दानिएल2
1राजा नबुकदनेस्सर तान राज ने दिहरा वोरह्या माय एक होपनो दिख्यो, ता होपनान वोजेसे तान मोन जुलूम चिन्ता माय पोड़ गीयो एने तो हुव नाह सीकनो।2केरीन राजा उकुम आप्यो काय जाणकार, पुजारा, जादुगेर एने कसदी कागेल पांड्याह हादाड्यो काय ता आवीन तान होपनान मतलब सोमजाड़े। जेवी ता राजान ओंगाण आवीन उब रेना।3तेवी राजा ता माणहाह केयो, “मी एक होपनो दिखेल हे, ता माय मारो मोनाम दुखी हे, मी ज्य जाणने होदथु काय ता होपनान मतलब काय हे?”4तेवी कसदी राजाह अरामी बाषा माय केया, “एय राजा तु कायेम जीवतालो रिहे! आमु तारा सेवक हेते, तु तारो होपनो आमुह के, ओवता आमु तान मतलब केहु।”5तेवी नबुकदनेस्सर राजा ता कसदी पुजाराह केयो, “नाह! तो होपनो एने तान आर्थो काय एतो, ज्य बी तुमूस केणु हे, एने केदी तुमू ज्य केया नाह, ताहार मी तुमरे टुकड़ा केरनेन उकुम आपुह। एने तुमरा गेरे उजाड़ाय जाती।6पुण केदी तुमू होपनो एने तान मतलब केय दिहो, ताहार मी तुमूह बात बातीन बेट एने ईनाम आपुह; तुमरो मान मेलुह। केरीन तुमू एवी मारो होपनो एने तान मतलब किवो।”7ता माणहे पोशा राजाह केया, “एय राजा होपनो तारा सेवकाह के, एने आमु तान मतलब सोमजाड़ देहु।”8राजा जापाप आप्यो, “माहु पाको मालुम एय जायेल हे, काय तुमू टेमाह टालनेन कोसीत केरने बाजरेनाह, काहाकाय तुमू ज्य जाण जायेल हेते काय, मी ज्यो उकुम आपेल हे।9तुमू ज्य जाणतेह काय केदी तुमू माहु मारा होपनान बाराम नाय किहो ताहार देन्ड जुड़ी, ज्य तुमूह मालुच हे। तुमू आखा मिलीन माहु जुठ मेलतेह। केरीन तुमू माहु होपनो किवो, तेवी मी जाणुह काय तुमू होपनान मतलब बी सोमजाड़ सेकतेह।”10कसदी राजाह जापाप आप्या, “देरती पोर ओहलो काल्लो माणुह नाह जो राजान ज्यी वात केय सिके एने नाह एगदो ओहलो राजो, नाहते मुखी, नाहते आदिकारी ईयेल हे जो एगदा कागेल पांड्या, जादुगेर माणहाप नाहते कसदी फाय केदी ओहली वात फुसेल एय।11जी वात राजा आमु फाय रेन जाणने हुदेह, ती केठीण हे, एने देवता ओलास राजान होपनो केय सेकतेह, पुण देवता ते माणहान विचीम नाह रेणु।”12जेवी राजा ज्य होमल्यो ते तो जुलूम खीजवाय गीयो, एने तो बाबेलान आखा एकलीदार माणहाह मार टाकणेन उकुम आप्यो।13केरीन राजान उकुम निकेलनो काय आखा एकलीदार माणहाह मारनु एतो, केरीन दानिएल एने तान जोस्तीह बी माराव देणेन केरता ताह होदणेन राजान माणहे गीया।14अर्योक ज्यो राजान राखवाल्यान मुखी इतो। तो बाबेलान एकलीदार माणहाह मारनेन केरता जाणे बाजरियेल इतो, पुण दानिएल अर्योक हिऱ्यो सोच सोमजीन एने हासकेरीन वातु किऱ्यो।15दानिएल अर्योकाह फुशो, “राजा ओलो काठो देन्ड आपणेन उकुम काहा आपेल हे?” ओवतो अर्योक राजान होपनावाली वातीन बाराम केयो, ओवतो दानिएल आखो सोमजी गीयो।16दानिएल जेवी ज्यी वात होमल्यो, ते तो नबुकदनेस्सर राजा फाय जाईन राजाह विन्ता केरीन थोड़ोक टेम उंजु मांग्यो, ओवतो तो राजाह तान होपनो एने ता होपनान मतलब किण्यो इतो।17ओवतो दानिएल तान गेर जाईन, तान दोस्ती हनन्याह, मीशाएल एने अजर्याह ती आखी वात केय होमलायो।18दानिएल तान जोस्तीह हेरगावाला बोगवानान देयान केरता विन्ता केरनेन केयो, काहाकाय बोगवान ता पोर गीण केरी, एने ज्यी वातीह सोमेजणे माय मोदेक केरी, काय बाबेलान एने आखा एकलीदार माणहा हेऱ्या, दानिएल एने तान हाती बी खेतेम नाय केराय जाय।19राती बोगवान दानिएलाह देरसेनान द्वारा, ती आखी वात सोमजाड़ दिनो। तेवी दानिएल हेरगावाला बोगवानान दन्यवाद किऱ्यो,20एने दानिएल केयो, “बोगवानान नावान कायेम बोड़ाय किरो;काहाकाय ईकेल एने ताकेत तास ने हे।21तोस टेम एने वोरह्यान ऋतुह एने राजा बी बोदलेह;सेत्ता आपणे एने तोस तान सेत्ता सांडाड़ लिथे; तोस बुद्दी आपेह एने माणहे बुद्दीमान बोण जातेह,तोस माणहाह ईकेल आपेह एने माणहे एकलीदार बोण जातेह।22तोस केठीण एने लिकायेल वातुह देखाड़ेह;उजालो कायेम रेणेन वोजेसे, आंदारलाम एने लिकायेल जागाम काय हे,ज्य तो जाणेह।23एय मारा डायडायान बोगवान, मी तारो दन्यवाद एने बोड़ाय केरथु,तुस माहु ईकेल एने ताकेत आप्यो।ज्यु वातु आमु फुसेल एता, त्युन बाराम तु आमुह केयो!तु आमुह राजान होपनान बाराम केयो।”
राजाह होपनो एने तान मतलब केणो
24ओवतो दानिएल अर्योक फाय गीयो, जाह नबुकदनेस्सर राजा बाबिलोन ने एकलीदार माणहाह खेतेम केरनेन केरता ठेरायेल इतो। दानिएल ताह केयो, “बाबेलवाला एकलीदार माणहाह मारे मा! माहु राजा फाय ली जा, मी राजाह तान होपनो एने होपनान मतलब केह।”25ओवतो अर्योक चालोच दानिएलाह राजा फाय ली गीयो, एने राजाह केयो, “यहुदान आरापी माय मी एक ओहलो एदमी होद लियेल हे, जो राजाह होपनान मतलब केय।”26तेवी राजा दानिएलाह जो बेलतशस्सर केवातालो फुशो, “काय तु माहु मारा होपनो एने तान मतलब केय सिकेह काय?”27दानिएल राजाह जापाप आप्यो, “एय नबुकदनेस्सर राजा, तु फुसेल लिकायेल वातु एकलीदार, जादुगेर नाहते कसदी नाय केय सेकती,28पुण हेरगा माय ओहलो बोगवान हे जो लिकायेल वातुह देखाड़ेह, तोस नबुकदनेस्सर राजाह होपना माय देखाड़ेल हे काय बोविष्याम काय काय एण्यो हे। तारा आथरोणा माय हुवते लेन तु होपना माय ज्यु वातु दिखेल एत्यु, त्यु ज्यु हेत्यु।”29एय राजा, जेवी तु तारा पोलांगा पोर लोटीन सोचणे बाज गीयो काय भविष्य माय काय काय एण्य हे। तेवी बोगवान लिकायेल वातुह देखाड़णार, आवणार्यु वातुह तुवाह देखाड़ दियेल हे।30बोगवान त्यु लिकायेल वातु माहु बी केय दियेल हे। ओहलो ज्यान वोजेसे नाह एनो काय मार फाय दिहरा माणहाह रेन जादा ईकेल हे, पुण माहु बोगवान ज्यी वातीह, ज्यानकेरता कियेल हे काय राजाह तान होपनान मतलब मालुम पोड़ जाय, एने तु तारा मोनान विचाराह सोमजी सिके।31एय राजा, जेवी तु देखणे बाजरियेल इतो, तेवी एक मोटली मुरती देखानी, एने ती मुरती जी तार सामने उबरियेल एती, ती लांबी चौड़ी एती; तीन चोमेक जुलूम एती, एने ती देखाणे माय बियावे ओहली एती।32ती मुरतीन मुंड ते चोखाला होनान एतो, साती एने आथ चांदीन एता, पेट एने जांगु पितलान एत्यु,33ती मुरतीन पायान नेचलो बाग लोड़ान एतो, एने ती मुरतीन पाय थोड़ाक लोड़ान, एने थोड़ाक माटड्यान एता।34जेवी तु मुरतीन उगे देखणे बाजरियेल इतो, तेवी एक दिगोड़ बिगेर एगदान उखालेल, आप आप उखलीन ती मुरतीन लोड़ा एने माटड्या केरीन बुणेल पाया पोर जाय पोड़नो, एने ताह चुरावाल दिनो।35तेवी लोड़ो, माटड्यो, पितलो, चांदी एने होनो बी, आखो चुरा चुरा एय गीयो, एने उनालाम खोलान बुहटान गेत वारा केरीन ओहला उड़ गीया, काय तान कायच पुतो नाह रिनो; एने तो दिगोड़ जो मुर्ती पोर पुड़ेल इतो, तो मोटलो बुयड़ो बोणीन आखी देरती पोर पोसरी गीयो।36“ज्य तारो होपनो हे; एने एवी आमु तान मतलब तुवाह सोमजाड़ देतेह।37राजा तु आखाम रेन मोटलो राजो हे, काहाकाय हेरगावालो बोगवान तुवाह राज, सेत्ता, ताकेत एने बोड़ाय आपेल हे।38एने जा का माणहे देखातेह, ताहरी तो ता आखाह, एने चोवगान जीव जेन्तु, एने जुगान चिड़ाह बी तारा ताबाम केर दियेल हेते; एने तुवाह ता आखान आदिकारी ठेरायेल हे, ज्य होनान मुंड तुस हे।39तार पासाण एक राज आवी, जो तारा राज्याह रेन, आत्यो रेय; ओवतो एक उंजु तीसरो राज पितलान गेत राज रेय, जो आखी देरती पोर राज केरी।40एने चोवथो राज, लोड़ान गेत मोजबुत रेय; जीहे लोड़ो आखी वोस्तुह टुकड़ा केरने, एने चुरा केरने, तिहेच केरीन ता चोवथा राज्या केरीन, ता आखा राज्यान चुरा चुरा केर देय।41एने तु जो मुरतीन पाय एने तीन आंगल्याह दिख्यो, जा थोड़ाक कुमारान माटड्यान एने थोड़ाक लोड़ान एता, न्या माय तो चोवथो राज वाटायेल रेय; जिहकेरीन तु लोड़ो माटड्याम बेचकायेल दिख्यो, तिहेच केरीन ता माय बी लोड़ान गेत मोजबुती रेय।42जिहकेरीन पायान आंगल्या थोड़ाक ते लोड़ान एने थोड़ाक माटड्यान एता, ज्यान मतलब ज्य हे काय, तो राज्य थोड़ोक ते मोजबुत एने थोड़ोक कोमजोर रेय।43एने तु जो लोड़ाह कुमारान माटड्या हिऱ्यो बेचकायेल दिख्यो, ज्यान मतलब ज्य हे काय, ता राज्यान माणहे एका दिहरा माणहा हेऱ्या ईली मिलीन ते रेती, पुण जीहे लोड़ो माटड्या हेर्य मेल नाह खात, तिहेच केरीन तान एकी एय नाय।44एने ता राजान राज केरनेन टेमाम हेरगावालो बोगवान, एक ओहलो राज लावी, जो कायेम रेय, तान केदी बी खेतेम नाय एय, एने नाह तो एगदी दिहरी जातीन आथाम केराय जाय। पुण तो राज्य आखा राज्याह चुरा चुरा केरी, एने ताह खेतेम केर देय; पुण तो राज्य कायेम टिकीन रेय।45जीह केरीन तु दिखेल काय एक दिगोड़ एगदा माणहान आथा केरीन खोद्या बिगेर बोयड़ाम रेन उखल्यो, एने तो दिगोड़ लोड़ो, पितलो, माटड्यो, चांदी, एने होनाह चुरा चुरा किऱ्यो, इहीच केरीन मोटलो बोगवान राजाह देखाड़ेल हे काय ज्यान बाद काय काय एण्य हे। होपनो खेरो हे, एने तान मतलब माय काय सेंका नाह।”46ओलोक होमलीन नबुकदनेस्सर राजा मांड्या वोलीन दानिएलाह वोंद्यो, एने उकुम आप्यो काय ताह बेट चेड़ावो, एने तान सामने सुगन्द वोस्तु पेटाड़ो।47ओवतो राजा दानिएलाह केयो, “खेरी ते ज्य हे काय तुमरो बोगवान, आखा बोगवानान बोगवान, राजान राजो हे, तोस आख्यु लिकायेल वातुह उगाड़णार हे, केरीन तु ज्यी लिकायेल वातु उगड्यु केर सीक्यो।”48तेवी राजा दानिएल ने पोद मोठो किऱ्यो, एने ताह जुलूम मोटला मोटला दान आप्यो; एने ज्यो उकुम आप्यो काय तो बाबेलान आखा राज्या पोर आदिकारी एने बाबेलान आखा एकलीदार माणहान मुखी बोणी।49तेवी दानिएल ने केणे से राजा शद्रक, मेशेक एने अबेदनगोह बाबेलान आखा राज्यान कामान उपेर मुखी आदिकारी केरीन निवाड़ केर दिनो; पुण दानिएल सोता राजान राजवाड़ाम रिनो।The Word for the World International