Zozue9
1Hio Kongapora ndɔng fɛt ka dung ha kuli li Zurdain, zea nde hio wi mɔ Israel gdangsa le mɔ Ai. Nɛ hio le ndɔng fɛt ka dung ha nanga ngari, le mɔ wal gdɔk, nɛ tɛlfɛn nu nana li tɔng mɔ Mediterane tee gboa ngari mɔ Liban. Mɛgi, hio wi mɔ Het, hio wi mɔ Amori, hio wi mɔ Kanaan, hio wi mɔ Perizi, hio wi mɔ Hivi nɛ hio wi mɔ Yebus2zea may mɔ bibulo nɛ Zozue nɛ hio wi mɔ Israel.3Hio wi mɔ Gabaon zeawen mɔ ndɔng ka Zozue gdangsa hazang le mɔ Zeriko nɛ le mɔ Ai.4Maa, pɛ hio wi mɔ Gabaon, mbwa dea dambari ha tɛ hio wi mɔ Israel. Mbwa bhɔngara hio yɔngamɔ, hio gba ngobho nɛ hio gdanga ngobho mɔ gbɛli dɔkɔ, ka ɛ ful nɛ kutu sari gde ha zu hio toyfok.5Mbwa yola hio gba la nɛ gdanga nakala kutu ka ɛ fulo tɛa zabhi-zabhi. Mbwa kuo kota mampa ka gbinɔ bhutu-bhutu kiforo fok.6Mbwa nɛ̂a nɛ kpaamay nɛ Zozue hazang guru mɔ Gilgal nɛ mbwa tɔa ha wɛnɛ nɛ hio wi mɔ Israel nde: «Ɔ gutɛ ha ma le nɛ nyɛa tɛnɛ ha ana ɛnɛ nde ɔ de mbon ha soko ɔ.»7Hio wi mɔ Israel kiforowen ha hio wi mɔ Hivi, mbwa tɔa: «Mana ɛnɛ ɔnu sanga nɛ ɔ nde? Ka yo dungɔ mɛgi, ɔ mɛkiri dea mbon hinɛ ɛnɛ na!»8Hio wi mɔ Hivi gbasa ha Zozue nde: «Ɔ nɛ̂ sanga mɔ de bala ha si mɛ.» Mɛgi, Zozue ana mbwa: «Ɛnɛ nɛ̂ hio o? Nɛ ɛnɛ gutɛ ha ndo?»9Mbwa kiforowen: «Ɔ, hio bala pɛ mɛ, ɔ gutɛ ha ma le nɛ nyɛa tɛnɛ, ha wenzu ɔ zea wen pɛ Wankpoo, Sɔ pɛ mɛ. Ɔ zea wen hio wi mɔ fɛt ka wɛnɛ dea hazang le mɔ Ezipte,10nɛ hio gdanga mɔ ka wɛnɛ dea ha tɛ hio kongapora bwa ha kandɔnu Amori nɛ wal kuli li Zurdain. Hio kongapora dɔng nɛ Sihon, kongapora mɔ Hesebon, nɛ Og kongapora mɔ Basan ka ɔnu ha Asetarot.11Hio wi nɛ hio wi ka ɔnu hazang le pɔ haa mbɔla ɔ nde: ɛnɛ baa hio yɔngamɔ pɛ ɛnɛ mɔ yɔng ha wal, ɛnɛ nɛ̂ nɛ kpa hio wi mɔ Israel. Mbwa tɔa ha ɔ nde: “Ɔ nɛ̂ nɛ dung bala ha si ɛnɛ nɛ ɔ ani ɛnɛ mɔ de mbon ha soko ɔ hinɛ ɛnɛ.”12Zɔk mampa pɔ, ka ɔ kuo hazang twa tɛnɛ. Ɔ kuo yo ha ngimɔ ka yo bhɔna nɛ we. Maa, yo kota bhuyu-bhuyu fɛt nɛ gbinɔ bhutu-bhutu!13Nɛ hio ngobho kutu ndɔng! Ha ngimɔ ka ɔ gɔsa gbɛli dɔkɔ hazanga, yo bhɔna nɛ mbombea. Maa, hio ngobho kutu ndɔng gbaa fɛt kari! Hio la pɔ nɛ hio nakala pɔ gdanga fɛt, ha wenzu gbaboya wal ka ɔ baa nɛnyea tɛnɛ.»14Mɛgi, hio wi mɔ Israel mɛkara mɔ yɔng hio yɔngamɔ pɛ mbwa, maa mbwa tɛ ani Wankpoo hazu wen pɛ wi ndɔng na.15Zozue mɛkara dea mbon mɔ gaamɔ hazu gbatazu mbwa nɛ tunɔ. Hio wi mɔ zugili mɛkara hazu gɔna nû mɔ pam nɛ mbon ɛngi.16Yala tar hapata dea mbon ha soko mbwa, hio wi mɔ Israel zea kpasawen nde hio wi mɔ Gabaon ɔnu sanga nɛ mbwa.17Hio wi mɔ Israel gutɛ nɛ̂, tar yalaa mbwa hɔa hazang hio le mɔ Gabaon, Kefira, Beerot nɛ Kiriat-Yearim.18Tangere, hio wi mɔ Israel gbɛ mbwa na, hazu hio gasa wi mɔ zugili pɛ mbwa baagɔn nû soeki ha hio wi mɔ Gabaon nɛ ling Wankpoo, Sɔ mɔ Israel. Mɛgi, hio zugili fɛt dea ngambi sungiri nɛ hio gasa wi pɛ mbwa.19Maa hio gasa wi mɔ zugili kiforowen ha mbwa: «Ɔ baagɔn nû ha mbwa, nɛ ling Wankpoo, Sɔ mɔ Israel nde ɔ lɛm de gdangamɔ nɛ hio wi ndɔng fin na.20Ɔ begde mbwa nɛ tunɔ hazu gɔna nû ka ɔ baa gɔn ha mbwa, wenzu Wankpoo betɛ de ngambi sungiri nɛ ɔ. Maa zɔk hio wi mɔ ka ɔ bede nɛ ɛngɛ:21ɔ begde mbwa nɛ zutunɔ, mɛgi mbwa bedung nɛ hio wan gba gua nɛ hio wan gdu li mɔ zugili fɛt.» Baazu pɛ hio gasa wi mɔ zugili dungɔ tuka ɛngi.22Zozue saa hio wi mɔ Gabaon nɛ wɛnɛ tɔa ha mbwa: «Ɛnɛ ɔsiri ɔ nde ɛnɛ ɔnu nɛnyea tangere, ɛnɛ ɔnu sanga nɛ ɔ?23Ha ngimɔ ɛngɛ mɛsɛ, fomi teka hazu ɛnɛ kari, ɛnɛ bedung kpoo nɛ kpoo ha dea tom bala, ɛnɛ begba gua nɛ ɛnɛ begdu li twa pɛ Sɔ pɔm.»24Hio wi mɔ Gabaon kiforowen mbwa tɔa: «Ɔ dea mɛgi hazu ɔ zea nde Wankpoo, Sɔ pɛ mɛ baa haa nû ha wan-tom pɛa Moize nde, wɛnɛ behaa le fɛt ha ɛnɛ hio wi mɔ Israel nɛ ɛnɛ begbɛ hio wi mɔ zang lea fɛt. Mɛgi, ke pɛ ɛnɛ dea ɔ pentɛ nɛ ɔ dea ke tunɔ pɔ.25Maa, ɔ ha si mbonga pɛ mɛ, de nɛ ɔ tuka ɛngɛ ka mɛ gɔn nɛ kita nɛ dedea.»26Zɔk mɔ ka Zozue dea ha tɛ mbwa nɛ ɛngɛ: wɛnɛ gdɔka wal ha hio wi mɔ Israel nde ɛ gbɛ mbwa na.27Fin wɛnɛ gdea mbwa ha gba gua nɛ gduo li twa pɛ hio zugili mɔ Israel nɛ tom go haa sadaka pɛ Wankpoo, ha bhandi ka Wankpoo beosi. Mɛsɛ, hio bezang mbwa bede ndangi tom ɛngi fin.
The Seed Company