1 Timoti5
Nyawu tu n anyigbayi, abyeda ɓədo n afyenuyii
1To gnaknyi, əza n wo kwo ho, n minagyii m, ama dna wo bwugbakala ngye wo zhni əho dada nu. Gye aɓyikasa anugbai əwye ngye əho amaje,2anyikwoza n ɓa kwo ho, ngye əho aya, jesnu anyikwoza n ɓa ce n əho avnu nyi, ngye əho amapwi n tnadodnai kwo cewyi.3La əwyewna jesnu ha kpe anyigbayi hnihnii əye, n ɓa fyilo n snagyi.4Ama n nyigbayi n aɓyii lo kwo ayawyiyi, aza ye nu ɓa kpmi tumwi; ɓa zhni Shekwoyi tnutnu, ɓai bma əɓahni əbye zhni, nlonu ɓa ɓa gba əɓahni azado, əɓa azamayi, jesnu əɓa azakwoyi əta n əɓa anyikwowyii n anuɓayii, ntuge ɓəye kwo da Shekwoyi agbma.5Nyigbayi n wo kwu dnalo n snagyi, n əwo nu ɓwagnyi əwo gbmanyii, wo tuwye n ɓwasnu n Shekwoyi nu jesnu woi gwodu woi zhniaduwa n nyipyei n sukwoi, woi nya Shekwoyi bmazhni ɓo.6Ama nyigbayi n wo gyianyì ntu əwo agbmada wo ɓo nu, wo zhni fyífyii nu, kwo shikwonyi, wo ye gnyilo n wyewyeyii.7Ga aza agbega ye ce, nabai n a ta myi a ma zahozahoyi aɓo m.8Zahozahoyi n wo to bma əwo əbyekwu zhni, Nshnisnusnu aza n ɓa kwnu n əwo pwuwa m, wo la gaiciyaganunui aɓo na, jesnu wo gna tnavyiyi wnuwnuiya lo.9Nyigbayi ho to lo n a ɓa wo ba dna ge anyigbayi m, akpəge wo la du aye shitnanyi ya, n wo ɓə zhni gaiciyanunui ga əwo əɓa,10jesnu ai kpe wo əye ntu əwo aɓo amanai zhni ɓo, ngye: woi shi aɓyi ɓai mwa fyi n ofye manai, woi shi azhiɓeyi, woi zhna Dagayi aza apita, woi bma aza yi zhni n ɓa fyi n azhnìgye jesnu n əwohnii gagai dna n aɓo manai zhni dəhodəhoi pya.11Ama anyigbayi azaazayi, fye to ba ɓa fyi n okwu yi m. Ntuge əsa n əɓa nayi shakpe ɓə gyi ɓa kalá n əɓahni ga fyi n Kirisiti tnutnu, ɓa ɓə ye ɓa só anu.12Nlai nu n ɓa yi owada kpe əɓahni, ntuge ɓa la əɓa ɓəgbeshi kpmisnui bmaya.13Njesnu, ɓa kwu lofyi n alu aɓwato nya, ɓa kwu laɓa ɓai vyi apwuwa n apwuwai. Njesnu ɓa ta kwu ɓwa aɓwatoyi nu zhni m, ama aɓəshnayi ɓai da aɓo atnatukwogyii, ɓai da aɓo n ɓa to gwo ɓa da m.14Ntulonu mi wu anyigbayi azaazayi ofye, ge ɓa so anu, ɓa ma aɓyi, ɓa wna əɓa apyi akna, to ɓa ga nuwnuyi aba waa ze agbebyeda m.15Ɓəhnihni, ntuge azaho ɓa la awye lu pmyi ɓa vyi Shetam.16Ngye nyikwoza lo n wo zhni vyiyi nu, wonyi n anyigbayi fyilo n əwo akwnu, wo gwodu wa bma ɓa zhni to wa ye nge ɓa kwu zè akaya kpe n ikilisiya m, nabai n ikilisiya ɓa bma anyigbayii zhni, n ɓa kwu fyilo n snagyi.17Abyeda n ɓa shi ikilisiya əɓwa n bmya, ɓa kwnuce lo a ga ɓa mwamwa aɓwa ngwnu-aba, n gnasnusnu n aza yi ɓo, n əɓa tnutnu nyi n waazizhnii nu ɓədo n nyawui.18Ntuge Nyakashi gna lo ge, “To kwu zhagawyi gyi alumizhamyi kwoi gnyi kwoi dna awyi m,” jesnu, “tnutnuyi kwnuce lo a gba wo əwo tnutnu gyiwye.”19To gwo aɓəma tu n abyeda tukwo m, akpəge aɓəgbmiyi lo ngwnu-aba kwo ngwnu-ata.20Ama aza yi n ɓa zhi ɓai zhni leifyi, ho ɓa gnaknyi ɓa gnyi n azaawye, nabai n kwo ɓaa zè ɓəkwnu n azaje aba.21Mi tu ho əgbe gnyi n Shekwoyi awye ɓədo n Kirisiti Yeisui n amaləka aknyiknyiyii, nge ho shi agbega ye əɓwa, toge hoi wu kakai m, jesnu to tnu aza tnutnu hoi wu bmyashi m.22To la pye n aza aɓwakpei n tukwo m, jesnu to dna azaje aleifyi əɓo əɓwa m. La əhohni wnashi n tnadodnai.23To ye ɓwa nuwna nu sni kwonyikwonyi m, ama la anamnuwna ɓe cewyi, ntu əho nubwo ɓo jesnu n əho anyasnai n ɓa sna ho ciici nyi.24Azaho aleifyi ɓa wulo pəipəi, kwoi ɓe ɓa n owadai n aza awye; ama azaho aleifyi ɓa vyi ɓa n avnu nu.25N ɓwajesnu lonu, atnutnu amanai ɓa wu pəipəi nu, jesnu kwo adəyi n ɓa to wu pəipəi m, ɓa taa kwu ɓwufyi nyalonyalo m.Biblica, Inc.