2 SAMUEL1

Saul te Jonathan elang David A Rah

1Saul a chih koute, David nynh Amalek hae kha tae hae zah he yn ki te, David tuh Ziklag khua kya nin ning a um.2Nin thumnaw nin khe, ccungccapaw lu kheit tuh a boeining seiikute, a lu vawlan vuiping phingkute Saul a ryahmin kyate yn thua. David kya he a thua te, laekhu kya bakhung zah sawtuanaw a pya.3David nynh amaw kha, “Tei langte mou nae thua?” cite a khia. Aning nynh, “Israel hae ryahmin kyate nynh kae ccue,” a cipya.4David nynh amaw kha, “Pawtemou athua? Yn hopya tua!” a cipya. Aning nynh, “Israel rhawkaw hae tuh rhawtuknaw kyate a ccue hae, rhawkaw patae tuh khuliakuh hae zah a chih hae; Saul te a ccapaw Jonathan mah a chih hae,” a cipya.5David nynh a hopahtupaw ccangvaepaw kyakhe, “Saul te a ccapaw Jonathan a chi hae paw tuh pawtemou na ny?” cite a khia.6A hopahtupaw ccangvaepaw nynh, “Gilboa Mua vawlan ka la um lyate tungkuh zah, Saul tuh a ccoi kya a ngeiku lyakhe, marangle hae te marang rhawkaw hae tuh a kalan oun naekuh vae hae.7Saul nynh a nulang he a do tuh, kae kha yn muih zah yn ko. Kae nynh, ‘E kya mang ka um, bawipaw,’ ka cipya.8Aning nynh kae kha, ‘Hummou na thua?’ cite yn khia zah, kae nynh, ‘Amalek paw nynh ka thua,’ cite ka khung.9Saul nynh, ‘Rang, ka pe thadyn lah, yn theih; pawccecize vaemaw myarya ccih lan ka mue zah reih-i-reih-ae phang ka hiin ung,’ yn cipya.10Tukeiccuze a pe ka thadyn zah ka chia, pawccecize a khuliakuh koute tuh hiin kho vae lan khyh cipaw ka ny. A lu kya umpaw bawilukhung te a kuihnyng kya umpaw khawccan kha ka lah zah, hynhlang ka bawipaw kalan kae thuakhae,” a cipya.
11Tetuh David nynh amaw boeining kha kyng zah a seiiku; a kya um hae paw balyn nynh tuhcite a cyibua hae.12Saul, a ccapaw Jonathan, Bawipaw rhawkaw hae te Israel hae tuh thaloi te a chi hae keiccuze minmin elang zete cia rah hae zah looh-ae a sung hae.13David nynh a hopahpaw ccangvaepaw kha, “Tei langte mou nae thua?” cite a khia. Aning nynh, “Kae tuh Amalek paw, ramccangpaw ccapaw nynh ka thua,” a cipya.14David nynh amaw kha, “Bawipaw nynh chitui thuhpaw kha chia khylan na kuih hangnua lanpaw kha na rih khyh tou?” a cipya.15Tetuh David nynh ccangvaepaw lu kheit kha ko zah, “Hynhlang yn cceih lah, aning hynh theih,” a cipya. Tukeiccuze aning nynh tuh-e paw tuh theih zah a chih.16David nynh, “Na chiise tuh na lu vawlan um sah; pawccecize, ‘Bawipaw nynh chitui thuhpaw kha ka chia vae,’ cite namaw mung ccaccei nynh ccaekia a khangku vae,” a cipya.
17David nynh Saul te a ccapaw Jonathan kha hynh-e rawnaw hlaw hynh a phua hae.18(Judah hae kyakhe hynh-e hlaw hynh ccangpya athua cih, cite kaw a tho; tuh-e tuh Jashar Ccauh kya zei athua.) David nynh:19Pou Israel, na phu-enaw khaahangpaw na hmin haevawlan khe chia athua vae!Mih thawsae hae paw tuhphe chih vae hae ccarei!20Tuh-e kong tuh Gath khua kyaho nan oh,Ashkelon khua laanpi hae kya mahho nan oh;tuhkhyhze tuh Filistin ccanung hae tuhmih lungpawsei cih,vingdungawkuh lei hae pawmih ccanung hae tuhmih lungtuasei cih.
21Pou Gilboa mua hae,nae vawlan kya dangtuiccah nan sah,khuaa mah rah nan sah,looh patae voipaw loo mahum nan sah!Pawccecize tuin kyakhemih thawsae hae paw kya-ekhawriaphua tuh a nungsikuh vae,Saul a khawriaphua tuhchitui thuh thua vae khyh.
22Chia athuapaw ccungccaw haechiise kyate thuasah,mih thawsae hae paw thokyate thuasah,Jonathan li tuh nulangki hang khyh zah,Saul thaloi tuh a ccakaeteki hang khyh.
23Saul te Jonathan,sungsakuh hae zahsungsah lan a um hae!Hiinnaw kya thuasah,chinaw kya thuasahphiakuh khyh hae;minmin tuh mosipi laezeranghua hae zah,chindeih laeze mih thawsaehua.
24Pou Israel ccanung hae,Saul hanlan rawtua oh,aning nynh apuithyapawboei sepaw khaae zingsah oh zah,nae boeining khaccaannawpaw sui teae ccaanpya oh.
25Mih rawthungpawrhawkaw hae tuhrhawtukku cciamang lyaa khuliakuh vae hae!Jonathan tuh ahangpawna hmin hae kya a chia vae hae.26Ka neitaw Jonathan,nang na hanlan ka ngaethah;nang tuh myarya kae sungsahpaw nynhna thua;nae sungsahnaw tuhngaeangthua lan um zah,nopi hae sungsahnaw po alawe.
27Mih rawthung hae paw tuha chih vae hae,rhawtuknawpaw zunghe hae tuharoh vae hae! a ci.Judah Siapharan lang David A Tang
1Tukoute David nynh Bawipaw kha, “Judah ram e khua khuakhakheit kalan ka cceihthung cih tou?” cite a khia. Bawipaw nynh amaw kha, “Cceihthung” a cipya. David nynh, “Tei khua lang mou ka cceihthung cih?” a cipya. Aning nynh, “Hebron khua lang,” a cipya.2Tukeiccuze David tuh tuin khua langkhe a zu hae lu ning, Jezreel khuanung Ahinoam te Nabal nynh a chitawpaw nomaenung, Karmel khuanung Abigail ryte a cceihthung hae.3David nynh a kya um hae paw kha mih innbyn raveih ryte cciakhae thung hae zah, Hebron khua pe umpaw khua hae kyakhe a um hae.4Te Judah ccungccaw hae tuh oun thua hae zah, tuin kyakhe David kha Judah siapharan lang chitui a thuh hae.
“Jabesh-gilead khuaccaaw hae nynh Saul rhua kha a uu hae,” cite David kha he a hopah hae te,5David nynh Jabesh-gilead khuaccaaw hae kalan khe locceihtu hae kha saw hae zah, “Nanning nynh nae bawipaw Saul tungvaw kya lungzinaw na langsakuh oh zah a rhua kha na uu oh keiccuze Bawipaw nynh hythua ae pya vae oh sah!6Bawipaw nynh nae tungvaw kya atynpaw sungsahnaw te lungzinaw kha langsakuh vae sah! E rya hynh na law oh keiccuze kae nynh mah nae tungvaw hoynaw ka rae cih.7Tukeiccuze nae thawsae sah lah, nae rawthung sah; pawccecize nae bawipaw Saul tuh chih vae zah Judah hae nynh kae hynh siapharan lang chitui yn thuh vae hae,” cite bya a taw hae. Ishbaal Israel Siapharan lang Tangnaw
8Thuasalama Ner ccapaw Abner, Saul a rhawbawipaw nynh Saul ccapaw Ishbaal kha ko zah Mahanaim khua lang a cciakhae.9Abner nynh Ishbaal kha Gilead, Ashur, Jezreel, Efraim, Benjamin te Israel ram balyn kha a uktupaw siapharan lang a khang.10Saul ccapaw Ishbaal nynh Israel ram a uk takaw lya tuh kum sung pali acih vae, aning nynh kum ning a uk. Thuasalama Judah hae nynh tuh David kha a zui hae.11David tuh Hebron khua kya siapharan lang um zah Judah hae a uk ccyh tuh kum sari te sah taruh acih vae. Gibeon Rhawtuknaw
12Ner ccapaw Abner te Saul ccapaw Ishbaal a ryalahtu hae tuh Mahanaim khua kyate Gibeon khua lang a cceih hae.13Zeruiah ccapaw Joab te David a ryalahtu hae tuh cceih hae zah minmin ryte Gibeon tuili pe khe a tungkuh hae. Phu kheit tuh tuili voikheit lang raw kya haung hae zah ccangpaw phu kheit tuh tuili voikheih lang raw kya a haung hae.14Abner nynh Joab kha, “Ccangvae hae tuh malang pou hae sah lah, aening malang hin zuepaw taekuh hae sah,” a cipya. Joab nynh, “Ou, malang pou hae sah,” a ci.15Tukeiccuze malang pou hae zah a ccia lya hae khe a ria hae, Benjamin phin te Saul ccapaw Ishbaal hanlan lu haw lae ning pou hae zah, David a ryalahtu hae mah lu haw lae ning a pou hae.16Lu kheit cci nynh amaw a rhawpaw kha a lu te kyng zah a naw kha thaloi te a thuing; tukeiccuze pynkheihlan a khuliakuh hae. Tukeiccuze tuh-e hmin tuh Helkath-hazzumrim cite ko hae zah Gibeon kya a um.17Tuin nin kya thawte rhaw a tukkuh hae; David a ryalahtu hae nynh Abner te Israel hae kha a tae hae.
18Zeruiah ccapaw hae lu thum, Joab, Abishai te Asahel tuh tuin kya a umbua hae. Asahel tuh ramkaw e sazuh hawte a liazaw.19Asahel nynh Abner kha voilang ranglang maeku leite a dee.20Tetuh Abner nynh nulang do zah, “Asahel tou na thua?” cite a khia. Aning nynh, “Ou, ka thua,” cite a khung.21Abner nynh amaw kha, “Na voilang khyhze na ranglang maekuh lah, ccangvae lukhakheit kha kyngte a uccaw kha luade tua,” a cipya. Thuasalama Asahel nynh ccanglang maeku leite amaw kha a deehui.22Abner nynh Asahel kha, “Nae deehuinaw kyate ccanglang maekuh; pawccemou nang kha laekhu kya kae khulia cih? Na upaw Joab malang khe pawtemou ka mae ka langsakuh ngan cih?” cite bua a hopya.23Thuasalama Asahel nynh ccanglang maekuh ry khyh. Tukeiccuze Abner nynh aning kha a ccoi dung te a vue kya thuing zah a ke lang po zua; tuin kya khuliakuh zah a chih. Asahel nynh khuliakuh zah a chinaw hmin kya a thuapaw balyn tuh a thadyn hae.
24Thuasalama Joab te Abishai nynh Abner kha a deehui hae. Khuanin he a ccaw lyakhe Gibeon ramkaw lang ccianaw laanpi kya umpaw Giah khua a malang e Ammah mua kya a thua hae.25Benjamin phin hae tuh Abner kalan khe sueluakuh hae zah phu kheit lang umte mua dung khe thadynnaw hmin a tahkuh hae.26Tetuh Abner nynh Joab kha ko zah, “Aening hynh zungzae po douku lan tou? Athangnaw tuh myarya yn ccih cih cipaw na nyh khyh tou? Na ccungccaw hae tuh mih puizia hae deehuinaw kyate nulang a ki nawlan hae, hohseciamou kawpya lei hae te na um ung cih?” a cipya.27Joab nynh, “Pachia tuh a hiin thyhte, nang nynh tuhcite na ho khyh lanze, ka ccungccaw hae nynh mih puizia hae kha umtaw leite awkhualan awkhua cia po a deehui cih hae,” a cipya.28Joab nynh mungkae tu zah ccungccaw balyn nynh Israel hae deehuinaw kha umtaw hae zah rhaw mah tuk vae khyh hae.
29Abner te a ccungccaw hae nynh azi zidae Arabah accya kha po zuate a cceih hae; Jordan vaw kha zuate awkhualan awkhua balyn tuh po cceih hae zah Mahanaim khua kya a thua hae.30Joab tuh Abner deehuinaw kyate a ki; te ccungccaw balyn kha he a pum hae tuh, David a ryalahtu hae kya-e Asahel holeite lu haw lae takua azo hae.31David a ryalahtu hae nynh Benjamin phin hae, Abner a ccungccaw hae za thum sung taruh kha a chia hae.32Asahel rhua kha lah hae zah Bethlehem khua umpaw a paaw shawku kya a uu hae. Joab te a ccungccaw hae tuh azi zidae cceih hae zah Hebron khua khe khua nynh a dae phaw hae. David te Abner
1Saul innbyn te David innbyn hae tuh khaw cia rhaw a tukkuh vae hae; David tuh houhouh a thawsae thung zah, Saul innbyn tuh a thaw houhouh zyabung.
2David nynh Hebron khua kya a saah hae paw ccapaw hae tuh: a ccatawccaw tuh Jezreel khuanung Ahinoam kya a saahpaw Amnon nynh thua,3lu ningnaw tuh Karmel khuapaw Nabal nynh a chitawpaw nomaenung Abigail kya a saahpaw Khileab nynh thua; lu thumnaw tuh Geshur siapharan Talmai ccanung Maakah a ccapaw Absalom nynh thua;4lu palinaw tuh Haggith ccapaw Adonijah nynh thua; lu pangawnaw tuh Abital ccapaw Shefatiah nynh thua;5lu taruhnaw tuh David zu Eglah kya a saahpaw Ithream nynh thua. E hae hynh David nynh Hebron khua kya a saah hae.
6Saul innbyn te David innbyn hae rhaw a tukku lya hae khe, Abner nynh amaw te amaw kha Saul innbyn kalan te a thaw a saesaku.7Saul nynh Aiah ccanung Rizpah kha a lovae lang a hoiku. Ishbaal nynh Abner kha, “Pawccemou ka paaw lovaenung kha na ikhae?” a cipya.8Ishbaal bya keiccuze Abner tuh myarya a thinria zah, “Kae tuh Judah hae ui lu tou ka thua? Atunin cia na paaw Saul innbyn te a uno hae te a ruiban hae tungvaw kya lungzinaw ka hoi zah, nang kha David kuih kalan kae pya khyh; tuhzemah atu vae tuh nang nynh hynh-e nopinung te nae ruphuh.9Peenaw kha Saul ciihan kyate ccaring lawte David a bawitungkhung tuh Israel ram te Judah ram kya, Dan khua kyate Beersheba khua kyacia tynsah khylan, Bawipaw nynh David kya bya a kinpyakupaw kha ka ccingsahpah cih, Pachia nynh Abner tungvaw kya tuhcite cyih sah lah, tuhlaeze mah cyichih vae sah,” a ci.11Ishbaal nynh Abner kha a ri keiccuze ccangpaw bya kaw kheit sanmah khung kho khyh.
12Abner nynh David kalan Hebron khua langkhe locceihtu hae kha saw hae zah, “Ram hynh hum kya-e mou athua? Kae te byakinnaw rae lah, Israel hae balyn hynh na kalan pybia lan kae bawm cih,” cite bya a taw.13David nynh, “Ahoy, nang te byakinnaw ka rae cih. Thuasalama kae ngia rypaw ccangkheit a um: kae kha muih khylan he nae cceih te, Saul ccanung Mikhal kha nae thuakhae khyh zetuh, ka malang nae langkuh lan khyh,” a cipya.14David nynh Saul ccapaw Ishbaal kalan locceihtu hae kha saw hae zah, “Filistin hae vingdung za kheit kha mee lang ka syanuathepaw ka zu Mikhal kha yn pya,” cite bya a taw.15Ishbaal nynh ccungccaw sawte tuh-e nopinung tuh Laish ccapaw a vawpaw Paltiel kyate a kosah hae.16A vawpaw tuh a nulang te Bahurim khua kyacia rawkhuite a zuikuh. Abner nynh Patiel kha, “Inn lang la ki ccavae!” cipah zah a ki vae.
17Abner nynh Israel piccan hae kalan khe, “Anuhlang lya mawte David kha nae siapharan lang na ry vae oh.18Atu tuh ccingsah ccavae oh; pawccecize Bawipaw nynh David kha byakinpakuh zah: Ka ryalahtu David kha mangte ka ccungccaw Israel hae kha Filistin hae kuih kyate thuasah, mih rhaw hae balyn kyate thuasah ka khum cih hae,” a ci.19Abner nynh Benjamin phin hae kha mah a hopya hae; te Israel hae te Benjamin ciihan hae balyn nynh cyi lan a ry hae paw balyn kha Hebron khua kya David kha hopya khylan Abner tuh a cceih.
20Abner nynh ccungccaw hae lu kuin ryte Hebron khua, David kya he a thua hae tuh, David nynh Abner te a kya um hae paw elang looh-aenaw poi a tuapya hae.21Abner nynh David kha, “Israel hae balyn nynh nang te byakinnaw a rae nawlan hae thuasah, na lung nynh a ry hawte na uk nawlan hae thuasah ka la cceih sah lah, mih balynte siapharan ka bawipaw kalan kae suelua cih hae,” a cipya. Tukeiccuze David nynh Abner kha cciasah zah lungdaete a cceih vae. Joab nynh Abner A Chia
22Sosoh koute Joab te David a ryalahtu hae tuh rhaw a thiingnaw hae kyate oun thua hae zah luadepaw uccaw patae kha oun phubia hae. Thuasalama Abner tuh Hebron khua kya David ryte umkheih khyh hae, pawccecize David nynh cciasah zah aning tuh lungdaete phe a cceih vae.23Joab te a kya umpaw rhawkaw hae balyn he oun thua hae te, Joab kyakhe, “Ner ccapaw Abner tuh siapharan kalan yn thua zah, aning nynh cciasah zah lungdaete phe cceih vae,” cite a hopya hae.24Tetuh Joab nynh siapharan kalan cceih zah, “Pawmou phe na la cyi vae? Abner tuh na kalan yn thua zah a lue ccaw cite pawccemou na cciasah?25Ner ccapaw Abner tuh nang kha ling khylan te na tee na pounaw te na cyipaw balyn kha ny khylan nynh yn thua cipaw phe na ny,” a cipya.
26David kyate a pou koute, Joab nynh Abner nulang te locceihtu hae kha saw hae zah, Sirah tuisung kyate phe a kikhae hae; tuh-e konglang tuh David nynh nyh khyh.27Abner tuh Hebron lang he a ki te, Joab nynh byarupaw hoku khylan koikua pe lang cciakhae zah, tuin kyakhe a vue kha a thuing. Tuhcite Joab a neitaw Asahel chiise a luapaw hanlan Abner tuh a chih.28Nyalangte, David nynh tuh-e tuh he a thae te, “Ner ccapaw Abner chiise hanlan kae te ka peenaw tuh Bawipaw malang kae cyiseinaw papin um khyh.29Tuh-e cyiseinaw tuh Joab lu vawlan te a puizia hae balyn lu vawlan khe ccah vae sah; te Joab a puizia hae kya anae poupaw, vaethyakaepaw, a kekypaw, thaloi te chihpaw, a kanmawpaw thouh boi nan sah!” a ci.30Tuhcite Joab te a neitaw Abishai nynh Abner kha a chia hae, pawccecize Gibeon khua rhawtuknaw kyakhe Abner nynh mih neitaw Asahel kha a la chia.
31David nynh Joab te a kya um hae paw balyn kha, “Nae boeining kha seii oh lah, buriboei kha zingkuh oh, te Abner hanlan rah oh,” a cipya hae. David siapharan nynh michi rhua-thingkua kha a zui.32Abner kha Hebron kya a uu hae. Siapharan nynh Abner shawku kya thawte a roisaw zah a rah, ccungccaw balyn mah a rah hae.33Siapharan nynh Abner hanlan rawnaw hlawsah zah,“Abner tuh mingaeea chi hawte tou a chih cih?34Na kuih kha khi thua khyh zah,na ccu kha khinawpawarui te khii thua khyh;ccungccaw hoyleipaw malanga khuliakuhpaw hawtena khuliakuh vae,”a ci. Te ccungccaw balyn tuh aning elang bua a rah hae.35Khua azi mawkhe David nynh looh a ae nawlan ccungccaw balyn nynh a soihbia hae; thuasalama David nynh byakinkuh zah, “Khuanin accaw maw kya sanlou thuasah, ccangpaw hankhakheit thuasah ka taangtua lanze, Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah!” a ci.36Ccungccaw hae balyn nynh tuh-e tuh muih hae zah mih lungtua; siapharan nynh a cyipaw miakaw kha ccungccaw balyn nynh mih lungrythua.37Tukeiccuze Ner ccapaw Abner chianaw kya siapharan panbua khyh cipaw kha tuin nin khe ccungccaw balyn te Israel hae balyn nynh a thaethya hae.38Te siapharan nynh a ryalahtu hae kyakhe, “Israel hae kyaze bawi lu kheit athuapaw alesaepaw ccungccaw lu kheit tuh atunin a chih vae cipaw na nyh khyh oh tou?39Siapharan lang chitui thuh ka thua zemah atunin kya ka thawzya. E Zeruiah ccapaw hae hynh ka hanlan myaryamaw a puatho hae. Bawipaw nynh hoyleinaw a raetupaw kha a hoyleinaw thyhte a liaru!” a cipya hae. Ishbaal Chianaw
1Abner tuh Hebron khua kya a chih vae cipaw kha Saul ccapaw Ishbaal nynh he a thae tuh, a thawthah zah, Israel hae balyn tuh mih bungzou.2Saul ccapaw nynh rhaw a thiingpaw aphu hae rhawbawi lu ning a hoi; lu kheit min tuh Baanah cikuh zah ccangpaw lu kheit min tuh Rekhab acikuh. Minmin tuh Beeroth khua kya-e Benjamin phinpaw Rimmon ccapaw hae nynh athua hae—pawccecize Beeroth khua tuh Benjamin ram kya-e nynh thua.3(Beeroth ccungccaw hae tuh Gittaim lang ccue hae zah, tuin kyakhe atunin cia ramccang ccungccaw lante a um hae).
4Saul ccapaw Jonathan nynh a ccukhoupaw ccapaw lu kheit a hoi. Saul te Jonathan konglang Jezreel khua kyate thongpang yn than lyaze aning tuh kum pangaw acih vae. Aning a do-oihtunung nynh lah zah a ccuekhae; arangte a ccuekhae lyakhe phe ccahsei zah a ccu akhou. A min tuh Mefibosheth acikuh.
5Beeroth khuapaw Rimmon ccapaw hae Rekhab te Baanah tuh thokuh hae zah ninthu khuaninso lya loukaw khe Ishbaal inn kya a thua hae, Ishbaal tuh ninthu a haeung ccyh lya nynh thua.6Minmin nynh chanvuih law lan a tee hae paw hawte inn lungkhu lang tee hae zah Ishbaal vue kha a thuing hae; tukoute Rekhab te a uno Baanah tuh a ccue hae.7A inaw khaan kya ikhung vawlan a i lyakhe inn lungkhu lang teenua hae zah, Ishbaal kha theih hae zah a lu a pae hae. A lu kha lah hae zah Arabah laanpi te azi zidae a cceih hae.8Ishbaal lu kha Hebron khua e David kalan a thuakhae hae, te siapharan kyakhe, “E hynh na hiinnaw ae ccungpaw na rhawpaw, Saul ccapaw Ishbaal lu nynh thua; atunin kya siapharan ka bawipaw hanlan Bawipaw nynh Saul te a ciihan tungvaw kya phu ae lawpya vae,” a cipya hae.
9David nynh Beeroth khuapaw Rimmon ccapaw hae Rakhad te a unopaw Baanah kyakhe, “Rhaw hae balyn kyate ka hiinnaw yn shawkhawpaw Bawipaw tuh a hiin thyhte,10ccungccapaw lu kheit nynh thongpang hoypaw ka phupya cite tua zah, ‘Dotua, Saul tuh a chih vae,’ cite he yn hopah te, aning kha ka kyng zah Ziklag kya ka chia; tuh-e tuh thongpang yn phutupaw elang ka pyapaw lasung nynh thua.11Ccungccaw hoylei hae paw nynh midingpaw kha amaw inn kya a ikhung vawlan khe a chia hae ze, tuhlaeze houh cyi lan accan khaw! Atu aning chiise mee kha nanning kya ngiate, nanning kha laephi vawlan te kae roh lan khyh oh tou?” a cipya hae.12Te David nynh ccangvae hae kha kawpya hae zah minmin kha a chia hae; mih kuih mih ccu kha pae hae zah, mih pyn kha Hebron khua e tuili pe khe a sae hae. Ishbaal lu kha tuh lah hae zah Hebron khua e Abner shawku kya a uu hae. Israel te Judah Siapharan lang David Chitui Thuhnaw (1Sh 11.1-9, 14.1-7)
1Israel phin hae balyn nynh Hebron khua umpaw David kalan oun thua hae zah, “Dotua, kaening tuh na ru te na saw nynh kae thua.2Anuhlang lya, Saul nynh siapharan lang oun tangpya lyaze, Israel hae oun poukhaetu te oun teekhaetu tuh namaw nynh na thua. Bawipaw nynh nang kha ae hopah zah: ‘Nang tuh ka ccungccaw Israel hae tuurin na thua cih zah, Israel hae uktu na thua cih,’ ae cipya,” cite a hopya hae.3Tuhcite Israel piccan hae balyn tuh Hebron khua umpaw David kalan a thua hae; David siapharan tuh Hebron khua Bawipaw malang khe minmin ryte byakinnaw rae zah, David kha Israel siapharan lang chitui a thuh hae.4David nynh siapharan lang a tang takaw lya tuh kum sung thum acih vae, kum sung pali lungkhu siapharan lang a tang.5Hebron khua kya Judah ram kha kum sari sah taruh a uk; Jerusalem khua kya Israel ram balyn te Judah ram kha sung thum kum thum a uk. Jerusalem kha Khuapi lang Raenaw
6Siapharan te a ccungccaw hae tuh Jebus hae kha dou khylan Jerusalem lang a cceih hae, ram lungkhu um hae paw nynh David kha, “Hynhlang nae tee lan khyh, mitzu hae te ccukhou hae nynh heize nang kha ae khee kho cih hae,” a cipya hae—minmin nynh, “David nynh hynhlang tee kho lan khyh,” cite a tua hae.7Thuasalama atu David khua a ci hae paw Zion rhawlungrua kha David nynh a law.8David nynh tuin nin khe, “Jebus hae kha chia a rypaw miakaw nynh, David nynh a hua hae paw mitzu hae te ccukhou hae kha tuk khylan, tuizypi kha po kae hae sah,” a ci. Tukeiccu nynh tuh-e tuh, “Mitzu hae te ccukhou hae nynh Bawipaw inn lungkhu lang tee lan khyh hae,” cite a honaw hae paw athua.9David tuh rhawlungrua lungkhu khe um zah, tuh-e tuh David khua cite min a phu. David nynh khua kha Millo kyate alungkhu lang cia po voilu lan a koih.10Bawipaw , vaaw Pachia tuh David kya a um keiccuze aning tuh houhouh a lesae.
11Tair siapharan Hiram nynh locceihtu hae kha sidar thing hae, lehccama hae te pazan thya hae paw ryte David kalan saw hae zah, minmin nynh David kha inn a sakpya hae.12Bawipaw nynh David kha Israel siapharan lang a khangpaw te a ccungccaw Israel hae hanlan a peenaw a hangthungpaw kha David nynh a ny.
13David tuh Hebron khua te a nuekuh koute, Jerusalem khua khe zupi hae te lovae hae kha hoikuh chih zah, David nynh ccanung ccapaw hae kha a saahku hae.14Jerusalem kya a saah hae paw a ccapaw hae min tuh: Shammua, Shobab, Nathan, Solomon,15Ibhar, Elishua, Nefeg, Jafia,16Elishama, Eliada te Elifelet nynh thua hae. Filistin hae kha Taenaw (1Sh 14.8-17)
17David tuh Israel siapharan lang chitui a thuh vae hae cipaw kha Filistin hae nynh he a thae hae te, Filistin hae balyn nynh David kha ccung khylan a cceih hae; tuh-e konglang tuh David nynh thae zah rhawlungrua kalan a cceih.18Filistin hae tuh oun cceih hae zah Refaim accya khe pong pazaekuh lante a um hae.19David nynh Bawipaw kha khia zah, “Filistin hae kha tuk lan ka ccianua thung cih hae tou? Minmin kha ka kuih kalan nae pya cih hae tou?” a cipya. Bawipaw nynh David kha, “Ccianua thung hae; pawccecize Filistin hae kha na kuih kalan kae pya ccaccing cih,” a cipya.20Tukeiccuze David tuh Baal-perazim lang cceih zah, tuin kyakhe minmin kha a tae hae. David nynh, “Bawipaw nynh ka rhaw hae kha avuakuhpaw tuileih hawte ka malang khe a vuasaku vae hae,” a ci. Tukeiccuze tuh-e hmin tuh Baal-perazim cite a ko hae.21Filistin hae nynh mih zohtuh hae kha tuin kya vuasya hae zah, David te a ccungccaw hae nynh a law hae.
22Filistin hae tuh bua oun cceih hae zah, Refaim accya khe pong pazaekuh lante a um hae.23David nynh Bawipaw kha he a khia tuh, “Na cceihthung lan khyh; mih nulang te koihlu hae lah, balsam thing hae te arawsekunaw kyakhate na naangbia cih hae.24Balsam thing dung hae kyakhe ccu cciapaw siho kha he na thae te, na naangbia vae cih hae; pawccecize Filistin rhawkaw hae kha chia khylan Bawipaw tuh na malang a cceih lalo vae,” a cipya.25Bawipaw nynh kaw a pya thyhte David nynh cyih zah, Filistin hae kha Geba kyate Gezer kyacia po a chia hae. Jerusalem lang Thingkua Nuenaw (1Sh 13.1-14, 15.25—16.6, 43)
1David nynh Israel hae kya-e popaw ccungccaw hae thong sung thum kha bua a pum hae.2Cherubim vawlan a umpaw vaaw Bawipaw min te ko athuapaw Pachia thingkua kha Judah ram Baalah khua kyate cciakhae khylan David te a kya um hae paw balyn tuh thokuh hae zah a cceih hae.3Pachia thingkua kha vaetuale thawpaw kya khang hae zah mua vawlan umpaw Abinadab inn kyate a poukhae hae. Abinadab ccapaw hae Uzzah te Ahio nynh4Pachia thingkua a umpaw vaetuale thawpaw kha a mawng hae; Ahio tuh thingkua malang khe a cceih.5David te Israel hae balyn tuh hlaw, tintang, tyng, daw te lanchi hae khate mih thawzung balynte Bawipaw malang khe a law hae.
6Nakon huimin kya he a thua hae te, tangnuapaw hae nynh Pachia thingkua kha a thyngbia hae keiccuze Uzzah nynh a kuih dyng zah thingkua kha a kyng.7Bawipaw tuh Uzzah tungvaw myarya a thinria; thingkua kalan a kuih a dyng keiccuze Pachia nynh detah zah, Pachia thingkua pe khe a chih.8Pachia nynh Uzzah tungvaw a thinria zah de a tah keiccuze David tuh a thinria; tukeiccuze tuh-e hmin tuh atunin cia Perez-uzzah cite a ko hae.9Tuin nin khe David nynh Bawipaw kha rih zah, “Bawipaw thingkua hynh pawtemou ka kalan a thua kho cih?” a ci.10Tukeiccuze David nynh Bawipaw thingkua kha David khua lungkhu lang teekhae ry khyh; David nynh Git khuapaw Obed-edom inn langkhe a cciakhae.11Bawipaw thingkua tuh Git khuapaw Obed-edom inn kya sawpaw sah thum a um; Bawipaw nynh Obed-edom te a innbyn hae balyn kha hythua a pya hae.
12“Pachia thingkua liate Obed-edom a innbyn hae te a inn um hae paw balyn tuh Bawipaw nynh hythua a pya hae,” cite David Siapharan kha a hopya hae. Tukeiccuze David nynh cceih zah Pachia thingkua kha Obed-edom inn kyate David khua lang lungpawte a cciakhae;13Bawipaw thingkua a puihtu hae nynh kaw taruh he a kaw hae te, tangnuapaw sa kheit te sahiin athopaw sa kheit khate si a law.14David nynh Bawipaw malang khe a thawzung balynte a law; David tuh laaw te kuakuhpaw ranpibawi angki a kikuh.15Tuhcite David te Israel hae balyn nynh sia biate, mungkae tu biate Bawipaw thingkua kha a cciakhae hae.
16Bawipaw thingkua tuh David khua lungkhu he a thua lyakhe, Saul ccanung Mikhal nynh thanlan-aw kyate do zah, David Siapharan tuh Bawipaw malang khe thohkute a lawpaw kha muih zah a thinlung kyate a theihrya.
17Bawipaw thingkua kha teekhae hae zah, David nynh a sakpyapaw bu lungkhu, amaw hmin kyakhe a nung hae; te David nynh Bawipaw malang khe maee-ute silawnaw te ccawkunaw silawnaw kha a rae.18David nynh maee-ute silawnaw te ccawkunaw silawnaw kha a rae koute, vaaw Bawipaw min te ccungccaw hae kha hythua a pya hae,19te ccungccaw balyn kha looh a nee hae, Israel zapi hae, nopi pise hae balyn kha sanlou phe kheit, saw nge kheit te misu thae aroupaw phe kheit cci kha ccarou a nee hae. Tukoute ccungccaw hae balyn tuh mih inn lang a ki hae.
20David tuh a innbyn hae kha hythuapya khylan a ki. Saul ccanung Mikhal tuh David te tungku khylan yn pou zah, “A thualahpaw ccungccaw nynh maethya ny leite a boeining a kalyngku hawte, atunin a ryalahtu hae kya-e ryalahtunung hae malang khe a boeining kalyngkute Israel siapharan tuh atunin kya hohcih baban mou sawtuanaw a raeku!” a ci.21David nynh Mikhal kha, “Na paaw te a innbyn hae balyn hanpaw kae kha yn po zah, Bawipaw ccungccaw hae, Israel hae a uktu bawi lang yn nungpaw Bawipaw malang khaw ka langku, Bawipaw malang ka law cih.22E laeze theihrya lan umpaw kha ka cyih ung cih, kamaw mit kya heize ka thethah cih; thuasalama na ho hae paw ryalahtunung hae liate sawtuanaw ka ccou cih,” a cipya.23Te Saul ccanung Mikhal tuh a chi nin cia ccaawsaah khyh. David tungvaw Pachia Byakinnaw (1Sh 17.1-15)
1Bawipaw nynh David kha a pepan e a rhaw hae balyn kyate haeungnaw pya zah, a inn kya a um lyakhe,2siapharan nynh profeh Nathan kha, “Dotua, kae tuh sidar thing inn kya ka um, thuasalama Pachia thingkua tuh bu kya nynh a um,” a cipya.3Nathan nynh siapharan kha, “La cceih lah, na thinlung kya a umpaw balyn kha la cyih, pawccecize Bawipaw tuh na kya a um,” a cipya.
4Thuasalama tuin khuazi khe Bawipaw bya tuh Nathan kalan yn thua zah:5La cceih lah, ka ryalahtu David kha la hopah: Bawipaw nynh hynhte a ho: Ka um nawlan inn nae sakpah cih tou?6Israel ccungccaw hae kha Izip ram kyate ka cciakhae nin hae kyate atunin cia inn lungkhu kya ka um boi khyh, bu te beikbu lungkhu umte ka nuekuh bungthung.7Israel hae balyn ryte kae ccia bungthungnaw takyh kya ka ccungccaw Israel hae kha do-oih khylan kaw ka pyapaw Israel phin cciakhaetu lukhakheit kha, “Pawccemou sidar thing inn nae sakpya khyh?” cite ka hopah boi tou?8Tukeiccuze ka ryalahtu David kha hynhte na hopah cih: Vaaw Bawipaw nynh hynhte a ho: Nang tuh ka ccungccaw Israel hae kya bawi lang tang khylan tuu rampaeekunaw hmin kyate, tuu hae na zuinaw kyakhate kae ko;9na ccianaw takyh kya na kya ka um zah, na rhaw hae balyn kha na malang te ka vua hae; laephi vawlan e alesae hae paw min hawte alesaepaw min kha kae raepah cih.10Ka ccungccaw Israel hae elang hmin ccangkheit ka raepah cih hae zah, mimaw hmin kya a um nawlan hae te kaccohkale nung athua khyh nawlan hae, ka tynsah cih hae;11langmawlya ka ccungccaw Israel hae kya byapiatu hae ka nungpya lya hae hawte ccungccaw hoylei hae paw nynh vawsawnaw pya vae lan khyh hae; na rhaw hae balyn kyate nang kha haeungnaw kae pya cih. Tuhpiaze Bawipaw nynh nang kha inn innkheit ae raepah cih cite, Bawipaw nynh nang kha ae thaesah.12Na ccyh zaw vae zah na minpaaw hae ryte he na ihkheih oh te, na pyn kyate a pou cih paw na ciihan tuh namaw koute ka hangthung cih zah a peenaw kha ka tynsah cih.13Aning nynh ka min hanlan inn a sak cih zah a peenaw kha ka tynsah cih.14Kae tuh a paaw ka thua cih zah aning tuh ka ccapaw athua cih, hoyleinaw a rae ze, ccungccaw nynh a mangthyapaw ccungngue khate thuasah, ccungccaw nynh a buanaw thyapaw ruising khate thuasah de ka tah cih.15Thuasalama na malang te ka vua vae paw Saul kyate atynpaw ka sungsahnaw kha ka law hawte aning kyate ka lah lan khyh.16Na inn te na peenaw tuh ka malang khe zungzae atyn lante rae athua cih; na bawitungkhung tuh zungzae atyn cih, a ci cite David kha la hopah, a cipya.17E bya hae balyn thyhte, e vizin hae balyn thyhte Nathan nynh David kha a hopya. David Sawsangnaw (1Sh 17.16-27)
18Tetuh David siapharan nynh alungkhu lang tee zah Bawipaw malang haung zah, “Pou Bawipaw PACHIA, kae tuh ahum ka thua zah, ka innbyn tuh pawcihawpaw innbyn athua keiccu mou hynhcih ciate nae hangthung?19Thuasalama pou Bawipaw PACHIA, e hynh tuh nang na muihnaw kya uccaw dihpaw nynh thua; na ryalahtu innbyn kong hynh mah malang ccyh hynhsepi hanlan cia na hoty vae. Pou Bawipaw PACHIA, e hynh ccungccaw hae elang thuiheinaw thua vae sah!20David nynh na kalan pawmou a ho kholae ung cih? Pawccecize pou Bawipaw PACHIA, na ryalahtupaw kha phe na ny!21Na byakinnaw keiccu thuasah, na thinlung thyhte thuasah na ryalahtupaw nynh a ny nawlan, e lesaenaw balyn hynh na rae vae.22Tukeiccuze pou Bawipaw Pachia, nang tuh na lesae; pawccecize kae nakaring te kae thaepaw balyn thyhte nang ae lopaw lu kheit san um khyh zah namaw laelan ccangpaw Pachia um khyh.23Na ccungccaw hae alopaw, Israel hae alopaw hummou a um? Minphuin hae te mih pachia hae kha a ccungccaw hae malang te ccaring deete, minmin elang alesaepaw te ngaeang lan umpaw uccaw hae kha raete a ccungccaw hae lang tang lan shawkhaw khylan te amaw hanlan min ccangkheit raeku khylan Pachia nynh a ccianua hae paw laephi vawlan ccangpaw minphuin a um tou?24Na ccungccaw Israel hae kha na ccungccaw lang zungzae tang khylan namaw hanlan na tynsah hae; pou Bawipaw , nang tuh mih Pachia lang na tang.25Atu pou Bawipaw Pachia, na ryalahtupaw konglang te a innbyn konglang na ho vae paw bya kha zungzae tynsah tua; bya na kinku hawte beih cyitua.26‘Vaaw Bawipaw tuh Israel a uktu Pachia nynh thua,’ cite na min tuh zungzae hangthung thua sah; na ryalahtu David innbyn tuh namaw malang tyn vae sah.27Pawccecize pou vaaw Bawipaw , Israel Pachia, nang nynh e byaphy hynh na ryalahtu hanlan na rae zah, ‘Nang kha inn innkheit kae raepah cih,’ na ci; tukeiccuze na ryalahtu nynh namaw kalan hynh-e sawsangnaw hynh ka sang ngan.28Pou Bawipaw PACHIA, nang tuh Pachia nynh na thua, na bya tuh kyh zah, e uccaw hoypaw hynh na ryalahtu kya bya na kinpyaku vae;29tukeiccuze atu tuh na ryalahtu innbyn hynh namaw malang zungzae tyn sah cite hythuapya khylan na lungrythua sah; pawccecize pou Bawipaw PACHIA, na ho vae hawte na ryalahtu inn tuh na hythuanaw khate zungzae hythuaccou vae sah,” a ci. David nynh A Taepaw Rhawtuknaw hae (1Sh 18.1-17)
1Tukoute David nynh Filistin hae kha tuk hae zah a tae hae; David nynh Filistin hae kuih kya umpaw Metheg-ammah khua kha a law.
2Moab hae kha tae hae zah, laekhu kya luesahte arui te a tou hae, arui ruining kha chia lan tou hae zah ruikheit kha haang lan a tou hae. Te Moab hae tuh David rya a lahtu lang tang hae zah ngunto a pya hae.
3Zobah siapharan, Rehob ccapaw Hadadezer nynh Zufrates vaw pepan e ram hae kha lawthui khylan a ccia lyakhe David nynh amaw kha a chia.4David nynh aning kyate marang rhawkaw thong kheit za sari te ccu rhawkaw thong kuin kha a kyng hae. David nynh marangle a suepaw marang hae balyn kha a chia hae, thuasalama marangle za kheit hanlan phe azaw lante a haang bang hae.5Damaskas khua e Siria hae nynh Zobah siapharan Hadadezer kha bawm khylan he oun cceih hae tuh, David nynh Siria hae kha thong kuin lae ning a chia hae.6David nynh Damaskas khua e Siria hae kyakhe rhawviatu hae kha a nung hae; Siria hae tuh David rya a lahtu lang tang hae zah ngunto a pya hae. Bawipaw nynh David kha a ccianaw takyh kya taenaw a pya.7Hadadezer a ryalahtu hae nynh a ccyng hae paw sui khawriaphua hae kha David nynh lah zah Jerusalem lang a phu.8Hadadezer kya-e khua hae Betah te Berothai kyate sohin patae kha David nynh a law.
9Hadadezer a rhawkaw hae balyn kha David nynh a tae vae cipaw Hamath siapharan Toi nynh he a thae te,10David nynh Hadadezer kha tuk zah a tae keiccuze byabeih khylan te lungtuakhae khylan David Siapharan kalan khe a ccapaw Joram kha a saw; Hadadezer nynh Toi kha atu te atu rhaw a tuk. Joram nynh ngun, sui, sohin te raekuhpaw uccaw hae kha a ccyngpya;11tuh-e uccaw hae kha mah David Siapharan nynh Bawipaw kalan a pya; aning nynh a taepaw minphuin hae balyn kyate a lawpaw ngun te sui ryte pynkheihlan a pya;12tuh-e sui te ngun hae tuh Edom ram, Moab ram, Ammon ram, Ammon hae, Filistin hae, Amalek ram kyate a lawpaw te Zobah siapharan Rehob ccapaw Hadadezer kyate a luadepaw nynh athua hae.
13David tuh a min myarya thaan. He yn ki te, Edom hae thong haw lae tarya kha Loi Accya kya a chia hae.14Edom ram kya rhawviatu hae kha a nung hae; Edom ram balyn phe lekuh lan rhawviatu hae kha nung hae zah Edom hae balyn tuh David ryalahtu lang a tang hae. Bawipaw nynh David kha a ccianaw takyh kya taenaw a pya. David Kuihkaw e Bawi hae
15Tuhcite David nynh Israel ram pynpi kha a uk; David nynh a ccungccaw hae balyn kha byading te ngingnaw te a uk hae.16Zeruiah ccapaw Joab tuh rhawkaw hae a uktu rhawbawi thua zah Ahilud ccapaw Jehoshafat tuh ccazing kyngtu nynh thua;17Ahitub ccapaw Zadok te Abiathar ccapaw Ahimelek tuh ranpibawi hae thua hae zah, Seraiah tuh ryaccinkhan nynh thua;18Jehoiada ccapaw Benaiah nynh Khereth hae te Peleth hae kha a uk hae; David ccapaw hae tuh ranpibawi hae nynh thua hae. David nynh Mefibosheth Thaw A Cci
1David nynh, “Jonathan keiccuze a tungvaw kya thawccinaw ka langsaku nawlan, Saul innbyn kya a hiinhypaw lu kheit san a um ung tou?” cite a khia.2Saul innbyn kya-e ryalahtu lu kheit, a min Ziba cikuhpaw um zah David kalan a ko hae. Siapharan nynh, “Nang hynh Ziba na thua tou?” cite a khia. Ziba nynh, “Na ryalahtu kae tuh Ziba nynh ka thua!” a cipya.3Siapharan nynh, “Pachia thawccinaw tuh a tungvaw kya ka langsaku nawlan, Saul innbyn kya a hiinhypaw lu kheit san a um ung tou?” a cipya. Ziba nynh siapharan kha, “Janathan ccapaw lu kheit a um ung; aning tuh a ccu akhou,” a cipya.4Siapharan nynh, “Aning tuh teimou a um?” cite khia zah, Ziba nynh siapharan kha, “Aning tuh Lodebar khua, Ammiel ccapaw Makhir inn kya nynh a um,” a cipya.5David Siapharan nynh ccungccaw saw zah Lodebar khua, Ammiel ccapaw Makhir inn kya-e amaw kha a kosah hae.6Saul ccapaw Jonathan a ccapaw Mefibosheth tuh David kalan yn thua zah bakhungte sawtuanaw a pya. David nynh, “Mefibosheth!” cite ko zah, aning nynh, “Na ryalahtu mang ka um,” cite a khung.7David nynh amaw kha, “Rih nan, pawccecize na paaw Jonathan keiccuze na tungvaw thawccinaw kae langsapakuh cih; na minpaaw Saul laephi balyn kha kae kii cih zah, ka ccaboi kya zungzae na ae cih,” a cipya.8Aning nynh sawtuanaw pya zah, “Kae tahawpaw ui chihpaw hynh nang nynh do lan ciate, na ryalahtu hynh pawmou ka thua?” a cipya.
9Tetuh siapharan nynh Saul a ryalahtupaw Ziba kha ko zah, “Saul uccaw balyn te a innbyn hae kya-e balyn kha na bawipaw a mintawpaw kalan ka pya vae.10Nang te na ccapaw hae te na ryalahtu hae nynh aning hanlan loo na phopah cih oh zah, na bawipaw a mintawpaw nynh a ae lanpaw looh kha na thuakhaepah cih oh; thuasalama na bawipaw a mintawpaw Mefibosheth tuh ka ccaboi kya zungzae a ae cih,” a cipya. Ziba tuh ccapaw lu haw lae pangaw te ryalahtu lu kuin a hoi.11Ziba nynh siapharan kha, “Siapharan ka bawipaw nynh a ryalahtu kya kaw yn pya thyhte, na ryalahtu kae nynh ka cyih cih,” a cipya. Mefibosheth tuh siapharan ccapaw lu kheit hawte David ccaboi kya looh a ae.12Mefibosheth nynh Mika cikuhpaw ccapaw taraw lu kheit a hoi. Ziba inn kya um hae paw balyn tuh Mefibosheth ryalahtu lang a tang hae.13Mefibosheth tuh Jerusalem kya a um; pawccecize siapharan ccaboi kya looh zungzae a ae. Aning tuh a ccu voi ning mawte akhou. Ammon hae te Siria hae kha Taenaw (1Sh 19.1-19)
1Tukoute Ammon hae siapharan tuh chih zah, amaw ccelang a ccapaw Hanun tuh siapharan lang a tang.2David nynh, “Hanun paaw Nahash nynh ka tungvaw a lungzi hawte, a ccapaw Hanun tungvaw kya lungzite ka ccuepe cih,” a ci. Tukeiccuze David nynh a paaw te asekuh lante lungtangnaw pya khylan locceihtu hae kha a saw hae. David a locceihtu hae tuh Ammon hae ram kya he a thua hae te,3Ammon ccungccaw hae bawi hae nynh mih bawipaw Hanun kyakhe, “David nynh nang kha lungtangnaw pya khylan locceihtu hae yn saw hae paw hynh na paaw kha sawtuanaw a pyapaw nynh thua cite na tua ccaccing tou? Khua hynh akaw-aleih dote dophi khylan te ro khylan David nynh a locceihtu hae hynh yn saw khyh hae tou?” a cipya hae.4Tukeiccuze Hanun nynh David locceihtu hae kha kyngte mih khawming angankuh kha ccarou ngo hae zah, mih boeining kha angaelung ccepahthua te awpah hae zah ccaring a cciasah hae.5Tuh-e tuh David kya he a hopah hae te, minmin tuh myaryamaw mih maethya keiccuze minmin kha cciadue khylan ccungccaw a saw hae. Te siapharan nynh, “Nae khawming asae mawlaezung Jeriko khua kya la um oh, tukoute nae ki cih oh,” a cipya hae.
6Ammon hae nynh David kya kae cceikhah vae cipaw he a nyh hae te, Ammon hae nynh ccungccaw saw hae zah Beth-rehob e Siria hae te Zobah e Siria hae, ccu rhawkaw thong kuin, Maakah ram siapharan te a ccungccaw hae thong kheit, Tob ram e ccungccaw thong haw lae ning kha a hoh hae.7Tuh-e tuh David nynh he a thae te, Joab te athungpaw rhawkaw hae balyn kha a saw hae.8Ammon hae tuh oun pou hae zah koikua teenaw kyakhe rhawtuk lan a um hae; Zobah te Rehob e Siria hae te Tob te Maakah e ccungccaw hae tuh ramkaw khe taekhiate a um hae.
9Joab nynh malang te thuasah, nulang te thuasah rhaw yn tuk vae cih hae cipaw he a nyh tuh, Israel hae lungkhu e athung huaccepaw ccungccaw abang kha po hae zah, Siria hae kha tuk khylan a nung hae;10tuhlaepaw a ccungccaw hae kha tuh Ammon hae kha tuk khylan a neitawpaw Abishai kuihkaw khe a nung hae.11Joab nynh, “Siria hae tuh ka hanlan myaryasankae a thung hae ze, nang nynh nae bawm cih; te Ammon hae tuh na hanlan myaryasankae a thung hae ze, kae ccianua cih zah kae bawm cih.12Rawthungte um lah, ah ccungccaw hae hanlan te ah Pachia khua hae hanlan rawhoyte um oh sih; Bawipaw nynh ahoy a ci thyhte cyih vae sah,” a cipya.13Tetuh Joab te a kya um hae paw tuh Siria hae kha tuk khylan naenuakuh hae zah, mih malang te Siria hae tuh a ccue hae.14Siria hae a ccue vae hae cipaw kha Ammon hae nynh he a muih hae tuh, minmin mah tuhmaminte Abishai malang te ccue hae zah khua lungkhu lang a tee hae. Te Joab tuh Ammon hae a tuknaw hae kyate yn ki zah Jerusalem yn thua.
15Thuasalama Israel hae nynh oun tae vae hae cipaw kha Siria hae nynh he a muih hae tuh, pynkheihlan bua a pumkuh hae.16Hadadezer nynh ccungccaw saw hae zah Zufrates khuraw lang um hae paw Siria hae kha yn thuakhae hae; Hadadezer a rhawkaw hae kya-e rhawbawipaw Shobak nynh ukte cciakhae hae zah Helam kya a thua hae.17Tuh-e tuh David kya he a hopah hae tuh, aning nynh Israel hae balyn kha pynkheihlan pumte Jordan vaw kha zua hae zah Helam a thua hae. Siria hae tuh David kha rawsete taekhiate um hae zah aning te rhaw a tukkuh hae.18Siria hae tuh Israel hae malang a ccue hae; David nynh Siria hae marangle a ccikuh hae paw za sari te marang rhawkaw thong sung pali kha a chia hae, mih rhawbawipaw Shobak kha tuk zah tuin kya a chih.19Hadadezer a ryalahtu siapharan hae balyn nynh Israel hae nynh oun tae vae hae cipaw he a muih hae tuh, Israel te ccawkunaw rae hae zah mih kuihkaw um hae paw lang a tang hae. Tukeiccuze Siria hae tuh rih hae zah Ammon hae kha bua bawm ngan vae khyh hae. David te Bathsheba
1Hawnin yn thua zah siapharan hae nynh rhawtuknaw lang ccia ccyh he yn thua tuh, David nynh Joab te a kuihkaw e bawi hae te Israel hae balyn kha a saw hae; minmin nynh Ammon hae kha roh hae zah Rabbah khua kha a koihlu hae. Thuasalama David tuh Jerusalem khua kya a um.
2Nin kheit tuh zetesang khe David nynh a ikhung kyate thokuh zah siapharan inn innccuvaw kya a ccia bungthung lyakhe, tui singkuhpaw nopinung lu kheit kha innccuvaw kyate a muih; tuh-e nopinung tuh myarya a puithya.3David nynh tuh-e nopinung kong khiatua khylan ccungccaw saw zah, “Eliam ccanung Bathsheba, Hit minphuinpaw Uriah zu nynh thua,” cite a hopya.4David nynh tuh-e nopinung kha ko khylan locceihtu hae kha a saw hae, te a kalan yn thua zah amaw nynh a ikhae. (Aning tuh nopiny a nyh koute a ccikanku lya nynh thua.) Tukoute nopinung tuh a inn lang a ki.5Tuh-e nopinung tuh ccaaw a poi; te David kalan ccungccaw saw zah, “Ccaaw ka hoi,” cite bya a taw.
6Tukeiccuze David nynh Joab kha byataw zah, “Hit minphuinpaw Uriah kha ka kalan yn saw,” a cipya. Te Joab nynh Uriah kha David kalan a saw.7Uriah he yn thua tuh, David nynh Joab te ccungccaw hae konglang te rhawtuk konglang kha a khia.8Te David nynh Uriah kha, “Na inn lang la cceih lah na ccu la singkuh,” a cipya. Uriah tuh siapharan inn kyate pou zah, a nulang te siapharan nynh lasung a pyasah hae.9Thuasalama Uriah tuh a inn lang ki leite a bawipaw a ryalahtu hae balyn ryte siapharan inn thuakaw kyakhe a ryabua.10“Uriah tuh a inn lang cceih khyh,” cite David kha he a hopah hae tuh, David nynh Uriah kha, “Pawccemou na inn lang na ccia khyh? Khuaccongnaw langte khaw nae thua?” a cipya.11Uriah nynh David kha, “Byakin thingkua te Israel hae te Judah hae tuh bu kya nynh a um hae; ka bawipaw Joab te ka bawipaw ryalahtu hae tuh ramkaw kya nynh a rya hae; kae tuh ae lan nia lan te ka zu ryte ikheih khylan ka inn lang ka cceih cih zawtou? Nang tuh na hiin thyhte, na hiinnaw mah a hiin thyhte, tuhcihawpaw tuh ka cyih lan khyh,” a cipya.12Te David nynh Uriah kha, “Atunin mah hein kya um hin, awkhualan kae cciasah cih,” a cipya. Tukeiccuze Uriah tuh tuin nin khe Jerusalem kya a um. Awkhualan tuh,13David nynh ae khylan te nia khylan a kalan ko zah a ruisah; zete tuh a bawipaw ryalahtu hae ryte ryakheih khylan a pou, thuasalama a inn lang tuh cceih khyh. David te Uriah
14Awkhualan awkhua tuh David nynh Joab kalan ccaw zei zah Uriah kuih kyate a ky.15Ccaw kyakhe, “Uriah hynh rhawtuk aso huanaw malang kou khe nung lah, amaw kha tuk hae zah a chi ccaw, nulang na kitaw cih,” cite a zei.16Joab nynh khuapi a koihlu lyakhe, mih rawthung hae paw a umnaw hae hmin cite a nynaw kyakhe Uriah kha a nung.17Tuh-e khuapi kya-e ccungccaw hae tuh oun pou hae zah Joab te a tukkuh hae; tuh-e hae kya-e David a ryalahtu hae abang tuh a chih hae. Hit minphuinpaw Uriah mah a chihbua.18Te Joab nynh ccungccaw saw zah rhawtuknaw konglang thongpang balyn kha David kalan a thaesah;19tuh-e locceihtupaw kyakhe, “Rhawtuknaw konglang thongpang balyn kha siapharan kya he na hopah koute,20siapharan tuh a thinria zah nang kha, ‘Pawccemou khuapi kalan thawte na naeku oh? Khualungrua kyate oun kaw cih hae cipaw na nyh khyh oh tou?21Jerusbbaal ccapaw Abimelek kha hum nynh mou a theih? Nopinung lu kheit nynh sungmia-lung avawlan e khate khualungrua kyate sawphu zah Thebez khua kya chih khyh tou? Pawccemou khualungrua kalan thawte na naeku oh?’ ae cipya ze, nang nynh, ‘Na ryalahtupaw Hit minphuinpaw Uriah mah a chih,’ cite na la hopah cih,” a cipya.
22Tukeiccuze locceihtupaw tuh cceih zah Joab nynh ho lan a tawpaw bya balyn kha David kya a hopya.23Locceihtupaw nynh David kha, “Rhaw hae nynh oun tae hae zah, ramkaw khe oun pounua hae; thuasalama khua koikua teenaw kyacia bua kae dee hae.24Tetuh thekawthya hae paw nynh na ryalahtupaw kha khualungrua kyate a kaw hae; siapharan na ryalahtu hae abang tuh a chih hae; te na ryalahtupaw, Hit minphuinpaw Uriah mah a chihbua,” a cipya.25David nynh locceihtupaw kha, “Joab kyakhe, ‘E uccaw keiccuze na lungriathae nan sah, pawccecize thaloi nynh tuh atu lu kheit, tukoute lu kheit cite chia phungpaw nynh thua; khuapi kha thawte tuk oh lah, roh oh,’ a ci cite thawpyanaw bya na la hopah cih,” a cipya.
26Uriah zu nynh a vawpaw a chih vae cipaw kha he a nyh tuh, rawkhuite a um.27He a rah koute, David nynh ccungccaw sawte a inn lang kosah hae zah a zu lang a tang, te ccapaw lu kheit a saahpya. Thuasalama David a cyisahnaw nynh Bawipaw kha a lunghoysah khyh. Nathan nynh David Sei A Be
1Te Bawipaw nynh profeh Nathan kha David kalan a saw. Aning nynh David kha, “Khua khuakheit kya ccungccaw lu ning a um hae, lu kheit tuh mihoipaw thua zah ccangpaw lu kheit tuh ryachipaw nynh thua.2Mihoipaw nynh tuuphu te vaetua phu patae a hoi;3ryachipaw nynh tuh a rekupaw tuu nopi taraw sa kheit laelan pawpaw mah hoilae vae khyh. Tuh-e tuu nopi taraw tuh ryachipaw nynh kuakuh zah amaw ryte, a ccaaw hae ryte a lethung kheih hae; aning nynh ryachipaw looh kha leih ae zah a banang kya-e kha leih a neih, ryachipaw by vaw kya leih ih zah a ccanung hawte nynh athua.4Te mihoipaw kalan khe mikhia lu kheit yn thua zah mihoipaw nynh a kalan yn thuapaw mikhiapaw tuh aepaw paccynpya khylan amaw tuuphu kya-e te vaetua phu kya-e kha chiapya lan a hysah khyh keiccuze, ryachipaw kya-e tuutaw kha lah zah, a kalan yn thuapaw mikhiapaw kha aepaw a paccynpya,” a cipya.5David nynh tuh-e mihoipaw tungvaw myaryamaw a thinria zah Nathan kha, “Bawipaw tuh a hiin thyhte, tuhte a cyihtupaw tuh chi lan accan;6tuhte a cyi keiccu thuasah, ngaethya a umsah khyh keiccu thuasah tuutaw tuh leit pali a pyaru cih,” a cipya.
7Nathan nynh David kha, “Tuh-e paw tuh namaw nynh na thua! Israel Pachia, Bawipaw nynh hynhte a ho: Nang kha Israel uktu siapharan lang chitui kae thuh zah Saul kuih kyate kae luesah;8na bawipaw inn te na bawipaw zu hae kha na by kya kae pya, Israel ciihan te Judah ciihan kha kae pya; e hae hynh eih azya ung ze, bua kae pyachih ung cih.9Bawipaw muihnaw kya hoyleinaw rae khylan pawccemou a bya kha pawlang na ria khyh? Hit ccungccaw Uriah kha thaloi te na theih zah a zu kha na zu lang na lawku, aning kha Ammon hae thaloi te na chia.10Kae kha pawlang nae ria khyh zah Hit ccungccaw Uriah zu kha na zu lang na lawku keiccuze na ciihan kyate thaloi tuh papin phiakuh lan khyh.11Bawipaw nynh hynhte a ho: Namaw ciihan lungkhu toulou kyate na tungvaw kya vawsawnaw ka langsakuh cih; na zu hae kha na muihnaw kyate ka lah cih hae zah na innpaw kalan ka pya cih, e khuanin nynh a muihnaw ccaccei kyakhe aning nynh minmin kha a ikhae cih hae.12Pawccecize nang nynh e uccaw hynh aruh lante na cyi; thuasalama kae nynh tuh Israel hae balyn malang te khuanin malang khe ka cyih cih,” a ci.13David nynh Nathan kha, “Bawipaw tungvaw ka sei vae,” a cipya. Nathan nynh David kha, “Bawipaw nynh na seinaw kha ae vuapya vae, na chih lan khyh.14Thuasalama tuhcite na cyisahnaw liate Bawipaw kha myaryamaw pawlang na ria khyh keiccuze na saahkupaw ccaaw tuh a chih cih,” a cipya.15Te Nathan tuh a inn lang a ki. Bathsheba Ccaaw A Chih
Uriah zu nynh David a saahpyapaw ccaaw tuh Bawipaw nynh detah zah myarya a ccih.16Tukeiccuze David nynh imua hanlan Bawipaw kalan a ngia; David tuh looh-aesungte alungkhu lang tee zah azi zidae laekhu kya a toukuh.17A innbyn kya-e piccan hae nynh laekhu kyate a thoku nawlan soihbia hae zah a pe a thadynnua hae; thuasalama tho ry khyh, minmin ryte looh mah ae ry khyh.18Nin sarinaw nin khe imua tuh a chih. David a ryalahtu hae nynh imua a chih vae cipaw hopya lan a rih hae; pawccecize minmin nynh, “Imua a hiin lya heize ah hopah oh zah oun ngaepah khyh; atu imua a chih vae cipaw kha pawtemou ah hopah ngan cih oh? Amaw toulou kha vawsawnaw a pyakuh sei cih,” a ci hae.19Thuasalama a ryalahtu hae nynh tarytary a hoku hae paw kha David nynh he a thae tuh, imua a chih vae cipaw a ny; te David nynh a ryalahtu hae kha, “Imua tuh a chih vae tou?” cite khia hae zah, minmin nynh, “A chih vae,” a cipya hae.
20Tetuh David tuh laekhu kyate thokuh zah tui a singkuh, chitui thuhkuh zah a boeining a liakuh. Bawipaw inn lang cceih zah a beik; te a inn lang cciate aepaw ngiakuh hae zah aepaw kha paccynpah hae zah a ae.21Te a ryalahtu hae nynh amaw kha, “Na cyipaw hynh pawtemou athua? Imua a hiin lya tuh imua hanlan looh-ae na sung zah na rah; imua he a chih tuh, na thokuh zah looh na ae,” a cipya hae.22David nynh, “Imua a hiin lya tuh looh-ae ka sung zah ka rah; pawccecize, ‘Bawipaw nynh thaw yn ccih zah imua tuh a hiin kho ung khaw, hummou a nyh?’ ka ci.23Thuasalama atu imua tuh a chih vae; pawccemou looh-ae ka sung ung cih? Bua ka hiinsah kho ung cih zawtou? Kae tuh a kalan ka cceih cih, thuasalama aning tuh ka kalan yn ki vae lan khyh,” a ci. Solomon A Pui
24Te David nynh a zu Bathsheba kha lungtangnaw a pya, a kalan cceih zah a ikhae; te Bathsheba nynh ccapaw saah zah David nynh Solomon cite min a phu. Bawipaw nynh amaw kha sungsah zah,25profeh Nathan kyate bya a taw; Bawipaw nynh a sungsah keiccuze Jedidiah cite min a phu. Ammon hae kha A Chia hae (1Sh 20.1-3)
26Joab nynh Ammon hae khua Rabbah kha tuk zah siapharan khuapi kha a law.27Joab nynh David kalan locceihtu hae kha saw hae zah, “Rabbah khua kha ka tuk vae; tuhpiaze tui alungnaw khua kha ka law vae.28Tukeiccuze atu tuhlaepaw ccungccaw hae kha pumte khua kha ryahmin tahnuakuh lah, lawtua; tuhkhyhze tuh kamaw nynh khuapi kha ka lah cih zah, ka min te khua kha ko athua vae cih,” a cipya.29Tukeiccuze David nynh ccungccaw balyn kha pynkheihlan pumte Rabbah khua lang cceih zah khua kha tuk zah a law.30Mih siapharan kya-e bawilukhung kha a lu kyate poh a khyh; tuh-e lukhung tuh sui talent ccangkheit ri zah, a lungkhu khe aphutepaw lung a um; tuh-e tuh David lu kya a khungsah hae. Aning nynh khua lungkhu e luadepaw uccaw kha mah myarya lung lan a law.31Khua lungkhu um hae paw ccungccaw hae kha poukhae hae zah thing-aw, sivaw muinzung te sivaw hae khate rya a lawsah hae, ohkhe ruanaw kya mah rya a lawsah hae. Tuhcite Ammon hae kya-e khua hae balyn tungvaw kya a cyi hae. Te David te a ccungccaw hae balyn tuh Jerusalem lang a ki hae. Amnon te Tamar
1Ccyh tuh sya aro vae. David ccapaw Absalom nynh Tamar cikuhpaw apuithyapaw ccianung lu kheit a hoi; David ccapaw Amnon nynh Tamar kha a sungsah.2Amnon tuh a ccianung Tamar keiccuze a lungria myarya thae zah amaw te amaw kha a ccisaku, pawccecize aning tuh liaccady thua zah a tungvaw hankhakheit cyi lanpaw kha Amnon elang thua kho khyh.3Amnon nynh Jonadab cikuhpaw ruiban lu kheit hoi zah, aning tuh David a upaw Shimeah ccapaw nynh thua; Jonadab tuh myarya athyaruhpaw ccungccaw nynh thua.4Aning nynh Amnon kha, “Pou siapharan ccapaw, pawccemou nin kheit koute nin kheit na mitsung houhouh khu? Nae hopah lan khyh tou?” a cipya. Amnon nynh, “Ka neitaw Absalom ccianung Tamar kha ka sungsah,” a cipya.5Jonadab nynh amaw kha, “Na ikhung kya huekuh lah, ccisakuh nyn; na paaw nynh nang do lan he yn thua te, ‘Ka ccianung Tamar kha ka kalan yn cceih sah lah, ae lanpaw looh yn pya sah, aepaw yn hyngpyapaw kha ka muih zah a kuih kya-e kha ka ae ccaw, ka muihnaw kyahin aepaw yn paccynpah sah,’ cite na hopah cih,” a cipya.6Tukeiccuze Amnon tuh huekuh zah a ccisaku nyn; siapharan nynh Amnon kha do lan he yn thua tuh, Amnon nynh siapharan kha, “Ka ccianung Tamar kha beih yn cceih sah, a kuih kya-e kha ka ae ccaw, ka muihnaw kyahin sanlou phe ning kha beih yn raepah sah,” a cipya.
7Te David nynh Tamar inn lang ccungccaw saw zah, “Na raeepaw Amnon inn lang la cceih lah, aepaw la hynpah,” a cipya.8Tukeiccuze Tamar tuh a raeepaw Amnon inn lang cceih zah Amnon tuh a la huekuh. Tamar nynh vaekhui kha lah zah a non koute a muihnaw khe sanlou lang rae zah a rua.9Te talyng-ang kha lah zah Amnon malang khe a nungpya, thuasalama ae lan a mya. Amnon nynh, “Ka kyate ccungccaw miakaw pou hae sah,” a ci. Tukeiccuze a kyate ccungccaw miakaw a pou hae.10Tetuh Amnon nynh Tamar kha, “Na kuih kya-e kha ka ae ccaw, looh kha akhaan lungkhu lang yn ccyng,” a cipya. Tukeiccuze Tamar nynh a raepyapaw sanlou kha lah zah a raeepaw Amnon kalan akhaan lungkhu lang a teekhae.11A ae ccaw cite a kalan he a naekuh tuh, Amnon nynh Tamar kha kyng zah, “Rang, ka kya yn itua, ka ccianung,” a cipya.12Tamar nynh, “Thua khyh, ka raeepaw, yn nangse nan; pawccecize hynhcihawpaw hynh Israel hae kya cyih boi khyh hae; e anungsikuhpaw hynh cyih nan!13Kae ka hanlan te, ka maethyanaw hynh teilangmou ka cciakhae kho cih? Te namaw hanlan te mah, Israel hae kya a ccouseikuhpaw lu kheit hawte na thua cih. Tukeiccuze siapharan kha hopya tua cite kae ngia; pawccecize nang te umkheih lanpaw hynh yn khee lan khyh,” a cipya.14Thuasalama Amnon nynh ngaepah khyh; aning tuh Tamar laeze a thawsaehua keiccuze kyngde zah a ikhae.
15Te Amnon nynh Tamar tuh myaryamaw bua a hua; langmawlya a la sungsahnaw laeze a huanaw tuh alehua vae. Amnon nynh amaw kha, “Thokuh lah cceih ccavae!” a cipya.16Thuasalama Tamar nynh amaw kha, “Thua khyh, ka raeepaw; kae nae deepaw hynh-e cyiseinaw hynh ka tungvaw kya ccangpaw na cyipaw laeze alehua,” a cipya. Thuasalama Amnon nynh ngaepah khyh.17A ryalahpaw ccangvaepaw kha ko zah, “E nopinung hynh ka malang te pousah lah, thuakaw kha tou,” a cipya.18(Aning nynh angkiccua kuihsae kha a kiku; pawccecize langmaw lyaze siapharan ccanung liaccady hae nynh tuhcite leih a kiku hae.) Tukeiccuze a ryalahtupaw nynh amaw kha a pousah koute thuakaw kha a tou.19Te Tamar nynh a lu vawlan buhhaw phingkuh zah a kikupaw angkiccua kha a seii; a lu vawlan a kuih khang zah a cceih, a cceih lalia lante thawte a siabia.
20A raeepaw Absalom nynh amaw kha, “Na raeepaw Amnon nynh ae ikhae vosi? Ka ccianung, daebabi lan zya um vae ii; aning tuh na raeepaw nynh thua; e hynh na thinlung kya ccyke nan,” a cipya. Tukeiccuze Tamar tuh a raeepaw Absalom inn khe daebabi lan lanmete zya a um.21E kong balyn hynh David Siapharan nynh he a thae tuh, myarya a thinria, thuasalama a ccapaw Amnon tuh a ccatawccaw athua keiccuze myarya sungsah zah detah khyh.22Thuasalama Absalom nynh Amnon kya bya hoypaw thuasah, bya thahpaw thuasah ho khyh; pawccecize Amnon nynh a ccianung Tamar kha a ikhaede keiccuze Absalom nynh Amnon kha a hua. Absalom nynh Amnon A Liaru
23Kum ning accing koute, Efraim khua pe umpaw Baal-hazor kyakhe Absalom nynh tuuming ngo poi kha tua zah siapharan ccapaw hae balyn kha a ko hae.24Absalom nynh siapharan kalan cceih zah, “Na ryalahtupaw nynh tuuming ngo poi kha ka tua; siapharan te na ryalahtu hae nynh ka kalan beih oun cceih oh,” a cipya.25Siapharan nynh Absalom kha, “Thua khyh, ka ccapaw, kae balynte kae cceih nan sah, na hanlan phupaw ripaw lang kae tangsei cih,” a cipya. Absalom nynh palei a soihbia, siapharan nynh a ccia khyh zemah hythuanaw tuh a pya.26Te Absalom nynh, “Namaw na thua khyh ze, ka unopaw Amnon tuh yn cceih sah,” a cipya. Siapharan nynh, “Pawccemou aning tuh na kalan yn cceih cih?” a cipya.27Thuasalama Amnon te siapharan ccapaw hae balyn tuh a kalan a cciasah makhia hae, Absalom nynh siapharan kha a soihbia. Absalom nynh siapharan poi hawte a paccyn.28Te Absalom nynh a ryalahtu hae kha, “Amnon tuh misutui neih zah a lung he yn paw te, phang ngaw oh lah, kae nynh, ‘Amnon kha theih oh,’ cite he kae hopah oh te, aning kha na theih cih oh. Rih nan oh; kamaw ccaccei nynh kaw kae pya oh paw thua khyh tou? Nae rawthung sah lah, nae rawhoy sah,” cite kaw a pya hae.29Tukeiccuze Absalom nynh kaw a pya hae thyhte, Absalom a ryalahtu hae nynh a cyi hae. Tetuh siapharan ccapaw hae balyn tuh thokuh hae zah mih lann raveih kha ccikute a ccue hae.
30Laanryng a um lya hae khe, Absalom nynh siapharan ccapaw hae balyn kha pong a chia hae, lu kheit san hiin khyh hae, cite David kha a thaesah hae.31Siapharan tuh thokuh zah a boeining seiikute laekhu kya a huekuh; a ryalahtu hae balyn tuh mih boeining seiikute a pe a thadyn hae.32David a upaw Shimeah ccapaw Jonadab nynh, “Siapharan ccapaw hae ccangvae hae balyn kha a chia hae, cite ka bawipaw nynh tua nan; Amnon makhae nynh a chih. Amnon nynh a ccianung Tamar kha a ikhaede nin kyate e ryalaw hynh Absalom nynh a paccynku vae paw nynh thua.33Tukeiccuze siapharan ccapaw hae balyn tuh a chih vae hae cite siapharan ka bawipaw nynh na thinlung kya tua nan; pawccecize Amnon makhae nynh a chih,” a cipya.
34Absalom tuh a ccue. Rhawviatu ccangvaepaw nynh ngawdo zah, mua zong e Horonaim laanpi kya ccungccaw patae oun cceih hae paw kha a muih.35Jonadab nynh siapharan kha, “Dotua, siapharan ccapaw hae oun cceih vae hae; na ryalahtupaw nynh ka ho hawte, akyh vae,” a cipya.36Te he a ho koute, siapharan ccapaw hae tuh oun thua hae zah mih roisawte a rah hae; siapharan te a ryalahtu hae balyn mah thawmawte a rah hae.
37Absalom tuh ccue zah, Geshur siapharan Ammihud ccapaw Talmai kalan a cceih. David tuh a ccapaw elang nin takyh a rah.38Absalom tuh Geshur lang ccue zah kum thum a um.39David siapharan tuh Amnon a chinaw konglang te lungtangnaw a hoi vae keiccuze a lungdae vae zah Absalom kha a ngae. Jerusalem lang Absalom A Ki
1Siapharan thinlung tuh Absalom kya nynh a um cipaw kha Zeruiah ccapaw Joab nynh a ny.2Joab nynh Tekoa lang ccungccaw saw zah ahawpaw nopinung kha a kosah. Joab nynh nopinung kha, “Michi elang a ngaethahpaw hawte umsaku nyn tua; chitui thuhku leite michi chi lya lawkupaw boeining kha lawkuh lah, michi elang khaw cia a rah vae paw nopinung hawte umsaku tua.3Siapharan kalan cceih lah, hynhte na hopah cih,” a cipya. Te a ho lanpaw bya kha Joab nynh a hopya.
4Tekoa khua e nopinung nynh siapharan kalan he a thua te, laekhu kya bakhungte sawtuanaw pya zah, “Pou siapharan, beih yn bawmtua!” a cipya.5Siapharan nynh, “Pawmou na vawsaw?” cite a khia. Nopinung nynh, “Thanccingte, kae tuh nomaenung nynh ka thua; ka vawpaw nynh yn chitaw vae.6Na ryalahtunung nynh ccapaw lu ning ka hoi zah ramkaw kya a ziakuh hae; a phiatu lu kheit san a um khyh keiccuze lu kheit nynh lu kheit kha zia zah phe a chia.7Atu tuh ka puizia hae balyn nynh na ryalahtunung hynh yn thonuakuh hae zah, ‘A unopaw a theihtupaw kha oun pya, a unopaw hiinnaw kha a chia keiccuze amaw kha kae theihru cih, a rho kha heize kae roh cih,’ a ci hae. Tuhcite a laehy ungpaw ka maee-e ccangkheit kha minmin nynh a the cih hae zah, ka vawpaw hanlan min thuasah, a laehypaw kha thuasah laephi vawlan te a zosah vae cih hae,” a cipya.
8Tetuh siapharan nynh nopinung kha, “Na inn lang la cceih, nang te asekuh lante kaw ka tho cih,” a cipya.9Tekoa khua e nopinung nynh siapharan kha, “Siapharan ka bawipaw, seinaw tuh kae te ka paaw ciihan kya ccah vae sah; siapharan te a bawitungkhung kya seinaw um nan sah,” a cipya.10Siapharan nynh, “Lukhakheit nynh hankhakheit ae hopya ze, ka kalan yn ko lah, aning nynh nang kha bua ae ty vae lan khyh,” a cipya.11Te nopinung nynh, “Chiise phulahtu nynh a chia vae khyh nawlan te ka ccapaw tuh chia athua khyh nawlan, siapharan nynh Bawipaw na Pachia kha na lung kya beih ccyke tua,” a cipya. Siapharan nynh, “Bawipaw tuh a hiin thyhte, na ccapaw sangrua ccangkheit sanmah laekhu lang khuakuh lan khyh,” a cipya.
12Te nopinung nynh, “Na ryalahtunung nynh siapharan ka bawipaw kha bya kaw kheit beih kae hopya tua sah,” cipah zah, aning nynh, “Hotua,” a cipya.13Nopinung nynh, “Athua lanze, Pachia ccungccaw hae kha rawsete hynhcihawpaw uccaw hynh pawccemou na paccyn? Pawccecize siapharan nynh hynh-e byapaenaw a raenaw kyahin, siapharan nynh a deepaw lu kheit kha inn lang bua a kisah khyh keiccuze amaw toulou kha bya a piaku vae.14Aening balyn tuh ah chih cih oh; laekhu kya tui alaekuhpaw suelua kho leipaw te nynh ah aloku oh. Thuasalama Pachia nynh ccungccaw hiinnaw kha ccaring lah lan khyh; dee vae paw ccungccaw kha Pachia nynh a muihnaw kyate zungzae dee athua khyh nawlan a paccyn mamin cih.15Ccungccaw hae nynh ka thin yn phangsah hae keiccuze e hynh siapharan ka bawipaw kha hopya lan kae cceih; na ryalahtunung nynh, ‘Siapharan kha ka hopah cih; a ryalahtunung nynh ka ngiapaw hynh siapharan nynh poh yn cyipah kho vosi.16Siapharan nynh a thae cih zah, Pachia rho lungkhu te kae te ka ccapaw parouh mawte oun roh cih paw ccungccapaw kuih kyate a ryalahtunung hynh yn luesah cih,’ cite a tua.17Na ryalahtunung nynh, ‘Siapharan ka bawipaw bya nynh kae kha ngaengannaw yn pya cih,’ a ci; siapharan ka bawipaw tuh Pachia vaawpaw hawte athya te ahoy phiathyanaw a hoi. Bawipaw na Pachia tuh na kya um vae sah!” a cipya.
18Tetuh siapharan nynh nopinung kha, “Nang kae khiapaw bya miakaw hynh yn phei nan,” a cipya. Nopinung nynh, “Siapharan ka bawipaw, yn hotua,” a cipya.19Siapharan nynh, “E konglang balyn kyahin Joab nynh tuanaw ae pya tou?” cite a khia. Nopinung nynh, “Siapharan ka bawipaw, nang tuh na hiin thyhte, siapharan ka bawipaw nynh na ho vae paw bya miakaw kha lukhakheit nynh voilang thuasah, ranglang thuasah mae kho lan khyh. Kaw yn pyatu tuh na ryalahtu Joab nynh thua; aning nynh e bya balyn hynh na ryalahtunung kha yn hopah.20Uccaw acyikuzia hynh paleih khylan na ryalahtu Joab nynh e hynh a cyih. Thuasalama ka bawipaw tuh laephi vawlan a umpaw uccaw balyn kha ny nawlan Pachia vaawpaw kya-e hawnaw alopaw hawnaw kha na hoi,” a cipya.
21Tetuh siapharan nynh Joab kha, “Myarya hoy, e hynh ka ua; cceih lah, ccangvaepaw Absalom kha yn kikhae,” a cipya.22Joab tuh laekhu kya bakhung zah sawtuanaw pyate siapharan kha hythua a pya; te Joab nynh, “Siapharan ka bawipaw, na ryalahtupaw nynh kae ngiapaw kha siapharan nynh nae ua keiccuze na malang maehoynaw ka mue vae cipaw kha na ryalahtupaw nynh atunin ka ny,” a cipya.23Tukeiccuze Joab tuh thokuh zah Geshur lang cceih zah Absalom kha Jerusalem lang a hoei.24Siapharan nynh, “Amaw inn lang cceih sah; ka umnaw lang yn cceih nan sah,” a ci. Tukeiccuze Absalom tuh amaw inn lang cceih zah siapharan a umnaw lang cceih khyh. David nynh Absalom A Ngaethya
25Israel hae balyn kya Absalom hawte a puithyanaw kya thehoysah lanpaw lu kheit san um khyh. A ccuphe kyate a lu kya-e bawilukhung kyacia ccaenaw um khyh.26A sang a ngoku vae ze, a sang kha tounawpaw te leih tou zah siapharan kya-e tounawpaw te shekel za ning acih, (kum takyh kum thang khe leih a ngokuh; a sang eih ari vae ze leih a ngokuh).27Absalom nynh ccapaw lu thum te a min Tamar cikuhpaw ccanung lu kheit a saah; aning tuh myarya puithyapaw nopi nynh thua.
28Tukeiccuze Absalom tuh Jerusalem kya siapharan a umnaw lang thua leite kum ning phe ccing lan a um.29Siapharan kalan yn saw ccaw cite Absalom nynh Joab kalan ccungccaw saw zah, Joab tuh yn thua khyh. Vae ningnaw ccungccaw saw zahmah yn thua lae khyh.30Tetuh Absalom nynh a ryalahtu hae kha, “Dotua oh, Joab loo tuh ka loo pe um zah barli a hoi; la cceih oh lah, maee te la soi oh,” a cipya hae. Tukeiccuze Absalom a ryalahtu hae nynh a loo kha maee te a soi hae.31Joab nynh thokuh zah Absalom kha a inn lang ccianua zah, “Pawccemou na ryalahtu hae nynh ka loo kha maee yn soipya hae?” a cipya.32Absalom nynh Joab kha, “Dotua, nang kha bya kae taw zah: Hynhlang yn cciatua, ‘Pawccemou Geshur kyate kae ccia? Khuing kya maw po ka la um ze kamaw elang ahoyhua,’ cite byakhia khylan siapharan kalan kae saw cih, kae cipya. Atu siapharan a umnaw lang yn cciasah; ka cyiseinaw a um ze, yn theih sah!” a cipya.33Joab nynh siapharan kalan cceih zah a hopya; te siapharan nynh Absalom kha a ko. Te siapharan kalan cceih zah siapharan malang laekhu khe a bakhung; te siapharan nynh Absalom kha a myng. Absalom nynh David A Rawse
1Tukoute Absalom nynh marangle ccangkheit, marang hae te a malang a ccuety lanpaw ccungccaw sung pangaw kha a paccyn hae.2Absalom tuh awkhua takaw te leih tho zah koikua kalan ccianaw laanpi pe khe leih a thadyn; te lukhakheit nynh a byathan kha byapiaku khylan siapharan malang a thuakhae ze, Absalom nynh ko zah, “Nang hynh tei khuapaw mou na thua?” cite leih a khia. Tuh-e paw nynh, “Na ryalahtu tuh Israel ram kya-e tuh phin khah phin nynh ka thua,” cite he a khung vae ze,3Absalom nynh, “Dotua, na bya tuh hoy zah akyh; thuasalama na byathan ngaepya khylan siapharan nynh a nawpaw ccungccaw um khyh,” cite leih a hopya hae.4Tuhpiaze Absalom nynh, “E ram kya byapiatu lang ka tang ravo nyn! Kaethekunaw bya te byathan a hoipaw balyn nynh ka kalan oun cceih cih hae zah, hmerarih lan bya ka piapah cih hae,” cite leih a ho.5Ccungccaw hae nynh sawtuanaw pya khylan amaw kalan a naeku vae hae ze, a kuih kha leih dyng zah leih a myng hae.6Byapiaku khylan siapharan kalan oun cceih hae paw Israel hae miakaw kha Absalom nynh tuhcite leih a cyi hae; tukeiccuze Absalom nynh Israel ccungccaw hae thinlung kha a ru hae.
7Kum pali aro koute, Absalom nynh siapharan kha, “Bawipaw kya bya ka kinkupaw kha ccingsah khylan Hebron khua lang ccianaw kaw beih yn pya.8Pawccecize na ryalahtu nynh Siria ram Geshur khua ka um lyaze byakinkunaw ccangkheit ka rae zah: Bawipaw nynh Jerusalem lang yn cciakhae ccaccing zetuh, Bawipaw kha Hebron khua kya ka beik cih, ka la ci,” a cipya.9Siapharan nynh, “Ngaengante la cceih,” a cipya. Tukeiccuze thokuh zah Hebron lang a cceihthung.10Thuasalama Absalom nynh Israel phin hae balyn kalan khe locceihtu hae kha aruh lante saw hae zah, “Mungkae roi ccahe na thae oh te, ‘Absalom tuh Hebron khua kya siapharan lang a tang vae!’ cite na sia cih oh,” a cipya hae.11Absalom nynh a ko hae paw ccungccaw za ning tuh Jerusalem kyate a cceih hae; tuh-e hae tuh pawningkhua ny leite, thinlung thyaararihte a cceih hae paw nynh thua hae.12Absalom nynh silawnaw a rae cciamang lyakhe, Giloh khua lang ccungccaw saw zah David kya-e tuanaw pyatu, Gilon minphuinpaw Ahithofel kha a kosah hae. Tuh-e aruh lante khuakhannaw tuh thawzung houhouh hoi zah Absalom a zuipaw ccungccaw hae tuh houhouh a lungchih hae. Jerusalem te David A Ccue
13Locceihtu lu kheit tuh David kalan yn thua zah, “Israel hae thinlung tuh Absalom nulang nynh a zuiku vae,” a cipya.14Tetuh David nynh Jerusalem kya a umkheih hae paw a kuihkaw e bawi hae balyn kha, “Thoku oh! Ccue oh sih, tuhkhyhze tuh Absalom kuih kyate ah lue vae lan khyh oh. Rangsakuh oh, tuhkhyhze tuh aning nynh aro mawze oun phah cih zah, ah tungvaw kya ronaw thuakhaete khuapi hynh thaloi te a bae vae cih,” a cipya hae.15Siapharan kuihkaw e bawi hae nynh siapharan kha, “Siapharan kae bawipaw nynh bya na paepaw miakaw kha na ryalahtu hae nynh cyi lan paccynkute kae um,” a cipya.16Tukeiccuze siapharan tuh thokuh zah a innbyn hae balyn nynh a zui hae; tuhzemah a lovaenung hae lu haw kha tuh inn do-oih khylan a cciatawsya hae.17Siapharan te a ccungccaw hae balyn tuh pou hae zah, innte lang kou umpaw inn kyakhe a haeung hae.18A kuihkaw e bawi hae balyn tuh a kya a zuikuh hae; Khereth hae balyn, Peleth hae balyn te Gath khua kyate amaw a zui hae paw Git minphuin za taruh hae balyn tuh siapharan malang a cceih hae.
19Te siapharan nynh Git minphuinpaw Ittai kha, “Pawccemou nang hynh kae kya na cciabua? La ki lah, siapharan ryte la um oh; pawccecize nang tuh ramccangpaw na thua zah, na inn kyate a ccuepaw mah na thua.20Inkhawnin dede nae thua zah, atunin kaemaw ryte kae vaevuisah bua cih tou? Teilang ccia lan cipaw san ka nykuh khyh. La ki lah, na puizia hae mah la kikhae hae; Bawipaw nynh atynpaw sungsahnaw te a lungzinaw kha ae la muihsah vae sah,” a cipya.21Thuasalama Ittai nynh siapharan kha, “Bawipaw tuh a hiin thyhte, siapharan ka bawipaw mah a hiin thyhte, siapharan ka bawipaw a umnaw takyh kya, chi zemah hiin zemah, tuin kyakhe na ryalahtupaw mah ka umbua cih,” a cipya.22David nynh Ittai kha, “Athua lanze, po cceih ccaleih,” a cipya. Tukeiccuze Git minphuinpaw Ittai tuh a ccungccaw hae balyn ryte, te amaw kya um hae paw imua hae balyn ryte po a cceih hae.23David a zui hae paw balyn tuh a ccia hae keiccuze ram pynpi tuh thawte a rah; siapharan nynh Kidron vaw kha zua zah, ccungccaw balyn tuh ramkaw langkhe a cceih hae.
24Abiathar tuh yn thua zah, Zadok mah Levi hae balyn ryte Pachia byakin thingkua kha puihte oun thua hae. Ccungccaw hae tuh khua lungkhu te pong a pou kou makhia hae, Pachia thingkua kha laekhu khe a nung hae.25Te siapharan nynh Zadok kha, “Pachia thingkua kha khua lungkhu lang la kikhae. Bawipaw malang maehoynaw ka mue zetuh, aning nynh bua yn kikhae cih zah, e thingkua te thingkua a umnaw hmin kha yn muihsah cih.26Thuasalama aning nynh, ‘Na tungvaw ka lungrythua khyh,’ a ci lanze, kae tuh hein kya mang ka um, ahoy a ci thyhte ka tungvaw cyih vae sah,” a cipya.27Siapharan nynh ranpibawi Zadok kha, “Dotua, daebabi lan khua lungkhu langkhe, nang te Abiathar tuh, nae ccapaw hae lu ning, namaw ccapaw Ahimaaz te Abiathar ccapaw Jonathan ryte la ki oh.28Dotua, nanning kyate ka kalan thaesah lanpaw bya yn thua mawlaezung ramkaw e vawkhu zuanaw kyakhe ka la ngaw cih,” a cipya.29Tukeiccuze Zadok te Abiathar nynh Pachia thingkua kha Jerusalem langkhe kikhae hae zah, tuin kya a umsya hae.
30David tuh raw biate, a lu bongkute a ccu ccakaete Oliv Mua langkhe a kaethung; amaw kya um hae paw balyn tuh raw biate mih lu bongkute a kaethung hae.31Ahithofel tuh aruh lante khuakhantu hae kyakhe Absalom ryte a umkheih hae cipaw kha David kya a hopya hae. Te David nynh, “Pou Bawipaw , Ahithofel nynh a pyapaw tuanaw kha ngaeenaw lang tangsah tua, cite na kalan saw ka sang,” a ci. David kya-e Dophitu Hushai
32David tuh Pachia a beiknaw hae mua dung kya he a thua tuh, Arkhi phin athuapaw Hushai tuh a angkile seiikute, a lu kya laephi phingkute David kha tungku khylan yn cceih.33David nynh, “Nang tuh ka kya na cciabua ze, ka hanlan phupaw ripaw lang na tang cih.34Thuasalama khua lungkhu lang na cceih zah Absalom kha, ‘Pou siapharan, na ryalahtu lang ka tang cih; langmawlya na paaw ryalahtu lang ka la tang hawte, atu tuh na ryalahtu lang ka tang vae cih,’ cite na hopya lanze, Ahithofel nynh a pyapaw tuanaw kha nae taepah kho cih.35Ranpibawi Zadok te Abiathar tuh khua lungkhu kya nang ryte a um hae. Tukeiccuze siapharan inn e na thaepaw miakaw kha ranpibawi Zadok te Abiathar kha hopah hae.36Mih ccapaw hae lu ning, Zadok ccapaw Ahimaaz te Abiathar ccapaw Jonathan tuh minmin ryte a umkheih hae; na thaepaw miakaw kha minmin kyate nae thaesah cih,” a cipya.37Tukeiccuze Absalom nynh Jerusalem lang he a tee lyakhe, David banpaw Hushai tuh khua lungkhu lang a tee. David Rhaw hae
1David nynh mua dung kha hary he a lawe tuh, Mefibosheth a ryalahtupaw Ziba nynh khungnin dekuhpaw lann sa ning ryte sanlou aphe za ning, misu thae aroupaw ange za kheit, hawnin thingthae za kheit te misutui saving tui-ung ccangkheit kha phu zah David kha a cciadue.2Siapharan nynh Ziba kha, “E hae hynh pawccemou nae phu?” cite khia zah, Ziba nynh, “Lann hae hynh siapharan innbyn hae a cciku lan hae thua zah, sanlou te hawnin thingthae hynh ccangvae hae nynh a ae lan hae, te misutui hynh ramkaw kya mih thawbangpaw nynh a nia lan hae paw nynh thua,” cite a khung.3Siapharan nynh, “Na bawipaw ccapaw teimou a um?” cite khia zah, Ziba nynh siapharan kha, “Jerusalem kya nynh a um, pawccecize aning nynh, ‘Atunin Israel hae nynh ka paaw peenaw kha yn pyathui cih hae,’ a ci,” cite a hopya.4Siapharan nynh Ziba kha, “Mefibosheth kya-e balyn tuh na kya-e nynh athua vae,” a cipya. Ziba nynh, “Sawtuanaw kae pya; siapharan ka bawipaw, na malang maehoynaw ka mue vae sah,” a cipya. Shimei nynh David kha Thya A Law
5David Siapharan tuh Bahurim kya he a thua te, Saul puizia athuapaw Gera ccapaw, a min Shimei cikuhpaw tuh thya a lawbia lalia lante yn pou.6Aning nynh David Siapharan te a ryalahtu hae balyn kha lung te a deih hae; ccungccaw balyn te athungpaw ccungccaw hae balyn tuh a voilang te a ranglang khe a um hae.7Thya a law lalia lante Shimei nynh, “Pou! Pou! Ccungccaw theihpaw! Ccungccaw thyapaw!8A peenaw na luapaw Saul ciihan chiise balyn tuh Bawipaw nynh namaw tungvaw a ccawsah vae; Bawipaw nynh peenaw kha na ccapaw Absalom kuih kya a pya vae. Dotua, nang tuh chiise luasahtu na thua keiccuze na ronaw tuh na tungvaw accah vae,” a cipya.
9Tetuh Zeruiah ccapaw Abishai nynh siapharan kha, “E ui chihpaw nynh siapharan ka bawipaw kha pawccemou thya a law cih? Kae ccianua sah lah, a lu khuh thoh kae pae,” a cipya.10Thuasalama siapharan nynh, “Nanning Zeruiah ccapaw hae, nanning tuh kae te pawmou asekuh? Bawipaw nynh aning tuh, ‘David kha thyalaw,’ a cipya keiccuze aning nynh kae kha thya yn lawpaw a la thua lanze, hum nynh mou amaw kha, ‘Pawccemou hynhte na cyi?’ cite a hopah kho cih?” a cipya.11David nynh Abishai te a ryalahtu hae balyn kha, “Ka ccapaw toulou nynh ka hiinnaw hynh yn ccung; e Benjamin phin hae thathy nynh tuh houh yn ccung hae ngawrei! Amaw um lan um sah lah, thya yn law ccaleih sah; pawccecize Bawipaw nynh a nawpaw nynh thua.12Bawipaw nynh ka riathaenaw kha yn muihpah cih zah, atunin thya yn lawnaw hanlan hynh Bawipaw nynh hoynaw kha poh yn pyaru kho,” a cipya hae.13Tukeiccuze David te a ccungccaw hae tuh laanpi kya cceih hae zah, Shimei tuh David te arawsekunaw mua azoubungnaw kya a cceih lalia lante David kha thya a lawbia, lung te a deih bia, vuiping te mah a hei bia.14Siapharan te a kya umpaw ccungccaw balyn tuh thawbangte Jordan vaw a thua hae; tuin kyakhe David tuh a thaw bua a umsakuh. Ahithofel kya-e Tuanaw Pyanaw
15Absalom te Israel hae balyn tuh Jerusalem thua hae zah, Ahithofel tuh amaw kya a umbua.16Arki phin Hushai, David a banpaw nynh Absalom kya he a thua te, Hushai nynh Absalom kha, “Siapharan tuh a hiinshe sae vae sah! Siapharan tuh a hiinshe sae vae sah!” a cipya.17Absalom nynh Hushai kha, “E hynh na banpaw tungvaw lungzinaw na hoipaw tou athua? Pawccemou na banpaw kya na cciabua khyh?” a cipya.18Hushai nynh Absalom kha, “Thua khyh; Bawipaw te e ccungccaw hae te Israel hae balyn nynh a po vae hae paw ccungccapaw kya-e ka thua cih zah, amaw kya ka umbua cih.19Tuhpiaze, hum rya mou ka lah cih? A ccapaw rya kha thua khyh tou? Na paaw rya kha ka la law hawte namaw rya kha ka lah cih,” a cipya.
20Te Absalom nynh Ahithofel kha, “Na tuanaw kha kaening oun pyatua; pawtemou ah cyih cih oh?” a cipya.21Ahithofel nynh Absalom kha, “Inn ngawtu lang na paaw nynh a nungsya hae paw a lovaenung hae kha la ikhae hae; te na paaw nynh nang kha ae hua vae cipaw tuh Israel hae balyn nynh a thae cih hae zah, na kya um hae paw balyn tuh mih thaw houh asae vae cih,” a cipya hae.22Tukeiccuze innccuvaw khe Absalom elang bu kha a dawpya hae; te Israel hae balyn nynh a muihnaw hae khe Absalom nynh a paaw lovaenung hae kha a ikhae hae.23Tuh ccyh lya tuh Ahithofel nynh a pyapaw tuanaw kha Pachia bya ccaccei hawmawte a tua hae; tuhcite Ahithofel kya-e tuanaw pyanaw kha David te Absalom nynh saw a tua hae.
1Tuhpiaze Ahithofel nynh Absalom kyakhe, “Ccungccaw thong haw lae ning kha pote atu khuazi ka la thokuh sah lah, David kha ka la deehui sah.2A thawbang lya te a lungthang lyakhe ka la phah cih zah ka la siisakuh cih; a kya umpaw ccungccaw balyn tuh a ccue cih hae. Siapharan kyalya kha ka la theih cih zah,3ccungccaw balyn tuh a vawpaw inn lang a cceihpaw akaenung liaccanung hawte na kalan kae kikhae cih hae. Ccungccapaw lu kheit hiinnaw kyalya kha na ccungpaw thua zah ccungccaw balyn tuh daebabi lan a um cih hae,” a cipya.4Tuh-e tuanaw pyapaw bya nynh Absalom te Israel piccan balyn kha mih lungrythuasah. Hushai kya-e Tuanaw Pyanaw
5Tetuh Absalom nynh, “Arkhi phin Hushai kha mah oun kotua oh, ho lan a hoipaw bya kha thaebua tua oh sih,” a ci.6Hushai tuh Absalom kalan he yn thua tuh, Absalom nynh amaw kha, “Ahithofel nynh hynhte a ho vae; aning nynh tuanaw oun pyapaw hawte ah cyih cih oh tou? Athua khyh ze, nang nynh oun hopya tua,” a cipya.7Hushai nynh Absalom kha, “Ahithofel nynh tuanaw oun pyapaw hynh atu ccyh kya tuh hoy khyh,” a cipya.8Hushai nynh po ho zah, “Na paaw te a ccungccaw hae tuh athungpaw rhawkaw hae nynh athua hae cipaw te ramkaw kya a taw lawpyapaw vong hawte myaryamaw mih thinria cipaw kha phe na ny. Tuhpiaze, na paaw tuh rhawtuk myarya thyapaw thua zah, rhawkaw hae kya khuazi rya lan khyh.9Atumaw heize laekarung sankhakheit kya khyhze ccangpaw hmin sankhakheit kya a rekuh vae cih. Masaty rhawtuknaw kya aening rhawkaw hae beihtaraw a chi hae ze, tuh-e bya a thaepaw miakaw nynh, ‘Absalom a zuipaw rhawkaw hae kha patae a chia vae hae,’ cite a ho cih hae.10Tetuh chindeih thinlung alopaw thinlung a hoi hae paw mih rawthungpaw rhawkaw hae heize myarya a rih vae cih hae; pawccecize Israel hae balyn nynh na paaw tuh a thungpaw thua zah a kya um hae paw tuh mih rawthung cipaw kha a ny hae.11Tukeiccuze hynhte tuanaw kae pya: Israel hae balyn tuh Dan kyate Beersheba kyacia, rili kin e laesia zeih alung hae paw zapi hae kha namaw kalan pum lan hae zah, rhawtuknaw kalan namaw ccaccei phe na cceihbua cih.12Aning kha muih khonaw pawpaw hmin kya zemah ccianua lan zah, dangtui nynh laephi a ccawphu hawte ccawphu lan; amaw thuasah, a kya um hae paw thuasah lu kheit san hiin lan khyh hae.13Khua lungkhu lang yn tee ze, Israel hae balyn nynh khua lungkhu lang liarui ccyngkute khua kya-e lung taraw ccangkheit san a laehy lei lan ciate, tuh-e khua tuh accya langkhe sue lan,” a cipya.14Absalom te Israel ccungccaw balyn nynh, “Arkhi phin Hushai tuanaw tuh Ahithofel tuanaw laeze ahoyhua,” a ci hae. Pawccecize Bawipaw nynh Absalom tungvaw ronaw a thuakhae nawlan, Bawipaw nynh Ahithofel tuanaw ahoypaw kha ro khylan a paccyn vae. Hushai nynh David A Ccuesah
15Tetuh Husai nynh ranpibawi Zadok te Abiathar kha, “Ahithofel nynh Absalom te Israel piccan hae kha hynhte khahte tuanaw a pya hae; kae nynh mah hynhte khahte tuanaw ka pya hae.16Tukeiccuze arangte ccungccaw saw oh lah, David kha, ‘Atu khuazi ramkaw e vaw zuanaw kya la um nan, pawpawte athua zemah vaw kha po la zua; tuhkhyhze tuh siapharan te a kya umpaw ccungccaw balyn tuh maemih na thua vae cih oh,’ cite la hopah oh,” a cipya hae.17Jonathan te Ahimaaz tuh Enrogel kya a ngaw hae; ryalahtunung lu kheit nynh leih cceih zah minmin kha a hopya hae, te minmin nynh leih cceih hae zah David Siapharan kha a hopya hae; pawccecize khua lungkhu lang a tee hae paw kha muihsakuh ry khyh hae.18Thuasalama imuapaw lu kheit nynh minmin kha muih hae zah Absalom kha a hopya; tukeiccuze parouh mawte arangte ccue hae zah, Bahurim khua e ccungccapaw inn kya a thua hae, tuh-e paw nynh a voidu lungkhu khe tuisung ccangkheit hoi zah, tuh-e lungkhu langkhe a rungbung hae.19Tuh-e ccungccapaw zu nynh tuisung akhu kha ahu hu zah, a vawlan khe looh a rei; tuh-e kong tuh humhung nynh mah nyh khyh.20Absalom a ryalahtu hae nynh inn kya umpaw nopinung kya he a thua hae te, “Ahimaaz te Jonathan teimou a um hae?” cite a khia hae. Nopinung nynh, “Khuraw lang phe zua vae hae,” a cipya hae. Minmin nynh ccung hae zah a muih khyh hae keiccuze Jerusalem lang a ki hae.
21Minmin a ki kou hae te, Ahimaaz te Jonathan tuh tuisung lungkhu te oun pou hae, te cceih hae zah David Siapharan kha a hopya hae. Minmin nynh David kha, “Thokuh lah, khuraw lang arangte zua; pawccecize Ahithofel nynh nang kha rawsete hynhte khahte tuanaw kha a pya vae,” a cipya hae.22Tukeiccuze David te a kya um hae paw balyn tuh thokuh hae zah Jordan vaw a zua hae; khua yn dae tuh Jordan vaw a zua leipaw lu kheit san um vae khyh.
23Ahithofel nynh tuanaw a pya hae paw kha zui khyh hae cipaw he a muih tuh, a lann kha khungnin de zah amaw khua lang a inn lang a cceih. Innbyn khuasahkunaw kha a hopah kou hae te, amaw toulou kha a nging saekuh zah a chih; te a paaw shawku kya a uu hae.24Absalom te Israel hae balyn nynh Jordan vaw he a zua kou hae tuh, David tuh Mahanaim khua a thua vae.25Absalom nynh Amasa kha Joab ccelang rhawkaw hae uktu lang a khang. Amasa tuh Ishmael ccungccaw a min Ithra cikuhpaw ccapaw nynh thua; Ithra nynh Abigail kha zu lang a umkhae, Abigail tuh Joab nung Zeruiah a neitawnung Nahash ccanung nynh thua.26Absalom te Israel hae tuh Gilead ram kya ryahmin a tahku hae.
27David tuh Mahanaim khua he a thua te, Ammon hae ram e Rabbah khuapaw Nahash ccapaw Shobi, Lodebar khuapaw Ammiel ccapaw Makhir te Gilead ccungccaw Rogelim khuapaw Barzillai nynh28ikhung hae, pakepi hae, laephi ang hae, chanvuih, barli, aepaw, thoupaw ccathae, pei hae, bia hae,29khoitui, samateitui ahaawpaw, tuu, vaetua zaw kya-e mateitui haawsahpaw kha David te a kya um hae paw nynh a ae lan hae cite a ccyngpya hae; pawccecize minmin nynh, “Rhawkaw hae tuh ramkaw kya mih vuelaw zah thawbangte tui a haw hae,” a ci hae. Absalom Chinaw
1David nynh a kya umpaw ccungccaw hae kha pum hae zah, milu thong kheit uktu, za kheit uktu cite rhawbawi hae kha a khang hae.2David nynh rhawkaw hae kha phu thum lang a phia hae: pum thum pum kheit kha Joab nynh a uk, pum thum pum kheit kha Zeruiah ccapaw Joab a neitaw Abishai nynh uk zah, pum thum pum kheit kha Git minphuinpaw Ittai nynh a uk. Siapharan nynh ccungccaw hae kha, “Kamaw mah nae kya ka cceihbua cih,” a cipya hae.3Thuasalama ccungccaw hae nynh, “Na cceihbua lan khyh. Pawccecize kaening tuh kae ccue zemah pawlang oun ria lan khyh hae. Kaening angankuh kae chi zemah pawlang oun ria lan khyh hae. Thuasalama nang tuh kaening thong haw zeih na phupaw nynh thua; tukeiccuze khua kyate bawmnaw nae pya ze ahoyhua cih,” a ci hae.4Siapharan nynh minmin kha, “Nanning nynh ahoyhua na ci oh paw kha ka cyih cih,” a cipya hae. Tukeiccuze siapharan tuh koikua pe khe thadyn zah rhawkaw hae tuh azaza athongthong te a cceih hae.5Siapharan nynh Joab, Abishai te Ittai kha, “Kae ka liate ccangvaepaw Absalom kha nebaleih lante la ccuepe vae oh,” a cipya hae. Siapharan nynh Absalom te asekuh lante rhawbawi hae balyn kaw a pya hae paw kha ccungccaw balyn nynh a thaebua hae.
6Tuhcite rhawkaw hae tuh Israel hae kha tuk khylan ramkaw lang cceih hae zah, Efraim tuhpi kyakhe rhaw a tukkuh hae.7Israel ccungccaw hae kha David ryalahtu hae nynh a tae hae, tuin nin kya ccungccaw patae chiakunaw um zah thong kuin a chih hae.8Rhawtuknaw tuh ram pynpi kya a pazaekuh; tuin nin kya thaloi te a chihpaw laeze tuhpi kya a chihpaw alunghua.
9Absalom tuh David a ryalahtu hae ryte tualeipite a tungkuh hae. Absalom tuh a lann kha ccikuh zah, lann tuh aran myarya lungpaw phaesi ku kaw khe a cceih. Absalom lu tuh phaesi ku kya phang takeihkuh zah, vaaw te lae laku kya a saekuh, a ccikupaw lann tuh po a cceih.10Ccungccapaw lu kheit nynh tuh-e tuh muih zah Joab kha, “Phaesi ku kya phang saekuhpaw Absalom kha ka muih,” a cipya.11Joab nynh a hopahtupaw kha, “Pawte-e, Absalom na muih tou! Athua lanze, pawccemou tuin kya maw chiate laekhu lang na saw khyh? Ngunphua kia haw te taeccia kha he kae pya cih paw,” a cipya.12Thuasalama tuh-e paw nynh Joab kha, “Ka kuih kya ngunphua thong kheit yn pya hae ze heize, siapharan ccapaw kha ka kuih ka hangnua lan khyh; pawccecize kae thaebuanaw kya khaw siapharan nynh namaw, Abishai te Ittai kha, ‘Kae ka liate ccangvaepaw Absalom kha thungkhaw oh!’ cite kaw ae pya oh.13Tuhlae lanze, lungzinaw hoi leite aning kha ka la chia ze (siapharan kya tuh pawpaw mah phei kho um khyh zah), nang hynh mah nae pankhae tali lan khyh,” a cipya.14Joab nynh, “Nang te hynhcite accyh ka thangsah han vae lan khyh,” a cipya. A kuih kya ccoi ccangthum ccyngkuh zah, phaesi ku kya phang a hiin ungpaw Absalom bung kha a thuing.15Te Joab kya-e rhawtuk-zunghe ccyngtu hae lu haw nynh Absalom kha koihlute thuing hae zah a chia hae.
16Tetuh Joab nynh mungkae tu zah rhawkaw hae kha a khee hae keiccuze Israel hae a deehuitu rhawkaw hae tuh oun ki hae.17Absalom kha lah hae zah tuhpi kya-e hunghuapi kalan vua hae zah, myarya lepaw lungpum a pumthin hae. Israel hae balyn tuh mih inn lang a ccue vae hae.18Absalom nynh a hiin lyakhe, “Ka min liathuinaw lanpaw ccapaw ka hoi khyh,” ci zah, Siapharan Accya kyakhe lungbing ccangkheit bingkuh zah amaw min kha a phu. Tuh-e tuh atunin cia Absalom Lungbing a ci hae. David nynh Absalom A Chipaw A Thae
19Tetuh Zadok ccapaw Ahimaaz nynh, “Ka la ccue sah lah, siapharan kha Bawipaw nynh na rhaw hae thungnaw kyate ae luesah vae, cite the ka la thaesah cih,” a ci.20Joab nynh amaw kha, “Nang nynh atunin the na thaesah lan khyh; nyalang nin kya na thaesah cih; atunin tuh siapharan ccapaw a chi keiccuze na thaesah lan khyh,” a cipya.21Joab nynh Kush minphuinpaw lu kheit kha, “La cceih lah, na muihpaw kha siapharan la hopah,” a cipya. Kush minphuinpaw tuh Joab malang bakhung zah a ccue.22Zadok ccapaw Ahimaaz nynh Joab kha, “Pawpawte athua zemah, Kush minphuinpaw nulang te kae mah ka la ccue sah,” bua a cipya. Joab nynh, “Ka ccapaw, pawccemou na ccue cih? Tuh-e the na thaesah liate lasung na mue lan khyh,” a cipya.23Ahimaaz nynh, “Pawpawte thua zemah, ka ccue cih,” a ci. Tukeiccuze Joab nynh, “Ccue,” a cipya. Ahimaaz tuh Bialae laanpi te ccue zah, Kush minphuinpaw kha po a thoih.
24David tuh koikua thyh ning laku kya a haung. Rhawviapaw nynh khualungrua kyate koikua adawkuhpaw innccuvaw lang po kae zah, ngaw he a do tuh a makhaete yn ccue cciamangpaw ccungccapaw lu kheit kha a muih.25Rhawviapaw nynh sia zah siapharan kha a hopya. Siapharan nynh, “A makhaepaw athua zetuh, thongpang yn phupaw nynh athua cih,” a ci. Aning tuh po yn cceih zah yn naekuh vae.26Te rhawviapaw nynh yn ccue cciamangpaw ccangpaw lu kheit kha a muih; rhawviapaw nynh koikua a ngawpaw kha ko zah, “Dotua, mingccangpaw a makhaete yn ccue cciamang!” a cipya. Siapharan nynh, “Aning mah thongpang yn thuakhae cih,” a ci.27Rhawviapaw nynh, “Masaty e paw nynh a ccuepaw tuh Zadok ccapaw Ahimaaz nynh a ccuepaw te nynh aloku,” a ci. Siapharan nynh, “Aning tuh ccungccaw hoypaw thua zah, thehoypaw yn thuakhae cih,” a ci.
28Te Ahimaaz nynh siapharan kha ko zah, “Marya ahoy!” a cipya. Siapharan malang laekhu khe bakhung zah, “Siapharan ka bawipaw ae doutu hae paw kha ae pyatupaw Bawipaw na Pachia tuh thehoyte um sah,” a cipya.29Siapharan nynh, “Ccangvaepaw Absalom kha a dan tou?” a ci. Ahimaaz nynh, “Joab nynh na ryalahtupaw yn saw lya tuh ngaluin-ngaluin ccae hae paw kha ka muih zah, pawte nynh athua cipaw ka nyh khyh,” a cipya.30Siapharan nynh, “Nuekuh lah, hein kya thadyntua hin,” a cipya. Tukeiccuze aning nynh nuekuh zah, phang a thadyn.
31Te Kush minphuinpaw tuh yn thua zah Kush paw nynh, “Siapharan ka bawipaw hanlan thehoypaw a um! Pawccecize Bawipaw nynh nang ae doutu hae balyn thungnaw kyate nang kha ae luesah zah, atunin phu ae lawpya vae,” a cipya.32Siapharan nynh Kush minphuinpaw kha, “Ccangvaepaw Absalom kha a dan tou?” cite a khia. Kush minphuinpaw nynh, “Siapharan ka bawipaw rhaw hae te nang kha vawsawnaw pya lan ae thonuakuh hae paw balyn tuh tuh-e ccangvaepaw hawte thua vae hae sah,” a cipya. Absalom elang David A Rah
33Siapharan tuh myarya a ngaethah zah, koikua vawlan umpaw akhaan kalan kae zah a rah; a cceih lalia lante, “Pou ka ccapaw Absalom, ka ccapaw, ka ccapaw Absalom! Nang na hanpaw kha kamaw ka la chih ravo nyn, pou Absalom, ka ccapaw, ka ccapaw!” a ci.
1“Siapharan tuh palei rah zah Absalom elang ngaethya rawkhuite a um,” cite Joab kha a hopya hae.2Tukeiccuze tuin nin e taenaw tuh rhawkaw hae balyn hanlan rawkhui nawlan a tang; pawccecize rhawkaw hae nynh tuin nin khe, “Siapharan tuh a ccapaw elang myarya a ngaethah,” cite a thae hae.3Rhawtuknaw kyate a ccuepaw rhawkaw hae nynh mih maethah zah aruh lante a ccue hae hawte, tuin nin khe rhawkaw hae tuh khua lungkhu lang aruh lante a tee hae.4Siapharan tuh a mae kha bongkuh zah, “Pou ka ccapaw Absalom, pou Absalom, ka ccapaw, ka ccapaw!” cite siapharan tuh roi myarya ccae lante a rah.5Tetuh Joab nynh siapharan kalan inn lungkhu lang tee zah, “Na hiinnaw, na ccapaw hae te na ccanung hae hiinnaw, na zu hae te na lovae hae hiinnaw a khumtu hae na kuihkaw e bawi hae mae miakaw kha maethyanaw te atunin na bong vae hae,6pawccecize nang ae hua hae paw kha na sungsah hae zah, ae sungsah hae paw kha na hua hae. Na rhawbawi hae te na kuihkaw e bawi hae tuh pawpaw mah thua khyh hae cipaw kha atunin ccaerarih lan na langsaku vae; pawccecize atunin kya Absalom tuh la hiin sah lah, kaening balyn tuh kae la chi lanze, nang tuh na lungrythua cih, cipaw ka muih.7Tukeiccuze atu palou toikuh lah, na ryalahtu hae kha nebaleih lante hopah hae; pawccecize Bawipaw min phyate bya ka kinku, na ccia khyh lanze, atu khuazi lu kheit sanmah na kya um vae lan khyh hae; tuh-e tuh na di lyate atu cia na tungvaw accah boi paw ronaw balyn laeze athah huapaw athua cih,” a cipya.8Tetuh siapharan tuh thokuh zah koikua kya a haung. “Dotua oh, siapharan tuh koikua kya a haung,” cite rhawkaw hae kha a hopya hae; te rhawkaw hae balyn tuh amaw malang oun thua hae. David kha Jerusalem lang A Ko hae
Tuh ccyh lyakhe Israel hae balyn tuh mih inn raveih lang a ccue vae hae.9Israel phin hae balyn kyakhe ccungccaw balyn tuh bya eikuh hae zah, “Siapharan nynh ah rhaw hae kuih kyate oun luesah zah, Filistin hae kuih kyate oun khum; atu tuh Absalom keiccuze ram kyate a ccue vae.10Thuasalama oun uktu lang chitui ah thuh oh paw Absalom tuh rhawtuknaw kya a chih vae. Tukeiccuze atu pawccemou siapharan kikhae lanpaw kong kha pawpaw san na ho khyh oh?” a ciku hae.
11David Siapharan nynh ranpibawi hae Zadok te Abiathar kalan ccungccaw saw zah, “Judah piccan hae kyakhe, ‘Siapharan kha a inn lang kikhae khylan nanning tuh pawccemou nya na thya oh? Israel hae balyn nynh a ho hae paw bya kha siapharan kalan phe thua vae.12Nanning tuh ka puizia, ka ru te ka saw nynh na thua oh; athua lanze, siapharan kha kikhae khylan pawccemou nya na thya oh?’ cite la hopah oh.13Te Amasa kha, ‘Nang tuh ka ru te ka saw na thua khyh tou? Nang tuh Joab ccelang ka rhawkaw hae bawipaw lang na tang khyh lanze, Pachia nynh ka tungvaw kya tuh-e ciate thuasah, tuhlaeze alung lante mah cyih vae sah,’ cite la hopah oh,” a cipya hae.14Aning nynh Judah hae thinlung kha ccungccaw lu kheit thinlung hawte a law kho keiccuze minmin nynh siapharan kha byataw hae zah, “Nang tuh na ryalahtu hae balyn ryte oun ki oh,” a cipya hae.15Tukeiccuze siapharan tuh Jordan lang a ki; Judah hae tuh siapharan kha cciadue khylan te Jordan vaw zuakhae khylan Gilgal lang a cceih hae.
16Benjamin phinpaw, Gera ccapaw Shimei tuh Judah hae ryte David Siapharan kha cciadue khylan Bahurim khua kyate arangte a cceih;17amaw kyakhe Benjamin phin hae thong kheit a um hae. Te Saul innbyn kya ryalahtu Ziba tuh a ccapaw hae lu haw lae pangaw te a ryalahtu hae lu kuin ryte siapharan malang khe Jordan vaw kalan a ccuebung hae,18siapharan innbyn kha zuakhae khylan te siapharan a ry hawte cyipya khylan vaw kha a zua hae. David nynh Shimei Thaw A Cci
Te siapharan nynh Jordan vaw a zua dyn khe Gera ccapaw Shimei nynh a malang bakhung zah,19siapharan kha, “Siapharan ka bawipaw nynh Jerusalem lang na pou nin kya na ryalahtupaw nynh ka cyiseinaw kha ka bawipaw nynh yn ccuinpah nan lah, yn liathuipah nan; siapharan nynh na lung kya beih nung nan.20Pawccecize ka sei vae cipaw kha na ryalahtupaw nynh ka nyku vae; tukeiccuze, dotua, atunin siapharan ka bawipaw kha cciadue khylan Josef ciihan hae balyn kyaze masaty kae thua vae,” a cipya.21Zeruiah ccapaw Abishai nynh, “Bawipaw nynh chitui a thuhpaw kha thya a law keiccuze Shimei hynh chia lan ccan khyh tou?” cite a khung.22Thuasalama David nynh, “Nanning Zeruiah ccapaw hae, atunin ka rhaw hae lang tang lan ciate kae te nanning tuh pawmou asekuh? Atunin Israel ccungccaw lukhakheit kha chia lan accan zawtou? Pawccecize atunin Israel hae kya siapharan ka thuapaw hynh ka nyhkuh khyh tou?” a cipya hae.23Siapharan nynh Shimei kha, “Na chih lan khyh,” a cipya. Te siapharan nynh bya a kinpyaku. David te Mefibosheth Tungkunaw
24Saul mintawpaw Mefibosheth tuh siapharan kha cciadue khylan yn cceihbung; siapharan a pou nin kyate khyndadyh lan a ki nin kyacia, a ccu mah ccikankuh khyh, a khawming mah ngokuh khyh, a boeining mah sukuh khyh.25Siapharan cciadue khylan Jerusalem kyate he a cceih te, siapharan nynh Mefibosheth kha, “Mefibosheth, pawccemou ka kya na cciabua khyh?” a cipya.26Aning nynh, “Pou siapharan, ka bawipaw, ka ryalahtupaw nynh phe yn ling; pawccecize na ryalahtupaw kae nynh amaw kha, ‘Ka hanlan lann kha khungnin yn depah, ka ccikuh cih zah siapharan kya ka cceihbua cih,’ ka cipya. Pawccecize na ryalahtupaw tuh ka ccukhou.27Aning nynh siapharan ka bawipaw kha ka konglang ae hynpya. Thuasalama siapharan ka bawipaw tuh Pachia vaawpaw te nynh na loku oh; tukeiccuze ahoy na ci hawte cyitua.28Pawccecize ka paaw innbyn hae balyn tuh siapharan ka bawipaw malang chi lan accan hae paw nynh thua hae; thuasalama na ccaboi kya a ae hae paw laku kya na ryalahtupaw hynh nae nungbua. Tukeiccuze siapharan kalan ccangpaw ngianaw kaw ka hoi ung cih zawtou?” a cipya.29Siapharan nynh amaw kha, “Na konglang tuh pawccemou na ho ung? Nang te Ziba nynh ram kha na neekuh cih oh, cite bya phe ka pae vae,” a cipya.30Mefibosheth nynh siapharan kha, “Siapharan ka bawipaw tuh inn lang khyndadyh lan nae thua nyngkae tuh, aning nynh marya lawkuh sah,” a cipya. David nynh Barzillai Ngaethyaumsahnaw
31Gilead ccungccaw Barzillai tuh Rogelim khua kyate yn cceihbung zah, siapharan kha Jordan khuraw lang cia saw khylan siapharan ryte a cceih hae.32Barzillai tuh kum sung tarya cih vae zah myarya a taw vae. Siapharan tuh Mahanaim khua a um lyakhe aning nynh looh a pya; pawccecize aning tuh myarya a hoipaw nynh thua.33Siapharan nynh Barzillai kha, “Ka kalan cceihbua lah, Jerusalem khua kya kae do-oih cih,” a cipya.34Thuasalama Barzillai nynh siapharan kha, “Siapharan ryte Jerusalem lang ka cciabua thung lanpaw tuh kae hynh kum hohzeihmou ka hiin ung cih?35Atu hynh kum sung tarya ka cih vae; ahoypaw te athahpaw kha ka phiathya ung cih tou? Na ryalahtupaw nynh ka aepaw te ka niapaw hynh a thua thua khyh cipaw ka nyh kho ung cih zawtou? Hlawsahpaw pise hae te hlawsahpaw nopi hae roi kha ka ngae kho ung cih zawtou? Tukeiccuze na ryalahtupaw hynh siapharan ka bawipaw hanlan pawccemou phupaw ari chihpaw lang ka tang lanpaw tuh?36Na ryalahtupaw nynh Jordan vaw khuraw lang syngtaraw cia siapharan kya ka cceihbua cih. Siapharan nynh tuhcihawpaw lasung tuh pawccemou yn pya cih?37Ka khua kya, ka nung ka paaw hae shawku pe khe ka chi nawlan, na ryalahtupaw hynh thawccinawte beih yn kisah. Thuasalama hein kya na ryalahtu Khimham a um; aning hynh siapharan ka bawipaw kya cceihbua sah; ahoy na ci hawte amaw kha la cyipah,” a cipya.38Siapharan nynh, “Khimham tuh ka kya a cceihbua cih, te nang nynh ahoy na ci hawte ka cyipah cih; nae ngiapaw miakaw kha kae cyipah cih,” cite a khung.39Te ccungccaw balyn tuh Jordan vaw kha zua hae zah siapharan mah a zua; siapharan nynh Barzillai kha myng zah hythua a pya, te Barzillai tuh a inn lang a ki.40Siapharan tuh Gigal lang po cceih zah Khimham tuh a kya a cceihbua; Judah hae balyn te Israel hae angankuh nynh siapharan kha a cciakhae hae.
41Te Israel hae balyn tuh siapharan kalan oun cceih hae zah, “Pawccemou kae uno Judah hae nynh nang kha ae ruh hae zah, siapharan ryte na innbyn hae te David ccungccaw hae kha Jordan vaw khuraw lang ae cciakhae oh?” a cipya hae.42Judah hae balyn nynh Israel hae kha, “Siapharan tuh kae naekuhpaw kae puizia athua keiccu nynh thua. E kong kyahin pawccemou nae thinria? Kaening nynh siapharan looh kha kae ae zawtou? Tuhkhyhze aning nynh lasung ccangkhakheit oun pya zawtou?” cite a khung hae.43Te Israel hae nynh Judah hae kha, “Kaening nynh siapharan tungvaw kya ccoupaw ccanghaw kae hoi, te David tungvaw kya mah nanning laeze alunghua kae hoi. Pawccemou nae theihrya oh? Kae siapharan kikhae lanpaw kong kha kaening nynh masaty kae ho khyh tou?” cite a khung hae. Thuasalama Judah hae bya tuh Israel hae bya laeze arehua. Sheba nynh Dounaw
1Te Benjamin phinpaw Bikhri ccapaw Sheba cikuhpaw acouseikuhpaw lu kheit a um. Aning nynh mungkae tu zah,“Pou Israel hae, kaening tuhDavid kya ccoupaw kae hoi khyh,Jesse ccapaw kya rho kae hoi khyh!Ccungccaw miakaw nae buraveih lang cceih oh,”cite a sia.2Tukeiccuze Israel hae balyn nynh David kyate pou hae zah Bikhri ccapaw Sheba kha a zui hae; thuasalama Judah hae nynh tuh Jordan vaw kyate Jerusalem cia mih siapharan kha tynkaring lan a zui hae.
3David tuh Jerusalem khua e a inn kya a thua; siapharan nynh inn do-oih khylan a cciataw hae paw a lovae hae lu haw kha a ko hae, te rhawviatu a umpaw inn kyakhe nung hae zah a kua hae, thuasalama minmin kha ikhae khyh hae. Tukeiccuze minmin kha mih chi makhia tuin kyakhe khung hae zah nomae hawte a um hae.
4Siapharan nynh Amasa kha, “Nin thum lungkhu Judah hae kha ka kalan oun ko hae lah, namaw mah umbua,” a cipya.5Tukeiccuze Amasa tuh Judah hae ko lan a cceih; thuasalama aning tuh accyh khyapyapaw laeze arohua.6David nynh Abishai kha, “Absalom laeze Bikhri ccapaw Sheba nynh aening tungvaw vawsawnaw oun pyahua cih; na bawipaw ryalahtu hae kha hoeikute Sheba kha deehui oh, tuhkhyhze tuh aning nynh akoihkuhpaw khua hae lungkhu lang a tee cih zah, aening kyate a luesei cih,” a cipya.7Abishai kha Joab ccungccaw hae, Khereth hae, Peleth hae te rhawkaw hae balyn nynh a zui hae; Bikhri ccapaw Sheba kha deehui khylan Jerusalem kyate a thokuh hae.8Gibeon kya umpaw lungtungpi myarya lepaw kya he a thua hae tuh, Amasa tuh minmin te tungku khylan yn cceih. Joab tuh rhawkaw boeining kha lawkuh zah tuh-e vawlan khe thaloi kha abu ryte a tae kyakhe taeccia te a cciabiaku; malang a ccia lyakhe tuh-e tuh phe accah.9Joab nynh Amasa kha, “Ka neitaw, na dan tou?” a cipya. Joab nynh Amasa kha myng khylan a ranglang kuih te a khawming kha a kyng.10Amasa nynh Joab kuih kya umpaw thaloi kha nyh khyh; tukeiccuze Joab nynh a vue kha thuing zah a ring tuh laekhu lang ccah zah a chih. Aning nynh vae ningnaw thuing chih vae khyh.
Te Joab te a neitaw Abishai nynh Bikhri ccapaw Sheba kha a deehui hae.11Joab ccungccapaw lu kheit tuh Amasa pe khe thadyn zah, “Joab kalan a panpaw miakaw te David kalan a panpaw miakaw nynh Joab kha zui oh,” a cipya hae.12Amasa tuh laanluepi kya a chii kyakhe a huekuh. Laanluepi kya a cceih hae paw balyn nynh amaw kha muih hae zah a thadyn hae; ccungccaw hae balyn nynh a thadyn hae paw kha Joab ccungccapaw nynh a muih keiccuze Amasa kha laanluepi kyate ramkaw lang nue zah boei a bong.13Tuhcite laanluepi kyate a nue koute tuh, Bikhri ccapaw Sheba kha deehui khylan ccungccaw balyn nynh Joab kha a zui hae.
14Sheba tuh Beth-maakah ram, Abel khua kyacia Israel phin hae balyn kalan po lekuh lan a cceih; Bikhri ccungccaw hae balyn tuh sueluakuh hae zah Joab kha a zui hae.15Joab rhawkaw hae nynh oun cceih hae zah Beth-maakah ram, Abel khua umpaw Sheba kha a koih hae; minmin nynh khua kha marung thaenuakuh hae zah rhawlungrua kha a rawse hae. Joab rhawkaw hae nynh khualungrua kha ting khylan lae kha a thae hae.16Te ahawpaw nopinung nynh khua lungkhu te, “Ngaetua oh! Ngaetua oh! Joab kha, ‘Hynhlang yn cceih, bya hopya kae ry,’ a ci cite hopah oh,” a cipya hae.17Joab tuh a kalan naekuh zah, nopinung nynh, “Joab na thua tou?” cite khia zah, aning nynh, “Ka thua,” cite a khung. Te nopinung nynh Joab kha, “Na ryalahtunung bya hynh yn ngaepya tua,” a cipya. Joab nynh, “Phang ka ngae,” cite a khung.18Te nopinung nynh, “Langmawlya tuh, ‘Abel khua kya tuanaw ngiakuh hae sah,’ cite leih a ho hae; tuhcite byathan kha leih a ccawsaku hae.19Kae tuh Israel ram kyaze daenaw a rypaw te a lungzipaw lu kheit nynh ka thua; nang nynh Israel ram kyaze nung athuapaw khua kha ro lan na ccung; pawccemou Bawipaw rho kha na roh cih?” a cipya.20Joab nynh, “Tuh-e tuh kae te sawkuh vae sah, khua kha ka laang lan khyh, ro mah ka roh lan khyh!21Tuhcite tuh thua khyh! Efraim muaram e ccungccapaw lu kheit a min Sheba cikuhpaw Bikhri ccapaw nynh David Siapharan kha rawsete a kuih a hangnua; amaw makhae kha yn pya lah, khua kyate ka pou cih,” cite a khung. Nopinung nynh Joab kha, “Tuh-e paw a lu kha khualungrua kyate na kalan kae vuapah cih,” a cipya.22Te nopinung nynh ahawpaw paccynnaw te ccungccaw balyn kalan a cceih. Bikhri ccapaw Sheba lu kha pae hae zah, Joab kalan khe a vuapya hae. Joab nynh mungkae tu zah khua kyate a pou hae, mih balynte mih inn raveih lang a cceih hae, Joab tuh siapharan kalan Jerusalem lang a ki.
23Joab tuh Israel rhawkaw balyn a uktu rhawbawi nynh thua; Jehoiada ccapaw Benaiah nynh Khereth hae te Peleth hae kha a uk hae;24Adoram tuh nangsete ryalawsahnaw kya a uktu nynh thua; Ahilud ccapaw Jehoshafat tuh ccazing kyngtu nynh thua;25Sheva tuh ryaccinkhan nynh thua; Zadok te Abiathar tuh ranpibawi hae nynh thua hae;26Jair ccungccaw Ira hynh mah David ranpibawi nynh thua. David nynh Gibeon hae Phulawnaw
1David ccyh lyakhe kum thum lungkhu, kum kheit koute kum kheit ccakanccih zah, David nynh Bawipaw kha a khia. Bawipaw nynh, “Saul te a innbyn tungvaw kya chiise luasahpaw seinaw a um, pawccecize aning nynh Gibeon hae kha a chia hae,” a ci.2Tukeiccuze siapharan nynh Gibeon hae kha ko hae zah a hopya hae. (Gibeon hae tuh Israel hae thua khyh hae, Amor hae a laehy hae paw nynh thua hae; Israel hae nynh minmin kha kae haang cih oh cite bya a la kinpyaku hae zemah, Saul nynh Israel hae te Judah hae kha myarya pankhae hae zah minmin kha maemih lan a zuaku.)3David nynh Gibeon hae kha, “Pawmou kae cyipah cih oh? Nanning nynh Bawipaw rho kha hythua na pya nawlan oh, pawtemou seithyaanaw kae rae cih?” a cipya hae.4Gibeon hae nynh amaw kha, “Kaening te Saul te a innbyn laku e byathan hynh sui te ngun kong thua khyh; Israel ccungccaw lu kheit sanmah kae theih lan khyh,” a cipya hae. Aning nynh, “Nae hanlan pawmou cyipyaku na ry oh?” a cipya hae.5Minmin nynh siapharan kha, “Kaening nynh Israel ram pynpi kya umnaw hmin kae hoi khyh nawlan, kaening hynh oun maemih zah ro lan a paccyntupaw6a ccapaw hae kya-e lu sari kha kae kuih kalan oun pya lah, Bawipaw mua vawlan Gibeon khua kya Bawipaw malang khe minmin kha kae sae cih hae,” a cipya hae. Siapharan nynh, “Minmin kha kae pya cih oh,” a cipya hae.
7Thuasalama siapharan nynh Saul ccapaw Jonathan a ccapaw Mefibosheth kha tuh a haang, pawccecize David te Saul ccapaw Jonathan nynh Bawipaw malang khe byakinkunaw a la rae hae.8Aiah ccanung Rizpah te Saul nynh a saah hae paw ccapaw lu ning Armoni te Mefibosheth kha thuasah, Saul ccanung Merab te Meholah khuapaw Barzillai ccapaw Adriel nynh a saah hae paw ccapaw lu pangaw kha thuasah siapharan nynh a ko hae;9David nynh minmin kha Gibeon hae kuih kalan a pya hae, Gibeon hae nynh minmin kha Bawipaw malang mua vawlan khe thuing hae zah, lu sari mawte a chihkheih hae. Minmin tuh barli loohrue takaw lyakhe a chia hae.
10Tetuh Aiah ccanung Rizpah nynh loohrue takaw ccyh kyate vaawlang te khuaa a raw makhia buriboei kha lah zah lung vawlan khe a phaeku; khuadae ccyh kyaze mih rhua vawlan khe azouthyapaw pavaw hae kha ccusah khyh hae, khuazi ccyh kya mah sarepaw hae kyate a thungkhaw hae.11Aiah ccanung Rizpah, Saul a lovaenung nynh tuhte a cyipaw kha David kya he a hopah hae tuh,12David nynh cceih zah Filistin hae nynh Saul kha Gilboa mua kya a chia nin hae ze, Filistin hae nynh a saenaw hae Bethshan khua e zapi tungkunaw laanpi kya-e mih rhua a ruhtu hae Jabesh-gilead khuaccaaw hae kyakhate Saul ru te a ccapaw Jonathan ru kha a law.13Aning nynh tuin kya umpaw Saul ru te a ccapaw Jonathan ru kha a cciakhae; a thuing hae paw ccungccaw hae mih ru kha a pum hae.14Saul ru te a ccapaw Jonathan ru kha Benjamin ram Zela khua umpaw a paaw Kish shawku kyakhe a uu hae; siapharan nynh kaw a pya hae paw miakaw kha a cyi hae. Tuh-e koute ram hanlan a ngia hae paw kha Pachia nynh a ccoupya hae. David Ccungccaw hae tungvaw Amia Ccungkunaw (1Sh 20.4-8)
15Filistin hae nynh Israel hae kha bua tuk hae zah, David te a ryalahtu hae tuh a cceihbung hae. Filistin hae kha tuk hae zah, David tuh myarya a thawbang.16Ccungccaw lepaw hae mintaw lu kheit athuapaw Ishbi-benob nynh sohin shekel za thum aripaw ccoi te zunghe thawpaw kha ccyngkuh zah, David kha ka theih cih, a ci.17Thuasalama Zeruiah ccapaw Abishai nynh amaw kha bawm khylan yn thuanua zah, Filistin paw kha tuk zah a chia. Tetuh David kha a ccungccaw hae nynh, “Israel maeekhua kha na thesei khyh nawlan, rhawtuknaw lang kae kya na cceihbua vae lan khyh,” cite byakinkute a hopya hae.
18E koute Gob kyakhe Filistin hae ryte rhawtukkunaw bua a um; Hushath ccungccaw Sibbekai nynh ccungccaw lepaw hae mintaw lu kheit athuapaw Saf kha a chia.19Te Gob kyakhe Filistin hae ryte ccangpaw rhawtukkunaw bua a um; Bethlehem khuapaw Jaare-oregim ccapaw Elhanan nynh boeikuanawpaw phaeccya cia acihpaw ccoi alua a kyngpaw Git ccungccaw Goliath kha a chia.20Te Gath kyakhe rhawtukkunaw bua a um, tuin kyakhe a pyn myarya lepaw ccungccapaw lu kheit, a kuihdung ccangtaruh cci, a ccudung ccangtaruh cci, abalynte ccangkuin lae pali asaepaw a um; aning mah ccungccaw lepaw hae ciihan nynh athuabua.21Aning nynh Israel hae kha he a theihrya hae tuh, David a upaw Shimei ccapaw Jonathan nynh amaw kha a chia.22E lu pali hae tuh Gath khua kya um hae paw ccungccaw lepaw hae ciihan nynh athua hae; David te a ryalahtu hae kuih te a chih hae. David A Lungtuanaw Hlaw (Sam 18.1-50)
1Bawipaw nynh David kha a rhaw hae balyn kuih kyate thuasah, Saul kuih kyate thuasah a luesah nin khe, aning nynh e hlaw hynh Bawipaw kalan a sah.2David nynh:Bawipaw tuh ka lungpi,ka rhawlungrua te yn luesahtu,3Ka Pachia, ka khynnaw lungpi,ka khynnawpaw ka khawriaphua teyn khumpaw saki,ka rhawhohung te ka khynnaw,ka khumtu nynh thua;yn rawsetu hae kyate nae khum.4Thehoysah lan angaekuhpawBawipaw kha ka ko zah,ka rhaw hae kyate khum ka thua.
5Pawccecize chinaw tuileih nynh yn koihlu,ronaw tuithaw nynh yn luathin.6Chinaw arui nynhphang yn khethinku;chinaw kaang nynh phang yn kaesah.
7Ka vawsaw lyakhe Bawipaw kha ka ko;ka Pachia kha ka ko.A beikinn kyate ka roi khayn thaepah zah,ka sianaw tuh a nakaring kyaphe a thua.
8Pachia a thinria keiccuze laephi tuhhy zah a thyngkuh;vaawlui leihpaw hae mahthyngkuh hae zah a hy hae.9A naduh kyate maekhuhpouthung zah,a khalang kyate aruapaw maeesoi tezaezae epaw maeehue apou.10Vaawlui kha nesah bung zahyn rungbung;marae zipingpaw mohnaw tuha ccu kaw kya a um.11Cherubim kha ccikuh zah a zou;khivae sake vawlan kheamaw kha a muih hae.12Mohnaw athuapawmaeking thaawkalaepaw tetui apumkuhpaw khaa pepan po voilu lanbongnawpaw lang a rae.13A malang e phaephae akpaw kyatemaeehue tuh zaezae a e.14Bawipaw mah vaawlui khekholung lang thyh zah,Ahang Huaccepaw nynha roi a saw.15Te a the kha kaw zah,rhaw hae kha a phiasaku hae;ria he a kawsah tuh,phiariphiarae a ccue vae hae.16Bawipaw nynh pe hae zah,a naduh kyate hy he a saw tuh,rilipi kaw phe lang zah,laephi aleihpaw mah phe alang.
17Bawipaw nynh ahangnaw kyateyn dyngnuakuh zah yn hoeilang;myarya khupaw tui lungkhu kyatepo yn sue.18Athungpaw ka rhaw hae kyate thuasah,kae yn hua hae paw kyate thuasah yn luesah;pawccecize minmin tuh ka hanlanmyaryamaw a thung hae.19Minmin nynh ka vawsaw ccyhlyakhe yn thuanua hae,thuasalama Bawipaw tuhyn bawmtu nynh thua.20Akopaw hmin kalan yn cciakhae;Ka tungvaw a lungrythua keiccuze yn luesah.
21Bawipaw nynh ka dingnaw thyhte lasung yn pya;ka kuih a thyaa thyhte yn pyaru.22Pawccecize Bawipaw laanpi khaka zui zah, seinaw raeteka Pachia kyate ka phiakuh khyh.23Pawccecize a phungzae haebalyn kha ka zui zah,a phungbya hae khaka vua khyh.24A malang ccaenaw um leipawka thua zah, hoyleinaw kha ka sibia.25Tukeiccuze Bawipaw nynhka dingnaw thyhte thuasah,a muihnaw kya ka thyaa thyhtethuasah yn pyaru vae.
26A lungzipaw tungvaw kyalungzinaw kha na langsaku,ccaenaw a um leipaw kyaccae lan um leinaw khana langsaku.27Athyaapaw ccungccaw kyathyaanaw kha na langsaku;ccungccaw hoyleipaw kyarawsenaw kha na langsah.28Zakaw a sangsakuhpawccungccaw kha na khum,thuasalama lysakunawmitdae a dae hae paw khana biabung hae.29Pou Bawipaw , nang tuhka maeekhua nynh na thua ccaccing;Bawipaw nynh ka mohnaw khaa awsah.30Namaw liate ka rhaw hae khaka ro kho hae,ka Pachia liate khualungrua khapo ka zou kho.31E Pachia tuh a laanpi phe accing;Bawipaw byakinpyakunaw nynhahmepaw kha ccaekia akhan;Aning tuh amaw kyaa rekuh hae paw balyn hanlankhawriaphua nynh thua.
32Bawipaw laelanhummou Pachia athua?aening Pachia laelanhummou lungpi athua?33Pachia nynh thawzung khaka tae kya yn khiidepah zah,ka laanpi kha ako lanteyn hungpya.34Ka ccu kha sazuh ccu hawtea liazawsah zah,ahangnaw khe khyndadyh lanyn nung.35Ka kuihbaw nynh sohin li khaa sue kho nawlan,ka kuih kha rhawtuk nawlanyn ccangpya.36Na khumnaw khawriaphua khanae pya vae zah,nae bawmnaw nynhyn lesaesah vae.37Ka ccianaw laanpi khanae kosahpah zah,ka ccu tuh thei khyh.38Ka rhaw hae khaka deehui hae zah ka ro hae;ka maemih makhia haeka kitaw khyh hae.39Minmin kha ka maemih hae;a thokuh kho lei lan hae,ka bua hae zah,ka ccu kaw kya a khuliakuh hae.40Pawccecize rhawtuknaw hanlanthawzung kha ka tae kyanae khiidepya;ka rhaw hae kha ka zakaw khena bakhungsah hae.41Ka rhaw hae kha ka kyatena maeleihsakuh hae zah,kae yn hua hae paw kha ka ro hae.42A do hae zemah minmina khum lan hae pawhumhung mah um khyh;Bawipaw kalan a sia hae zemahkhungru khyh hae.43Vuiping hawte phe khui lanka miade hae;laanpi kya-e tuiccua hawte,ka syde hae.44Ccungccaw hae ryte rhawkunawkyate nae luesah;minphuin hae lu lang nae nung;ka ny boi leipawccungccaw hae nynhrya oun lawpya hae.45Ramccang hae tuh bohkuteka kalan oun cceih hae;ka bya he a thae takaw hae te,ka kaw a ngae hae.46Ramccang hae tuhmih thawthah zah,mih rhawlungrua lungkhu tethyngkute oun pou hae.
47Bawipaw tuh a hiin!Ka lungpi tuh thehoyte um sah,Yn khumtu lungpi athuapawka Pachia tuh hangthungte um sah.48Pachia tuh phulawrunawyn pyatu thua zah,ccungccaw hae kha ka zakawa sangsahtu hae nynh thua;49ka rhaw hae kyatepoh yn thuaatu nynh thua;yn rawsetu hae luki langnae hangthung;a puathopaw ccungccaw haekyate nae luesah.
50Tukeiccuze, pou Bawipaw ,minphuin hae laku kyakae thehoysah cih zah,na min thehoysahnaw hlaw khaka sah cih.51Pachia nynh amaw a khangpawsiapharan kha taenaw lepaw a pya;chitui a thuhpaw David tea ciihan hae kyaatynpaw sungsahnaw khazungzae a langsahpya hae.David nynh Nyathya Hopaw Bya
1E hynh David nynh nyathyakou a hopaw bya nynh thua:Jesse ccapaw,Pachia nynh a hangthungpaw,Jakob Pachia nynh chitui a thuhpaw,Israel hae elang hlaw hoypawa phuapaw David bya tuh:
2Bawipaw muisaw nynhkae kha mangte bya a ho,a bya tuh ka lae kya a um.3Israel Pachia nynh a ho vae,Israel lungpi nynh yn hopya vae:Ccungccaw hae kha dingnaw teuk hae zah, Pachia rawrite a uktupaw tuh,4awkhua e awnaw hawte thua zahmaeking athyaapaw awkhua ccyhkya yn thuathungpawkhuanin te nynh aloku,khuaa a rah koute laephi vawlanlonua a thosahpawawnaw te nynh aloku.
5Ka innbyn tuh Pachia malangtuh-e hawte thadyn khyh tou?Pawccecize kamaw rytezungzae tynpaw byakinnaw khaa rae vae,atyn-are kha ccingsah zaha khynsah vae.Kamaw bawmnaw balyn teka rynaw khaccingsah leite tou a um cih?6Thuasalama Pachia pawlangrialei hae paw tuh vuapaw hinpawhawte nynh athua hae;pawccecize minmin kha kuih telaw kho thua khyh hae;7khah-e hae kha kyng nawlansivaw ccong khyhzeccoi kha mang aho.Khah-e hae kha maee tekhaleih soi athua hae.Athungpaw David Rhawkaw hae (1Sh 11.10-41)
8E hae tuh David nynh a hoipaw athungpaw rhawkaw hae nynh thua hae: Takhemon ccungccapaw Josheb-Basshebeth tuh lu thum hae kyaze lupi nynh thua; aning nynh a ccoi ccyngkute ccungccaw za tarya kha ccyh kheit kya a chia hae.
9Tuh-e paw koute he a zuipaw tuh Ahohi ccapaw Dodo a ccapaw Eleazar nynh thua. Rhawtuk khylan a sueluakuh hae paw Filistin hae kha minmin nynh a dou lya hae ze, aning tuh David ryte a umkheih hae. Israel hae nynh nulang a ki lya hae ze,10aning tuh a umnaw hmin kya phang a thadyn. A kuih tuh bang zah thaloi kya phe a ngeikuh lan cia, Filistin hae kha a chia hae; Bawipaw nynh tuin nin khe taenaw lepaw kha a rae. Israel hae tuh a chih hae paw kya-e uccaw kha khahku khylan kyalya nynh Eleazar kalan a ki hae.
11Amaw koute he a zuipaw tuh Harar ccungccapaw Agi ccapaw Shammah nynh thua. Filistin hae tuh Lehi kya a sueluakuh hae, Lehi kyakhe bia ku phe abeihpaw loo a um. Israel rhawkaw hae tuh Filistin hae kyate a ccue hae.12Aning nynh loo ngaelung khe thadynnaw hmin lawkuh zah, tuh-e hmin kha thungkhawte Filistin hae kha a chia hae; te Bawipaw nynh taenaw lepaw kha a rae.
13Loohrue ccyh azaw takaw lyakhe mih cciakhaetu hae sung thum kya-e lu thum tuh Adullam lungkarung kya umpaw David kalan a cceih hae, tuh ccyh lyakhe Filistin hae phu kheit tuh Refaim accya kya a rya hae.14David tuh rhawlungrua lungkhu um zah, Filistin rhawviatu rhawkaw hae tuh Bethlehem khua kya a um hae.15David nynh a lawleih zah, “Lukhakheit nynh koikua pe umpaw Bethlehem tuisung kya-e tui kha ka nia lan yn pya ravo nyn!” a ci.16Tetuh athungpaw rhawkaw lu thum hae nynh Filistin hae ryahmin kha roh hae zah koikua pe umpaw Bethlehem tuisung kya-e tui kha the hae zah David kalan a cciakhae hae. Thuasalama David nynh nia leite Bawipaw malang khe moh lae zah,17“Pou Bawipaw , e tui hynh nia leite ka um sah. Ka chi ze ka chih cite a cceih hae paw chiise kha ka neih kho cih zawtou?” a ci. Tukeiccuze aning nynh neih khyh. Tuh-e rhawkaw hae lu thum nynh tuhcite rya a law hae.
18Joab neitaw Zeruiah a ccapaw Abishai tuh Ccungccaw Sung Thum hae kyaze lupi nynh thua. A ccoi te ccungccaw za thum kha tuk hae zah a chia hae keiccuze Lu Thum hae kya a minthaanbua.19Aning tuh Ccungccaw Sung Thum hae kyaze a minthaan huaccepaw thua zah mih rhawbawipaw lang a tang; thuasalama Lu Thum hae hawte tuh a minthaan khyh.
20Kabzeel khuapaw Jehoiada ccapaw Benaiah tuh arawthungpaw rhawkaw thua zah, ryalaw lepaw a lahtupaw nynh thua; Moab ccungccaw Ariel ccapaw hae lu ning kha a chia hae. Vuiraw accaw nin khe cceih zah laekarung lungkhu umpaw chindeih kha a chia.21Izip ccungccaw apuithyapaw lu kheit kha a chia. Izip paw tuh a kuih kya ccoi a hoi; thuasalama Benaiah nynh hoitang ccyngkute ccianua zah, Izip paw kuih kya-e ccoi kha a lua koute tuh-e ccoi maw te amaw kha a chia.22Jehoiada ccapaw Benaiah nynh tuh-e ryalaw hae tuh lah zah athungpaw rhawkaw hae lu thum kya a minthaanbua.23Aning tuh ccungccaw Sung Thum hae kya a minthaanbua, thuasalama Lu Thum hae hawte tuh a minthaan khyh. David nynh a pyn rhawviatu hae lupi lang a nung.
24Joab neitaw Asahel tuh ccungccaw Sung Thum hae kya a umbua; Bethlehem khuapaw Dodo ccapaw Elhanan,25Harod khuapaw Shammah, Harod khuapaw Elika,26Palti ccungccaw Helez, Tekoa khuapaw Ikkesh a ccapaw Ira;27Anathoth khuapaw Abeizer, Hushath ccungccaw Mebunnai;28Ahohi ccungccaw Zalmon, Netofah ccungccaw Maharai,29Netofah ccungccaw Baanah ccapaw Heled, Benjamin phin hae khua Gibeah ccungccaw Ribai a ccapaw Ittai,30Pirathon ccungccaw Benaiah, Gaash pe umpaw accya e ccungccaw Hiddai,31Arbath ccungccaw Abialbon, Bahurim ccungccaw Azmaveth,32Shaalbon ccungccaw Eliahba, Jashen ccapaw hae: Jonathan,33Harar ccungccaw Sharar ccapaw Ahiam,34Maakah ccungccaw Ahasbai ccapaw Elifelet, Gilon ccungccaw Ahithofel ccapaw Eliam,35Karmel ccungccaw Hezro, Arbi ccungccaw Paarai,36Zobah ccungccaw Nathan ccapaw Igal, Gad ccungccaw Bani,37Ammon ccungccaw Zalek, Zeruiah ccapaw Joab a rhawtuk-zunghe ccyngtu Beeroth khuapaw Naharai,38Ithri ccungccaw Ira, Ithri ccungccaw Gareb,39Hit ccungccaw Uriah: mih balynte sung thum lu sari acih hae.
David nynh Israel te Judah Milu A Ria (1Sh 21.1-27)
1Israel hae tungvaw kya Bawipaw thinrianaw tuh maee lang rua zah, minmin kha rawsete aning nynh David kha tuhou zah, “La cceih lah, Israel te Judah ccungccaw hae kha milu ria hae,” a cipya.2Tukeiccuze siapharan nynh Joab te a kya umpaw rhawbawi hae kha, “Israel phin hae balyn kalan khe, Dan kyate Beersheba kyacia, po lekuh lan la cceih oh lah, ccungccaw hae kha la ria oh, ccungccaw hohzeihmou a um hae cipaw ny ka ry,” a cipya hae.3Thuasalama Joab nynh siapharan kha, “Bawipaw na Pachia nynh ccungccaw hae kha aleit za kheit pungzaesah hae sah lah, tuh-e tuh siapharan ka bawipaw nynh a mit te muih kho hin vae sah! Thuasalama siapharan ka bawipaw nynh pawccemou hynh-e ryalaw hynh law na ry?” a cipya.4Thuasalama siapharan bya nynh Joab te rhawbawi hae kha a tae hae. Tukeiccuze Joab te rhawbawi hae tuh Israel ccungccaw hae kha milu ria khylan siapharan malang te a cceih hae.5Jordan vaw kha zuate Aroer khua te accya ngaelung umpaw khua kyate Gad langkhe thokuh hae zah, Jazer khua lang po a cceih hae.6Te Gilead te Hit hae ram kya umpaw Kadesh kya a thua hae; te Dan a thua hae, Dan kyate Sidon ram lang kouleih hae zah,7Tair rhawlungrua te Hiv hae te Kanaan hae khua miakaw kya a thua hae; te Judah ram Neged langkhe cceih hae zah Beersheba kyacia a thua hae.8Tuhcite ram pynpi balyn cceih hae zah sawpaw sah takua te nin kuin aro kou hae te Jerusalem bua a thua hae.9Joab nynh milu ccazing a law hae paw kha siapharan a pya: Israel ram kya thaloi kyng khopaw milu cciing tarya um zah, Judah ram kya milu cciing pangaw a um. David Seinaw kha Byapianaw
10Thuasalama David nynh ccungccaw milu a ria koute a lungvaw asaw. David nynh Bawipaw kha, “Ka cyipaw kya myaryamaw ka sei vae. Pou Bawipaw , na kalan saw ka sang, na ryalahtupaw ka cyiseinaw hynh beih yn vuapah; pawccecize myarya lepaw ngaeenaw rya kha ka lawsei vae,” a cipya.11David nynh awkhualan awkhua he a tho te, Bawipaw bya tuh David a profehpaw Gad kalan yn thua zah,12“La cceih lah, David kha la hopah: Bawipaw nynh hynhte a ho: Uccaw ccangthum kae pya, tuin kya-e ccangkheit kha pokuh lah, tuh-e tuh na tungvaw ka cyih cih, a ci cite la hopah,” a cipya.13Tukeiccuze Gad nynh David kalan cceih zah, “Na ram kya kum thum lungkhu ccakanccinaw pui tou? Tuhkhyhze sawpaw sah thum lungkhu rhaw hae nynh deekute na rhaw hae kyate ccue tou? Tuhkhyhze na ram kya nin thum lungkhu shethya thua tou? Yn sawtupaw kalan ka kikhaepya lanpaw aphi kha hoyte tua lah, byapaeku tua,” a cipya.14David nynh Gad kha, “Myarya lepaw lungriathaenaw kya nynh ka um; Bawipaw kuih kya ccah oh sih, pawccecize a thawccinaw tuh myarya ale; thuasalama ccungccaw kuih kya tuh ka ccah nan sah,” a cipya.
15Tukeiccuze Bawipaw nynh awkhua te accyh khyapaw kyacia Israel hae tungvaw kya shethya thuasah zah, Dan kyate Beersheba kyacia ccungccaw thong sung sari achih.16Vaawpaw nynh Jerusalem kha ro khylan a kuih he a dyngnua tuh, tuh-e hoyleinaw konglang te Bawipaw tuh ngaesikuh zah, ccungccaw hae kalan ronaw a thuakhaepaw vaawpaw kha, “Azaw vae; na kuih kha khin ccavae,” a cipya. Te Bawipaw vaawpaw tuh Jebus ccungccaw Araunah kya-e huimin pe khe a um.17Ccungccaw hae a theihpaw vaawpaw kha David nynh he a muih tuh, aning nynh Bawipaw kha, “Ka makhae kyalya nynh ka sei, ka makhae kyalya nynh hoyleinaw kha ka rae; e tuu hae nynh pawmou a cyi hae? Na kuih tuh kae te ka paaw innbyn tungvaw kya um vae sah, cite ka ngiaku,” a cipya. Huimin kya David kya-e Silawhang
18Tuin nin khe Gad nynh David kalan yn cceih zah, “Cceih lah, Jebus ccungccaw Araunah kya-e huimin kyakhe Bawipaw hanlan silawhang kha raepah,” a cipya.19Gad bya thyhte, David tuh Bawipaw nynh kaw a pya hawte a cceihthung.20Araunah nynh he a do tuh, siapharan te a ryalahtu hae nynh amaw kalan oun ccia hae paw kha a muih; te Araunah nynh pou zah siapharan malang laekhu kya a bakhung.21Araunah nynh, “Siapharan ka bawipaw nynh pawccemou na ryalahtupaw kalan nae ccia?” a cipya. David nynh, “Ccungccaw hae kya shethya hynh adae ccaw cite, Bawipaw hanlan silawhang raepya nawlan na huimin hynh re khylan nynh kae ccia,” a cipya.22Araunah nynh David kha, “Siapharan ka bawipaw nynh ahoy na ci hawte lawkuh lah, silawtua; maee-ute silawnaw lanpaw tangnuapaw hae a um; maeething lanpaw tuh looh tinnawpaw thing te tangnuapaw taphu hae a um.23Pou siapharan, e hae balyn hynh Araunah kae nynh siapharan kha kae pya,” a cipya. Te Araunah nynh siapharan kha, “Bawipaw na Pachia nynh ae ccoupah vae sah,” a cipya.
24Thuasalama siapharan nynh Araunah kha, “Thua khyh, amee pyate kae re cih; Bawipaw ka Pachia hanlan amee pya leipaw maee-ute silawnaw kha ka rae lan khyh,” a cipya. Tukeiccuze David nynh huimin te tangnuapaw hae kha ngunphua shekel sung pangaw te a re.25David nynh tuin kyakhe Bawipaw elang silawhang kha rae zah, maee-ute silawnaw te ccawkunaw silawnaw kha a rae. Tukeiccuze ram hanlan a ngiapaw kha Bawipaw nynh thaepah zah, Israel ram kyate shethya tuh a daesah.

Bible Society of Myanmar

https://app.library.bible/content/1a340f5ae072b2f4

expand_more
chevron_leftNakaraang Kabanata
chevron_rightSusunod na Kabanata