1 Timoti4
1Zafnu daɓo lo n səsəiya nge asa ɓe lo n abye, azaho ɓə kwu gaiciyaganunui zokwo ya, ɓai vyi azafnu kwocednai n aɓoi n ase nu wu.2Anyawuwu yi pya, ɓa ɓe dna n akataceyi akwocednayi nu, aza n əɓa tukwovnyi kwo kwu gyina ngye a tukwo snukna əná bmyibmyii.3Ɓa ɓə kpma aza amwula pa jesnu ɓai gna aza nge ɓa to gyi anyagyi ho m, ado n Shekwoyi ɓə zhni nge aza n ɓa kwu gaiciyaga jesnu n ɓa kpe gaiciyanunui əye lo, nge ɓa gwo ɓa n amisai.4Ntuge nyahonyahoi n Shekwoyi ɓə zhni, kwo bmyabmyai lo, jesnu nyaho to lo n a ɓa na kwo aɓo ń a gwo kwo n amisai m,5ntuge a la kwo pmya n Shekwoyi ɓədagbmai ɓədo n aduwazhnii.6Əyi azaje, azanugbai n anyikwozai n ha kwnu aɓo ye wu bmyi, ho ɓə la zhni Kirisiti Yeisu ɓəvyitnutnui manai, n nubwoi fufui dna n gaiciyanunui gaiciyaganunui nya ɓədo n nyawu manai n ho la shiɓwa nyi.7To dna akwnunu atnashekwodnawoyi nya dəhodəhoi əɓo ɓwa ɓədo n əɓa atukwopmi asnìtai m; n əkwoɓwi, ta əhohni haa zhni Shekwodnawoyi.8Ntuge tata nayi nya kwo n apma lo fyewyi, ama tata dna n shekwodnawo kwo n apmai lo ntu anya vnyanya ɓo; n ɓəgbeshii ntu anyìgyi nsaiye nya ɓo, ɓədo n ədoi n kwo ye ɓeɓelo nyi.9Ɓəda ye kwnuce lo a kpema kwo jesnu aa kwo gwo kwo n nunui vnyanya.10Cenuzhni yii zhni tnutnu n əwyei bmyibmyii jesnu yii wna əyihni əsnu, ntuge yi la əyi əwyetu n Shekwoyi wyewyeyida, n əwo nu zhni aza vnyanya Gnyiyi nyi, n shnisnusnu ntu n aza yi ɓo n ɓa kwu gaiciyaga nyi.11Kwu aɓəgbetu ye ga jesnu ha wu ɓa.12To ye zahozahoyi wa ci ho wyegba ntuge ho zhni əɓyikasa nu m, ama la zè ɓədogbe ga agaiciyagayi dna n ɓədada, dna n ɓəzhni, dna n yeyewu, dna n gaiciyaganunui jesnu dna n tnadodna.13Nya əsa n mi ɓə ɓe, la əhohni ga dna cewo n Nyakagyigyiyi baba gnyi n bəgyé, waazizhni ɓədo n nyawui.14To la əho nyaga ciwyegba m, ədo n a ɓə ga ho dna n sheɓəgwogna əsa n abyeda vnyanya ɓə kpe ho əɓa aɓwa n tukwo nyi m.15La əwyenyi dna n aɓo ye; la əhohni ga vnyanya dna n ɓa, nabai n zahozahoyi ɓa gye əho abyegyi.16La əwyewna əho anyìgyi n gaiciyanyawu kpokəloi byiwuu. La myitu n ɓa, ntuge n ha zhni nlonu ho ɓə gnyi əhohni ɓədo n azai n ɓa kna ho tnubwa nyi.
Biblica, Inc.