Read 𐴔𐴝𐴌𐴑𐴟𐴏𐴢 8

𐴔𐴝𐴌𐴑𐴟𐴏𐴢8

𐴏𐴝𐴙𐴌 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴧𐴠

¹𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴢 𐴀𐴡𐴃𐴢, 𐴎𐴠𐴣𐴃𐴧𐴠𐴥 𐴀𐴝𐴁𐴝𐴌 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴎𐴡𐴔𐴝 𐴀𐴡𐴥𐴘𐴧𐴠 𐴀𐴝𐴦𐴌 𐴀𐴞𐴥𐴃𐴝𐴌𐴝𐴃𐴧𐴟 𐴈𐴝𐴥𐴘𐴃𐴡 𐴑𐴠𐴏𐴧𐴟𐴥 𐴕𐴟 𐴀𐴝𐴐𐴧𐴞𐴥𐴓𐴢, 𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠,²”𐴀𐴝𐴣𐴀𐴃𐴧𐴟 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴓𐴧𐴝 𐴉𐴠𐴄𐴉𐴟𐴌𐴠𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴃𐴝𐴌𐴝𐴤 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤 𐴊𐴠 𐴃𐴞𐴕 𐴊𐴞𐴕 𐴀𐴡𐴥𐴘𐴧𐴠 𐴀𐴝𐴦𐴌 𐴀𐴞𐴃𐴝𐴌𐴝𐴤𐴃𐴧𐴟 𐴈𐴝𐴥𐴘𐴃𐴡 𐴑𐴠𐴏𐴧𐴟𐴥 𐴕𐴝𐴥𐴘.³𐴎𐴡𐴊𐴞 𐴀𐴝𐴀𐴛 𐴀𐴞𐴃𐴝𐴌𐴝𐴤𐴌𐴠 𐴒𐴡𐴥𐴌𐴡𐴃𐴢 𐴖𐴝𐴀𐴐𐴧𐴝 𐴊𐴟𐴣𐴌𐴝𐴘𐴊𐴞, 𐴀𐴞𐴃𐴝𐴌𐴝𐴤 𐴉𐴡𐴣𐴃𐴡𐴃𐴢 𐴔𐴝𐴃𐴝𐴥 𐴒𐴟𐴥𐴌𐴝𐴘 𐴉𐴡𐴌𐴞𐴎𐴝𐴘𐴁𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴃𐴝𐴌𐴝𐴤𐴃𐴧𐴟 𐴇𐴡𐴊𐴟𐴥𐴕 𐴁𐴞𐴐𐴞𐴤 𐴊𐴟𐴌𐴡𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴀𐴝𐴏𐴠𐴤.“

⁴𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤𐴌𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴁𐴝𐴘 𐴁𐴡𐴓𐴧𐴝 𐴀𐴠 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴀𐴠𐴓𐴝𐴑𐴝𐴃𐴢 𐴇𐴠𐴥𐴊𐴟𐴕 𐴌𐴟𐴄𐴞 𐴇𐴡𐴍𐴠𐴥 𐴉𐴝𐴘𐴁𐴡؟“

⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴃𐴧𐴟 𐴌𐴟𐴄𐴞 𐴈𐴡𐴖𐴝𐴤 𐴀𐴝𐴏𐴠𐴤؟“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴇𐴝𐴥𐴣𐴃𐴧𐴗𐴝.“

⁶𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴔𐴠𐴍𐴞𐴃𐴢 𐴁𐴡𐴘𐴃𐴡𐴥 𐴈𐴡𐴘𐴧𐴠𐴥; 𐴁𐴝𐴦𐴊𐴠 𐴇𐴝𐴥𐴣𐴃𐴧𐴗𐴝 𐴌𐴟𐴄𐴞 𐴒𐴟𐴥𐴕 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴊𐴞𐴦 𐴁𐴡𐴓𐴧𐴝 𐴇𐴞𐴥𐴀𐴕 𐴁𐴝𐴥𐴚𐴒𐴞 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴞𐴦𐴘𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴝𐴍𐴞𐴊𐴞𐴘𐴠𐴥.⁷𐴀𐴞𐴥𐴃𐴝𐴌𐴝𐴃𐴧𐴟 𐴈𐴡𐴒𐴧𐴗𐴝𐴤 𐴒𐴟𐴌𐴝 𐴔𐴝𐴏𐴢 𐴀𐴡𐴥 𐴀𐴝𐴐𐴧𐴞𐴥𐴓𐴢. 𐴀𐴞𐴏𐴝𐴤𐴘𐴠 𐴇𐴞𐴥𐴀𐴕𐴡𐴓𐴧𐴝 𐴘𐴡𐴥 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥𐴘𐴡𐴌𐴠, 𐴇𐴞𐴥𐴀𐴕 𐴁𐴝𐴍𐴞𐴊𐴞𐴃𐴡 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴘𐴧𐴠𐴥.⁸𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴘𐴧𐴠, 𐴁𐴝𐴦𐴊𐴠 𐴎𐴠 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴁𐴝𐴏𐴞 𐴀𐴝𐴐𐴧𐴞𐴥𐴓𐴢 𐴇𐴞𐴥𐴀𐴕 𐴁𐴡𐴥𐴙𐴅𐴧𐴠 𐴌𐴝𐴥𐴌 𐴋𐴡𐴣𐴀𐴌 𐴓𐴝𐴘 𐴓𐴡𐴘 𐴇𐴝𐴥𐴣𐴃𐴢 𐴓𐴝𐴘 𐴀𐴡𐴥𐴘𐴧𐴠.⁹𐴇𐴠𐴥𐴍𐴠 𐴏𐴝𐴙𐴌 𐴀𐴝𐴥𐴎𐴝𐴌 𐴉𐴡𐴙𐴅𐴧𐴡𐴕𐴃𐴡 𐴁𐴠𐴍𐴝𐴀𐴙𐴕 𐴀𐴝𐴐𐴧𐴞𐴥𐴓𐴢. 𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥𐴊𐴞𐴘𐴠,¹⁰𐴀𐴝𐴦𐴌 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴕𐴡𐴦𐴃𐴢 𐴀𐴟𐴍𐴞𐴤 𐴊𐴝𐴓𐴔𐴝𐴕𐴟𐴃𐴝 𐴕𐴝𐴔𐴡𐴌 𐴀𐴠𐴑𐴧𐴝𐴥𐴕 𐴀𐴠𐴓𐴝𐴑𐴝𐴃𐴢 𐴒𐴞𐴦𐴘𐴠𐴥𐴒𐴡𐴘.

𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕𐴡𐴌 𐴊𐴝𐴁𐴞

¹¹𐴉𐴡𐴌𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴞 𐴀𐴝𐴀𐴘𐴢 𐴀𐴞𐴏𐴝𐴤 𐴓𐴧𐴡𐴥𐴘 𐴃𐴡𐴌𐴑𐴝𐴃𐴡𐴌𐴑𐴞 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥𐴁𐴝𐴌 𐴕𐴞𐴘𐴡𐴃𐴠, 𐴀𐴞𐴥𐴁𐴝𐴃𐴧𐴟 𐴀𐴠𐴑𐴧𐴝𐴥𐴕 𐴀𐴝𐴏𐴔𐴝𐴕𐴞 𐴕𐴞𐴐𐴝𐴥𐴕 𐴊𐴝𐴁𐴞 𐴒𐴡𐴙𐴅𐴧𐴠𐴥.¹²𐴀𐴞𐴥𐴁𐴝𐴘𐴠 𐴋𐴡𐴣𐴀𐴌 𐴒𐴡𐴥𐴌𐴞 𐴕𐴞𐴘𐴝𐴥𐴐𐴢 𐴉𐴠𐴥𐴓𐴝𐴘 𐴈𐴡𐴀𐴌 𐴊𐴠, ”𐴀𐴠 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴠𐴥 𐴕𐴞𐴐𐴝𐴥𐴕 𐴊𐴝𐴁𐴞 𐴑𐴞𐴘𐴝𐴥 𐴒𐴡𐴌𐴠𐴥؟ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌𐴠 𐴇𐴡𐴕𐴡𐴤 𐴕𐴞𐴐𐴝𐴥𐴕 𐴊𐴝𐴈𐴝𐴤 𐴕𐴡 𐴎𐴝𐴘𐴁𐴡.“¹³𐴃𐴡𐴥𐴘 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌𐴠 𐴀𐴠𐴌𐴞, 𐴀𐴝𐴁𐴝𐴌 𐴕𐴡𐴦𐴃𐴢 𐴀𐴟𐴍𐴞𐴤 𐴋𐴞𐴀𐴌 𐴀𐴡𐴑𐴟𐴓𐴠 𐴒𐴞𐴦𐴘𐴡𐴥𐴘.

𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴈𐴠𐴥𐴌𐴟𐴊𐴡𐴌 𐴐𐴟𐴥𐴄𐴝𐴌

¹⁴𐴀𐴝𐴦𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴌𐴟𐴄𐴞 𐴓𐴡𐴘𐴎𐴝𐴘𐴃𐴠𐴥 𐴉𐴡𐴀𐴌𐴝𐴘𐴒𐴞𐴓𐴒𐴡𐴘; 𐴕𐴡𐴦𐴃𐴢 𐴔𐴝𐴎𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴑𐴒𐴗𐴝𐴥𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴌𐴟𐴄𐴞 𐴕𐴟 𐴀𐴝𐴐𐴧𐴞𐴥𐴓𐴢.¹⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴌𐴠𐴥𐴌 𐴊𐴠, ”𐴇𐴡𐴥𐴁𐴡𐴌𐴡𐴊𐴧𐴝𐴌, 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴐𐴟𐴥𐴄𐴝𐴌𐴡𐴃𐴧𐴟 𐴀𐴠𐴊𐴧𐴠 𐴈𐴠𐴥𐴌𐴟𐴊𐴡𐴌 𐴐𐴟𐴥𐴄𐴝𐴌𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡.“

¹⁶𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴝𐴉𐴡𐴤𐴏𐴡𐴃𐴢 𐴈𐴡𐴖𐴝𐴤𐴇𐴡𐴘 𐴒𐴡𐴌𐴠𐴥𐴌 𐴊𐴠, ”𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴈𐴡𐴀𐴌 𐴊𐴠 𐴀𐴝𐴣𐴀𐴌𐴝𐴃𐴧𐴟 𐴌𐴟𐴄𐴞 𐴕𐴝𐴥𐴘 𐴊𐴠 𐴇𐴠𐴥𐴃𐴡𐴓𐴧𐴝.“

¹⁷𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴇𐴞𐴥𐴘𐴝𐴕 𐴎𐴝𐴕𐴞 𐴉𐴝𐴌𐴞, 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴃𐴧𐴟 𐴌𐴟𐴄𐴞 𐴕𐴝𐴥𐴘 𐴊𐴠 𐴇𐴞𐴥𐴘𐴝𐴕 𐴑𐴞𐴘𐴝𐴥 𐴈𐴡𐴖𐴝𐴤𐴇𐴡𐴘 𐴒𐴡𐴌𐴡𐴤𐴌؟ 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴀𐴝𐴙𐴅𐴧𐴡𐴤 𐴀𐴡𐴥𐴃𐴢 𐴕𐴡𐴥 𐴉𐴡 𐴘𐴝𐴥 𐴕𐴡𐴥 𐴁𐴟𐴎𐴡𐴥؟ 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴀𐴝𐴙𐴅𐴧𐴡𐴤 𐴊𐴡𐴌𐴡𐴤 𐴊𐴠𐴥؟¹⁸𐴃𐴟𐴣𐴀𐴝𐴥𐴌𐴝 𐴏𐴟𐴑 𐴃𐴝𐴥𐴘 𐴕𐴡 𐴊𐴠𐴑𐴡𐴥𐴌 𐴊𐴠𐴥؟ 𐴀𐴝𐴦𐴌 𐴈𐴝𐴕 𐴃𐴝𐴥𐴘 𐴕𐴡 𐴉𐴟𐴥𐴕𐴡𐴌 𐴊𐴠𐴥؟ 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴕𐴡𐴃𐴢 𐴕𐴝𐴥𐴘 𐴕𐴠,¹⁹𐴎𐴠𐴣𐴃𐴧𐴠𐴥 𐴀𐴝𐴀𐴛 𐴉𐴝𐴣𐴏𐴢 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌 𐴓𐴧𐴝 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴁𐴝𐴥𐴙𐴚𐴒𐴞𐴓𐴝𐴥𐴔 𐴇𐴠𐴥𐴣𐴃𐴧𐴠 𐴌𐴟𐴄𐴞𐴌 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴈𐴡 𐴁𐴝𐴥𐴙𐴌 𐴁𐴡𐴥𐴌𐴞 𐴓𐴡𐴀𐴘𐴓𐴝؟“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴁𐴝𐴌𐴡𐴥 𐴁𐴝𐴥𐴙𐴌.“

²⁰”𐴀𐴝𐴌𐴡𐴤, 𐴎𐴠𐴣𐴃𐴧𐴠𐴥 𐴀𐴝𐴀𐴛 𐴏𐴝𐴙𐴌 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌 𐴓𐴧𐴝 𐴇𐴝𐴥𐴣𐴃𐴧𐴗𐴝 𐴌𐴟𐴄𐴞 𐴁𐴝𐴥𐴙𐴚𐴒𐴞𐴓𐴝𐴥𐴔 𐴇𐴠𐴥𐴣𐴃𐴧𐴠 𐴌𐴟𐴄𐴞𐴌 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴈𐴡 𐴓𐴝𐴘 𐴁𐴡𐴥𐴌𐴞 𐴓𐴡𐴀𐴘𐴓𐴝؟“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴇𐴝𐴥𐴣𐴃𐴢 𐴓𐴝𐴘.“

²¹𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴀𐴝𐴙𐴅𐴧𐴡𐴤 𐴕𐴡𐴥 𐴁𐴟𐴎𐴡𐴥 𐴊𐴠𐴥؟“

𐴁𐴠𐴃𐴏𐴝𐴥𐴘𐴊𐴝 𐴉𐴝𐴌𐴝𐴃𐴢 𐴀𐴠𐴑 𐴀𐴝𐴣𐴊𐴝𐴤𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

²²𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴁𐴠𐴃𐴏𐴝𐴥𐴘𐴊𐴝 𐴉𐴝𐴌𐴝𐴃𐴢 𐴀𐴝𐴙𐴐𐴧𐴠𐴥. 𐴀𐴝𐴦𐴌 𐴔𐴝𐴙𐴕𐴐𐴠𐴥 𐴀𐴠𐴑 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴡𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤, 𐴀𐴝𐴕𐴞𐴤 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴠𐴥 𐴊𐴠, 𐴘𐴡𐴥𐴒𐴧𐴗𐴝𐴌𐴠 𐴏𐴟𐴥𐴘𐴃𐴡.²³𐴀𐴞𐴥𐴁𐴝𐴘𐴠 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞 𐴉𐴝𐴌𐴝𐴌 𐴁𐴝𐴀𐴌𐴠 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴏𐴟𐴑𐴡𐴃𐴢 𐴏𐴠𐴥𐴂𐴢 𐴊𐴞𐴥 𐴁𐴝𐴦𐴊𐴠 𐴀𐴞𐴥𐴁𐴝𐴌 𐴊𐴟𐴕𐴞𐴥 𐴀𐴝𐴥𐴃𐴢 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴊𐴞𐴥 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴑𐴠𐴏𐴧𐴟𐴥 𐴊𐴠𐴑𐴡𐴥𐴌 𐴕𐴠𐴥؟“

²⁴𐴘𐴡𐴥𐴒𐴧𐴗𐴝𐴘𐴠 𐴖𐴡𐴌𐴔𐴞𐴑𐴧𐴝𐴥 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴝𐴀𐴛 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥𐴌, 𐴀𐴞𐴥𐴃𐴝𐴌𐴝𐴌𐴠 𐴏𐴝𐴘𐴃𐴠𐴥 𐴒𐴝𐴏𐴢 𐴀𐴝𐴥𐴣𐴍𐴠𐴌 𐴉𐴝𐴥𐴕 𐴓𐴝𐴒𐴠𐴌.“

²⁵𐴀𐴞𐴏𐴝𐴤𐴘𐴠 𐴀𐴝𐴁𐴝𐴌 𐴕𐴞𐴎𐴡𐴌 𐴀𐴝𐴥𐴃𐴢 𐴘𐴡𐴥𐴒𐴧𐴗𐴝𐴌 𐴏𐴟𐴑𐴡𐴃𐴢 𐴊𐴞𐴘𐴠𐴥, 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴠𐴑 𐴊𐴞𐴥𐴘𐴝𐴕𐴠 𐴏𐴝𐴀𐴘𐴢 𐴃𐴝𐴥𐴙𐴑𐴧𐴠. 𐴘𐴡𐴥𐴒𐴧𐴗𐴝 𐴀𐴝𐴒𐴡𐴌 𐴋𐴡𐴥𐴙𐴓𐴧𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴊𐴠𐴑𐴞𐴥 𐴉𐴝𐴙𐴅𐴧𐴠𐴥.²⁶𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴒𐴡𐴥𐴌𐴡𐴃𐴢 𐴊𐴟𐴣𐴌𐴝𐴘𐴊𐴞𐴘𐴠𐴥, ”𐴉𐴝𐴌𐴝𐴃𐴢 𐴀𐴟𐴥𐴊𐴧𐴗𐴝 𐴕𐴡 𐴒𐴡𐴥𐴙𐴓𐴧𐴡.“

𐴉𐴞𐴃𐴡𐴌𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴝𐴌 𐴒𐴡𐴙𐴅𐴧𐴠𐴥

²⁷𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢, 𐴑𐴝𐴘𐴏𐴝𐴥𐴌𐴞𐴘𐴝 𐴉𐴞𐴓𐴞𐴤𐴂𐴧𐴞 𐴀𐴠𐴓𐴝𐴑𐴝𐴌 𐴉𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴦𐴌𐴒𐴡𐴥𐴘; 𐴉𐴡𐴣𐴃𐴡𐴃𐴢 𐴀𐴞𐴥𐴁𐴝𐴘𐴠 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴙𐴕𐴐𐴠𐴥 𐴀𐴝𐴀𐴛 𐴇𐴡𐴕 𐴁𐴡𐴓𐴞 𐴈𐴡𐴀؟“

²⁸𐴀𐴞𐴥𐴃𐴝𐴌𐴝 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴀𐴛 𐴁𐴡𐴥𐴓𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝; 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, 𐴕𐴡𐴁𐴞 𐴀𐴠𐴓𐴞𐴘𐴝𐴏𐴢; 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴇𐴡𐴕𐴡𐴤 𐴀𐴠𐴒𐴧𐴗𐴝𐴤.“

²⁹𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴈𐴡𐴀, 𐴀𐴝𐴀𐴛 𐴇𐴡𐴕؟“
𐴉𐴞𐴃𐴡𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴇𐴠𐴥 𐴔𐴡𐴀𐴏𐴞𐴤.“

³⁰𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴃𐴡𐴤.

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴡𐴦𐴃𐴢 𐴀𐴠𐴊𐴧𐴠 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥

³¹𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴈𐴝𐴥𐴔𐴝𐴈𐴝 𐴁𐴡𐴀𐴗𐴃𐴢 𐴋𐴡𐴥𐴙𐴓𐴧𐴝 𐴊𐴟𐴑 𐴉𐴝𐴦 𐴉𐴡𐴌𐴞𐴁𐴡𐴥; 𐴀𐴝𐴦𐴌 𐴔𐴟𐴌𐴟𐴁𐴧𐴞, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴞𐴕𐴑𐴝𐴌 𐴇𐴝𐴥𐴘𐴁𐴡; 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴎𐴝𐴘𐴁𐴡, 𐴔𐴡𐴕𐴃𐴡𐴌 𐴃𐴞𐴕 𐴊𐴞𐴕 𐴁𐴝𐴦𐴊𐴠 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴎𐴝𐴘𐴁𐴡𐴘.³²𐴀𐴞𐴥𐴁𐴝𐴘𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴘𐴧𐴠𐴥. 𐴇𐴠𐴥𐴃𐴡𐴓𐴧𐴝 𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴀𐴠𐴑𐴧𐴞𐴕𐴝𐴌𐴠 𐴓𐴡𐴘𐴎𐴝𐴘 𐴁𐴟𐴎𐴝𐴥𐴃𐴢 𐴊𐴡𐴙𐴅𐴧𐴠.

³³𐴔𐴡𐴕𐴃𐴡𐴌 𐴀𐴞𐴏𐴝𐴤 𐴉𐴞𐴥𐴌𐴞 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴉𐴞𐴃𐴡𐴌𐴡𐴌𐴠 𐴅𐴠𐴥𐴅𐴧𐴠𐴍𐴝𐴘 𐴈𐴡𐴀𐴌 𐴊𐴠, ”𐴐𐴡𐴥𐴘𐴃𐴝𐴕, 𐴀𐴝𐴣𐴀𐴌 𐴔𐴟𐴀𐴕𐴃𐴟 𐴊𐴟𐴌 𐴀𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴊𐴞𐴥𐴘𐴝𐴕 𐴃𐴡 𐴀𐴝𐴓𐴧𐴝𐴌 𐴒𐴟𐴥𐴕𐴡𐴌 𐴀𐴟𐴎𐴟 𐴕𐴡, 𐴁𐴡𐴥𐴓𐴑𐴠 𐴀𐴞𐴕𐴏𐴝𐴥𐴕𐴡𐴌 𐴒𐴟𐴥𐴕𐴡𐴌 𐴀𐴟𐴎𐴟.“

³⁴𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴐𐴡𐴥𐴀 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴀𐴝𐴘𐴃𐴡𐴤 𐴔𐴡𐴕𐴠𐴈𐴡𐴀, 𐴘𐴡𐴥𐴒𐴧𐴗𐴝𐴃𐴧𐴟 𐴕𐴞𐴎𐴡𐴌𐴠𐴥 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴕𐴞𐴎𐴡𐴌 𐴑𐴟𐴥𐴌𐴟𐴐𐴢 𐴁𐴡𐴀𐴘𐴢 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴝 𐴉𐴡𐴌𐴞𐴁𐴡𐴥.³⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕 𐴁𐴝𐴏𐴝𐴘𐴃𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴇𐴝𐴥𐴌𐴝𐴘𐴉𐴠𐴓𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴀𐴠𐴊𐴧𐴠 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴖𐴝𐴏𐴃𐴠𐴥 𐴕𐴞𐴎𐴡𐴌 𐴎𐴝𐴕 𐴇𐴝𐴥𐴌𐴝𐴘𐴉𐴠𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴁𐴝𐴏𐴝𐴘𐴉𐴠𐴥𐴓𐴝𐴘𐴁𐴡.³⁶𐴑𐴞𐴦 𐴓𐴝𐴉𐴢 𐴀𐴡𐴥𐴘𐴁𐴡, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴝𐴔𐴝𐴥𐴔 𐴊𐴟𐴕𐴞𐴘𐴝𐴘 𐴉𐴝𐴦, 𐴔𐴡𐴕𐴃𐴡𐴌 𐴕𐴞𐴎𐴡𐴌 𐴎𐴝𐴕 𐴕𐴝𐴥𐴕 𐴇𐴝𐴥𐴌𐴝𐴘𐴉𐴠𐴓𐴠؟³⁷𐴀𐴞𐴕𐴏𐴝𐴥𐴕𐴠 𐴕𐴞𐴎𐴡𐴌 𐴎𐴝𐴕𐴡𐴌 𐴁𐴡𐴊𐴡𐴓𐴢 𐴑𐴞𐴦 𐴊𐴞𐴦 𐴉𐴝𐴌𐴞𐴁𐴡𐴥 𐴊𐴠 𐴀𐴝𐴏𐴠𐴤؟³⁸𐴎𐴠𐴦 𐴑𐴞𐴘𐴠𐴥 𐴀𐴠 𐴎𐴠𐴕𐴝𐴤𐴑𐴟𐴌 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌𐴠𐴥 𐴓𐴡𐴥𐴘 𐴀𐴠𐴊𐴧𐴠 𐴀𐴝𐴣𐴀𐴌 𐴈𐴡𐴃𐴝𐴤𐴌𐴠 𐴓𐴡𐴥𐴘 𐴐𐴡𐴥𐴌𐴔𐴝, 𐴘𐴡𐴥𐴒𐴧𐴗𐴝𐴌𐴠 𐴓𐴡𐴥𐴘 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴘𐴡𐴥 𐴐𐴡𐴥𐴌𐴔𐴝𐴘𐴁𐴡 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴕𐴞𐴎𐴡𐴌 𐴁𐴝𐴉𐴡𐴌 𐴔𐴡𐴈𐴞𐴥𐴔𐴝𐴘𐴠 𐴂𐴝𐴑 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴀𐴝𐴘𐴁𐴡𐴤.“

The Word for the World International

https://app.library.bible/content/87faca8b51c22590