Uown Lawt15
Mosi kowh meng
1Nami kung kowi dow CHAKRAMANG vüi maiawng Mosi hai Israeluüa tek meng khai.“CHAKRAMANG kiow hai ang natek meng kown,aia dow akraingma hai ransu-uüa kowi nowngta khai.Kawrnga hai aluk kowi kowh chowm miuüa kowi aia dow sata tui kowi pe tamirah khai.2CHAKRAMANG dow ang kowh kürra hai ang kowh meng chekhai,aiamat dow ang kowh lawng miia hai ang kowh Thurai chekhai.Aia dow apa kowh Thurai chekhai;aia kowh kraingra meng ang natek kown.3CHAKRAMANG dow tasen akiakma;aia kowh ming dow CHAKRAMANG chekhai.4Faraw kowh kawrnga kari dow sata tui kowi aia kuakah khai,Faraw kowh siphai hawmuüa kowi dow sata tui kowi aia kuakah khai.Faraw kowh lang kiak mih siphaiuüa dow sata Rik kowi tamir khai,amatni dow sata Rik kowi kowng bowk khai.5Amatni kowi dow abüpma mih tui limah khai;amatni dow huaklu iawng sata thing kowi nip büah khai.6“Aw CHAKRAMANG, en kowh hawmlawm bawng dow kür akraingma chekhai,en kowh hawmlawm bawng dow ransu-uüa kowi di-ah reng chekhai.7“En kowh kraingra akraingma mih hown kingküa en miuüa kowi dow en nowng sumta khai,en kowh kunmarau lün pluplup mih hown chahau kowi kowh maih kamah iawng amatni kowi kamah khai.8En nakawng hownia kowh kawli hown sata tui dow uang tahen khai;sata kowi kowh takling nurlur mih tui dow uang taklu bowk khai.Talowng phunglung mih tui maten dow tap iawng iowng hüah khai.9“Ransu-uüa tek mih, ‘Amatni kowi ang kawikrawiah kown,ang kowh saidawng howkla hanow amatni kowi ang nakrawi saiah kown.Amatni kowi dow ang krawi ia um kown taih;amatni kowh uanh dow ang naretah kown,naiawngün uanh hown apiawma ang nauowi kown,’ pakhai.10Nachenganchepaw en kowh li hown sata dow en hutah khai;sata tui dow amatni kowi mumta klum khai,amatni dow tui abüpma mih kowi khema iawng nip büah bowk khai.11“Aw CHAKRAMANG, akeng thuraiuüa pungmadawng kowi en iawng mih mia chow uowi?En iawng dow chimsaima mih hai akraingma mih amia chow uowi?Naiawng awdara uowima mih lup nachang kown mih kür mia kowh chow uowi?12En kowh hawmlawm bawng dow en parah khai,now anging kowh ransu-uüa kowi dow krawng iawnta bowk khai.13En kowh sakraura achur uowi dowi mih hown en maru-uüa kowi en lawngah khai,amatni kowi dow en matia kür hown en kowh arah chimsaima mih prakowi en kruila khai.14Naiawng en changah mih ta hanow akeng chenchapuüa lainowmma takrow hai chür khai:Filistinuüa dow kram lai bowt kowh sak chür klukluk towbowt,Edawmuüa kowh aluchowuüa dow lainowmma kram khai,Moabuüa kowh akürma miuüa dow takrow lai bowt kowh chürla kluk khai,Kanan pren kowi kowh maru maten dow kram lai bowt kowh rüp bowk khowk chekhai.16Aw CHAKRAMANG, akeng chenchapuüa dow lainowmma nakram kown,amatni pren hownia en lawngah mih maru-uüa taklen dowi mowr amatni dow nakram kown.En kowh bawng kür rakowi akeng chenchapuüa dow huaklu iawng nauowi phülü kown.Kramra dow amatni luk kowi tamum klum khowk chekhai,takrow takraira dow amatni luk kowi hing uowi hüah chekhai.17En kowh maru-uüa kowi dow en matia kowh hungh kowi en napawla kown;nami hungh kowi amatni kowi dow singh pawi iawng en nakowchowkah kown.Aw CHAKRAMANG, nami dow en kowh uowi rah chimsaima mih chekhai;nami dow en matia rut hown kowh en thawpah mih chekhai.18CHAKRAMANG dow chowngchowng saksakma nachowm mang reng kown,” pakhai.19Israeluüa dow sata dawnglang iawng akang khawngma mih bawn luk hown nowng powt bowk khai. Nachenganchepaw Faraw kowh kawrnga hai kawrnga kari hown kawrnga kowi kowh chowm miuüa kowi dow sata dawnglang kowi uowi khe CHAKRAMANG uang plan pawla pe sata tui khai.20Arawn kowh tuamow Miriam dow risi chekhai. Miriam dow dowkla sawkchow lowk hanow dowm plai khai, now masiuüa maten paw dowkla sawkchow lowk chi now aia kung tawi plai khai.21Now Miriam dow maiawng krui meng khai,“CHAKRAMANG kiow hai tek meng büa diah,aia dow akraingma hai ransu-uüa kowi nowngta khai.Kawrnga hawmh kowi dow sata tui kowi aia pe tamirah khai,kawrnga luk kowi kowh chowm miuüa kowi dow sata tui kowi aia pe limah khai,” pakhai.22Nami kung kowi dow sata Rik hownia Israeluüa kowi Mosi pawla khai bowt. Now amatni dow Sur pami süngrüp süngkangma kowi kowrik kowi büah khai. Nami süngrüp süngkangma kowi dow sum ni mowr krawi mang büah khai, nachepaw tawng re-e paw krum tui büah dowi chekhai.23Nami kung kowi dow Mara pape mih süngrüp süngkangma kowi kowting büah khai. Tawkchedow nakowi kowh tui mih akhakma rakowi nowng kham büah dowi chekhai. Naiawng rakowi nami arah ming dow Mara pahai chapah khai. (Mara pami auan dow akhakma pami chekhai).24Naiawng rakowi maru kawmuüa Mosi kowi kamcheah mih, “Khaleng dow tawng chow anging nakham bowt kown?” pakhai.25Nami laiklow rakowi Mosi mih CHAKRAMANG tut-e kowkar khai bowt. Now CHAKRAMANG dow Mosi kowi iu tüng pe singh pachap khai. Nami singh kre dow tui kowi Mosi kowkuakah khai, now tui dow akham iung khai bowt.CHAKRAMANG dow nakowi amatni kowi chaingah khai, now amatni kowi dow peah ana khai.26CHAKRAMANG tek pe mih, “Enni kowh CHAKRAMANG Thurai lai chün hai aia mik kowi iung iawng enni nauowi kown takla, now aia kowh ana pek sünta hai aia kowh rirow maten enni nachün kown takla. Nahanow Aigupta maru-uüa luk kowi kowh ang uang pawla pe mih rawka chap maten enni luk kowi ang nauang pawla enni kown nadowi. Enni kowh arau abau pe iung enni mih dow ang CHAKRAMANG chekhai,” pakhai.27Nami kung kowi amatni dow Elim pape mih arah kowi kowting büah khai. Nakowi dow tuikuam uowi laipre buk, now chekmarawng singh uowi 70 singh chekhai. Amatni dow nami tuikuam ria kowi khup tangbung büah khai.
The Seed Company