Иов5
1Тылат вашмутым пуышо уло гын, ӱжын кычкыре.Кӧм тый святой-влак кокла гыч полшаш йодат?2Шонен моштыдымо еҥым шыдыже кошарта,ораде айдемым чытен кертдымашыже пытара.3Мый шке ужынам, кузе ораде еҥ вияҥеш,но тудын пӧртшӧ кенета каргыме лиеш.4Тудын йочаже-влакым нигӧ ок арале,ола капка воктене нуным шыгыремдылаш тӱҥалыт,пыдал налше нигӧ огеш лий.5Шужен илыше еҥ тудын шурнылектышыжым кочкеш,эсогыл иман вондер кокла гыч тудым поген налеш,незер-влак тудын погыжым наҥгаят.6Тыгеракын, пурак гыч ок шоч ойго,мланде гыч шытен ок лек азап –7кузе тулойып кӱшкӧ чоҥешташ шочеш,туге айдеме орлык ден пашалан шочеш.8Тыйын олмышто мый Юмо дек савырнем ыле,шке пашам Тудлан кучыктем ыле,9вет Тудо кугу, умылаш лийдыме паша-влакым ышта –нуным шотлен пытараш ок лий.10Тудо мландылан йӱрым пуа,пасулашке вӱдым колта,11пызырналтше еҥым кӱш нӧлталеш,ойганыше еҥым утара.12Тудо осал чоя-влакын шонымашыштым шалата –шонен пыштымыштым нуно огыт шукто.13Ушан-влакым Тудо чоялыкышт дене куча,осал чоя-влакын шонен пыштымышт ярашке лектеш:14кечывал кечын нунылан пычкемыш лиешда кечывал рӱдын нуно йӱдым коштмо семын кидшӱма коштыт.15А йорлым Тудо керде деч,виян-влакын умша ден кидышт деч утара.16Незер еҥынат уло ӱшанже,а осалым ыштыше умшажым петыра.17Пиалан тудо еҥ, кӧм Юмо шылтален туныкта!Чылакучышын наказатлымыжым ит шӱкал:18Тудо сусырта, но Шкеак сусырым пидеш,Тудо пера, но Тудынак кидше паремда.19Куд азап деч тыйым утара,шымше азапат тый декет ок тӱкнӧ.20Шужен ий годым тыйым колымаш деч утара,сарыште керде деч арален кода.21Осал йылме деч тый саклыме лият,туткар толмеке, тудын деч от лӱд.22Туткар ден шужымашлан тый воштылат гына,ир янлык-влак дечын от лӱд,23вет пасусо кӱ-влак дене ушемыште лият,ир янлык-шамыч дене келшен илаш тӱҥалат.24Тый палет: омашет дек лӱдыкшӧ ок лишем,шке суртетым ончен лектат – нимат йомын огыл.25Тый ужат: шочшет тыйын шуко,тукымет олыкысо шудо наре лиеш.26Тый шкежат, кужу ӱмырым илен,шке жапыштыже поген оптымо шыдаҥ кылта семын шӱгарыш возат.27Теве мом ме шымлен рашемдышна, да чыла тиде чын.Колышт да ушышкет тидым пыште».
Institute for Bible Translation, Finland