ন্যায়কর্তা14
1সাইয়ুহা শিমশোনহা তিম্নাতা হোয়ে। আউতা আকুহা ইচো পলিশ্তী মেমেহিং তিংয়ে।2আকুহা সাতা লায়োংয়ে আসা আপনিকো আয়ু আপাহিং জাংয়ে, “তিম্নাতা কাহা ইচো মেমেহিং তিংনা। কাহা আকু মেমেহিংপা বেয়ৌ জোকো ইচ্ছা নিনা। আকুহিংয়া কুং সোতা লাপি।”3আদো আকো আয়ু আপাহা আকুহিং উইয়ে, “খতনা মোজোওয়া পলিশ্তিবিকো প্যাকোসো নাতিহা মে লানেকোগা? য়োংকো জিরিতা, য়োংকো জ্যাতা ইচো মেমেরে মামুংগা?” আদো শিমশোনহা আপাহিংয়া জাংয়ে, “কাহা আকু মেমেহিংনাং জেজেংনা। কাহিংয়া আকু মেমেহিংনাং লাপি।”4প্রভুসেংজারাং শিমশোনহিংয়া ওইপারাং জোপাদিংয়ো তাওয়া নুওয়াংহা আকো আয়ু আপাহা মেগেয়াংমি। পলিশ্তিবিহিংয়া লুইসুকো আকুহা ইচো উপায় মোদিংমি। তিম্নাাকো পলিশ্তিবিহা ইস্রাইলকো তোইতা রাজ জোদিংমি।5আত্রংহা আকো আপা আয়ুবিহিংপা শিমশোনহা তিম্নাাতা হোয়ে। আগুরবিরিসো জিংমসা হোদিংনুওয়া আকুহা ইচো ওয়াংটেংটেংগেওয়া কুংওয়া জ্যাদিংওয়া হিংয়ে।6প্রভুসেংজাকো সেহা শিমশোনকোতা তাত্রেংপা উইয়ে, আসা আকো খুইতা হাইরে মাতাদো আকু কুংওয়াহিংয়া ইপু এচেংহিং ত্যাবাপা আকুহা নামু ছিপুয়ে। আপনিকো জোওয়া ই কামহা আকুহা আপনিকো আয়ু আপাহিংনে মাজাংতো।7আত্রংহা আকুহা হোমসা আকু মেমেহিংপা য়্যইসুয়ে। আসা আকু মেমেহিংয়া শিমশোনহা জেজেংপুয়ে।8সাইয়ু নিহয়ুকো নোইতাহা আকু মেমেহিং বেয়ৌ জোকো শিমশোনহা আকু মেমেকোতা হোয়ে। এপা জোমসারাং হোদাংনুওয়া আকুহা আপনিকো নাগাইকো স্যাওয়া কুংওয়াহিং কাংকো হোয়ে। কুংওয়াকো জুপাতাহা সুইমা আসা চ্যাবে তিংয়ে।9আকুহা খুইসো আইসি সুইমাকো পুতি চায়ে আসা খুই নেপুমসা ন্যাতাসো হোপুয়ে। আপনিকো আয়ু আপাহিং দোসপামসা আকুহা আবিহিংনে সুইমাকো পুতি পিচায়ে আসা আবিরে সুইমাকো পুতি চায়ে। আদো সিপুওয়া কুংওয়াকো জুপাসো আকু সুইমাকো পুতি চ্যামসা নোপাওয়া নুওয়াংহা শিমশোনহা আপনিকো আপা আয়ুহিংয়া মাজাংতো।10আকো আপাহা আকু মেমেকো সাতা হোয়ে। শিমশোনহা আউতা ইচো টেবো চাওয়া-আংওয়াকো ভোজ পিচায়ে। আউতা নিওয়া পোজাবিকো প্যাকোতাহা ওইপারাং লিংপাং নিমি।11হাত্রং পলিশ্তিবি শিমশোনহিং তিং, আত্রংহা আবিহা ইকাইসো ত্যাচো ওয়াংটেংটেংগেংওয়া পোজাবিহিং আকুহিং য়ুংজ্রুকো নিংপুয়ে।12শিমশোনহা আবিহিংয়া জাংয়ে, “নাবিহা ইচো জাংদি হিং, কা জাংরোওয়া। ই জাংদিকোমি অর্থ জাংকো ছুনাহা কা ইজো ইজো সুতিকো আংদুং আসা ইজো ইজো লুচাওয়া আংদুং কা নাবিহিংয়া পিচারোওয়া, মোকোনাহা নাবিহা কাহিং পিচানেরোওয়া। আদো ই জাংদিকো অর্থহা বিয়ৌকো চাওয়া আওয়া চলেদিংনুকো সানীয়ুকো নাপোতারাং নাবিহা ই জাংদিকো অর্থহা জাংনেরোওয়া।” আবিহা জাংয়ে, “নাতিহা আপনিকো জাংদি জাং, কাবি হিংরোওয়া।”14আকুহা জাংয়ে, “চাওয়াকো জুপাসোহা চাওয়া-আংওয়াবি নোয়ে।; বুচুইওয়াকো জুপাসোহা থেক্যইওয়া নুওয়াং নোয়ে।” সাসুংয়ুকো নোইতাপারাং আবিহা আকো আর্থ জাংকো মোছুতো।15সাদিয়ু জিংনুওয়া আবিহা শিমশোনকো মেহিংয়া জাংয়ে, “চলাকি জোমসা নাকো ওয়াকোসো জাংদিকো অর্থহা হাংমমে আকু উই, মেনাহা কাবিহা নাকো আপাকো সাতাহা মেহ চুংপুরোওয়া আসা আকুহিংপা নাতিহিংনে ওংপাপুরোওয়া। নাবি নিহসো য়ুসুমসা কাবিহিং জোরোংপাকো মোউমগা?”16শিমশোনকো মেহা কাইপুমসা আকোতা হোয়ে আসা জাংয়ে, “নাতিহা কাহিংয়া জেজেংপা মোজোমগা। নাতিহা কাহিংয়া আচকাপা জোমগা। নাতিহা কুং ব্যারোবিহিংয়া ইচো জাংদি জাংমি নিও, আদো আকো অর্থহা কাহিংয়া মাজাংয়াংতো।”
আকুহা জাংয়ে, “কাং, কাহা কুং আয়ু আপাহিংনে মাজাংয়াংতো। নাতিহিংয়া ই নুওয়াংহা জাংকোগাসা?”17চাওয়া আংওয়াকো সানীয়ু চোইপা আকো মেহা কাইদিংমি। আকো সানীয়ুকো নোইতাহা শিমশোনহা আকু জাংদিকো অর্থ জাংপুয়ে, হাংপাতানাহা ইকো বিষয়তাহা আকুহা পুরা জিদ্দী জোদিংমি নিমি। আকুহা আকো অর্থহা পলিশ্তিবিহিং জাংপুয়ে।18সানীয়ুকো নোইতাহা শিমশোনহা জিংওয়া সিরিতা হোনুরোমা নাগাইহা শহরকো দিংঙাবিহা আকুহিংয়া জাংয়ে, “সুইমাকো পুতিরোমা হাং টাটামগা? সিঁংহরোমা হাং সাডুংপা নিংগা?”
শিমশোনহা জাংয়ে, “কুং মেহিংমি মোনোইপানাহা নাবিহা ইকো অর্থহা জাংকো মাছুকোগা।”19একবিরি প্রভুসেংজাকো সেহা শিমশোনকোতা লেয়ে আসা আকুহা সাডুংপা জিংপুয়ে আসা আকুহা অশ্কোলোনতা হোয়ে। আউতা আকুহা ইকাইসো ত্যাচো দিংঙাবিহিং স্যাপুয়ে আসা আবিকো আংদুংবি গিংচামসা আকু জাংদিকো অর্থ ওয়েওয়া দিংঙাবিহিং পিচায়ে। আকো নোইতা সেদ্রাংপুমসা আকো সাতা লাকাপুয়ে।20আকো বিয়ৌতা বেরোকেতো জিংওয়া দিংঙাহিংপা আকো মেকোহা বিয়ৗ জিংপুয়ে।
আকুহা জাংয়ে, “কাং, কাহা কুং আয়ু আপাহিংনে মাজাংয়াংতো। নাতিহিংয়া ই নুওয়াংহা জাংকোগাসা?”17চাওয়া আংওয়াকো সানীয়ু চোইপা আকো মেহা কাইদিংমি। আকো সানীয়ুকো নোইতাহা শিমশোনহা আকু জাংদিকো অর্থ জাংপুয়ে, হাংপাতানাহা ইকো বিষয়তাহা আকুহা পুরা জিদ্দী জোদিংমি নিমি। আকুহা আকো অর্থহা পলিশ্তিবিহিং জাংপুয়ে।18সানীয়ুকো নোইতাহা শিমশোনহা জিংওয়া সিরিতা হোনুরোমা নাগাইহা শহরকো দিংঙাবিহা আকুহিংয়া জাংয়ে, “সুইমাকো পুতিরোমা হাং টাটামগা? সিঁংহরোমা হাং সাডুংপা নিংগা?”
শিমশোনহা জাংয়ে, “কুং মেহিংমি মোনোইপানাহা নাবিহা ইকো অর্থহা জাংকো মাছুকোগা।”19একবিরি প্রভুসেংজাকো সেহা শিমশোনকোতা লেয়ে আসা আকুহা সাডুংপা জিংপুয়ে আসা আকুহা অশ্কোলোনতা হোয়ে। আউতা আকুহা ইকাইসো ত্যাচো দিংঙাবিহিং স্যাপুয়ে আসা আবিকো আংদুংবি গিংচামসা আকু জাংদিকো অর্থ ওয়েওয়া দিংঙাবিহিং পিচায়ে। আকো নোইতা সেদ্রাংপুমসা আকো সাতা লাকাপুয়ে।20আকো বিয়ৌতা বেরোকেতো জিংওয়া দিংঙাহিংপা আকো মেকোহা বিয়ৗ জিংপুয়ে।
The Seed Company