Luke22
1Mar Ƀăñ So Mau Pei, nai năn jêng Mar Găn Gao, mơñ trôh.2Băl khua mhŏ yang ram jêh iên khua tơ ti pơp bhiên jai juôi truông no di hên dơi lăm khư̆t Khua Yang, bơ yơng hên bhŭng băl uôn lan.3Jêh hư̆n Sa-tan mư̆t mŏng kăn Yu-đa, nêh nai năn jêng Ič-ka-ri-ôt, ju nau mŏng măt bar nau ƀing kna.4Jêh iên, jai jêh sak tŏng tuôm, kăn trông čhai ta băl khua mhŏ yang ram wăt khua gak hih ƀư̆n ta bruă kăn dơi jao Khua Yang ta hên.5Hên brơn ngăn jêh iên tŭ ư ăn prăk ta kăn.6Kăn dơn rŏk jêh iên juôi mông găl jao Khua Yang ta hên mŏng mông ngă măt băl uôn lan.7Jêh hư̆n trôh nar mar Sa Ƀăñ So Mau Pei, hư̆n jêng nar nai jrăng lăm khư̆t biêp kuôn Mar Găn Gao.8Khua Yang yua Pê-trôih jêh iên Yô-han sak, tơ tă: “Ăn sak prăp prê Mar Găn Gao ta băl băn, no di băn sông sa ju băk.”9Hên ngơi ta Khua Yang: “U ta tŭk Khua Yang khơñ hi prăp prê?”10Jêh hư̆n Khua Yang têh ta hên: “Iêt ho, jai pu me mư̆t mŏng uôn ram, ju nau nêh tlơ tlau duôl nhông dak jrăng tŏng tuôm pu me. Ăn sak băk nêh hư̆n mư̆t mŏng hih jêh kăn mư̆t hư̆n.11Jêh hư̆n pu me jrăng ngơi ta nêh tơm hih: ‘Khua Yang lup me: “U ta tŭk dŭ năč Khua Yang jrăng sa Mar Găn Gao ju băk băl ƀing kna Yang di?”’12Kăn jrăng tơ to ta pu me ju mlăm dŭ ram ĕh gŭk tal tŏng tê̆ jêh mau nư̆m pơp no ru. Ăn prăp pơp sông sa ta iên.”13Kơt iên, jai sak truông, hên so bruă trôh geh trip klăh di pơp Khua Yang jêh ngơi ta hên. Jêh hư̆n hên prăp prê ta Mar Găn Gao.14Jai trôh mông sông sa, Khua Yang gŭk ta jhưng, jêh iên băl ƀing kna gŭk ju băk Khua Yang ya.15Khua Yang ngơi ta hên: “Čang mơn ngăn, ăñ dơi sa Mar Găn Gao ho băk pu me luôr ta ăñ tŭ pơp knap.16Bơ yơng ăñ ngơi ta pu me, hư̆n jêng ngĭn ngăn ăñ jrăng so hôm wêh sa mar ho tăl trôh mông mar hư̆n dơi lăm jêh nơn mŏng uôn Yang Trôk.”17Jêh iên jai jêh sŏk kčok jêh iên lăh găl, Khua Yang ngơi: “Ăn sŏk kčok ho jêh iên tăm phă ndăng pu me.18Bơ yơng ăñ ngơi ta pu me, dŏng băh o ta măt, ngĭn ngăn ăñ so hôm wêh ñêt ple ño ho ôh, tăl trôh ta mông uôn Yang Trôk di trôh.”19Jêh iên jai jêh sŏk ƀăñ jêh iên lăh găl, Khua Yang phĭč jêh iên jao ta hên, ngơi: “Ho jêng săk jăn ăñ, yơng băh pu me hư̆n jao ăn. Ăn mhŏ pơp ho mŏng pơp kăh tôr ta ăñ.”20Ăt kơt iên ya ta kčok, jai jêh sa, Khua Yang ngơi: “Kčok ho jêng pơp tăm guôp mhei mŏng mham ăñ, jêng mham jêh tôh yơng băh pu me.21Ƀê̆ dăh, tŏ hư̆n, plang ti băl lhiăr ăñ gŭk ta jhưng ju băk ăñ.22Bơ yơng khă Kuôn Nêh sak hui si pơp jêh kčăh tŭ. Ƀê̆ dăh knap mñai ta nêh hư̆n, jêng yơng băh kăn, Khua Yang nai lhiăr jao!”23Hên dư̆ng tŏng nhan ndăng hên nêh tơm jêng nêh mhŏ klăh iên mŏng hên, jêng nêh jai khơñ mhŏ bruă hư̆n.24Kơt iên, mau pơp tŏng nhan ĕh dŏk mŏng mbar hên yơng ta nêh tơm jêng nêh ram hĭn mŏng hên.25Jêh hư̆n, Khua Yang ngơi ta hên: “Đơ băl mtao grăp čar yua pơp ktang kĕ kriê nai, jêh iên lĕ mơt nêh ñôt bôk uôn lan dơi ngơp jêng ‘nêh mhŏ bruă găl.’26Ƀê̆ dăh băl pu me so dơi mau kơt iên ôh. Mlih ta iên, nêh ram hĭn mŏng pu me ăn ñjêng ndrơm nêh ku êt hĭn, jêh iên nêh têk lăm ndrơm klăh di nêh đru bruă.27Bơ yơng nêh tơm ram hĭn, nêh gŭk sông mdăh nêh đru bruă? So lăh geh jêng nêh gŭk sông lăh? Ƀê̆ dăh ăñ gŭk mŏng mbar pu me ndrơm klăh di ju nau nêh đru bruă.28Ƀê̆ dăh pu me jêng nêh tuôm gŭk kjăp băk ăñ mŏng lĕ mơt pơp lông dlăng ăñ ji29Ăñ ăt ăn ta pu me, ndrơm klăh di Bap ăñ jêh ăn čar ta ăñ,30no di pu me dơi gŭk sông ñêt ju băk jhưng ăñ ji mŏng čar ăñ, jêh iên gŭk tŏng jhưng mtao phat dôih măt bar găp pôl I-sra-el di.31Wơ Si-môn, Si-môn, dlăng tŏ, Sa-tan khơñ prôh ghiêng me ndrơm klăh di ba mi.32Ƀê̆ dăh ăñ jêh kuôl dăn un ta me ru no di pơp đăo me tlĕh nga. Jêh iên me, jai jêh du plŏ ta kơi, ăn mhŏ ta ŏh mi me prăl ktang hĭn.”33Ƀê̆ dăh kăn ngơi ta Khua Yang: “Wơ Khua Yang, ăñ ƀuôn klă jrăng sak băk Khua Yang khă mư̆t war mdăh trôh tŭk khư̆t tŭ.”34Ƀê̆ dăh Khua Yang ngơi: “Wơ Pê-trôih, ăñ ngơi ta me, nar o iêr kuăng jrăng so ndrau luôr ta me khan ăñ pei dŏ.”35Khua Yang ngơi ta hên: “Jai ăñ yua pu me sak so dơi ñôt sut prăk, kdô, jep, so mau pơp pu me bhơi ƀă, geh ya?” Hên têh: “So bhơi ju mta pơp ôh.”36Jêh hư̆n Khua Yang ngơi ta hên: “Ƀê̆ dăh mông ho, nêh tơm mau sut prăk, ăn sŏk gơñ, jêh iên kdô ăt iên ya. Nêh tơm ñăm mau đao, ăn blŏ ao jhŭng tơm jêh iên ruôt.37Bơ yơng ăñ ngơi ta pu me klăh iêu pơp ngơi jêh čih ho jrăng dơi ñjêng nư̆k mŏng ăñ: ‘Jêh iên Kuôn Nêh nai ngơp ju băk ta băl tih djŏh.’ Bơ yơng ngĭn ngăn pơp čiêng ngơi ta ăñ jrăng dơi lăm jêh nư̆m.”38Jêh hư̆n, hên ngơi: “Wơ Khua Yang, dlăng ho, ta o mau bar mlăm pêh.” Khua Yang ngơi ta hên: “Kơt iên djăp ru.”39Jai jêh du băh iên, Khua Yang sak trôh yôk Ô-liu klăh di pơp mơng, bơ băl ƀing kna ăt sak gre Khua Yang ya.40Jai jêh trôh ta iên, Khua Yang ngơi ta hên: “Ăn kuôl dăn no di ơn ĕh lăč mŏng pơp mblơm.”41Khua Yang sak wăč băh tŭk hên năng ai jăng ju mlăm bôk mau, jêh iên čuôn krŭng mŏng sô̆, Khua Yang kuôl dăn,42klăh iêu: “Wơ Bap, ndă Bap khơñ, dăn sŏk lat kčok ho băh Kuôn. Khă iên tŭ, so hui pơp mĭn Kuôn, ƀê̆ dăh, dăn pơp Bap khơñ dơi ñjêng.”43[Ju nau nêh myang băh trôk lăm ƀlang ta măt Khua Yang, mbăč pơp ktang ta Khua Yang.44Mŏng mbar pơp knap mñai, Khua Yang kuôl dăn ktang ngăn, jêh iên dak hal Khua Yang ñjêng ndrơm blăh di mham ĕh lăč ta teh.]45Jai dŏk du băh tŭk kuôl dăn, Khua Yang sak trôh ta tŭk băl ƀing kna, Khua Yang so hên hôm bê̆ bơ yơng au nguôt nư̆ng.46Khua Yang ngơi ta hên: “Pơp mhŏ pu me bê̆? Ăn dŏk kuôl dăn gơñ, no di pu me tlĕh lăč mŏng pơp mblơm.”47Jăng jai Khua Yang hôm ngơi, dlăng tŏ, mau ju pôl nêh ŏk jêh iên nêh nai năn jêng Yu-đa, ju nau mŏng măt bar nau ƀing kna, lăm bôk băl hư̆n. Kăn sak mơñ Yang Yê-su no di čư̆m Khua Yang,48ƀê̆ dăh Yang Yê-su ngơi ta kăn: “Yu-đa, me lhiăr Kuôn Nêh ta pơp čư̆m lăh?”49Jăng jai băl nêh gŭk jư̆m dar Khua Yang gư̆t bruă jrăng trôh, hên lup: “Wơ Khua Yang, hi dơi yua pêh tăm pŭ ya?”50Ju nau mŏng băl hên srĕh dư̆k khua mhŏ yang ram, jêh iên srĕh tĕ tôr ju đăh ma kăn hư̆n.51Ƀê̆ dăh mông boh dơk, Yang Yê-su ngơi: “Bruă ho dŏng iên man ru!”. Jêh iên jai bi tŏng tôr hư̆n, Khua Yang lăm băh ta kăn.52Jêh hư̆n, Yang Yê-su ngơi ta băl nêh sak ñư̆p Khua Yang, hư̆n jêng băl khua mhŏ yang ram, băl khua ka han hih ƀư̆n, jêh iên băl khua u rañ, klăh iêu: “Pu me ñôt đao gưm jêh iên mŏng klăh di ñư̆p băl tlĕ lăh?53Grăp nar, jai ăñ gŭk băk pu me mŏng hih ƀư̆n, pơp mhŏ so pu me ñư̆p ăñ. Ƀê̆ dăh ho jêng mông pu me di jêh iên pơp myang ngo măng.”54Jêh hư̆n, jai jêh ñư̆p Khua Yang, hên đŏh jêh iên ndơp trôh hih khua mhŏ yang ram. Bơ Pê-trôih kăn hui gre Khua Yang băh wăč.55Mông phŏng iñ mŏng mbar nuông jŏng gung jêh iên gŭk ju băk, kăn Pê-trôih gŭk ju băk hên hư̆n ya.56Mông hư̆n, de dư̆k u ur hư̆n, jai so kăn jăng jai gŭk ta kêng pôih iñ jêh iên dlăng ngơ ngăñ ta kăn, de ngơi: “Kăn ho ăt ju băk ta nêh tŏ ya.”57Ƀê̆ dăh kăn khan, klăh iêu: “Wơ rôh, ăñ so tuôm gư̆t năl kăn hư̆n ƀă.”58Păh pê băh iên, mau ju nau nêh dơ dêh, jai so kăn, hư̆n ngơi: “Me ăt ting ju hên hư̆n ya.” Ƀê̆ dăh Pê-trôih lăh: “Wơ mi, so geh ăñ.”59Năng ai ju mông ta kơi, ju nau nêh dơ dêh mơh ngơi klăh iêu: “Geh ru me ho ăt gŭk ju băk kăn tŏ ya, bơ yơng me ăt jêng nêh Ga-li-lê.”60Ƀê̆ dăh Pê-trôih ngơi: “Wơ mi, so ăñ wơng năn pơp me ngơi hư̆n.” Mhăč rŏk, jăng jai hôm kăn ngơi, ju mlăm iêr kuăng ĕh ndrau.61Khua Yang wiêng dlăng ta Pê-trôih, jêh iên Pê-trôih kăh wơi hư̆t pơp ngơi Khua Yang di, hư̆n jêng pơp Khua Yang tuôm ngơi ta kăn gư̆t luôr: “Nar o, luôr ta iêr ndrau, me jrăng khan ăñ pei dŏ.”62Jêh iên jai jêh du ta ling, kăn ñim ta pơp srăč nư̆ng.63Lĕ mơt băl gak Khua Yang hên mưč hêr, pŭ bang Khua Yang.64Put măt Khua Yang, hên lup Khua Yang klăh iêu: “Ngơi pơp têh luôr gơñ! Nêh tơm jêng nêh pŭ me?”65Hên ngơi ta Khua Yang ŏk pơp lăm prêng dơ dêh ya.66Jăng jai ôi ưm, băl khua u rañ mŏng uôn lan, wăt băl khua mhŏ yang ram jêh iên băl khua tơ ti pơp bhiên, hên tăm ƀư̆n jêh iên hên ndơp Khua Yang trôh ta pôl phat dôih hên di,67ngơi: “Ndă me jêng Yang Tŏng Tlĕh, ăn têh ta hi.” Ƀê̆ dăh Khua Yang ngơi ta hên: “Ndă ăñ têh ta pu me, ngĭn ngăn pu me so tip ƀă;68jêh iên ndă ăñ lup, ngĭn ngăn pu me so thơp wêh lăh ya.69Ƀê̆ dăh băh o ta măt, Kuôn Nêh jrăng gŭk ju đăh ma Yang Trôk mau lĕ pơp myang.”70Mông hư̆n, lĕ mơt dŏng băl ĕh ngơi: “Kơt iên, me jêng Kuôn Yang Trôk lăh?” Jêh iên Khua Yang têh ta hên: “Pu me tơm ngơi klăh iên ăñ jêng Mtao hư̆n.”71Jêh iên hên ngơi: “Năn pơp hôm băl băn wêh juôi nêh lăm nư̆k? Bơ yơng jêh băn tŏng băh dơk kăn tơm ngơi.”
FAR EAST BROADCASTING COMPANY