Лекм7
1Но Господь Моисейлан каласен: «Ончо, Мый тыге ыштем: тый фараонлан Юмо семын лият, а Аарон изат тыйын пророкет лиеш.2Израиль эрге-влакым фараон шке мландыж гыч колтыжо манын, Мый мом кӱштем, тый чылажымат Ааронлан ойлаш тӱҥалат. А тудо, тыйын изат, тидым фараонлан ойла.3Но Мый фараонын шӱм-чонжым вустыкым ыштем. Египет мландыште шуко палдарыше пале ден ӧрыктарыше пашам ончыктем гынат,4фараон тендам огеш колышт. Тунам Мый Египет ваштареш шке кидем нӧлталам. Мый шке еҥ-влакем, шке калыкем – Израиль эрге-влакым – Египетыш тӱрлӧ орлыкым колтымо дене ты мланде гыч луктам.5Кунам Мый Египет ваштареш шке кидем нӧлталам да Израиль эрге-влакым нунын кокла гыч луктам, тунам [уло] египет калык пален налеш: Мый Господь улам».6Господь кузе кӱштен, Моисей ден Аарон тугак ыштеныт.7Кунам нуно фараонлан ойлаш тӱҥалыныт, Моисейлан кандашле ий, Аарон [изажлан] кандашле кум ий лийын.8Господь Моисей ден Ааронлан кӱштен каласен:9«Фараон [палдарыше палым але] ӧрыктарыше пашам ышташ йодеш гын, тый Аарон [изатлан] пондыжым фараон [да тарзыж-влак] ончылно [мландыш] кудалташ каласе – тунам пондо кишкыш савырна».10Моисей ден Аарон фараон [да тудын тарзыж-влак] деке миеныт да Господь кӱштымӧ семынак ыштеныт. Аарон пондыжым фараон да тудын тарзыж-влак ончылно кудалтен – тудыжо кишкыш савырнен.11Фараон [Египетысе] мунлыеҥ ден юлышо-влакым ӱжын, нине юзо-влакат шке ю вийышт дене тыгак ыштеныт.12Нунын кокла гыч кажныже шке пондыжым кудалтен – нунышт кишкыш савырненыт. Но Ааронын пондыжо нунын пондыштым нелын колтен.13Фараонын шӱм-чонжо вустыкак кодын, да тудо, Господьын ойлымыж семынак, Моисей ден Аароным колыштын огыл.14Господь Моисейлан каласен: «Фараон пеш ӱскырт. Тудо калыкым ынеж колто.15Эрла тый фараон деке кае. Кунам тудо эҥер деке лектеш, тый тудын корныштыжо эҥер сереш шогал, кидыштет кишкыш савырныше пондет лийже.16Тый тудлан каласе: ”Мыйым Господь, еврей-влакын Юмышт, тыланет каласаш колтен: калыкемым Мыланем кумалаш ир мландыш колто. Тидым тый але мартеат шуктен отыл.17Тыге Господь ойла: Мыйын Господь улмем тый тышечын пален налат – Мый кидыштем улшо пондо дене эҥерым перем, да вӱд вӱрышкӧ савырна.18Эҥерыште кол колен пыта, вӱд шакшын ӱпшаш тӱҥалеш да египет калыклан йӱаш йӧрдымӧ лиеш”».19Господь Моисейлан каласен: «Аарон [изатлан] каласе: тек тудо пондыжым налеш да кидшым Египет вӱдла деке – эҥер, йогын, пӱя-влак да вӱд улмо моло верла деке – шуялта. Тыге уло вӱд вӱрышкӧ савырна да Египетыште чыла вереат, тыгодымак пу ден кӱ атыштат, вӱр лиеш».20Моисей ден Аарон Господьын каласымыж семынак ыштеныт. Аарон пондыжым нӧлталын да фараон ден тудын тарзыж-влак ончылно Нил эҥерым перен – уло вӱд вӱрышкӧ савырнен.21Эҥерыште улшо кол колен пытен, вӱд шакшын ӱпшаш тӱҥалын, да египтян-влак тушеч вӱдым йӱын кертын огытыл. Египет мландыште чыла вере вӱр лийын.22Египетысе юзо-влакат шке ю вийышт дене тыгак ыштеныт, да фараонын шӱм-чонжо ӱскыртак кодын. Тудо, Господьын ойлымыж семынак, Моисей ден Аароным колыштын огыл.23Фараон савырнен да пӧртышкыжӧ каен – мо лийме тудлан садак лийын.24Йӱшаш вӱдым муаш шонен, египтян-влак эҥер воктене мландым кӱнчаш тӱҥалыныт – вет эҥер вӱдым нуно йӱын кертын огытыл.25Господьын эҥерым тӱнчыктарымыж деч вара шым кече эртен.
Institute for Bible Translation, Finland