JEREMIAS1

1Re' taqe i xuq'or, re' taqe i xub'an i Jeremías, rak'uun i Hilsías, re' ruuk' taqe i k'amal kib'eeh aj tiij xi patinik Anatot wilik paruyuq'ul i Benjamín.2Re' i QaJaaw Dios xuq'oreej chaloq i Jeremías noq oxlaj haab' chik rokiik chi reyil Josías ar Judá i rak'uun Amón.3Eh re' i QaJaaw Dios xuq'oreej i Jeremías noq xwihik chi reyil Judá Joacim rak'uun i Josías, eh noq i xwihik chi reyil ar i Sedequías rak'uun i Josías, korehtaal chik xukohlaaj i junlaj haab' chi reyil ar. Eh paroo' poh ree haab' re' re' xi k'amarik reje pan tokoom tinamit i aj Jerusaleem.
4Re' i QaJaaw Dios je' wili i xuq'or weh:
5Noq komajaa' titz'uhk'rik cho ruuk' aatuut xa weht'al wo' naq chik awach. Eh noq komajaa' ti aasjik xanoq wo' xat nukuxisaj, eh xat nupab'aa' chi hat jalal nuq'oral chupaam chu'nchel i tinamit, inki.
6Eh re' hin je' wili xnuq'or:
Jaaw xti ma' ruk'ul taj inaq'or weh chi je' re' ruum re' hin, ko hin k'isa k'un, eh ma' kinchol ta q'orik, kinki reh.
7Re' i QaJaaw Dios je' wili i xuq'or weh:
Re' hat maa q'or chi ko hat k'isa k'un, naa la' awojiik aha' naa kaat nutaq'aam reje. Eh re' wo' naa aq'orom naa nuq'orom aweh.8Re' hat ma' awach ta aj uum naa ayo'jiik, ruum re' hin naa nuwihiik awuuk' chako'ljiik, inki.
9Re' QaJaaw Dios xuyub' chaloq i q'ab' xutz'aj i xaq nuchii', je' wili i xuq'or weh:
Re' wili rehtalil chi xnuyeew chik taqe i nuq'oral panachii'.10Yu'naak xat nukoj chikinaah i tinamit, chikinaah i reey. Reh chi wilik i naa asacham wach, chi wilik i naa aachuqum, chi wilik naa ayojom, chi wilik i naa awesam, chi wilik i naa ayejaam, i naa atikim, inki weh.
11Re' i QaJaaw Dios je' wili i xuq'or weh: ¿Chib'ih jariik i k'achi' awilom wach? inki. Re' hin je' wili i xnuq'or: Re' hin jinaj i q'ab' chee' almendro k'achi' wilom wach, kinki reh.12Re' i QaJaaw Dios je' wili i xuq'or weh: Korik i xaq'or re' re' i rehtalil chi naa nub'anam chi jumehq'iil taqe i nuq'orom chaloq, inki.
13Re' i QaJaaw Dios je' wo' chik wili i xuq'or weh: Yu'naak ¿Chib'ih chik jariik i k'achi' awilom wach? inki. Jinaj i xun k'ahchi' wilom wach xan rooq rotik chik i ha' chupaam xaraaj chik reje b'uulinik pantz'eet reh i rookb'aal q'iij, kinki reh.
14Re' i QaJaaw Dios je' wili i xuq'or weh:
Re' re' i rehtalil chi pantz'eet reh i rookb'aal q'iij naa ruchaliik i ti' k'axik naakik'ulum taqe i Judá.15Re' hin i Dios naa nuk'amam chaloq i tinamit wilkeeb' cho pantz'eet reh i rookb'aal q'iij, je' wo' taqe i kireey. Eh ar naa kiyejaam i kipaat panookb'al reh i Jerusaleem, ar naakilok'em reje kiib' chuwach i tz'aq kotimaj wii' riij i tinamit. Eh ar naakilok'em reje i kipaat chuwach i tinamit Judá.16Ruum i kiyiib' wach na'ojb'al i tinamit re' re' naa nuye'em i ti' k'axik chikinaah, ruum xin kiq'eb' chi riij kik'ux, xkik'at i insensia, eh kiloq'ej taqe i tiyoox, re' ki dios i tokoom tinamit xa re' keh kiyej-anik reh.17Re' hat Jeremías chakowej awiib' hiy cha q'or keh i tinamit re' re' chu'nchel i xnuq'or aweh, mat yo'jik kuum. Eh wila' ma' xa a'n i xnuq'or aweh naa nuye'em q'ab' chi naa ab'arb'otiik ruum ayo'jiik chikiwach.18Yu'naak i hin naa kaat nukanaam chi je' rukab' i tinamit kotimaj riij chi tz'aq, chi je' akab' i rooq paat ch'ihch' ruyej-aal, chi je' akab' i q'an ch'ihch' inkojarik chi koraal. Reh chi nee nakuy kik'ulb'ejiik chu'nchel i tinamit wilkeeb' Judá, taqe i kireey, taqe i k'amal kib'eeh aj tiij.19Re' keh nanaq kianam aweh ruuk' q'aq'inik, xa re' la' xama' xta wo' naa kaat kuchem, ruum re' hin naa nuwihiik awuuk' chi ako'ljiik, inki i Dios. Re' i ma' holohik taj xkian i aj Israel chuwach i QaJaaw Dios
1Re' i QaJaaw Dios je' wili i xuq'or weh:
2Hiy kuuk' i aj Jerusaleem cha q'or keh chi je' wili: Re' i QaJaaw Dios je' wili i xuq'or taq chawiij. Re' hin ink'ulik panuk'ux noq xnuchop cho kinaah noq xkitoq'aa' cho nimanik korik naq wach kik'ux wuuk'. Eh kinkik'ax naq xkiyeew cho kik'ux wuuk', re' noq xnuk'am cho kib'eeh panchiq yuuq' re' i ma' xta wii' i tik.3Re' taqe i aj Israel santo laj tinamit naq taqe, peet naq taqe cho wak'uun wixq'uun, ruum aj re' awach naq taqe imb'anik ti' k'axik keh i nuyeew naq taqe chutojariik i kimahk tiko'q keh, inki i Dios.
4Re' taq i hat, hat taq riih rumaam i Jacob, eh chawunchelaal taq i hat aj Israel, chab'iraj taq i ruq'oral i QaJaaw Dios.5Re' reh je' wili i ruq'or taq chawiij:
¿Chib'ih la' jariik i ma' holohik taj xnub'an keh i kimaam kati't, ruum re' chik taqe i tiyoox ma' xta kajaawriik xkinimaj. Eh xkikanaa' kiib' chi xama' xta chik kikamaj?6Re' keh ma' xkikapaaj ta chik nunimjiik i hin. Xanaah re', re' wo' naq i hin xineesanik cho keh ar Egipto. Eh xnuk'am wo' naq cho kib'eeh panchiq yuuq', Re' i ye'aab' ma' xta wii' ha' b'oqeel taqe paam, ma' k'isiin taqe i yohb'aal chupaam. Re' taqe i ye'aab' ma' xta patineel chupaam, eh ma' awach ta i nik'ik ar.7Eh xnuk'am taqe chaloq chupaam i ye'aab' wilik wii' i suq atoob' reh chi xkian rusuqkiil. Xa re' la' re' keh xkitoq'aa' rub'an i re' ma' re' xkisutej chi b'amb'al mahk i ye'aab' re' re'. Eh xkich'uwa'risaj wach i nuye'aab' nuyeew keh.8Re' taqe i k'amal kib'eeh aj tiij ma' re' ta chik i hin xinkinimaj, eh re' taqe i k'amal kib'eeh xinsahchik pankik'ux. Eh re' taqe i q'atal q'orik ma' xkiyeew ta wajaawriik. Re' taqe i jalal naq nuq'oral re' chik i tiyoox Baal xkinimaj, re' chik i xkinimaj i ma' xta kajaawriik.
9Ruum aj re', re' hin naa nuq'atam i q'orik taq cha naah i hat, je' wo' chikinaah taqe awiih aamaam.10Yu'naak hiy taq chupaam i ye'aab' Quitim wilik reje parookb'aal q'iij. Eh cha taq'aaj taq i reje i aj taqareel ar Cedar, reh chi nee rilow chi korik mi wilik imb'anik reh je' rukab' i xa a'n taq i hat.11Eh ma' jino'q taqe kiloq'inik reh i tiyoox xkijal wach i ki dios. Re' keh ma' nkijal ta wach i ki dios atoob' ta xama' xta wo' rajaawriik. Eh re' taq i hat nutinamiit xajal taq nuwach kuuk' taqe i tiyoox xama' xta wo' kajaawriik.12Eh re' taxaaj xan b'arb'otik chik ruum ruyo'jiik noq xrilow aha' wilik taq i xa a'n re' re'.
13Re' taq i hat ki'ib' i yiib' wach na'ojb'al taq xa a'n re' i peet re' chi xinaq'eb' taq chi riij ak'ux i hin, je' naq hin k'achlik raasb'al ha' taq cha weh. Eh je' naaxak'ot taq jino'q i jul xama' xta wo' ha' i rumol, inki Dios.
14Re' taq i hat aj Israel ma' hat ta naq taq k'ayimaj pan tokoom tinamit. Eh yu'naak ¿Chib'ih reet noq xchoparik taq anaah kuum i tokoom tinamit?15¿Chib'ih reet noq yohb'aal wach i kijosq'iil i aj ixowaal noq xi chalik taq cha naah xa je' chik kijosq'iil i kaq b'ahlam? Eh xsacharik taq kiwach aatinamiit, eh k'atarik ma' xta chik i xkahnik chupaam.16Re' taqe i tinamit kichalik Menfis, eh re' taqe i kichalik Tafnes xisachwik wach taq aatinamiit.17Re' taq i hat je' taq re' i xak'ul ruum xinaq'eb' taq chi riij ak'ux i hin, hin taq aaWaJaaw aaDios. Eh hin wo' naq kink'amwik taq ab'eeh chupaam i holohik.18Eh yu'naak ¿Chib'ih taq neerutiq aweh chi nee taq tiooj Egipto chi nee taq inawuk'ej aweh i nim ha' Nilo? ¿Chib'ih taq neerutiq aweh chi nee taq tiooj Asiria, eh chi nee taq inawuk'ej aweh i nim ha' Éufrates?19Eh ruum taq ayiib' wach na'ojb'al naa ak'ulum i ti' k'axik, ruum chi ma' tinimanik ta taq naa ruq'atariik i q'orik taq cha naah. Xti cha kapaaj taq riij chi re' nuq'eb'ariik taq xa a'n ti' k'axik, eh ruti'kiil k'uxliis i ruk'am taq cho cha naah, ruum chi ma' nayeew ta taq chik nuloq'il i hin, inki, i QaJaaw Dios nim rajaawriik.
20Re' taq i hat xa najtir wo' taq kinaq'eb' chi riij ak'ux, ma' xawaaj ta taq chik nunimjiik, je' taq wili i xaq'or: Re' hoj ma' nqaaj ta chik qa'nam i rukamaj, tiki taq. Eh xat okik taq chub'anariik i je' k'oyomal re' kilooqjiik taqe i tiyoox xa a'n taq chi ri'sil taqe i nimaq taq chee' je' wo' chikinaah taqe i nimaq taq yuuq'.21Re' hin xti xatnuch'ikaa' wo' naq taq pana ye'aab', je' rukab' noq intikarik i uuva holohik rija'eel. ¿Chib'ih reet noq xasutej taq awiib' chi je' rukab' i uuva intikarik xama' holohik taj i rija'eel?22Re' taq i hat atoob' ta nee taq i na a'n awitiin ruuk' i xa chib'ih jariik, oon nee taq i nakojib'eej awiib' pan xab'oon, xama' jaruuj ta wo' naa reliik panaq' nuwach i ruch'uwa'il taq wach amahk, inki QaJaaw Dios.23Eh ¿Nik' wach noq nee taq inaq'or chi je' wili: Re' hoj ma' xta xqach'uwa'risaj wii' qiib' ma' nqaloq'ej ta taqe i tiyoox, tiko'q taq? Ruum re' taq i hat aweht'al taq xa a'n wa taq k'ixkaab', xa a'n taq aweh je' rukab' ixoq cameyo xa rajimam chik riib' inooj xa ruch'apaa' chik taqe i rixk'aq.24Xa a'n taq aweh i rub'an ixoq b'uurux, xa okrinaq wo' pantaq ch'ahn, noq wilik parutehkiil wach xanoq wo' rik'raaj reje i k'achi' rusik'im. Eh xaraaj chik k'o'nik xama' awach ta chik impab'anik reh, eh xa eliik inkan ruum i imas b'uurux chi xaraaj wo' k'o'nik.
25Re' taq i hat aj Israel maa q'uhtisaj taq awiib', maa toxk'iij taq i nah aawooq, maa kuy taq ahaa' chi ojik chikiij taqe i tiyoox. Xa re' la' re' taq i hat je' wili taq inaq'or: Re' hoj ma' nq'uhtik ta qak'ux chunimjiik taqe i tiyoox, xa konaa wo' qatahqeem taqe, tiki taq.
26Eh nik' wach noq ink'ixik i aj jileq' noq inkan chi riij, je' re' noq naa taq ak'ixiik i hat aj Israel ruum taq i na a'n. Eh naa wo' k'ixik taq aareey, taqe i k'amal ab'eeh, taqe i k'amal kib'eeh i aj tiij, taqe i jalal naq nuq'oral i hin.27Re' chee' yej-amaj chi tiyoox je' wili taq inaq'or reh: Hat wajaaw, tiki taq reh, eh re' ab'aj korjinaq chi ixoq tiyoox, hat nutuut, tiki taq reh. Eh re' hin re' taq chik awiij xasutej weh. Noq panyohb'aal taq chik wilkaat ko' ra'j je' wili taq inaq'or weh re': Qoh ako'leej, tiki taq.28Re' taq i hat aj Judá xayejaa' taq ju'jun atiyoox chupaam i ju'jun chi tinamit, neerub'an chi kuuk' taqe re' neenapahqaaj taq atoob'jiik noq neenchalik i ti' k'axik taq cha naah i lb'al reh mi nee pa' inki a'n taq atoob'jiik.
29¿Chib'ih reet noq inchalik taq aa peleto wuuk' chawunchelaal taq i hat ma' kinanimaj ta taq chik? inki i QaJaaw Dios.30Re' hin xnuyeew taqe panti' k'axik aawak'uun, eh xama' xkijal ta wo' wach i kina'ojb'al. Chawunchelaal taq i hat xa kansaj taq chi q'aslaj ch'ihch' taqe i jalal nuq'oral, xa je' taq chik akab' i josq'laj i kaq b'ahlam noq i ruchop i rutiib'.31Re' taq i hat i aj Israel chab'iraj taq i nuk'uhb'aal. ¿Mi xa je' hin jino'q chiq yuuq' mi xa je' hin jino'q i ye'aab' q'equm paam taq cha weh re'? Hat taq nutinamiit, ¿Chib'ih reet noq inaq'or taq chi je' wili: Yu'naak xoj elik chik panaq'ab' ma' jaruuj chik naa kaat qanimam tiki'nche taq weh?32Re' i xq'un naa rub'anam kaxáro ma' jaruuj neensahchik paruk'ux taqe naa ruxoyem wii' riib', eh je' wo' hoq i ruso'. Raaj taq i hat, i hat taq nutinamiit, ¿Chib'ih reet noq najtir kinsahchik taq panak'ux?
33Eh xa nayejaa' taq chik reje awiib' noq tiooj taq chub'anariik i je' k'oyomal. Eh hat taq aj tijoom chub'anariik taqe i yiib' wach na'ojb'al.34Re' taq i hat xasach taq aso' ruuk' i kikik'eel taq aawas achaaq', re' i xa neb'aa' tii taqe, eh ma' xta wo' naq i yiib' wach k'ahchi' keeb'. Eh xama' xta wo' naq kimahk taq xareq.35Eh je' taq wili inaq'or: Re' hoj ma' xta qamahk ma' kaqrinaq ta chik i Dios quuk', tiki taq. Eh ruum taq inaq'or re' re', naa nuq'atam i q'orik taq cha naah.36Eh ¿Chib'ih reet noq tokoom chik inooj taq asik' atoob'jiik tiooj taq kuuk' i aj Egipto? xa re' la' naa ruk'uhtjiik taq chaak'ixb'ilaal ar, je' rukab' noq xk'uhtjik taq chaak'ixb'ilaal Asiria.37Re' taq i hat yohb'aal taq wach ak'ixiik noq naa taq aweliik cho Egipto ruum re' hin naa wesam i kajaawriik awach naq aj uuk' naa rojiik asik'im atoob'jiik. Re' keh xama' naa ta wo' taq kaat kesam panti' k'axik, inki i Dios. Re' taqe i aj Israel xkian i ma' holohik taj chuwach i Dios1Re' i QaJaaw Dios je' wili i xuq'or keh i aj Israel: Wila' re' ixoq xuch'aq riib' ruuk' i rub'ahiil, eh nee wo' chik i rub'an kaxáro ruuk' tokoom winaq. Re' i peet rub'ahiil ma' nee ta chik i rub'an chi neensutinik cho ruuk' ruum wixsutinik chaloq k'ixb'ilaal chi reh i tinamit. Raaj taq i hat aj Israel i xa a'n taq je' k'oyomal kuuk' i tokoom, xa konee wo' taq ti nuk'ul wuuk', inki.
2Re' taq i hat ti tz'ehtanoq taq chikinaah i yuuq', nee taq inawil mi wilik reh i ye'aab' re' re' ma' xa a'n ta taq wii' i je' k'oyomal. Re' taq i hat xanutzunaa' taq chik awiib' chii' b'eeh chub'aan. Eh xach'uwarisaj taq paam aatinamiit ruuk' i je' k'oyomal, ruuk' i yiib' wach na'ojb'al taq xa a'n.3Eh ruum taq i xa a'n re' re' ma' rub'an ta chik i peet jab', je' wo' i jab' i rub'an koq'uun. Eh k'ixb'ilaal taq xat b'anik, je' taq akab' i k'oyoom laj ixoq.4Eh je' taq wili inaq'or: Hat manlik wajaaw toob'en qeh pan qak'ijolal, tiki taq weh.5¿Mi ma' jaruuj chik naa awesam re' aajosq'iil chi qanaah? tiki taq weh. Eh noq k'ahchi' taq aq'orom taqe re' xa nach'ikaa' taq chik ak'ux chub'anariik taqe i yiib' wach na'ojb'al, inki Dios. Re' i Dios xuq'or keh i aj Israel, i aj Judá chi naa kiyot'om i kik'ux chi riij i kimahk
6Re' i QaJaaw Dios je' wili i xuq'or weh, noq xwihik chi reyil Josías ar Judá: ¿Mi ma' xawilow re' i hat i xkian i aj Israel i ma' kinimanik ta weh? Re' keh xiooj chinaah taqe i yuuq' chi ri'sil taqe nimaq chee' chub'anariik i je' k'oyomal.7Re' hin xnukapaaj naq chi naa wo' chik kiin kinimam noq kianam chik taqe i yiib' wach na'ojb'al. Eh xama' xinkinimaj ta wo' chik. Eh re' taqe i aj Judá ma' korik ta wach kik'ux, xkilow wo' naq i re'.8Eh xkilow wo' naq i aj Judá chi xnuq'eb' chi riij nuk'ux taqe i aj Israel ruum i je' k'oyomal xkian, xnukanaa' taqe chi kutkeel. Xa re' la' re' taqe i aj Judá kichaaq' kiib' kuuk' i aj Israel, xama'xiyo'jik ta wo' hoq, xkian la' wo' chik i je' k'oyomal i keh.9Re' keh ma' k'axik ta noq xkich'uwa'risaj paam i kitinamiit, ma' xkian taj i korik chi nuwach. Re' la' chik inche taqe i tiyoox ab'aj, chee' kiyej-aal xkiloq'ej.10Eh noq b'anooj chik taqe re', re' taqe i aj Judá ma' kinimanik ta weh xama' xinkinimaj ta wo' hoq. Je' tii chik xintohq'ik kinimam xkian kiib' xa re' la' xama' korik ta wo' keh, inki Dios.
11Eh je' wo' chik wili i xuq'or weh: Re' taqe i aj Israel ma' kinimanik ta weh xa manlik i kimahk i keh chikiwach taqe i aj Judá ma' korik ta wach kik'ux wuuk'.12Hiy tiz'ehtanoq reje pansak'aaj reh i rookb'aal i q'iij je' wili i cha q'or:
Re' i QaJaaw Dios je' wili i xuq'or: Re' taq i hat aj Israel i ma' tinimanik ta taq weh, kinanimaj wo' taq chik, re' hin ma' pank'aah ta nee taq ti nuk'ul reje, eh ma' naa ta nuye'em i nujosq'iil taq cha naah chi juneliik ruum q'e' hin aj keteloom wachiis, inki.13Xa re' chanab'eej taq chi xa a'n taq i ma' holohik taj chi nuwach, ma' xinanimaj ta taq i hin. Tokoom la' chik taq xaloq'ej, chi ri'sil taqe i nimaq chee', ma' xanimaj ta taq i xnuq'or aweh i hin, tiko'q keh, inki i Dios.
14Eh je' wo' chik wili i xuq'or: Re' taq i hat ma' tinimanik ta taq, hin taq kinehchanik aweh kim wo' taq chik wuuk'. Re' hin ju'jun i naa nusik'im kiwach chupaam i ju'jun chi tinamit. Eh ka'kab' i naa nusik'im wach kuuk' i ju'jun chi patineel, naa nuk'amam taqe reje Sión.15Re' hin naa nukojom taq k'amal aab'eeh je' rukab' i naa ruchaliik panuk'ux i hin, reh chi parub'ehel, eh ruuk' holohik laj na'ojb'al naa taq kaat kicha'jeem.16Eh noq naa kik'ihaaxb'iik taq awak'uun awixq'uun chupaam taq aatinamiit, ma' awach ta chik naa ruq'oriik rib'iral i kaxoon moloj wii' i tz'ihb'amaj wii' i k'uhb'aal. Ma' awach ta chik naa rukapeb'iniik reh, ma' naa ta chik ruk'uliik pank'uxliis, ma' naa ta kesam i rajaawriik, eh ma' naa ta wo' chik kiyejaam jino'q i ak'.17Ruum chupaam taqe i q'iij re' re', ruye'aab' i QaJaaw Dios naa rubíhnaam i Jerusaleem. Eh chu'nchel i tinamit naa ruchaliik kimolom kiib' ar reh i ruye'ariik nuloq'il, ma' naa ta chik kianam i yiib' wach na'ojb'al inchalik pankik'ux.
18Eh noq naa ruponiik taqe i q'iij re' re', re' taqe i aj Judá naa kianam jinaj kiwach kuuk' i aj Israel junchaliik taqe noq naa kichaliik chupaam i ye'aab' wilik reje pantz'eet reh i rookb'aal q'iij, re' i xnuyeew cho chi kikooch aamaam awati't.
19Hat taq aj Israel, re' hin xatnuk'ul wo' naq taq chi wak'uun wixq'uun, naa naq nuye'em taq aweh i ye'aab' k'axb'al wach, je' wo' i tinamit xiik' naah holwochiil. Re' hin xnukapaaj naq chi naakiin akojom taq chi awajaaw, eh chi ma' jaruuj chik taq naa kiin akanaam.20Xa re' la' re' taq i hat xa a'n taq aweh je' rukab' i rub'an ixoq ma' korik ta wach ruk'ux i ruq'eb' i rub'ahiil, je' re' noq xinaq'eb' taq chi riij ak'ux, inki QaJaaw Dios.
21Eh je' wo' chik wili i xuq'or: Re' taqe i xkiq'eb' chi riij kik'ux nunimjiik i hin, x-ib'irjik i noq k'erik cho kichii' chinaah taqe i yuuq' chupahqaljiik kitoob'jiik reh chi naa wo' chik nuketelaam kiwach.22Re' taq i hat wak'uun wixq'uun ma' tinimanik ta taq kinanimaj wo' taq chik. Re' hin nee taq tiwiq'omaaj ruuk' ati'kiil re' re', inki Dios.
Eh re' taqe i aj Israel je' wili i xkiq'or: Jaaw ayu' wilkooj xoj chalik awuuk' ruum re' hat i qaDios.23Re' hoj xqakoj rehtaal chi xama' xta rutiq qeh chi qoh hoj nah taq yuuq' chi kilooq'jiik taqe i tiyoox, eh chi nqak'er qachii' chinaah i yuuq'. Eh qeht'al wo' naq chi awuuk' hat QaJaaw Dios inqareq ko'lemb'al qiib'.
24Eh ruum taqe i yiib' wach loq'inik tiyoox xqa a'n pan qak'ijolal xqaq'eb' taqe i xkiyejaa' cho wach i qatuut qajaaw, kak'uun kixq'uun, i kitentzuun, i kiwakax.25Re' hoj ma' k'isiin taj i qak'ixiik noq xchalik qaloch' qiib' chawach. Ruum re' taqe i qamaam qati't ximahkunik wo' chawach, eh re' hoj kopan qak'isinal xqatoq'aa' cho mahkunik, eh yu'naak xakok'ahchi' wo' kooj chawach i hat QaJaaw Dios, korik wo' hoq chi ma' tiqanimaj taj, inki taqe. Re' Dios kow xuq'or keh i aj Israel chi naa wo' chik runimjiik1Re' i QaJaaw Dios je' wili xuq'or keh i aj Israel: Wila' naa wo' chik asutiniik taq cho wuuk'. Eh wila' xakanaa' taq kinimjiik taqe tiyoox yiib' kiwach, wila' ma' xinakanaa' taq chik.2Chi je' re' naa taq aq'orom i nub'ihnaal ruuk' i korik, ruuk' i rub'ehel, ruuk' i rukorkiil. Eh naa rukahniik chi wuum i hin naakik'ulum i wotob'il chu'nchel i tinamit, naakiye'em nuloq'il ruuk' kitz'uuy, tiko'q taq.
3Eh re' i QaJaaw Dios je' wili i xuq'or keh i aj Judá, i aj Jerusaleem:
Chayejaa' taq awánima chi korik, je' rukab' noq inyejeb'jik ak'al intikarik wii' i tik mo-oq je' pank'iix taq neenatik.4Hat taq aj Judá, hat taq aj Jerusaleem, chawesaj taq i ch'uwa' panawánima. Chayeew taq panawánima i nuk'uhb'aal. Ruum wila' ma' xakanaa' taq rub'aan ayiib' wach na'ojb'al naa nuye'em i nujosq'iil taq cha naah chi xa je' chik inqop xaq q'aaq' ma' awach ta chik neenchupwik reh, inki. Re' i tinamit Judá xq'orarik chi naa ruchopariik naah kuum i aj ixowaal5Re' i QaJaaw Dios je' wili i xuq'or weh: Chaq'or keh i aj Jerusaleem, i aj Judá chi kixulej i kituun, chi kik'er kichii' chuq'orariik chi je' wili chupaam chu'nchel i tinamit: Yu'naak naa rojiik qamolom qiib' chupaam taqe i tinamit kotimaj kiij chi tz'aq ko'lemb'al kiib'.6Chajosaj taq i rehtalil chi korkiil i Sión, hiy taq cha sik' chi jumehq'iil aha' taq naa ako'leem awiib', ruum re' hin pantz'eet reje reh i rookb'aal q'iij, naa nuk'amam chaloq i naa rusachwiik taq awach.7Re' i je' josq'laj kaq b'ahlam xelik chik chaloq paruye'aab', chalik chik i rub'an insachwik kiwach taqe i tinamit. Re' reh xchalik chi rusachariik wach taq aatinamiit, reh chi naa rukanaam chi ma' xta chik k'isinoq wilik chupaam.8Ruum aj re', re' taq i hat chakoj taq chawiij i q'as wach itz'ihy, cha k'er taq aachii' ruum i ruti'kiil taq ak'ux, ruum re' i runimaal rujosq'iil i QaJaaw Dios komajaa' taq i nik'ik chawiij.
9Re' i QaJaaw Dios je' wili i ruq'or: Noq naa ruponiik i q'iij re' re', re' i reey, re' taqe i k'amal b'eeh, re' taqe i k'amal kib'eeh aj tiij, re' taqe i jalal naq nuq'oral xanaa chik kib'arb'otiik ruum kiyo'jiik, inki.
10Eh re' hin je' wili i xnuq'or reh: Jaaw q'e' wo' chik ti' naa ab'aniik re' hat xachuk i q'orik keh i aj Jerusaleem, ruum re' hat xaq'or keh chi naa taqe aye'em pan suq laj wihik, eh yu'naak je' naa ayohq'eem kich'ihch'aal reh i kikanteesjiik, kinki reh.
11Eh noq naa ruponiik taqe i q'iij re' re' je' wili i naa ruq'orariik keh i aj Jerusaleem: Jinaj i runimaal teew naa reliik chaloq panchiq yuuq' naa ruchaliik chinaah i nutinamiit. Re' re' ma' xata je' rukab' i teew inkamanik chi puhb'al wach i trigo.12Je' re' noq re' teew naa nuye'em chaloq i hin xiik' naah kowiil chuwach i re', chupaam aj re' i q'iij re' re' naa nuye'em taqe chutojariik i kimahk, inki.13Re' i kikareta taqe aj ixowaal xa je' chik kowiil i rub'an i suutz' noq naa kik'uliik iloq, eh re' i kikawayu xakow chik inki a'n xa je' chik kowiil i rub'an i kaq suut teew, eh ma' xata je' kowiil kirupinik i xihk. Xa re' la' q'e' ti' i naa qak'ulum taq awuum.14Re' taq i hat aj Jerusaleem chawesaj taq i ch'uwa' wach wilik panawánima chi je' re' nee taq tiko'ljik. Eh ¿Kojaruuj taq inakanaa' rukapeb'jiik taqe i yiib' wach na'ojb'al?15Jinaj i ak' laj q'orik xchalik rib'iral chupaam i ye'aab' Dan, chupaam i ye'aab' Efraim xchalik ruq'orariik chi k'ulik iloq reh i runimaal ti' k'axik taq cha naah.16Chaq'or keh i nimaq tinamit, je' wo' keh i aj Jerusaleem chi chupaam i jinaj tinamit wilik chaloq chi najt xi chalik i aj ixowaal. Eh k'erlik kichii' chuq'orariik i q'aq'inik noq naa kik'uliik iloq chikinaah i aj Judá.17Naakikotem riij i tinamit Judá naa kianam reh je' rukab' noq incha'jaljik jino'q i ye'aab'. Naa rub'an keh ruum xkikanaa' nunimjiik, inki QaJaaw Dios.
18Je' re' i ti' k'axik naa ruchaliik taq cha naah ruum taq ayiib' wach na'ojb'al, eh konaa ruponiik taq panawánima i ruti'kiil, inki. Re' Jeremías xtib'ik ruk'ux ruum i xuk'ul i rutinamiit19Re' hin xan yot'ik chik i wánima, eh xankurkutik chik, xama' nureq ta chik chi riij chib'ih i naa nub'anam, re' hin wilik i naa nuq'orom chi riij, ruum xb'iraj chik chi xuuljik chaloq i tuun eh xak'erik chik kichii' i aj q'aq'ineel k'ulik inki a'n iloq.20Eh k'ahchi' chik qib'iram rib'iral chi naa rusachariik wach i qatinamiit xa chi jumehq'iil xsacharik kiwach i tinamit, nee-oq inkisach wach i paat inqamol wii' qiib', je' wo' i itz'ihy naah paat qoh hi'lik wii'.21Eh ¿Kojaruuj i numay rilariik chi kijosam taxaaj i rehtalil i q'aq'inik? ¿Kojaruuj i numay rib'irjiik chi k'ahchi' ruxuljiik i tuun?22Re' taqe i wili k'achi' ruk'ulariik ruum re' taqe i nutinamiit ma' kinkib'iraj taj ma' kinkinimaj taj, ma' xta kina'ojb'al chub'anariik i holohik. Xa re' la' i yiib' wach na'ojb'al kichol rub'aan, inki.
23Re' hin xwilow i wach ak'al chi ma' tuslik ta wach, chi ma' xta i wilik chupaam. Eh xwilow i taxaaj chi ma' xta i saqum wilik chupaam.24Eh xwilow taqe inajt kinaah yuuq' chi xakib'arb'otik chik ruum kiyo'jiik, eh xwilow chi chu'nchel i rub'ohl yuuq' xsacharik kiwach.25Eh xwilow chi ma' jino'q chik i k'achareel wilkeeb' chinaah i wach ak'al re' taqe i chikop wilik kixiik' xkimol chi elik.26Eh xwilow chi re' taqe i rax paam ye'aab' xi kahnik chi xa je' chik chiq yuuq', xwilow chi chu'nchel i tinamit xsahchik kiwach. Eh re' i QaJaaw Dios xb'anik taqe re' ruum i runimaal i rujosq'iil.
27Re' i QaJaaw Dios je' wili i xuq'or: Chu'nchel i tinamit naa wik'sam chi ti' k'axik, xa re' la' ma' naa ta nusacham wach chi jumpech.28Eh chupaam chu'nchel i wach ak'al naa runujiik i ruti'kiil k'uxliis, re' i taxaaj naa ruq'equumriik paam. Re' wili korik re' hin xinq'orik ma' nee ta chik i nuyoj, ma' nee ta chik i nusutej chi riij i nuq'oral.29Noq xkib'iraj i tinamit chi k'erlik kichii' taqe i k'ulik inki a'n iloq rij kawáyu ruch'ihil taqe i wilik cho kiflecha kuuk' ma' k'isiin ta xiyo'jik xiooj lom kajiim xkikeb'aa' kiib' pantaq ch'ahn, pantaq ruhopil ab'aj. Ruum taqe re' xkahnik chi ma' xta chik wilik chupaam taqe i tinamit. Eh xkahnik chi ma' jino'q chik patineel chupaam.30Re' taq aatinamiit naa rusachariik wach, xama' xta nkih chi nakoj taq i holohaq itz'ihy, chi naxoyej taq awiib' ruuk' oro. Eh xama' xta nkih chi natz'ihb'aaj taq i rij naq'awach, ruum awach aj uuk' taq xa a'n i je' k'oyomal xat kiq'eb' taq chi riij kik'ux akanteesjiik taq chik inkaaj.31Re' hin xb'iraj i jinaj i k'erej chi'is je' rukab' noq i ruk'er chii' ixoq noq ink'ulik ruk'ux ruuk' i peet ruha'lak'uun. Re' taqe i k'erik kichii' re' re', re' taqe i aj Siónoq'ik inki a'n inkiyub' chaloq i kiq'ab' je' wili inkiq'or: Xti q'e' wo' chik ti' i k'ahchi' qak'ulum naakooj kikansam taqe i aj i kaansoom, inki taqe, inki.
Re' i mahk xkian i aj Jerusaleem.1Re' i QaJaaw Dios je' wili i xuq'or: Yu'naak hiy taq cha sik' chi korik pantaq b'eeh reh i Jerusaleem nee oon inareq taq jino'q imb'anik reh i korik eh korik inq'orik. Eh wila' xareq taq jino'q neenukuy kimahk i aj Jerusaleem.2K'achlik i QaJaaw Dios inki, inki wo' naq taqe. Xa re' la' ma' korik ta wo' keh inkiq'or inki.
3QaJaaw Dios, re' inasik' i hat re' taqe i korik wach kik'ux. Korik wo' hoq chi xa a'n ti' k'axik keh, xayoj wach i kitinamiit, eh xama' xokik ta wo' kina'ojb'al. Q'e' kow i kinaah je' kowiil ab'aj, ma' nkaaj ta chik sutinik chupaam i holohik laj b'eeh.
4Re' hin je' wili i xnuq'or chikiij: Re' taqe i wili q'e' ketel kiwach ma' xta kina'ojb'al, ruum ma' nkireq ta chi riij i nuq'or chi naa kianam.5Eh xuq'oreej wo' naq taqe i nimaq wach kina'ojb'al, ruum xnukapaaj naq i hin chi nkireq chi riij iraaj i QaJaaw Dios. Xa re' la' chi kunchelaal wo' keh kija'wachej kiib' chuwach i QaJaaw Dios, xama' xkaaj ta wo' kinimam.
6Re' taqe i aj ixowaal naa rusachwiik kiwach xa je' chik kijosq'iil kaq b'ahlam kielik chaloq paraxchee'. Eh xa je' chik kikab' i xojb' kichalik panchiq yuuq', eh naa kichaliik chinaah taq aatinamiit chi je' kijosq'iil nimaq taq b'ahlam, naa taq kisachib'eem awach. Ruum yohb'aal taq wach aamahk, eh xa a'n taq ma' imponik ta chi nuwach, inki.
7¿Nik' wach noq naa nukuyum taq aamahk re' re'? Re' taq awak'uun awixq'uun xin kiq'eb' chi riij kik'ux, inkiq'or i korik pankib'ihnaal i tiyoox ma' re' ta wo' taqe Dios. Eh xnuyeew wo' naq kiwa' kihaa', xa re' la' xama' xkian ta wo' korik, pankomonil la' xkian i je' k'oyomal.8Re' keh xa je' chik kikab' imas kawáyu k'achi' chik'onik noq kiooj chi q'uchariik i rehk'een i kas kichaaq'.9¿Mi ma' naa nuye'em taqe chi tojariik re' i kimahk ruum inki a'n re' re'? ¿Mi ma' ruk'ul chi naa nuye'em taqe chutojariik i kimahk re' i tinamit re' re'?10Eh re' taqe i aj ixowaal, naa taq kisacham awach, atoob' ta ma' chawunchelaal ta taq i hat taq nu uuva noq wilkaat. Xa re' wo' taqe i ma' holohik taj kina'ojb'al naa kesam iloq, re' taqe i ma' re' ta taqe weh.11Re' i tinamit Israel, ruch'ihil i tinamit Judá tokoom chik i xkikoj chi ki dios chi nuwach i hin, inki QaJaaw Dios.
12Re' taqe aj Israel, i aj Judá ma' xkinimaj taj i xuq'or i Dios je' wili i xkiq'or: Re' hoj ma' xta ti' k'axik, ma' xtakaansanik, ma' xta wi'jaleel naa ruchaliik chi qanaah, inki taqe.13Re' taqe i jalal naq nuq'oral naa kikahniik chi xa je' taqe teew xama' re' ta wo' hoq i nuq'oral i hin naa kiq'orom je' re' naa rub'aan kuuk'.
14Re' i QaJaaw Dios nim rajaawriik, je' wili i xuq'or: Re' taqe i tinamit ruum chi xkiq'or taqe q'orik re' re' naa nuye'em panachii' i nuq'oral chi je' jinaj q'aaq'. Eh naa kikahniik chi je' rukab' i sii' noq ink'ahtik inki.
15Re' taq i hat aj Israel naa nuk'amam taqe chaloq chi najt tinamit taqe i aj ixowaal q'e' kow kiib' re' ruuk' taqe i najtir tinamit. Eh ma' aweht'al ta taq nik' wach kiq'orik, eh ma' naa ta taq areqem chi riij i naa kiq'orom taq aweh.16Eh chu'nchel taqe re' kowlaj q'aq'ineel taqe, xa re' ikaansanik inki a'n ruuk' inkikoj chi kantesb'aal.17Re' chik i keh naakik'uxwiik reh taq aakaxlanwi'k, naa kisacham wach awak'uun awixq'uun. Eh naa kik'uxum taqe aatentzuun, taqe i awaakaax, taqe aa-uuva, taqe a higo. Eh ruuk' i q'aslaj ch'ihch' naa kisacham wach taq aatinamiit i wilik inkiko'leej wii' kiib' re' inach'ikaa' naq wii' ak'ux taq i hat.
18Xa re' la' chupaam taqe i q'iij re' re' ma' naa ta nuye'em q'ab' chi naa rusachariik taq awach chi jumpech.19Eh noq neenkipahqaaj aweh chi je' wili: ¿Chib'ih reet noq xub'an qeh chi je' wili i QaJaaw Dios inko'q taqe aweh? Re' i hat je' wili ruchaq'weesjiik naa a'nam: ¿Nik' wach noq xakanaa' taq runimjiik? re' chik taqe i ki dios i tokoom tinamit taq xaloq'ej pan aatinamiit je' wo' chik re' naa taq a'nam panatinamiit inkaaj i tokoom tinamit, inki Dios.
20Re' i hat cha q'or keh chi je' wili chu'nchel i aj Israel re' taqe i riih rumaam Jacob, je' wo' keh i aj Judá:21Chab'iraj taq i hat tinamit ma' xta taq ana'ojb'al, ma' ti ib'irinik ta taq, wilik wo' naq taq naq'awach, xama' ti ilwik ta wo' taq, wilik wo' naq taq axikin xama' ti ib'irinik ta wo' taq.22Re' hin i Dios je' wili nuq'or: Re' taq i hat ma' kinayohleej ta taq, ma' chalik ta taq ab'arb'otiik chi nuwach. Re' hin xnukoj i q'atb'al chii' i palaw. Atoob' ta yohb'aal wach i rub'ohl xan teleninik chik, xama' rik'saj ta wo' reje q'atb'al chii' nukojom.23Raaj taq i hat ma' tinimanik ta taq k'isinoq, xiik' naah kowiil taq awánima xinaq'eb' taq chi riij ak'ux chi jumpech.24Eh ma' xaq'or ta taq chi je' wili: Qanimaj i QaJaaw Dios, chi je' re' manlik paruq'ijil nee ruyeew cho qeh i peet jab', eh nee ruyeew cho qeh i xam jab'. Eh nee ruyeew q'ab' qeh chi neenqajach i wach qatik paruq'ijil, ma' tiki ta taq.25Xa re' la' re' taq i hat ruum taq amahk i na a'n ma' na a'n ta taq rusuqkiil i wotob'il re' re'.26Ruum chaxilak taq i hat nutinamiit wilkeeb' taqe i yiib' wach kina'ojb'al, kiooj chukanteesjiik i kas kichaaq' je' inkanteesjik chikop inki a'n Eh inki a'n reh i kas kichaaq', je' rukab' noq inkojarik kixirob'aal taqe i tz'ikin.27Re' keh inkinujisaj i kipaat ruuk' i xa chib'ih jariik inkelq'aaj xa je' chik inhamarik kok' tz'ikin pankok' kaxoon koraal inki a'n Ruum i re' xnimb'ik kiwach, eh xib'ehoomb'rik.28Eh xiik' naah kiq'ina'iil ruum inkik'uxlaaj kiib' chi korik. Re' i yiib' wach na'ojb'al inki a'n ma' pajooj taj. Eh ma' nkitoob'eej ta taqe i ma' xta kituut kajaaw, ma' nkiyeew ta q'ab' reh taqe i neb'aa' chi neenkian aha' wilik i ruk'ul chi keh.29¿Mi ma' naa nuye'em taqe chutojariik re' kimahk? ¿Mi ma' ruk'ul re' chi nee nuq'aj wach keh je' rukab' i ruk'ul chi keh? inki i QaJaaw Dios.
30Xti korik wo' hoq chi yohb'aal wach, eh ti yo'joq ruum i k'achi' ruk'ulariik panutinamiit.31Re' taqe i jalal naq nuq'oral re' chik i chukuj q'orik inkiq'or. Re' taqe i k'amal b'eeh aj tiij inkik'am rub'eeh i tinamit chi je' rukab' inkaaj i keh. Re' taq i hat nutinamiit je' taq re' imponik chawach. ¿Chib'ih taq i naa a'nam na' chaloq i ti' k'axik? inki i Dios. Re' taqe i aj ixowaal xkikotej riij i tinamit Jerusaleem1Re' taq i hat aj Benjamín, eleen taq reje Jerusaleem. Eh chaxulej taq reje i tuun chupaam i tinamit Tecoa. K'utinoq i sib' taxaaj chupaam i ye'aab' Bet-haquerem, ruum re' taqe i aj ixowaal xi k'uloq i pantz'eet reh i rookb'aal q'iij chub'anariik i runimaal ti' k'axik.2Re' tinamit Sión xa je' naq chik rukab' taqe i holohaq laj xq'un xa re' la' naa rusachariik kiwach.3Re' taqe i je' cha'jen tentzun yiib' wach i kina'ojb'al naa rucha'jiniik keh. Naa kiyejaam ki-itz'ihy naah paat chi junsuut i tinamit Sión, eh naakicha'jeem i je' kitentzuun chi kiju'junaal.4Re' taqe i aj ixowaal je' wili inkiq'or: Qayejaa' taq qiib' taq taq q'aq'ineel kuuk', kim taq naa rojiik qa'nam keh kab'lajora i q'iij. Xa re' la' q'e' ti' inqik'raaj ruum xokik chik i q'iij, xokik chik chaloq i q'equm.5Eh qachop taq qak'ux chi chaq'ab' neeqa a'n keh, neenqasach wach inajt kinaah tz'aq inkiko'leej wii' kiib', inki taqe.
6Re' i QaJaaw Dios nim rajaawriik je' wili i xuq'or keh i aj ixowaal:
Chayok' taq i chee' reh chi nee taq inayejaa' awiik'b'aal noq nee taq inooj a a'n keh i aj Jerusaleem. Ruum re' tinamit re' re', i ruk'ul chi naa ruye'ariik chutojariik i ru mahk, ruum xa re' i yiib' wach inki a'n7Ar Jerusaleem i xa re' i yiib' wach na'ojb'al imb'aan, je' rukab' noq ma' rumay ta elik chaloq i ha' paraasb'al. Re' i nib'irjik rib'iral ar xa re' i ma' ruk'ul ta chi b'anarik, xa re' pletohinik iib', xa re' i hopoj iib', xa re' i ti' k'axik inki a'n reh i tokoom, re' taqe i re' inki a'n chi nuwach.8Re' taq i hat aj Jerusaleem, chajal taq wach ana'ojb'al, reh chi ma' nee ta taq tinukanaa' cha wutkeel. Reh chi ma' nee ta taq i nukanaa' aatinamiit chi xa je' chik chiq yuuq', eh chi ma' xta chik jino'q patineel ar, inki Dios.
9Re' i QaJaaw Dios nim rajaawriik je' wili xuq'or: Re' taqe i aj Israel konaakikahniik ar aha' ta chik ma' naakisik'ariik kuum i aj ixowaal korehtaal kireqariik. Je' rukab' i rub'an i tikil uuva i rusik' chu'nchel i wach ma' jino'q chik i rukanaa', inki.
10Eh re' hin je' wili i xnuq'or: Chi nee nuq'or rib'iral keh i re' ma' jino'q ineerunimaj, ruum re' keh je' naa tz'aplik i kixikin. QaJaaw Dios re' taqe i re' ma' jaruuj neenkaaj kib'iram neenkikaqse'laaj inaq'or, ma' nee ta imponik panaq' kiwach.11Re' hin, hin nujinaq chi rujosq'iil i QaJaaw Dios, ma' nukuy ta chik. Re' reh je' wili i xuq'or weh: Chawik'saj aajosq'iil chikinaah i k'ijolaq pantaq b'eeh,
je' wo' chikinaah taqe i komanaan inkimol kiib, reh chi neekik'amarik reje pantz'ilom taqe i winaq kuch'ihil kehk'een, je' wo' taqe i riji' winaq.12Re' taqe re', chi je' kiye'aab', chi je' kipaat, chi je' kehk'een re' chik taqe i aj ixowaal naa ruchopwiik kinaah. Ruum re' hin naa taqe nuye'em chutojariik i kimahk taqe i patim chupaam i tinamit re' re', inki.
13Chi nimaq chi kok' taq xa re' i tumiin inkikapaaj re' inkireq ruuk' i leq'. Eh chi je' jalal naq taqe nuq'oral, chi je' taqe k'amal kib'eeh i aj tiij xa re' i jot'ooj inki a'n14Eh inkijot'isaj wach i ruti'kiil kik'ux i nutinamiit, inki a'n kiib', je' wili inkiq'or: Yu'naak xtiwilkooj pansuqkiil k'uxliis inki taqe xanaah re' ma' xata wo' suq kiil k'uxliis.15Re' keh i ruk'ul naq chi nchalik kik'ixiik ruum inki a'n re' re' xama' nukuy ta chik rilariik i hin. Xa re' la' re' keh xama' keht'al ta wo' wach k'ixik. Ruum aj re' noq naa taqe nuye'em chutojariik i kimahk i tokoom naa wo' kib'aniik i ti' k'axik re' re' i keh, inki i QaJaaw Dios.
16Eh je' wili i xuq'or i QaJaaw Dios: Chapab'aa' taq awiib' xilak taq b'eeh, chapahqaaj taq aha' wilik i holohik i najtir b'eeh re' taq chak'am, chi je' re' nee taq i naa req ruhi'lb'aal awánima, inki. Eh re' keh je' wili i xkiq'or: Ma' chih taj, ma' nee ta qak'amam i b'eeh re' re' i hoj, inki taqe.
17Re' i QaJaaw xnukoj wo' naq cha'jen taq aweh, reh chi xkiq'or taq aweh chi naa naq taq ab'iram noq naa ruxuljiik chee i tuun rehtalil i ti' k'axik. Eh je' taq wili i xaq'or: Re' hoj ma' qanimaj taj i re', tiki taq.
18Ruum aj re' je' wili i xuq'or i QaJaaw Dios: Chab'iraj taq i hat nimaq tinamit, chanab'eej taq chib'ih i naa ruk'ulum i nutinamiit.
19Chab'iraj taq i hat i wilkaat taq wach ak'al, re' hin naa nuk'amam chaloq i ti' k'axik chikinaah i tinamit wili, ruum chi ma' xkinimaj ta taqe i xnuq'or keh, xkiq'eb' chi riij kik'ux i nuk'uhb'aal.20¿Chib'ih reet noq ink'ulik taq ak'at i insensia inchalik ar Saba, eh ink'ulik taq ak'at chi nuwach xa chib'ih chik jariik ch'ahniil kik'ohnik kichalik chi najt yuuq'? Re' hin ma' suq ta rub'an weh taq amayiij, je' wo' hoq i k'atoj chikop i nayeew taq chi amayiij, inki.
21Ruum wo' re' i ruq'or chi je' wili i QaJaaw Dios: Re' hin naa nuye'em q'ab' chi re' taqe i tinamit wili naa rusahchiik kiwach, chi tuutb'ees chi ajaab'ees chi ak'uunb'ees chi ixq'uunb'ees chi kika'jaah kiib', eh chi kamigo kiib'.
22Re' re' QaJaaw Dios je' wili xuq'or: Re' taqe i aj ixowaal wilkeeb' cho chi najt tinamit, pantz'eet reje reh i rookb'aal i q'iij, re' wilik kajaawriik, chalik chik inki a'n chi q'aq'inik.23Eh kik'amam cho kiflecha, kiq'as ju' ch'ihch', ma' awach taj i naa kiketelaam wach, ruum yohb'aal wach kijosq'iil. Xa je' chik rukab' i choqik i rub'an i palaw, eh iqilkeeb' taqe riij kawáyu noq naa kik'uliik iloq, chi q'aq'inik kuuk' i aj Sión, inki.
24Re' taqe i aj Jerusaleem je' wili inkiq'or: Re' hoj xqib'iraj chik rib'iral i ti' k'axik re' re' ma' k'isiin ta xchalik qayo'jiik, eh xchalik rutiib'iik qak'ux ruum, je' rukab' noq inchalik ruti'kiil ixoq noq ink'ulik ruk'ux.25Ma' aha' taq tiooj pantaq ab'iix, pantaq b'eeh ruum re' taqe aj ixowaal kiyejaam chik cho kiib' reh ikaansanik aha' ta chik ma' kipuhkaam kiib', inki taqe.
26Hat taq nutinamiit chakoj taq chawiij i q'as wach itz'ihy cha tolej taq awiib' pan chaaj chakoj taq i q'eq itz'ihy chawiij. Eh cha ch'ikaa' taq ak'ux chi oq'ik, je' rukab' noq inooq'jik i rukimiik ak'uunb'ees xa jinaj wo' chuwach i rutuut. Ruum re' taqe i naa rusachwiik qawach naa kik'uliik iloq chi jumehq'iil.
27Eh re' QaJaaw je' wili i xuq'or weh: Re' hin i nuq'or aweh chakoj rehtaal i k'achi' keeb' ar neenawilow nik' wach i kina'ojb'al, inki.
28Eh re' taqe i keh Jaaw chi kunchelaal ma' ti kinimaj taj, xa aj tz'aqal wach k'utaaj taqe, xa tee eh kiwach, q'e' kow i kinaah je' kowiil q'an ch'ihch', je' kowiil rax ch'ihch'.29Eh noq inhuupjik i q'aaq' i ruhaahb'isaj i plomo. Xa ma' xta inkih chi nsaqb'eejik kiwach, eh re' taqe i yiib' wach kina'ojb'al xama' nsahchik ta wo' kiwach.30Ruum aj re' i ruk'ul chi naa qaq'orom keh chi je' kikab' i plata xa nsahchik kiwach. Ruum re' hat QaJaaw Dios naa asacham kiwach. Re' Jeremías xub'an i k'uhb'aal chupaam i rupaat i Dios
1Re' QaJaaw Dios je' wili i xuq'or reh i Jeremías:2Re' hat chapab'aa' awiib' panookb'al reh i nupaat, cha q'or rib'iral ar i nuk'uhb'aal wili, je' wili i neenaq'or: Hat taq aj Judá chawunchelaal taq i ti okik i koq chi chii' i ookb'al wili chab'iraj taq i k'uhb'aal wili:3Re' i QaJaaw min rajaawriik re' qaDios i hoj aj Israel je' wili i xuq'or: Chayejaa' taq aak'achariik, re' chik i holohik taq cha a'n, reh chi neenuyeew q'ab' taq aweh chi nee taq ti k'acharik chupaam i ye'aab' wili.4Manimaj taq i xachukuj q'orik noq neenkiq'or taq aweh chi je' wili: Ayu' wilik i rupaat i QaJaaw Dios, ayu' wilik i rupaat i QaJaaw Dios, ma' xta taq neenak'ul, tiuchjoq taq.
5Eh wila' xayejaa' taq ak'achariik, wila' re' chik holohik taq xa a'n, wila' re' i korik taq xa a'n ruuk' aawas achaaq'.6Wila' ma' xaq'uch taq chik i chib'ih keh i tokoom tinamit, taqe i ma' xta kituut kajaaw, taqe i kamnaq kib'ahiil. Eh wila' ma' xa kansaj taq chik taqe i ma' xta kimahk chupaam i ye'aab' wili, eh wila' ma' xaloq'ej chik taqe i tiyoox, re' ink'amwik chaloq i ti' k'axik taq cha naah,7re' hin nee taq tinuyeew chi k'acharik nik'-oq najtiil chupaam i ye'aab' wili, re' i nuye'em cho keh chi jumpech taq aamaam awati't.
8Re' taq i hat inach'ikaa' taq ak'ux ruuk' i xachukuj q'orik xama' xta ruk'am taq chaaweh.9Re' taq i hat i na a'n taq i leq', ikaansanik, inach'uwa'risaj taq wach i aakaxáro, inaq'or taq i korik i na a'n awiib'. Eh inak'at taq insensia chuwach i tiyoox Baal, i nayeew taq kiloq'il taqe i tiyoox, ma' ruk'ul ta taq cha weh.10Eh chi riij i re' ti chalik wo' taq chik ayu' chi nuwach chupaam i nupaat wili inloqjiik wii' i nub'ihnaal, je' wili taq inaq'or: Yu'naak hoj chik ko'limaj tiki taq. Noq ti sutinik taq reje inatoq'aa' wo' taq chik rub'aan i yiib' wach na'hojb'al.11¿Mi nakapaaj taq re' hat chi re' i nupaat inlooq'jik wii' i nub'ihnaal xa je' kiye'aab' ajileq'? Re' hin inwilow chu'nchel i yiib' wach taq i na a'n.12Re' taq i hat hiy taq chupaam i nupaat ar Silo, re' tinamit re' re' peet wo' naq xnuyeew kiloq'il ruuk' i nub'ihnaal. Re' taq i hat nee taq inakoj rehtaal chib'ih i ti' k'axik xnuyeew cho chikinaah ruum i kimahk i nutinamiit Israel.13Re' hin k'ipech wo' naq xatnuq'il taq ruuk' aana'ojb'al, eh xama' xanimaj ta wo' taq, noq xat nuyuq'eej taq xama' xinab'iraj ta wo' taq.14Ruum aj re' nik' wach noq xnusach wach i nuSantolaj ye'aab' xwihik cho Silo, je' wo' chik re' noq naa nusacham wach i paat wilik ayu', re' inlooq'jik wii' i nub'ihnaal. Re' i xnuyeew taq aweh i inach'ikaa' naq taq wii' ak'ux, xnuyeew wo' cho keh taq i aamaam awati't.15Re' hin naa taq kaat wesam reje chi nuwach, je' rukab' noq xwesaj taqe reje chi nuwach i ma' tokoom ta taq awuuk', re' taqe i riih rumaam Efraín, inki taq aweh i QaJaaw Dios.
16Eh je' wo' chik wili xuq'or: Re' hat Jeremías maa a'n chik atiij chikiij i tinamit wili, maa pahqaaj chik weh chi neenutoob'eej taqe, eh chi neenuketelaaj kiwach ruum re' hin xama' nee ta wo' chik tib'iraj.17Ruum re' keh xa re' wo' hoq i ma' holohik ta laj na'ojb'al inki a'n chupaam i tinamit Judá. Eh je' wo' hoq xilak taq b'eeh reh i Jerusaleem.18Re' taqe i kak'uun kisik'wik i sii', eh re' taqe ajaab'ees kiluk'wik i q'aaq, eh re' taqe i ehk'eenb'ees kiyej-anik reh i kaxlanwi'k inkiyeew chi mayiij chuwach ixoq tiyoox inkiq'or chi re' reh i reey pan taxaaj. Eh inkiyeew i riis uuva chikiwach i tokoom dios, ruuk' i re' inkiyeew nujosq'iil.19Noq kinkiq'eet wachej hin xa re' wo' keh inkiq'et wachej kiib' ruum xa re' wo' keh inkik'uhtaaj kik'ixb'ilaal.20Ruum aj re', re' hin i Dios korik i nuq'or taq aweh chi naa nuye'em chu'nchel i nujosq'iil chinaah i ye'aab' wili, chikinaah i patineel wilkeeb' ayu', chikinaah i chikop. Eh chikinaah i chee' kiwachinik, re' taqe i wach tik nakik'ahtiik ruuk' q'aaq' ma' jaruuj chik naa ruchuhpiik. Re' ti' k'axik xye'arik chikinaah i aj Judá ruum ma' xinimanik taj
21Re' i QaJaaw, i qaDios i hoj, hoj aj Israel nim rajaawriik, je' wili i xuq'or keh i rutinamiit: Chayeew taq chu'nchel k'atoj chikop chi mayiij xanik' pa' k'ihaal taq inawaaj, nee wo' rub'an chi nee taq inak'ux aweh i kitib'kaal.22Xa re' la' re' hin noq xwesaj taqe chaloq aamaam awati't Egipto, xama' xta wo' xnuq'or keh, ma' xnumin ta taqe chupaam chi naa kiye'em i k'atoj mayiij, eh chi naa kik'atam i chikop chi kimayiij.23Re' i xnuq'or keh i hin xa re' wo' naq chi nakiin kinimam. Reh naq chi xin kahnik chi hin ki Dios, eh chi re' keh xi kahnik naq chi nutinamiit taqe, je' naq re' xnuq'or keh chi naa kianaam reh naq chi holohik naakeliik.24Xa re' la' re' keh xama' xinkinimaj ta wo' hoq, xama' xkinimaj ta wo' i xnuq'or keh, xkikowb'isaj la' i kinaah. Re' chik xkian i yiib' wach na'ojb'al i nelik cho pankanima, ma' xinkinimaj taj xin kiq'eb' chi riij kik'ux.25Eh xa re' wo' noq xwesaj taqe chaloq aamaam awati't Egipto nutik'aam chaloq chi xariij chik riib' xnutaq'aaj taq cho chak'uhb'aljiik taqe jalal nuq'oral xnutaq'aaj taq cha weh chu'nchel i waj kamanoom.26Re' taq i hat xama' xinanimaj ta wo' taq, ma' xanimaj ta taq i xnuq'or. Q'e' wo' chik xakowb'isaj taq anaah, ma' xata je' rukab' xkian taq aamaam awati't.
27Eh je' wili xuq'or weh: Re' hat Jeremías cha q'or keh chu'nchel wili, atoob' ta ma' neetikib'iraj. Kow cha k'er aachii' chi kiq'orob'jiik atoob' ta ma' nee ta tikich'aqweej.28Je' wili cha q'or keh: Re' i tinamit wili ma' nkinimaj taj i QaJaaw i qaDios, ma' nkaaj ta chi neen q'orarik keh chi neenkikanaa' i yiib' wach na'ojb'al, ma' korik ta chik kiq'orik, tiko'q keh, inki.
29Hat taq aj Jerusaleem, chayok' taq i rismaal anaah chayeew taq reje wulu', cha k'er taq aachii' chi oq'ik chinaah taqe i yuuq', ruum re' i QaJaaw Dios ruum i rujosq'iil xat ruq'eb' taq, chi riij ruk'ux.
30Re' QaJaaw Dios je' wili i xuq'or: Re' taqe i tinamit wilkeeb' Judá wilik i xkian ma' suq ta xub'an weh, xkiyeew i tiyoox chupaam i nupaat re' naq i kinkiloq'ej wii' xkich'uwa'risaj paam.31Re' keh xkiyejaa' i artaal Tofet rub'ihnaal ar wach k'ixkaab' Ben-hinom ar xkik'at taqe i kak'uun kixq'uun chi mayiij chikiwach i tiyoox. Re' hin ma' xnuq'or ta keh chi je' re' i naa kianam, ni xata naq xik'ik panukapeb'aal.32Ruum aj re' naa ruponiik i q'iij chi re' ye'aab' re' re' ma' re' ta chik Tofet ni xata Ben-hinom naa rubíhnaam, ye'aab' reh kanteesb'al iib', la' chik i naa rubíhnaam, ar chik Tofet naakimuq'aam taqe i kamnaq ruum ma' naa ta chik rumanlojiik i ye'aab' kimuhqik wii'.33Re' kiti'jolal taqe i tinamit wili naa rukahniik chi kiwa' taqe i k'uch chi kiwa' taqe i josq'laj chikop, atoob' ta naq nee kiyohb'esjik chinaah ma' jaruuj chik naakikanaam ruk'uxariik.34Re' hin naa nusacham kiwach pan tinamit Judá, pantaq xilak b'eeh Jerusaleem, ma' naa ta chik rib'irjiik i tz'uuy reh ninq'iij, reh suq kiil k'uxliis, tz'uuy reh kaxáro. Ruum re' i tinamit wili naa rukahniik chi xa je' chik ye'aab' chiq yuuq' ma' xta chik i naa ruwihiik chupaam, inki.
1Re' i QaJaaw Dios je' wili ruq'or: Eh chupaam taqe i q'iij re' re', re' taqe i aj ixowaal, naa kesam cho pankijuleel i kib'aqil taqe i reey, i kib'aqil xk'amwik cho kib'eeh i aj Judá, i kib'aqil taqe i k'amal b'eeh aj tiij, i kib'aqil taqe i xijalwik cho nuq'oral, re' taqe i xi k'acharik cho Jerusaleem.2Eh naakikanaam chi ch'a'lik i kib'aqil wach q'iij, chuwach i poh, chuwach taqe i ch'umiil, re' i xkikoj chi jilow ki dios, eh kiyeew ruloq'il xkinimaj. Ruum aj re', re' kib'aqil ma' awach ta chik naa rumolwiik reh, eh ma' naa ta chik kimuq'aam, naa la' kikahniik chi xach'a'lkeeb' chik wach ak'al xa je' chik rusaa' chikop.3Re' taqe i konaakikahniik chi k'achalkeeb' re' ruuk' taqe i tinamit wilik yiib' wach i kina'ojb'al, xa aha' pa' naa kiwihiik, noq nutukem chik kiwach i hin, ma' naa ta chik kaajwaam k'acharik, re' la' chik i kimik naa kaajwaam, inki QaJaaw Dios.
4Eh je' wili i xuq'or i QaJaaw Dios:
Chakoj taq rehtaal noq awach inq'ehb'ik impa'lojik wo' chik, noq insahchik reh i b'eeh i rusik' wo' chik, i rureq wo' chik.5Raaj taq i hat aj Israel ¿Chib'ih reet noq tokoom taq chik inanimaj? ¿Chib'ih reet noq xinaq'eb' taq chi riij ak'ux taq i hat i aj Jerusaleem? ¿Chib'ih reet noq ma' xinasik' ta taq chik ruka'peech?6Re' hin eliik naq imb'iraj, xa re' la' ma' jank'al tamb'iraj chi nkipahqaaj ta kuyb'al kimahk. Eh ma' inkiq'or ta wo' chi je' wili: ¿Chib'ih i ma' holohik taj nub'anam? ma' nki ta taqe. Chi kunchelaal la' kiooj kajimam kiib' chub'aan i kiyiib' wach na'ojb'al xa je' chik kiajiminik kawáyu ojik i rub'an panq'aq'inik.7Re' qamaan sajikiih inrupinik pan taxaaj reht'al nare' jaruuj wo' chik insutinik reje. Re' mukur ruch'ihil i siq'jil tz'ikin, i nimlaj tz'ikin keht'al jaruuj kisutinik reje. Eh re' taq i hat nutinamiit Israel, xama' jaruuj wo' xawaaj taq animam i nuk'uhb'aal.
8Eh ¿Nik' wach noq inaq'or taq chi wilik ana'ojb'al chi k'achi' taq animam i nuk'uhb'aal? Xanaah re', re' taqe i k'amal taq ab'eeh xijalwik wach rutz'ihb'jiik, re' chik i chukuj q'orik xkikoj.9Re' taqe i aj na'ojb'al re' re', naa ruchaliik kik'ixiik naa ruchaliik kiyo'jiik. Eh ¿Nik' wach noq inkiq'or chi wilik kina'ojb'al eh ma' imponik ta panaq'kiwach i nuk'uhb'aal?10Ruum aj re', re' hin naa nuye'em q'ab' chi re' chik taqe i aj ixowaal naa ruchopwiik naah i kehk'een, i kak'aal, ruum chi nimaq chi kok' taq xa re' i tumiin inkikapaaj, re' inkireq ruuk' i leq'. Eh chu'nchel i leq' ruuk' inki a'n chi je' taqe k'amal b'eeh aj tiij chi je' taqe jalal naq nuq'oral.11Eh inkijot'isaj wach i ruti'kiil kik'ux i nutinamiit inki a'n kiib', inkiq'or chi wilik suq kiil k'uxliis, xanaah re' xama' xta wo' suq kiil k'uxliis.12Re' keh i ruk'ul naq chi nchalik kik'ixiik ruum i ch'uwa' wach na'ojb'al inki a'n re' re'. Xa re' la' re' keh xama' xta wo' inkaaj reh, ma' keht'al ta wach i k'ixik. Ruum aj re' noq naa taqe nuye'em chutojariik i kimahk i tokoom naa kib'aniik i ti' k'axik keh.
13Re' hin naa nusacham wach i nutinamiit, naa kikahniik chi je' rukab', i uuva, ma' wachinik taj, i higo ma' wachinik taj, xa chiqiij chik i xaq, re' naq i chib'ih i nuye'em keh naa wesam chikiwach, inki.
14Eh re' taqe tinamit je' wili i naa kiq'orom: ¿Chib'ih kamaj chi naa qakahniik ayu' chi ruyub'jiik i qakimiik? Taq taq chupaam i tinamit kotimaj kiij chi tz'aq neerub'an chi ar nee qoh kimik. Ruum re' i QaJaaw Dios naakooj rukansam, je' naa ruye'em qeh chi uuk'jik i ha' inkansanik ruum ma' k'isiin i mahk xqa a'n chuwach.15Re' hoj k'ahchi' naq quy-eem i suq kiil k'uxliis, xama' xta wo' i suq kiil k'uxliis k'achi' qilom. K'ahchi' naq quy-eem chi naa qakoowjiik qayo'jiik chik inchalik.16Eh re' taqe i aj ixowaal i nib'irjik chik ar Dan i choqik i rub'an i kikawayu, noq kipisk'anik pankooq xan k'uyu'jik chik chu'nchel aak'al. Eh xchalik kisach wach i tinamit, je' wo' hoq chib'ih i wilkeeb' chupaam, je' wo' chu'nchel i patineel chupaam, inko'q taqe.
17Eh re' QaJaaw Dios je' wili i xuq'or keh: Re' hin naa nutaq'aam taq cho cha naah taqe i aj ixowaal je' kikab' i josq'laj aaq'. Naa taq kaat kikansam ma' xta chik taq naa ako'leem wii' awiib' chikiwach, inki. Re' ruti'kiil ruk'ux i Jeremías chi riij i rutinamiit18Re' ruti'kiil nuk'ux xama' xta chik neenik'ik wii' xan yot'ik chik i wánima.19Ruum re' i nutinamiit xak'erik chik kichii', i nib'irjik chupaam taqe i tinamit je' wili inkiq'or: ¿Mi ma' xta chik ar Sión re' i QaJaaw Dios? ¿Chib'ih reet noq ma' qohrutoob'eej chik i qa reey? inki taqe. Re' i QaJaaw Dios je' wili i xuq'or: ¿Chib'ih reet noq xajosaj taq chee nujosq'iil ruum i kilooq'jiik taqe i tiyoox, xama' xta kiokik wii'? inki.
20Xik'ik chik i siq'jil xkuxik chik i rumolariik i kiwach i tik. Eh re' hoj xama' qoh ko'ljik ta wo' hoq.21Re' hin q'e' intiib'ik nuk'ux chi riij i ti' k'axik k'ahchi' kik'ulum i nutinamiit. Q'e' tz'irik nuwach, eh inchalik nuyo'jiik i rub'an.22¿Mi ma' awach re' ineenkan Galaad nee risaj i ti' k'axik chinaah i nutinamiit? ¿Mi ma' awach re' i neerub'an rehtesjiik i ti' k'axik? ¿Chib'ih reet noq ma' nkian ta riq'oomjiik i nutinamiit?1Re' hin inwaaj naq chi re' i riis naq'nuwach je' rukab' i raasb'al ha' ma' jaruuj inchiqik. Chi je' re' ma' jaruuj naq neenk'uhlik atoob' ta nee naq inwoq'ej chi q'iij chi aq'ab' i kikimiik i nutinamiit.2Re' hin inwaaj naq rojiik nuyejaam nuperpaat pan chiq yuuq', reh naq chi neenukanaa' kahnoq i nutinamiit, eh ma' nee ta naq chik inwilow kiwach. Ruum re' keh xkian i je' k'oyomal, eh aj chukul q'orik taqe.3Eh re' kaaq' xanyub' chik chi chukuj q'orik xa je' chik rukab' noq inyub' i kutb'al reh i flecha. Ma' awach ta chik i korik inq'orik, q'e' yiib' wach kib'anik, ruum i re' je' wili i ruq'or QaJaaw Dios: Re' tinamit wili ma' kinkinimaj ta chik.
4Eh ma' awach taj i nee ruq'or chi korik inq'orik i ramigo. Ma' awach ta wo' i nee ruq'or chi korik inq'orik i ras oon ruchaaq' ruum re' keh k'ul inkijot' kiib' chikiwach. Eh k'ul inkikoj kimahk chikiwach.5Xak'ul inkelq'aaj i kamigo ma' inkiq'or taj i korik, kitijem chik i kaaq' chi chukuj q'orik, ma' xkaaj ta chik nimanik.
6Xa re' i leq', xa re' jot'oj inki a'n ma' kimponik ta k'isinoq panaq'kiwach i ma' kinkaaj ta chik kiin kinimam, inki QaJaaw Dios.7Ruum aj re' je' wo' chik wili i xuq'or: Re' hin naa nuye'em panti' k'axik je' naa wik'sam taqe pan q'aaq' ilb'al reh chib'ih pa' i neenkian, je' re' i naa nub'anam kuuk' i nutinamiit.8Re' kaaq' xa je' chik rukab' i q'aslaj ch'ihch', xa re' i chukuj q'orik i nelik cho pan kichii'. Pan suq kiil tii chik inkiq'oreej i kas kichaaq' inki a'n kiib', xa re' la' pankanima kiyejaam cho wach chib'ih i naa kianam reh.9¿Mi ma' naa nuye'em taqe chutojariik re' i kimahk? ¿Mi ma' ruk'ul re' chi nee taqe nuyeew chutojariik i kimahk i tinamit re' re' je' rukab' i ruk'ul chi keh? inki i QaJaaw i Dios.
10Re' hin naa nuye'em q'ab' chi naakik'erem kichii' chinaah taqe i yuuq' noq naakilom chi k'ahtinaq chik taqe i ch'ahn chupaam i kiye'aab'. Eh naa rutib'iik kik'ux ruum ma' naa ta chik rib'irjiik i koq'iim taqe i wakax, ma' naa ta chik kiwihiik ar taqe i chikop wilik kixiik', taqe i panch'ahn chikop. Chu'nchel naakimolom chi elik.
11Re' hin naa nuch'ahaam wach ak'al i tinamit Jerusaleem naa nukanaam chi kiye'aab' k'ichi'ahq. Eh naa nusacham wach i tinamit Judá, naa nukanaam chi ma' jino'q chik i patineel chupaam. Re' i rusachariik kiwach re' i kik'amariik reje pan tokoom tinamit
12¿Awach i wilik runa'ojb'al nee rureq chi riij i naa ruk'ulariik wili? ¿Mi wilik jino'q i raj kamanoom i Dios neeruch'ob' rub'ehel? ¿Chib'ih reet noq naa rukahniik chi ma' xta chik i wilik chupaam i qatinamiit, eh naa rukahniik chi je' rukab' i chiq yuuq', eh ma' awach ta chik i naa rik'iik ar?
13Re' i QaJaaw Dios je' wili i xuq'or: Re' nutinamiit je' re' inakik'ulum, ruum xkiq'eb' chi riij kik'ux taqe i nuk'uhb'aal, ma' inkik'am ta naah i nuq'or keh.14Ruum i rukowiil i kinaah ma' xkikanaa'ta rulooq'jiik taqe i tiyoox xankiyeew chik kik'ux chub'aan, je' rukab' i xitijik kahnoq wii' kuum i kimaam kati't.15Ruum aj re', re' hin i Dios wilik wajaawriik, hin ki Dios i aj Israel, je' wili xnuq'or: Re' hin naa nuye'em i ti' k'axik chikinaah, je' naa k'ah laj wi'k i naa nuye'em keh, je' na naa nuye'em keh chi uuk'jik i ha' inkansanik.16Re' hin naa nutukem kiwach chupaam i tokoom tinamit ni xata re' keh ni xata re' i kimaam kati't xinab'inik reh. Eh naa nuye'em q'ab' chi naa kitahqaljiik reje ruuk' i q'aslaj ch'ihch' korehtaal insacharik kiwach chi kunchelaal, inki.
17Re' QaJaaw Dios nim rajaawriik, je' wili xuq'or weh: Yu'naak cha taq'aaj kik'amarik ixoq xa re' oq'ik inkaaj, eh xa re' re' kikamaj, inki.18Re' hin je' wili xnuq'or: ma' xta reet kichaloq chi jumehq'iil, k'oloq kian koq'iim chiqiij i hoj ruum i ti' k'axik k'achi' qak'ulum. Re' hoj nee wo' i nujik chi ha' paam inaq'qawach, nee nb'ulinik chaloq i ha' pariij naq'qawach.19Eh k'achi' qib'iram noq re' taqe i aj Sión k'erik kichii' chi oq'ik je' wili inkiq'or: Q'e' wo' chik ti' i k'ahchi' qak'ulum, xsahchik wach i chib'ih qeh ma' k'isiin ta k'ixb'ilaal chi qeh, naa qakanaam i qatinamiit, re' i qapaat xsacharik chik wach, inki taqe.20Re' hin je' wili xnuq'or: Hat taq ixoq chab'iraj taq i ruq'oral i QaJaaw, xti chab'iraj taq chib'ih i ruq'or. Eh cha k'uhtaaj taq keh awixq'uun i awamigo oq'ik inki a'n ixoq, cha q'or taq keh chib'ih naa kianam noq ti' kik'ux, je' wili taq cha q'or keh:21Re' hoj k'ahchi' chik rukimiik awach qeh panqapaat, wilik i ha'lak'un k'ahchi' kikansam pantaq b'eeh, re' taqe i k'ijolaq k'achi' kikanteesjiik pantaq k'aayb'al, tiko'q keh.22Re' kiti'jolal taqe i winaq naa rukahniik chi tuch'ulkeeb' pantaq b'eeh, xa je' chik rukab' i rusaa' chikop pantaq ab'iix. Je' rukab' i wach i trigo wilik pariij inq'eb'arik kahnoq ruum i sik'il reh, eh ma' awach ta chik i molwik reh. Re' i runa'ojb'al i Dios inchol ruye'em ruloq'il i winaq23Re' Dios je' wili ruq'or: Re' wilik runa'ojb'al ma' runimb'isaj riib' ruuk' i runa'ojb'al. Eh re' wilik rajaawriik ma' runimb'isaj riib' ruuk' i rajaawriik. Re' i b'ehoom ma' runimb'isaj riib' ruuk' i rub'ehomal.24Wila' awach iraaj runib'isam riib' chunimb'isaj riib' ruuk' i runaab'jiik nuwach i hin, re' i runaab'jiik chi re' hin i raJaaw i ruDios. Eh chi hin aj keteloom wachiis, eh chi re' i rukorkiil re' rub'ehel i nub'an wach ak'al, re' taqe i re' imponik chi nuwach i hin, inki i Dios.
25Eh je' wo' chik wili i xuq'or: Re' hin naa ruponiik i q'iij chi naa taqe nuye'em chutojariik i kimahk, i poch'ooj i rutz'uhmal naah i kik'achab', je' wo' taqe i ma' b'anooj ta keh i re'.26Eh re' taqe i aj Egipto, i aj Judá, i aj Amón, i aj Edom, i aj Moab, eh chu'nchel i patim taqe panchiq yuuq', ma' kiq'asam ta kiib' weh chi korik. Ruum chu'nchel i tinamit, je' wo' taqe i tinamit Israel xti kiq'asam kiib' chulooq'jiik taqe i tiyoox, inki Dios. Re' rulooq'jiik i k'achlik Dios, eh re' kilooq'jiik i xatz'aqoj tiyoox
1Re' taq i hat aj Israel chab'iraj taq aha' wilik i ruq'or taq aweh i QaJaaw Dios.2Re' reh je' wili i xuq'or:
Maa tijej taq aweh inki a'n i tokoom tinamit, maayohb'isaj taq awiib' ruum i ehtalil i ruk'uhtaaj cho riib' pan taxaaj. Je' rukab' inkik'ul taqe i tinamit re' re'.3Re' inki a'n i tinamit re' re' ma' xta tz'aaq, inkiyok' i chee' inkiyeew reh i aj sehk. Re' reh insehkanik wach ruuk' i ruch'ihch' i rukorb'isaj chi tiyoox.4Re' keh inkixoyej ruuk' oro, ruuk' plata, eh inkikoj rukalawuxiil inkich'ey qohoq chi tuhyb'al reh, re' inkaaj chi ma' q'ehb'ik taj.5Re' i kitiyoox xa je' rukab' i pooy cha'jalb'al reh tik. Eh xama' kiq'orik ta wo' hoq, eh ma' kib'ehik taj, kopantehl kiooj. Re' taq i hat matyo'jik taq kuum taqe re' ruum xama' xta wo' neenkian, ni xata re' i ma' holohik taj, ni xata re' i holohik inki a'n rub'aan inki.
6QaJaaw Dios xti korik wo' hoq noq ma' xta chik jino'q Dios chi je' rukab' i hat. Ruum re' hat xiik' naah nimaal awach, ehxiik'naah i rajaawriik ab'ihnaal.7QaJaaw Dios Reey chikinaah chu'nchel i tinamit, i ruk'ul chi chu'nchel naakiyohliniik awach. Ruum xa re' wo' hat wilik runimaal awach chikiwach taqe i reey, chikiwach i wilik kina'ojb'al, ma' awach ta jino'q i nee rureq chi je' rukab' i hat.8Chu'nchel i kiloq'inik reh taqe tiyoox, meem taqe, ruum inkipahqaaj kina'ojb'al reh i xa chee'.9Eh ar Tarsis inkik'am chaloq i plata, ar Ufaz inkik'am chaloq i oro. Ruuk' i re' i ruyejaa' i kitiyoox i aj ch'eyool, eh inkitiq'aa' ruuk' i raxmuqik laj itz'ihy, ruuk' i kaq laj itz'ihy. Re' taqe itz'ihy re' re', xti kichol keem kiyej-anik reh.10Eh re' i QaJaaw reh xti korik laj Dios, eh k'achlik Dios re' wilik chi Reyil chi juneliik, noq inchalik rujosq'iil xan b'arb'otik chik chu'nchel i wach ak'al chuwach, eh re' taqe i tinamit ma' inkikuy taj i rujosq'iil.
11Eh re' taq i hat i aj Israel cha q'or taq keh i kiloq'inik reh taqe i tiyoox. Re' i ki dios ma' re' tee keh xiyej-anik reh i taxaaj i wach ak'al, naa rusahchiik kiwach chi jumpech.
12Re' QaJaaw Dios ruuk' i rajaawriik xuyejaa' i wach ak'al, eh ruuk' i runa'ojb'al xuyeew taqe paruye'aab' i wilkeeb' chupaam, eh xuhe' wach i taxaaj paruye'aab'.13Eh noq inq'orik inkitik'aa' cho choqik i suutz' kiye'wik chee jab' pan taxaaj. Eh ruuk' ruq'oral i ruksaj taqe chaloq i suutz' chi junsut i wach ak'al, i ruyeew taqe chaloq i ruch'aab' i kahoq noq k'ahchi' jab'. Eh i resaj chaloq i teew aha' molik wii'.14Eh re' i tinamit ma' xta kina'ojb'al ma' nkik'am ta naah i na'ojb'al i ruyeew i Dios. Eh inki a'n i k'ixb'ilaal chi b'anarik, inkiyejaa' taqe kitiyoox inkixuk'aa' kiib' chuwach xama' xta wo' kajaawriik, eh ma' k'achalkeeb' ta wo' hoq.15Xa je' taqe k'o'naal, ma' xta kitz'aaq, junsachariik kiwach naa rub'aan ruuk' i kiyej-anik reh na' chub'aan i q'ataj q'orik i QaJaaw Dios.16Eh re' ruDios i Jacob, ma' je' ta kikab' taqe i tiyoox re' re', ruum re' reh tz'uhk'risanik reh chu'nchel. Eh re' reh xsik'wik cho kiwach i aj Israel chi rutinamiit, eh Dios nim rajaawriik i rub'ihnaal. Re' ruq'orariik chi naa rusachariik wach i tinamit Judá17Yu'naak taq i hat chamol wach i chib'ih taq aweh, ruum naa taq ak'amariik reje pan tokoom tinamit18Ruum re' i QaJaaw Dios je' wili i xuq'or: Yu'naak naa wesam taqe reje ayu' i tinamit wili, naa nuye'em taqe panti' k'axik, chi je' re' nee oon chee kinkisik' ruka'peech, inki.
19Re' tinamit je' wili i xuq'or: Yohb'aal inche wach i ti' k'axik naa ruchaliik chi qanaah ma' awach ta chik naa resaniik reh. Re' hoj xqakapaaj naq chi naa qakuyum raansil taqe i re'.20Re' itz'ihy naah paat inqamol wii' qiib' naa ruyojib'iik naakik'upib'iik taqe i ruk'ahamal. Naakojiik taqe i tinamit ma' awach ta chik naa rukorb'isaniik i qa itz'ihy naah paat.
21Re' taqe i k'amal kib'eeh tinamit min min taqe chub'anariik inkaaj i keh, ma' inkisik' taj i Dios, ruum aj re' ma' kielik ta korik, chu'nchel i kitinamiit xkitukej kiib'.
22Eh k'ahchi' chik rib'iirjiik chi xa kichoqik chik xi k'uloq i aj ixowaal chupaam i tinamit wilik pantz'eet reh i rookb'aal i q'iij, chi rusachariik wach i tinamit Judá. Eh naa kikanaam chi ma' xta chik i wilik chupaam, naa kikanaam chi kiye'aab' i k'ichi'ahq, inki.
23QaJaaw Dios re' hoj qeht'al noq re' winaq ma' ehchan ta reh i ruk'achariik chi rib'il riib'. Eh ma' re' tee reh naa ruq'oriik chib'ih jariik i naa ruchaliik chinaah.24Jaaw Dios xaruk'ul ta naq i ti' k'axik nee nayeew cho chi qanaah kojb'al qana'ojb'al. Mayeew tii chaloq chu'nchel aajosq'iil chi qanaah reh chi ma' nee ta nasach qawach.
25Chikinaah la' i tinamit ma' nkiyeew ta awajaawriik, chayeew aajosq'iil. Eh chinaah i ma' inkiq'or ta wib'iraal chayeew. Ruum re' keh xkisach chik wach i tinamit re' taqe i riih rumaam i Jacob xkisach chik wach chi jumpech i tinamit, inki taqe. Re' tinamit ma' xkian taj i ruq'or i k'uhb'aal
1Re' QaJaaw Dios xq'orik wuuk' i hin Jeremías, je' wili i xuq'or weh:2Re' hat cha q'or keh i aj Israel chi kib'iraj chi korik i k'uhb'aal nuyejaam cho wach. Chaq'or wo' keh i aj Judá, i aj Jerusaleem.3Chaq'or keh chi re' hin i Dios, ki Dios i aj Israel kinq'orik reh chi naa ruye'ariik pantojb'al mahk i ma' runimaj taj i ruq'or i k'uhb'aal nuyejaam cho wach.4Re' k'uhb'aal wili nuyejaam cho wach kuuk' i kimaam kati't noq xwesaj taqe chaloq Egipto. Re' i tinamit, je' naq jinaj horna inkihaab'isaj wii' i ch'ihch' chi keh. Re' hin je' wili i xnuq'or keh: Kinanimaj taq cha a'n taq i nuq'or taq aweh, reh chi nee taq ti kahnik chi nutinamiit, eh re' hin nee kinkahnik taq chi hin aaDios.5Eh wila' xanimaj taq i nuq'or taq aweh. Re' hin nee wo' nuyeew taq aweh i ye'aab', eh xnuq'or wo' cho keh xti korik taq aamaam awati't chi naa nuye'em taq aweh, re' i ye'aab' i nelik wii' i suq atoob' re' wilkaat taq wii' yu'naak, inki.
Eh re' hin je' wili ruchaq'weesjiik xnub'an: ma' xta reet Jaaw, kinki reh.
6Je' wo' chik wili i xuq'or weh i QaJaaw: Re' hat cha q'or rib'iral aha' wilik i xnuq'or aweh, chupaam i tinamit Judá, je' wo' pantaq xilak b'eeh Jerusaleem, je' wili i cha q'or keh i tinamit: Chab'iraj taq nik' wach noq wilik i k'uhb'aal korjinaq cho wach, eh cha a'n taq aha' wilik i ruq'or, tiko'q keh.7Noq xwesaj taqe chaloq Egipto i aamaam awati't xnuq'or wo' naq keh chi kinimaj aha' wilik xnuq'or keh, Xa re' wo' chupaam taqe i q'iij re' re' nutoq'aam cho ruq'orariik, eh yu'naak xa kok'achi' wo' nuq'orom taq aweh i hat chi tinimanoq taq.8Xa re' la' re' keh xama' xkinimaj ta wo' hoq i xnuq'or keh ni xata xkinimaj, ruum i rukowiil i kinaah. Xa ma' nkikanaa' ta wo' rub'an i yiib' wach na'ojb'al inchalik pankanima. Ma' xkaaj ta kianam taqe i xnuq'or keh i hin, ruum i re' xnuyeew q'ab' chi xchalik chikinaah i ti' k'axik nuq'orom cho chupaam i k'uhb'aal nuyejaam wach kuuk', tiko'q keh, inki weh Dios.
9Eh je' wo' chik wili i xuq'or weh: Re' taqe i tinamit wilkeeb' Judá, ruch'ihil taqe wilkeeb' Jerusaleem, wilik i ma' holohik taj k'ahchi' kianam chi nuwach.10Re' keh k'ahchi' wo' kianam i mahk je' rukab' i xkian i kimaam kati't re' taqe i ma' xkaaj ta nunimjiik, re' chik taqe i tiyoox xkiloq'ej. Chi je' taqe aj Jerusaleem, chi je' taqe aj Judá ma' xkaaj ta kianam i ruq'or i nuk'uhb'aal nuyejaam wach kuuk' i kimaam kati't.11Ruum aj re', re' hin naa nutaq'aam chaloq i runimaal ti' k'axik chikinaah, ma' naa ta rik'iik chikiij. Atoob' ta neenkik'er kichii' chupahqaljiik chi naa taqe nutob'eem re' hin xama' naa ta wo' nutoob'eem taqe.12Eh noq naakilom chi je' re' taqe i aj Judá, ruch'ihil taqe i aj Jerusaleem naa rojiik kipahqaam kitoob'jiik keh taqe i tiyoox, re' taqe inkik'at i insensia chuwach. Xa re' la' ma' naa ta wo' kiko'ljiik kuum taqe i re' na' k'oloq i runimaal ti' k'axik chikinaah.13Ruum re' taqe i aj Judá ju'jun kitiyoox wilik chupaam i ju'jun seht chi tinamit. Eh re' taqe i aj Jerusaleem rajlaal pantaq q'ab' b'eeh xkiyejaa' i ki altaar, reh chi nkik'at i insensia chuwach i tiyoox Baal.
14Je' re' noq re' hat Jeremías maa a'n chik atiij chikiij i tinamit wili maa pahqaaj weh chi nee taqe nutob'eej. Ruum re' hin xama' naa ta wo' nutoob'eem taqe noq naa kipahqaam kitoob'jiik weh noq naa kiwihiik pa runimaal ti' k'axik.
15¿Chib'ih chik inkisik' panupaat i nutinamiit Israel? Xanaah re' yohb'aal wach yib'kiil wach xib'anik chaloq. ¿Mi inkikapaaj re' keh, chi xa ruum chi neen kiyeew i q'ina' i tiwik chi k'atoj mayiij chi nuwach neenik'ik chikiij i runimaal ti' k'axik?16Pampeet, re' hin Dios i nukoj naq taqe i nutinamiit re' re' chi je' kikab' i ruche'el i olivo q'e' inwachinik xa holohik chik. Xa re' la' yu'naak naa nusacham kiwach i nutinamiit, naa nub'anam keh je' rukab' imb'aan reh i olivo noq ink'atarik i xaq ruuk' q'aaq', eh noq injehaarik i q'ab'.
17Pampeet re' hin Dios wilik wajaawriik chikinaah chu'nchel, xinch'ikanik keh chi nutinamiit taqe. Eh yu'naak re' wo' chik i hin xin ye'janik wach i runimaal ti' k'axik naakik'ulum, ruum i yiib' wach na'ojb'al xkian i aj Judá, i aj Jerusaleem. Re' hin xin kiq'etwachej ruum xkik'at i insensia chuwach i tiyoox Baal, inki Dios. Re' taqe i xi-ixowanik wach i Jeremías xkaaj naq kikansam
18Re' i QaJaaw Dios xye'wik weh chi naab'jik chi re' taqe i ki-ixowanik nuwach wilik i ma' holohik taj k'achi' kiyejaam wach chi wiij je' re' noq xnunab'eej.19Eh re' hin suq naq nuk'ux ma' xta naq i nukapaaj, je' rukab' i rak'uun tentzun noq ink'amarik reje pankanteesb'al. Eh ma' weht'al ta naq chi k'achi' kiyejaam wach nukanteesjiik kore' chik imb'iraj chi je' wili i xkiq'or: Yu'naak qasach wach chi jumpech, je' rukab' noq inyok'arik i chee' kosuq i k'ihik i rub'an reh chi ma' nee ta chik inq'orarik rib'iral chinaah i wach ak'al wili, inki taqe.
20Eh re' hat QaJaaw Dios wilik awajaawriik, korik wach ak'ux chi q'ataj q'orik. Eh aweht'al i wilik cho pankikapeb'aal pankanima i tinamit. Re' hin inwaaj naq chi nee nak'uhtaaj weh chi nee taqe nayeew chi tojariik i kimahk ruum re' hin panaq'ab' taqe nukanaa'.
21Re' tinamit wilkeeb' cho Anatot k'ahchi' naq kisik'im chi riij nik' wach nukanteesjiik nakianam, re' taqe i ximinwik naq weh chupaam chi ma' naa ta chik nuq'orom awib'iral i hat QaJaaw Dios, ruum naq i re' xinkaaj kinkikansam, inki.22Xa re' la' je' wili i xq'orarik keh ruum i QaJaaw Dios nim rajaawriik: Yu'naak taq i hat naa taq kaat nuye'em chutojariik amahk, re' taq ak'ijolaq ruuk' q'aslaj ch'ihch' naa kikimiik panq'aq'inik. Eh re' taqe awak'uun awixq'uun naakikimiik ruum wi'jaleel.23Eh ma' jino'q taq chik aweh i naa kikahniik chi k'achalkeeb' ruum naa nuk'amam chaloq i runimaal ti' k'axik cha naah taq i hat, hat taq aj Anatot. Re' noq naa taq kaat nuye'em chutojariik taq amahk, inki. Re' i Jeremías xuq'oreej i Dios1QaJaaw Dios korik wach ak'ux, xama' xta nkih chi nee tinuwech'uj. Xa re' la' re' hin wilik i ma' suq ta inwilow, i ruk'ul chi naa nupahqaam aweh. ¿Chib'ih reet noq chu'nchel i nelik korik chikiwach i yiib' wach kina'ojb'al? ¿Chib'ih reet noq suq i wilkeeb' i tokoom chik inkinimaj?2Re' hat ti ye'wik keh wach ak'al kikoowjik, ink'ihaaxb'ik i chib'ih keh, kib'ehomrik. Eh inkit'iosej tii chik aweh, inki a'n kiib' xa re' la' xa chi kichii' eh pankanima xama' tikikapaaj ta wo' k'isinoq.3Eh Jaaw re' hat aweht'al nik' wach noq wilkiin, eh inawilow i wánima. Eh re' taqe i yiib' wach kina'ojb'al re' re' chakoj kehtaal reh chi nee taqe nayeew panti' k'axik noq nee rureq i ruq'ijil. Cha a'n kuuk' je' rukab' noq kik'amarik reje tentzun pankanteesb'al.4Eh ¿Nik' chik najtiil naa rub'anam chi xa je' chiq yuuq' i qa ye'aab'? Re' taqe i ch'ahn kuxik chik ruchiqiik wataq yuuq' k'ixkaab'. Re' taqe i chikop, re' taqe i tz'ikin k'ahchi' kikimik, ruum i yiib' wach na'ojb'al inki a'n taqe i k'achareel, je' wili inkiq'or: Re' Dios ma' rilow taj chib'ih inqa a'n, inki taqe.
5Re' QaJaaw Dios je' wili nuchaq'weesjiik xub'an: Wila' re' hat xat q'uhtik chupajariik awiib' kuuk' xa chi kooq kib'ehik, ¿Nik' wach noq neenukuy rupajariik awiib' kuuk' i rij kawáyu wilkeeb'? Eh wila' inchalik ruti'kiil ak'ux chupaam i ye'aab' ma' xta yohb'aal chupaam. ¿Chib'ih i naa a'nam chupaam i raxchee' wilik ar Jordán?6Eh re' taqe aawas, oon achaaq' chu'nchel i awach aweh xi sutinik wo' chi ixowan awach. Re' keh inkik'er kichii' chab'ajariik rij anaah, ruum aj re' maach'ikaa' ak'ux kuuk' atoob' ta xasuq chik neetikiq'oreej.
7Re' hin xnukanaa' chik chi rutkeel i nutinamiit, xnuq'eb' chik chi riij nuk'ux re' i hin naq kinehchanik reh. Eh xnuq'asaj chik taqe pan kiq'ab' i aj ixowaal re' naq taqe q'e' nuk'ax.8Re' taqe i tinamit re' re' je' chik kikab' i josq'laj kaq b'ahlam wilkeeb' cho paraxchee' chi weh, xankiqirich'eej chik naah ikehchi nunaah, ruum aj re' xnuq'eb' taqe chi riij nuk'ux.9Re' taqe i nutinamiit naq naa nusacham kiwach naa nutaq'aam taqe chaloq i k'uch, i josq'laj chikop wilkeeb' pantaq rax chee' naa ruk'uliik k'uxaroq i kiti'jolal.10Eh ma' kisiin taqe i k'amal b'eeh, taqe i aj ixowaal xkisach wach i nutinamiit je' naq nu uuva noq wilkeeb'. Xkich'uwareej paam, xkikanaa' chi xa je' chik chiq yuuq' intz'irik paam, i nuye'aab' q'e' nuk'ax.11Eh xkikanaa' i nutinamiit chi xa je' chik chiq yuuq' xan tz'irik chik paam. Eh xb'iraj oq'ik inki a'n ruum chu'nchel i tinamit ma' xta chik i wilik chupaam. Ma' awach taj i ruchop ruk'ux chi neenkorjik.12Eh chinaah taqe i rub'ohl i yuuq k'ulik chik inki a'n iloq taqe i aj ixowaal yohb'aal wach i kijosq'iil. Je' re' noq re' hin je' naa ruuk' ch'ihch' k'ul q'as naa nusacham kiwach i tinamit ma' awach ta chik i naa rureqem rusuqkiil ruk'ux.13Eh noq naa kitikim i trigo k'iix chik i naruwachum chu'nchel i kamanik naa kianam narojiik chi re' chi ma' re', ma' xtaj i wach i kitik naakimolom, inki Dios.
14Re' QaJaaw Dios je' wili i xuq'or chikiij i yiib' wach i kina'ojb'al, re' wilkeeb' chuka'jaah i Israel, re' taqe i xisachwik wach i ye'aab' i xnuyeew chi kikooch i nutinamiit Israel: Re' hin naa wesam taqe pan kitinamiit eh naa wesam taqe chaloq i aj Judá pankixilak.15Xa re' la' noq wesam chik taqe chaloq pan kitinamiit naa wo' chik nuketelaam kiwach, naa wo' chik nuye'em q'ab' chi naa kisutiniik reje pan kiye'aab' eh pan kitinamiit16Xti korik noq re' keh xik'uhtanik reh i nutinamiit chi parub'ihnaal chik i Baal inkiq'or i korik. Eh yu'naak nee wo' rub'an chi nee taqe nuk'ul chi kixilak i nutinamiit, xa re' la' mix ti korik keh chi neenkik'ulaa' nunimjiik je' rukab' inki a'n i nutinamiit, panub'ihnaal chik i hin neenkiq'or i korik.17Eh re' taqe i tinamit ma' naa ta kinimaniik weh chi jumpech, naa nusacham kiwach, ma' xta chik kehtalil naa nukanaam, inki, QaJaaw Dios. Re' jalwaach q'orik chi riij i nim rooq itz'ihy b'ak'b'al pamis
1Re' QaJaaw Dios je' wili xuq'or weh: Yu'naak Jeremías chaloq' jino'q i nim rooq itz'ihy b'ak'b'al pamis, re' ruuk' i lino chab'ak' reje panayejaal xa re' la' mat'aqsaj ruuk' ha', inki.2Eh re' hin xnuloq' wo' hoq i nim rooq itz'ihy, je' rukab' i xuq'or weh QaJaaw, eh xnub'ak' wo' panuyejaal.3Chi riij i re' xiruq'o'reej wo' chik chaloq i QaJaaw Dios je' wili i xuq'or weh:4Yu'naak chak'am reje i nim rooq itz'ihy xaloq' chab'ak' panayejaal, hiy chi chii' i nim ha' Éufrates chakeb'aa' ar chupaam ruhopil ab'aj, inki.5Eh re' hin xinooj wo' hoq chi chii' i nim ha' Éufrates, xnukeb'aa' wo' hoq nim rooq itz'ihy chupaam ab'aj je' rukab' i xuq'or weh i QaJaaw.
6Eh noq k'ih laj q'iij chik ruponiik nukeb'aam je' wo' chik wili i xuq'or weh i QaJaaw Dios: Yu'naak hiy wo' chik chi chii' i nim ha' Éufrates chak'am wo' chik chaloq i nim rooq itz'ihy re' i xnuq'or aweh chi xponik i keb'aa' ar, inki.7Eh re' i hin, xinooj wo' chik chi chii' i nim ha' Éufrates xtohq'ik nusik'im panak'al i nim rooq itz'ihy, eh xnureq wo' hoq xwisaj chaloq aha' naq nukeb'aam wii' xa re' la' q'ahinaq chik xama' xta chik kamaj.
8Chi riij i re' je' wo' chik wili i xuq'or cho weh i QaJaaw Dios:9Je' aj re' naa kikahniik i aj Judá ruch'ihil taqe i aj Jerusaleem noq naa wesam i runimaal kiwach.10Re' i tinamit re' re' yiib' wach kina'ojb'al ma' xkian taj i xnuq'or keh. Eh ruum i rukowiil i kinaah xama' xkikanaa' ta wo' rub'aan i yiib' wach na'ojb'al wilik pankanima. Re' chik taqe i tiyoox xkinimaj, xkiloq'ej, re' keh naa kikahniik chi je' kikab' i nim rooq itz'ihy re' re' b'ak'b'al pamis xama' xta chik kamaj.11Nik' wach noq i rujit' i paam i winaq ruuk' i nim rooq itz'ihy, je' wo' naq re' noq xnuchop taqe i aj Judá i hin, i aj Israel, reh naq chi naa nakiwihiik wuuk'. Re' naq xwaaj i hin chi naa kikahniik chi manlik nutinamiit. Reh naq chi naa kiye'em chi naab'jik i nub'ihnaal, ye'b'al nuloq'il, chi naa kiye'em runimaal nuwach. Xa re' la' re' keh xama' xinkinimaj ta wo' hoq, inki Dios. Re' jalwaach q'orik chi riij i ikom inkinujisaj chi ha'
12Eh je' wo' chik wili i xuq'or weh: Re' hat Jeremías naa aq'orom keh tinamit chi je' wili: Re' QaJaaw i qaDios i hoj, hoj aj Israel xuq'or chi chu'nchel kikoom naakinujiik chi riis uuva, inki, tiko'q keh. Re' taqe i aj Israel je' wili i naa kiq'orom aweh: Re' hoj xa qeht'al wo' hoq chi naa runujiik i qikoom chi riis uuva, inkoq taqe.13Eh re' hat je' wili i cha q'or keh: Re' QaJaaw je' wili xuq'or: Re' ikom naa runujiik chi riis uuva rujal wach i ti' k'axik je' naa nuxohk'risam taqe chu'nchel i patim chupaam i tinamit wili, chi je' taqe wilkeeb' chi reyil, je' rukab' noq xwihik chi reyil i David, chi je' taqe k'amal rub'eeh aj tiij, chi je' taqe jalal naq nuq'oral, eh chu'nchel i patim Jerusaleem.14Re' hin jumehq'iil naa nusacham kiwach je' rukab' noq impaxik i ak'al xaro k'ul inkiq'oj kiib' chi je' taqe ajaab'ees, chi je' taqe ak'uunb'ees elik wach naa nub'anam keh. Ma' naa ta nuketelaam kiwach junsachariik kiwach naa nub'anam, inki Dios tiko'q keh, inki. Re' aj Israel xq'orarik keh ruum i Dios chib'ih i xkik'ul15Hat taq aj Israel, re' QaJaaw Dios kok'achi' taq kaat ruq'oreem maa niimb'isaj taq awach chab'iraj taq chib'ih i ruq'or taq aweh.16Chayeew taq ruloq'il aaDios konee ruyeew riib' yu'naak komajaa' i ruyeew chaloq i je' runimaal q'equm, komajaa' ta nee inatoxk'iij taq aawooq chinaah taqe i je' najt kinaah yuuq' ti yo'joq kuum. Eh komajaa' wo' rusutej chi q'equm i saqum najtir intohq'ik taq awuy-eem.17Eh wii' ma' xata nimanik taq re' hin naawoq'iim chi ma' eht'alimaj ruum taq aja'wachiil ma' k'isiin i riis naq'nuwach naa reliik noq naawilom chi naa kik'amam reje pan tokoom tinamit i rutinamiit QaJaaw Dios.
18Re' hin je' wili i xuq'or weh i Dios: Yu'naak cha q'or reh i reey chi je' wili, je' wo' reh ixoq reey: Yu'naak xelik chik awajaawriik ti tz'uun qohoq wach ak'al. Ruum xelik chik aakorona wach anaah inye'wik naq runimaal awach, tiko'q reh.19Re' i tinamit Neguev kotimaj chik riij kuum i aj ixowaal ma' awach ta chik i neerub'an ik'ik ar. Eh chu'nchel i aj Judá xi k'amarik chik reje pankowlaj kamanik ar pan tokoom tinamit.20Re' taq i hat chawilow taq reje i aj ixowaal k'ulik inki a'n iloq pantz'eet reh i rookb'aal q'iij. ¿Aha' wilik i nutinamiit nuye'em taq aweh chi ilarik, re' naq taqe inye'wik taq aholwochiil?
21Eh ¿Chib'ih i naa aq'orom taq i hat aj Jerusaleem noq naa nuye'em q'ab' chi re' chik taqe i tinamit xatijej taq i hat naa kokiik chi ajaab'esil taq cha naah? Eh ma' k'isiin ta naa rutiib'iik taq ak'ux je' rukab' i ruti'kiil ixoq noq ink'ulik ruk'ux.22Re' taq i hat naa taq apahqaam chi je' wili: ¿Chib'ih reet inqak'ul chi je' wili? tiko'q taq. Re' hin i nuq'or chi ruum chi xiik' naah yib'kiil wach taq amahk naa taq kichopom anaah i aj ixowaal, eh naa kikanaam chi ma' xta taq wilik aweh.23Re' q'eq chikop ma' nee ta rub'an chi nee rusutej chi saq i riij, eh re' i nimlaj b'ahlam ma' nee ta rub'an chi neeresaj iloq i saq req'laq pariij. Je' wo' re' taq i hat ma' nee ta wo' taq i na a'n i holohik chi b'anarik, ruum hat taq chik okrinaq chub'aan i yiib' wach na'ojb'al.24Ruum aj re', re' hin naa nuye'em q'ab' chi k'ul taq naa atukem awiib' je' rukab' noq inkutarik reje wulu' i rutuus ixiim ruum i kowlaj teew inchalik panchiq yuuq'.25Re' taq i hat aj Israel je' taq re' naa ak'ulum, re' taq i re' xawaaj chi naa nub'anam taq aweh ruum xinsahchik taq panak'ux, kuuk' chik taqe i tiyoox xayeew taq ak'ux.26Je' re' noq re' hin naa nukanaam chi ma' xta chik wilik taq aweh naa nuye'em q'ab' chi naa taq ak'uhtaam ak'ixb'ilaal.27Re' hin xwilow chik i ch'uwarisanik wach aakaxáro taq i na a'n, eh i nak'er taq aachii' chi q'orik, chi xa re' i k'oyomal taq i na a'n. Eh xaloq'ej taq i tiyoox chinaah taqe i rub'ohl i yuuq'. Re' taq i hat aj Jerusaleem xiik' naah ti'kiil taq i naa ak'ulum ruum ma' jaruuj taq xakanaa' taqe i ch'uwa' wach na'ojb'al, inki Dios. Re' noq ma' xub'an ta chik i jab', eh chiqik i ch'ahn wach ak'al
1Ruum chi ma' rub'an ta chik i jab', re' i QaJaaw Dios je' wili xuq'or reh i Jeremías:
2Re' taqe i aj Judá xkikoj chik kiq'eq so' ruum xkahnik chi ntz'irik paam i kitinamiit. Eh xkipach'aa' kiib' wach ak'al i aj Jerusaleem xak'erik chik kichii' chi oq'ik, ruum ma' inkireq ta chik kihaa'.3Re' taqe i b'ehomaq inkitaq'aaj i kajpooh chi k'amaj ha' pantaq jul ha' xa re' la' xama' nkireq ta wo' chaloq. Eh kisutinik wo' chik chaloq ruuk' i kikoom chi ma' xta paam. Xa yo'jik chik inki a'n xankib'ur chik i kiwach ruum kik'ixiik.4Re' ak'al k'ahchi' rutarib'iik ruum ma' rub'an ta chik i jab' chupaam i qatinamiit. Re' taqe i aj ab'ixoom xama' nkireq ta chik chi riij chib'ih i nakianam, xankib'ur chik i kiwach ruum i ruti'kiil kik'ux.5Eh re' taqe ixoq keej kox-aasjik kak'uun inkiq'eb' kahnoq i kak'uun, ruum xkuxik ruchiqiik i ch'ahn inkik'ux.6Re' taqe i b'uurux wilkeeb' naah taq yuuq' xa chiqiij chik taqe ch'ahn chuwach, xa teew chik inkijihq'aaj, je' rukab' inki a'n i k'ichi'ahq. Xanchalik chik ruq'equmriik paam inaq'kiwach ruum ma' inkireq ta chik i ch'ahn inkik'ux, inki.
7Re' tinamit je' wili i xkiq'or: QaJaaw Dios, xti korik wo' chi xiik' naah i mahk xqa a'n chawach, eh ma' xat qanimaj ta chi korik. Xa re' la' inqapahqaaj otob'il aweh chi nee ta tii qoh atoob'eej ye'b'al ruloq'il ab'ihnaal.8Re' hoj, i hoj aj Israel xa awuuk' wo' hat inqach'ikaa' qak'ux, xa re' wo' hat ti ko'linik qeh panti' k'axik. Eh yu'naak ¿Chib'ih reet noq ma' nakapaaj ta chik qatoob'jiik, xa je' cho pan tokoom tinamit ti chalik xa je' akab' i xa ik'al b'eeh xa junwar i nik'ik rub'an i na a'n qeh?9Eh ¿Chib'ih reet noq ina' a'n awiib' i hat chi je' rukab' i winaq yo'jik i rub'an, eh chi je' rukab' soldado ma' nee ta rub'an i ko'linik? QaJaaw Dios re' hoj qeht'al chi wilkaat quuk', qoh atoob'eej tii qeh, mansahchik panak'ux chi chu'nchel kinab'inik reh chi hoj aatinamiit, inki taqe.
10Re' QaJaaw Dios je' wili i xuq'or chikiij i tinamit Israel: Re' tinamit re' re' xak'ul kiooj chub'aan i ma' holohik taj, ruum aj re' ma' mponik ta chi nuwach inki a'n Ruum aj re' yu'naak ink'ulik cho panuk'ux chu'nchel i kimahk, eh naa nuye'em taqe chutojariik, inki.
11Eh re' QaJaaw Dios je' wili xuq'or weh: Re' hat maa pahqaaj chik akuyb'al weh chi nee taqe nutob'eej i tinamit re' re'.12Eh atoob' ta neenkikuy kiwa' kihaa' chub'aan i kitiij, re' hin xama' nee ta wo' imb'iraj taqe, atoob' ta neenkiyeew i k'atoj chikop neen kiyeew i kimayiij chi nuwach xama' nee ta wo' imponik chi nuwach. Naa la' nusacham kiwach ruuk' q'aslaj ch'ihch' ruuk' wi'jaleel, ruuk' yab'ilaal, inki.
13Re' hin je' wili i xuq'or: QaJaaw Dios re' taqe i jalal aq'oral k'ahchi' kiq'orom reh i tinamit chi ma' naa ta kikimiik panq'aq'inik, chi ma' naa ta kikimiik ruum wi'jaleel. Eh chi re' hat naa aye'wiik keh i suq laj k'acharik chupaam i ye'aab' wili, kinki reh.
14Eh re' QaJaaw Dios je' wili i xuq'or weh: Re' taqe i jalal naq nuq'oral re' re' k'achi' kichukum i q'orik chi wiij. Re' taqe i re' ma' hin ta kintaaq'anik reje keh, ma' jank'al ta nuq'or keh chi naa kiq'orom i je' re', ma' jank'al ta nuq'oreej taqe. Eh ma' jank'al ta wo' ink'uhtjik chikiwach inkiq'or ruuk' jot'ooj, xama' xta ruk'am chaloq, inkiq'or rib'iral.15Re' hin i Dios je' wili nuq'or chikiij: Re' keh panub'ihnaal tii chik i hin kiq'orik inki a'n kiib'. Xa ma' hin ta wo' kintaaq'inik reje keh. Re' taqe i kiq'orik reh chi ma' naa ta ruwihiik q'aq'inik, chi ma' naa ta ruwihiik wi'jaleel chupaam i tinamit wili. Re' taqe re' naa kikimiik panq'aq'inik, eh naa kikimik ruum wi'jaleel.16Re' taqe i tinamit ki-ib'iriniik reh inkiq'or panq'aq'inik wo' naa kikimiik. Eh re' i kehk'een ruch'ihil taqe kak'uun kixq'uun, ruum wi'jaleel naa kikimiik. Re' i kiti'jolal naakikutariik xilak taq b'eeh ree tinamit Jerusaleem, ma' awach ta naa rumuq'aniik keh.
17Eh re' hat je' wili i cha q'or keh i tinamit:
Chi re' hin chi q'iij chi aq'ab' naa woq'iim ruum i runimaal ti' k'axik naakik'ulum i nutinamiit. Eh ruum chi xiik' naah ti'kiil naa kiwihiik.18Noq naaweliik pantaq ab'iix naawilom wach chi tuch'ulkeeb' ar i kiti'jolal taqe i naa kikimiik panq'aq'inik. Eh noq naawik'iik pan tinamit naawilom chi wilik i kimik inki a'n ruum wi'jaleel. Re' taqe i jalal naq nuq'oral taqe k'amal kib'eeh aj tiij k'ul kiooj pantaq tinamit, eh ma' inkireq ta chi riij chib'ih reet noq je' re' i k'ahchi' ruk'ulariik.
19Re' hin je' wili xnuq'or: QaJaaw Dios, ¿Mi xti xaq'eb' chi riij ak'ux re' i tinamit Judá? ¿Mix q'uhtik ak'ux re' chi rilariik aatinamiit Sión? ¿Chib'ih reet noq xoj ayeew panti', eh ma' awach ta chik iniq'omanik qeh? Re' hoj k'ahchi' naq quy-eem wihik pansuqkiil k'uxliis, xama' nqareq ta wo' hoq, k'ahchi' naq quy-eem chi naa qakowjiik, qayo'jiik chik inchalik.20QaJaaw Dios, re' hoj inqanimaj inaq'or chi ma' k'isiin i qamahk, ruum chi xqa a'n i yiib' wach na'ojb'al xk'uhtjik kahnoq qeh kuum i qamaam qati't, xoj mahkunik chawach.21Reh chi neenqayeew aloq'il, maa qoh aq'eb' chi riij ak'ux, ma' wixow wach aatinamiit ti' wilik wii', k'oloq la' panak'ux ayejaam wach chi naa a'nam kuuk' maa yoj wach.22¿Mi wilik jino'q keh re' i tiyoox neen ye'wik chaloq i jab'? ¿Mi nee ruyeew chaloq re' i kowlaj jab' i taxaaj xa chi rib'il riib'? QaJaaw Dios ¿Mi ma' re' re' hat ti ye'wik cho qeh i jab'? ¿Mi ma' re' re' hat i qaDios? Re' hoj awuuk' i hat ch'iklik qak'ux eh inquy-eej chi nakooj atoob'eem kinkih reh. Re' ruq'orariik rib'iral i ti' k'axik
1Re' i QaJaaw Dios je' wili nuchaq'wesjiik xub'an: Re' ta ne'chee Moisés, re' ta ne'chee Samuel xi wihik cho najtir, k'ahchi' chi q'orik wuuk' chikiij i tinamit wili xama' nee ta wo' naq inuketelaaj kiwach. Chaq'or keh chi kieloq reje chi nuwach.2Eh wila' xkipahqaaj taq aweh chi aha' naa kojiik je' wili cha q'or keh: Re' QaJaaw je' wili ruq'or:
Re' taqe i korjinaq wach chi yab'ilaal naa rukansaniik keh, re' wo' re' naa rub'aniik keh. Re' taqe i korjinaq wach chi panq'aq'inik naa kikimik, ar wo' naa kikimiik. Re' taqe i korjinaq wach chi wi'jaleel, naa rukansaniik keh re' wo' re' naa rub'aniik keh, Re' i korjinaq wach chi naa kojiik pan tokoom tinamit, naa wo' kojiik.
3Re' hin i Dios kijib' wach i ti' k'axik naa nutaq'aam cho chikinaah, re' naa kikanteesjiik panq'aq'inik, re' taqe tz'i' naa ruqeriniik reh i kiti'jolal, re' taqe i chikop wilik kixiik', re' taqe josq'laj chikop naa ruk'uxwiik reh i kiti'jolal.4Re' hin naa nuye'em q'ab' chi xiik' naah yib'kiil wach naakilom chu'nchel i tinamit wach ak'al, ti' k'axik naa nuye'em chikinaah ruum i yiib' wach na'ojb'al xub'an ar Jerusaleem i kireey i aj Judá Manasés rub'ihnaal rak'uun i Ezequías.
5Hat taq aj Jerusaleem na' chak'ul taq i re'. ¿Awach naa ruketeliniik taq awach? ¿Awach i ti' taq naa kaat rik'raam? ¿Awach naa resaniik taq aweh panti' k'axik?6Re' taq i hat xinsahchik taq panak'ux xinaq'eb' ta chi riij ak'ux re' wili re' hin kinq'orik hin Dios, xinq'uhtik taq chawuyub'jiik, ruum aj re' naa nuye'em i nuq'ab' taq cha naah re' i rub'anariik taq aweh i ti' k'axik naa taq nusacham awach.7Re' hin naa nukutum taqe reje wulu' aatinamiit, je' inkutarik reje sohk' eh naa nukanaam chi ma' xta chik tinamit chupaam i nutinamiit Jerusaleem naa nusacham kiwach ruum ma' xkaaj ta chik sutinik cho wuuk'.8Eh ma' k'isiin taqe ixoq naa nukanaam chi ma' xta kib'ahiil, ma' xata je' kik'ihaal i saniib' chi chii' palaw. Eh xti manlik parusaqumaal i q'iij naa nuye'em i kimik chikinaah i tuutb'ees, ak'uunb'ees, ixq'uunb'ees, xa chi ma' keht'al naa nuye'em i ti' k'axik chikinaah.9Re' je' tuutb'ees wilik wuquub' rak'uun naa ruq'ehb'iik wach ak'al, naa rukahniik chi ma' xta chik raansil. Eh naa ruchaliik ruk'ixiik, eh re' i rusuqkiil ruk'ux, naa rusutiniik chi ruti'kiil ruk'ux. Eh wila' ko wilik keh i xi kahnik chi k'achalkeeb' re' inixowanik kiwach naa rukansanik keh. Re' wili xti korik ruum re' hin kinq'orik, inki Dios. Re' Jeremías xuk'er chii' ruum ruti'kiil ruk'ux10Re' Jeremías je' wili xuq'or: Hat nutuut, re' hin ma' nukuy ta chik i ruti'kiil nuk'ux, i ruk'ul naq chi ma' xin-aasjik taj ruum xa re' peleto i nub'an kuuk' i tinamit. Ma' awach ta uuk' nukemelem nutumiin, eh ma' awach taj i rukemelem rutumiin wuuk'. Xa re' la' xa chu'nchel chik ma' holohik ta kiq'orik chi wiij.11QaJaaw Dios ma' xta naq reet inki a'n weh chi je' re' wita ma' k'ahchi' kaat nunimam chi korik wita ma' nupahqaam aweh chi naa taqe atoob'eem i ki-ixowanik nuwach re' re' noq ti' i kik'ux, noq k'axik wilkeeb', inki. Re' QaJaaw Dios xuq'or rib'iral chi naa ruye'em i ti' k'axik chikinaah i aj Israel12Re' QaJaaw Dios je' wili i xuq'or: ¿Mi wilik neenq'atwik wach i tinamit naa kichaliik pantz'eet reh i rookb'aal q'iij xiik' naah kikowiil je' kikowiil i rax ch'ihch', eh je' kikowiil i q'an ch'ihch'?13Eh re' taq i hat xat mahkunik taq, re' taq ab'ehomal naa nuq'asam pan kiq'ab' i ki-ixowanik taq awach re' q'e' k'ih tz'aaq taq cha weh i wilik chupaam taq aatinamiit. Eh xa chi siih naa kik'amam reje.14Re' hin naa nuye'em q'ab' chi re' chik taqe i ki-ixowanik awach naakichopwiik taq anaah, chupaam i ye'aab' ma' aweht'al ta taq i hat, ruum ma' k'isiin ta noq xqop i nujosq'iil taq cha naah xa je' chik rukab' i q'aaq' xa re' yu' ink'atwik, inki. Re' Jeremías xupahqaaj ree Dios chi naa rutoob'jiik15QaJaaw Dios, re' hat aweht'al chib'ih jariik i k'ahchi' nuk'ulum, je' re' noq kinatoob'eej tii, chaq'aj wach keh inki a'n weh i aj ixowaal. Eh cha a'n cho kuuk' chi jumehq'iil reh chi ma' nee ta kinkikansaj i hin. Re' hat aweht'al chi ruum animjiik i nukuy i pajarik.16Noq imb'iraj aq'oral ruuk' i re' i nuk'uxlaaj wiib' panuxlab'al, re' wo' re' inye'wik rusuqkiil i wánima q'e' ti' wilik. Cha a'n tii otob'il weh Jaaw nim awajaawriik ruum hin wo' tii awak'uun.17Re' hin ma' inwuch'ihleej ta chik taqe i xa re' i ninq'ijinik inkik'ax wach. Xa re' wo' noq xinawehchaaj chi hin awak'uun ma' numin ta wiib' xa aha'. Xa re' la' chik i hat xti xiik' wo' chik naah aajosq'iil xayeew cho chi nunaah.18Jaaw, ¿Chib'ih reet noq ma' hi'lik ta wach i nuti'kiil? ¿Chib'ih reet noq ma' nik'ik taj i nuti'kiil ma' xata riq'omal iraaj? Eh re' hat chi weh i hin xat sutinik chi xa je' hat jinaj rooq ha' xa ik'ik i rub'an, inki.
19Re' i QaJaaw Dios je' wili xuq'or weh: Wila' xat sutinik wo' chik cho wuuk' neenwik'saj aati'kiil, wila' xakanaa' i ma' holohik ta laj q'orik, eh mi xa re' chik i holohik i neenaq'or neerub'an chi neena a'n i nukamaj. Xa nee wo' tii kahnik chi hat jalal nuq'oral, re' taqe i ki-ixowanik awach naakinimaniik chawach, ma' re' tee hat naa animaniik chikiwach i keh.20Re' hin naa kaat nukanaam chi je' rukab' i koraal re' ruuk' i q'an ch'ihch' ma' xta nee ruk'ul, re' i tinamit re' re', naa naq kianam aweh ruuk' q'aq'inik xa re' la' xama' xta wo' naa kaat kuchem, ruum re' hin naa nuwihiik awuuk' cha toob'jiik, eh chako'ljiik.21Eh naa wo' kaat nuko'leem pan kiq'ab' i yiib' wach kina'ojb'al, naa wo' kaat nuko'leem chuwach i kijosq'iil taqe i aj ixowaal, inki weh i Dios. Re' ti' k'axik xchalik chikinaah i tinamit Judá
1Re' QaJaaw Dios je' wili i xuq'or weh:2Re' hat ma' naa ta sik'im awehk'een chupaam i tinamit wili, eh ma' ruyeew ta riib' chi neen wihik awak'uun awixq'uun ayu'.3Ruum re' hin i Dios i nuq'or chib'ih inakik'ulum taqe ak'un, xq'un naa kaasjiik chupaam i tinamit wili, je' wo' hoq inakik'ulum i kituut kajaaw.4Re' keh yiib' wach yab'ilaal naa rukasaniik keh, ma' awach taj naa roq'iim chikiij, eh ma' naa ta kimuhqik. Xa aha' naa rukahniik tuch'ulkeeb' i kiti'jolal wach ak'al chi je' rusaa' chikop. Re' q'aq'inik, re' i wi'jaleel naa rusachwiik kiwach, re' kiti'jolal naa ruk'uxariik kuum i chikop wilik kixiik', eh kuum taqe i josq'laj chikop, inki.
5Re' QaJaaw Dios je' wo' chik wili i xuq'or weh: Re' hat mat ik'ik i koq chupaam i paat aha' kikojom ikiq'eq so'. Eh ma' naa ta woq'em ma' naa ta ak'uhtaam chi naa rutib'iik ak'ux chi riij awach i naa rukimiik keh. Ruum re' hin wesam chik chinaah i tinamit wili i suq kiil k'uxliis, i nuk'axb'al, i ketelinik wachiis i nub'an, inki.6Je' re' noq chi nimaq chi kok' taq naa kikimiik chupaam i tinamit wili, eh ma' awach ta naa rumuq'aniik keh, ma' naa ta kooq'jiik, ma' naa ta kiyok'om wach i kiti'jolal, ma' awach taj i naa ruyok'om i rismaal i kinaah ruum i ruti'kiil kik'ux chikiij.7Eh ni xata naakimolom kiib' chi wi'k noq naakicha'jeem i kamnaq ye'b'al rusuqkiil kik'ux taqe i awach reh i xkimik. Eh ni xata naa ruye'ariik keh chi uuk'jik i riis uuva ye'b'al rusuqkiil kik'ux, chi riij i rukimiik i kituut i kajaaw.8Je' wo' i hat ma' naa ta wo' awokiik i koq kuuk' aha' kimolom kiib' chi wi'k oon chi uk'ik, ma' naa ta tzunaam awiib' chi kixilak.9Ruum re' hin i Dios nim wajaawriik, kiDios i aj Israel, i nuq'or chi chupaam i tinamit wili naa rumahyiik i tz'uuy pantaq ninq'iij, je' wo' hoq i rusuqkiil k'uxliis, je' wo' i tz'uuy reh kaxáro. Eh xti manlik paruq'ijil naa ruk'ulariik, re' taq i hat naa taq awilom ruuk' naq'awach.
10Eh noq naa aq'orom rib'iral keh i tinamit wili, naa kipahqaam aweh chi je' wili: ¿Chib'ih reet noq xuq'or i Dios chi naa ruye'em chi qanaah i runimaal ti' k'axik re' re'? ¿Chib'ih i ma' holohik taj xqa a'n chuwach? ¿Chib'ih i mahk xoj q'ehb'ik wii' chuwach i QaJaaw, re' i qaDios? inko'q taqe.11Re' hat je' wili i naa aq'orom keh, re' QaJaaw Dios je' wili i xuq'or: Re' hin je' re' i naa nub'anam keh, ruum re' taqe i kimaam kati't xin kiq'eb' chi riij kik'ux, re' chik taqe i tiyoox xtohq'ik kinimam, eh xtohq'ik kiloq'em. Eh re' hin xin kiq'eb' chi jumpech, ma' xkinimaj taj i nuk'uhb'aal xnutijej taqe wii'.12Eh re' keh xti xiik' wo' chik naah yib'kiil wach kib'anik chikiwach i kimaam kati't, ruum i rukowiil i kinaah xkitoq'aa' rub'aan i ma' holohik ta chi b'anarik, re' i nelik cho pankanima. Ma' xinkaaj ta kinkinimam.13Ruum aj re', re' hin naa wesam taqe reje chupaam i ye'aab' wili naa nutaq'aam taqe reje chupaam i tinamit ma' keht'al taj i keh. Eh ni xata re' i kimaam kati't xinab'inik cho reh, eh ar chi q'iij chi aq'ab' naa kiloq'em taqe i tiyoox, ruum aj re' ma' naa ta nuketelaam kiwach inki taq chawiij, tiko'q keh.
14Eh naa ruponiik i q'iij chi ma' naa ta chik kiq'orom chi je' wili: Tik'achlik i QaJaaw Dios i x-esanik cho keh i aj Israel ar Egipto ma' ko'q ta chik taqe.15Je' la' wili i neenkiq'or: K'achlik i QaJaaw Dios x-esanik cho keh i aj Israel chupaam i tinamit wilik chaloq pantz'eet reje reh rookb'aal i q'iij, resaj wo' chaloq i rutinamiit chupaam i tinamit aha' kitukem wii' kiib' inko'q ta taqe. Chi je' re', re' hin naa wo' chik taq kaat nuk'amam chaloq chupaam taq aaye'aab' re' i nuye'em cho keh taq aamaam awati't.
16Xa re' la' re' hin i Dios naa nutaq'aam reje k'ih-oq i sik'il taq aweh aha' pa' akeb'aam taq awiib', naa taq kaat tikichop chaloq, je' rukab' i aj karineel noq i ruchop i kar. Eh je' rukab' inki a'n i kiooj aj chikop panch'ahn korehtaal inki a'n cho reh. Re' taqe aj sik'ool re' re' naa taq kaat rojiik kesam pantaq raxchee' nah taq yuuq', chupaam taqe i ruhopil ab'aj.17Ruum re' hin inwilow chi ma' holohik ta taq tib'anik, eh inwilow chu'nchel taq i yiib' wach na'ojb'al taq i na a'n, ma' xtaj inkahnik pankeliik chi nuwach.18Eh re' hin xiik' naah ti'kiil naa nuq'ajam wii' wach taq aweh ayiib' wach na'ojb'al, ruch'ihil taq amahk, ruum xa ch'uwareej taq wach i nuye'aab' ruuk' i yiib' wach kilooq'jiik taqe kamnaq tiyoox taq xa a'n ar. Eh chupaam chu'nchel i ye'aab' xnuyeew taq aweh chi akooch xa a'n taq i yiib' wach na'ojb'al ma' imponik ta chi nuwach inki.
19Re' Jeremías je' wili xuq'or: QaJaaw Dios, hat ye'el nukowiil, hat toob'en weh, hat ko'len weh nik' wilkiin panyohb'aal. Awuuk' i hat naa kichaliik taqe i tinamit wach ak'al, je' wili i naa kiq'orom aweh: ¿Mi xa re' wo' taqe i tiyoox xama' xta kajaawriik xkik'ul chi kikooch i qamaam kati't?20¿Mi neerub'an re' chi xa neeruyejaa' rudios i winaq? Re' dios inkiyejaa' i keh ma' re' ta wo' taqe korik laj dios inko'q taqe.
21Re' QaJaaw Dios je' wili i xuq'or weh: Ruum aj re', re' hin naa nuk'uhtaam chi manlik i wajaawriik taq chawach. Reh chi naa taq anab'eem chi re' i nub'ihnaal ajaab'ees Dios, inki. Re' i mahk, re' i ti' k'axik xye'arik cho chikinaah i aj Judá1Re' i QaJaaw Dios je' wili xuq'or: Re' taq amahk i hat aj Judá je' naa ruuk' q'as ju' ch'ihch', ruuk' i q'as ju' holohaq ab'aj k'otooj ruye'aab' chupaam taq awánima, je' wo' chuwach i ruk'aa' taq artaal.2Re' taq awak'uun awixq'uun ma' inkimay taj i mahk xank'ulik wo' pankik'ux i kiartaal, i kitiyoox Asera inkiyeew ruloq'il chi ri'sil taqe i nimaq taq chee' eh chikinaah taqe inajt kinaah yuuq'.3Chinaah taqe i rax chee' pantaq ab'iix. Eh ruum taq amahk i na a'n naa nuye'em q'ab' chi naa kelq'aam taq ab'ehomal. Eh chi naa kelq'aam paam i rupaat taq atiyoox wilkeeb' chupaam chu'nchel i taq aatinamiit.4Eh naa taq akanaam kahnoq aa ye'aab' nuye'em taq chi akooch, eh re' chik i ki-ixowinik taq awach naakitaaq'aniik taq aweh chupaam i ye'aab' ma' aweht'al ta taq. Ruum re' nujosq'iil yohb'aal wach noq xqop, xa je' chik rukab' i q'aaq' imb'anik sachooj, inki i Dios.
5Eh je' wo' chik wili i xuq'or: Q'e' ti' inaruk'ulum awach i resaj i ránima wuuk' i hin, ruuk' chik i xa winaq i ruyeew ruk'ux, ar chik i rusik' toob'al reh.6Re' imb'anik reh i je' re', naa rukahniik chi je' rukab' i kaq k'iix wilik chupaam i ye'aab' chiq yuuq' ma' awach ta incha'jinik reh. Eh xilak taq ab'aj ink'ihik johtoq chupaam i sahaab' paam ak'al ma' awach taj i patim chupaam.
7Eh awach i ruyeew ruk'ux wuuk' i hin naa ruk'ulum i wotob'il, eh wuuk' i hin i ruch'ikaa' ruk'ux.8Re' reh je' rukab' i chee' tikooj chii' rooq ha' inooj reje i raa' chii' ha', ma' xta ruk'ul noq inchalik i rutz'ahiil i q'iij xa eliik rax wach i xaq. Eh noq inchiqik taqe i yuuq' k'ixkaab' xama' xta wo' ruk'ul, xama' rukanaa' ta wo' wachinik.
9Eh ma' xta chik jino'q imb'anik jot'ooj chuwach i ma' holohik taj wilik cho pan ánima. ¿Mi wilik jino'q neenab'inik reh i ánima?10Re' hin i Dios ra'j weht'al re' chib'ih i wilik cho pan ánima, i wilik cho chupaam i kapeb'al, eh naa nuye'em i rutojb'aal i ju'jun je' rukab' i ruk'ul chi reh, re' q'oreel chib'ih i xub'an, chib'ih i xuq'or inki.
11Awach i rureq i rub'ehomal ma' re' ta parub'ehel, i rub'an reh je' rukab' i rub'an i tz'ikin i rumoheej i miloj ma' re' tee reh xk'otwik reh. Re' reh panyejaal i ruk'achariik naa rukanaam kahnoq i rub'ehomal, ar naa ruk'utiniik chi ma' xta runa'ojb'al.
12Re' i rupaat i qaDios i hoj xiik' naah loq'il xanoq wo' pampeet xye'arik runimaal wach, re' i santo laj ye'aab'.
13QaJaaw Dios awuuk' hat inqach'ikaa' qak'ux i hoj aj Israel, eh chu'nchel i xat kiq'eb' chi riij kik'ux naa ruk'uhtjiik kik'ixb'ilaal. Eh re' inkimay animjiik xa je' pampooq tz'ihb'amaj i kib'ihnaal, ruum chi xat kiq'eb' i hat i je' naq hat jinaj k'achlik raasb'al ha' chi keh.
14QaJaaw Dios cha kuy kinak'achrisaj tii, chi je' re' neekink'achjik. Eh kinako'leej tii, chi je' re' neekinko'ljik ruum re' hin xa re' wo' hat i nuyeew aloq'il.15Re' tinamit je' wili inkiq'or weh: ¿Chib'ih reet noq ma' nqak'ul taj i ruq'or rib'iral qeh i Dios? Re' hoj inqaaj qilom chi nenooj eloq wach yu'naak, inki taqe.16Re' hin ma' xnupahqaaj taa weh chi naa nuyeew i ti' k'axik chikinaah, ma' inwaaj taj chi neenkik'ul i ti' k'axik, re' hat aweht'al chi re' taqe i xnuq'or chi na kik'ulum re' wo' hat xat q'orik weh.17Jaaw maa kinayohb'isaj cho ruuk' aajosq'iil, ruum xa awuuk' wo' hat inusik' ko'lemb'al wiib' noq inchalik i ti' k'axik chi nunaah.18Eh re' taqe i ki-ixowanik nuwach cha kanaa' taqe pank'ixb'ilaal, ma' re' taj i hin. Re' keh chayohb'isaj taqe ruuk' aajosq'iil, ma' re' taj i hin. Xa k'ahchi'-oq aye'em i runimaal ti'kiil k'uxliis, chikinaah. Re' i ruk'ul chi b'anarik eh re' ma' ruk'ul ta chi b'anarik panhi'limb'al q'iij
19Re' QaJaaw Dios je' wili i xuq'or weh: Yu'naak hiy chapab'aa' awiib' panookb'al reh i tinamit Judá re' kiokik i kielik wii' taqe i reey, eh nee wo' nooj apab'aa' awiib' chi chii' taqe i ookb'al reh i tinamit Jerusaleem.20Eh je' wili i neenaq'or keh i tinamit, je' wo' keh taqe i reey, je' wo' keh i aj Judá, je' wo' keh i aj Jerusaleem: neeki okik i koq chupaam taqe i ookb'al re' re'. Chab'iraj taq i ruq'oral i QaJaaw Dios.21Re' QaJaaw je' wili i xuq'or: Chaketelaaj taq wach aak'achariik maa k'am taq reje ihq chupaam i hi'limb'al q'iij, ma' naa ta wo' taq ak'amam reje chupaam taqe i ookb'al re' i tinamit Jerusaleem.22Eh maa wesaj taq chaloq jino'q i ihq panapaat, eh ma' xta jino'q i kamanik naa a'nam. Naa la' taq akanaam chi loq'oomb'al weh i hi'limb'al q'iij re' re', je' rukab' i xnuq'or keh taq aamaam awati't chi naa kianam.23Xa re' la' re' keh xama' xkian ta wo' hoq i xnuq'or keh, ni xata xinkinimaj. Eh ruum i rukowiil i kinaah ma' xkik'am ta naah i nuk'uhb'aal.
24Re' hin i Dios kinq'orik chi kinanimaj taq i hat, maa k'am taq reje jino'q i ihq pantaq ookb'al reh i tinamit Jerusaleem chupaam i hi'limb'al q'iij. Cha kanaa' taq chi loq'oomb'al weh, ma' jino'q i kamanik taq naa a'nam chupaam.25Eh wila' xa a'n taq i je' re', chi juneliik naa ruwihiik taq aareey je' rukab' noq xwihik i reey David. Pan kareta xoyimaj, eh rij kawáyu wilkeeb' noq naakokiik pantaq ookb'al reh i tinamit wili kuch'ihil taqe i k'amal b'eeh kuch'ihil taqe i aj Judá. Je' wo' taqe i aj Jerusaleem, chi je' re' junelik naa ruwihiik patineel Jerusaleem.26Wilik inaakichaliik pan tinamit Judá, re' taqe i wilkeeb' chi junsuut i Jerusaleem, pan tinamit Benjamín, wach k'ixkaab' wilik wii' i rax chee' ar Neguev. Eh naa kik'amam cho chi kimayiij taqe i k'atoj chikop, eh wilik xa chi naq'wach i kitik, wilik insensia naa kik'amam cho chi kimayiij chupaam i ye'aab' chi ye'b'al nuloq'il.27Eh wi ma' xanimaj taq i hat i nuk'uhb'aal, wila' ma' xakanaa' taq chi loq'oomb'al weh i hi'limb'al q'iij, eh wila' ma' xakanaa' taq i kojooj ihq chupaam taqe i ookb'al reh i tinamit Jerusaleem. Re' hin naa nukojom ruq'aq'al taqe i ookb'al reh i tinamit re' re', eh re' q'aaq re' re' naruk'atwiik reh taqe i paat imb'aan wii' i q'ataj q'orik ma' awach ta chik naa ruchupwiik reh, tiko'q keh, inki weh i Dios. Re' i QaJaaw Dios xujalwachej riib' ruuk' i yej-an ak'al xun
1Re' i QaJaaw Dios je' wili i xuq'or weh:2Re' hat hiy qohoq parupaat i aj yej-an ak'al xun, ar nee nuch'ob' rub'ehel aweh i nuk'uhb'aal, inki.3Eh re' hin xinqajik wo' qohoq, xponik nureq i yej-an ak'al xun chi k'ahchi' ruyuq'um paam i lech'ik laj ch'uwa' chinaah i rukamamb'aal.4Eh xwilow noq k'ahchi' naq ruyejaam i xun ruuk' i lech'ik laj ch'uwa', inyoj wo' chik chuwach, eh intohq'ik wo' chik ruyejaam tokoom ruuk' i lech'ik laj ch'uwa' re' re'. Korehtaal xkorjik chuwach xti nik' wach iraaj i reh.
5Noq k'achi' wilom i re' je' wili i xuq'or weh i QaJaaw Dios:6Hat taq aj Israel, ¿Mi ma' nee taq i nub'an awuuk' re' je' rukab' i rub'an i aj yej-an xun ruuk' i lech'ik laj ch'uwa' re' re'? Re' taq i hat chanab'eej taq chi xa je' taq hat lech'ik laj ch'uwa' panuq'ab', je' rukab' lech'ik laj ch'uwa' pan q'ab' i yej-an xun, re' re'. Re' taq i hat je' taq hat lech'ik laj ch'uwak' panuq'ab'.7Re' hin wilik pech xa chi jumehq'iil i nuq'or chi naa ruchopariik naah, chi naa ruyojiik wach, eh chi naa rusachariik wach junseht-oq i tinamit oon jino'q i reey chopen naah i tinamit.8Eh wila' xkikanaa' i yiib' wach na'ojb'al inki a'n taqe i tinamit re' re' nee wo' chik inwisaj chikinaah i ti' k'axik ma' nee ta i nusach kiwach, je' naq rukab' nuyejaam cho wach.9Eh jumehq'iil wo' neenuq'or chi nee taqe nuch'ikaa' chi nee taqe nuk'ihaaxb'isaj taqe i tinamit re' re', je' wo' taqe i reey.10Eh wila' xkian i ma' holohik ta laj na'ojb'al, eh wila' ma' xkinimaj i nuq'or. Re' hin ma' naa ta nuye'em i wotob'il chikinaah ma' naa ta nuye'em keh i nuyejaam naq wach chi keh.
11Re' hat hiy kuuk' taqe aj Judá, kuuk' taqe i aj Jerusaleem cha q'or keh chi je' wili: Chi re' hin i Dios wilik i k'ahchi' nuyejaam wach chikiij, k'achi' nuyejaam wach chi naa taqe nuye'em chutojariik i kimahk. Je' re' noq kikanaa' i yiib' wach b'eeh, kiyejaa' i kina'ojb'al, je' wo' hoq inki a'n12Re' keh je' wili i naa kiq'orom aweh: Maa cham awiib' quuk', re' hoj imponik chi qawach i k'achariik je' rukab' inqaaj i hoj. Eh ma' qaaj ta qakanaam rub'aan i ma' holohik taj inchalik panqanima, inko'q taqe, inki Dios.
13Ruum aj re' je' wili i ruq'or i QaJaaw Dios. Chapahqaaj chupaam taqe i tinamit mi wilik jino'q ixq'orik reh je' rukab' i q'orik re' re'. Re' taqe i tinamit Israel ma' k'isiin ta yib'kiil wach kib'anik.14Eh ¿Mi neerub'an chi ma' nee ta chik inqajik chaloq i musjab' chinaah inajt naah yuuq' wilik Líbano? ¿Mi neerub'an chi nee kichiqiik taqe i jot'ik paam ha' kichalik chi najt yuuq'?15Xa re' la' re' nutinamiit keh xinsahchik pankik'ux, eh chuwach chik taqe i tiyoox inkik'at i insensia xkikanaa' i holohik b'eeh re' xkik'am chaloq i aj najtir q'iij. Re' chik i b'eeh ma' eht'alimaj taj k'ahchi' kojiik wii'.16Je' aj re' noq re' i kitinamiit xsutinik chi xa je' chik chiq yuuq', eh chu'nchel i naakik'iik ilwoq reh naa kikaqse'laam, naa rusahchiik kik'ux naakik'uyusam i kinaah, cha q'or i xuk'ul, inko'q taqe.17Eh re' hin je' naa ruuk' kowlaj teew inchalik parelb'aal q'iij naa nukutum taqe i aj Israel chikiwach i inixowanik kiwach. Eh noq naakik'ulum i ti' k'axik re' re', ma' naa ta nuko'leem taqe, naa la' nukanaam taqe chi kutkel, inki Dios. Re' noq xkiyejaa' wach chi naa kianam ti' k'axik reh i Jeremías
18Re' i tinamit je' wili i xkiq'or: Qayejaa' taq wach chi neenqasach wach i Jeremías ruum i ruq'or. Re' hoj qeht'al chi xanaa wo' kiwihiik i k'amal b'eeh aj tiij aj tijen qeh, eh xanaa wo' kiwihiik kojol qana'ojb'al, xanaa wo' kiwihiik i jalal ruq'oral i Dios neenkiq'or qeh i k'uhb'aal. Qakoj taq ru mahk i Jeremías reh chi neenkanteesjik, eh manqanimaj taq reh taqe i ruq'or, inki taqe.
19Re' Jeremías je' wili i xuq'or parutiij: QaJaaw Dios kinako'leej tii chuwach inkiq'or chi wiij taqe i ki-ixowanik nuwach.20Re' keh nupletohjiik chik inki a'n chi q'ajb'al wach otob'il xnub'an keh. Eh xankaaj naq chik kin kimuq'aam, re' hat Jaaw aweht'al chi kinchoqik awuuk' chupahqaljiik i kitoob'jiik, chi maayeew chik chaloq aajosq'iil chikinaah.21Eh i nupahqaaj aweh chi chayeew chee wi'jaleel chikinaah i kak'uun kixq'uun, eh chi neekikanteesjik ruuk' q'aslaj ch'ihch'. Eh chi nee kikahnik chi ma' xta chik kib'ahiil ma' xta chik kak'uun kixq'uun ixoq, chi yab'ilaal neenkansanik keh i kib'ahiil, eh re' kik'ijool kikimoq panq'aq'inik.22Re' hin Jaaw i nupahqaaj aweh chi cha taq'aaj cho juntuhb'-oq ajileq' chikinaah, korehtaal i nib'irjik chi k'erik kichii', ruum re' keh xkik'ot i jul reh chi naa nuq'ehb'iik chupaam, eh xirob' inkikoj panub'eeh.23Xa re' la' re' hat Jaaw aweht'al chu'nchel i xkiyejaa' wach reh i nukanteesjiik. Je' re' noq i nupahqaaj aweh chi maa kuy kimahk ruuk' i kiyiib' wach na'ojb'al, eh mansahchik panak'ux taqe i kimahk. Chayeew taqe chutojariik i kimahk ruuk' aajosq'iil. Re' jalwaach q'orik chi riij i paxeel laj ak'al ikom
1Re' QaJaaw Dios je' wili xuq'or weh: Yu'naak hiy chaloq jino'q aak'al ikom nee nak'am taqe kiib' ixib'-oq chawiij taqe i k'amal b'eeh chupaam i tinamit, neenak'am taqe chawiij i k'amal kib'eeh aj tiij.2Chi riij i re' neetiqajik qohoq wach k'ixkaab' Ben-hinom neenapab'aa' awiib' chi chii' i ookb'al wilik reje chi korkiil ireelb'aalq'iij ar neenaq'or i nuk'uhb'aal naa nuq'orom aweh.3Je' wili i neenaq'or keh: Re' taq i hat wilkaat taq chi reyil Judá, je' wo' taq i hat i wilkaat taq chi patinik Jerusaleem chab'iraj taq i k'uhb'aal wili, re' ruq'or i QaJaaw nim rajaawriik qaDios i hoj, hoj aj Israel. Re' hin naa nutaq'aam chaloq i runimaal ti' k'axik chinaah i ye'aab' wili, chu'nchel i naakib'iriniik reh naa rutib'iik i kixikin.4Ruum re' taqe i aj Israel xin kiq'eb' chi riij kik'ux xkikanaa' i ye'aab' re' re' chi xa je' tokoom tinamit, ar xkik'at i insensia chikiwach taqe i tiyoox ma' keht'al ta wach i keh, ni xata re' i kimaam kati't ni xata re' taqe kireey i aj Judá xinab'inik cho kiwach. Re' taqe i aj Israel ma' k'isiin i ma' xta kimahk i xkikansaj ar.5Eh xkiyejaa' wo' kiartaal k'atb'al reh taqe i kak'uun kixq'uun chi kimayiij chuwach i tiyoox Baal. Re' hin ma' xnuq'or ta keh chi je' re' naa kianam, ni xata naq xik'ik cho panukapeb'aal.6Ruum aj re' chi nuwach i hin naa ruponiik i q'iij chi re' ye'aab' re' re' ma' re' ta chik Tofet ni xata Ben-hinom naa rubíhnaam, ye'aab' kantesb'al iib' la' chik inarub'ihnaam. Re' wili korik ruum re' hin i Dios kinq'orik.7Eh chupaam i ye'aab' re' re' naa nusacham wach i kiyejaam wach i aj Judá, eh je' wo' hoq i kiyejaam i aj Jerusaleem. Re' hin naa nuye'em q'ab' chi naa rub'aan keh ruum inixowanik kiwach xiik' naah kijosq'iil re' taqe naa rukansaniik keh. Eh re' i kiti'jolal naa rukamaniik chi kiwa' k'uch chi kiwa' josq'laj chikop.8Re' hin naa nukanaam i tinamit wili chi xa je' chik rukab' i ye'aab' chiq yuuq' yohb'aal wach i naa ruk'ulum. Eh chu'nchel i naakik'iik ilwoq reh chi xsahchik chik wach chi jumpech ma' k'isiin ta naa kikaqse'laam, eh naa rusahchiik kik'ux.9Re' hin naa nuye'em q'ab' chi re' inixowanik kiwach yohb'aal wach kijosq'iil chikinaah, korehtaal kikanab'jik chi ma' xta wilik keh. Re' chik taqe i kamigo, re' chik taqe i kak'uun kixq'uun naa kik'uxum paruti'kiil, inki tiko'q keh.
10Noq aq'orom chik keh i re' kora'j neenapaxej qohoq wach ak'al re' i ak'al ikom chikiwach taqe i winaq awuch'ihil.11Eh je' wili i naa aq'orom keh: Re' QaJaaw Dios nim rajaawriik je' wili ruq'or: nik' wach noq xpaxik i ak'al ikom wili ma' jaruuj chik naa rukorjiik, je' re' noq naa nusacham kiwach i tinamit wili ma' jaruuj chik naa rukorjiik. Ruum chiyohb'aal wach ikaansanik naa rub'aan ma' naa ta chik rumanlojiik i ye'aab' kimuhqik wii' i kamnaq, ar chik Tofet naki muq'aam i kikamnaaq i tinamit.12Je' re' naa nub'anam ruuk' i tinamit wili, je' wo' kuuk' chu'nchel i patim chupaam. Xa aha' naa rukahniik chi tuch'lik i kiti'jolal kamnaq, naa nukanaam chi je' rukab' i ye'aab' Tofet.13Re' taqe i paat wilkeeb' Jerusaleem, re' taqe i paat inki a'n wii' i taaq'anik i reey ar Judá, re' taqe i ruk'ixkab'il naa taqe paat, re' inkik'at wii' i insensia chikiwach johtoq i ch'umiil. Re' inkichihkaaj wii' i riis uuva chikiwach taqe i tiyoox. Re' taqe i ye'aab' re' re' naa rukahnik chi ch'uwa' kiwach je' rukab' i ye'aab' Tofet, tiko'q keh inki i Dios.
14Eh chi riij i re' xelik wo' chik chaloq i Jeremías ar Tofet re' xtaq'ab'jik reje wii' ruum i Dios noq xponik ruq'or i ruk'uhb'aal re' re'. Eh xoj rupab'aa' riib' chi chii' i rupaat i Dios je' wili i xuq'or keh i tinamit.15Re' QaJaaw Dios nim rajaawriik qaDios i hoj, hoj aj Israel je' wili i xuq'or: Re' hin naa nuye'em chinaah i tinamit wili je' wo' chikinaah i tinamit wilkeeb' reje chuka'jaah taqe i ti' k'axik xnuq'or taq aweh. Eh ruum q'e' xkikowb'isaj i kinaah ma' xkaaj ta kinimam i nuq'oral, inki weh i Dios. Re' i xub'an i Pasur i nixowanik wach i Jeremías
1Eh noq re' i rak'uun Imer Pasur rub'ihnaal k'amal b'eeh aj tiij nim wach ilil reh i rupaat i Dios, xrib'iraj i xuq'or i Jeremías chi naa ruk'ulariik.2Ruum re', re' i Pasur xutaq'aaj ruchopariik i Jeremías xkiq'ojib'eej xkilutz' pan chee' i ralaq i rooq ar chi chii' i nim wach ookb'al Benjamín rub'ihnaal wilik ma' najt ta ruuk' i rupaat i Dios.3Eh chi junwaar re' xutaq'aaj wo' chik ruq'orariik chi kesaj pan lutz' chee' i rooq. Re' i Jeremías je' wili i xuq'or reh Pasur: Re' hat narujalam wach ab'ihnaal i QaJaaw, runimaal yo'jik chik ab'ihnaal naa rukojom.4Re' i QaJaaw Dios je' wili i xuq'or chawiij: Re' hin naa kaat nusutem chi xa re' hat naa ayohb'isam awiib', je' wo' chi keh taqe awamigo. Eh naa awilom ruuk' naq'awach noq naa kikanteesjiik taqe awamigo ruuk' q'aslaj ch'ihch'. Re' hin naa nuq'asam taqe i aj Judá pan q'ab' i kireey i aj Babilonia naa kik'amariik reje pankowlaj kamanik, ar naa kikanteesjiik ruuk' q'aslaj ch'ihch'.5Naa wo' nuq'asam pan kiq'ab' i nixowanik kiwach i rub'ehomal i tinamit wili, je' wo' hoq i chib'ih jariij wilik keh, je' wo' hoq i k'ih taq tz'aaq chi keh. Eh je' wo' chu'nchel i xa chib'ih jariik q'e' k'ih tz'aaq wili keh i kireey i aj Judá, chu'nchel i re' naa kik'amam reje Babilonia i nixowanik kiwach.6Eh re' hat Pasur naa wo' ak'amariik reje ar Babilonia, ruch'ihil taqe awach aweh ar naa akimiik, ar naa kaat kimuq'aam, ar naakimuhqiik chu'nchel i awamigo, re' i xiq'orik rib'iral taqe i xachukuj q'orik inki i Dios. Re' Jeremías xujal johtoq ree Dios i ti' xuk'ul7QaJaaw Dios re' hat xachuk weh i q'orik, ruum xaq'or weh chi nanaq kiin atoob'eem. Eh re' hin xnunimaj ruum re' hat q'e' wilik awajaawriik chi nuwach i hin, eh yu'naak xi nakanaa' chi k'ahchi' nuk'uhtaam nuk'ixb'ilaal, eh chu'nchel kikaqse'lanik weh.8Jarpech kinq'orik xa re' i rusachariik wach i tinamit, xa re' i ti' k'axik naa ruchaliik i nuq'or rib'iral. Ruum taqe re' xak'ahchi' keeb' chi nub'ajariik, chi nukaqse'ljiik, eh ruum wo' i ruq'orariik aak'uhb'aal.9Re' hin je' wili i xnuq'or: Ma' naa ta chik nuq'orom i ruk'uhb'aal i QaJaaw, ma' naa ta chik nuq'oriik parub'ihnaal, kinki. Xa re' la' re' aq'oral cho pan wánima xa je' chik xaq q'aaq' imponik wach nub'aqil noq inwik'raaj xwaaj naq nukanaam ruq'orariik, xa re' la' xama' xnukanaa' ta wo' hoq.10Re' hin imb'iraj chi re' taqe i tinamit aha' ta chik ma' nkikoj numahk je' wili inkiq'or: Ruum i reh aha' ta chik ma' wilik i yohb'aal, qaq'or taq chi ru mahk i reh, inki taqe. Eh re' taqe wamigo k'ahchi' wo' kuy-eem i keh chi naa nuq'eb'em wiib', je' wili inkiq'or: Qilow taq nee oon inche ruyeew riib' chi jot'arik chi je' re' neerutoj wach qeh i rub'an, inki taqe.11Xa re' la' re' hat QaJaaw Dios nim awajaawriik wilkaat wuuk' chi nuko'ljiik ma' awach ta neenq'atwik awach. Re' taqe i ki-ixowanik nuwach ma' xta naa kiin kuchem, naa ruchaliik kik'ixiik ruum ma' naa takeliik korik, naa kikahniik chi ma' xta chik kajaawriik chi jumpech.
12QaJaaw Dios nim awajaawriik. Re' hat i nawilow i ránima i rukapeb'aal i ju'jun. Ruum aj re' inwaaj chi nee nak'uhtaaj weh nik' wach noq naa taqe aye'em chutojariik i kimahk i ki-ixowanik nuwach. Re' hin xnukanaa' chik panaq'ab' i nuk'axkiil.
13Re' hin i nuq'or taq aweh chi chatz'uyej taq wach i QaJaaw chayeew taq ruloq'il. Ruum re' hin q'e' naq ti' nuk'ux, eh xi ruko'leej pan kiq'ab' i yiib' wach kina'ojb'al.
14Xa re' la' re' hin i nuq'or chi ma' ta naq xin-aasjik ruuk' i nutuut chupaam i q'iij xin-aasjik wii' ruum re' hin i nukapaaj chi re' q'iij re' re' ma' holohik taj.15Eh i nuq'or wo' hoq chi ma' holohik ta xb'anik awach i xye'wik rusuqkiil ruk'ux i wajaaw noq xuq'or rib'iral reh chi re' hin naa wasjiik.16Re' reh i ruk'ul chi naa rusachariik wach je' rukab' noq xusach kiwach i ki'ib' chi tinamit i Dios ma' xuketelaaj ta kiwach, nee ta naq i ruk'er chii' pantaq wahq'eq, eh kab'lajora i q'iij.17Wita re' Dios xuyeew q'ab' chi xin kimik noq ko hin naq rihqaam i nutuut ar naq xin kahnik chi kamnaq, chi je' re' ma' xin-aasjik ta naq chik chi jumpech.18¿Chib'ih ta wo' inchirutiq chi xin-aasjik ruuk' i nutuut, xa re' inchel i ti' xa re' inchel i ruti'kiil k'uxliis, xa hin inche k'uhtan nuk'ixb'ilaal xin chalik ayu' wach ak'al? Re' ruq'oriik rib'iral chi xchalik i ti' k'axik chinaah i tinamit Jerusaleem
1Re' reey Sedequías xutaq'aaj reje Pasur rak'uun i Malquías ruuk' i k'amal b'eeh aj tiij Sofonías rub'ihnaal rak'uun i Maasías reh chi xoj chi q'orob'jiik i Jeremías je' wili xuq'or ponoq reh:2Re' reey je' wili i xuq'or chaloq: chupahqaaj i rotob'il i QaJaaw Dios chiqiij, ruum re' i Nabucodonosor reey ar Babilonia k'achi' chi q'aq'inik quuk' nee oon i rub'an cho quuk' i QaJaaw je' rukab' taqe i nimaq wach ma' ilooj taj i rub'an. Reh chi re' i aj ixowaal neensutinik reje, inki.
3Re' Jeremías je' wili ruch'aq'weesjiik xub'an i raj taqareel i Sedequías:4Re' QaJaaw i qaDios i hoj, hoj aj Israel je' wili xuq'or: Re' hin naa wesam i kajaawriik i raj q'aq'ineel i Sedequías, eh ma' xta chik naa rukamaniik wii' i ch'ihch' reh q'aq'inik wilik pan kiq'ab'. Re' naq inkik'ulb'ilej wii' i kireey i aj Babilonia. Eh re' taqe i aj Caldeo wilkeeb' reje chi junsuut i tz'aq, korehtaal inumol kiwach panyejaal i tinamit wili.5Eh re' rutinamiit i Sedequías, re' hin naa nub'aniik i peleto ruuk' i runimaal i wajaawriik ruum yohb'aal wach i nujosq'iil.6Re' hin naa nuye'em i ti' k'axik chikinaah, chi winaq chi ixoq chi chikop naa kikimiik ruum i yiib' wach yab'ilaal.7Eh re' Sedequías kireey i aj Judá ruch'ihil taqe i aj kamanoom naa taqe nuq'asam pan q'ab' i Nabucodonosor, pan kiq'ab' i nixowanik kiwach xiik' naah kikojsq'iil. Re' taqe i ru soldado, re' taqe i tinamit ma' naa ta kikimiik ruum q'aq'inik, ruum wi'jaleel, naa nuq'asam taqe pan kiq'ab' i aj ixowaal re' re'. Eh re' keh naa rukansaniik keh ruuk' q'aslaj ch'ihch', ma' naa ta ruketeljiik kiwach ma' naa ta rukuyariik i kimahk.
8Eh cha q'or keh i tinamit wili chi je' wili: Re' QaJaaw Dios je' wili ruq'or: Re' hin i nuyeew q'ab' keh chi neenkisik' wach i kiib' chi b'eeh re' i rub'eeh i k'achariik, oon re' rub'eeh i kimik.9Awach i naa rukahniik chupaam i tinamit wili naa rukimiik ruum q'aq'inik, ruum wi'jaleel, ruum yab'ilaal. Eh awach i naa reliik reje ayu' i naa ruq'asam riib' pan kiq'ab' i aj Caldeo, re' taqe i k'ahchi' kib'aniik i q'aq'inik chupaam i tinamit wili. Re' reh ma' naa ta rukimiik naa ruko'leem riij i ruk'achariik.10Re' hin xchalik nuk'aah kuuk' i tinamit wili, ma' re' ta suq i naa nuk'amam cho chikinaah, ti' k'axik la' i naa nuk'amam chaloq. Naa nuq'asam pan q'ab' i kireey i aj Babilonia, re' reh naa ruk'atwiik ruuk' i q'aaq'.
11Eh chupaam i rupaat i kireey i aj Judá je' wili i naa aaq'orom:
Chab'iraj i ruq'oral i QaJaaw Dios naa ruq'atam q'orik cha naah.12Hat taq riih rumaam i reey David i ti q'atwik taq q'orik cha a'n taq q'ataj q'orik parukorkiil chu'nchel q'iij chawesaj taq panti' k'axik i k'ahchi' rub'an ti' k'axik keh, reh chi ma' nee ta inqop wach i nujosq'iil taq cha naah je' rukab' noq inqop i q'aaq' ma' awach ta chik inchupwik reh, ruum taq i ayiib' wach na'ojb'al. Re' ruq'orariik i ti' k'axik chinaah i tinamit Jerusaleem13Re' taq i hat i wilkaat taq wach k'ixkaab' je' taq aakowiil ab'aj i naa a'n awiib', re' hin i Dios ma' ruk'ul ta nuk'ux taq i na a'n. Je' taq wili inaq'or: Re' hoj ma' awach ta neen k'ulik kaansanoq qeh, eh ma' awach ta neerub'an i chee johtik chupaam i ye'aab' wilkooj wii', tiki taq.14Xa re' la' re' hin naa taq kaat nuye'em chutojariik amahk je' rukab' i ruk'ul taq cha weh. Re' hin naa nuqopom ruq'aq'al taqe i rax chee' wilkaat taq wii' re' re' naa rusachwiik taq awach, je' wo' chu'nchel i chib'ih jariik i wilkeeb' taq cha junsuut, inki Dios. Re' ruq'orariik chib'ih i xkik'ul i xi wihik cho chi reyil Judá
1Re' QaJaaw Dios je' wili i xuq'or weh: Hiy parupaat i kireey i aj Judá ar neenaq'or reh taqe i q'orik wili:2Hat kireey i aj Judá je' rukab' noq xwihik cho chi reyil i David chab'iraj i ruq'oral i Dios naa nuq'orom aweh hat, i ruk'ul wo' chi naa kib'iram taqe i kikamanik awuuk' taqe aatinamiit kiokik cho chupaam aa ye'aab' wili.3Je' wili i ruq'or i QaJaaw Dios: Parub'ehel naa kianam i q'ataj q'orik, naakiko'leem inq'ucharik i chib'ih keh. Eh mankelq'aaj i chib'ih keh i aj pan tokoom tinamit, je' wo' taqe ixoq kamnaq kib'ahiil, je' wo' taqe i ma' xta kituut kajaaw. Eh maa nkikansaj chik ma' xta kimahk, chupaam i ye'aab' wili.4Wila' xti korik chi xkinimaj i nuq'oral juneliik naa ruwihiik i reey chinaah i tinamit re' re' je' rukab' noq xwihik cho chi reyil i David. Re' keh pan kareta, rij kawáyu wilkeeb' noq naa kokiik cho chupaam i ye'aab' wili kuch'ihil taqe i naa rukamaniik kuuk' kuch'ihil taqe i kitinamiit.5Eh raaj wila' ma' xkinimaj i xnuq'or keh, re' hin xti nuq'or i korik chi re' paat wili i na a'n wii' i taaq'anik naa rusachariik wach chi jumpech, inki Dios.
6Ruum re' reh je' wili ruq'orom cho chi riij i paat i rub'an wii' i taaq'anik i kireey i aj Judá:
Re' hat q'e' naq tiwaaj je' rukab' noq inwaaj i yuuq' Galaad, i yuuq' Líbano, xa re' la' re' hin i nuq'or i korik chi naa akahniik chi xa je' chik akab' i ye'aab' chiq yuuq', eh chi je' akab' i tinamit ma' xta patineel chupaam.7Eh naa nuk'amam taqe chaloq i naa ruk'uliik sachwoq taq wach aatinamiit wilik kich'ihch' pan kiq'ab' naakiyok'om taq aach'iit re' ruuk' i chakaltee' naa kikutum pan q'aaq'.
8Ma' k'isiin i naakik'iik ilwoq reh i tinamit re' re', je' wili i naa kiq'orom chikiwach: ¿Chib'ih reet noq xusach wach i QaJaaw Dios i tinamit wili xanaah re' xiik' naq naah nimaal? inko'q taqe.9Eh je' wili kichaq'weesjiik naa rub'aan: Je' re' xuk'ul ruum ma' xkian taj aha' naq wilik i xkiyejaa' wach ruuk' i QaJaaw Dios. Re' la' chik i tiyoox xkiloq'ej, re' chik taqe i re' xkikamaneej wach kiuchjoq, inki Dios.
10Re' taq i hat maawoq'ej taq i rukimiik reey Josías. Re' la' chawoq'ej taq i rak'uun Salum rub'ihnaal, ruum re' reh naa ruk'amariik reje pan tokoom tinamit. Eh ma' jaruuj ta chik naa rusutiniik chaloq, ma' naa ta chik rilom wach i rutinamiit x-aasjik wii'.
11Ruum re' i QaJaaw Dios je' wili ruq'or chi riij i Salum, rak'uun i Josías kireey i aj Judá. Re' Salum re' re' wilik chi reyil chi jilow i rajaaw naa ruk'amariik reje pan tokoom tinamit ma' jaruuj chik naa rusutiniik cha yu' parutinamiit.12Ar la' naa rukimiik chaloq pan tokoom tinamit re' naa ruk'amariik reje wii' ma' naa ta chik rilom wach chi jumpech i ruye'aab' wili.
13Re' hat reey Joacim q'e' ti' i naa ak'ulum ruum ruuk' taqe yiib' wach na'ojb'al ruuk' i leq' inayejaa' i paat i na a'n wii' i taaq'anik je' wo' taqe najt kinaah paat inayejaa' inamin taqe pankowlaj kamanik taqe i tokoom, eh ma' natoj ta taqe.14Re' hat je' wili inaq'or: Re' hin naa nuyejaam i nunim laj paat naa nub'anam wii' i taaq'anik, eh k'ih tahs paam naa nub'anam naa nukojom taqe ru ventanahiil. Eh naa nukojom ruka'taah chi tz'ilom re' ruuk' i chakaltee', naa wiq'omaam wach ruuk' i kaq laj iq'oom tiki.15¿Mi nakapaaj re' i hat chi re' reyil manlik ruuk' chi xoyimaj wach aapaat cha junsuut ruuk' i tz'ilom i chakaltee'? Korik re' awajaaw Josías xub'an rusuqkiil i ruwa' ruum re' korik i xub'an eh parub'ehel xub'an i q'ataj q'orik ruum aj re' suq xwihik.16Re' reh xuko'lej riij i ajwaal wach chi keh i neb'aa', taqe xb'aan cho ti' k'axik keh, ruum aj re' suq xwihik, ¿Mi ma' ruuk' taqe re' re' xk'utinik chi xirunimaj? inki QaJaaw Dios.17Eh re' hat xa re' inakapaaj chi naa areqem atumiin ruuk' i leq' eh chi naa akansam taqe ma' xta kimahk chi nayeew taqe panti' k'axik chi nawelq'aaj i chib'ih keh aatinamiit, inki.
18Re' QaJaaw Dios je' wili xuq'or chi riij i reey Joacim rak'uun i Josías kireey aj Judá.
Re' Jocim ma' awach ta naa roq'iniik reh na'kimoq ma' awach ta naa ruq'oriik chi je' wili: Q'e' ti' xuk'ul ma' ko'q ta taqe i ras i ruchaaq'. Q'e' ti' xuk'ul i qajaaw reey nim rajaawriik ma' ko'q ta taqe.19Ma' naa ta kimuq'aam naakiqerem reje i ruti'jolal chi riij i tinamit Jerusaleem je' rukab' noq inkiqerej reje i ruti'jolal i b'uurux ma' nkimuq'aa' taj, inki.20Re' taq i hat aj Jerusaleem johteen taq chinaah i yuuq' Líbano cha k'er taq aachii' kow taq tiq'oroq reje chinaah i yuuq' Basán, eh k'ul taq cha k'er reje aachii' ruum chu'nchel i q'e' naq taq inak'ax xsacharik chik kiwach.21Re' hin xat nuq'oreej wo' naq taq noq kosuq taq wilkaat, xa re' la' xama' xinawaaj ta wo' taq ab'iram. Eh xa je' wo' re' i na a'n taq noq kore' xatoq'aa' taq cho nimanik, xama' xinawaaj ta wo' taq ab'iram.22Re' taqe i k'amal ab'eeh xajunhuup chi teew naa ruk'amwiik reje keh, chu'nchel i q'e' naq taq inak'ax naa kik'amariik reje pan tokoom tinamit. Eh re' taq i hat naa taq ak'uhtaam ak'ixb'ilaal, naa rukahniik chi xama' xta chik taq awajaawriik, ruum taq ayiib' wach na'ojb'al.23Re' taq i hat yu'naak xasuq taq chik ak'ux chi wihik chupaam taq apaat, akojom taq tz'ilom chuwach re' ruuk' i chakaltee' inchalik ar Líbano. Xa re' la' ponik reh i q'iij chi naa ruchaliik taq i ti' k'axik cha naah xa je' chik rukab' i ruti'kiil ixoq noq ink'ulik ruk'ux, inki Dios.
24Re' QaJaaw Dios je' wili xuq'or reh Jeconias, rak'uun i Joacim reey ar Judá: Re' hin xti korik i nuq'or aweh atoob' ta naq je' hat nulopq'aaq' wilik ju' rusak'aaj nuq'ab' q'e' iloq weh re' i hin xa nee wo' naq tiinub'oq iloq ar.25Reh chi nee ti nuq'asaj pan kiq'ab' taqe i ki-ixowanik awach i xiik' naah kijosq'iil, re' taqe i xiik' naah tiyo'jik kuum. Naa wo' kaat nuq'asam pan q'ab' i Nabucodonosor kireey i aj Babilonia, eh pan kiq'ab' i aj Caldeo.26Naa nuye'em q'ab' chi naa ak'amariik reje pan tokoom tinamit i hat, je' wo' hoq i atuut, ma' re' ta taq xat aasjik wii'. Ar taq naa akimiik cho akab'cheel, inki.27Je' re' noq re' keh ma' jaruuj chik naakisutiniik cho pan kitinamiit re' i xanaa naq chik kaajwaam kilom wach.
28Re' Jeconias naa rukahniik chi xa je' chik rukab' jino'q paxeel laj pulato. Eh chi je' rukab' i paxeel ak'al xaro ruum naa ruk'amariik reje pan tokoom tinamit i reh, je' wo' taqe i rak'uun rixq'uun.29Re' taq i hat wilkaat taq wach ak'al eh chawunchelaal taq i wilkaat taq wach ak'al xti chab'iraj taq i ruq'oral i QaJaaw Dios.
30Chatz'ihb'aaj taq i naa ruk'ulum i winaq re' re'. Ruum re' reh naa rukahniik chi xa je' ma' xwihik ta rak'uun rixq'uun, eh ma' xelik ta korik paruk'achariik ruuk' taqe i xub'an. Ruum ma' jino'q i rak'uun ma' jino'q i riih naa rokiik chi reyil ar Judá je' rukab' noq xwihik cho chi reyil i David ar, inki. Xuq'or i Dios chi naa wo' chik kisutinik chaloq i rutinamiit
1Re' QaJaaw Dios je' wili i xuq'or: Q'e' ti' inakik'ulum i aj cha'joom inkisach wach, inkitukej wach i nutinamiit taqe nutentzuun.
2Ruum aj re', re' QaJaaw, i qaDios i hoj, hoj aj Israel je' wili i xuq'or keh i kicha'jinik reh i rutinamiit: Re' taq i hat xatukej taq kiwach i nutinamiit, re' taqe nutentzuun xa kaaj taq reje ma' xacha'jej ta taq. Re' hin naa taq kaat nuye'em chutojariik amahk ruum ayiib' wach na'ojb'al taq xa a'n.3Re' hin naa wo' chik numolom kiwach i ruqox i nutinamiit re' taqe i nutentzuun, re' i xnutaq'aaj taqe reje wii' chupaam i ju'jun chi tinamit, naa wo' chik nuk'amam taqe chaloq pan kitinamiit naa nuk'uxlaam taqe, eh naa kik'ihaaxb'iik.4Eh re' hin naa nukojom cha'jen keh, reh chi naa kicha'jaljiik chi korik kuum, ma' naa ta chik kiyo'jiik ma' xta chik i naakik'ulum, ma' jino'q chik keh i naa rusahchiik wach, inki QaJaaw Dios.
5Eh je' wo' chik wili i xuq'or: Naa ruponiik i q'iij chi re' hin naawuksam cho jino'q i xikin riih i reey David re' chik i reh naa rokiik chi reyil korik wach ruk'ux, re' holohik, eh parub'ehel naa rub'anam i q'ataj q'orik chinaah chu'nchel i wach ak'al.6Noq naa ruwihiik chi reyil i reh naa ruko'ljiik i tinamit Judá, je' wo' hoq i tinamit Israel pansuqkiil k'uxliis chik naa kik'achariik. Eh je' wili i naa rubíhnaam jinaj i Dios korik wach ruk'ux quuk', inko'q taqe reh, inki.
7Eh re' QaJaaw Dios je' wili xuq'or: Re' hin korik i nuq'or chi naa ruponiik i q'iij chi ma' naa ta chik kiq'orom chi je' wili: Xti k'achlik i QaJaaw Dios x-esanik cho keh i aj Israel paruyuq'ul i Egipto, ma' ko'q ta chik taqe.8Je' la' chik wili i naa kiq'orom: K'achlik i QaJaaw Dios x-esanik cho keh i aj Israel chupaam i tinamit wilik pantz'eet reje reh i rookb'aal q'iij. Eh xresaj chaloq i rutinamiit chupaam taqe i tinamit kitukem naq wii' kiib', inko'q taqe, ruum re' hin naa wo' chik nuk'amam taqe cho pan kitinamiit, inki. Re' xq'orarik keh chi naa rub'aan kuuk' taqe i jalal ruq'oral i Dios ma' korik ta wach kik'ux9Kuum taqe i jalal ruq'oral i Dios ma' korik ta wach kik'ux, xan yot'ik chik i wánima xakib'arb'otik chik chu'nchel i nub'aqil. Xa je' chik nukab' i winaq ma' rukuy ta chik i ruxohk'riik noq inwik'raaj, ruum kiyo'jik chuwach i QaJaaw Dios, chuwach i ru santo laj q'orb'al.10Ruum re' i tinamit wach ak'al xa re' chik i ch'uwarisanik wach kikaxaro, xa re' i yiib' wach na'ojb'al inki a'n ruum i yiib' wach na'ojb'al inki a'n xkahnik i qaye'aab' chi ma' xta chik i wilik chupaam. Re' taqe k'im inkik'ux naq i chikop xchiqik chi jumpech.
11Re' QaJaaw Dios je' wili xuq'or: Re' taqe i jalal naq nuq'oral, taqe i k'amal kib'eeh aj tiij re' wo' taqe haa' chub'anariik i yiib' wach na'ojb'al. Re' hin xnureq taqe panupaat chub'anariik.12Re' i keh panq'equm paam b'eeh pan kalik naakib'eeh, xa k'isiin naakimihnjik naa kiqehb'iik. Ruum re' hin naa nuye'em i ti' k'axik chikinaah noq naa ruponiik i q'iij chi nuwach i hin, inki QaJaaw Dios.
13Re' hin xwilow taqe i kijalwik naq nuq'oral ar Samaria chi wilik taqe i ma' imponik ta chi nuwach inki a'n re' chik i tiyoox Baal xkiq'or rib'iral. Ruuk' taqe re' xkiyeew q'ab' chi xkiq'eb' kiib' i nutinamiit Israel.14Eh xwilow kuuk' taqe i kijalwik nuq'oral ar Jerusaleem chi xkian yiib' wach na'ojb'al, xa re' i ch'uwa'risanik wach kikaxaro, xa re' i chukuj q'orik inki a'n Eh inkiyeew rukowiil kik'ux i yiib' wach kib'anik reh chi ma' jino'q keh i neenkikanaa' rub'aan. Re' taqe re', ruch'ihil chu'nchel i tinamit wilkeeb' ar xa je' kikab' i tinamit Sodoma i tinamit Gomorra.15Ruum aj re', re' hin i Dios wilik wajaawriik, je' wili i xnuq'or chikiij i jalal nuq'oral re' re': Re' hin je' na naa nuye'em keh chi k'uxarik xiik' naah k'ahiil, je' na naa nuye'em keh chi uuk'jik i k'ahlaj ha', ruum kuuk' taqe i kijalwik nuq'oral ar Jerusaleem xelik chaloq i k'ulb'anaj wachiis. Eh xooj chi nimaal chinaah chu'nchel i wach ak'al kinki.
16Eh re' QaJaaw Dios wilik rajaawriik je' wili i xuq'or: Re' taq i hat aj Israel manimaj taq inkiq'or i jalal naq nuq'oral, ruum re' inkiq'or taq aweh xachukuj q'orik, ruuk' i re' inkiyeew taq rukowiil ak'ux, xa re' keh kitz'aqwik wach. Eh re' inkiq'or chi nkilow pan kisaqwiriik xa pankanima inchalik ma' re' taj i hin kink'uhtanik keh.17Eh je' wili inkiq'or taqe i ki-ixowanik wach i nuq'oral: Re' Dios xuq'or chi ma' xta taq ti' naa awilom wach, inki taqe eh chi re' taqe i ma' holohik ta kib'anik suq naa kiwihiik. Eh re' inki a'n i nelik cho pankanima Ma' jino'q i ti' k'axik naa ruchaliik chikinaah inki taqe, inki i Dios.
18¿Mi wilik jino'q keh i jalal naq ruq'oral i Dios i naab'inik reh i wilik cho panránima i Dios? ¿Mi wilik jino'q i rilom wach, eh rib'iram i ruq'oral? ¿Mi wilik jino'q i xuyeew ruk'ux chi rib'irjiik i ruk'uhb'aal eh xuk'am naah?19Re' QaJaaw Dios yohb'aal wach i rujosq'iil naa ruye'em chikinaah taqe i yiib' wach kina'ojb'al xa je' chik rukab' noq inchalik i kowlaj jab' i kowlaj kaq suut teew.20Re' QaJaaw Dios ma' jaruuj naa resam i rujosq'iil chikinaah, korehtaal i rub'an i ruyejaam wach paránima. Eh pan jinaj q'iij naa taq areqem chi riij chib'ih reet noq narojiik eloq wach taqe i re'.
21Re' taqe i jalal naq nuq'oral ma' hin ta xin taaq'anik reje keh chi chukuj i q'orik. Eh re' keh xankiyeew chik kik'ux chub'aan, ma' hin ta xin taaq'anik reje keh. Re' keh xakajiim chik kiooj chub'aan.22Wita xkik'am naah inwaaj i hin, re' naq i nuq'oral xkiq'or reh i nutinamiit. Eh xkesaj naq taqe chaloq chupaam i kiyiib' wach b'eeh, eh xkitik'aa' wo' naq rub'aan i kiyiib' wach na'ojb'al.
23Re' QaJaaw Dios je' wili xuq'or: Re' hin xa hin wo' Dios chi najt chi ma' najt.24Je' re' noq ma' jino'q i rukeb'aa' riib' chi nuwach. Re' hin inwilow paam chu'nchel i taxaaj, je' wo' paam chu'nchel i wach ak'al. Re' wili korik ruum re' hin i Dios kinq'orik.
25Re' hin xb'iraj i chukuj q'orik xkian taqe i jalal naq nuq'oral, re' re' je' wili inkiq'or: Parub'ihnaal i QaJaaw wilik i ruk'uhtaaj qeh pan qawiriik, inki taqe.26Re' taqe jalal naq nuq'oral re' re' ¿Kojaruuj inkimay ruq'orariik i xama' korik ta wo' hoq, re' taqe i xa re' i chukuj q'orik xa re' keh kitz'aqwik wach?27Eh ruuk' inkixohk'reej pan kiwirik inkiq'or chikiwach inchalik ruyojiik kik'ux intohq'ik kikanaam nunimjiik i hin. Je' rukab' noq xkikanaa' cho nunimjiik i kimaam kati't, re' chik xkinimaj i tiyoox Baal.28Eh awach i jalal naq nuq'oral wilik i xixohk'reej paruwiriik, re' wo' chuq'or i k'uhtjik reh. Awach i re' i nuq'oral i ruk'ul re' wo' nuq'oral chuq'or. Ruum re' naq'wach i Trigo ma' elik ta wach ruuk' i rusohk'iil, inki Dios.29¿Mi ma' je' rukab' re' i q'aaq' i nuq'oral? ¿Mi ma' je' rukab' re' i nimlaj paxb'al ab'aj?
30Ruum aj re', re' hin ma' ruk'ul ta nuk'ux chi re' taqe i jalal naq nuq'oral k'ul inkiq'or chikiwach chi je' re' i nuq'or, inki.31Eh je' wo' chik wili i xuq'or i QaJaaw Dios: Re' hin ma' ruk'ul ta nuk'ux chi re' taqe i jalal naq nuq'oral re' re' inkiq'or chi re' nuk'uhb'aal i hin inkiq'or rib'iral xanaah re' xa re' wo' keh kiyej-anik wach.32Eh ma' ruk'ul ta nuwach chi re' taqe i jalal naq nuq'oral inkiq'or rib'iral inkilow pan kiwirik xanaah re' xama' korik ta wo' hoq. Ruuk' taqe chukuj q'orik ruuk' taqe i xa kina'ojb'al i keh inkiyoj ruk'ux i nutinamiit. Ma' re' taj i hin kitaaq'anik keh, ma' hin ta kinq'orik keh taqe re'. Re' keh ma' xta kina'ojb'al chi kitoob'jiik taqe i tinamit, inki i Dios.
33Re' hat Jeremías wixkipahqaaj aweh i tinamit oon jino'q keh taqe jalal naq i nuq'oral, oon jino'q keh i k'amal kib'eeh aj tiij chi je' wili: ¿Nik' wach i ruq'or i QaJaaw Dios? inko'q taqe aweh. Re' hat je' wili taq i naa aq'orom: Re' ruq'or i QaJaaw Dios, re' chi naa taq kaat rukanaam cha wutkeel, tiko'q keh.34Eh wila' re' taqe i tinamit, taqe i jalal naq nuq'oral, taqe k'amal kib'eeh aj tiij nee nq'orik reh chi je' wili: Re' wili i xuq'or i QaJaaw Dios inko'q chi k'onb'al reh i nuq'oral i hin, hin Dios. Re' hin naa nuye'em i ti' k'axik chinaah i reh chikinaah i awach reh parupaat.35Neerub'an chi nee rupahqaaj reh i ramigo i ju'jun oon reh i awach reh chi je' wili: ¿Chib'ih xchaq'wik cho wii' i QaJaaw? ¿Chib'ih i xuq'or i QaJaaw? inko'q.36Xa re' la' ma' nee ta chik i rub'an chi nee taq ink'ulik pankik'ux i xuq'or i QaJaaw, ruum chu'nchel taq aq'oral naa rukamaniik chi wilik i ti' naa ruk'amam chaloq ruum xayoj taq wach i ruq'oral i k'achlik Dios, re' i Dios wilik rajaawriik chinaah chu'nchel.37Eh re' hat Jeremías cha pahqaaj keh i jalal naq nuq'oral chi je' wili: ¿Chib'ih i xatruchaq'weej taq wii' i QaJaaw Dios? ¿Chib'ih i xuq'or taq weh? tiko'q keh.38Wila' xaq'or chi je' wili: Re' wili i xuq'or i QaJaaw Dios inko'q taqe. Re' QaJaaw Dios je' wili i ruq'or taq cho chawiij: Ruum chi xaq'or taq i q'orik re' re' je' wili i xuq'or i QaJaaw tiki taq. Eh xnutaq'aaj naq ruq'orariik chi ma' naa ta taq aq'orom chi re' wili ruq'or i QaJaaw, kinki.39Ruum re' i korik i nuq'or taq aweh chi naa taq asahchik panuk'ux naa wesam pan naq'nuwach i tinamit xnuyeew naq cho keh aamaam awati't.40Eh chi juneliik naa wesam taq i runimaal awach naa nuye'em q'ab' chi naa taq ak'uhtaam ak'ixb'ilaal, ma' naa ta rusahchiik pank'uxliis chi jumpech, inki Dios. Re' i kiib' chakach chi higo xk'uhtjik reh i Jeremías paru saq wiriik
1Eh noq re' Nabucodonosor ruk'amam chik reje pankowlaj kamanik ar Babilonia i kireey i aj Judío Jeconias rak'uun i Joacim. Eh xi k'amarik taqe reje haa' i k'amal kib'eeh aj Judá, taqe i kiyej-anik reh i xa chib'ih jariik, taqe i aj ch'eyel ch'ihch' wilkeeb' Jerusaleem. Re' QaJaaw Dios xuk'uhtaaj weh i ki'ib' chakach chi higo wilik i koq chuwach i rupaat i Dios ar Jerusaleem.2Eh jinaj i chakach q'e' holohik ruq'aniil i higo wilkeeb' chupaam, re' i higo wilkeeb' chupaam i chakach jinaj i q'e' chik yiib' wach k'ahchi' chik kiq'ahiik ni xata naq chik nee ruyeew riib' chi k'uxarik.3Eh re' i QaJaaw Dios je' chik wili xuq'or weh: ¿Chib'ih jariik i k'ahchi' awilom wach i hat Jeremías? inki. Re' hin je' wili xnuq'or: Re' hin k'achi' wilom kiwach i higo xa re' la' jinaj chakach i xiik' naah kiholwochiil, eh jinaj chakach xiik' naah yib'kiil kiwach, ni xata naq chik nee ruyeew riib' chi k'uxarik kinki.
4Eh re' i QaJaaw Dios je' wili xuq'or weh:5Re' hin i ki Dios i aj Israel je' wili nuq'or: Re' i holohaq laj higo wilkeeb' chupaam i chakach jinaj kijalwaach taqe i aj Judá naa kik'amariik reje pankowlaj kamanik chupaam i kiyuq'ul i aj Caldeo, re' i xnub'an keh re' re' jinaj otob'il chi keh.6Re' hin naa nuko'liniik keh, naa wo' chik nusutem taqe cho chupaam i kitinamiit wili. Eh naa nuye'em q'ab' chi naakeliik korik ayu' ma' naa ta chik nusacham kiwach, naa taqe nuye'em pan kiye'aab' ma' naa ta chik wesam taqe reje.7Re' hin naa nuye'em keh jinaj i ak' laj kapeew reh chi nee kinkikoj chi hin kaJaaw, eh hin ki Dios chi je' re' nee kikahnik chi nutinamiit taqe. Eh re' hin naa nukahniik chi hin ki Dios, ruum chu'nchel i kánima naa wo' chik kinkinimam.
8Eh re' taqe i higo xayiib' chik kiwach k'achi' chik kiq'ahiik rujalwaach i Sedequías kireey i aj Judá kuch'ihil taqe i k'amal kib'eeh i tinamit kuch'ihil chu'nchel i ruqox i tinamit xi kahnik Jerusaleem, kuch'ihil taqe i xiooj chi patinik Egipto. Eh naa nub'anam keh je' rukab', imb'aan reh taqe i q'aah laj higo ma' ruyeew ta chik riib' chi nk'uxarik.9Wilik i naa nub'anam kuuk' eh ruum i re' naa ruchaliik kiyo'jiik chu'nchel i tinamit wach ak'al. Ruuk' i re' naa wesam i runimaal kiwach, eh naa ruxoowjiik kiwach, ma' holohik taj i naa ruq'orariik chikiij chupaam taqe i tinamit aha' naa nuye'em q'ab' chi naa kik'amariik reje.10Re' hin naa nutaq'aam reje i q'aq'ineel, i wi'jaleel, i yab'ilaal chikinaah, korehtaal inkuxik kikimiik ma' jino'q chik i naakikahnik chupaam i ye'aab' nuye'em kekeh, re' wo' i nuye'em cho keh i kimaam kati't, inki i Dios. Lajeeb' ru kajwinaq haab' i ti' k'axik i xponik kik'ul pan tokoom tinamit i aj Israel
1Re' QaJaaw Dios xuq'or cho reh i Jeremías i ruk'uhb'aal wili re' wo' xq'orarik cho keh i aj Judá re' noq kijib' haab' chik rokiik chi reyil ar Judá i Joacim, rak'uun i Josías. Pampeet haab'rokiik chi reyil ar Babilonia i Nabucodonosor.2Re' i Jeremías jalal ruq'oral i Dios xuq'or i k'uhb'aal keh chu'nchel i aj Judá, je' wo' keh chu'nchel i aj Jerusaleem, je' wili i xuq'or keh:3Xa re' wo' noq oxlaj haab'rokiik chi reyil i Josías ar Judá rak'uun i Amón nutoq'aam cho ruq'orom taq aweh i ruk'uhb'aal i Dios, eh xata wo' jarpech taq xat nuq'oreej, eh xk'uloq ayu' yu'naak. Ixib' ru ka'winaq haab' nutoq'aam chaloq, eh re' taq i hat xama' nab'iraj ta wo' taq.4Atoob' ta re' Dios xata wo' jarpech rutoq'aam taq cho aq'orob'jiik, chu'nchel i raj kamanoom taqe i jalal ruq'oral, eh re' taq i hat xama' nab'iraj ta wo' taq xama' nanimaj ta wo' taq chib'ih inkiq'or.5Re' keh je' wo' naq wili inkiq'or taq aweh: Chakanaa' taq ayiib' wach b'eeh, cha kanaa' taq ayiib' wach na'ojb'al, chi je' re' nee taq ti k'acharik chupaam i ye'aab' wili xuyeew taq chaaweh i Dios i hat, re' wo' xye'arik cho keh taq aamaam awati't reh junelik.6Manimaj taq i tiyoox, maa kamaneej taq kiwach, eh maa yeew taq kiloq'il. Mayeew taq rujosq'iil i QaJaaw Dios ruuk' i kilooqjiik taqe i tiyoox xa atz'aqam taq ruuk' aq'ab', chi je' re' ma' xta wo' ti' k'axik nee ruyeew taq cho cha naah i hat inki wo' naq taqe.7Ruum aj re', re' i QaJaaw Dios je' wili i xuq'or taq cha weh: Re' taq i hat ma' kinanimaj ta taq, xayeew taq nujosq'iil ruum xaloq'ej taq i tiyoox xa re' taq i hat xatz'aqwik keh. Ruum i re' xak'am taq chaloq i ti' k'axik cha naah, inki.
8Eh wili i xuq'or i QaJaaw Dios nim rajaawriik: Ruum chi re' taq i hat ma' xanimaj ta taq aq'ilariik xnub'an.9Re' hin naa nuk'amam chaloq i tinamit wilkeeb' pantz'eet reh rookb'aal q'iij. Naa nuk'amam chaloq i Nabucodonosor kireey i aj Babilonia re' reh naa nukojom chi pleto kuuk' i tinamit wili, eh naa rukuxiik rub'anam keh i patineel wilkeeb' chupaam. Eh je' wo' i tinamit wilkeeb' chi junsuut i tinamit wili, eh naa nukanaam chi ma' xta chik i wilik chupaam, xa ti yo'joq chik ruum naa rukahniik.10Eh ma' naa ta chik nuye'em q'ab' chi naa ruwihiik i tz'uuy pan kitinamiit, ma' naa ta chik ruwihiik rusuqkiil k'uxliis. Eh ma' naa ta chik rub'aan i ninq'ijinik i tz'uuy reh kaxáro, ma' naa ta chik rib'irjiik i keeb'al, naa rukahniik chi xaq'equm chik kipaam i tinamit.11Chu'nchel i tinamit wili naa rusachariik wach, naa rukahniik chi ma' xta chik i wilik chupaam. Eh jar ch'uq i tinamit Israel chu'nchel naa kik'amariik reje chi ri'sil i rajaawriik i kireey i aj Babilonia, chuwach i lajeeb' rukajwinaq haab'.12Eh noq ik'inaq chik i lajeeb' rukajwinaq haab' naa nuye'em chutojariik i ru mahk i Nabucodonosor, re' i kireey i aj Babilonia, chi riij nik' nimaal i ru mahk xub'an. Eh naa nuye'em taqe chutojariik i kimahk i rutinamiit je' wo' taqe i aj Caldeo. Re' hin naa nusacham kiwach chi jumpech.13Re' hin naa nuye'em chinaah i tinamit re' re' chu'nchel i ti' k'axik tz'ihb'amaj rehtalil chupaam i huuj wili. Re' i ruq'orom rib'iral i Jeremías chi naakik'ulum chu'nchel i tinamit re' re'.14Ruum re' keh naa wo' kiye'ariik panti' k'axik kuum i k'ih seht chi tinamit, je' wo' kuum i reey q'e' wilik kajaawriik. Re' hin naa nuye'em q'ab' chi naa rub'aan keh reh chi naa nuq'ajam wach keh i nakianam reh i nutinamiit, inki i Dios. Re' i kulk rehtalil i rujosq'iil i Dios xk'uhtjik reh parusaq wiriik i Jeremías
15Re' QaJaaw i qaDios i hoj, hoj aj Israel je' wili i xuq'or weh panusaq wiriik: K'oloq ak'ul panuq'ab' i kulk wili wilik k'ahlaj riis uuva chupaam rehtalil i nujosq'iil naa aye'em keh chi uuk'jik chu'nchel i tinamit aha' naa kaat nutaq'aam.16Eh noq naa kuk'em naa ruchaliik kixab'iik, je' na naa ruchalik kahqalil ruum i q'aq'inik naa nutaq'aam cho chikinaah, inki weh.
17Eh re' hin xnuk'ul wo' chik i kulk pan q'ab' i QaJaaw Dios, eh xponik chik nuyeew keh chi uuk'jik chu'nchel i tinamit xi rutaq'aaj wii'.18Ar chik xtohq'ik reje nuye'em chi uuk'jik Jerusaleem, eh xinooj pan i tinamit Judá, xinooj kuuk' i kireey, eh kuuk' i k'amal kib'eeh, xnuyeew keh chi uuk'jik, reh chi naa rusahchiik kiwach, reh chi naa rub'aan yo'jik kuum, eh chi naa kikaqse'ljiik. Eh chi xab'ajb'al taqe, je' rukab' i k'ahchi' kik'ulum yu'naak.19Eh xinooj chik ruuk' i kireey i aj Egipto, kuuk' i raj kamanoom, kuuk' i k'amal kib'eeh, kuuk' chu'nchel i rutinamiit xnuyeew chik keh chi uuk'jik i wilik pan kulk.20Eh xnuyeew b'ila' chik keh chi uuk'jik i tokoom tinamit wilkeeb' pan kitinamiit, keh i reey wilkeeb' ar Uz, keh i kireey i aj filisteo, keh Ascalón, keh i aj Gaza, keh i aj Ecrón, keh nik' chik k'ihaal i ruqox i tinamit Asdod.21Je' wo' keh i aj Edom, keh i aj Moab, keh i aj Amón.22Je' wo' keh chu'nchel i kireey i aj Tiro, keh i aj Sidón, keh chu'nchel i kireey i tinamit wilkeeb' chi chii' i palaw.23Je' wo' keh i aj Dan, aj Tema, aj Buz, keh i tinamit inkesaj i rismaal kinaah.24Eh je' wo' keh chu'nchel i kireey i aj Arabia, keh i kireey taqe i tokoom tinamit patim taqe chupaam i ye'aab' chiq yuuq'.25Je' wo' keh chu'nchel i kireey i aj Zimri, keh i kireey i aj Elam, keh chu'nchel i kireey i aj Media.26Eh je' wo' keh chu'nchel i reey wilkeeb' pantz'eet reh i rookb'aal q'iij, keh i wilkeeb' chi najt chi ma' najt, keh chu'nchel i reey wilkeeb' chi junsuut i wach ak'al. Chu'nchel i re' xnuyeew keh chi uuk'jik i k'ahlaj vino, wilik pan kulk. Eh re' kireey i aj Babilonia ko xam chik xuk'ej reh noq xwilow.
27Re' hat je' wili i naa aq'orom keh re' i QaJaaw Dios ki Dios i aj Israel nim rajaawriik je' wili xuq'or: Re' wili naa taq awuk'em, naa ruchaliik taq aaxohk'riik, naa ruchaliik taq axab'iik naa taq aq'ehb'iik wach ak'al ma' jaruuj taq chik naa awuktiik, re' wili rehtalil i q'aq'inik naa nutaq'aam taq cha naah, tiko'q keh.28Eh wila' ma' inkaaj kik'ulum aweh i kulk je' wili ineneq'or keh: Re' i QaJaaw Dios nim rajaawriik, je' wili i xuq'or: Re' taqe re' xanaa wo' kuk'em keh i k'ah laj riis uuva wilik pan kulk.29Re' hin naa nutaq'aam i ti' k'axik chinaah i nutinamiit ¿Nik' wach noq inakapaaj taq i hat chi naa taq rik'iik wach anaah i ti' k'axik? Re' hin i nuq'or taq weh chi ma' naa tarik'iik taq cha naah ruum re' hin naa nutaq'aam i q'aq'inik chinaah chu'nchel i tinamit wilkeeb' chi junsuut i wach ak'al, inki Dios nim rajaawriik.
30Eh re' hat cha q'or keh i tinamit chu'nchel i naakik'ulum chi je' wili:
Re' QaJaaw Dios ruuk' rujosq'iil kow naa ruq'oreem chaloq i rutinamiit chupaam i rusantolaj ye'aab'. Eh je' rukab' noq inkik'er kichii' i kiyitz'wik reh i uuva, naa ruk'erem cho chii' chikinaah chu'nchel i k'achareel wach ak'al.31Re' choqik naa rub'anam naa ruponiik chi junsuut i wach ak'al, ruum re' i QaJaaw Dios peleto i rub'an kuuk' chu'nchel i tinamit. Eh re' reh naa ruq'atwiik i q'orik chikinaah i k'achareel, reh chi ruuk' q'aslaj ch'ihch' naa kikanteesjiik taqe i yiib' wach kina'ojb'al, tiko'q keh, inki Dios.
32Re' QaJaaw Dios nim rajaawriik je' wili i xuq'or weh: Re' ti' k'axik re' re' tuslik naa rik'iik reje chupaam i ju'jun seht chi tinamit jinaj i runimaal ti' k'axik naa ruchaliik chikinaah tinamit chi junsuut i wach ak'al, inki.33Eh naa ruye'em q'ab' i QaJaaw Dios chi naa kikimiik chupaam taqe q'iij re' re' xa aha' naa rukahniik tuuch' i kiti'jolal, ma' awach ta naa roq'iniik keh, ma' awach ta naa rumolwiik i kiti'jolal, ni xata naa kimuq'ub'jiik, naakikahnik chi ch'alkeeb' chinaah i wach ak'al chi je' rusaa' chikop.34Re' taq i hat aj cha'joom, taq i hat k'amal b'eeh yiib' taq wach ana'ojb'al cha k'er taq aachii' chi oq'ik, cha tolej taq awiib' pan chaaj ruum i ruti'kiil taq ak'ux, ruum k'ahchi' chikruponiiki q'iij reh taq akanteesjiik reh taqe i rutukjiik awach. Eh naa taq akanteesjiik je' rukab' noq inkanteesjik i q'ina' laj tentzun.
35Eh ma' naa ta chik ruye'em riib' chi naa kimolom chi elik taqe i aj cha'joom, eh ma' ta naakiko'leem kiib' chuwach i ti' k'axik i tinamit inkichajeej.36Korik wo' hoq chi naa rib'irjiik chi naakik'erem kichii' taqe i aj cha'joom, je' wo' koq'iim taqe i kitinamiit, ruum re' QaJaaw Dios naa rukanaam chi ma' xta chik k'uxumb'al keh.37Re' QaJaaw Dios yohb'aal wach naa ruchaliik rujosq'iil naa rusacham wach i kitik wilik pan kiye'aab'.38Re' reh yohb'aal wach i rujosq'iil naa ruchaliik je' rukab' i rujosq'iil i kaq b'ahlam noq inwuktik cho parusuuq', ruum i re' naa rusacham wach tinamit Eh naa nuye'em runimaal q'aq'inik chikinaah. Re' Jeremías xq'orarik chi naa rukanteesjiik
1Eh noq xokik chi reyil i ar Judá i Jocim rak'uun i Josías je' wili i xuq'or weh i QaJaaw Dios:2Re' hat chapab'aa' reje awiib' chuwach i nupaat, eh cha q'oreej taqe jar ch'uq i tinamit wilkeeb' ar Judá, re' i kik'ulik chi nulooq'jiik panupaat. Re' hat cha q'or keh chu'nchel i xnuq'or aweh ma' jino'q chik ineenakanaa' chi ma' nee ta naq'or.3Nee oon naq inche inki a'n i neenaq'or, nee oon naq inkikanaa' i kiyiib' wach na'ojb'al. Re' hin nee wo' naq chik inuketelaaj kiwach ma' nee ta wo' naq i nuyeew i taqe chutojariik i kimahk i nuyejaam wach chi keh.4Re' hat je' wili i neenaq'or keh: Re' i QaJaaw Dios je' wili xuq'or: Wila' ma' xkib'iraj i nuk'uhb'aal xnuq'or keh, i wila' ma' xik'acharik chi je' rukab' i nutijej taqe wii'.5Eh wila' ma' xkinimaj i kiq'ilariik imb'aan kuum taqe i jalal nuq'oral re' taqe i k'ih pech wo' naq nutaq'aam taq cho chaq'orob'jiik, eh re' taq i hat xama' xanimaj ta wo' taqe.6Re' hin naa nusacham wach i nupaat wili, je' rukab' noq xnusach wach i paat ar Silo. Re' taqe i aj Jerusaleem naa kikahniik chi ma' holohik ta rib'iral chikiwach i tinamit wach ak'al tiko'q keh, inki weh i QaJaaw.
7Eh re' taqe i k'amal kib'eeh taqe jalal ruq'oral i Dios, chu'nchel i tinamit xkib'iraj taqe i xuq'or i Jeremías chuwach reje i rupaat i Dios8Noq xukohlaaj ruq'orariik i xq'orarik cho reh ruum i Dios, re' taqe i k'amal b'eeh aj tiij, taqe i jalal ruq'oral i Dios je' wo' chu'nchel i tinamit xkichop i Jeremías, je' wili i xkiq'or reh: Re' hat xti korik noq naa akimiik.9¿Chib'ih reet noq xaq'or chi re' i Dios naa rusacham wach i rupaat wili je' rukab' noq xusach wach i paat ar Silo, chi naa rukahniik chi xan tz'irik chik paam i tinamit wili chi ma' jino'q chik patineel naa rukahniik chupaam? Chu'nchel i tinamit, xchalik kik'aah chinaah i Jeremías eh xkimol kiib' chuwach i rupaat i QaJaaw.
10Eh re' taqe i k'amal kib'eeh i aj Judá noq xkib'iraj i k'ahchi' ruk'ulariik jumehq'iil xiooj chupaam i paat i rub'an wii' i taaq'anik i reey ar kitzunaa' i koq kiib' chi q'ataj q'orik chuwach i ak' puerta. Re' paat re' re' ma' najt ta i koq ruuk' i rupaat i Dios wilik.11Eh re' taqe i k'amal b'eeh aj tiij, taqe i jalal naq ruq'oral i Dios je' wili i xkiq'or keh i k'amal kib'eeh i aj Judá, keh chu'nchel i tinamit: Re' winaq wili i ruk'ul chi nee taq inaq'at i q'orik chinaah reh i runkanteesjiik, ruum xuq'or chi naa rusahchiik wach i tinamit wili, eh re' taq i hat xab'iraj taq ruuk' axikin, inki taqe.12Eh noq rib'iraj chi je' re' i Jeremías, je' wili i xuq'or keh i k'amal kib'eeh i aj Judá, keh i tinamit: Re' hin re' QaJaaw Dios xtaaq'anik cho weh chi naa nuq'orom chi re' tinamit wili naa rusahchiik wach je' wo' i rupaat i Dios, re' i xnuq'or taq xab'iraj.13Je' re' hoq re' taq i hat chajal taq wach ana'ojb'al, je' wo' taq chib'ih i na a'n cha nimaj taq awajaaw aaDios. Chi je' re' ma' nee ta rutaq'aaj taq cho cha naah i ti' k'axik ruyejaam cho wach chi naa taq ak'ulum.14Xa re' la' re' hin yu'naak panaq'ab' taq wilkiin chaq'at taq i q'orik chi nunaah nik' wach i ruk'ul chi weh taq inawilow.15Xa re' la' chanab'eej taq chi korik chi wi xinakansaj taq i hat wach naah i tinamit wili naa rukahniik i nukimiik ruum re' hin ma' xta numahk ruum chu'nchel i xnuq'or taq xab'iraj re' i QaJaaw Dios xtaaq'anik cho weh chuq'orariik, inki.
16Eh re' taqe i k'amal kib'eeh i aj Judá je' wili i xkiq'or reh taqe i k'amal kib'eeh aj tiij, keh i tinamit: Re' i winaq wili korik chi ma' xta ru mahk ma' ruk'ul taj chi neenqa q'at i q'orik chinaah, korik wo' hoq chi re' i xuq'or qeh re' wo' i QaJaaw Dios xq'orik cho reh, inki taqe.17Wilik wo' taqe i mama' winaq wilik kina'ojb'al xipa'lojik johtoq je' wili i xkiq'or reh i tinamit kimolom kiib' ar:18Noq xwihik cho chi reyil i Ezequías ar Judá re' i Miqueas aj Moreset, xuq'or wo' keh chu'nchel i tinamit Judá i xuq'or chee QaJaaw, je' wili i xuq'or:
Re' QaJaaw Dios nim rajaawriik xuq'or chi re' ye'aab' Sión naa rukahniik chi xa je' chik rukab' i ye'aab' ab'iixomaj wach, re' tinamit Jerusaleem naa ruch'a'lojiik wach ak'al. Eh re' yuuq' wilik wii' i rupaat i Dios naa ruchaamb'iik i ch'ahn chuwach, inki.
19Re' i reey Ezequías, re' i tinamit Judá, ¿Mi xkikansaj re' i Miqueas chi riij i xuq'or? Xuyohleej la' wach i QaJaaw Dios i reey, xub'an rutiij chuwach i QaJaaw Dios. Eh re' i QaJaaw ma' xuyeew ta wo' chaloq chikinaah i ti' k'axik ruyejaam naq cho wach. ¿Mi neerub'an re' chi re' hoj neenqayuq'eej i ti' k'axik chi qanaah ruum i rukanteesjiik i winaq wili? inki.
20Eh re' Urías jalal ruq'oral i Dios, rak'uun i Senaias aj pan tinamit Quiriat-jearim xuq'or cho rib'iral chi re' Dios naa rusacham wach i tinamit wili, je' wo' chu'nchel i ruyuq'ul i tinamit, je' rukab' i xuq'or i Jeremías.
21Eh re' reey Joacim ruch'ihil taqe i kikamanik ruuk', taqe i k'amal b'eeh noq xkib'iraj rib'iral i xuq'or i Ursias xkaaj naq kikansam, eh noq xunab'eej i Urías chi je' re' xumol chi elik xooj pan tinamit Egipto.22Eh re' reey Joacim xutaq'aaj ar Egipto i Elnatán rak'uun i Acbor wilik wo' chik taqe i winaq xutaq'aaj reje haa'.23Re' keh xi ponik k'amwoq reh i Ursias ar Egipto xk'ulik kiq'asaj pan q'ab' i reey Joacim, eh xutaq'aaj rukanteesjiik, xuq'or chi naa rumuq'ub'jiik i ruti'jolal chupaam i xanik' wach jul, inki taqe.
24Re' i Ahicam rak'uun i Safán xuko'leej riij i Jeremías, je' re' noq ma' xq'atarik taj i q'orik chinaah, ruum aj re' ma' xkanteesjik ta kuum i tinamit. Re' ruq'orariik chi re' tinamit naakiq'ahtesjiik pan q'ab' Nabucodonosor
1Noq koxokik chi reyil ar Judá i Sedequías rak'uun i Joacim je' wili xq'orarik cho reh i Jeremías ruum i QaJaaw Dios:2Re' hat cha yejaa' junrahp-oq i tz'uhuum cha yejaa' jino'q i per per wach chee', eh neenab'ak' riij awalaq i hat.3Eh neenataq'aaj reje i q'orik reh i kireey i aj Edom, i kireey i aj Moab i kireey i aj Amón, kireey i aj Tiro, kireey i aj Sidón. Re' i q'orik re' re' neenataq'aaj reje chikiij i aj taqareel kik'ulik Jerusaleem ruuk' i Sedequías kireey i aj Judá.4Neenataq'aaj reje ruq'orariik keh chi neenkiq'or reh taqe ajaab'ees wilik chikinaah chi re' hin i ki Dios i aj Israel nim wajaawriik, je' wili nuq'or.5Eh neenkiq'or ponoq chi re' hin Dios ruuk' i runimaal i wajaawriik xnuyejaa' i wach ak'al i winaq, i chikop wilkeeb' chupaam. Eh neenuyeew keh awach aj eh inwaaj nuye'em i hin.6Eh yu'naak i k'ih seht i tinamit wilik wach ak'al xnuq'asaj chik pan q'ab' i Nabucodonosor re' naa rukamaniik weh re' i kireey i aj Babilonia, eh xnuq'asaj chi ri'sil i rajaawriik taqe i josq' laj chikop wilkeeb' panch'ahn.7Chu'nchel i tinamit naakikamaniik reh, je' wo' taqe i kak'uun kixq'uun, i kiih kimaam korehtaal inkahnik i kitinamiit chi ri'sil i rajaawriik, je' wo' taqe i k'ih seht chi tinamit, je' wo' taqe reey wilik kajaawriik.
8Eh wila' wilik tinamit, wilik i reey ma' xkaaj ta kikamaneem wach i Nabucodonosor kireey i aj Babilonia, wila' ma' xuloch' riib' je' rukab' noq i ruloch' riib' i b'ooyax noq inkojarik i per per wach chee' wach naah. Re' hin naa nuye'em ti' k'axik chinaah, ruuk' q'aq'inik, ruuk' wi'jaleel ruuk' yab'ilaal korehtaal i ruyeew riib' chi ri'sil i wajaawriik, inki i Dios.9Eh re' taq i hat manimaj taq i neenkiq'or i jalal q'orik, taqe i aj q'iij, taqe i aj war taqe i wilik inkixohk'reej, inkiq'or tii chik rib'iral chib'ih i naa ruk'ulariik manimaj taq wixkiq'or taq aweh chi maakamaneej taq wach i kireey i aj Babilonia.10Ruum re' taqe re' xachukuj q'orik inkiq'or, wila' xayeew taq awiib' chi jot'arik, re' hin naa taq kaat wesam reje panaye'aab', naa taq kaat nutaq'aam reje chi najt, ar taq naa awojiik kimoq.11Eh re' taqe i jarseht chi tinamit naa kiq'asam kiib' chi ri'sil i rajaawriik i kireey i aj Babilonia re' hin naa nuye'em q'ab' chi naa kikahniik chupaam i kitinamiit, reh chi ar neenkitik chib'ih keh, inko'q taqe, inki weh i Dios.
12Eh re', hin i Jeremías xnuq'or wo' chik reh i Sedequías kireey i aj Judá taqe i re'. Eh nuq'or wo' reh chi chuq'asaj riib' chi ri'sil i rajaawriik i kireey i aj Babilonia chakamaneej wach je' wo' rutinamiit chi je' re' ma' nee ta tikimik.13¿Chib'ih neerutiq aweh chi nee nayeew awiib' chi kimik i hat, eh neenayeew chi kimik aatinamiit ruum wi'jaleel, ruum q'aq'inik, ruum yab'ilaal? Ruum re' i QaJaaw Dios ruq'orom chi je' re' i kimik naakik'ulum jarseht i tinamit ma' naa kikamaneem wach i kireey i aj Babilonia.14Re' hat manimaj taqe i jalal ruq'oral i Dios inki a'n kiib', wila' xkiq'or aweh chi maa a'n rukamaj i kireey i aj Babilonia ruum re' inkiq'or xachukuj q'orik, inko'q taqe.15Re' QaJaaw Dios i ruq'or chi ma' re' tee reh intaaq'anik keh, chuq'orariik inkiq'or. Wila' xanimaj keh naa kaat resam reje panaye'aab' i QaJaaw i hat, taqe aatinamiit taqe i jalal ruq'oral i Dios inki a'n kiib', hat taq junkimiik kuuk' inki reh.
16Eh re' taqe i k'amal kib'eeh aj tiij, taqe i tinamit je' wo' wili i xuq'or keh: Manimaj taq keh i jalal nuq'oral inki a'n kiib' wila' xkiq'or taq aweh chi xa chi jumehq'iil naa taq aweliik cho pan tinamit Babilonia, eh naa taq ak'amam chaloq i chib'ih jariik taqe kulk nkamanik panupaat. Re' taq ineenkiq'or aweh re' re' xachukuj q'orik.17Manimaj taq keh ineenkiq'or taq aweh chakamaneej la' taq wach i kireey i aj Babilonia, chi je' re' ma' nee ta taq tikimik, inko'q taqe. ¿Chib'ih taq neerutiq aweh chi nee taq i nayeew q'ab' chi re' taq aatinamiit wili neensahchik wach?18Wila' korik keh chi jalal taqe nuq'oral kipahqaaj wee hin Dios nim wajaawriik, chi ma' nee ta kik'amarik reje Babilonia i chib'ih taqe jariik inkamanik panupaat ko kanlik ar, je' wo' hoq i ko kanlik parupaat i kireey ar Judá i rub'an wii' taaq'anik, je' wo' hoq i ko kanalkeeb' Jerusaleem inki.19Re' QaJaaw Dios nim rajaawriik je' wili xuq'or chi riij taqe i nimaq ch'iit q'an ch'ihch' kiyej-aal, chi riij i molb'al ha', taqe i ch'ikaab' reh i q'an ch'ihch' ruyej-aal chi riij i ruqox taqe i chib'ih jariik inkamanik parupaat i Dios kox kahnik chupaam i tinamit wili.20Re' taqe i ma' xuq'uch ta reje i Nabucodonosor kireey i aj Babilonia, noq xresaj reje Jerusaleem xuk'am reje Babilonia i Jeconias kireey i aj Judá rak'uun i Joásim, je' wo' chu'nchel i xa atoob' wach kik'ux wilkeeb' naq Judá wilkeeb' naq Jerusaleem.21Chanab'eej taq chi re' i QaJaaw Dios i hoj, hoj aj Israel nim rajaawriik, je' wili i xuq'or chi riij taqe i xa chib'ih jariik ko kanlik inkamanik parupaat i reh, je' wo' hoq i wilkeeb' parupaat i kireey i aj Judá, i wilkeeb' ar Jerusaleem:22Chu'nchel i re' naa kik'amariik reje Babilonia, ar naa kiwihiik kore' chik naa ak'amam taqe chaloq chupaam i ye'aab' wili noq naa nuq'asam pan kiq'ab' i aj ixowaal i tinamit Babilonia inki Dios, kinki keh. Re' i ma' korik taj xuq'or rib'iral i Hananías
1Eh paroo' poh reh i haab' re' re', re' noq kijib' haab'rokiik chi reyil ar Judá i Sedequías. Re' i Hananías jalal ruq'oral i Dios i rub'an riib', rak'uun i Azur aj Gabaón, xuq'oreej i Jeremías ar parupaat i Dios chikiwach i k'amal b'eeh aj tiij. Eh chikiwach chu'nchel i tinamit, je' wili i xuq'or reh:2Re' QaJaaw Dios nim rajaawriik, re' ki Dios i aj Israel je' wili xuq'or: Re' hin naa wesam taqe i aj Israel chi ri'sil i rajaawriik i Nabucodonosor kireey i aj Babilonia.3Re' hin xa pan kiib' haab' wo' chik i nuk'am taqe cho ayu' chu'nchel i xa chib'ih jariik inkamanik panupaat re' taqe i xuk'am reje Babilonia i reey Nabucodonosor.4Eh naa wo' chik nuk'amam chaa yu' i Jeconias kireey i aj Judá rak'uun i Joacim, Naa wo' chik nuk'amam taqe chaloq chu'nchel i tinamit k'amooj taqe reje ar Babilonia, naa wesam i rajaawriik i kireey i aj Babilonia, inki i Dios.
5Eh chikiwach chu'nchel i tinamit, chikiwach chu'nchel i k'amal b'eeh i aj tiij wilkeeb' parupaat i Dios je' wili i xuq'or i Jeremías reh i Hananías jalal ruq'oral i Dios i rub'an riib'.6Ma' xta reet korik ta naq chi neerub'an Dios inaq'or, re' naq i QaJaaw Dios nee nq'orik chi korik ti q'orik. Nee naq inooj iloq wach i xaq'or chi naa wo' chik kik'amariik cha yu' i xa chib'ih jariik inkamanik parupaat i Dios. Eh chi naa wo' chik kik'amariik chaloq chu'nchel i tinamit k'amooj taqe reje Babilonia.7Xa re' la' re' hin, inwaaj chi neenab'iraj i q'orik naa nuq'orom aweh, inwaaj wo' chi neenkib'iraj i tinamit:8Re' taqe i jalal ruq'oral i Dios wihinaq taqe chaloq najtir, noq komajaa' ti aasjik i hat, je' wo' hoq i hin. Re' keh xa kiq'orom wo' cho rib'iral chi naa ruwihiik q'aq'inik, chi naa ruwihiik ti' k'axik, wi'jaleel chupaam taqe i ju'jun seht chi tinamit. Eh je' wo' chikinaah taqe i reey nim kajaawriik.9Eh awach i jalal ruq'oral i Dios inq'orik chi naa ruwihiik i suq laj k'acharik, eh noq inooj eloq wach i ruq'or, ar inreqarik chi riij chi korik chi re' i QaJaaw Dios inq'orik reh i ruq'or, inki.
10Noq xrib'iraj chi je' re' i Hananías ma' k'isiin ta xchalik ruk'aah xulahk'aaj i per per wach chee' ruye'em naq rijnaah i Jeremías xutoqib'eej.11Re' Hananías je' wili i xuq'or keh i tinamit kimolom kiib' ar: Re' QaJaaw Dios korik chi je' wili xuq'or: Pan kiib' haab' noq naa wesam taqe chu'nchel i tinamit chi ri'sil i rajaawriik i Nabucodonosor kireey i aj Babilonia naa nusacham wach i rajaawriik, inki. Eh chupaam i jumehq' re' re' xelik reje ar i Jeremías.12Eh noq re' Hananías i jalal ruq'oral i Dios i rub'an riib' rutoqib'eem chik i per per wach chee' ruye'em naq riij naah i Jeremías jalal ruq'oral i Dios xq'orob'jik Jeremías je' wili xq'orarik reh:13Yu'naak hiy ruuk' i Hananías je' wili cha q'or reh, re' QaJaaw je' wili xuq'or: Re' reh per per wach chee' i xutoqib'eej, re' wilik naq riij anaah i hat. Eh re' hin jinaj i per per wach ahl laj ch'ihch' nuyejaam chi naa nukojom rij naah i reh.14Ruum re' hin i Dios nim wajaawriik hin ki Dios i aj Israel je' naa per per ahl laj ch'ihch' i nukoj rij kinaah chu'nchel i nimaq tinamit, reh chi naa kiminariik pankowlaj kamanik ruum i Nabucodonosor kireey i aj Babilonia. Eh nuyeew wo' chi ri'sil i rajaawriik taqe i josq'laj chikop, tiko'q reh, inki Dios.15Eh re' Jeremías je' wili i xuq'or reh i Hananías: Chab'iraj i hat Hananías re' QaJaaw Dios xuq'or chik weh chi ma' re' tee reh xq'orik aweh taqe i xaq'or, je' re' noq re' hat xachukuj q'orik i na a'n keh i tinamit.16Ruum aj re', re' QaJaaw Dios je' wili i xuq'or chawiij: Re' reh naa wesam i ruk'achariik chinaah i wach ak'al. Eh xa chupaam i haab' wili naa rukimiik, ruum taqe i xuq'or keh i tinamit ruuk' i re' xin kiq'eb' chi riij kik'ux, inki.17Eh re' Hananías xkimik wo' hoq chupaam i ruwuuq poh ree haab' re' re'. Re' ruhuuj i Jeremías xutaq'aaj reje keh i k'amooj taqe reje pan tokoom tinamit
1Re' Jeremías jalal ruq'oral i Dios ar wilik Jerusaleem noq xutaq'aaj reje kihuuj i ruqox taqe mama' winaq wilik kina'ojb'al k'amooj taqe reje pan tokoom tinamit kuch'ihil taqe i k'amal kib'eeh aj tiij, taqe i jalal ruq'oral i Dios, kuch'ihil i tinamit xiehtesjik reje Jerusaleem xuk'am reje i Nabucodonosor ar Babilonia.2Re' wili re' xb'aan noq ko xelik reje Jerusaleem i reey Jeconias ruch'ihil ixoq reey tuutb'ees, taqe nimaq wach kikamaj, ruch'ihil taqe i aj Jerusaleem, ruch'ihil taqe i aj ch'eyelch'ihch', taqe i kiyej-anik xa chib'ih jariik.3Re' huuj re' re' xuk'am reje i Elasa rak'uun i Sefa, ruch'ihil i Gemarías rak'uun i Hilcías. Re' taqe i xutaq'aaj reje i Sedequías kireey i aj Judá ar Babilonia reh chi xi ponik ruuk' i Nabucodonosor kireey i aj Babilonia, eh re' huuj je' wili i ruq'or chupaam.
4Re' QaJaaw Dios nim rajaawriik, re' i qaDios i hoj, hoj aj Israel, je' wili ruq'or keh, chu'nchel i xuyeew q'ab' chi xi elik reje Jerusaleem, eh xi k'amarik reje Babilonia:5Chayejaa' taq i aapaat, ti patinoq taq chupaam, cha tik taq i chee' re' ruuk' i kiwachinik, eh cha a'n taq rusuqkiil i neenkiwachuj.6Cha a'n taq kaxáro i hat, wih-oq taq awak'uun awixq'uun. Eh re' keh naa wo' kianam kaxáro, eh naa wo' ruwihiik kak'uun kixq'uun, reh chi nee taq ti k'ihaaxb'ik ar ma' nee ta intohq'ik rusahchiik taq awach.7Tikamanoq taq, reh chi neenwihik i suq kiil k'uxliis chupaam i tinamit xat nutaq'aaj taq wii'. Eh cha pahqaaj taq weh, reh chi suq neen wihik i tinamit, ruum wii suq xwihik i tinamit re' re' suq wo' nee ti wihik taq i hat.8Re' hin i Dios kiDios i aj Israel nim wajaawriik, i nuq'or taq aweh wili: Mayeew taq awiib' chi jot'arik keh i jalal nuq'oral inki a'n kiib', je' wo' keh i aj q'iij wilkeeb' taq panaxilak. Eh manimaj taq keh wila' xkiq'or taq aweh inkilow pan kiwiriik.9Eh wila' xkiq'or taq aweh chi re' hin kinq'orik keh inkiq'or taq aweh xan kichuk ruum ma' hin ta kinq'orik keh, inki Dios.10Eh je' wo' chik wili i xuq'or: Eh noq naa taq akohlaam i lajeeb' ru kajwinaq haab' taq awihik ar Babilonia, wilik i naa nub'anam chi toob'al taq aweh i hat. Naa nub'anam i nuq'orom, re' chi naa wo' chik taq kaat nusutem cho chupaam aatinamiit wili.11Ruum re' hin weht'al chib'ih jariik i nuyejaam wach cha weh taq i hat reh chi suq taq naa awihiik, je' rukab' i k'ahchi' awuy-eem taq i hat, ma' re' ta yiib' wach i k'ahchi' nukapaam taq chawiij, inki i Dios.12Eh chupaam i q'iij re' re' naa taq kiin aq'oreem, eh re' hin naa wo' taq kaat b'iram, eh naa taq apahqaam weh panatiij chib'ih taq inawaaj, re' hin naa wo' nuye'em taq aweh.13Noq naa taq kiin asik'im naa wo' kiin taq areqem ruum chu'nchel taq ak'ux naa kiin asik'im.14Eh noq hin taq chik areqem, re' hin naa wo' chik taq kaat wesam cho panti' k'axik. Naa taq kaat wesam cho chupaam taqe i nimaq tinamit chupaam taqe i ye'aab' aha' taq xat'ooj noq xnutukej taq reje awach. Chi je' re' naa wo' chik numolom taq awach ayu' aha' xat wesaj taq reje wii', inki i Dios.15Xa re' la' re' taq i hat yu'naak je' taq wili inaq'or: Re' QaJaaw xusik' wo' wach i jalal ruq'oral ayu' Babilonia, tiki taq.16Eh re' QaJaaw Dios je' wili i ruq'or chi riij i wilik chi reyil ayu' re' wihinaq cho wii' chi reyil i David, je' wo' chikiij taqe i patim chupaam i tinamit wili, je' wo' chikiij taqe i ma' tokoom ta taq awuuk' re' i ma' xi k'amarik ta taqe reje chawiij pan tokoom tinamit.17Re' hin i Dios wilik wajaawriik, je' wili nuq'or chi re' hin naa nuye'em taq cho cha naah i q'aq'inik, wi'jaleel, i yab'ilaal. Reh chi naa taq kaat nukanaam chi je' rukab' i q'aah laj higo xama' xta chik kamaj ma' ruyee ta chik riib' chi neenk'uxarik.18Re' hin ma' naa ta nukanaam ruye'ariik q'aq'inik, i yab'ilaal, i wi'jaleel taq cha naah, naa taq kaat nukanaam chi xa hat taq se'lb'al, chi naa taq ak'uhtaam ak'ixb'ilaal, chi naa taq akahniik chi xa je' taq hat yohb'isaneel. Eh naa taq akahniik chi ma' holohik ta taq awib'iral chi keh chu'nchel i tinamit nutukem taq reje wii' awach.19Ruum re' taq i hat ma' nab'iraj ta taq i nuk'uhb'aal inkiq'or taq aweh waj kamanoom. Re' taqe i jalal nuq'oral xnutaq'aaj taq cho chaq'orob'jiik pampeet, eh je' wo' yu'naak xakok'ahchi' wo' nutaq'aam taq cha wuuk', eh xama' nawaaj ta wo' taq animam, inki Dios.20Je' re' noq chawunchelaal taq i hat aj Jerusaleem i xnuyeew q'ab' chi xat k'amarik taq reje Babilonia cha nimaj taq i nuk'uhb'aal, inki.21Eh je' wili xuq'or i QaJaaw Dios ki Dios i aj Israel nim rajaawriik, chi riij i Acab rak'uun i Colaias, chi riij i Sedequías rak'uun i Maasías, re' chi re' taqe chukuj q'orik inki a'n hin kinq'orik keh noq inkiq'or, re' hin naa nuye'em q'ab' chi naa kojiik q'ehb'oq pan q'ab' i Nabucodonosor kireey i aj Babilonia, eh naa kikanteesjiik chawach taq i hat.22Eh chu'nchel i aj Judá k'amooj taqe reje Babilonia noq inkaaj chi naa ruk'ulum i ma' holohik taj i tokoom, je' wili i naa kiq'orom: Neeta naq i rub'an cha wuuk' i QaJaaw je' rukab' i xub'an cho ruuk' i Sedequías ruuk' Acab, noq xi k'atarik pan q'aaq' chi k'achlik kiwach. Ruum i Nabucodonosor kireey i aj Babilonia inko'q taqe.23Ruum re' keh xkian i yiib' wach na'ojb'al kuuk' i aj Israel, eh xkich'uwa'risaj wach i kikaxarohiil, ruuk' i rehk'een i kas kichaaq', eh ruum chi xkiq'or chi re' hin xinq'orik keh i chukuj q'orik inki a'n Xanaah re' ma' re' ta wo' hin kinq'orik keh, inki i Dios inki panhuuj.
24Re' QaJaaw Dios xuq'or reh i Jeremías chi je' wili i naa ruq'orom reh i Semaías aj Nehelam.25Re' QaJaaw Dios nim rajaawriik, je' wili ruq'or: Re' i hat xataq'aaj reje jinaj i huuj xa panab'ihnaal i hat keh chu'nchel i tinamit wilkeeb' Jerusaleem. Eh je' wo' keh chu'nchel i k'amal kib'eeh i aj tiij wilkeeb' ar, xaq'or reje reh i Sofonías rak'uun i Maasías panhuuj chi je' wili:26Re' QaJaaw Dios xkojwik aweh chi k'amal b'eeh aj tiij, chi jilow i Joiada reh chi re' hat i k'amal b'eeh chi rilariik i rupaat i Dios. Eh wila' awach i yojinaq i naah xoj k'oloq xtohq'ik-oq ruq'orom i q'orik je' rukab' inkiq'or i jalal ruq'oral i Dios, re' hat panaq'ab' wilik ruye'ariik pantz'ilom, eh neena lutz' paam chee' i rooq.27¿Chib'ih reet noq komajaa' inachop i Jeremías aj Anatot rukoj riib' chi jalal ruq'oral i Dios?28Re' reh je' wili i xutaq'aaj cho ruq'orariik qeh ayu' Babilonia: Re' taq i hat najt taq naa a'nam cho ar Babilonia, cha yejaa' taq apaat, ti patinoq taq chupaam. Eh cha tik taq i chee' re' ruuk' kiwachinik naa taq ak'uxum i naakiwachum, tiki reje maje' i nuchjik.
29Eh re' k'amal b'eeh aj tiij Sofonías rub'ihnaal rilom wo' naq chik wach i huuj re' re' chi xikin i Jeremías jalal ruq'oral i Dios.30Chi riij i re', je' wili i xq'orarik reh i Jeremías:31Chataq'aaj reje ruq'orariik keh chu'nchel i k'amooj taqe reje Babilonia chi re' hin i Dios je' wili i nuq'or: Re' i Semaías aj Nehelam xuq'or chi re' hin xinq'orik reh taqe xuq'or. Eh ma' hin ta wo' hoq, xuch'ikaa' taq ak'ux i hat ruuk' taqe i chukuj q'orik xub'an.32Re' hin i Dios naa nuye'em chutojariik i ru mahk i Semaías, je' wo' taqe i riih rumaam, ma' naa ta rupatiniik i awach reh chi kixilak i nutinamiit. Eh ni xata naakehtriik i rusuqkiil k'uxliis naa nuye'em i keh i nutinamiit, ruum xkichuk taq aweh i q'orik, eh ruum i re' xakanaa' taq nunimjiik i hat tiko'q reje keh, inki weh i Dios. Re' xuq'or i QaJaaw Dios chi naa rub'anam cho ruuk' i rutinamiit
1Re' i QaJaaw Dios je' wili i xuq'or reh i Jeremías:2Re' i QaJaaw i qaDios i hoj, hoj aj Israel je' wili xuq'or: Re' hat cha tz'ihb'aaj chupaam jino'q i huuj chu'nchel taqe i xnuq'or aweh.3Ruum re' hin naa ruponiik i q'iij chi naa wesam taqe cho panti' k'axik i nutinamiit Israel, taqe i aj Judá. Re' hin kinq'orik reh chi naa wo' chik nuk'amam taqe chaloq pan kitinamiit re' nuye'em cho chi kikooch i kimaam kati't, inki.
4Re' taqe i wili xuq'or i QaJaaw chikiij i aj Israel, i aj Judá:5Je' wili i xuq'or i QaJaaw Dios:
Re' hin imb'iraj chi xa re' oq'ik inki a'n i nutinamiit ruum i ruti'kiil kik'ux. Eh xa pan yo'jik wilkeeb' ma' xta rusuqkiil kik'ux.6Re' taqe i winaq q'e' ti' wilkeeb' xan kiyot' chik i kiyej-aal xasaq moq'ik chik taqe, xa je' chik rukab' inki a'n ixoq noq ach k'isiin ma' nk'ulik kik'ux.7Eh chupaam taqe q'iij re' re' i naakik'ulum i ti' k'axik, i ma' jank'al ta nilarik. Jinaj runimaal ti'kiil k'uxliis chi keh i aj Israel riih rumaam taqe i Jacob. Xa re' la' re' hin naa wesaniik keh chupaam.
8Eh re' QaJaaw Dios nim rajaawriik, je' wili i xuq'or: Re' hin korik i nuq'or chi naa wesam taqe chaloq i nutinamiit chi ri'sil i rajaawriik i tokoom tinamit ma' jaruuj chik naa kik'amariik reje pan tokoom tinamit.9Re' la' chik i hin naa kikamaneem nuwach, hin ki Dios, naa wo' kikamaneem wach i riih rumaam i David re' naa nukojom chi reey na' chub'an, inki.
10Re' QaJaaw Dios je' wili xuq'or: Re' taq i hat riih rumaam Jacob, hat taq aj Israel, hat taq waj kamanoom, matyo'jik taq ruum re' hin naa taq kaat wesam chaloq hat, je' wo' taqe awak'uun awixq'uun chupaam inajt laj tinamit xat k'amarik taq reje wii'. Eh naa wo' chik taq aak'achariik pansuqkiil k'uxliis, ma' xta chik naa ruyohb'isaniik taq aweh.11Ruum re' hin taq aaDios naa nuwihiik taq awuuk' chako'ljiik. Eh naa nusacham kiwach taqe i tinamit, xnutukej taq reje wii' awach. Re' taq i hat ma' naa ta nusacham taq awach, xanaa la' taq kaat nuye'em panti' k'axik je' rukab' i ruk'ul taq cha weh. Eh ma' naa ta nukanaam chi ma' naa ta taq atojom riij amahk, inki.
12Ruum re' i QaJaaw je' wili xuq'or: Re' taq amahk xiik' wo' chik naah yib'kiil wach je' naa rukab' jino'q i q'aah laj yok'eel ma' xata ruq'omal iraaj.13Ma' awach ta taq intoob'inik aweh ruuk' aak'axkiil, ma' awach ta niq'omanik reh taq ati'kiil, xanaah re' ma' xata wo' chik ruq'omal iraaj14Re' taqe i q'e' naq kik'axwik taq aweh xat sahchik taq pankik'ux ma' tikikapaaj ta taq chik, ruum re' hin xnub'an taq ti' k'axik aweh je' rukab' imb'aan reh i aj ixowaal. Xti ti' taq i xnub'an aweh, ruum xiik' naah yib'kiil wach taq ana'ojb'al, eh ma' k'isiin taq amahk.15¿Chib'ih reet noq inak'er taq aachii' ruum taq aati'kiil? Re' taq aati'kiil ma' xata chik riq'omal iraaj, ruum chi xiik' naah yib'kiil wach taq ana'ojb'al, eh ruum chi ma' k'isiin taq amahk je' re' i xnub'an taq aweh.16Eh chu'nchel i kisachwik taq awach naa wo' rusachariik kiwach i keh. Eh chu'nchel i ki-ixowanik taq awach naa kik'amariik reje pan tokoom tinamit, eh re' taqe i kielq'anik chib'ih taq aweh naa wo' relq'jiik i chib'ih keh. Eh re' taqe i kipletohinik taq aweh naa wo' kipletohjiik i keh.17Eh re' hin naa taq kaat wesam chupaam i ti' k'axik, naa taq kaat nuk'achrisam ruuk' taq i ti'kiil, ruum je' wili inkiq'or taq chawiij: Re' taqe i wili re' taqe ruuk' i aj Sión ma' awach ta nkapeb'inik keh inki taqe, inki Dios.
18Eh je' wo' chik wili i ruq'or: Re' hin naa wesam taqe panti' k'axik i kitinamiit, re' taqe i riih rumaam i Jacob, naa nuketelaam wach i kitinamiit. Naa wo' chik rukorjiik i kitinamiit aha' wo' yojinaq wii', eh re' i paat imb'aan wii' taaq'anik ar wo' chik naa rukorjiik aha' naq wilik pampeet.19Eh chupaam taqe i tinamit re' re' nareliik chee tz'uuy reh t'iosinik, reh suq kiil k'uxliis, ma' naa ta kojiik k'uhloq naa la' nuk'ihaaxb'isam taqe. Ma' awach ta chik naa rixowaniik kiwach, ruum re' hin naa nuye'wiik kiloq'il.20Re' taqe i aj Israel naa wo' chik kikahniik chi je' rukab' i pampeet naa nuye'em rukowiil kik'ux. Eh naa nuye'em taqe chutojariik i kimahk i naa rub'aniik ti' k'axik keh.21Naa wo' chik ruwihiik kajaab'ees naa rutaaq'aniik keh, re' ruuk' i xa kitinamiit eh naa nusik'im kiwach i hin chi naakichaliik wuuk'. Ma' awach taj i neenchalik wila' ma' re' hin xin sik'wik wach.22Eh naa taq akahniik chi hat taq nutinamiit i hat, eh re' hin naa nukahniik chi hin taq aaDios, inki Dios.
23Re' rujosq'iil i QaJaaw Dios je' rukab' i runimaal jab', je' rukab' i kaq suut teew noq naa ruye'em cho chikinaah i yiib' wach kina'ojb'al.24Re' reh ma' naa ta resam i rujosq'iil chikinaah korehtaal i rub'an i ruyejaam cho wach chi keh. Re' taq i hat naa ruponiik i q'iij noq naa taq areqem chi riij chi korik i nuq'or taq aweh.
1Re' i QaJaaw Dios je' wili xuq'or: Naa ruponiik i q'iij chi re' taqe i k'ih chuq' chi aj Israel, re' hin naa nukahniik chi ki Dios, eh re' keh naa kikahniik chi nutinamiit.
2Re' QaJaaw Dios je' wili i xuq'or re' taqe i ma' xikimik ta cho panq'aq'inik. Re' hin xnuketelaaj cho kiwach chupaam i ye'aab' chiq yuuq'. Eh xnuhi'lisaj wo' taqe Israel re' re'.3Re' hin najtir i nuq'or cho keh chi je' wili i aj Israel: Re' hin xatinuk'ax wo' taq chaloq, eh xanaa wo' taq kaat nuk'axam chi juneliik ruum aj re' ma' jaruuj taq naa nukanaam ruketeljiik awach.4Je' re' noq re' hin naa wo' chik nuyejaam taq aatinamiit Israel eh naa wo' chik taq ak'amam chaloq i kotokaq q'ooj intzalajinik naa taq asoniniik ruum i rusuqkiil taq ak'ux.5Eh naa wo' chik atikim taq i uuva paruyuq'ul i Samaria. Awach i naa kitikim ki uuva naa wo' kianam rusuqkiil i wach.6Ruum naa ruponiik i q'iij chi re' taqe i aj cha'jen ye'aab' paruyuq'ul i Efraín, naakik'erem kichii' chuq'orariik chi je' wili: Taq taq ar Sión i wilik choo wii' QaJaaw Dios, inko'q taqe, inki.
7Eh re' QaJaaw Dios je' wili xuq'or: Re' taq i hat titz'uyinoq taq ruum rusuqkiil taq ak'ux chikiij i aj Israel riih rumaam taqe Jacob, nim kiwach chikiwach i tinamit, naa taq rib'irjiik atz'uuy, chi je' wili: Re' QaJaaw Dios xko'linik keh i ma' xi kanteesjik taj, tiko'q taq.8Eh naa taqe nuk'amam chaloq i wilkeeb' reje pantz'eet reh i rookb'aal q'iij, i wilkeeb' cho chi junsuut i wach ak'al. Eh naa ruchaliik chikiij taqe i moywach, taqe i chelej riib' kib'ehik, taqe i yowaab' ixoq, taqe i kox-aasjik kiha'lak'uun, xiik' naah k'ihaal noq naakimolom cho kiib'.9Re' keh oq'ik inki a'n noq xiooj, eh suq chik kik'ux noq naa nusutem taqe chaloq, naa nuk'amam taqe reje paraasb'al ha'. Eh korik b'eeh taqe naa nuk'amam wii' reh chi ma' xta neekiq'ehb'ik wii', re' hin naa nukahniik chi manlik kaJaaw i aj Israel re' taqe i aj Efraín peet wak'uun taqe.
10Hat taq nimaq tinamit chab'iraj i ruq'oral i QaJaaw Dios, cha q'or taq rib'iral chupaam taqe i tz'a' laj yuuq' wilkeeb' chi najt, je' wili taq i cha q'or: Re' QaJaaw Dios xutukej reje kiwach i rutinamiit Israel. Xa re' la' naa wo' chik rumolom cho kiwach, naa rucha'jeem taqe je' rukab' i rub'an cha'jen tentzuun, tiko'q taq.11Ruum re' i QaJaaw Dios naa ruko'leem taqe i aj Israel, i riih rumaam taqe Jacob pan q'ab' i tinamit xti kow riib' chikiwach i keh.12Re' keh xak'erlik chik kichii' chi tz'uuy noq naa kik'uliik iloq chinaah i yuuq' Sión. Naa kianam rusuqkiil i naa ruye'ariik keh ruum i QaJaaw, re' taqe wili: Re' Trigo, re' riis uuva, re' Aseite, re' taqe tentzuun, re' taqe wakax. Re' kik'achariik naa rukahniik chi je' rukab' i tik inik'ik rooq ha' chupaam, eh ma' naa ta chik rutiib'iik kik'ux.13Re' taqe i qahxoq, i k'ijool, taqe mama' winaq naakisoniniik ruum rusuqkiil kik'ux. Ruum re' hin re' i ruti'kiil kik'ux naa nusutem chi suq kiil k'uxliis naa rusahchiik pankik'ux i ruti'kiil kik'ux.14Eh re' taqe i k'amal b'eeh aj tiij, re' chihooj laj mayiij ink'amarik reje panupaat re' nakik'uxlaam wii' kiib'. Re' taqe nutinamiit naa wo' kianam rusuqkiil i k'uxumb'al keh naa nuye'em,
inki QaJaaw Dios.
15Eh je' wo' chik wili i xuq'or: Jinaj i q'orik x-ib'iirjik xb'aan chaloq Rama, kowlaj oq'ik, jinaj i runimaal ti' kiil k'uxliis. Re' po'nchel i Raquel oq'ik i rub'an chi riij taqe rak'uun re' reh ma' xata chik q'uunjik wach xraaj ruum xukapaaj i reh chi kamnaq chik taqe i rak'uun, inki.
16Xa re' la' je' wili xq'orarik reh ruum i QaJaaw Dios: Raquel re' hat maa q'eb' chik i riis naq'awach, ruum re' hin xat b'iraj chik naa wik'sam i ruti'kiil ak'ux, re' taqe awak'uun awixq'uun naa wesam taqe chaloq pan q'ab' i tinamit inixowanik kiwach.17Ko naa ruwihiik rusuqkiil ak'ux, re' taqe awak'uun awixq'uun naa awilom chi naa wo' chik kik'uliik iloq pan kitinamiit, inki i Dios.18Re' hin xb'iraj chik taqe i nutinamiit Efraín k'erik kichii' ruum i ti' k'axik, je' wili inkiq'or: Re' hoj je' naq qakab' i b'ooyax ma' tijimaj ta chi kamanik, ruum i ti' k'axik xqak'ul xaloch' qanaah ruum aj re' qoh ak'ul wo' chik awuuk' ruum xa re' wo' hat, QaJaaw i qaDios.19Korik noq re' hoj xat qaq'eb' chi riij qak'ux, xa re' la' yu'naak xqayot' chik i qak'ux chi riij ixqa a'n. Xan qatuy chik i koq i chi' qak'ux chi qaq'ab' xchalik qak'ixiik, xama' nqareq ta chik chi riij inqa a'n ruum i qamahk qatoq'aam cho pan qak'uniil, inki taqe.20Re' QaJaaw Dios je' wili xuq'or: Re' i tinamit Efraín kok' wak'uun wixq'uun wo' taqe q'e' taqe nuk'ax. Korik noq xnuyeew taqe panti' k'axik, xa re' la' yu'naak xakonuk'ax wo' taqe. Ruum chi k'ahchi' kik'erem kichii', re' hin naa wo' chik nuketelaam kiwach, ruum xutz'a'j i wánima i ti' k'axik k'ahchi' kik'ulum, inki.
21Hat taq aj Israel chakoj taq rehtalil chi korik i b'eeh, aha' taq xat-ik'ik reje wii'. Reh chi ma' k'axik ta taq noq neenareq noq nee taq ti sutinik chaloq, chi je' re' nee taq ti sutinik cho chupaam aatinamiit chi je' rukab' jino'q i k'isaxq'un ma' ruch'uwa'risam ta wach i ruk'achariik.22¿Kojaruuj taq inakanaa' rub'aan chi xak'ul taq tiooj, xa je' taq akab' i ixq'uunb'ees xak'ul inooj? Re' hin jinaj i ak' na'ojb'al nuyejaam wach taq aweh chinaah i wach ak'al. Re' chi naa wo' chik taq kiin asik'im naa taq kaat nuko'leem je' rukab' noq inko'ljik ixchoparik ruum i kowlaj winaq, inki Dios.
23Re' QaJaaw Dios nim rajaawriik ki Dios i aj Israel je' wili xuq'or: Eh noq naa wo' chik wesam taqe chaloq panti' k'axik i aj Judá naa wo' chik nuk'amam taqe chaloq pan kitinamiit. Eh pantaq tinamit Judá je' wili inakiq'orom, re' ta naq i QaJaaw Dios neenkuxisanik reh santo laj yuuq' wili ruum ayu' wilik i rukorkiil wach k'uxliis, inko'q taqe.24Eh re' taqe i aj Judá naa wo' chik kik'achariik chupaam i ju'jun ch'uq chi kitinamiit chi je' taqe ab'ixoom, chi je' taqe aj cha'jen tentzun.25Eh naa nuye'em kihi'liik taqe i q'uhtinaq, naa nuye'em rusuqkiil kik'ux i ti' kik'ux, inki Dios.
26Noq wilom chik taqe re' panuwiriik xwi'raaj wiib', eh xnukoj rehtaal chi xaholohik chik i xuk'uhtaaj riib' weh. Re' i jinaj chik ak' na'ojb'al
27Re' QaJaaw Dios je' wili xuq'or: Naa ruponiik i q'iij chi naa wo' chik nuk'ihaaxb'isam taqe i tinamit. Je' wo' taqe i chikop ayu' Israel, je' wo' paruyuq'ul i Judá.28Nik' wach noq xnusik' chi riij noq xnuyoj wach, noq xnusach, noq wesaj taqe reje, noq xwesaj i kajaawriik, noq xnutib'isaj kik'ux je' wo' chik re' noq naa nuyejaam wach, noq naa wo' chik nuye'em taqe pan kiye'aab', inki.29Eh chupaam taqe i q'iij re' re' ma' awach ta chik i naa ruq'orom chi je' wili: Re' ajaab'ees i ruk'ux reh i je' ch'amlaj uuva, je' naa nerujot' riib' i reeh i rak'uun rixq'uun ma' inko'q ta chik taqe.30Ruum awach naa ruk'uxwiik reh i je' ch'amlaj uuva, re' re', je' na naa rujoto'm riib' i reeh, eh chi kiju'junaal wo' naa kikimiik ruum i kimahk, inki i Dios.
31Eh je' wo' chik wili i xuq'or: Naa ruponiik i q'iij noq jinaj i ak' k'uhb'aal naa nuyejaam wach kuuk' i aj Israel, i aj Judá.32Ma' je' ta rukab' i xnuyejaa' cho wach kuuk' i kimaam kati't noq ruuk' i wajaawriik xnuchop cho chi kiq'ab' noq xwesaj taqe chaloq ar Egipto. Eh ruum chi ma' xkian ta runimjiik i k'uhb'aal i xnuyejaa' cho wach kuuk' xnukanaa' taqe chi kutkeel, atoob' ta re' wo' naq i hin kinehchanik keh, hin wo' naq ki Dios, inki.33Eh re' taqe i wili naa nuyejaam wach kuuk' i aj Israel re' chi naa nuye'em i nuk'uhb'aal pankikapeb'aal, naa nutz'ihb'aam pankanima, chi je' re', re' chik i hin naa nukahniik chi manlik ki Dios. Eh re' keh naa kikahniik chi manlik nutinamiit taqe.34Chupaam taqe i q'iij re' re', ma' kota chik ruman chi naa rutijem i rutinamiit, oon ruka'jaah, oon ma' tokoom ta ruuk', chi je' wili: Chanab'eej wach i QaJaaw, ma' koq ta chik, keh, ruum chu'nchel naakinab'iniik nuwach chi nimaq chi kok' taq. Eh re' hin naa nukuyum i kimahk ruuk' i kiyiib' wach na'ojb'al, ma' naa ta chik ruk'uliik cho panuk'ux i kimahk. Re' wili korik, inki Dios.
35Re' QaJaaw Dios xkojwik reh i q'iij chi naa rusihq'iniik pan q'iij, re' wo' re' xkojwik reh i poh, ruch'ihil taqe i ch'umiil chi naa kisihq'iniik chaq'ab'. Eh i rukaqrisaj i palaw i rutik'aa' teleninik i rub'ohl, re' i Dios nim rajaawriik i rub'ihnaal, je' wili i ruq'or:36Pan jinaj poo q'iij wila' ma' xooj eloq wach i ruq'or i nuk'uhb'aal wili, xa chupaam wo' i q'iij re' re', neenkahnik chi ma' re' ta chik nutinamiit taqe i aj Israel.
37Eh wila' xb'aan rupajariik johtoq paam i taxaaj, wila' xb'aan rupajariik chu'nchel i ch'ikaab' reh i wach ak'al, chi je' re' nee naq i nuq'eb' chi riij nuk'ux chi jumpech taqe i aj Israel ruum i kina'ojb'al kianam, je' wo' taqe i kiih kimaam, inki QaJaaw Dios.
38Eh je' wo' chi wili i ruq'or: Naa ruponiik i q'iij chi naa wo' chik nuyejaam i nutinamiit, ar naa nutoq'aam reje i wilik wii' inajt naah tz'aq Hananeel, eh naa ruponiik i wilik wii' i puerta wilik pantz'u'k.39Ar naa reliik reje naa rojiik chi korik korehtaal imponik chinaah i yuuq' najt naah wilik paruyuq'ul i Gareb, eh naa rusutiniik reje naa ruponiik chupaam i ye'aab' Goa.40Eh chu'nchel i k'ixkaab' kimuhqik wii' i kamnaq, inkiq'eb' wii' i chaaj, inaasjik cho wii' i ha' wilik Cedrón, imponik pantz'u'k kiokik wii' kawáyu, je' wo' hoq wilkeeb' reje parelb'aal q'iij naa nukanaam chi wilik kisantohiil. Eh chu'nchel taqe re' ma' naa ta chik ruchopariik kinaah, eh ma' naa ta chik rusachariik kiwach, inki Dios. Re' Jeremías xuloq' i ruye'aab' i Hanameel
1Re' QaJaaw Dios xuq'oreej chee Jeremías noq lajeeb' haab' chikrokiik chi reyil i Sedequías ar Judá, noq waxaqlaj haab' chik rokiik chi reyil i Nabucodonosor ar Babilonia.2Eh re' taqe i ru soldado i kireey i aj Babilonia kisutem chik riij i tinamit Jerusaleem. Eh re' i Jeremías jalal ruq'oral i Dios kiye'em chik pan i tz'ilom wilik reje chuwach i rupaat i kireey i aj Judá.3Re' i reey Sedequías xtaaq'anik ruchopariik i Jeremías, je' wili i xuq'or reh: ¿Chib'ih reet noq xaq'or chi re' Dios xuq'or chi re' tinamit wili naa nuq'asam pan q'ab' i kireey i aj Babilonia, eh chi naa ruchopom naah?4Eh xaq'or chi re' Sedequías wilik chi reyil Judá ma' naa ta ruko'leem riib' pan kiq'ab' i aj Caldeo, naa la' wo' ruchopariik naah i reh ruum i kireey i aj Babilonia korehtaal inooj pa'lojoq chuwach.5Re' Nabucodonosor naa ruk'amwiik reje reh i Sedequías ar Babilonia ar naa ruwihiik korehtaal i nuyeew q'ab' chi ar naa rusahchiik wach. Atoob' ta nee taq i na a'n peleto kuuk' taqe i aj Caldeo, xama' naa ta wo' taq aweliik korik, inki.
6Eh je' wo' chik wili i xuq'or i Jeremías: Re' QaJaaw Dios, je' wili i xuq'or weh:7Chab'iraj re' Hanameel rak'uun awikaan Salum, naa ruk'uliik ruq'orom aweh chi naa aloq'om reh rak'aal wilik Anatot. Re' hat neerub'an chi nee naloq' reh ruum ma' tokoom ta awuuk', inki weh.8Nik' wach i xuq'or weh i QaJaaw xk'ulik wo' ruq'or weh i Hanameel rak'uun i wikaan chi naa nuloq'om reh i ruye'aab' noq wilkiin reje chuwach i tz'ilom i wilik chuwach i rupaat i reey. Re' rak'aal re' re', ar wilik paruyuq'ul i Benjamín ruum chi re' i rak'uun i wikaan xk'ulik q'oroq weh, eh ruum chi xuq'or weh i QaJaaw Dios chi ruk'ul chi naa nuloq'om, xnuloq' wo' hoq.
9Je' re' noq xnuk'am wo' hoq i rak'aal wilik Anatot i Hanameel, rak'uun i wikaan xnuq'asaj reh i tumiin waxiqiib' libra ruuk' medio rahliil chi plata.10Eh xqayejaa' i ruhujil xnukoj i nub'ihnaal chuwach, eh xnukoj rehtalil chi korik, wilik wo' xi ilwik reh noq xnupaj i tumiin pan pexu.11Chi riij i re' xnuchop chaloq kab'chel i huuj, re' korjik wii' chi korik i loq' xnub'an, jinaj inutz'ap naah chi korik, eh jinaj i ma' xnutz'ap ta naah.12Eh re' ru huujil i aak'al xnuq'asaj reh i Baruc, rak'uun i Neria, riih i Maasías, eh chuwach i Hanameel rak'uun i wikaan, chikiwach wo' taqe i xi ilwik reh xkikoj i kib'ihnaal chi xnub'an i loq'. Eh chikiwach wo' chu'nchel i aj Judío tzunulkeeb' reje chuwach i tz'ilom.13Chi kiwach chu'nchel i re', je' wili i xnuq'or reh i Baruc:14Re' Dios nim rajaawriik ki Dios i aj Israel je' wili i ruq'or: Chak'am kab'chel i huuj re' re', re' i tz'aplik naah chi korik, eh re' i ma' tz'aplik ta naah chi korik neenamol chupaam jino'q ak'al xaro reh chi ma' nee ta nq'ahik nik' najtiil neemolarik.
15Ruum ko wilik i paat ko wilik i ak'al, ko wilik i uuva tikooj naa ruloq'ariik, inki QaJaaw Dios nim rajaawriik.16Eh noq xnuq'asaj chik reh i Baruc i ruhujil aak'al xnuloq', xnuq'o'reej i QaJaaw Dios panutiij, je' wili i xnuq'or reh:17QaJaaw Dios, hat xat yej-anik reh i taxaaj ruch'ihil i wach ak'al ruuk' animaal awajaawriik. Eh ruum chi wilik awajaawriik ma' xta k'isinoq i k'axik rub'aan chawach.18Re' hat q'e' naaketelaaj kiwach i tinamit kinimanik aweh jar ch'iht i ki-ik'ik xa re' la' i nayeew wo' taqe panti' k'axik i tinamit ruum i kimahk kianam i kituut kajaaw, Dios nim awajaawriik aab'ihnaal.19Re' hat xti wilik ana'ojb'al, ma' k'isiin taqe i sahchb'al k'uxliis i na a'n xiik' naah loq'il taqe i na a'n. Re' hat eliik inawil i kina'ojb'al inki a'n i tinamit. Eh i nayeew kitojb'aal i ju'jun je' rukab' i ruk'ul chi keh, re' q'oreel chib'ih inki a'n chib'ih inkiq'or.20Re' hat ma' k'isiin taqe i xak'uhtaaj, taqe i ma' ilooj taj xa a'n cho chi kixilak i aj Egipto. Eh yu'naak xakok'ahchi' wo' kaat, je' chi kuuk' taqe i aj Israel, je' chi kuuk' chu'nchel i tinamit. Je' re' noq re' ab'ihnaal xelik rib'iral chi xiik' naah nimaal wach.21Eh xawesaj taqe chaloq aatinamiit Israel Egipto, ruuk' awajaawriik, ruuk' i rub'anariik taqe ma' ilooj taj, ruuk' taqe i ruk'uhtjiik i nimaq wach na'ojb'al, ma' xchalik kiyo'jiik chu'nchel i tinamit.22Eh xayeew wo' keh i ye'aab' wili re' i wilik wii' i lecha, i wilkeeb' wii' chu'nchel i suq atoob'. Re' wo' hoq i ye'aab' xaq'or chee korik keh i kimaam kati't chi naa aye'em keh.23Re' keh xkichop naah i ye'aab', eh xkian wo' naq rusuqkiil iwihik ar. Xa re' la' xama' xkinimaj taj aq'oral, eh ma' xkik'am ta naah aak'uhb'aal, xama' xkian ta wo' hoq i xaq'or keh chi naa kianam. Ruum aj re', re' hat naa aye'em cho chikinaah i ti' k'axik.24QaJaaw Dios yu'naak xkiyejaa' chik i kiye'aab' taqe i aj Babilonia reh chi naa kikotem riij i tinamit Israel reh chi naa kichopom naah. Re' keh q'aq'inik wi'jaleel, runimaal yab'ilaal inkik'am chaloq. QaJaaw Dios xti korik wo' hoq chi k'ahchi' rojiik eloq wach i aaq'orom cho rib'iral.25QaJaaw Dios q'e' wo' chik ti' wila' xailook' chik inq'ahxik pan kiq'ab' i aj Caldeo i tinamit wili. ¿Chib'ih reet noq xaq'or weh chi xnuloq' i ye'aab', eh chi wilik i xi-ilwik reh noq xnutoj? kinki.
26Eh re' i QaJaaw Dios je' wili ruchaq'wesjik i Jeremías xub'an:27Re' hin i Dios, hin ki Dios chu'nchel i k'achareel wach ak'al, ma' xta k'isinoq i k'axik rub'aan chi nuwach.28Je' re' noq i nuq'or aweh chi re' hin naa nuye'em q'ab' chi re' tinamit wili naa ruchopariik naah ruum i Nabucodonosor kireey i aj Babilonia, re' kitinamiit i aj Caldeo.29Re' taqe i aj Babilonia re' re' naa kik'uliik iloq, naa kokiik chupaam i tinamit, naakiqopom ruq'aq'al junk'atariik naa kianam ruuk' i paat inkik'at wii' mayiij loq'oomb'al reh i tiyoox Baal ruuk' i re' xinkija' wachej. Eh xkiyeew ink'ohnik laj iq'oom chikiwach i tiyoox.30Re' taqe i aj Israel taqe i aj Judá xanoq wo' pampeet xkitoq'aa' cho rub'aan i ma' imponik ta chi nuwach. Re' taqe i aj Israel xkijosaj wach i nujosq'iil ruuk' i rulooq'jiik taqe i tiyoox inki a'n xa re' keh kiyej-anik reh, inki QaJaaw Dios.31Re' i tinamit wili xa re' wo' noq xtohq'ik cho ruch'ihkik, eh xk'uloq ayu' yu'naak xa re' wo' hoq uksanik wach nujosq'iil inki a'n Ruum aj re' naa nusacham kiwach.32Ruum re' taqe i aj Israel, taqe i aj Judá xa re' i yiib' wach na'ojb'al inki a'n chi nuwach. Eh je' wo' re' i kina'ojb'al i kireey, je' wo' taqe i k'amal kib'eeh, je' wo' taqe k'amal kib'eeh aj tiij, je' wo' hoq i jalal naq taqe nuq'oral, je' re' kina'ojb'al chu'nchel i aj Judá, chu'nchel i aj Jerusaleem.33Re' keh xkisutej weh i kiij ma' xinkaaj ta kinimam. Eh re' hin eliik wo' naq i nutijej taqe, re' keh xama' xinkib'iraj ta wo' hoq. Eh ma' xkinimaj taj i kiq'ilariik xnub'an.34Eh xkich'uwa'risaj paam i nupaat kinlooq'jik wii', ruum re' chik i tiyoox inkiloq'ej ar.35Xkiyejaa' i artaal re' ruuk' i tusuj ab'aj loq'oomb'al reh i Baal ar wach k'ixkaab' Ben-hinom, ar xkik'at i kak'uun kixq'uun chi kimayiij chuwach i tiyoox Moloc. Ruuk' taqe i yiib' wach na'ojb'al re' re' xkiq'eb' pamahk taqe i aj Judá. Eh ma' hin xinq'orik keh chi nakianam re', ni xata naq xik'ik cho panukapeb'aal, inki Dios.
36Re' QaJaaw Dios je' wili xuq'or weh: Re' hin i ki Dios i aj Israel, je' wili i nuq'or chikiij i tinamit wili, re' naa nub'anam ruuk' koq'uun, re' inaq'or i hat chi naa ruchopariik naah ruum i kireey i aj Babilonia, ruum q'aq'inik ruum wi'jalel, ruum yab'ilaal.37Re' hin naa numolom wach i kitinamiit chupaam taqe i tinamit aha' xnutukej reje kiwach noq yohb'aal wach i nujosq'iil xchalik chikinaah, xama' nukuy ta chik. Eh naa wo' chik nuk'amam taqe chaloq pan kitinamiit, reh chi pansuqkiil k'uxliis naa kik'achariik.38Eh naa wo' chik kikahniik chi nutinamiit taqe, eh re' hin naa wo' chik nukahniik chi ki Dios.39Eh naa nuye'em pankanima chi xa re' chik naa kianam inwaaj i hin, eh chi naa kinkiyohleem, ruum re' re' chihooj chi kekeh, eh je' wo' chi keh i kiih kimaam.40Re' hin wilik i naa nuyejaam wach kuuk' reh juneliik. Re' chi ma' jaruuj chik naa nukanaam kitoob'jiik, naa nuye'em pankanima chi naa kinkiyohleem, reh chi ma' nee ta chik inkikanaa' nunimjiik chi jumpech.41Chi je' re' naa rusuqb'iik nuk'ux kuuk', naa nutob'eem taqe, xti korik chi naa wo' chik nuye'em taqe pan kitinamiit wili. Je' re' i naa nub'anam kuuk' chu'nchel nuk'ux, chu'nchel i wánima, inki Dios.
42Eh je' wo' chik wili i xuq'or: Nik' wach noq naa nuye'em q'ab' chi naakik'ulum i runimaal ti' k'axik je' wo' chik re' noq naa nuye'em keh chu'nchel i wotob'il nuq'orom cho rib'iral keh.43Eh naa wo' chik kehchaam i tinamit, re' xaq'or i hat chi naa rukahniik chi xan tz'irik chik paam, chi ma' xta chik tinamit, chi ma' xta chik chikop naa ruwihiik chupaam. Eh chi naa ruchopariik naah kuum i aj Babilonia.44Naa wo' chik kiloq'om kak'aal, naakiyejaam ruhujil naa kikojom i kib'ihnaal i naa kilwiik reh chi xloq' naa kikojom rehtalil. Re' loq' wili ar naa rub'aan chupaam i ruyuq'ul i Benjamín, chi junsuut i Jerusaleem, eh chupaam taqe tinamit wilkeeb' Judá. Eh chupaam taqe tinamit wilkeeb' paraxchee', chupaam taqe i tinamit wilkeeb' Sefela, chupaam i tinamit Neguev, ruum naa wo' chik wesam taqe cho panti' k'axik, inki i QaJaaw Dios. Re' Dios xuq'or rib'iral chi naa wo' chik rusutiniik chee rutinamiit
1Re' i Jeremías noq tz'aplik chuwach reje tz'ilom je' wili i xq'orarik reh ruum i Dios:2Re' hin i Dios, hin xinyej-anik reh i taxaaj, i wach ak'al, eh xnuyeew taqe pan kiye'aab' je' wili i xnuq'or:3Kow kinaq'oreej awuuk' re' hin nee tib'iraj, neenuk'uhtaaj aweh aha' wilik i ma' weht'al taj i hat, re' i ma' eht'alimaj taj.4Ruum re' hin i Dios, ki Dios i aj Israel, je' wili i nuq'or chikiij i tinamit wili, chi riij i rupaat i reey, re' chi naa rusachariik kiwach naa rukahniik chi ke'emb'al kiib' taqe i naa kitoq'aam kik'ulb'ejiik chi q'aq'inik taqe i aj Babilonia.5Eh naa runujiik chi kamnaq paam i tinamit, re' hin naa nuye'em q'ab' ruum i nujosq'iil chi naakik'ulum i ti' k'axik. Re' hin ma' naa ta nuketelaam kiwach naa nuq'eb'em taqe chi riij nuk'ux, ruum i yiib' wach na'ojb'al inki a'n6Atoob' ta je' re' inki a'n re' hin naa wiq'omaam taqe, naa wesam i kiti'kiil, naa nuye'em keh i suq laj wihik, eh ma' xta chik inakik'ulum.7Je' re' noq naa wo' chik taqe wesam chaloq panti' k'axik i aj Judá, taqe i aj Israel, naa wo' chik nuch'ikaam taqe pan kiye'aab' je' rukab' i pampeet.8Naa wesam pankamanik chu'nchel i kiyiib' wach na'ojb'al, re' taqe i mahk xkian noq xkiq'eb' kiib' chi nuwach. Eh re' hin naa nukuyum chu'nchel i kimahk, eh ruum i re' xin kiq'eb' chi riij kik'ux.9Re' i tinamit Jerusaleem naa rukahniik chi ye'el rusuqkiil nuk'ux, chi ye'el nuloq'il chi ye'el runimaal nuwach, chikiwach chu'nchel i tinamit sut i wach ak'al, Noq naa kib'iram rib'iral i tokoom tinamit chu'nchel i kitoob'jiik naa nub'anam chi suq chik naa kiwihiik ma' k'isiin ta naa kiyo'jiik, inki Dios.
10Eh je' wo' chik wili i xuq'or: Re' taq i hat inaq'or taq chi re' tinamit wili xan tz'irik chik paam, ma' xta chik tinamit, ma' xta chik chikop, chi ma' xta chik wilik chupaam taqe i xilak taq b'eeh Judá, je' wo' xilak taq b'eeh Jerusaleem. Korik chi ma' xta chik tinamit, chi ma' xta chik chikop chupaam.11Xa re' la' naa wo' chik rib'irjiik i tz'uuy, i ninq'iij reh i kaxáro, je' wili i naa ruq'orariik: Chat'iosej taq i rotob'il i QaJaaw Dios nim i rajaawriik ruum re' reh q'e' aj k'axool, eh juneliik wilik i ketelinik wachiis ruuk' inko'q taqe. Eh naa wo' rib'irjiik i kiq'oral i naa kik'amam chaloq i kimayiij panupaat reh i t'iosinik. Eh korik wo' hoq chi naa wo' chik wesam taqe cho pan ti k'axik i tinamit wili, reh chi naa wo' chik kikahnik chi je' rukab' i pampeet, inki Dios.
12Re' QaJaaw Dios nim rajaawriik je' wili i xuq'or: Re' tinamit wili i ma' xta chik tinamit ma' xta chik chikop chupaam. Naa wo' chik ruwihiik ch'ahn chupaam reh chi re' taqe i aj cha'jen tentzun naa wo' chik kiye'em ruwa' i kitentzuun ar.13Chi je' chupaam i tinamit wilkeeb' paraxchee', chupaam tinamit wilkeeb' Sefela, chupaam i tinamit wilkeeb' paruyuq'ul i Neguev, chupaam i ruyuq'ul Benjamín, chupaam i tinamit chi junsuut i Jerusaleem. Chupaam i tinamit wilkeeb' paruyuq'ul i Judá, naa wo' chik rilariik kiwach i aj cha'jen tentzun chi k'ahchi' kajlaam i kitentzuun.
14Xti korik chi naa wo' chik ruponiik i q'iij chi nuwach noq naa nuye'em i wotob'il chikinaah i aj Israel, je' wo' chikinaah i aj Judá, je' wo' rukab' i nuq'orom rib'iral keh.15Noq naa ruponiik i q'iij, re' hin naawisam jinaj manlik xikin riih i David, re' i wihinaq cho chi reyil. Eh re' reh naa ruch'ikaniik reh i rukorkiil wach k'uxliis chupaam i tinamit, je' wo' hoq i rub'ehel chi b'anarik.16Eh chupaam taqe i q'iij re' re' naa nuko'leem taqe i aj Judá, taqe i aj Jerusaleem. Eh ma' xta chik ti' naakilom wach, je' wili i nub'ihnaal naa kiq'orom. Ruum i QaJaaw Dios naaqeliik korik, inko'q taqe.
17Re' hin kinq'orik reh chi eliik naa ruwihiik xikin riih rumaam i David, re' i naa rokiik chi reyil chinaah i tinamit Israel.18Eh ma' k'isiin taqe i k'amal b'eeh aj tiij naa ruwihiik chi kixilak, re' ruuk' taqe i riih rumaam i Leví, reh chi chu'nchel i q'iij naa kik'atam i mayiij chi nuwach. Naa kik'atam i kimayiij re' ruuk' i chi naq'wach, je' wo' hoq i tokoom mayiij inki.
19Eh re' QaJaaw Dios, je' wili i xuq'or reh i Jeremías:20Wila' wilik neerub'an ruyojariik wach nik' wach noq wilik q'iij, je' wo' hoq nik' wach noq wilik i chaq'ab', eh ma' re' ta chik paruorahiil nee ruyeew riib' i pan q'iij je' wo' chaq'ab'.21Nee wo' naq rub'an chi nee nuyoj wach hin i nuyejaam wach ruuk' i David, ma' nee ta naq inwihik xikin riih naa rokiik chi reyil, je' rukab' noq xwihik cho chi reyil i reh. Eh ma' nee ta naq inooj eloq wach i nuyejaam wach kuuk' taqe i k'amal kib'eeh aj tiij, taqe i riih rumaam i Leví.22Re' taqe i riih rumaam i waj kamanoom David, riih rumaam taqe Leví k'amal kib'eeh aj tiij naa nuk'ihaaxb'isam taqe. Korehtaal kiponik chi je' kik'ihaal i ch'umiil, chi je' kik'ihaal i saniib' tub'ulkeeb' chi chii' i palaw, ma' awach ta naa rukuywiik kajaljiik, inki Dios.
23Eh re' i QaJaaw Dios, je' wo' chik wili xuq'or reh i Jeremías:24¿Mi ma' nakoj rehtaal re' hat chi re' i tinamit inkiq'or chi xnuq'eb' taqe chi riij nuk'ux ka'ch'uq chi tinamit nusik'im cho kiwach, re' i Israel re' i Judá? Ruum aj re', re' keh ma' kiyeew ta chik rajaawriik i nutinamiit, ma' nkikoj ta chik chi nimlaj tinamit.25Re' hin i Dios je' wili i nuq'or: Nik' wach noq ma' nee ta nuyoj wach i saqum pan q'iij, i q'equm chaq'ab' nuyejaam cho wach reh chi naa ruwihiik kajaawriik pan taxaaj, je' wo' wach ak'al.26Je' wo' re' noq ma' nee ta nuq'eb' chi riij nuk'ux taqe i riih rumaam i Jacob, i riih rumaam David re' i waj kamanoom. Eh ma' naa ta wo' nukanaam kipa'ab'jiik i naa rub'aniik i taaq'anik chikinaah i riih rumaam Abraham, i riih rumaam Isaac, i riih rumaam Jacob. Ruum re' hin naa wo' chik nuketelaam kiwach, naa wesam taqe chaloq panti' k'axik, inki. Re' noq xq'orob'jik i reey Sedequías
1Noq re' i Nabucodonosor kireey i aj Babilonia ruch'ihil chu'nchel i ru soldado kichalik chupaam taqe i tinamit ruchopom naah k'ulik chik inki a'n iloq chi q'aq'inik chinaah i Jerusaleem, chikinaah i tinamit wilkeeb' chi junsuut. Re' i QaJaaw Dios je' wili xuq'or reh i Jeremías:2Re' hin i Dios, aaDios taq i hat i aj Israel i nuq'or aweh i hat chi hiy cha q'or reh i Sedequías kireey i aj Judá chi je' wili: Chi re' hin naa nuye'em q'ab' chi re' i rutinamiit naa ruchopariik naah ruum i kireey i aj Babilonia, eh naa kikojom ruq'aq'al.3Eh re' reh ma' naa ta ruko'leem riib' pan q'ab', naa ruchopariik, naa ruq'ahtesjiik pan q'ab' i reey re' re' naa rilom wach ruuk' naq'wach. Eh xti naa rub'anam k'ulwach ruuk' noq naa rub'anam ruk'utaaj ruuk' ar Babilonia.4Eh ma' xata re', i re' Sedequías kireey i aj Judá, chab'iraj i ruq'or chawiij i QaJaaw Dios: Re' reh ma' naa ta rukimiik ruuk' q'aslaj ch'ihch'.5Pan suq kiil k'uxliis la' naa rukimiik parupaat, eh naa kik'atam ink'ohnik laj iq'oom je' rukab' i xk'atarik cho chikinaah i rumaam rati't, re' i xi wihik cho chi reyil chi peet chuwach i reh. Re' reh naakoq'em naa rutiib'iik kik'ux chi riij, je' wili inakiq'orom: Q'e' wo' chik ti' i xqak'ul xkimik i qareey, inko'q taqe, inki i Dios.
6Eh re' Jeremías i jalal ruq'oral i Dios xponik ruq'or reh i Sedequías kireey i aj Judá ar Jerusaleem i xq'orarik reh ruum i Dios.7Chupaam taqe q'iij re' re' k'ahchi' chik cho keeb' chi q'aq'inik i ru soldado i kireey i aj Babilonia, chinaah i tinamit Jerusaleem. Ach wo' re' i tinamit Laquis ruch'ihil i tinamit Azeca wilik ko'lemb'al kiib' chi korik wilkeeb' paruyuq'ul i Judá majaa' tanchalik i q'aq'inik chikinaah. Xa ma' xioq'tejik ta wo' reje taqe i minooj pankowlaj kamanik
8Re' QaJaaw Dios xuq'oreej wo' chik i Jeremías noq re' reey Sedequías ruyejaam naq chik wach kuuk' chu'nchel i aj Jerusaleem chi naa koq'taam reje i kimoso kiminim pankowlaj kamanik.9Xuq'or keh chi, chi kunchelaal naa koq'taam reje i kimoso winaq i kimoso ixoq re' ruuk' taqe i aj hebreos, reh chi ma' jino'q keh i re' ruuk' i kitinamiit naa rukahniik chi kimoso.10Re' taqe i k'amal b'eeh taqe i tinamit xuk'ul kik'ux chi kunchelaal i xuq'or i reey, xkoq'taaj wo' naq reje taqe i kimoso ma' xkimin ta chik pankowlaj kamanik.11Xa re' la' ti' wo' chik xkik'raaj chi xkoq'taaj reje i kimoso xkichop wo' chik naah xkimin wo' chik pankowlaj kamanik.12Ruum aj re', re' i QaJaaw Dios je' wili i xuq'or reh i Jeremías:13Re' hin i Dios, aaDios taq i hat, hat taq i aj Israel wilik wo' naq i xnuyejaa' cho wach kuuk' taq aamaam awati't, noq xwesaj taqe chaloq Egipto, re' naq taqe i minooj pankowlaj kamanik, je' wili i xuq'or keh:14Re' taq i hat xa waqiib' haab' naa rukamaniik taq awuuk' amoso aloq'om, eh paruwuuq haab' naa taq awoq'taam reje, kinki keh. Xa re' la' re' taq aamaam awati't xama' xkinimaj ta wo' hoq, eh xama' xinkaaj ta wo' kib'iram.15Re' taq i hat yu'naak xajal wo' chik taq wach aana'ojb'al, eh xatoq'aa' naq taq chik rub'aan imponik chi nuwach i hin, ruum xawoq'taaj naq taq chik reje amoso xa aloq'om, re' ruuk' taq aatinamiit aj hebreo. Eh xatoq'aa' wo' naq taq rub'aan i xqayejaa' taq cho wach awuuk' chupaam i nupaat kinlooq'jik wii'.16Chi riij i re' xajal wo' chik taq wach ana'ojb'al, xa yeq' taq panak'al i xnuq'or taq aweh xachop wo' chik taq naah amoso chi winaq, chi ixoq xa nim wo' chik taq pankowlaj kamanik.17Ruum aj re' re' hin i Dios kinq'orik chi xama' xinanimaj ta wo' taq ruum xama' xawoq'taaj ta wo' taq reje amoso chi jumpech chi winaq chi ixoq re' ruuk' taq aatinamiit. Ruum aj re', re' hin naa nuye'em taq cha naah i q'aq'inik, i wi'jaleel, i runimaal yab'ilaal. Eh ruum i re' yohb'aal wach noq naa kiyo'jiik i tinamit sut i wach ak'al.18Re' hin naa nuye'em taqe pan q'ab' i ti' k'axik re' re' chu'nchel i xiyeq'wik panak'al i xnuq'or naq keh chi naa kianam, eh ma' xkian taj i xqayejaa' wach kuuk'. Re' noq xkik'at i rak'uun wakax chi nuwach chi kimayiij, kiib' xkesaj, ki-ik'ik panyejaal i rutooq.19Re' taqe i naa nuye'em panti' k'axik re' taqe i wili: Re' taqe i k'amal kib'eeh i aj Judá, i k'amal kib'eeh i aj Jerusaleem, i nimaq wach kikamaj, i k'amal kib'eeh i aj tiij. Eh chu'nchel i tinamit ki-ik'ik panyejaal i rutooq i mayiij.20Eh re' hin naa nuq'asam taqe pan kiq'ab' i nixowanik kiwach re' taqe i k'ahchi' rusi'wiik keh reh i kikanteesjiik. Eh re' i kiti'jolal naa rukahniik chi kiwa' taqe i chikop kirupinik pan taxaaj, eh chi kiwa' taqe i josq'laj chikop wilkeeb' pantaq ch'ahn.21Eh re' i Sedequías kireey i aj Judá, ruch'ihil i nimaq wach kikamaj wilkeeb' ruuk', naa nuq'asam taqe pan kiq'ab' i nixowanik kiwach, re' i k'ahchi' rusik'wiik keh reh i kikanteesjiik. Eh naa nuq'asam taqe pan kiq'ab' taqe i ru soldado i kireey i aj Babilonia, re' taqe i koxkikanaa' pechik i q'aq'inik taq awuuk'.22Re' hin naa wo' chik nuye'em q'ab' keh chi naakichaliik chi q'aq'inik chinaah taq aatinamiit wili chi naa kichopom naah, chi naa kikojom ruq'aq'al. Re' i tinamit wilkeeb' paruyuq'ul i Judá naa nukanaam chi xan tz'irik chik kipaam, eh chi ma' jino'q chik i k'achareel chupaam, inki i QaJaaw Dios. Re' i xub'an i Jeremías kuuk' i aj Recabitas
1Re' i Jeremías je' wili xuq'or: Noq wilik chi reyil ar Judá i Joacim rak'uun i Josías, re' QaJaaw Dios je' wili xuq'or weh:2Hiy aha' patim taqe wii' i aj rekabitas cha a'n ak'utaaj kuuk' chak'am taqe johtoq paruka'ch'iht i paat wilik chucheel i rupaat i Dios ar nee nayeew keh chi uuk'jik i k'ahlaj vino, inki.
3Eh re' hin xinooj wo' hoq chusik'ariik i Jaazanias rak'uun i wuch Jeremías jinaj riih Habasinías, haa' taqe i ruchaaq', taqe i rak'uun, chu'nchel i aj rekabitas.4Eh xnuk'am taqe johtoq paruka'ch'iht jinaj i paat wilik chucheel i rupaat i QaJaaw Dios, re' i patim wii' taqe i rak'uun Igdalias. Re' paat wilik chucheel i kipaat, i kinimanik reh i Dios chi korik, eh chucheel i kipaat i kik'amwik b'eeh parupaat i Dios ar chinaah i paat wilik wii' Maasías rak'uun i Salum aj cha'joom chi chii' i puerta.5Eh re' hin xnuyeew chikiwach chu'nchel i aj Recabitas taqe i kulk nujinaq taqe i chi k'ahlaj vino, eh je' wili i xnuq'or keh: Chawuk'ej taq i vino wili, kinki keh.6Eh re' keh je' wili i xkiq'or: Re' hoj ma' jaruuj neenquk'ej qeh i k'ahlaj vino ruum re' Jonadab rak'uun i Recab re' i xikin qamaam ruq'orom cho qeh chi ma' jaruuj naa quk'em qeh i k'ahlaj vino i hoj, je' wo' taqe i qiih qamaam.7Eh i xuq'or qeh chi ma' naa ta qayejaam qapaat, chi ma' xta na qatikim qeh, eh ni xata naa qatikim qa uuva. Eh ruq'orom cho qeh chi xa pankok' perpat itz'ihy kinaah, naa qak'achariik, chi je' re' najt taq nee ti k'acharik ayu' wach ak'al aha' i xa hat taq ik'al b'eeh, inki qeh.8Chu'nchel i ruq'orom cho qeh i xikin qamaam Jonadab k'ahchi' qanimam ruum aj re' ma' jaruuj neenquk'ej qeh i k'ahlaj vino, ni xata re' i qehk'een, ni xata re' taqe i qak'uun, qixq'uun nee kiuk'inik reh.9Ruum aj re', re' hoj ma' qayejaa' ta qapaat, eh ma' qatik ta qa uuva, eh ma' xta wo' hoq inqatik qeh panye'aab'.10Xa pan itz'ihy naah paat la' k'acharik inqa'an, k'ahchi' qanimam chu'nchel i ruq'orom cho qeh i xikin qamaam Jonadab.11Xa re' la' re' Nabucodonosor kireey i aj Babilonia xuchop naah i qatinamiit. Ruum i re' xchalik qakeb'aa' qiib' ayu' hoj, hoj aj Jerusaleem chikiwach taqe i ki soldado i aj Babilonia, je' wo' chikiwach i ki soldado i aj Siria. Ruum taqe i re' ayu' k'acharik inqa a'n Jerusaleem yu'naak, inki taqe.
12Eh re' i QaJaaw Dios je' wili i xuq'or reh i Jeremías:13Re' hin i Dios nim wajaawriik, ki Dios i aj Israel, i nuq'or aweh chi hiy kuuk' i aj Judá, kuuk' i aj Jerusaleem, cha q'or keh chi je' wili: ¿Mi ma' xkitijej keh re' i nunimjiik i xkian i tinamit re' re'? Ruum ma' xkinimaj taj i xnuq'or keh.14Re' i xikin riih rumaam Jonadab rak'uun i Recab xkinimaj i xuq'or kahnoq chi ma' jaruuj naa kuk'em keh i k'ahlaj vino. Eh xama' xkuk'ej ta wo' keh chi jumpech, ruum xkinimaj i xuq'or kahnoq i xikin kimaam. Eh re' taq hat xata wo' jarpech nuq'orom taq aweh chi naa kin taq animam, xa re' la' xama' kinanimaj ta wo' taq, xama' na a'n ta wo' taq i nuq'or aweh.15Re' hin kok' xilak xnutaq'aaj taqe chaloq i jalal nuq'oral taq chaxilak, reh chi xq'orarik taq aweh chi chakanaa' taq rub'aan i yiib' wach na'ojb'al. Eh chi ma' naa ta chik taq animam, aloq'em i tiyoox. Chi je' re' nanaq taq a'nam rusuqkiil i aak'achariik chupaam i ye'aab' nuq'orom cho rib'iral chi naa nuye'em taq aweh, re' wo' nuye'em cho keh taq aamaam awati't. Xa re' la' re' taq i hat xama' xanimaj ta wo' taq xama' xa a'n ta wo' taq i xnuq'or taq aweh.16Eh re' taqe i xikin riih rumaam i Jonadab keh rak'uun i Recab k'ahchi' kinimam i xuq'or kahnoq i xikin kimaam. Raaj taq i hat aj Israel xama' kinanimaj ta wo' taq xama' nanimaj ta wo' taq i nuq'or aweh.17Ruum aj re', re' hin i Dios nim wajaawriik, aaDios taq i hat aj Israel, naa nuye'em i runimaal ti' k'axik chikinaah i aj Judá, i aj Jerusaleem. Re' wo' nuq'orom rib'iral chi naa nuye'em chikinaah. Ruum re' hin xnuq'or naq keh chi naa kin kinimam, eh xama' xinkinimaj ta wo' hoq, xama' xkian ta wo' hoq i xnuq'or keh, inki weh Dios.
18Eh re' Jeremías je' wili i xuq'or keh i aj Recabitas: Re' QaJaaw Dios nim rajaawriik ki Dios i aj Israel je' wili xuq'or: Ruum chi xanimaj taq i rukanaam kahnoq ruq'orariik i xikin taq aamaam Jonadab xanimaj taq chu'nchel i ruk'uhb'aal xukanaa' kahnoq, xa a'n taq i xuq'or.19Ruum aj re', re' hin i Dios nim wajaawriik, ki Dios i aj Israel je' wili xnuq'or: Juneliik naa ruwihiik jino'q panukamaj chi nuwach i re' ruuk' i xikin riih i Jonadab, rak'uun i Recab, inki. Re' i Baruc xrilow wach i tz'ihb'amaj chupaam i junb'oht chi huuj
1Eh noq parukaaj haab' chik rokiik chi reyil ar Judá i Joacim rak'uun i Josías, re' QaJaaw Dios. Je' wili i xuq'or reh i Jeremías:2Yu'naak i hat cha chop jumb'oht-oq i huuj cha tz'ihb'aaj ar chu'nchel i xnuq'or weh pampeet re' noq xwihik cho chi reyil Judá i Josías, eh je' wo' taqe i k'ahchi' nuq'orom aweh yu'naak. Re' taqe i naakik'ulum i aj Israel, i aj Judá, i naakik'ulum chu'nchel i tinamit.3Eh noq neenkib'iraj rib'iral i runimaal ti' k'axik k'achi' nukapaam chi naa nuye'em chikinaah re' taqe i aj Judá nee oon naq inche kikanaa' i kiyiib' wach na'ojb'al. Re' hin nee naq i nukuy i kimahk, i kiyiib' wach na'ojb'al, inki Dios.
4Eh re' Jeremías xuyuq'eej ruuk' i Baruc re' i aj tz'ihb' rak'uun i Narias. Nik' nimaal i q'orooj reh i Jeremías ruum i Dios xuq'or reh i Baruc, eh xutz'ihb'aaj chu'nchel chupaam jumb'oht chi huuj.5Chi riij i re', re' Jeremías je' wili i xuq'or reh i Baruc:
Re' hin ma' ye'ooj ta chik q'ab' weh chi naawokiik chupaam i rupaat i Dios.6Ruum aj re' okeen i koq i hat, reh chi nee nawil wach ar i xatz'ihb'aaj chupaam i jumb'oht chi huuj, re' i ruq'oral i Dios xnuq'or aweh. Re' noq imb'aan i loq'inik chi ma' b'anooj ta wi'k ha', eh nee nawil wach reh chi neenkib'iraj i tinamit, reh chi neenkib'iraj i kichalik Judá, reh chi neenkib'iraj i ruk'uhb'aal i Dios.7Chi je' re' nee oon naq inche inkipahqaaj kikuyb'al reh i Dios, nee oon naq inche kikanaa' i kiyiib' wach na'ojb'al, ruum re' Dios yohb'aal wach i rujosq'iil naa ruye'em chaloq. Re' i ruq'orom cho rib'iral chi naa ruye'em cho chikinaah i tinamit wili, inki Jeremías.8Eh re' Baruc xub'an chu'nchel i xq'orarik reh ruum i Jeremías jalal ruq'oral i Dios, xrilow wo' wach parupaat i Dios chi kixikin i tinamit nik' nimaal i ruq'oral i Dios xutz'ihb'aaj chupaam i jumb'oht chi huuj.
9Eh parub'eleej pooh reh i roo' haab' rokiik chi reyil Judá i Joacim rak'uun i Josías xq'orarik chi naa rub'aan rulooq'jiik i Dios chi ma' b'anooj ta wi'k ha', chi je' taqe i aj Jerusaleem, chi je' kichalik taqe paruyuq'ul i Judá.10Re' i Baruc xrilow wach i ruq'oral i Dios chi kixikin i tinamit, re' xuq'or i Jeremís, re' i xutz'ihb'aaj i Baruc. Ar xrilow cho wach paruka'ch'iht i paat wilik wii' i aj tz'ihb' Gemarías rub'ihnaal, ma' najt ta ruuk' i ak' laj puerta wilik panookb'al reh i rupaat i Dios.
11Eh re' Micaias rak'uun i Gemarías riih i Safán xkuxik rib'iram chu'nchel i ruq'oral i Dios xrilow wach i Baruc chupaam i jumb'oht chi huuj.12Eh xooj chupaam i rupaat i reey paruka'ch'iht i paat wilik wii' i aj tz'ihb', re' i kimolom wii' kiib' i kikamanik ruuk' i ajaab'ees, re' taqe wili: Re' i Eliasama aj tz'ihb', re' Delaía rak'uun i Semaías, re' i Elnatán rak'uun i Acbor, re' Gemarías rak'uun i Safán, re' Sedequías rak'uun i Hananías, wilik chik taqe i kikamanik ruuk' i ajaab'ees wilkeeb' ar.13Eh re' Micaias kuxik ruk'uhtjaam keh nik' nimaal i xrib'iraj noq xrilow wach i Baruc chi xikin i tinamit i tz'ihb'amaj chupaam i jumb'oht chi huuj.14Noq xkib'iraj chi je' re', xkitaq'aaj i Jehudi i rak'uun i Netanías, riih i Selemías, riih i Cusi chuk'amariik i Baruc reh chi naa ruk'amam chaloq jumb'oht chi huuj xrilow wach chi kixikin i tinamit. Eh re' i Baruc xuchop chaloq i jumb'oht chi huuj xchalik chikiwach i raj kamanoom ajaab'ees kimolom kiib'.15Eh re' keh je' wili i xkiq'or reh i Baruc: Titzuun quuk' chawilow wach qeh i jumb'oht chi huuj inki taqe. Re' i Baruc xrilow wo' wach i jumb'oht chi huuj.16Noq xkib'iraj taqe i ruq'or chupaam i jumb'oht chi huuj ma' k'isiin ta xchalik kiyo'jiik k'ul xkitz'ehtaaj kiib' je' wili i xkiq'or chikiwach: Chu'nchel i xqib'iraj wili naa qaq'orom reh i reey, inki taqe.17Eh xkipahqaaj reh i Baruc chi je' wili:
Chaq'or qeh nik' wach noq xatz'ihb'aaj taqe chu'nchel i q'orik re' re', inki taqe.
18Re' i Baruc je' wili kichaq'weesjiik xub'an:
Chu'nchel i q'orik wili, re' Jeremías xq'orik weh, eh re' hin xnutz'ihb'aaj.
19Eh re' taqe i raj kamanoom i ajaab'ees, je' wili i xkiq'or reh i Baruc:
Hiy chakeb'aa' awiib' awuch'ihil i Jeremías, mo'-oq jino'q neenab'inik reh aha' taq neenooj akeb'aa' awiib', inki taqe, reh.
20Eh re' taqe i nimaq wach kikamaj ruuk' ajaab'ees xkikanaa' i junb'oht chi huuj chupaam i paat wilik wii' i Elisama re' i aj tz'ihb'. Eh xiooj parupaat i reey, xponik kiq'or reh nik' nimaal i ruq'or chupaam i huuj.21Chalik i reey xutaq'aaj reje i Jehudi parupaat i Elisama re' aj tz'ihb' chuk'amariik i jumb'oht chi huuj. Noq re' i Jehudi ruk'amam chik chee i huuj re' re' xrilow wach chi xikin i reey, chi kixikin i nimaq wach kikamaj ruuk' ajaab'ees kimolom kiib' ar.22Eh chupaam i rub'eleej poh ree haab' re' re', re' i reey ar wilik paruka'ch'iht i paat i rub'an wii' i taaq'anik, re' i rik'saj wii' i jab' q'iij q'axnik i rub'an i koq chi chii' i q'aaq' luk'uuj ar.23Noq re' i Jehudi i rilow wach oxch'iht oon kajch'iht chi q'orik wilik chupaam i huuj, re' reey i ruq'or reh i Jehudi chi ma' rilow pee chik wach, eh chi chuyok' iloq i huuj ruuk' kuchilo, tiklik ruk'atam wach q'aaq'. Korehtaal kuxik ruk'atam i jumb'oht chi huuj.24Eh ni xata re' i reey, ni xata re' taqe i nimaq wach kikamaj ruuk' ajaab'ees xi ib'irinik reh i xuq'or panhuuj, eh xchalik kiyo'jiik, ni xata naq xkik'uhtaaj chi xtib'ik kik'ux chi riij i huuj re' re'.25Atoob' ta re' i Elnatán, re' i Delaía, re' i Gemarías xkipahqaaj wo' naq kikuyb'al reh i reey chi maruk'at i jumb'oht chi huuj re' re'. Eh re' reh xama' xrib'iraj ta wo' k'isinoq.26Re' reey xutaq'aaj reje i Jerameel, rak'uun i Hamelec, i Seraías rak'uun Azriel, i Selemías rak'uun i Abdeel, chi ruchopariik i Jeremías jalal ruq'oral i Dios ruch'ihil i Baruc re' i aj tz'ihb'. Eh xama' xkian ta wo' ruchopariik ruum re' i QaJaaw Dios xkeb'anik keh.
27Eh noq re' i reey Joacim ruk'atam chik i jumb'oht chi huuj i wilik wii' i ruq'oral i Dios re' i xuq'or i Jeremías reh i Baruc chi xutz'ihb'aaj. Re' QaJaaw Dios je' wo' chik wili i xuq'or reh i Jeremías:28Yu'naak i hat cha chop wo' chik jumb'oht-oq i huuj nee wo' chik i natz'ihb'aaj chupaam chu'nchel i q'orik xatz'ihb'aaj pampeet chupaam i jumb'oht chi huuj xuk'at wach q'aaq' i Joacim re' i kireey i aj Judá.29Eh je' wili i cha q'or reh i reey re' re': Re' QaJaaw Dios je' wili ruq'or chawiij: Re' reh xuk'at i jumb'oht chi huuj, eh xat ruq'il i hat Jeremías chi xatz'ihb'aaj chupaam chi re' taqe i aj Babilonia ma' naa rik'iik wach chi ma' naa ta kichaliik chi rusachariik wach i tinamit wili. Eh chi naa kikanaam chi ma' jino'q chik i winaq, chi ma' jino'q chik i chikop naa rukahniik chupaam.30Re' QaJaaw Dios je' wili i xuq'or chi riij i Joacim kireey i aj Judá: Re' reh ma' jaruuj naa ruwihiik jino'q i riih rumaam chi reyil, je' rukab' noq xwihik cho chi reyil i David. Eh re' i ruti'jolal noq naa rukimiik naa rukahnik chi tuch'lik chuwach i tz'a'laj q'iij, chuwach i runimaal k'uxik chaq'ab'.31Re' taqe riih rumaam, taqe nimaq wach kikamaj wilkeeb' ruuk' naa nuye'em taqe chutojariik i kimahk. Eh naa nuye'em chikinaah i keh, chikinaah i aj Jerusaleem, chikinaah i aj Judá. Nik' nimaal i ti' k'axik xnuq'or rib'iral, re' i ma' xkaaj ta kib'iram, inki chawiij i Dios tiko'q reh.
32Re' i Jeremías xuchop wo' chik chaloq i jumb'oht chi huuj tokoom chik xuyeew reh i Baruc rak'uun i Nerias, re' wo' xtz'ihb'anik reh i ruq'oral i Dios xq'orarik reh ruum i Jeremías. Re' i xutz'ihb'aaj chupaam i peet huuj xuk'at i Joacim. Eh re' i Jeremías xuq'or chi naa rutz'ihb'jiik i kore' xq'orarik cho reh ruum i Dios, wilik i xtiqarik naah. Re' noq xtz'aparik i Jeremías
1Re' i Nabucodonosor i kireey i aj Babilonia xukoj chi reey ar Judá i Sedequías rak'uun i Josías chi jilow i Jeconias rak'uun i Joacim.2Xa re' la' ni xata re' i Sedequías, ni xata re' taqe i raj kamanoom, ni xata re' taqe i tinamit xinimanik reh i ruk'uhb'aal i Dios xq'orarik keh ruum i Jeremías jalal ruq'oral i Dios.
3Re' i reey Sedequías xutaq'aaj reje i Jucal rak'uun i Selemías, ruch'ihil i k'amal b'eeh aj tiij Sofonías rub'ihnaal rak'uun i Maasías, ruuk' i Jeremías jalal ruq'oral i Dios je' wili taq i cha q'or reh: Chub'aan rutiij chiqiij chuwach i QaJaaw Dios tiko'q taq reh, inki.4Eh chupaam i q'iij re' re' komajaa' inye'arik pantz'ilom i Jeremías, koruyee riib' chinb'ehik chi kixilak i tinamit.5Eh chupaam i q'iij re' re' k'ulik naq chik inki a'n iloq i ru soldado i kireey aj Egipto. Eh noq xkinab'eej taqe i ki soldado i aj Babilonia i k'ahchi' naq keeb' chi q'aq'inik ruuk' i aj Jerusaleem xi elik reje ar.
6Chi riij i re', re' i QaJaaw Dios je' wo' chik wili i xuq'or reh i Jeremías jalal ruq'oral i reh:7Re' hat je' wili i cha q'or reh i kireey i aj Judá: Re' i QaJaaw i qaDios i hoj, hoj aj Israel je' wili i xuq'or: Xuq'or chi naa apahqaam weh chib'ih naa rukahniik wii', cha q'or reh i reey re' re' chi re' taqe i ru soldado i kireey i aj Egipto xi chalik naq chi ruko'ljiik, naa wo' chik kisutiniik reje pan Egipto.8Eh re' taqe i ki soldado i aj Babilonia naa wo' chik kichaliik chi q'aq'inik chinaah i tinamit Jerusaleem, naa kichopom naah, naa kikojom ruq'aq'al.9Re' hin i Dios kinq'orik taq aweh chi maa jot' taq awiib' maa kapaaj taq chi re' i ki soldado i aj Babilonia ojik xkian chi jumpech ruum ma' je' ta re'.10Atoob' ta nee wo' naq taq i na a'n keh i hat i ki soldado i aj Babilonia naa kib'aniik i q'aq'inik taq awuuk', xama' k'ih ta chik chi winaq i naa kikahniik, xanaa kiq'ojib'iik chupaam i kiye'aab' kimolom wii' kiib'. Re' taqe i re' naa wo' chik kik'achjik reje, re' chik i keh naakikojwiik ruq'aq'al aatinamiit, inki Dios.
11Eh re' i ki soldado i aj Babilonia xi elik reje Jerusaleem, re' noq xkinab'eej chi re' taqe i ru soldado i kireey i aj Egipto k'ulik inki a'n iloq.12Re' i Jeremías xelik reje pan tinamit Jerusaleem xooj naq chupaam i ruyuq'ul i Benjamín. Re' naq xraaj i reh chi xooj haa' chuch'aqariik i ye'aab' i xkik'ul chi kikooch ruch'ihil taqe i rutinamiit.13Eh noq xooj k'oloq i Jeremías chi chii' i puerta wilik reje chi korkiil i ruyuq'ul i Benjamín, ar wilik jinaj i aj cha'joom kajaaw soldado Irías rub'ihnaal rak'uun i Selemías xuq'at i Jeremías je' wili xuq'or reh: Re' hat inawaaj ojik chi kixilak i aj Babilonia maje', inki reh.14Eh re' Jeremías je' wili i xuq'or: Ma' korik taj inaq'or ma' k'ahchi' ta wojiik chi kixilak i aj Babilonia, inki. Eh re' Irías xama' xunimaj taj i xq'orarik reh, xuchop la' i Jeremías xuk'am reje chikiwach i nimaq wach kikamaj ruuk' i reey.15Re' keh ma' k'isiin ta xchalik kik'aah chinaah i Jeremías noq xkilow wach xkiq'ojib'eej. Eh ar xkitz'ap parupaat i Jonatán, re' i aj tz'ihb', ruum re' i paat re' re' xkisutej chi kiye'aab' prexo.
16Eh re' noq re' i Jeremías xye'arik i koq chupaam i jul wilik chupaam i paat, eh najt xub'an ar.17Re' i reey Sedequías xuq'or: chi naa ruk'amariik reje i Jeremías chupaam i paat i rub'an wii' i taaq'anik, noq wilik chik ar i Jeremías, re' reey xupahqaaj reh chi qeqmaal chi je' wili: ¿Mi wilik jino'q i ruk'uhb'aal i Dios chi wee hin? inki. Re' Jeremías je' wili i xuq'or: Hoo' wilik, re' chi naa aq'ahtesjiik chi ri'sil i rajaawriik i kireey i aj Babilonia, inki.18Eh re' i Jeremías xupahqaaj reh i reey Sedequías chi je' wili: Raaj i hin ¿Chib'ih i mahk xnub'an chawach i hat chikiwach i awaj kamanoom, chikiwach i tinamit, ruum xinkimin pantz'ilom? inki.19Eh ¿Aha' wilkeeb' taqe i jalal ruq'oral i Dios inki a'n kiib' re' i xiq'orik aweh i chi re' kireey i aj Babilonia ma' naa ta ruchaliik chi q'aq'inik cha naah i hat, chikinaah aatinamiit?20Qajaaw reey chab'iraj tii weh i naa nupahqaam aweh, inwaaj chi nee nayeew weh. Re' chi maayeew chik q'ab' chi nee kinooj kitz'ap parupaat i Jonatán ruum wi xinooj kitz'ap, ar neekinkimik, inki.21Eh re' i reey Sedequías xuq'or chi cha'jaljoq chuwach reje i tz'ilom. Xuq'or chi rajlaal q'iij naa ruk'amariik reje rukaxlanwi'k re' ruuk' i xa pantaq b'eeh inloq'arik. Je' re' xkian reh korehtaal chik xk'uhlik i kaxlanwi'k. Je' aj re' noq xkahnik i Jeremías chuwach reje i tz'ilom. Re' hoq xye'arik pan chaam laj jul i Jeremías
1Re' i Sefatías rak'uun i Matán, i Gedalías rak'uun i Pasur, i Jucal rak'uun i Selemías, i Pasur rak'uun i Malquías, xkib'iraj i Jeremías noq k'ahchi' ruq'orom keh i tinamit taqe i q'orik wili:2Re' i QaJaaw Dios je' wili i xuq'or: Awach i naa kikahniik chupaam i tinamit wili naa kikimiik ruum q'aq'inik, ruum wi'jaleel, ruum yab'ilaal. Eh awach i naakeliik reje neenkiq'asaj kiib' pan kiq'ab' i aj Babilonia, neenkiko'leej riij i kik'achariik.3Re' QaJaaw Dios i xuq'or chi re' i tinamit wili naa rukahniik chi ri'sil i kajaawriik i ru soldado i kireey i aj Babilonia. Re' reh naa ruchopwiik naah inki Dios, inki Jeremías.4Eh re' taqe i nimaq wach kikamaj je' wili i xkiq'or reh i reey: Re' hoj inqaq'or chi ruk'ul chi neenkanteesjik i winaq re' re', ruum k'ahchi' rutukem wach i kikapeb'aal taqe i soldado koxikahnik panqatinamiit, je' wo' taqe i tinamit. Re' winaq re' re' ma' re' taj i holohik k'ahchi' rusik'im chi riij i qatinamiit, re' la' i yiib' wach k'ahchi' rusik'im, inki taqe.5Eh re' reey Sedequías je' wili i xuq'or: Ma' xta reet cha a'n taq ruuk' aha' wilik taq inawaaj i hat. Re' hin xama' xta wo' neenub'an taq aweh chi riij, inki.6Noq xkib'iraj chi je' re' xkichop i Jeremías xkiqasaj qohoq chi laso chupaam i chaamlaj jul wilik paruye'aab' i k'amal b'eeh Malquías rub'ihnaal. Re' jul re' re' ar wilik chuwach reje i tz'ilom, eh ruum chi ma' xta ha' chupaam i jul re' re' xa ch'uwa' i wilik chupaam xjutlujik qohoq ar i Jeremías.
7Eh noq xrib'iraj i Ebed-melec aj Etiopía kapuun raj kamanoom reey chi xye'arik qohoq panjul i Jeremías. Eh chupaam i q'iij re' re' rumolom riib' i reey chik'utaaj kuuk' taqe i raj kamanoom chi chii' puerta Benjamín rub'ihnaal.8Eh re' Ebed-melec xelik reje chupaam i paat i rub'an wii' i taaq'anik i reey, xooj chi q'orob'jiik i reey je' wili i xuq'or reh:9Re' i xkian taqe i winaq re' re', reh i Jeremías jalal ruq'oral i Dios jinaj i runimaal mahk. Re' keh xkimin chupaam i chaam laj jul, eh yu'naak k'ahchi' rukimiik ar ruum wi'jaleel ruum ma' xta chik kaxlanwi'k chupaam i tinamit, inki.10Eh chi riij i re', re' i reey xuq'or reh Ebed-melec chi chuk'am reje chi riij lajeeb'-oq ru ka'winaq taqe i winaq, reh chi naa rojiik kesam i Jeremías chupaam i chaam laj jul, reh chi ma' xkimik ta ar.11Eh re' Ebed-melec xuk'am wo' taqe reje chi riij i winaq xooj i molarik wii' taqe itz'ihy inkamanik chupaam i paat i rub'an wii' i taaq'anik i reey xuk'am chaloq taqe i q'aah taq itz'ihy ruuk' laso xuqasaj qohoq reh i Jeremías chupaam i chaamlaj jul, je' wili i xuq'or reh:12Chakoj taqe i q'aa itz'ihy re' re' pan asikan reh chi ma' nee ta tiruyol i laso, inki. Eh re' i Jeremías xub'an wo' hoq i xq'orarik reh.13Eh re' taqe i winaq xkikut qohoq i laso reh i Jeremías, ruuk' i re' xkiqerej chaloq. Eh ar wo' chik xkahnik i Jeremías chuwach reje i tz'ilom. Re' i reey Sedequías xutaq'aaj ruk'amariik i Jeremías
14Re' i reey Sedequías xuq'or chi naa ruk'amariik reje chuwach i Jeremías ar chupaam i ookb'al reh i rupaat i Dios, je' wili xuq'or reh i Jeremías jalal ruq'oral i Dios:
Re' hin jinaj inwaaj nupahqaam aweh inwaaj chi nee naa chaq'weej weh chi korik, inki.
15Re' i Jeremías je' wili i xuq'or:
Wila' xnuchaq'weej aweh chi korik re' hat neenataq'aaj nukanteesjiik. Eh wila' xnukoj ana'ojb'al xama' nee ta wo' kinanimaj, inki.
16Eh re' i reey Sedequías xa chi qeqmaal xuq'or reh i Jeremías, chi je' wili:
Re' hin parub'ihnaal i QaJaaw i xye'wik k'achariik i nuq'or aweh i xti korik chi ma' nee ta nutaq'aaj akanteesjiik. Eh ma' nee ta tinuyeew pan kiq'ab' inkaaj akanteesjiik, inki.
17Eh re' i Jeremías je' wili i xuq'or reh i reey Sedequías: Re' QaJaaw i qaDios i hoj, hoj aj Israel wilik rajaawriik je' wili i ruq'or chawiij:
Wila' re' reh xuq'asaj riib' pan kiq'ab' i k'amal kib'eeh taqe i ru soldado i kireey i aj Babilonia neeruko'leej riij i ruk'achariik i reh je' wo' i rak'uun rixq'uun. Eh re' i tinamit wili ma' nee ta inkojarik ruq'aq'al.18Raaj wila' ma' xuq'asaj riib' keh taqe i ki soldado i aj Babilonia naa kichopom naah i tinamit wili naakiqopom ruq'aq'al. Eh re' reh ma' naa ta ruko'leem riib' chuwach, inki.
19Re' i reey Sedequías je' wili i xuq'or:
Re' hin kinyo'jik kuum i aj Judío chi q'ahxik chi kixilak i aj Babilonia, ruum wila' xinkichop i keh neenkik'saj chi ti' i nuti'jolal, inki.20Eh re' Jeremías je' wili xuq'or:
Re' hat ma' nee ta ti q'ehb'ik pan kiq'ab' cha nimaj la' i ruq'oral i Dios i nuq'or aweh, ma' xta reet nee ti elik, eh neenako'leej riij ak'achariik.21Re' i QaJaaw Dios ruk'uhtaam chik weh chib'ih jariik i naa ak'ulum, wila' ma' xaq'asaj awiib' pan kiq'ab' i ru soldado i kireey i aj Babilonia.22Eh chu'nchel ixoq naakikahnik chupaam i paat i na a'n wii' i taaq'anik i hat reey, xanaa wo' kiq'ahteesjiik pan kiq'ab' i k'amal kib'eeh i ru soldado i kireey i aj Babilonia, je' wili i naa kiq'orom reh i reey:
Re' taqe i xti naah naq awamigo xatkijot' xkiq'at awach, xkiyeew q'ab' chi xat q'ehb'ik chupaam i ti' k'axik, eh xatkikanaa' cha wutkeel, inko'q taqe.
23Eh chu'nchel ixoq achopom kinaah, taqe i awak'uun awixq'uun naa kiq'ahteesjiik pan kiq'ab' taqe i aj Babilonia, eh re' hat i reey ma' naa ta ko'leem awiib' pan kiq'ab', naa la' kaat kiq'asam pan q'ab' i kireey i aj Babilonia. Eh re' i tinamit wili naakiqopom ruq'aq'al, inki.
24Eh re' reey Sedequías je' wili xuq'or reh i Jeremías:
Wila' ma' nawaaj chi nee tikimik maa awach aj eh aq'or taqe i xaq'or weh.25Wila' xkinab'eej taqe i waj kamanoom chi xnub'an nuk'utaaj awuuk' neenkipahqaaj weh chib'ih i xaq'or weh i hat. Eh je' wili i neenkiq'or aweh: Wila' nawaaj chi nee nuko'leej riij aak'achariik, cha q'or qeh i xaq'or taq ruuk' i reey, inko'q taqe aweh.26Eh re' hat je' wili i neenaq'or keh: Re' hin re' i xnupahqaaj reh i reey re' chi ma' nee ta chik rutaq'aaj nutz'apariik parupaat i Jonatán, reh chi ma' nee ta tikimik ar, tiko'q keh inki.
27Eh chu'nchel i raj kamanoom i reey xiooj wo' ruuk' i Jeremías i xkipahqaaj reh chib'ih jariik i xkiq'or. Re' Jeremías nik' wach i xq'orarik reh ruum i reey je' wo' re' i xuq'or keh, ruum i re' ma' xta kuchej, xkikanaa' chi je' re' ruum ma' awach ta x-ib'irinik reh i k'utaaj xkian.28Eh re' i Jeremías ar wo' xkahnik chi tz'aplik chuwach reje i tz'ilom, korehtaal chik xponik i q'iij noq xchoparik naah i tinamit Jerusaleem. Re' noq xqehb'ik panti' k'axik i tinamit Jerusaleem (2 Rey 24.20—25.21; 2 Cron 36.17-21; Jer 52.3-30)
1Eh chupaam i ru lajeeb' poh reh i rub'elejeeb' haab' rokiik chi reyil i Sedequías ar Judá, re' i reey Nabucodonosor ruch'ihil taqe i ru soldado xi chalik chi q'aq'inik chinaah Jerusaleem, eh xkikotej riij.2Eh parub'eleej q'iij reh i rukaaj poh chupaam i rujunlaaj haab'rokiik chi reyil i Sedequías, re' taqe i aj ixowaal xkiteh i koq jinaj i-ik'b'al chupaam i koraal tz'aq chi riij i tinamit, xi okik i koq pan tinamit.3Eh chu'nchel i kitowik reh i kireey i aj Babilonia xi okik i koq, ar xiooj wih-oq chuwach i puerta wilik panyejaal, re' taqe re' je' wili i kib'ihnaal: Nergal-sarezer, Samgar-nebo, Sarsequim, k'amal kib'eeh taqe i kapuun, eh jinaj chik Nergal-sarezer re' taqe i re' nimaq wach kikamaj ruuk' i kireey i aj Babilonia.4Eh noq xrilow chi je' re' i Sedequías kireey i aj Judá ruch'ihil taqe i ru soldado xkimol chi elik chaq'ab' reje chupaam i tinamit. Ar xi elik reje chupaam i b'eeh tikooj wii' i uhtz'ub' ma' najt ta ruuk' i ruye'aab' i reey xi elik reje chi chii' i puerta wilik panyejaal i tz'aq. Eh xkik'am qohoq i b'eeh wach k'ixkaab' i nik'ik wii' i nim ha' Jordán.5Eh re' taqe i ki soldado i kireey i aj Babilonia xkitahqeej reje, korehtaal xponik kireq wach k'ixkaab' Jericó reey Sedequías. Eh ar xkichop xkik'am chuwach i reey Nabucodonosor wilik chupaam i ye'aab' Ribla wilik paruyuq'ul i Hamat, ar xuq'at i q'orik chinaah.6Eh ar Ribla re' i kireey i aj Babilonia xutaq'aaj kik'amariik taqe i rak'uun rixq'uun i Sedequías, eh ti chuwach i reh xuyok' i kalaq taqe i rak'uun rixq'uun. Eh je' wo' re' i xub'an keh taqe i xa atoob' wach kik'ux wilkeeb' Judá.7Eh re' reey Sedequías xresaj kab'chel i naq wach, b'ak'lik i q'ab' chi karena noq xk'amarik reje prexo pan tinamit Babilonia.8Re' taqe i soldado kichalik Babilonia xkikoj ruq'aq'al i paat i rub'an wii' i taaq'anik i reey Sedequías. Eh xkikoj wo' ruq'aq'al i paat wilkeeb' pan tinamit, xkiq'eb' wach ak'al i tz'aq kotimaj wii' riij i tinamit Jerusaleem.9Eh re' i Nabuzaradán k'amal kib'eeh i soldado kichalik Babilonia xuk'am taqe reje Babilonia nik' k'ihaal i koxikahnik Jerusaleem. Je' wo' taqe i xkiq'asaj naq kiib' chi kixilak i ki soldado i aj Babilonia eh xuk'am wo' taqe reje chu'nchel i tinamit koxikahnik naq.10Xa re' wo' chik xukanaa' pantinamiit Judá i kok'neb'aa' ma' xta wilik keh. Eh chupaam i q'iij re' re' xuyeew kiye'aab' reh chi naa kitikim ki uuva. Re' noq xelik chi prexohjik i Jeremías
11Re' reey Nabucodonosor ko ar Babilonia xuq'or cho reh i Nabuzaradán k'amal kib'eeh soldado chi riij chib'ih i naa ruk'ulum i Jeremías, je' wili xuq'or:12Re' hat naa achopwiik nah rucha'jaljiik i Jeremías, maa chih awuchej, naa aye'em reh chib'ih jariik i naa rupahqaam aweh, inki reh.13Eh re' Nabuzaradán k'amal kib'eeh i soldado, ruch'ihil Nabusazbán, ruch'ihil i Nergal-sarezer, i k'amal kib'eeh taqe i kapuun nimaq wach kikamaj ruuk' i kireey i aj Babilonia.14Xkesaj i Jeremías chupaam i paat wilik reje chuwach i tz'ilom. Eh re' i Gedalías xkikoj chi ilil reh, rak'uun Ahicam riih i Asaf, reh chi naa ruk'amariik reje parupaat. Re' i Jeremías xkahnik chi k'acharik chi kixilak i tinamit xi kahnik chupaam i tinamit re' re'. Re' i Dios xuq'or chi naa ruko'leem riij i ruk'achariik i Ebed-melec
15Noq re' i Jeremías ko tz'aplik chuwach reje i tz'ilom xq'rob'jik ruum i Dios, je' wili i xq'orarik reh:16Re' hat cha q'or reh i Ebed-melec aj Etiopía. Je' wili i cha q'or reh. Re' i QaJaaw Dios nim rajaawriik i qaDios i hoj, hoj aj Israel, je' wili i ruq'or chawiij: Re' hin naa nuye'em i ti' k'axik chinaah i tinamit wili, ma' re' ta holohik i naa nuye'em chinaah. Eh noq naa ruk'ulariik i re', re' reh naa rilom ruuk' naq'wach.17Xa re' la' re' reh naa nuko'leem, reh chi ma' nee ta nq'ehb'ik pan kiq'ab' i aj ixowaal re' re' q'e' inyo'jik kuum.18Re' hin korik chi naa nuko'leem, reh chi ma' nee ta nkikansaj, naa nuko'leem riij i ruk'achariik ruum chi xuyeew ruk'ux wuuk', inki Dios tiko'q reh. Re' i Jeremías ar xkahnik ruuk' i Gedalías
1Re' i Dios xuq'oreej i Jeremías noq re' i Nabuzaradán k'amal kib'eeh i soldado roq'taam chik reje i Jeremías chupaam i ye'aab' Rama. Eh re' Nabuzaradán prexo wilik i Jeremías b'ak'lik wach chi karena noq xponik rureq chi kixilak i aj Jerusaleem, chi kixilak i aj Judá k'ahchi' kik'amariik reje Babilonia.2Re' i k'amal kib'eeh soldado xresaj reje chi rutkeel i Jeremías. Je' wili xuq'or reh: Re' i QaJaaw Dios ruq'orom chaloq chi naa ruye'em i runimaal ti' k'axik chinaah i tinamit wili.3Eh yu'naak xub'an chik chaloq taqe i ruq'orom. Re' taqe i wili xchalik taq cha naah ruum xat mahkunik taq chuwach i QaJaaw, eh ma' xanimaj ta taq.4Xa re' la' re' hin xatwoq'taaj chik xnuchej chik i karena b'ak'lik naq wii' taqe aq'ab'. Eh wila' i ruk'ul ak'ux chi netiooj chi wiij Babilonia neerub'an chi nee tiooj, re' wo' hin nee kincha'jinik aweh. Eh wila' ma' ruk'ul ak'ux chi nee tiooj nee wo' rub'an chi ma' nee ta tiooj. Wilik wo' chawach i runimaal tinamit wili xa aha' pa' nee ruk'ul ak'ux chi nee ti k'acharik neerub'an chi nee tiooj ar.5Eh wila' nawaaj wo' chik sutinik reje neerub'an chi nee ti k'acharik ruuk' i Gedalías rak'uun i Ahicam riih i Safán, re' i xkojarik chi ajaab'esil ar Judá ruum i qareey i hoj aj Babilonia. Eh nee ti k'acharik chi kixilak i tinamit, xa aha' pa' i ruk'ul ak'ux i hat i nuchjik i Jeremías. Re' i k'amal kib'eeh soldado jinaj i rukooch i Jeremías xuyeew, eh xuch'aq reje.6Re' i Jeremías xooj wo' ruuk' i Gedalías rak'uun i Ahicam chupaam i ye'aab' Mizpa. Ar xk'acharik chi kixilak i tinamit xi kahnik chupaam i ye'aab' re' re'.
7Noq re' taqe i k'amal b'eeh kuch'ihil taqe i ki soldado re' ruuk' taqe i aj Judío wilkeeb' chupaam taqe i ye'aab' re' re', xkib'iraj chi re' i kireey i aj Babilonia re' i Gedalías rak'uun i Ahicam xukoj chi ajaab'ees chinaah i tinamit. Eh re' wo' reh xukoj chi cha'jen keh i tinamit q'e' taqe neb'aa', chi winaq chi ixoq, chi ha'lak'un, re' i ma' xi k'amarik ta taqe reje Babilonia.8Re' taqe i k'amal b'eeh re' re' xiooj ar Mizpa chi rilariik i Gedalías. Eh xooj haa' i Ismael rak'uun i Netanías, haa' i Johanán, haa' i Jonatán, rak'uun Carea, haa' i Seraías rak'uun i Tanhumet, haa' taqe i rak'uun i Efai, haa' taqe i rak'uun Netofa, haa' i Jezanias rak'uun jinaj i winaq aj Maacateo, haa' taqe i winaq wilkeeb' chi riij.9Eh re' Gedalías rak'uun Ahicam, rak'uun i Safán xuq'or i korik je' wili i xuq'or keh: Matyo'jik taq chi nee taq inaq'asaj awiib' chi kixilak i aj Babilonia. Neerub'an chi nee taq ti k'acharik ayu', xa re' la' chakamaneej taq wach kireey i aj Babilonia, ma' xta reet taq nee ti elik.10Eh re' hin ayu' naa nukahniik chi k'acharik Mizpa, re' hin neekinq'orik taq chawiij kuuk' i aj Babilonia noq naa kik'uliik iloq ayu'. Re' taq i hat naa taq amolom i riis i uuva, i wach taq aachee', aseite reh i siq'jil, eh suq taq nee ti k'acharik chupaam i ye'aab' achopom taq naah, inki.11Eh re' taqe i aj Judío wilkeeb' Moab, taqe i wilkeeb' Amón, taqe wilkeeb' Edom, taqe wilkeeb' xa aha' pantaq tokoom tinamit, xkib'iraj chi re' i kireey i aj Babilonia ko wilik taqe i aj Judío xukanaa' chupaam i kitinamiit, eh chi re' Gedalías xupab'aa' chi ajaab'ees chikinaah.12Eh chu'nchel i aj Judío re' re' xi chalik, xi elik chaloq chupaam taqe i ye'aab' tukimaj reje wii' kiwach, xchalik kik'uhtaaj kiib' chuwach i Gedalías chupaam i ye'aab' Mizpa. Eh je' wo' keh ma' k'isiin k'ihaal i riis uuva xkimol, je' wo' i wach taqe i kichee'. Re' i ma' holohik taj xuyejaa' wach i Ismael chi riij i Gedalías
13Re' i Johanán rak'uun i Carea, ruch'ihil taqe i k'amal kib'eeh i soldado re' taqe i kanalkeeb' pantaq ye'aab' xiooj ar Mizpa chi rilariik i Gedalías.14Je' wili i xkiq'or reh: ¿Mi aweht'al i hat chi re' i Baalis kireey i aj Amón xutaq'aaj chaloq i Ismael chakantesjiik? inki taqe reh. Xa re' la' re' Gedalías xama' xunimaj ta wo' hoq.15Eh re' i Johanán rak'uun i Carea je' wili i xuq'or reh Gedalías chi q'eeqmaal: Chayeew q'ab' weh chi nenooj nukansaj i Ismael, ma' awach ta neenab'inik awach neemb'anik reh. ¿Nik' wach noq naaqaye'em q'ab' i hoj chi nee tirukansaj? ¿Mi neenqayeew q'ab' re' chi nee wo' chik inkitukej kiib' i aj Judío kimolom kiib' awuuk', eh neekikimiik? inki.16Eh re' i Gedalías rak'uun i Ahicam je' wili i xuq'or: Maa a'n i je' re' aha' wilik inkiq'or chi riij i Ismael ma' korik taj, inki.
1Eh paruwuuq poh chik re' i Ismael rak'uun i Netanías riih i Elisama, ma' tokoom ta kuuk' i nimaq wach kikamaj ruuk' i reey. Ruch'ihil taqe i lajeeb' chi winaq xiooj ar Mizpa chuq'orob'jiik i Gedalías, noq wi'k chik inki a'n ruuk' ar nah mexa.2Re' i Ismael rak'uun i Netanías ruch'ihil taqe i lajeeb' chi winaq xi wuktik johtoq, chi jumehq'iil xkesaj chaloq i kiq'aslaj ch'ihch' xkikansaj i Gedalías rak'uun i Ahicam, rak'uun i Safán. Re' i xupab'aa' i kireey i aj Babilonia chi ajaab'ees chikinaah i aj Judá,3Re' i Ismael xkuxik wo' rukansam chu'nchel i aj Judío je' wo' ki soldado i aj Babilonia wilik naq ruuk' Gedalías ar Mizpa.
4Eh eew-oq chik inkanteesjik i Gedalías, re' noq komajaa' ta awach i naab'inik reh chib'ih i xk'ularik.5Wilik taqe i winaq xi elik cho Siquem, i xi elik cho Silo, i xi elik cho Samaria kajwinaq chi kiib' kijoyom i kusinchii' xkiweq i kiso' chikiij, eh xkiyok'ib'eej wach i kiti'jolal. Eh wilik naq kimayiij i ki insensia xkik'am chaloq, reh naq chi naakiq'aasam parupaat i Dios.6Eh re' Ismael xelik reje chupaam i ye'aab' Mizpa, xooj taqe ruk'ul wach b'eeh xasuq chik inoq'ik, xa re' wo' noq xuk'ul taqe je' wili xuq'or keh: Taq taq chawilow i Gedalías rak'uun i Ahicam.7Xa re' la' noq xi ponik panyejaal i tinamit xyok'arik i kalaq ruum i Ismael rak'uun Netanías kuum taqe i winaq ruch'ihil. Eh xkikut taqe qohoq chupaam i jinaj i chaam laj jul.8Eh lajeeb' chik chi winaq re' ruuk' i keh ma' xi kanteesjik taj je' wili i xkiq'or reh i Ismael: Maa qoh akansaj ti hoj ruum wilik i trigo, i sebada, i Aseite, i riis kaab' qakeb'aam panab'iix, inki taqe. Noq xrib'iraj chi je' re' Ismael ma' xukansaj ta taqe je' rukab' noq xukansaj taqe i kuch'ihil.
9Re' chaamlaj jul xukut wii' i kiti'jolal i winaq i Ismael re' wo' hoq i jul xutaq'aaj ruk'otariik i reey Asa ko'lemb'al riib' chuwach i Baasa kireey i aj Israel. Re' i chaamlaj jul re' re' xiik' wo' naq naah nimaal xnujik ruum i kiti'jolal i xukansaj taqe i Ismael rak'uun i Netanías.10Eh ma' xata re' re' xub'an i Ismael xuchop la' wo' taqe i rixq'uun i reey, je' wo' chu'nchel i tinamit xi kahnik naq Mizpa. Re' taqe i xye'arik reh i Gedalías chi naa rucha'jeem ruum i Nabuzaradán k'amal kib'eeh i soldado, re' i Ismael xuchop taqe i tinamit re' re', eh xuchop reje rub'eeh xq'ahxik reje pan kitinamiit i aj Amón.
11Noq xrib'iraj rib'iral i Johanán rak'uun i Carea ruch'ihil taqe chu'nchel i k'amal kib'eeh i soldado chu'nchel ikaansanik xub'an i Ismael.12Xkimol wach chu'nchel i ki soldado xiooj chi q'aq'inik chinaah i Ismael rak'uun i Netanías, ar xponik kireq chi chii' i nimlaj jul ha' wilik Gabaón.13Eh noq re' taqe i tinamit k'ahchi' ruk'amam reje pan tokoom tinamit i Ismael manlik xkilow chi xooj k'oloq i Johanán rak'uun Carea ruch'ihil taqe chu'nchel i k'amal kib'eeh soldado, ma' k'isiin ta xsuuqb'ik kik'ux.14Xi sutinik chaloq xchalik wo' chik kimol kiib' ruuk' i Johanán, eh re' taqe i tinamit resaj naq reje Mizpa i Ismael.15Xa re' la' re' i Ismael rak'uun i Netanías waxiqiib' keh i winaq intowik reh xkian reje elik chuwach i Johanán ar chik xiooj pan kitinamiit i aj Amón.16Eh re' i Johanán rak'uun i Carea ruch'ihil i k'amal kib'eeh soldado, taqe ixoq, taqe i kok' ha'lak'un, taqe i kapuun nimaq wach kikamaj xuk'am naq reje pan tokoom tinamit i Ismael rak'uun i Netanías. Re' taqe i xresaj reje Mizpa, noq rukansam chik i Gedalías rak'uun i Ahicam. Re' i Johanán xponik wo' chik taqe rusutej chupaam i ye'aab' Gabaón.17Eh xkichop chee kib'eeh, korehtaal xi ponik chupaam i ye'aab' Gerut-quimam ma' najt ta ruuk' i Belén. Ar xi hi'lik chuwach i xama' k'ih ta laj q'iij, re' naq xkaaj i keh chi naakokiik chupaam i ruyuq'ul i Egipto.18Re' naq inkaaj chi xkiko'leej kiib' chikiwach i aj Babilonia, xchalik kiyo'jiik ruum re' i Ismael rak'uun i Netanías xukansaj i Gedalías rak'uun i Ahicam. Re' naq i xukoj chi ajaab'ees chikinaah i aj Judío i kireey i aj Babilonia. Re' i tinamit xkipahqaaj reh i Jeremías chi naa rub'aan i tiij chikiij
1Eh chu'nchel i k'amal kib'eeh soldado haa' i Johanán, haa' rak'uun i Carea, haa' Jezanías rak'uun i Osaías, haa' chu'nchel i tinamit, chi nimaq chi kok' taq xiooj ruuk' i Jeremías jalal ruq'oral i Dios.2Eh je' wili xkiq'or reh:
Jinaj inaaqapahqaam aweh, xa re' la' maaq'or chi ma' nee ta na a'n. Re' chi chapahqaaj reh i aaDios panatiij chi nee qoh rutoob'eej i hoj i xama' hoj ta wo' chik k'ih xoj kahnik. Noq xub'an xiik' naq naah qak'ihaal, eh yu'naak xama' hoj ta chik k'ih je' rukab' i k'ahchi' awilom.3Je' re' noq cha pahqaaj reh aaWaJaaw aaDios chi nee ruk'uhtaaj qeh i holohik b'eeh naa qak'amam, je' wo' hoq i naaqanam, inki taqe.
4Eh re' i Jeremías je' wili i xuq'or keh:
Ma' xta reet naa nupahqaam reh i Dios taq inawaaj je' rukab' i xaq'or taq weh. Re' hin nee taq i nuq'or aweh chu'nchel i nee ruq'or weh i QaJaaw Dios, ma' xta chik i neenukanaa' chi ma' nee ta nuq'or, inki.
5Re' keh je' wili xkiq'or reh i Jeremías:
Re' aaWaJaaw aaDios xti korik wach ruk'ux k'ahchi' rilwiik reh, neenye'wik qeh panti' k'axik wila' ma' xqa a'n i nee ruq'or aweh chi naa qa'nam.6Atoob' ta nee ruk'ul qak'ux, atoob' ta ma' nee ruk'ul qak'ux i nee ruq'or qeh i QaJaaw Dios reh chi suq neenqohwih'ik. Re' i xqaq'or aweh chi naa apahqaam i rotob'il chiqiij, inki taqe.
7Eh lajeeb'-oq chik q'iij kiq'orom i re', re' i QaJaaw Dios xuq'oreej wo' hoq i Jeremías.8Re' reh xuyuq'eej ruuk' i Johanán rak'uun i Carea, je' wo' taqe i k'amal kib'eeh i soldado kiooj panq'aq'inik, je' wo' chu'nchel i taqe i tinamit, chi nimaq chi kok' taq je' wili i xuq'or keh:9Re' i QaJaaw qaDios i hoj, hoj aj Israel, re' i xaq'or taq weh chi naa nupahqaam reh chib'ih taq inawaaj, je' wili i xuq'or weh:10Wila' xi kahnik chupaam i tinamit wili, re' hin naa wesam taqe korik, eh ma' naa ta nusacham kiwach naa la' nu ch'ikam taqe pan kiye'aab', ma' naa ta wesam taqe reje ayu'. Re' hin ti' wo' inwik'raaj taqe chi xnuyeew i ti' k'axik chikinaah.11Eh mankiyohleej chik i kireey i aj Babilonia re' i ma' k'isiin ta kiyo'jiik ruum. Manchalik chik kiyo'jiik, ruum re' hin naa nuwihiik kuuk' chi kiko'ljiik, re' hin naa wesaniik keh pan q'ab' i reey re' re'.12Naa nuketelaam kiwach, eh naa wo' nuye'em paránima i reey chi naa ruketeljiik kiwach ruum, reh chi nee rukanaa' taqe chi k'acharik pan kitinamiit, inki.13Eh wila' re' taq i hat ma' nawaaj taq k'acharik panatinamiit, wila' ma' xanimaj taq awajaaw aaDios, je' taq wili i neenaq'or:14Re' hoj inqaaj ojik k'achareel Egipto aha' ma' naa ta qilom wach i q'aq'inik, ni xata naa qib'iram chi naa ruxuljiik i tuun rehtalil i q'aq'inik. Eh ma' nee ta qoh kimik ruum wi'jalel, tiko'q taq.15Re' taq i hat koxat kahnik taq chi k'acharik Judá chab'iraj taq i ruq'or i QaJaaw Dios nim rajaawriik i qaDios i hoj, hoj aj Israel je' wili i ruq'or taq chawiij: Wila' re' keh xankotwaaj chik ojik k'achareel Egipto.16Naa wo' kireqariik ar ruum i q'aq'inik, je' wo' ruum wi'jaleel, re' i ma' k'isiin ta kiyo'jiik ruum, re' wo' taqe i re' naa rukansanik keh ar.17Eh chu'nchel i xankotwaaj chik ojik chi k'acharik Egipto ar wo' naa kikimiik ruum i q'aq'inik, ruum wi'jaleel, ruum yab'ilaal. Eh ma' jino'q chik i naa kikahniik chi k'achalkeeb', ma' jino'q naa ruko'leem riib' chuwach i runimaal ti' k'axik naa nuye'em chikinaah, inki.
18Ruum re' i QaJaaw Dios nim rajaawriik, qaDios i hoj, hoj aj Israel je' wili i ruq'or taq chawiij: Nik' wach noq xqop i nujosq'iil chikinaah i aj Jerusaleem, je' wo' re' noq naa ruqopiik i nujosq'iil chikinaah i keh wila' xiooj Egipto. Eh chu'nchel i tinamit ma' holohik ta naa kiq'oriik chikiij, ti yo'joq ruum inakik'ulum, eh ma' naa ta chik kilom wach i kitinamiit, inki.19Eh re' taq i hat i koxat kahnik taq chi k'acharik Judá. Re' i QaJaaw Dios i ruq'or taq aweh chi ma' naa ta awojiik taq Egipto, chanab'eej taq chi korik ruum re' hin i nuq'or taq aweh yu'naak chib'ih i ruq'or.20Re' taq i hat runimaal mahk k'ahchi' taq kaat ruum xasutej taq chi riij aq'oral. Re' wo' naq taq i hat xat q'orik weh chi naa nub'anam nutiij chuwach i QaJaaw taq chawiij, je' wili taq i xaq'or weh: Chapahqaaj reh aaDios panatiij chi nee qohrutoob'eej, eh neenaq'or qeh i nee ruq'or aweh reh chi neenqa a'n, tiki taq.21Eh re' hin xnuq'or taq chik aweh yu'naak i xuq'or weh QaJaaw Dios chi naa taq a'nam, xa re' la' re' taq i hat xama' xawaaj ta wo' taq a'nam.22Je' re' noq yu'naak chanab'eej taq chi korik chi ruum q'aq'inik, ruum wi'jaleel, ruum yab'ilaal, naa taq akimiik chupaam i tinamit taq naa awojiik k'achareel, inki Jeremías. Xkik'am reje chikiij i Jeremías Egipto
1Eh noq xukohlaaj ruq'orariik keh i tinamit i Jeremías chu'nchel i xq'orarik reh ruum i Dios chi naa ruq'orom.2Re' i Azarías rak'uun i Osaías, i Johanán rak'uun Carea, taqe i winaq nimaq kiwach, je' wili i xkiq'or reh i Jeremías: Re' hat i nachuk qeh i q'orik, re' i QaJaaw i qaDios ma' xuq'or taa weh chi naa aq'orom qeh chi ma' ruk'ul ta chi naaqojiik k'achareel Egipto.3Re' la' Baruc i rak'uun i Nerias i nixowanik qawach xq'orik aweh chi naa aq'orom qeh chi naa qakahniik ayu', reh chi nee qoh kahnik pan kiq'ab' i aj Babilonia, reh chi nee qoh kikansaj, oon chi nee qoh kik'am reje, inki taqe.4Eh ni xata re' i Johanán rak'uun i Carea, ni xata re' i k'amal kib'eeh soldado, ni xata re' i tinamit koxikahnik paruyuq'ul i Judá xkinimaj i xq'orarik keh. Eh ma' xkinimaj taj i xuq'or i QaJaaw.5Re' i Johanán rak'uun i Carea ruch'ihil taqe i k'amal rub'eeh soldado xkimol wach i kiqox i aj Judá xama' k'ih ta wo' chik taqe. Re' i xkitukej kiib' xa aha' yuuq', re' taqe i xi sutinik chaloq chi naa wo' naq chik kik'achariik Judá.6Je' re' noq chi winaq chi ixoq, chi ha'lak'un chi re' taqe i rixq'uun i reey je' wo' chu'nchel i tinamit xukanaa' i Nabuzaradán k'amal kib'eeh soldado chi re' i Gedalías naa rilwiik keh re' i rak'uun i Hicam, xkikoj wo' haa' i Jeremías, ruch'ihil i Baruc.7Re' keh ma' xkinimaj taj i xuq'or i QaJaaw chi naa naq kikahniik ar, xiooj la' Egipto, Korehtaal xi ponik chupaam i tinamit Tafnes rub'ihnaal.
8Eh noq wilkeeb' chik chupaam i tinamit re' re', re' i QaJaaw Dios je' wili xuq'or reh i Jeremías:9Re' hat cha sik' ixib'-oq nimaq ab'aj, eh chikiwach chu'nchel i aj Judá neenamuq'aa' chupaam i lech'ik laj ak'al, chuk'ulwaach imb'aan i koq wii' okik chupaam i paat i rub'an wii' i taaq'anik i reey chupaam i tinamit re' re'.10Eh je' wili i cha q'or keh: Re' i QaJaaw Dios nim rajaawriik, re' i qaDios i hoj, hoj aj Israel je' wili i ruq'or: Re' hin naa nukojom chi waj kamanoom i Nabucodonosor kireey i aj Babilonia naa nuk'amam cho chikinaah. Eh chikinaah taqe i ab'aj xnumuq'aa' naakich'ikaam i rupaat naa rub'anam wii' i taaq'anik.11Re' reh naa ruchaliik chi rusachariik wach i tinamit Egipto, Awach ye'ooj chikinaah chi naa kikimiik naa wo' kikimiik. Awach i ye'ooj chikinaah chi naa kik'amariik reje pan tokoom tinamit naa wo' kik'amariik reje. Awach i ye'ooj chikinaah chi panq'aq'inik naa kikimiik ar wo' naa kikimiik.12Re' i Nabucodonosor naa rukojom ruq'aq'al i rupaat i kitiyoox i aj Egipto. Re' naa ruk'amam taqe reje chi riij parutinamiit. Naa rupuhum reje paam i tinamit Egipto, je' rukab' noq i rupuh i wach i ruso' i aj cha'jen tentzun, ma' k'axik ta noq naa ruk'amam taqe reje.13Eh naa ruch'ahaam wach ak'al inajt kinaah tz'aq wilkeeb' paruyuq'ul i Egipto, naa rukojom ruq'aq'al i tiyoox Bet-semes rub'ihnaal re' inkiloq'ej i aj Egipto, tiko'q keh, inki Dios. Re' i xq'orarik keh ruum i Dios i aj Judío xiooj Egipto
1Re' wili i k'uhb'aal xq'orarik reh i Jeremías ruum i Dios, reh chi xuq'or keh chu'nchel i aj Judío xiooj chi patinik ar Egipto, re' i xi patinik ar Migdo, ar Tafnes, ar Menfis, ar Patros je' wili i xuq'or keh:2Re' QaJaaw Dios nim rajaawriik, i qaDios i hoj, hoj aj Israel je' wili xuq'or taq chawiij: Re' keh xkilow i runimaal ti' k'axik xnuyeew chikinaah i aj Jerusaleem, chikinaah i aj Judá, yu'naak ma' jino'q chik i k'achalkeeb' chupaam taqe i tinamit re' re'.3Ruum i yiib' wach na'ojb'al xkian xkijosaj wach i nujosq'iil, ruum xkik'at i insensia, chi loq'oomb'al reh taqe tiyoox, ni xata re' keh, ni xata re' i kimaam kati't kieht'alinik wach.4Eh ruum inki a'n re' re' xata wo' jarpech xnutaq'aaj cho chi kixilak i waj kamanoom reh chi xq'orarik keh chi naa kikanaam rub'aan i yiib' wach na'ojb'al re' re', ruum re' hin ma' mponik ta chi nuwach.5Xa re' la' re' keh xama' xkib'iraj ta wo' hoq. Eh xama' xkikanaa' ta wo' rub'aan i yiib' wach na'ojb'al, xama' xkikanaa' ta wo' ruk'atariik i insensia chikiwach taqe i tiyoox.6Ruum aj re', re' hin yohb'aal wach noq xqop i nujosq'iil chikinaah i xi patinik chupaam taqe i tinamit i Judá, chikinaah i xi wihik pantaq xilak b'eeh reh i Jerusaleem. Eh xsacharik kiwach xkahnik chi xan tz'irik chik paam, eh je' re' xkahnik chi jumpech.7Eh re' QaJaaw Dios nim rajaawriik, qaDios i hoj, hoj aj Israel je' wili i xuq'or taq chawiij: ¿Chib'ih reet noq inki a'n i yiib' wach na'ojb'al, eh ti' k'axik i ruk'am cho chikinaah? Eh ruum taqe i re' naa rusahchiik kiwach i aj Judá chi winaq, chi ixoq, chi k'ijool, chi qahxoq, chi koch'uch' kipaam, ma' jino'q chik i naa rukahniik.8¿Chib'ih reet noq inkijosaj wach i nujosq'iil ruuk' i kina'ojb'al ruuk' i k'ataj insensia chikiwach i tiyoox ayu' Egipto re' i xi chalik wih-oq wii'? Eh ruum i re' naa rusachariik kiwach, naakikahnik chi ma' xta chik kajaawriik, chu'nchel i wilkeeb' pan nimaq tinamit ma' holohik ta naa kiq'oriik chikiij.9¿Mi xsahchik pankik'ux re' chib'ih i yiib' wach na'ojb'al xuk'am chaloq xkian chee i kimaam kati't, i yiib' wach na'ojb'al xkian i xi wihik cho chi reyil ar Judá, i xkian i kehk'een i yiib' wach na'ojb'al xkian i keh, i xkian i kehk'een paruyuq'ul i Judá, eh xilak taq b'eeh reh i tinamit Jerusaleem?10Eh yu'naak i keh xama' inkijal ta wo' wach i kina'ojb'al, xama' kinkiyohleej ta wo' hoq. Eh xama' nkik'am ta wo' naah i kitijiik, i nuk'uhb'aal xnuq'or keh i kimaam kati't, eh xnuq'or wo' kekeh.
11Ruum aj re' re' hin i Dios nim wajaawriik, ki Dios i aj Israel je' wili nuq'or: Re' hin naa nuye'em i ti' k'axik chikinaah korehtaal i nusach kiwach chu'nchel i aj Judá.12Eh re' taqe i ruqox i aj Judá xiooj chi patinik ar Egipto, naa wo' rusachariik kiwach ar chi jumpech. Eh chu'nchel naa rusachariik kiwach chi nimaq chi kok' taq, naa rukuxiik kikimiik ruum i q'aq'inik, ruum i wi'jaleel, ma' holohik taj i naa ruq'orariik chikiij naa kikahniik chi ma' xta kajaawriik, ti yo'joq ruum i naakik'ulum.13Re' taqe i aj Judá xiooj chi k'acharik Egipto naa nuye'em taqe panti' k'axik, je' rukab' noq xnuyeew taqe panti' k'axik i aj Jerusaleem, noq xnuyeew i q'aq'inik, wi'jaleel, i yab'ilaal chikinaah.14Eh re' i kiqox i aj Judá xiooj chi k'achariik ar Egipto, ma' awach ta keh i naa ruko'leem riib', ma' jino'q chik keh i naa rukahniik chi k'achlik. Ma' awach ta chik jino'q i naa rusutiniik cho chi k'acharik Judá, wila' wilik kiib' ixib'-oq inkaaj chalik xakeb'an chik kiib' naa kichaliik, inki i Dios, inki Jeremías.
15Eh chu'nchel i keht'al chi re' i kehk'een inkik'at i insensia chuwach taqe i tiyoox, wilik taqe ixoq wilkeeb' ar xiik' naah kik'ihaal noq xkimol kiib'. Eh haa' taqe i aj Judío xiooj chi k'acharik pansak'aaj reh i rookb'aal q'iij ar Egipto, je' wili ruchaq'weesjiik i Jeremías xkian:16Re' taqe i xaq'or qeh chi re' i QaJaaw xq'orik aweh xama' naa ta wo' qanimam aweh.17Naa la' qa'nam taqe i qaq'orom ruuk' aachii', naa qak'atam i insensia chuwach i qa ixoq tiyoox rehtalil i reey pan taxaaj, naa qajalk'iim ink'ohnik laj iq'oom chuwach. Je' rukab' i qa'nam, je' rukab' i xkian chee qamaam qati't, i xkian chee qa reey, i xkian k'amal qab'eeh, chupaam taqe i tinamit wilkeeb' Judá, je' rukab' inki a'n xilak taq b'eeh Jerusaleem. Eh noq inqa a'n taqe chee re' xa eliik wilik qawa' qahaa' qoh elik korik ruuk' taqe inqa a'n, eh ma' xta ti' k'axik inchalik chi qanaah.18Xa re' wo' noq xqakanaa' ruk'atariik i insensia, xqakanaa' ruye'ariik ink'ohnik laj iq'oom chuwach i qa ixoq tiyoox rehtalil i reey pan taxaaj xoj kahnik chi ma' xta chik wilik qeh. Re' taqe i qatinamiit xtohqik kikimiik ruum q'aq'inik, eh ruum wi'jaleel.19Re' taqe ixoq je' wili i xkiq'or: Re' hoj inqayejaa' wo' naq qakaxlanwi'k je' ruwii' i qa ixoq tiyoox rehtalil i reey pan taxaaj, inqak'at wo' naq i insensia inqayeew wo' naq ink'ohnik laj iq'oom chuwach. Eh chu'nchel inqa a'n re' re' qaq'orom reh i qab'ahiil, eh ma' naa ta qakanaam rub'aan, inki taqe.
20Eh re' i Jeremías xuchaq'weej taqe chu'nchel i winaq, chu'nchel ixoq xichaq'winik reh chi je' re', je' wili i xuq'or keh:21¿Mi nakapaaj taq re' hat chi re' i QaJaaw Dios ma' reht'al taj, chi sahchinaq paruk'ux, chi re' taq i hat, chi re' taqe aamaam awati't, chi re' taqe i reey, chi re' taqe i k'amal taq ab'eeh, taqe i tinamit xkik'at i insensia chikiwach taqe i tiyoox chupaam taqe i tinamit wilkeeb' i Judá, je' wo' xilak taq b'eeh Jerusaleem?22Re' i QaJaaw Dios ma' xukuy ta chik nik'-oq najtiil i yiib' wach na'ojb'al taq xa a'n, re' reh ma' xponik ta chuwach. Ruum aj re', re' taqe aatinamiit xsacharik wach ma' jino'q chik patineel xkahnik chupaam, je' re' xkahnik chi jumpech. Eh xkahnik chi ma' holohik ta chik kiq'orik chi riij, ti yo'joq ruum i xuk'ul.23Re' i runimaal ti k'axik xchalik taq cha naah re' re' ruum chi xak'at taq i insensia chikiwach taqe i tiyoox ruuk' i re' xat mahkunik taq chuwach i QaJaaw Dios. Eh ruum chi ma' xanimaj ta taq i xatrutijej wii', ma' xanimaj ta taq i xuq'or taq aweh, eh ruum chi ma' xa a'n ta taq i ruq'or taqe i ruk'uhb'aal, inki Jeremías.
24Eh je' wili i xuq'or keh i tinamit, keh ixoq: Chab'iraj taq i ruk'uhb'aal i Dios naa taq nuq'orom aweh chawunchelaal taq i hat aj Judá, i k'acharik taq i na a'n ar Egipto.25Re' QaJaaw Dios nim rajaawriik, i qaDios i hoj, hoj aj Israel je' wili i ruq'or taq chawiij: Chi re' keh, chi re' i kehk'een aha' wilik inkiq'or ruuk' kichii' chi naa kianaam inki a'n inkiq'or: Re' hoj qaq'orom chik chi naa qak'atam i insensia chi naaqaye'em ink'ohnik laj iq'oom chuwach i qa ixoq tiyoox rehtalil i reey pan taxaaj, korehtaal inqa a'n i qaq'orom, inki taqe. Ma' xta reet kian i kiq'orom.26Xa re' la' kib'iraj chi kunchelaal i aj Judá k'acharik inki a'n Egipto i naa nuq'orom chi je' wili: Xti nuq'or i korik ruuk' i runimaal wach i nub'ihnaal chi ma' jino'q chik keh i aj Judá naa ruq'orariik i kib'ihnaal chupaam chu'nchel i ruyuq'ul i Egipto. Xa ma' xta chik inki chi neenkiq'or chi je' wili: K'achlik i Dios nee qohrutoob'eej, inko'q taqe.27Ruum re' hin naa nutaq'aam chaloq i runimaal ti' k'axik chikinaah i aj Judá wilkeeb' paruyuq'ul i Egipto. Ma' re' ta holohik i naa nuye'em chikinaah, je' re' noq naa rukuxiik kikimiik ruum q'aq'inik, ruum wi'jaleel.28Ach kiib' ixib' naakiko'leem kiib' chuwach i kimiik ruum q'aq'inik naa wo' chik keliik reje paruyuq'ul i Egipto, eh naa wo' chik kisutiniik reje Judá. Eh chu'nchel i aj Judá wilkeeb' chi k'acharik ar Egipto naakilom aha' wilik i naa rojiik eloq wach, mi re' i xnuq'or i hin, oon re' i xkiq'or i keh.29Re' hin i Dios re' wili i rehtalil naa nuye'em chikiwach, naab'al reh chi narojiik eloq wach chi naa nuye'em ti' k'axik chikinaah chupaam i tinamit wilkeeb' wii'.30Re' chi re' hin naa nuq'asam i Hofra kireey i aj Egipto pan kiq'ab' i nixowanik wach inkaaj rukanteesjiik. Je' rukab' noq xnuq'asaj i Sedequías xwihik chi kireey i aj Judá pan q'ab' i inixowanik wach re' Nabucodonosor kireey i aj Babilonia re' wo' hoq i xkansanik reh, inki Dios, inki. Re' i ruq'oral i Dios xq'orarik cho reh i Baruc
1Re' i k'uhb'aal wili xuq'or i Jeremías reh i Baruc, re' noq kijib' chik haab' rokiik chi reyil ar Judá i Joacim rak'uun i Josías, eh re' noq re' i Baruc xtz'ihb'anik reh i ruq'oral i Dios xq'orarik reh ruum i Jeremías.2Eh je' wili i xuq'or: Re' i hat Baruc je' wili i ruq'or cho chawiij i QaJaaw re' i ki Dios i aj Israel.3Re' reh je' wili i ruq'or: Re' hin ma' k'isiin i ti' k'axik k'ahchi' nuk'ulum re' i Dios xutiq cho naah i ti' k'axik chi nunaah ma' xta chik rusuqkiil nuk'ux xinq'uhtik chik chi oq'ik, inki.4Re' i QaJaaw Dios je' wili i xuq'or weh: Re' hat i cha q'or reh i Baruc chi re' hin i nusach wo' chik wach taqe i nuyejaa', eh inwesaj pan kiye'aab' taqe i nuch'ikaam pan kiye'aab', je' wo' re' i naa nub'anam ruuk' chu'nchel i wach ak'al wili.5Re' reh xaraaj rusik'im runimaal wach xa ree reh chi rib'il riib', maruk'ul ta chi nee rusik' i re' ruum re' hin naa nuye'em i runimaal ti' k'axik chinaah chu'nchel i tinamit. Xa re' la' re' hin naa nuko'leem riij i ruk'achariik i reh xa aha' pa' yuuq' nenooj i k'oq, inki Dios. Re' noq xb'aan keh i aj Egipto chupaam i ye'aab' Carquemis
1Re' QaJaaw Dios xuq'or cho reh i Jeremías jalal ruq'oral chib'ih xub'an kuuk' i ju'jun seht chi tinamit.
2Je' wili i xuq'or chi riij i tinamit Egipto, chikiij i ru soldado Nacao kireey i aj Egipto wilkeeb' chupaam i ye'aab' Carquemis, wilik ma' najt ta ruuk' i nim ha' Éufrates. Re' taqe i xb'aan keh ruum i Nabucodonosor kireey i aj Babilonia noq kijib' chik haab' rokiik chi reyil ar Judá i Joacim rak'uun Josías.
3Eh je' wili xuq'or: Chayejaa' taq i nimlaj pulato ch'ihch' ko'lemb'al awiib' hiy taq chak'ulb'ilej taqe i aj ixowaal.4Eh chakoj taq rihqb'aal aakawayu johteen taq chi riij chakoj taq ach'ihch' puneet, ach'ihch' so' chatus taq awiib' chajuk' taq ach'ihch', inki.5Eh noq xwilow xi sutinik wo' chik xb'aan keh. Eh re' i ki soldado, ma' xkikuy taj i q'aq'inik. Eh xkimol chi elik xkitukej kiib' ma' kota chik xitz'ehtanik cho chikiij, ma' k'isiin i kiyo'jiik xa aha' yuuq', inki QaJaaw Dios.6Xa ma' kow ta wo' kiajiminik, eh xama' xkiko'leej ta wo' kiib' i xti kow naq inki a'n kiib'. Ar la' xiooj q'ehb'oq chi chii' i nim ha' Éufrates, i wilik reje pantz'eet reh i rokb'aal i q'iij.7¿Awach taqe i soldado re' re' yohb'aal wach kikowiil inki a'n kiib' xa je' chik rukab' i choqik i rub'an i nim ha' Nilo?8Re' taqe re', re' i ki soldado i aj Egipto, re' choqik inki a'n je' rukab' i rub'an i nim ha' Nilo, je' wili inkiq'or: Re' hoj naa qak'ihaaxb'iik naa qanujisam naah i wach ak'al. Naa qasacham kiwach tinamit, je' wo' taqe i k'achareel chupaam, inki taqe.9Kichaloq i aj q'aq'ineel wilkeeb' chi riij i kawáyu, i wilkeeb' pan kareta i xa chi kooq xi chalik, kichaloq i kow kiib' chi q'aq'inik, je' wo' i ki soldado i aj Put, kik'am cho kipulato ch'ihch', kichaloq i ki soldado i aj Lud, re' taqe i kichol rutz'a'jiik i flecha.10Ruum chupaam i q'iij re' re' naa ruq'ajam wach i QaJaaw Dios nim rajaawriik keh i aj Egipto i nixowanik wach, re' q'aslaj ch'ihch' naa runujiik chi kik' naa rukuxiik ru kansam taqe. Ruum re' QaJaaw Dios, ma' k'isiin ikaansanik naa rub'anam pantz'eet reje reh i rookb'aal i q'iij ma' najt ta ruuk' i nim ha' Éufrates, je' mayijimaj chikop taqe chi reh.11Re' taq i hat aj Egipto, i je' taq akab' i k'isa q'ahxoq, naa naq rojiik asik'im aawiq'oom Galaad. Atoob' ta ma' k'isa iq'oom taq i nee nakoj xama' xta wo' neerutiq taq aweh, ruum ma'iq'oom ta wo' chik iraaj taq aati'kiil.12Re' taqe i nimaq tinamit naa kinab'eem chi xb'aan taq aweh. Eh naa rib'irjiik chupaam i tinamit wach ak'al chi naa taq ak'erem aachii'. Eh re' taqe i a soldado q'e' kow kiib' k'ul naakiq'ojom kiib' naa kiq'ehb'iik wach ak'al, inki Dios.
13Re' QaJaaw Dios xuq'oreej i Jeremías jalal ruq'oral, noq ojik chik i rub'an i Nabucodonosor kireey i aj Babilonia chub'anariik keh i aj Egipto je' wili i xuq'or reh:
14Cha q'oreej taqe i aj Egipto, aj Migdol, i aj Menfis, aj Tafnes, chi je' wili: Chawikraaj taq awiib', cha yejaa' taq awiib' ruum yohb'aal wach ikaansanik k'ahchi' ruuk' i q'aslaq ch'ihch' taq cha junsuut, tiko'q keh.15¿Chib'ih reet noq xumol chi elik inye'wik taq rukowiil ak'ux inaq'or? Xumol chi elik ruum re' hin i Dios xineesanik i rajaawriik.16Re' i ki soldado k'ul nakiq'ehb'iik chikinaah chi kib'il kiib', je' wili i naa kiq'orom: Qoh eloq reje ayu' taq wo' taq chik panqatinamiit xoj-aasjik cho wii', qamol reje chi elik chuwach i q'aq'inik wili, inkoq taqe.17Re' taq i hat naa taq akojom rukab' i b'ih i kireey i aj Egipto chi je' wili: Xa q'e' inq'orik, eh xama' xta wo' rub'an, tiko'q taq reh.18Eh re' hin i Dios k'achalkiin chi juneliik, wilik wajaawriik i nub'ihnaal. Eh re' taqe i aj ixowaal naa ruchaliik chikinaah i aj Egipto, xiik' naah nimaal wach ma' xata je' najtiil naah i yuuq' Carmelo, wilik chi chii' i palaw.19Re' taq i hat i aj Egipto cha yejaa' taq chib'ih aweh reh ojik, ruum re' i tinamit Menfis naa rukahniik chi je' rukab' i chiq yuuq', naa rukahniik chi ma' jino'q chik patineel chupaam.
20Re' taqe i aj Egipto je' wo' naq kiholwochiil i q'ahxoq wakax. Xa re' la' naa ruk'uliik b'anroq keh kuum i aj ixowaal naa kichaliik pantz'eet reh i rookb'aal i q'iij.21Re' i ki soldado xa q'ina' wo' naq chik taqe, xa je' chik kiq'ina'hiil i rak'uun wakax, xa re' la' xama' naa ta wo' kikuyum ransil taqe i aj ixowaal. Eh naakimolom chi elik ruum naa ruchaliik i runimaal ti' k'axik chikinaah chi tojb'al kimahk.
22Re' taqe i aj Egipto naakimolom chi elik, je' rukab' noq i rumol chi elik i mama' aaq'. Eh noq naa ruk'uliik iloq i ki soldado i aj ixowaal chikinaah naa ruyok'ariik i kinaah chi ikej je' kiyok'arik sii' naa rub'aan.23Eh je' kiyok'arik rax chee' naa rub'aan, xa je' chik kik'ulik iloq ruk'ihaal nimaq chili'l noq naa kik'uliik iloq i aj ixowaal chikinaah ma' awach ta naa rukuywiik kajaljiik.24Re' taqe i aj Egipto naa rehtesjiik i kajaawriik, naa ruchopariik kinaah ruum i tinamit wilik reje pantz'eet reh i rookb'aal i q'iij, inki.
25Re' i QaJaaw Dios nim rajaawriik, qaDios i hoj, hoj aj Israel, je' wili i xuq'or: Re' hin naa nuye'em i ti' k'axik chikinaah i aj Amón, inkikoj chi ki dios i aj Tebas, chikinaah i aj Egipto, chinaah i kireey, je' wo' taqe inkiyeew kik'ux ruuk'.26Eh naa nuye'em q'ab' chi naa ruchopariik kinaah kuum i aj kaansoom i nixowanik kiwach, re' i Nabucodonosor kireey i aj Babilonia, naa wo' nuq'asam taqe pan kiq'ab' i ru soldado. Xa re' la' naa wo' chik ruponiik i q'iij chi naa kiwihiik k'achareel ar Egipto, inki.
27Re' taq i hat aj Israel, riih rumaam i Jacob hat taq waj kamanoom mat yo'jik taq, ruum re' hin naa taq kaat wesam chee hat, taqe awak'uun awixq'uun chupaam inajt tinamit xat k'amarik taq reje wii'. Eh naa wo' chik taq aak'achariik pansuqkiil k'uxliis, ma' xta chik naa ruyohb'isaniik taq aweh.28Matyo'jik taq i hat riih rumaam i Jacob hat taq waj kamanoom, ruum re' hin taq aaDios naa nuwihiik taq awuuk'. Eh naa nusacham kiwach i tinamit re' i xnutukej taq reje wii' awach, ma' naa ta nusacham taq awach i hat, xanaa la' taq kaat nuye'em chutojariik riij taq amahk parub'ehel, xa re' la' ma' naa ta wo' nukanaam chi ma' naa ta taq atojom wach aamahk, inki. Re' i ruq'orariik rib'iral chib'ih i xkik'ul i aj filisteo
1Re' i wili i ruq'oral i Dios xuq'or reh i Jeremías chikiij taqe i aj filisteo, noq komajaa' inchalik i kireey aj Egipto chub'anariik keh i aj Gaza.
2Re' QaJaaw Dios je' wili xuq'or: Pantz'eet reh i rookb'aal i q'iij naa kik'uliik iloq i ruk'ihaal soldado xa je' chik rukab' i choqik i rub'an i nim ha', naa kisacham wach i xata wo' jarseht chi tinamiit, ruch'ihil i k'achareel wilkeeb' chupaam. Eh naakik'erem kichii' ruum i ti' k'axik naakik'ulum.3Eh noq naa kib'iram chi xa kitelikinik chik taqe i kikawayu i ruk'ihaal soldado, eh xampolojinik chik i kikareta ma' k'isiin ta naa kiyo'jiik taqe i tuutb'ees ajaab'ees naakiq'eb'em kahnoq i kak'uun kixq'uun.4Ruum chupaam i q'iij re' re' naa rusachariik kiwach i aj filisteo, aj Tiro, aj Sidón, korehtaal inkuxik rusachariik kiwach intowik keh i aj filisteo, inki. Re' i QaJaaw Dios naa rusacham kiwach i aj filisteo, je' wo' chu'nchel i wilkeeb' chupaam i ye'aab' Kaftor.5Eh re' taqe i aj Gaza naa kijoyom i rismaal kinaah ruum i ruti'kiil kik'ux, re' taqe i aj Ascalón naa kikahniik meem. Re' taq i hat i wilkaat taq wach k'ixkaab' ¿Kojaruuj taq i namay ruyok'ariik wach taq ati'jolal?6Eh je' wili taq i naa aq'orom: QaJaaw Dios, re' hat xataaq'anik cho qakanteesjiik ruuk' q'aslaj ch'ihch'. Chayeew q'ab' chi neenkikanaa' qakanteesjiik ruuk' q'aslaj ch'ihch', chawesaj chi qanaah, tiko'q taq.7Eh ¿nik' wach noq neeresaj taq cha naah wila' re' wo' i QaJaaw xtaaq'anik taq cho akanteesjiik kikanteesjiik i aj Ascalón, kikanteesjiik i wilkeeb' pan tz'a'laj yuuq' chi chii' i palaw? Re' i ruq'orariik rib'iral chib'ih i xkik'ul i aj Moab
1Re' QaJaaw Dios nim rajaawriik, qaDios i hoj, hoj aj Israel je' wili i ruq'or chikiij i aj Moab:
Q'e' ketel kiwach i aj Nebo ruum naa rusachariik kiwach, je' wo' taqe i aj Quiriataim naa ruchopariik kinaah naa kikahniik chi ma' xta chik kajaawriik naa rehtesjiik i kikowiil.2Re' taqe i aj Moab ma' jaruuj chik ruye'ariik runimaal kiwach, ruum i Hesbón re' taqe i aj ixowaal kiyejaam chik wach chi naa kisacham wach i tinamit Moab. Eh je' wo' taq i hat aj Madmena naa wo' rusachariik taq awach ruuk' q'aq'inik.
3Eh wilik i naakik'erem cho kichii' ar Horonaim, je' wili i naa kiq'orom: Naa rusachariik wach i tinamit, inko'q taqe.4Re' taqe i aj Moab naa rusachariik kiwach, eh noq naa ak'erem kichii' naa ruponiik ko ar Zoar.5Eh naa koq'iim awach i naakijohtiik nah yuuq' Luhit. Eh naa koq'iim awach i naakiqajiik cho Horonaim, eh naa kib'iram i nixowanik kiwach.6Awach i nee ruyeew riib' chuwach chumol chi elik, chuko'leej riib', je'-oq rukab' i k'iix wilik pan chiq yuuq' ink'amarik reje ruum i teew.7Eh re' taq i hat aj Moab i xach'ikaa' taq ak'ux chinaah taq ab'ehomal naa wo' ruchopariik taq anaah. Re' taq atiyoox Quemos i kib'ih naa wo' kik'amariik reje pan tokoom tinamit, ruch'ihil taqe i k'amal kib'eeh aj tiij, taqe i k'amal b'eeh.8Eh naa rusahchiik kiwach i wilkeeb' chupaam i ju'junseht chi tinamit, ma' junseht i tinamit naa ruko'leem riib'. Chi je' wilkeeb' wach k'ixkaab', chi je' wilkeeb' chinaah taqe yuuq' naa rusachariik kiwach, je' rukab' i xnuq'or.
9Eh wilik ta naq kixiik' i aj Moab nee naq inkimol chi elik. Eh jarseht i tinamit ruchopom naah naa rusachariik kiwach, ma' jino'q chik i k'achareel naa kikahniik ar, inki Dios.
10Eh je' wili i xuq'or: Re' hin naa nuye'em panti' k'axik awach i xakiib' ruk'ux i rub'an i nukamaj, je' wo' hoq awach ma' naa ta rajwaam kikantesjiik taqe i aj Moab.
11Re' aj Moab eliik naq suq chee kik'achariik ma' jank'al ta naq kik'amarik reje pan tokoom tinamit. Xa je' naq kikab' i riis uuva xa jinaj wilik wii' ma' q'ahteesjik ta reje chupaam i tokoom ye'aab' reh, ruum i re' ma' inyoj ta naq wach i rusuqkiil, i ruk'ohonkiil.
12Re' QaJaaw Dios je' wili xuq'or xponik chik i q'iij chi naa nutaq'aam taqe chaloq i aj ixowaal reh chi naa kik'amariik reje. Naa rub'aan keh je' rukab' imb'aan reh i riis uuva noq inehteesjik chupaam i ye'aab' reh chupaam chik i tokoom ye'aab' inye'arik, eh re' naq i wilik wii' impaxjik.13Eh naakik'uhtaam kik'ixb'ilaal i aj Moab, ruum i runimjiik i kitiyoox Quemos i b'ih, je' rukab' noq xkik'uhtaaj kik'ixb'ilaal i aj Israel ruum i runimjiik i kitiyoox Bet-el i b'ih re' naq i ch'iklik wii' kik'ux.
14Re' taqe i aj Moab ma' naa ta chik kiq'orom chi je' wili: Q'e' hoj kow wilik qajaawriik chi q'aq'inik, ma' ko'q ta chik taqe.15Eh naa ruponiik i sachal kiwach i aj Moab, je' wo' hoq jarseht chi tinamit ruchopom naah. Eh re' taqe i k'ijolaq naa kik'amariik pankimik, inki Reey, i Dios nim rajaawriik.16Re' i rusachariik kiwach, re' i ti' k'axik naakik'ulum i aj Moab xailook' chik ink'uloq chikinaah.17Re' taq i hat wilkaat taq chi junsuut i Moab, aweht'al taq wach chaketelaaj taq wach ti oq'oq taq chi riij je' taq wili i cha q'or: Ti xsacharik wach i rajaawriik, eh xti holohik wo' naq, tiko'q taq.18Re' taq i hat aj Dibón, na taq atzunaam awiib' wach chiq ak'al ruum naa rehtesjiik taq awajaawriik, ruum xi chalik wo' chi rusachariik taq awach i hat i xi chalik chi rusachariik kiwach i aj Moab. Eh naa rusachariik kiwach inako'leej taq wii' awiib'.19Re' taq i hat aj Aroer naa taq awilom naa taq apab'aam awiib' chii' b'eeh, naa taq apahqaam keh i konaakikahniik chi k'achalkeeb' chib'ih i xk'ularik.20Eh noq naa ruk'ulariik naa taq awilom chi re' taqe i aj Moab, esamaj chik i kajaawriik, eh naa kiyo'jiik, naa taq awoq'iim chikiij. Naa taq aq'orom chi chii' i nim ha' Arnón, chi xsacharik kiwach i aj Moab, inki Dios.
21Eh xponik chik i ruq'ijil i ti' k'axik chi naa ruchaliik, chikinaah i aj wach k'ixkaab', chikinaah i aj Holón, i aj Jahoza, i aj Mefáat.22Eh naa wo' ruchaliik chikinaah i aj Dibón, chikinaah i aj Nebo, chikinaah i aj Bet-diblataim.23Eh chikinaah i aj Quiriataim, chikinaah i aj Bet-gamul, chikinaah i aj Bet-meón.24Naa wo' ruchaliik chikinaah i aj Queriot, chikinaah i aj Bosra, chikinaah i jarseht chi tinamit ruchopom naah i tinamit Moab chi je' wilkeeb' chi najt chi ma' najt.25Re' QaJaaw Dios je' wili xuq'or:
Re' taqe i aj Moab naa kikahniik chi ma' xta chik kikowiil, chi ma' xta chik kajaawriik, inki.
26Re' i aj Moab je' nanaa kixohk'resjiik ruum i Dios, je' na naakitolem kiib' pankixab'iik, eh chu'nchel i tinamit naa rukaqse'laniik keh.27Eh re' taq i hat aj Moab xanaa kaqse'laaj naq taqe i aj Israel, inawixowaaj naq taq kiwach, ma' holohik ta taq ti' q'orik chikiij, xakoj taqe chi ajileq'.
28Re' taq i hat aj Moab eleen taq reje chupaam i tinamit, hiy taq cha sik' aa ye'aab' pantaq ruhopil ab'aj, je' rukab' inki a'n i paloma inooj kiyejaa' kisuuq' chi chii' taqe i ruhopil ab'aj.29Re' hoj qeht'al noq re' taqe i aj Moab q'e' inkinimb'isaj kiib', xa nimaq chik kiwach inki a'n kiib', chi xakow kiq'orik, chi xama' awach taj imponik panaq'kiwach.30Re' QaJaaw Dios reht'al wo' hoq chi xa q'e' nim kiwach inki a'n kiib', eh xa re' nimaq wach i q'orik inkiq'or, je' wo' hoq i josq'iil inki a'n31Re' hin q'e' ti' naawik'raam, naawoq'iim chikiij chu'nchel i aj Moab, je' wo' chikiij i aj Qir-hares.32Re' taq i hat aj Sibma q'e' naawoq'iim taq chawiij ma' xata je' rukab' oq'ik xb'aan chikiij i aj Jezer, re' taq aa-uuva ma' naa ta chik ruwachiniik. Eh komponik wo' naq chi chii' i taqe palaw taq aa-uuva. Eh yu'naak naa rusachariik taq wach aa-uuva.33Ma' awach ta chik i naa ruk'erem chii' ruum rusuqkiil ruk'ux chupaam taqe i ye'aab' tikooj wii' i uhtz'ub' ar Moab. Re' i riis i uuva naa ruk'uhliik chupaam i molarik wii', ma' awach ta chik naa ruyeq'wiik paam i uuva pan yitz'b'al reh. Ma' awach ta chik naa rub'anam rutz'uuy.
34Naa la' kik'erem kichii' ruum i ti' k'axik i aj Hesbón, korehtaal inib'irjik ar Eleale, ar Jahaza, ar Zoar, ar Horonaim, eh ar Eglat-selesiya. Eh naa kichiqiik taqe raasb'al ha' wilkeeb' Nimrim.
35Re' QaJaaw Dios je' wili xuq'or: Re' hin naa nusacham kiwach i aj Moab, kijohtik chinaah taqe i yuuq' chu k'atarik insensia, chuk'atariik i chikop chi kimayiij chikiwach taqe i tiyoox, inki.36Ruum aj re', re' hin xtikinoq'ik chikiij i aj Moab, je' wo' chikiij taqe i aj Qir-hares. Re' taqe xuul narib'irjiik xa reh chik muq'anik, eh re' i kib'ehomal kimolom wach naa rusachariik wach chi jumpech.37Eh chi kunchelaal naa kijoyom i rismaal kinaah, ruum ruti'kiil kik'ux, naa kijoyom i kusinchii', naakiyok'om wach i kiq'ab', naa kikojom chikiij i q'as wach itz'ihy.
38Re' QaJaaw Dios je' wili xuq'or: Re' taqe i aj Moab, naakik'erem cho kichii' chi oq'ik nah kipaat. Eh naa koq'iim xilak taq b'eeh, ruum re' hin naa nusacham kiwach, je' kipaxik ak'al ikom naa nub'anam taqe, inki.39Re' taqe i aj Moab naa koq'iim ruum i ti' naakik'ulum, xama' xta chik i naa kianam, naakik'uhtaam kik'ixb'ilaal, xama' xta chik kikamaj naa kikahniik, xama' xta chik kajaawriik naa kikahniik chikiwach taqe i wilkeeb' chi kijunsuut.
40Ruum re' QaJaaw Dios je' wili xuq'or: Re' taqe i aj ixowaal naa kikutum kiib' chikinaah i aj Moab, xa je' chik rukab' noq i ruhe' paam i ruxiik' i xihk noq i ruchop i rutiib'.41Re' taqe i ju'jun seht chi tinamit re' i nimaq paat inkiko'leej wii' kiib' naa kichopom naah i aj ixowaal. Eh re' taqe i kaj q'aq'ineel i aj Moab ma' naa kiyo'jiik, xa je' chik rukab' ixoq noq ink'ulik ruk'ux.42Re' taqe i aj Moab naa rusachariik wach i kitinamiit, i korehtaal inkahnik chi ma' xta chik wilik chupaam, ruum q'e' xkinimb'isaj kiib' chi nuwach.43Re' taqe i aj Moab naakisik'ariik kuum i aj ixowaal je' rukab' noq insik'arik i chikop kuum i aj puhb', xanik' neekiq'ehb'ik panjul, oon pan xirob'.44Re' taqe i chikop ma' imb'aan ta keh chi puhb' kiooj q'ehb'oq panjul, eh noq i kielik cho panjul kiooj q'ehb'oq pan xirob'. Je' wo' re' i naakik'ulum i aj Moab ma' naa ta rik'iik chikiij chi ma' naa rub'aan keh, ruum re' hin naa nuye'em i ti' k'axik chikinaah, inki Dios.
45Eh wilik i naakimolom chi elik chi ma' xta chik kaansil naa naq rojiik kikeb'aam kiib' pan tinamit Hesbón, eh re' i tinamit re' re' naa ruqopariik ruq'aq'al, eh naa ruk'atam chu'nchel i ruyuq'ul i Moab, haa' taqe i patineel wilkeeb' ar ruum ma' kinimanik taj.46Hat taq aj Moab, i hat taq rutinamiit i Quemos q'e' taq ti' i naa ak'ulum ruum naa rusachariik taq awach. Q'e' wo' chik ti' ruum re' taq awak'uun awixq'uun naa kik'amariik reje pan tokoom tinamit.47Eh noq naa rojiik kuxoq naa wo' chik wesam taqe cho panti' k'axik i aj Moab. Re' wili korik ruum re' hin kiq'orik, inki Dios.
Re' taqe i ti' k'axik wili naa ruye'em chee Dios chikinaah i aj Moab. Re' noq xq'orarik cho rib'iral chib'ih xkik'ul i aj Amonita
1Re' i QaJaaw Dios je' wili i xuq'or chikiij i aj Amón:
Hat taq aj Israel ¿Mi ma' re' naq re' taqe awak'uun awixq'uun naa kehchaniik reh i ye'aab' wili? ¿Chib'ih reet noq re' chik taqe aj Amón kiloq'inik reh i tiyoox Milcom b'ih xichopwik naah i ye'aab' Gad, je' wo' chu'nchel i kitinamiit i aj Israel?2Xa re' la' naa wo' chikruponiiki q'iij chi naa nuye'em q'ab' chi re' taqe i aj Amón, taqe i aj Rabá naakik'erem kichii' ruum naa ruchaliik i q'aq'inik chikinaah, naa rusachariik kiwach taqe i kitinamiit. Eh re' keh naakik'atariik, re' taqe i aj Israel naa wo' chik kichopom naah i kiye'aab', inki Dios.
3Re' taq i hat aj Hesbón naa taq rutib'iik ak'ux ruum re' taqe i aj Hai naa rusachariik kiwach. Eh re' taq i hat aj Rabá naa taq ak'erem aachii' chi oq'ik, naa taq akojom aq'as wach so' chawiij. Eh k'ul taq naa awojiik, ruum re' taq aatiyoox Milcom i b'ih naa ruk'amariik reje pan tokoom tinamit, kuch'ihil taqe i k'amal b'eeh aj tiij, taqe i k'amal kib'eeh.4¿Chib'ih reet noq inanimb'isaj taq awach ruuk' akowiil? re' taq aakowiil xanaa rik'iik wach taq i hat i ma' tinimanik ta taq. Eh i nayeew taq ak'ux chinaah ab'ehomal, je' taq wili inaq'or: ¿Mi wilik jino'q i neenk'ulik b'anoq qeh i hoj? tiki taq.5Re' hin naa nuye'em q'ab' chi xa aha' naa ruchaliik i ti' k'axik taq cha naah. Re' wili korik ruum re' hin i Dios nim wajaawriik kinq'orik reh. Je' re' noq k'ul taq naa amolom chi elik xa aha' pa' taq inawaaj i hat. Eh ma' awach ta chik taq naa rumolwiik awach.6Xa re' la' naa wo' chikruponiiki q'iij chi nuwach i hin chi naa wo' chik wesam taqe panti' k'axik i aj Amón, inki Dios. Re' noq xq'orarik rib'iral chib'ih i xkik'ul i aj Edom
7Re' QaJaaw Dios nim rajaawriik, je' wili i ruq'or chikiij i aj Edom:
¿Mi ma' chih chik i na'ojb'al ar Temán re'? ¿Mi ma' awach chik re' i inkojwik na'ojb'al ar? ¿Mi xsahchik wach re' i kina'ojb'al?8Re' taq i hat i aj Dedán naa taq amolom chi elik, naa rojiik taq akeb'aam awiib', ruum re' hin naa nusacham kiwach i aj Esaú, ruum xponik chik i q'iij chi naa nuye'em taqe panti' k'axik.9Eh noq insik'arik i wach i uuva ko wilik wo' k'isinoq inkahnik, noq kiponik i aj jileq' chaq'ab' xa re' wo' hoq i ajwaal wach chi keh inkik'am xa ko wilik wo' inkikanaa' ar.10Eh re' hin ma' xta chik i naa nukanaam chupaam i tinamit Esaú, naa nuyojom i ke'emb'al kiib'. Re' taqe i kak'uun kixq'uun, taqe i ma' tokoom ta kuuk', taqe i kika'jaah naa rukuxiik rusachariik kiwach. Ma' jino'q chik i naa ruq'oriik reh chi je' wili:11Chakanaa' taq weh awak'uun awixq'uun, taqe ixoq kamnaq kib'ahiil re' hin neenwilow taqe ma' inko'q ta chik taqe, inki Dios.
12Re' i QaJaaw Dios je' wili xuq'or: Wila' naakik'ulum i ti' k'axik i ma' xta kimahk je' naa jinaj kulk chi k'ahlaj ha' i naa kuk'em ra'j naa chik taq re' hat i aj Edom ma' naa ta ak'ulum i ti' k'axik. Je' naa jinaj kulk chi k'ahlaj ha' taq i naawuk'em.13Re' hin i Dios xti korik i nuq'or chi re' i tinamiit Bosra naa rukahniik chi xan tz'irik chik paam, Eh naa rehtesjiik i kajaawriik, ma' holohik taj i naa ruq'orariik chikiij, eh re' taqe i tinamit i ruchopom naah naa rusachariik kiwach chi jumpech, inki.
14Re' hin wilik i xuq'or cho weh i QaJaaw, jinaj i aj taqareel je' wili i xuq'or cho chupaam taqe i tinamit: Chayejaa' taq awiib' reh chi nee tiooj taq q'aq'ineel chikinaah i aj Edom.15Re' taq i hat aj Edom naa taq kaat nukanaam chi ma' xta taq awajaawriik chikiwach i k'ih seht chi tinamit, eh naakixowaam taq awach.16Re' taq i hat xayeew taq awiib' chi jot'arik ruum q'e' taq inanimb'isaj awiib' Atoob' ta nee taq i naakeb'aa' awiib' chupaam taqe i ruhopil ab'aj, oon nee taq tiooj k'achareel chikinaah taqe yuuq', oon nee taq nooj ayejaa' taq aaye'aab' chinaah taqe i yuuq', je' rukab' i rub'an xihk, re' hin xanaa wo' taq kaat nuqasam cho ar.
17Re' noq naa rusachariik kiwach i aj Edom yohb'aal wach ti'kiil i naa rilariik, naa rub'aan yo'jik ruum. Chu'nchel i naakik'iik ar naa kiyo'jiik naa kikaqse'laam.18Ruum re' taqe i aj Edom naa rusachariik kiwach, je' rukab' noq xsacharik kiwach i aj Sodoma, i aj Gomorra. Eh re' taqe i tinamit wilik chuka'jaah naa rusachariik kiwach, ma' awach ta chik i naa rupatiniik ar, ma' awach ta chik i naa rik'iik ar, inki i Dios.19Re' hin yohb'aal wach nujosq'iil taq cha naah aj Edom, je' rukab' i rujosq'iil i kaq b'ahlam i nelik chaloq panch'ahn Jordán i rukut riib' chikinaah i rutiib', re' hin naa taq kaat nukaham reje. Eh re' taqe i aj ixowaal naa nukojom chi naaki a'nam taq aweh. ¿Mi wilik aj uuk' taq neenkipaaj i hin? ¿Awach i neerureq chi je' rukab' i hin? ¿Mi wilik jino'q i aj cha'joom neenq'atwik nuwach i hin?20Chab'iraj taq aha' wilik i nuyejaam wach i hin, re' chi naa nuye'em taqe i chutojariik i kimahk i aj Edom. Eh nuyejaam wo' wach chi naa nuye'em taqe chutojariik i kimahk i aj Temán. Eh naa wo' kik'amariik reje i kihaa' lak'uun, naa rusachariik wach i kiye'aab'.21Eh noq naa rusachariik kiwach i aj Edom, ma' k'isa choqik, xan k'uyu'jik chik ak'al naa rub'anam. Eh naakik'erem kichii' naa rib'irjiik cho ko chi chii' i kaq palaw.22Re' taqe i aj ixowaal xakow chik inki a'n noq naa kichaliik chikinaah i aj Bosra, je' rukab' noq kirupinik i xihk. Eh re' taqe i ki soldado i aj Edom ma' k'isiin naa kiyo'jiik, je' rukab' noq inyo'jiik ixoq noq ach k'isiin ma' k'ulik ruk'ux, inki Dios. Re' noq xq'orarik cho rib'iral chib'ih i xkik'ul i aj Damasco
23Re' i QaJaaw Dios je' wili xuq'or chikiij i aj Damasco:
Re' taqe i aj Hamat, taqe i aj Arfad, xkik'uhtaaj kik'ixb'ilaal, ruum xkib'iraj chi ma' holohik taj i naa ruchaliik chikinaah. Ma' kisiin taxiyo'jik xama' suq ta chik inki a'n24Re' taqe i aj Damasco naa kikahniik chi ma' xta chik kikowiil naakimolom chi elik, ma' k'isiin ta naa kiyo'jiik, naa ruchaliik i rutz'irkiil kiwach, xa je' chik kikab' ixoq ach k'isiin ma' nk'ulik ruk'ux.25Re' i kitinamiit holohik naq rib'iral suq naq wilik, naa rukanab'jiik chi kutkeel.26Eh re' taqe i k'ijolaq naa rukahniik chi kutlik i kiti'jolal xilak taq b'eeh. Eh chu'nchel i kaj q'aq'ineel naa rukuxiik kikimiik, inki QaJaaw Dios nim wajaawriik.27Re' hin naa nukojom ruq'aq'al i tz'aq kotimaj wii' riij i tinamit Damasco, eh naa wo' ruk'ahtiik i paat i rub'an wii' i taaq'anik i reey Ben-adad, inki. Re' noq xq'orarik rib'iral i xkik'ul i aj Cedar, je' wo' taqe i aj Hazor
28Re' QaJaaw Dios je' wili i xuq'or chikiij i aj Cedar, chikiij taqe i k'amal b'eeh ar Hazor.
Re' i xb'aan keh ruum i Nabucodonosor kireey i aj Babilonia: Re' taq i hat i aj Babilonia hiy taq cha a'n keh i aj Cedar, chasach taq wach i tinamit re' re' wilik reje pareelb'aal q'iij.29Naa taq achopom naah i ki-itz'ihy naah paat, i kitentzuun, i chib'ih keh, i kikulk, i kicameyo. Eh naa taq ak'erem i aachii' chuq'orariik keh chi je' wili: Xk'uloq taq cha junsuut i runimaal yohb'aal, tiko'q taq keh.30Eh re' hin i Dios je' wili i naa nuq'orom keh: Chamol taq chi elik i hat i patinik taq i na a'n Hazor, hiy taq chakeb'aa' awiib' ruum re' i Nabucodonosor kireey i aj Babilonia ruyejaam chik wach chi naa rub'anam taq aweh.31Re' wo' hin i Dios naa nuq'oriik reh chi je' wili: Hiy taq cha a'n keh i tinamit re' re' i ma' xta naakik'ulum noq inkiq'or. Eh suq wilkeeb', ma' xta koraal tz'aq chi riij, eh ma' xta ru puertahiil i kitinamiit, rutkeel wilik.32Naa taq aq'uchum i kikaweyo, i kiwakax, naa nutukem reje kiwach xa aha' yuuq'. Re' taqe i tinamit re' re' inkijoy i rismaal kinaah xa aha' naa nuk'amam chaloq i runimaal ti' k'axik chikinaah.33Re' i tinamit Hazor naa rukahniik chi xan tz'irik chik paam, naa rukahniik chi kiye'aab' xojb'. Ma' jino'q chik i patineel naa kikahniik chupaam, eh ma' awach ta chik i naa rik'iik ar, inki i Dios. Re' noq xq'orarik rib'iral chib'ih xkik'ul i aj Elam
34Eh noq xokik chi reyil i Sedequías ar Judá, re' i QaJaaw Dios je' wili i xuq'or reh i Jeremías chikiij i aj Elam:35Re' hin i Dios nim wajaawriik,
xti korik i nuq'or chi naa rutoqib'iik i kiflecha inkikoj chi kantesb'al taqe i aj Elam.36Naa nuk'amam taqe chaloq chi junsuut i aj ixowaal chikinaah, xa je' chik kik'uloq kowlaj teew, reh chi naa rutukjiik reje kiwach xa aha' yuuq'. Korehtaal inkahnik chi ma' jino'q chik i tinamit naa rukahniik aha' imponik kikeb'aa' kiib' i kitinamiit.37Re' hin naa nuye'em q'ab' chi naa kiyo'jiik i aj Elam chikiwach i aj ixowaal naa rukansanik keh. Ruum i nujosq'iil naa nuk'amam chaloq i ti' k'axik chikinaah, naa nuk'amam chee q'aq'inik chikinaah, korehtaal insacharik kiwach.38Re' hin tokoom chik i naa nukojom chi taaq'anik ar Elam, naa nuye'em q'ab' chi naakikanteesjiik taqe i kireey, je' wo' taqe i k'amal kib'eeh.39Xa re' la' na' ohoq kuxoq naa wo' chik taqe wesam chaloq panti' k'axik taqe i aj Elam, inki i QaJaaw Dios. Re' i ruq'orariik rib'iral chi xb'aan keh i aj Babilonia
1Re' i xuq'or i QaJaaw Dios chikiij i aj Babilonia kitinamiit i aj Caldeo, re' i xuq'or cho ruuk' chii' i Jeremías jalal ruq'oral, je' wili i xuq'or:
2Chaq'or rib'iral chayeew chi naab'jik chupaam i ju'jun seht chi tinamit. Chajosaj i rehtalil aq'oral reh chi neenaq'or chu'nchel, je' wili i neenaq'or: Re' i tinamit Babilonia ach k'isiin ma' inchopariik naah, re' i kitiyoox Bel xa se'lb'al naa rukahniik wii'. Re' i kitiyoox Merodac chu'nchel tiyoox inkiloq'ej naa rusachariik kiwach.3Ruum pantz'eet reh i rookb'aal q'iij k'achi' kichaliik i naa rukananiik reh i kitinamiit chi xan tz'irik chik paam. Ma' awach ta chik jino'q i naa rupatiniik ar, ni xata naq chik chikop i naa ruwihiik ar, naa la' kimolom chi elik chi kunchelaal, tiko'q keh, inki.
4Re' QaJaaw Dios je' chik wili xuq'or: Chupaam taqe ponoq i q'iij re' re' naa wo' chik kinkisik'im i nutinamiit Israel, kuch'ihil i taqe i aj Judá naa wo' chik kin kikojom chi kaJaaw chi ki Dios.5Naakipahqaam aha' wilik i b'eeh inooj Sión, je' wili i naa kiq'orom: Qasik' wo' taq chik i QaJaaw, wilik i naaqayejaam wach ruuk' chi naaqanam juneliik, eh ma' naa ta chik rusahchiik panqak'ux, inko'q taqe.
6Re' taqe i nutinamiit sahchinaq naq taqe, je' naq kikab' i tentzun ma' kicha'jaljiik ta chi korik kuum i aj cha'joom kisahchik xak'ul chik kiooj nah taq yuuq' sahchik pankik'ux aha' wilik i kiye'aab'.7Eh noq kireqariik i nutinamiit kuum i aj ixowaal imb'aankeh je' wili inq'orarik chikiij: Ma' re' ta mahk inqa a'n keh ruum ximahkunik chuwach i Dios, re' i xti manlik ehchan keh. Re' Dios inkich'ikaa' cho wii' kik'ux i kimaam kati't.
8Re' taq i hat aj Israel eleen taq reje Babilonia, re' i kitinamiit i aj Caldeo hiy taq chi peet b'eeh je' rukab' noq inooj chi peet b'eeh i kaprax chikiwach i tentzun.9Ruum re' hin naa nuye'em q'ab' keh i k'ih ch'uq chi tinamit, re' i kow kiib' naa kichaliik pantz'eet reh i rookb'aal q'iij, naa kia'nam reh i tinamit Babilonia. Eh pankomonil naa kichopom naah re' ruuk' taqe i aj q'aq'ineel xti tz'eht i kiq'ab' noq inkikut i flecha.10Eh naa kikanaam chi ma' xta chik wilik keh i aj Caldeo, naa kikansam chu'nchel korehtaal inch'iklojik kik'ux, inki i QaJaaw Dios.
11Eh je' wo' chik wili i xuq'or: Re' taq i hat aj Caldeo xak'am taq i chib'ih keh i nutinamiit, xatipisk'anik taq chik panawooq ruum i rusuqkiil ak'ux, xa je' chik rukab' noq impisk'anik i q'ahxoq wakax, xa je' chik rukab' noq i ruk'er chii' i kawáyu wach k'im.12Xa re' la' re' taq aatinamiit xat aasjik wii' naakik'uhtaam kik'ixb'ilaal, ruum xa re' wo' re' ma' ajwaal ta kiwach na' chub'an. Eh naa rukahniik chi xan tz'irik chik paam i kitinamiit, ma' xta chik naa ruwihiik ar chi jumpech.13Ruum re' hin naa ruchaliik nujosq'iil chinaah i tinamit Babilonia, ma' jino'q chik patineel naa nukanaam, xan tz'irik chik paam chi jumpech. Awach naa rik'iik ilwoq reh i ma' k'isiin taq naa ruchaliik ruyo'jiik ruum i ti' k'axik naakik'ulum.14Re' taq i hat i tikaansanik taq ruuk' flecha chatus taq awiib' chakotej taq riij i Babilonia nee taq inakansaj, ruum ximahkunik chi nuwach i hin, hin Dios.15Chak'er taq aachii' chi junsuut, chi je' wili: Re' i tinamit Babilonia achk'isiin ma' inkiq'asaj kiib' xiq'ehb'ik chik i tz'aq inkiko'leej wii' wiib', je' wo' hoq i tz'aq kotimaj wii' riij. Je' re' ruq'ajariik wach naa nub'anam keh, chaq'aj wo' taq wach keh i hat i xkian.16Re' taq i hat naa taq rukuxiik akansam i kib'anik i tik, je' wo' taqe i kimolwik i wach i tik, eh re' taqe i aj pan tokoom tinamit naa wo' chik kisutiniik reje pan kitinamiit, chi kiju'junaal.
17Re' i nutinamiit Israel xkik'ul keh i je' rukab' i ruk'ul i tentzun ajimamaj ruum i kaq b'ahlam.
Ruum peet xb'aan ti' k'axik keh ruum kireey i aj Asiria, eh xb'aan wo' keh ruum i Nabucodonosor kireey i aj Babilonia, xpaaxjik paam i kib'aqil.18Ruum aj re', re' hin i Dios wilik wajaawriik, ki Dios i aj Israel i nuq'or chi naa nuye'em panti' k'axik i kireey i aj Babilonia, je' wo' hoq i rutinamiit, je' rukab' i xnub'an ruuk' i kireey i aj Asiria.
19Eh naa wo' chik nusutem taqe chaloq pan kitinamiit i aj Israel. Naa nukanaam taqe chi je' kikab' i tentzun wilik kiwa' chi korik, chuwach i yuuq' Carmelo, i ye'aab' Basán, i rax chee' Efraín, i Galaad.20Re' hin i Dios kinq'orik chi chupaam taqe ponoq i q'iij re' re' naa nukanaam chi ma' xta chik i kimahk i aj Israel, je' wo' taqe i aj Judá re' taqe i xnukanaa' cho chi kok'achalkeeb' ruum naa nukuyum taqe i kimahk, inki.
21Re' QaJaaw Dios je' wili i xuq'or: Re' taq i hat aj q'aq'ineel hiy taq cha a'n keh i aj Meretaim, i aj Pecod, chasach taq kiwach. Cha a'n taq chu'nchel i nuq'or taq aweh ruum re' hin kinq'orik, inki.22Naa rib'irjiik chupaam i tinamit chi naakik'erem kichii', ruum naa ruponiik i q'aq'inik chikinaah.23Re' taqe i aj Babilonia imb'anik keh chu'nchel i tinamit wach ak'al naa rukahniik chi ma' xta chik kamaj, eh naa rusachariik kiwach. Eh ma' k'isiin ta naa kiyo'jiik i tinamit wach ak'al noq naakilom i naakik'ulum i aj Babilonia.24Re' taq i hat aj Babilonia xa re' taq i hat xakoj aaxirob'aal cha wib'il awiib' xa chi ma' aweht'al taq naa aq'ehb'iik chupaam, ruum xinaq'etwachej taq i hin, hin Dios.25Re' QaJaaw Dios naa ruye'em q'ab' keh i aj q'aq'ineel chi naakesam chee kich'ihch' reh q'aq'inik ruum i rujosq'iil. Ruum re' i QaJaaw Dios nim rajaawriik, naa rub'anam keh i aj Caldeo.26Re' taq i hat aj q'aq'ineel ti chaloq taq xa aha' yuuq' hiy taq cha teh i kiye'aab' inkimol wii' i wach kitik, chasach taq kiwach, korehtaal inakanaa' taqe chi ma' jino'q i k'achalkeeb'.27Chakansaj taqe chi kunchelaal, cha a'n taq kuuk' je' rukab' noq ink'amarik reje i k'ijol wakax pan kantesb'al. Re' keh xiik' naah ti' kiil i naakik'ulum chupaam taqe i q'iij re' re'.
28Eh re' taqe i ma' naa ta kikimiik ar Babilonia naa rojiik kiq'orom ar Sión chi re' i QaJaaw Dios xuyeew taqe chutojariik i kimahk i aj Babilonia, je' rukab' i ruk'ul chi keh ruum xkiyeew chi re' chi ma' re' i rupaat i Dios.
29Chayuq'eej taqe chu'nchel i kikansanik ruuk' flecha, reh chi neenkikotej riij i tinamit Babilonia, reh chi neenb'aan keh, eh ma' jino'q ineenkiko'leej kiib'. Chi je' re' neenb'aan keh nik' wach i xkian i keh reh i tokoom. Ruum xa nimaq chik kiwach inki a'n kiib' chi nuwach i hin wilik nuSantohiil hin ki Dios i aj Israel.30Ruum aj re', re' taqe i k'ijolaq naa rukuxiik kikanteesjiik pantaq b'eeh. Eh chu'nchel taqe i kaj q'aq'ineel kikansanik ruuk' flecha, naa rukuxiik kikimiik chupaam taqe i q'iij re' re', inki i QaJaaw Dios.
31Eh je' wo' chik wili i xuq'or i QaJaaw Dios nim rajaawriik: Re' taq i hat tinamit xa nimaq taq chik awach i na a'n awiib' ma' nwaaj ta wach taq i na a'n, ruum aj re' xponik chik i q'iij chi naa taq kaat nuye'em panti' k'axik.32Re' taq i hat nimaq taq awach i na a'n awiib' ma' naa ta taq aweliik korik noq naa ruk'uliik chee ti' k'axik taq cha naah, ruum ma' awach ta taq naa rutoob'iniik aweh. Re' hin naa ruqopom kiq'aq'al taqe i tinamit, naa ruk'atam reje i chi junsuut, inki.
33Eh je' wo' chik wili xuq'or: Re' taqe i tinamit Israel, re' taqe i tinamit Judá k'achi' rub'aan ti' k'axik keh kuum taqe i inixowanik kiwach ar tz'apalkeeb' ma' kioq'teesjik ta chaloq.34Xa re' la' re' hin xti kow naa wesam taqe chaloq, hin Dios nim wajaawriik i nub'ihnaal. Re' hin naa nub'aniik i q'ataj q'orik, suq kiil k'uxliis i naa nuye'em keh i nutinamiit Israel. Eh runimaal ti' k'axik inanuye'em chikinaah taqe i aj Babilonia, inki.
35Re' i QaJaaw Dios je' wo' chik wili i xuq'or: Re' taqe i aj Babilonia naa kikantesjiik ruuk' i q'aq'inik, taqe i k'amal kib'eeh, taqe i wilik kina'ojb'al.36Eh naa kikanteesjiik ruuk' q'aq'inik taqe i kaj q'iij, naa ruchaliik ruyojiik paam i kinaah. Naakikanteesjiik ruuk' q'aq'inik i xakow chik inki a'n kiib'.37Naakikanteesjiik ruuk' q'aq'inik taqe i ki soldado, taqe i kikareta, i kikawayu, taqe i tokoom tinamit wilkeeb' chi kixilak. Xa ma' xta chik i naa kianam naakikahnik chi xa je' chik taqe ixoq, Eh naa relq'jiik chu'nchel i chib'ih keh.38Eh naa ruchiqiik taqe i kirooq haa', i aj Babilonia ruum xa re' taqe i tiyoox xkiloq'ej, ruum taqe i re' insahchik i kina'ojb'al.
39Ruum aj re', re' i tinamit Babilonia naa rukahniik chi kiye'aab' i yaak, chi kiye'aab' xojb'. Eh naa rukahniik chi kiye'aab' nimaq chikop wilik kixiik', ma' jaruuj chik q'iij naa kiwihiik patineel chupaam.40Nik' wach noq xnusach kiwach i tinamit Sodoma, i Gomorra, taqe i tinamit wilik chi kijunsuut ma' awach ta chik i naa rupatiniik ar. Je' wo' re' noq naa nusacham wach i tinamit Babilonia, ma' jino'q chik i naa rupatiniik chupaam.
41Eh chupaam i jinaj ye'aab' chi najt yuuq' wilik cho pantz'eet reh i rookb'aal q'iij k'ahchi' cho ruyejaam riib' chi chalik jinaj i nimlaj tinamit xti kow riib', ma' k'isiin kik'ihaal taqe i ru reey.42Xkik'am chaloq i kiflecha, i kiq'asju' ch'ihch', yohb'aal wach i kijosq'iil, ma' xta ketelinik wachiis kuuk'. Eh yohb'aal wach i choqik naa kianam, je' rukab' i rub'an i palaw. Chalik chik inki a'n chi riij i kikawayu chi q'aq'inik chinaah i tinamit Babilonia.43Eh noq naa rib'iram chi je' re' i kireey i aj Babilonia naa rusik'riik ruum ruyo'jiik. Eh ma' k'isiin ta naa rutib'iik ruk'ux, je' rukab' noq inchalik ruti'kiil ixoq noq ink'ulik ruk'ux.
44Re' hin yohb'aal wach nujosq'iil je' rukab' rujosq'iil i kaq b'ahlam i nelik cho panch'ahn Jordán eh naa nukaham taqe reje ar i aj Babilonia. Eh re' taqe i aj ixowaal naa nukojom chi naa kia'nam taq aweh taq i hat aj Babilonia. ¿Mi wilik i aj kuuk' taq nee kinapaj i hin? ¿Awach i nee rureq chi je' nukab' i hin? ¿Mi wilik jino'q i aj cha'joom neeruq'at nuwach i hin?45Chab'iraj taq aha' wilik i nuyejaam wach i hin chi naa nub'anam kuuk' i aj Babilonia re' i kitinamiit i aj Caldeo, re' taqe i wili: Re' hin nuyejaam wach chi naakik'amariik reje i keh, je' wo' i kikok' halak'uun, eh naa rusachariik wach i kiye'aab'.46Eh noq naa rusachariik kiwach i aj Babilonia, ma' k'isiin i choqik naa rub'aan naa ruk'uyu'jiik i wach ak'al naakik'erem kichii' naa rib'irjiik cho chupaam taqe i nimaq tinamit, inki Dios. Re' i rusachariik wach i kitinamiit i aj Babilonia
1Re' QaJaaw Dios je' wili xuq'or:
Re' hin naa nutaq'aam chaloq jinaj i naa rusachwiik wach i tinamit Babilonia, eh chu'nchel i kiye'aab' i aj Caldeo naa nusacham wach.2Eh wilik i naa nutaq'aam chaloq i naa rukutwiik reje keh i aj Babilonia, je' rukab' noq inkutarik reje inaq'wach i trigo. Eh naa rukahniik chi ma' xta chik patineel chupaam i kitinamiit, k'ul naa kichaliik i naa rub'aniik keh, paruq'ijil i ti' k'axik.3Eh naa nuq'orom chi naakiyejaam i kiflecha i kikansanik ruuk' flecha. Eh chi naa kikojom i kich'ihch' so' chikiij, chi ma' naa ta kiketelaam wach taqe i k'ijolaq ar Babilonia. Eh naa rukuxiik kisacham wach i ki soldado.4Ar Babilonia pan kitinamiit taqe i aj Caldeo naa rukahniik chi tuch'lik i kiti'jolal taqe kamnaq.5Atoob' ta re' taqe i aj Israel, taqe i aj Judá ximahkunik chi nuwach. Eh xkinujisaj chi mahk paam i tinamit. Re' hin i Dios nim wajaawriik, hin kiSantolaj Dios i aj Israel xama' nukanaam ta wo' taqe.
6Awach i nee ruyeew riib' chuwach eloq reje Babilonia, chi ko'leej riib' maruyeew riib' chi kimiik ruum i kimahk i keh. Ruum xponik chik i q'iij chi naa nuq'ajam wach keh i xkian i keh je' rukab' i ruk'ul chi keh.7Re' i Babilonia chi weeh hin je' naq rukab' i kulk re' ruuk' i oro, xkamanik weh chi ruuk' nujosq'iil i ruxohk'risaj taqe i tinamit, je' naa k'ahlaj ha' i xuyeew keh chi uuk'jik ruuk' i re' xusach i kina'ojb'al.8Re' taqe i aj Babilonia jumehq'iil naa rusachariik kiwach. Re' taq i hat naa taq awoq'iim chikiij, naa naq taq chik atoob'eem xa i lb'al naq reh mi konee nik'ik, i kiti'kiil, inki Dios.9Eh re' taqe i aj Israel wilkeeb' poo ar je' wili i naa kiq'orom: Re' hoj xqatob'eej wo' naq taqe i aj Babilonia, xa re' la' ma' xta wo' chik i xraaj ruum re' i kimahk xponik chik kopan taxaaj i kochi juntar i suutz', taq taq chi qaju'junaal panqatinamiit.10Re' i QaJaaw Dios xoj resaj korik ruuk' i ruk'ul chi qeh i hoj. Taq taq qaq'or rib'iral ar Sión i xub'an quuk' i QaJaaw Dios, inko'q taqe.11Re' i QaJaaw Dios i xraaj rusacham kiwach i aj Babilonia xuyeew pankikapeb'aal taqe i kireey i aj Media i rukapaaj i reh. Re' QaJaaw je' re' ruq'ajariik wach keh naa rub'anam ruum xkiyeew chi re' chi ma' re' i rupaat. Hat taq aj q'aq'ineel cha yejaa' taq aaflecha, je' wo' taq apulato ch'ihch'.12Chayeew taq rehtalil chi naa taq asacham wach i tz'aq' kotimaj wii' riij i tinamit Babilonia, chakoj taq kiman i aj cha'joom cha yejaa' taq awiib' chub'aan, ruum re' i QaJaaw Dios naa rub'anam i ruyejaam cho wach chi naa rub'anam kuuk' i aj Babilonia.13Eh re' taq i hat aj Babilonia ma' k'isiin wo' naq taqe i nim ha' wilkeeb' cha junsuut, ma' k'isiin wo' naq taq ab'ehomal. Xa re' la' yu'naak xponik chik i q'iij chi naa rusachariik taq awach.14Re' i QaJaaw Dios nim rajaawriik xuq'or korik, je' wili i xuq'or: Re' hin naa nutaq'aam i ma' k'isa aj ixowaal taq cha naah, xa je' chik taqe k'ihaal nimaq chili'l, naa rusuqb'iik kik'ux ruum i naa kia'nam taq aweh, inki.
15Re' i QaJaaw Dios ruuk' i rajaawriik xuyejaa' i wach ak'al, ruuk' i runa'ojb'al xuyeew taqe paruye'aab' i wilkeeb' chupaam. Eh ruuk' runa'ojb'al xuhe' wach i taxaaj paruye'aab'.16Noq inq'orik i reh inkitik'aa' cho choqik i suutz' kiye'wik chee jab' pan taxaaj. Eh i ruksaj chaloq i suutz' chi junsuut i wach ak'al, i rub'an taqe chaloq i ruch'aab' i kahoq noq k'ahchi' i jab'. Eh i resaj taqe chaloq i teew aha' wilik wii'.17Xa re' la' re' taqe i tinamit ma' xta kina'ojb'al ma' inkik'am ta naah i runa'ojb'al i Dios, inkixuk'aa' kiib' chuwach taqe i tiyoox. Eh inkiq'asaj kiib' chub'aan i k'ixb'ilaal chi b'anarik, inkiyejaa' kitiyoox xama' xta wo' kajaawriik, xama' k'achalkeeb' ta wo' hoq.18Xa ma' xta kitz'aaq, xa se'lb'al taqe, naa rusachariik kiwach ruum i QaJaaw, noq naa ruye'em chee ti' k'axik.19Re' i ruDios chaloq i Jacob, ma' je' ta kikab' taqe i tiyoox re' re' ruum re' reh xtz'uhkrisanik chaloq chu'nchel i chib'ih jariik i wilik. Eh re' reh xsik'wik cho kiwach i aj Israel, chi xukoj taqe chi rutinamiit.
20Re' i QaJaaw Dios je' wili i xuq'or: Re' taq i hat aj Babilonia xatkamanik taq weh chi ch'eyb'al, chi waj q'aq'ineel, chi xqasach kiwach i tinamit ruch'ihil i kireey.21Re' taq i hat xatowik weh chub'aan keh i kikawayu reh q'aq'inik, je' wo' i kijohtik chi riij, je' wo' taqe i kikareta, je' wo' taqe i kiwihik chupaam.22Re' wo' taq i hat xatowik weh noq xnub'an keh i tinamit, chi winaq chi ixoq chi nimaq chi kok' taq, eh chi k'ijool, chi q'ahxoq.23Eh re' wo' taq i hat xatowik weh noq xnub'an keh i aj cha'jen tentzun, ruch'ihil i kitentzuun. Je' wo' noq xnub'an keh i aj arado ruch'ihil i kib'ooyax, je' wo' taqe i k'amal rub'eeh i tinamit, ruch'ihil taqe i kaj kamanoom, inki.
24Re' i QaJaaw Dios je' wili i xuq'or keh i aj Israel: Re' taq i hat naa taq awilom ruuk' naq'awach noq naa nuq'ajam wach keh i aj Babilonia chu'nchel i aj Caldeo, chu'nchel i yiib' wach xkian reh i nutinamiit Sión.25Re' hin ma' imponik ta chi nuwach i na a'n taq i hat aj Babilonia ruum xa re' rusachariik kiwach i tinamit wilkeeb' wach ak'al taq i na a'n. Ruum aj re', re' naa nub'anam taq aweh i ti' k'axik naa taq wesam i runimaal awach naa ruqopariik ru i q'aaq' taq aatinamiit.26Naa ruyojib'iik chi jumpech ma' jino'q chik i rab'ajiil naa rokiik chi yejemb'al paat. Xti korik chi naa rukahniik chi xan tz'irik chik paam chi jumpech, inki QaJaaw Dios.
27Re' taq i hat chajosaj taq itz'ihy rehtalil i q'aq'inik chinaah i tinamit Babilonia, eh chaxulej taq aatuun, reh chi nee kichalik i tinamit chub'anariik keh i tinamit re' re'. Eh chak'am cho chikinaah taqe i kireey i aj Ararat, i aj Mini, i aj Askenaz, chapab'aa' taq jino'q, k'amal rub'eeh i q'aq'inik, chak'am taq chaloq i ruk'ihaal kawáyu, xa je' chik ruk'ihaal nimaq chili'l.28Chaq'or taq keh i nimaq tinamit chi chaloq kian reh i tinamit Babilonia. Chaq'or taq keh i kireey i aj Media, i k'amal b'eeh, i ki itaaq'anik sut i wach ak'al, inki.29Re' i Jeremías je' wili i xuq'or: Re' taqe i aj q'aq'ineel xan k'uyu'jik chik ak'al naa kianam noq naa rojiik eloq wach i ruyejaam cho wach i QaJaaw re' chi naa rukanaam i tinamit Babilonia chi xan tz'irik chik paam.30Re' taqe i ki soldado i aj Babilonia naa kikanaam i q'aq'inik, naa kikahniik chupaam i kiye'aab' naa ruk'uhliik i kaansil, naa kikahniik chi xa je' chik taqe ixoq. Eh naa ruchopariik naah i kitinamiit, eh re' i kipaat naa rukojariik ruq'aq'al.31Eh xa kitahqeem chik kiib' i aj taqareel noq naa rojiik kiq'orom reh i kireey i aj Babilonia chi xchoparik chik naah i rutinamiit.32Re' taqe i aj ixowaal naakitz'apam paam i b'eeh chu'nchel naa kikojom ruq'aq'al imb'aan wii' i ko'linik iib'. Eh re' i ki soldado i aj Babilonia ma' k'isiin ta naa kiyo'jiik.33Ruum re' i QaJaaw Dios nim rajaawriik, ki Dios i aj Israel je' wili i xuq'or: Re' i tinamit Babilonia xailook' chik insacharik wach, je' rukab' i trigo k'achi' ruq'anb'iik i wach xailook' chik inq'ojarik paam chi chee', inki.
34Re' taqe i aj Sión je' wili i naa kiq'orom: Re' i Nabucodonosor kireey i aj Babilonia xusachib'eej wach i chib'ih qeh, xukanaa' chi xa je' jino'q pulato ma' xta paam. Eh re' chik i reh xinujisaj riib', je' rukab' noq i runujisaj riib' i qaman josq'laj chikop. Eh xoj resaj reje panqatinamiit.35Yu'naak aj re' naa kitojom wach i tinamit Babilonia ruum re' i kireey xkesaj i qajaawriik, eh ruum chi xkian ti' k'axik qeh. Eh re' kaansanik xub'an qeh naa kitojom wach chu'nchel i aj Caldeo, inko'q taqe.
36Re' i QaJaaw Dios je' wili xuq'or keh i aj Israel:
Re' hin naa nuq'ajam wach keh i ki-ixowanik taq awach i xkian taq aweh. Eh naa nuchiqsam taqe i raasb'al ha', taqe i nim ha' wilkeeb' paruyuq'ul i Babilonia.37Naa ruyojib'iik, naa rusachariik wach, naa rukahniik chi kiye'aab' xojb', ma' awach ta chik i naa rupatiniik chupaam. Eh ma' k'isiin ta naa kiyo'jiik awach i naa kilwiik reh.38Re' taqe i aj Babilonia naakik'erem kichii' ruum i ti' naakik'ulum, xa je' chik rukab' noq i ruk'er chii' i nimlaj b'ahlam, oon rak'uun b'ahlam.39Eh noq naakitz'ab'iik je' naa k'ah laj ha' i naa nuye'em keh chi uuk'jik, je' na naakixohk'riik, naa ruyojiik kina'ojb'al, je' na naakiqajik chi suq laj wirik, ma' jaruuj chik naa runa'lojiik keh.40Re' hin naa nukansam taqe je' rukab' noq kinkanteesjik, taqe imas tentzun, taqe ixoq kaprax, i imas kaprax noq kik'amarik reje pankanteesb'al, inki i QaJaaw Dios.
41Re' i kitinamiit i aj Babilonia naa rusachariik wach, re' naq i xti wilik rib'iral chupaam chu'nchel i tinamit wach ak'al chi xiik' naah nimaal wach. Yu'naak naa ruchopariik naah, naa kiyo'jiik i aj pan nimaq tinamit ruum i naa ruk'ulum.42Re' taqe i aj Babilonia xa je' chik kikab' i rub'ohl i palaw noq naa ruchaliik i aj ixowaal chikinaah, naa rusachariik kiwach.43Re' taqe i ju'junseht chirutinamiit naa kikahniik chi xan tz'irik chik paam. Eh ma' naa ta chik ruwihiik patineel chupaam, ma' awach ta chik i naa rik'iik ar.
44Re' hin naa rojiik nuq'uchum chupaam i rupaat i tiyoox Bel rub'ihnaal, nik' nimaal i xkik'am reje Babilonia. Re' taqe i tokoom tinamit ma' naa ta chik kichaliik ruuk', eh naa ruq'ehb'iik wach ak'al i tz'aq kotimaj wii' riij.45Re' taq i hat nutinamiit eleen taq cho chi kixilak chako'leej taq riij aak'achariik chuwach i runimaal i nujosq'iil naa nuye'em cho chikinaah.46Maa yohb'isaj taq awiib' ruum i ti' k'axik naa taq ab'iram rib'iral chupaam i tinamit eh chupaam i ju'jun chi haab' xa reh reh wach i ti' k'axik naa rib'irjiik, naa rib'irjiik chi k'ahchi' ikaansanik chupaam i tinamit. Eh naa kitoq'aam peleto chikiwach i ajaab'ees.47Eh ponik reh i q'iij chi naa nuye'em panti' k'axik i tinamit Babilonia je' wo' taqe i kitiyoox. Re' taqe i kitinamiit naa kikahniik chi ma' xta chik kajaawriik, aha' ta chik ma' naa rukahniik tuuch' i kiti'jolal.48Re' taqe i wilkeeb' pan taxaaj i wilkeeb' wach ak'al ma' k'isiin ta naa rusuqb'iik kik'ux noq naakilom chi naa rusachariik wach i tinamit Babilonia. Re' noq naa kichaliik pantz'eet reh i rookb'aal i q'iij i naa rusachwiik wach.49Re' i tinamit Babilonia naa rusachariik wach ruum i kikanteesjiik i aj Israel xub'an, ruum ikaansanik xub'an chi junsuut i wach ak'al, inki QaJaaw Dios.
50Re' taq i hat naa taq ako'leem awiib' chuwach i kimik, naa taq amolom chi elik, ma' aha' ta chik taq nee tipahiik. Eh i ruk'ul chi naa taq akapaam i QaJaaw Dios, eh chi naa ruk'uliik taq panak'ux i tinamit Jerusaleem.51Re' hoj q'e' qoh k'ixik noq qohkib'aj. Eh xan qatz'ap chik i qawach ruum qak'ixiik, ruum re' taqe i tokoom tinamit xi okik chupaam i Santolaj ye'aab' wilik parupaat i qaDios, tiko'q taq.
52Re' i QaJaaw Dios je' wili i xuq'or: Re' hin xailook' i nuyeew taqe panti' k'axik i aj Babilonia, je' wo' taqe i kitiyoox. Eh chupaam i kitinamiit naakik'erem kichii' taqe i naa kiq'ojib'iik.53Atoob' ta naq inche neenjohtik kopan taxaaj chi keb'anik riib' i tinamit Babilonia. Re' hin xa nee wo' i nutaq'aaj reje i aj ixowaal reh chi ar neenooj sacharoq wach, inki Dios.
54Naa rib'irjiik noq re' taqe i aj Babilonia naakik'erem kichii' chi oq'ik, ruum i ti' naakik'ulum, ruum chi naa rusachariik wach i kiye'aab' i aj Caldeo.55Ruum re' i QaJaaw Dios naa rusacham kiwach i aj Babilonia, naa resam i runimaal kiwach. Re' taqe i aj ixowaal yohb'aal wach i kijosq'iil noq naa ruk'uliik iloq chikinaah, xa je' chik rukab' i rub'ohl i palaw.56Re' keh naa kisacham wach i aj Babilonia, naa ruchopariik i ki soldado kow kiib'. Eh re' i kiflecha naa wo' kitoqib'eem, ruum re' i QaJaaw naa ruye'em taqe chi tojariik i kimahk je' rukab' i ruk'ul chi keh.57Re' i Reey i QaJaaw Dios nim rajaawriik, je' wili i ruq'or: Re' hin naa nuxohk'risam taqe i k'amal kib'eeh i aj Babilonia, taqe i wilik kina'ojb'al, taqe i k'amal rub'eeh tinamit, taqe i nimaq wach kikamaj, taqe i ki soldado. Eh naa nuqasam i kiwiriik ma' jaruuj chik naakik'raam kiib'.58Re' hin i Dios nim wajaawriik, i nuq'or chi re' i nim wach tz'aq kotimaj wii' riij i tinamit Babilonia naakich'ahaam wach ak'al i aj ixowaal. Eh re' taqe nimaq taq puerta naa ruqopariik ruq'aq'al, naa rojiik wach ak'al i kamanik kianam i k'ihset chi tinamit, xa q'aaq' naa rusachwiik wach kikamaj, inki.
59Eh kijib'-oq chik haab' rokiik chi reyil i Sedequías Judá, re' i Jeremías jalal ruq'oral i Dios xuyeew jinaj i taqarik reh i Seraías rak'uun i Nerias riih i Maasías. Re' i Seraías ruch'ihil i reey Sedequías noq xooj Babilonia, re' reh xyej-anik reh aha' inwirik i reey.60Re' i Jeremías rutz'ihb'aam chik chupaam i jumb'oht chi huuj taqe i xq'orarik chi riij i tinamit Babilonia. Re' chi naa ruchaliik i runimaal ti' k'axik chinaah, re' chu'nchel i tz'ihb'amaj chi naa ruk'ulum.61Re' i Jeremías je' wili xuq'or reje reh i Serarías: Noq naa aponiik Babilonia kow chawil wach chu'nchel taqe i q'orik tz'ihb'amaj chupaam i jumb'oht chi huuj.62Eh je' wili i aatiij naa a'nam: QaJaaw Dios re' hat xat q'orik chi naa asacham wach i tinamit wili, reh chi ma' naa ta chik rub'aan patinik chupaam, ni xata naq chik chikop i naa ruwihiik chupaam, ruum re' hat naa akanaam chi xan tz'irik chik paam chi jumpech, tiko'q.63Eh re' jumb'oht chi huuj wili neenab'ak' chuwach jino'q ab'aj neenakut qohoq chupaam i nim ha' Éufrates.64Eh je' wili i neenaq'or: Je' aj wili noq naa rumuhqiik naah i tinamit Babilonia, ma' jaruuj chik naa reliik chupaam i ti' k'axik naa ruye'ariik chinaah ruum i Dios, tiko'q, inki. Ayu' xkuxik wach i ruq'oral i Jeremías. Re' noq xwihik chi reyil i Sedequías (2 Rey 24.18-20; 2 Cron 36.11-16)
1Re' i Sedequías jinaj ru ka'winaq haab' i wilik reh noq xokik chi reyil ar Jerusaleem, eh junlaj haab' xwihik chi reyil. Eh re' i rutuut Hamutal rub'ihnaal rixq'uun Jeremías jinaj chik aj Libna.2Re' i Sedequías xa re' i yiib' wach na'ojb'al xub'an chuwach i QaJaaw Dios, je' rukab' i xub'an i reey Joacim.3Ruum aj re', re' i QaJaaw Dios xchalik rujosq'iil chikinaah i aj Jerusaleem, i aj Judá, xuq'eb' taqe chi riij ruk'ux. Re' i reey Sedequías xuq'etwachej riib' chuwach i kireey i aj Babilonia. Re' noq xsacharik wach i tinamit Jerusaleem (2 Rey 24.20—25.7; Jer 39.1-7)
4Eh pan rulajeeb' rub'eeh i ru lajeeb' poh reh i rub'eleej haab'rokiik chi reyil i Sedequías ar Judá. Re' i reey Nabucodonosor ruch'ihil taqe chu'nchel i ru soldado xi chalik chi q'aq'inik chinaah i tinamit Jerusaleem xkikotej riij. Eh xkiyejaa' i kiye'aab' chi junsuut reh chi ar naa kianam cho reh.5Eh ar xi wihik chi junsuut i tinamit Jerusaleem chuwach i kiib' haab' korehtaal xub'an i junlaj haab' chi reyil i Sedequías.6Eh parub'eleej q'iij reh i rukaaj poh reh i rujunlaaj haab'rokiik chi reyil i Sedequías, xooj chi nimaal i wi'jaleel chupaam i tinamit re' re', ma' ha' ta chik inkireq kiwa' i tinamit.7Eh noq kotimaj kiij kuum i ki soldado i aj Babilonia. Re' i reey Sedequías ruch'ihil taqe i ru soldado xkiteh reje jinaj i kiik'b'aal chupaam i tz'aq kotimaj wii' riij i Jerusaleem, ar xi elik reje. Eh xi elik reje chi chii' i puerta wilik panyejaal i tz'aq, ma' najt ta ruuk' i tikooj wii' i ruhtz'uub' i reey, eh xkik'am qohoq i b'eeh wach k'ixkaab' chi chii' i nim ha' Jordán.8Eh re' taqe i ru soldado i kireey i aj Babilonia xkitahqeej reje korehtaal xponik kireq i reey Sedequías wach k'ixkaab' Jericó. Eh xq'eb'arik kahnoq kuum taqe i ru soldado.9Eh ar xkichop i reey Sedequías, xkik'am reje chuwach i kireey i aj Babilonia ar Ribla wilik paruyuq'ul i Hamat. Eh xuq'at i q'orik chinaah i reey Sedequías.10Eh chuwach i Sedequías xyok'arik i kalaq i rak'uun rixq'uun ruum i Nabucodonosor ar Ribla, xukansaj taqe i k'amal kib'eeh i aj Judá.11Eh re' kireey i aj Babilonia xresaj kab'chel i naq wach, reey Sedequías b'ak'lik i q'ab' chi riij chi karena noq xk'amarik reje Babilonia ar xkojarik prexo korehtaal xkimik ar. Re' noq xsacharik wach i rupaat i Dios ar Jerusaleem (2 Rey 25.8-21; 2 Cron 36.17-21; Jer 39.8-10)
12Eh pan lajeeb' rub'eeh i roo' poh reh i rub'elejlaj haab' rokiik chi reyil i Nabucodonosor Babilonia, re' Nabuzaradán raj kamanoom i reey chi k'amal kib'eeh i soldado xponik ar Jerusaleem.13Re' reh xuk'at i rupaat i Dios, je' wo' hoq i paat i rub'an wii' i taaq'anik i reey. Eh xuk'at taqe i paat chupaam i tinamit, je' wo' taqe i kipaat i xa atoob' wach kik'ux.14Re' i Nabuzaradán ruch'ihil taqe i ki soldado i aj Babilonia xkituhb'aaj wach ak'al i tz'aq kotimaj wii' riij i tinamit Jerusaleem.15Re' i Nabuzaradán xuk'am reje Babilonia i tinamit nik' kik'ihaal i koxikahnik Jerusaleem, je' wo' taqe i xkiq'asaj kiib' chi kixilak i ki soldado i aj Babilonia, xuk'am wo' taqe reje chu'nchel i tinamit.16Eh re' Nabuzaradán k'amal kib'eeh soldado, xa re' wo' chik xukanaa' pan tinamit Judá i kok'neb'aa', eh xuyeew kiye'aab' reh chi xkitik ki uuva.
17Re' taqe i aj Babilonia xkixereb'eej i kulk, i xa chib'ih chik jariik re' ruuk' q'an ch'ihch' wilkeeb' parupaat i Dios. Eh je' wo' i nimaq pilalix, i ch'ikaab' reh i molb'al ha', i xa chib'ih chik jariik re' ruuk' q'an ch'ihch' xkik'am reje Babilonia.18Eh xkik'am wo' reje taqe i molb'al chaaj, taqe i likb'al, taqe i nimaq taq xun, taqe i nimaq taq cucharo, xkuxik kik'amam reje chu'nchel i kulk, je' wo' hoq i xa chib'ih chik jariik i re' ruuk' i q'an ch'ihch' inkamanik chupaam i rupaat i Dios.19Re' k'amal kib'eeh soldado xuk'am reje Babilonia i re' ruuk' i oro, re' ruuk' plata re' taqe i wili: Re' i likb'al ha', re' i ye'aab' nah wach q'aaq', re' i nimaq kulk, re' i molb'al chaaj, re' i ye'aab' kantela, re' i nimaq cucharo, re' i kulk impajarik wii' i riis uuva inye'arik chi mayiij.20Re' taqe i kiib' chi pilalix, re' i nimlaj molb'al ha', re' taqe i kab'laj chi imas wakax re' ruuk' i q'an ch'ihch', i ch'iklik wii' i molb'al ha', re' taqe i flecha, re' ruyejaam chaloq i reey Salomón chi naa rukahniik parupaat i Dios, re' taqe re' ma' pajooj taj i kahliil ruum q'an ch'ihch' korjinaq wii'.21Re' i kiib' chi pilalix laj taq b'ara rooq, re' i runinqaal kipaam ach k'isiin ma' wuqtaq b'ara, eh re' i runimaal i q'an ch'ihch' chikiij kaj taq q'ab', eh hoop kipaam i pilalix re' re'.22Re' taqe i kiib' chi pilalix re' re' ik'inaq ixib' b'ara i kiju' b'otooj riij chi q'an ch'ihch' xoyimaj i kiju' chi tolotaq je' kiwach chee', eh q'an ch'ihch' korjinaq wii', eh elik wach i b'anooj keh kab'chel.23Eh ach kijib' ma' jinaj siento chi tolotaq chi je' wach chee' wilik chi junsuut i kiju', eh jinaj siento i xa jinaj kimolom wii' kiib'.
24Re' i Nabuzaradán k'amal kib'eeh soldado xuchop i Seraías rajaaw i k'amal kib'eeh i aj tiij, ruch'ihil i Sofonías rukab' k'amal kib'eeh aj tiij, kuch'ihil ixib' chi winaq kicha'jinik reh i rupaat i Dios.25Eh xuchop haa' taqe i wilkeeb' Judá, eh xuchop ink'amwik kib'eeh i soldado, je' wo' taqe i wuquub' chi winaq i kib'anik naq reh rutaqariik i kireey i aj Judá, ar xkireq pan tinamit. Eh xuchop wo' haa' i winaq i molwik kiwach i winaq reh ojik chi soldado hiil, xuchop wo' taqe i oxk'ahl chi winaq xkireq ar pan tinamit.26Eh re' i Nabuzaradán k'amal kib'eeh soldado chu'nchel taqe re' xuk'am reje chuwach i kireey i aj Babilonia wilik ar Ribla.27Re' i kireey i aj Babilonia ar xkuxik taqe rukansam i aj Judá re' re' ar Ribla wilik chupaam i ruyuq'ul i Hamat. Je' re' noq xi k'amarik reje pan tokoom tinamit i aj Judá.
28Re' taqe i tinamit wili xi k'amarik reje ruum i Nabucodonosor noq wuquub' haab' rokiik chi reyil je' wili kik'ihaal: ixib' miil ruuk' ixib' ru ka'winaq chi aj Judío.29Eh noq waxaqlaj haab' chik rokiik chi reyil xuk'am taqe reje i waxiqiib' siento ruuk' kab'laj ru ka'winaq chi aj Jerusaleem.30Eh noq ixib' ru ka'winaq haab' rokiik chi reyil, re' i k'amal kib'eeh soldado Nabuzaradán xuk'am wo' chik taqe reje Babilonia i wuquub' siento ruuk' ho'oob' roxk'ahl chi aj Judío, Chu'nchel i xi k'amarik reje Babilonia xponik kijib' miil ruuk' waqiib' siento (4,600) chi tinamit. Re' i Joaquín x-ehtesjik prexo, eh xye'arik ruloq'il ar Babilonia (2 Rey 25.27-30)
31Eh noq ho'oob' ru ka'winaq rub'eeh i ruka'b'laj poh reh i wuqlaj ru ka'winaq haab' ruk'amariik reje prexo i Joaquín ar Babilonia, re' i xwihik cho chi reyil ar Judá, chupaam i peet haab' rokiik chi reyil ar Babilonia i Evil-merodac. Re' reh xuketelaaj wach i Joaquín xresaj chi prexohjik.32Eh xuq'oreej panotob'il, xa re' wo' reh q'e' xuk'ax chuwach taqe i reey wilkeeb' ruuk' ar Babilonia.33Je' re' noq xresaj i ruso' prexo chi riij i Joaquín, eh jinaj inki a'n wii' kiwa' nah mexa ruuk' nik' chik najtiil xk'acharik.34Eh eqal eqal inye'arik reh ruum i kireey i aj Babilonia aha' wilik i ruk'uxlaaj wii' riib', je' re' i xb'aan reh nik' najtiil xk'acharik ar korehtaal chik xkimik.

Bible Society in Guatemala

https://app.library.bible/content/695aa4b9f902778f

expand_more
chevron_leftNakaraang Kabanata
chevron_rightSusunod na Kabanata