Luke23
1Lĕ mơt băl ĕh dŏk tŏng tê̆, ndơp Khua Yang trôh ta Pi-lat.2Hên dư̆ng kčŭt Khua Yang, klăh iêu: “Hi so tlau ho lăm ƀlum uôn lan hi, ghă so ăn nai tôh jia ta Sê-sa, jêh iên kăn čŏng ngơp kăn tơm jêng Yang Tŏng Tlĕh, jêng mtao.”3Mông hư̆n, Pi-lat lup ksiêm Khua Yang, klăh iêu: “Geh ya me jêng Mtao uôn lan Yo Thaĭ?” Ƀê̆ dăh jai boh pơp kăn, Khua Yang ngơi: “Me tơm ngơi blăh iên.”4Jêh hư̆n, Pi-lat ngơi ta băl khua mhŏ yang ram wăt ta băl uôn lan: “So ăñ so ju mta pơp tih ôh mŏng kăn ho.”5Ƀê̆ dăh hên ăt lư̆k lư̆k ngơi, klăh iêu: “Kăn čhôl trôt uôn lan, tơ ti lăh grăp wăl Yu-đê, dŏng băh Ga-li-lê tăl trôh ta tŭk ho.”6Jai Pi-lat tŏng klăh iên, kăn lup Khua Yang geh ya me jêng nêh Ga-li-lê.7Jêh dơi gư̆t klă Khua Yang gŭk mŏng sô̆ pơp dơi kăn Hê-rôt, kăn lŏ jao Khua Yang ta Hê-rôt, mtao ho ăt jai gŭk ta Yê-ru-sa-lem mŏng nar hư̆n ya.8Jai Hê-rôt so Yang Yê-su, kăn čhô̆ brơn ngăn bơ yơng kăn khơñ tŏng tuôm Khua Yang băh yau ngăn ru, yơng tŏng pĕh ta Khua Yang, hư̆n yơh kăn čang mơn so ƀơn pơp ndrơh dơi mhŏ yơng băh Khua Yang.9Kơt iên, kăn lup Khua Yang mŏng ŏk pơp, ƀê̆ dăh Khua Yang so wêh têh ju mta pơp ta kăn ôh.10Bơ băl khua mhŏ yang ram jêh iên băl tơ ti pơp bhiên dŏk ta iên tăm pit kčŭt tih Khua Yang.11Jêh hư̆n lĕ Hê-rôt wăt ta ka han kăn di hêr mưč Khua Yang jêh iên jai jêh hêr mưč Khua Yang, lăm sŏh ao brông hăr ta Khua Yang, kăn lŏ wêh ndơp Khua Yang ta Pi-lat.12Mông hư̆n, lĕ Hê-rôt wăt ta Pi-lat hên ñjêng jôk kuăng ju băk mŏng nar hư̆n, bơ yơng luôr lak hên hôm mau pơp tăm hao nuih ndăng hên.13Jêh hư̆n, jai jêh Pi-lat tăm ƀư̆n băl khua mhŏ yang ram, băl khua mua jêh iên băl uôn lan,14kăn ngơi ta hên: “Pu me ndơp ta ăñ kăn ho ndrơm klăh di nêh lăm ƀlum uôn lan, jêh iên dlăng ho, jai jêh ăñ lup ksiêm kăn ta măt pu me, so ăñ so mŏng nêh ho mhŏ ju mta pơp tih hư̆n jêng pơp pu me kčŭt tăm dăng ta kăn.15Ƀê̆ dăh so mau băh gu ăñ ôh, Hê-rôt ăt so dơi so ya, bơ yơng mtao jêh lŏ jao hư̆t kăn ta hi, jêh iên dlăng ho, so mau ju mta bruă kăn mhŏ jêng năng khư̆t.16Bơ yơng kơt iên, jai jêh kmhal kăn, ăñ jrăng phưi.”17[Ƀê̆ dăh, mŏng grăp nar mar, kăn mau pơp krĕh phưi ju nau nêh mnă ta hên.]18Ƀê̆ dăh hên ju nuih nhăm ôr tĕh, klăh iêu: “Ăn yông kăn tŏng tê̆, jêh iên phưi Ƀa-ra-ƀa ta hi!”19Kăn ho jêng nêh nai nggruôn mŏng war mnă bơ yơng kăn tăm pŭ lăm rŭng răng mŏng uôn ram jêh iên yơng băh pơp tih lăm khư̆t nêh.20Mông hư̆n, Pi-lat wêh mñă hên ju dŏ hư̆t, bơ yơng khơñ phưi Yang Yê-su.21Ƀê̆ dăh hên ôr tĕh klăh iêu: “Ăn pŏng đĭn! Pŏng đĭn kăn ta jhi tăm kăng!”22Jêh hư̆n kăn lŏ wêh ngơi ta hên dŏ tal pei: “Yơng năn pơp djŏh ƀai jêh kăn ho mhŏ? So ăñ so ju mta pơp tih mŏng kăn năng khư̆t ôh. Hư̆n yơh, jêh kmhal, ăñ jrăng phưi kăn.”23Ƀê̆ dăh hên lư̆k lư̆k ôr tĕh khơñ ăn nai pŏng đĭn Khua Yang, jêh iên ôr tăl hên dơi.24Pi-lat ăn pơp kčăh dôih no di mhŏ hui si pơp khơñ hên.25Mông hư̆n, kăn phưi ju nau nêh nai nggruôn mŏng war yơng băh pơp tăm dăng jêh iên lăm khư̆t nêh, jêng nêh jêh hên dăn, ƀê̆ dăh kăn jao Yang Yê-su hui si pơp mĭn hên.26Mŏng mông nai ndơp Khua Yang sak, hên mhăl kăn Si-môn, ju nau nêh Si-ren tŏ, mhei trôh băh uôn tơm, hư̆n hên ăn jhi tăm kăng tŏng kăn no di tung hui gre kơi Yang Yê-su.27Ju pôl uôn lan ŏk ngăn sak gre Khua Yang, wăt ta băl u ur ôr ñim ta Khua Yang.28Ƀê̆ dăh jai wiêng dlăng ta hên, Yang Yê-su ngơi: “Wơ băl kuôn u ur Yê-ru-sa-lem, man ñim ta ăñ, ƀê̆ dăh, ăn ñim ta pu e tơm jêh iên ta ŏh kuôn pu e.29Bơ yơng dlăng ho, lĕ mơt nar jrăng trôh, ƀê̆ dăh mŏng grăp nar hư̆n, nai jrăng ngơi: ‘Găl jôn ta nêh ur nên, jêh iên ndư̆l so bă kuôn, wăt ta tŏh so ăn pu.’30Mông hư̆n, nai jrăng dư̆ng ngơi ta grăp dôn yôk jua. ‘Ăn dlưh geh tŏng hi,’ jêh iên ta grăp dôn yôk dlĕh, ‘ăn bư̆l lat hi.’31Bơ yơng ndă nai mhŏ kơt iên ta tơm jhi hôm lư̆t, đô̆ nă bruă jrăng trôh ta jhi ro?”32Mông hư̆n, bar nau nêh tih dơ dêh ăt nai ndơp no di tŭ pơp lăm khư̆t ju băk Khua Yang.33Jăng jai hên sak trôh ta tŭk nai năn jêng “Ndŏh Bôk,” hư̆n hên pŏng đĭn Khua Yang ta iên, ju băk ta bar nau nêh tih — ju nau đăh ma jêh iên ju nau đăh kiêu.34Jêh hư̆n hên tŏng đă no di phă ao Khua Yang.35Uôn lan dŏk ta iên kăp dlăng, bơ băl kĕ kriê hên ăt mưč hêr Khua Yang, klăh iêu: “Kăn tuôm lăm tlĕh nêh dêh, lơi kăn lăm tlĕh dêh kăn tơm, ndă di kăn jêng Mtao Tŏng Tlĕh Yang Trôk di, Mtao jêh Khua Yang săč ruăh.”36Băl ka han ăt hêr mưč Khua Yang, sak mơñ yăr dak srat ta Khua Yang,37jêh hư̆n ngơi: “Ndă me jêng Mtao uôn lan Yo Thaĭ hư̆n ăn me lăm tlĕh dêh me tơm yơh.”38Tŏng tê̆ ta bôk Khua Yang ăt mau ju mta pơp čih: “Ho jêng Mtao uôn lan Yo Thaĭ.”39Ju nau mŏng bar nau băl tih jai nai yông ta iên ăt hêr mưč Khua Yang, klăh iêu: “Me so geh jêng Yang Tŏng Tlĕh lăh? Ăn me lăm tlĕh me tơm wăt ta hi ƀă.”40Ƀê̆ dăh jai boh dơk, nêh tih ju đăh tŏ ôt kăn, kăn ngơi: “Me ăt so gư̆t bhŭng Yang Trôk jai me tŭ ju băk ƀơn pơp kmhal lăh?41Bơ băn klăh iêu jêng geh ru, bơ yơng băn sŏk dơn geh năng ta bruă băn tuôm mhŏ. Ƀê̆ dăh nêh ho so tuôm mhŏ tih ju mta pơp nơn.”42Jêh hư̆n kăn dăn: “Wơ Yê-su, jăng jai Khua Yang mư̆t mŏng čar Yang di, dăn kăh tôr ta ăñ ƀă.”43Khua Yang ngơi ta kăn: “Ngĭn ngăn, ăñ ngơi ta me, nar o me jrăng gŭk băk ăñ mŏng Pa-ra-đi.”44Mông hư̆n năng ai mŏng mông tal pro ru, ƀê̆ dăh pơp ngo măng trôh ĕh guôm lĕ čar tăl trôh mông tal sư̆n.45Măt nar so hôm ĕh đang. Bơ dhiêm ram mŏng hih ƀư̆n ĕh čriêk ñjêng bar.46Jai jêh ôr tĕh dơk, Yang Yê-su ngơi: “Wơ Bap, Kuôn jao ngăt nhuôl Kuôn mŏng ti Bap.” Jêh hư̆n, jêh ngơi lĕ pơp ho, Khua Yang tôč nhăm.47Mông hư̆n, jai jêh khua ka han so bruă trôh klăh iên, kăn nơ nei Yang Trôk, klăh iêu: “Nêh ho yŏng ngăn jêng nêh kpă.”48Lĕ pôl uôn lan ŏk tăm ƀư̆n bơ yơng pơp lăm khư̆t ho hên so lĕ mơt bruă trôh, hư̆n hên tư̆r nuih du hih.49Bơ lĕ mơt nêh gư̆t năl Khua Yang wăt ta băl u ur gre Khua Yang băh Ga-li-lê, hên dŏk băh wăč ksiêm dlăng grăp bruă hư̆n.50Tŏ hư̆n, ju nau nêh năn Yô-sep, jêng nêh mŏng pôl phat dôih, jêng nêh găl jêh iên kpă,51(kăn so tuôm tŭ ư ju băk pôl phat dôih wăt ta bruă hên mhŏ) kăn jêng nêh uôn A-ri-ma-thê, ju čăm uôn ram băl Yo Thaĭ di, jêng nêh kăp găn uôn Yang Trôk.52Jai sak tŏng tuôm ta Pi-lat, kăn dăn săk jăn khư̆t Yang Yê-su.53Jêh hư̆n jai jêh lăm jư̆r săk Khua Yang mŏng sô̆, kăn put săk khư̆t ta dhiêm nhơ, jêh iên tăp bư̆l ĕh mŏng tu môč nai phat mŏng bôk mau, tŭk hư̆n ñăm tuôm mau nai tăp bư̆l nêh ôh.54Năng hư̆n jêng nar Prăp Prê, jêh iên nar Sa-ƀat mơñ trôh.55Mông hư̆n, băl u ur, jêng nêh krĕh sak băk Khua Yang dŏng băh Ga-li-lê, jai sak gre băh kơi, hên so tu môč jêh iên đô̆ nă nai lăm bê̆ săk khư̆t Khua Yang.56Jêh hư̆n jêh du hih, hên prăp prê dak gư̆n jêh iên dak ƀau kăh.
Trôh nar Sa-ƀat, hên mdei hui si pơp bhiên.
Trôh nar Sa-ƀat, hên mdei hui si pơp bhiên.
FAR EAST BROADCASTING COMPANY