Read ISAIAS 1

ISAIAS1

¹Re' hin Isaías hin rak'uun i Amoz xk'uhtjik weh panusaq wiriik ruum i Dios chib'ih i naakik'ulum i aj Judá, i aj Jerusaleem. Re' noq xk'uhtjik cho weh i re', re' noq xi-ik'ik cho chi reyil ar Judá i Uzías, Jotam, Acaz, i Ezequías.

²Chab'iraj i hat taxaaj, je' wo' hat wach ak'al, re' QaJaaw Dios je' wili i xuq'or: Re' hin xnuk'isaj taqe i wak'uun wixq'uun korehtaal xi k'ihaaxb'ik, eh re' keh xkikanaa' nunimjiik.³Re' i b'ooyax reh, reht'al wach i rukoo', eh re' i b'uurux reht'al aha' inketarik. Eh re' i nutinamiit Israel reh ma' nkiyeew ta wajaawriik i hin, ma' nkireq ta chi riij.

⁴Q'e' ti' taq i naa ak'ulum i hat tinamit aj mahk, xa re' i yiib' wach na'ojb'al taq i na a'n. Hat taq kak'uun kixq'uun chaloq i yiib' wach kina'ojb'al. Xinaq'eb' taq chi riij ak'ux i hin, hin taq aaWaJaaw aaDios wilik nuSantohiil, xajosaj taq wach i nujosq'iil.⁵¿Chib'ih reet noq ma' tinimanik ta taq? ¿Mi konawaaj taq re' chi naa rub'aan ti' k'axik taq aweh? Xanaah re' ti' taq chik wilik awánima, je' wo' chu'nchel taq ati'jolal.⁶Xelik taq chaloq koju' aawooq, eh koxponik taq yejal anaah, ma' xta chik taq awotob'il, je' naa hopeel, je' naa sipjinaq, je' naa tolin q'aah, ma' awach ta taq iniq'omanik aweh inkojwik aseite chuwach.⁷Re' taq aatinamiit xkahnik chi ma' xta chik i wilik chupaam, k'ahchi' ruk'ahtiik. Eh re' taqe i tokoom tinamit panaq'awach taq inkik'ux i wach atik, re' taq aaye'aab' xkahnik chi ma' xta chik wilik chupaam.⁸Eh ach wo' re' i tinamit Sión xkahnik chi ma' xta xuk'ul, atoob' ta sutimaj riij kuum i nixowanik wach. Ach wo' re' reh xkahnik chi je' rukab' i perpat cha'jalb'al reh i uuva, cha'jalb'al reh i melon.⁹Eh wita ma' xukanaa' chik kiib' ixib'-oq i qatinamiit i QaJaaw Dios nim rajaawriik, najtir naq chik insahchik qawach. Je' rukab' noq xsacharik cho kiwach taqe i aj Sodoma, taqe i aj Gomorra. Re' xti manlik yot'oj k'uxliis chi riij i mahk¹⁰Re' taq i hat k'amal kib'eeh i aj Jerusaleem i je' taq akab' i aj Sodoma, i aj Gomorra. Chab'iraj taq i ruq'or aweh i QaJaaw Dios, chab'iraj wo' taq i ruk'uhb'aal.¹¹Re' QaJaaw Dios je' wili i xuq'or: Re' hin ma' xta kamaj weh i ma' k'isa mayiij i nak'am taq cho chi nuwach, xinq'uhtik chik reh i k'atoj imas tentzun, i kixeb'ohiil i q'ina' laj chikop. Eh ma' nwaaj ta chik chi nee taq i nayeew chi amayiij i rukik'eel b'oyax, i rukik'eel tentzun, i rukik'eel imas kaprax.¹²¿Awach taq inq'orik aweh chi nchalik taq ayeew chi amayiij chi nuwach taqe re'? ¿Chib'ih reet noq inchalik taq ach'uwarisaj paam i nupaat ruum taqe re'?¹³Re' hin ma' nwaaj ta chik chi nee taq i nak'am chaloq i mayiij chi nuwach xama' xta nokik wii'. Re' i rusib'eel i insensia ma' suq ta i rub'an weh. Re' runinq'ijiik i ak' poh, i hi'limb'al q'iij, ruch'ihil i moloj iib' taq i na a'n, ma' imponik ta chi nuwach.¹⁴Re' hin ma' nwaaj ta wach i runinq'ijiik i ak' poh, i moloj taq awiib' i na a'n. Re' taqe re' ma' suq ta i rub'an weh, xama' nukuy ta chik taqe i yiib' wach na'ojb'al taq i na a'n re' re'.¹⁵Eh noq nee taq inajosaj chaa q'ab' chub'anariik taq atiij, re' hin xama' nee ta wo' taq ti wilow qohoq. Atoob' ta ma' k'isatiij taq i neena a'n. Xa ma' naa ta wo' taq kaat b'iram, ruum ma' k'isiin taq aawas achaaq' akansam.¹⁶Chasaqb'isaj taq wach awánima, cha kanaa' taq chi ma' xta chik ruch'uwa'iil wach, reh chi ma' nee ta chik taq i na a'n i yiib' wach na'ojb'al.¹⁷Chatijej taq rub'aan i holohik, re' taq cha a'n i ruk'ul chi b'anarik. Eh chawunej taq i chib'ih aweh taqe i neb'aa', korik-oq taq wach ak'ux kuuk' i ma' xta kituut kajaaw, chatoob'eej taqe kamnaq kib'ahiil, inki.

¹⁸Eh re' QaJaaw Dios je' wili i xuq'or: Kim taq wuuk' chi jumehq'iil, qayejaa' taq wach aak'axkiil. Atoob' ta xa ch'uwa' taq chik wach awánima ruum amahk, re' hin neenukanaa' chi xa je' chik saqpotz'ik laj suutz', atoob' taxiik'naah kaqiil, re' hin neenukanaa' chi xa je' chik saq laj nooq'.¹⁹Wila' xanimaj taq i nuq'or, naa taq a'nam rusuqkiil i kiwach i tik i nelik wach ak'al.²⁰Eh raaj wila' ma' xanimaj taq, naa taq kaat kikansam ruuk' q'aslaj ch'ihch' i ki-ixowanik taq awach, inki i Dios. Re' Dios xuq'or chi naa resam i ch'uwa' wach na'ojb'al chi kixilak i aj Jerusaleem²¹Re' taq i hat pampeet korik naq taq wach ak'ux, re' naq holohik, i ruk'ul chi b'anarik taq i na a'n. Eh yu'naak xat sutinik taq chi je' akab' taqe ixoq inkik'ayej kiib', eh xa re' taq chik i kaansanik i na a'n.²²Eh je' naq taq akab' i plata, yu'naak je' taq chik akab' i sohk', eh je' naq taq akab' holohik laj riis uuva, eh yu'naak je' taq chik akab' i riis uuva xilakimaj ruuk' jot'ik.²³Re' taqe i wilkeeb' chi taaq'anik taq cha naah, ma' kinimanik taj, inki a'n jinaj kiwach kuuk' i ajileq', eh inkik'ayej kiib'. Eh inkaaj chi wilik i naa rusijiik keh, ma' kitob'eej taj i ma' xta kituut kajaaw, je' wo' taqe ixoq kamnaq kib'ahiil.²⁴Re' i QaJaaw Dios nim rajaawriik, chinaah i tinamit Israel, je' wili i ruq'or: Manlik taq i xa a'n weh Re' hin naa taq nuye'em i nujosq'iil cha naah taq i hat i ti ixowanik nuwach, naa nuq'ajam taq wach aweh i xa a'n taq weh.²⁵Re' hin naa nuq'atam i q'orik taq cha naah, naa wesam i ruch'uwa'iil taq awach, je' rukab' noq i nelik i ruch'uwa'iil wach i plata.²⁶Re' hin naa wo' chik nupab'aam taqe i q'atal q'orik, je' rukab' i pampeet, je' wo' taqe i kojol na'ojb'al, je' rukab' i najtir. Eh je' wili i naa ruq'orariik taq chawiij: Re' i tinamit re' re' korik wach kik'ux, eh holohik i kina'ojb'al, inko'q taqe.²⁷Eh ruum chi re' hin korik wach nuk'ux, naa nuko'leem taqe i aj Sión, naa wesam taqe panti' k'axik, naa wo' chik kiin kinimam.²⁸Re' taqe i ma' naa ta kinimaniik weh, re' taqe i aj mahk naa nusacham kiwach, eh re' taqe i naa kiinkiq'eb'em chi riij kik'ux, naa wo' kikimiik.²⁹Re' taq i hat naa taq ak'ixiik noq naa taq awilom wach taqe i chee' tz'inuj, taqe i ye'aab' inatik taq wii' aawuhtz'uub', re' imponik taq chawach, re' naq inaloq'ej taq wii' i tiyoox.³⁰Eh re' taq i hat, naa taq akahniik chi je' taq akab' i tz'inuj noq inchiqik i xaq. Eh chi je' taq akab' i uhtz'ub' ma' inkojarik ta ruha'iil.³¹Eh re' i kow riib' je' rukab' i k'im, re' taqe i yiib' wach i rub'an je' rukab' i ruk'oxb' q'aaq', eh ruuk' i re' junk'ahtiik taqe wach q'aaq', re' q'aaq' ma' jaruuj chik naa ruchuhpiik, inki i Dios. Re' i Dios xuq'or chi naa ruye'em taqe pansuqkiil k'uxliis i tinamit (Miq 4.1-3)

¹Re' wili xk'uhtjik reh parusaq wiriik i Isaías rak'uun i Amoz, chi naakik'ulum i aj Judá, i aj Jerusaleem.

²Je' wili i xq'orarik reh: Naa ruponiik i q'iij noq re' manlik rupaat i QaJaaw Dios wilik chinaah i yuuq', re' re' naa ruwihiik runimaal wach chikiwach chu'nchel i nimaq kiwach. Eh re' i tinamit sut i wach ak'al naa kojiik chi rilariik.³Eh re' i tinamit je' wili i naa kiq'orom: Qoh johtoq chinaah i yuuq' wilik wii' i rupaat i QaJaaw, re' i ruDios Jacob. Eh neeruk'uhtaaj qeh i rub'eeh, eh neenqak'am naah i nee ruq'or qeh, inko'q taqe. Ruum ar Sión naa reliik chaloq i ruk'uhb'aal i Dios, eh Jerusaleem naa reliik chaloq i ruq'oral.⁴Eh re' reh naa ruq'atwiik i q'orik chikinaah i nimaq tinamit, i ruq'il i kok' i tinamit. Re' i kiq'aslaj ch'ihch', naakisutem chi arado, re' i kiq'as ju' ch'ihch' naa kisutem chi macheet. Ma' naa ta chik kojiik chi kansanik ruuk' ruq'aslaj ch'ihch' pan tokoom tinamit, ma' naa ta chik kitijem i q'aq'inik.⁵Chab'iraj taq i hat, rak'uun rixq'uun i Jacob, qoh wih-oq taq parusaqumaal i QaJaaw Dios. Re' i rub'aan i ti' k'axik keh i yiib' wach kina'ojb'al⁶QaJaaw Dios re' hat xakanaa' aatinamiit, re' taqe i rak'uun rixq'uun i Jacob, ruum inki a'n taqe i yiib' wach na'ojb'al, inchalik parelb'aal q'iij. Eh inkiq'ijej kiib' je' rukab' inki a'n i aj filisteo, eh inki a'n jinaj kiwach kuuk' i tokoom tinamit.⁷Eh re' i kitinamiit nujinaq chi plata, nujinaq chi oro, eh xiik' naah k'ihaal i k'ih taq tz'aaq wilik keh. Eh ma' k'isiin i kikawayu, i kikareta wilik.⁸Eh re' i kitinamiit nujinaq paam chi tiyoox. Re' xan kiyeew chik kik'ux chulooq'jiik i ki dios xa re' keh xitz'aqwik reh ruuk' kiq'ab'.⁹Re' keh inkixuk'aa' kiib', inkiloch' kiib' chulooq'jiik i ki dios re' re'. Re' hat QaJaaw Dios maakuy chik kimahk.¹⁰Re' i tinamit naakikeb'aam kiib' pantaq paat ab'aj, pantaq jul. Ruum naa kiyo'jiik ruum i rujosq'iil i runimaal wach i ruloq'il i QaJaaw Dios.¹¹Re' i nimaq kajaawriik naa ruloch'ariik kinaah, eh re' taqe i kow kiib' naa rehtesjiik i runimaal kiwach. Eh xa re' chik i QaJaaw Dios naa ruk'uhtaam i runimaal wach.¹²Re' QaJaaw nim rajaawriik naa ruponiik i q'iij noq naa resam i runimaal kiwach i wilik kajaawriik, i yiib' wach kina'ojb'al, je' wo' taqe i kow kiib'.¹³Eh naa resam i runimaal kiwach inkikapaaj chi je' kikab' inajt kinaah chee' chakaltee' ar Líbano. Eh chi je' kikab' inajt kinaah tz'inuj ar Basán.¹⁴Naa resam i runimaal kiwach i nimaq kiwach, inkikapaaj chi je' kikab' taqe i yuuq' najt kinaah.¹⁵Eh naa wo' resam i runimaal kiwach inkikapaaj chi je' kikab' inajt kinaah tz'aq, eh chi je' kikab' i kowlaj koraal tz'aq.¹⁶Naa kesam i runimaal kiwach inkikapaaj chi je' kikab' i b'ehlb'al kihq i aj Tarsis, eh chi je' kikab' taqe i holohaq barco.¹⁷Re' i QaJaaw Dios naa resam i runimaal kiwach i wilik kajaawriik, i kow kiib'. Eh xa re' chik i QaJaaw Dios naa ruk'uhtaam i runimaal wach chupaam taqe i q'iij re' re'.¹⁸Eh naa rukuxiik rusacham kiwach chu'nchel i tiyoox.¹⁹Chupaam taqe i q'iij re' re', yohb'aal wach i ti' k'axik naa ruye'em chinaah i wach ak'al i QaJaaw Dios, re' i tinamit naakikeb'aam kiib' pantaq paat ab'aj, pantaq jul ruum ma' naa ta kikuyum, i runimaal wach, i ruloq'il i QaJaaw Dios.²⁰Eh chupaam taqe i q'iij re' re', re' i tinamit naa kikutum reje chuwach i ch'ooh, chuwach i chikop tz'uhumxik' i kitiyoox re' ruuk' i oro, i plata chi naa kiloq'em.²¹Eh noq naa rub'anam i q'ataj q'orik i QaJaaw Dios chinaah i wach ak'al, re' i tinamit naakikeb'aam kiib' pantaq paat ab'aj, pantaq nimaq jul. Ruum ma' naa ta kikuyum rilariik i rujosq'iil i runimaal wach, i ruloq'il i QaJaaw Dios.²²Eh maayeew taq chik ak'ux chikinaah i xa winaq, ruum re' keh xa reh junk'aam i kik'achariik. Eh ¿Chib'ih reet noq q'e' taq i nayeew kiloq'il? Re' Dios naa ruye'em i ti' k'axik chikinaah i aj Jerusaleem, i aj Judá¹Chab'iraj taq, re' i QaJaaw Dios nim rajaawriik, naa risam chu'nchel inkich'ikaa' wii' kik'ux i aj Jerusaleem, i aj Judá. Naa resam i k'uxumb'al keh chi kiwa' chi kihaa'.²Naa resam i winaq kow riib', i aj q'aq'ineel, i aj q'atal q'orik, i jalal ruq'oral i reh, i aj q'iij, i aj k'amal b'eeh.³Naa resam intaaq'anik keh i lajeeb' roxk'ahl chi soldado, i nim wach, i kojol na'ojb'al, i insik'wik chi riij i ch'umiil, i aj war.⁴Eh kok' k'ijool chik i naa nukojom chi k'amal kib'eeh reh chi re' chik i keh naa rutaaq'aniik keh.⁵Re' i tinamit k'ul naa kitoq'aam peleto chikiwach, ruuk' i kika'jaah kik'ula't. Re' i k'ijolaq naa kitoq'aam peleto kuuk' i mama' winaq, re' i ma' xta kina'ojb'al naa kitoq'aam peleto kuuk' i wilik kina'ojb'al.⁶Eh parupaat i kajaaw, je' wili i naa kiq'orom reh i chaaq'b'ees: Re' hat ko wilik aso' neerub'an chi, re' chik i hat nee ti taaq'anik chinaah i qatinamiit wili k'ahchi' rik'iik panti' k'axik, inko'q taqe.⁷Eh re' i aasb'ees je' wili i naa ruq'orom: Re' hin ma' nee ta nub'an rilariik i tinamit wili, ruum ma' xta nuwa' nuhaa', ma' xta nuso' panupaat. Maa kinakoj taq chi taaq'anik chinaah i tinamit wili, inko'q.⁸Re' taqe aj Jerusaleem, taqe aj Judá ilook' insahchik kiwach, ruum re' inki a'n inkiq'or ma' imponik ta chuwach i QaJaaw Dios. Ruuk' taqe re' inkesaj i ruloq'il.⁹Re' keh xa panaq'kiwach ink'utinik chi yiib' wach i k'ahchi' keeb'. Eh ma' nkikeb'aa' taj i kimahk, je' rukab' inki a'n chaloq i aj Sodoma, ruum i re' q'e' ti' i naakik'ulum. Ti' k'axik k'ahchi' kik'amam chaloq chikinaah.¹⁰Eh re' taqe i korik wach kik'ux naakeliik korik, eh naa kianam rusuqkiil i kikamaj.¹¹Eh re' taqe i yiib' wach kina'ojb'al keh q'e' ti' i naakik'ulum ruum naakik'ulum jilow i yiib' wach inki a'n¹²Re' i nutinamiit kok' ak'un i kow kitaaq'anik chikinaah, eh ixoq taqe ink'amwik kib'eeh. Re' taq i hat nutinamiit, xak'ahchi' taq kaat kijot'om i kik'amwik taq ab'eeh, tikesaj taq chupaam i korik laj b'eeh.¹³Re' i QaJaaw Dios ruyejaam chik cho riib' chi ruq'atariik i q'orik, chuye'ariik panti' k'axik i rutinamiit.¹⁴Re' i QaJaaw Dios naa ruq'atam i q'orik chikinaah i k'amal b'eeh, chikinaah i ajaab'ees. Je' wili i naa ruq'orom keh: Re' taq i hat xa a'n taq ti' k'axik keh i nutinamiit, xa q'uch taq i wach i kitik i neb'aa', i nayeew taq panapaat.¹⁵Eh re' taq i hat ¿Chib'ih reet noq i na a'n taq i ti' k'axik keh i nutinamiit? ¿Chib'ih reet noq inayeq' taq panak'al taqe i neb'aa'? inki i QaJaaw Dios nim rajaawriik. Re' i ti' k'axik naa ruchaliik chikinaah taqe ixoq wilkeeb' Sión

¹⁶Re' i QaJaaw Dios je' wili i xuq'or:
Ruum chi re' taqe ixoq wilkeeb' ar Sión, xankinimb'isaj chik kiib', xankijab'aa' chik i kiwach, xankiyejaa' chik inaq'kiwach. Eh xa je' chik soon inki a'n xan tzalajinik chik taqe i xooyb'al reh kooq.¹⁷Re' QaJaaw Dios, naa ruset'em i rismaal kinaah taqe ixoq wilkeeb' Sión. Eh re' wo' i QaJaaw Dios naa ruk'uhtaniik kik'ixb'ilaal.¹⁸Eh chupaam i q'iij re' re', re' QaJaaw Dios naa risam inkixoyej wii' kiib' ixoq, naa resam taqe i xooyb'al ralaq kooq, i xooyb'al yejal kiwach.¹⁹Naa wo' resam i karena chi kalaq, i kika'xikin, i kotokaq ch'ihch' ralaq kiq'ab'.²⁰Eh naa resam i itz'ihy inkikoj wach kinaah, je' wo' inkikoj chi chaq'b'al reh i rismaal kinaah, je' wo' karena ralaq kooq, je' wo' ink'ohnik laj iq'oom inkikoj, je' wo' i xa chib'ih chik jariik inkixoyej wii' kiib'.²¹Eh naa resam taqe i lopq'aaq' inkikoj, taqe i ch'ihch' inkilokaa' chi ki ju'.²²Eh je' wo' i holohaq itz'ihy inkikoj, i kinimaq rooq so', i ma' piim ta laj itz'ihy reh wach kinaah, je' wo' hoq i bolso.²³Eh naa wo' resam i lemow inkikoj, i k'ih taq tz'aaq itz'ihy inkikoj, itz'ihy xanlihik chik.²⁴Eh chi jilow ink'ohnik laj iq'oom xa chuh chik i kiwach naa rub'anam. Eh chi jilow i holohik laj b'ak'b'al kipaam, k'ahaam chik i naa kikojom. Eh chi jilow rujitz'ariik kinaah, johm chik wach i kinaah naa rukahniik. Eh chi jilow i ch'ub'ik wach itz'ihy, q'as wach itz'ihy chik i naa kikojom, chi jilow kiholwochiil naa rukojariik kehtalil ruuk' q'aaq'.

²⁵Re' taqe i winaq inko'linik naq keh, naa kikanteesjiik ruuk' q'aslaj ch'ihch', panq'aq'inik.²⁶Chupaam i q'iij re' re', ma' k'isiin ta naa rutib'iik kik'ux i tinamit re' re', naa kikojom i kiq'eq so' chikiij, naakitzunaam kiib' panak'al.¹Eh chupaam i q'iij re' re', naakik'uhliik i winaq, wuquub' chi ixoq i naa kiq'uchum chikiwach jinaj chi winaq, je' wili i naa kiq'orom reh: Qoh ak'am chi awehk'een, qa a'n kaxáro awuuk' chawesaj i qak'ixb'ilaal, re' hoj nee wo' qasik' qawa' qahaa', i qaso', inko'q taqe. Re' ruq'orariik chi naa kia'nam i suq laj k'acharik i aj Jerusaleem²Eh chupaam i q'iij re' re', re' i QaJaaw Dios jinaj i naa rutz'uhkrisam johtoq, ma' k'isiin ta holwochiil, naa ruwihiik ruloq'il, chi keh i aj Israel ma' naa ta rusachariik kiwach. Eh re' i kitik naa ruye'wiik runimaal kiwach.

³Eh nik' k'ihaal aj Sión, i aj Jerusaleem, ma' naa ta rusachariik kiwach, konaa wo' chik kik'achariik pan kitinamiit. Eh santo laj rutinamiit i Dios naa ruq'orariik keh.⁴Re' QaJaaw Dios noq naa ruq'atam i q'orik, chikinaah i aj mahk. Eh ma' naa ta chik ruye'em q'ab' chi naa kianam i yiib' wach na'ojb'al taqe ixoq aj Sión. Ma' naa ta ruye'em q'ab' chi naa rub'aan ikaansanik Jerusaleem.⁵Eh re' i QaJaaw Dios xuyeew i ruloq'il chinaah i yuuq' Sión, je' wo' chikinaah i kimolom kiib' ar chupaam i ruye'aab'. Pan q'iij q'equm pan suutz' i naa ruye'em cho riib' chikinaah, chaq'ab' xaq q'aaq' naa rusihq'iniik cho keh k'uhtb'al reh chikiwach i ruloq'il i QaJaaw Dios.⁶Eh naa ruye'em chaloq i kimuuj paam q'iij, reh chi naa ruko'leem taqe chuwach i rutz'a'iil i q'iij. Ruuk' i re' naa ruko'leem taqe chuwach i teew jab'. Re' jalwaach q'orik chi riij i uuva

¹Re' hin naa nutz'uyem jinaj i tz'uuy parub'ihnaal i jinaj i q'e' nuk'ax,
je' wili i naa nutz'uyem chi k'axb'al reh i ru-uuva rutikim: Re' i q'e' nuk'ax wilik jinaj ruye'aab' q'e' holohik.²Re' reh xuk'ot paam i ak'al xresaj taqe ab'aj, xusik' wach i rija'eel uuva xutik ar. Eh xuyejaa' i jinaj i paat panyejaal i ru-uuva cha'jalb'al reh, xuyejaa' i yitz'b'al reh i uuva, ruum xukapaaj i reh chi ma' k'isiin i wach i ki' laj uuva naa reliik. Xanaah re' k'ah chik i xuwachuj.³Eh re' i q'e' nuk'ax je' wili i xuq'or: Re' taq i hat aj Jerusaleem, i hat aj Judá, cha sik' taq chi riij awach i wilik ru mahk. Mi re' hin, oon re' nutik.⁴Eh ¿Mi ko wilik naq re' i xraaj i nu-uuva xnutik? ¿Mi ko wilik re' i ma' xnuyejaa' taj i hin? Re' hin ki'laj uuva naq i xwuy-eej, xanaah re' k'ahlaj uuva chik i xuwachuj.⁵Re' hin naa taq nuq'orom aweh chib'ih i naa nub'anam ruuk' i nu-uuva re' re': Re' hin naa wesam i koraal chi riij reh chi neensacharik wach, naa wesam i tz'aq chi riij reh chi naa ruyeq'eb'iik paam.⁶Eh naa nukanaam chi ma' xta chik i wilik chupaam, ma' naa ta chik rumesariik paam. Eh k'iixmoq'ool, kaq k'iix chik naa rupoq'iik cho ar, naa nuq'ilim i suutz' reh chi ma' nee ta chik ruye'em chaloq i jab' chinaah, inki.⁷Re' i ru-uuva i QaJaaw Dios i ruq'or, re' taqe i aj Israel, taqe i aj Judá, xukapaaj naq i reh chi re' i rub'ehel naa kianam. Xanaah re', re' chik i kaansanik inki a'n re' reh re' naq i wihik pansuqkiil k'uxliis xruy-eej, eh xa re' chik i k'erej kichii' inki a'n. Re' i ti' k'axik i naakik'ulum i yiib' wach kina'ojb'al⁸Q'e' ti' i naakik'ulum i xata wo' jarub' i kipaat, xata wo' jarseht i kiye'aab' inkiloq'. Eh xama' awach ta chik inkiyeew ruye'aab', xa re' chik i keh ehchan taqe reh chu'nchel noq inkikapaaj.⁹Re' hin xb'iraj chi je' wili i ruq'orom i QaJaaw Dios: Re' taqe i ma' k'isa paat naa nusacham kiwach. Atoob' ta xanimaq chik, xa holohaq chik taqe, xama' jino'q wo' hoq i naa rupatiniik chupaam.¹⁰Eh re' i lajeeb' k'ahaam i chi uuva, xa jinaj wo' ti b'ariil i riis naa ruye'em. Eh re' i lajeeb' koxtaal chi i ja' trigo, xa jinaj wo' tii koxtaal i wach naa rub'anam.¹¹Q'e' ti' i naakik'ulum taqe rajlaal wahq'eq, kiwuktiik reje chi xohk'rik. Eh re' i k'ahlaj ha' inyojwik kina'ojb'al, korehtaal kiokik q'iij chub'aan.¹²Eh chupaam i kininq'iij, inkikoj i arpa, i k'ahaam kiwach q'ooj, i tamb'oor, i suub' q'ooj. Eh inkuk'ej i k'ahlaj ha', ma' inkiyeew ta rajaawriik i ruyejaam chaloq i QaJaaw Dios.¹³Re' nutinamiit ma' inkireq ta chi riij, ruum aj re' naa kik'amariik reje pan tokoom tinamit. Eh chu'nchel i k'amal b'eeh, chu'nchel i tinamit naa kikimiik ruum kinuhmiik, ruum kichiqchi'iil.¹⁴Re' jul muq'umb'al xa tehlik chik i chii' chi kuyub'jiik, i tinamit reh chi naa kimuhqik ar. Je' wo' chu'nchel i k'amal b'eeh. Ar naa rusahchiik wach i runimaal kiwach, ruum xa ruuk' i re' inkich'ikaa' kik'ux.¹⁵Chu'nchel i tinamit naa kikahniik chi ma' xta chik kajaawriik, re' taqe i nimaq kiwach korehtaal inkiloch' kiib'.¹⁶Eh re' i QaJaaw Dios nim rajaawriik, naa ruk'uhtaam i rajaawriik noq naa rub'anam i q'ataj q'orik. Eh naa ruk'uhtaam i ruSantohiil ruuk' taqe i korik naa rub'anam.¹⁷Eh chupaam i tinamit re' re', re' chik taqe imas tentzun naa kianam kiwa' ar. Re' taqe i tokoom tinamit naakik'uxwiik reh i kitik, ma' xta chik naa ruwihiik keh i b'ehomaq.¹⁸Q'e' ti' i naakik'ulum taqe i kiqerjik pamahk ruum i yiib' wach na'ojb'al. Eh qeremaj taqe chub'anariik i ma' korik ta laj na'ojb'al, je' kiqerjik reje kareta.¹⁹Re' keh je' wili inkiq'or: Re' hoj inqaaj qilow chi jumehq'iil i ruq'or i QaJaaw Dios. Chub'aan i ruyejaam cho wach i wilik ruSantohiil chikinaah quch i aj Israel reh chi neenqanab'eej i hoj, inki taqe.²⁰Q'e' wo' ti' i naakik'ulum i kikojwik reh chi holohik, i ma' holohik taj. Eh inkikoj chi saqum i q'equm, eh re' q'equm inkikoj chi saqum, re' k'ah inkikoj chi ki', re' ki' inkikoj chi k'ah.²¹Q'e' wo' ti' i naakik'ulum i kow inki a'n kiib' wilik kina'ojb'al inki a'n kiib'.²²Eh xakow chik inki a'n kiib' chi ruxilaakjiik i k'ahlaj ha' noq inkuk'ej.²³Q'e' ti' i naakik'ulum i q'atal q'orik ruuk' tumiin inkikanaa' chi ma' xta ru mahk i wilik ru mahk, eh re' chik i korik wach ruk'ux inkiq'or chi wilik ru mahk.²⁴Ruum aj re', re' taqe re' naa rusachariik kiwach, je' rukab' noq inchaajrik i chiq sohk', i chiq k'im. Naakik'ulum keh je' rukab' i ruk'ul i tik inq'ahik i raa' i ruhz'ub'aal impooqrik. Ruum ma' xponik ta panaq'kiwach i ruk'uhb'aal i QaJaaw Dios, nim rajaawriik. Ma' xkinimaj taj i ruq'oral i wilik ruSantohiil chikinaah i aj Israel.²⁵Ruum aj re', re' QaJaaw Dios ma' k'isiin ta naa ruchaliik rujosq'iil chinaah i rutinamiit. Eh naa ruye'em i ti' k'axik chikinaah naa ruk'uyu'sam ak'al, xa aha' naa rukahniik chi tuch'lik i kiti'jolal pantaq b'eeh, xa je' chik kiq'ehb'ik sohk'. Re' QaJaaw Dios xama' naa ta wo' rik'iik i rujosq'iil, xama' naa ta wo' rukanaam ruye'ariik i ti' k'axik chikinaah.²⁶Eh re' QaJaaw Dios jinaj i rehtalil naa rujosam, naa ruxub'em reje jinaj i tinamit wilik chi najt yuuq'. Eh re' i tinamit re' re' jumehq'iil naa kichaliik chub'anariik reh i tinamit Jerusaleem.²⁷Eh chi kixilak i naa kik'uliik iloq ma' jino'q keh i q'uhteel. Ma' jino'q keh i chelej riib' imb'ehik, ma' jino'q keh naa ruchaliik ruwiriik, chu'nchel la' kib'ak'am i kipaam, kib'ak'am i kixijab' chi korik.²⁸Eh re' i kiflecha xaq'as chik kiju' re' inkikut wii' xakow chik kiripim wach, re' i rixk'aq i kikawayu xa je' chik kowlaj ab'aj re' i kikareta xa je' chik rukab' i choqik i rub'an i teew jab'.²⁹Eh xak'erik chik kichii' je' rukab' noq i ruk'er chii' kaq b'ahlam. Naa rub'aan kuuk' i je' rukab' i rub'an i kaq b'ahlam noq i ruchop i chikop i ruk'am reje ma' awach ta chik inq'uchwik reh.³⁰Eh noq naa kitoq'aam peleto i kuuk' i aj Israel xa k'erik chik kichii', je' rukab' i choqik i rub'an i palaw. Eh jinaj runimaal q'equm naa ruk'utiniik chinaah i Israel, ruum pan runimaal ti'kiil k'uxliis naa kiwihiik. Re' Isaías wilik i xk'uhtjik reh parusaq wiriik noq xsik'arik wach

¹Chupaam i haab' noq xkimik i Uzías, kireey i aj Judá, xwilow wach panusaq wiriik i QaJaaw Dios, chi tzunlik chinaah i runajt naah ye'aab', eh re' i runimaal i ruso' xunujisaj paam i rupaat.²Eh chinaah i QaJaaw Dios, wilkeeb' i ki'ib' chi k'achareel je' kiwii' ánjel, eh chi kiju'junaal waq taq i kixiik'. Ki'ib' i kixiik' imb'urwik reh i kiwach, ki'ib' imb'urwik reh i kooq, ki'ib' kirupinik reje wii'.³Eh kow k'ahchi' kiq'orom chikiwach chi je' wili:
Santo, Santo, Santo i qaDios, wilik rajaawriik, eh xnujik i ruloq'il chinaah chu'nchel i wach ak'al, inki taqe.

⁴Eh noq k'achi' kiq'orom chi je' wili, re' taqe i ru puertahiil i rupaat xanoq wo' xik'uyu'jik, eh re' i rupaat i Dios xnujik chi sib'.⁵Eh re' hin je' b'ila' wili i xnuq'or:
Re' hin naa nukimiik, ruum xwilow wach ruuk' naq'nuwach i Reey, re' Ajaab'ees Dios xti nim rajaawriik, xanaah re' ch'uwa' wach kinq'orik, eh ayu' wilkiin chi kixilak i tinamit ch'uwa' wach kiq'orik, kinki.

⁶Eh xrupinik cho chi nunaah, jinaj keh i k'achareel ruchopom chi lach' ch'ihch' jinaj i nah wach q'aaq' xuchop cho wach artaal,⁷eh xrik'saj xaq nuchii'. Eh je' wili i xuq'or weh:
Ruum chi xwik'saj xaq aachii' i naah wach q'aaq' wili xelik chu'nchel i ma' holohik taj i na a'n. Eh kuyuuj chik chu'nchel amahk, inki.

⁸Eh xb'iraj i ruq'oral i QaJaaw Dios je' wili i xuq'or:
¿Awach i naa nutaq'aam, awach i naa rojiik taqareel? inki.
Eh re' i hin je' wili i xnuq'or reh:
Jaaw ayu' wilkiin i hin, kinataq'aaj i hin, kinki reh.

⁹Eh je' wili i xuq'or weh:
Ma' xta reet hiy cha q'or keh chi je' wili i tinamit: Inab'iraj wo' naq taq xama' areq ta wo' taq chi riij, inawil wo' naq taq, xama' nakoj ta wo' taq rehtaal, tiko'q keh.¹⁰Chakoowb'isaj i kánima i tinamit re' re', chatz'ap i kixikin, chamutz' inaq' kiwach reh chi ma' nee ta nkib'iraj, eh ma' nee ta inkikoj rehtaal. En ni xata neenkireq chi riij, reh chi ma' nee ta inkiyot' i kik'ux. Eh re' hin ma' nee ta wo' nukuy kimahk, inki weh.

¹¹Re' hin je' wili xnuq'or:
¿Nik' najtiil naa ruk'ulariik i re' Jaaw? kinki reh.
Eh je' wili i xuq'or weh: Korehtaal inkuxik rusachariik wach i kitinamiit, ma' jino'q chik i naa rupatiniik pankipaat, korehtaal kiehteesjik reje pan i kiye'aab', inki.¹²Je' re' noq re' i QaJaaw Dios korehtaal i resaj taqe reje chu'nchel i tinamit ar. Eh xan tz'irtz'otik chik paam i kitinamiit naa rukahniik.¹³Eh wila' kox kahnik chik k'isinoq ruqox i tinamit, naa wo' rusachariik kiwach. Noq re' chee' tuhq, eh re' i tz'inuj inyok'arik naah neenkahnik i raa', reh chi nee wo' chik intoxlinik. Je' wo' chik re' na' kikahnoq kiib' ixib'-oq i loq'laj rak'uun rixq'uun i Dios. Re' i xuq'or i Isaías reh i reey Acaz

¹Je' wili xk'ularik noq wilik chi reyil Judá i Acaz rak'uun i Jotam, riih i Uzías. Eh re' i Rezín wilik chi reyil Siria, ruch'ihil i rak'uun i Remalías, Peka i b'ih wilik chi reyil Israel, xiooj naq chi kipletohjiik i aj Jerusaleem, xa re' la' xama' xkian ta wo' okik.

²Eh xponik rib'iral kuuk' i riih rumaam i reey David, je' wili xkiq'or reh i reey Acaz:
Re' taqe i aj Siria, i aj Efraín, naa ruchaliik kipletoheem aatinamiit, inki taqe. Eh re' keh xchalik kib'arb'otiik ruum kiyo'jiik. Xa je' chik rukab' noq kik'uyu'jik i nimaq chee' ruum i kowlaj teew.³Eh re' i QaJaaw Dios je' wili i xuq'or reh i Isaías:
Yu'naak i hat awuch'ihil awak'uun Sear-jasub i b'ih, hiy taxaaj inik'ik wii' i rooq ha' tuqlik, ar taq neenareq i reey Acaz chupaam i b'eeh inooj wii' i ha' imb'aan wii' i tz'ajooj.⁴Je' wili i neenaq'or reh: Chawik'raaj awiib' maa rub'an kiib' ak'ux, mat yo'jik chuwach i Rezín kireey i aj Siria ruch'ihil i rak'uun Remalias Peka i b'ih, kireey i aj Israel. Re' taqe i yohb'aal wach kijosq'iil re' re' xama' xtaj i naa kianam, xa je' kikab' i ki'ib' chi ju' sii' intzub'ik rusib'eel.⁵Re' i kireey i aj Siria ruch'ihil taqe i aj Efraín, ruch'ihil i rak'uun Remalias, xkiyejaa' wach nik' wach noq naa kichaliik chi peleto awuuk', je' wili i xkiq'or:⁶Yu'naak taq taq chi peleto kuuk' i aj Judá, neenqachop naah i kiye'aab', neenqakoj ar chi reey i rak'uun i Tabeel, inki taqe.⁷Eh re' i QaJaaw Dios je' wili i xuq'or:
Re' inkiq'or re' re', ma' jaruuj naa kianam rub'aan, ma' jaruuj taq naa ak'ulum i re'.⁸Ruum re' i Siria, re' i tinamit Damasco inchopwik naah. Eh re' i Damasco, re' i tinamit Resín inchopwik naah. Eh re' taqe i riih rumaam i Efraín xa pan ho'oob' rukajwinaq haab' insacharik wach,⁹Eh re' i aj Efraín, re' i tinamit Samaria inchopwik naah. Eh re' i wilik chi reyil ar re' rak'uun Remalias Peka b'ih. Eh wila' ma' xat nimanik taq i hat, naa taq ak'ulum aweh je' rukab' i ti' naakik'ulum i aj Efraín, inki.

¹⁰Re' i QaJaaw Dios xuq'oreej wo' chik chaloq i Acaz i kireey i aj Judá je' wili i xuq'or reh:

¹¹Re' hin, hin aaDios cha pahqaaj jino'q i ma' ilooj taj nim wach, reh chi neenk'utinik ko paruchamiil i ak'al, oon ko chupaam i runajtiil paam i taxaaj, inki.

¹²Eh re' i reey Acaz je' wili i xuq'or: Re' hin ma' nee ta nupahqaaj aweh i re' ruum ma' ruk'ul taj chi nee tinupaj inki.

¹³Eh re' i Isaías je' wili i xuq'or: Chab'iraj taq i hat, i hat taq riih rumaam i reey David: ¿Mi ma' ch'iklojik taq ak'ux re' ruuk' i kijot'ariik i jalal ruq'oral i Dios taq i na a'n, ruum konawaaj wo' taq rujot'ariik i nuDios?¹⁴Eh re' i QaJaaw Dios wilik i rehtalil naa ruk'uhtaam taq chaawach. Re' chi jinaj k'isa q'ahxoq ma' reht'al ta wach q'orinik winaq naa rasjiik jinaj k'isa rak'uun. Emanuel i rub'ihnaal naa rukojom, inki (re' iraaj ruq'orom chi re' Dios wilik quuk')¹⁵Eh xa riis kaab', xa sas la' lecha naa ruk'uxlaam wii' riib' noq naa ruk'ih korehtaal i rureq chi riij i ma' holohik taj, i holohik.¹⁶Eh re' i k'isa k'un noq komajaa' ta rusik' wach i holohik chi xilak i ma' holohik taj. Re' taqe i ki'ib' chi reey inayohleej taq kiwach naa rukahniik chi ma' jino'q chik i i k'achareel naa ruwihiik pan kiye'aab'.

¹⁷Eh re' i QaJaaw Dios naa ruye'em i ti' k'axik taq cha naah i hat, chikinaah taq aatinamiit ma' jank'al ta nk'ularik, i rutohq'iik cho ruch'aqam riib' i tinamit Efraín ruuk' i tinamit Judá. Re' i ti' k'axik wili re' i kireey i aj Siria naa ruk'uliik b'anoq.

¹⁸Re' QaJaaw Dios naa ruyuq'eem taqe reje i aj Egipto wilkeeb' chi' taq nim ha'. Eh naa ruyuq'eem taqe reje i aj Asiria, eh re' keh je' kichalik nimaq utz', winaq kaab' noq naa kichaliik.¹⁹Re' taqe re' xa je' chik kikab' i nimaq utz', i winaq kaab' noq naakipuhkaam kiib'. Eh naa kojiik pantaq jul, pantaq paat ab'aj, pantaq k'iix, wataq k'im chub'anariik keh i aj Judá.²⁰Eh re' i QaJaaw Dios chupaam i q'iij re' re' naa ruye'em q'ab' reh i kireey i aj Asiria chi naa ruchaliik rub'anam i ti' k'axik keh, je' na naa rujotzom i rismaal kinaah, i kusinchii', i rismaal pan kisekan.

²¹Eh chupaam i q'iij re' re', xa jinaj chik chi ixoq wakax, eh xa ki'ib' chik chi ixoq tentzun i naa ruk'isam i jinaj chi winaq.²²Eh nik' chik kik'ihaal i naa kikahniik chi k'achalkeeb', ruuk' chik sas paam lecha, ruuk' riis winaq kaab' naa kik'uxlaam kiib'.

²³Eh chupaam i q'iij re' re', re' i ye'aab' i nelik naq wii' i ma' k'isa uuva jinaj miil naq chi tumiin re' ruuk' i plata i tz'aaq, naa rukahniik chi xa kaq k'iix, xa k'iixmoq'ool chik i naa rupoq'iik cho ar.²⁴Eh konaa chik kik'amam kiflecha noq naa kokiik chupaam i ye'aab' re' re' ruum xa i kaq k'iix, xa k'iixmoq'ool naa rupoq'iik chuwach.²⁵Eh ma' naa ta chik rub'anam chi naa kab'ixeem wach i ye'aab' re' re', inkab'ixeej naq wach. Ruum re' i ye'aab' re' re', xa ch'ahn chik i naa rupoq'iik chuwach. Xa wakax, xa tentzun chik i naa kianam kiwa' chuwach. Xa re' wo' i Dios naa qayohleem wach

¹Re' QaJaaw Dios je' wili i xuq'or weh panusaq wiriik:
Chasik' jino'q i tz'ilom nim wach, cha tz'ihb'aaj chuwach ruuk' i ma' k'ayeew ta wach q'orik i b'ihnaal Meher-salal-hasbaz.

²Eh neenayuq'eej i Urías k'amal b'eeh aj tiij, i Zacarías, rak'uun i Jeberequías, reh chi neenkilow chi xatz'ihb'aaj i b'ihnaal re' re', inki.³Eh xnutoq'aa' k'acharik ruuk' i wehk'een, re' jalal ruq'oral i Dios, eh xkahnik wach k'acharik, x-aasjik jinaj wak'uun ruuk', je' wili i xuq'or weh i QaJaaw Dios: Maher-salal-hasbaz i rub'ihnaal naa akojom.⁴Eh re' i k'isa k'un re' re', noq komajaa' inchol ruq'orariik taqe i q'orik wili: Hat nutuut, hat wajaaw re' tinamit Damasco, ruch'ihil i tinamit Samaria naa ruchopariik kinaah, eh naa relq'jiik i kib'ehomal ruum i kireey i aj Asiria, inki.

⁵Eh re' i QaJaaw Dios je' wo' chik wili i xuq'or weh:

⁶Re' taqe i tinamit, xin kiq'eb' chi riij kik'ux, re' hin xa je' naq nukab' i ha' Siloe xa jinaj tuqlik wii'. Re' keh ruuk' chik i reey Rezin, ruuk' chik i rak'uun Remalias re' i reey Peka rub'ihnaal xkiyeew kik'ux.⁷Ruum aj re', re' hin naa nutaq'aam chaloq i kireey aj Asiria, ruch'ihil taqe soldado, chi naa ruchaliik b'anroq keh i nutinamiit. Eh yohb'aal wach i kijosq'iil noq naa kik'uliik iloq, xa je' chik rukab' i rujosq'iil i nim ha' Éufrates noq i nelik reje chi' taq chii, i rutz'ap naah i xa chib'ih i wilik parub'eeh.⁸Re' keh xiooj xa aha', xiooj k'oloq Judá chub'aan i ti' k'axik re' naa reliik reje wii' i k'isa k'un Emanuel i rub'ihnaal. Eh yohb'aal wach i kijosq'iil, xa je' chik rukab' i rujosq'iil i elal ha' i rutz'ap naah chu'nchel i wilik parub'eeh.

⁹Eh re' taq i hat tinamit, atoob' ta neenamol taq awiib', xanaa wo' rub'aan i ti' k'axik taq aweh. Eh chab'iraj taq i hat i tinamit inajt taq wilkaat chaloq, atoob' ta cha yejaa' taq awiib' xanaa wo' taq rusachariik awach.¹⁰Atoob' ta ayejaam taq wach i naa a'nam, xama' naa ta wo' taq aweliik korik. Re' taq i naa aq'orom xama' naa ta wo' taq a'nam, ruum re' hoj re' i QaJaaw Dios wilik quuk'.

¹¹Eh noq re' i QaJaaw Dios kow xiruchop ruuk' i rajaawriik, xuq'or weh chi ma' naa ta nutahqeem taqe i tinamit re' re', chub'anariik taqe i yiib' wach na'ojb'al, je' wili i xuq'or weh:¹²Re' taq i hat maa a'n jinaj taq wach ak'ux kuuk' i tinamit noq inkiyejaa' wach i ma' holohik taj. Eh maayohb'isaj taq awiib' ruuk' inkiyohb'isaj wii' kiib' i keh, chakowej la' taq ak'ux.¹³Je' re' noq re' taq i hat, xa re' wo' hin i jinaj chi Dios nim waJaawriik i ruk'ul chi naa taq aye'em nuSantohiil, eh chi naa taq ayohleem nuwach.¹⁴Ruum chi re' hin wilik nuSantohiil, hin naa nuko'liniik keh i kinimanik weh. Eh chi keh i aj Judá, i aj Jerusaleem, je' hin ab'aj inkitoxk'iij wii' i kooq, kiq'ehb'ik wii' keh. Eh chi keh i aj Jerusaleem, je' hin xirob'.¹⁵Eh ma' k'isiin i naakitoxk'iim i kooq chi nunaah, je' naa kiq'ehb'iik, eh naa rusachariik kiwach. Ma' k'isiin wo' taqe i naakichopariik ruum i xirob', inki.

¹⁶Re' hin naa numolom i k'uhb'aal wili re' i naa nuk'uhb'aleem taqe wii' inaakitahqiniik weh.

¹⁷Eh re' i QaJaaw Dios atoob' ta ma'rutoob'eej taqe i riih rumaam i Jacob re' hin ch'iklik nuk'ux ruuk' chi konaa ruk'uhtaam i rotob'il.¹⁸Re' hin ayu' wilkiin kuuk' i wak'uun xuyeew weh i QaJaaw Dios rehtalil chikiwach i tinamit Israel chi wilik i rotob'il i QaJaaw Dios nim rajaawriik eh wilik ar nah yuuq' Sión.¹⁹Eh wila' i xkiq'or taq aweh chi chapahqaaj taq keh i kamnaq, keh i aj q'iij je' taq wili i cha q'or keh: ¿Mi ma' ruuk' re' i Dios naa qapahqaam? ¿Mi neerub'an re' chi re' i k'achalkeeb' reh i kamnaq neenkipahqaaj inkaaj? tiko'q taq keh.²⁰Eh ruuk' i ruk'uhb'aal i Dios chachaq'weej taqe. Eh wila' ma' ruuk' taq i k'uhb'aal, xatchaq'wik komajaa' taq inareq i saqum.

²¹Re' taqe i tinamit xak'ul chik naa kojiik chusik'ariik kiwa' ruum i runimaal wi'jaleel naa ruchaliik. Eh ruum i re' yohb'aal wach naa ruchaliik kijosq'iil eh naakib'ajam i kireey, je' wo' hoq i ki Dios.²²Xa naa naq chik kitz'ehtanik reje wach ak'al, xa re' la' ti' k'axik i naa ruchaliik chikinaah. Eh juneliik naa rutib'iik kik'ux, ar naa rusachariik kiwach panq'equm. Re' i ruq'orariik rib'iral chi jinaj i naa rasjiik eh naa ruwihiik chi reyil

¹Re' i QaJaaw Dios ma' chu'nchel ta q'iij naa risam i rajaawriik i tinamit Zabulón, je' wo' i tinamit Neftalí, naa la' risam i ruti'kiil kik'ux. Naa ruponiik i q'iij chi naa ruye'em ruloq'il i tinamit wilik chi chii' i nim ha' Jordán, re' i wilik chii' b'eeh inooj chi chii' palaw. Eh naa wo' chik ruye'em ruloq'il i tinamit Galilea, re' i wilkeeb' wii' i ma' re' ta aj Judío.

²Re' taqe i tinamit k'acharik inki a'n panq'equm, xkilow wach i runimaal saqum. Eh re' taqe i k'acharik inki a'n paruyohb'alil i kimik, xisihq'iljiik cho ruum jinaj i saqum.³QaJaaw Dios re' hat naa ak'ihaaxb'iisam i tinamit, eh naa rusuuqb'iik kik'ux awuuk', je' rukab' noq insuuqb'ik kik'ux i kore' xkian i jach. Je' rukab' noq insuuqb'ik kik'ux noq inkich'aq inkiq'uch chaloq panq'aq'inik.⁴Re' hat naa awesam ahl laj ihq chikinaah, naa awesam taqe panti' k'axik imb'aan keh kuum inixowanik kiwach. Eh naa asacham kiwach je' rukab' i xa a'n keh i aj Madián.⁵Re' taqe i aj ixowaal re' re', xa nk'uyu'jik chik ak'al i naa rub'anam i kixijab', reh q'aq'inik. Eh re' i kiso' naa rusahchiik chi kik', je' wo' hoq i keh naakik'atariik wach q'aaq' chi sachb'al kiwach,⁶ruum jinaj i k'isa k'un x-aasjik chi qeh, re' i QaJaaw Dios xye'wik cho qeh, re' chik i reh naa rub'aniik i taaq'anik. Eh je' taqe wili i naa rubíhnaam: Kojol na'ojb'al, ma' ha' ta chi je', Dios nim rajaawriik, Ajaab'ees naa ruwihiik chi juneliik, eh ye'el reh i wihik pansuqkiil k'uxliis.⁷Eh re' reh naa ruwihiik chi reyil, je' rukab' noq xwihik chi reyil David. Eh re' i taaq'anik naa rub'anam i suq kiil k'uxliis naa ruye'em ma' xata pajooj najtiil, Re' i korik, re' rub'ehel, naa ruye'em, reh juneliik.
Re' i QaJaaw Dios je' re' i naa rub'anam, re' raaj i reh chi xa re' wo' reh naa runimjiik. Re' i rujosq'iil i QaJaaw Dios xuye cho chikinaah i aj Israel⁸Re' i QaJaaw Dios xuq'or chi naa ruye'em i ti' k'axik chikinaah i aj Israel, re' taqe i riih rumaam i Jacob.⁹Re' wili chu'nchel i tinamit naa runab'iniik reh. Naakinab'eem taqe i aj Efraín, taqe i aj Samaria. Re' keh inkiq'et wachej kiib', inkinimb'isaj kiwach, chuq'orariik chi je' wili:¹⁰Xq'ehb'ik i paat korjinaq taqe ruuk' xaan, re' hoj ruuk' chik ab'aj naaqayejaam. Eh xkiyok' i chee' Sicómoro korjinaq wii' i qasiq paat, re' hoj chakaltee' chik naa qayej-aam wii', inki taqe.¹¹Re' i QaJaaw Dios naa rujosam cho wach i kijosq'iil i aj ixowaal. Eh naa ruk'amam taqe chaloq reh chi naakichaliik chi peleto kuuk' i aj Israel.¹²Re' taqe i aj Siria, naakeliik chaloq parelb'aal q'iij, re' taqe i aj filisteo naakeliik chaloq parookb'aal q'iij chub'anariik keh i aj Israel. Eh ni xata ruuk' i re' naa rik'iik i rujosq'iil, i QaJaaw Dios xa konaa wo' ruye'em i ti' k'axik chikinaah.

¹³Xa re' la' re' taqe i aj Israel xama' naa ta wo' kisik'im i QaJaaw Dios nim rajaawriik, re' naa ruye'wiik keh panti' k'axik. Eh ni xata naa kinimam i Dios.¹⁴Re' QaJaaw Dios xa chi jumehq'iil naa ruye'em taqe panti' k'axik i aj Israel, je' rukab' noq inyok'arik i naah, inyok'arik i rujeeh i chikop.¹⁵Re' i naah i chikop kijalwaach i k'amal b'eeh. Re' i rujeeh i kijalwaach taqe i chukul q'orik inkikoj kiib' chi jalal ruq'oral i Dios.¹⁶Naakik'ulum i ti', ruum re' taqe i k'amal b'eeh i naa wo' chik kiq'eb'em kiib'. Eh re' taqe i tinamit inkik'am rub'eeh naa wo' chik kiq'eb'em kiib' i keh.¹⁷Ruum aj re', re' QaJaaw Dios, ma' ruketelaaj ta kiwach i k'ijolaq, je' wo' i ma' xta kituut kajaaw, je' wo' i neb'aa' ixoq kamnaq kib'ahiil, ruum chu'nchel i yiib' wach kina'ojb'al. Eh chi kunchelaal xa re' i yiib' wach q'orik i nelik cho pankichii', ruum aj re', re' QaJaaw Dios majaa' ta nik'ik i rujosq'iil, chikinaah.

¹⁸Re' i yiib' wach na'ojb'al inki a'n xa je' chik rukab' i q'aaq' noq i ruk'at, i ruchajrisaj i k'iix, i xa reh reh wach ch'ahn. Eh je' rukab' i q'aaq' ink'atwik reh i runimaal rax chee', yohb'aal wach i rusib'eel injohtik pan taxaaj.¹⁹Eh ruum i rujosq'iil i QaJaaw Dios nim rajaawriik, naa rusacham wach i wach ak'al. Eh re' i tinamit naakik'ahtiik ruuk' q'aaq', ma' awach ta chik i naa ruketelaam wach i ras ruchaaq'.²⁰Xa aha' naa kojiik chi q'uchariik i chib'ih keh i tinamit, eh re' keh xama' naa ta wo' ruch'iklojiik kik'ux, xayohb'aal wach i kinuhmiik, korehtaal inkik'ux i ruti'jolal i kas kichaaq'.²¹Re' taqe i aj Manasés atoob' ta naa kipletoheem kiib' kuuk' i aj Efraín, naa kichaliik chi peleto kuuk' i aj Judá. Re' i QaJaaw Dios ni xata ruuk' i re' naa rik'iik i rujosq'iil, xa konaa wo' ruye'em i ti' k'axik chikinaah.¹Re' taq i hat, q'e' taq ti' i naa ak'ulum, ruum inakoj taq i k'uhb'aal chi ye'b'al keh panti' k'axik i tinamit.²Eh xaq'uchb'al chib'ih keh i neb'aa', xa reh chi ma' parub'ehel ta taq inaq'at i q'orik. Eh xaq'uchb'al chib'ih keh ixoq kamnaq kib'ahiil, je' wo' chib'ih keh i ma' xta kituut kajaaw.³Eh ¿Chib'ih taq i naa a'nam i hat noq naa ruq'atariik taq i q'orik cha naah? Eh ¿Chib'ih taq i naa a'nam noq naa ruk'uliik iloq taq cha naah i ti' k'axik? ¿Awach taq naa rutoob'iniik aweh? ¿Aha' taq naa rojiik ab'ehomal amolom wach?⁴Eh wii' ma' xat kanteesjiik taq panq'aq'inik, naa taq ak'amariik reje chi prexohjik pan tokoom tinamit. Eh ni xata ruuk' i re' naa rik'iik i rujosq'iil i QaJaaw Dios, xa konaa wo' ruye'em i ti' k'axik taq cha naah. Re' QaJaaw Dios re' taqe i aj Asiria xukoj chub'anariik i ti' k'axik⁵Re' QaJaaw Dios je' wili i xuq'or: Re' hin, re' taqe i aj Asiria naa nukojom chi jilow nukarote, re' keh naakik'saniik reh i nujosq'iil chikinaah i tinamit⁶Re' ruum nujosq'iil naa nutaqaam taqe chaloq i aj Asiria chi q'aq'inik kuuk' taqe i aj Israel, reh chi naa ruq'uchariik i chib'ih keh. Eh reh chi naa rub'aan ti' k'axik keh, naakiyeq'eb'iik panak'al, je' rukab' imb'aan reh i ch'uwa' pantaq b'eeh.⁷Xa re' la' re' i kireey i aj Asiria ma' xata re' re' iraaj chi naa rub'anam, re' la' raaj i reh chi naa rusacham kiwach i ruk'ihaal tinamit.⁸Re' i reey re' re' je' wili i ruq'or: Chu'nchel i wilkeeb' chi reyil, chi ri'sil i wajaawriik wilkeeb'.⁹Eh chi wee hin eliik wach i tinamit Calno, ruuk' i Carquemis. Eh eliik wach i tinamit Hamat, ruuk' i Arfad. Eh re' i Samaria eliik wach ruuk' Damasco.¹⁰Re' hin xnub'an keh i tinamit ma' k'isiin i tiyoox kuuk' ma' xata je' k'ihaal i tiyoox wilik kuuk' i aj Jerusaleem, i aj Samaria.¹¹¿Mi ma' naa nusach kiwach re' i aj Jerusaleem, ruch'ihil i kitiyoox, je' rukab' noq xnusach kiwach i aj Samaria, ruch'ihil i kitiyoox? inki i kireey i aj Asiria, inki.

¹²Eh re' i QaJaaw Dios noq rukohlaam chik ruye'ariik i ti' k'axik chikinaah i aj Jerusaleem chinaah i yuuq' Sión. Kora'j naa ruye'em chutojariik re' i ru mahk i yiib' wach runa'ojb'al, re' i kireey i aj Asiria, ruum i xu q'etwachej riib'. Eh xa nim wach i rub'an riib'.¹³Re' i kireey i aj Asiria je' wili i ruq'or:
Chu'nchel i xnub'an, ruuk' i wajaawriik xnub'an, eh wilik nuna'ojb'al. Eh xinelik korik, re' hin xnub'an keh i k'ih seht chi tinamit, eh xnuchop naah chi weh i kib'ehomal, xnuq'uch i kajaawriik i kireey.¹⁴Eh xnuchop naah i kib'ehomal i tinamit re' re', ma' awach ta neentz'a'inik weh. Xa je' rukab' noq inchoparik naah i miloj wilik pan jino'q suuq' ma' xta ehchan reh noq xnuchop naah. Eh ma' awach ta inq'orik chi riij, ma' xkik'er ta kichii' chi ko'ljiik riij, inki kireey aj Asiria.

¹⁵¿Mi re', re' ikej nim wach chuwach intz'a'inik reh? ¿Mi re', re' i xera ch'ihch' tarb'al chee' nim wach chuwach intz'a'inik reh? ¿Mi re', re' i karote nim wach chuwach i k'ahchi' rutob'eem riib' chinaah? ¿Mi neeruksaj jino'q re' i winaq i xa chee' wo' hoq?

¹⁶Re' i QaJaaw Dios nim rajaawriik naa resam i kajaawriik i aj Asiria. Re' wilik kajaawriik inki a'n kiib' naa ruye'em i ti' k'axik chikinaah, na naakik'ahtiik ruum q'aaq' noq naakik'ulum taqe re'.¹⁷Re' QaJaaw Dios wilik ruSantohiil, kisaquum i aj Israel. Re' i kib'anik i ti' k'axik, naa rusacham kiwach, je' rukab' noq ink'ahtik kaq k'iix, i k'iixmoq'ool.¹⁸Re' taqe re' je' naq kiholwochiil i rax chee' pan kiye'aab'. Xa re' la' naa rusachariik kiwach naa kikahniik chi ma' xta chik kikamaj. Xa je' chik kikab' i yowaab' ma' xta chik ransil.¹⁹Re' keh xama' k'ih ta chik inaakikahniik, je' rukab' noq kiyok'arik i chee' xama' k'ih ta chik inkahnik, xa jinaj chik chi k'isa k'un i neenchol rajaljiik.

²⁰Eh naa ruponiik i q'iij chi re' taqe i aj Israel i riih rumaam i Jacob, i ma' naa ta rusachariik kiwach. Ma' naa ta chik kisik'im ko'lemb'al kiib' kuuk' i xa re' sachooj inki a'n Ruuk' la' chik i QaJaaw Dios wilik ruSantohiil chikinaah i aj Israel naa kisik'im i ko'lemb'al kiib'.²¹Eh re' taqe i riih rumaam i Jacob, ma' naa ta rusachariik kiwach naa wo' chik kinimam i QaJaaw Dios nim rajaawriik.²²Atoob' ta xa je' wo' naq chik kik'ihaal i saniib' chi chii' i palaw taqe i aj Israel, xama' k'ih ta chik i naakisutiniik cho ruuk' i QaJaaw Dios. Ruum korjinaq chik wach chi naa rusachariik kiwach.²³Re' i QaJaaw Dios nim rajaawriik, ruyejaam chik wach chi naa rusacham kiwach chu'nchel i tinamit, eh naa wo' rub'anam chaloq.

²⁴Re' i QaJaaw Dios nim rajaawriik je' wili i ruq'or:
Hat taq nutinamiit aj Sión, mat yo'jik taq kuum taqe i aj Asiria. Atoob' ta neenkian taq ti' k'axik aweh, nee taq tikiq'oj chi chee', je' rukab' inki a'n i aj Egipto.²⁵Re' hin jumehq'iil naa wesam i nujosq'iil taq cha naah i hat, chikinaah chik i aj Asiria naa nuye'em i nujosq'iil chi sachb'al kiwach, inki.²⁶Re' i QaJaaw Dios, nim rajaawriik naa rusacham kiwach, je' rukab' noq xusach kiwach i aj Madián chinaah i yuuq' Oreb. Eh naa ruk'uhtaam i rajaawriik, je' rukab' i xub'an Egipto, noq xuq'eb'aa' i rukarote i Moisés chinaah i kaq palaw.²⁷Eh chupaam i q'iij re' re', naa taq aweliik chi ri'sil i kajaawriik i aj Asiria. Ma' naa ta chik kianam ti' k'axik taq aweh, naa reliik taqe i ahl laj ihq taq cha naah ruum hat taq nutinamiit nusik'im taq chaawach, inki.

²⁸K'ulik chik inki a'n iloq ar Ajat i ki-ixowanik taq awach, xi-ik'ik chik cho ar Migrón. Eh xkimol chik wach ar Micmas i naa rukamaniik keh.²⁹Eh naakik'iik chinaah i yuuq' Geba naa kiyejaam i kikok' perpat. Eh re' taqe i aj Ramá naa ruchaliik kiyo'jiik kuum, eh re' taqe i rutinamiit i Saúl inkimol chi elik.³⁰Re' taq i hat aj Galim, cha k'er taq aachii' chi kow reh chi neenib'irjik chaloq ar Lais. Re' taqe i aj Anatot, q'e' ti' i naakik'ulum.³¹Re' taqe i aj Madmena inkimol chi elik. Eh re' taqe i aj Gebim xkikeb'aa' kiib'.³²Eh re' taq i ki-ixowanik awach k'ulik iloq keh ar Nob, naa kiyejaam i kikok' perpat. Ar naa kojiik chi q'aq'inik chinaah i yuuq' Sión wilik ar Jerusaleem.

³³Xa re' la' re' i QaJaaw Dios naa rusacham kiwach ruuk' i rajaawriik. Naakik'ulum keh je' rukab' noq inq'eb'arik taqe i nimaq taq chee'. Re' taqe i nimaq kiwach naa rehtesjiik i kajaawriik.³⁴Naa rub'aan keh je' rukab' noq inyok'arik i nimaq chee'. Je' rukab' noq kiq'eb'arik taqe i chee' wilkeeb' ar Líbano. Re' q'orooj cho rib'iral chi naa ruk'uliik, eh naa ruk'amam chaloq i suq kiil k'uxliis¹Eh chi kixilak taqe i riih rumaam i Isaí, jinaj naa rasjiik reje, je' rukab' noq ink'ihik johtoq i rutoxl i chee'.²Re' reh, re' i ruxlab'al i Dios naa ruwihiik ruuk' chi juneliik. Eh re' re' naa ruye'wiik runa'ojb'al, naa rutijiniik reh, re' naa rukuuhtaniik i rukorkiil. Re' wo' reh naa ruye'wiik rukowiil ruk'ux, je' wo' i ruyohljiik wach i Dios.³Ma' naa ta ruq'atam i q'orik chinaah i ju'jun wila' ma' chih ru mahk. Eh ma' naa ta rub'anam i q'ataj q'orik ruuk' i xa naa rib'iram.⁴Eh parub'ehel naa ruq'atam i q'orik chikinaah i neb'aa', naa rutoob'eem taqe i ma' nimaq ta kiwach. Ruuk' i ruq'oral naa ruye'em taqe chutojariik i kimahk i kib'anik ti' k'axik. Eh xa ruuk' i junhuup chi ruxlaab' naa rukaansam taqe i yiib' wach kina'ojb'al.⁵Re' reh xa re' i rub'ehel naa rub'anam, xa re' i rukorkiil naa rub'anam, naa rutiq'aam riib' ruuk' taqe i re'.

⁶Eh re' xojb' jinaj naa kiwihiik wii' ruuk' i tentzun. Re' i b'ahlam jinaj naa kiwihiik wii' ruuk' i rak'uun kaprax. Eh re' i rak'uun wakax jinaj naa kianam wii' kiwa' ruuk' i kaq b'ahlam, eh xa jinaj chi k'isa k'un naa rucha'jiniik keh.⁷Eh re' ixoq wakax jinaj naa kiwihiik wii' ruuk' ixoq oso, eh jinaj naa ruwihiik wii' i kak'uun. Eh re' kaq b'ahlam k'im chik i naa ruk'uxum, je' rukab' i b'ooyax.⁸Re' jino'q i k'isa k'un naa rub'anam ruk'o'niik chinaah i rujuul i nimlaj aaq'. Re' i koxukanaa' ch'uch'ik naa ruye'em i q'ab' chinaah rusuuq' josq'laj aaq' eh ma' naa ta ruk'uxariik.⁹Eh ma' xta chik jot'ooj naa rub'aan. Ma' xta chik ti' k'axik chinaah i santo laj yuuq' Sión, ruum naa runujiik chinaah i wach ak'al i runa'ojb'al i Dios je' rukab' noq i nujik i palaw chinaah i wach ak'al.

¹⁰Eh na' ponoq i q'iij re' re', re' i naa rasjiik reje chi kixilak i riih rumaam i Isaí, naa rukahniik chi jinaj ehtalil chikiwach i tinamit. Eh re' keh naa kojiik chi rusik'ariik, re' i ruye'aab' naa ruwihiik wii' xiik' naah holwochiil.¹¹Eh chupaam taqe i q'iij re' re', re' i QaJaaw Dios naa ruketelaam kiwach i aj Israel. Eh naa rumolom cho kiwach i wilkeeb' Asiria, i wilkeeb' Egipto, i wilkeeb' Elam, i wilkeeb' Sinar, wilkeeb' Hamat, i wilkeeb' chupaam taqe i tinamit wilkeeb' chi chii' i palaw.¹²Re' reh jinaj ehtalil i naa rujosam chikiwach i tinamit, chi xumol wo' chik kiwach i rutinamiit. Re' taqe i aj Judá, i aj Israel kitukem kiib' chi junsuut i wach ak'al.¹³Re' i aj Efraín, ma' naa ta chik kixowaam kiib' kuuk' i aj Judá. Re' taqe i ki-ixowanik wach taqe i aj Judá naa rusachariik kiwach.¹⁴Re' taqe re' naa kojiik parookb'aal q'iij chi peleto kuuk' i aj filisteo. Eh naa kiq'uchum i chib'ih keh i tinamit wilkeeb' reje pareelb'aal q'ij. Eh je' wo' taqe i aj Edom, i aj Amón, i aj Moab re' chik i keh naa kitaaq'anik reh taqe re'.¹⁵Eh re' i QaJaaw Dios naa ruchiqsam i palaw ar Egipto. Eh naa rutaq'aam reje i tz'a'laj teew chinaah i nim aha' Éufrates ruuk' i re' naa ruchiqsam i wuquub' i q'ab'. Reh chi re' i tinamit neenkian ik'ik ar chi ma' naa ta kesam i kixijab'.¹⁶Reh chi naa kireqem kib'eeh i ruqox i rutinamiit noq naa kik'iik ar, re' taqe i ma' naa ta rusachariik kiwach chupaam i ye'aab' Asiria, je' rukab' i xub'an i QaJaaw Dios noq xresaj taqe chaloq i rutinamiit ar Egipto. Re' tz'uuy t'iosb'al reh i Dios i xub'an chaloq¹Eh chupaam ponoq i q'iij re' re' je' wili taq i naa aq'orom: Re' hoj naaqatz'uyem awach QaJaaw Dios, ruum atoob' ta xayeew aajosq'iil chi qanaah, yu'naak xik'ik chik. Eh xayeew wo' chik suq kiil qak'ux.²Ruum re' hat i qaDios ti ko'linik qeh, ma' qohyo'jik taj, awuuk' i hat ch'iklik qak'ux. Eh re' hat ti ye'wik rukowiil qak'ux, re' hat inqatz'uyej awach, hat qaj ko'loom, tiko'q taq.³Eh chawunchelaal taq nee taq inooj a'an rusuqkiil i ko'lemb'al iib' re' re' ruuk' suq kiil k'uxliis.⁴Ruum i re' je' taq wili i naa aq'orom: Chat'iosej, qaloq'ej taq i QaJaaw Dios ruuk' i xub'an, cha q'or taq keh i tinamit, eh cha q'or taq keh chi xa re' wo' reh xiik' naah nimaal wach chikiwach chu'nchel.⁵Eh cha tz'uyej taq wach i QaJaaw Dios, ruum xiik' naah i nimaal wach taqe i rub'an, eh chayeew taq chi naab'jik keh chu'nchel i tinamit.⁶Re' taq i hat wilkaat taq Sión, cha k'er taq aachii' chi tz'uuy ruum i rusuqkiil taq ak'ux, ruum xiik' naah nimaal wach, wilik ruSantohiil taq aaDios wilik taq chaxilak. Re' ruq'orariik rib'iral chib'ih i naa ruk'ulum i tinamit Babilonia

¹Re' Isaías rak'uun i Amoz xk'uhtjik reh parusaq wiriik ruum i Dios chib'ih i naa ruk'ulum i tinamit Babilonia.

²Chajosaj taq i rehtalil chinaah inajt naah yuuq'. Eh cha q'or taq keh i soldado chi naa taq awokiik chupaam i kiye'aab' taqe i aj taaq'oom chikinaah i tinamit.³Eh re' i hin naa nusik'im kiwach nu soldado kow kiib', reh chi narojiik b'anroq keh i aj ixowaal re' re'. Eh naakeliik korik, ruuk' i re' naakiye'em nuloq'il, inki Dios.

⁴Chinaah taqe i yuuq' inib'irjik chi k'erlik kichii' i ruk'ihaal tinamit. Re' i choqik inki a'n re' taqe i ruk'ihaal tinamit kianam jinaj wach kik'ux. Re' i QaJaaw Dios i ruyeew rukowiil kik'ux i ru soldado reh chi naa kojiik chi q'aq'inik.⁵Re' taqe i re' najt naa kichaliik chi junsuut i wach ak'al, chusachariik kiwach chu'nchel i aj Babilonia ik'tesb'al reh i rujosq'iil i QaJaaw Dios.⁶Re' taq i hat tiib'oq taq ak'ux, ruum k'ulik iloq reh i q'iij chi naa ruye'em taq cho cha naah i rujosq'iil i QaJaaw Dios nim rajaawriik naa rusacham taq awach.⁷Eh chu'nchel i tinamit ma' k'isiin ta naa rutib'iik kik'ux, naa kikahniik chi ma' xta chik k'isinoq kikowiil.⁸Re' keh i ti' k'axik naa ruchaliik chikinaah, naa kiyo'jiik, naa rutib'iik kik'ux. Eh xiik' naah i ti' naakik'ulum, je' rukab' i ruti'kiil ixoq noq ink'ulik ruk'ux. Eh k'ul naakitz'ehtaam panaq'kiwach, naa rusahchiik kik'ux, xanaa chik rukaaqb'iik i kiwach.

⁹Re' i QaJaaw Dios ilook' i rureq i ruq'ijil chi naa ruye'em taqe panti' k'axik i tinamit, naa ruye'em i rujosq'iil. Eh naa rukanaam chi ma' xta chik wilik chupaam, naa rusacham kiwach chu'nchel i aj mahk.¹⁰Re' i ch'umiil ma' naa ta chik ruye'em i rusaqumaal, eh re' i q'iij xa kore' wo' naq elik i rub'an chaloq naa wo' chik ruq'equmriik wach. Eh re' poh ma' naa ta chik ruye'em i rusaqumaal.¹¹Re' i QaJaaw Dios je' wili i xuq'or: Re' hin naa nuye'em taqe chutojariik i kimahk i tinamit, taqe i yiib' wach kina'ojb'al ruum i kaansanik inki a'n naa wesam i runimaal kiwach i nimaq kiwach, taqe i kib'anik ti' k'axik.¹²Re' hin xama' k'ih ta chik i winaq naa nukanaam chi k'achalkeeb'. Xa je' chik kik'ihaal i holohik oro ar Orfir.¹³Chupaam taqe i q'iij re' re' noq naa nuye'em i nujosq'iil i hin nim wajaawriik, naa nuk'uyu'sam i taxaaj. Eh naa nuk'uyu'sam i wach ak'al, ik'tesb'al reh i nujosq'iil chinaah i tinamit.¹⁴Re' taqe tokoom tinamit naakimolom chi elik noq naa kojiik pan kitinamiit, je' rukab' noq inkimol chi elik i keej, je' kikab' i tentzun ma' xta cha'jen keh.¹⁵Re' i tinamit re' re', xa aha' pa' neenkik'am reje xanaa wo' rusachariik kiwach. Eh ma' k'isiin taqe ruuk' q'aslaj ch'ihch' naa kikanteesjiik.¹⁶Re' i kiha'lak'uun panaq'kiwach naakiq'ojariik wataq ab'aj, naa relq'jiik i chib'ih keh pankipaat, naa ruchopariik i kehk'een kuum i tokoom winaq.

¹⁷Re' hin naa nuk'amam taqe chaloq i aj Media, reh chi naa rub'aan keh. Re' keh, ma' nee ta inkik'ul i plata i oro chi tojb'al riij chi ma' ta neenb'aan keh.¹⁸Re' keh ruuk' i kiflecha naa kikansam taqe i k'ijolaq, eh ma' naa ta kiketelaam wach noq naa kikansam taqe i koxi aasjik, je' wo' i saq nimaq chik taqe.¹⁹Re' Babilonia q'e' naq holohik chi keh i tinamit, eh q'e' wo' naq looq', nim i rajaawriik chi keh i aj Caldeo. Xa re' la' re' hin i Dios, naa nusacham wach, je' rukab' noq xnusach wach i Sodoma, i Gomorra.²⁰Eh ma' awach ta chik i naa rupatiniik ar chi jumpech, ma' xta chik i naa ruwihiik ar, eh ma' naa ta chik kiyejaam ki perpat ar taqe i aj árabe, eh ma' naa ta wo' chik kiye'em i kichikoop ar taqe i aj cha'jen chikop.²¹Naa la' rukahniik chi kiye'aab' i chikop kiwihik chupaam i ye'aab' chiq yuuq'. Eh ar naa kiwihiik taqe tuhkur, taqe i nimaq chikop wilik kixiik', taqe i kaprax, xanaa chik kipisk'anik pankooq ar.²²Eh chupaam taqe i paat imb'aan wii' i taaq'anik, re' chik taqe i josq'laj chikop naakik'erem kichii', taqe i xojb', je' wo' chupaam inajt kinaah paat ko'lb'al iib'. Je' re' noq xa ilook' insacharik wach i Babilonia, inki Dios. Re' QaJaaw Dios naa wo' chik ruketelaam kiwach i aj Israel

¹Re' i QaJaaw Dios naa wo' chik ruketelaam kiwach i aj Israel, re' taqe i riih rumaam i Jacob. Naa wo' chik ruk'amam taqe chaloq chupaam i kiye'aab', eh wilik taqe i tokoom tinamit naa ruchaliik chikiij.²Re' chik taqe i aj Israel naa rutaaq'aniik keh i tokoom tinamit naa ruchaliik chikiij, naakiminariik pankowlaj kamanik chupaam i ye'aab' naa ruye'ariik keh ruum i QaJaaw Dios. Re' chik taqe i aj Israel naa rutaaq'aniik keh i tokoom tinamit re' naq taqe intaaq'anik imb'anik ti' k'axik keh.

³Re' taq i hat, aj i Israel noq naa ruye'em taq ahi'liik i QaJaaw Dios ruuk' i ti' k'axik, ruuk' i ruti'kiil taq ak'ux i hat taq minooj wii' chupaam i kowlaj kamanik.⁴Re' taq i hat, je' wili i naa taq aq'orom chi riij i kireey i aj Babilonia:
¿Mi xawil taq nik' wach noq xooj kuxoq imb'anik naq i ti' k'axik qeh? Eh ¿Nik' wach noq xhesteesjik i rajaawriik ink'axwik wach b'ehomal?⁵Re' QaJaaw Dios xresaj i kajaawriik, i q'e' naq kow kitaaq'anik. Eh xresaj i kajaawriik i q'e' naq kow kiib'.⁶Eh xresaj kajaawriik i kib'anik i ti' k'axik reh i tinamit ruum kijosq'iil, eh xama' kihi'lik ta chub'aan taqe re'. Eh ruum i kijosq'iil xa eliik inkiyeew panti' k'axik i tinamit.⁷Eh yu'naak chu'nchel i wach ak'al wilkeeb' pansuqkiil k'uxliis, inkik'er kichii' chi tz'uuy.⁸Eh re' taqe sohchaj, taqe i chakaltee' ar Líbano naa rusuuqb'iik kik'ux, je' wili i naa kiq'orom: Xa re' wo' noq xsacharik kiwach i kireey i aj Babilonia, ma' awach ta chik inyok'winaq qeh, inko'q taqe.⁹Eh noq naakilom awach i wilkeeb' pan kiye'aab' kamnaq, naa rusahchiik kik'ux. Eh noq naakilom chi naa awojiik k'oloq naa rusuuqb'iik kik'ux, naa kaat ruchaliik kik'ulum. Eh re' taqe wihinaq chi k'amaj b'eeh, taqe i wihinaq chi reyil naa kiwuktiik chaloq chi ak'ulariik.¹⁰Chu'nchel i re' je' wili i naa kiq'orom aweh: ¿Mi xat q'ehb'ik wo' re' hat je' rukab' noq xoj q'ehb'ik i hoj? ¿Mi xehteesjik wo' re' awajaawriik i hat je' rukab' noq xehteesjik i qajaawriik i hoj?¹¹Eh noq xub'an tixkiyeew wo' naq aloq'il ruuk' i q'ooj arpa, eh yu'naak ma' xta chik aloq'il, xokik taqe ruhahal ati'jolal, xa je' chik chinaah taqe i haah yokolkaat.¹²Eh re' hat i naq'at wo' naq kiwach i tinamit, yu'naak xak'ul aweh je' rukab' noq xkutarik chaloq wach ak'al i holohik laj saqum insihq'inik pantaq wahq'eq.¹³Re' hat je' wili i xaq'or panak'ux: Re' hin korehtaal kinjohtik pan taxaaj, ar naa wojiik wih-oq i wilkeeb' wii' i ruch'umiil i Dios. Korehtaal i nub'an i taaq'anik chinaah i yuuq' re' inkiloq'ej wii' i ki dios ar pantz'eet reh i rookb'aal i q'iij.¹⁴Re' hin naa wojiik wih-oq kochinaah taqe i suutz' korehtaal kinkahnik paruye'aab' i Dios, tiki wo' naq.¹⁵Xa re' la' re' hat yu'naak xkesaj awajaawriik, xatkikut ko chupaam i ruchamiil i jul wilkeeb' wii' i kamnaq.¹⁶Eh re' i naa kilwiik aweh na' chak'ul i re', naa rusahchiik kik'ux, je' wili naa kiq'orom: ¿Mi ma' re' i winaq wili re' i ruk'uyu'saj naq i ak'al ruum i rajaawriik, xakib'arb'otik chik ruum kiyo'jiik i tinamit chuwach,¹⁷eh i ma' xta chik jino'q xukanaa' chupaam i tinamit, xukanaa' chi xa je' chik rukab' i ye'aab' chiq yuuq'? ¿I rub'an naq ti' k'axik keh i tinamit, ma' jaruuj naq i roq'taaj taqe reje, i ruminim pankowlaj kamanik? inko'q taqe.¹⁸Eh chu'nchel i reey wilkeeb' wach ak'al kimuhqik chi korik, eh yu'naak k'ahchi' keeb' chi hi'lik chupaam kiye'aab' muqulkeeb' wii'.¹⁹Xa re' la' re' hat ma' naa ta kaat kimuq'aam parub'ehel, naa kaat kikutum reje wulu', je' rukab' imb'aan reh i sohk'. Eh ar naa kaat kikutum chi kixilak taqe i xa kansamaj ruuk' ch'ihch', i xa b'iyooj chi kalaq. Xa nik' wach jul naa kaat kikutum wii'.²⁰Re' hat ma' naa ta amuhqiik je' rukab' noq ximuhqik taqe i reey junch'uq, ruum re' hat xasach kiwach aatinamiit, xkuxik taqe akansam i tinamit. Eh ma' naa ta chik ruwihiik awiih aamaam ruum ayiib' wach na'ojb'al xa a'n.²¹Re' taq i hat cha yejaa' taq awiib' chi kikanteesjiik i riih rumaam i reey wili, ruum i mahk xkian i kimaam kati't. Reh chi ma' nee ta chik inkiye'q' pankooq i tinamit. Eh ma' naa ta kinujisam paam i tinamit, ma' naa ta kehchaam i ye'aab'.

²²Re' QaJaaw Dios nim rajaawriik je' wili i xuq'or: Re' hin naa nub'anam keh i tinamit, eh naa nusacham wach i tinamit Babilonia. Ma' xta chik i naa nukanaam, naa nusacham wach i kiih kimaam, inki.²³Re' hin naa nusutem chi ch'uwa' ak'al i Babilonia, naa nukanaam chi kiye'aab' i tuhkur, eh naa numesem cho paam naa nusacham kiwach, inki i QaJaaw Dios. Re' noq xq'orarik rib'iral chi naa rusachariik wach i tinamit Asiria

²⁴Re' QaJaaw Dios nim rajaawriik xti xuq'or i korik, je' wili i xuq'or:
Nik' wach nukapaam cho rub'aan naa wo' rojiik eloq wach. Nik' wach i nuyejaam cho wach je' wo' re' i naa nub'anam.²⁵Re' hin naa nusacham kiwach i aj Asiria pan kiye'aab' i aj Israel chinaah i yuuq' naa nub'anam keh, naa nuyeq'em taqe pan wooq. Kora'j naa wesam re' i ahl laj hiq kiye'em chinaah i nutinamiit Israel.²⁶Re' taqe i wili i nuyejaam wach chi naa nub'anam kuuk' i tinamit wach ak'al. Eh ruuk' i wajaawriik naa nub'anam keh i nimaq tinamit, inki i QaJaaw Dios.²⁷Re' wili re' i QaJaaw Dios xyej-anik wach, ma' awach ta chik neenyojwik wach. Re' reh ruq'orom chi naa rusacham kiwach i tinamit ma' xta neenq'ilwik reh. Re' ruq'orariik rib'iral i ti' k'axik i naakik'ulum i aj filisteo

²⁸Eh chupaam i haab' noq i xkimik i reey Acaz, re' Isaías xuq'or taqe i q'orik wili:

²⁹Re' taq i hat aj filisteo mansuuqb'ik taq ak'ux, chi ma' xta chik rajaawriik intaaq'anik taq aweh. Ruum wilik wo' chik i naa ruktiik cho ar, q'e' kow riib' je' rukab' i aaq'. Re' je' rukab' i rak'uun i aaq' xan pisk'anik chik.³⁰Eh re' taqe i neb'aa', xanaa wo' kireqem kiwa' kihaa, xanaa wo' kik'achariik chi suq kik'ux. Eh re' i QaJaaw Dios naa taq kaat rukansam ruuk' wi'jaleel i hat taq aj filisteo. Eh nik' chik k'ihaal inaakikahniik naa rusacham kiwach.³¹Re' taq i hat aj filisteo, ti oq'oq taq, chaloq taq ab'arb'otiik ruum pantz'eet reh i rookb'aal q'iij xa sib' chik kipaam i xi chalik chi q'aq'inik taq awuuk'. Eh ma' jino'q naa risam iloq riib' chi kixilak i kuch'ihil.³²¿Chib'ih taq i naa achaq'weem wii' i kaj taqareel i tinamit? Re' hoj je' wili i naa qachaq'weem taqe wii': Re' i QaJaaw Dios xye'wik paruye'aab' i Sión, re' rutinamiit ti' wilkeeb' ar naakiko'leem kiib', qoh ko'q. Re' noq i xq'orarik rib'iral i ti' k'axik xuk'ul i tinamit Moab

¹Re' taqe wili xq'orarik chi riij i tinamit Moab:
Xti korik noq re' i tinamit Ar rub'ihnaal, i tinamit Qir wilkeeb' ar i Moab, xa ruuk' i jinaj aq'ab' naa rusahchiik kiwach. Eh ma' jino'q chik i naa rukahniik ar²Eh re' taqe i aj Dibón, naa koq'iim chuwach i artaal wilik chinaah i yuuq'. Eh re' taqe i aj Moab, naa koq'iim chi riij i tinamit Nebo, i tinamit Medeba. Eh naa kijoyom i rismaal kinaah, i kusinchii'.³Eh naa kikojom i q'as wach itz'ihy chikiij, noq naakeliik pantaq b'eeh naa kojiik chi oq'ik pantaq k'aayb'al naakik'erem kichii' ruum i ruti'kiil kik'ux chinaah taqe paat.⁴Re' taqe i aj Hesbón, aj Eleale naakik'erem kichii', eh ko ar Jahaza naa rib'irjiik chaloq. Ruum i re' naa kiyo'jiik naa ruyojiik kik'ux taqe i ki soldado i aj Moab.⁵Re' hin ti' inwik'raaj taqe i aj Moab, ruum naakimolom chi elik ko Zoar, eh ko Eglat-selisiya naakiponiik. Eh suq kioq'ik noq naakijohtiik chinaah i yuuq' Luhit. Kow naakik'erem kichii' chi oq'ik, noq naa kojiik k'oloq chupaam i ye'aab' Horonaim.⁶Re' taqe i jul ha' ar Nimrim naakichiqiik. Naa ruchiqiik taqe k'im, chu'nchel i tik, taqe i chee' k'ahaam, ma' jino'q chik i xaq naa rukahniik chi rax.⁷Je' re' noq re' i chib'ih keh kimolom wach i b'ehoom, naa kik'amam reje chikiij kochi juntar i nim ha' Sauce rub'ihnaal.⁸Ruum chupaam i tinamit Moab aha' ta chik ma' naa rib'irjiik i oq'ik. Eh naa rib'irjiik Eglaim, naa rib'irjiik pan tinamit Beer-elim.⁹Eh re' taqe i ha' ar Dimón naa rusutiniik chi kik'. Re' hin koxiik naah i ti' k'axik naa nuye'em chikinaah i aj Moab. Eh re' taqe i ma' naa ta kikanteesjiik kuum aj ixowaal, kaq b'ahlam naa ruk'uxwiik keh.¹Re' taq i hat aj Moab i akeb'aam taq awiib' panchiq yuuq' Sela, neerub'an chi nee taq i naataq'aaj i rak'uun tentzun chi rukooch i reey wilik Sión.²Re' taqe ixoq aj Moab naakikanab'jiik chi chii' i nim ha' Arnón. Eh naa kikahniik chi je' kikab' i kok' tz'ikin ma' nkireq ta kisuuq'.³Eh je' wili i neenkiq'or ponoq keh i aj Sión: Cha a'n taq otob'il qeh, chakoj taq qana'ojb'al, qoh ako'leej taq je' rukab' i rub'an i muuj parutz'a'iil i q'iij. Ruum re' hoj k'ahchi'kooj kisik'im i aj ixowaal reh i qakanteesjiik.⁴Eh nee ta tii nayeew taq qapatal panatinamiit, qoh ako'leej i hoj, hoj aj Moab chikiwach inkaaj qakanteesjiik, inko'q taqe. Re' taqe aj ixowaal naa wo' kikanteesjiik, ma' naa ta chik rilariik kiwach chinaah wach ak'al.⁵Eh jinaj i re' ruuk' i riih rumaam i reey David naa rokiik chi reyil. Re' reh naa ruwihiik otob'il ruuk', eh parukorkiil naa rub'anam i q'ataj q'orik, eh naa ruye'em reh i ju'jun aha' wilik iraaj. Eh re' rub'ehel naa rub'anam.

⁶Re' hoj qeht'al chi re' taqe aj Moab ma' k'isiin ta inkinimb'isaj kiwach. Eh xa q'et q'et taqe, xa re' i yiib' wach na'ojb'al inki a'n ma' xta korik kuuk'.⁷Ruum aj re' chu'nchel i aj Moab, naa koq'iim ruum i ti' naakik'ulum. Eh ruum chi ma' naa ta chik kinik'eem wach kikaxlanwi'k inkorjik ruuk' i chiq uuva re' inkorjik cho ar Qir-hareset.⁸Naa ruchiqiik i kiye'aab', naa ruchiqiik wach i ki uuva chupaam i ye'aab' Hesbón, je' wo' chupaam i ye'aab' Sibna, naa ruchiqiik kuum i tokoom tinamit. Eh noq xub'an chaloq i uuva inkitik imponik ko chupaam i tinamit Jezer, eh imponik wo' naq ko chupaam i chiq yuuq', je' wo' chi chii' i palaw.⁹Ruum aj re', re' hin xa je' chik kinoq'ik aj Jezer, ruum naa rusachariik wach i ki uuva. Eh ti' nuk'ux noq kinoq'ik chikiij i aj Hesbón, i aj Eleale. Re' taqe re', ma' naa ta koqiim noq naa rusachariik wach i kitik, ko ruum chik i q'aq'inik naakik'erem kichii'.¹⁰Eh ma' naa ta chik ruwihiik suq kiil k'uxliis chupaam i kiye'aab'. Ma' awach ta chik i naa rutz'uyiniik chupaam i ye'aab' intikarik wii' i uuva, ma' naa ta chik kiyitz'im i riis. Ma' awach ta chik naa rusuuqb'iik ruk'ux, ruum re' hin naa wesam i rusuqkiil kik'ux.¹¹Re' hin naa rutib'iik nuk'ux ruum i ti' k'axik naakik'ulum i aj Moab, i naakik'ulum i aj Qir-hareset.¹²Re' taqe i aj Moab naa wo' naq kojiik chinaah taqe inajt naah yuuq' chulooq'jiik taqe i tiyoox, xa re' la' xama' xta wo' chik inaakesam ruuk' i re'.

¹³Re' i QaJaaw Dios re' taqe i ti' k'axik wili ruq'orom cho najtir chi naakik'ulum taqe i aj Moab.¹⁴Eh yu'naak re' QaJaaw Dios je' wili i xuq'or:
Re' taqe i aj Moab ach ixib' haab' naa kik'achariik, xa nupajam chik i q'iij, je' rukab' noq impajarik i q'iij reh i kamanoom. Eh naa rehtesjiik i kajaawriik, atoob' ta kik'ihaal wo' naq, xama' k'ih chik i naa kikahniik, eh ma' kow ta chik kiib', inki. Re' i ti' k'axik xchalik chinaah i tinamit Damasco

¹Re' Isaías je' wili i xuq'or:
Re' i tinamit Damasco naa rukahniik chi ma' re' ta chik tinamit. Naa rusachariik wach chu'nchel i wilkeeb' chupaam.²Eh re' tinamit Aroer naa rukahniik chi ma' xta chik i wilik chupaam ch'ahn chik i naa rupoq'iik ar, re' chik taqe tentzun naa kianam kiwa' ar, ma' xta naa ruyohb'isaniik keh.³Re' taqe aj Efraín naa rehtesjiik i runimaal kiwach, je' wo' taqe i aj Damasco. Eh re' taqe aj Siria i ma' naa ta rusachariik kiwach, naa kikahniik pank'ixb'ilaal, je' wo' taqe i aj Israel, inki QaJaaw Dios nim rajaawriik. Re' ti' k'axik chalik chinaah i tinamit Israel⁴Eh chupaam i q'iij re' re', naa rehtesjiik i runimaal kiwach i aj Israel, re' taqe i riih rumaam i Jacob, naa wo' rusachariik wach i kib'ehomal.⁵Re' i tinamit Israel, naa rukahniik chi ma' xta chik i wilik ar xan tz'irik chik paam, je' rukab' noq injacharik i tik wach k'ixkaab' Refaím, noq xa re' chik taqe i rooq kikahnik ar.⁶Ach kiib' ixib' i patineel naa kikahniik chupaam, je' rukab' noq inkahnik kiib' ixib'-oq wach i olivo noq sik'ooj chik i wach. Je' rukab' noq xa ju'jun chik i wach i chee' inkahnik ju' taq q'ab', inki i Dios, qaDios i hoj aj Israel.

⁷Eh ruum taqe re', naa wo' chik kipahqaam kitoob'jiik reh i QaJaaw Dios i aj Israel. Re' ixtz'uhkrisanik cho keh, re' wilik ruSantohiil.⁸Re' keh ma' naa ta chik kojiik loq'ineel chuwach i artaal xakiyejaam ruuk' kiq'ab'. Eh ma' naa ta kojiik loq'ineel chuwach i tiyoox kiyejaam chi rujalwaach i Asera, chuwach kiyejaam chi rujalwaach i q'iij.

⁹Eh chupaam i q'iij re' re', naa rukahniik chi ma' xta chik ko'lb'al kiib' i kitinamiit. Naa kikahniik je' rukab' noq xkahnik chi ma' xta chik i wilik chupaam i kitinamiit i aj heveo, i kitinamiit i aj amorreo, noq xkimol chi elik chikiwach i aj Israel.¹⁰Ruum re' taq i hat xsahchik taq panak'ux i Dios inko'linik taq aweh, i je' paat ab'aj i ko'lemb'al iib' taq cha weh. Eh xa tik taq atik q'e' holohaq, xatik taq i uhtz'ub', ye'b'al kiloq'il i tiyoox.¹¹Re' taq i hat noq i naa tik taq i re' xa nacha'jeej taq chik, re' taq inawaaj chi naa rupoq'iik cho chi jumehq'iil. Xa re' la' re' taq atik re' re', naa rusachariik wach noq naa ruchaliik i ti' k'axik chinaah, xama' xta wo' taq i wach naa amolom.

¹²Eh ma' k'isiin i ti' k'axik naakik'ulum taqe i k'ih seht chi tinamit. Naakik'erem kichii' kochinajt naa rib'irjiik chaloq. Xa je' chik rukab' i choqik i rub'an i palaw, i choqik inki a'n i nim ha'.¹³Xa re' la' noq naakiq'ilariik ruum i QaJaaw Dios, naakimolom chi elik naa kojiik chi najt yuuq', je' rukab' noq ink'amarik reje chi najt i rutuus ixiim ruum i kowlaj teew, eh noq ink'amarik reje i pooq ruum i kaq suut teew.¹⁴Eh noq inokik i q'iij, re' taqe i aj Israel naakiye'ariik panti' k'axik. Eh noq naa ruchaliik rusaq'iik, naa rusachariik kiwach taqe inixowanik kiwach. Je' wili i ti' k'axik i naakik'ulum taqe i ki-ixowanik wach i rutinamiit i QaJaaw Dios. Xq'orarik chinaa ruchaliik i ti' k'axik chinaah i tinamit Etiopía¹Re' taq i hat q'e' taq ti' i naa ak'ulum i wilkaat taq chupaam i tinamit wilkeeb' wii' utz' chi chii' taqe i nim ha' ar Etiopía²Re' taq i hat inataq'aaj taq i awaj taqareel nah taq palaw, nah taq nim ha' chupaam taqe barco kowlaj k'im korjinaq wii'. Xa kow chik inki a'n noq kichalik taqe aj taqareel, eh yu'naak nee wo' chik kisutinik reje chupaam i kitinamiit i q'e' kow kiib', q'e' holohaq taqe. Eh inyohljik kiwach kuum taqe i sutimaj kiij chi ha'.³Je' re' noq chawunchelaal taq i hat wilkaat taq wach ak'al koruman chi naa taq ajosam jinaj i rehtalil chinaah i yuuq'. Chawilow taq, noq naa ruxuljiik chee tuun chab'iraj taq.

⁴Re' i QaJaaw Dios je' wili i xuq'or: Re' hin ayu' pan taxaaj chupaam i nuye'aab', naa wilom chib'ih i naa kianam i tinamit, je' rukab' noq insihq'inik i q'iij noq kore' xukohlaaj i jab'. Eh je' rukab' noq inchalik i mus jab' noq kore' xkuxik i jach.⁵Eh noq i rutoq'aa' ixmak'inik i uuva korehtaal inq'aanb'ik i wach. Eh noq komajaa' i rutoq'aa' wachinik inyok'arik iloq i chiqiij chi xilak i q'ab'. Je' re' i naa taq ak'ulum i hat, hat taq aj Etiopía noq naa kisacham taq awach.⁶Eh re' taqe i kiti'jolal i aj ixowaal, xa aha' naa rukahniik chi kutlik wataq yuuq', eh re' taqe i k'uch naa ruk'uxwiik keh, ruch'ihil taqe i josq'laj chikop, re' taqe i chikop re' re', ar naa kik'sam i siq'jil, iq'ilej q'iij.

⁷Eh chupaam i q'iij re' re', naa kik'amam chaloq i kimayiij chuwach i QaJaaw Dios taqe i tinamit nimaq kooq, eh q'e' holohaq taqe. Eh q'e' kow kiib', inyohljik kiwach kuum taqe i tinamit kotimaj kiij chi ha'. Re' i kimayiij naa kik'amam cho chinaah i yuuq' Sión, re' inlooq'jik wii' i QaJaaw Dios. Xq'orarik chi naa ruchaliik i ti' k'axik chinaah i tinamit Egipto

¹Xq'orarik chi naa ruchaliik i ti' k'axik chinaah i tinamit Egipto,
je' wili xq'orarik keh: Chab'iraj taq, re' i QaJaaw Dios chinaah i suutz' kow i rub'an naa ruponiik taq cha naah, eh naa ruk'uyu'sam pan kiye'aab' taqe i tiyoox ar Egipto. Re' taq i hat aj Egipto naa taq ayo'jiik chuwach.²Re' hin naa nuye'em q'ab' chi k'ul naa kipletoheem kiib' i aj Egipto. Eh k'ul naa kipletoheem kiib' xa kas kichaaq' kiib'. Eh re' i ju'jun seht chi tinamit k'ul naa kipletoheem kiib', je' wo' taqe i reey.³Re' hin naa nuyojom i kina'ojb'al taqe i aj Egipto, naa nuyojom wach i kiyejaam wach. Eh re' keh naa kipahqaam i koq reh i kitiyoox chihreet inkik'ul, je' wo' keh i aj war, keh i aj q'iij, reh i kánjel kit'iosil taqe kamnaq.⁴Re' hin naa nuq'asam pan q'ab' josq'laj aj taaq'oom i tinamit Egipto. Eh naa nuq'asam pan q'ab' i reey kow intaaq'anik, inki, i QaJaaw Dios nim rajaawriik.

⁵Eh re' i ruha'iil i palaw naa ruchiqiik, naa wo' ruchiqiik chu'nchel i nim ha' wilkeeb' ar.⁶Re' taqe i rooq ha' wilkeeb' Egipto, naakichiqiik, eh naakichuhb'iik. Eh re' taqe i kaxlan-aaj, taqe i kowlaj k'im naakichiqiik.⁷Chu'nchel i ch'ahn wilkeeb' chi chii' i nim ha' Nilo naa rukuxiik kichiqiik. Naa wo' rukuxiik kichiqiik chu'nchel i tik wilkeeb' chi chii' i nim ha' re' re'.⁸Eh re' taqe aj karineel chupaam i ha' re' re', naa koq'iim, naa rutib'iik kik'ux, ruum ma' naa ta chik kikutum qohoq i kiya'l chopb'al kar, je' wo' hoq i kiloklok naah ch'ihch' chopb'al kar ruum naa ruchiqiik i ha' re' re'.

⁹Re' taqe i kiyej-anik i holohaq itz'ihy, taqe i kikemwik reh itz'ihy, naa rutiib'iik kik'ux.¹⁰Eh chu'nchel i kikemwik i itz'ihy naa ruyojiik kik'ux, je' wo' chu'nchel i aj karineel.

¹¹Xti korik chi re' taqe i k'amal kib'eeh i aj Zoán, ma' xta kina'ojb'al. Re' i kikojwik runa'ojb'al i reey Egipto yiib' wach i kina'ojb'al. Eh ¿Chib'ih reet noq inkiq'or i koq reh i reey ar Egipto chi je' wili? Re' hoj, hoj kiih kimaam i wilik kina'ojb'al, hoj kiih kimaam i najtir reey, inki taqe.¹²Eh ¿Aha' wilik taqe i kikojwik na'ojb'al inaq'or? wila' korik chi wilik kina'ojb'al neerub'an chi nee kichalik yu'naak eh neenkiq'or aweh chib'ih jariik i ti' k'axik naa ruchaliik chikinaah aatinamiit Egipto.¹³Re' taqe i k'amal kib'eeh aj Zoán sahcheel i kina'ojb'al, je' wo' taqe i k'amal kib'eeh aj Menfis. Chu'nchel i k'amal b'eeh wilik pan kitinamiit xkiyeew kiib' chi jot'arik, eh xkiyeew chi jot'arik i tinamit Egipto.¹⁴Re' i QaJaaw Dios xusach i kina'ojb'al, reh chi ma' holohik ta naa kib'aniik. Eh re' taqe i aj Egipto ma' nelik ta korik inki a'n ruum je' taqe rukab' i xohk'reel i ruxab'ej riib', eh k'ulchel inooj.¹⁵Re' tinamit Egipto ma' awach ta naa ruko'liniik reh ni xata wilik rajaawriik, ni xata ma' chih rajaawriik, ni xata re' ipak', i kalaab'.

¹⁶Eh chupaam i q'iij re' re', naa kikahniik i aj Egipto chi xa je' chik taqe ixoq, xakib'arb'otik chik ruum kiyo'jiik. Re' keh naa kiyo'jiik noq naakilom chi naa ruye'em chikinaah i rujosq'iil i QaJaaw Dios nim rajaawriik.¹⁷Eh re' taqe i aj Egipto ma' k'isiin ta naa kiyo'jiik chikiwach i aj Judá. Noq naa kib'iram rib'iral i ti' k'axik yej-amaj cho wach chi naa ruye'ariik chikinaah ruum i QaJaaw Dios.¹⁸Eh chupaam i q'iij re' re', ho'oob' taqe i tinamit naa kichaliik Egipto, eh naakiq'orik pan kiq'oral i aj Canaán. Eh naa kiq'orom xti korik chi naa kiloq'em i QaJaaw Dios nim rajaawriik. Eh jinaj keh i tinamit re' re' i Herez naa rubíhnaam.

¹⁹Eh chupaam i q'iij re' re' naa ruwihiik jinaj ru artaal i QaJaaw Dios ar Egipto. Eh chupaam reje i k'ula't reh i rutinamiit naa ruwihiik jinaj inajt naah ab'aj loq'oomb'al reh i QaJaaw Dios.²⁰Re' taqe i re' naa rukahniik chi rehtalil chi re' i QaJaaw Dios naa ruwihiik ar Egipto. Noq re' taqe i tinamit naa kipahqaam i rotob'il ruum i ti' k'axik, naa wo' kib'irjiik. Re' i QaJaaw Dios naa rutaq'aam chaloq jinaj i naa resaniik keh pan i ti' k'axik.²¹Re' i QaJaaw Dios naa ruk'uhtaam i rotob'il kuuk' i aj Egipto, eh naakinimam chi wilik i Dios naa kik'atam kimayiij chuwach, eh naa kiloq'em. Re' i naa kiq'orom reh chi naa kianam, naa wo' kianam.²²Re' QaJaaw Dios naa rik'sam taqe chi ti' i aj Egipto, eh naa wo' chik resam taqe chupaam. Eh re' keh naakinimam i QaJaaw Dios, naa rib'iram taqe, naa resam taqe chupaam i ti' k'axik.

²³Eh jinaj i b'eeh naa reliik chaloq Egipto naa ruponiik ar Asiria. Re' taqe aj Egipto naakiponiik ar Asiria, eh re' taqe i aj Asiria naakiponiik ar Egipto. Eh naa kianam jinaj wach kik'ux, pankomonil naa kiloq'em i QaJaaw Dios.

²⁴Eh chupaam i q'iij re' re', naa rub'anam jinaj kiwach i ixib' chi tinamit. Re' Israel, re' Egipto, re' Asiria, kuum i keh naakik'ulum i rotob'il i Dios i tinamit wach ak'al.²⁵Noq naakikuxeesjiik ruum i QaJaaw Dios nim rajaawriik je' wili i naa ruq'orom: Re' hin naa nukuxisam i nutinamiit Egipto, naa nukuxisam i Asiria, re' i nuyejaam chaloq, je' wo' hoq i Israel re' i xa nutinamiit wo' chaloq, inko'q. Xq'orarik chi naa ruchaliik i ti' k'axik chinaah i tinamit Egipto, i Etiopía

¹Pan jinaj cho q'iij, re' i Sargón kireey i aj Asiria, jinaj i k'amal kib'eeh i soldado xutaq'aaj cho Asdod chi q'aq'inik. Eh xub'an wo' keh i tinamit re' re' xuchop naah.²Re' i QaJaaw Dios xuq'oreej i jalal ruq'oral, Isaías rub'ihnaal rak'uun i Amoz, je' wili i xuq'or reh: Chawesaj anim rooq so' ach re' paam aso' neenkahnik chawiij, eh chawesaj axijab', inki. Eh re' Isaías xresaj wo' hoq i runim rooq so', ruxijab'.

³Re' i QaJaaw Dios je' wili i xuq'or: Re' Isaías xkahnik chi ma' xta runim rooq so', eh chi ma' xta ruxijab' chi rooq, chuwach ixib' haab'. Re' re' rehtalil i ti' k'axik naa ruchaliik chikinaah i aj Egipto, i aj Etiopía.⁴Je' re' i naa rub'anam i kireey i aj Asiria, ma' xta kiso', eh ma' xta kixijab' noq naa ruk'amam chi prexohjik i aj Egipto chi nimaq chi kok' taq, je' wo' taqe aj Etiopía. Eh naakik'uhtaam kik'ixb'ilaal ruum t'usulkeeb' noq naa kik'amariik reje.⁵Eh re' i tinamit naa rusahchiik kik'ux, naa kiyo'jiik ruum i naakik'ulum i aj Etiopía, ruum ar naq ch'iklik kik'ux. Eh je' wo' kuum i aj Egipto re' naq inye'wik runimaal kiwach.⁶Eh je' wili i naa kiq'orom i wilkeeb' reje pansak'aaj reh i rookb'aal q'iij: Chawilow taq i xuk'ul i tinamit inqach'ikaa' naq wii' qak'ux. Re' naq i qohooj wii' chupahqaljiik qatoob'jiik, reh naq chi naakooj ruko'leem pan q'ab' i kireey i aj Asiria. Eh yu'naak ¿Awach chik naa ruko'liniik qeh? inko'q taqe inki. Re' ruq'orariik chi naa ruk'ulum ti' k'axik i Babilonia

¹Re' taqe i wili xq'orarik chi naa ruk'ulum i tinamit Babilonia.
Xa je' chik kaq suut teew jab' chalik i rub'an pansak'aaj reh i rookb'aal q'iij, eh panchiq yuuq' xa ti yo'joq chik ruum.²Q'e' ti' i xuk'uhtaaj weh panusaq wiriik i Dios. Re' jot'ool chi ma' eht'alimaj i rub'an. Re' aj sachool i rub'an wo' i sachooj. Re' taq i hat aj Elam, aj Media hiy taq cha a'n keh i tinamit re' re', reh chi nee nelik taq cha naah i ti' k'axik.³Re' hin ma' k'isiin i nuyo'jiik, q'e' ti' xwik'raaj taqe i xwilow panusaq wiriik. Ma' k'isiin ta ti'kiil nuk'ux ruum xa je' chik rukab' i ruti'kiil jino'q ixoq noq ink'ulik ruk'ux. Re' hin insahchik nuk'ux ruum taqe xwilow re' re'.⁴Re' hin insahchik nuna'ojb'al, ma' k'isiin taj nuyo'jiik. Q'e' wo' naq suq nuk'ux noq inqajik i q'iij, xa re' la' insutinik chi ruti'kiil k'uxliis.⁵Eh xwilow b'ila' chi xkiyejaa' i mexa, ixkihe' wach itz'ihy chuwach. Eh i xkian kiwa' kihaa', re' i k'amal kib'eeh i soldado je' wili i xuq'or: Cha juk' taq wach pulato ch'ihch' ko'lemb'al taq awiib'.⁶Ruum re' QaJaaw Dios je' wili i xuq'or weh: Re' hat chakoj jino'q soldado aj cha'joom, reh chi neeruq'or chib'ih taqe i neenk'uloq.⁷Wila' xrilow reje wach i kikareta qeremaj kuum i kawáyu. Eh wila' xrilow chi xik'uloq taqe i winaq chi iqilkeeb' chi riij b'uurux, oon chi riij taqe cameyo, nee rilow chi korik inki.⁸Eh re' xokik chi cha'jinik kow chik inche xuk'er cho chii' chuq'orariik chi je' wili: Re' hin Jaaw, xak'ahchi' kiin chi cha'jinik panuye'aab' chi q'iij chi aq'ab'.⁹Re' hin xwilow chi wilik i winaq xi k'uloq pantaq kareta qeremaj taqe kuum i kawáyu, inki. Eh wilik i xuk'er cho chii' chi je' wili: Xsacharik chik wach, xsacharik wach i tinamit Babilonia, chu'nchel i kitiyoox xiooj wach ak'al.

¹⁰Hat nutinamiit Judá, xyeq'arik taq apaam, je' rukab' imb'aan reh i trigo, Re' hin nuq'orom aweh i ruq'orom i QaJaaw Dios nim rajaawriik, re' i qaDios i hoj, hoj aj Israel. Re' ruq'orariik chi naakik'ulum i ti' k'axik i aj Duma.

¹¹Xq'orarik chi naakik'ulum i ti' k'axik i aj Duma,
wilik i naa ruq'oriniik cho weh Seir, chi je' wili: Hat aj cha'joom ¿Nik' i ora wilkooj? ¿Nik' neensaq'ik? inko'q taqe.

¹²Eh re' aj cha'joom je' wili i xuq'or:
Ach k'isiin ma' insaq'ik, xa re' la' naa wo' chik rokiik aaq'ab'. Awach iraaj runab'eem chupahqaaj nee wo' chik i rub'an chi nee taq ti sutinik ruka'peech, inki. Re' ruq'orariik chi naakik'ulum i ti' k'axik i aj Arabia

¹³Eh xq'orarik chi naakik'ulum i ti' k'axik i aj Arabia:
Re' taq i hat aj Dedán, k'ahchi' taq awik'sam aq'ab' pantaq ch'ahn paruyuq'ul i Arabia.¹⁴Eleen taq chaloq i hat aj Tema, chuye'ariik kiwa' kihaa' taqe i kinuhmik, taqe chiqiij kichii' elik inki a'n¹⁵Ruum re' keh elik inki a'n ruum naa kikanteesjiik ruuk' i q'aslaj ch'ihch', ruuk' i flecha, ruum yohb'aal wach i kijosq'iil inixowanik kiwach.

¹⁶Re' QaJaaw Dios je' wili i xuq'or weh: Xa pan jinaj haab' insahchik wach i runimaal kiwach i aj Cedar, xa pan ajlamaj q'iij naa rub'aan, je' rukab' noq inajaljik i ru q'iij i moso.¹⁷Atoob' ta q'e' wo' naq kow kiib' chi q'aq'inik taqe i aj Cedar, xama' k'ih ta chik i kiflecha naa rukahniik i aj q'aq'ineel, inki. Re' i wili re' i QaJaaw Dios inq'orik, re' i qaDios i hoj, hoj aj Israel. Re' ruq'orariik chi naa ruk'ulum i ti' k'axik i Jerusaleem

¹Re' wili naa ruk'ulariik wach k'ixkaab', re' i xwilow panusaq wiriik.
¿Chib'ih taq i xak'ul, noq chawuncheel taq xatjohtik chinaah taq aapaat, ruum ayo'jiik?²Chupaam taqe aatinamiit wilik tukinik iib', i choqinik iib', eh suq wo' naq taq ak'ux. Re' taq akamnaaq ma' re' ta ruuk' q'aslaj ch'ihch', ma' re' ta panq'aq'inik xi kanteesjik.³Re' i k'amal taq aab'eeh xkimol chi elik, noq naa naq kikanteesjiik ruuk' flecha, xa re' la' xa xichoparik wo' hoq xi k'amarik reje kuum inixowanik kiwach. Atoob' ta xkimol wo' naq chi elik chi najt.⁴Re' hin je' wili i xnuq'or: Kinakanaa' taq naawoq'iim q'e' ti' nuk'ux. Eh ma' awach chik inq'uninik nuwach, ma' naa ta chik numayam oq'ik chi riij i rusachariik wach i nutinamiit.⁵Re' QaJaaw Dios nim rajaawriik, ruq'orom chi naa ruchaliik i yo'jik, i tukinik wachiis sachaj wachiis, chupaam i ye'aab' xk'uhtjik weh panusaq wiriik. Eh noq naa ruq'ehb'iik i tz'aq kotimaj wii' riij i tinamit, re' koq'iim naa ruponiik kopan taq rax chee'.

⁶Re' taqe i aj Elam, pan kareta, rij kawáyu chalik inki a'n kiyohq'eem kiflecha. Eh re' i aj Qir xkik'am chaloq i pulato ch'ihch' ko'lemb'al kiib'.⁷Re' taqe i wach k'ixkaab' q'e' holohaq xinujik chi kareta reh q'aq'inik. Eh re' taqe i xi chalik chi riij i kawáyu xkipab'aa' kiib' chi chii' i ookb'al reh i tinamit Jerusaleem.⁸Re' taq i hat aj Judá, ma' naa ta taq a'nam ruko'ljiik awiib'. Jumehq'iil wo' naq taq naa awesam chaloq i ch'ihch' chupaam i paat wilik panch'ahn.⁹Re' taq i hat xawil taq chi k'erenaq chik i tz'aq kotimaj wii' riij i rutinamiit reey David. Eh ruum i re' xokik i ha' chupaam i ye'aab' ha' wilik panyuuq'.¹⁰Re' taq i hat xawil taq i paat wilkeeb' Jerusaleem, chi wilik i xraaj yojarik, reh chi xareq taq i tz'a'amb'al korb'eesb'al reh i tz'aq kotimaj wii' riij i tinamit.¹¹Eh chi kixilak i ki'ib' chi tz'aq re' re' jinaj i tz'aq xkiyejaa' jilow i tz'aq korjinaq cho najtir ye'aab' ha'. Xa re' la' ma' xkipahqaaj ta kitoob'jiik ree Dios, re' i xye'wik cho q'ab' pampeet chi xikorjik chaloq i molb'al ha' re' re'.

¹²Eh chupaam i q'iij wili re' QaJaaw Dios nim rajaawriik, i ruq'or taq aweh chi tioq'oq taq, chi tiib'oq taq ak'ux. Eh chi chakoj taq i q'as wach itz'ihy, chi chajohmaaj taq wach aanaah, k'uhtb'al reh chi ti' taq ak'ux.¹³Eh re' taq i hat ninq'ijinik, xohk'rik, kaansanik ixoq wakax, kaansanik tentzun taq i na a'n, reh chi nak'ux taq. Eh je' taq wili inaq'or: Yu'naak qa a'n qawa' qahaa' chi suq ruum xa i iqal kab'iij qoh kimik, tiki taq.¹⁴Re' QaJaaw Dios nim rajaawriik, xuk'uhtaaj riib' weh i panusaq wiriik, je' wili i xuq'or weh: Korik chi ma' jaruuj naa nukuyum i kimahk i aj Jerusaleem, ruum korehtaal kikimik chub'aan, inki i Dios. Re' ruq'orariik chi naa rujaljiik wach jinaj i raj kamanoom ajaab'ees¹⁵Re' i QaJaaw Dios nim rajaawriik, je' wili i xuq'or weh: Hiy ruuk' i Sebna incha'jinik reh i paat imb'aan wii' i q'ataj q'orik, je' wili i cha q'or reh:¹⁶¿Chib'ih i k'ahchi' kaat i hat ayu'? ¿Awach q'orik aweh chi k'achi' ak'otom jinaj muq'umb'al? ¿Awach q'orik aweh chi chupaam i paat ab'aj wilik ayu' taxaaj xchalik ayejaa' amuq'umb'aal?¹⁷Re' QaJaaw Dios xuq'or chi naa kaat rukutum reje wulu', je' rukab' i rub'an i winaq wilik ransil i rukut reje wulu' i wilik ru mahk chuwach.¹⁸Eh naa kaat rutolem reje wach ak'al, je' rukab' imb'aan reh i pelota ar naa akimiik. Eh ar naakikutariik taqe i kareta kiye'wik naq runimaal awach. Ruuk' i re' naa ak'uhtaam ruk'ixb'ilaal i ajaab'ees tikamanik wii'.¹⁹Eh naa kaat resam chupaam akamaj wilkaat wii', eh chi naa resam awajaawriik.

²⁰Eh chupaam i q'iij re' re', naa nutaq'aam ruk'amariik i waj kamanoom Eliaquim rub'ihnaal rak'uun i Hilcías.²¹Eh naa nukojom reh itz'ihy i nakoj naq i hat, je' wo' asincho inakoj naq i hat, re' naq inye'wik runimaal awach. Naa wo' nuye'em reh awajaawriik i hat. Re' Hilcías, naa rukahniik chi je' jinaj kajaaw i aj Jerusaleem, i aj Judá.²²Re' hin naa nuye'em i rajaawriik, re' chik i reh naa rilwiik reh i riih rumaam i reey David. Eh re' i naa rutehem i reh ma' awach ta chik naa rutz'apwiik reh, re' i naa rutz'apam i reh ma' awach ta chik naa rutehwiik reh.²³Re' hin naa nuye'wiik reh paruye'aab' chi je' inch'aplojik kalawux. Eh naa ruye'ariik runimaal wach ruum taqe i awach reh i rajaaw.²⁴Eh nim wach i ihq naa rukahniik chinaah ruum chu'nchel i awach reh i rajaaw ruuk' i reh naa kipahqaam kitoob'jiik. Eh naa rukahniik chi je' kalawux ch'ilaab' reh i kulk re' ruuk' taqe i oro chi nimaq chi kok' taq.

²⁵Eh re' i QaJaaw Dios nim rajaawriik je' wili xuq'or: naa ruponiik i q'iij noq ma' naa ta chik rukuyum naa rojiik wach ak'al i ransil. Je' rukab' i kalawux noq ma' rukuy ta rahliil int'uyub'jik chi riij, inch'a'lojik qohoq wach ak'al i rihq, inki i QaJaaw Dios. Re' ruq'orariik rib'iral i ti' k'axik xuk'ul i tinamit Tiro

¹Re' taqe i wili i naakik'ulum i aj Tiro:
Re' taq i hat aj Tarsis i ti oq'oq taq ruum naa rusachariik wach i Tiro re' ti ponik taq eloq wii' pan barco Eh ko Quitim xab'iraj taq chaloq chi je' re' taq i naa ak'ulum.²Eh re' taq i hat i wilkaat taq chi juntar i palaw, naa taq rusahchiik ak'ux, je' wo' taq i hat aj Sidón i xat b'ehomrik taq ruum i k'aay ink'amarik cho pan barco.³Ruuk' taqe i b'iyajo inki a'n pan barco chinaah taqe i runimaal ha' Nilo inkireq kitumiin. Eh inooj naq kik'ayej chi naq'wach taqe i xa chib'ih jariik pantaq tokoom tinamit.⁴Eh re' taq i hat i aj Sidón i wilkaat taq chi chii' i palaw chaloq taq ak'ixiik, je' taq wili i naa aq'orom: Re' hoj je' naa ma' xqik'raaj taqe nik' ti'kiil i ak'unanik, je' naa ma' xqak'isaj ta jino'q qak'uun qixq'uun, tiko'q taq.⁵Eh re' taqe i aj Egipto, ma' k'isiin ta naa rutib'iik kik'ux noq naa kib'iram i naakik'ulum i aj Tiro.⁶Eh re' taq i hat i wilkaat taq reje chi chii' i palaw naa wo' taq awoq'iim eh naa taq amolom chi elik ar Tarsis.

⁷Eh je' wili i naa ruq'orariik taq chawiij: ¿Mi re' re' i tinamit wili i xa eliik naq suq kik'ux eh xawilik wo' cho najtir? ¿Mi ma' re' re' i tinamit wili i xa kiooj naq chi patinik chi najt?⁸Eh ¿Awach xq'atwik i q'orik chikinaah i aj Tiro chi je' re' i xkik'ul? Re' taqe i aj yakool chi kixilak k'amal b'eeh wo' naq taqe, eh xti nimaq wo' naq kiwach chikiwach chu'nchel i k'achareel.⁹Re' i QaJaaw Dios nim rajaawriik xq'atwik q'orik chikinaah. K'uhtb'al reh chi wilik rajaawriik chi rehtesjiik i kiloq'il, i runimaal kiwach i nimaq kiwach wilkeeb' sut i wach ak'al.

¹⁰Re' taq i hat aj Tarsis naa taq awojiik xa aha' yuuq', je' rukab' noq inik'ik i nim haa', ruum xehteesjik taq chik awajaawriik chi jumpech.¹¹Re' Dios xuyeew i q'ab' chinaah i palaw, eh xakib'arb'otik chik ruum kiyo'jiik taqe i wilik kajaawriik. Eh xutaq'aaj kikanteesjiik inko'linik naq keh i aj Canaán.¹²Eh je' wili i xuq'or keh i aj Sidón: Re' taq i hat, je' taq akab' i k'isa xq'un jot'ooj chik, atoob' ta neenamol taq chi elik Quitim, xama' naa ta wo' taq areqem rusuqkiil ak'ux.

¹³Eh chawil taq i kiye'aab' aj Caldeo, re' re' ma' re' ta naq tinamit, eh re' taqe i aj Asiria xich'ikanik reh, chi kiye'aab' i wilkeeb' cho panchiq yuuq'. Eh kijosaj kinimaq paat, xkijosaj i paat imb'aan wii' i q'ataj q'orik, eh re' wo' taqe i aj Asiria xsachwik kiwach.

¹⁴Eh re' taq i hat aj Tarsis i tib'iyajoinik taq pan barco, naa taq awoq'iim, ruum naa rusachariik wach i tiqajik taq wii'.

¹⁵Eh chupaam i q'iij re' re', naa rusahchiik pank'uxliis i Tiro chuwach i lajeeb' rukajwinaq haab', je' najtiil ink'acharik i reey. Noq ik'inaq chik i lajeeb' rukajwinaq haab', re' taq i hat aj Tiro naa taq kitz'uyem aweh i tz'uuy je' rukab' intz'uuyjik keh i k'oyoom laj ixoq.

¹⁶Re' i tz'uuy i ruq'or chi je' wili: Hat taq k'oyoom laj ixoq hat taq sahchinaq pank'uxliis, naa taq akotem paam i tinamit chi tz'uuy ruuk' arpa, xa re' naq taq naa awaajwaam chi naa taq ak'uliik pank'uxliis, inki.

¹⁷Eh noq ik'inaq chik i lajeeb' rukajwinaq haab', re' i QaJaaw Dios naa wo' chik ruye'em q'ab' keh i aj Tiro chi naa wo' chik kianam i yak kuuk' i tokoom tinamit. Eh je' nanaa kianam i k'oyomal kuuk' i tinamit sut i wach ak'al.¹⁸Eh re' i kiyak, i kitumiin naa kiq'asam pan q'ab' i QaJaaw Dios, ma' naa ta kimolom, ma' naa ta kitamam wach. Naa la' ruye'ariik keh i kikamanik parukamaj i QaJaaw Dios, reh chi neenkiloq' kiwa' kihaa', reh chi neenkiloq' kiholohaq so'. Re' ruq'orariik chi naa ruk'ulum i ti' k'axik i tinamit wach ak'al¹Re' i QaJaaw Dios naa rusacham wach i tinamit wach ak'al. Eh naa ruyojom wach, eh naa rutukem kiwach i rutinamiit.²Eh eliik wach i ti' k'axik naakik'ulum chi kunchelaal. Chi k'amal b'eeh aj tiij, chi tinamiit, chi patroon, chi moso, chi patroon ixoq, chi aj poh, chi loq'ool, chi aj k'aay, chi nye'wik i kemeel chi aj kemeel, chi b'ehoom, chi neb'aa'.³Eh naa rusachariik kiwach chu'nchel i wilkeeb' wach ak'al, eh naa rukuxiik relq'jiik chu'nchel i chib'ih keh. Re' wili re' i QaJaaw Dios xq'orik reh.⁴Eh naa ruchiqiik i wach ak'al, naa rusachariik wach i tinamit, Re' taqe kow kiib' naa kikahniik chi ma' xta chik kaansil.⁵Re' i wach ak'al naa rojiik chi re' chi ma' re', kuum i naa kikanaam runimjiik i ruk'uhb'aal i Dios. Eh ma' naa ta chik ruponiik panaq'kiwach i ruyejaam cho wach reh chi juneliik.⁶Ruum aj re' ruuk' i runimaal ti' k'axik naa rusachariik wach chu'nchel i wach ak'al. Eh re' taqe i k'achareel wilkeeb' chuwach naakik'ulum i ti' k'axik, ruum aj re' naa rusachariik kiwach, eh xama' k'ih ta chik i naa kikahniik.

⁷Re' i uuva naa rutikariik naa ruchiqiik, ma' xta chik i riis naa rumolariik. Eh re' taqe i tinamit xa eliik naq suq kik'ux naa rutib'iik kik'ux.⁸Eh ma' naa ta chik rib'irjiik i q'ooj tambor, i rusuqkiil i ruq'or i arpa. Ma' awach ta chik naa ruye'wiik rusuqkiil kik'ux ma' naa ta chik rub'aan i ninq'iij.⁹Ma' awach ta chik i naa kianam kitz'uuy noq uk'inik riis uuva inki a'n Re' i ki' laj ha' k'ah chik naakik'raam.¹⁰Re' i tinamit naa rukahniik chi xama' ruq'or ta chik korik. Re' taqe i paat naakitz'ahpiik ma' awach ta chik i naa kokiik ar.¹¹Eh naakik'erem kichii' pantaq b'eeh, ruum ma' naa ta chik kireqem i riis uuva. Eh ma' naa ta chik kireqem rusuqkiil kik'ux chinaah i wach ak'al.¹²Re' i tinamit naa rukahniik chi xan tz'irik chik paam. Eh re' taqe i ru puertahiil i paat naakixereb'iik.¹³Eh re' i tinamit wach ak'al naa rukahniik chi ma' xta chik wilik chupaam. Naa rukahniik chi je' rukab' noq inkuxik ruq'ehb'iik i wach i olivo, je' rukab' noq inkuxik rusik'ariik i wach i uuva.

¹⁴Eh re' taqe i ma' naa ta kikanteesjiik haa' naakik'erem kichii' chi tz'uuy re' wilkeeb' chi chii' i palaw, noq naakilom i runimaal wach i QaJaaw Dios.¹⁵Eh je' wo' i wilkeeb' chi korkiil ireelb'aalq'iij, taqe i wilkeeb' reje chi chii' i palaw, naa wo' kiye'em ruloq'il i QaJaaw i keh, re' i qaDios i hoj, hoj aj Israel.¹⁶Xa aha' naa rib'irjiik chi naa kitz'uyem wach i QaJaaw Dios chi ye'b'al ruloq'il, je' wili i naa kiq'orom: Neeta naq inye'arik i ruloq'il i QaJaaw Dios. Eh re' hin je' wili i naa nuq'orom: Ma' k'isiin ta ti'kiil i naakik'ulum i kib'anik reh i yiib' wach na'ojb'al.¹⁷Re' taqe i k'achareel wach ak'al, naa rub'aan keh je' rukab' imb'aan keh i chikop ajimamaj taqe ruum inpuhb'anik keh, kiooj q'ehb'oq panjul, oon panxirob'.¹⁸Eh naakik'ulum keh je' rukab' inkik'ul i chikop noq ma' imb'aan ta keh ruum i k'ahchi' rupuhb'aniik keh panjul chik kiooj q'ehb'oq. Eh re' taqe kielik cho panjul panxirob' chik kiooj q'ehb'oq, eh noq naa ruqajiik chee kowlaj jab' naa ruk'uyu'jiik i ch'iklik wii' aak'al.

¹⁹Eh re' aak'al yohb'aal wach noq naa ruk'uyu'jiik, naa rukahniik chi xa kok' xeer chik i wach ak'al.²⁰Re' i wach ak'al naa rub'arb'otiik, chi je' jino'q i xohk'reel. Eh naa ruk'uyu'jiik je' rukab' i rub'an i paat ruum i kowlaj teew, naa rusachariik kiwach, ruum re' mahk imb'aan chuwach, i xti xiik' wo' chik naah.²¹Eh chupaam i q'iij re' re', re' i QaJaaw Dios naa ruye'em taqe panti' k'axik chu'nchel i wilkeeb' pan taxaaj, je' wo' chu'nchel i reey wilkeeb' chinaah i wach ak'al.²²Re' reh naa rumolom kiwach, naa taqe rutz'apam pan jinaj ye'aab', je' rukab' noq kitz'aparik i prexo nimaq wach kimahk. Re' taqe re' najt naa kiwihiik ar, korehtaal imponik i q'iij chi naa kiye'ariik chutojariik i kimahk.²³Eh noq re' i QaJaaw Dios naa rokiik chi reyil chinaah i yuuq Sión ar Jerusaleem, re' q'iij, re' i poh naa ruq'equumriik kiwach. Re' taqe i k'amal rub'eeh tinamiit ar naakilom wach i ruloq'il i Dios. Re' i rutz'uyjiik wach i Dios ruum i rotob'il xub'an¹WaJaaw hat nuDios, re' hin i nuyeew aloq'il, i nuyeew runimaal wach aab'ihnaal, ruum xa a'n taqe i sahchb'al k'uxliis, ayejaam cho wach najtir. Eh korik wo' hoq chi xooj eloq wach.²Re' hat xasach kiwach i tinamit, xatuhb'aaj wach ak'al i tz'aq kotimaj naq wii' kiij. Eh xasach kiwach i paat imb'aan wii' q'ataj q'orik, re' i kiyejaam i ki-ixowanik qawach, eh ma' jaruuj chik naakikorjiik.³Re' i jinaj chi tinamit kow i rub'an riib' i ruyeew aloq'il. Re' taqe i tinamit xiik' naah kijosq'iil inkiyohleej awach.⁴Ruum re' hat xatoob'eej taqe i neb'aa', je' wo' taqe i toob'jik inkaaj xako'leej taqe chikiwach imb'anik ti' k'axik keh. Re' taqe i yohb'aal wach kijosq'iil, xa je' chik kaq suut teew jab', eh xa je' chik rukab' i tz'a'laj q'iij i kijosq'iil.⁵Re' hat naa awesam i runimaal kiwach i nimaq kiwach, je' rukab' i rutz'a'iil i q'iij chupaam i ye'aab' chiq yuuq' naa aye'em chikinaah i aj ixowaal. Je' rukab' noq imuujrik wach i rutz'a'iil i q'iij ruum i suutz' noq naa atz'apam kichii' i xiik' naah kijosq'iil.

⁶Eh re' i QaJaaw Dios nim rajaawriik, chinaah i yuuq' Sión naa rub'anam jinaj i ninq'iij chi keh chu'nchel i nimaq taq tinamit. Eh naa kik'uxum i suq laj wi'k, eh suq laj k'uxb'al wi'k, naa kuk'em i sik'oj wach riis uuva.

⁷Eh chinaah i yuuq' re' re' naa reliik reje i naa resaniik reh i ti' k'axik chikinaah i tinamit. Eh naa resam i ruti'kiil kik'ux naa risam chikinaah i je' q'eq laj itz'ihy b'otooj taqe wii'.⁸Re' i QaJaaw Dios naa risam i rajaawriik i kimik chikinaah chi jumpech. Eh naa rujuxum i riis naq' kiwach i rutinamiit naa resam i kik'ixb'ilaal, re' wili re' i QaJaaw Dios inq'orik reh.⁹Eh chupaam i q'iij re' re' je' wili i naa kiq'orom i tinamit: Re' aj re' i wili i xti manlik qaDios, korik wo' hoq chi ruuk' i reh inqach'ikaa' qak'ux, eh re' reh xoj ruko'leej. Ruum aj re' i ruk'ul chi naa rusuuqb'iik qak'ux, ruum korik chi xoj ruko'leej chik, inko'q taqe.

¹⁰Re' i QaJaaw Dios naa ruko'liniik keh i naa kiwihiik chinaah i yuuq' Sión. Eh re' tinamit Moab naa rusacham wach, na naa ruyeq'em kipaam, je' rukab' imb'aan reh i sohk' panye'aab' reh.¹¹Eh re' taqe i aj Moab naa naq chik kiyub'um reje i kiq'ab' chi ko'lb'al kiib', je' rukab' noq i ruyub' reje i q'ab' i aj mux panha' xa re' la' xama' xta wo' chik naa rokiik wii', ruum re' i QaJaaw Dios naa resaniik i kajaawriik.¹²Eh re' i QaJaaw Dios naa rusachwiik kiwach inajt naah paat ko'lb'al kiib'. Eh re' wo' reh naa rukutwiik wach ak'al i tz'aq kotimaj wii' riij i tinamit re' re'. Re' rutz'uyjiik wach i Dios ruum i ko'linik xub'an¹Chupaam ponoq i q'iij re' re', je' wili i naa kiq'orom pankitz'uuy i aj Judá: Xti korik wo' chi q'e' kow riib' i qatinamiit ruum xqa a'n ruko'ljiik qiib'. Eh re' i QaJaaw Dios xyej-anik reh i tz'aq kotimaj wii' riij i qatinamiit.²Yu'naak cha teh taq i ookb'al reh i tinamit, reh chi neekiokik ar i korik wach kik'ux, i kib'anik reh i korik.³QaJaaw Dios, re' hat i nayeew keh i suq kiil k'uxliis i kiye'em kik'ux awuuk', ruum awuuk' i hat ch'iklik kik'ux.⁴Je' re' noq eliik taq chayeew ak'ux ruuk' i QaJaaw Dios, ruum xa re' wo' reh neenko'linik taq aweh chi juneliik.⁵Eh re' reh ineesanik i runimaal kiwach inkinimb'isaj kiib'. Eh xusach kiwach i tinamit ma' tiklik ta kib'anik, xukut taqe wach ak'al i q'e' naq kow kiib.⁶Eh re' chik taqe neb'aa' naa rukojom pan kitinamiit, naakiyeq'ariik panak'al kuum i neb'aa', inko'q taqe.

⁷QaJaaw Dios re' taqe i korik wach kik'ux re' i holohik b'eeh inkik'am, ruum re' hat ti ye'wik keh chi naab'jik.⁸QaJaaw Dios, re' hoj q'e' suq qak'ux chuk'amariik i b'eeh i ruq'or qeh taqe aak'uhb'aal. Re' i wilik panqanima i hoj re' chi xa re' wo' hat naa kaat qakapaam chi juneliik.⁹Re' hin rajlaal aq'ab' inusik' awotob'il, chu'nchel i wánima, je' wo' pantaq wahq'eq. Je' re' i naa nub'anam nik' pa' chik najtiil i nuk'achariik ayu' wach ak'al. Ruum re' hat naa a'nam i q'ataj q'orik wach ak'al, re' tinamit inchol kisik'im i korik.¹⁰Re' hat naa wo' naq aketelaam kiwach i yiib' wach kina'ojb'al, xama' naa ta wo' kireqem chi riij, i korik. Eh xa re' i yiib' wach inki a'n chupaam i kiye'aab' i korik wach kik'ux, xama' inkiyohleej ta wo' awach i hat.¹¹QaJaaw Dios re' hat ayejaam chik wach i ti' k'axik chi keh, eh re' keh xama' inkikoj ta wo' rehtaal. Eh noq naakilom i chi naa ak'axam aatinamiit, re' keh naa kikahniik chi xa se'lb'al taqe. Jaaw chasach kiwach ruuk' aajosq'iil.¹²QaJaaw Dios, re' hoj qeht'al chi re' hat ti ye'wik qeh i suq laj k'acharik. Eh re' hat ti k'amwik qab'eeh chub'anariik aakamaj.¹³QaJaaw Dios, re' hoj noq xub'an k'ih naq taqe inchopwik qanaah chi ehchan qeh. Eh yu'naak xa re' chik i hat qeht'al awach chi hat ehchan qeh, eh chi hat QaJaaw chi manlik.¹⁴Re' taqe i kichopwik naq qanaah, xikimik chik reje, eh ma' naa ta chik kik'aach chaloq. Ruum re' hat xat ye'wik keh panti' k'axik, xasach kiwach chi jumpech.¹⁵QaJaaw Dios, re' hat xat k'ihaaxb'isanik reh i qatinamiit, ma' xata chik je' nimaal noq xwihik cho najtir. Re' nawaaj i hat chi naa ruye'ariik runimaal awach.

¹⁶QaJaaw Dios, noq xoj ayeew chutojariik i qamahk, xqa'an qatiij chawach. Eh noq k'ahchi' qik'iik chi ti' k'axik, qapahqaaj awotob'il.¹⁷Eh ruum chi xat sahchik panqak'ux xqak'ul i ti' k'axik, xama' inqakuy ta chik, xan qab'ak'ej chik qiib' ruum i ruti'kiil. Xa je' chik rukab' i ruti'kiil ixoq noq nk'ulik ruk'ux.¹⁸Re' hoj xqak'ul i ti' k'axik je' rukab' i ruk'ul ixoq noq ink'ulik ruk'ux, xa re' la' xama' xta wo' xuk'am chaloq. Xa ma' xqak'am ta wo' chaloq i ko'lemb'al reh i qatinamiit, eh xama' xqak'ihaaxb'isaj ta wo' hoq i tinamit.¹⁹Eh re' hat naa wo' chik kik'aach chaloq aatinamiit, re' taqe i je' muqulkeeb' panjul. Eh naakik'erem kichii' chi tz'uuy ruum naa wo' chik aye'em kik'achariik je' rukab' noq inqajik chaloq i mus jab' chinaah i tik.

²⁰Hat taq nutinamiit okeen pee taq i koq panapaat chatz'ap taq chaloq aapuerta chakeb'aa' pee taq awiib' jarub'-oq q'iij. Ar taq naa awihiik korehtaal irik'saj i rujosq'iil i QaJaaw Dios.²¹Re' QaJaaw Dios naa ruqajiik chaloq chikinaah chu'nchel i tinamit. Eh naa taqe ruye'em chutojariik i kimahk, ma' naa ta rub'anam chi naa kipoyom ikaansanik kianam, naa la' reliik wach saqum nik' nimaal i mahk kianam. Re' i rehtesjiik chaloq panti' k'axik i tinamit Israel¹Eh chupaam i q'iij re' re', re' i QaJaaw Dios ruuk' nimlaj ch'ihch' xiik' naah q'asiil naa rukansam taqe aj ixowaal, i je' kikab' i qamaan k'ap, je' wo' hoq qamaan k'ap, i je' josq'laj aaq'. Eh je' wo' hoq i je' qamaam josq'laj chikop wilik pam palaw.²Eh je' wili i naa ruq'orom i Dios: Re' taq i hat aj Israel cha tz'uyej taq wach aatinamiit, re' i je' taqe suq laj uuva.³Re' hin i Dios, hin naa nucha'jiniik keh chi q'iij chi aq'ab', reh chi ma' xta naakik'ulum je' naa nukojom kiha'iil je' rukab' imb'aan reh i tik.⁴Re' hin naa wesam i nujosq'iil chikinaah. Eh wila' wilik i xi chalik chub'aan i ti' k'axik keh jumehq'iil neenusach kiwach je' rukab' noq ink'ahtik i k'iix, noq ink'ahtik i ch'ahn.⁵Eh ¿Mi wilik re' i ki-ixowanik wach i nutinamiit inkaaj chi naa nuko'leem taqe i ruk'ul naq chi nee kinkisik'? eh nee naq kiokik wuuk' panotob'il, inki i Dios.

⁶Eh chupaam i q'iij re' re' naa ruk'amam wach i kik'achariik i aj Israel, naa wo' chik ruwihiik kitoxl kixmak'al, korehtaal inkinujisaj i wach ak'al ruuk' i kak'uun kixq'uun.⁷Re' QaJaaw Dios ma' xuyeew ta taqe chutojariik i kimahk i aj Israel, je' rukab' xub'an keh inixowanik kiwach. Eh ma' xukansaj ta wo' taqe i aj Israel je' rukab' i xb'aan kekeh.⁸Eh xa re' wo' noq xuyeew taqe chutojariik i kimahk noq xi k'amarik reje pan tokoom tinamit. Eh xa junhuup i xub'an reje keh je' rukab' i rub'an i teew inchalik parelb'aal q'iij.⁹Re' QaJaaw Dios naa rukuyum i kimahk taqe i riih rumaam i Jacob, wila' kisachib'eej wach chu'nchel i kiartaal inkiloq'ej wii' taqe tiyoox. Eh wila' xkesaj chu'nchel i tiyoox Asera, eh wix kituhb'aaj chu'nchel ab'aj inkik'at wii' i kimayiij chuwach taqe i tiyoox.

¹⁰Re' i tinamit kow naq riib' naa rukahniik chi ma' xta chik kamaj, Eh naa rukahniik chi je' rukab' i ye'aab' chiq yuuq', Eh xa wakax chik i naa kianam kiwa' chuwach, re' chik taqe i xaq i q'ab' i chee' naa kik'uxum ar, naakokiik chi hi'lik chi ri'sil.¹¹Re' taqe i q'ab' i chee' kiq'ehb'ik chaloq i kichiqiik, eh re' taqe ixoq inkisik' chi kisii'. Je' wo' re' i naakik'ulum i ma' xta kina'ojb'al. Ruum aj re', re' i QaJaaw Dios xtz'uhkrisanik cho keh, ma' naa ta rub'anam otob'il keh, eh ni xata naa ruketeljiik kiwach.

¹²Eh chupaam i q'iij re' re', re' i QaJaaw Dios naa rumolom kiwach i rutinamiit. Ar naa rutoq'aam chaloq i wilik wii' nim ha' Éufrates, korehtaal imponik chi chii' i nim ha' Egipto. Re' taqe i aj Israel naa rumolariik kiwach chi kiju'junaal¹³Eh chupaam q'iij re' re', kow naa ruxuljiik chaloq i tuun. Eh re' taqe i rutinamiit i Dios k'amooj taqe reje Asiria, je' wo' taqe i k'amooj reje Egipto naakichaliik chi loq'oonjiik i QaJaaw Dios chinaah i yuuq' Sión, re' i wilik ar Jerusaleem. Re' ruq'orariik rib'iral i ti' k'axik xchalik chikinaah i aj Efrín¹Q'e' ti' i naakik'ulum i aj Samaria, re' inye'wik runimaal kiwach i aj Efrín, re' i wilik wach k'ixkaab' i rax wii' paam ak'al. Re' taqe i aj Samaria xa re' xohk'rik inkaaj, ruum aj re' naa rusachariik kiwach, je' rukab' noq inchiqik i uhtz'ub'.²Xa re' la' re' i QaJaaw Dios rusik'im cho wach jinaj i winaq kow riib', re' rajaawriik je' rukab' kowlaj saq b'och, je' rukab' i jab' kahoq paam. Eh je' rukab' i kaq suut teew, je' rukab' i elal ha', noq naa rusacham kiwach.³Eh naakiyeq'ariik panak'al i aj Samaria, re' i kiye'wik runimaal kiwach i aj Efrín i xa re' xok'rik inkaaj.⁴Re' taqe i aj Samaria naa rehtesjiik i kajaawriik, re' wilkeeb' wach k'ixkaab' re' i rax wii' paam ak'al, naakik'ulum keh je' rukab' i ruk'ul i uhtz'ub' xa holohik naq chik, eh xa re' yu' inchiqik. Eh na' wo' kik'ulum keh je' rukab' i ruk'ul i peet wach i higo xa holohik chik, eh insik'arik chi jumehq'iil ink'uxarik i koq.

⁵Eh chupaam q'iij re' re', re' i QaJaaw Dios nim rajaawriik, re' i ruqox rutinamiit ma' naa ta rusacham kiwach. Je' naa corona xiik' naah holwochiil re' ruuk' i uhtz'ub' korjinaq wii' chi keh.⁶Eh naa ruye'em kina'ojb'al q'atal q'orik reh chi parub'ehel naakiq'atam i q'orik. Naa ruye'em rukowiil kik'ux i soldado inko'linik keh.

⁷Re' taqe i q'atal q'orik xa re' i xohk'rik inki a'n xak'ulchel chik kiooj. Eh re' i k'amal kib'eeh aj tiij, taqe i jalal ruq'oral i Dios xak'ul inooj i kikapeb'aal ruum i k'ahlaj ha', ma' nkireq ta chi riij chib'ih jariik i ruq'or ink'uhtjik keh pan kisaq wiriik, xama' nkian ta wo' chik rukojariik kina'ojb'al i tinamit.⁸Eh re' i ki mexa nujinaq naah, chi chuh laj xab'ik. Re' taqe i ye'aab' i kiwihik wii' xiik' naah ch'uwa'iil paam.⁹Eh re' hin je' wili inkiq'or chi wiij: ¿Mi re' reh naa rutijiniik qeh re'? ¿Mi re' reh naa ruq'oriik qeh re' i ruyeew chi naab'jik i Dios? Hoj ta chi ha'lak'un chi je' re' neerub'an qeh.¹⁰Xa re' inchel i qatijiniik, i k'uhb'aal i ruk'uhtaaj qeh, eh ruch'ob' inche rub'ehel qeh i ju'jun chi q'orik, je' cho rukab' imb'aan keh i ma' xta kina'ojb'al i rub'an qeh, inki taqe.¹¹Re' hin xama' xta wo' inwaaj reh wila' ma' nkaaj tiijik. Xa re' la' re' chik taqe i tokoom tinamit k'ayeew wach kiq'orik naa ruq'oriik keh i tinamit wili.¹²Re' QaJaaw Dios je' naq wili i ruq'orom chaloq chikiij: Re' hin naa nuye'em taqe pansuqkiil k'uxliis. Eh naa nuhi'lisam taqe i q'uhtinaq, inki, eh re' keh xama' xkaaj ta wo' kinimam.¹³Eh re' chik i QaJaaw naa ruq'oriik keh, xa re' chik i k'uhb'aal naa ruq'orariik keh, xa re' chik i kik'uhb'aljiik naa rub'aan. Eh naakitaq'ab'jiik, naa rub'aan keh je' rukab' imb'aan keh i kok' ha'lak'un, q'e' ti' i naakik'ulum noq naa kik'amariik reje pan tokoom tinamit. Re' i kiq'ilariik i aj Jerusaleem¹⁴Chab'iraj taq i ruq'oral i Dios i hat i tib'anik taq i taaq'anik chinaah i tinamit Jerusaleem, ruum re' taq i hat q'e' taq nim awach i na a'n awiib'.¹⁵Re' taq i hat je' taq wili inaq'or: Re' hoj wilik chik ixqayejaa' wach ruuk' ink'amwik cho reh i kimik, eh ruuk' i kimuhqik wii' i kamnaq. Eh noq neenk'uloq i ti' k'axik chi qanaah ma' xta nee qoh ruchej, naa rik'iik chiqiij ruum i chukuj q'orik xqa'an, eh naa wo' qareqem ko'lemb'al qiib' ruuk' taqe i jot'ooj xqa'an, tiki taq.

¹⁶Ruum aj re', re' QaJaaw Dios je' wili i xuq'or: Re' hin jinaj i je' kowlaj ab'aj xnusik' wach, xnukoj ar nah yuuq' Sión. Eh re' je' ab'aj re' re', naa rukahniik chi manlik rukowiil rooq i paat, awach i naa ruch'ikaam ruk'ux ruuk' naa rureqem rusuqkiil ruk'ux.¹⁷Eh re' reh naa rupajwiik reh i rub'ehel chi b'anarik noq naa rub'aan i q'ataj q'orik. Eh naa nukojom chi pajb'al i rukorkiil wach k'uxliis, inki. Je' naa ruuk' saqb'och ruuk' elal ha' naa nusacham wach i ko'lemb'al taq awiib' xareq taq ruuk' chukuj q'orik.¹⁸Eh re' taq i xayejaa' wach ruuk' ink'amwik cho reh i kimik, ruuk' i kimuhqik wii' taqe i kamnaq xama' xta naa rokiik wii'. Re' taq i hat q'e' ti' i naa ak'ulum, naa ruchaliik taq ayo'jiik.¹⁹Re' taq i hat k'ih pech taq naa ak'ulum i ti' k'axik, chi q'iij chi aq'ab' naa ruchaliik taq cha naah. Eh xa ruum chi naa taq ab'iram rib'iral chi je' re' i naa taq ak'ulum ma' k'isiin taq naa ruchaliik ayo'jiik.²⁰Re' ti' k'axik re' re', je' rukab' noq imb'aan yohkik chinaah i k'isiin rooq ch'aht, eh je' naa rukab' noq imb'urarik iib' ruuk' i k'isiin rooq chamaar.

²¹Re' QaJaaw Dios naa rub'anam taq wuuk' je' rukab' i xub'an chinaah i yuuq' Perazim, eh wach k'ixkaab' Gabaón. Re' reh naa rukaqriik naa rub'anam i ma' jank'al ta rub'an, eh naa rub'anam chi manlik wach i ma' eht'alimaj ta naq chaloq.²²Je' re' noq maa kaq se'laaj taq chik i korik, reh chi ma' nee ta intiqarik naah i ti' k'axik taq cha naah. Re' hin b'iram rib'iral chi re' QaJaaw Dios nim rajaawriik ruyejaam chik wach chi naa rusacham wach taq aatinamiit.

²³Chab'iraj taq, i naa nuq'orom, eh xti chakoj taq rehtaal i nuq'oral.²⁴Noq re' jino'q i aj ab'ixoom, noq rutikim chik i chib'ih reh neerumay i b'anaj arado, eh nee wo' rumay rulak'ariik i sohk' chuwach i ruye'aab'.²⁵Re' hin korik taq i nuq'or aweh, noq rab'ixeem chik wach i ruye'aab' i rutik reje irija'eel i eneldo, i rutik i ruja'eel i Comino, eh i rutik chi lohk'aal i trigo, chii' taq chii' i rutik, i rutik i rija'eel i sebada, je' wo' i rija'eel i avena.²⁶Eh re' wo' hoq i Dios ink'uhtanik reh nik' wach rutikariik imb'aan.²⁷Re' eneldo, i Comino, xa ruuk' k'isa chee' inq'ojarik paam noq impotz'arik inaq'wach. Ma' nee ta ruyeew riib' chi ruuk' nimlaj chee' neenq'ojarik, je' rukab' imb'aan reh i trigo noq impotz'arik.²⁸Re' trigo ruuk' nim paam chee' inkiq'oj paam, xa re' la' ma' q'e' ta kow inkiq'oj re' inkaaj chi ma' kipuch' taj inaq'wach. Eh manlik wach noq inkipuh wach, noq inkimol pam ye'aab' reh.²⁹Chu'nchel i na'ojb'al re' re', re' i QaJaaw Dios ink'uhtanik. Re' QaJaaw Dios wilik taqe i na'ojb'al ruyejaam wach naa rub'anam. Re' ruq'orariik rib'iral i ti' k'axik xchalik chikinaah i aj Jerusaleem¹Ma' k'isiin ta ti'kiil i naa ruk'ulum i Jerusaleem, Ariel inkiq'or reh. Re' i xwihik wii' i reey David, i xub'an cho wii' i ninq'iij chuwach i ixib' haab'.²Re' i QaJaaw Dios naa ruye'em i ti' k'axik chikinaah i aj Jerusaleem, Ariel inkiq'or reh. Eh naa ruchaliik ruyot'kiil i kánima, je' nanaah wach q'aaq' naa kiwihiik.³Re' QaJaaw Dios naa ruk'amam chaloq i tokoom tinamit, naa kiyejaam ki-itz'ihy naah paat chi junsuut taq aatinamiit. Eh naa kitoq'aam peleto taq awuuk' reh taq akanteesjiik.⁴Ruuk' i re' naa rehtesjiik i kajaawriik i tinamit Jerusaleem, Ariel inkiq'or reh. Eh chib'ih i naa kiq'orom xama' xta chik naa rokiik wii', xa panteew naa rukahniik je' rukab' i pooq.⁵Xa re' la' re' i QaJaaw Dios naa ruye'em taqe chutojariik i kimahk i k'ih laj ixowan kiwach i aj Jerusaleem. Eh xa chi jumehq'iil naa rusachariik kiwach, je' rukab' noq ink'amarik reje i rutuus ixiim ruum i kowlaj teew.⁶Eh re' i QaJaaw Dios nim rajaawriik, xa chi jumehq'iil naa ruye'em i rujosq'iil chikinaah. Re' reh kowlaj kahoq, kowlaj yihk, runimaal teew jab', xaq q'aaq' naa ruye'em chikinaah.⁷Eh chu'nchel i tinamit naa rub'aniik i peleto i ti' k'axik keh i aj Jerusaleem, xa chi jumehq'iil naa rusachariik kiwach. Re' i kik'achariik xa je' naakixohk'reem wach, eh xa je' pan kisaq wiriik naakilom wach.⁸Naakik'ulum keh je' rukab' i ruk'ul i nuhmeel, i rub'an ruwa' noq i rilow paruwiriik, noq irik'raaj riib' xanuhmik wo' hoq. Eh je' rukab' i ruk'ul i chiqiij chii', rub'an ruhaa' noq i rilow paruwiriik, noq i rik'raaj riib' xa chiqiij wo' chii'. Je' re' i naakik'ulum i naa kitoq'aam peleto kuuk' i wilkeeb' chinaah i yuuq' Sión.⁹Eh re' taq i hat aj Jerusaleem. ¿Mi konaa taq akahniik chi je' taq hat moywach chi je' taq hat xohk'reel chi tichele'lanik taq, atoob' ta ma' k'ahchi' taq awuk'em aweh i k'ahlaj ha'?¹⁰Re' i QaJaaw Dios suq laj wirik i xuyeew taq cha naah. Re' taqe i jalal ruq'oral i Dios, kikojwik runa'ojb'al i tinamit, xa re' la' re' i QaJaaw Dios xsachwik reh i kina'ojb'al, je' na naa rub'urum inaq'kiwach.¹¹Eh ma' awach ta chik naa ruch'ob'wiik rub'ehel i naa taq awilom pansaqwiriik, naa rukahniik chi je' rukab' i q'orik tz'ihb'amaj wach i huuj lutz'uuj chi korik. Eh wila' xye'arik reh chi ilarik inchol ilij wach huuj je' wili i naa ruq'orom: Re' hin ma' nee ta nub'an rilariik wach ruum lutz'lik, inko'q.¹²Wila' xye'arik reh chi ilarik wach jino'q i ma' nchol ta ilij wach huuj je' wili i naa ruq'orom: Re' hin ma' nee ta nub'an rilariik wach ruum ma' kinchol ta ilij wach huuj, inko'q.

¹³Re' i QaJaaw Dios je' wili i ruq'or: Re' i tinamit wili xa chi kichii' kinkiloq'ej, eh re' kánima najt wilik wuuk'. Xa ma' xta rutiq chi kinkiloq'ej, ruum re' i k'uhb'aal inkik'uhtaaj xa kitijem, xa ruk'uhb'aal winaq.¹⁴Je' re' noq re' hin ma' k'isiin i sachb'al k'uxliis, ma' k'isiin i ma' ilooj taj xnub'an, eh naa nusacham wach i kina'ojb'al i wilik kina'ojb'al korehtaal insahchik kik'ux i tinamit wilik kina'ojb'al. Eh naa nuyojom i kikapeew i nimaq wach kikapeb'aal¹⁵Eh q'e' ti' i naakik'ulum inkikeb'aa' i kimahk chuwach i Dios, eh inkikeb'aa' i inkiyejaa' wach, xa pan ke'b'lik inki a'n je' wili inkiq'or: Re' hoj ma' awach ta inilwik qeh ruuk' taqe inqa a'n, inki taqe.¹⁶Re' keh, ma' xta kina'ojb'al. ¿Mi nee ruyeew riib' chi re' ak'al xun nee ruq'or reh chi je' wili awach intz'aqwik reh?: Ma' hat ta xatz'aqwik weh, inko'q Eh ¿Mi nee ruq'or i re' ak'al xun chi je' wili reh intz'aqwik reh? Ma' aweht'al taj i k'ahchi' kaat weh, inko'q reh. Re' QaJaaw Dios xuq'or chi naa resam taqe panti' k'axik i aj Israel¹⁷Eh xa chi jumehq'iil naa ruponiik i ruq'ijil chi re' rax chee' Líbano naa rukojariik chi tikb'al tik. Eh re' intik wii' i tik yu'naak naa rukahniik chi rax chee'.¹⁸Chupaam taqe i q'iij re' re', re' taqe i tz'ap xikin naa chik kib'iram chib'ih i ruq'or panhuuj noq naa rilariik wach chi kixikin. Eh naakeliik chupaam i q'equm wilkeeb' wii'.¹⁹Eh re' taqe i xama' nimaq ta kiwach, naa kireqem runimaal kiwach ruuk' i QaJaaw Dios. Eh re' taqe neb'aa', naa kireqem rusuqkiil kik'ux ruuk' i wilik ruSantohiil, re' i qaDios i hoj, hoj aj Israel.²⁰Re' taqe i xiik' naah kijosq'iil naa rusachariik kiwach, je' wo' taqe inkikaqse'laaj i kas kichaaq'. Eh naa rusachariik kiwach chu'nchel i xa re' i yiib' wach na'ojb'al inki a'n²¹Eh naa rusacham kiwach i kitz'aqwik ru mahk i kas kichaaq', je' wo' taqe i kitaqchi'inik reh taqe i q'atal q'orik, je' wo' taqe inkisik' chi riij nik' wach noq naa rukojariik ru mahk i ma' xta ru mahk.²²Re' i QaJaaw Dios i xko'linik reh i Abraham je' wili i ruq'or keh riih rumaam i Jacob: yu'naak reje chi qawach ma' naa ta chik taq ayo'jiik, eh ma' naa ta chik rukaaqb'iik taq awach ruum ak'ixiik.²³Eh noq naakilom taq awiih aamaam xnub'an ruuk' taq aatinamiit, re' keh naa kikojom rehtaal noq re' hin wilik nuSantohiil, eh naa kiin kiyo'hleem i hin, hin ki Dios i aj Israel riih rumaam taqe i Jacob.²⁴Re' taqe i sahchinaq kina'ojb'al naa chik kireqem chi riij i naa kia'nam, eh re' taqe i xa re' wech'inik kiib' inki a'n naa kik'amam naah i kik'uhb'aljiik naa rub'aan, inki Dios. Re' taqe i aj Israel xama' xta rutiq chi nkiyeew kik'ux kuuk' i aj Egipto¹Re' i QaJaaw Dios je' wili i xuq'or: Q'e' ti' i naakik'ulum i aj Israel, ma' kinimanik taj, xa chi kutkeel inkiyejaa' wach inki a'n ma' inkipahqaaj ta weh. Eh xak'ahchi' keeb' chi mahk.²Re' keh xa chi jumehq'iil kiooj ar Egipto chusik'ariik i kitoob'jiik chi ma' kiq'orom ta weh, inooj kisik' i kitoob'jiik ruuk' i kireey i aj Egipto.³Xa re' la' ma' re' ta wo' kitoob'jiik naa rub'aan ruum i kireey i aj Egipto, kijot'ariik la' chik naa rub'aan, k'uhtb'al kik'ixb'ilaal.⁴Re' keh atoob' ta kitaq'aam wo' naq reje awach inq'orik ponoq chi riij i kitinamiit Zoán, eh ar Hanes.⁵Chu'nchel la' naakijot'ariik ruum i tinamit Egipto xama' xta nokik wii', xama' xta wo' otob'il naa rub'aan keh. Naa la' rehtesjiik i kajaawriik, eh xaruti'kiil kik'ux i naa ruye'ariik, inki.

⁶Re' wili i q'orik chi riij i chikop wilkeeb' Neguev:
Re' i ye'aab' re' re' xiik' naah yohb'alil, ruum ar wilkeeb' imaas, ixoq kaq b'ahlam, taqe i josq'laj aaq', taqe aaq' kipisk'anik pan taxaaj. Eh re' taqe i aj Israel ar ki-ik'ik noq kiooj Egipto, inkik'am reje i xa chib'ih jariik k'ih taq tz'aq, taqe i kib'ehomal chi riij taqe i b'uurux, taqe i cameyo, xanaah re' xama' naa ta wo' kitoob'jiik.⁷Re' kito'ariik naa rub'aan kuum i aj Egipto, xama' xta naa rokiik wii'. Ruum aj re', re' hin je' wili i nuq'or: Xa ma' naa ta wo' rub'anam kiko'ljiik.⁸Re' i QaJaaw Dios xuq'or weh chi naa nutz'ihb'aam chuwach jino'q i tz'ilom, oon chuwach jino'q i huuj. Eh ar neenkahnik rehtalil chi juneliik chi re' taqe i aj Israel ma' xinkinimaj taj, eh nik' wach i kina'ojb'al.⁹Eh chi re' taqe i tinamit re' re' xa q'et q'et taqe, ma' korik ta wach kik'ux, ma' nkaaj ta kib'iram i kik'uhb'aljiik imb'aan ruum i QaJaaw Dios.¹⁰Eh je' wili inkiq'or reh i jalal ruq'oral i Dios: Maa q'or taq chik qeh chi wilik taq inawil panasaq wiriik, eh chi holohik i ruq'or i ruk'uhtaaj taq riib' aweh. Re' taqe holohik rib'irjiik cha q'or taq qeh, atoob' ta xachukuj q'orik wo' hoq.¹¹Chakanaa' taq rub'aan i k'ahchi' taq kaat, eh cha kanaa' taq i korik b'eeh. Eh ma' q'or taq chik rib'iral qeh i Dios wilik ruSantohiil, re' qaDios i hoj, hoj aj Israel, inki taqe.¹²Ruum aj re', re' i QaJaaw Dios wilik ruSantohiil re' inqaloq'ej i hoj, hoj aj Israel je' wili xuq'or: Re' taq i hat inaq'eb' taq chi riij ak'ux i nuq'oral, xa re' i peleto, xa re' taq i ma' holohik ta na'ojb'al i na a'n.¹³Re' taq i hat wilik taq amahk, xa je' taq akab' inajt naah tz'aq xa tareel chik ma' k'ahchi' ta taq akapaam noq naa taq awojiik wach ak'al.¹⁴Xa je' taq ti xerarik ak'al xaro naa rub'aan, xama' xta chik rotob'il i ruxeer inkahnik, ni xata naq chik neenkanik chi ye'aab' naah wach q'aaq'. Eh ni xata naq chik neen kamanik i ruxeer chi ehteesb'al ha' chupaam jino'q i jul, inki Dios.

¹⁵Eh ruum i re', re' Dios wilik ruSantohiil i ki Dios i aj Israel je' wili i xuq'or: Kinanimaj wo' taq chik nee wo' chik taq tinuko'leej. Eh nee taq ti k'acharik pansuqkiil, eh nee taq inareq akowiil, inki. Re' taq i hat xama' xawaaj ta wo' taq.¹⁶Je' wili taq i xaq'or: Ma' chih taj, re' hoj naa qamolom chi elik chi riij i qakawayu, chupaam taqe i kareta xti kow inki a'n tiki taq. Korik je' re' taq elik naa a'nam, xa re' la' q'e' wo' chik kow taq naa kaat kajimam i ki-ixowanik taq awach.¹⁷Noq naa ruk'uliik iloq i jinaj chi aj ixowaal jinaj miil taq aweh i hat i naa rumolom chi elik. Eh chikiwach i ho'oob' chi aj ixowaal chawunchelaal taq naa amolom chi elik, xa hat taq chik kiib' ixib' naa akahniik, je' rukab' i b'olob'ik chee' wilik naah yuuq', eh chi je' rukab' i ehtalil wilik chi jurub' i yuuq'. Re' Dios xuq'or chi naa rutob'eem taqe i aj Israel

¹⁸Re' i QaJaaw Dios kok'ahchi' taq kaat ruy-eem chi naa taq ruketelaam awach xaraaj taq chik ruye'em aweh i ruk'axb'al, ruum re' i QaJaaw Dios re' i rub'ehel i rub'an. Eh q'e' atoob' keh awach inkiyeew kik'ux ruuk.

¹⁹Re' taq i hat tinamit i wilkaat taq chinaah i yuuq' Sión, ar Jerusaleem ma' naa ta chik taq awoq'iim, ruum re' i QaJaaw Dios naa ruketelniik taq chawach. Noq naa taq ak'erem aachii' chupahqaljiik taq atoob'jiik jumehq'iil wo' taq naa kaat rutob'eem.²⁰Re' QaJaaw Dios atoob' ta nee ruyeew i ti' k'axik taq cha naah chi je' awa' ahaa' taq ruti'kiil k'uxliis. Eh naa taq awilom wach ruuk' naq'awach i reh ruum re' reh taq awajtiijoom, eh re' reh ink'uhb'alinik taq aweh.²¹Eh re' taq i hat noq k'ul taq naa awojiik chub'anariik i ma' holohik taj, jinaj i q'orik naa ab'iram naa rub'aan taq cho chawiij, je' wili i naa ruq'orom: Re' i wili i korik b'eeh re' taq chak'am, inko'q.²²Eh ruum i re' naa taq areqem chi riij chi ch'uwa' wach kinimjiik taqe i tiyoox iq'omamaj kiwach chi plata, je' wo' taqe iq'omamaj kiwach chi oro. Naa taq aq'eb'em chi riij ak'ux chi xa je' jino'q chib'ih jariik, oon chi xa je' taqe sohk'.²³Re' i QaJaaw Dios naa ruye'em chaloq i jab' chinaah taq awijaa' naa taq atikim panye'aab', ruuk' i re' ma' k'isiin taq naa kiwachiniik taqe atik. Eh naa taq a'nam awa' aha' chi manlik. Eh ma' k'isiin wo' naa ruk'ihiik i ch'ahn naa kik'uxum taq aachikoop.²⁴Re' taqe aab'oyaax, taqe aab'uuruux kib'anik ab'iixik ruuk' arado, re' chik i xti suq laj, i holohik laj ch'ahn naa kik'uxum.²⁵Eh noq naa ruponiik i q'iij chuwach i QaJaaw Dios chi naa rusacham kiwach i ki-ixowanik taq awach, noq naa ruq'ehb'iik inkiko'leej wii' kiib'. Eh je' naa yohb'aal wach i ha' naa ruqajiik chikinaah taqe i yuuq'.²⁶Re' i QaJaaw Dios naa riq'omaam i rutinamiit, yohb'aal wach i rusaqumaal i poh xa je' chik rukab' i rusaqumaal i q'iij, je' wo' i rusaqumaal i q'iij naa ruye'em chaloq, wilik naa wuquub'-oq chi je' rukab' i rusaqumaal yu'naak. Re' i ruq'orariik i ti' k'axik xye'arik chikinaah i aj Asiria²⁷Re' i QaJaaw Dios naa ruk'uliik ruk'uhtaam riib' ruuk' i rujosq'iil xa je' chik rukab' i xaq q'aaq', i sib'. Eh re' taqe i naa ruq'orom ruuk' chii' naa rik'uhtaniik reh i rujosq'iil, re' taqe i naa ruq'orom i ju' raaq' je' rukab' i q'aaq' imb'anik sachooj.²⁸Eh re' i ruxlab'al je' naa rukab' i chaamlaj ha', imponik kochiralaq jino'q i winaq. Reh chi naa ruye'em taqe panti' k'axik yiib' wach i kina'ojb'al, chi sachb'al kiwach. Re' keh naa rukojariik ch'ihch' pan kichii' mek'b'al reje keh chupaam i ma' holohik ta laj b'eeh.²⁹Eh re' taq i hat aj Israel naa taq a'nam atz'uuy je' rukab' i xb'aan pan chaq'ab' noq xninq'ijik i elik chaloq Egipto. Naa taq rusuuqb'iik awánima, je' rukab' i rub'an ink'amwik naah i xuul i rub'an i q'ooj noq inooj rusik' i ko'lemb'al riib' chinaah i yuuq' Sión.³⁰Re' i QaJaaw Dios, narib'irjiik i ruq'oral noq kow naa ruq'oriik chaloq ruum i rujosq'iil, naa ruhk'uhtaam i runimaal wach. Je' naa jinaj runimaal xaq q'aaq, je' naa kowlaj kahoq, je' runimaal ab'aj, je' naa runimaal saqb'och, i naa ruye'em chaloq.³¹Eh noq naa kib'iram i ruq'oral i QaJaaw Dios, i aj Asiria i xib'anik ti' k'axik keh i aj Israel yohb'aal wach noq naakiyo'jiik.³²Eh noq re' i QaJaaw Dios naa ruye'em i ju'jun chi ti' k'axik chikinaah i aj Asiria, re' taqe i aj Israel keh naakiq'ojom i kitamb'oor, i kiarpa, ruum i rusuqkiil kik'ux.³³Re' taqe i ti' k'axik wili xanoq wo' ruyejaam wach i Dios chi keh aj Asiria, chi reh i kireey. Re' i je' naa nim i chaam laj jul, je' naa rukab' i horna qoplik ruq'aq'al. Eh re' Dios ruuk' i junhuup chi ruxlaab' naa ruqopom ruq'aq'al ruuk' asufre. Re' ti' k'axik xchalik chinaah i xponik kisik' kitoob'jiik Egipto¹Q'e' ti' inakik'ulum i aj Israel inooj kisik' kitoob'jiik Egipto, eh inkich'ikaa' kik'ux chi naa kik'o'ljik ruum i k'ih laj kawáyu, i k'ih laj kareta, eh kuuk' kiooj chi riij taqe kawáyu ruum q'e' taqe kow. Ma' inkik'am ta chik i rub'eeh i wilik ruSantohiil, re' i qaDios i hoj, hoj aj Israel. Eh ma' ruuk' tee reh inkipahqaaj kitoob'jiik.²Re' i QaJaaw Dios wilik wo' runa'ojb'al i reh, nee wo' ruyeew i ti' k'axik chinaah, noq i ruq'or i reh chi naa rub'anam, i rub'aan wo' hoq, eh ma' rusutej ta chi riij i ruq'oral naa wo' ruye'em i ti' k'axik chinaah i yiib' wach kina'ojb'al.³Re' taqe i aj Egipto xa winaq wo' taqe ma' re' taa taqe Dios re' i kikawayu reh i q'aq'inik xa chikop wo' taqe ma' re' taqe uxlab'al. Ruum aj re' noq naa rub'aan ti' k'axik keh ruum i QaJaaw Dios junsachariik kiwach naa rub'aan chi je' naakiko'ljiik, chi je' i naa kib'aniik i ko'linik.

⁴Re' i QaJaaw Dios je' wili i xuq'or weh: Re' hin naa nub'anam i peleto chi riij i nutinamiit naa taqe nuko'leem chinaah i yuuq' Sión, ma' awach ta neenq'atwik chi nuwach, je' rukab' i rub'an i kaq b'ahlam noq i ruchop i tentzun, ma' awach ta chik nee q'uchwik reh. Atoob' ta naq neenkimol kiib' i aj cha'jen tentzun, nee ta naq inkik'erb'eej i koq kichii' chukajiik i kaq b'ahlam xama' nee ta wo' i roq'taaj i rutiib'.⁵Re' hin i Dios nim wajaawriik, naa nutob'eem, naa wesam taqe panti' k'axik i aj Jerusaleem. Naa nub'anam kuuk' je' rukab' i rub'an i tz'ikin noq i rucha'jeej taqe i kok' rak'uun parusuuq'.

⁶Hat taq aj Israel re' QaJaaw Dios iraaj wo' chik chi nee taq inasik', eh ti raaj taq kaat ruko'leem atoob' ta yohb'aal taq wach i mahk xa a'n chuwach.⁷Eh noq neemponik i q'iij chi chawunchelaal taq i hat nee naq'eb' taq chi riij ak'ux kinimjik taqe i tiyoox plata, oro korjinaq wii', re' taq i xa ayejaam taq ruuk' aq'ab' i hat xa hat wo' taq aj mahk.⁸Re' taqe i aj Asiria i naa kikanteesjiik ruuk' q'aslaj ch'ihch' ma' xata winaq naa rub'aniik, eh ruum i re' naakimolom chi elik i tinamit. Re' taqe i k'ijolaq naa kikojom chi q'aq'inik naakichopariik kuum i nutinamiit.⁹Eh ruum i kiyo'jiik i aj Asiria, haa' ki soldado naakimolom chi elik, naa kikanaam kahnoq itz'ihy kehtalil. Re' i QaJaaw Dios xuq'or chi wilik jinaj i horna naa ruye'em taqe wii' inixowanik kiwach i aj Jerusaleem. Naa ruwihiik jinaj i reey naa rub'anam i taaq'anik parub'ehel¹Naa ruwihiik jinaj i reey parub'ehel naa rutaaq'aniik. Eh naa kiwihiik i ajaab'ees parub'ehel naakiq'atwiik q'orik²Re' reey re' re' naa rukamaniik chi je' rukab' i ye'aab' inkiko'leej wii' kiib' i tinamit chuwach i kowlaj jab', chuwach i kowlaj teew. Eh chi je' rukab' i rooq ha' chupaam i ye'aab' chiq yuuq', eh chi je' rukab' i paat ab'aj muujb'al pantz'a' laj yuuq'.³Re' taqe i jalal ruq'oral i Dios naa chik kireqem chi riij inaakilom. Eh re' i tinamit naa chik kiye'em kik'ux chi rib'irjiik i kik'uhb'aljiik.⁴Re' taqe i xateheh naq kiwach ruuk' i chib'ih inki a'n pan q'unil chik naa kianam. Eh re' taqe i ma' q'e' ta kichol q'orik, naak chik kicholiik q'orik chi korik.⁵Eh re' i yiib' wach runa'ojb'al, ma' naa ta chik ruq'orariik chi holohik imb'anik. Re' i jot'ool i ma' naa ta chik ruye'ariik runimaal wach.⁶Re' i yiib' wach runa'ojb'al xa re' wo' re' naa rub'anam, eh xa re' i ma' holohik taj wilik parukapeb'aal. Eh xa re' kaansanik ras ruchaaq' iraaj, i ruchuk q'orik chi riij i Dios. Eh ma' rusiij ta ruwa' ruhaa' i kuyuj ruwa' ruhaa' i rub'an.⁷Re' yiib' wach runa'ojb'al, re' i ma' holohik taj i rub'an, i rusik' chi riij nik' wach rujot'ariik i neb'aa' naa rub'anam ruuk' taqe i chukuj q'orik. Eh i rusik' chi riij nik' wach noq naa rukojariik ru mahk i neb'aa'.⁸Eh re' i atoob' wach ruk'ux, xa re' atoob' chi b'anarik i rub'an, ruum i re' naa ruye'ariik runimaal wach. Re' ti' k'axik xkik'ul ixoq aj Jerusaleem⁹Re' taq i hat ixoq aj Jerusaleem, ch'iklik taq ak'ux chi ma' xta taq i naa ak'ulum chab'iraj taq chi korik i naa nuq'orom taq aweh:¹⁰Chanab'eej taq chi pan wilik rukab' haab' naa taq ruchaliik ayo'jiik, ruum ma' naa ta chik kiwachiniik i tik. Eh ma' xta chik i wach i uuva taq naa amolom.¹¹Re' taq i hat ixoq i ch'iklik taq ak'ux chi ma' xta taq i naa ak'ulum ti yo'joq, tiib'oq taq ak'ux. Eh chawesaj taq aholohaq so', re' chik aq'as wach so' chakoj taq chawiij.¹²Naa taq atuyum i koq i chi' ak'ux ruum i ruti'kiil taq ak'ux chi riij taq aa ye'aab' ruum ma' naa ta chik rub'anam i tik, ni xata naq chik re' uuva naa ruwachiniik.¹³Ch'ahn, k'iix la' chik i naa rupoq'iik chupaam i kiye'aab' i nutinamiit, je' wo' chupaam taqe i paat, eh chupaam taqe i tinamit wilik naq wii' i suq kiil k'uxliis.¹⁴Re' i paat imb'aan wii' i taaq'anik naa rukahniik chi ma' xta chik i wilik chupaam. Eh re' wilkeeb' wii' i patineel naa rukahniik chi xa ntz'irik chik paam. Re' chik taqe i b'uurux naa kiwihiik ar chi suq kik'ux, eh re' chik taqe i wakax naa kianam kiwa' ar.¹⁵Eh re' i QaJaaw Dios naa wo' chik ruye'em i ruk'axb'al chi qanaah i hoj, naa wo' chik rub'anam i tik chuwach i ye'aab' chiq yuuq'. Eh re' i ye'aab' xa rub'an wo' hoq i tik chuwach ma' k'isiin chik naa rub'anam i tik chuwach.¹⁶Eh chupaam taqe q'iij re' re', re' chik i korik, re' chik i rub'ehel naa rub'aan chupaam i qatinamiit.¹⁷Re' i korik naa rub'aan re' re' naa ruk'amwiik cho reh i rusuqkiil k'uxliis. Eh i ruk'am wo' chaloq i suq laj wihik ch'iklik wii' qak'ux chi juneliik.¹⁸Re' nutinamiit ma' xta chik i peleto naa rub'aan chupaam i kiye'aab', eh ma' xta naa kuuchjiik pankipaat, xasuq chik naa kiwihiik.¹⁹Re' taqe i ki-ixowanik taq awach ruuk' saqb'och jab' naa rusachariik wach i kitinamiit.²⁰Eh re' taq i hat xasuq wo' taq ak'ux ruum xa tz'aqik wo' paam ak'al taq naa atikim wii' atik. Eh xanaa wo' ruwihiik kiwa' taq aab'oyaax, i aab'uuruux. Re' i QaJaaw Dios inko'linik¹Q'e' ti' taq i naa ak'ulum i hat taq aj Asiria i tib'anik taq sachooj i komajaa' taq insacharik awach i hat. Eh noq naa taq akohlaam i leq' i hat naa wo' kelq'aam i chib'ih taq aweh i hat. Noq naa taq akohlaam sachooj naa wo' rusachariik taq awach i hat.

²QaJaaw Dios nee ta tiinaketelaaj qawach, ruum xa awuuk' wo' hat ch'iklik qak'ux. Inquy-eej chi re' hat neetitoob'inik qeh rajlaal i q'iij, eh re' wo' hat nee ti ko'linik qeh panti' k'axik.³Eh noq inkib'iraj i tinamit chi naa aye'em chaa josq'iil inkimol chi elik. Noq inak'uhtaaj chaa kowiil inkimol chi elik i kichalik pantaq nimaq tinamit.⁴Re' taqe inixowanik kiwach i keh yohb'aal wach kik'ihaal, xa je' chik taqe ruk'ihaal nimaq chili'l noq naa kikutum kiib' chinaah i chib'ih keh, eh naa relq'jiik reje chikiwach.⁵Re' i QaJaaw Dios pan taxaaj wilik xiik'naah nimaal wach, naa ruye'em q'ab' chi parub'ehel, parukorkiil chik naa kik'achariik i aj Sión.⁶Eh juneliik naa rucha'jeem taqe, naa rukojom kina'ojb'al, reh chi naa kireqem chi riij i holohik, eh naakiko'leem kiib'. Re' i ruyohljiik i QaJaaw Dios xiik' naah chihojal.

⁷Eh re' taqe i q'e' kow kiib' oq'ik chik inki a'n pantaq b'eeh. Eh oq'ik inki a'n i xitaq'ab'jik naq chaloq chi rusik'ariik i rusuqkiil k'uxliis.⁸Eh xkahnik chi xantz'irik chik paam i tinamit, ma' xta chik taqe b'ehik inki a'n pantaq b'eeh. Xyoj chik wach i naa naq kianam, ma' awach ta chik imponik chuwach i ras ruchaaq'.⁹Xantz'irik chik wach aak'al, re' taqe i aj Líbano xkik'uhtaaj kik'ixb'ilaal, ruum xsacharik kiwach. Re' i wach k'ixkaab' Sarón xkahnik chi xa je' chik chiq yuuq', eh re' i ye'aab' Basán, i yuuq' Carmelo xi kahnik chi ma' xta chik i wilkeeb' chupaam.

¹⁰Re' i QaJaaw Dios je' wili i xuq'or: yu'naak naa nuk'uhtaam i runimaal nuwach, naa nuk'uhtaam i wajaawriik.¹¹Re' taq ayejaam wach i hat, taq akamaj, ma' xta tz'aq, xa ruuk' i junhuup chi wuxlaab' naa nusacham wach, je' rukab' noq ink'ahtik i sohk'.¹²Re' taqe i junseht chi tinamit naakichajriik ruuk' q'aaq', je' rukab' noq ink'ahtik i chiq k'iix.¹³Re' taq i hat najt taq wilkaat naa taq ab'iram rib'iral i naa nub'anam. Eh re' taq i hat xa ayu' taq wilkaat naa taq awilom chi wilik wajaawriik.¹⁴Eh re' taqe i aj mahk ar Sión naakib'arb'otiik ruum kiyo'jiik, je' wo' taqe i ma' kinimanik taj, je' wili inakiq'orom: Xti korik wo' hoq chi ma' awach taj i naa ruko'leem riib' chuwach i rujosq'iil i QaJaaw Dios, ruum je' rukab' i horna qoplik ruq'aq'al chi juneliik, re' imb'anik sachooj, inko'q taqe.

¹⁵Xa re' wo' naa ruko'ljiik i re' i rub'ehel i rub'an, korik inq'orik, eh ma' re' ta ruuk' iransil i tokoom nee nb'ehoomrik. Eh ma' nee ta ruk'ayej riib' ruuk' jino'q i kooch neenye'arik reh, ma' runimaj taj i kitaqchi' i kansan kas kichaaq', eh ma' rukapaaj ta chik rub'aan i yiib' wach na'ojb'al.¹⁶Re' aj i re' ma' xta naa ruuchjiik, chinaah inajt naah paat ko'lemb'al iib' naa rojiik ruko'leem riib'. Eh chupaam i ruhoop i paat ab'aj naa rojiik ruko'leem riib', juneliik naa ruwihiik ruwa' ruhaa'.

¹⁷Eh re' i reey naa taq awilom i ruloq'il. Eh re' taq aatinamiit naa runimb'iik reje, naa ruponiik kochinajt.¹⁸Eh noq naa ruk'uliik taq panak'ux i yo'jik taq xak'ul, je' wili taq i naa aq'orom: ¿Aha' wilik inajlanik naq reh i tumiin? ¿Aha' wilik imb'anik naq pajooj? ¿Aha' wilik incha'jinik naq reh inajt naah paat ko'lb'al iib'? tiko'q taq.¹⁹Re' taq i hat, ma' naa ta chik taq apatiniik chi kixilak i tinamit xiik' naah kijosq'iil. Re' taqe i k'axik noq inkan chi riij inkiq'or, eh k'ayeew wach q'orik kiq'orik wii' ma' awach ta inreqwik chi riij.²⁰Re' taq i hat chayeew taq reje i naq'awach, chinaah i tinamit Sión, re' inqa a'n wii' i qaninq'iij. Eh ar taq chayeew reje i naq'awach chinaah i tinamit Jerusaleem, re' i wilik wii' i suq kiil k'uxliis. Re' re' je' rukab' i paat itz'ihy naah lamlik chi korik ma' xta naa ruyojwiik reh, ma' nee ta ink'up taqe i b'ak'lik wii'.²¹Eh re' i QaJaaw Dios xiik' naah i ruloq'il, naa ruwihiik ar chi qako'ljiik. Re' reh je' rukab' nim ha' nim wach, re' i ki-ixowanik qawach ma' naa ta kianam ojik chi qajot'ariik chinaah i nim ha' re' re' pan barco.²²Re' QaJaaw Dios naa ruq'atwiik i q'orik chi qanaah, re' reh naa ruk'amwiik qab'eeh, re' reh i qareey, eh re' wo' reh i qaDios naa ruko'liniik qeh.²³Re' i ki barco i ki-ixowanik qawach xama' xta naa rokiik wii', naa rucho'lojiik i ruk'ahamal itz'ihy, ma' naa ta chik ruq'atam i teew. Re' la' chik i hoj naaqehchaniik reh i chib'ih keh, atoob' ta chelej riib' kib'ehik naakik'ulum chib'ih keh.²⁴Eh ar ma' jino'q chik naa ruq'oriik chi je' wili: Re' hin, hin yowaab', ma' inko'q taj. Eh re' i QaJaaw Dios naa rukuywiik reh i kimahk i wilkeeb' ar Sión. Re' ruq'orariik rib'iral i ti' k'axik xchalik chikinaah i nimaq tinamit¹Re' taq i hat i wilkaat taq panimaq tinamit, pankok' tinamit chamol taq chawiib' chi rib'irjiik taqe i naa nuq'orom. Eh chab'iraj taq i hat wach ak'al, je' wo' hoq i wilkeeb' chupaam.²Re' i QaJaaw Dios yohb'aal wach i rujosq'iil chikinaah i wilkeeb' panimaq tinamit, je' wo' chinaah i ki soldado, k'ahchi' ruq'orom chi naa ruq'atam, i q'orik chikinaah, reh i rusachariik kiwach.³Re' i kiti'jolal xa aha' naa rukahniik chi kutulkeeb', eh ma' k'isiin i kichuhkiil naa reliik chaloq. Eh naa runujiik paam i rax chee' ruum i kikik'eel.⁴Eh chu'nchel i wilkeeb' pan taxaaj, naakik'uyu'jiik, re' i runimaal i taxaaj naa rub'otom riib', je' rukab' noq imb'otarik wach i nimlaj huuj. Chu'nchel i ch'umiil naakichuhpiik, je' rukab' noq inchiqik i xaq i uuva, i xaq i higo.

⁵Re' i QaJaaw Dios, yohb'aal cho wach i rujosq'iil pan taxaaj. Je' naa ruyejaam chik chaloq i ruq'aslaj ch'ihch' reh chi naa rub'anam keh i aj Edom, eh naa rukansam taqe.⁶Eh ruuk' q'aslaj ch'ihch' naa rukaansam taqe. Je' rukab' noq inkanteesjik i tentzun, inkanteesjik i kaprax chi mayiij, i nujik chi kik', chi xeb'oh i reeh i q'aslaj ch'ihch'. Re' i QaJaaw Dios je' naa ruye'em i ruk'atoj mayiij ar Bosra, eh naa rub'anam i ma' k'isa kansanik ar Edom.⁷Re' keh je' kikanteesjik i b'ooyax je' kikanteesjik i k'ijol wakax, imas wakax naa rub'an. Re' kiye'aab' naa runujiik chik'ik', naa ruxilakiniik ruuk' pooq i kiq'ina'iil.⁸Chupaam i q'iij re' re' naa ruq'ajam wach i QaJaaw Dios keh i aj Edom. Eh chupaam i haab' re' re' naakeliik korik i aj Sión.⁹Re' taqe i raasb'al ha' wilik ar Edom naa rusutiniik chi q'ool. Re' i pooq naa rusutiniik chi asufre, eh xa je' chik inqop q'ool noq naa ruqopiik.¹⁰Re' i tinamit re' re' ma' jaruuj chik naa ruchuhpiik i ruq'aq'al, chi q'iij chi aq'ab' naa reliik rusib'eel. Eh ma' xta chik i naa ruwihiik chupaam chi jumpech, ma' awach ta chik i naa rik'iik chupaam chi jumpech.¹¹Re' chik i k'uch, re' chik i xihk naa kiyejaam kisuuq' ar je' wo' taqe i tuhkur, ruch'ihil taqe i nimaq taq tz'ok. Re' i QaJaaw Dios naa rukananiik reh i tinamit chi xa je' chik chiq yuuq', eh chi xan tz'irik chik paam.¹²Ma' naa ta chik rokiik jino'q i reey chi taaq'anik chikinaah, chu'nchel i k'amal kib'eeh naa rusachariik kiwach.¹³Eh re' wilik wii' kipaat imb'aan wii' taaq'anik, i paat inkiko'leej wii' kiib' k'iixmoq'ool, kaq k'iix chik i naa rupoq'iik cho ar. Eh naa rukahniik chi kiye'aab' xojb', chi ke'emb'al kiib' i nimaq chikop wilik kixiik'.¹⁴Re' taqe i yaak naa kuch'ihleem kiib' kuuk' i xojb' eh re' taqe josq'laj ixoq kaprax k'ul naa kiyuq'eem kiib' chikiwach. Eh ar naa kiwihik taqe i chikop kiyohb'isanik chaq'ab', ar naa kihilik.¹⁵Eh ar wo' naa ruyejaam rusuuq' ixoq tuhkur, ar naa rumolom wach i rumiloj, eh naa rupoq'iik kok' rak'uun, naa rumolom kiwach reh i kicha'jaljiik. Ar wo' naakimolom kiib' i xihk, jinaj imas, eh jinaj xq'un.¹⁶Eh chawilow taq chupaam i ruhuuj i QaJaaw Dios. Ar taq neenareq chi korik chi ar naa kiwihiik taqe chikop re' re' chi imas, chi xq'un, ruum re' reh xq'orik, eh ruuk' i ruxlab'al naa rumolom kiwach.¹⁷Eh re' wo' i QaJaaw Dios naa ruyewiik keh pan kiye'aab' chi kiju'junaal. Re' wo' reh insik'wik reh i kiye'aab', eh ar naa kiwihiik chi juneliik. Re' i QaJaaw Dios xuq'or chi naa wo' chik rusutem chaloq i rutinamiit ar Sión¹Re' i xkahnik chi chiq yuuq' naa wo' chik rusuuqb'iik ruk'ux. Re' chiq ak'al naa chik reliik i uhtz'ub' chuwach.²Eh xa holohik chik i uhtz'ub' naa reliik chuwach, naa rusuuqb'iik ruk'ux. Naa ruye'ariik ruloq'il i ye'aab' re' re', naa rukahniik chi je' kiholwochiil i ye'aab' Líbano, i ye'aab' Carmelo, i ye'aab' Sarón. Eh re' i naa kiwihiik ar naakilom wach i runimaal wach, i ruloq'il i QaJaaw Dios.³Chatoob'eej taqe i ma' kow ta kik'ux, eh chayeew taq kikowiil taqe i q'uhtinaq.⁴Eh re' i kiyo'jik je' wili taq i cha q'or keh: Chakowej taq ak'ux maayohb'isaj taq awiib', ruum re' aaDios naa ruko'liniik taq aweh, eh naa ruye'em taqe chutojariik i kimahk i ki-ixowanik taq awach, tiko'q taq keh.⁵Eh chupaam taqe i q'iij re' re', re' taqe i moywach naa chik kilwiik, re' taqe i tz'aplik i kixikin naa chik kib'irinik.⁶Re' taqe i chelej riib' kib'ehik naakipisk'aniik pankooq je' kikab' i keej. Re' taqe i meem naa chik kitz'uyinik. Eh chupaam i ye'aab' chiq yuuq' naa raasjiik chaloq i ma' k'isa ha'.⁷Eh chupaam i ye'aab' chiq yuuq' naa rukahniik chi ye'aab' ha', xa aha' chik naa raasjiik chaloq i ha'. Re' ye'aab' wilkeeb' naq wii' i xojb' kaxlan-aaj, kalaab' chik i naa kiwihiik ar.⁸Eh chupaam i ye'aab' re' re' naa ruwihiik jinaj i b'eeh, Santolaj b'eeh i naa kiq'orom reh. Re' taqe i ma' saq ta wach i kánima ma' naa ta ruye'em riib' chi naa kik'iik chupaam i b'eeh re' re', je' wo' taqe i ma' kinimanik taj ma' naa ta wo' kik'iik ar.⁹Eh ma' naa ta chik kiwihiik ar i josq'laj chikop, taqe i kaq b'ahlam. Eh re' i naa kianam okik ar xa re' wo' taqe i esamaj chik taqe chaloq chupaam i ti' k'axik.¹⁰Xa re' wo' taqe iresam chaloq panti' k'axik i QaJaaw Dios, tz'uuy inki a'n noq naakokiik chupaam i ye'aab' Sión. Eh juneliik suq kik'ux noq naa kik'achariik ar, naa kireqem i suq laj wihik, ma' naa ta chik koq'iim ruum i ruti'kiil kik'ux. Re' taqe i aj Asiria xkian i peleto kuuk' i aj Jerusaleem (2 Rey 18.13-37; 2 Cron 32.1-19)

¹Kab'laj-oq chik haab' rokiik chi reyil Judá i Ezequías, re' i kireey i aj Asiria Senaquerib rub'ihnaal, xooj chi peleto chikinaah chu'nchel i tinamit Judá re' i wilik wo' naq kipaat inkik'olej wii' kiib'.²Re' i kireey i aj Asiria ar wilik Laquis noq xutaq'aaj reje i Rabsaces, i nim wach k'amal b'eeh, ma' k'isa soldado i xuk'am reje chi riij, noq xooj ruuk' i Ezequías ar Jerusaleem. Eh ar xkiyejaa' i ki-itz'ihy naah paat chi chii' i rooq i ha' wilik cho taxaaj, re' i b'eeh i nik'ik chi chii' i ha' tz'ajb'al.³Eh ixib' i xi elik chaloq chi kik'ulariik, je' wili kib'ihnaal: Re' Aliaquim, ilil reh chu'nchel i wilik ar rak'uun Hilcías, re' i Sebna i aj tz'ihb', re' i Joa rak'uun i Asaf x-ilwik wach i huuj.⁴Re' i Rabsaces je' wili i xuq'or keh ixib' chi winaq re' re':
Re' taq i hat naa taq aq'orom reh i Ezequías re' taq aareey taqe i q'orik wili: Re' i kireey i aj Asiria nim rajaawriik je' wili i xuq'or taq cho chawiij.⁵Mi rukapaaj re' reh chi neeruko'leej riib' ruuk' taqe i holohaq q'orik, mi neenye'arik rukowiil chi q'aq'inik re'. ¿Awach aj uuk' ruye'em ruk'ux chi ma' kiruyohleej ta k'isinoq?⁶Re' hin inwilow chi kuuk' i aj Egipto i rusik' i ko'lemb'al riib'. Eh wila' re' reh xuyeew ruk'ux kuuk' i re' naa ruk'ulum reh je' rukab' i ruk'ul awach i rukoj chi rukarote i kaxlan aaj noq i ruyeew i rahliil chinaah intoq eh inokik pan q'ab' i ruxeer, xama' xta inkih chi nee ruyeew ruk'ux ar.⁷Eh wila' xuq'or i reh chi je' wili: Re' hoj ruuk' i QaJaaw Dios inqayeew qak'ux nee qoh ruko'leej, inkoq. Re' hin ma' nunimaj taj ruum re' wo' i Ezequías x-esanik reh chu'nchel taqe i artaal imb'aan naq wii' i loq'inik. Re' artaal naa kianam wii' i loq'inik ar Jerusaleem.⁸Yu'naak nee b'ila' rub'an chi nee taq inayejaa' wach i jinaj na'ojb'al ruuk' i qareey i hoj, hoj aj Asiria. Re' reh nee b'ila' i ruyeew i kiib' miil chi kawáyu, eh re' b'ila' hat nee tisik'wik keh winaq neekijohtik chikiij.⁹Re' reh ma' nee ta rukuy i q'aq'inik ruuk' i k'amal kib'eeh soldado atoob' ta ma' q'e' kow riib' inchalik ruuk' i kireey i aj Asiria. ¿Mi ch'iklik taq ak'ux re' chi wilik taqe i aj Egipto naa kichaliik rij kawáyu taq chako'ljiik?¹⁰¿Mi rukapaaj re' reh chi xchalik nub'an reh chi xchalik nusach wach i tinamit chi ma' nupahqaam ta reh i Dios? Re' i reh xq'orik cho weh, chi naa nusacham wach, inki i reey tiko'q taq reh.

¹¹Eh re' Eliaquim, i Sebna, i Joa je' wili ruchaq'weesjiik i Rabsaces xkian:
Chakuy pan kiq'oral i aj arameo qoh aq'oreej ruum re' hoj inqib'iraj. Je' re' noq ma' qoh aq'oreej pan kiq'oral i aj Judá ruum chu'nchel i wilkeeb' cho nah tz'aq k'ahchi' cho kib'iram i k'ahchi' aq'orom qeh, inki taqe.

¹²Re' i Rabsaces xchalik Asiria je' wili i xuq'or:
Re' hin ma' xata awuuk' taq i hat, eh ma' xata ruuk' taq aareey xintaq'ab'jik cho chi q'orik. Xin taq'ab'jik la' wo' chaloq chi q'orik kuuk' i wilkeeb' cho nah tz'aq, kuuk' taqe re', hat taq junk'uxariik aasaa' na'chub'an, eh naa taq awuk'em aawaab' chinaah, inki.

¹³Re' Rabsaces xpa'lojiik johtoq kow xuq'or chi je' wili: Pan kiq'oral i aj Judá:
Chab'iraj taq chawunchelaal i ruq'or taq cha weh i kireey i aj Asiria, re' i xiik' naah nimaal i rajaawriik.¹⁴Re' reh je' wili i ruq'or: Maa yeew taq awiib' chi jot'arik reh i reey Ezequías ruum re' reh xama' naa ta wo' taq rub'anam ako'ljiik.¹⁵Wila' re' Ezequías xuq'or taq aweh chi je' wili: Ruuk' i QaJaaw Dios chayeew ak'ux, xti korik chi nee qoh ruko'leej. Re' reh ma' jaruuj naakooj ruq'asam pan q'ab' i kireey i aj Asiria, inko'q taq aweh.¹⁶Manimaj taq reh i reey Ezequías. Re' i qareey i hoj, hoj aj Asiria je' wili i xuq'or cho weh chi naa taq nuq'orom aweh: Wila' xkaaj kik'amam kiib' panotob'il wuuk' naa kianam rusuqkiil i wach i ki uuva, i wach i ki higo. Eh naa kianam rusuqkiil i kijul haa'.¹⁷Eh naa nuk'amam taqe reje chupaam i ye'aab' q'e' holohik, je' raxiil pam i kiye'aab' i keh. Re' i rub'an wii' i wach i trigo, i uuva, aha' ma' naa ta kikuyum kiwa' kihaa'.¹⁸Eh wila' xuq'or taq aweh i reey Ezequías chi re' Dios naa ruko'liniik taq aweh manimaj taq reh maayeew taq awiib' chi jot'arik reh. ¿Mi wilik jino'q re' i dios xkian ruko'ljiik i kitinamiit pan q'ab' i qareey i hoj, hoj aj Asiria?¹⁹¿Mi wilik kajaawriik re' i ki dios i aj Hamat, i ki dios i aj Arfad i ki dios i aj Sefarvaim? ¿Mi xkian ruko'ljiik re' i tinamit Samaria pan q'ab' i kireey i aj Asiria?²⁰¿Mi wilik jino'q keh i dios re' re' xkian ruko'ljiik i kitinamiit pan q'ab' i kireey i aj Asiria? ¿Chib'ih reet noq inkikapaaj chi re' i Dios naa ruko'liniik reh panuq'ab' i tinamit Jerusaleem? inki qareey, inki.

²¹Eh re' taqe i aj Judá ma' jino'q chi q'orik xichaq'wik, ruum q'orooj chik keh ruum i reey chi ma' naa ta kichaq'wik chi jumpech.²²Eh re' i Eliaquim rak'uun i Hilcías inilwik reh i wilkeeb' parupaat i reey, i Sebna, i aj tz'ihb', i Joa inilwik wach i huuj rak'uun i Asaf. Re' keh xkixih i kiso' chikiij ruum i ruti'kiil kik'ux noq xiooj ruuk' i reey Ezequías chuq'orariik i xq'orarik keh ruum i Rabsaces aj Asiria nim wach k'amal b'eeh. Re' QaJaaw Dios xuko'lej i tinamit Judá pan q'ab' i xchopwik naah (2 Rey 19.1-37; 2 Cron 32.20-23)

¹Eh noq xrib'iraj i reey Ezequías i xq'orarik reh, xuxih i ruso' chi riij, q'as wach itz'ihy chik i xukoj chi riij rehtalil chi xtib'ik ruk'ux. Eh xooj chupaam i rupaat i QaJaaw Dios.²Xutaq'aaj taqe ruuk' i Isaías rak'uun i Amoz jalal ruq'oral i Dios, i Eliaquim inilwik reh i wilik parupaat i reey, i Sebna i aj tz'ihb', haa' taqe i k'amal kib'eeh i aj tiij, q'as wach kiso' xkikoj reje.³Eh noq xi ponik, je' wili i xkiq'or reh i Isaías:
Re' hoj je' wili i xuq'or cho qeh i reey Ezequías chi naa qaq'orom aweh chuwach i q'iij wili, wilkooj chupaam i runimaal ti'kiil k'uxliis, jinaj i ti' k'axik xama' nqakuy ta chik, xa je' chik rukab' ixoq achk'isiin ma' nk'ulik ruk'ux ma' xta chik raansil.⁴Atoob' wila' xrib'iraj i ruDios i reh i xk'ulik, ruq'or Rabsaces nim wach k'amal b'eeh, xtaq'ab'jik cho ruum i kireey chutojariik i ru mahk chi riij taqe i xuq'or. Je' re' noq chub'an rutiij chi riij i qatinamiit reh chi ma' nee ta nsahchik kiwach nik' nimaal taqe i koxikahnik chi k'achalkeeb, inki taqe.

⁵Re' taqe i raj kamanoom i reey Ezequías xi ponik wo' chuq'orob'jiik i Isaías.⁶Eh re' Isaías je' wili i xuq'or keh:
Re' taq i hat je' wili i cha q'or taq ponoq reh i Ezequías. Re' i QaJaaw Dios je' wili i xuq'or: Maa ruyob'isaj riib' ruuk' taqe i q'orik xrib'iraj, i nub'ajariik xkian taqe i raj kamanoom i kireey i aj Asiria.⁷Re' hin naa nuye'em q'ab' chi naa ruponiik rib'iral ruuk' i kireey i aj Asiria chi jinaj i runimaal yo'jik naa ruchaliik chinaah. Ruum i re' naa wo' chik rusutiniik reje parutinamiit. Eh ar naa nukansam, inki i QaJaaw Dios, tiko'q taq ponoq reh.

⁸Re' Rabsaces nim wach k'amal b'eeh xunab'eej chi re' i ru reey xelik reje pan tinamit Laquis, xelik reje Jerusaleem, xponik rureq i ru reey chi peleto chik i rub'an kuuk' i aj Líbano.⁹Re' i Senaquerib i xrib'iraj chi re' i Tirhaca kireey i aj Etiopía xchalik chi q'aq'inik ruuk'. Eh re' kireey i aj Asiria wilik wo' chik taqe i xutaq'aaj reje ruuk' i Ezequías kireey i aj Judá, je' wili i xuq'or reje keh:¹⁰Re' i qareey i hoj, hoj aj Asiria je' wili i xuq'or cho chawiij: Re' i ruDios i ruyeew wii' ruk'ux inq'orarik reh ruum chi reh i tinamit Jerusaleem ma' jaruuj naa ruye'em q'ab' chi naa nuchopom naah, re' re' ma' korik taj, maa ruyeew riib' chi jot'arik.¹¹Re' reh reht'al chib'ih i kianam i wihinaq taqe cho chi reyil ar Asiria. Re' keh xkuxik kisacham wach i xkaaj naq cho kisacham wach i tinamit Asiria. ¿Mi kore' chik i reh neeruko'leej riib' panuq'ab' re'?¹²Re' taqe i numaam wati't xkisach wach taqe i tinamit je' wili kib'ihnaal: Gozán, Harán, Resef, ruch'ihil taqe i riih rumaam i Edén, re' i xi k'acharik ar Telasar. ¿Mi xiko'ljik taqe i re' i tinamit re' re' ruum i ki dios?¹³¿Mi wilik kajaawriik re' i kireey i aj Hamat, i kireey i aj Arfad, i kireey i aj Sefarvaim, i kireey i aj Hena, i kireey i aj Joa? noq i rilow i reh, inki i qareey, inki taqe i aj taqareel.

¹⁴Eh re' reey Ezequías xuk'ul i huuj xkik'am chaloq i aj taqareel, eh xrilow wach chib'ih i ruq'or. Eh xooj chupaam i rupaat i QaJaaw Dios, ar xuhe' johtoq wach i huuj chuwach i QaJaaw Dios.¹⁵Eh xub'an rutiij chuwach i QaJaaw Dios je' wili i xuq'or:¹⁶QaJaaw Dios nim awajaawriik, hat qaDios i hoj, aj Israel, ar wilkaat pan taxaaj chi kixilak taqe i k'achaach wilik kixiik' Eh xa re' wo' hat i Dios wilkaat chikinaah i reey sut i wach ak'al. Re' wo' hat xatyej-anik reh i taxaaj i wach ak'al.¹⁷QaJaaw Dios kinab'iraj tii, chawilow i ruti'kiil qak'ux. Re' hat xab'iraj chik i xutaq'aaj cho ruq'orariik weh i Senaquerib kireey i aj Asiria, chu'nchel i xuq'or, ab'ajariik i hat QaJaaw Dios k'achalkaat chi juneliik.¹⁸QaJaaw Dios korik wo' chi re' taqe i kireey i aj Asiria ik'inaq taqe chaloq, kisacham wach taqe i tinamit.¹⁹Eh xkuxik kik'atam wach q'aaq' i kitiyoox taqe i tinamit re' re' ruum ma' re' ta wo' taqe manlik Dios xa chee' xa ab'aj wo' kiyej-aal. Xa ruyej-aniik winaq taqe ruum aj re' xkian rusachariik wach.²⁰Yu'naak QaJaaw Dios, i nupahqaaj otob'il aweh chi qoh ako'leej pan kiq'ab' i aj Asiria. Ruuk' i re' neenkilow chi wilik awajaawriik chuwach taqe i wilik kajaawriik, eh chi xa re' wo' hat i jinaj chi Dios, inki parutiij.

²¹Eh je' wili i xutaq'aaj ruq'orariik i Isaías rak'uun i Amoz reh i Ezequías:
Re' QaJaaw qaDios i hoj, hoj aj Israel je' wili i xuq'or chawiij: Re' hin xb'iraj chik i rutiij chi riij i k'axkiil i ruk'am chaloq i Senaquerib kireey i aj Asiria.²²Re' i QaJaaw Dios je' wili i xuq'or reh i kireey i aj Asiria:
Re' hat naa kaat kikaqse'laam i aj Sión je' rukab' i kaqse'eel i rub'an i k'isa q'ahxoq. Eh noq naa amolom chi elik re' taqe i aj Jerusaleem naakik'uyusam i kinaah.²³Eh ¿Awach i xakaqse'laaj, i xaq'ehtaaj, i xab'aj, i xajosaj aq'oral chinaah noq inaq'or i hat? Re' i xa a'n reh chi je' re', re' i hin i Santolaj Dios ki Dios i aj Israel.²⁴Re' hat xataq'aaj taqe reje aj taqareel chi nub'ajariik i hin, hin Dios, je' wili i xaq'or: Re' hin ruuk' i kajaawriik i nukareeta xin johtik chi q'aq'inik chikinaah i yuuq'. Eh xin johtik wo' chinaah inajt naah yuuq' Líbano, ar taqe xnuyok' i nimaq chee' chakaltee', taqe i sohchaj q'e' holohaq. Eh korehtaal ximponik chupaam i ye'aab' kitikim wii' i chee' q'e' holohaq.²⁵Re' hin pan tokoom ye'aab' xnuk'ot nujul haa', eh xwuk'ej weh, eh xa ruuk' wooq xnuchiqsaj taqe i rooq ha' wilkeeb' naq cho Egipto, tiki.²⁶¿Mi ma' ab'iram re' hat chi re' hin i k'achlik Dios xikapeb'inik cho reh najtir q'iij, eh chi re' hin xinyej-anik cho wach chi naa rub'aan? Eh yu'naak xnub'an chik ruum i re' nuyeew q'ab' aweh i hat chi xasach kiwach i tinamit wilik wo' naq kipaat inkiko'leej wii' kiib', eh xakanaa' chi ma' xta i wilkeeb' chupaam.²⁷Re' taqe i patineel ar ma' xta kikowiil, xiyo'jik, xik'ixiik. Ruum aj re' xi kahnik chi xa je' taqe ch'ahn, xa je' taqe k'im, je' kikab' i ch'ahn kipoq' nah taq paat, ink'atarik ruum i rutz'a'iil i teew inchalik pareelb'aal q'iij.²⁸Re' hin weht'al chik chu'nchel ayejaam wach, eh chib'ih taqe i naa a'nam. Eh weht'al wo' hoq chi xchalik ak'aah chi nunaah.²⁹Ruum chi xchalik ak'aah, chi xajosaj aq'oral chi nunaah, je' naa nukojom i kotkot laj ch'ihch' chii' aaju'. Eh je' wo' naa nukojom ch'ihch' panachii' mek'b'al reje aweh, reh chi naa wo' chik asutiniik reje chupaam i b'eeh xat chalik wii', inki Dios, inki Isaías.

³⁰Re' Isaías je' wili i xuq'or reh i Ezequías: Re' i wili i rehtalil i naa ruk'ulariik, chupaam i haab' wili, eh chupaam i haab' jinaj xa re' i naakiwachum i poq'el trigo taq naa ak'uxum. Eh chupaam i roox haab' naa taq chik atikim atrigo naa taq atikim aa-uuva re' taq chik i wach naa ak'uxum.³¹Eh re' taqe i aj Judá konaakikahniik chi k'achalkeeb' naa wo' chik kik'ihaaxb'iik je' rukab' noq inwachinik i tik noq i ruk'am raa' chi korik.³²Wilik taqe i aj Judá naa kikahniik chi k'achalkeeb' ar Jerusaleem. Eh wilik taqe i naa kikahniik chi k'achalkeeb' chinaah i yuuq' Sión. Re' i wili, re' i QaJaaw Dios naa rub'aniik ruuk' i runimaal i ruk'axb'al.³³Re' i QaJaaw Dios je' wili i xuq'or: Re' i kireey i aj Asiria ma' jaruuj naa rokiik chi q'aq'inik pan tinamit Jerusaleem, ni xata ruuk' flecha, ni xata ruuk' i pulato ch'ihch', ma' naa ta kianam ookik atoob' ta naq neenkimol wach aak'al kijohtb'aal.³⁴Re' i b'eeh xuk'am chaloq noq xchalik, ar wo' chik naa rusutiniik reje, xama' jaruuj ta wo' naa rokiik pan tinamit Jerusaleem, inki i QaJaaw Dios.³⁵Re' hin naa nucha'jiniik reh, naa nuko'liniik reh i tinamit wili ye'b'al runimaal wach i nub'ihnaal i hin, ye'b'al runimaal wach i rub'ihnaal David waj kamanoom inki Dios, inki i Isaías.

³⁶Eh chupaam aq'ab' re' re' jinaj i ruánjel i QaJaaw xponik rukansaj taqe i kimolom naq wii' kiib' i aj Asiria jinaj siento miil ruuk' kajwinaq ruuk' hoob' miil chi soldado Eh chu'nchel i re' kamnaq chik taqe noq xsaq'ik chi junwaar.³⁷Eh noq xrilow chi je' re' i Senaquerib i kireey i aj Asiria, xelik reje ar xuk'am reje i rutz'a'aamb'aal reh q'aq'inik, ar chik xooj wih-oq Nínive.³⁸Eh re' i Senaquerib, noq loq'inik i rub'an parupaat i rudios Nisroc rub'ihnaal, xkikansaj i ki'ib' chi rak'uun, Adramelec, Sarezer i kib'ih. Ruum i re' xumol chi elik i Senaquerib ruch'ihil taqe i ru soldado, ar chik xiooj i Ararat, eh re' chik i rak'uun Esar-hadón i b'ih xokik chi reyil chi jilow. Re' yab'ilaal xub'an i Ezequías, eh re' noq xk'achjik (2 Rey 20.1-11; 2 Cron 32.24-26)

¹Eh chupaam q'iij re' re' xchoparik ruum i runimaal yaab'ilaal i reey Ezequías. Re' i Isaías jalal ruq'oral i Dios rak'uun i Amoz xponik ruuk', je' wili i xuq'or reh: Re' QaJaaw Dios je' wili i xuq'or aweh: Chayejaa' chib'ih jariik i naa ayejaam wach panapaat ruum naa akimiik, ma' naa ta chik ak'aachjiik, inki.

²Eh noq xrib'iraj chi je' re' i Ezequías xusutej i koq i wach, wach tz'aq, eh je' wili i xuq'or parutiij reh i QaJaaw Dios:³QaJaaw Dios, re' hin inupahqaaj otob'il aweh chi k'oloq tii cho panak'ux chi xatnunimaj chi korik ruuk' i rukorkiil wach nuk'ux. Eh xti xnub'an chu'nchel nuk'ux imponik chawach, inki, eh xasuq suq chik inoq'ik.

⁴Re' i QaJaaw Dios je' wo' chik wili i xuq'or reh i Isaías:⁵Hiy wo' chik ruuk' i Ezequías, je' wili i cha q'or reh: Re' i QaJaaw Dios je' wili i xuq'or aweh: Re' hin, hin ruDios i xikin aamaam David, xb'iraj chik i aatiij xwilow chik i riis naq'awach, ruum aj re' ko ho'lajuuj chik haab' naa nutiqim rooq aak'achariik.⁶Re' hin naa nuko'liniik aweh, eh re' hin naa nuko'liniik reh i tinamit Jerusaleem pan q'ab' i kireey i aj Asiria, inki Dios. ²¹Re' Isaías je' wili xuq'or: Chake'j taq wach i higo nee taq inakoj chuwach i ru q'aah i Ezequías neenk'achjik, inki.²²Eh re' Ezequías xupahqaaj reh i Isaías chi je' wili: ¿Chib'ih rehtalil neenwilow chi naa nujohtiik parupaat i nuDios? inki.⁷Re' i wili i rehtalil naa ruye'em i QaJaaw Dios, reh chi naa anab'eem, chi naa rub'anam aha' wilik i xuq'or.⁸Re' QaJaaw Dios hoob' ora naa rusutem chi riij i q'iij. Ar naa ruk'utiniik chupaam i ilb'al ru ora i Acaz re' i rupaj wii' i ru ora ruuk' i q'iij, inki Isaías. Eh je' wo' re' i xk'ularik re' hoob' ora wo' sutinik chi riij. Eh xk'utinik chupaam i ilb'al ru ora i Acaz, chi re' q'iij xsutinik chi riij.

⁹Eh noq xk'achjik ruuk' i ruyab'ilaal i Ezequías kireey i aj Judá xutz'ihb'aaj taqe q'orik wili ye'b'al ruloq'il i QaJaaw Dios.

¹⁰Re' hin je' wili i xnuq'or: Kopan yehjaal i nuk'achariik wilkiin, noq naawojiik muhqoq pan kiye'aab' i kamnaq. Eh ma' naa ta nub'anam rusuqkiil i ruqox i nuk'achariik, kinki.¹¹Re' hin xnukapaaj chi ma' naa ta chik wilom, wach i ruloq'il i QaJaaw Dios ayu', eh chi ma' naa ta chik wilom kiwach i k'achareel ayu' wach ak'al.¹²Re' hin xnukapaaj chi xresaj chik i nuk'achariik i QaJaaw Dios. Je' rukab' noq inehteesjik reje i ki-itz'ihy naah paat i aj cha'jen tentzun, je' rukab' noq inyok'arik i keem, ruum xa chi q'iij chi aq'ab' naq chik wilkiin panti' k'axik ruum i yab'ilaal.¹³Re' hin kinik'ik aq'ab' chi oq'ik ruum i ti' k'axik, ma' kiwirik ta ruum. Je' cho kaq b'ahlam k'ahchi' rupaxiniik reh i nub'aqil noq inwik'raaj. Eh chi q'iij chi aq'ab' kinik'ik chi ti'.¹⁴Eh xama' nukuy ta chik i q'orik, xa je' chik kinoq'ik kok' siq'jil tz'ikin, xa je' chik kinoq'ik i paloma. Xa ma' nukuy ta chik johtoq i tz'eht pan taxaaj: QaJaaw Dios q'e' ti' wilkiin kinatoob'eej tii.¹⁵¿Chib'ih ta wo' chik i naa nuq'orom i hin, ruum re' wo' i QaJaaw Dios xye'wik i ti' k'axik wili? Re' hin naa nuwihiik pan chaq'lamiil chupaam i nuk'achariik ruum i ruti'kiil i wánima.¹⁶QaJaaw Dios re' hat inatob'eej taqe i winaq ruum i re' inwihik kik'achariik. QaJaaw Dios re' hin weht'al chi nee kinatoob'eej ruuk' i re' nee kinak'achrisaj neen wihik nuk'achariik.¹⁷Yu'naak re' naq i ruti'kiil nuk'ux xasutej chi rusuqkiil k'uxliis. Re' hat xako'leej chik riij i nuk'achariik xinawesaj chik pankimik, ruum xakuy chik chu'nchel i numahk.¹⁸Re' i wilkeeb' chik pankijuul ma' nee ta chik tikiloq'ej, je' wo' taqe i kamnaq. Re' taqe i kiooj panjul ma' nee ta chik inkuy-eej i rukorkiil wach ak'ux.¹⁹Xa re' wo' taqe i kok'achalkeeb' neenkian alooq'jiik je' rukab' i k'ahchi' kiin hin yu'naak. Re' taqe i tuutb'ees ajaab'ees inkiq'or reh i kak'uun kixq'uun i rukorkiil wach ak'ux.²⁰Re' i QaJaaw Dios inko'linik weh, ruum aj re' naa qaq'ojem i qa arpa naaqatz'uyem wach i QaJaaw Dios parupaat nik' chik najtiil i qak'achariik ayu' wach ak'al, inki Ezequías. Re' reey Ezequías xuk'ul taqe i taqareel xutaq'aaj i kireey i aj Babilonia (2 Rey 20.12-19; 2 Cron 32.27-31)

¹Eh chupaam i q'iij re' re', re' rak'uun i Baladán, re' i Merodac-baladán i kireey i aj Babilonia, xrib'iraj rib'iral chi xyowab'jik i Ezequías, eh chi xk'achjik wo' chik. Ruum i re' xutaq'aaj reje ruhuuj, eh xutaq'aaj reje jinaj i rukooch chikiij i aj taqareel.²Re' Ezequías xasuq chik ruk'ux noq xuk'ul taqe i raj taqareel i reey Merodac-baladán. Eh xuk'uhtaaj keh i rub'ehomal, i ru plata, i ru oro, i k'ih b'uhr wach chi nk'ohnik laj iq'oom taqe i ch'ihch' i rukoj reh q'aq'inik. Eh chu'nchel i wilik chupaam i paat i rub'an wii' taaq'anik Ezequías xuk'uhtaaj keh chu'nchel i aj taqareel.³Eh re' Isaías jalal ruq'oral i Dios xooj k'oloq ruuk' i reey Ezequías xupahqaaj reh chi je' wili:
¿Aha' kichalik i winaq xi k'ulik awuuk', eh chib'ih i xkiq'or? inki.
Re' i Ezequías je' wili xuq'or:
Re' keh konajt xi chalik ko ar Babilonia, inki.

⁴Re' Isaías je' wili i xuq'or reh i Ezequías:
¿Chib'ih jariik i xk'ulik kilow chupaam aapaat? inki.
Re' Ezequías je' wili xuq'or:
Re' keh xk'ulik kilow chu'nchel chib'ih jariik wilkeeb' ar. Eh ma' xta chik jino'q i ma' ta xnuk'uhtaaj keh, inki.

⁵Eh re' Isaías je' wili xuq'or reh i reey Ezequías:
Chab'iraj i naa ruq'orom aweh, i QaJaaw Dios nim rajaawriik:⁶Naa ruponiik i q'iij noq chu'nchel i wilkeeb' chupaam i paat re' re', re' taqe i kimolom cho wach taq aamaam awati't xk'uloq ayu' yu'naak naa ruk'amariik reje Babilonia. Ma' xta chik i naa rukahniik ayu'.⁷Eh wilik wo' keh taqe awiih aamaam winaq naakik'amariik reje Babilonia naakikanab'jiik chi kapuun, naakikojariik chi cha'jen reh i rupaat i reey, inki.

⁸Eh re' reey Ezequías, je' wili xuq'or reh Isaías:
Re' ruq'oral i Dios xaq'or weh ma' xta reet.
Xa re' la' nik' chik najtiil i nuk'achariik ayu' ma' ta naq chih i neenuk'ul nee ta naq kinwihik pansuqkiil k'uxliis, inki. Re' QaJaaw Dios i ruyeew rusuqkiil kik'ux i aj Sión¹Re' QaJaaw Dios je' wili i xuq'or: Chayeew taq rusuqkiil kik'ux, eh chayeew taq rusuqkiil kik'ux i nutinamiit.²Chaq'or taq keh ruuk' q'unil, i aj Jerusaleem chi manlik chik i ti' k'axik xkik'ul, eh naa wo' chik keliik reje i wilkeeb' wii'. Re' hin ma' k'isiin chik i tojb'al kimahk xnuyeew ruum i kiyiib' wach na'ojb'al. Eh xnukuy chik i kimahk, inki.

³Eh jinaj i k'erik chii' chuq'orariik chi je' wili chupaam i ye'aab' chiq yuuq': Chayejaa' taq chi korik awánima chuk'ulariik i QaJaaw Dios. Eh cha yejaa' taq i rub'eeh, je' rukab' noq inyejeb'jik i rub'eeh i wilik chi ajaab'esil.⁴Chu'nchel i ye'aab' juulaq paam, taqe inajt naah yuuq', naa rub'aan k'ixkaab' reh. Eh re' taqe i b'eeh b'uuk'laq paam naa rub'aan chijiik wach keh, re' taqe i b'eeh yok yok wach naakiye'ariik chi korik.⁵Eh re' i QaJaaw Dios naa ruk'uhtaam i ruloq'il, chu'nchel i tinamit naaki-ilwik wach pankomonil. Re' wili korik, ruum re' i QaJaaw Dios inq'orik reh, inki.

⁶Eh je' wo' chik wili i xq'orarik cho weh: Chak'er aachii', inki. ¿Chib'ih jariik i naa nuq'orom? kinki reh. Re' naa aq'orom re' chi re' i kik'achariik i tinamit xa je' rukab' i rax ch'ahn, eh re' runimaal kiwach je' rukab' i rixmak'al i ch'ahn inpuhlujik wataq yuuq' k'ixkaab'.⁷Korik wo' hoq chi re' i rax ch'ahn xa re' yu' inchiqik. Re' i uhtz'ub' xa re' yu' inchiqik ruum i tz'a'laj teew i ruyeew chee QaJaaw Dios, je' re' noq insahchik wach i kik'achariik i tinamit.⁸Re' i ch'ahn inchiqik, eh re' i uhtz'ub' inchiqik wo' hoq. Eh re' i ruq'oral i QaJaaw Dios, ma' jaruuj naa rik'iik wach, inki cho weh.

⁹Re' hat johteen chinaah i yuuq', cha q'or keh i aj Sión i q'orik holohik rib'irjiik. Eh cha q'or keh i aj Jerusaleem, chi naa rik'iik i kiyo'jiik. Nee wo' naq'or keh i aj Judá chi je' wili: Chalik taq reh aaWaJaaw aaDios chako'ljiik.¹⁰Re' QaJaaw Dios naa ruk'uliik iloq ruuk' i rajaawriik, re' chik i reh naa rub'aniik taaq'anik. Eh xuk'am chaloq i kitojb'aal nik' nimaal i xuko'leej taqe chaloq.¹¹Re' wo' reh naa rucha'jiniik reh i rutinamiit chi, je' rukab' i rub'an i cha'jen tentzun, i ruyeew taqe i koq chi' ruk'ux. Eh ruuk' q'unil i rub'esaj taqe ixoq tentzun ko kok' taq i kak'uun. Re' i runimaal rajaawriik i Dios ma' ha' ta chi je'¹²¿Mi wilik i neerub'an rupajariik i palaw ruuk' i paam i q'ab', eh neerub'an rupajariik paam i taxaaj ruuk' taqe ju' q'ab'? ¿Mi wilik i neerub'an rupajariik i runimaal i wach ak'al, eh neerub'an rupajariik inajt kinaah yuuq' ruuk' jino'q i pajb'al?¹³¿Mi wilik inq'orik reh i QaJaaw Dios ruuk' chib'ih taqe i rub'an? ¿Mi wilik ixtijinik reh i QaJaaw?¹⁴¿Mi wilik xkojwik runa'ojb'al i QaJaaw Dios? ¿Mi wilik xq'orik reh chi parub'ehel naa ruq'atam i q'orik, eh xk'uhtanik reh i nimaq wach na'ojb'al, ixtijinik reh ruuk' taqe i runa'ojb'al?¹⁵Chuwach i QaJaaw Dios re' taqe i nimaq tinamit, xama' xta kiokik wii', xa je' taqe junt'uur chi ha'. Eh xa je' taqe kikab' i pooq inye'arik pan pexu. Re' taqe i tinamit kotimaj kiij chi ha', xa je' rukab' noq insahchik wach i pooq.¹⁶Eh re' taqe i chikop wilkeeb' Líbano, ma' nee ta naq kimanlojik chi mayiij. Ni xata naq neemanlojik i chee' wilkeeb' ar chi k'atb'al reh i mayiij.¹⁷Chu'nchel i nimaq tinamit, xama' xta kiokik wii' chuwach i QaJaaw Dios. Xti korik chi ma' xta kitz'aaq chuwach i reh.¹⁸¿Awach taq aj uuk' naa apajam i runimaal wach i QaJaaw Dios? ¿Mi nee taq inapaj ruuk' jino'q xatz'aqoj tiyoox?¹⁹Re' aj ch'eyel ch'ihch' i ruyejaa' i tiyoox, eh re' aj ch'eyool i ruyulej i oro chi riij, eh i ruyejaa' rukarena chi plata, eh i rulekaa' chi ralaq.²⁰Re' neb'aa' reh i rusik' i chee' ma' moohrik taj i ruyeew reh i aj sehk, eh ruuk' i re' inyejeb'jik i rutiyoox, re' aj sehk xa holohik chik i ruyejeb'jiik i rub'an xa re' la' xama' ink'uyu'jik ta wo' hoq.²¹¿Mi ma' aweht'al mi ma' ab'iram taq re' hat? ¿Mi ma' q'orooj taq cho rib'iral aweh pampeet re'? ¿Mi ma' aweht'al taq re' hat i xa re' wo' rutz'uhkriik chee wach ak'al?²²Chi re' QaJaaw Dios ko ar wilik cho kochinaah i taxaaj, imb'urwik naah i wach ak'al. Eh re' i tinamit wilkeeb' wach ak'al xa je' taqe kok' chili'l noq i rilow. Eh re' i taxaaj, xa je' inteharik wach itz'ihy i rub'an, re' ruuk' inokik chi perpat.²³Re' QaJaaw Dios i rusutej taqe chi xama' xta kiokik wii' i winaq nimaq kiwach inki a'n kiib'. Eh i rusach kiwach taqe i k'amal kib'eeh i tinamit.²⁴Re' keh naakik'ulum keh je' rukab' i ruk'ul i tik koha'lakuun koxtikarik panak'al, komajaa' i ruk'am raa' chi korik. Eh noq re' i QaJaaw Dios i ruyeew chaloq i teew chinaah inchiqik. Eh noq i ruyeew chaloq i kaq suut teew jab' ink'amarik reje chi xa je' ma' ahl ta laj sohk'.²⁵Eh re' i santo laj Dios i rupahqaaj chi je' wili: ¿Awach taq aj uuk' nee kinapaj, awach i nee rureq chi je' nukab' i hin? inki.²⁶Re' taq i hat ti tz'ehtanoq taq johtoq pan taxaaj, Eh ¿Awach inyej-anik taqe re' noq inaq'or taq i hat? re' i QaJaaw Dios nim rajaawriik xyej-anik keh. Re' reh xye'wik reh pan kiye'aab', eh xukoj rub'ihnaal. Eh ma' xta jino'q i ma' ta xuyeew paruye'aab'.²⁷Eh re' taq i hat aj Israel i hat taq riih rumaam i Jacob. Chib'ih reet noq inaq'or taq chi je' wili: ¿Chib'ih reet noq re' Dios xama' qohrutoob'eej ta wo' hoq ruuk' i ti' k'axik inqak'ul, tiki taq?²⁸¿Mi ma' aweht'al, mi ma' ab'iram taq re' hat chi re' i QaJaaw Dios xa wilik wo' chaloq najtir, eh chi re' reh xyej-anik reh chu'nchel i wilik wach ak'al? Re' reh ma' q'uhtik taj, ma' k'uhlik taj i raansil, re' runa'ojb'al ma' aha' ta chi je'.²⁹Re' reh i ruyeew ruman raansil i q'uhteel. Eh i ruyeew ransil i ma' xta k'isinoq ransil.³⁰Re' taqe k'ijool kiq'uhtik, re' taqe i kow kiib' ink'uhlik i kaansil, eh kiq'ehb'ik wo' hoq.³¹Eh re' taqe i kiye'em kik'ux ruuk' i QaJaaw Dios xa eliik naa ru aak'b'iik i kaansil. Eh naakixik'iniik chi je' rukab' taqe i xihk, xama' naa ta wo' kiq'uhtik, naakib'eeh xama' naa ta wo' ruk'uhliik i kaansil. Re' QaJaaw Dios xuq'or chi naa wo' chik ruko'leem i tinamit Israel¹Re' QaJaaw Dios je' wili ruq'or: Re' taq i hat tinamit i wilkaat taq chi chii' i palaw chab'iraj taq i naa nuq'orom. Chachop taq ak'ux reh chi neenqayejaa' wach i ko'lenb'al taq awiib' pankomonil.²¿Awach x-uksanik reh i korik wach ruk'ux? ¿Awach inq'asanik pan q'ab' i tinamit, eh chi nkiloch' kiib' i reey chuwach, chi rub'an keh ruuk' i ruq'aslaj ch'ihch', ruuk' i ru flecha, i rutukej kiwach je' rukab' noq ink'amarik reje i ma' ahl ta laj sohk' ruum i teew?³¿Awach intoob'inik reh noq rutahqeej taqe reje i aj ixowaal chi xasuq wo' ruk'ux noq inooj chupaam i b'eeh ma' jank'al tamponik wii'?⁴¿Awach imb'anik i re'? ¿Awach i xa wilik wo' chaloq i chinaah i wach ak'al rutihk'ik chee k'acharik? Re' imb'anik taqe reh i re', re' hin i jinaj chi Dios xa wilkiin wo' chaloq najtir q'iij xanaa wo' nuwihiik pantz'apaab' wach.⁵Eh noq xkilow i nimaq tinamit wilkeeb' cho chii' i palaw, taqe i xnub'an re' re', xchalik kiyo'jiik. Je' re' noq kim taq, chamol taq chaawiib'.⁶Eh k'ul inkitoob'eej kiib' chikiwach, je' wili inkiq'or: Chakowej taq ak'ux, inki taqe.⁷Re' aj sehk i ruyeew rukowiil ruk'ux i ch'eyel plata, je' wili i ruq'or reh i aj ch'eyel ch'ihch': ma' xta reet i xa a'n xuchop chik riib' i tiyoox ruuk' i ch'ihch' xahab'isaj, eh re' hin ruuk' kalawux i ruchop riib' chi nuwach, inki.

⁸Eh re' taq i hat aj Israel, riih rumaam Jacob i hat taq waj kamanoom, nutinamiit nusik'im taq chaa wach, hat taq cho riih rumaam i wamigo Abraham.⁹Re' hin xineesanik taq chaaweh pan tokoom tinamit wilkeeb' cho chi najt, je' wili i xnuq'or taq aweh: Re' taq i hat, hat taq waj kamanoom re' hin xin sik'wik taq chawach, ma' jaruuj taq naa kaat nuq'eb'em chi riij nuk'ux.¹⁰Je' re' noq matyo'jik taq, ruum re' hin wilkiin taq awuuk'. Maa rub'an taq kiib' ak'ux ruum re' hin, aaDios. Eh re' wo' hin kinye'wik taq akowiil, re' hin kintoob'inik taq aweh chi juneliik, ruuk' i runimaal i wajaawriik, eh naa taq kaat wilom.¹¹Eh chu'nchel i ki-ixowanik taq awach naakik'uhtaam kik'ixb'ilaal, naa rehtesjiik i runimaal kiwach. Eh awach naq inkaaj kianam aweh naa rusachariik kiwach chi jumpech.¹²Re' taq i hat naa naq chik asik'im i ki-ixowanik taq awach i kichalik taq chi q'aq'inik awuuk' ma' naa ta chik areqem taqe. Je' cho xama' wilkeeb' ta wo' chi jumpech naa rub'anam.¹³Re' hin, hin taq aaWaJaaw aaDios, hat taq nuchopom ruuk' i rusak'aaj nuq'ab', je' wili i nuq'or taq aweh: Maayohb'isaj taq awiib', re' hin naa nutoob'iniik taq aweh.

¹⁴Matyo'jik taq i hat, hat taq riih rumaam i Jacob, i ma' xta taq awajaawriik noq i nawik'raaj. Eh xama' hat ta taq k'ih chawiib', re' hin naa nutoob'iniik naa nuko'liniik taq aweh, hin taq aSantolaj Dios.¹⁵Re' hin naa taq kaat nukanaam chi je' rukab' i keeb'al riij i trigo ko ak' q'as i reeh. Naa taq a'nam keh i ki-ixowanik taq awach je' rukab' noq ink'amarik reje taqe i yuuq' chi je' rutuus ixiim.¹⁶Re' taqe i ki-ixowanik awach naa akutum taqe taxaaj, naakik'iik k'amaroq ruum i kaq suut teew. Eh re' taq i hat naa rusuuqb'iik taq ak'ux ruuk' i asantolaj Dios.

¹⁷Eh re' taqe i neb'aa' i nooj naq kisik' kihaa', xama' inkireq ta wo' hoq, xa chiqiij naq chik kichii'. Eh re' hin naab'iram i kitiij, ma' naa ta taqe nukanaam chi kutkeel, ruum naa taqe nutoob'eem, ruum re' hin taq aaDios i hat taq aj Israel.¹⁸Re' hin naa wesam taqe chaloq i nim ha' chupaam taqe i yuuq'. Eh chi naa raasjiik i k'achlik ha' wataq k'ixkaab', naa nusutem chi ha' paam ye'aab' i chiq yuuq'. Naa nusutem chi raasb'al ha' i chiqiij paam ak'al.¹⁹Eh naa nuye'em q'ab' chi naa rupoq'iik taqe chaloq i chee' chakaltee' chupaam i ye'aab' chiq yuuq'. Naa kipoq'iik i acacia, i wahut, i olivo, i chaj, i sohchaj, i bojes.²⁰Reh chi re' i tinamit neenkikoj rehtaal, chi neenkilow, chi neenkinab'eej, chi re' hin ximb'anik xin tz'uhkrisanik reh chu'nchel i re', hin aSantolaj Dios taq i hat, aj Israel, inki Dios. Re' QaJaaw Dios xuq'or keh i xatz'aqoj tiyoox chi kiq'oroq²¹Re' QaJaaw Dios, i ruDios i Jacob je' wili i xuq'or: Kim aj taq re' hat, tiyoox tib'ehoq taq chaloq k'oloq taq aq'or reh chi nee taq inako'leej awiib', inki.²²Kim taq cha q'or taq qeh chib'ih i naa ruk'ulariik na' chub'an. Eh cha q'or taq rub'ehel qeh chib'ih i k'uluuj chaloq noq xub'an, re' hoj neenqachop qak'ux chureqariik chi riij. Chaq'or taq qeh chib'ih i naa ruk'ulariik na'chub'an reh chi neenqareq chi riij.²³Chach'ob' taq rub'ehel qeh chib'ih i naa ruk'ulariik na' chub'an reh chi neenqanab'eej chi korik chi hat taq dios. Cha a'n taq jino'q i nim wach na'ojb'al reh chi neenqaq'or chi wilik taq awajaawriik, atoob' ta ma' holohik reh chi neenchalik qayo'jiik.²⁴Xa re' la' re' hoj qeht'al chi xama' xta wo' hoq i nee taq tichol rub'aan Re' taqe i kiloq'inik taq aweh xama' xta kiokik wii'.

²⁵Re' hin jinaj i winaq xnusik' cho wach pareelb'aal q'iij. Eh re' reh naa ruq'oriik rib'iral i nub'ihnaal, naa ruyeq'em taqe panak'al i wilkeeb' chi ajab'esil. Naa rub'anam keh je' rukab' i rub'an i aj yej-an xun noq i ruyeq' paam i lech'ik laj ak'al.²⁶¿Awach xq'orik cho qeh pampeet chi xqanab'eej i korik? ¿Awach xq'orik rukorkiil qeh taqe i na'ojb'al wili reh chi naa qach'ob'om rub'ehel, eh chi naa qanab'eem? Ma' awach ta taq aweh i hat xq'orik cho rib'iral, re' re' korik ma' nkitaj. Korik wo' hoq chi ma' awach ta x-ib'irinik cho reh, ma' awach ta xk'uhtanik cho reh.²⁷Re' hin i Dios, xinq'orik keh i aj Sión pampeet taqe wili. Re' hin xin taaq'anik reh i aj taqareel Jerusaleem chuq'orariik chi ilook' kielik chaloq panti' k'axik rutinamiit.²⁸Re' hin xnusik' naq chi kixilak i tiyoox chi naa kiin kichaq'weem, xa re' la' xama' jino'q wo' keh ixchaq'wik, xama' xkian ta wo' hoq i xnuq'or keh.²⁹Re' keh xama' xinkichaq'weej ta wo' hoq ruum ma' jino'q wo' keh i wilik rajaawriik, xa tiyoox taqe, xama' xta kiokik wii'. Re' QaJaaw Dios xusik' wach i raj kamanoom¹Re' Dios je' wili xuq'or: Re' wili i waj kamanoom, inusik'im wach, q'e' nuk'ax, eh suq nuk'ux chi riij. Eh naa nuye'em i Wuxlab'al chinaah, eh naa ruq'orom i rukorkiil wach nuk'ux keh chu'nchel i tinamit.²Re' reh ma' awach tee naa ruwech'um, ma' naa ta ruk'erem chii', eh ma' naa ta rib'irjiik i ruq'oral pantaq b'eeh³Eh naa rutoob'eem taqe i je' paxeel kaxlan aaj, eh je' wo' taqe i je' taqe q'aaq' xa k'isiin intzub'ik rusib'eel. Xti korik la' chi re' reh naa ruk'amwiik chaloq i wihik parub'ehel.⁴Eh ma' naa ta ruq'uhtiik, ma' naa ta rub'anam kiib' ruk'ux. Korehtaal la' i ruyeew i k'acharik parub'ehel chinaah i wach ak'al. Eh re' i wilkeeb' chi chii' i palaw k'ahchi' kuy-eem chi narojiik eloq wach i re', inki.

⁵Re' QaJaaw Dios xyej-anik reh i taxaaj, eh xuhe' wach, re' i xyej-anik reh i wach ak'al ruch'ihil taqe i kik'ihik chuwach, re' inye'wik ruxlaab' inye'wik ruk'achariik i tinamit je' wili i xuq'or reh i raj kamanoom:⁶Re' hin i Dios, xin sik'wik awach, eh hin xiye'wik awajaawriik reh chi naa ak'amam chaloq i k'acharik parub'ehel chinaah i wach ak'al. Eh chi re' hat naa aq'oriik rib'iral i naa nub'anam kuuk' i tinamit, re' hat i kisaqumaal i tinamit.⁷Reh chi naa atehem inaq'kiwach i moywach eh chi naa taqe awisam cho panti' k'axik i wilkeeb' prexo. Eh chi naa taqe awesam chaloq pan q'equm i wilkeeb' panq'equm.⁸Re' hin, Dios nim wajaawriik i nub'ihnaal, maayeew taq inuloq'il keh i tokoom, maayeew taq runimaal kiwach taqe i tiyoox chi nujilow i hin.⁹Eh re' i xnuq'or cho pampeet xooj wo' eloq wach, yu'naak ko ak' chik taqe i nuq'or. Re' hin k'achi' taq nuq'orom rib'iral aweh noq komajaa' nilarik, inki Dios. Re' rutz'uyjiik wach i Dios ruuk' i ko'linik xub'an¹⁰Re' taq i hat wilkaat taq chi junsuut i wach ak'al, cha tz'uyej taq i ak' tz'uuy chi loq'oomb'al reh i QaJaaw Dios. Eh re' taq i hat i tib'ehik taq naah palaw, je' wo' taq i hat i wilkaat taq chupaam, je' wo' taq i hat wilkaat taq chi chii' i palaw, chaloq'eej taq i QaJaaw Dios.¹¹Re' taqe i wilkeeb' panchiq yuuq', re' taqe i kitinamiit kik'er kichii' chi tz'uuyjik wach i QaJaaw Dios. Je' wo' taqe i wilkeeb' Cedar, taqe i wilkeeb' ar Sela, kik'er kichii' chutz'uuyjiik wach i QaJaaw Dios, chinaah taqe yuuq'.¹²Eh re' taqe i wilkeeb' chi chii' i palaw kiyeew runimaal wach, kitz'uyej wach i QaJaaw Dios.¹³Re' QaJaaw Dios ruuk' i rajaawriik naa rutik'am jinaj pajaj iib', je' rukab' i rub'an i soldado, i ruk'er reje chii' chuq'orariik chi naa rutoq'aam i q'aq'inik. Eh korehtaal i rub'an keh chu'nchel inixowanik wach.

¹⁴Re' QaJaaw Dios je' wili i xuq'or: Re' hin najt xwuy-eej, chi xama' xta xnuq'or. Eh yu'naak naa nuk'erem nuchii', je' kowiil i ruk'er chii' ixoq noq ink'ulik ruk'ux. Junsachariik kiwach naa nub'anam i ki-ixowanik nuwach.¹⁵Re' hin naa nusacham kiwach taqe je' inajt kinaah yuuq', taqe i je' rub'ohl yuuq', taqe i je' tik. Eh naa nuchiqsam taqe i je' nim ha', i je' jul ha' naa nukanaam taqe chi je' chiq yuuq'.¹⁶Eh naa nuk'amam kib'eeh i moywach chupaam i b'eeh ma' keht'al taj, naa taqe nuk'amam chupaam i b'eeh ma' jank'al ta ki-ik'ik wii'. Eh naa nusutem chi saqum i q'equm wilkeeb' wii' re' taqe i b'eeh b'uuk'laq paam naa nukanaam chi jiik kiwach. Re' taqe i wili naa nub'anam kuuk' i ma' naa ta taqe nukanaam chi kutkeel.¹⁷Re' hin naa nuye'em q'ab' chi naa kik'uhtaam kik'ixb'ilaal taqe inkiyeew i kik'ux kuuk' taqe i tiyoox, eh je' wili inkiq'or reh: Hat manlik qadios, inki taqe reh. Re' taqe i aj Israel xa ko je' wo' mutz'lik inaq'kiwach¹⁸Re' taq i hat i tz'aplik taq axikin ti ib'irinoq taq. Re' taq i hat, moywach ti ilwoq taq.¹⁹¿Awach i moywach? Re' taqe i nutinamiit. ¿Awach taqe i moywach i tz'aplik i kixikin? Re' taqe i nusik'im cho kiwach re' taqe i waaj kamanoom nutaq'aam taqe reje chuq'orariik.²⁰Re' keh ma' k'isiin wo' naq inkilow, xama' inkikoj ta wo' rehtaal. Ma' k'isiin wo' naq i xkib'iraj xama' xkaaj ta wo' kib'iram, inki QaJaaw Dios.²¹Re' QaJaaw Dios ruum chi re' reh aj ko'loom, ruum aj re' xuyeew runimaal wach i ruloq'il ruk'uhb'aal xuk'utaaj.²²Xa re' la' re' rutinamiit i Dios inkichop inkiyeew prexo inkelq'aaj i chib'ih keh. Eh inkitz'ap pantz'ilom, inchoparik kinaah ma' awach ta chik inq'uchwik keh, eh noq kieljik reje ma' awach ta chik inooj q'uchwoq keh.

²³Eh ¿Mi wilik taq jino'q chaxilak i hat ineerunimaj taqe wili? ¿Mi wilik taq jino'q chaxilak i hat iraaj rib'iram chib'ih jariik i naa ruk'ulariik?²⁴Eh ¿Awach xye'wik q'ab' chi xeljik i chib'ih keh i riih i rumaam i Jacob? ¿Mi ma' re' re' i QaJaaw Dios xye' wik q'ab' ruum ximahkunik chuwach? ma' xkaaj ta kik'amam i rub'eeh. Eh ma' xkaaj ta kinimam i xitijik wii' ruum i reh.²⁵Ruum aj re', re' QaJaaw Dios xrik'saj i ruk'aah chikinaah, xuyeew taqe panti' k'axik noq xb'aan keh ruuk' i q'aq'inik. Je' naa xi k'atarik pa runimaal q'aaq', xa re' la' re' keh xama' xinimanik ta wo' hoq. Xa re' wo' jinaj chi Dios inko'linik¹Eh yu'naak je' wili ruq'or i QaJaaw Dios ixtz'uhkrisanik qeh i hoj, hoj aj Israel, i hoj riih rumaam i Jacob: Matyo'jik taq ruum re' hin xineesanik taq cha weh panti' k'axik. Eh hin xinkojwik taq aab'ihnaal chi hat taq nutinamiit.²Eh noq naa taq awik'iik chinaah i palaw, noq naa taq awik'iik chinaah taqe nim ha' ma' naa ta taq ajihq'iik, ruum re' hin naa nuwihiik taq awuuk'. Noq naa taq awik'iik pan q'aaq' ma' naa ta taq kaat ruk'atam i xaq q'aaq'.³Ruum re' hin taq aaWaJaaw aaDios, awaj ko'loom, hin taq aSantolaj Dios i hat taq aj Israel. Re' xat wesaj taq cho panti' k'axik Egipto. Re' chik i tinamit Etiopía, i tinamit Seba xnuyeew taq chajilow.⁴Re' hin q'e' taq tiwaaj, xiik' taq k'ihaal atz'aaq chi nuwach, q'e' taq ti nuk'ax. Ruum aj re' i nuko'leej taq rij ak'achariik, tokoom tinamit chik i nuq'asaj taq chajilow.⁵Maayohb'isaj taq awiib', re' hin naa nuwihiik taq awuuk'. Eh naa numolom cho kiwach taq aatinamiit pareelb'aal q'iij, parookb'aal q'iij.⁶Eh chi je' i wilkeeb' pantz'eet, pansak'aaj ree rookb'aal q'iij, naa nuq'orom keh chi kitaq'aaj chaloq taqe i wak'uun wixq'uun, naa nuk'amam taqe chaloq i wilkeeb' chi junsuut i wach ak'al.⁷Chu'nchel i re', re' hin xin tz'uhkrisanik keh, re' hin xikojwik taq aweh chi nutinamiit re' taqe i kiq'orik wib'iral. Eh re' wo' hin inkiyeew nuloq'il, inki QaJaaw Dios. Re' taqe i aj Israel xiq'orik i korik chi riij i Dios⁸Re' QaJaaw Dios je' wili xuq'or: Atoob' ta wilik wo' naq naq' kiwach, xa je' wo' taqe moywach Atoob' ta wilik wo' naq kixikin xa je' wo' tz'aplik i kixikin.⁹Eh naakimolom kiib' i nimaq tinamit kuuk' i kok' tinamit. ¿Mi wilik jino'q chi kixilak ixq'orik cho pampeet i k'ahchi' ruk'ulariik? ¿Mi wilik jino'q chi kixilak i neeruq'or chib'ih naa ruk'ulariik? Wila' wilik jino'q i nee nq'orik, neerub'an chi nee ruk'am taqe chaloq i kieht'alinik reh chi neenkiq'or i korik, reh chi neenib'irjik, inki.

¹⁰Eh je' wili i xuq'or: Re' taq i hat nee ti q'orik i korik chi wiij. Re' hin xin sik'wik taq awach chi waj kamanoom, reh chi naa taq anab'eem nuwach chi re' hin i Dios. Eh ma' jino'q i dios wihinaq chaloq chi peet chi nuwach i hin, eh ma' naa ta wo' chik ruwihiik jino'q dios chi wiij i hin.¹¹Eh xa re' wo' hin i jinaj chi Dios, ma' awach ta chik jino'q inko'linik chi wiij i hin.¹²Re' hin xinq'orik chaloq chib'ih i naa ruk'ulariik eh re' wo' hin naa nuko'liniik taq aweh, ma' re' ta jino'q i tiyoox. Eh re' wo' taq i hat nee ti q'orik reh chi xa re' wo' hin i Dios.¹³Korik wo' hoq noq xa hin wo' cho Dios pampeet. Ma' jino'q i neeruko'leej riib' panuq'ab', eh ma' awach ta chik neenyojwik wach i nuyejaam wach i hin, inki.

¹⁴Re' taq aSantolaj Dios taq i hat aj Israel re' inko'linik taq aweh je' wili ruq'or: Re' hin wilik taqe i naa nutaq'aam kuuk' i aj Babilonia, reh chi naa taq kaat nuko'leem, naa taq kaat wesam cho ar. Eh re' taqe i aj Caldeo q'e' naq suq kik'ux chi riij i Babilonia naa rutib'iik kik'ux.¹⁵Re' hin i Dios wilik nuSantohiil, hin xin tz'uhkrisanik taq aweh i hat, hat taq aj Israel, eh hin taq aaReey.¹⁶Re' hin xintehwik chee kib'eeh taq aamaam awati't noq xi ik'ik cho chupaam i palaw, noq xi ik'ik cho chupaam i nim ha'.¹⁷Re' hin xinsachwik kiwach i ruk'ihaal soldado xtahqinik cho keh. Eh nusach kiwach i kikareta, i kikawayu reh q'aq'inik, ma' xi wuktik ta chik chi jumpech je' rukab' noq inchuhpik i saqum.¹⁸Re' taqe re' ik'inaq chik, maank'ulik taq chik panuk'ux inub'anam cho najtir, maakapaaj taq chik i k'uluuj chaloq.¹⁹Re' hin ak' chik taqe naa nub'anam, eh jumehq'iil taq naa awilom. Eh naa nutehem i b'eeh chi keh i nutinamiit chupaam i ye'aab' chiq yuuq', naa nutz'uhkrisam taqe i nim ha' chupaam i ye'aab' ma' xta nelik chuwach.²⁰Re' taqe i josq'laj chikop naakiye'em nuloq'il, taqe i xojb', taqe i nimaq chikop wilik kixiik', ruum naa nutz'uhkrisam ha' pan i chiq yuuq'. Eh je' wo' chupaam i ye'aab' ma' xta nelik chuwach, reh chi naa ruwihiik kihaa' i nutinamiit nusik'im cho kiwach.²¹Re' taqe i tinamiit wili xnuyejaa', reh chi naa kiye'em nuloq'il chikiwach i tinamit.

²²Xa re' la' re' taq i hat aj Israel hat taq cho riih rumaam i Jacob xama' xayeew ta wo' taq nuloq'il. Xq'uhtik la' taq ak'ux chi nusik'ariik.²³Eh ma' xak'am ta taq chaloq aatentzuun chi mayiij, ma' xta mayiij taq xayeew weh. Eh ma' nik' ta taq xnupaqaaj aweh i mayiij, je' wo' hoq insensia.²⁴Eh ma' xta taqe ink'ohnik laj ch'ahn taq xak'at chi amayiij chi nuwach. Eh ma' xak'am ta taq chaloq chi mayiij i kixeb'ohiil taqe i chikop. Re' la' taq chik amahk xinaq'utisaj taq wii', eh ma' suq ta xub'an weh chu'nchel taq ayiib' wach na'ojb'al.

²⁵Xa re' la' ruum chi re' hin taq aaDios naa nujuxum taq ayiib' wach na'ojb'al taq i na a'n. Eh ma' naa ta chik ruk'uliik panuk'ux taq amahk a'nam.²⁶Eh wila' re' hin ximahkunik taq chawach, re' numahk neenqak'am pan q'atb'al q'orik, reh chi neensik'arik chi riij awach i wilik ru mahk.²⁷Re' taqe aamaam awati't, taqe i xk'amwik cho kib'eeh ximahkunik cho chi nuwach.²⁸Re' taqe i xi k'amwik cho kib'eeh xkich'uwa'risaj paam i nuSantolaj paat. Ruum aj re', re' hin xnukanaa' taqe i aj Israel re' taqe i riih rumaam i Jacob chi xsacharik kiwach. Xa re' wo' hoq i QaJaaw Dios i xti manlik Dios¹Re' taq i hat aj Israel i hat taq riih rumaam i Jacob chab'iraj taq. Re' hin xisik'wik taq chaawach chi waj kamanoom.²Re' hin i Dios, hin xintz'ukrisanik taq chaaweh eh xatnuyejaa' taq chaloq noq komajaa' taq ti aasjik. Maayohb'isaj taq awiib', i hat taq waj kamanoom, re' hin xin sik'wik taq chaaweh, ti nuk'ax taq.³Re' hin naa nutz'uhkrisam chaloq i ha' chupaam i ye'aab' chiq yuuq'. Eh je' wo' i nim ha' chupaam i ye'aab' ma' xta nelik chuwach. Naa nuye'em i wuxlab'al i wotob'il chikinaah taq aawiih aamaam.⁴Re' keh naa kik'ihaaxb'iik, je' rukab' noq kik'ihaaxb'iik i ch'ahn panab'iix. Eh je' rukab' noq kik'ihaaxb'iik i chee' chi rooq haa'.⁵Wilik i naa ruq'oriik reh chi je' wili: Re' hin, hin reh i QaJaaw Dios. Wilik i naa ruq'oriik reh chi je' wili: Re' hin, hin reh i Jacob. Wilik i naa rutz'ihb'aam ralaq q'ab' chi je' wili: Re' hin, hin reh i QaJaaw. Eh wilik naa kiq'oriik reh chi re' ruuk' taqe i aj Israel.

⁶Re' QaJaaw Dios, i kiReey i aj Israel re' inko'linik keh je' wili i ruq'or: Re' hin xa wilkiin wo' chaloq pampeet, je' wo' parukuxiik wach i chib'ih jariik. Ma' jino'q chik Dios chi nuwach i hin.⁷¿Mi wilik ixq'orik cho reh pampeet chib'ih i xk'ularik chik, eh chib'ih i naa ruk'ulariik? ¿Mi wilik jino'q i nee ruyeew paruye'aab' i tinamit je' rukab' inub'anam chaloq i hin pampeet? Wila' wilik neerub'an chi neeruq'or chib'ih i naa ruk'ulariik.⁸Re' taq hat mat yo'jik taq aweht'al taq chi xa re' wo' hin xinch'obwik cho rub'ehel chib'ih taqe i naa ruk'ulariik. ¿Mi wilik chik jino'q i Dios re' chi nuwach i hin? Re' taq i hat aweht'al taq chi ma' xta chik jino'q inko'linik chi nuwach, i hin. Re' i q'ilooj chi riij i loq'inik tiyoox

⁹Re' taqe kiyej-anik reh i tiyoox xama' xta kiokik wii'. Ma' xta kiokik wii' taqe i tiyoox q'e' looq' kekeh. Re' taqe i kiloq'inik reh taqe i tiyoox re' re', je' moywach taqe ma' xta kina'ojb'al, ruum aj re' naa kikahniik chi xa se'lb'al taqe.¹⁰Re' taqe inkiyejaa' ki dios ruuk' ch'ihch' ruuk' chee' xaq'eb'ej q'iij inki a'n¹¹Eh chu'nchel i kiloq'inik reh, xa se'lb'al naakikahnik wii' ruum re' ki dios xa winaq kiyej-anik reh. Noq neenkimol kiib' chupaam i q'atb'al q'orik, neenehteesjik i kajaawriik, eh neenchalik kik'ixiik.

¹²Re' i aj ch'eyel ch'ihch', i ruchop i ruch'ihch' ruuk' i chopb'al reh, i ruhab'isaj wach q'aaq', i ruch'ey wach ruuk' i tuhyb'al kalawux. Eh i rukamaneej wach ruuk' i raansil i wach tileb', wi ma' xub'an chik ruwa' ruhaa' ma' nee ta chik i ruk'uy i kamanik.

¹³Eh re' i aj sehk i ruchop chaloq i tz'ilom i rukoj chi rupajb'aal, ruuk' i re' rukoj rehtalil ruuk' lapis. Eh i rujuk' wach i chee' ruuk' i ch'ihch' ruuk' i re' i ruyejaa' rutiyoox, chi je' ruwii' holohik laj winaq, chi riij i re' i ruyeew chupaam i paat.¹⁴Eh inkitik i chakaltee' re' jab' ink'isanik johtoq reh. Eh noq kik'ihik i ruyok', wilik wo' sohchaj i rutik, oon re' ruuk' taqe i q'eq tz'inuj, eh i rucha'jeej korehtaal kiponik chi xa nimaq chik kipaam.¹⁵Eh re' reh i rukoj taqe i chee' re' re' chi luk'b'al ruq'aaq'. Eh re' i ruxeer i ruk'at, i rub'an ruq'axniik chuwach. Eh wilik wo' ruqox i rukoj chi chaq'teesb'al kaxlanwi'k, ruuk' i ruqox i chee' i ruyejaa' i tiyoox, noq ruyejaam chik ruxuk'aa' riib' chuwach.

¹⁶Eh yejaal reh i chee' re' re' i rukoj wach q'aaq ruuk' i re' irub'ah rutiib', i ruk'ux korehtaal i nujik. Eh i rub'an ruq'axniik chuwach i ruqox i chee', je' wili i ruq'or: Re' hin k'achi' chik nutz'a'b'iik, inki.¹⁷Ruuk' i ruqox i chee' re' re', i ruyejaa' i tiyoox, i ruxuk'aa' riib' chuwach i rupahqaaj rukuyb'al reh je' wili i ruq'or i koq: Kinako'leej, ruum re' hat, hat nudios, inki.

¹⁸Re' taqe kib'anik reh i re', ma' kireq ta chi riij i korik, wilik wo' naq naq' kiwach xa je' wo' taqe moywach Tz'aplik i kikapeb'aal chi jumpech.¹⁹Re' winaq i ruyejaa' rutiyoox ma' rukapaaj ta riij i rub'an, eh ma' ruq'or ta chi je' wili: Re' wili xa rutooq chee' i nukoj chi nusii' reh nuq'axniik, i nukoj chi chaq'tesb'al nuwa', eh xnub'ah nutiib' chuwach, xnuk'ux i koq. Re' ruqox i chee' wili ma' ruk'ul ta chi neenuyejaa' nudios chi reh, ma' ruk'ul taj chi neenuxuk'aa' wiib' chuwach i xa rutooq chee', ma' nki taj.²⁰Eh je' naa chaaj i ruk'ux. Eh i ruk'am naah i xachukuj q'orik, re' reh ma' jaruuj naa ruko'leem riib' chuwach i ti' k'axik, ma' xta runa'ojb'al, ruum ma' rureq ta chi riij chi re' i rukoj chi rudios i ruyohq'eej pan q'ab' ma' re' ta wo' Dios. Re' QaJaaw Dios xukuy i kimahk i aj Israel, eh xuko'leej taqe²¹Re' i Dios je' wili xuq'or: Hat taq aj Israel, hat taq riih rumaam i Jacob k'oloq taq panak'ux chi hat taq waj kamanoom. Eh re' hin xin tz'uhkrisanik taq chaaweh, maa kinsahchik taq panak'ux.²²Re' hin xnusach chik wach i ma' holohik ta taq xa a'n, eh xnukuy taq amahk, je' rukab' noq insahchik wach i suutz'. Eh xat nuko'leej taq chik ruum aj re' kinanimaj wo' taq chik.

²³Re' i hat taxaaj, cha k'er aachii' ruum i rusuqkiil ak'ux. Re' hat ruchamiil i wach ak'al cha k'er aachii' chi tz'uyjiik nuwach i hin, hin Dios. Re' taq i hat najt taq anaah yuuq' taq i hat raxchee' cha k'er taq aachii' ruum i rusuqkiil taq ak'ux, ruum re' hin xnuko'leej taqe i aj Israel, re' taqe i riih rumaam i Jacob.

²⁴Re' taq i hin, awaj ko'loom, hin taq xintz'ukrisanik chaaweh noq komajaa' taq ti aasjik. Re' hin i Dios, hin xintz'ukrisanik cho reh chu'nchel i xa chib'ih jariik, re' hin xinhe'wik wach i taxaaj, eh xnuyeew paruye'aab' i wach ak'al, eh ma' awach ta xtowik weh chub'aan.²⁵Re' hin ma' naa ta nuye'em q'ab' chi naa rojiik eloq wach i chukuj q'orik inki a'n inkikoj kiib chi jalal nuq'oral i nusach kina'ojb'al taqe i aj q'iij. Eh inusutej chi xa memil laj na'ojb'al i kinimaq wach na'ojb'al²⁶Eh re' inkiq'or taqe i waj kamanoom i nuyeew q'ab' chi nooj eloq wach, eh chi neenooj eloq wach inkiyejaa' wach taqe i waj taqareel. Re' hin i nuq'or i korik chi naa wo' chik kiwihiik i patineel Jerusaleem, eh chi re' tinamit Judá naa wo' chik rukorjiik ruka'peech i yojinaq naq.²⁷Re' hin noq neenuq'or reh i palaw chi neenchiqik nee wo' inchiqik. Eh noq neenuq'or keh i nim ha' chi nee kichiqik nee wo' kichiqiik.²⁸Eh noq neenuq'or reh i reey Ciro, chi neenkahnik chi cha'jinik nee wo' inkahnik. Noq neenuq'or keh i aj Jerusaleem chi naa wo' chik rukorjiik i kitinamiit naa wo' rukorjiik. Eh noq neenuq'or reh i nupaat chi naa rukorjiik naa wo' rukorjiik, inki Dios. Re' QaJaaw Dios xupab'aa' i reey Ciro chub'aan jinaj i kamanik¹Re' QaJaaw Dios xukuxisaj i Ciro chi xkahnik chi reey, xuyeew rajaawriik chi naa rub'anam keh i tinamit, chi nee ruq'uch i kitz'a'amb'aal i reey. Eh chi re' Ciro naa rutehwiik i b'eeh chi naa rub'aan okik pantaq tinamit, ma' awach ta chik naa rutz'apwiik reh, je' wili xuq'or reh:²Re' hin naa wojiik chi peet b'eeh chawach, naa nuyejaam chi korik i b'eeh. Eh naa nuxerem i puerta q'an ch'ihch' ruyej-aal, eh naa nutoqom i ch'ihch' tz'apb'al riij i puerta.³Re' hin wilik taqe i k'ih taq tz'aaq naa nuq'asam aweh re' i ke'lik naq. Reh chi nee nanaab'eej chi re' hin Dios. Eh hin ki Dios i aj Israel, re' hin xin sik'wik awach ruuk' ab'ihnaal.⁴Re' hin pankib'ihnaal i aj Israel re' taqe i riih rumaam i Jacob nusik'im cho kiwach, xnusik' chaawach ruuk' aab'ihnaal. Eh xnuyeew aaloq'il, atoob' ta re' hat ma' nayeew ta runimaal nuwach.⁵Re' i hin i Dios, ma' jino'q chik Dios chi nuwach i hin. Re' hin naa nuye'wiik awajaawriik reh chi naa rojiik a'nam i nukamaj, atoob' ta re' hat ma' nayeew runimaal nuwach i hin.⁶Re' hin naa kaat nutaq'aam reje reh chi neenkinab'eej i tinamit chi junsuut i wach ak'al chi xa re' wo' hin i jinaj chi Dios ma' xta chik jino'q tokoom Dios chi nuwach i hin.⁷Re' hin xintz'ukrisanik reh i saqum, i q'equm, eh hin kinye'wik i wihik pansuqkiil, i wihik pan k'axkiil. Re' hin i Dios hin kinb'anik reh chu'nchel i re'. Re' runimaal wach i rajaawriik i Dios⁸Re' hin pan taxaaj naa nuye'em chaloq i korik laj k'acharik xa aha' yuuq' je' rukab' noq inqajik chee jab'. Eh re' kolemb'al iib', re' korik naa ruwihiik je' rukab' noq i nelik i wach i tik. Re' hin naa nuye'wiik reh, inki Dios.

⁹Q'e' ti' i naa ruk'ulum i neeruwech'uj riij awach xyej-anik reh. Re' i xun ma' nee ta ruq'or reh chi je' wili i xyej-anik reh: ¿Chib'ih reet noq xinayejaa' chi je' wili? ¿Chib'ih i k'achi' kaat weh? Re' hat ma' tichol ta kamanik ma' inko'q ta reh.¹⁰Eh ma' nee ta wo' ruyeew riib' chi re' jino'q ak'uunb'ees nee rixow wach i rutuut rajaaw xye' wik reh chinaah i wach ak'al wili.

¹¹Eh re' QaJaaw i qaDios i hoj, hoj aj Israel ixtz'uhkrisanik cho qeh je' wili i xuq'or: ¿Mi neerub'an re' chi nee taq i nawech'uj riij nik' wach noq wilkeeb' taqe i wak'uun wixq'uun? ¿Mi konee taq inakoj nuna'ojb'al re' ruuk' taqe i naa nub'anam?¹²Re' hin xiyej-anik reh i wach ak'al, i tinamit wilkeeb' chuwach. Re' hin xinhe'wik wach i taxaaj paruye'aab'. Re' hin xinyej-anik reh i q'iij, i poh, chu'nchel taqe i ch'umiil.¹³Re' hin xinpab'anik reh i Ciro, chi naa rehchaam i nimaq tinamit. Eh naa nutehem i rub'eeh reh i chi naa wo' chik ruyejaam i nutinamiit. Naa koq'taam chaloq i nutinamiit k'amooj taqe reje pan tokoom tinamit, eh ma' naa ta kitojoom riij, inki QaJaaw Dios nim rajaawriik.

¹⁴Re' QaJaaw Dios je' wili i xuq'or: Re' i wach i kitik i aj Egipto, i kik'aay i aj Etiopía naa taq awehchaam. Re' taqe i nimaq kooq winaq aj Sabá, b'ak'lik kiwach chi karena noq naa kojiik taq chawiij, naa kixuk'aam kiib' taq chawach, je' wili i naa kiq'orom: Xti korik chi re' Dios wilik taq awuuk', ma' xta chik jino'q Dios chuwach i reh, inko'q taqe inki.¹⁵Re' QaJaaw qaDios i hoj aj Israel, re' wo' re' inko'linik taq aweh, atoob' ta ma' nilarik wach.¹⁶Eh chu'nchel i kiyej-anik reh taqe i tiyoox, naakik'utaam kik'ixb'ilaal. Naa rehtesjiik i runimaal kiwach, xa se'lb'al chik taqe naakikahnik wii'.¹⁷Re' taqe i aj Israel keh, re' i QaJaaw Dios naa ruko'liniik keh chi junelik, eh ma' jaruuj naa kik'uhtaam kik'ixb'ilaal ma' naa ta rehtesjiik i runimaal kiwach.

¹⁸Re' QaJaaw Dios, ixyej-anik reh i taxaaj, i wach ak'al manlik Dios, eh xuyeew paruye'aab'. Eh ma' xuyejaa' ta chee wach ak'al chi xama' xta naa rukamaniik wii'. Xuyejaa' la' chi naa rub'aan i patinik chupaam, eh je' wili i xuq'or: Re' hin i Dios, ma' xta chik jino'q tokoom Dios chi nuwach i hin.¹⁹Re' hin ma' chi q'eeqmaal ta kinq'orik, ma' chupaam taqe i q'equm paam ye'aab' kinq'orik. Eh ma' nik' ta xnuq'or keh i riih rumaam i Jacob aha' i ma' nee ta taq kinareq wii'. Re' hin i Dios parukorkiil kinq'orik, juneliik i nuq'or i korik, inki. Re' QaJaaw Dios i ruq'or chi ma' xta kajaawriik i tiyoox²⁰Re' QaJaaw Dios je' wili xuq'or: Chamol taq awiib' i hat taq tinamit. Kim taq chawunchelaal, i koxat kahnik taq chi k'achalkaat. Re' taq i hat ma' xta taq ana'ojb'al inab'esaj taq pantaq b'eeh atiyoox chee' ruyej-aal, eh i na a'n taq atiij chuwach.²¹Tiq'oroq taq chako'leej taq riij aatiyoox. Eh cha pahqaaj taq chawach chi je' wili: ¿Awach xq'orik cho reh najtir q'iij chi naa qak'ulum i wili? ¿Mi ma' re' re' hin i Dios xinq'orik chaloq reh pampeet? Xa re' wo' hin i Dios, ma' xta chik jino'q Dios chi nuwach i hin chi nee ta nelik korik, chi nee tanko'linik.

²²Kim taq wuuk' i hin i wilkaat taq chi junsuut i wach ak'al, re' hin nee taq tinuko'leej, ruum xa re' wo' hin, i Dios ma' xta chik jino'q tokoom Dios chi nuwach hin.²³Re' hin nuq'or i korik chi wiij. Eh nuq'or chi naa rub'aan elik korik, korehtaal inooj eloq wach, korehtaal inkixuk'aa' kiib' chi nuwach chu'nchel i tinamit. Eh naa kiq'orom chi re' hin i Dios.²⁴Je' wili i naa kiq'orom chi wiij, xa ruum wo' i QaJaaw Dios imb'aanelik korik xa re' wo' reh wilik rajaawriik, naa wo' chik kinkinimam chi kunchelaal. Re' i xchalik kik'aah wuuk' naakik'uhtaam kik'ixb'ilaal.²⁵Xa ruum i wotob'il i hin naakeliik korik chu'nchel i aj Israel, eh naa ruwihiik runimaal kiwach wuum, inki i Dios.¹Re' tiyoox Bel rub'ihnaal impachlojik wach ak'al, je' wo' hoq i Nebo rub'ihnaal. Re' taqe i tiyoox re' re' kik'amarik reje rij kawáyu, xa jinaj ahl laj ihq chi keh i kawáyu q'uhtinaq taqe chi ihq.²Re' taqe i tiyoox re' re' kiq'ehb'ik wach ak'al, ma' inki a'n ta ruko'ljiik kiib'. Eh ma' xkiko'leej ta wo' taqe inloq'inik keh junk'amariik la' taqe xib'aan reje pan tokoom tinamit.

³Re' Dios je' wili xuq'or: Re' taq i hat, aj Israel i hat taq riih rumaam i Jacob, kinab'iraj taq. Re' taq i hat i koxat kahnik taq, chanab'eej taq chi noq komajaa' taq ti aasjik chaloq xa hat wo' taq nucha'jeem.⁴Eh je' re' i naa nub'anam taq awuuk' korehtaal taq tirijb'iik, insaaqb'ik taq i rismaal aanaah. Re' hin xintz'ukrisanik taq chaaweh, ruum aj re' xama' naa ta wo' nukanaam taq awilariik, atoob'jiik, ako'ljiik.⁵Eh raaj taq i hat ¿Awach taq aj uuk' nee kinajalwachej? ¿Awach taq i nakapaaj i hat chi nee rureq chi je' rukab' i hin?⁶Wilik taqe inkesaj chaloq i oro pan kibolso, eh inkipaj i plata chupaam i pexu. Eh inkiq'asaj reh i aj ch'eyool reh chi ruuk' taqe re' inkorb'eesjik kitiyoox, eh inkixuk'aa' kiib' chulooq'jiik.⁷Eh inkitehlaaj reje nah kitileb' imponik kikanaa' chupaam jinaj i ye'aab' ar inkahnik chi xama' ink'uyu'jik ta wo' hoq. Eh noq inkik'er kichii' chupahqaljiik chib'ih inkaaj xama' ruyeew ta wo' hoq, xama' kiehteesjik ta wo' panti' k'axik ruum.

⁸Chakoj taq rehtaal taqe i wili i hat taq aj mahk, cha kapaaj taq riij chi korik i k'achi' nuq'orom.⁹Eh k'oloq taq panak'ux chib'ih jariik i k'uluuj taqe chaloq najtir q'iij, xa re' wo' hin i jinaj chi Dios, ma' xta chik jino'q chi nuwach i hin. Ma' awach taj inerureq chi je' rukab' i hin.¹⁰Re' hin xinq'orik chaloq chib'ih taqe imb'aan i rutihk'ik chee k'acharik. Eh re' hin kinq'orik i k'uluuj chik, je' wo' hoq i komajaa' ink'ularik. Naa nub'anam chu'nchel i nuyejaam wach.¹¹Re' hin xnusik' wach i reey Ciro wilik najt tinamit wilik reje chi korkiil ireelb'aalq'iij. Re' reh je' rukab' i k'uch, re' reh naa rub'aniik i nuyejaam wach, nik' wach i nuq'orom, je' wo' re' i naa nub'anam. Re' i nuyejaam cho wach naa wo' nub'anam.¹²Kinab'iraj taq i hat inakowb'isaj taq awánima, re' taq ti kapeb'inik reh chi ma' jaruuj taq naa ako'ljiik.¹³Re' hin naa taq kaat wesam panti' k'axik, eh naa taq kaat nuko'leem, re' wili naa nub'anam chi jumehq'iil. Eh naa nuko'leem taqe i aj Sión, eh naa nuye'em runimaal kiwach i aj Israel, inki Dios. Re' Dios xuq'or chi naa ruye'em panti' k'axik i tinamit Babilonia¹Re' Dios je' wili i xuq'or: Re' i hat tinamit Babilonia je' naq akab' i k'isa q'ahxoq, naa atzunaam awiib' pan pooq, naa rehtesjiik awajaawriik. Je' wo' hat Caldeo, naa atzunaam awiib' wach ak'al, ruum ma' jaruuj chik naa kiq'orom aweh chi q'e' hat looq'.²Naa achopom aakaa' naa aye'ariik chi ke'inik arina, naa awesam itz'ihy b'urb'al awach. Eh naa atolom aso' naa at'usam atuuq, naa awik'iik pan rooq ha'.³Naa ak'uhtaam ati'jolal chi t'uslik, naa ak'uhtaam ak'ixb'ilaal. Re' hin naa nuq'ajam wach aweh i ma' holohik taj i na a'n, ma' jino'q i naa ruko'leem riib' panuq'ab', inki.⁴Re' i qaj ko'loom i Santolaj Dios i qaDios i hoj, hoj aj Israel, nim rajaawriik i rub'ihnaal je' wili i xuq'or:

⁵Re' hat Caldeo, naa atzunaam awiib' panq'equm chi ma' xta i naa aq'orom. Ruum ma' jaruuj chik naa kiq'orom chi wilik awajaawriik chi taaq'anik, chinaah i tinamit.

⁶Re' hin xchalik nujosq'iil chinaah i nutinamiit, xa re' la' ma' q'e' ta naq kow i ti' k'axik xnuyeew chikinaah, noq xnuyeew taq panaq'ab', ma' xaketelaaj ta kiwach. Xayeew la' taq ahl laj ihq chikinaah i rijib' taq winaq.⁷Eh je' wili i xaq'or: Re' hin naa nuwihiik chi taaq'anik chi juneliik, tiki. Eh ma' xakapaaj taj chib'ih i naa ak'ulum, eh chib'ih naa wojiik kuxoq wii'.⁸Yu'naak chab'iraj i nuq'or aweh i hat je' wili inaq'or: Xa re' wo' hin wilik wajaawriik ma' awach ta chik nee rureq chi je' rukab' i hin. Ma' jaruuj naa nukahniik chi je' rukab' ixoq inkimik reje i rub'ahiil eh kikimik reje i rak'uun rixq'uun, tiki.⁹Xanaah re' xa chupaam i jinaj chi q'iij naa ruchaliik cha naah i ki'ib' chi ti' k'axik re' re', naa ak'ulum aweh je' rukab' i ruk'ul ixoq inkimik reje i rub'ahiil, inkimik taqe reje i rak'uun rixq'uun. Atoob' ta ma' k'isiin wo' naq i warinik, i q'ijinik i na a'n.¹⁰Eh xakapaaj chi ma' xta i naa ak'ulum chub'aan ayiib' wach na'ojb'al, ma' awach ta inilwik weh, tiki. Re' akapeb'aal, re' ana'ojb'al xjot'wik aweh, je' wili i xaq'or pan awánima: Xa re' wo' hin wilik wajaawriik, ma' awach ta chik i je' rukab' i hin, tiki.¹¹Xa re' la' jinaj i runimaal ti' k'axik naa ruchaliik cha naah, ma' xta chik naa ako'leem wii' awiib' chuwach. Jinaj i runimaal ti' naa ruchaliik cha naah ma' naa tarik'iik chawiij, chi ma' aweht'al naa rusachariik wach.

¹²Ko cha a'n pee i warinik, i q'ijinik, re' atijem pan awak'uniil. Nee inawil ko wilik oon neen kamanik wii' aweh, nee oon inchalik kiyo'jiik i tinamit awuum.¹³Re' i hat ma' k'isiin taqe i kojol ana'ojb'al. Yu'naak kichaloq aj re' inki a'n i q'ijinik ruuk' ch'umiil re' taqe i kiq'orik reh rajlaal i poh chib'ih i naa ruchaliik cha naah mi nee pa' inki a'n ako'ljiik chuwach i ti' k'axik chalik reh cha naah.¹⁴Re' taqe re' naakik'ahtiik je' rukab' noq ink'ahtik i k'im, ma' jaruuj naa kiko'leem kiib' chuwach. Ruum re' re' ma' xata je' rukab' i nah wach q'aaq' inkamanik chi reh q'axnik. Ma' naa ta kikuyum chi naa kitzunaam i koq kiib' ruuk'.¹⁵Je' re' naa kojiik kuxoq wii' awaj q'iij atoob' ta kuuk' wo' naq i keh xasik' atoob'jiik chupaam aak'achariik. Re' keh xama' jaruuj wo' naa kianam ako'ljiik, naa la' kimolom chi elik ruum kiyo'jiik. Re' Dios xuq'il i tinamit Israel ruum ma' holohik taj kina'ojb'al¹Chab'iraj i naa nuq'orom i hat taq aj Israel, hat taq riih rumaam i Jacob. Hat taq kiih kimaam i aj Judá, inaq'or taq i korik parub'ihnaal i QaJaaw. Eh inapaqaaj taq chib'ih inawaaj parub'ihnaal i ki Dios i aj Israel, atoob' ta ma' nayeew ta wo' taq ruloq'il, eh ma' korik ta wo' taq wach ak'ux chuwach.²Re' taq i hat santo laj tinamit wo' naq taq ab'ihnaal, eh i nasik' wo' naq taq atoob'jiik ruuk' i ki Dios i aj Israel. Re' Dios nim rajaawriik rub'ihnaal.

³Re' hin xinq'orik reh taqe i xk'ularik chaloq. Re' hin xin ye'wik chi naab'jik, xnub'an, xooj eloq wach.⁴Je' re' xnub'an ruum kow taq awánima, je' kowiil i rax ch'ihch', je' kowiil i q'an ch'ihch'.⁵Re' hin xnuq'or cho rib'iral taq aweh xnuyeew cho chi naab'jik i ti' k'axik noq komajaa' ink'ularik. Re' xwaaj i hin chi ma' xaq'or ta taq chi je' wili: Re' xk'ularik wili re' taqe i qatiyoox xye'janik cho wach, ma' tiki ta taq.⁶Re' taq i hat xab'iraj xawilow taq chi xk'ularik, chu'nchel i re' cha kapaaj taq riij, cha nimaj taq chi korik. Eh wilik taqe i ko ak' taq naa nuq'orom rib'iral aweh, re' ma' aweht'al ta taq.⁷Re' taqe i naa nub'anam kore' naa nuyejaam wach, ma' ab'iram ta taq cho najtir kore' la' yu'naak naa taq ab'iram, reh chi ma' nee ta taq inaq'or chi xa aweht'al wo' taq chik.⁸Re' taq i hat ma' xab'iraj ta taq cho rib'iral eh xama' aweht'al ta wo' taq. Re' hin xa weht'al wo' hoq nik' wach taq ana'ojb'al, weht'al wo' hoq chi xama' ti ib'irinik ta taq noq xat tz'uk'rik taq chaloq ruuk' taq aatuut.

⁹Xa re' la' re' hin xa ruum i nuloq'il, xa ruum chi wilik q'unil wuuk' ma' xnuyeew tee i nujosq'iil taq cha naah, komajaa' i nusach taq awach.¹⁰Re' hin xwaaj naq chi xat korjik taq ruuk' i ti' k'axik. Xa re' la' ma' ruuk' ta q'aaq' je' rukab' imb'aan reh i plata noq inye'arik pan q'aaq'.¹¹Xa ruum i nuloq'il, i nuk'axb'al ma' xnusach ta taq awach, ruum ma' nwaaj ta chi neenuyeew wiib' chi q'orarik, eh ma' nee ta nuyeew i nuloq'il reh tokoom, inki Dios.

¹²Eh kinab'iraj taq i hat aj Israel i hat taq riih rumaam i Jacob i nusik'im taq chaawach i hin, i xa wilkiin wo' chaloq pampeet, je' wo' parukuxiik wach.¹³Eh re' hin xin ch'ikanik reh i wach ak'al paruye'aab'. Re' wo' hin xinhe'wik wach i taxaaj paruye'aab'. Noq xnuq'or kib'ihnaal chi naa kikorjiik xikorjik wo' hoq.¹⁴Re' taq i hat chamol taq awiib', chab'iraj taq i naa nuq'orom aweh: ¿Awach taq aweh i hat xq'orik cho rib'iral taqe i naa ruk'ulariik? Re' hin xa jinaj wo' i nusik'im cho wach chi naa rub'anam kuuk' i aj Babilonia, i aj Caldeo.¹⁵Re' hin xinq'orik xinpab'anik reh, re' hin naa nutaaq'aniik reh. Eh chu'nchel i naa rub'anam naa reliik korik chuwach.¹⁶Tichaloq taq wuuk' chab'iraj taq i naa nuq'orom aweh chi je' wili: Re' hin ma' jank'al ta nukeb'aa' ruq'orariik, noq ink'ularik taqe i nuq'or wilkiin wo' ar i hin.
Re' hin i Dios, re' nuSantolaj Uxlab'al inye'wik rajaawriik taqe wili, inki.¹⁷Re' i Dios wilik ruSantohiil re' aaDios taq i hat aj Israel inko'linik taq aweh je' wili xuq'or: Re' hin, aaDios, hin taq kink'uhtanik aweh i ma' xta reet taq cha weh, hin kink'amwik taq aweh chupaam i b'eeh i ruk'uul taq cha weh.¹⁸Ma' xta naq reet chi xanimaj taq i nuk'uhb'aal, reh chi xooj naq chi nimaal i rusuqkiil taq ak'ux, je' rukab' noq inooj chi nimaal i rooq i ha'. Eh nee naq taq ti elik korik, je' rukab' i palaw ma' nsahchik ta wach.¹⁹Eh xiik' naq k'ihaal taq awiih aamaam, ma' inkuyjik ta naq kajaljiik, je' naq kik'ihaal i saniib' tub'lik chi chii' i palaw. Re' hin ma' xnusach ta naq taq awach, ma' nee ta naq insahchik panuk'ux taq aatinamiit, inki.

²⁰Eleen taq cho chi kixilak i aj Babilonia, i aj Caldeo. Eh cha q'or taq rib'iral chi junsuut i wach ak'al, je' taq wili i neenaq'or: Re' QaJaaw Dios xko'linik qeh i hoj, hoj cho riih rumaam i Jacob raj kamanoom, tiko'q taq.

²¹Re' Dios noq xatrik'saj taq cho chupaam i ye'aab' chiq yuuq' ma' xa kuy ta taq ahaa'. Panab'aj taq xresaj cho ahaa', eh xamb'ehik chik rooq noq xelik chaloq.²²Eh re' taqe i yiib' wach kina'ojb'al ma' naa ta ruwihiik rusuqkiil kik'ux, inki QaJaaw Dios. Re' i Israel raj kamanoom i QaJaaw Dios¹Chab'iraj taq i naa nuq'orom i hat i wilkaat taq cho chi chii' i palaw, i wilkaat taq cho panimaq tinamit: Re' hin re' i QaJaaw Dios xsik'wik cho nuwach, noq ko hin cho rihqaam i nutuut xa reht'al wo' naq chik i nub'ihnaal.²Re' reh xuyeew nuq'oral reh chi xin kahnik chi je' rukab' i ch'ihch' k'ul q'as kiruko'leej ruuk' i rajaawriik. Eh xuyeew nukowiil reh chi naa nukamaniik reh chi je' rukab' i flecha q'as ju' wilik parupatil.³Eh je' wili i xuq'or weh: Hat aj Israel hat waj kamanoom re' hat naa ak'uhtaniik i nuloq'il, inki.⁴Re' hin je' wili i xnuq'or panuk'ux: Xa ma' xta ruk'am chaloq i kamanik k'ahchi' kiin, xa k'achi' nusub'um i wansil, kinki. Re' i QaJaaw Dios ineht'alinik reh i k'achi' kiin, eh naa ruye'em nutojb'aal pan jinaj q'iij.

⁵Re' hin, re' i QaJaaw Dios xtz'ukrisanik cho weh ruuk' i nutuut, reh chi naa wo' chik nusutem taqe chaloq i aj Israel re' taqe i riih rumaam Jacob, reh chi nee wo' chik kinimanik. Eh chuwach i QaJaaw Dios wilik nuloq'il i hin, re' reh inye'wik rukowiil nuk'ux.⁶Re' i QaJaaw Dios je' wili i ruq'or weh: Ma' manlik ta ruuk' chi xa nee nasutej taqe chaloq i aj Israel, eh chi neenayeew taqe pan kiye'aab'. Naa la' wo' kaat nukanaam chi kisaqumaal i tinamit, eh naa kaat nutaq'aam chuq'orariik i ko'lemb'al iib' chi junsuut i wach ak'al, inki.

⁷Eh re' i QaJaaw Dios wilik ruSantohiil inko'linik keh i aj Israel je' wili xuq'or: Re' tinamit ma' ajwaal ta wach kuum i tokoom tinamit, re' i kow kitaq'ab'jiik kuum i josq' laj ajaab'ees. Eh noq naakilom wach taqe i reey, taqe i ajaab'ees naa ruchaliik kixuk'aam kiib' taq chawach, ruum re' hin xin sik'wik taq chaaweh, wilik nuSantohiil hin ki Dios i aj Israel, inki. Re' i QaJaaw Dios xuq'or chi naa wo' chik ruyejaam i tinamit Jerusaleem⁸Re' i QaJaaw Dios je' wili i xuq'or: Manlik paruq'ijil xb'iraj aatiij, manlik paruq'ijil i ko'lemb'al iib' xat nutob'eej. Re' hin naa kaat nucha'jeem, reh chi naa a'nam kuuk' i tinamit i nuyejaam wach i hin. Eh naa wo' chik ak'amam taqe chaloq pan kiye'aab' i nutinamiit Israel, k'amooj taqe reje pantaq tokoom tinamit.⁹Reh chi neenaq'or keh chi naa keliik cho panti' i je' prexo wilkeeb', eh chineekeliik cho panq'equm i wilkeeb' panq'equm. Re' chik i hat naa acha'jiniik keh, je' rukab' i rub'an i cha'jen tentzun i ruyeew taqe ruwa' i rutentzuun chi' taq b'eeh, eh wataq rub'ohl yuuq'.

¹⁰Re' taqe i tinamit re' re' ma' naa ta kikuyum kiwa' kihaa'. Eh ni xata naakik'raam i rutz'a'iil i q'iij ruum jinaj inketelinik wachiis naa ruye'wiik keh chi uuk'jik i k'achlik rooq ha'.¹¹Re' hin naa nutehem jinaj i b'eeh chinaah i yuuq', eh naa nub'anam k'ixkaab' wach taqe b'eeh b'uuk'laq paam, ar naakik'iik i nutinamiit.

¹²Re' keh chi najt naa kichaliik, wilik i naa kichaliik pantz'eet reh i rookb'aal q'iij, parookb'aal q'iij, wilik naa kichaliik chupaam i ye'aab' Sinim.¹³Re' taq i hat i taxaaj titz'uyinoq taq re' i hat wach ak'al tinujoq chi rusuqkiil k'uxliis. Je' wo' taq i hat najt taq anaah yuuq' cha k'er taq aachii' chi tz'uuy, ruum re' hin i Dios xnuyeew wo' chik rusuqkiil kik'ux i nutinamiit, xnuketelaaj kiwach i ti' kik'ux.

¹⁴Re' taqe i aj Sión je' wili inkiq'or: Re' i QaJaaw Dios xoj rukanaa' chi qutkeel chi jumpech, xoj sahchik paruk'ux, inki taqe.

¹⁵Re' hin je' wili i xnuq'or: ¿Mi wilik re' i tuutb'ees neensahchik paruk'ux i k'isa ruha'lak'uun, eh nee rukanaa' ruk'axariik? Atoob' ta nee rukanaa' i k'isa ruha'lak'uun i tuutb'ees, re' hin ma' jaruuj taq neenukanaa' ak'axariik.¹⁶Juneliik la' wilkaat taq panuk'ux, eh nuk'otom paam i nuq'ab' nutz'ihb'aam taq wii' aab'ihnaal. Eh juneliik wo' wilik panuk'ux i koraal tz'aq xyojib'ik kotimaj naq wii' riij taq aatinamiit.¹⁷Re' taqe i naa wo' chik kiyej-aniik reh aatinamiit, jumehq'iil k'ahchi' kichaliik. Eh re' taqe xisachwik wach xi elik chik reje chi jumpech.¹⁸Eh chawilow taq reje chi junsuut, k'ahchi' wo' chik kisutiniik chaloq i tinamit pan kitinamiit.
Re' hin i Dios i nuq'or taq aweh chi ma' k'isiin naa rusuuqb'iik taq ak'ux. Jinaj xoyb'al iib' taq cha weh, je' rukab' noq i ruxoyej riib' i k'isa q'ahxoq noq i rub'an kaxáro.¹⁹Re' taq aatinamiit ma' xta chik wilik chupaam, xa ntz'irik chik paam ruum. Naa ruponiik i q'iij chi ma' naa ta chik ruk'amam i tinamit naakimolom kiib' ar. Re' taqe ixsachwik kiwach chi najt yuuq' chik wilkeeb' ponoq.²⁰Eh re' taq i aha'lak'uun ma' naa ta chik kik'aach noq xaq'or je' wili i naa kiq'orom: Re' i ye'aab' wili ma' qoh ruk'am ta chik, nim la' chik qaye'aab' inqaaj, reh chi ar nee qoh wihik, inko'q taq aweh.²¹Eh re' taq i hat je' wili i naa aq'orom panak'ux: ¿Awach xk'isanik cho keh i wili? Re' hin xin kahnik naq chik chi wutkeel, ni xata naq i nukapaaj chi naa ruwihiik k'ih-oq nutinamiit. Re' keh xin kiq'eb' kahnoq ruum xi k'amarik reje pan tokoom tinamit, re' taqe wili ma' weht'al taj aha' xi chalik, tiko'q taq.

²²Re' QaJaaw Dios je' wili i xuq'or: Re' hin naa nuq'orom keh i wilkeeb' chupaam nimaq tinamit, chupaam kok' tinamit chi naa wo' chik kisutem chaloq taqe awak'uun awixq'uun, nakiq'acheem taq chaaweh.²³Re' taqe winaq reey, taqe ixoq reey naakikahnik chi je' atuut awajaaw. Eh naakipach'aam qohoq kiib' wach ak'al taq chawach loch'b'al kiib', eh naakireq'em i pooq chuwach taq aawooq. Eh re' taq hat naa taq anab'eem i chi xa re' wo' hin i Dios, eh chi awach i kiye'em kik'ux wuuk' ma' naa ta kik'uhtaam kik'ixb'ilaal, inki.²⁴¿Mi nenq'uchariik reh i kowlaj winaq i xponik ruq'uch panq'aq'inik? ¿Mi nee nelik jino'q i prexo chuwach i josq'laj winaq?

²⁵Eh re' i QaJaaw Dios je' wili i ruq'or: Re' hin naa nub'anam kiq'uchariik i k'amooj taqe reje pan kiq'ab' i kowlaj winaq. Eh naa nuq'uchum keh i kiq'uchum reje josq'laj winaq, re' hin naa nuko'liniik keh aatinamiit.²⁶Re' hin naa nuye'em q'ab' keh i ki-ixowanik taq awach chi k'ul naa kik'uxum kiib'. Eh je' na naa kixohk'resjiik ruum ikaansanik inki a'n Ruuk' i re' naa kinab'eem i tinamit chi re' hin taq aaDios, hin, taq awaj ko'loom, hin xineesanik taq chaaweh panti' k'axik taq i hat aj Israel riih rumaam i Jacob. Re' QaJaaw Dios irutoob'eej taqe awach inkiyeew kik'ux ruuk'¹Re' QaJaaw Dios je' wili i xuq'or: Re' taq i hat inakapaaj naa taq chi re' hin xink'ayinik reh taq aatinamiit Israel, re' taq aatuut noq wilik. Wila' re' hin ¿Aha' wilik i huuj rehtalil i ch'aqb'al iib'? ¿Aha' wilkeeb' i xitowik weh? ¿Mi ma' aweht'al taq re' chi ruum taq amahk, chi ruum xaq'etwachej taq awiib' chi nuwach xat k'amarik taq reje chi najt tinamit?²¿Chib'ih reet noq ma' awach ta xnimanik weh noq xink'ulik ma' awach taj i xunimaj i ruyuq'ub'jiik xnub'an? ¿Mi ma' xnub'an ta naq taq atoob'jiik re' mi ma' xnub'an naq taq chawehteesjiik panti' k'axik re'? ¿Mi ma' aweht'al taq re' hat chi xa ruuk' i jinaj chi nuq'oral inchiqik i palaw, eh i nusutej chi chiq yuuq' wilik wii' i nim ha' re' taqe kar wilkeeb' chupaam kikimik?³Re' hin inuq'equmb'isaj paam i taxaaj, eh inukanaa' chi xan tz'irik chik paam, inki Dios.

⁴Re' hin, re' QaJaaw Dios inye'wik nuq'oral reh chi naa nuq'unem kiwach taqe i rub'an kiib' kik'ux. Rajlaal wahq'eq i ruyeew weh chi ib'irjik i ruq'oral, reh chi ruyeew weh chi naab'jik ruuk' q'unil.⁵Re' wo' hoq i QaJaaw Dios inye'wik nuna'ojb'al, eh re' hin i nuyeew nuk'ux chi rib'iirjiik, ma' xnukanaa' ta runimjiik.⁶Re' hin xnuyeew q'ab' chi xkiq'ojib'eej i nujurub', eh chi xkichuq i wusinchii'. Eh ma' xnukeb'aa' tee nuwach chikiwach i xib'ajwik weh, kichuhb'aaj i pan naq'nuwach.⁷Eh re' QaJaaw Dios inye'wik rukowiil nuk'ux, ruum aj re' ma' xta kiruchej inub'ajariik inki a'n Re' hin pa'alkiin chi korik, je' rukab' i paat ab'aj, weht'al chi ma' jaruuj naa nuk'uhtaam nuk'ixb'ilaal.⁸Re' hin eliik wilik wuuk' inko'linik weh, ¿Mi wilik nee nq'orik reh chi wilik numahk? wila' wilik neerub'an chi nee qohooj ruuk' i q'atal q'orik. ¿Mi wilik i neen kojwik numahk? wila' wilik neerub'an chi neenchalik ruq'or.⁹Re' QaJaaw Dios intoob'inik weh. ¿Mi wilik nee ruq'or chi wilik numahk? Ma' awach taj, ruum re' taqe i ki-ixowanik nuwach naa rusahchiik kiwach, je' rukab' noq insahchik kiwach itz'ihy inhopib'ik ruum i mooh.

¹⁰Re' taq i hat i tiyohlinik taq wach i Dios, i tib'anik taq reh aha' wilik taqe i ruq'or i raj kamanoom, wila' kopan q'equm taq wilkaat, chayeew taq ak'ux ruuk' i QaJaaw. Eh chawuy-eej taq chi re' reh neen ye'wik aweh i saqum.¹¹Eh re' taq i hat je' q'aaq' taq inaluk' chi sachb'al kiwach taq aawas achaaq', xa re' wo' taq i hat naa rusachariik awach ruuk' taq inayejaa' wach rub'an. Re' i QaJaaw Dios naa ruye'wiik taq cha naah i ti' k'axik wili, eh ruum i re' naa taq akimiik. Re' taqe i xq'orarik chi ye'b'al rusuqkiil kik'ux i aj Sión¹Re' QaJaaw Dios je' wili i xuq'or: Kinab'iraj taq i hat, i tib'anik taq reh i korik, i tisik'wik taq weh. Chakapaaj taq riij awach taqe chaloq aamaam awati't, xat tz'uhk'rik taq cho wii'. Re' i je' kikab' ab'aj esamaj chaloq chupaam i saqrehp ab'aj.²K'oloq taq panak'ux i xikin aamaam Abraham, i qatuu Sara. Re' reh tz'uhk'risanik taq aweh, noq xnusik' cho wach i xa jinaj naq chi riib'. Eh noq xnukuxisaj, xk'ihaaxb'ik i riih rumaam.³Re' hin naa nuketelaam wach i tinamit Sión, re' i sacharik cho wach. Eh re' taqe i ye'aab' chiq yuuq' naa nusutem chi jinaj ye'aab' naa relik wii' i suq atoob', je' rukab' i rax paam ye'aab' Edén. Eh ar naa ruwihiik i suq kiil k'uxliis, naa rub'aan i tz'uuy, naa rib'irjiik taqe i q'ooj.

⁴Re' taq i hat i wilkaat taq pankok' tinamit, pan nimaq tinamit kinab'iraj taq, re' hin naa nupuhkaam ruq'orariik taqe i tijinik naa nub'anam. Eh re' i nuk'uhb'aal naa rukamaniik chi kisaquum i tinamit.⁵Re' hin naa nub'anam i nuq'or, naa taqe nuko'leem tinamit, naa nuq'atam i q'orik chikinaah. Re' taqe i nimaq tinamit k'ahchi' kiinkuy-eem. Eh naakich'ikaam kik'ux ruuk' i wajaawriik.⁶Titz'ehtanoq taq johtoq pan taxaaj chatz'ehtaaj taq i wach ak'al. Re' taxaaj naa rusahchiik wach je' rukab' noq insahchik wach i sib'. Re' i wach ak'al naa rik'iik wach je' rukab' noq inik'ik wach itz'ihy, re' taqe i k'achareel naa rusahchiik kiwach chi je' insahchik wach i suutz'. Eh re' ko'lemb'al iib' i rukorkiil wach k'uxliis i nuyeew i hin reh juneliik.⁷Kinab'iraj taq i hat i tib'anik taq reh i rub'ehel i nak'am taq naah i nuk'uhb'aal, maayohb'isaj taq awiib' kuum i kikaqse'lanik taq aweh. Eh ma' rub'an taq kiib' ak'ux ruuk' taq ab'ajariik inki a'n⁸Ruum re' keh naa rusahchiik kiwach je' rukab' noq insahchik wach itz'ihy ruum i rumohil, oon je' rukab' noq inokik cho ruhahiil inooq' re' ruuk' i isb'. Eh re' i rukorkiil wach nuk'ux i hin, re' i ko'lemb'al iib' i nuyeew naa ruwihiik chi juneliik xa jar ch'iht pa' chi k'achareel i naakik'iik, inki Dios.

⁹Xti qoh ab'iraj i hat, hat QaJaaw Dios, eh qoh atoob'eej ruuk' awajaawriik je' rukab' noq xako'leej i tinamit najtir q'iij. ¿Mi ma' re' wo' re' hat xatkansanik reh i Rahab re' i je' nimlaj josq'laj chikop wilik pam palaw?¹⁰¿Mi ma' re' wo' re' hat xatchiqsanik reh i palaw noq xayejaa' jinaj i b'eeh chupaam, reh chi re' taqe aatinamiit ma' xta haa' xik'ik wii' reh chi xako'leej taqe?¹¹Xti korik wo' hoq chi naa wo' chik kisutinik chaloq chupaam i ye'aab' Sión i xresaj taqe panti' k'axik i QaJaaw Dios. Eh naakik'erem kichii' chi tz'uuy, naa kireqem i suq laj wihik, ma' naa ta chik koq'iim.

¹²Re' hin kinye'wik taq rukowiil ak'ux. ¿Chib'ih reet noq tiyo'jik taq kuum i winaq xakimik keh? Re' keh naa rusahchiik kiwach je' rukab' noq insahchik kiwach i ch'ahn.¹³¿Chib'ih reet noq xinsahchik taq panak'ux i hin, hin taq xin tz'uhkrisanik cha weh? Re' hin xin ye'wik paruye'aab' i taxaaj, i wach ak'al. ¿Chib'ih reet noq ma' k'isiin taq tiyo'jik kuum i xiik' naah kijosq'iil inkisik' chi riij nik' wach noq naa taq kisacham awach? Re' hin neenuq'at wach i kajaawriik¹⁴Re' taqe i minooj panti' k'axik naakeliik ar chi jumehq'iil. Ma' naa ta kikimiik i k'amooj taqe reje wii' chi prexohjik, eh ma' naa ta wo' chik kikuyum kiwa' kihaa'.

¹⁵Re' QaJaaw Dios je' wili i xuq'or: Re' i hin taq aaWaJaaw aaDios Ajaab'ees Dios nim wajaawriik i nub'ihnaal. Re' hin xink'uysanik reh i palaw, xan teleninik chik i rub'ohl.¹⁶Re' hin xin ye'wik paruye'aab' taxaaj, i wach ak'al. Re' hin xin ye'wik i nuq'oral taq panachii', xat nuko'leej taq ruuk' i wajaawriik, eh je' wili i xnuq'or keh i aj Sión: Re' taq i hat, hat taq nutinamiit, kinki keh.

¹⁷Chawik'raaj taq awiib' i hat taq aj Jerusaleem, na'lojoq taq aweh i xak'ul taq i ti' k'axik ruum taq amahk xa a'n noq xuyeew chee rujosq'iil i Dios taq cha naah. Je' jinaj kulk chi k'ahlaj ha' i xuyeew taq aweh, xat xohk'rik taq ruum.¹⁸Re' taq i hat ma' jino'q chik keh awak'uun, awixq'uun xi kahnik chi k'achalkeeb' chi nee taq tirutob'eej, chi nee inkik'am taq ab'eeh.¹⁹Re' taq i hat kiib' wach i ti' k'axik taq xak'ul, re' chi xsacharik wach taq aatinamiit ruuk' q'aslaj ch'ihch', eh ruuk' i wi'jaleel. ¿Mi wilik ta wo' neen ketelinik taq awach ineenye'wik rusuqkiil taq ak'ux?²⁰Re' taq awak'uun awixq'uun xsahchik kina'ojb'al xa aha' xi kahnik chi tuch'ulkeeb' pantaq b'eeh, je' rukab' inkik'ul i keej noq kichoparik pan xirob'. Reh chi rik'saj i rujosq'iil i QaJaaw Dios chikinaah noq xuq'il taqe.²¹Chab'iraj taq i hat ti' taq ak'ux, i je' taq cho hat xohk'reel, xa re' la' ma' re' ta ruuk' i k'ahlaj ha'.²²Re' taq aawajaaw aaDios inko'linik reh i rutinamiit je' wili i ruq'or taq aweh: Re' hin naa wesam cha naah i ti' k'axik ma' jaruuj chik naa nuye'em cha naah i nujosq'iil. Ma' naa ta chik nuye'em aweh i je' jinaj kulk chi k'ah laj ha'.²³Re' i ti' k'axik chikinaah chik taqe i kib'anik ti' k'axik aweh naa nuye'em, re' i kiq'orik taq aweh chi je' wili: Re' taq i hat ma' xta taq awajaawriik nee taq ti qayeq' pan qooq chi je', pooq, inki taqe, re' taq i hat xa nakanaa' wo' taq awiib', inki. Re' Dios xuq'or chi naa resam taqe chaloq panti' k'axik i aj Jerusaleem¹Re' i Dios je' wili i xuq'or: Chawik'raaj awiib' i hat Sión cha sik' i wajaawriik. Hat santo laj tinamit Jerusaleem, chakoj aholohaq so', ruum re' i ch'uwa' kiwach, i ma' poch'ooj taj i rutz'uhmal naah i kik'achab', ma' xta chik naa taq kaat kuchem.²Re' hat Jerusaleem cha puh i pooq chawiij, eh chachej karena, chawesaj i ahl laj ihq cha naah, titzuhnoq chupaam i ye'aab' imb'aanwii' i taaq'anik.³Re' QaJaaw Dios je' wili xuq'or: Re' hin ma' xta tumiin xnuk'ul noq xat k'amarik reje pan tokoom tinamit. Eh ma' xta wo' chik naa nutojom noq naa kaat wesam chaloq ar.⁴Pampeet chaloq xiooj wo' reje i nutinamiit ar Egipto, ar xi k'acharik cho pan tokoom tinamit. Eh chi riij i re' xiye'arik panti' k'axik kuum i aj Asiria chi ma' xta kimahk.⁵Raaj i yu'naak ¿Chib'ih i naa nub'anam? Ruum xkik'am reje i nutinamiit Babilonia chi ma' xta kimahk. Eh re' taqe intaaq'anik keh xakow chik inkik'er kichii' chi kinaqariik, xa nimaq chik kiwach inki a'n kiib', eh rajlaal i q'iij inkib'aj i nub'ihnaal.⁶Xa re' la' naa ruponiik i q'iij noq re' i nutinamiit naa kikojom rehtaal, naa kinab'eem chi re' hin i Dios k'achi' nuq'orinik keh.

⁷Ma' k'isiin ta loq'il noq kik'uloq nah taq yuuq' i kiq'orik rib'iral i ak' laj q'orik suq rib'irjiik. K'ahchi' cho kiq'orom rib'iral i ko'lemb'al iib', inkiq'or rib'iral i suq kiil k'uxliis. Je' wili inkiq'or reh i aj Sión: Re' QaJaaw Dios taq aareey, inki taqe.

⁸Re' taq i hat naa taq ab'iram i kicha'jinik taq reh aatinamiit noq naakik'erem kichii' chi tz'uuy, ruum naakilom chi re' i QaJaaw Dios naa wo' chik taq kaat ruk'amam chaloq panatinamiit Sión.⁹Re' taq i hat aj Jerusaleem i xsacharik naq taq awach naa taq ak'erem aachii' chi tz'uuy, noq naa taq awilom chi re' QaJaaw Dios naa ruketelaam kiwach taqe i rutinamiit aj Jerusaleem, eh naa ruko'leem taqe.¹⁰Re' QaJaaw Dios naa ruk'uhtaam i runimaal i rajaawriik chikiwach i wilkeeb' pan nimaq tinamit. Eh naa wo' runaab'jiik chi junsuut i raa' taxaaj chi re' i QaJaaw Dios xko'linik qeh.

¹¹Re' taq i hat cha chop taq ak'ux chi elik chaloq Babilonia, maa tz'a'j taq aweh i ch'uwa' kiwach wilkeeb' ar. Re' taq chik i hat i naa ak'amwiik cho reh taqe i xa chib'ih jariik inkamanik parupaat i Dios.¹²Xa re' la' ma' pan ajiim b'eeh, ma' panke'lik ta taq naa aweliik cho ar, ruum re' i QaJaaw Dios i ki Dios i aj Israel naa ruk'amwiik taq ab'eeh, re' reh naa rucha'jiniik taq aweh. Re' ti' k'axik xuk'ul i raj kamanoom i QaJaaw Dios¹³Re' QaJaaw Dios je' wili xuq'or: Re' i waj kamanoom naa reliik korik ruuk' chu'nchel i naa rub'anam. Eh naa ruye'ariik runimaal wach, naa ruye'ariik ruloq'il.¹⁴Eh ma' k'isiin i tinamit xsahchik kik'ux noq xkilow wach ma' xkinab'eej ta chik wach, ruum xama' ink'utinik ta chik i wach ruum yohb'al wach i ti' k'axik kian reh.¹⁵Eh noq naa rusahchiik kik'ux i wilkeeb' pan nimaq tinamit. Eh re' taqe reey chinaah i tinamit ma' naa ta chik reliik i kiq'oral chuwach, ruum naakilom wach i ma' jank'al ta nq'orarik cho rib'iral keh, inki Dios.¹Ma' awach ta nimanik reh i aak'uhb'aal inqaqor. Eh ma' awach taj inye'wik ruloq'il i awajaawriik²Re' i QaJaaw Dios xraaj naq chi re' i raj kamanoom eliik naq suq naa ruwihiik, Xa re' la' xk'ihik chi je' rukab' i chee' wilik panchiq yuuq'. Re' reh ma' holohik ta xub'an riib', xa re' la' xqil wo' naq wach, eh xama' xta wo' xqaaj reh.³Re' i tinamit ma' xponik ta panaq'kiwach, eh ma' xkaaj ta wach. Re' reh ma' k'isiin i ti' k'axik xuk'ul, eh ma' k'isiin ta xtib'ik ruk'ux. Eh re' hoj xama' xta wo' xqaaj reh taqe i xuk'ul, xqixowaaj wach, eh ma' xqak'ax taj.⁴Xanaah re' xti korik wo' hoq chi re' reh xk'amwik reh i qayab'ilaal, i qati'kiil. Eh quum i hoj xkiqojib'eej, eh xuyeew q'ab' i Dios chi xhopib'ik i ruti'jolal, xelik i runimaal wach, xuyeew panti' k'axik.⁵Eh ruum chi ma' qohnimanik taj xkihopib'eej i ruti'jolal, eh ruum taqe i qamahk xkik'saj chi ti' i ruti'jolal. Eh ruum i ti' xuk'ul xuk'am cho qeh i suq kiil k'uxliis, ruum chi xhopib'ik i ruti'jolal xoj riq'omaaj i hoj.

⁶Re' hoj qasik' qab'eeh chi qa ju'junaal, xqatukej qiib' je' rukab' noq inkitukej kiib' i tentzun. Eh re' i QaJaaw Dios xuyeew q'ab' chi re' raj kamanoom xk'amwik reh i qamahk chi qunchelaal.⁷Atoob' ta ti' wilik, ti' ruk'ux ma' xta yiib' wach q'orik xelik cho panchii'. Re' reh je' ink'amarik reje tentzun pankanteesb'al xb'aan, je' rukab' noq ink'amarik reje i tentzun chuwach inyok'wik reh i rismaal riij, ma' xta xuq'or.⁸Re' reh xkik'am reje pankanteesb'al chi ma' xta ru mahk, eh ma' awach ta xko'linik reh, eh ma' xta xkaaj reh i xuk'ul. Eh xkesaj reje i ruk'achariik chinaah i wach ak'al wili, xkiyeew pankimik ruum i ru mahk i nutinamiit.⁹Eh ar xkimuq'aa' chi kixilak i yiib' wach kina'ojb'al, eh chi kixilak i ma' holohik ta kib'aniik. Xanaah re' ma' xta wo' naq i yiib' wach xub'an, eh ma' jino'q i chukuj q'orik xelik cho panchii'.¹⁰Re' i QaJaaw Dios xraaj chi xik'ik chi ti' k'axik i raj kamanoom. Eh ruum chi re' reh xuyeew riib' chi mayiij chi riij i qamahk, re' i reh xraaj naq chi najt rooq i ruk'achariik, korehtaal taqe naa rilom wach i ruk'ihaal chi riih rumaam. Ruum i reh naa rojiik eloq wach i ruyejaam cho wach i QaJaaw Dios.¹¹Eh re' reh naa rilom i naa ruwachum i ti' k'axik xuk'ul naa ruch'iklojiik ruk'ux noq naa runab'eem chi ajwaal wach chi xuk'ul taqe i ti' re' re'. Re' i raj kamanoom i QaJaaw Dios korik wach ruk'ux, ma' k'isiin taqe i naa ruko'leem, naa resam i kimahk.¹²Ruum i re' naa ruye'ariik chi kixilak i nimaq kiwach ruum i QaJaaw Dios, eh naa reliik korik haa' i reh, ruum xuyeew riib' pankimik. Eh xb'aan reh je' rukab' imb'aan keh i yiib' wach kina'ojb'al xanaah re', re' wo' naq i reh xtojwik riij i kimahk i tinamit. Eh xq'orik i koq ruuk' i Dios chikiij i aj mahk. Re' i QaJaaw Dios xuq'or chi eliik naa ruk'axam taqe i aj Israel¹Re' QaJaaw Dios je' wili xuq'or: Chak'er aachii' chi tz'uuy i hat Jerusaleem, i je' naq akab' ixoq ma' naak'unanik taj. Eh yu'naak cha k'er aachii' chi tz'uuy, ruum ma' k'isiin chik k'ihaal aatinamiit chuwach i xwihik cho pampeet, naa aponiik chi je' rukab' ixoq k'ih i rak'uun rixq'uun.²Ruum aj re' chayub' reje aa itz'ihy naah paat reh aab'iyajo, eh chayub' rooq i k'ahaam b'ak'lik wii' itz'ihy re' re'. Eh kow chalahmaaj i chee' ab'ak'am wii' i ruk'ahamil i itz'ihy.³Eh naa ayub'um reje aaye'aab', je' pantz'eet, je' pansak'aaj. Eh re' awiih aamaam naa wo' chik kehchaam i ye'aab' wilkeeb' wii' i tokoom tinamit, eh naakipatiniik chupaam i ye'aab' ma' xta wii' patineel.⁴Re' hat maayohb'isaj awiib', ma' naa ta chik kaat kikaqse'laam. Ma' naa ta chik kaat kib'ajam, eh ma' naa ta chik kik'uhtaam ak'ixb'ilaal. Ma' naa ta chik ruk'uliik panak'ux i ti' xak'ul noq xat kahnik chi je' rukab' ixoq kamnaq rub'ahiil.⁵Re' hin i Dios, nim rajaawriik i nub'ihnaal, re' hin xin tz'uhkrisanik chaaweh, hin ab'ahiil noq wilkiin. Re' hin kinesanik cha weh panti' k'axik, hin kiSantolaj Dios taqe i aj Israel, je' wo' chu'nchel i wach ak'al.⁶Re' hat je' naq akab' i k'isa q'ahxoq ti' ruk'ux koxub'an wo' naq kaxáro xkanab'jik wo' chik. Xa re' la' re' hin, hin aaDios xnusik' wo' chik chawach, je' wili i xnuq'or aweh:⁷Re' hin xama' najt ta wo' xat nukanaa', eh yu'naak naa wo' chik nuketelaam awach, naa wo' chik kaat nuk'amam wuuk' pan jinaj wach k'uxliis.⁸Re' hin xa ruum i nujosq'iil ma' xnuyeew ta chik i wotob'il cha naah chuwach i ma' najt ta laj q'iij. Xa re' la' ruum chi wilik i k'axooj wuuk' chi juneliik naa wo' chik nuketelaam awach, inki aaDios x-esanik taq cha weh panti' k'axik.

⁹Eh nik' wach noq xnuq'or i xti korik reh i Noé chi ma' naa ta chik nutz'apam naah i wach ak'al ruuk' elal ha', je' wo' re' noq i nuq'or aweh i korik yu'naak chi ma' jaruuj chik naa ruchaliik nujosq'iil cha naah. Ma' naa ta chik kaat nuye'em panti' k'axik.¹⁰Atoob' ta neerujal ruye'aab' i yuuq', atoob' ta neenq'ehb'ik chaloq i yuuq' re' hin ma' jaruuj naa nukanaam ruketeljiik awach. Eh ma' jaruuj naa ruyojiik wach i suq kiil k'uxliis nuyejaam wach, je' wili i nuq'or i hin i kin keteleniik awach, inki.

¹¹Re' hat Jerusaleem ketel awach q'e' ti' xak'ul ma' xta naq rusuqkiil ak'ux. Re' hin naa wo' chik nuyejaam aatinamiit ruuk' ab'aj karbunklo, eh naa wo' nuyejaam i tz'aq paraa' ruuk' i ab'aj zafiro.¹²Eh re' taqe i ru ventanahiil i paat naa nuyejaam taqe ruuk' i holohaq ab'aj, re' taqe i ru puertahiil naa nuyejaam taqe ruuk' i holohaq ab'aj, chu'nchel i tz'aq naa nuyejaam ruuk' taqe i ab'aj q'e' k'ih tz'aaq.¹³Re' hin naa nutijiniik keh taqe i aawak'uun i aawixq'uun, re' wo' hin naa nuye'wiik aweh i runimaal suq kiil k'uxliis.¹⁴Eh ruum chi naa ruwihiik i rukorkiil wach k'uxliis awuuk' naa ruwihiik awajaawriik chupaam aatinamiit. Ma' naa ta chik ayo'jiik kuum i ki-ixowanik awach, eh ma' xta chik naa kaat ruchem.¹⁵Wila' awach i xutoq'aa' peleto awuuk', wila' ma' re' hin xin ye'wik rajaawriik, xama' xta wo' naa kaat ruchem. Re' la' hat naa ab'aniik reh.¹⁶Eh re' hin xinyej-anik reh i aj ch'eyel ch'ihch' re' reh i ruqop i q'aaq' i ruhab'isaj i ch'ihch', ruuk' i re' i ruyejaa' i ch'ihch' inkamanik reh q'aq'inik. Eh re' wo' hin xinyej-anik reh i winaq inkansanik ruuk' q'aq'inik.¹⁷Eh re' hat ma' jino'q i ch'ihch' korjinaq chi reh q'aq'inik neensachwik awach. Eh naa aq'atam kiwach chu'nchel i naakitz'aqam amahk, re' wili naa nuye'em chi kikooch i waj kamanoom, re' chi ma' xta naa kuuchjiik ruum inixowanik kiwach, inki i Dios. Re' i QaJaaw Dios xa chi siih i ruketelaaj kiwach i tinamit¹Re' i QaJaaw Dios je' wili i xuq'or: Chu'nchel i chiqiij kichii' chaloq kian kihaa', chaloq kian kiwa' xa chi siih. Chaloq kuk'ej i riis i uuva, i lecha chi ma' jino'q sentabo neenkitoj.²¿Chib'ih reet noq inasach taq atumiin ruuk' i ma' re' ta wi'k ha'? ¿Chib'ih reet noq inasach taq i tz'aaq akamaj ruuk' i xama' nujisanik ta wo' hoq? Chayeew taq axikin chi wib'irjiik i hin, reh chi nee taq inak'ux aweh i suq atoob', eh nee taq inareq rusuqkiil awánima.³Kim taq wuuk', xti kinab'iraj taq, reh chi neenwihik taq ak'achariik. Re' hin wilik i neenuyejaa' wach taq awuuk' reh juneliik, reh chi neenooj eloq wach i nuq'orom cho reh i reey David noq xnuketelaaj cho wach.⁴Re' hin xnukoj chi re' reh xk'uhtanik i korik keh i nimaq tinamit. Eh xnukoj chi k'amal b'eeh, chi aj tijoom chi kixilak i tinamit.⁵Eh naa taq ayuq'eem awuuk' i tinamit ma' aweht'al ta taq kiwach, eh ma' keht'al ta taq awach, naa kichaliik kajimam kiib' taq awuuk', ruum re' hin, hin taq aaDios i hat taq aj Israel i wilik nuSantohiil naa nuye'wiik taq aloq'il, inki.

⁶Chasik' taq i QaJaaw Dios ruum yu'naak konee ruyeew riib' chi nee taq inareq. Chaq'oreej taq awuuk' ruum re' reh ma' najt ta wilik.⁷Re' yiib' wach runa'ojb'al chukanaa' i rub'eeh. Re' i ma' holohik taj i rukapaaj chukanaa' rub'aan. Chasik' wo' taq chik i QaJaaw Dios, nee wo' chik i ruketelaaj taq awach, eh neerukuy taq amahk, ruum re' reh xti wilik i kuyuuj ruuk'.⁸Re' akapeb'aal taq i hat ma' je' ta rukab' i nukapeb'aal i hin, re' i nub'eeh i hin ma' eliik ta wach ruuk' taq ab'eeh i hat, inki QaJaaw Dios.⁹Re' i taxaaj xiik' naaj tiil wilik chinaah i wach ak'al, re' i nuna'ojb'al i hin je' re' najtiil riik'sam wach taq ana'ojb'al i hat. Eh re' i nukapeb'aal i hin je' wo' re' najtiil rik'sam taq wach akapeb'aal i hat.

¹⁰Chakoj taq rehtaal chi re' i kowlaj jab' ruch'ihil i mus jab' inqajik cho pan taxaaj ma' sutinik ta reje chi ma' xtaj i rub'an, korehtaal la' i rut'aqsaj i tik, ruuk' i re' inki a'n kiwa' kitikwik reh.¹¹Je' wo' re' i nuq'oral i nelik reje panuchii' ma' naa ta rusutiniik cho wuuk' chi ma' xtaj i naa rub'anam. Korehtaal la' rub'an chaloq aha' wilik inwaaj i hin, reh chi naa rub'anam aha' wilik i xnutaq'aaj reje chub'anariik.

¹²Re' taq i hat xasuq taq chik ak'ux noq naa taq aweliik cho ar. Eh xasuq taq chik ak'ux noq naa ak'uliik iloq panatinamiit. Eh noq naa taq awilom taqe yuuq', taqe i rub'ohl yuuq' naa taq ak'erem aachii' chi tz'uuy. Eh re' taqe i chee' naa ruq'ojib'eem riib' i kixaq ruum i rusuqkiil kik'ux.¹³Eh sohchaj chik naa rupoq'iik chi jilow i k'iix, wahut chik naa rupoq'iik chi jilow i kaq k'iix. Eh naa ruwihiik runimaal wach i rub'ihnaal i QaJaaw Dios, re' i rehtalil wili naa ruwihiik chi juneliik, inki i Dios. Re' kib'anik reh aha' wilik iraaj i Dios¹Re' i QaJaaw Dios je' wili i xuq'or: Re' taq i hat, re' korik, re' holohik taq cha a'n, ruum re' hin naa taq kaat nuko'leem chi jumehq'iil. Eh naa nuk'uhtaam i rukorkiil wach nuk'ux.²Atoob' reh awach i ruk'am naah taqe i ruq'or i nuk'uhb'aal, eh i rub'an chi korik i ruq'or. Eh rumol i hi'limb'al q'iij i ruyeew ruloq'il, eh ma' xtaj i yiib' wach i rub'an, inki.³Wila' re' i tokoom tinamit neerusik' i QaJaaw Dios maa ruq'or chi je' wili: Re' hin ma' nee ta kiruk'ul chi xilak i rutinamiit i QaJaaw Dios. Eh re' kapuun maa ruq'or chi je' wili: Re' hin xa je' nukab' i chiq chee'.⁴Ruum re' i QaJaaw Dios je' wili i ruq'or: Wila' re' taqe i kapuun, inkiyeew ruloq'il i hi'limb'al q'iij, eh wila' inki a'n inwaaj i hin, wila' inki a'n taqe i nuyejaam wach.⁵Re' hin naa nukojom taqe chi wak'uun wixq'uun, naa nukanaam rehtalil i kib'ihnaal chupaam i nupaat, eh chuwach taqe i tz'aq. Eh jinaj i b'ihnaal naa nukojom keh, ma' jaruuj chik naa rusahchiik wach.⁶Re' taqe i tokoom tinamit inkiq'asaj kiib' weh reh chi naa kikahniik chi waj kamanoom, eh chi nee kinkik'ax. Eh wila' xkimol i hi'limb'al q'iij, wila' xkiyeew ruloq'il i nuk'uhb'aal.⁷Re' hin naa taqe nuk'amam chaloq pan nuSantolaj ye'aab', naa nuye'em rusuqkiil kik'ux panupaat imb'aan wii' tiij. Eh naa nuk'ulum i kimayiij, je' wo' i k'atoj chikop inkiyeew wach artaal, ruum re' i nupaat naa rukahniik chi b'amb'al kitiij i tinamit, inki Dios.

⁸Eh re' i QaJaaw Dios i molwik kiwach i aj Israel tukimaj kiwach, je' wili i ruq'or: Ko wilik i tokoom tinamit naa nuk'amam chaloq chi kixilak i aj Israel, inki.⁹Kim taq i hat tokoom tinamit chasach taq kiwach i nutinamiit, je' rukab' inki a'n i josq'laj chikop reh i kitiib'.¹⁰Ruum re' taqe incha'jinik keh i nutinamiit, i moywach taqe, ma' xta kina'ojb'al. Eh xa je' kikab' i tz'i' ma' kiwohwanik taj, xa re' wirik inki a'n xa re' i xohk'risanik inki a'n¹¹Xa je' kikab' i tz'i' xa kinuhmik chik noq inki a'n kiwa', xama' kinujik ta wo' hoq. Eh k'amal b'eeh wo' naq taqe xa re' la' xama' holohik ta wo' kib'anik chi kiju'junaal, xa re' i k'axb'al kiib' i keh inkisik'.¹²Eh je' wili inkiq'or chikiwach: Kim taq quk'ej taq qak'ah laj haa', reh chi nee qohxohk'rik, eh i iqal xti k'ih chik inaaquk'em, inki taqe. Re' taqe i aj Israel xiye'arik chutojariik i kimahk ruum i kilooq'jiik i tiyoox¹Re' korik wach kik'ux kikimik ma' ti' taki-ik'aarjik. Eh noq kikimik i atoob' wach kik'ux ma' insik'arik ta chi riij chib'ih reet noq xuk'ul, eh chi ruuk' i re' kielik chupaam i ti' k'axik.²Awach wilkeeb' parub'eeh i Dios kiokik pansuqkiil k'uxliis. Eh noq kikimik reje kiooj chi hi'lik pankijuul.

³Kim taq i hat i je' taq akab' i kak'uun i aj war, eh je' taq akab' i kak'uun i k'oyoom laj ixoq ch'aq kaxáro.⁴¿Awach taq inab'aj awach taq inakaqse'laaj noq inaq'or? ¿Awach taq inawehtz'aaj? Eh ¿Wila' je' re' taq i na a'n mi ma' hat taq kak'uun kixq'uun re' i ma' xinimanik taj, chuk'ul q'orik taqe?⁵¿Mi ma' re' taq re' hat tib'anik k'oyomal chi ri'sil taqe i nimaq chee'? ¿Mi ma' nayeew taq chi amayiij re' aha'lak'uun chupaam taqe i ruhopil ab'aj, eh chupaam taqe yuuq' kixkaab'?

⁶Re' taq i hat inamol taq i ch'ub'ik kiwach ab'aj inaloq'ej taq. Eh i nayeew taq i vino, i trigo chi amayiij chikiwach. ¿Mi ma' rik'ul re' chi nee taq tinuyeew chi tojariik amahk chi riij taq i na a'n re' re'?⁷Re' taq i hat tiooj taq chinaah taqe inajt kinaah yuuq' ar taq tiooj woroq chub'anariik taqe yiib' kiwach chi b'anarik. Eh ar taq tiooj chuye'ariik taq amayiij.⁸Eh i nayeew taq aatiyoox chi chii' taq i ru puertahiil aapaat, re' chik taq ayiib' wach tiyoox xaloq'ej, xinsahchik taq panak'ux i hin. Eh xasonaa' taq awiib', xahe' taq wach anim wach yokaab', xat yohkik kuuk' taqe i winaq awach uuk' xawaaj taq i hat.

⁹Eh tiooj taq ruuk' i tiyoox Melec rub'ihnaal, ma' k'isiin ink'ohnik laj iq'oom i nak'am taq reje. Xataq'aaj taq awaj taqareel chi najt yuuq', xiqajik chupaam i rujuleel kamnaq.¹⁰Re' taq i hat xaq'uhtisaj taq awiib' chub'anariik taq imponik chawach. Eh ma' xakapaaj ta taq riij chi ma' xta ruk'am chaloq taq i na a'n, eh inareq taq rukowiil ak'ux chub'aan i ma' ruq'or korik.¹¹Eh ¿Chib'ih kianam i tiyoox nayohleej taq kiwach, i nayeew taq kiloq'il? Eh re' hin ma' kink'ulik ta chik k'isinoq taq panak'ux, ma' kinaloq'ej ta taq chik. Re' hin xama' xta wo' nuq'or chi je' taq re' i na a'n weh.¹²Re' hin naa nuq'orom chi ma' holohik ta taq i na a'n, eh chi xama' xta ruk'am chaloq.¹³Eh noq naa taq apahqaam atoob'jiik reh i tiyoox xama' naa ta wo' taq kaat resam panti' k'axik. Xa chi jumehq'iil kik'amariik reje ruum i kowlaj teew, insachwik kiwach. Eh re' i ruyeew ruk'ux wuuk' i hin naa nuye'em reh chi rukooch, i ye'aab', eh naa wo' nuye'em reh i santo laj ye'aab'.¹⁴Eh naa wo' rib'irjiik noq naa nuq'orom chi je' wili: Re' hin inwaaj chi nee wo' chik kisutiniik chaloq i nutinamiit, cha yejaa' taq chi korik i kib'eeh cha teh chi korik i kib'eeh, kinko'q.

¹⁵Ruum re' i QaJaaw Dios nim rajaawriik wilik pan taxaaj, k'achlik chi juneliik re' i Santo laj Dios rub'ihnaal je' wili i ruq'or: Re' hin pan taxaaj k'acharik i nub'an chupaam i nuSantolaj ye'aab', ar wilkiin. Xa re' la' wilkiin wo' chi kitoob'jiik taqe i xama' nimaq ta kiwach, je' wo' chi kitoob'jiik i ti' kik'ux i nuyeew rukowiil kik'ux.¹⁶Eh ma' chi juneliik ta naa wik'sam pankinaah i kimahk i nutinamiit, ma' juneliik ta naa nuye'em i nujosq'iil chikinaah. Ruum re' hin ma' inwaaj ta chi neenyoj kik'ux wuuk' i tinamit nutz'uhkrisam chaloq.¹⁷Re' hin xa ruum wo' kimahk xkian xchalik nujosq'iil, xnuyeew taqe chi tojariik i kimahk. Re' hin xnukanaa' kitoob'jiik, ruum re' keh xinkija' wachej, re' chik xkian aha' wilik i xkaaj i keh.¹⁸Korik re' hin inwilow chi yiib' wach i kina'ojb'al, xa re' la' re' hin naa wiq'omaam taqe, naa nuye'em rusuqkiil kik'ux reh juneliik.¹⁹Re' hin je' wili i naa nuq'orom: Naa nuye'em rusuqkiil kik'ux taqe i wilkeeb' cho chi najt chi ma' najt, kinko'q. Re' hin naa nuk'achrisaniik keh i nutinamiit.

²⁰Eh re' taqe i yiib' wach kina'ojb'al keh ma' naa ta ruch'iklojiik kik'ux, naa kikahniik chi je' kikab' i palaw k'ul inooj i rub'ohl i rukut taqe reje i sohk' chi chii'.²¹Xti korik noq ma' naa ta ruwihiik rusuqkiil k'uxliis chi keh i yiib' wach kina'ojb'al, inki i Dios. Re' i xti korik laj kuyuuj wi'k ha' chub'aan i tiij¹Re' i QaJaaw Dios je' wili i xuq'or weh: Matyo'jik cha k'er aachii' je'-oq i inq'ajb'anik tuun aq'oral noq nee taqe i naq'il i tinamit. Eh chaq'il taqe i riih rumaam i Jacob ruuk' i kimahk.²Rajlaal q'iij inkisik' i wotob'il xankaaj chik kinab'eem i nub'eeh xa korik chik wach kik'ux inki a'n kiib', xa nkik'am chik naah i nuk'uhb'aal noq inkikapaaj inkipahqaaj weh i korik chi b'anarik. Eh inkiq'or chimponik chikiwach i nulooq'jiik.³Eh je' wili inkiq'or: ¿Chib'ih ta wo' kamaj qeh chi neenqakuy qawa' qahaa' chub'aan i tiij. Eh chi neenqik'saj chi ti' k'axik i qati'jolal re' Dios xama' qohril ta wo' chaloq, xama' rukoj ta wo' paruman? inki taqe. Je' re' inkiq'or ruum re' chik i yak, re' chik i jot'ooj kimoso inki a'n⁴Eh chupaam i ruq'ijil i tiij chi ma' b'anooj wi'k ha' re' chik i peleto taq i na a'n, xakow taq chik inasak' aawas achaaq'. Ruum chi je' taq re' i na a'n paruq'ijil i tiij chi ma' b'anooj ta wi'k ha' ma' jaruuj taq naab'iram aatiij.⁵¿Mi nakapaaj taq re' hat chi re' tiij chi ma' b'anooj ta wi'k ha' re' chi nee taq inawik'saj aati'jolal chi ti', chi na k'utzaa' taq anaah je' rukab' i kaxlan aaj, chi nayo'k'aa' taq awiib' chuwach i q'as kiwach itz'ihy, oon nah chaaj? ¿Mi re' i re' imponik chi nuwach re' i hin?⁶¿Mi ma' re' i wili i tiij imponik chi nuwach i hin chi ma' b'anooj ta wi'k ha': Re' chi nee taq inakanaa' i yiib' wach na'ojb'al. Eh re' chi nee nawesaj taq ahl laj ihq aye'em taq chikinaah aawas achaaq', eh chi nee taq inakanaa' i kowlaj taaq'anik chikinaah?⁷¿Mi ma' re' chi naa taq awunem awa' ahaa' i ma' xta kiwa' kihaa' chi naa taq aye'em rupatal i ma' xta rupaat. Eh chi naa taq akojom kiso' taqe i neb'aa', chi ma' naa ta taq akanaam kitoob'jiik aawas achaaq'?⁸Wila' xa a'n taq i je' re' k'ahchi' taq ak'uhtaam i saqum, je' rukab' i rusaqumaal i q'iij noq insaq'ik, eh naa taq ak'aachjiik chi jumehq'iil ruuk' taq ati'kiil. Eh naa ruwihiik rukowiil taq ak'ux, naa wo' ruwihiik taq awuuk' i nuloq'il.⁹Eh noq nee taq inapahqaaj i wotob'il nee taq tib'iraj. Eh noq nee taq inaq'or i nub'ihnaal ayu' wilkiin, kinko'q taq aweh. Eh cha kanaa' taq i kowlaj taaq'anik, ma' b'aj taq chik i tokoom, cha kanaa' taq i tz'aqaj q'orik chikiij.¹⁰Eh wila' xayeew taq kiwa' kihaa' i ma' xta kiwa' kihaa', wila' xayeew taq chib'ih keh i ti' kik'ux. Re' rusaqumaal taq ana'ojb'al je' rukab' i rusaqumaal i q'iij noq tuqlik kab'lajora.¹¹Re' hin naa nucha'jiniik taq aweh chi juneliik naa nuye'em taq awa' ahaa' chupaam i ye'aab' chiq yuuq'. Eh naa nuye'em taq akowiil, naa taq akahniik chi je' rukab' i ye'aab' wilik wii' uhtz'ub' wilik ruha'iil, chi je' rukab' i raasb'al ha' ma' jaruuj inchiqik.¹²Eh re' taq i hat naa wo' chik ayejaam taq aatinamiit yojinaq, eh naa wo' chik akojom taq rukowiil i raa' kojooj cho najtir. Eh je' wili taq i naa ab'ihnaam: Re' i xikorb'isanik cho reh taqe i paat yojinaq naq, inko'q taqe aweh. Re' k'utaaj chi riij i hi'limb'al q'iij¹³Re' i QaJaaw Dios je' wili xuq'or: Chayeew taq ruloq'il i hi'limb'al q'iij ruum nuSantolaj q'iij. Wilik-oq taq panak'ux chi re' q'iij re' re' suq kiil k'uxliis i ruk'am chaloq, eh q'e' looq', maa a'n taq aha' wilik taq inawaaj i hat chupaam. Eh mo'-oq xa re' taq neenasik' inawaaj taq i hat.¹⁴Wila' xayeew taq ruloq'il nee taq inareq rusuqkiil ak'ux wuuk'. Naa taq kaat nutob'eem reh chi xa re' taq i hat naa aweliik korik. Naa wo' ruye'em taq aweh chi k'ularik akooch nuq'orom cho rib'iral reh i Jacob, inki i Dios. Re' ti' k'axik xye'arik chikinaah i aj Israel ruum i kimahk¹Maa kapaaj taq i hat chi re' i QaJaaw Dios ma' xta chik rajaawriik taq chako'ljiik. Eh ma' tz'aplik ta wo' xikin chi ma' nee taq tirib'iraj.²Re' la' taq ayiib' wach na'ojb'al inq'atwik taq panab'eeh ruuk' i Dios. Eh ruum taq amahk ma' ruyeew ta chik riib' chi naa a'n taq k'ul chi' ruuk' i Dios, ruum i re' ma' rib'iraj ta taq atiij.³Re' taq i hat sahchinaq chi kik' taq aq'ab', ruum xa re' inkansanik taq i na a'n, xa re' chukuj q'orik, xa re' i yiib' wach q'orik i nelik taq cho panachii'.⁴Ma' jino'q i re' rukorkiil i ruq'or, ma' awach taj i rub'an i q'ataj q'orik parub'ehel, inach'ikaa' la' taq ak'ux ruuk' i xachukuj q'orik. Xa re' i yiib' wach q'orik nujinaq taq cho panawánima, eh korehtaal inawesaj taq wach saqum.⁵Re' taq i na a'n re' re' je' rukab' i rumiloj i aaq' je' rukab' i rukeem am. Awach ink'uxwik reh i miloj re' re' inkimik, eh noq i rupuch' i miloj, aaq' i nelik cho ar.⁶Eh re' i rukeem am, xama' inkorjik ta wo' chi itz'ihy, je' wo' re' taq ayiib' wach na'ojb'al i na a'n xama' xta nokik wii'. Xa re' ikaansanik, xa re' i ma' holohik taj taq i na a'n.⁷Xa eliik taq tiooj chub'anariik i yiib' wach na'ojb'al, xa re' i kikanteesjiik aawas achaaq' taq i na a'n atoob' ta xama' xta wo' naq kimahk. Eh xa re' i rub'anariik i yiib' wach inayejaa' taq wach, xa re' i sachooj taq inawaaj.⁸Eh ma' nasik' ta taq i suq kiil k'uxliis, ma' xta taq i korik i na a'n. Re' la' chik ma' korik ta laj b'eeh taq i nak'am, re' kik'amwik reh i b'eeh re' re' ma' nkireq ta rusuqkiil kik'ux.

⁹Ruum i re' ma' qareq taj i wihik parukorkiil. Noq inqasik' naq i saqum xa panq'equm wo' qohkahnik, noq inqasik' naq i rukorkiil re' chik i ma' holohik taj inqareq.¹⁰Xa je' hoj moywach inqamajej i qab'eeh wataq tz'aq, xa je' cho ma' nqil taj i qab'eeh. Atoob' ta kab'lajora wo' naq i q'iij wilkooj inqatoxk'iij nah qooq, je' rukab' inqak'ul chaq'ab' eh xa je' cho hoj yowaab' noq inqik'raaj.¹¹Eh chi qunchelaal i hoj inqak'er qachii', je' rukab' i rub'an i oso, je' rukab' noq i ruk'er chii' i paloma chi ruyub'jiik i ko'lenb'al qiib', xama' qoko'ljik ta wo' hoq. Eh inqaaj naq chi naaqeliik panti' k'axik xama' qoh elik ta wo' hoq.¹²Ma' qoh ehteesjik ta chupaam ruum xiik'naah i qamahk, xti korik chi je' re' ruum re' hoj wilik panqak'ux i qamahk. Eh qeht'al chi ma' k'isiin i yiib' wach inqa a'n.¹³Korik wo' hoq chi ma' qanimaj taj i QaJaaw, eh ma' korik ta wach qak'ux ruuk'. Ma' nqaaj ta rutahqaljiik, xa re' inkahsanik inqaq'or rib'iral, xa re' i ma' holohik taj inqa a'n, xa re' i rujot'ariik i tokoom inqa a'n.¹⁴Ma' korik ta qohq'orik, ma' nqareq taj i korik chi b'anarik, aha' imb'aan i q'ataj q'orik ma' imb'aan taj i korik. Eh ma' awach taj imb'anik reh i rukorkiil.¹⁵Eh ma' awach tamb'anik reh i korik, awach naq iraaj rukanaam rub'aan i ti' k'axik inkiyeew pan ti k'axik. Eh re' i QaJaaw Dios ma' imponik ta chuwach chi ma' awach ta imb'anik reh i rukorkiil.¹⁶Re' i QaJaaw Dios xsahchik ruk'ux noq xrilow chi ma' awach ta yej-anik reh taqe i re'. Ruum aj re' ruuk' i rajaawriik xuko'leej taqe i tinamit, xuch'ikaa' i wihik parukorkiil.¹⁷Re' i wihik parukorkiil xuk'am chaloq je' naa xukoj chi ruch'ihch' so', eh re' i ko'lenb'al iib' je' naa xukoj chi ruch'ihch' puneet. Eh je' naa xukoj chi ruso' i rujosq'iil, noq xuq'aj wach keh i aj ixowaal i xkian.¹⁸Re' i QaJaaw Dios naa ruq'ajam wach keh i je' rukab' i ruk'ul chi keh, naa ruye'em taqe panti' k'axik i ki-ixowanik qawach. Je' wo' re' i naa rub'anam kuuk' i wilkeeb' chi chii' i palaw.¹⁹Eh re' taqe wilkeeb' cho pareelb'aal q'iij, i wilkeeb' cho parookb'aal q'iij, naakinimam i Dios noq naakilom i runimaal wach. Ruum re' reh naa ruk'uliik iloq chi je' rukab' jino'q i nim ha' xan choqik chik k'ahchi' ruk'uyu'jiik ruum i kowlaj teew.

²⁰Eh naa ruchaliik chi kiko'ljiik i wilkeeb' ar Sión, re' taqe i riih rumaam i Jacob, re' taqe i naakiyot'om i kik'ux chi riij i kimahk, inki i QaJaaw Dios.²¹Re' i QaJaaw Dios je' wili i xuq'or: Re' hin jinaj i nuyejaam taq wach awuuk'. Re' chi re' i Santolaj Wuxlab'al naa ruwihiik taq awuuk' chi juneliik, je' wo' taq atijiik naa nub'anam reh chi naa taq aq'orom rib'iral keh taq awak'uun awixq'uun i hat. Eh re' keh nee wo' chik inkiq'or rib'iral keh i kak'uun kixq'uun, inki. Re' i ye'arik ruloq'il i tinamit Sión¹Hat taq aj Jerusaleem tiwuktoq taq, wih-oq taq asaquumaal, ruum xk'ulik chik i ruloq'il i QaJaaw Dios xsihq'inik taq chik cha naah.²Eh chu'nchel i tinamit wach ak'al panq'equm wilkeeb' ruum i kina'ojb'al. Eh re' taq i hat re' i ruloq'il i QaJaaw Dios naa rusihq'iniik taq cha naah.³Eh chupaam i rusaqumaal naa kiwihiik i nimaq tinamit, naa wo' rusik'ariik i rusaqumaal kuum i reey, naa rusahq'iik chi keh.⁴Eh ti tz'ehtanoq taq reje cha junsuut nee taq inawil chi chu'nchel k'ahchi' cho kimolom kiib' chi chalik taq panatinamiit, k'ahchi' kichaliik taqe i kak'uun kixq'uun chupaam inajt tinamit.⁵Eh noq naa taq awilom i hat chi k'ulik inki a'n iloq naa rusuuqb'iik taq ak'ux, naa taq aye'em kiloq'il. Naa kik'amam chaloq i kib'ehomal i nimaq tinamit wilkeeb' chi chii' i palaw naa taq kiq'asam aweh i kib'ehomal i tokoom tinamit.⁶Eh ma' k'isiin i cameyo naa kichaliik Madián, naa kichaliik Efa. Naa wo' kichaliik i aj Sabá, naa kik'amam chaloq i oro, insensia. Eh naa kitz'uyem wach i QaJaaw Dios chi loq'oomb'al reh.⁷Naa taq amolom kiwach i chikop ar Cedar, naa taq rukahniik cha weh. Re' taqe imas tentzun wilkeeb' ar Nebaiot, naa taq aq'asam chi amayiij wach artaal ye'b'al ruloq'il i rupaat i QaJaaw Dios, re' i mayiij re' re' q'e' neemponik chuwach i reh.

⁸¿Awach i chalik inki a'n Jerusaleem, je' kichalik suutz', je' kirupinik cho paloma pan kisuuq'?⁹Re' taqe i re', re' taqe i barco chalik inki a'n chinaah i palaw, ruch'ihil kichalik Tarsis k'ahchi' cho kik'amam chi najt i awak'uun awixq'uun. Eh xkik'am wo' chee oro i plata, chi ye'b'al ruloq'il i QaJaaw Dios wilik ruSantohiil. Re' qaDios i hoj, hoj aj Israel, re' inye'wik qaloq'il.¹⁰Eh re' taqe i tokoom tinamit naa kikorb'isaniik i tz'aq chi riij taq aatinamiit. Re' i kireey naakikamaniik taq aweh, atoob' ta xnuyeew nujosq'iil taq cha naah, naa wo' chik nuketelaam taq awach.¹¹Eh ma' jaruuj chik naa rutz'ahpiik i ookb'al taq reh aatinamiit, naa rukahniik chi tehlik chi q'iij chi aq'ab' reh chi naa kik'amam cho ar i kib'ehomal i tokoom tinamit. Reh chi neeki okik i reey.¹²Eh re' taqe i tinamit ma' naa ta kaajwaam kamanik taq chawach, naa rusahchiik kiwach chi kunchelaal.

¹³Re' taqe i chee' Líbano ma' k'isiin kiholwochiil, re' taqe i chaj, re' taqe i sohchaj, re' taqe i chakaltee'. Re' taqe re' naa rukamaniik chi xoyb'al wach i nupaat. Re' hin naa nuye'em ruloq'il i nupaat.¹⁴Eh re' taqe i kak'uun kixq'uun i xi ixowanik taq chaawach naa kiloch'om kiib' taq chawach. Chu'nchel i xitib'isanik taq ak'ux naakixuk'aam kiib' taq chawach, je' wili i naa kiq'orom: Re' taqe i aj Sión rutinamiit taqe Santolaj Dios i kiDios i aj Israel, inko'q taqe.¹⁵Ma' jaruuj taq chik naa akahniik cha wutkeel, ma' naa ta chik rixowjiik taq awach. Naa la' nuye'em q'ab' i hin chi naa kiye'em taq aloq'il chi juneliik, naa nuye'em rusuqkiil taq ak'ux chi juneliik.¹⁶Re' taqe i tokoom tinamit naa kik'amam taq cho k'uxumb'al aweh. Re' taqe i reey naa kik'amam taq cha weh i kib'ehomal, eh naa taq anab'eem chi re' hin i Dios kinko'linik taq aweh, eh chi re' hin nim wajaawriik xinko'linik reh i Jacob.

¹⁷Re' hin oro chik naa nuye'em taq aweh chi jilow i q'an ch'ihch', plata chik i jilow rax ch'ihch', q'an ch'ihch' chik i jilow chee', eh ch'ihch' chik i jilow ab'aj. Eh parukorkiil chik naa kianam i taaq'anik taq cha naah ajaab'ees.¹⁸Eh chupaam taq aaye'aab' ma' naa ta chik rib'irjiik i ti' k'axik, ma' awach ta chik naa ruyojwiik naa rusachwiik wach taq aatinamiit. Re' la' tz'aq kotimaj wii' riij naa ruko'liniik taq aweh, eh chupaam taqe i ookb'al reh taq aatinamiit naa ruwihiik i loq'inik.

¹⁹Eh chupaam taq aatinamiit ma' koruman ta chik chi naa rusihq'iniik i q'iij, eh ma' koruman ta chik i rusaqumaal i poh. Ruum re' i hin i Dios naa nusihq'iniik taq aweh chi juneliik. Re' taq i hin aaDios, hin taq naa nuye'wiik asaquumaal.²⁰Re' taq asaquum naa rukahniik chi jilow i q'iij, chi jilow i poh, ma' jaruuj chik naa ruchuhpiik, ruum re' hin naa nukahniik chi hin taq asaquum chi juneliik. Ma' naa ta chik rutib'iik taq ak'ux.

²¹Naa rukahniik chi korik wach kik'ux chu'nchel taq aatinamiit, eh chi ehchan taqe reh chi juneliik i ye'aab' naa ruye'ariik keh, je' kintikarik i chee' naa nub'anam, k'uhtb'al reh i nuloq'il.²²Eh yu'naak ma' q'e' ta taq hat k'ih korehtaal taq ti ponik chi nimlaj tinamit, naa ruwihiik taq awajaawriik. Re' hin naa nub'aniik i wili chi jumehq'iil, inki i QaJaaw Dios. Re' ruq'orariik rib'iral chi naa ruko'ljiik i tinamit Israel¹Re' hin xuyeew cho chi nunaah i Ruxlab'al i QaJaaw Dios, ruum re' reh xirukuxisaj. Re' reh xsik'wik nuwach chuq'orariik i ak' k'uhb'aal keh i neb'aa'. Je' wo' chuq'orariik chi naakeliik prexohjik i wilkeeb' prexo, eh chi naa ruye'ariik i rukowiil kik'ux i ti' kik'ux.²Eh chi ruq'orariik chi xponik chik i q'iij chi re' i QaJaaw Dios naa ruko'leem i tinamit, eh chi ruye'ariik rusuqkiil kik'ux chu'nchel intz'irik kiwach. Eh chi ruq'orariik chi re' QaJaaw naa ruq'ajam wach keh i aj ixowaal.³Eh xirutaq'aaj chi ruye'ariik rusuqkiil kik'ux i ti' kik'ux wilkeeb' Sión. Eh kiloq'il chik i naa nuye'em chi jilow i kiye'ariik kiib' pan chaaj, ink'ohnik laj suq kiil k'uxliis naa nuye'em keh chi jilow i ruti'kiil k'uxliis. Eh naa nusutem chi tz'uuy i koq'iim, naakikanab'jiik chi je' taqe kowlaj chee' ruum i QaJaaw Dios, ye'b'al ruloq'il i reh.

⁴Eh naa wo' chik kiyejaam aha' wilik i yojinaq cho najtir, naa wo' chik kiyejaam taqe i paat yojinaq. Eh naa wo' chik wuksam i tinamit sahchinaq cho wach najtir q'iij.⁵Re' chik taqe i tokoom tinamit naa kicha'jiniik reh taq atentzuun, re' chik i keh naakitikwiik taq reh atik, re' chik i keh naa kab'ixiniik wach taq aaye'aab'.⁶Re' taq i hat k'amal b'eeh i aj tiij chuwach i QaJaaw Dios taq i naa ab'ihnaam, raj kamanoom i Dios taq i naa ab'ihnaam. Eh naa taq ak'uxum aweh i kib'ehomal i tokoom tinamit, naakiye'em taq aloq'il.⁷Ruum chi re' taq i hat ma' k'isiin taq i ti' xat ik'ik wii', eh q'e' xk'uhtjik taq ak'ixb'ilaal xak'ul taq ab'ajariik. Ruum aj re' xiik'chik naah k'ihaal i jilow naa taq ak'ulum, naa ruwihiik rusuqkiil taq ak'ux chi juneliik.

⁸Ruum re' i QaJaaw Dios imponik chuwach i korik. Eh ma' imponik ta chuwach i leq', ikaansanik, naa ruye'em kitojb'aal taqe i kib'anik reh i korik. Wilik i naa ruyejaam wach, kuuk' reh juneliik.⁹Eh naa reliik rib'iral chupaam taqe i tinamit chi re' kiih kimaam holohik i kina'ojb'al. Chu'nchel i naa rilwiik keh naa kinab'eem chi rak'uun rixq'uun i Dios taqe, rukuxisam taqe chaloq.

¹⁰Re' hin ma' k'isiin ta nsuuqb'ik nuk'ux ruuk' i nuDios ruum xi ruko'leej. Je' naa xukoj chi nuso' je' rukab' noq i rutiq'aa' riib' i winaq okik reh pan kaxáro, oon je' rukab' ixoq okik reh pan kaxáro i ruxoyej riib' ruuk' i karena.¹¹Eh nik' wach noq impoq' chaloq i tik korehtaal inwachinik, je' wo' re' noq naa rutz'ukrisam chaloq i QaJaaw Dios i korik chi b'anarik naa ruye'ariik ruloq'il chupaam i tinamit wach ak'al.¹Ruum chi q'e' nuk'ax taqe i aj Sión, taqe i aj Jerusaleem ma' naa ta nukanaam kitoob'jiik, korehtaal i nelik wach saqum i korik, je' rukab' noq insaq'ik. Eh korehtaal kielik korik chi je' rukab' q'aaq' ju' chee'.²Eh re' i tinamit naakilom chi korik taq wach ak'ux. Chu'nchel i reey wach ak'al naakilom chi wilik taq aloq'il. Re' QaJaaw Dios jinaj i ak' b'ihnaal naa rukojom taq aweh.³Chi je' re' ma' k'isiin taq naa ruwihiik aloq'il chuwach i QaJaaw Dios, naa taq akahniik chi je' jinaj corona chi reh.⁴Eh ma' jaruuj chik naa ruq'orariik taq aweh chi hat taq q'eb'ooj, eh chi sachooj taq wach aaye'aab', naa la' ruq'orariik reh taq aa ye'aab' chi ruye'em i rotob'il i Dios chinaah. Re' taq i hat naa taq akahniik chi je' taq hat ehk'eenb'ees chi ree reh.⁵Re' taqe awak'uun awixq'uun naa rusuuqb'iik kik'ux chi riij i kiye'aab', je' rukab' noq insuuqb'ik ruk'ux i k'ijool chi riij i rehk'een, je' wo' re' noq insuuqb'ik ruk'ux taq awuuk' i QaJaaw Dios i hat taq rutinamiit.⁶Eh re' wo' hin xinkojwik taqe i aj cha'joom chinaah i tz'aq kotimaj wii' riij i tinamit Jerusaleem. Chi q'iij chi aq'ab' naa kipahqaam taq atoob'jiik chuwach i QaJaaw Dios.⁷Eh mat hi'lik taq chub'aan korehtaal inkorjik wo' chik i Jerusaleem. Reh chi naa wo' chik kiloq'em i Dios ar chu'nchel i tinamit.

⁸Re' i QaJaaw Dios ruuk' i rajaawriik xuq'or chi ma' naa ta chik ruye'em q'ab' chi naa kik'uxum i wach taq atrigo i ki-ixowanik taq awach, chi ma' tokoom tinamit ta chik naa kuk'iniik reh i riis taq aa-uuva akamaneem taq wach.⁹Re' la' wo' taq i hat naa amolwiik, naa ab'aniik rusuqkiil i wach taq atik, ruum i re' naa taq kiin aloq'em i hin. Re' taq i hat naa aasik'wiik reh i wach taq aa-uuva naa taq awuk'em i riis chupaam i nuSantolaj paat.

¹⁰Eleen taq cho chi chii' i puerta, cha yejaa' taq i kib'eeh i nutinamiit, chawesaj taq inq'atwik keh. Chajosaj taq i rehtalil chi yuq'umb'al keh i tinamit.¹¹Re' i QaJaaw Dios je' wili i xuq'or keh i wilkeeb' chi junsuut i wach ak'al: Chaq'or keh i nutinamiit wilkeeb' Sión chi xk'uloq chik i ko'len keh, eh chi xnuk'am chik chaloq i nutinamiit, xwesaj taqe chaloq panti' k'axik.¹²Re' taq i hat santo laj tinamit taq i naa ab'ihnaam. Eh re' Jerusaleem loq'laj tinamit, ma' kanamaj ta chik chi rutkeel i naa rubíhnaam, inki Dios. Re' i QaJaaw Dios xuyeew taqe chutojariik i kimahk i ximahkunik chuwach¹¿Awach i kaq ruso' chalik i rub'an ar Bosra, re' wilik cho Edom? ¿Awach i chalik i rub'an chi jumehq'iil xiik' naah holwochiil i ruso' ruuk' i rajaawriik ruuk' i ruloq'il? Re' hin i Dios kink'utjanik parukorkiil, wilik wajaawriik chi ko'linik.²Wilik kiq'orik weh chi je' wili: ¿Chib'ih reet noq kaq aaso' je' cho xayeq' cho paam i uuva chawooq chi yitz'b'al reh? inki taqe³Korik re' hin je' wo' naa yitz'ij uuva i nub'an ruum xnuyeq' taqe pan wooq ruum nujosq'iil i ki-ixowanik nuwach, Eh re' i kikik'eel je' naa xt'ahxanik chuwach i nuso', ma' wach ta xtoob'inik weh chub'aan keh.⁴Re' hin xanuyejaam naq chik wach chi naa nuq'ajam wach keh i ki-ixowanik nuwach inki a'n Eh chi naa nuko'leem taqe i nutinamiit.⁵Eh xwil chi ma' awach ta xtoob'inik weh, chi ma' awach taj i xuk'ul ruk'ux i xnub'an xsahchik nuk'ux. Ruum i nujosq'iil nu kowej wiib', xawutkeel xnub'an keh i aj ixowaal.⁶Ruum i nujosq'iil xnub'an keh, xnusach kiwach i tinamit, eh xnuchihkaaj i kikik'eel chinaah i wach ak'al. Re' i QaJaaw Dios xuketelaaj kiwach i aj Israel⁷Re' hin inwaaj nuq'orom rib'iral i ruk'axb'al i QaJaaw Dios. Inwaaj nutz'uyem wach ruum i xub'an cho quuk' ruum i ruketeljiik qawach xub'an i hoj, hoj aj Israel. Eh ruum i rotob'il, ruum i runimaal i ruk'axb'al xub'an cho quuk'.⁸Re' reh je' wili i xuq'or: Re' re' nutinamiit, wak'uun wixq'uun taqe, ma' ruk'ul ta chi neenkian i ma' imponik ta chi nuwach i hin, inki. Eh re' wo' reh xko'linik keh.⁹Re' i QaJaaw Dios inyot'ik i ruk'ux ruum i ti' k'axik xkik'ul aj Israel. Eh re' reh ma' aj taqareel taj i xutaq'aaj chaloq chi kiko'ljiik, re' la' wo' reh xko'linik keh ruum xuketelaaj kiwach, je' rukab' i rub'an cho najtir q'iij.¹⁰Xa re' la' re' keh ma' xkinimaj taj i QaJaaw Dios, xkich'uwa'risaj wach i ruSantohiil. Ruum aj re' ma' x-ajawjik ta chik kiwach ruum i Dios, ruum i re' xb'aan keh ruuk' q'aq'inik.¹¹Re' keh xk'ulik cho pankik'ux noq xuko'leej chaloq i rutinamiit i Moisés najtir, eh je' wili ixkiq'or: ¿Mi ma' re' re' i Dios xtoob'inik keh i tinamit ruch'ihil i Moisés k'amwik cho kib'eeh noq xi q'ahxik chi juntar i palaw? ¿Mi ma' re' wo' re' reh xuyeew i rusantolaj Uxlab'al keh?¹²Re' reh xtoob'inik reh i Moisés ruuk' i loq'laj rajaawriik, re' reh xch'aqwik pan yejaal i palaw noq xik'ik ar i rutinamiit, reh chi xkahnik rib'iral chi juneliik.¹³Re' wo' reh xtoob'inik keh i rutinamiit chi ma' xiq'ehb'ik taj noq xik'ik pan palaw. Eh xa je' chik kowiil kib'ehik i kawáyu chupaam i ye'aab' chiq yuuq' noq xik'ik ar.¹⁴Eh i ruSantolaj Uxlab'al i QaJaaw Dios xtoob'inik keh noq xa je' chik kiqajik qohoq wakax wach k'ixkaab'. Je' re' i xub'an reh chi xkahnik rib'iral i ruloq'il chi juneliik i rub'ihnaal. Re' i tiij pahqb'al rotob'il i QaJaaw Dios¹⁵QaJaaw Dios kopan taxaaj pan aSantolaj ye'aab', qoh awilow chaloq. ¿Mi ma' intiib'ik chak'ux chi qilariik? ¿Chib'ih reet noq ma' qoh atoob'eej ruuk' awajaawriik? ¿Mi ma' rub'an chik re' chi nee naketelaaj qawach?¹⁶QaJaaw Dios, re' hat manlik QaJaaw atoob' ta re' i Abraham, i Israel ma' xkinab'eej ta cho qawach. Re' hoj qeht'al chi re' hat manlik ehchan qeh, eh re' wo' hat ti ko'linik cho qeh najtir q'iij.¹⁷QaJaaw Dios ¿Chib'ih reet noq i nayeew q'ab' chi naa qakanaam ab'eeh, eh chinkoowjiik i qanima reh chi ma' nee ta chik ti ponik pan naq'qawach? QaJaaw Dios qoh atoob'eej chaketelaaj kiwach amoso, je' wo' taqe i jar ch'uq chi aj Israel.¹⁸Re' taqe asantolaj tinamiit xama' najt ta wo' hoq xi wihik pan kitinamiit. Eh re' chik taqe ki-ixowanik qawach k'ahchi' keeb' chub'anariik i re' ma' re' chupaam i loq'laj apaat.¹⁹Re' hoj xoj kahnik chi xa je' qakab' i tinamit ma' jank'al ta na a'n i taaq'anik chinaah, xoj kahnik chi xa je' ma' jank'al ta i nq'orarik aab'ihnaal chi qaxilak.¹Yu'naak nee ta naq inateh chee taxaaj nee ta tiqajik cho wach ak'al, nee ta kik'uyu'jik i yuuq' chawach.²Eh je' ta naq rukab' i q'aaq' noq i ruk'at, i kaq k'iix, noq i rutz'aab'isaj i ha'. Chi je' re', nee naq inkiyeew runimaal awach i ki-ixowanik awach. Eh re' taqe i nimaq tinamit nee naq kiyo'jiik chawach.³Eh noq re' hoj ma' k'achi' ta naq quy-eem xa a'n chaloq taqe i sahchb'al k'uxliis, xat qajik cho pan taxaaj, re' taqe i yuuq' xik'uyu'jik pan kiye'aab' chawach.⁴Eh ma' jank'al ta nib'irjik, nilarik, chi wilik ta chik jino'q Dios chi je' rukab' i hat chi nee ta rub'an i sahchb'al k'uxliis kuuk' i kiye'em kik'ux ruuk'.⁵Eh re' hat imponik taqe chawach i kib'anik reh i holohik laj na'ojb'al chi suq kik'ux. Inki a'n aha' wilik inawaaj i hat. Xa re' la' quuk' i hoj k'achi' aajosq'iil, ruum k'ahchi'kooj chi mahk, xa najtir wo' cho q'iij titohq'ik qaq'etwachem. ¿Mi konee rub'an re' chi nee qoh ko'ljik?⁶Chi qunchelaal i hoj xoj qa ch'uwa'risaj qiib' re' korik inqa a'n noq inqaq'or je' rukab' i ch'uwa' wach itz'ihy. Eh re' i yiib' wach inqa a'n inq'eb'wik qeh, je' rukab' noq inq'ehb'ik i chiqiij laj xaq chee' ruum i teew, je' re' noq insahchik qawach i hoj.⁷Je' re' i k'achi' qak'ulum ruum ma' awach ta chik jino'q qeh inq'orik aab'ihnaal ni xata nqayeew qak'ux awuuk'. Ruum aj re' ma' qoh atoob'eej ta chik chaloq, eh xoj aq'eb' chi riij ak'ux ruum i qayiib' wach na'ojb'al.⁸Atoob' ta je' re' xa hat la' wo' QaJaaw yu'naak, eh xa hat wo' ehchan qeh. Re' hoj xa je' hoj ak'al xun chawach re' hat xatyej-anik reh re' wo' hat xatyej-anik qeh i hoj chi qunchelaal.⁹QaJaaw Dios, maa yeew tii chu'nchel aajosq'iil chi qanaah, ma' ta naq neenk'ulik cho panak'ux chi juneliik i qamahk. Neeta la' tiinaketelaaj qamahk ruum hoj aatinamiit.¹⁰Re' asantolaj tinamiit xsacharik wach, re' i aatinamiit Sión xkahnik chi xa je' chik rukab' i chiq yuuq'. Re' i Jerusaleem xkahnik chi xan tz'irik chik paam.¹¹Re' i santo laj ye'aab' xatkiloq'ej cho wii' i qamaam qati't xsacharik wach ruum ruuk' q'aaq'. Eh chu'nchel i q'e' naq holohaq wilkeeb' ar xsacharik chik kiwach kuum i aj ixowaal.¹²QaJaaw Dios ¿Mi ma' nee chik i qoh ako'leej re'? ¿Mi ma' nee chik i naaketelaaj qawach re'? ¿Mi konaa qak'ulum nik'-oq najtiil i ti' k'axik re'? Re' i QaJaaw Dios xuyeew taqe panti' k'axik i ma' kinimanik taj¹Re' Dios je' wili i xuq'or: Re' taqe i ma' jank'al ta kinkisik' xinkireq wo' hoq. Re' taqe i ma' jank'al ta inkiq'or i nub'ihnaal, je' wili i xnuq'or keh: Ayu' wilkiin taq cha toob'jiik, kinki.²Re' hin juneliik wo' naq xnuk'ul taqe wuuk' i tinamit ma' kinimanik ta weh, ojik inki a'n chupaam i yiib' wach b'eeh. Re' i kiyiib' wach kapeew i keh inki a'n³Re' i tinamit re' re' inkijosaj chee nujosq'iil ruum inkik'at i kimayiij chikiwach i tiyoox nah taq yuuq', eh inkik'at insensia chinaah i artaal tusuj xaan.⁴Eh kitzunaa' kiib' i muqulkeeb' wii' i kamnaq, eh ki-ik'ik aq'ab' chupaam i ye'aab' aha' ma' ki-ilarik ta wii'. Eh inkik'ux i tiwik ahq, inkuk'ej i riis i kitib'kaal i chikop ma' toob' ta chi k'uxarik.⁵Eh je' wili inkiq'or: Maa jil chaawiib' maa kinatz'a'j ruum wilik nuSantohiil, inki taqe. Re' keh inkiyeew nujosq'iil xa ch'i'k inki a'n je' kikab' i sib', xa je' kikab' i q'aaq' qoplik inik'ik q'iij.⁶Chu'nchel inki a'n re' re' tz'ihb'amaj rehtalil chi nuwach i hin, ma' jaruuj naa nukanaam chi je' re' korehtaal i nuq'aj wach keh je' rukab' i ruk'ul chi keh.⁷Re' hin naa taqe nuye'em chutojariik riij i kimahk, i ma' holohik taj xkian chaloq i kimaam kati't. Re' keh xkik'at i insensia chinaah taqe i yuuq', ruuk' i re' xkiyeew nujosq'iil. Re' hin peet naa wajlaam riij i kimahk kora'j naa nuq'ajam wach keh re', inki Dios.⁸Re' i QaJaaw Dios je' wili i xuq'or: Noq re' i uuva ma' k'isiin i riis ma' inkiq'eb' ta reje i tinamit. Je' wo' re' i naa nub'anam i hin k'axb'al keh i waj kamanoom, ma' naa ta nusacham wach chu'nchel i tinamit.⁹Re' hin naa nuk'ihaaxb'isam i riih rumaam i Jacob, i riih rumaam i Judá. Re' taqe re' naakipatiniik chupaam taqe i nuye'aab' naa nuye'em keh i nusik'im kiwach, ar naakipatiniik taqe i waj kamanoom.¹⁰Re' i nutinamiit kisik'wik weh re' i kitentzuun naakinujisam i wach k'ixkaab' Sarón. Eh re' i kiwakax ar naa kianam kiwa' wach k'ixkaab' Acor.¹¹Eh re' taq i hat i kinaq'eb' taq chi riij ak'ux insahchik taq panak'ux i nuSantolaj ye'aab'. Eh i nayeew taq i wi'k, i vino chuwach i Agad Imeni, re' inaq'or taq i hat chi rut'iosil i b'ehomal.¹²Xa re' la' xama' xta wo' taq i naa areqem, naa la' nuye'em q'ab' chi naa taq akanteesjiik ruuk' i q'aslaj ch'ihch'. Eh noq xnusik' naq taq awach xama' xawaaj ta wo' taq. Eh noq xat nuq'oreej naq taq xama' xinab'iraj ta wo' taq, re' la' chik taq i xa a'n i ma' inwaaj ta wach i hin, re' taq chik xasik' inyojwik nuk'ux i hin, inki i Dios.¹³Re' i QaJaaw Dios je' wili i xuq'or: Re' taqe i waj kamanoom juneliik naa ruwihiik kiwa' kihaa' ma' naa ta rukahniik chi ntz'irik kiwach. Eh re' taq i hat i ma' tinimanik ta taq weh naa taq akuyum awa' ahaa', naa taq akahniik pank'ixb'ilaal.¹⁴Re' taqe i waj kamanoom naa kianam kitz'uuy ruum i rusuqkiil kik'ux. Eh re' taq i hat naa taq awoq'iim naa ak'erem aachii' ruum ruti'kiil taq ak'ux ruum i ti' k'axik taq i naa ak'ulum.¹⁵Re' taqe i nusik'k'im kiwach naa taq kiq'orom aab'ihnaal chi pahqb'al reh i ti' k'axik i kimik chikinaah i tokoom. Eh re' taqe i waj kamanoom keh ak' laj b'ihnaal chik i naa nukojom keh.¹⁶Xa awach pa' i neerupahqaaj rutoob'jiik koruman chi weh i hin korik wach nuk'ux naa rupahqaam. Eh awach iraaj ruq'orom i korik koruman chi panub'ihnaal i hin naa ruq'orom. Re' taqe i ti' k'axik k'uluuj chaloq xik'ik chik, xsahchik chik panuk'ux chi jumpech. Re' ak' taxaaj, re' ak' wach ak'al¹⁷Re' hin naa nuyejaam jinaj i ak' taxaaj, jinaj i ak' wach ak'al. Re' i k'uluuj chaloq xik'ik chik, ma' jaruuj chik naa ruk'uliik panuk'ux.¹⁸Suuqb'oq taq ak'ux chi juneliik ruuk' i naa nuyejaam, ruum re' hin naa nuyejaam jinaj i ak' Jerusaleem naa nu nujisam chi rusuqkiil k'uxliis. Eh chu'nchel i naa kik'achariik ar naa ruwihiik rusuqkiil kik'ux.¹⁹Eh re' hin naa rusuqb'iik nuk'ux ruum i ak' Jerusaleem, eh naa rusuqb'iik nuk'ux chikiij i nutinamiit. Ruum ma' naa ta chik rib'irjiik i k'erej chi'is oq'ik.²⁰Ma' naa ta chik kikimiik i kore' xi-aasjik. Eh re' taqe i mama' winaq ma' naa ta kikimiik chi komajaa' i kihab'ul, awach i xkimik noq kore' wilik reh i jinaj siento haab' ko ak'un noq xkimik reje. Eh awach i xkimik reje chi komajaa' imponik i jinaj siento haab' re' re' q'e' i ru mahk.²¹Re' taqe aatinamiit noq naa kiyejaam kipaat re' wo' keh naakipatiniik ar. Eh re' chik i keh naa kib'aniik rusuqkiil i wach i ki uva.²²Eh ma' tokoom ta chik i naa rupatiniik pankipaat. Re' i kitik ma' tokoom ta chik naa rub'aniik rusuqkiil. Re' taqe i nutinamiit najt naa kik'achariik, je' najtiil ink'acharik i nimlaj chee', eh re' chik keh naa kib'aniik rusuqkiil i kikamaj.²³Eh ma' naa ta rojiik chi re' chi ma' re' i kikamaj, ma' naa ta kikimiik i kak'uun kixq'uun chi komajaa' i kihab'ul. Ruum re' taqe i tinamit re' re' nukuxisam taqe, je' wo' hoq i kiih kimaam.²⁴Noq komajaa' inkipahqaaj weh chib'ih jariik inkaaj, re' hin naa nuye'em keh. Eh noq komajaa' inkikohlaaj nuq'orob'jiik re' hin naa taqe b'iram.²⁵Re' taqe i xojb' jinaj naa kianam wii' kiwa' ruuk' taqe i tentzun. Re' kaq b'ahlam k'im chik i naa ruk'uxum re' ruuk' i ruk'ux i b'ooyax. Re' aaq' ak'al naa ruk'uxum, chupaam i santo laj ye'aab' Sión ma' jino'q i chikop naa ruk'uxwiik keh, inki Dios. Re' Dios naa ruq'atwiik i q'orik chinaah i tinamit¹Re' i QaJaaw Dios je' wili i xuq'or: Re' i taxaaj nuye'aab', re' i wach ak'al ye'aab' reh i wooq wilik. ¿Mi koruman re' chi nee taq inayejaa' jino'q i paat nu ihi'limb'aal? Eh ¿aha' wilik i ye'aab' naa nuhi'liik wii'?²¿Mi ma' re' wo' re' hin xinyej-anik reh chu'nchel i wilik noq xkitoq'aa' wihik? Re' hin i nuketelaaj kiwach taqe i neb'aa', taqe i ma' nimaq ta kiwach, re' taqe kiye'wik ruloq'il i nuq'oral.³Re' taqe i yiib' wach kina'ojb'al noq inkiyok' ralaq i b'ooyax chi kimayiij, je' naa kansanik kas kichaaq' inki a'n Eh noq inkiyok' ralaq i tentzun je' naa tz'i' inkiyok' ralaq. Eh noq inkiyeew chi kimayiij i wach i ki trigo je' naa rukik'eel ahq inkiyeew, noq inkik'at i insensia je' naaloq'inik tiyoox inki a'n⁴Re' hin naa nusik'im wach i ti' k'axik naa nuye'em chikinaah, re' ruuk' i naa kiyo'jiik ruum, ruum noq xnusik' naq kiwach xama' xinkinimaj ta wo' hoq, eh noq xnuq'o'reej naq taqe xama' xinkib'iraj ta wo' hoq. Eh re' chik xkian i ma' nwaaj ta wach i hin, re' chik i xkisik' wach inyojwik nuk'ux i hin, inki i Dios.

⁵Re' taq i hat i nayeew taq rajaawriik i ruq'oral chab'iraj taq i ruq'or i QaJaaw Dios chi je' wili: Re' taqe i ki-ixowanik taq awach wuum i hin, je' wili inkiq'or taq aweh: Re' ta naq taq aaWaJaaw nee ruyeew chee ruloq'il taq cha naah, inqaaj qilom chi suq taq ak'ux, inki taqe. Xa re' la' re' keh naa kikahniik chi se'lb'al taqe.⁶Re' i choqik imb'aan cho chupaam i tinamit, chupaam i rupaat i Dios. Re' reh chalik i rub'aan chuq'ajariik wach keh i ki-ixowanik taq awach inki a'n taq aweh.

⁷Re' i santo laj tinamit Sión je' rukab' ixoq chi jumehq'iil x-aasjik jinaj k'isa rak'uun, noq komajaa' i rutik'aa' i ruti'kiil.⁸¿Mi wilik re' ix-ib'irinik i x-ilwik reh chi naa ruk'ulariik taqe re'? ¿Mi neentahmik re' i tinamit chi jumehq'iil? ¿Mi wilik re' i tinamit xa ruuk' i jinaj q'iij neentahmik? Ma' chih taj xa re' la' re' i tinamit Sión xa chi jumehq'iil naa ruk'ihaaxb'iik.⁹Eh ¿Nik' wach noq ma' nee ta nuyeew q'ab' chi naa ruk'ihaaxb'iik? Ruum re' wo' hin kinye'wik q'ab' chi naa ruwihiik kak'uun kixq'uun, i aj Sión, inki i Dios.

¹⁰Eh nee ta naq insuuqb'ik taq ak'ux i hat ruuk' i tinamit Jerusaleem. Re' taq i tik'axwik reh, ti okoq taq pansuqkiil k'uxliis i xat oq'ik taq chi riij i tinamit re' re'.¹¹Re' i tinamit Jerusaleem naa taq kaat ruk'uxlaam, naa ruye'em taq rusuqkiil ak'ux, korehtaal inch'iklojik taq ak'ux.¹²Ruum re' QaJaaw Dios je' wili xuq'or: Re' hin naa nuye'em rusuqkiil taq ak'ux i hat taq aj Jerusaleem, chi je' jino'q rooq ha'. Re' i tinamit naakik'amaam taq chaaweh i kib'ehomal chi je' rukab' i nim ha', chi k'uxumb'al taq aweh naa taq kiq'unem awach je' rukab' imb'aan reh ha'lak'un.¹³Re' hin naa nuye'em rusuqkiil taq ak'ux, je' rukab' i rub'an i tuutb'ees noq i ruyeew rusuqkiil kik'ux taqe i rak'uun rixq'uun. Eh ar taq naa areqem rusuqkiil ak'ux Jerusaleem, inki.

¹⁴Eh noq naa taq awilom chi je' re', naa taq rusuuqb'iik ak'ux, naa rukowjiik taq ak'ux, je' rukab' i k'im xa rax chik wach. Re' i QaJaaw Dios neentoob'inik keh taqe i raj kamanoom. Eh naa ruye'em i rujosq'iil chikinaah i ki-ixowanik wach.¹⁵Re' i QaJaaw Dios yejal xaq q'aaq naa ruk'uliik iloq. Re' teew naa ruk'uliik iloq wii' xa je' chik rukab' i kareta reh q'aq'inik, xan qop chik noq naa ruchaliik rik'sam i rujosq'iil.¹⁶Xti korik chi re' i QaJaaw Dios ruuk' q'aaq', ruuk' ch'ihch' k'ulq'as, naa ruye'em taqe panti' k'axik i yiib' wach kina'ojb'al. Eh ma' k'isiin taqe i naa rukansam.

¹⁷Re' i QaJaaw Dios je' wili i xuq'or: Naa rusahchiik kiwach i wilik kisantohiil inkisaqb'isaj kiib', i kiloq'inik taqe reh i tiyoox, chupaam i ye'aab' uhtz'ub'. Eh taqe i kik'uxwik reh i kitib'kaal ahq, i kitib'kaal i ch'ooh, i ch'uwa' kiwach.

¹⁸Re' hin weht'al inkikapaaj, inki a'n Naa ruponiik i q'iij chi naa numolom kiwach i tokoom tinamit, reh reh wach kiq'orik wii'. Eh ar Jerusaleem naakilom chi re' hin wilik nuloq'il.¹⁹Re' hin naa nuye'em i ehtalil, re' i koxikahnik chi k'achalkeeb' naa nutaq'aam taqe reje chupaam taqe i tinamit wili: Tarsis, Lidia, Fut Tubal, Javán, re' taqe i kichol q'aq'inik ruuk' flecha, chupaam taqe i tinamit wilkeeb' chi chii' i palaw. Re' taqe i re' ma' kib'iram taj, ni xata kilom i nuloq'il. Eh re' chik i keh naa kiq'oriik rib'iral i nuloq'il chupaam taqe i tinamit.

²⁰Naakesam chaloq chupaam chu'nchel i tinamit taqe i re' ruuk' aatinamiit. Wilik i naa kichaliik pan kareta, rij kawáyu, rij b'uurux, riij cameyo. Chu'nchel i re' je' taqe jinaj mayiij chi weh noq naa kik'uliik iloq Jerusaleem. Eh chupaam i nuSantolaj ye'aab' naa kikahniik chi je' taqe ink'ohnik laj mayiij inkik'am chaloq taqe i aj Israel chupaam i kulk saq kipaam.²¹Eh chi kixilak re' wilik taqe i naa nusik'im kiwach chi k'amal b'eeh aj tiij, re' ruuk' taqe i aj Levíta, inki QaJaaw Dios.

²²Eh je' wo' chik wili i xuq'or: Nik' wach noq naa ruwihiik chi juneliik i ak' taxaaj, i ak' wach ak'al naa nutz'uhkrisam i hin je' wo' re' noq naa ruwihiik kik'achariik taqe awiih aamaam i hat, re' taq aab'ihnaal ma' jaruuj naa rusahchiik wach.

²³Rajlaal i ak' poh, eh rajlaal xamano chupaam i hi'limb'al q'iij naa ruchaliik kixuk'aam kiib' chi nuwach chu'nchel i tinamit.²⁴Eh re' i naa kichaliik re' re', naakilom chi tuch'ulkeeb' i kiti'jolal i ma' xinimanik ta weh. Eh re' kihaahil ma' jaruuj naa kikimiik, ma' jaruuj naa ruchuhpiik i kiq'aq'al, na' k'ularoq i re' xiik' naah ti'kiil chi keh i tinamit, inki i Dios.

Bible Society in Guatemala

https://app.library.bible/content/695aa4b9f902778f