Лекм6
1Господь Моисейлан каласен: «Мом Мый фараон дене ыштем, тый ынде ужат. Мыйын виян кидемлан кӧра тудо калыкым колта, нуным шке мландыж гыч эсогыл поктен луктеш».2Юмо Моисейлан ойлен: «Мый Господь улам.3Мый Авраамлан, Исааклан да Иаковлан ”Чылакертше Юмо” лӱм дене конченам. А Господь лӱмем Мый нунылан почын омыл.4Ханаан мландым пуаш манын, Мый нунын дене ойпидышым ыштенам – туштыжо нуно йотъеҥ семын иленыт.5Мый Израиль эрге-влакын йӧсын кычкырымыштым кольым: нуным египтян-влак куллыкышто кучат, да Мый шке ойпидышем шарналтышым.6Сандене Израиль эрге-влаклан каласе: Мый Господь улам. Тендам Мый египет еҥ-влакын кепшылышт гыч луктам, куллык деч утарем. Виян кидем дене, египтян-влаклан тӱрлӧ неле орлыкым колтымо дене тендам Мый эрыкыш луктам.7Тендам Мый шке калыкем ыштем да тендан Юмыда лиям. Тунам те пален налыда: Мый Господь, тендан Юмыда, улам, тендам [Египет мланде гыч,] Египетын кепшылже гыч луктынам.8Мый тендам Авраамлан, Исааклан да Иаковлан пуаш сӧрымӧ мландыш намиен пуртем, тидым ышташ Мый кидем нӧлталын товатленам. Тендам Мый тиде мландылан озам ыштем. Мый Господь улам».9Моисей нине мутым израиль эрге-влаклан каласен, но кумылышт волымылан да неле пашаштлан кӧра нунышт тудым колышташат тӱҥалын огытыл.10Господь Моисейлан тыге каласен:11«Кай фараон деке, Египетын кугыжаж деке, да каласе: тек тудо израиль эрге-влакым шке мландыж гыч луктын колта».12Господь ончылно Моисей каласен: «Израиль эрге-влакат мыйым огыт колышт гын, фараонжо мыйым кузе колыштеш? Мый кутырен моштышо омыл».13Но Господь Моисей ден Ааронлан израиль эрге-влак да фараон, Египетысе кугыжа, деке каяш да израиль эрге-влакым Египет гыч лукташ кӱштен.14Теве израиль эрге-влакын тукымвуйышт: Израильын Рувим кугэргыжын эргыже-влак: Ханох ден Фаллу, Хецрон ден Харми – тиде Рувимын тукым-ешыже.15Симеонын эргыж-влак: Иемуил, Иамин, Огад, Яхин, Цохар да хананей ӱдырамашын Саул эргыже – тиде Симеонын тукым-ешыже.16Теве Левий эрге-влакын лӱмышт да урлыкышт: Гирсон, Кааф, Мерари. Левий шӱдӧ кумло шым ий илен.17Гирсонын эргыж-влак: Ливни ден Шимей шке тукым-ешышт дене.18Каафын эргыж-влак: Амрам, Ицгар, Хеврон да Узиил. Кааф шӱдӧ кумло кум ий илен.19Мерарин эргыж-влак: Махли ден Муши. Тиде Левийын тукым-ешыже да урлыкшо.20Амрам шке ачажын Иохаведа шӱжаржым марлан налын. Тудо Аарон ден Моисейым [да нунын Мариам акаштым] ыштен. Амрам шӱдӧ кумло шым ий илен.21Ицгарын эргыж-влак: Корей, Нефек да Зихри.22Узиилын эргыж-влак: Мисаил, Елцафан да Сифри.23Аарон Елисаветам, Аминадавын ӱдыржым, Наассонын шӱжаржым, марлан налын. Тудо Надав ден Авиудым, Елеазар ден Ифамарым ыштен.24Корейын эргыж-влак: Асир, Елкана да Авиасаф – тиде Корейын тукым-ешыже.25Ааронын Елеазар эргыже Футиилын ик ӱдыржым марлан налын. Тудо Финеесым ыштен. Теве Левийын тукымвуйышт да нунын урлыкышт.26Тиде Аарон ден Моисейлан Господь каласен: «Израиль эрге-влакым тукымышт дене, тӱшкан-тӱшкан, Египет мланде гыч лукса».27Нунак Египет мланде гыч Израиль эрге-влакым лукмо нерген фараонлан, Египет кугыжалан, ойленыт. Нине еҥ Моисей ден Аарон лийыныт.28Египет мландыште Моисейлан ойлымыж годым29Господь каласен: «Мый Господь улам! Мом Мый тыланет ойлем, тый чылажымат фараонлан, Египет кугыжалан, каласе».30Но Моисей Господьлан вашештен: «Мый кутырен ом мошто. Кузе мыйым фараонжо колыштеш?»
Institute for Bible Translation, Finland