Basahin ang 𐴉𐴞𐴓𐴞𐴤𐴂𐴧𐴝𐴘𐴀𐴡𐴥𐴓𐴢 3

𐴉𐴞𐴓𐴞𐴤𐴂𐴧𐴝𐴘𐴀𐴡𐴥𐴓𐴢3

𐴀𐴝𐴏𐴡𐴥𐴓𐴢 𐴉𐴡𐴌𐴇𐴠𐴥𐴏𐴒𐴝𐴌𐴞

¹𐴀𐴝𐴇𐴠𐴥𐴌𐴞𐴃𐴢 𐴈𐴡𐴀𐴙𐴌, 𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴔𐴝𐴓𐴞𐴑𐴡𐴌 𐴀𐴟𐴔𐴧𐴡𐴃𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴑𐴟𐴥𐴐𐴞 𐴒𐴡𐴌𐴡𐴤. 𐴀𐴝𐴣𐴀𐴃𐴧𐴟 𐴀𐴠𐴑𐴞𐴤 𐴈𐴡𐴃𐴝𐴤 𐴓𐴠𐴑𐴞𐴥𐴃𐴠 𐴊𐴟𐴑 𐴕𐴡 𐴓𐴝𐴒𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴓𐴧𐴠𐴥 𐴃𐴟𐴣𐴀𐴝𐴥𐴌𐴝 𐴈𐴠𐴥𐴉𐴝𐴎𐴡𐴃𐴢 𐴃𐴝𐴥𐴑𐴞𐴁𐴝.²𐴑𐴟𐴣𐴙𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴘𐴝𐴥𐴕𐴞 𐴈𐴡𐴥𐴌𐴝𐴉𐴢 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴟𐴘𐴃𐴝𐴌𐴝𐴤𐴃𐴧𐴟 𐴎𐴠𐴃𐴝𐴌𐴝𐴤 𐴅𐴞𐴏𐴞𐴥𐴔 𐴈𐴝𐴍𐴞-𐴏𐴞𐴥𐴌𐴞 𐴀𐴝𐴥𐴎𐴡𐴔𐴞 𐴒𐴡𐴌𐴠𐴥.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴀𐴠𐴥𐴕𐴝 𐴀𐴝𐴏𐴡𐴥𐴓𐴢 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴔𐴝𐴕𐴟𐴥𐴙𐴐𐴢, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴠 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥, 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌𐴠 𐴓𐴡𐴥𐴘 𐴁𐴡𐴌𐴝𐴥𐴘 𐴒𐴡𐴌𐴞𐴥, 𐴀𐴝𐴦𐴌 𐴅𐴞𐴏𐴞𐴥𐴔𐴡𐴌 𐴖𐴡𐴌𐴠 𐴇𐴡𐴕𐴡𐴤 𐴁𐴡𐴥𐴌𐴝𐴐𐴝 𐴕𐴡 𐴒𐴡𐴌𐴞𐴥,⁴𐴎𐴡𐴊𐴞 𐴀𐴝𐴀𐴛 𐴕𐴞𐴎𐴡𐴃𐴧𐴟 𐴘𐴡𐴥 𐴅𐴞𐴏𐴞𐴥𐴔𐴡𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴞𐴥𐴁𐴝𐴌 𐴖𐴝𐴅𐴝𐴤 𐴀𐴝𐴏𐴠𐴤 𐴊𐴠 𐴀𐴡𐴥𐴘𐴓𐴠 𐴘𐴡. 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴃𐴝𐴃𐴧𐴟 𐴅𐴞𐴏𐴞𐴥𐴔𐴡𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴞𐴥𐴁𐴝𐴌 𐴖𐴝𐴅𐴝𐴤 𐴀𐴝𐴏𐴠𐴤 𐴁𐴡𐴥𐴓𐴞 𐴄𐴝𐴥𐴀𐴌𐴠 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴃𐴧𐴟 𐴃𐴡 𐴀𐴝𐴌𐴡𐴤 𐴁𐴞𐴐𐴞𐴤 𐴀𐴝𐴏𐴠𐴤:⁵𐴀𐴝𐴣𐴀𐴌𐴠𐴥 𐴀𐴝𐴣𐴐𐴄𐴡 𐴊𐴞𐴕𐴡𐴃𐴢 𐴊𐴞𐴕 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥 𐴒𐴞𐴥𐴀𐴓𐴢; 𐴀𐴝𐴀𐴛 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴞, 𐴁𐴞𐴕𐴘𐴝𐴔𐴞𐴕𐴡𐴌 𐴈𐴝𐴥𐴀𐴕𐴊𐴝𐴕 𐴀𐴡𐴃𐴧𐴟, 𐴀𐴝𐴀𐴛 𐴇𐴞𐴁𐴌𐴝𐴕𐴞𐴀𐴡𐴥𐴓𐴡𐴌 𐴀𐴠𐴥𐴎𐴧𐴡𐴕 𐴇𐴞𐴁𐴌𐴝𐴕𐴞. 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴈𐴡𐴘𐴓𐴠𐴥, 𐴀𐴝𐴀𐴛 𐴀𐴠𐴥𐴎𐴧𐴡𐴕 𐴉𐴠𐴥𐴌𐴡𐴐𐴞 𐴀𐴝𐴐𐴧𐴞𐴥𐴓𐴝𐴔;⁶𐴅𐴟𐴏𐴢 𐴃𐴝𐴥𐴑𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴓𐴠𐴥, 𐴀𐴝𐴀𐴛 𐴔𐴡𐴀𐴏𐴞𐴤𐴌 𐴎𐴡𐴔𐴝𐴥𐴃𐴡𐴌𐴠 𐴎𐴟𐴓𐴟𐴥𐴔 𐴒𐴡𐴙𐴃𐴧𐴝𐴥𐴔; 𐴀𐴝𐴦𐴌 𐴐𐴡𐴥𐴌𐴞𐴘𐴡𐴃𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴓𐴠𐴥, 𐴀𐴝𐴣𐴀𐴌𐴠𐴥 𐴕𐴞𐴊𐴝𐴑 𐴉𐴝𐴦 𐴎𐴝𐴘𐴃𐴡.

⁷𐴓𐴠𐴑𐴞𐴕 𐴎𐴞𐴀𐴕 𐴀𐴝𐴣𐴀𐴌 𐴓𐴧𐴝 𐴕𐴡𐴉𐴝𐴤 𐴀𐴝𐴐𐴧𐴞𐴥𐴓𐴢, 𐴘𐴝𐴓𐴝 𐴇𐴞𐴥𐴀𐴕𐴡𐴌𐴠 𐴔𐴡𐴀𐴏𐴞𐴤𐴌 𐴎𐴡𐴌𐴞𐴘𐴝 𐴓𐴟𐴏𐴧𐴝𐴥𐴕 𐴁𐴡𐴓𐴞 𐴒𐴡𐴕𐴞.⁸𐴀𐴝𐴌𐴡𐴤 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌𐴠 𐴓𐴟𐴏𐴧𐴝𐴥𐴕 𐴁𐴡𐴓𐴞 𐴒𐴡𐴕𐴞 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴀𐴞𐴏𐴝𐴤 𐴀𐴝𐴣𐴀𐴌 𐴔𐴝𐴓𐴞𐴑𐴡𐴌𐴠 𐴎𐴝𐴕𐴝𐴃𐴢 𐴀𐴡𐴥𐴊𐴡𐴌𐴁𐴝𐴀𐴌𐴝 𐴑𐴞𐴔𐴡𐴃𐴢 𐴀𐴝𐴏𐴠𐴤, 𐴎𐴞𐴁𐴝𐴤𐴌 𐴎𐴡𐴌𐴞𐴘𐴝 𐴕𐴞𐴑𐴞 𐴀𐴝𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌 𐴓𐴟𐴏𐴧𐴝𐴥𐴕 𐴐𐴡𐴥𐴀𐴘𐴧𐴞 𐴀𐴝𐴦𐴌 𐴇𐴞𐴥𐴀𐴕𐴡𐴌𐴠 𐴉𐴟𐴥𐴌𐴝𐴌𐴞 𐴁𐴡𐴓𐴞 𐴒𐴡𐴕𐴞, 𐴎𐴠𐴀𐴕𐴠 𐴀𐴝𐴀𐴛 𐴔𐴡𐴀𐴏𐴞𐴤𐴌𐴠 𐴉𐴝𐴘,⁹𐴀𐴝𐴦𐴌 𐴀𐴝𐴣𐴀𐴌𐴠𐴥 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴉𐴝𐴦 𐴎𐴝, 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴙𐴓𐴧𐴠𐴥 𐴉𐴝𐴦 𐴎𐴝 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴕𐴞𐴎𐴡𐴌 𐴑𐴟𐴐𐴞𐴥𐴐𐴡𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴎𐴡𐴌𐴞𐴘𐴝 𐴕𐴡, 𐴁𐴡𐴥𐴓𐴑𐴠 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴓𐴠 𐴉𐴝𐴦 𐴎𐴝 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴎𐴡𐴌𐴞𐴘𐴝, 𐴎𐴠 𐴉𐴡𐴌𐴇𐴠𐴥𐴏𐴒𐴝𐴌𐴞 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴞𐴔𐴝𐴕𐴡𐴌 𐴎𐴡𐴌𐴞𐴘𐴝 𐴁𐴠 𐴀𐴝𐴘𐴧𐴠𐴤.¹⁰𐴀𐴝𐴣𐴀𐴃𐴧𐴟 𐴇𐴠𐴥 𐴔𐴡𐴀𐴏𐴞𐴤 𐴌𐴠, 𐴘𐴝𐴥𐴕𐴞 𐴀𐴞𐴥𐴁𐴝𐴌 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴑𐴟𐴊𐴟𐴌𐴟𐴃𐴡𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴊𐴟𐴑𐴧𐴡𐴥𐴃𐴢 𐴇𐴞𐴥𐴏𐴧𐴝 𐴀𐴡𐴥𐴖𐴝𐴌𐴠 𐴎𐴝𐴙𐴕𐴃𐴡 𐴔𐴡𐴕𐴠𐴈𐴡𐴀𐴌, 𐴀𐴞𐴥𐴁𐴝𐴌 𐴔𐴡𐴦𐴃𐴡𐴌 𐴕𐴡𐴔𐴟𐴕𐴝𐴘𐴠 𐴔𐴡𐴌𐴞-𐴔𐴡𐴌𐴞;¹¹𐴎𐴠𐴀𐴕𐴠 𐴇𐴡𐴕𐴡𐴤 𐴁𐴡𐴃𐴠 𐴀𐴝𐴀𐴛 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴇𐴠𐴥𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴘𐴡𐴥 𐴉𐴡𐴀𐴣𐴏𐴞.

𐴔𐴡𐴕𐴎𐴞𐴓𐴢-𐴔𐴡𐴑𐴏𐴡𐴥𐴃𐴡𐴌 𐴀𐴟𐴎𐴟 𐴊𐴟𐴣𐴌𐴝

¹²𐴀𐴠𐴕𐴊𐴞𐴓𐴧𐴝 𐴕𐴡 𐴊𐴠 𐴑𐴞, 𐴀𐴝𐴀𐴛 𐴇𐴞𐴥𐴘𐴝𐴕 𐴉𐴟𐴌𐴝𐴉𐴟𐴌𐴞 𐴉𐴝𐴘𐴉𐴠𐴥𐴓𐴝𐴘𐴧𐴞 𐴘𐴝𐴥 𐴀𐴝𐴀𐴛 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴀𐴡𐴥𐴘𐴒𐴞𐴘𐴞𐴒𐴡𐴘, 𐴔𐴡𐴕𐴃𐴡𐴌 𐴀𐴝𐴀𐴛 𐴖𐴝𐴀𐴕 𐴊𐴡𐴥𐴌𐴞𐴉𐴠𐴓𐴝𐴘 𐴁𐴡𐴓𐴧𐴝 𐴁𐴠 𐴊𐴟𐴣𐴌𐴝𐴃𐴢 𐴀𐴝𐴏𐴞𐴤 𐴎𐴞𐴘𐴝𐴥𐴕𐴡𐴌 𐴕𐴞𐴘𐴡𐴃𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞𐴉𐴠𐴓𐴝𐴘𐴧𐴠.¹³𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴇𐴞𐴥𐴘𐴝𐴕 𐴀𐴝𐴙𐴅𐴧𐴡𐴤 𐴊𐴡𐴥𐴌𐴞𐴉𐴠𐴓𐴝𐴘𐴧𐴞 𐴁𐴡𐴓𐴞 𐴕𐴡 𐴄𐴝𐴥𐴀𐴌𐴞, 𐴓𐴠𐴑𐴞𐴕 𐴀𐴝𐴀𐴛 𐴀𐴠𐴑𐴧𐴝𐴥𐴕 𐴒𐴡𐴌𐴞𐴥 𐴊𐴠 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠: 𐴉𐴞𐴏𐴠𐴤 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕𐴡𐴌𐴠 𐴉𐴡𐴀𐴌𐴝𐴘𐴉𐴠𐴓𐴝𐴘 𐴔𐴟𐴀𐴕𐴃𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕𐴡𐴌 𐴇𐴠𐴥𐴍𐴠 𐴉𐴡𐴀𐴣𐴏𐴞𐴁𐴝𐴌 𐴑𐴟𐴐𐴞𐴥𐴐𐴢.¹⁴𐴀𐴝𐴀𐴛 𐴔𐴡𐴕𐴎𐴞𐴓𐴢-𐴔𐴡𐴑𐴏𐴡𐴥𐴃𐴡𐴌 𐴀𐴟𐴎𐴟 𐴊𐴟𐴣𐴌𐴝𐴃𐴢 𐴀𐴝𐴏𐴞𐴤 𐴊𐴠, 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴀𐴝𐴓𐴧𐴝𐴌 𐴎𐴠 𐴋𐴝𐴑 𐴀𐴝𐴏𐴠𐴤, 𐴁𐴡𐴐𐴧𐴞𐴥𐴐𐴢 𐴀𐴞𐴥𐴏𐴝𐴉𐴠 𐴘𐴞𐴥𐴁𐴝 𐴇𐴝𐴥𐴏𐴞𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝.

¹⁵𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤 𐴁𐴝𐴓𐴡𐴑 𐴀𐴝𐴏𐴞𐴤, 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴡𐴃𐴧𐴟 𐴇𐴠𐴥 𐴑𐴞𐴥𐴘𐴝𐴓𐴢 𐴌𐴝𐴑𐴝𐴤𐴌 𐴎𐴡𐴌𐴟𐴌. 𐴀𐴝𐴦𐴌 𐴎𐴡𐴊𐴞 𐴇𐴡𐴕𐴡𐴤 𐴑𐴠𐴏𐴧𐴟𐴥𐴃𐴢 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴡𐴙𐴕𐴧𐴡 𐴋𐴡𐴙𐴓𐴧𐴝 𐴑𐴞𐴥𐴘𐴝𐴓𐴢 𐴃𐴝𐴥𐴑𐴠, 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴘𐴝𐴕 𐴀𐴡𐴥 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡.¹⁶𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴝𐴣𐴀𐴌𐴝 𐴎𐴠𐴊𐴧𐴟𐴥𐴌𐴡𐴃𐴢 𐴉𐴡𐴀𐴣𐴙𐴐𐴧𐴞𐴒𐴡𐴘 𐴇𐴠𐴥𐴊𐴧𐴟𐴌𐴡𐴌 𐴔𐴟𐴃𐴝𐴉𐴠𐴑 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘.

¹⁷𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴠 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴝𐴃𐴢 𐴃𐴝𐴥𐴑𐴡, 𐴀𐴝𐴦𐴌 𐴀𐴟𐴘𐴃𐴝𐴌𐴝𐴤𐴌 𐴇𐴞𐴥𐴑𐴧𐴝 𐴊𐴞𐴥𐴘𐴝𐴕 𐴊𐴞𐴘𐴡 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴃𐴧𐴟 𐴃𐴟𐴣𐴀𐴝𐴥𐴌𐴝 𐴊𐴠𐴙𐴑𐴧𐴡𐴥 𐴊𐴠 𐴇𐴠𐴥 𐴕𐴡𐴔𐴟𐴕𐴝 𐴔𐴡𐴎𐴞𐴕 𐴏𐴡𐴓𐴠.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴁𐴡𐴀𐴗𐴃𐴢 𐴁𐴝𐴌 𐴈𐴡𐴀𐴘𐴓𐴝𐴔, 𐴀𐴝𐴦𐴌 𐴘𐴝𐴓𐴝 𐴈𐴝𐴣𐴊𐴞-𐴈𐴝𐴣𐴊𐴞 𐴘𐴡𐴥 𐴈𐴡𐴀𐴙𐴌, 𐴀𐴠𐴕𐴊𐴞𐴓𐴧𐴝 𐴁𐴡𐴀𐴗𐴃𐴢 𐴎𐴡𐴕 𐴀𐴝𐴏𐴠𐴤 𐴎𐴠𐴃𐴝𐴌𐴝𐴤 𐴔𐴡𐴀𐴏𐴞𐴤𐴌 𐴑𐴟𐴥𐴌𐴟𐴐𐴡𐴌 𐴊𐴟𐴐𐴧𐴡𐴕𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴠;¹⁹𐴀𐴞𐴥𐴃𐴝𐴌𐴝𐴌 𐴃𐴡𐴑𐴊𐴞𐴥𐴌𐴡𐴃𐴢 𐴁𐴡𐴌𐴁𐴝𐴊𐴞 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝𐴌 𐴑𐴟𐴥𐴊𐴝 𐴀𐴡𐴥𐴙𐴓𐴊𐴠 𐴕𐴞𐴎𐴡𐴌 𐴉𐴠𐴄𐴢, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴃𐴧𐴟 𐴐𐴡𐴥𐴌𐴡𐴔 𐴓𐴝𐴒𐴝 𐴉𐴡𐴙𐴃𐴧𐴡 𐴊𐴠 𐴇𐴞𐴥𐴀𐴕 𐴓𐴡𐴥𐴘 𐴉𐴡𐴇𐴡𐴥𐴌𐴝𐴘 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴊𐴟𐴕𐴞𐴘𐴝𐴘𐴁𐴞 𐴒𐴟𐴥𐴕𐴡𐴌 𐴇𐴞𐴥𐴑𐴧𐴝 𐴁𐴠 𐴔𐴡𐴕 𐴊𐴠.²⁰𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴕𐴝𐴒𐴡𐴌𐴞𐴃𐴝 𐴀𐴡𐴥𐴙𐴓𐴊𐴠 𐴀𐴝𐴏𐴔𐴝𐴕 𐴀𐴡𐴃𐴢, 𐴎𐴠𐴕𐴃𐴟𐴥 𐴀𐴝𐴣𐴀𐴌𐴝 𐴀𐴠𐴥𐴒𐴧𐴗𐴝 𐴕𐴠𐴅𐴝𐴃𐴊𐴡𐴘𐴝 𐴘𐴝𐴥𐴕𐴞 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴝𐴘𐴁𐴝𐴤𐴌 𐴁𐴞𐴐𐴞𐴤 𐴀𐴝𐴎𐴧𐴟𐴌 𐴏𐴝𐴥𐴀𐴣𐴃𐴠 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴞𐴤,²¹𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴀𐴝𐴣𐴀𐴌𐴝𐴌 𐴕𐴞𐴌𐴡𐴥𐴐𐴢 𐴇𐴝𐴘𐴧𐴝𐴌𐴠 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝 𐴀𐴡𐴓𐴝 𐴒𐴝𐴦𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴁𐴡𐴓𐴧𐴝 𐴁𐴡𐴊𐴡𐴓𐴞𐴉𐴠𐴥𐴓𐴝𐴘𐴁𐴡; 𐴇𐴞𐴥𐴘𐴝𐴕 𐴀𐴡 𐴃𐴝𐴦𐴑𐴡𐴃𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥 𐴒𐴡𐴌𐴞𐴥𐴁𐴡 𐴎𐴞𐴘𐴝𐴥𐴕 𐴓𐴡𐴥𐴘 𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌𐴠 𐴀𐴟𐴥𐴊𐴧𐴗𐴝 𐴕𐴞𐴎𐴡𐴌 𐴑𐴡𐴁𐴎𐴝𐴃𐴢 𐴒𐴡𐴌𐴞𐴥𐴉𐴠𐴓𐴝𐴘 𐴉𐴝𐴌𐴠.

The Word for the World International

https://app.library.bible/content/87faca8b51c22590