تيتوس1
1نش ذ بُوْلُس ذ اَخدَّام ن أَربِّـي ذ اَرَّسُوْل ن عِيْسَى لْمَسِيح خدّْمغ عْلَاحْسَاب يِنِّي إِݣ يخْضَر أَربِّـي بَاش اَذ اَمْنن اَذ سّْنن لْحَقِيقَا إِي ثن يسݣُّوْرن غَار مِين يدْجَان نِيشَان ذِي لْإِيمَان.2لْإِيمَان-أَ ذ ثُوْسْنَا-يَا ثْبدَّا خ لْأَمَال ن ثُوْذَارْث نِّي وَار يفنِّين عمَّارْص، ثنِّي إِي زِي يوْعذ أَربِّـي يعْنِي ونِّي وَار يسْخرِّيقن شَا. ئِوْعذ س ثُوْذَارْث نِّي قْبڒ مَا ٱذ بْذَان زْمَانَاث قَاع.3أُو ذِي لْوقْت نِّي إِݣ يخْضَر نتَّا يسْمظْهَار-د لْوَاعد-أَ س تّبْشِير نِّي إِي زِي ذَايِي يتْوَاكلّف س لْأَمَر ن أَربِّـي ونِّي إِي ذَانغ يسْنجْمن.4تَارِيغ ثَبْرَات-أَ إِ تِيتُوْس ونِّي إِي يدْجَان اَم ممِّي ذ صَّح ذِي لْإِيمَان-أَ إِي ذِي نْشَرّش. أَكِذش يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح ونِّي إِي ذَانغ يسْنجْمن.5خ مَانَاينِّي جِّيغ-شك ذِي ثيْزِيرْث ن كْرِيت، أَذ تْعذْڒذ مِين تُوْغَا رزُّوْغ نش اَذ عذْڒغ وَار ؤُوِيضغ شَا أُو عَاوذ بَاش اَذ تِخْضَرذ يمقّْرَانن ن جْمَاعث ن ڒْمُوْمِنِين ذِي مْكُڒ اَبِيلَاج اَم مَامّش إِي ش وصِّيغ.6أَمقّْرَان-أَ مَاشِي اَذ يِيڒِي ذ يجّن ن بْنَاذم تْعيَّابن-ث يِوْذَان. أَغَارس ثِيڒِي يجّن ن ثمْغَارْث وَاهَا اَذ يڒِين يحنْجِيرن نّس ذ ڒْمُوْمِنِين. مَاشِي اَخَاسن ينِين يِوْذَان تݣّن لْمَدلَّا ن سّكْرَا نِغ وَار تْسذْحِين شَا.7أَقَا اَرَّايس ن جْمَاعث يتْكلَّاف نتَّا س لْمسْؤُلِيَا زِي أَربِّـي أُو لَابُد اَذ يِيڒِي بْڒَا ڒْعِيب، وَار ذَايس يتِيڒِي بُو تَّكبُّر، وَار يتْعصِّيب شَا ذغْيَا، وَار يسكَّر شَا س شّْرب، وَار يشِّيث شَا، وَار يضمّع شَا ذِي تْمنْيَاث.8وَاه، ئِتخصَّا اَذ يتْرحَّاب زݣ ينوْجِيون، أَذَاس يتعْجِيب مِين يدْجَان ذ اَصبْحَان، أَذ يحْكم خ ثْنفْسِيث نّس، أَذَايس يِيڒِي لْمَعْقُوْل، أَذ يِيڒِي يصْفَا، أَذ يربَّا يخف نّس.9ئِتْخصَّا أُو لَابُد اَذ يطّف مْلِيح ذݣ وَاوَاڒ نِّي إِي ذِي ثدْجَا تِّقث إِي ذَاس يتْوَاسْڒمْذن حمَا اَذ يشجّع يوْذَان س يِجّن ن تَّعْلِيم نِيشَان اَذ ينْهَا يِنِّي يتْعَارَّاضن إِ تَّعْلِيم-أَ.10لِأَنَّا يِنِّي إِي ذِي ثدْجَا ثْغنَّانْت اَقَاثن مُجُوْدِين، سَّاوَاڒن وَاهَا نِثْنِي ذ يغدَّارن خَاصَّتَان ذ يِنِّي يتِيشّن لْهِمَّا اَطَّاس إِ طَّهَارث. 11يِيْنَا اَقمُّوْم نْسن يتْخصَّا-يَاسن اَذَاسن يتْوَاقّن. نِثْنِي مشْحَاڒ ن لْعَائِلَاث كمْڒنْت إِي سْپَـرْذْڒن وَامِي ذَاسن سڒْمَاذن ثِمسْڒَايِين يتْخصَّا-يَاسن وَار ذَاسن ثنْت سڒْمِيذن شَا، نِثْنِي ضمّْعن ذِي تْمنْيَاث وَاهَا.12ئِجّن زَّايْسن حسّْبن-ث ذ نَّبِي نتَّا س يِيخف نّس ينَّا: "نِثْنِي أَيث-كْرِيت ڒبْدَا ذ أَيث-بُوْيخَرِّيقن ذ ڒُوْحُوْش يوْعَارن ذ يمَعْݣَازن ذَايْسن اَعدِّيس وَاهَا."13أَقَا شْهَاذث نِّي إِي ينَّا نِيشَان إِي ثدْجَا. إِذن، نْهَا-ثن س ڒقْسَاحث حمَا اَذ يڒِين نِيشَان ذِي لْإِيمَان.14مَاشِي اَذ ݣّن اَرَّاي إِ ثْحُوْجَا نِّي ن أَيث-إِسْرَائِيل نِغ اَذ ݣّن اَرَّاي إِ ڒُوْصِيَاث نِّي ن يِنِّي يسْبعَّاذن يخف نْسن زِي لْحَقِيقَا.15أَقَا يِنِّي إِݣ يدْجَان صْفَان اَتَاف قَاع ثِمسْڒَايِين اَذَايْسن يڒِينْت صْفَانْت. وَلَكِن يِنِّي يخنْزن وَار ؤُمِينن شَا اَتَاف وَار ذَايْسن تِيڒِي ؤُڒَا ذ يجّن ن ثْمسْڒَايْث ثصْفَا. أَتَاف ڒْعَقُوْرَاث نْسن ذ ضَّمِيرَاث نْسن س ثْنَاين تخْنِيزن.16قَّارن قَا نسّن أَربِّـي وَلَكِن نكَّرن-ث س ڒفْعَايڒ نْسن. نِثْنِي تْوَاعِيفّن، وَار تْطِيعِين شَا، وَار نفّْعن شَا ؤُڒَا ذݣ يِجّن ن ڒْخذْمث ذ ثَصبْحَانْت.
Wycliffe Bible Translators, Inc.