Efeso4
Bumosi mu nyutu a Kristo
1Me wu ndi ikondaayi mu tooni a Pfumu, me ndi mu upondo benu mu udyata mu mbiili yi yaayelemene na teelili yi benu laayaki,2na kulimini, na bulembo, na mukami. Baakumbasanaani mu litondo.3Baahwadaani mu ukeelese itwadi hi Livupu la Ngidi libaava, mu hyenze hi hibaapfuuta benu.4Hu li na nyutu ndulu mosi, na Livupu ndulu limosi. Bumosi kaka, bu Nzambi haateeli benu, nde asooli benu mu hiitu ndulu imosi,5na Pfumu ndulu mumosi, mu imiinu imosi na mu tondihili mosi.6Hu li na Nzambi ndulu mosi, ni Taata a boosi, wu ubaatuma boosi, wu ubaasala mu boosi na wu ubaakwilala mu boosi.7Ka pasi muutu mu bisu a benu, ayaka hyese we bu hu li iteesi hi bungodu bu Kristo haava.8Ni buuna, baaleele mu Mabasonehe ma Ngidi:«Bu nde haakumisi hu hati mayulu,nde abiti bikondaayi ŋa mbisa a nde,nde aviidi bungodu huli baatu.»9Ka hima hitondi uleele: «Nde akumisi»? Hyo hitondi uleele ti Kristo akulimini kaka natee hu tsina a toto.10Wu akulimini, ni nde wuuna kaka wu akumisi hu hati mayulu, mana nde aluusa bisiha byosi.11Nde amiibyalisa bamosi we biluumbi, bakima we mimbihuli, bakima we milongisi mi Musamu wu Mubwe, na bakima we basalili ba libundu, na bayihisi.12Ni buuna, nde haavangimisi bangidi mu usa isalu hya bo mu uhwadisa nyutu a Kristo,13natee bu bisu boosi luuba laakangama itwadi mu imiinu na mu nzaabili a Mwana a Nzambi. Buuna, bisu luuba ba tuungi la ba baakula, natee bu luuto mu iteesi hya nyutu yi yaasupaha ya Kristo.14Bisu a luubweba bangebe ve, ba baatu bali mu ubita mu mapo, buuve mu bidyengese bi mandongisili ma pila mu pila, ma baatu banga a soho bubaapfuta, mu ubwisa bakima hutso a myeto.15Ka tso lileeli imbuli mu litondo, bisu sa likula mu moosi natee bu luuto bebele na Kristo, wu li mutswe libundu.16Ni mu tooni a nde, nyutu yili yaasunda, yi yaakangama mu makede ma yo moosi. Buuna, ŋa pasi inama hibaasala we bu hyo hyafwana, na nyutu yoosi yibaakula na ubama mu litondo.Moonyi wu munyatihi mu Kristo
17Buuna, monwaani mambu ma me undeele benu, ma me utsinzandeele mu nduhi a Pfumu: a laabwedyata we bangoyi. Matsimi ma bo a mali na lisuunga ve.18Matsimi ma bo mu baafuha bo mutso a piipidi. Bo baamiitahuha na moonyi wu li mu umata huli Nzambi. Mu tooni ati, bo bitsuudu bi binene na bo bali na mitima mi minono.19Bo abaasaalamono tsonyi ve. Bo a buutwala usa lisobosono ŋa hati li mabwe na mabi ve, ka bo bali mu usa mayamba ma pila mu pila na lehemene la mbongo.20Ka benu, Kristo a haalongese benu mbiili mo yiina ve!21Benu laayuha moosi ma baatoyo mu Yisu? Benu laayuha ma baalongese mu nde? Eye, ma benu laayuha mu nde, ni imbuli.22Buuna, siisaani mbiili a benu yi kulu, tiimbaani imuutu hya benu hi ikulu, hi manzala ma hyo mu baabita benu hu bipfu bya soho.23Benu laafwana ukituha baatu ba banyatihi, mu Livupu li lili mu usala mu matsimi ma benu.24Lwataani imuutu hi inyatihi, hibaavaanga mu ifwafwani hya Nzambi mu butsiitsa na bungidi bwosi, hi hili mu ubuta imbuli.25Ni mu buuna, timbaani mapfuta! Nyaha pasi muutu abaaleele imbuli huli munande, mu tooni ati, bisu boosi lili binama bya nyutu ndulu mosi.26Tso benu libahi kesi, a lisumaha ve. Ka nyaha kesi a benu yivudamana teehele nyangu adyama.27A liva Saatana nzila yi unangimana benu ve.28Nyaha muyibi abweveleyiba, ka nde afwana umono pasi mu usala mu myoho mya nde mwakulu, mu abaha bi nde huukumbasa ba baakeehele.29Nyaha dyambu tso limosi lilibi livelepala mu minywa mya benu. Ka, baaleelaani mambu ma mabwe, ma muutuunga hyenze huli ba bali mu uyuha benu.30A linyongese Livupu la Ngidi la Nzambi ve. Lo ni iliimbu hi baakuma benu, mu tooni ilumbu hi liyobolo.31Bingaani matsimi moosi ma kali, ma bunyama, ma kesi, ma mibabu na bituhi. Kukaani nyutu mu mbiili yi bukanyi.32Baani baatu ba babwe na ba baaluula mu litondo la bana mu bana. Baasaani bana kolo-kolo, we bu Nzambi ubaasa benu kolo-kolo mu nzila a Kristo.Wycliffe Bible Translators, Inc.