Iyyaasu3
Isira'eelito Yoridaanoosi'i Fooffe
1Gorsa Iyyaasunna Isira'eel ardi duuchchi Seeximii'n ke'eexxi Yordaanoosi'a dangeexxi foonfebaang ookko galle.2Sase barra udduma Isira'eelike ardik ja'laabuwwi kaanbe giddi'a marreexxi3arda hineexxi ajanjee qici, «Leewwito qeese Duuchchi Woddika Gootta ha'noke Mageniinka taaboota dukkeexxi ke'e'na uudinaa wodda kaanbe giddii'n fuldineexxi taabota hordoffe.4Konnechchi edo ookkone ora me'itine ege'na gophphineemmaxxe habaa me'iyyo hassissaaxxa ookko egendinaan.»5Iyyaasunna arda, «Duuchchi woddik Gootti soodo ha'nooxe oddo'ni masso ifi qulloonse» hiyye.6Iyyaasunna qeese, «Kakotika taabota dukkineexxi ardi edo sa'we» hiyye. Insa'nenna taabota dulkineexxi ardi edo sa'ne.7Duuchchi woddik Goottinna Iyyaasu'u, «Muusenni welti hedhennasha atinni welti hedhennexxa ege'no'a telcho Isira'eeliki ard edo atee lummisa safanenni.8Kakotika taaboota dukkaaxxa qeese, ‹Yordaanoosika gaalana geltina wodda wodi'i giddo e'itine uurre› hite kuli.»9Iyyaasunna Isira'eelika arda, «kaba'a shikk hitineexxi Duuchchii woddik Gootti ha'nok Mageni hiyya'neexxa laqqe» hiyye.10Iyyaasunna lebeexxi, «Hedhaak Mageni han'ooonni welt hedheexxa egendinaashsha Kenaanito, Hitaawito, Hiitito, Feeriizito, Gergerisiito, Amooritonna Iyyaabusito bogakenaa'n shorraan.11Kunse butta duuchchike Duuchchi Woddik Goottik kakotik taabootta ha'no'a ediseexxi Yordaanoosika galaana e'yaan.12Yoona Isira'eelixxe gosatike mininaa'ni tommena lame manjo melle.13Butta duuchchik Duuchchi Woddike Goottik kakotika taabota dukkeexxi qeesexxi lekka Yordaanoosika galaana haxxeeshshanni adade yaa'amak wedi'i kutemaan; tuulotishshanna kadeexxi uuraan.»14Tennexxee Isira'eelik ardi Yordaanoosi'i foofo'a kaanbe giddii'n fulaa wodda kakotika taaboota dukkemmaxxi qeesole ardi edo me'ite.15Itti yanna midha bukki asseccatixxe yanna kaddemmaxxee, Yordaaanoosiki galaaninna dageemmani; kakotika taaboota dukkeemaxxi qeesole Yordaanoosika galaana gelte wodda lekka insa'nexxi galaana tuqqeeshanni,16alee'ni yaa'ammak wedi'i uurre; Tsartaani bira Addaami hiyyemaake bayike qachchii qico'ni tuuleme tullubeme; adadde Areebaxxe Maxinetixxe Abbaayyabaa ya'ammak wedi'inna kuteme; ardikinna Iyyaarikoke kallachchi darree'n foofe.17Duuchchi Woddike Goottika taaboota dukkeemaxxe qeesole ardi duuchchi kuninna Isira'eelito duuchchi fooffe luggitaa qico'ni Yordaanoosike galaannixxe oddo'ni bago buttina'n uuriteemman.The Word for the World International