Nọmba13
Uyeb Isọñ Kenan
1Abọọñ amaabo Moses,2“Dọñ usʌk ideen nọ eka ekeyep isọñ Kenan, a-ami nnọọhọ nditọ Isrel. Sio keed ke atu mme adadusʌñ ke esiin mme eteete keedekeed dọñ.”3Ndin ke uyio Abọọñ Moses amaatie ke Akpautatan ke Paran adọñ ammọ ekaa. Afịd ammọ ekedo mme adadusʌñ ke Isrel.4Mme anyịñ ammọ edoñño ami:ke esiin Rubịn, Samua ayịn Saku;5ke esiin Simiọn, Safad ayịn Hori;6ke esiin Yuda, Kaleb ayịn Yefune;7ke esiin Isaka, Ikal ayịn Yosef;8ke esiin Ifrem, Hosie ayịn Nọn;9ke esiin Benyamin, Palti ayịn Rafu;10ke esiin Sebulọn, Kadiel ayịn Sodi;11ke esiin Manase (esiin Yosef), Kaddi ayịn Susi;12ke esiin Daan, Amiel ayịn Kemali;13ke esiin Asaa, Setọ ayịn Maikel;14ke esiin Naftali, Nahbi ayịn Fosi;15ke esiin Kad, Kuel ayịn Maki.16Mbon ami edoñño anyịñ mbon ake Moses akedọññọ abo ekeyep isọñ ado. (Moses amaanọ Hosie ayịn Nọn anyịñ Yọsua.)17Ke ini Moses akedọññọ ammọ ate ekeyep Kenan, anye amaabo, “Idọọk ika anyọñ ikanna isaña usʌk-usʌk idọọk ke Nekef abod-abod abio.18Ise naña isọñ ado aba ye mme awo se idʌñọ do, me edoñño ñkpọsọñ ibon, me edoñño mmeem-mmeem, me iwakka me ewak.19Nsoo utọ isọñ ke ammọ edʌñọ? Nte isọñ a-afọn me ifọnnọ? Mme abio se ammọ edʌñọ aba die? Me ammọ ebono inwañ me ebọbọp ekanna?20Isọñ abadie? A-anie ñkpadia me ado ikrọk? Nte mme eto eda ke esịd me idaaha? Idomo ukeme adidat usʌk mfịd eto se ida ke isọñ ado idi.” (Akedo ini a-akpa kreb adatta.)21Ndin ammọ emaedakka edọọk ekeyep isọñ ado tọọñọ ke Akpautatan Sịn tutu akewuọ Rehob, a-akaaha Lebo Hamad.22Ammọ emaedakka edọọk esaña eboiyo ke Nekef enyʌñ ediwuọ Hibrọn, itie ake Ahiman, Sesai ye Talmai, mbon ubon Anak, ekedʌñọke. (Emaebọp Hibrọn ñkpọ nte isua itiaba mbemiso Soan ke Iyib.)23Ke ini ammọ ekewuọhọ Abedeñ Eskol, ammọ emaewaak ñkọk e-eboho kreb keed akeyịreke. Awo iba ke atu ammọ emaeben anye edot ke ufọọd eto ebiom, edian ye mme kpomekrened ye fik.24Ekekoot itie ado Abedeñ Eskol sia mbon Isrel ekekpịkke eboho kreb ke itie ado.25Ke usen aba amaakeboiyo ammọ emaetịmme enyọñọ uyeb isọñ ado.
Unọ Ibọọrọ Uyeb Isọñ
26Ammọ emaetịmme enyọñọ edibịne Moses ye Erọn ye afịd mbon Isrel ke Kades ke Akpautatan Paran. Ke itie ado ke ammọ ekenọọ afịd mbono mbʌk enyʌñ ewọọt ammọ mme mfịd eto se ito isọñ ado.27Ndin ammọ emaenọ Moses mbʌk ami: “Ñnyịn imaikaa ikidʌk isọñ a-afo akidọññọ ñnyịn, ndin anye ado isọñ a-afiọọrọke ye mmọọñeba ye adanakwọọk! Se mfịd amọ mi.28Ado mme awo se idʌñọ do edoñño ñkpọsọñ awo, ndin mme abio ammọ enieñe ndibene enyʌñ enekke ekpoon. Ñnyịn imainyʌñ ikịt mbon ntịppe ubon Anak do.29Mbon Amalek edʌñọ ke Nekef; mbon Hed, mbon Yebus, ye mbon Amọọ edʌñọ ke abod-abod abio; mbon Kenan edʌñọ ekpere akpainyañ ye ke mben inyañ Yọdan.”30Akema Kaleb amaanam afịd awo edop uyio ke iso Moses anyʌñ abo, “Akpena ñnyịn idọọk ikaa ikidat isọñ ado, sia ñnyịn imine ayọhọ ukeme adinam ado.”31Ado ideen mfen ekedọọhọ eka ye anye emaebo, “Ñnyịn idiikanna adinwana ye ibon ado; ammọ esọñ adudu ikan ñnyịn.”32Ndin ammọ emaesuan idiọọk mbʌk ke atu nditọ Isrel ebaña isọñ a-ammọ ekekaaha ekeyep. Ammọ emaebo, “Isọñ a-ñnyịn ikiyeppe adadia mbon se idʌñọ ke esịd. Afịd mbon se ñnyịn ikikịt do ekedoñño ñkpoon-ñkpoon ke idaha.33Ñnyịn imaikịt mme Nefilim (mbon uko e-etooho ubon Anak eto Nefilim). Ñnyịn ikikịt idem ñnyịn nte mme ataktak ke anyen ñnyịn, ndin ammọ ekenyʌñ ikịt ñnyịn ukem ado ke anyen ammọ.”Biblica, Inc.