Basahin ang 𐴔𐴝𐴌𐴑𐴟𐴏𐴢 7

𐴔𐴝𐴌𐴑𐴟𐴏𐴢7

𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴡𐴌 𐴌𐴡𐴏𐴡𐴥𐴔

¹𐴀𐴠𐴑 𐴊𐴞𐴕 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴇𐴡𐴦𐴎𐴧𐴡𐴕 𐴀𐴝𐴓𐴠𐴔 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴞𐴥𐴃𐴝𐴌𐴝 𐴀𐴝𐴙𐴐𐴧𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴅𐴠𐴌𐴟𐴥𐴏𐴝𐴓𐴠𐴔 𐴀𐴡𐴃𐴧𐴟.²𐴀𐴞𐴥𐴃𐴝𐴌𐴝 𐴊𐴠𐴙𐴑𐴧𐴠𐴥 𐴊𐴠, 𐴀𐴞𐴏𐴝𐴤𐴌 𐴇𐴡𐴊𐴟𐴥𐴕 𐴀𐴟𐴔𐴧𐴡𐴃𐴠 𐴕𐴝𐴉𐴝𐴑 𐴀𐴝𐴥𐴃𐴠 𐴘𐴝𐴥𐴕𐴞 𐴀𐴝𐴊𐴟𐴥𐴘𐴧𐴝 𐴀𐴝𐴥𐴃𐴠 𐴈𐴝𐴥𐴕𐴝 𐴈𐴝𐴥𐴀𐴌.³𐴀𐴝𐴏𐴡𐴥𐴓𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴐𐴟𐴥𐴕𐴊𐴡𐴌𐴒𐴡𐴌𐴞 𐴀𐴝𐴥𐴃𐴢 𐴕𐴡 𐴊𐴟𐴥𐴘 𐴈𐴝𐴥𐴕𐴝 𐴕𐴝 𐴈𐴝𐴥𐴀, 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴡𐴌 𐴌𐴡𐴏𐴡𐴥𐴔 𐴊𐴡𐴥𐴌𐴞 𐴃𐴝𐴥𐴑𐴠.⁴𐴀𐴝𐴦𐴌 𐴁𐴝𐴎𐴝𐴌𐴡𐴃𐴧𐴟 𐴀𐴝𐴘𐴓𐴠𐴤 𐴕𐴞𐴎𐴡𐴌𐴠𐴥 𐴕𐴡 𐴊𐴟𐴥𐴘 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴝 𐴈𐴝𐴥𐴀. 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴋𐴡𐴙𐴓𐴧𐴝 𐴌𐴡𐴏𐴡𐴥𐴔 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴎𐴞𐴀𐴕 𐴀𐴞𐴥𐴃𐴝𐴌𐴝 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴡𐴓𐴞 𐴇𐴠𐴥 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴡𐴃𐴧𐴟 𐴉𐴝𐴘𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴕𐴞𐴑𐴞, 𐴉𐴞𐴘𐴝𐴓𐴝 𐴊𐴟𐴥𐴖𐴝, 𐴎𐴡𐴑 𐴊𐴟𐴥𐴖𐴝, 𐴀𐴠𐴊𐴧𐴠 𐴑𐴠𐴃𐴟𐴥𐴌𐴞 𐴊𐴟𐴥𐴖𐴝.

⁵𐴇𐴠𐴥 𐴉𐴠𐴥𐴌𐴡𐴐𐴞 𐴀𐴠𐴊𐴧𐴠 𐴀𐴝𐴓𐴠𐴔 𐴔𐴟𐴥𐴕𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴡𐴌 𐴌𐴡𐴏𐴡𐴥𐴔 𐴔𐴡𐴎𐴞𐴕 𐴕𐴡 𐴑𐴞𐴘𐴝𐴥 𐴏𐴡𐴓𐴠, 𐴁𐴡𐴥𐴓𐴑𐴠 𐴕𐴝𐴉𐴝𐴑 𐴀𐴝𐴥𐴃𐴠 𐴈𐴝𐴥𐴕𐴝 𐴈𐴝𐴥𐴀؟“

⁶𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴕𐴡𐴁𐴞 𐴘𐴠𐴏𐴝𐴥𐴘𐴝𐴘𐴠 𐴃𐴟𐴣𐴀𐴝𐴥𐴌𐴝 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴏𐴡𐴥𐴘𐴧𐴞 𐴈𐴡𐴃𐴝𐴤 𐴈𐴡𐴘𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤,’𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴠 𐴀𐴝𐴣𐴀𐴌𐴠𐴥 𐴕𐴞𐴎𐴡𐴌 𐴔𐴟𐴑𐴠𐴥 𐴁𐴠 𐴀𐴞𐴎𐴧𐴡𐴃𐴢 𐴒𐴡𐴌𐴠𐴥,𐴔𐴡𐴕𐴃𐴡𐴌 𐴃𐴝𐴌𐴝𐴥𐴌 𐴊𐴞𐴓𐴢 𐴀𐴝𐴣𐴀𐴃𐴧𐴟 𐴊𐴟𐴌𐴠𐴥.⁷𐴃𐴝𐴌𐴝𐴥 𐴀𐴝𐴣𐴀𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴠𐴥𐴊𐴠 𐴁𐴠𐴇𐴝𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴌𐴝𐴥 𐴃𐴝𐴦𐴓𐴞𐴔 𐴀𐴞𐴥𐴏𐴝𐴉𐴠 𐴐𐴞𐴥𐴑𐴝 𐴊𐴠 𐴀𐴡𐴥𐴙𐴓𐴊𐴠 𐴀𐴞𐴕𐴏𐴝𐴥𐴕𐴡𐴌 𐴕𐴞𐴘𐴡𐴔-𐴑𐴝𐴦𐴕𐴟𐴕 𐴀𐴡𐴥𐴑𐴧𐴡𐴓𐴢.‘

⁸𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔𐴡𐴌𐴠 𐴁𐴝𐴊𐴢 𐴊𐴞, 𐴀𐴞𐴕𐴏𐴝𐴥𐴕𐴡𐴌 𐴌𐴡𐴏𐴡𐴥𐴔𐴡𐴌𐴠 𐴊𐴡𐴥𐴌𐴞 𐴃𐴝𐴥𐴑𐴡.“

⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴌𐴡𐴏𐴡𐴥𐴔 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔𐴡𐴌𐴠 𐴁𐴝𐴊𐴢 𐴊𐴞𐴘𐴝𐴃𐴢 𐴁𐴞𐴐𐴞𐴤 𐴏𐴝𐴓𐴝𐴥𐴑.¹⁰𐴔𐴟𐴀𐴏𐴝𐴘𐴠 𐴈𐴡𐴀𐴙𐴓𐴢 𐴊𐴠, ’𐴕𐴞𐴎𐴡𐴌 𐴁𐴝𐴉𐴔𐴝𐴦𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴡𐴤,‘ 𐴀𐴝𐴦𐴌 ’𐴎𐴠𐴦𐴕𐴞𐴑𐴞 𐴁𐴝𐴉𐴡𐴌 𐴘𐴝𐴥 𐴔𐴝𐴦𐴌 𐴁𐴡𐴊𐴕𐴝𐴔 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴎𐴝𐴘𐴁𐴡.‘ ¹¹𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴈𐴡𐴀 𐴊𐴠, ’𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴁𐴝𐴉𐴡𐴌𐴠 𐴘𐴝𐴥 𐴔𐴝𐴦𐴌𐴠 𐴀𐴠𐴀𐴕 𐴈𐴡𐴀, 𐴎𐴠 𐴏𐴞𐴎𐴢 𐴓𐴡𐴘 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴃𐴧𐴟 𐴓𐴝𐴉𐴢 𐴉𐴝𐴘𐴃𐴝 𐴇𐴞𐴥𐴘𐴝𐴕 𐴑𐴡𐴌𐴁𐴝𐴕,‘𐴘𐴝𐴥𐴕𐴞, 𐴀𐴝𐴓𐴧𐴝𐴌𐴠 𐴊𐴞𐴦𐴉𐴠𐴥𐴓𐴝 𐴒𐴞𐴥𐴘𐴠,¹²𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴠 𐴕𐴞𐴎𐴡𐴌 𐴁𐴝𐴉𐴡𐴓𐴧𐴝 𐴘𐴝𐴥 𐴔𐴝𐴦 𐴓𐴧𐴝 𐴀𐴝𐴌 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴒𐴡𐴙𐴃𐴧𐴡𐴥 𐴕𐴡 𐴊𐴡.¹³𐴇𐴠𐴥𐴀𐴕 𐴒𐴡𐴌𐴞𐴥, 𐴃𐴟𐴣𐴀𐴝𐴥𐴌𐴝 𐴎𐴝𐴌𐴞 𐴒𐴡𐴙𐴅𐴧𐴡𐴥 𐴊𐴠 𐴌𐴡𐴏𐴡𐴥𐴔𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥𐴉𐴠𐴓𐴡; 𐴇𐴠𐴥𐴕𐴊𐴞𐴓𐴧𐴝 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴒𐴡𐴌𐴡𐴤 𐴊𐴠 𐴀𐴝𐴏𐴠𐴤.“

𐴎𐴞𐴀𐴕𐴠 𐴔𐴝𐴕𐴟𐴥𐴙𐴐𐴡𐴌𐴠 𐴕𐴝𐴉𐴝𐴑 𐴒𐴡𐴌𐴠𐴥

¹⁴𐴀𐴞𐴏𐴝𐴤𐴘𐴠 𐴀𐴝𐴁𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴇𐴝𐴣𐴏𐴠 𐴔𐴝𐴃𐴝𐴘 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴁𐴠𐴒𐴧𐴟𐴥𐴕𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴡, 𐴀𐴝𐴦𐴌 𐴁𐴟𐴎𐴡𐴥:¹⁵𐴁𐴝𐴀𐴃𐴧𐴟 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞 𐴀𐴞𐴥𐴃𐴝𐴌𐴠 𐴕𐴝𐴉𐴝𐴑 𐴒𐴡𐴌𐴞𐴥 𐴉𐴝𐴌𐴠 𐴊𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴝𐴥𐴘; 𐴁𐴡𐴥𐴓𐴑𐴠 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴃𐴧𐴟 𐴎𐴞𐴀𐴕 𐴕𐴠𐴦𐴓𐴞𐴀𐴝𐴘𐴧𐴠𐴥, 𐴀𐴞𐴥𐴃𐴝𐴌𐴠 𐴇𐴞𐴥𐴀𐴕𐴠 𐴁𐴠 𐴕𐴝𐴉𐴝𐴑 𐴒𐴡𐴌𐴠𐴥.¹⁶𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

¹⁷𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴀𐴠𐴌𐴞 𐴀𐴠𐴑 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴃𐴧𐴟 𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥.¹⁸𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴀𐴡𐴁𐴟𐴎𐴢 𐴃𐴝𐴥𐴘𐴒𐴞𐴘𐴡𐴒𐴡𐴘 𐴊𐴠𐴥؟ 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴕𐴡 𐴁𐴟𐴎𐴡𐴥, 𐴁𐴝𐴀𐴃𐴧𐴟 𐴎𐴞𐴀𐴕 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴠, 𐴇𐴞𐴥𐴀𐴕𐴠 𐴀𐴞𐴥𐴃𐴝𐴌𐴠 𐴕𐴝𐴉𐴝𐴑 𐴒𐴡𐴌𐴞𐴥 𐴕𐴡 𐴉𐴝𐴌𐴠 𐴊𐴠𐴥؟¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴎𐴝𐴦 𐴊𐴠 𐴃𐴡 𐴀𐴞𐴥𐴃𐴝𐴌 𐴊𐴞𐴓𐴡𐴌 𐴁𐴟𐴥𐴃𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴉𐴠𐴍𐴡𐴌 𐴁𐴟𐴥𐴃𐴡𐴌𐴠, 𐴀𐴝𐴦𐴌 𐴇𐴞𐴥𐴀𐴕 𐴉𐴠𐴘𐴑𐴝𐴥𐴕𐴝 𐴁𐴝𐴥𐴘 𐴕𐴠𐴦𐴓𐴞𐴎𐴝𐴒𐴡𐴥𐴘.“𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴏𐴝𐴤𐴘𐴠 𐴇𐴝𐴥𐴀𐴌 𐴈𐴝𐴥𐴕𐴝 𐴇𐴝𐴥𐴓𐴝𐴓𐴢 𐴁𐴡𐴥𐴓𐴞 𐴈𐴡𐴘𐴧𐴠𐴥.

²⁰𐴀𐴞𐴥𐴁𐴝𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴎𐴞𐴀𐴕 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴀𐴝𐴘𐴧𐴠𐴥, 𐴔𐴝𐴕𐴟𐴥𐴙𐴐𐴡𐴌𐴠 𐴇𐴞𐴥𐴀𐴕𐴠 𐴁𐴠 𐴕𐴝𐴉𐴝𐴑 𐴒𐴡𐴌𐴠𐴥.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴃𐴧𐴟, 𐴘𐴝𐴥𐴕𐴞 𐴊𐴞𐴓𐴡𐴃𐴧𐴟 𐴀𐴠𐴥𐴕𐴝 𐴑𐴟𐴑𐴞𐴥𐴘𐴝𐴓𐴢, 𐴎𐴠𐴕𐴝𐴤𐴑𐴝𐴌𐴞, 𐴏𐴟𐴌𐴞, 𐴑𐴡𐴃𐴡𐴥𐴓𐴝𐴑𐴡𐴃𐴡𐴥𐴓𐴞,²²𐴀𐴡𐴙𐴕𐴧𐴡 𐴎𐴡𐴕𐴡𐴌 𐴁𐴡𐴖𐴢 𐴓𐴡𐴘 𐴎𐴠𐴕𐴝𐴤𐴑𐴝𐴌𐴞, 𐴓𐴝𐴓𐴏𐴞𐴥, 𐴁𐴟𐴌𐴝𐴘, 𐴊𐴟𐴥𐴑𐴝𐴁𐴝𐴎𐴞, 𐴁𐴡𐴊𐴔𐴝𐴐𐴞, 𐴌𐴞𐴐𐴢, 𐴒𐴞𐴉𐴡𐴃𐴢, 𐴁𐴡𐴌𐴝𐴥𐴘, 𐴀𐴠𐴊𐴧𐴠 𐴁𐴠𐴑𐴟𐴉𐴝𐴘 𐴀𐴝𐴘𐴧𐴠𐴤.²³𐴀𐴠 𐴁𐴟𐴌𐴝𐴘 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴢 𐴔𐴝𐴕𐴟𐴥𐴙𐴐𐴡𐴌𐴠 𐴕𐴝𐴉𐴝𐴑 𐴒𐴡𐴌𐴠𐴥.“

𐴀𐴠𐴑𐴒𐴗𐴝𐴥 𐴔𐴝𐴘𐴝𐴉𐴟𐴖𐴝𐴌 𐴀𐴞𐴔𐴝𐴕

²⁴𐴀𐴞𐴏𐴝𐴤 𐴀𐴟𐴍𐴞𐴤 𐴇𐴠𐴥 𐴎𐴝𐴒𐴝𐴃𐴧𐴟 𐴄𐴝𐴘𐴝𐴥𐴌 𐴐𐴡𐴥𐴀𐴌𐴡𐴌 𐴀𐴠𐴓𐴝𐴑𐴝𐴃𐴢 𐴒𐴞𐴦𐴘𐴠𐴥. 𐴀𐴞𐴥𐴁𐴝 𐴀𐴠𐴑 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘, 𐴀𐴝𐴦𐴌 𐴇𐴞𐴥𐴘𐴝𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴎𐴝𐴙𐴕𐴃𐴡 𐴊𐴞𐴃𐴡 𐴔𐴡𐴕 𐴕𐴟 𐴀𐴝𐴐𐴧𐴞𐴥𐴓𐴢; 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴓𐴟𐴑𐴞 𐴃𐴝𐴥𐴑𐴞 𐴕𐴡𐴥 𐴉𐴝𐴌𐴠.²⁵𐴇𐴠𐴥𐴍𐴠 𐴀𐴠𐴑 𐴔𐴝𐴘𐴝𐴉𐴟𐴖𐴝𐴃𐴧𐴟 𐴈𐴡𐴥𐴌𐴝𐴉𐴢 𐴅𐴞𐴕𐴠-𐴉𐴝𐴘𐴧𐴝 𐴀𐴠𐴒𐴧𐴗𐴝𐴤 𐴒𐴟𐴌𐴝 𐴎𐴠𐴥𐴌𐴉𐴟𐴖𐴝 𐴀𐴝𐴐𐴧𐴞𐴥𐴓𐴢; 𐴇𐴞𐴥𐴁𐴝𐴘𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴉𐴟𐴥𐴕𐴞 𐴔𐴡𐴃𐴧𐴡𐴌 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴉𐴡𐴦𐴃𐴢 𐴉𐴡𐴙𐴅𐴧𐴠𐴥.²⁶𐴔𐴝𐴘𐴝𐴉𐴟𐴖𐴝 𐴖𐴝 𐴀𐴝𐴐𐴧𐴞𐴥𐴓𐴢 𐴀𐴠𐴎𐴧𐴡𐴕 𐴁𐴠𐴘𐴡𐴇𐴟𐴥𐴊𐴞, 𐴇𐴞𐴥𐴁𐴝 𐴎𐴡𐴌𐴔𐴡 𐴀𐴡𐴥𐴘𐴧𐴠 𐴊𐴠 𐴀𐴡𐴥𐴙𐴓𐴊𐴠 𐴏𐴞𐴀𐴌𐴞𐴘𐴝 𐴔𐴟𐴓𐴧𐴟𐴑𐴡𐴌 𐴂𐴠𐴕𐴞𐴐𐴞𐴥𐴘𐴝𐴌 𐴀𐴠𐴓𐴝𐴑𐴝𐴃𐴢. 𐴇𐴞𐴥𐴁𐴝𐴘𐴠 𐴀𐴞𐴏𐴝𐴤𐴌𐴠 𐴀𐴝𐴌𐴡𐴏𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠, 𐴎𐴠𐴥𐴌𐴉𐴟𐴖𐴝𐴃𐴧𐴟 𐴇𐴠𐴥 𐴁𐴟𐴥𐴃𐴧𐴗𐴝 𐴕𐴠𐴦𐴓𐴝𐴘𐴉𐴠𐴥𐴓𐴝𐴘 𐴁𐴡𐴓𐴧𐴝.

²⁷𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴒𐴠 𐴉𐴟𐴀𐴝𐴙𐴕 𐴊𐴡𐴌𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴘𐴃𐴡 𐴊𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴟𐴀𐴝𐴙𐴕 𐴊𐴡𐴌 𐴈𐴝𐴥𐴕𐴝 𐴓𐴡𐴦𐴘𐴢 𐴑𐴟𐴣𐴙𐴌𐴡𐴌 𐴔𐴟𐴀𐴕𐴃𐴟 𐴉𐴠𐴥𐴓𐴝𐴘 𐴊𐴡𐴥𐴕 𐴒𐴡𐴔 𐴕𐴡.“

²⁸𐴇𐴞𐴥𐴁𐴝𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴡𐴥𐴘 𐴔𐴝𐴓𐴞𐴑, 𐴔𐴡𐴕𐴃𐴡𐴌 𐴃𐴡𐴀 𐴊𐴠 𐴔𐴠𐴏𐴡𐴌 𐴃𐴡𐴓𐴡𐴌 𐴑𐴟𐴣𐴘𐴌𐴠 𐴉𐴟𐴀𐴝𐴙𐴕 𐴊𐴡𐴌 𐴈𐴝𐴥𐴕𐴝𐴌 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴈𐴝𐴥𐴀.“

²⁹𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴠 𐴎𐴟𐴖𐴝𐴁𐴡𐴌 𐴎𐴡𐴌𐴞𐴘𐴝 𐴃𐴟𐴀𐴛 𐴎𐴝𐴘𐴒𐴡𐴥𐴘 𐴉𐴝𐴌𐴞𐴁𐴝𐴥; 𐴃𐴟𐴣𐴀𐴝𐴥𐴣𐴌 𐴎𐴠𐴥𐴌𐴉𐴟𐴖𐴝𐴃𐴧𐴟 𐴁𐴟𐴥𐴃𐴢 𐴕𐴠𐴦𐴓𐴞𐴒𐴞𐴘𐴡𐴥𐴘.“

³⁰𐴇𐴞𐴥𐴁𐴝 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘 𐴓𐴡𐴦𐴃𐴢 𐴉𐴝𐴘𐴧𐴠𐴥 𐴊𐴠, 𐴎𐴠𐴥𐴌𐴉𐴟𐴖𐴝 𐴖𐴝 𐴁𐴞𐴏𐴝𐴥𐴕𐴝𐴃𐴢 𐴕𐴠𐴙𐴄𐴧𐴝, 𐴀𐴝𐴦𐴌 𐴁𐴟𐴥𐴃𐴢 𐴕𐴠𐴦𐴓𐴞𐴒𐴞𐴘𐴡𐴥𐴘.

𐴀𐴠𐴎𐴧𐴡𐴕 𐴕𐴝𐴥𐴉𐴝𐴚 𐴀𐴠𐴊𐴧𐴠 𐴃𐴟𐴥𐴃𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

³¹𐴃𐴝𐴌𐴉𐴡𐴌𐴠 𐴀𐴞𐴏𐴝𐴤 𐴄𐴝𐴘𐴝𐴥𐴌 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴌 𐴀𐴠𐴓𐴝𐴑𐴝𐴃𐴧𐴟 𐴕𐴠𐴦𐴓𐴞 𐴊𐴠𐴑𐴝𐴂𐴡𐴥𐴓𐴞𐴏𐴢 𐴀𐴠𐴓𐴝𐴑𐴝𐴌 𐴔𐴝𐴎𐴡𐴥𐴃𐴧𐴟 𐴒𐴝𐴓𐴞𐴓𐴢 𐴋𐴞𐴀𐴃𐴢 𐴀𐴝𐴙𐴐𐴧𐴠𐴥.³²𐴇𐴠𐴥𐴍𐴠 𐴔𐴝𐴙𐴕𐴐𐴠𐴥 𐴀𐴠𐴎𐴧𐴡𐴕 𐴕𐴝𐴥𐴉𐴝𐴚 𐴀𐴠𐴊𐴧𐴠 𐴃𐴟𐴥𐴃𐴝𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴠𐴥 𐴊𐴠, 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴀𐴞𐴥𐴁𐴝𐴌 𐴀𐴝𐴥𐴃𐴢 𐴊𐴞𐴃𐴡.

³³𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴃𐴧𐴟 𐴀𐴠𐴑 𐴋𐴝𐴥𐴙𐴑𐴧𐴝 𐴓𐴡𐴘𐴎𐴝𐴘 𐴀𐴞𐴥𐴁𐴝𐴌 𐴀𐴡𐴦𐴣𐴓𐴢 𐴘𐴡𐴥𐴒𐴧𐴗𐴝𐴌 𐴊𐴟𐴕𐴞𐴥 𐴈𐴝𐴕𐴡𐴃𐴢 𐴒𐴡𐴥𐴓𐴝𐴘𐴊𐴞𐴘𐴠, 𐴀𐴝𐴦𐴌 𐴀𐴞𐴥𐴁𐴝𐴌 𐴀𐴡𐴦𐴣𐴓𐴡𐴃𐴢 𐴏𐴠𐴥𐴂𐴢 𐴊𐴞𐴥 𐴘𐴡𐴥𐴒𐴧𐴗𐴝𐴌 𐴎𐴞𐴌 𐴏𐴟𐴥𐴘𐴧𐴠.³⁴𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴋𐴡𐴣𐴀𐴌 𐴕𐴞𐴘𐴝𐴥𐴐𐴢 𐴉𐴠𐴥𐴓𐴝𐴘𐴧𐴠, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴠𐴉𐴧𐴝𐴃𐴝“𐴘𐴝𐴥𐴕𐴞, ”𐴑𐴟𐴥𐴓𐴞𐴎𐴝𐴒𐴡𐴘.“³⁵𐴃𐴡𐴥𐴘 𐴀𐴠𐴥𐴇𐴡𐴕 𐴘𐴡𐴥𐴒𐴧𐴗𐴝𐴌 𐴈𐴝𐴕 𐴕𐴟𐴥𐴕 𐴑𐴟𐴥𐴓𐴞𐴒𐴞𐴘𐴡𐴘, 𐴀𐴠𐴊𐴧𐴠 𐴎𐴞𐴌 𐴀𐴠𐴌𐴞𐴊𐴞𐴘𐴝 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠.

³⁶𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴃𐴡𐴤 𐴀𐴞𐴏𐴝𐴤𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴔𐴝𐴕𐴝𐴥 𐴒𐴡𐴙𐴅𐴧𐴠𐴥; 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴎𐴠𐴃𐴡𐴥 𐴔𐴝𐴕𐴝𐴥 𐴒𐴡𐴙𐴃𐴧𐴡𐴥, 𐴀𐴞𐴥𐴃𐴝𐴌𐴝 𐴇𐴠𐴥𐴃𐴡 𐴉𐴡𐴥𐴓𐴝𐴃𐴢 𐴃𐴝𐴥𐴑𐴞𐴃𐴡.³⁷𐴀𐴞𐴥𐴃𐴝𐴌𐴝 𐴀𐴠𐴁𐴧𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴎𐴞𐴀𐴕 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴒𐴡𐴔 𐴈𐴝𐴔 𐴒𐴡𐴙𐴅𐴧𐴠𐴥. 𐴀𐴞𐴁𐴝𐴤𐴘𐴠 𐴃𐴡 𐴕𐴝𐴥𐴉𐴝𐴚𐴡𐴌𐴠 𐴉𐴟𐴥𐴕𐴞𐴁𐴝𐴌 𐴀𐴝𐴦𐴌 𐴁𐴟𐴑𐴡𐴌𐴠 𐴔𐴝𐴃𐴞𐴁𐴝𐴥𐴌 𐴃𐴡𐴖𐴉𐴞𐴥𐴑 𐴊𐴠𐴦.“

The Word for the World International

https://app.library.bible/content/87faca8b51c22590