2 تيموتاوس4
1أَشك وصِّيغ زَّاث إِ أَربِّـي ذ عِيْسَى لْمَسِيح ونِّي إِي غَا يحكْمن خ يِنِّي يدَّرن ذ يِنِّي يمُّوْثن، أَشك وصِّيغ عَاوذ ذِي ڒْمُلْك نّس ذ نْهَار نِّي إِي ذِي د غَا يمظْهَار:2بشَّر اَوَاڒ ن أَربِّـي، سوْجذ يخف نّش اَذ تْبشَّرذ ذِي ڒْوقْث نِّي إِي تْرَاجِيذ نِغ ذِي ڒْوقْث نِّي إِي وَار تْرِيجِيذ شَا. ڒْمُوْمِنِين نْهَا-ثن، عْڒم-اَسن، شجّع-يثن س مَارَّا تَّاسِع ن ڒْخَاضَر ذ وسڒْمذ.3أَقَا اَذ تَاس ڒْوقْث نِّي نِثْنِي وَار تْصنِّيطن شَا غَار تَّعْلِيم نِيشَان؛ أَغَارْسن د سْمُوْنن يجّن ن لْعَدَد ن يمْسڒْمَاذن سَّاوَاڒن غِير مِين ذَاسن يعجْبن إِ يمجَّان نْسن وَاهَا.4يِيْنَا اَذ سْبعّْذن يمجَّان نْسن زِي لْحَقِيقَا اَثن اَوِين اَذ سْڒن إِ ثْحُوْجَا وَاهَا.5شك اَرّ-د ڒْبَاڒ نّش ذِي مَارَّا ثِمسْڒَايِين، صْبَر إِ تَمَارَا، اݣّ ڒْخذْمث اَم ونِّي يتْبشَّارن، اݣّ لْوَاجِب ن ڒْخذْمث نّش.6شُوْف، نش تْفرَّاغن-اَيِي-د اَم يِجّن ن صّذْقث ن يذَامّن خ دْبِيحث يتْوَاقدَّامن، أَقَا ثُوْوض-د ڒْوقْث ن ؤُفُوْغ ينُو زِي دُّنشْت-أَ.7أَمنْغِي-يَا اَصبْحَان منْغغ-ث، ثَازّْڒَا-يَا كمّْڒغ-ت، لْإِيمَان حْضِيغ-ث.8سَّا ٱڒ ثْسَاونْت يتْرَاجَا-اَيِي يجّن ن تَّاج ن صُّلْح اَݣ أَربِّـي ونِّي إِي ذَايِي غَا يُوْش سِيذِيثْنغ إِي يدْجَان ذ لْقَاضِي نِيشَان؛ أَذَايِي-ث يُوْش ذِي نْهَار نِّي ن لْحِسَاب. مَاشِي اَذَايِي-ث يُوْش إِ نش وَاهَا؛ لَّا، أَث يُوْش إِ مَارَّا يِنِّي يتخْسن نْهَار نِّي إِي ذِي د غَا يمظْهَار.9اݣّ لْمجْهُوْد نّش بَاش اَغَارِي د تَاسذ ذغْيَا.10مِينْزِي دِيْمَاس يسْمح ذَايِي ثُوْوِي-ث ڒمْحِبّث ن دُّنشْت-أَ يرُوْح غَار ثنْدِينْت ن سَالُوْنِيك. ئِرُوْح كْرِيسْكُوْس غَار لْإِقْلِيم ن ݣَلَاطْيَا، ئِرُوْح تِيتُوْس غَار جِّهث ن دَلْمَاسْيَا.11ئِقِّيم اَكِذِي غِير لُوْقَا وَاهَا. أَوِي-د اَكِذش مَرْقُوْس مِينْزِي ينفّع-اَيِي ذِي ڒْخذْمث ينُو.12سّكّغ تُوْشِيق غَار ثنْدِينْت ن ؤُفَسُوْس.13خْمِي د غَا ثَاسذ، أَوِي-د اَكِذش اَزدْجَاب ينُو ونِّي إِي جِّيغ اَك كَرْپُـوْس ذِي ثنْدِينْت ن تْرَاوْس ؤُڒَا ذ لْكُتُب ينُو خَاصَّتَان يِنِّي يدْجَان ن يڒمَاون.14إِسْكَنْدر ونِّي يتْصنَّاعن نّحَّاس يضَرّ-اَيِي اَطَّاس، أَث يخدْجس أَربِّـي خ ڒفْعَايڒ نّس.15ؤُڒَا ذ شك حْضَا يخف نّش زَّايس مِينْزِي نتَّا يتْعَارَّاض اَطَّاس إِ مِين نتْبشَّار.16وَامِي ذَافْعغ خ يِيخف ينُو ثْوَاڒَا ثَمزْوَارُوْت ذِي لْمَحْكَامَا مَارَّا سمْحن ذَايِي ؤُڒَا ذ يجّن مَا يبدّ اَكِذِي. وَار خَاسن ت يتْحِيسِيب شَا سِيذِي أَربِّـي.17ذ سِيذِيثْنغ إِي كِذِي يبدّن غَار وغزْذِيس ينُو يُوْشَا-ٱيِي جّْهذ حمَا زَّايِي نش اَذ يتْوَابشَّر لْإِنْجِيل يكْمَاڒ اَث سْڒن مَارَّا يِنِّي وَار يدْجِين شَا زِي أَيث-إِسْرَائِيل، سّنِّي نش فڒْثغ زݣ ؤُقمُّوْم ن سّْبَاع. 18أَذَايِي يسفْڒث سِيذِيثْنغ زِي مْكُڒ ثَمسْڒَايْث ذ ثَعفَّانْت اَذَايِي يسنْجم غَار ڒْمُلْك نّس يدْجَان ذݣ وجنَّا. أَغَارس ثِيڒِي لْعَظَمَا إِ ڒبْدَا ن ڒبْدَاث. آمِين.19سِيْوض-اَس سْڒَام إِ پْـرِيْسْكِيْلَا ذ وَاكِيْلَاس ذ ثدَّارْث ن وَانِيْسْفُوْر.20ئِقِّيم أَرِيْسْطُوْس ذِي ثنْدِينْت ن كُوْرِيْنْث، تْرِيْفُوْمُو جِّيغ-ث نش ذِي ثنْدِينْت ن مِيْلِيْتُوْس يهْڒش.21اݣّ لْمجْهُوْد نّش بَاش اَذ د تَاسذ قْبڒ إِ ڒْمشْتَا-يَا. ئِسَّاوَاض-اَش-د سْڒَام يُوْبُوْلُوْس ؤُڒَا ذ بُوْدن ذ لِيْنُوْس ذ ؤُتْشْمَاثْنغ كْلُوْدْيَا ذ مَارَّا اَيثْمَاثْنغ.22أَذ يِيڒِي سِيذِيثْنغ اَك اَرُّوْح نّش. أَذ يِيڒِي اَرْضَا اَكِذْوم مَارَّا.
Wycliffe Bible Translators, Inc.