Efeso5
Udyata hutso liyalala
1Bu benu lili baana ba Nzambi haatondo, volwaani ifwaani hya nde.2Nyaha ndyatili a benu yiba hu tsina litondo, mu ifwaani hya Kristo. Nde atondi bisu, ni mu buuna, nde haayehuli muvumu a nde huli Nzambi mu tooni a bisu. Lipfu la nde laaba we kabu na bungodu bwa tsuhili, bi tsulu yili yimbwe we nyafi ŋa busu bwa Nzambi.3Nyaha bumbembo, tsumihili ya pila mu pila, buuve nyungu, a byafwana umonehele tso ŋa hati la benu ve, we bu hwafwana huli baatu bangidi.4A hwafwana kaka ve ti, benu libaapalisa mikuma mya tsonyi, mi myavyasahana buuve mya mbiindu. Ka baasaani masambulu ma pfutili matondo huli Nzambi.5Ka yaabaani lo bubwe: a hu li na muutu tso mumosi wu ukoto hu Ipfumu hya Kristo na hya Nzambi ve, mu ba bubaasalila bumbembo, tsumihili buuve nyungu, nyungu mbindulili ni ti kuundili bifwita.6Nyaha pasi muutu a hasoho benu mu bileedi bi mapfuta. Mu tooni ati, ni mu mambu mo maana kesi a Nzambi yibaabwila ba bubaatunala nde.7A livaanga dyambu tso limosi itwadi na baatu mo baana ve.8Hutsomi, benu abeedi hutso a piipidi ya dunga-dunga. Ka bunuubu, mu itwadi hya benu na Pfumu, benu laaka hutso liyalala. Buuna, dyataani we baatu ba bali mu liyalala.9Mu tooni ati, liyalala libaabuta ma mabwe ma pila mu pila, butsiitsa na imbuli.10Hwadaani mu utsikaha mambu ma mu baamweese Pfumu kinya.11A liba itwadi na mavaanga ma maavele na tsoongo ve, ma bubaasalila hutso a piipidi, ka tungalalaani mo.12Ni tsonyi mu utoyele mu mambu ma baatu bakima bali mu uvaanga mu tswehi.13Kaahu, moosi ma bamiiyandiha ŋa liyalala, mu baayaluha.14Mu tooni ati, pasi hi bubaayandiha ŋa liyalala, hibaayaluha. Ni mu buuna, bubaaleele:«Suuha, we wu li mu ubwamina tolo,suuha ŋa hati la babaakwa,na Kristo uyalusa we.»15Ni mu buuna, baakelaani na bukuhu mu ndyatili a benu: a we baatu banga maladi ve, ka we baatu banga tsiki.16Salilaani tangu bu hwafwana, mu tooni ati, bilumbu mo biniibi bili bi bibi.17Ni mu buuna, a liba biyahudi ve, ka baahwadaani mu ubaangula ki mambu Pfumu haatondo.18A likolo malamu ve. Kolili malamu yi yibaabita benu hu budyabidi. Ka luulaani mu Livupu la Ngidi.19Baahwadasanaani mu mikuunga na nyimbu, na nyimbu Livupu. Yimbaani mikuunga na nyimbu mu uyuusa Pfumu mu mitima mya benu woosi.20Baafutalaani matondo huli Nzambi Taata mu taangu yoosi, na mu moosi mu nduhi a Pfumu a bisu Yisu Kristo.Bakadi na balumi
21Siingaani uba hu tsina lituma la bana mu bana, mu tooni likiinzu li benu lili na lo mu Kristo.22Bakadi, siingaani uba hu tsina lituma li balumi ba benu, we bu benu libaasiinga uba hu tsina lituma la Pfumu.23Mu tooni ati, mulumi ni mutswe a mukadi, we bu Kristo ali mutswe a libundu li lili nyutu a nde, na li nde ali Muyobili a lo.24We bu libundu libaasiinga uba hu tsina lituma la Kristo mu mambu moosi, ni buuna kaka bakadi baafwana usiinga uba hu tsina lituma li balumi ba bo, mu mambu moosi.25Balumi, tondwaani bakadi ba benu, we bu Kristo haatondi libundu na haayehuli moonyi a nde mu tooni a lo.26Kristo atondi ubyalisa baatu ba libundu la nde huli Nzambi, hu mbisa utsyemese lo mu mamba na mu Musamu a nde.27Nde atondi umweese libundu huli Nzambi hutso muyusu a lo loosi, li laavele na toodi, tso munyuda, tso masyembo makima, ka libundu la ngidi na li laavele na ipiha.28Bumosi kaka, balumi baafwana utondo bakadi ba bo we nyutu a bo mwakulu. Woosi wu ubaatondo mukadi a nde, ubaatondo nde mwakulu.29Eye, a hu li na muutu tso mumosi wu abelele nyutu a nde mwakulu ve. Ka muutu ubaabuungala nyutu a nde na ubaakele yo, we bu Kristo ubaasa mu libundu,30li lili nyutu a nde yi bisu boosi lili binama.31We bu baasonehe: «Ni mu buuna, bahala luusiisa taata a nde na ngu a nde mu ukangama na mukadi a nde, na bo baboole buukituha nyutu mosi.»32Hu li ŋaniiŋa na imbuli hi hyasweme: me ndi mu undeele mu tswehi yi yitali Kristo na libundu.33Ka yo yaahwama kaka na benu: hwafwana ti pasi mulumi abaatondo mukadi a nde we nde mwakulu, na pasi mukadi abaakiinza mulumi a nde.Wycliffe Bible Translators, Inc.