Zozue10
1Adoni-Sedɛk, kongapora mɔ Zeruzalɛm,, zea nde Zozue baa le mɔ Ai nɛ wɛnɛ gdangsa zang lea fɛt. Wɛnɛ gdangsa le mɔ Ai nɛ kongapora tuka ɛngɛ ka wɛnɛ baade nɛ le mɔ Zeriko. Hazu ɛngi fin, wɛnɛ zea nde hio wi mɔ Gabaon nɛ hio wi mɔ Israel gdea gaamɔ ha soko mbwa nɛ mbwa ɔnu ha soko may mɔsoykisi.2Nɛ wen ɛngi hɔa ha Zeruzalɛm, mbwa fɛt dea ke hawenzu ɛngɛ Gabaon nɛ̂ ma le pentɛ ka gasa pen le mɔ Ai fin Gabaon nɛ le ka dung nɛ ngaya pen hio olo le pɛ hio kongapora nɛ hio ngaya wan-bibulo.3Mɛgi, Adoni-Sedek kongapora mɔ Zeruzalɛm, tomsa hio wan-nɛ-tom pɛa ha Hoham, kongapora mɔ Hebron, ha Piram, kongapora mɔ Yarmut, ha Yafia, kongapora mɔ Lakis nɛ ha Debir, kongapora mɔ Eglon, mɔ nɛ̂ ha ana mbwa:4«Ɛnɛ haa kɔ̂ ha mi mɛgi ɔ nɛ̂ nɛ bibulo ha le mɔ Gabaon, hawenzu ɛngɛ hio wi mɔ Gabaon dea mbon ha soko mbwa hinɛ Zozue nɛ hio wi mɔ Israel.»5.Mɛgi, hio kongapora mɔ Amori mɔrkɔ gutɛ, osa nde kongapora mɔ Zeruzalɛm, kongapora mɔ Hebron, kongapora mɔ Yarmut, kongapora mɔ Lakis, nɛ kongapora mɔ Eglon dungɔ mɔsoykisi. Mbwa nɛ̂a nɛ hio zugili wan bibulo pɛ mbwa fɛt; mbwa kɛlkata le mɔ Gabaon gdea bingsila nɛ mbwa angara biobulo hazang lea.6Mɛgi, hio wi mɔ Gabaon tomsa wan-nɛ-tom pɛ mbwa nɛ̂a saa Zozue ha guru pɛa ha Gilgal nɛ mbwa tɔa ha wɛnɛ: «Mul ɔ pi na, tɛ nɛ hasa, mɛ haa kɔ̂ ha ɔ, hio wan-tom pɛ mɛ, mɛ tɛ kpasisi ɔ! Zɔk hio kongapora mɔ Amori fɛt ka ɔnu ha le mɔ zu ngari zeamay mɔ bibulo nɛ ɔ!»7Mɛgi, Zozue gutɛ ha Gilgal, nɛ hio wan-bibulo pɛa nɛ hio nasara fɛt.8Wankpoo tɔa ha Zozue: «De ke pɛ mbwa na! Mi begde mbwa ha kɔ̂ mɛ, wi ndang ka beyol ha li mɛ ndang bona na.»9Zozue nɛ hio zugili bibulo pɛa gutɛ ha Gilgal zɛzɛzɛ nɛ tek hazu hio wi mɔ Amori nɛ bulo, wi ndang zewen tɛa pɛ mbwa na.10Wankpoo gdea hio wi mɔ Amori ha Sɔawi nɛtum-nɛtum ha Sɔngsi hio wi mɔ Israel. Hio wi mɔ Israel gbɛa hio wi mɔ Amori nɛ dɔka sanga nɛ le Gabaon. Mbwa naka pata hio wi mɔ Gabaon gboa ngari mɔ Bet-Horon, nɛ gbɛ mbwa fin tee gboa ha Azeka nɛ Makeda.11Ha ngimɔ ka mbwa Sɔawi ha Sɔngsi hio wi mɔ Israel, zil ha wal gdɔk ngari mɔ Bet-Horon, Wankpoo tomsa dɔka hio bhɔla ha ngɔn gbɛ nɛ mbwa tee gboa ha Azeka, nɛ hio bhɔla gbɛa hio wei nɛ dɔka pen fio gbapa pɛ hio wi mɔ Israel.12Yala ɛngi Wankpoo gdonga hio wi mɔ Amori ha hio nasara mɔ Israel, Zozue ana ha Wankpoo, nɛ li hio wi mɔ Israel fɛt, atɔa: «Swe, a yol hazu le mɔ Gabaon! Ze, a yol hazu bikonu nu mɔ Ayalon!»13Swe nɛ ze fɛt yola hazu hio wi mɔ Gabaon tee gboa gimɔ ka hio kandɔ mɔ Israel pena ha bhandi pɛ hio gana pɛ mbwa. Tuka ɛngi ka ɛ ba ngɛriki yo hazang takarata pɛ hio nzeng-wi nde: Swe beyol ha ndanga bhandi yala ndang tee gboa mbolo zɛ.14Ma yala ka bedung tuka ɛngi Sɔngsi mana ha pata bo na, osa nde Wankpoo mɛkara ana mɔ pɛ wei ɛngi ka wɛnɛ ana: Mɛgi Wankpoo biobulo nɛ tɛwa ha wal pɛ hio wi mɔ Israel.15Hapata, Zozue nɛ hio wi mɔ Israel fɛt sio ha guru mɔ Gilgal.16Ha ngimɔ biobulo hio kongapora mɔrkɔ mɔ Amori yuo mɔ osi tɛ hazang ngu mɔ Makeda.17Ɛ gbasa mbwa ha Zozue: «Ɔ kpa hio kongapora mɔrkɔ ha osa tɛ hazang ngu mɔ Makeda.»18Mɛgi, Zozue haa nû ha hio nasara pɛa: «Ɛnɛ ili gasa ta gdɔki nû ngua nɛ ɛnɛ gde hio nasara ha nûa.19Maa ɛnɛ de zɛng na, ɛnɛ nak pata hio nasɛn ɛnɛ. Ɛnɛ gdɔki liwal ha mbwa nde mbwa hɔa zang le pɛ mbwa na. Mɛgi, Wankpoo Sɔ pɛ ɛnɛ begdea nasɛn ɛnɛ ha kɔ̂ ɛnɛ.»20Zozue nɛ hio wi mɔ Israel gbɛa hio wi mɔ kandɔ Amori nɛ dɔka, nɛ mbwa gbɛa mbwa fɛt. Nɛ hio ma tikiring Sɔna ka yuomɔ, nɛ mbwa yu nɛ ke fio. Mbwa kiforo si nɛ pata hazang le pɛ mbwa ka ɛ sɛnga nɛ ngalɔ mɔ usi tɛ.21Hapata, hio wi mɔ Israel fɛt kpa gamɔ ha soko mbwa nɛ Zozue, hazang guru pɛa sanga nɛ Makeda. Mɛgi, ma wi ndang gu fin nu ha tɛ hio wi mɔ Israel na.22Hapata, Zozue tɔa: «Ɛnɛ nɛ̂ nɛ gu ta ha nu ngu yunɛ, nɛ ɛnɛ gbosisi hio kongapora ndɔng mɔrkɔ ha mi.»23Mbwa zea nû wa mɛgi mbwa nɛ̂a nɛ gbosisi hio kongapora ndɔng mɔrkɔ ha wɛnɛ: kongapora mɔ Zeruzalɛm,, mɔ Hebron, mɔ Yarmut, mɔ Lakis nɛ mɔ Eglon.24Ha ngimɔ ka ɛ gbosasa hio kongapora ndɔng, ɛ baa mbwa nɛ̂ nɛ ha Sɔngsi Zozue, wɛnɛ saa hio wi mɔ Israel nɛ wɛnɛ tɔa ha hio gasa wan mɔ zugili nasara fɛt ka baa biobulo nɛ wal pɛa, wɛnɛ tɔa: «Ɛnɛ tiki sanga, ɛnɛ gde nanga ɛnɛ ha gɛl hio kongapora ndɔng!» Hio wan mɔ zugili nasara zea nû wa, mɛgi mbwa gdea nanga mbwa ha zu gɛl hio kongapora ndɔng.25Zozue tɔa ha mbwa: «Ke ade na ɛnɛ, ɛnɛ dung nɛ kio sila na! Ɛnɛ dung nɛ ngaya nɛ da! Bin Wankpoo bede fin ha tɛ hio na sɛn ɛnɛ mɔsoykisi tuka ɛngɛ ɛnɛ bebi nɛ bulo nɛ mbwa.»26Hapata, Zozue gbɛa hio kongapora ndɔng, nɛ wɛnɛ gɛsa mbwa ha tɛ te mɔrkɔ. Wɔl mbwa bhɔna ha tɛ te gboa mbolo zɛ.27Nɛ mbolo zɛ, wɛnɛ haa nû nde ɛ zilsi wɔl mbwa ha tɛte, ɛ pio wɔl mbwa hazang ngu ɛngi ka mbwa baa ɔsi tɛ ang. Ɛ gdɔki nua fin nɛ gasa ta, nɛ ta ndɔng bhɔna gbo mɛsɛ.28Ndanga tɛ yala ɛngi, Zozue baa le mɔ Makeda nɛ wɛnɛ gbɛa kongapora nɛ hio wi ka ɔnu hazang lea fɛt, wɛnɛ tɛ gde ma wi ndang nɛ zutunɔ na. Wɛnɛ dea nɛ kongapora mɔ Makeda mɔsoykisi tuka ɛngɛ, ka wɛnɛ bade nɛ kongapora mɔ Zeriko.29Zozue nɛ hio wi mɔ Israel fɛt gutɛ ha Makeda, mbwa nɛ̂a ha Libna, nɛ mbwa baale mɔ Libna nɛ bulo.30Wankpoo gdonga le mɔ Libna nɛ kongapora fɛt ha mbwa. Mbwa gbɛa hio wi hazang lea nɛ ma wi ndang tɛ bhɔn nɛ zutunɔ na. Mbwa dea nɛ Kongapora ndɔng tuka ɛngɛ ka mbwa baade nɛ hio kongapora mɔ Zeriko.31Zozue nɛ hio wi mɔ Israel gutɛ ha Libna, mbwa nɛ̂a ha Lakis. Mbwa baa guru sanga nɛ lea nɛ mbwa baalea nɛ bulo.32Wankpoo gdonga le mɔ Lakis ha hio wi mɔ Israel ha zebwa yala tumbɔ. Mbwa gbɛa hio wi ka ɔnu hazang lea tuka ɛngi ka mbwa baa de nɛ̂ ha le Libna, ma wi ndang tɛ bhɔn nɛ zutunɔ na.33Mɛgi Horam, kongapora mɔ Gezer nɛ̂a ha kɔ̂ ha hio wi mɔ le Lakis. Ma Zozue gbɛa wɛnɛ nɛ hio nasara pɛa fɛt, nɛ ma wi ndang tɛ bhɔn nɛ zutunɔ na.34Zozue nɛ hio wi mɔ Israel gutɛ ha Lakis, mbwa nɛ̂a ha Eglon. Mbwa sanga nɛ le nɛ mbwa zikoro lea nɛ mbwa baa lea nɛ bulo.35Ha ndangi yala ɛngi mbwa gbɛa hio wi ka ɔnu hazang lea fɛt nɛ tuka ɛngi ka mbwa baa de nɛ le mɔ Lakis.36Zozue nɛ hio wi mɔ Israel fɛt gutɛ ha Eglon, mbwa nɛ̂a gboa Hebron nɛ baale ɛngi nɛ bulo.37Mbwa hɔa hazang le ɛngi nɛ gbɛ kongapora nɛ hio wi ka ɔnu hazang lea fɛt. Mbwa baa fin hio le ka kɛlkata Hebron nɛ gbɛ hio wi hazang lea. Tuka le mɔ Eglon, Zozue bhondasa lea fɛt nɛ wɛnɛ gbɛa hio wi ka ɔnu hazang lea wi ndang tɛ bhɔn nɛ zutunɔ na.38Hapata, Zozue nɛ hio wi mɔ Israel kiforo tɛsi ha Debir nɛ baa lea nɛ bulo.39Mbwa baa lea nɛ kongapora nɛ hio le ka kɛlkata Debir. Mbwa gbɛa hio wi ka ɔnu hazang lea ma wi ndang tɛ bhɔn nɛ zutunɔ na. Zozue dea nɛ le Debir nɛ kongapora mɔ lea tuka ɛngi ka wɛnɛ bade ha Hebron fin Libna nɛ kongapora.40Zozue baa kandɔnu fɛt nɛ bulo: kandɔnu mɔ zu ngari, kandɔnu mɔ wal gdɔk nɛ kandɔnu mɔ wal gdɔk ngari. Wɛnɛ gbɛa hio kongapora mɔ kandɔnu ndɔng fɛt. Wɛnɛ tɛ gde ma wi ndang nɛ zutunɔ na, wɛnɛ gbɛa hio wi fɛt ka ɔnu hazang kandɔnu ndɔng mɔsoykisi tuka haanu ka Wankpoo, Sɔ pɛ hio wi mɔ Israel baahaa.41Zozue gana zu le fɛt, angiri ha Kades-Barnea tee gboa Gaza, baa wal gdɔk gboa kandɔnu mɔ Gosen nɛ Gabaon nɛ wal kala.42Zozue baa hio kandɔnu ndɔng nɛ wɛnɛ gbɛa hio kongapora fɛt ze ndang, hazu Wankpoo, Sɔ pɛ hio wi mɔ Israel nɛ tɛwa baabi bulo nɛ wal kandɔ pɛa.43Hapata, Zozue nɛ hio wi mɔ Israel kiforo si hazang guru mɔ Gilgal.
The Seed Company