi loɖi i ɔmagɛ̃siare ame losu mi lopia i mafɔ nrɔɔ̃ ame si makpadzɛ̃ mi kutsue.10Mito miarɔ̃ i ipɛmi kanya, ne loakpadzɛ̃ mi kutsue i Israel karɔ̃ ta i ame iso. Iyɔ mito miatsue sɔ Mme nɖe Bosate.11Ɔmagɛ̃siare wɔgbe iibaɖe iwabui itã mi, ɣee miibakpese sina i ɔ̃ ame. Loto loakpadzɛ̃ mi kutsue i Israel karɔ̃ kame ku kã kume iso.12Ne mito miatsue sɔ Mme nɖe Bosate, alasɔ miisɛ i wũ asɛ̃ra iso ɣee miimɔɛ̃ wũ mmara mila ɣɛɛ misiai nɖebi mɛ loki milɔ mi asɛra iso."13Kiniɔ gɔ lola loɔɖikanya ne, Benaya ɔbibirɛrɛĩ Pelatia ɔkpi. Kere ne lorɔ̃ lofu anɔ i karɔ̃ ne lolakulu teteree sɔ, "Ao, Bosate Wɔ Nsiguso! Ato aawɔra Israel maturi ma lokuti pelepele aɖi?"Ɣaa Kaɣɛkasɛ i Mafɔrɔĩ Iso
14Bosate itɔ̃me ɔba me sɔ,15"Ɔturi awune ɔbi, fɔ manyii - fɔ manyii ma nɖe ima iwɛ̃ gu Israel kaɖe ɔɖuɖu - nɖe mma iso i Yerusalem maturi ɔɔɣɛ sɔ, 'Madzoro kaɖu i Bosate kɔrɛ. Bo masu karɔ̃ gagbe matã lɛ bo kare.'16"Ne ɔso ɣɛ sɔ, 'Bosate Wɔ Nsiguso sɔ: Atoasɔ losese ma dzoroo i nɖebi ndɛ̃ fiɛ losamera ma lopia i nrɔ̃ ame ne, ɣɛɛ ɔwi kɛkɛĩ ne loɖe kasekelekɔ̃ lotã ma i nrɔ̃ mɛ ame makɛlɛ.'17"Ne ɔso ɣɛ sɔ, ' Bosate Wɔ Nsiguso sɔ: Nto loasa mi kanya lobɔrɛgu i nɖebi mɛ ame miɔsame mipia, lokpesegu mi lobɔ fiɛ loasu Israel karɔ̃ lotã mi ana.'18"Mato maakpese maba i kã iso fiɛ maaɖi kã kumiamia nyanyariã gu anyanya arapɔa ɔɖuɖu i kã iso.19Nto loatã ma ɔtu wɔ nsɛ ɔki ɔri ɔwɛ̃ fiɛ loasu siwarã ɣɛtɛ lopia i ma ame. Loto loaɖi ɔtu wɔ mba ɔle lɛ ita i ma ame fiɛ loatã ma ɔtu wɔ loɣɔ lɛ sina.20Iyɔ mato maasiai wũ asɛ̃ra fiɛ maamɔɛ̃ wũ mmara mala kukaakɔ. Mato maaɖe wũ maturi fiɛ Mme wũ loaɖe ma Ɣaa.21Ɣɛɛ mma losu ma situ masia i kumiamia nyanyariã gu anyanya arapɔa iso ne, loto loakpadzɛ̃ nnɛ mabara losia i ma mɔmɔ ati iso, Bosate Wɔ Nsiguso loɣɛ."22Kere ne makerubi, ku kukai i ma ababa, ɔwarɛ ma abue, ne Israel Ɣaa ikpawaĩ ɔwe i ma kato.23Bosate ikpawaĩ ɔta ibɔrɛ i ɔmagɛ̃siare ame ikɛlɛ kato, ne ituĩ i kube kato i ɔmagɛ̃siare kuɣɛ̃kabɔrɛkɔ̃ isɛ.24I kaɖikate ga i Ɣaa Siwarã ɔtã me ame ne, Siwarã ɔkɔlɛ me kato ne sikɔ me sikɛlɛgu i mafɔrɔĩ kɔrɛ i Babilonia ne.Kere ne kaɖikate ga loɔnya ɔrui i wũ kɔrɛ.25Ne loɣere mafɔrɔĩ irabiara nɛ i Bosate ɔ̃ɔɖi ɔte me ne.
The Seed Company