1 John5
1Misiwe awen kaa taapwehtahk Jesus e aawiyich Christ Chishemanituuh utawaashiimitutaakuu. E saachihiihkw maak uhtaawiimaau kaye aniyuuh utawaashiimh chisaachihaanuyuuh.2Ekut wehchi chischeyihtamuhkw e saachihiimuhkw Chishemanituu utawaashiim e saachihiihkw Chishemanituu kaye e ihtuutamuhkw e itashumitahkw.3E ihtuutamuhkw misiwe e itashumitahkw Chishemanituu ekut wehchi nuukuhch e saachihiihkw. Namui maak aayimaniyuu chechii ihtuutamuhkw aniyuu e itashumitahkw.4Wesh an awen kaa pimaachihiikut Chishemanituuh namui chii shaakuuchihiikuu machihtwaawiniyuu utah aschiihch. Chitaapwehtamuwinuu eukw waachihiikuyihkw chechii shaakuuchihtaayihkw machihtwaawin utah aschiihch.5Anichii kaa taapwehtahkwaau Jesus e aawiyich Chishemanituu Ukusisa eukunich siyaakuuchihtaatwaau machihtwaawiniyuu utah aschiihch.6Wiya Jesus Christ chii takushinuu Chishemanituu e chii itashumikut chechii siikahaahtuwaakanuut nipiihch, kaye chechii wanihtaat umihkw aashiteyaahtikuhch kaa chiistaaskuhwaakanuut. Namui uhchi takushinuu mikw chechii siikahaahtuwaakanuut nipiihch maak eyuu chechii wanitaat umihkw.7Kaa payehchisiit Ahchaahkw maak eukw tepaatutahk uyuu. Taapweu maak uu Ahchaahkw.8Nishtuyich chuuhchi wiihtamaakunaanuu chechii uhchi chischeyihtamuhkw Jesus e aaut Chishemanituu Ukusisa. Ahchaahkw chiwiihtamaakunuu, ekw maak nipiih ekw maak umihkw. Misiwe uyuuh peyakunihch ishi wiihtamaachemakanh taapwe Jesus e aaut Chishemanituu Ukusisa.9Chitaapwehtenaanuu maan taan e itaachimushtaatahkw awen utah aschiihch. Uste maak iteyihtaakuniyuu chechii taapwehtamuhkw taan e itaachimut Chishemanituu wesh wiya uyuu utipaachimuwin. Eukw maak uyeyuu kaa itaachimaat Ukusisa.10Awen taapwe e taapweyimaat Chishemanituu Ukusiyuu utinam kaye mamechiminam uyuu tipaachimuwiniyuu. Awen maak ekaa kaa taapwehtawaat taan e itaachimuyich Chishemanituuh itweu e nanatayich, wesh namui taapwehtam taan kaa itaachimaayich Chishemanituu aniyuuh Ukusiyuu.11Mwaauyuu maak e itaachimaat Chishemanituu Ukusisa, Chishemanituu chichii miikunuu kaachiche pimaatisiiwiniyuu, an maak kaachiche pimaatisiiwin anite Ukusisa e ihtaayich uhchipayuu.12An awen kaa ayaawaat Ukusiisimaau ayaau pimaatisiiwiniyuu. Ekw an awen ekaa kaa ayaawaat Chishemanituu Ukusiyuu namui ayaau pimaatisiiwiniyuu.13Chimasinahaamaatinaawaau chiyawaau kaa taapweyimekw Chishemanituu Ukusisa chechii chischeyihtamekw e ayaayekw kaachiche pimaatisiiwin.14Mwaau e ishi cheshtinaateyimuyihkw e ayimihiihkw Chishemanituu. Chiishpin chischeyihtamuhkwe kaye ihtuutamuhkwe utiteyihtamuwin chika ihtuutam taan e ishi nitutamuuhkw chechii ihtuutahk.15Chiishpin maak chischeyihtamuhke e pehtaatahkw Chishemanituu mikw taan e ishi nitutamuuhk chekwaayuu, chichischeyihtenaanuu kaye e ayaauhkw aniyuu e ishi nitutamuuhkw.16Awen waapamaate wiichishaan e machituutamiyich ekaa maak nipuwinihch ituhtahiikuyich aniyuu kaa ishi machituutamiyich, chipaa ayimiheshtamuweu, ekw maak che miikuyich Chishemanituuh pimaatisiiwiniyuu. Eukun che ispayiyich aniyuuh ekaa nipuwinihch kaa ituhtahiikuyich aniyuu kaa ishi wanituutamiyich. Mikw maak ihtakun machihtwaawin che ituhtahiikut awen nipuwinihch. Uyuu maak ishi machituutahke awen, ekush ekaa ayimiheshtamuu.17Misiwe wanituutamuwin, machihtwaawin an, mikw maak ihtakun machihtwaawin ekaa nipuwinihch ituhtahiiwech.18Chichischeyimaanuu awen e chii pimaachihiikut Chishemanituuh namui chipaa uhchi machituutam. Wesh Chishemanituu Ukusiyuu kanuweyimikuu, namui maak wiyesh chii ihtuutaakuu machimanituuh.19Chichischeyihtenaanuu Chishemanituu e utawaashiimituutaatahkw. Misiwe anichii utah aschiihch kaa ihtaatwaau tipeyimikuuch machimanituu.20Chichischeyihtenaanuu Chishemanituu Ukusisa e chii pechi takushiniyich utah aschiihch, chechii chiskutamaatahkw chechii chischeyimahkw aniyuu chihchiwe Chishemanituwiyich. Chiwiichewaanuu an taapwe Cheshemanituut e wiicheumahk Ukusisa Jesus Christ. Eukw uu taapwe Cheshemanituut, an kaa miiwet kaachiche pimaatisiiwiniyuu.21Awaashitikw, yaakwaamiikw ekaa chechii nuuchiishtuwekuch manituuhkaanich.
Canadian Bible Society