য়াকুব2
1ও কুং ডুওয়া এবাই আসা হুম্রিবাই, নাবিহা সন্মানসো মেইপুওয়া য়াংবিকো প্রভু ইশু খ্রীষ্টহিং দেংওয়াবি জিংওয়াকো সোতা নাবিহা বাইরেকো য়ুওয়াই কাংমসা হাংসুহিংনে পকচ্ছপাত মোজো।2নাবিকো জোংসুওয়া সাতা এনতা-এনতাওয়া আংদুং আসা সুনকো অংটি লুওয়া পুপুউ দিংঙা আসা দোসরা জেবে আংদুং, আজকাক্যইওয়া দাগ্রি-দোগ্রি আংদুং লুওয়া জোরোংওয়া দিংঙারে ওয়োংকো ছুরোওয়া।3আত্রংহা নাবিহা এনতা-এনতাওয়া আংদুং লুওয়া পুপুউ দিংঙাহিং আদর জোমসা জাংকোদোওয়া, “লেই, ইতা গাচা” আদো জোরোংবিহিংয়া, “আউতারাং জা, কিতা আউতারাং কুং কোকোই কাটুতা গা” তামসা জাংকোদোওয়া।4এপা জোনাহা নাবিহিংয়া আপনিকো প্যাকোতা পকচ্ছপাত আসা দুষ্ট নোচেংকো দোষ লাগেরোওয়া।5জেজেংওয়া ডুওয়া এবাই আসা হুম্রিবাই, হিং। না সেংজাহা বাসিমতিকো জোরোংবিহিং দেংওয়াতা পুপুউ বানাইকো আসা প্রতিজ্ঞা জোওয়া রাজ্যহা আকুহিং জেজেংপা জোওয়া জোরোংবিহিং পিচাকো মেজেংগাসা?6আদো নাবিহা জোরোংবিহিং মিচিপা জোমগা। আবিকো তোইতা অত্যাচার জোমসা ন্যায়ধীশবিকো নাগাই চোইপাওয়াহা পুপুউরাং মোকোতা?7আবিহা আকু আদরকো মিংকো বেইজ্জত মোজোংগাসা, হানি মিংসো নাবিহিং মোউমি নিমমে?8সাবেইবিহিং আপনিহিং বেপা জেজেংপা জোকো তামসা তাংজিকো হিগাতা লাওয়া সেংজাকো রাজ্যকো লিংপাংহিং পালন জোনাহা নাবিহা ঠিক কাম জোরোওয়া।9আদো বাইরেকো য়ুওয়াই কাংমসা দিংঙাবিহিংপা ব্যবহার জোনাহা নাবিহা পাপ জোদিংয়ো আসা এপারাং নাবিহিংয়া লিংপাংহিং ভঙ্গ জোওয়া দোষ লাগেরোওয়া।10হাংপাতানাহা হাংসু তাংসা লিংপাং পালন জো, আদো ইচো নুওয়াংমি ভঙ্গ জোপুনাহা, লিংপাংকো তাংসা নুওয়াংতা ভঙ্গ জোপুওয়াকো আকুহা দোষি জিংপুওয়া নিমগা।11হাংপাতানাহা “মোনুংনাংসু” তামসা জাংওয়া সেংজারাং “দিংঙা ম্যাস্যা” তামসারে জাংমগা। জিংদো জিংক্যইরোওয়া, মোনুংনাংসুকোদোওয়া, আদো দিংঙামি স্যাদানাহা পুরা লিংপাংহিংনাং ভঙ্গ জোমগা।12আকো সোতা নাবিকো য়্যইওয়া আসা লোংস্ত্যাইওয়াহা নাবিহা কোইনেরোওয়া, হাংপাতানাহা হানি লিংপাং নাবিহিং স্বতন্ত্র জো, আকুরাং নাবিহিংয়া ন্যায় জোরোওয়া।13হাংপাতানাহা হাংসু দিংঙা কৃপা মোজোয়াং, আকো ন্যায়রে কৃপা মোতোপারাং জিংরোওয়া, আদো কৃপাহা ন্যায়হিং জিয়োকো ছুমগা।14কুং ডুওয়া এবাই আসা হুম্রিবাই, লেরাহা দেংরো তামসাহা জাংমগা, আদো আপনিকো কামসোরে আপনিকো দেংওয়াহা তিংপামক্যইনাহা হাং জিংগাসা? এপাজিংওয়া দেংওয়াসোহা আকুহিংয়া বাচাইকো ছুকোগাসা?15হাংসু এবি কিতা হুম্রিবিকো আংদুং মোতো আসা চাওয়ারে মোতো,16আদো আবিকো প্যাকোতা হাংসুজিংদো আকুহিংয়া “সেংজাহা নাতিহিং আশিষ পিচাকো, এনতাপা লুচা, আসা এনতাপা চা” তারোওয়া, আদো আকুহিং ঘ্যইওয়াহা হাইরে মিচ্ছানাহা হাং তোইংদ্যা জিংগাসা?17দেংওয়ারে এপারাং জিংমগা। কাম মাজোওয়া দেংওয়াহা সিপুনতেওয়া দেংওয়াগা।18আদো লেরাহা জাংকোদোওয়া, “নাতিহা দেংমগা। কাহা কাম জোমগা।” কাম মোতোপা নাকো দেংওয়া তিংপাকে! কাহা কাম জোমসা কুং দেংওয়া তিংপারোওয়া।19ইচো মেংচে সেংজা নিও তামসা নাতিহা দেংমগা? ইহা এনতাওয়াগা। আদো এপাহা জেসাংবিরে দেংমগা আসা চুসুংমসা ফিমগা।20ও তোউজিবাই, কাম মোতোপা দেংওয়াহা হাইরে ত্যইংদ্যা মোতো তামসা জাংওয়াহা নাবিহিংয়া আজিপ্পারাং তিংপানেকোগা।21য়াংবিকো আটা অব্রাহামকো বিষয়তারাং নোকো জো। আকুহা আপনিকো চেংওয়া ইসহাকহিং মোজোংতা চড়াইওয়া কাম জোমসা সেংজাকো নাগাই আকুহা তাংজি তিংমকোতাসা?22আকো দেংওয়া আসা কামহা চিত্তা-চিত্তারাং তিংয়ে আসা আকো কামবিসো হেপা আকো দেংওয়াহা পুরা জিংগা, আকুহা নাবিহা মাতিংগা?23অব্রাহামহা সেংজাকো তোইতা দেংয়ে আসা আকু দেংওয়াসোরাং আকুহা সেংজাকো নাগাইতা তাংজি তিংয়ো তামসা তাংজিকো হিগাতা জাংওয়া নুওয়াংহা পুরা জিংয়ে। এপারাং অব্রাহামহা সেংজাকো ব্যারোগা তামসা জাংমি নিও।24নেহা কোইংগা? দেংওয়াসো মেংচে মোকো, আদো আকো জোওয়া কামসো দিংঙাহা সেংজাকো নাগাইতা তাংজি তিংমগা।25বেশ্য়া কাম জোওয়া রাহাবহিংনাং নোমসা কাং, হেপা আকুহা আপনিকো কামসো সেংজাকো নাগাইতা তাংজি তিংমমে। জাসুস জোকো হোওয়া ইস্রাইলিবিহিং মোউমসা আসা দোসরা ন্যাতাসো নিংপুমসা আকুহা বাচাইমগা।26লাংবে মোতোপাহা হেপা জুপা সিপুমমে, এপারাং কাম মোতোপাহা দেংওয়ারে সিপুমগা।
The Seed Company