Iyyaasu2
Ra'aabinna Isira'eelixxa Colibaleeyye
1Ookkoneechchi uduma Neewek belti Iyyaasu «Martineexxi ookkenee bogika Iyyaarkoka qachcha dooyye» hiyyeexxi Seeximinaa'n lame colibaleeye sho'ik erge; iikki maninna mareexxi Re'aabi hiyyendaaxxe yabaabulto manjichchoke mine'ni e'yine ookko galle.2Iyyaarikoke moyanjo'ni «Kunse konne boga dooyate'e heenoxxi Isira'eelito hashsha kabaa dagge'een» hiyyende iso'ni kulende.3Iyyaarikok moyanjinna «Atiba dageexxi mine e'yeeki manni konne boga duuchcha dooyyo'a dageemmaxxe insa'ne'e mine atikenaa'ni fulchitattosha» hitaaxxa erga Re'aabibaa erge.4Yaane kinni iitti manjichcho ookkone lame manna shoxxe'emmaxxee hitee qici, «Dhugaaten iikki manni anba dage'en; yaane kinni insa'ne habaa'n dangeexxa ege'nbe'no.5Bogi dukkaneexxi dalla'iinxi hula cefendeba ediga'ma iikki manni fulleexxi me'ineen; hoone darre'ni me'ineexxa ani kinni ege'nebe'no; insa'ne dhaqqabbinaan rakkine hordoffe.»6Yaane kinni ise ookkone manna dagamati iima sa'isiteexxi tuulde'emmake darga'i giddo insa'ne shoxxe'emman.7Manikinna colibaleeyye hordofiyyoti Yordaanoosi foossammaka ora abinde me'ine; iikki shorrammak manninni fule me'eeshshanni dalla'iinxi hula cufende.8Colibaleeyye iitti diiphpheba edi darre, manjichchotinna dagamati iima saxxeexxi9insa'ne hitee qici, «Duuchchi Woddik Gootti konnee boga ha'no'a uwweexxa, ha'no sodaachchise no'oo'n daggemaxxe konne bogik manni duuchchi ha'noo edo alayyik qexxirri hiyyeexxa ege'ne'eneni;10Gibtseke bogana'ni fuldinee wodda, Duuchchi woddik Gootti diimmoxxa Abaayya ha'noo edo hitta basseexxa, ha'nonna Yordaanoosii'n borroti darre'n hedhemmaka birtineeka ookkone Amooritotika lame moyanjjuwa Siihooni'ninna Oogi'n maa assitineexxa lanqenneni.11Duuchchii woddik Gootti ha'noon Mageni ale iimate'n butta buttate'n Magnoke kadeemmaxxee tenne laqqene wodda alane qexerinene; ha'no soda'atenaa'n kexxeexxa culphisebaak manji hedhemabaan.12Yoona ani ha'no'aa eloxxa assenshanni ha'noonna anke anike mini hadi'aa eloxa assitino'a ani'a kakatte. Adatemaaka beesisanna ani'a uwwe.13Anxe amaxxanna anke anxa anke dayyuwixxanna dayyuwwaxxa iittan insa'ne kadeeke manji duuchchixxa lubbo gatisino'a no'o'o reyotenaa'n anjire.»14«Mannikinna isee ha'nooxxa bakka no'o renno» no'o assinanoxxa duuchcha «Kula gophphinoole Duuchchi Woddik Gootti konne boga no'a uwwa wodda ati'a eloxxa assine addatensha no'oxxa leelinnshannon» hiyye.15Isenna hexxa'emmak mini qachchiinke dalla'in maxxaneeke kadeemmaxxe manna masikootetinnaa'ni wodaroti dirrisse.16Isenna insa'ne'e, «Ha'noo shorra'neek manni afabaashsha ookkone tullichchibaa martineexxi insa'ne illee iima hingaa qico'ni sase barra ookko sho'omme; ookkoneechchi uduma ora ha'nooka me'itinaan»17Mannikinna ise'e, «No'oo kakachchiissetaxxi kako no'a abidaabaashsha18Kunse, no'oo ookkone bogibaa e'yinenne wodda konne diimoka dhiile seema ati no'oo dirrisetexxe masikoote darree'ni usuri; anna atikanna ama atixxa labbaxxa dayyuwwa dubara dayyuwwa atika anna atikikka mini hado duuchcha atike minibaa bukki assei.19Ayyinna atike mininaa'ni fuleexxi orake'n afemoole munde ifixxe isonde qorema; isixxe no'oo e'yishaachchi hedhebaan; yaane kinni atinni welt mine hedhemmak manninaa'ni mittikinna tuqemoole munde isixxe no'o qoremmannon.20Yaane kinni no'oo assinannoxxa duuchcha kuldettexxe kaddoole tinni kako no'o abidabaan»21Isenna, «Hitineeshshanni kadduni» hite «hiissite haasotte» tennexxee insa'ne me'inaashsha assite'na'a insa'nenna me'ine; isenna diimooka shimala masikootete'n rarraasse.22Insa'nenna tullichchuwwiba genne, insa'nee shorrammak manni ora duuchcha'n hase gopheexxi illee iima hingaa qico'ni sase barra ookko turre.23Iikki lamiinxi colibaleeyye illee iima higge; tullichuwwakenaa'n dirriteexxi galaana foofiyyoti Neeweka belto Iyyaasubaa dangeexi insa'ne'n kaddeexxa yaane duuchcha iso'n haasone.24Insa'nenna Iyyaasu'n «Dhugaaten, Duuchchi Woddik Gootti ookkonee booga duuchcha no'oxxe anga'n sa'ise uwwedheen; ookkone boga'n hedheeke manninna no'o sodaatatenaa'n kexxeexxa alayyik qexerri hiyyedheen» hine.The Word for the World International